- By CNI
- Category: အားကစား
- Hits: 1516
CNI Sport News
၂၀၂၄ ခုနှစ်၊ မေလ ၂၈
အယ်လ်နာဆာအသင်းက အယ်လ်အစ်တီဟတ်အသင်းကို အနိုင်ရခဲ့တဲ့ ရာသီနောက်ဆုံးပွဲစဉ်မှာ ဂိုးသွင်းယူနိုင်ခဲ့တဲ့ အသင်းခေါင်းဆောင် ရော်နယ်ဒိုဟာ ဆော်ဒီပရိုလိဂ်ပြိုင်ပွဲမှာ ဂိုးသွင်းစံချိန်သစ် တင်နိုင်ခဲ့ပါတယ်။
ရော်နယ်ဒိုဟာ အယ်လ်နာဆာအသင်းက အယ်လ်အစ်တီဟတ်အသင်းကို ၄ ဂိုး-၂ ဂိုးနဲ့ အနိုင်ရတဲ့ပွဲမှာ ၂ ဂိုး သွင်းယူနိုင်ခဲ့တာကြောင့် ဒီရာသီ ဆော်ဒီပရိုလိဂ်သွင်းဂိုး ၃၅ ဂိုးအထိ ရှိခဲ့တာပါ။
အဲဒါကြောင့် ရော်နယ်ဒိုဟာ မော်ရိုကိုတိုက်စစ်မှူး ဟမ်ဒယ်လာရဲ့ ဆော်ဒီပရိုလိဂ် တစ်ရာသီ ဂိုးသွင်းအများဆုံး စံချိန်ကို ချိုးဖျက်ပြီး စံချိန်သစ်တင်နိုင်ခဲ့တာ ဖြစ်ပါတယ်။
အယ်လ်နာဆာအသင်း တိုက်စစ်မှူးဟောင်း ဟမ်ဒယ်လာဟာ ၂၀၁၈-၁၉ ရာသီက ၃၄ ဂိုးသွင်းပြီး ဆော်ဒီပရိုလိဂ် ပြိုင်ပွဲမှာ စံချိန်တင်ထားတာပါ။
ရော်နယ်ဒိုဟာ ဟမ်ဒယ်လာရဲ့ စံချိန်ကို ၁ ဂိုးအသာနဲ့ ကျော်ဖြတ်နိုင်ခဲ့သလို ဒီရာသီ အမှတ်ပေးလိဂ်မှာ ၁၁ ဂိုး ဖန်တီးမှုလည်း ပြုလုပ်နိုင်ခဲ့ပါတယ်။
ရော်နယ်ဒိုကို တွေ့ရစဉ်
ယူနိုက်တက်အသင်းက ထွက်ခွာပြီး ၂၀၂၃ ခုနှစ်၊ ဇန်နဝါရီလက အယ်လ်နာဆာအသင်းထံ ပြောင်းရွှေ့လာခဲ့တဲ့ ရော်နယ်ဒိုဟာ ဆော်ဒီကလပ်အသင်းအတွက် ၆၉ ပွဲ ပါဝင်ကစားပြီး ၆၄ ဂိုး သွင်းယူထားတာပါ။
ရော်နယ်ဒိုဟာ ဒီရာသီ ဆော်ဒီပရိုလိဂ်ပြိုင်ပွဲမှာ ဂိုးသွင်း အများဆုံး ကစားသမားဖြစ်ခဲ့တာကြောင့် မတူညီတဲ့ နိုင်ငံ ၄ ခုက လိဂ်တွေမှာ ရွှေဖိနပ်ဆုရယူနိုင်တဲ့ ပထမဆုံးကစားသမားလည်း ဖြစ်လာခဲ့ပါတယ်။
အယ်လ်နာဆာအသင်းဟာ ရာသီနောက်ဆုံးပွဲစဉ်မှာ အနိုင်ရခဲ့ပေမယ့် အမှတ်ပေးဇယားအဆင့် ၁ နေရာက အယ်လ်ဟီလယ်အသင်းနဲ့ ၁၄ မှတ်အကွာ အဆင့် ၂ နေရာနဲ့ ရာသီအဆုံးသတ်ခဲ့တာပါ။
အယ်လ်ဟီလယ်အသင်းကတော့ ဒီရာသီ ဆော်ဒီပရိုလိဂ်ပြိုင်ပွဲမှာ ရှုံးပွဲမရှိ ချန်ပီယံဆုကို ရယူနိုင်ခဲ့ပါတယ်။
အယ်လ်နာဆာအသင်းနဲ့ အယ်လ်ဟီလယ်အသင်းတို့ဟာ ရာသီပိတ် နောက်ဆုံးပွဲစဉ်အဖြစ် ဘုရင့်ဖလား ဗိုလ်လုပွဲ ယှဉ်ပြိုင်ဖို့ ရှိနေပြီး ဒီပွဲစဉ်ကို မေလ ၃၁ ရက်မှာ ကျင်းပသွားဖို့ စီစဉ်ထားတာ ဖြစ်ပါတယ်။
Source: BBC
- By CNI
- Category: အားကစား
- Hits: 856
CNI Sport News
၂၀၂၄ ခုနှစ်၊ မေလ ၂၇
မော်ရိုကိုကွင်းလယ်လူ အမ်ရာဘတ်ဟာ ယူနိုက်တက်အသင်းမှာ ဆက်ပြီးရှိချင်တာကြောင့် လာမယ့် ရက်သတ္တပတ်အတွင်းမှာ အနာဂတ်နဲ့ပတ်သက်ပြီး ကလပ်အသင်းနဲ့ စကားပြောသွားမယ်လို့ ပြောခဲ့ပါတယ်။
