CNI Sport News

၂၀၂၄ ခုနှစ်၊ ဇွန်လ ၅

ဘာစီလိုနာအသင်းဥက္ကဋ္ဌ လာပေါ်တာက နည်းပြဟောင်း ဇာဗီဟာ အသင်းရဲ့ လူစာရင်းအပေါ် သံသယရှိတာတွေ ကို ထုတ်ဖော်ခဲ့တာကြောင့် သူ့ကို ထုတ်ပယ်ဖို့ ဆုံးဖြတ်ခဲ့တာလို့ ပြောခဲ့ပါတယ်။

လာပေါ်တာက “ဇာဗီဟာ အလုပ်ကို ကောင်းမွန်စွာ လုပ်နိုင်ခဲ့ပြီး အခက်အခဲဆုံးအချိန်မှာ အသင်းကို ကိုင်တွယ်ခဲ့ ကာ မနှစ်ကရာသီမှာ ဆုဖလားတွေ ရခဲ့ပေမယ့် ဒီနှစ်မှာတော့ အဆင်မပြေတဲ့ အရာတွေရှိခဲ့ပါတယ်။ သူ ဆုံးဖြတ်ချက် ပြန်ပြောင်းတဲ့အချိန်က အသင်းအပေါ် ယုံကြည်မှုရှိလားလို့ ကျနော်မေးခဲ့တဲ့ အချိန်မှာ ယုံကြည် တယ်လို့ သူပြောခဲ့ပါတယ်။ နောက်ပိုင်းမှာတော့ သူ့ဆီကနေ ပြောင်းလဲခဲ့တဲ့ မှတ်ချက်တွေ ထွက်ပေါ်ခဲ့ပါတယ်။ အဲဒါကြောင့် အခြေအနေတွေကို ပြန်စဉ်းစားဖို့ တွန်းအားပေးခဲ့ပြီး အသင်းအတွက် ပိုကောင်းမယ့်အရာကို လုပ်ခဲ့ရ တာ”လို့ ပြောပါတယ်။

ဇာဗီဟာ ၂၀၂၁ ခုနှစ်၊နိုဝင်ဘာလမှာ နည်းပြဟောင်း ရော်နယ်လ်ကိုးမန်းရဲ့ နေရာကို အစားထိုး ဝင်ရောက်ပြီး အသင်းဟောင်း ဘာစီလိုနာအသင်းကို နည်းပြအဖြစ် ကိုင်တွယ်ဖို့ ပြန်လည်ရောက်ရှိလာခဲ့တာ ဖြစ်ပါတယ်။ 

ဇာဗီဟာ ဘာစီလိုနာအသင်းကို ၂၀၂၂-၂၃ ရာသီက စပိန်လာလီဂါနဲ့ စူပါဖလားတို့ကို ရယူပေးနိုင်ခဲ့တာပါ။ 

 ဘာစီလိုနာအသင်း လေ့ကျင့်ခန်းဆင်းနေစဉ်

ဇာဗီဟာ ဒီရာသီမှာ အသင်းရဲ့ ရလဒ်ဆိုးတွေကြောင့် ရာသီအကုန်မှာ ထွက်ခွာမယ်လို့ ကြေညာခဲ့ပေမယ့် ဒီနောက်ပိုင်း အသင်းရဲ့ ရလဒ်တွေ ပြန်ကောင်းမွန်လာမှုကြောင့် လာပေါ်တာဟာ သူ့ကို အသင်းမှာ ဆက်ပြီးရှိစေဖို့ ကြိုးစားခဲ့တာ ဖြစ်ပါတယ်။ 

အဲဒါကြောင့် ဇာဗီဟာ သူ့ရဲ့ဆုံးဖြတ်ချက်ကို ပြန်ပြောင်းပြီး စာချုပ်ကုန်ဆုံးမယ့် လာမယ့်ရာသီအကုန်ထိ ဘာစီလိုနာအသင်းကို ကိုင်တွယ်မယ်လို့ ကြေညာခဲ့တာပါ။

ဒါပေမယ့် ဇာဗီဟာ အသင်းရဲ့ ဘဏ္ဍာရေး အခြေအနေတွေကို ပြောခဲ့တာကြောင့် လာပေါ်တာနဲ့ ဘာစီလိုနာ အသင်း ဘုတ်အဖွဲ့ဟာ သူ့ကို ဒေါသထွက်ပြီး ထုတ်ပယ်ဖို့ ဆုံးဖြတ်ခဲ့တာ ဖြစ်ပါတယ်။ 

ဘာစီလိုနာအသင်းဟာ အသင်းရဲ့ ဂန္ထဝင်တွေဖြစ်တဲ့ ဇာဗီ၊ ရော်နယ်လ်ကိုးမန်းနဲ့ မက်ဆီတို့ကို ပြုမူဆက်ဆံပုံတွေနဲ့ ပတ်သက်ပြီး ဝေဖန်မှုတွေ ခံခဲ့ရတာပါ။ 

ကတ်တလန်ကလပ်ဟာ ထုတ်ပယ်ခဲ့တဲ့ ဇာဗီရဲ့ နေရာမှာ ဘိုင်ယန်မြူးနစ်အသင်း နည်းပြဟောင်း ဟန်ဆီဖလစ်ကို နည်းပြသစ်အဖြစ် ခန့်အပ်ခဲ့ပါတယ်။

ဘာစီလိုနာအသင်းဥက္ကဋ္ဌ လာပေါ်တာက နည်းပြသစ် ဟန်ဆီဖလစ်ကတော့ လက်ရှိလူစာရင်းနဲ့ အသင်းအောင်မြင် မှု ရယူနိုင်တယ်လို့ ခံစားရကြောင်း ပြောခဲ့တာပါ။

