CNI Sport News

၂၀၂၄ ခုနှစ်၊ ဒီဇင်ဘာ ၁၇

အာဆင်နယ်အသင်းမှာ အငှားကစားသမားဘဝကို စိတ်ပျက်ဖွယ် ဖြတ်သန်းနေရတဲ့ စတာလင်ဟာ လာမယ့် ဇန်နဝါရီ အပြောင်းအရွှေ့မတိုင်ခင် သူ့ရဲ့အနာဂတ်နဲ့ ပတ်သက်ပြီး ဆုံးဖြတ်ချက်ချခဲ့ပါတယ်။

ပြီးခဲ့တဲ့ သြဂုတ်က ချယ်လ်ဆီးအသင်းကနေ အာဆင်နယ်အသင်းထံ အငှားနဲ့ပြောင်းရွှေ့လာခဲ့တဲ့ စတာလင်ဟာ ကွင်းထဲမှာ သက်ရောက်မှုရှိတဲ့အရာတွေ အများကြီး ပြုလုပ်နိုင်ခြင်း မရှိသေးပါဘူး။ 

စတာလင်ဟာ အာဆင်နယ်အသင်းအတွက် ၁၀ ပွဲသာ ပါဝင်ကစားခွင့် ရရှိထားပြီး ၁ ဂိုး သွင်းယူကာ ၂ ဂိုး ဖန်တီးထားပါတယ်။ 

အင်္ဂလန်ကစားသမားဟာ ပြီးခဲ့တဲ့ အာဆင်နယ်အသင်းရဲ့ ပရီးမီးယားလိဂ်နဲ့ ချန်ပီယံလိဂ် ၃ ပွဲမှာ ပါဝင်ကစားခွင့် မရရှိခဲ့တာပါ။ 

The London Standard က စတာလင်ဟာ ပွဲကစားချိန် နည်းပါးနေပေမယ့် အာဆင်နယ်အသင်းမှာ ဆက်ရှိနေဖို့ ဆုံးဖြတ်ခဲ့တယ်လို့ ဖော်ပြထားပါတယ်။ 

စတာလင်ဟာ ဇန်နဝါရီ အပြောင်းအရွှေ့မှာ ပုံမှန်ကစားခွင့် ရနိုင်မယ့် အသင်းကို ရှာဖွေဖို့အတွက် အာဆင်နယ် အသင်းနဲ့ အငှားစာချုပ်ကို ဖြတ်ပစ်ဖို့ အစီအစဉ်မရှိတာပါ။ 

စတာလင်ကိုတွေ့ရစဉ်

အာဆင်နယ်အသင်းရဲ့ အဝတ်လဲခန်းထဲမှာ အရေးပါတဲ့သူဖြစ်တဲ့ စတာလင်ဟာ ဒုတိယရာသီဝက်မှာ အသင်း အတွက် ပိုပြီးပါဝင်ကစားနိုင်ဖို့ ဆုံးဖြတ်ထားပါတယ်။ 

အာဆင်နယ်အသင်းနည်းပြ အာတီတာက စတာလင်ဟာ ပွဲကစားဖို့ စိတ်အားထက်သန်နေပေမယ့် အသင်းရဲ့ ဒဏ်ရာတွေ၊ ပွဲပယ်တွေကြောင့် သူ့ရဲ့ ပွဲကစားချိန် မိနစ်တွေဟာ အကန့်အသတ် ဖြစ်စေခဲ့တယ်လို့ ပြောထား တာပါ။ 

စတာလင်ဟာ အာဆင်နယ်အသင်းနဲ့ အငှားစာချုပ် ကုန်ဆုံးမယ့် ဒီရာသီအကုန်မှာ ချယ်လ်ဆီးအသင်းထံ ပြန်ရမှာ ဖြစ်ပါတယ်။ 

၂၀၂၂ ခုနှစ်က မန်စီးတီးအသင်းကနေ ၅ နှစ်စာချုပ်နဲ့ ပြောင်းရွှေ့လာခဲ့တဲ့ စတာလင်နဲ့ ချယ်လ်ဆီးအသင်းတို့ရဲ့ စာချုပ်ဟာ ၂၀၂၇ ခုနှစ် ရာသီအကုန်ထိ သက်တမ်းရှိနေတာပါ။ 

ချယ်လ်ဆီးအသင်းကတော့ စတာလင်ကို အသင်းထံ ပြန်ရောက်လာချိန်မှာ အပြီးသတ်ရောင်းချ ဒါမှမဟုတ် ထပ်ပြီး အငှားချသွားဖို့ရှိနေတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဒီဇင်ဘာ ၁၇

