CNI Sport News

၂၀၂၄ ခုနှစ်၊ မေလ ၂၄

ဝက်စ်ဟမ်းအသင်း ကွင်းလယ်လူ ပါကွေတာဟာ လောင်းကစားစည်းမျဉ်းကို ချိုးဖောက်မှုနဲ့ အင်္ဂလန်ဘောလုံး အဖွဲ့ချုပ်(FA)ရဲ့ စွဲချက်တင်ခြင်းကို ခံလိုက်ရပါတယ်။

အသက် ၂၆ နှစ်အရွယ်ရှိ ဘရာဇီးလ် ကစားသမားဟာ ၂၀၂၂ နဲ့ ၂၀၂၃ ခုနှစ်အတွင်း ကစားခဲ့တဲ့ ပရီးမီးယားလိဂ် ၄ ပွဲမှာ အဝါကတ်ကို ရည်ရွယ်ချက်ရှိရှိ ရယူဖို့ ကြိုးစားခဲ့မှုနဲ့ FA ရဲ့ စွဲချက်တင်ခြင်းကို ခံခဲ့ရတာပါ။ 

ဒီပွဲတွေကတော့ ၂၀၂၂ ခုနှစ်၊ နိုဝင်ဘာက လက်စတာအသင်းနဲ့ပွဲစဉ်၊ ၂၀၂၃ ခုနှစ်၊မတ်လက အက်စတွန်ဗီလာ အသင်းနဲ့ပွဲစဉ်၊ ၂၀၂၃ ခုနှစ်၊မေလက လိဒ်စ်ယူနိုက်တက်အသင်းနဲ့ပွဲစဉ်၊ ၂၀၂၃ ခုနှစ်၊သြဂုတ်က ဘုန်းမောက်အသင်း တို့နဲ့ ပွဲစဉ်တို့ဖြစ်တယ်လို့ FA ရဲ့ ထုတ်ပြန်ချက်မှာ ဖော်ပြထားတာ ဖြစ်ပါတယ်။

ပါကွေတာဟာ လောင်းကစားကနေ အကျိုးအမြတ် ရရှိစေဖို့အတွက် လောင်းကစားဈေးကွက်ကို ထိခိုက်အောင် မသင့်လျော်တဲ့ ရည်ရွယ်ချက်တွေနဲ့ ဒိုင်လူကြီးဆီကနေ အဝါကတ် ရယူခဲ့တယ်လို့ FA က စွပ်စွဲထားတာပါ။ 

ပါကွေတာကတော့ ဒီစွပ်စွဲချက်တွေကို ငြင်းဆန်ခဲ့ပြီး သူ့ရဲ့နာမည်နဲ့ ဂုဏ်သိက္ခာအတွက် အဆုံးထိ တိုက်ပွဲဝင်သွား မယ်လို့ တုန့်ပြန်ခဲ့ပါတယ်။

ပါကွေတာကို တွေ့ရစဉ်

ပါကွေတာက “FA က ကျနော့်ကို စွဲချက်တင်ခဲ့တဲ့ ဆုံးဖြတ်ချက်အပေါ် ဝမ်းနည်းမိပြီး အံ့အားလည်း သင့်မိပါတယ်။ သူတို့ရဲ့ စုံစမ်းမှုအဆင့်တိုင်းကို ကျနော်ပူးပေါင်းပြီး အချက်အလက်တွေအားလုံးကို ပေးခဲ့ပါတယ်။ ဒီစွပ်စွဲချက်တွေ ကို ကျနော်ငြင်းပါတယ်။ ကျနော့်ရဲ့ နာမည်နဲ့ ဂုဏ်သိက္ခာအတွက် အဆုံးထိ တိုက်ပွဲဝင်သွားမှာပါ” လို့ သူ့ရဲ့ အင်စတာဂရမ်မှာ ရေးသားခဲ့တာပါ။

ပါကွေတာအနေနဲ့ FA ရဲ့ စွဲချက်ကို ဇွန် ၃ ရက် မတိုင်ခင် ဖြေရှင်းမှုတွေ ပြုလုပ်ရတော့မှာ ဖြစ်ပါတယ်။ 

FA ဟာ ပြီးခဲ့တဲ့နှစ် သြဂုတ်လ ကတည်းက ပါကွေတာရဲ့ လောင်းကစားစည်းမျဉ်း ချိုးဖောက်မှုကို စုံစမ်းစစ်ဆေး မှုတွေ စတင်ပြုလုပ်ခဲ့တာပါ။ 

ဒီလိုစုံစမ်းမှုတွေ ပြုလုပ်နေချိန်အတွင်းမှာ ပါကွေတာကို ဝက်စ်ဟမ်းအသင်းအတွက် ကစားခွင့်ပေးခဲ့ပြီး ဘရာဇီးလ် ကစားသမားဟာ လာမယ့်လမှာ ကျင်းပမယ့် ကိုပါအမေရိကဖလား ပြိုင်ပွဲအတွက် နိုင်ငံအသင်းရဲ့လူစာရင်းမှာ ရွေးချယ်ခံထားရတာ ဖြစ်ပါတယ်။