ဘာစီလိုနာအသင်းဟာ ပြီးခဲ့တဲ့ရာသီက လာလီဂါပြိုင်ပွဲမှာ အဆင့် ၂ ၊ ချန်ပီယံလိဂ်ပြိုင်ပွဲမှာ ကွာတားဖိုင်နယ်က ထွက်ခွာခဲ့ရပြီး ဆုဖလားလက်မဲ့နဲ့ ရာသီအဆုံးသတ်ခဲ့ရတာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဇွန်လ ၄

ဖီနာဘာချီအသင်း နည်းပြသစ်ဖြစ်လာတဲ့ မော်ရင်ဟိုက အသင်းဟောင်း ရိုးမားအသင်းက ကစားသမားတွေကို ခေါ်ယူသွားမှာ မဟုတ်ဘူးလို့ ပြောလိုက်ပါတယ်။

မော်ရင်ဟိုက “ကျနော့်ရဲ့ ကစားသမားဟောင်းတွေ၊ အသင်းဟောင်းတွေအကြောင်း ပြောနေကြတာတွေ ရှိပါတယ်။ ကျနော့်ရဲ့ စကားတွေနဲ့ ၁၀၀ ရာခိုင်နှုန်းဖြစ်အောင် လုပ်ချင်ပါတယ်။ ကျနော်ဟာ ရိုးမားအသင်းမှာရှိတဲ့ ဘယ်ကစားသမားကိုမှ ခေါ်ယူဖို့ စိတ်ဝင်စားခြင်း မရှိပါဘူး။ လုံးဝကို စိတ်ဝင်စားမှု မရှိတာပါ”လို့ ဖီနာဘာချီ အသင်းနည်းပြအဖြစ် ပထမဆုံးအကြိမ်ပြုလုပ်တဲ့ သတင်းစာရှင်းလင်းပွဲမှာ ပြောခဲ့တာပါ။

မော်ရင်ဟိုဟာ ပြီးခဲ့တဲ့ရက်ပိုင်းက ဖီနာဘာချီအသင်း နည်းပြသစ်အဖြစ် ပရိသတ်ထောင်ပေါင်းများစွာအရှေ့မှာ မိတ်ဆက်မှု ခံယူခဲ့ပြီးဖြစ်ပါတယ်။ 

ပေါ်တူဂီလူမျိုးနည်းပြဟာ ဖီနာဘာချီအသင်း အောင်မြင်မှုတွေ ပြန်လည်ရရှိအောင် ကစားသမားသစ်တွေခေါ်ယူဖို့ ပြင်ဆင်နေတာပါ။

ဒီအချိန်မှာ မော်ရင်ဟိုဟာ ရိုးမားအသင်းရဲ့ ကစားသမားတွေဖြစ်တဲ့ လူကာကူနဲ့ ဒိုင်ဘားလားတို့ကို ဖီနာဘာချီ အသင်းအတွက် ခေါ်ယူဖို့ ပစ်မှတ်ထားနေတယ်လို့ သတင်းတွေ ထွက်ပေါ်လာခဲ့တာ ဖြစ်ပါတယ်။

 မော်ရင်ဟိုကို တွေ့ရစဉ်

မော်ရင်ဟိုဟာ ရိုးမားအသင်းကို ကိုင်တွယ်နေတဲ့အချိန်မှာ ဒီကစားသမား ၂ ဦးစလုံးကို ခေါ်ယူခဲ့တာပါ။

ဒါပေမယ့် မော်ရင်ဟိုက ရိုးမားအသင်းမှာရှိတဲ့ ကစားသမားတွေကို ဖီနာဘာချီအသင်းအတွက် ခေါ်ယူသွားမှာ မဟုတ်ဘူးလို့ ပြောခဲ့တာ ဖြစ်ပါတယ်။ 

မော်ရင်ဟိုဟာ လူကာကူနဲ့ ရိုးမားအသင်းအပြင် ယူနိုက်တက်၊ ချယ်လ်ဆီးအသင်းတွေမှာလည်း အတူလက်တွဲ ခဲ့တာပါ။ 

လူကာကူဟာ ရိုးမားအသင်းနဲ့ အငှားစာချုပ် ကုန်ဆုံးချိန်မှာ ချယ်လ်ဆီးအသင်းထံ ပြန်ရမှာဖြစ်ပြီး လန်ဒန်ကလပ် က သူ့ကို အပြီးသတ် ရောင်းချဖို့ ရှိနေပါတယ်။

မော်ရင်ဟိုဟာ ဖီနာဘာချီအသင်းကို ၁၀ နှစ်ကျော်ကြာ ဝေးကွာနေတဲ့ တူရကီစူပါလိဂ်ဖလား ရယူပေးဖို့ အဓိက ပစ်မှတ်အဖြစ် သတ်မှတ်ထားတယ်လို့ သတင်းစာ ရှင်းလင်းပွဲမှာ ပြောခဲ့တာပါ။ 

ဖီနာဘာချီအသင်းဟာ ပြီးခဲ့တဲ့ရာသီက တူရကီစူပါလိဂ်ပြိုင်ပွဲမှာ ချန်ပီယံ ဂါလာတာစာရေး အသင်းရဲ့နောက် အဆင့် ၂ နေရာမှာသာ ရပ်တည်နိုင်ခဲ့တာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဇွန်လ ၄