အမ်ရာဘတ်က “ကျနော်တို့ စကားပြောဆိုမှုတွေပြုလုပ်ရမှာဖြစ်ပြီး ဒီမှာဆက်ရှိဖို့က သေချာပေါက် ရွေးချယ်စရာ တစ်ခုပါ။ ကျနော်တို့အတွက် အလွန်ခက်ခဲတဲ့ ရာသီဖြစ်ခဲ့တယ်လို့ ထင်ပါတယ်။ ယူနိုက်တက်ဟာ ကမ္ဘာပေါ်မှာ အကြီးမားဆုံးကလပ်အသင်းဖြစ်လို့ ဒီအသင်းအတွက် ဘယ်သူက မကစားပေးချင်မှာလဲ။ ကျနော်တို့ စကား ပြောဆိုမှုတွေပြုလုပ်သွားပြီး ဘာတွေဖြစ်လာမလဲဆိုတာ ကြည့်ရမယ်”လို့ Ziggo Sport နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ဖီအိုရင်တီးနားအသင်းကနေ အငှားနဲ့ လာရောက်ကစားနေတဲ့ အမ်ရာဘတ်ဟာ ကွင်းလယ်ခံစစ် ကစားသမား ဖြစ်ပေမယ့် ယူနိုက်တက်အသင်းရဲ့ ဒဏ်ရာအခက်အခဲတွေကြောင့် ဘယ်နောက်ခံလူအဖြစ် ပွဲအချို့ကစားခဲ့ရပြီး ခြေစွမ်းပြသနိုင်ဖို့ ခက်ခဲခဲ့တာဖြစ်ပါတယ်။
ဒါပေမယ့် အမ်ရာဘတ်ဟာ ပြီးခဲ့တဲ့ ပရီးမီးယားလိဂ် နောက်ဆုံး ပွဲစဉ်တွေအပြင် FA ဖလားဗိုလ်လုပွဲမှာ သူကစားနေကျနေရာ ကစားခဲ့ရပြီး အသင်းအတွက် အကောင်းဆုံး ခြေစွမ်းပြသနိုင်ခဲ့တာပါ။
အဲဒါကြောင့် အမ်ရာဘတ်ဟာ အသင်းရဲ့ဂန္ထဝင်ကွင်းလယ်လူ ပေါလ်စခိုးလ်အပါအဝင် အများအပြားရဲ့ ချီးကျူးမှု တွေကို ရရှိခဲ့တာဖြစ်ပါတယ်။
ယူနိုက်တက်အသင်းဟာ အမ်ရာဘတ်နဲ့ ချုပ်ဆိုထားတဲ့ စာချုပ်ထဲမှာ အငှားစာချုပ် ကုန်ဆုံးမယ့် နွေရာသီမှာ ပေါင် ၂၁ သန်းနဲ့ ဖီအိုရင်တီးနားအသင်းကနေ အပြီးသတ်ဝယ်ယူခွင့်ရှိနေတာပါ။
မန်ချက် စတာကလပ်ဟာ အပြီးသတ်ဝယ်ယူဖွယ်မရှိဘူးလို့ သတင်းတွေထွက်နေပေမယ့် အမ်ရာဘတ်ကတော့ အသင်းမှာ ဆက်ပြီး ရှိချင်တယ်လို့ ပြောခဲ့ပါတယ်။
အမ်ရာဘတ်ဟာ ဒီရာသီမှာ ယူနိုက်တက်အသင်းအတွက် ပွဲပေါင်း ၃၀ ပါဝင်ကစားခဲ့ပြီး FA ဖလားပြိုင်ပွဲမှာ ချန်ပီယံဆုကို ရယူနိုင်ခဲ့တာဖြစ်ပါတယ်။
Source:Metro
- By CNI
- Category: အားကစား
- Hits: 1186
CNI Sport News
၂၀၂၄ ခုနှစ်၊ မေလ ၂၇
ချန်ပီယံရှစ် ပလေးအော့ဖ် ဗိုလ်လုပွဲအဖြစ် ယှဉ်ပြိုင်ခဲ့တဲ့ ဆောက်သမ်တန်အသင်းနဲ့ လိဒ်စ်အသင်းတို့ပွဲမှာ ဆောက်သမ်တန်အသင်းက အနိုင်ရပြီး ပရီးမီးယားလိဂ်ကို တန်းပြန်တက်နိုင်ခဲ့ပြီဖြစ်ပါတယ်။
လာမယ့်ရာသီ ပရီးမီးယားလိဂ်ကို တန်းတက်နိုင်ဖို့ လက်ကျန် ၁ နေရာအတွက် ယှဉ်ပြိုင်ခဲ့တဲ့ဒီပွဲမှာ ဆောက်သမ်တန်အသင်းက လိဒ်စ်အသင်းကို ၁ ဂိုး- ဂိုးမရှိနဲ့ အနိုင်ရရှိခဲ့တာပါ။
ဆောက်သမ်တန်အသင်းအတွက် တစ်လုံးတည်းသော အနိုင်ဂိုးကို ပွဲချိန် ၂၄ မိနစ်မှာ အမ်းစထရောင်းက သွင်းယူခဲ့ တာ ဖြစ်ပါတယ်။
အဲဒါကြောင့် ဆောက်သမ်တန်အသင်းဟာ လက်စတာ၊ အစ်စဝှချ်အသင်းတို့နဲ့အတူ လာမယ့်ရာသီ ပရီးမီးယားလိဂ် ပြိုင်ပွဲကို ယှဉ်ပြိုင်ခွင့် ရရှိခဲ့တာပါ။
လိဒ်စ်အသင်းကို တွေ့ရစဉ်
ပြီးခဲ့တဲ့ရာသီက ပရီးမီးယားလိဂ်ကနေ တန်းဆင်းခဲ့တဲ့ လက်စတာ၊ ဆောက်သမ်တန်နဲ့ လိဒ်စ်အသင်းတို့ ၃ သင်းထဲ မှာ လက်စတာနဲ့ ဆောက်သမ်တန်အသင်းတို့က ချက်ချင်း တန်းပြန်တက်နိုင်ခဲ့ပြီး လိဒ်စ်အသင်းက လာမယ့်ရာသီ ချန်ပီယံရှစ်ပြိုင်ပွဲမှာ ဆက်ပြီးယှဉ်ပြိုင်ရတော့မှာ ဖြစ်ပါတယ်။