FA ဟာ လောင်းကစားစည်းမျဉ်း ချိုးဖောက်မှုကြောင့် ဘရန်ဖို့ဒ်အသင်း တိုက်စစ်မှူး အိုင်ဗန်တိုနေးနဲ့ နယူးကာဆယ်အသင်း ကွင်းလယ်လူ တိုနယ်လီတို့ကို ကာလရှည်ကြာ ပွဲပယ်ပြစ်ဒဏ်တွေ ချမှတ်ခဲ့တာပါ။ 

အဲဒါကြောင့် ပါကွေတာအနေနဲ့ အပြစ်ရှိကြောင်း တွေ့ရမယ်ဆိုရင် FA ရဲ့ ကာလရှည်ကြာ ပွဲပယ်ပြစ်ဒဏ် ချမှတ်ခြင်းကို ခံရမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၂၃

ဒဏ်ရာကြောင့် အနားယူနေရတဲ့ တိုက်စစ်မှူး နေမာကို စက်တင်ဘာမှာ အယ်လ်ဟီလယ်အသင်းအတွက် ပြန်ကစားပေးနိုင်ဖို့ မျှော်လင့်တယ်လို့ နည်းပြ ဂျော့ချ်ဂျီးဆပ်စ်က ပြောခဲ့ပါတယ်။

ဂျော့ချ်ဂျီးဆပ်စ်က “နေမာရတဲ့ ဒဏ်ရာအတွက် ပြန်လည်ထူထောင်ရေးလုပ်ဖို့ သူတို့ပေးတဲ့အချိန်က ပုံမှန်အားဖြင့် ၁၀ လကနေ ၁၁ လကြားပါပဲ။ အဲဒါကြောင့် နေမာဟာ လာမယ့်ရာသီအစပိုင်းမှာ အသင်းအတွက် ပါဝင်နိုင်မှာ မဟုတ်ပါဘူး။ ကျနော်ကတော့ သူဟာ စက်တင်ဘာ၊ အောက်တိုဘာမှာ ပြိုင်ပွဲတွေ ပြန်လည်ယှဉ်ပြိုင်နိုင်မယ့် အနေအထားမှာ ရှိမယ်လို့ထင်ကြောင်း”ပြောပါတယ်။

အသက် ၃၂ နှစ်အရွယ်ရှိ နေမာဟာ ပြီးခဲ့တဲ့နှစ် အောက်တိုဘာက ဘရာဇီးလ်အသင်းအတွက် နိုင်ငံတကာပွဲ ပါဝင် ကစားရင်း ရရှိခဲ့တဲ့ ဒူးအရွတ်ဒဏ်ရာကို ခွဲစိတ်ကုသမှု ခံယူပြီးကတည်းက အနားယူနေရတာ ဖြစ်ပါတယ်။ 

ပြီးခဲ့တဲ့နွေရာသီက ပီအက်စ်ဂျီအသင်းကနေ ၂ နှစ်စာချုပ်နဲ့ ရောက်ရှိလာခဲ့တဲ့ နေမာဟာ အယ်လ်ဟီလယ်အသင်း အတွက် ၅ ပွဲသာ ပါဝင်ကစားခဲ့ရပြီးနောက် ဒဏ်ရာကြောင့် ရာသီအကုန်ထိ အနားယူခဲ့ရတာပါ။ 

နေမာကို တွေ့ရစဉ်

နေမာဟာ ဒဏ်ရာကနေ သက်သာခြင်း မရှိသေးတဲ့အတွက် နွေရာသီမှာ ကျင်းပမယ့် ကိုပါအမေရိကဖလား ပြိုင်ပွဲမှာ ဘရာဇီးလ်အသင်းအတွက် ပါဝင်ကစားပေးနိုင်ခြင်း မရှိတော့ပါဘူး။ 

ဘရာဇီးလ် ကစားသမားဟာ လာမယ့်ရာသီအစမှာ အယ်လ်ဟီလယ်အသင်းအတွက် ကြံ့ခိုင်မှုအပြည့်နဲ့ ပါဝင်နိုင်ဖို့ မျှော်လင့်ထားပေမယ့် နည်းပြ ဂျော့ဂျီးဆပ်စ်က စက်တင်ဘာမှသာ ပြန်ကစားနိုင်ဖွယ်ရှိတယ်လို့ ပြောခဲ့တာ ဖြစ်ပါ တယ်။ 

အယ်လ်ဟီလယ်အသင်းဟာ နေမာ မပါဝင်နိုင်ပေမယ့် ဒီရာသီမှာ ပြိုင်ပွဲစုံ ၃၄ ပွဲဆက်တိုက် အနိုင်ရယူနိုင်ခဲ့တဲ့ စံချိန်မှတ်တမ်းတစ်ခုကို ရယူနိုင်ခဲ့တာပါ။ ဒါအပြင် ဆော်ဒီပရိုလိဂ်နဲ့ ဆော်ဒီစူပါဖလားပြိုင်ပွဲတွေမှာ ချန်ပီယံဆုကို ရယူနိုင်ခဲ့တာ ဖြစ်ပါတယ်။

အယ်လ်ဟီလယ်အသင်းဟာ နောက်ထပ် ရယူနိုင်စရာ ဆုဖလားအဖြစ် မေလ ၃၁ ရက်မှာ အယ်လ်နာဆာအသင်းနဲ့ ဘုရင့်ဖလားဗိုလ်လုပွဲ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၂၃