ပေါ်တူဂီအသင်းခေါင်းဆောင် ရော်နယ်ဒိုဟာ ယူနိုက်တက် အသင်းဖော်ဟောင်းဖြစ်ခဲ့တဲ့ ဂိုးသမား ဒီဂီယာကို ခေါ်ယူဖို့ အယ်လ်နာဆာအသင်းကို တိုက်တွန်းမှု ပြုလုပ်သွားခဲ့ပါတယ်။

အယ်လ်နာဆာအသင်း ဂိုးသမား အော့စပီနာဟာ ရာသီသစ်မတိုင်ခင် ထွက်ခွာဖို့ရှိနေတာကြောင့် ဆော်ဒီကလပ် ဟာ ဂိုးသမားအသစ်တစ်ဦး ရှာဖွေနေတာပါ။ 

ဒီအချိန်မှာ ရော်နယ်ဒိုက ဒီဂီယာကို ခေါ်ယူဖို့ အကြံပြုခဲ့တာကြောင့် အယ်လ်နာဆာအသင်း အကြီးအကဲတွေဟာ စပိန်ဂိုးသမားဟောင်းကို စိတ်ဝင်စားနေတယ်လို့ TBR Football က ဖော်ပြခဲ့ပါတယ်။ 

ဒီဂီယာဟာ ယူနိုက်တက်အသင်းက ထွက်ခွာပြီးနောက် ပြီးခဲ့တဲ့တစ်ရာသီလုံး အသင်းလက်မဲ့အဖြစ် ရှိနေခဲ့တာပါ။

ဒီဂီယာဟာ ပြီးခဲ့တဲ့ ရက်သတ္တပတ်တွေအတွင်းမှာ လေ့ကျင့်မှုတွေ ပြုလုပ်နေတဲ့ ရုပ်သံမှတ်တမ်းတွေကို သူ့ရဲ့ ဆိုရှယ်မီဒီယာပေါ်မှာ တင်ခဲ့ပြီး ကစားပွဲတွေထဲကို ပြန်လည်ဝင်ရောက်ချင်ကြောင်း ပြသခဲ့တာဖြစ်ပါတယ်။ 

ဒါပေမယ့် ဒီဂီယာဟာ ပြီးခဲ့တဲ့ရာသီက ဆော်ဒီကလပ်အသင်းတွေရဲ့ ကမ်းလှမ်းမှုကို စိတ်မဝင်စားခဲ့တာကြောင့် အယ်လ်နာဆာအသင်းကသာ ကမ်းလှမ်းမှုပြုလုပ်ရင် လက်ခံမလားဆိုတာ စဉ်းစားစရာအဖြစ် ရှိနေတာပါ။ 

ကတ်စမဲရိုးနဲ့ နာချိုကိုတွေ့ရစဉ်

ဒီဂီယာဟာ စပိန်ကလပ်အသင်းတွေမှာ ပြန်ပြီးကစားချင်နေပေမယ့် လာမယ့်ရာသီမှာ အသင်းသစ် ရရှိနိုင်ဖို့ဆိုရင် ဆုံးဖြတ်ချက်တစ်ခုကို အမြန်ဆုံးချမှတ်နိုင်ဖို့ လိုအပ်နေတာဖြစ်ပါတယ်။

ရော်နယ်ဒိုဟာ လာမယ့်ရာသီ အယ်လ်နာဆာအသင်းနဲ့အတူ အောင်မြင်မှု ရယူချင်နေတာကြောင့် ဒီဂီယာ အပါအဝင် အသင်းဖော်ဟောင်းအချို့ကို ခေါ်ယူနိုင်ဖို့ ကြိုးစားနေတာပါ။ 

ရော်နယ်ဒိုဟာ ရီးရယ်လ်နဲ့ ယူနိုက်တက်အသင်းမှာ အတူတွဲကစားခဲ့တဲ့ ကတ်စမဲရိုး၊ ရီးရယ်လ်အသင်းဖော်ဟောင်း နာချိုတို့ကို အယ်လ်နာဆာအသင်းထံ လာရောက်စေချင်နေတာ ဖြစ်ပါတယ်။ 

အယ်လ်နာဆာအသင်းဟာ ပြီးခဲ့တဲ့ရာသီက ဆော်ဒီပရိုလိဂ်၊ စူပါဖလားနဲ့ ဘုရင့်ဖလားတို့မှာ အယ်လ်ဟီလယ် အသင်းကို အရေးနိမ့်ခဲ့တာပါ။

အဲဒါကြောင့် ရော်နယ်ဒိုဟာ လာမယ့်ရာသီ အယ်လ်ဟီလယ်အသင်းနဲ့ ယှဉ်ပြိုင်နိုင်ဖို့အတွက် အယ်လ်နာဆာ အသင်း လူစာရင်းကို တောင့်တင်းအောင် လုပ်ဆောင်စေချင်နေတာ ဖြစ်ပါတယ်။

Source: Goal 

CNI Sport News

၂၀၂၄ ခုနှစ်၊ ဇွန်လ ၄

အင်္ဂလန်အသင်းဟာ ယူရို ၂၀၂၄ ပြိုင်ပွဲမတိုင်ခင် ခြေစမ်းပွဲအဖြစ် ဘော့စနီးယားအသင်းနဲ့ ကစားခဲ့တာမှာ ၃ ဂိုး- ဂိုး မရှိနဲ့ အနိုင်ရရှိခဲ့ပါတယ်။

ဒီပွဲမှာ အင်္ဂလန်အသင်းအတွက် ဂိုးတွေကို ကိုးလ်ပါလ်မာ၊ အာနိုးလ်နဲ့ ဟာရီကိန်းတို့က သွင်းယူခဲ့တာပါ။ 