ဆောက်သမ်တန်အသင်း နည်းပြ မာတင်က ပရီးမီးယားလိဂ်ကို တန်းပြန်တက်နိုင်ခဲ့တဲ့ အသင်းရဲ့စွမ်းဆောင်ရည် ကို ဂုဏ်ယူတယ်လို့ ပွဲအပြီးမှာ ပြောခဲ့တာပါ။
မာတင်က “ဒီကစားသမား အစုအဖွဲ့ဟာ မယုံနိုင်လောက်အောင်ပါပဲ။ သူတို့တွေဟာ အတူတကွ လက်တွဲပြီး ပရီးမီးယားလိဂ်ကို တန်းပြန်တက်အောင် လုပ်နိုင်ခဲ့ပါတယ်။ တန်းဆင်းပြီးနောက် ရာသီအစဟာ အခက်အခဲ ဆုံးဖြစ်ခဲ့ပေမယ့် ကျနော်တို့ရဲ့ အတူလက်တွဲ လုပ်ဆောင်မှုတွေက အံ့သြစရာပါပဲ။ ကျနော်တို့ အောင်မြင်ခဲ့တဲ့ အရာအတွက် အလွန်ဂုဏ်ယူပါတယ်။ ကျနော့်ကို အခွင့်အရေးပေးတဲ့ အသင်းပိုင်ရှင်တွေကိုလည်း ကျေးဇူးတင်ပါ တယ်”လို့ ပြောခဲ့ပါတယ်။
လိဒ်စ်အသင်းဟာ ပလေးအော့ဖ် ယှဉ်ပြိုင်ရတိုင်း တန်းမတက်နိုင်တဲ့ သူတို့ရဲ့ မှတ်တမ်းဆိုးကို ဆက်ပြီး ထိန်းသိမ်း နိုင်ခဲ့တာပါ။ ပရီးမီးယားလိဂ်ကနေ ချန်ပီယံရှစ်ပြိုင်ပွဲကို လူတန်၊ ဘန်လေနဲ့ ရှက်ဖီးယူနိုက်တက်အသင်းတို့ တန်းဆင်းခဲ့တာ ဖြစ်ပါတယ်။
Source: BBC
- By CNI
- Category: အားကစား
- Hits: 1543
CNI Sport News
၂၀၂၄ ခုနှစ်၊ မေလ ၂၇
ပြင်သစ်အသင်းတိုက်စစ်မှူး ဘတ်ပီက သူပြောင်းရွှေ့မယ့် အသင်းသစ်ကို ရက်အနည်းငယ်အတွင်း ကြေညာမယ် လို့ ပီအက်စ်ဂျီအသင်းနဲ့ ပြင်သစ်ဖလားရယူပြီးနောက် ပြောလိုက်ပါတယ်။
ဘတ်ပီက “နှုတ်ဆက်တာကို ပြီးအောင်လုပ်ဖို့က အကောင်းဆုံးလို့ထင်ပြီး ကောင်းမွန်စွာ ပြီးဆုံးနိုင်ဖို့ကိုပဲ ကျနော် လိုချင်တာပါ။ အရာအားလုံးအတွက် အချိန်တစ်ခုရှိပါတယ်။ အချိန်တန်ရင် ကျနော့်ရဲ့ ကလပ်အသင်းသစ်ကို ကျနော်ကြေညာမှာပါ။ ဒါကလည်း ရက်အနည်းငယ်ပဲ လိုတော့တဲ့အတွက် ပြဿနာမရှိပါဘူး” လို့ ပြောပါတယ်။
ဘတ်ပီဟာ ပီအက်စ်ဂျီအသင်းနဲ့ စာချုပ်ကုန်ဆုံးမယ့် နွေရာသီမှာ ထွက်ခွာမယ်လို့ ကြေညာခဲ့ပြီး ရီးရယ်လ်အသင်း ထံ ပြောင်းရွှေ့မယ်လို့ သတင်းတွေ အများအပြားက ဖော်ပြထားတာ ဖြစ်ပါတယ်။
ဘတ်ပီဟာ လိုင်ယွန်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပြင်သစ်ဖလားဗိုလ်လုပွဲမှာ ပီအက်စ်ဂျီအသင်း ကစားသမားဘဝ နောက်ဆုံးပွဲစဉ်အဖြစ် ပါဝင်ကစားသွားခဲ့တာပါ။
ပွဲအပြီးမှာ သတင်းထောက်တွေက အသင်းသစ်ကို ဘာကြောင့် တရားဝင် ဖော်မပြသေးတာလဲလို့ ဘတ်ပီကို မေးမြန်းခဲ့တာမှာ ပြင်သစ်ကစားသမားက ရက်အနည်းငယ်အတွင်း ကြေညာမယ်လို့ ဖြေခဲ့တာဖြစ်ပါတယ်။
ဘတ်ပီကို ဂုဏ်ပြုနေကြစဉ်
ဘတ်ပီဟာ ယူရို ၂၀၂၄ ပြိုင်ပွဲ ယှဉ်ပြိုင်ဖို့အတွက် ပြင်သစ်အသင်းနဲ့ မပူးပေါင်းခင်မှာ အသင်းသစ်ကို ကြေညာ သွားဖွယ်ရှိနေတာပါ။