ကော်တင်ဟိုဟာ ဘရာဇီးလ်ကလပ်အသင်းထံ မပြန်ခင် အက်စတွန်ဗီလာအသင်းနဲ့ ချုပ်ဆိုထားတဲ့ စာချုပ်ကို ဖျက်သိမ်းဖို့ ဆွေးနွေးမှုတွေ ပြုလုပ်နေတာ ဖြစ်ပါတယ်။

ကော်တင်ဟိုနဲ့ အက်စတွန်ဗီလာအသင်းတို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်အထိ သက်တမ်းရှိနေပေမယ့် ဘရာဇီးလ်ကစားသမားဟာ နည်းပြအူနှိုင်းအမ်မရီရဲ့ အနာဂတ်အစီအစဉ်မှာ ပါဝင်ခြင်း မရှိတော့တာပါ။ 

အဲဒါကြောင့် ကော်တင်ဟိုဟာ သူ့ရဲ့စာချုပ်ကို စောစီးစွာ ဖျက်သိမ်းဖို့ အက်စတွန်ဗီလာအသင်းနဲ့ ဆွေးနွေးမှုတွေ ပြုလုပ်ခဲ့တယ်လို့ UOL သတင်းမှာ ဖော်ပြထားတာ ဖြစ်ပါတယ်။ 

ကော်တင်ဟိုဟာ ပြီးခဲ့တဲ့ရာသီက ကာတာကလပ် အယ်လ်ဒူဟေးအသင်းမှာ ရာသီအကုန်ထိ အငှားစာချုပ်နဲ့ သွားရောက် ကစားခဲ့တာပါ။

အယ်လ်ဒူဟေးအသင်းဟာ ကော်တင်ဟိုကို စာချုပ်သက်တမ်းတိုးဖို့ ငြင်းဆန်ခဲ့လို့ အက်စတွန်ဗီလာအသင်းထံ ပြန်လည်ရောက်ရှိလာခဲ့တာ ဖြစ်ပါတယ်။ 

 ကော်တင်ဟိုကိုတွေ့ရစဉ်

ကော်တင်ဟိုဟာ အက်စတွန်ဗီလာအသင်းနဲ့ စာချုပ်ဖျက်သိမ်းနိုင်ခဲ့ရင် သူ့ရဲ့ငယ်ဘဝကလပ်ဖြစ်တဲ့ ဗတ်စကိုဒဂါးမားအသင်းထံ ပြန်ဖို့ စီစဉ်ထားတာပါ။ 

ဘရာဇီးလ်ကစားသမားဟာ ဗတ်စကိုဒဂါးမားအသင်းကနေ ထွက်ခွာအပြီးမှာ အင်တာမီလန်အသင်းထံ ပြောင်းပြီး ဥရောပဘောလုံးလောကမှာ ကျင်လည်နေခဲ့တာ ဖြစ်ပါတယ်။ 

ကော်တင်ဟိုဟာ အင်တာမီလန်အသင်းကနေ လီဗာပူးလ်အသင်းထံ ပြောင်းရွှေ့ခဲ့ပြီး ၅ ရာသီအကြာမှာ ဘာစီလိုနာအသင်းထံ ပြောင်းရွှေ့ကြေး အများအပြားနဲ့ ပြောင်းရွှေ့ခဲ့တာပါ။

ကော်တင်ဟိုဟာ ဘာစီလိုနာအသင်းမှာ ခြေစွမ်းပြသနိုင်ခဲ့ခြင်းမရှိလို့ ဘိုင်ယန်မြူးနစ်နဲ့ အက်စတွန်ဗီလာအသင်း တွေမှာ အငှားနဲ့သွားရောက်ကစားခဲ့ပြီး နောက်ပိုင်းမှာ အက်စတွန်ဗီလာအသင်းထံ အပြီးသတ် ပြောင်းရွှေ့ခဲ့တာ ဖြစ်ပါတယ်။ 

ကော်တင်ဟိုဟာ အက်စတွန်ဗီလာအသင်းအတွက် ၄၃ ပွဲ ပါဝင်ကစားခဲ့ပြီး ၆ ဂိုး သွင်းယူနိုင်ခဲ့တာပါ။

အက်စတွန်ဗီလာအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၄ နဲ့ ရာသီအဆုံးသတ်ခဲ့လို့ လာမယ့်ရာသီ ချန်ပီယံလိဂ်ပြိုင်ပွဲကို ပထမဆုံးအကြိမ် ဝင်ရောက်ယှဉ်ပြိုင်ခွင့် ရရှိမှာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၂၃

၂၀၂၃-၂၄ ရာသီ ယူရိုပါလိဂ်ဗိုလ်လုပွဲအဖြစ် အတ္တလန်တာအသင်းနဲ့ လေဗာကူဆင်အသင်းတို့ ကစားခဲ့တာမှာ အတ္တလန်တာအသင်းက ၃ ဂိုး- ဂိုးမရှိနဲ့အနိုင်ရပြီး ချန်ပီယံဖလားကို ရရှိသွားခဲ့ပါတယ်။

ဒီပွဲမှာ အတ္တလန်တာအသင်းအတွက် ၃ ဂိုးစလုံးကို လွတ်ခ်မန်း တစ်ဦးတည်းက သွင်းယူခဲ့တာပါ။ နိုင်ဂျီးရီးယား တောင်ပံကစားသမား လွတ်ခ်မန်းဟာ ယူရိုပါလိဂ်ဗိုလ်လုပွဲမှာ ဟက်ထရစ်သွင်းယူနိုင်တဲ့ ပထမဆုံး ကစားသမား အဖြစ်လည်း မှတ်တမ်းဝင်ခဲ့ပါတယ်။ 