အင်္ဂလန်အသင်းဟာ ဒီပွဲမှာ ဆာကာ၊ မက်ဂွဲယား၊ ဂျွန်စတုန်းစ်နဲ့ လုပ်ခ်ရှောတို့ကို ဒဏ်ရာတွေကြောင့် အသုံးမပြုခဲ့ သလို အသင်းခေါင်းဆောင် ဟာရီကိန်းကိုလည်း ဒုတိယပိုင်းရောက်မှ လူစားဝင် ကစားသမားအဖြစ် အသုံးပြုခဲ့တာ ဖြစ်ပါတယ်။ 

နည်းပြ ဆောက်ဂိတ်ဟာ လူငယ်ကစားသမားတွေဖြစ်တဲ့ အီဇီ၊ ကိုးလ်ပါလ်မာ၊ ဘရန်ဝိတ်နဲ့ ဝါတန်တို့ကို အသုံးပြု ခဲ့ပြီး သူတို့တွေဟာ အင်္ဂလန်အသင်းအတွက် ခြေစွမ်းပြသနိုင်ခဲ့တာပါ။

အင်္ဂလန်အတွက် ပထမဆုံး ဂိုးသွင်းယူနိုင်ခဲ့တဲ့ ကိုးလ်ပါလ်မာက “အလွန်ကောင်းမွန်တဲ့ ခံစားချက်ပါ။ ဟာရီကိန်း သာ ရှိနေရင် ပင်နယ်တီကို သူကန်သွင်းမှာ ဖြစ်ပေမယ့် သူမရှိတဲ့အတွက် ကျနော် ကန်သွင်းခဲ့ပါတယ်။ နိုင်ငံ အတွက် ပထမဆုံးဂိုး ရယူနိုင်ခဲ့တာကြောင့် ပျော်ရွှင်တယ်”လို့ Channel 4 ကို ပြောခဲ့တာ ဖြစ်ပါတယ်။

ဘော့စနီးယားနဲ့ အင်္ဂလန် ယှဉ်ပြိုင်နေစဉ်

အင်္ဂလန်အသင်းခေါင်းဆောင် ဟာရီကိန်းဟာ နောက်ကျောဒဏ်ရာကြောင့် ပြီးခဲ့တဲ့ မေလ ၈ ရက်ကတည်းက ဘိုင်ယန်မြူးနစ်အသင်းအတွက် ပါဝင် မကစားနိုင်ခဲ့တဲ့အတွက် ယူရိုပြိုင်ပွဲမတိုင်ခင် သူ့ရဲ့ကြံ့ခိုင်မှုကို စိုးရိမ်မှုတွေ ရှိခဲ့တာပါ။ 

ဒါပေမယ့် ဟာရီကိန်းဟာ ဘော့စနီးယားအသင်းနဲ့ပွဲမှာ လူစားဝင် ကစားသမားအဖြစ် ပါဝင်ခဲ့ပြီး အင်္ဂလန်အသင်း အတွက် ဂိုးသွင်းယူနိုင်ခဲ့တာ ဖြစ်ပါတယ်။

ဟာရီကိန်းက “ကောင်းမွန်တယ်လို့ ခံစားရပါတယ်။ ရာသီကုန်ချိန်မှာ ကောင်းမွန်စွာ အနားယူခဲ့ရတာက အခွင့်အရေး ကောင်းပါပဲ။ အခု ကျနော်အဆင်ပြေနေသလို ကစားချိန်မိနစ်တွေလည်း ရရှိခဲ့ပါတယ်”လို့ ပြောခဲ့တာပါ။

အင်္ဂလန်အသင်းဟာ ဇွန်လ ၇ ရက်မှာ အိုက်စလန်အသင်းနဲ့ ခြေစမ်းပွဲ ယှဉ်ပြိုင်ကစားပြီးရင် ယူရို ၂၀၂၄ ပြိုင်ပွဲ အတွက် အပြီးသတ် လူစာရင်းထုတ်ပြန်ကာ ဂျာမနီနိုင်ငံကို ထွက်ခွာမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၄

ရီးရယ်လ်အသင်းဟာ ဘတ်ပီကို အလွတ်ပြောင်းရွှေ့ကြေးနဲ့ ခေါ်ယူနိုင်ကြောင်း ကြေညာခဲ့ပြီးနောက် ဘတ်ပီက သူ့ရဲ့အိပ်မက်တွေ အမှန်တကယ် ဖြစ်လာခဲ့ပြီလို့ ပြောခဲ့ပါတယ်။

ဘတ်ပီက “အိပ်မက်တွေ အမှန်တကယ် ဖြစ်လာခဲ့ပါပြီ။ ကျနော့်ရဲ့ အိပ်မက်ကလပ်အသင်းကို ပြောင်းရွှေ့ခွင့်ရတဲ့ အတွက် အလွန်ပျော်ရွှင်ပြီး ဂုဏ်ယူမိပါတယ်။ အခုအချိန်မှာ ကျနော်ဘယ်လောက်အထိ စိတ်လှုပ်ရှားနေလဲ ဆိုတာကို ဘယ်သူကမှ နားလည်နိုင်မှာ မဟုတ်ပါဘူး။ မက်ဒရစ် ပရိသတ်တွေကို တွေ့ဖို့ မစောင့်ဆိုင်းနိုင်တော့ သလို ခင်ဗျားတို့ရဲ့ မယုံနိုင်စရာ အားပေးမှုတွေအတွက် ကျေးဇူးတင်တယ်”လို့ ရီးရယ်လ်အသင်းကို ငယ်ဘဝ ကတည်းက အားပေးခဲ့တဲ့ပုံတွေနဲ့ သူ့ရဲ့ ဆိုရှယ်မီဒီယာမှာ ရေးသားခဲ့တာပါ။