၂၀၁၇ ခုနှစ်က မိုနာကိုအသင်းကနေ ပြောင်းရွှေ့လာခဲ့တဲ့ ဘတ်ပီဟာ ပီအက်စ်ဂျီအသင်းအတွက် ၃၀၈ ပွဲ ပါဝင်ကစားခဲ့ပြီး ၂၅၆ ဂိုးသွင်းယူကာ အသင်းသမိုင်းတစ်လျှောက် ဂိုးသွင်းအများဆုံး ကစားသမားအဖြစ် ရပ်တည် နိုင်ခဲ့ပါတယ်။
အသက် ၂၅ နှစ်အရွယ်ရှိ ဘတ်ပီဟာ ပီအက်စ်ဂျီအသင်းနဲ့အတူ ပြင်သစ်လီဂူးဝမ်းဖလား ၆ ကြိမ် အပါအဝင် ဆုဖလားပေါင်း ၁၅ ခုအထိ ရယူနိုင်ခဲ့တာပါ။
ဒါပေမယ့် ဘတ်ပီဟာ ပီအက်စ်ဂျီအသင်းနဲ့ ရယူနိုင်ဖို့ မျှော်လင့်ခဲ့တဲ့ ချန်ပီယံလိဂ်ဖလားကိုတော့ ဗိုလ်လုပွဲ တက်နိုင်တာကသာ အမြင့်ဆုံး အောင်မြင်မှုဖြစ်ခဲ့ပြီး ဒီရာသီမှာလည်း ဆီမီးဖိုင်နယ်အဆင့်က ထွက်ခွာခဲ့ရတာ ဖြစ်ပါတယ်။
Source: ESPN
- By CNI
- Category: အားကစား
- Hits: 1328
CNI Sport News
၂၀၂၄ ခုနှစ်၊ မေလ ၂၆
ပြင်သစ်တိုက်စစ်မှူး ဘတ်ပီဟာ ၂၀၂၄ ပဲရစ်အိုလံပစ်ပြိုင်ပွဲမှာ နိုင်ငံအသင်းအတွက် ပါဝင်ကစားချင်တဲ့ သူ့ရဲ့ ရည်ရွယ်ချက်ကို ထပ်မံထုတ်ပြောလိုက်ပါတယ်။
ဘတ်ပီက “အိုလံပစ်နဲ့ပတ်သက်ပြီး ကျနော်တို့ စောင့်ဆိုင်းရမယ်လို့ ထင်ပါတယ်။ ကျနော့်ရဲ့ ရည်ရွယ်ချက်က တော့ ပြောဖို့တောင် မလိုပါဘူး။ အားလုံးသိပြီးသားပါ။ ဒါကို ဖြစ်အောင်လုပ်ရမယ်လို့ ထင်ပါတယ်။ ဒါက တကယ်ကို ထူးခြားမယ့်အရာပါ၊ အထူးသဖြင့် ပဲရစ်မှာပါ”လို့ ပြောခဲ့တာပါ။
နွေရာသီမှာ အမျိုးသားဘောလုံးပြိုင်ပွဲအတွက် အရေးကြီးတဲ့ ပြိုင်ပွဲ ၂ ခုရှိနေတာ ဖြစ်ပါတယ်။
ပထမတစ်ခုက ယူရို ၂၀၂၄ ပြိုင်ပွဲဖြစ်ပြီး ဒီပြိုင်ပွဲကို ဇွန်လ ၁၄ ရက်မှာ စတင်ပြီး ဇူလိုင် ၁၄ ရက်မှာ ပြီးဆုံးမှာပါ။
ဒုတိယတစ်ခုဖြစ်တဲ့ အိုလံပစ်ဘောလုံးပြိုင်ပွဲကို ဇူလိုင် ၂၄ ရက်ကနေ သြဂုတ် ၁၀ ရက်အထိ ကျင်းပသွားမှာ ဖြစ်ပါတယ်။
အဲဒါကြောင့် ဘတ်ပီဟာ ဒီပြိုင်ပွဲ ၂ ခုစလုံးကို ပြင်သစ်နိုင်ငံ ကိုယ်စားပြုပြီး ပါဝင်ယှဉ်ပြိုင်ချင်နေတာပါ။
ဘတ်ပီကို တွေ့ရစဉ်
ဒီရာသီအကုန်မှာ ပီအက်စ်ဂျီအသင်းကနေ ထွက်ခွာတော့မယ့် ဘတ်ပီဟာ အိုလံပစ်ပြိုင်ပွဲကို ပါဝင်ယှဉ်ပြိုင် ချင်ပေမယ့် ကလပ်အသင်းတွေဟာ ဒီပြိုင်ပွဲအတွက် သူတို့ရဲ့ ကစားသမားတွေကို စေလွှတ်မပေးလည်းရတာ ဖြစ်ပါတယ်။
ဘတ်ပီဟာ ရီးရယ်လ်အသင်းကို ပြောင်းရွှေ့မှာဖြစ်တဲ့အတွက် အိုလံပစ်ပြိုင်ပွဲမှာ ပါဝင်ခွင့်ရဖို့ စပိန်ကလပ်နဲ့ ဆွေးနွေးမှုတွေ ပြုလုပ်ရမှာပါ။
အိုလံပစ်ပြိုင်ပွဲ ကျင်းပနေတဲ့ အချိန်ဟာ ရာသီကြိုကာလနဲ့ တိုက်နေတာကြောင့် ရီးရယ်လ်အသင်းဟာ သူတို့ရဲ့ ကစားသမားတွေကို စေလွှတ်ပေးဖို့ ဆန္ဒမရှိဖြစ်နေပါတယ်။
အဲဒါကြောင့် အိုလံပစ်ပြိုင်ပွဲ ယှဉ်ပြိုင်ချင်တဲ့ ဘတ်ပီရဲ့ ရည်ရွယ်ချက်ဟာ သူ့ရဲ့ အသင်းသစ်အပေါ်မှာ အများကြီး မူတည်နေပြီး အသင်းသစ်ဘက်က ခွင့်မပြုရင် ယှဉ်ပြိုင်ခွင့်ရမှာ မဟုတ်ဘူးလို့ သိရပါတယ်။
Source: besoccer
- By CNI
- Category: အားကစား