အတ္တလန်တာအသင်းဟာ အသင်းသမိုင်းတစ်လျှောက် ပထမဆုံး ဥရောပ ဖလားဖြစ်တဲ့ ယူရိုပါလိဂ်ဖလားကို ရယူနိုင်ခဲ့သလို ဆုဖလားရယူနိုင်ဖို့ ၆၁ နှစ်ကြာစောင့်ဆိုင်းခဲ့ရတာကိုလည်း အဆုံးသတ်နိုင်ခဲ့တာပါ။ 

ဒီရာသီမှာ ပြိုင်ပွဲစုံ ၅၁ ပွဲဆက်ရှုံးပွဲမရှိတဲ့ လေဗာကူဆင်အသင်းဟာ အတ္တလန်တာအသင်းကို အရေးနိမ့်ခဲ့တာ ကြောင့် ရှုံးပွဲမရှိသေးတဲ့ စံချိန်ရပ်တန့်သွားခဲ့ပါတယ်။ 

လေဗာကူဆင်အသင်းဟာ ယူရိုပါလိဂ်ဗိုလ်လုပွဲရှုံးပွဲကြောင့် ဒီရာသီဆုဖလား ၃ လုံးရယူနိုင်မယ့် မျှော်လင့်ချက်အဆုံးသတ်သွားခဲ့ရတာပါ။ 

လေဗာကူဆင်အသင်းနည်းပြ ဇာဘီ အလွန်ဆိုက ရှုံးပွဲကြောင့် နာကျင်ခဲ့ရပေမယ့် အသင်းအတွက် ဂုဏ်ယူမိတယ်လို့ ပြောခဲ့ပါတယ်။

ဇာဘီအလွန်ဆိုက “အတ္တလန်တာက ကျနော်တို့ထက်ပိုကောင်းပြီး ဆုဖလားနဲ့ထိုက်တန်ပါတယ်။ ကျနော်တို့ လုပ်ခဲ့တဲ့အရာတွေက ထူးခြားခဲ့ပေမယ့် ဒီရှုံးပွဲကြောင့် နာကျင်ရပါတယ်။ ဒီပွဲကနေပြီး ကျနော်တို့ သင်ယူမှုတွေ ပြုလုပ်ရမှာပါ။ ပြီးတော့ နာကျင်မှုတွေကို ဘယ်လိုကိုင်တွယ်ရမလဲဆိုတာ ကျနော်တို့အတွက် စိန်ခေါ်မှုတစ်ခုပါပဲ” လို့ ပြောခဲ့တာပါ။

အတ္တလန်တာအသင်းဟာ ယူရိုပါလိဂ်ပြိုင်ပွဲမှာ ဗိုလ်စွဲခဲ့တာကြောင့် လာမယ့်ရာသီ ချန်ပီယံလိဂ်ပြိုင်ပွဲကို ယှဉ်ပြိုင် ခွင့်ရရှိသွားပြီဖြစ်ပါတယ်။ အတ္တလန်တာအသင်းဟာ ဒီရာသီ စီးရီးအေလက်ကျန်ပွဲစဉ်တွေအဖြစ် တိုရီနို၊ ဖီအိုရင် တီးနားအသင်းတို့နဲ့ ယှဉ်ပြိုင်ရဖို့ရှိနေတာပါ။ လေဗာကူဆင်အသင်းကတော့ ဂျာမန်ပိုကယ်ဖလားဗိုလ်လုပွဲအဖြစ် ကိုင်ဇာစလော့တန်အသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ မေလ ၂၃

ယူနိုက်တက်အသင်းဟာ မန်စီးတီးအသင်းနဲ့ကစားမယ့် FA ဖလားဗိုလ်လုပွဲစဉ်မှာ အသင်းအနိုင်ရခဲ့ရင်တောင် နည်းပြ အဲရစ်တန်ဟတ်ကို ထုတ်ပယ်ဖို့ ဆုံးဖြတ်ထားတယ်လို့ သတင်းတွေ ထွက်ပေါ်လာခဲ့ပါတယ်။

အဲဒါကြောင့် ဒတ်ချ်လူမျိုးနည်းပြ အဲရစ်တန်ဟတ်ဟာ ယူနိုက်တက်အသင်းနည်းပြဘဝ သူ့ရဲ့ နောက်ဆုံးပွဲစဉ် အဖြစ် FA ဖလားဗိုလ်လုပွဲကို တာဝန်ယူကိုင်တွယ်ပြီး ထွက်ခွာရတော့မှာပါ။ 

ယူနိုက်တက်အသင်းဟာ လက်ရှိအချိန်မှာ အဲရစ်တန်ဟတ်ရဲ့ နေရာကို အစားထိုးဖို့ နည်းပြသစ်တွေ စတင် ရှာဖွေနေပြီ ဖြစ်ပါတယ်။ 

အဲရစ်တန်ဟတ်ဟာ ဒီရာသီ ယူနိုက်တက်အသင်းရဲ့ ရလဒ်ဆိုးတွေကြောင့် ဖိအားတွေအောက်ကို ကျရောက် နေတာပါ။