အသက် ၂၅ နှစ်အရွယ်ရှိ ဘတ်ပီဟာ ပီအက်စ်ဂျီအသင်းနဲ့ စာချုပ်ကုန်ဆုံးမယ့် ဇွန်လ ၃၀ ရက်မှာ ရီးရယ်လ်အသင်း ထံ တရားဝင် ပြောင်းရွှေ့မှာဖြစ်ပြီး အသင်းနဲ့ ၅ နှစ် စာချုပ်ချုပ်ဆိုဖို့ သဘောတူညီမှုရရှိခဲ့တာ ဖြစ်ပါတယ်။ 

ဘတ်ပီဟာ ရီးရယ်လ်အသင်းမှာ တစ်ရာသီ ယူရို ၁၅ သန်းအပြင် လက်မှတ်ထိုးကြေးအတွက် အပိုဆုကြေး ယူရိုသန်း ၁၅၀ ကို ၅ နှစ်အတွင်း ရရှိမှာလည်း ဖြစ်တာပါ။ 

ဘတ်ပီကို တွေ့ရစဉ်

ရီးရယ်လ်အသင်းဟာ ယူရိုပြိုင်ပွဲအပြီးမှသာ ဘတ်ပီကို ကစားသမားသစ်အဖြစ် တရားဝင် မိတ်ဆက်သွားဖို့ ရှိနေတာ ဖြစ်ပါတယ်။

ဘတ်ပီဟာ ရီးရယ်လ်အသင်းမှာ ဗီနီစီးယက်စ်၊ ရိုဒရီဂို၊ ဘယ်လင်ဂမ်၊ အသစ်ရောက်ရှိလာမယ့် အန်းဒရစ်တို့နဲ့အတူ အသင်းရဲ့တိုက်စစ်ကို ပိုမိုကောင်းမွန်အောင် အတူတွဲလုပ်ဆောင်ရတော့မှာပါ။ 

ဘတ်ပီရဲ့ ရီးရယ်လ် အပြောင်းအရွှေ့အပေါ် သူ့ရဲ့ဟီးရိုးဖြစ်တဲ့ ရော်နယ်ဒိုက ဘတ်ပီကို စောင့်ကြည့်ဖို့ သူ့အလှည့် ရောက်ရှိလာခဲ့ပြီလို့ မှတ်ချက်ပေးခဲ့ပါတယ်။

ဘတ်ပီဟာ ရီးရယ်လ်အသင်းထံ ပြောင်းရွှေ့ဖို့ အကြိမ်ကြိမ် နီးစပ်ခဲ့ပေမယ့် အခုမှ အပြောင်းအရွှေ့ ဖြစ်ခဲ့တာပါ။

ဘတ်ပီဟာ လက်ရှိအချိန်မှာ ယူရို ၂၀၂၄ ပြိုင်ပွဲအတွက် ပြင်သစ်အသင်းနဲ့ စခန်းသွင်းလေ့ကျင့်မှုတွေ ပြုလုပ်နေပြီး ပြင်သစ်အိုလံပစ်ပြိုင်ပွဲအတွက် ပဏာမလူစာရင်းမှာတော့ ပါဝင်ခဲ့ခြင်းမရှိတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၃

အာဂျင်တီးနားအသင်းနည်းပြ စကာလိုနီက အာဂျင်တီးနားဘောလုံးအဖွဲ့ချုပ်(AFA)က သူ့ကို အလိုရှိတဲ့အထိ ဆက်ပြီး တာဝန်ယူသွားမယ်လို့ ပြောလိုက်ပါတယ်။

စကာလိုနီက “ကျနော့်အတွက် ကောင်းမွန်တဲ့နှစ် မဟုတ်ခဲ့လို့ ဘောလုံးကို ရပ်တန့်ဖို့ အချိန်တန်ပြီလို့ ခံစားခဲ့ရ ပါတယ်။ အခုအချိန်မှာတော့ ပြီးခဲ့တဲ့ နိုဝင်ဘာလကလို မဟုတ်တော့ဘဲ ခွန်အားတွေ အပြည့်နဲ့ ဒီကိုရောက်ရှိနေ တာပါ။ အာဂျင်တီးနားဘောလုံးအဖွဲ့ချုပ်ဥက္ကဋ္ဌက ကျနော့်ကို ဒီမှာဆက်ရှိဖို့ အလိုရှိတဲ့အထိ ဆက်ရှိသွားမှာပါ”လို့ ပြောခဲ့တာပါ။

အသက် ၄၆ နှစ်အရွယ်ရှိ စကာလိုနီဟာ အာဂျင်တီးနားအသင်းက ဘရာဇီးလ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ၂၀၂၆ ကမ္ဘာ့ဖလားခြေစစ်ပွဲအပြီးမှာ နည်းပြရာထူးက နုတ်ထွက်ဖို့ စဉ်းစားနေတယ်လို့ ပြောခဲ့တာ ဖြစ်ပါတယ်။ 

ဒါပေမယ့် အာဂျင်တီးနားဘောလုံးအဖွဲ့ချုပ်ဟာ ကိုပါအမေရိကဖလား ပြိုင်ပွဲပြီးဆုံးတဲ့ အချိန်ထိ နိုင်ငံအသင်းကို ဆက်ပြီး ကိုင်တွယ်ပေးဖို့ နည်းပြ စကာလိုနီနဲ့ သဘောတူညီမှု ရရှိခဲ့တယ်လို့ ဒေသတွင်းမီဒီယာတွေက ဖော်ပြခဲ့ တာပါ။