- Hits: 1461
CNI Sport News
၂၀၂၄ ခုနှစ်၊ မေလ ၂၆
ရီးရယ်လ်ကွင်းလယ်လူ ချူအာမန်နီဟာ ခြေဖဝါးဒဏ်ရာကြောင့် ဒေါ့မွန်အသင်းနဲ့ ယှဉ်ပြိုင်မယ့် ချန်ပီယံလိဂ် ဗိုလ်လုပွဲကို လွဲချော်မယ်လို့ နည်းပြ အန်ဆယ်လော့တီက အတည်ပြုခဲ့ပါတယ်။
အန်ဆယ်လော့တီက “ချူအာမန်နီဟာ တစ်ဦးချင်း အလုပ်တွေ လုပ်နေပေမယ့် ချန်ပီယံလိဂ်ဗိုလ်လုပွဲကို ပါဝင်ဖို့ အဆင်သင့် မဖြစ်သေးပါဘူး။ ယူရိုပြိုင်ပွဲအတွက် သူအဆင်သင့် ဖြစ်မလားဆိုတာတော့ ကြည့်ကျတာပေါ့”လို့ သတင်းထောက်တွေရဲ့ မေးမြန်းမှုကို ဖြေခဲ့တာပါ။
ချူအာမန်နီဟာ အခုလ အစောပိုင်းက ရီးရယ်လ်အသင်းက ဘိုင်ယန်မြူးနစ်အသင်းကို အနိုင်ရခဲ့တဲ့ ချန်ပီယံလိဂ် ဆီမီးဖိုင်နယ် ဒုတိယအကျော့ပွဲစဉ်မှာ ဒဏ်ရာရရှိသွားခဲ့တာ ဖြစ်ပါတယ်။
ပြင်သစ်ကွင်းလယ်လူ ချူအာမန်နီဟာ ချန်ပီယံလိဂ်ဗိုလ်လုပွဲကို ပါဝင်နိုင်ဖို့ မျှော်လင့်ခဲ့ပေမယ့် နည်းပြ အန်ဆယ်လော့တီက သူ့ရဲ့ကစားသမားဟာ ဒီပွဲစဉ်ကို ပါဝင်နိုင်မှာ မဟုတ်ဘူးလို့ ပြောသွားခဲ့တာပါ။
ချူအာမန်နီကို တွေ့ရစဉ်
ချူအာမန်နီဟာ ဒီရာသီမှာ ရီးရယ်လ်အသင်းအတွက် ၃၈ ပွဲ ပါဝင်ကစားခဲ့ပြီး ၃ ဂိုးသွင်းယူကာ ခြေစွမ်းပြသနေတာ ဖြစ်ပါတယ်။
ချူအာမန်နီဟာ ယူရို ၂၀၂၄ ပြိုင်ပွဲ ယှဉ်ပြိုင်မယ့် ပြင်သစ်အသင်းရဲ့ ကစားသမား ၂၅ ဦး စာရင်းထဲမှာ ရွေးချယ်ခံ ထားရပြီး ဒီပြိုင်ပွဲအတွက် ပါဝင်ဖို့ အဆင်သင့် ဖြစ်မလားဆိုတာ စောင့်ကြည့်ရဖို့ ရှိနေတာပါ။
၂၀၂၁ ခုနှစ်မှာ ပြင်သစ်အသင်းအတွက် ပွဲဦးထွက်ခွင့်ရခဲ့တဲ့ ချူအာမန်နီဟာ နိုင်ငံအသင်းအတွက် ၃၁ ပွဲ ပါဝင် ကစားထားပြီး အဓိက ကစားသမားအဖြစ် ခြေစွမ်းပြသနေတာ ဖြစ်ပါတယ်။
ပြင်သစ်အသင်းဟာ ယူရို ၂၀၂၄ ပြိုင်ပွဲမှာ နယ်သာလန်၊ သြစတြီးယား၊ ပိုလန်အသင်းတို့နဲ့ တစ်အုပ်စုတည်း ကျရောက်နေတာပါ။
ပြင်သစ်အသင်းဟာ ယူရို ၂၀၂၄ ပြိုင်ပွဲ မတိုင်ခင်မှာ လူဇင်ဘတ်၊ ကနေဒါအသင်းတို့နဲ့ ခြေစမ်းပွဲ ယှဉ်ပြိုင်သွားမှာ ဖြစ်ပါတယ်။
Source: CNA
- By CNI
- Category: အားကစား
- Hits: 1056
CNI Sport News
၂၀၂၄ ခုနှစ်၊ မေလ ၂၅
ပေါ်တူဂီကွင်းလယ်လူ ဘရူနိုဖာနန်ဒက်စ်က သူဟာ ယူနိုက်တက်အသင်းမှာ ဆက်ပြီး ရှိချင်ပေမယ့် ကလပ်အသင်း ကို သူ့ရဲ့မျှော်လင့်ချက်နဲ့ ကိုက်ညီမှု ရှိစေချင်တယ်လို့ ပြောခဲ့ပါတယ်။
ဘရူနိုဖာနန်ဒက်စ်က “အိုးထရက်ဖို့ဒ် ကွင်းထဲကို ဝင်ရတာထက် ဒီကမ္ဘာမှာ ပိုကောင်းတဲ့အရာ မရှိပါဘူး။ အဲဒါကြောင့် ဒီကနေ မထွက်ခွာချင်ပါဘူး။ ဒီမှာကစားဖို့က ကျနော်အမြဲတမ်းမက်ခဲ့ရတဲ့ အိပ်မက်ပါ။ ကျနော့်ရဲ့ မျှော်လင့်ချက်တွေနဲ့ ကလပ်ရဲ့မျှော်လင့်ချက်တွေကို တစ်ထပ်တည်း ကျစေချင်ပါတယ်။ ကျနော်တို့ဟာ ပရီးမီးယားလိဂ်နဲ့ ချန်ပီယံလိဂ်ပြိုင်ပွဲတွေကို ချန်ပီယံဆုအတွက် ယှဉ်ပြိုင်ချင်ပါတယ်။ ဖလားဗိုလ်လုပွဲတွေလည်း ကျနော်တို့ ရောက်ရှိချင်ပါတယ်၊ဒါက ကျနော်တို့ရဲ့ စံနှုန်းပါ”လို့ Players' Tribune ကိုပြောခဲ့တာပါ။