ယူနိုက်တက်အသင်းဟာ ပရီးမီးယားလိဂ်မှာ အဆိုးရွားဆုံး ရပ်တည်မှုအဖြစ် အဆင့် ၈ နဲ့ ရာသီအဆုံးသတ်ခဲ့ပြီး FA ဖလားဗိုလ်လုပွဲမှာ မန်စီးတီးအသင်းကို အနိုင်ရရှိမှသာ လာမယ့်ရာသီ ဥရောပပြိုင်ပွဲကို ယှဉ်ပြိုင်ခွင့်ရရှိမှာ ဖြစ်ပါ တယ်။

ယူနိုက်တက်အသင်းဟာ နည်းပြသစ်အဖြစ် ခန့်အပ်ဖို့ အစ်စဝှချ်အသင်းနည်းပြ မက်ကန်နာ၊ အင်္ဂလန်အသင်း နည်းပြ ဆောက်ဂိတ်၊ ဘိုင်ယန်မြူးနစ်အသင်း နည်းပြဟောင်း တူချယ်လ်နဲ့ ချယ်လ်ဆီးအသင်း နည်းပြဟောင်း ပိုချက်တီနိုတို့ကို နည်းပြလောင်းစာရင်းထဲ ထည့်သွင်းထားတာပါ။

ယူနိုက်တက်အသင်းနည်းပြ အဲရစ်တန်ဟတ်ကို တွေ့ရစဉ်

အဲရစ်တန်ဟတ်ကတော့ ယူနိုက်တက်အသင်း နည်းပြရာထူးအတွက် ဆက်ပြီးတိုက်ပွဲဝင်မယ်လို့ ပြောထားပေမယ့် ပူးတွဲပိုင်ရှင် ဆာဂျင်ရက်ကလစ်ဖ်နဲ့ INEOS တို့က နည်းပြ အပြောင်းအလဲပြုလုပ်ဖို့ ဆုံးဖြတ်ထားတာ ဖြစ်ပါတယ်။ 

ယူနိုက်တက်အသင်း ပရိသတ်အချို့က သူတို့ရဲ့ ဆိုရှယ်မီဒီယာတွေမှာ အဲရစ်တန်ဟတ်ကို ထုတ်ပယ်ပြီး ပိုချက်တီနိုကို နည်းပြသစ်အဖြစ် ခန့်အပ်ဖို့ တောင်းဆိုမှုတွေရှိနေကြတာပါ။

အသက် ၅၄ နှစ်အရွယ်ရှိ အဲရစ်တန်ဟတ်ဟာ ၂၀၂၂ ခုနှစ် နွေရာသီက ယူနိုက်တက်အသင်းကို စတင် တာဝန်ယူ ခဲ့တာဖြစ်ပြီး လက်ရှိအချိန်ထိ ပွဲပေါင်း ၁၁၃ ပွဲ ကိုင်တွယ်ထားခဲ့တာမှာ ၆၅ ပွဲ အနိုင်ရပြီး ၁၇ ပွဲသရေနဲ့ ၃၁ ပွဲ ရှုံးနိမ့်ထားပါတယ်။ 

ဒတ်ချ်လူမျိုးနည်းပြဟာ ပြီးခဲ့တဲ့ရာသီက ယူနိုက်တက်အသင်းကို ကာရာဘောင်းဖလား ရယူပေးနိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၂၂

ပိုချက်တီနိုဟာ ချယ်လ်ဆီးအသင်းကို တစ်ရာသီကြာ ကိုင်တွယ်အပြီးမှာ နှစ်ဦးသဘောတူညီမှုနဲ့ ထွက်ခွာပြီလို့ ကလပ်အသင်းက ကြေညာချက်ထုတ်ပြီး အတည်ပြုခဲ့ပါတယ်။

ပိုချက်တီနိုဟာ အသင်းပူးတွဲပိုင်ရှင်၊ အားကစားဒါရိုက်တာတွေနဲ့ ဆွေးနွေးမှုတွေ ပြုလုပ်အပြီးမှာ ချယ်လ်ဆီး အသင်းကနေ ထွက်ခွာခဲ့တာပါ။ 

အာဂျင်တီးနားလူမျိုး နည်းပြဟာ ဒီရာသီမှာ ချယ်လ်ဆီးအသင်းရဲ့ ရလဒ်တွေ မတည်မငြိမ်မှုကြောင့် ထုတ်ပယ် ခံရမယ့်သတင်းတွေ မကြာခဏ ထွက်ပေါ်ခဲ့ပေမယ့် အသင်းကို ပရီးမီးယားလိဂ်ပြိုင်ပွဲမှာ အဆင့် ၆ နေရာနဲ့ ရာသီအဆုံးသတ်နိုင်အောင် ကိုင်တွယ်ပေးနိုင်ခဲ့ပါတယ်။ 

ပိုချက်တီနိုဟာ ချယ်လ်ဆီးအသင်းကို ပရီးမီးယားလိဂ် ပြိုင်ပွဲကနေ ဥရောပဝင်ခွင့် ရရှိအောင် ကိုင်တွယ်ပေးနိုင် ခဲ့သလို ကာရာဘောင်းဖလားပြိုင်ပွဲမှာ ဗိုလ်လုပွဲနဲ့ FA ဖလားပြိုင်ပွဲမှာ ဆီမီးဖိုင်နယ် ရောက်ရှိအောင် ပို့ဆောင် ပေးနိုင်ခဲ့တာပါ။ 