 စကာလိုနီကို တွေ့ရစဉ်

အခုအချိန်မှာတော့ စကာလိုနီဟာ ကိုပါအမေရိကပြိုင်ပွဲ အပြီးမှာလည်း အာဂျင်တီးနားအသင်းကို ဆက်ပြီး တာဝန်ယူချင်တယ်လို့ သတင်းထောက်တွေနဲ့ တွေ့ဆုံချိန်မှာ ပြောခဲ့တာဖြစ်ပါတယ်။ 

အာဂျင်တီးနားအသင်းဟာ ကိုပါအမေရိကဖလား ပြိုင်ပွဲမတိုင်ခင် ကစားသမား ၂၉ ဦးနဲ့ လေ့ကျင့်မှုတွေ စတင် နေပြီး အသင်းခေါင်းဆောင် မက်ဆီဟာ ကြံ့ခိုင်မှုပိုင်း ပြဿနာရှိနေပေမယ့် အသင်းရဲ့ လေ့ကျင့်ခန်း အစီအစဉ်မှာ ပူးပေါင်းမယ်လို့ နည်းပြ စကာလိုနီက အတည်ပြုခဲ့တာပါ။

အာဂျင်တီးနားအသင်းဟာ ကိုပါအမေရိကဖလား ပြိုင်ပွဲမတိုင်ခင် ဇွန်လ ၉ ရက်မှာ အီကွေဒေါ၊ ၁၄ ရက်မှာ ဂွါတီမာလာ အသင်းတို့နဲ့ ခြေစမ်းပွဲ ယှဉ်ပြိုင်သွားမှာဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇွန်လ ၃

အင်္ဂလန်တောင်ပံကစားသမား ဆန်ချိုဟာ နည်းပြ အဲရစ်တန်ဟတ် ယူနိုက်တက်အသင်းက ထွက်ခွာရင် အသင်းထံ ပြန်လာဖွယ်ရှိတယ်လို့ ဗြိတိန်မီဒီယာတွေက ဖော်ပြထားပါတယ်။

ဆန်ချိုဟာ ယူနိုက်တက်အသင်းမှာ နည်းပြ အဲရစ်တန်ဟတ်နဲ့ အဆင်မပြေဖြစ်ခဲ့တာကြောင့် ပြီးခဲ့တဲ့ ဇန်နဝါရီက အသင်းဟောင်း ဒေါ့မွန်အသင်းထံ အငှားနဲ့ ပြောင်းရွှေ့ခဲ့တာပါ။ 

ဆန်ချိုဟာ ဒေါ့မွန်အသင်းမှာ သူ့ရဲ့အကောင်းဆုံး ပုံစံတွေပြန်လည် ရှာဖွေနိုင်ခဲ့ကာ အသင်းကို ချန်ပီယံလိဂ် ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့တာ ဖြစ်ပါတယ်။

ဒေါ့မွန်အသင်းဟာ ဆန်ချိုကို အပြီးသတ် ဝယ်ယူချင်နေပေမယ့် ယူနိုက်တက်အသင်း သတ်မှတ်ထားတဲ့ ပြောင်းရွှေ့ကြေး ပေါင်သန်း ၅၀ ကျော်ကို ပေးချေနိုင်ခြင်း မရှိတာပါ။

အဲဒါကြောင့် ဆန်ချိုဟာ ယူနိုက်တက်အသင်းမှာ ပြန်ကစားဖို့ မျှော်လင့်ချက်ရှိနေဆဲလို့ The Mirror က ဖော်ပြ ထားပါတယ်။

ဒါပေမယ့် ဆန်ချိုဟာ နည်းပြ အဲရစ်တန်ဟတ် ထွက်ခွာမှသာ ယူနိုက်တက်အသင်းမှာ ကစားချင်နေတာကြောင့် သူ့ရဲ့ မန်ချက်စတာကလပ် အနာဂတ်ဟာ ဒတ်ချ်လူမျိုးနည်းပြ ဆက်ရှိ/မရှိ အပေါ်မူတည်နေတာပါ။ 

ဆန်ချိုနဲ့ အဲရစ်တန်ဟတ်ကို တွေ့ရစဉ်

အဲရစ်တန်ဟတ်ဟာ FA ဖလား ဗိုလ်လုပွဲအပြီးမှာ ယူနိုက်တက်အသင်း နည်းပြရာထူးက ထုတ်ပယ်ခံရမယ်လို့ သတင်းတွေ ထွက်ခဲ့ပေမယ့် အခုအချိန်ထိတော့ အသင်းဟာ သူ့ကိုထုတ်ပယ်ဖို့နဲ့ ပတ်သက်ပြီး တုန့်ပြန်မှု မရှိသေးပါဘူး။

ယူနိုက်တက်အသင်း နည်းပြရာထူးအတွက် ဘိုင်ယန်မြူးနစ်အသင်း နည်းပြဟောင်း တူချယ်လ်၊ ချယ်လ်ဆီး အသင်းနည်းပြဟောင်း ပိုချက်တီနို၊ ဘရန်ဖို့ဒ်အသင်းနည်းပြ သောမက်စ်ဖရန့်ခ်နဲ့ ဘရိုက်တန်အသင်း နည်းပြဟောင်း ဒီဇာဘီတို့ ချိတ်ဆက်မှု ခံနေရတာပါ။ 