ဘာစီလိုနာအသင်းကြယ်ပွင့် ယာမဲလ်ဟာ လီဂါနက်စ်အသင်းနဲ့ ပွဲစဉ်မှာ ရရှိခဲ့တဲ့ ခြေချင်းဝတ် အရွတ်ဒဏ်ရာ ကြောင့် အသလက်တီကိုအသင်းနဲ့ လာလီဂါ ပွဲကြီးပွဲကောင်းကို လွဲချော်မှာ ဖြစ်ပါတယ်။ 

အသက် ၁၇ နှစ်အရွယ်ရှိ ယာမဲလ်ဟာ ဘာစီလိုနာအသင်းက လီဂါနက်စ်အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ ပွဲစဉ်ရဲ့ပထမပိုင်းမှာ ဒဏ်ရာရရှိခဲ့ပေမယ့် ပွဲချိန် ၇၅ မိနစ်အထိ ပါဝင်ကစားသွားခဲ့တာပါ။ 

ယာမဲလ်ဟာ ပြီးခဲ့တဲ့ နိုဝင်ဘာ ၆ ရက်က ရက်ဒ်စတားဘဲလ်ဂရိတ်အသင်းနဲ့ ချန်ပီယံလိဂ် ပွဲစဉ်တုန်းကလည်း ခြေချင်းဝတ်ဒဏ်ရာ ရရှိခဲ့တာကြောင့် ဘာစီလိုနာအသင်းရဲ့ ပွဲစဉ် ၃ ပွဲနဲ့ စပိန်အသင်းရဲ့ ပွဲစဉ် ၂ ပွဲကို လွဲချော် ခဲ့သေးတာ ဖြစ်ပါတယ်။ 

ဘာစီလိုနာအသင်းဟာ လီဂါနက်စ်အသင်းနဲ့ ပွဲစဉ်မှာ ရရှိခဲ့တဲ့ ယာမဲလ်ရဲ့ ဒဏ်ရာ အခြေအနေကို စမ်းသပ်မှုတွေ ပြုလုပ်ခဲ့တာမှာ ခြေချင်းဝတ်အရွတ်ဒဏ်ရာရရှိခဲ့တယ်လို့ ထုတ်ပြန်ထားတာပါ။ 

အဲဒါကြောင့် ယာမဲလ်ဟာ ၃ ပတ်ကနေ ၄ ပတ်ကြာအထိ အနားယူရဖွယ် ရှိနေပါတယ်။ 

ယာမဲလ်ကို တွေ့ရစဉ်

ဘာစီလိုနာအသင်း အတွက်တော့ ယာမဲလ်ရဲ့ ဒဏ်ရာဟာ ထိုးနှက်ချက်ဖြစ်ခဲ့ပြီး သူ့ကို အသလက်တီကို အသင်းနဲ့ ပွဲစဉ်မှာ အသုံးပြုလို့ရတော့မှာ မဟုတ်ပါဘူး။ 

ယာမဲလ်ဟာ ဒီရာသီမှာ ဘာစီလိုနာအသင်းအတွက် ၂၁ ပွဲ ပါဝင်ကစားထားပြီး ၆ ဂိုးသွင်းယူကာ ၁၂ ဂိုး ဖန်တီးထား တာပါ။ 

ဘာစီလိုနာအသင်းနဲ့ အသလက်တီကိုအသင်းတို့ဟာ ဒီရာသီ လာလီဂါပြိုင်ပွဲမှာ ရမှတ်တူညီနေပြီး အသလက်တီကို အသင်းက ၁ ပွဲကစားဖို့ ကျန်ရှိနေသေးပါတယ်။

ဘာစီလိုနာအသင်းဟာ အသလက်တီကို အသင်းနဲ့ပွဲပြီးရင် လာလီဂါရဲ့ ဆောင်းရာသီ အားလပ်ရက်ကြောင့် အနားရရှိမှာဖြစ်ပြီး ဇန်နဝါရီ ၄ ရက်မှ ကိုပါဒယ်ရေးဖလား ပွဲစဉ်အဖြစ် ဘာဘာစထရိုအသင်းနဲ့ ယှဉ်ပြိုင်ရမှာပါ။ 

ဘာစီလိုနာအသင်းဟာ ဇန်နဝါရီ ၈ ရက်မှာ စပိန်စူပါကိုပါ ဆီမီးဖိုင်နယ်ပွဲစဉ်အဖြစ် ဆော်ဒီနိုင်ငံကို သွားရောက် ကာ ဘီလ်ဘာအိုအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၁၇

နိုင်ဂျီးရီးယားနဲ့ အတ္တလန်တာအသင်း တိုက်စစ်မှူး လွတ်ခ်မန်းဟာ ၂၀၂၄ ခုနှစ်အတွက် အာဖရိကတစ်နှစ်တာ အကောင်းဆုံး အမျိုးသားဘောလုံးသမားဆုကို ရရှိသွားခဲ့ပါတယ်။ 