ဒါပေမယ့် ချယ်လ်ဆီးအသင်းနဲ့ စာချုပ် ၁ နှစ်သာ ကျန်ရှိတော့တဲ့ ပိုချက်တီနိုဟာ နှစ်ဦးသဘောတူညီမှုနဲ့ ထွက်ခွာဖို့ ဆုံးဖြတ်ခဲ့တာ ဖြစ်ပါတယ်။

 ပိုချက်တီနိုကို တွေ့ရစဉ်

ပိုချက်တီနိုက "ချယ်လ်ဆီးအသင်း ဘောလုံးသမိုင်းမှာ ပါဝင်ခွင့်ရခဲ့တဲ့ အခွင့်အရေးအတွက် အသင်းပိုင်ရှင်အဖွဲ့နဲ့ အားကစားဒါရိုက်တာတွေကို ကျေးဇူးတင်ပါတယ်။ ချယ်လ်ဆီးအသင်းဟာ လာမယ့်နှစ်တွေမှာ ပရီးမီးယားလိဂ်နဲ့ ဥရောပပြိုင်ပွဲမှာ ရှေ့ဆက်သွားနိုင်ဖို့ ကောင်းမွန်တဲ့ အနေအထားမှာ ရှိနေတယ်"လို့ ပြောပါတယ်။

ချယ်လ်ဆီးအသင်းဟာ နည်းပြသစ်အဖြစ် ခန့်အပ်ဖို့ လူငယ်နည်းပြတွေဖြစ်တဲ့ အစ်စဝှချ်အသင်းနည်းပြ မက်ကန်နာ၊ ဘရိုက်တန်အသင်း နည်းပြဟောင်း ဒီဇာဘီနဲ့ စပို့တင်းလစ္စဘွန်း အသင်းနည်းပြ အေမိုရင်မ်တို့ကို ပစ်မှတ်ထားနေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၂၁

အာဂျင်တီးနားအသင်းဟာ ၂၀၂၄ ကိုပါအမေရိကဖလား ပြိုင်ပွဲမတိုင်ခင် ခြေစမ်းပွဲအတွက် ကစားသမား ၂၉ ဦးပါ လူစာရင်းကို ထုတ်ပြန်ခဲ့ပါတယ်။

မက်ဆီ ဦးဆောင်တဲ့ အာဂျင်တီးနားအသင်းဟာ ဇွန်လ ၉ ရက်မှာ အီကွေဒေါ၊ ၁၄ ရက်မှာ ဂွါတီမာလာအသင်းတို့နဲ့ ခြေစမ်းပွဲယှဉ်ပြိုင်သွားမှာပါ။ 

အာဂျင်တီးနားအသင်းဟာ ဒီလူစာရင်းထဲမှာ ၂၀၂၂ ကမ္ဘာ့ဖလားပြိုင်ပွဲမှာ ချန်ပီယံဖြစ်ခဲ့တဲ့ ကစားသမား ၂၆ ဦး ထဲက ၂၂ ဦးကို ရွေးချယ်ခဲ့တာ ဖြစ်ပါတယ်။

ဒိုင်ဘားလား၊ ဂျူအန်ဖွိုက်နဲ့ အယ်လ်မာဒါတို့ကတော့ လူစာရင်းကနေ ချန်လှပ်ခံခဲ့ရတာပါ။ 

ယူနိုက်တက်အသင်းမှာ ခြေစွမ်းပြသနေတဲ့ လူငယ်ကြယ်ပွင့် ဂါနာချိုဟာ အာဂျင်တီးနားအသင်းရဲ့ ကစားသမား ၂၉ ဦးစာရင်းမှာ ပါဝင်လာခဲ့ပြီး လာမယ့်ခြေစမ်းပွဲတွေမှာ အကောင်းဆုံး စွမ်းဆောင်ကာ ကိုပါအမေရိကဖလား ပြိုင်ပွဲအတွက် အပြီးသတ်လူစာရင်းမှာ ပါဝင်နိုင်ဖို့ မျှော်လင့်နေတာ ဖြစ်ပါတယ်။

အာဂျင်တီးနားအသင်းကို တွေ့ရစဉ်
 
ကိုပါအမေရိကဖလားပြိုင်ပွဲကို ဝင်ရောက်ယှဉ်ပြိုင်ကြမယ့် နိုင်ငံအသင်းတွေဟာ သူတို့ရဲ့နောက်ဆုံး လူစာရင်းကို ဇွန်လ ၁၅ ရက် နောက်ဆုံးထားပြီး ပြိုင်ပွဲကျင်းပရေးထံ တင်သွင်းရမှာပါ။ 

ပြိုင်ပွဲဝင်အသင်းတွေကို ကစားသမား ၂၃ ဦးကနေ ၂၆ ဦးအထိ ရွေးချယ်ခွင့်ပြုခဲ့တာကြောင့် အာဂျင်တီးနားအသင်း ဟာ လက်ရှိရွေးချယ်ထားတဲ့ ကစားသမား ၂၉ ဦးထဲက ၃ ဦးကို လျှော့ချရမှာဖြစ်ပါတယ်။ 