အဲရစ်တန်ဟတ်ဟာ ဆန်ချိုဆီကနေ တောင်းပန်တာကို လိုချင်ပေမယ့် ကစားသမားကတော့ သူ့ဘက်က ဘာအမှားအယွင်းမှ လုပ်ဆောင်ထားတာ မရှိဘူးဆိုပြီး တောင်းပန်ဖို့ ငြင်းဆန်ခဲ့ပါတယ်။

ဆန်ချိုဟာ ဒေါ့မွန်အသင်းထံ အငှားကစားခဲ့တဲ့ကာလအတွင်းမှာ ၂၁ ပွဲကစားခဲ့ပြီး ၃ ဂိုးသွင်းယူကာ ၃ ဂိုး ဖန်တီးနိုင်ခဲ့တာ ဖြစ်ပါတယ်။

Source: Dailymail

CNI Sport News

၂၀၂၄ ခုနှစ်၊ ဇွန်လ ၃

ရီးရယ်လ်အသင်းဟာ စံချိန်တင် ၁၅ ကြိမ်မြောက်ရယူနိုင်ခဲ့တဲ့ ချန်ပီယံလိဂ်ဆုဖလားနဲ့ မက်ဒရစ်မြို့ရဲ့ လမ်းမ ပေါ်တွေမှာ အမိုးဖွင့်ဘတ်စ်ကားနဲ့ လှည့်လှည်အောင်ပွဲခံမှုတွေ ပြုလုပ်သွားခဲ့ပါတယ်။

ရီးရယ်လ်အသင်းဟာ ဝင်ဘာလေကွင်းမှာကစားခဲ့တဲ့ ချန်ပီယံလိဂ်ဗိုလ်လုပွဲမှာ ဒေါ့မွန်အသင်းကို ၂ ဂိုး- ဂိုးမရှိနဲ့ အနိုင်ရရှိပြီး ဆုဖလားကို ရယူနိုင်ခဲ့တာပါ။ 

ရီးရယ်လ်အသင်းဟာ ဒီရာသီမှာ ချန်ပီယံလိဂ်၊ လာလီဂါနဲ့ စပိန်စူပါ ဖလားတို့ကို ရယူနိုင်ခဲ့ပြီး အောင်မြင်တဲ့ရာသီတစ်ခုအဖြစ် အဆုံးသတ်နိုင်ခဲ့ပါတယ်။ 

ရီးရယ်လ်အသင်းဟာ စံချိန်တင်ရယူနိုင်ခဲ့တဲ့ ချန်ပီယံလိဂ်ဆုဖလားနဲ့ မက်ဒရစ်မြို့အတွင်း လှည့်လှည်အောင်ပွဲခံခဲ့တာမှာ ပရိသတ် ထောင်ပေါင်းများစွာဟာ အသင်းကို ဂုဏ်ပြုကြိုဆိုမှုတွေ ပြုလုပ်ခဲ့ကြပါတယ်။

တိုနီကရူးစ်က “ကျနော်တို့ လာလီဂါဆုဖလားနဲ့ အောင်ပွဲခံခဲ့တဲ့ လွန်ခဲ့တဲ့ ၃ ပတ်က ဒီကိုပြန်လာမယ်ဆိုပြီး ခင်ဗျား တို့ကို ကတိပေးခဲ့ပါတယ်။ ဒီနေ့မှာတော့ ကျနော်တို့ ၁၅ ကြိမ်မြောက် ဥရောပဖလားနဲ့ အောင်ပွဲခံနိုင်ခဲ့ပါပြီ။ မမေ့ နိုင်တဲ့ ၁၀ နှစ်တာအတွက် အားလုံးကိုကျေးဇူးတင်ပါတယ်။ ကျနော့်မှာ ပြောစရာစကားမရှိတော့ဘူး”လို့ ပရိသတ် တွေကို ပြောခဲ့တာပါ။

တိုနီကရူးစ်ဟာ ချန်ပီယံလိဂ်ဗိုလ်လုပွဲမှာ ရီးရယ်လ်အသင်းအတွက် နောက်ဆုံးပွဲစဉ်နဲ့ ကလပ်ကစားသမားဘ၀ နောက်ဆုံးပွဲစဉ်အဖြစ် ပါဝင်ကစားသွားခဲ့တာဖြစ်ပါတယ်။ 

ရီးရယ်လ်အသင်းဟာ ပြီးခဲ့တဲ့ ၂၀၂၃-၂၄ ရာသီမှာ ရှုံးပွဲ ၂ ပွဲသာကြုံတွေ့ခဲ့ပြီး ၂ ပွဲစလုံးဟာ မြို့ခံပြိုင်ဘက် အသလက်တီကိုအသင်းကို အရေးနိမ့်ခဲ့တာပါ။ 

ချန်ပီယံလိဂ် ဗိုလ်လုပွဲမှာ ရီးရယ်လ်အသင်းအတွက် ဒုတိယဂိုးသွင်းယူပေးခဲ့တဲ့ ဗီနီစီးယက်စ်ဟာ ပြီးခဲ့တဲ့ရာသီမှာ အသင်း အတွက် ၂၄ ဂိုးသွင်းယူခဲ့ပြီး ဂိုးသွင်းအများဆုံးကစားသမားအဖြစ် ရပ်တည်ခဲ့ပါတယ်။

ဗီနီစီးယက်စ်က “ဒီကိုပြန်လာရတာကို အလွန်ပျော်ရွှင်ပြီး ပရိသတ်တွေနဲ့အတူ ရှိနေရတာက အရေးကြီးပါတယ်။ ကျနော်တို့ဟာ တိုနီကရူးစ်၊နာချို၊မိုဒရစ်နဲ့ ကာဗာဂျဲလ်တို့ဆီကနေ အများကြီးသင်ယူခဲ့ပါတယ်။ ကျနော်တို့ လူငယ် တွေဟာ ဒီထက်ပိုပြီးအနိုင်ယူချင်ကြပါတယ်”လို့ ပြောခဲ့တာပါ။