အသက် ၂၇ နှစ်အရွယ်ရှိ လွတ်ခ်မန်းဟာ ပြီးခဲ့တဲ့ရာသီက ယူရိုပါလိဂ်ပြိုင်ပွဲမှာ အတ္တလန်တာအသင်း ချန်ပီယံဆု ရရှိအောင် ဗိုလ်လုပွဲမှာ ဟက်ထရစ် ဂိုးသွင်းယူနိုင်ခဲ့တာပါ။

ဒါအပြင် လွတ်ခ်မန်းဟာ ၂၀၂၄ အာဖရိကနိုင်ငံများဖလား ဗိုလ်လုပွဲ ရောက်ရှိခဲ့တဲ့ နိုင်ဂျီးရီးယားအသင်းအတွက် ၃ ဂိုး သွင်းယူပေးနိုင်ခဲ့ပြီး ဒီပြိုင်ပွဲရဲ့ အကောင်းဆုံး အသင်းမှာလည်း ပါဝင်ခဲ့ပါတယ်။ 

လွတ်ခ်မန်းဟာ ပြီးခဲ့တဲ့ရာသီက အတ္တလန်တာအသင်းအတွက် ပြိုင်ပွဲစုံ ၄၅ ပွဲမှာ ၁၇ ဂိုးသွင်းပြီး ၁၀ ဂိုး ဖန်တီး နိုင်ခဲ့ကာ ဒီရာသီမှာ ၁၉ ပွဲ ကစားထားပြီး ၁၁ ဂိုးသွင်းယူထားတာပါ။

အဲဒါကြောင့်လည်း လွတ်ခ်မန်းဟာ မော်ရိုကိုအသင်းက ဟာကီမီ၊ တောင်အာဖရိကအသင်းက ရွန်ဝမ်ဝီလီယံစ်၊ အိုင်ဗရီကို့စ်အသင်းက အဒင်ဂါရာ၊ ဂီနီအသင်းက ဂူရာဆေးတို့ကို မဲအသာရပြီး အာဖရိကတစ်နှစ်တာ အကောင်း ဆုံး အမျိုးသားဘောလုံးသမားဆုကို ရရှိခဲ့တာဖြစ်ပါတယ်။ 

လွတ်ခ်မန်းကို တွေ့ရစဉ်

လွတ်ခ်မန်းက “ဒီဆုဟာ ကောင်းချီးတစ်ခုဖြစ်ပြီး အာဖရိကရဲ့ အကောင်းဆုံး ကစားသမားအဖြစ် အသိအမှတ်ပြု ခံရတာဟာ မယုံနိုင်စရာပါပဲ။ လွန်ခဲ့တဲ့ ၄ နှစ်က ကျနော့်ရဲ့ ကစားသမားဘဝဟာ အဆင်မပြေမှုတွေ ရှိခဲ့ပေမယ့် အခုတော့ အာဖရိကရဲ့ အကောင်းဆုံး ကစားသမားအဖြစ် ဒီမှာရှိနေတာပါ”လို့ ဆုလက်ခံရယူအပြီးမှာ ပြောခဲ့ တာပါ။ 

အာဖရိကတစ်နှစ်တာ အကောင်းဆုံး အမျိုးသမီးဘောလုံးသမားဆုကို အော်လန်ဒိုပရိုက်အသင်း တိုက်စစ်မှူး ဘန်ဒါက ရရှိသွားခဲ့ပါတယ်။ 

ဘန်ဒါဟာ ဒီဆုကိုရရှိတဲ့ ပထမဆုံး ဇမ်ဘီယာအမျိုးသမီး ဘောလုံးသမားအဖြစ်လည်း မှတ်တမ်းဝင်ခဲ့တာပါ။ 

ဘန်ဒါဟာ အော်လန်ဒိုပရိုက်အသင်းအတွက် ခြေစွမ်းပြသပြီး ဆုဖလား ရယူပေးနိုင်ခဲ့တာကြောင့် မကြာသေးခင် က ဘီဘီစီရဲ့ တစ်နှစ်တာ အကောင်းဆုံး အမျိုးသမီးဘောလုံးသမားဆုကိုလည်း ရရှိခဲ့တာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၁၆

ဘရာဇီးလ်တောင်ပံကစားသမား နေမာဟာ အင်တာမိုင်ယာမီအသင်းနဲ့ သတင်းတွေ ထွက်နေပေမယ့် သူကတော့ အယ်လ်ဟီလယ်အသင်းနဲ့အတူ ဖီဖာကလပ် ကလပ်ကမ္ဘာ့ဖလားပြိုင်ပွဲမှာ ပါဝင်ကစားချင်တယ်လို့ ပြောခဲ့ပါတယ်။