ကိုပါအမေရိကဖလားပြိုင်ပွဲရဲ့ လက်ရှိချန်ပီယံ အာဂျင်တီးနားအသင်းဟာ ၂၀၂၄ ပြိုင်ပွဲရဲ့ အုပ်စု A မှာ ကနေဒါ၊ ချီလီ၊ ပီရူးတို့နဲ့ တစ်အုပ်စုတည်း ကျရောက်နေတာပါ။ 

ဇွန်လ ၂၀ ရက်ကနေ ဇူလိုင် ၁၄ ရက်အထိ ကျင်းပမယ့် ကိုပါအမေရိကဖလားပြိုင်ပွဲမှာ အာဂျင်တီးနားအသင်းဟာ အုပ်စုအဖွင့်ပွဲစဉ်အဖြစ် ဇွန်လ ၂၀ ရက်မှာ ကနေဒါအသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၂၁

လေဗာကူဆင်အသင်း ကွင်းလယ်တိုက်စစ် ကစားသမား ဖလော်ရီယန်ဝစ်ဇ်ဟာ ၂၀၂၃-၂၄ ရာသီ ဘွန်ဒက်လီဂါ ပြိုင်ပွဲရဲ့ တစ်နှစ်တာ အကောင်းဆုံး ကစားသမားအဖြစ် မဲပေးရွေးချယ်ခံခဲ့ရပါတယ်။

ဖလော်ရီယန်ဝစ်ဇ်ဟာ လေဗာကူဆင်အသင်းကို တစ်ရာသီလုံး ရှုံးပွဲမရှိ စံချိန်နဲ့ ဘွန်ဒက်လီဂါ ဆုဖလားကို ပထမဆုံးအကြိမ် ရရှိအောင် စွမ်းဆောင်ပေးနိုင်ခဲ့တာကြောင့် ဒီဆုကို ရရှိခဲ့တာပါ။ 

ဖလော်ရီယန်ဝစ်ဇ်ဟာ ဒီရာသီ ဘွန်ဒက်လီဂါ ၃၂ ပွဲ ကစားခဲ့ပြီး ၁၁ ဂိုးသွင်းယူကာ ၁၂ ဂိုး ဖန်တီးနိုင်ခဲ့တာ ဖြစ်ပါတယ်။ 

ဂျာမနီကစားသမားဟာ ပြီးခဲ့တဲ့ ဧပြီက ဝါဒါဘရီမင်အသင်းကို ၅ ဂိုး-ဂိုးမရှိနဲ့ လေဗာကူဆင်အသင်း အနိုင်ရတဲ့ပွဲမှာ လူစားဝင် ကစားသမားအဖြစ် ဝင်ရောက်ပြီး ဟက်ထရစ်သွင်းကာ အသင်းကို အမှတ်ပေးဖလားရယူနိုင်ဖို့ သေချာ စေခဲ့တာပါ။

ဖလော်ရီယန်ဝစ်ဇ်ဟာ ဘွန်ဒက်လီဂါပြိုင်ပွဲရဲ့ တစ်လတာ အကောင်းဆုံး ကစားသမားဆုကို ၃ ကြိမ် ရယူနိုင်ခဲ့ ပါတယ်။ 

လေဗာကူဆင်အသင်းမှာ ပြသနေတဲ့ ခြေစွမ်းတွေကြောင့် ဖလော်ရီယန်ဝစ်ဇ်ဟာ ယူရို ၂၀၂၄ ပြိုင်ပွဲဝင်မယ့် ဂျာမနီအသင်း လူစာရင်းမှာ ရွေးချယ်ခံထားရကာ ပြီးခဲ့တဲ့ မတ်လက ပြင်သစ်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ခြေစမ်းပွဲမှာ ဂျာမနီအသင်းအတွက် အဖွင့်ဂိုးသွင်းယူပေးခဲ့တာပါ။

ဖလော်ရီယန်ဝစ်ဇ်ကို တွေ့ရစဉ်

ဘွန်ဒက်လီဂါပြိုင်ပွဲရဲ့ တစ်နှစ်တာ အကောင်းဆုံး လူငယ်ကစားသမားဆုကို လေဗာကူဆင်အသင်း တိုက်စစ်မှူး ဘွန်နီဖေ့စ်က ရရှိခဲ့ပါတယ်။

ဘွန်နီဖေ့စ်ဟာ ဒီရာသီ ဘွန်ဒက်လီဂါပြိုင်ပွဲမှာ လေဗာကူဆင်အသင်းအတွက် ၂၃ ပွဲကစားပြီး ၁၄ ဂိုးသွင်းယူကာ ၁၀ ဂိုးဖန်တီးနိုင်ခဲ့တာပါ။ 

ဘွန်ဒက်လီဂါရဲ့ အကောင်းဆုံးဆုတွေကို ပရိသတ်တွေပေးတဲ့မဲ ၄၀ ရာခိုင်နှုန်း၊ ကလပ်အသင်းတွေကပေးတဲ့ မဲ ၃၀ ရာခိုင်နှုန်းနဲ့ ကျွမ်းကျင်သူတွေပေးတဲ့ မဲ ၃၀ ရာခိုင်နှုန်းပေါ် မူတည်ပြီး ဆုံးဖြတ်တာဖြစ်ပါတယ်။ 

ဘွန်ဒက်လီဂါ ပြိုင်ပွဲ ပြီးဆုံးသွားပေမယ့် လေဗာကူဆင်အသင်းကတော့ ယူရိုပါလိဂ်နဲ့ ပိုကယ်ဖလားဗိုလ်လုပွဲကို ဆက်ပြီးယှဉ်ပြိုင်ရဖို့ ရှိနေတာပါ။ 