၂၀၂၀ ခုနှစ်က စပို့တင်းလစ္စဘွန်း အသင်းကနေ ရောက်ရှိလာခဲ့တဲ့ ဘရူနိုဖာနန်ဒက်စ်ဟာ ယူနိုက်တက်အသင်း အတွက် ၂၃၂ ပွဲ ကစားထားပြီး ၇၉ ဂိုး သွင်းယူထားတာ ဖြစ်ပါတယ်။
ပေါ်တူဂီကွင်းလယ်လူဟာ ယူနိုက်တက်အသင်းမှာ သူ့ရဲ့အနာဂတ်နဲ့ ပတ်သက်ပြီး မရေမရာဖြစ်နေခဲ့တာကို ပြီးခဲ့တဲ့ ဧပြီက DAZN နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။
ဘရူနိုဖာနန်ဒက်စ်ကို တွေ့ရစဉ်
နည်းပြ အဲရစ်တန်ဟတ်ကတော့ အသင်းဟာ သူတို့ရဲ့ အသင်းခေါင်းဆောင်ကို ဆက်ပြီးထိန်းသိမ်းသွားမှာပါလို့ မှတ်ချက်ပေးခဲ့ပါတယ်။
ပြီးခဲ့တဲ့နှစ်က ယူနိုက်တက်အသင်း ခေါင်းဆောင်အဖြစ် ခန့်အပ်ခံခဲ့ရတဲ့ ဘရူနိုဖာနန်ဒက်စ်က ဒီရာသီမှာ အသင်းရဲ့ ရလဒ်ဆိုးတွေကြောင့် အားလုံးစိတ်ပျက်ခဲ့ရတဲ့အတွက် FA ဖလားဗိုလ်လုပွဲမှာ ရလဒ်ကောင်းရယူဖို့ အသင်းဖော် တွေကို တိုက်တွန်းခဲ့ပါတယ်။
ဘရူနိုဖာနန်ဒက်စ်ဟာ ဒီရာသီ ယူနိုက်တက်အသင်းရဲ့ တစ်နှစ်တာ အကောင်းဆုံး ကစားသမားအဖြစ် သတ်မှတ် ခံခဲ့ရပြီး ဒီဆုဟာ သူ့အတွက် တတိယအကြိမ်မြောက် ရရှိခဲ့တာပါ။
ယူနိုက်တက်အသင်းဟာ ဒီနေ့မှာ FA ဖလားဗိုလ်လုပွဲအဖြစ် မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: BBC
- By CNI
- Category: အားကစား
- Hits: 931
CNI Sport News
၂၀၂၄ ခုနှစ်၊ မေလ ၂၅
ဘာစီလိုနာအသင်းဟာ နည်းပြ ဇာဗီကို ထုတ်ပယ်လိုက်ပြီး ဘိုင်ယန်မြူးနစ်အသင်း နည်းပြဟောင်း ဟန်ဆီဖလစ်ကို သူ့နေရာမှာ အစားထိုးကာ နည်းပြသစ်အဖြစ် ခန့်အပ်ဖို့ စီစဉ်နေတာဖြစ်ပါတယ်။
ဇာဗီဟာ တနင်္ဂနွေနေ့မှာ ကစားမယ့် ဒီရာသီ လာလီဂါ နောက်ဆုံးပွဲစဉ်ဖြစ်တဲ့ ဆီဗီလာအသင်းနဲ့ပွဲမှာ ဘာစီလိုနာ အသင်းကို သူ့ရဲ့နောက်ဆုံးပွဲစဉ်အဖြစ် ကိုင်တွယ်ပြီး ထွက်ခွာမှာပါ။
ဇာဗီဟာ ဒီရာသီအကုန်မှာ ဘာစီလိုနာအသင်းက ထွက်ခွာမယ်လို့ ဇန်နဝါရီက ကြေညာခဲ့ပေမယ့် ဥက္ကဋ္ဌဖြစ်သူ လာပေါ်တာက သူ့ကို ဆက်ပြီးရှိနေပေးဖို့ ကြိုးစားခဲ့တာကြောင့် ဆုံးဖြတ်ချက်ကို ပြန်ပြောင်းပြီး ဆက်ရှိမယ်လို့ ပြောခဲ့တာဖြစ်ပါတယ်။
ဒါပေမယ့် ဇာဗီဟာ ကလပ်ရဲ့ ဘဏ္ဍာရေး အခက်အခဲတွေကို မီဒီယာတွေနဲ့တွေ့ဆုံချိန်မှာ ဖွင့်ဟခဲ့တာကြောင့် လာပေါ်တာနဲ့ ဘာစီလိုနာအသင်း ဘုတ်အဖွဲ့ကို ဒေါသထွက်စေခဲ့တာပါ။
အဲဒါကြောင့် ဇာဗီဟာ ဥက္ကဋ္ဌ လာပေါ်တာ၊ အားကစားဒါရိုက်တာ ဒေကိုတို့နဲ့ ဆွေးနွေးမှု ပြုလုပ်အပြီးမှာ ဘာစီလိုနာအသင်းကနေ ထုတ်ပယ်ခြင်းခံခဲ့ရတာ ဖြစ်ပါတယ်။
ဇာဗီကို တွေ့ရစဉ်