ရီးရယ်လ်အသင်းရဲ့ ကစားသမားအများစုဟာ မကြာခင်ရက်ပိုင်းအတွင်းမှာ နိုင်ငံပွဲစဉ်တွေယှဉ်ပြိုင်ကစားဖို့ သူတို့  ရဲ့ နိုင်ငံအသင်းတွေထံ သွားရောက်ပူးပေါင်းပြီး လေ့ကျင့်ပြင်ဆင်မှုတွေပြုလုပ်ရတော့မှာ ဖြစ်ပါတယ်။ 

Source:ESPN

CNI Sport News

၂၀၂၄ ခုနှစ်၊ ဇွန်လ ၃

တူရကီကလပ် ဖီနာဘာချီအသင်းဟာ ပေါ်တူဂီလူမျိုးနည်းပြ မော်ရင်ဟိုကို နည်းပြသစ်အဖြစ်ခန့်အပ်ကြောင်း မိတ်ဆက်မှုပြုလုပ်သွားခဲ့ပါတယ်။

ဖီနာဘာချီအသင်းအိမ်ကွင်းမှာ ပြုလုပ်ခဲ့တဲ့ ဒီပွဲမှာ ပရိသတ်ထောင်ပေါင်းများစွာတက်ရောက်ခဲ့ကြပြီး နည်းပြသစ် မော်ရင်ဟိုကို ကြိုဆိုမှုတွေပြုလုပ်ခဲ့ကြတာပါ။ 

မော်ရင်ဟိုဟာ ဖီနာဘာချီအသင်းပရိသတ်တွေနဲ့ ပွေ့ဖက် နှုတ်ဆက်ခဲ့ပြီး ဓါတ်ပုံရိုက်ကူးမှုတွေလည်း ပြုလုပ်ခဲ့ပါတယ်။ ပေါ်တူဂီလူမျိုးနည်းပြဟာ ပြီးခဲ့တဲ့ ဇန်နဝါရီက ရိုးမားအသင်းကနေ ထုတ်ပယ်ခံရပြီးနောက် ဖီနာဘာချီအသင်းနဲ့အတူ နည်းပြလောကထဲကို ပြန်လည်ဝင်ရောက် လာခဲ့တာပါ။

မော်ရင်ဟိုက “ပုံမှန်ဆိုရင် အောင်ပွဲတွေရရှိပြီးမှသာ နည်းပြတစ်ဦးကို ချစ်ခင်နှစ်သက်မှုတွေရှိပေမယ့် ဒီမှာတော့ အောင်ပွဲတွေမရခင်မှာတင် ချစ်ခြင်းမေတ္တာတွေကို ကျနော်ခံစားနေရပါတယ်။ အဲဒါကြောင့် ကျနော်ဟာ ကြီးမား တဲ့ တာဝန်တစ်ခုရှိသွားပြီလို့ ခံစားရပြီး ဖီနာဘာချီအသင်းအင်္ကျီက ကျနော့်ရဲ့အရေပြားပဲဆိုတာ ခင်ဗျားတို့ကို ကတိပေးပါတယ်။ ခင်ဗျားတို့ရဲ့ အိပ်မက်တွေဟာ ကျနော့်ရဲ့အိပ်မက်တွေပါပဲ” လို့ ဖီနာဘာချီ အသင်းဂျာစီကို ဝှေ့ယမ်းပြီး ပရိသတ်တွေကို ပြောခဲ့ပါတယ်။

မော်ရင်ဟိုဟာ ထွက်ခွာသွားခဲ့တဲ့ အစ္စမေးလ်ကာတဲလ်ရဲ့နေရာမှာ ဖီနာဘာချီအသင်းနည်းပြသစ်အဖြစ် ၂ နှစ် စာချုပ်ချုပ်ဆိုခဲ့တာပါ။ 

ဖီနာဘာချီအသင်းဟာ ပြီးခဲ့တဲ့ရာသီက တူရကီလိဂ်ပြိုင်ပွဲမှာ ရမှတ် ၉၉ မှတ်အထိ ရယူနိုင်ခဲ့ပေမယ့် ဂါလာတာစာရေးအသင်းရဲ့နောက် ၃ မှတ်အကွာနဲ့ အဆင့် ၂ နေရာမှာ ရပ်တည်နိုင်ခဲ့တာ ဖြစ်ပါတယ်။ 

ဖီနာဘာချီအသင်းဥက္ကဋ္ဌ အလီကော့က မော်ရင်ဟိုဟာ တခြားအသင်းတွေမှာ အောင်မြင်မှု တွေရယူနိုင်ခဲ့သလို သူတို့ကိုလည်း အောင်မြင်မှုတွေရယူပေးနိုင်မှာ သေချာတယ်လို့ ပြောခဲ့တာပါ။

ဖီနာဘာချီအသင်းဟာ တူရကီလိဂ်ပြိုင်ပွဲမှာ ၂၀၁၃-၁၄ ရာသီနောက်ပိုင်း ဆုဖလားအောင်မြင်မှုနဲ့ ဝေးကွာ ခဲ့တာကြောင့် မော်ရင်ဟိုဟာ အသင်းကို ချန်ပီယံဆုဖလား ပြန်လည်ရရှိနိုင်အောင် ကိုင်တွယ်ပေးရတော့မှာ ဖြစ်ပါတယ်။

Source:DailyMail