လေဗာကူဆင်အသင်းဟာ မေလ ၂၃ ရက်မှာ ယူရိုပါလိဂ်ဗိုလ်လုပွဲအဖြစ် အတ္တလန်တာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ မေလ ၂၁

ဘိုင်ယန်မြူးနစ်အသင်းဟာ နည်းပြ တူချယ်လ်ရဲ့ နေရာမှာ ဆက်ခံဖို့အတွက် ဘန်လေအသင်းနည်းပြ ကွန်ပနီကို ချိတ်ဆက်မှုတွေ ပြုလုပ်ခဲ့တယ်လို့ နာမည်ကြီး ဂျာနယ်လစ်တွေဖြစ်တဲ့ ဖာဘရီဇီယိုရိုမန်နိုနဲ့ ခရစ္စတီယန်ဖော့ခ် တို့က ဖော်ပြထားပါတယ်။

ကွန်ပနီဟာ ဘန်လေအသင်းကို ချန်ပီယံရှစ်ကနေ ပရီးမီးယားလိဂ်ထံ တန်းတက်နိုင်အောင် ကိုင်တွယ်ပေးနိုင်ခဲ့ ပေမယ့် တစ်ရာသီအကြာမှာ ချန်ပီယံရှစ်ကို တန်းပြန်ဆင်းခဲ့ရတာပါ။

ဒါပေမယ့် ဘိုင်ယန်မြူးနစ်အသင်းဟာ ကွန်ပနီကို နည်းပြသစ်အဖြစ် ခန့်အပ်နိုင်ဖို့နဲ့ ပတ်သက်ပြီး အတွင်းပိုင်းမှာ ဆွေးနွေးမှုတွေ ပြုလုပ်ခဲ့တာ ဖြစ်ပါတယ်။ 

ကွန်ပနီဟာ ဘိုင်ယန်မြူးနစ်အသင်း လိုချင်တဲ့ပုံစံနဲ့ ကိုက်ညီမှု ရှိတယ်လို့လည်း သတင်းတွေမှာ ဖော်ပြထားတာပါ။

ကွန်ပနီကို ခေါ်ယူဖို့ ပရီးမီးယားလိဂ် ကလပ်အသင်းတွေနဲ့ ကမ္ဘာပေါ်မှာရှိတဲ့ ကလပ်အသင်း အချို့ကလည်း စောင့်ကြည့်နေတယ်လို့ ဖာဘရီဇီယိုရိုမန်နိုက ပြောထားတာ ဖြစ်ပါတယ်။ 

ဘရိုက်တန်အသင်းဟာ နည်းပြ ဒီဇာဘီ ထွက်ခွာသွားတာကြောင့် ကွန်ပနီကို နည်းပြအဖြစ် ခန့်အပ်ဖို့ စိတ်ဝင် စားနေတာပါ။ 

ဘိုင်ယန်မြူးနစ်အသင်းကို တွေ့ရစဉ်

ဘိုင်ယန်မြူးနစ်အသင်းဟာ လက်ရှိအချိန်မှာ နည်းပြသစ် ရှာဖွေမှု အဆင်မပြေဖြစ်နေတဲ့အတွက် တူချယ်လ်ကို အသင်းမှာ ဆက်ထားဖို့ ကြိုးစားခဲ့တာမှာလည်း သဘောတူညီမှု မရရှိခဲ့တာဖြစ်ပါတယ်။

ဘိုင်ယန်မြူးနစ်အသင်းဟာ ပြီးခဲ့တဲ့ ဘွန်ဒက်လီဂါပြိုင်ပွဲမှာ အဆင့် ၃ နဲ့ ရာသီ အဆုံးသတ်ခဲ့ပြီး ဆုဖလား အောင်မြင်မှုလည်း မရခဲ့တာကြောင့် ဆိုးရွားတဲ့ရာသီ ဖြစ်ခဲ့တာပါ။ 

ဘိုင်ယန်မြူးနစ်အသင်းဟာ ကွန်ပနီအပြင် ရော်ဂျာရှမစ်၊ ဇီဒန်း၊ ဟန်ဆီဖလစ်ခ်နဲ့ မော်ရင်ဟိုတို့ကိုလည်း နည်းပြ ရာထူးအတွက် ချိတ်ဆက်မှုတွေ ပြုလုပ်ထားတာ ဖြစ်ပါတယ်။

ကွန်ပနီနဲ့ ဘန်လေအသင်းတို့ ချုပ်ဆိုထားတဲ့ စာချုပ်ဟာ ၂၀၂၈ ခုနှစ်အထိ သက်တမ်းရှိနေပါတယ်။

ကွန်ပနီဟာ ဘန်လေအသင်းနဲ့အတူ ဆိုးရွားတဲ့ရာသီကို ဖြတ်သန်းခဲ့ပြီးနောက် အနားယူမှုတွေ ပြုလုပ်ပြီးမှသာ အနာဂတ်ကို ဆုံးဖြတ်ဖို့ ဘန်လေအသင်း တာဝန်ရှိသူတွေနဲ့ ဆွေးနွေးမှုတွေ ပြုလုပ်သွားမှာ ဖြစ်ပါတယ်။

Source: Goal