ဇာဗီက ဘာစီလိုနာအသင်းကို ၂ နှစ်ခွဲကြာ ကိုင်တွယ်ခွင့် ရခဲ့တဲ့အတွက် ဂုဏ်ယူမိပြီး အသင်းက ထွက်ခွာသွား ပေမယ့် ဘာစီလိုနာအသင်းရဲ့ ပရိသတ်အဖြစ် အမြဲရှိနေမယ်လို့ သူ့ရဲ့ ဆိုရှယ်မီဒီယာမှာ ရေးသားခဲ့တာပါ။
ဘာစီလိုနာအသင်းဟာ လာမယ့်ရက် အနည်းငယ်အတွင်းမှာ ဟန်ဆီဖလစ်ကို နည်းပြသစ်အဖြစ် ခန့်အပ်ကြောင်း ကြေညာသွားဖို့ ရှိနေတာ ဖြစ်ပါတယ်။
ဟန်ဆီဖလစ်ဟာ ၂၀၂၃ ခုနှစ်၊ စက်တင်ဘာက ဂျာမနီအသင်းကနေ ထုတ်ပယ်ခံရပြီးကတည်းက ဘယ်အသင်း ကိုမှ ကိုင်တွယ်ရခြင်း မရှိသေးတာပါ။
ဟန်ဆီဖလစ်ဟာ ဂျာမနီအသင်းကို မကိုင်တွယ်ခင် ဘိုင်ယန်မြူးနစ်အသင်းကို ကိုင်တွယ်ခဲ့ပြီး ၂၀၂၀ ခုနှစ်က ဆုဖလား ၃ လုံး ရယူပေးနိုင်ခဲ့ပါတယ်။
ဘာစီလိုနာအသင်းတိုက်စစ်မှူး လီဝန်ဒေါစကီးဟာ နည်းပြ ဟန်ဆီဖလစ်နဲ့ ဘိုင်ယန်မြူးနစ်အသင်းမှာ ၂ ရာသီကြာ လက်တွဲခဲ့ပြီး ဆုဖလားအောင်မြင်မှုတွေ ရယူနိုင်ခဲ့တာဖြစ်ပါတယ်။
Source: BBC
- By CNI
- Category: အားကစား
- Hits: 1820
CNI Sport News
၂၀၂၄ ခုနှစ်၊ မေလ ၂၄
ယူနိုက်တက်အသင်းဂန္ထဝင် ဝိန်းရွန်နီဟာ ချန်ပီယံရှစ်ကလပ် ပလိုင်းမောက်အသင်းနဲ့ သူတို့ရဲ့ လစ်လပ်နေတဲ့ နည်းပြရာထူးအတွက် ဆွေးနွေးမှုတွေ ပြုလုပ်ခဲ့ပါတယ်။
ဝိန်းရွန်နီဟာ ပြီးခဲ့တဲ့ရာသီက ဘာမင်ဂမ်အသင်းကို ၁၅ ပွဲ ကိုင်တွယ်ခဲ့တာမှာ ၉ ပွဲအထိ ရှုံးပွဲကြုံတွေ့ခဲ့ရလို့ ရာထူးက ထုတ်ပယ်ခံခဲ့ရတာပါ။
အဲဒါကြောင့် ဝိန်းရွန်နီဟာ ကျဆင်းခဲ့တဲ့ သူ့ရဲ့ဂုဏ်သိက္ခာကို ပြန်လည်တည်ဆောက်ဖို့ စိတ်အားထက်သန်နေပြီး နည်းပြလောကထဲကို ပြန်လည်ဝင်ရောက်ချင်နေတာ ဖြစ်ပါတယ်။
ပလိုင်းမောက်အသင်းဟာ ပြီးခဲ့တဲ့ရာသီ ကုန်ခါနီးမှာ နည်းပြ အီယန်ဖော်စတာကို ထုတ်ပယ်ပြီးနောက် နည်းပြသစ် ရှာဖွေမှုပြုလုပ်နေတာပါ။
ပလိုင်းမောက်အသင်းဟာ ပြီးခဲ့တဲ့ရာသီ လက်ကျန်ပွဲစဉ်တွေမှာ ဘောလုံးဒါရိုက်တာ နေးလ်ဒူစနစ်နဲ့ နည်းပြ ကီဗင်တို့က ကိုင်တွယ်ခဲ့ပြီး အသင်းကို ချန်ပီယံရှစ်ပြိုင်ပွဲမှာ ဆက်ပြီးရှိနေနိုင်အောင် လုပ်နိုင်ခဲ့တာ ဖြစ်ပါတယ်။
ဝိန်းရွန်နီကို တွေ့ရစဉ်
နေးလ်ဒူစနစ်ဟာ အဲဗာတန်အသင်း အကယ်ဒမီမှာ နည်းပြအဖြစ် ဆောင်ရွက်ခဲ့တဲ့အတွက် ဝိန်းရွန်နီရဲ့ အကြောင်း ကို သိရှိနေတာပါ။
ဝိန်းရွန်နီဟာ အဲဗာတန်၊ ယူနိုက်တက်၊ ဒီစီယူနိုက်တက်နဲ့ ဒါဘီအသင်းတွေမှာ ကစားသမားအဖြစ် ပွဲပေါင်း ၇၆၃ ပွဲ ပါဝင်ကစားခဲ့တာ ဖြစ်ပါတယ်။
အသက် ၃၈ နှစ်အရွယ်ရှိ ဝိန်းရွန်နီဟာ ၂၀၂၀ ခုနှစ်၊ နိုဝင်ဘာမှာ ဒါဘီအသင်းကို ကစားသမား/နည်းပြအဖြစ် တာဝန်ယူရင်း ၂ လအကြာမှာ ကစားသမားဘဝက အနားယူကာ အမြဲတမ်းနည်းပြအဖြစ် တာဝန်ယူခဲ့တာပါ။
အင်္ဂလန်အသင်း ခေါင်းဆောင်ဟောင်းဟာ ဒါဘီအသင်းကို ကိုင်တွယ်အပြီးမှာ အသင်းဟောင်း မေဂျာလိဂ်ကလပ် ဒီစီယူနိုက်တက်အသင်းကို ကိုင်တွယ်ခဲ့တာ ဖြစ်ပါတယ်။
ဝိန်းရွန်နီဟာ ပြီးခဲ့တဲ့နှစ် အောက်တိုဘာမှာတော့ ဘာမင်ဂမ်အသင်း နည်းပြအဖြစ် ခန့်အပ်ခံခဲ့ရပေမယ့် ရလဒ်ဆိုး တွေကြောင့် ၃ လ မပြည့်ခင်မှာတင် ထုတ်ပယ်ခံခဲ့ရတာပါ။
ဝိန်းရွန်နီဟာ ကစားသမားဘဝမှာ အောင်မြင်မှု အများအပြား ရယူနိုင်ခဲ့ပေမယ့် နည်းပြဘဝမှာ အောင်မြင်မှု ရယူနိုင်ဖို့ ခက်ခဲနေပြီး သူ့ရဲ့နည်းပြဘဝ မှတ်တမ်းတွေဟာ ဆိုးရွားနေတာ ဖြစ်ပါတယ်။
Source: BBC
- By CNI
- Category: အားကစား
- Hits: 1091
CNI Sport News
၂၀၂၄ ခုနှစ်၊ မေလ ၂၄
အေစီမီလန်အသင်း တိုက်စစ်မှူး ဂီရော့ဒ်ဟာ နွေရာသီမှာ ကျင်းပမယ့် ယူရို ၂၀၂၄ ပြိုင်ပွဲအပြီးမှာ ပြင်သစ် လက်ရွေးစင်အသင်းကနေ အနားယူမယ်လို့ ပြောလိုက်ပါတယ်။
ဂီရော့ဒ်က “ရိုးရိုးသားသားပြောရရင် ယူရို ၂၀၂၄ ပြိုင်ပွဲဟာ ပြင်သစ်အသင်းအတွက် ကျနော့်ရဲ့ နောက်ဆုံးပြိုင်ပွဲပါ။ ကျနော် အများကြီးကို လွမ်းနေတော့မှာ ဖြစ်ပါတယ်။ ဒါပေမယ့် ကျနော်တို့ဟာ လူငယ်တွေအတွက် လမ်းဖွင့်ပေးဖို့ လိုအပ်ပါတယ်။ ကျနော့် ခန္ဓာကိုယ်က ကျနော့်ကို တောင်းဆိုရင် ရပ်တန့်မယ်ဆိုတာ အမြဲတမ်း ပြောဖူးပါတယ်။ ကျနော် ၂ နှစ်လောက် ကစားဖို့ရှိနေသေးပေမယ့် ပြင်သစ်အသင်းအတွက်တော့ ယူရိုပြိုင်ပွဲအပြီးမှာ ပြီးဆုံးမယ်”လို့ L'Equipe နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ဂီရော့ဒ်ဟာ ပြင်သစ်အသင်းမှာ ၂၀၁၁ ခုနှစ်ကတည်းက စတင်ပွဲဦးထွက်ခွင့် ရခဲ့တာဖြစ်ပြီး လက်ရှိအချိန်ထိ ၁၃၁ ပွဲ ကစားထားတာမှာ ၅၇ ဂိုးသွင်းယူထားတာ ဖြစ်ပါတယ်။
အသက် ၃၇ နှစ်အရွယ်ရှိ ဂီရော့ဒ်ဟာ ပြင်သစ်အသင်းသမိုင်းမှာ ဂိုးသွင်း အများဆုံး ကစားသမားအဖြစ်လည်း ရပ်တည်နေတာပါ။ အေစီမီလန်အသင်း ကစားသမားဟာ ၂၀၁၈ ကမ္ဘာ့ဖလားရယူနိုင်ခဲ့တဲ့ ပြင်သစ်အသင်းမှာ အဓိက အစိတ်အပိုင်းအနေနဲ့ ပါဝင်ခဲ့တာဖြစ်ပါတယ်။
ဂီရော့ဒ်ကို တွေ့ရစဉ်
ဂီရော့ဒ်ဟာ ပြင်သစ်အသင်းနဲ့ ယူရို ၂၀၂၄ ပြိုင်ပွဲမှာ ချန်ပီယံဆုကို ရယူနိုင်ခဲ့ရင် သူ့ရဲ့နိုင်ငံအသင်း ကစားသမား ဘဝဟာ ပြီးပြည့်စုံသွားမှာပါ။
ဂီရော့ဒ်ဟာ ယူရို ၂၀၁၆ ပြိုင်ပွဲမှာ ဗိုလ်လုပွဲ တက်နိုင်ခဲ့တဲ့ ပြင်သစ်အသင်းမှာ ပါဝင်ခဲ့ပေမယ့် ပေါ်တူဂီအသင်းကို အရေးနိမ့်ခဲ့တာကြောင့် ဒုတိယနဲ့သာ ကျေနပ်ခဲ့ရတာ ဖြစ်ပါတယ်။
ယူရို ၂၀၂၄ ပြိုင်ပွဲမှာ ဗိုလ်စွဲဖို့ ရေပန်းစားနေတဲ့ အသင်းတွေထဲမှာ ပါဝင်တဲ့ ပြင်သစ်အသင်းဟာ ဒီပြိုင်ပွဲမှာ သြစတြီးယား၊ နယ်သာလန်၊ ပိုလန်အသင်းတို့နဲ့ တစ်အုပ်စုတည်း ကျရောက်နေတာပါ။
ဂီရော့ဒ်ဟာ ပြင်သစ်အသင်းနဲ့ ယူရို ၂၀၂၄ ပြိုင်ပွဲယှဉ်ပြိုင်အပြီးမှာ မေဂျာလိဂ်ကလပ် LAFC အသင်းထံ သွားရောက်ကစားမှာ ဖြစ်ပါတယ်။
Source: CNA
Page 61 of 306
Latest News
Connect with us