နေမာက “ကျနော်ဟာ အယ်လ်ဟီလယ် အသင်းနဲ့အတူ ကောင်းမွန်တဲ့ ရာသီတစ်ခုကို ပိုင်ဆိုင်ချင်ပါတယ်။ ပြီး တော့ ၂၀၂၅ ကလပ် ကမ္ဘာ့ဖလားပြိုင်ပွဲမှာ အယ်လ်ဟီလယ်အသင်းနဲ့ ကစားချင်ပါတယ်။ ဒါဟာ ကလပ်အသင်း အတွက် အလွန်အရေးကြီးပါတယ်။ ကမ္ဘာ့ဖလားဆိုတာ ကစားသမားတိုင်းအတွက် ရည်မှန်းချက်ပါပဲ။ အခုအချိန် ကတော့ ကလပ်အသင်းမှာ ပုံစံကောင်း ရအောင်လုပ်သွားမှာဖြစ်ပြီး ဒါကိုအာရုံစိုက်သွားမယ်”လို့ RMC Sport ကို အနာဂတ်နဲ့ ပတ်သက်ပြီး ပြောခဲ့တာပါ။ 

၂၀၂၃ နွေရာသီက ပီအက်စ်ဂျီအသင်းကနေ ထွက်ခွာလာခဲ့တဲ့ နေမာဟာ ဒဏ်ရာတွေကြောင့် အယ်လ်ဟီလယ် အသင်းအတွက် ၇ ပွဲသာ ပါဝင်ကစားရသေးတာ ဖြစ်ပါတယ်။

နေမာကို တွေ့ရစဉ်

နေမာဟာ ဒဏ်ရာတွေကြောင့် အယ်လ်ဟီလယ်အသင်းနဲ့ စာချုပ်ကုန်ဆုံးချိန်မှာ မေဂျာလိဂ်ထံ ပြောင်းရွှေ့ဖွယ် ရှိတယ်လို့ သတင်းတွေ ထွက်ခဲ့တာပါ။

ဒါပေမယ့် နေမာကတော့ အယ်လ်ဟီလယ်အသင်းမှာ ပျော်ရွှင်နေတယ်လို့ ပြောခဲ့ပါတယ်။ 

နေမာဟာ လက်ရှိအချိန်မှာ ဒဏ်ရာကနေ အပြည့်အဝ သက်သာအောင် အာရုံစိုက်နေပြီး ၂၀၂၅ ခုနှစ်၊ မတ်လမှာ ဘရာဇီးလ်အသင်းအတွက် ပြန်လည်ကိုယ်စားပြုနိုင်ဖို့ ရည်ရွယ်ထားတာပါ။

နေမာဟာ ၂၀၂၃ ခုနှစ်၊ အောက်တိုဘာလက ယှဉ်ပြိုင်ခဲ့တဲ့ ကမ္ဘာ့ဖလားခြေစစ်ပွဲမှာ ဒူးအရွတ်ဒဏ်ရာ ရရှိပြီး ကတည်းက ဘရာဇီးလ်အသင်းအတွက် ပါဝင်ကစားနိုင်ခြင်း မရှိသေးပါဘူး။ 

အသက် ၃၂ နှစ်အရွယ်ရှိ နေမာဟာ ဘရာဇီးလ်အသင်းအတွက် ၁၂၈ ပွဲ ကစားထားပြီး ၇၉ ဂိုးသွင်းယူကာ နိုင်ငံအသင်းရဲ့ ဂိုးသွင်း အများဆုံး ကစားသမားအဖြစ် ရပ်တည်နေတာပါ။

နေမာရဲ့ အယ်လ်ဟီလယ်အသင်းဟာ ဒီရာသီ ဆော်ဒီပရိုလိဂ်ပြိုင်ပွဲမှာ အဆင့် ၂ နေရာ ရပ်တည်နေပြီး အာရှ ချန်ပီယံလိဂ်ပြိုင်ပွဲမှာ ၁၆ သင်းအဆင့်ကို တက်ရောက်ထားတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဒီဇင်ဘာ ၁၆

ဝုလ်ဗ်စ်အသင်းဟာ ထုတ်ပယ်ခဲ့တဲ့ နည်းပြဂယ်ရီအိုနေးလ်ရဲ့နေရာမှာ အစားထိုးခန့်အပ်ဖို့ အယ်လ်ရှာဘတ် အသင်းနည်းပြ ဗစ်တာပါရဲရားနဲ့ ဆွေးနွေးမှုပြုလုပ်နေပါတယ်။

ပရီးမီးယားလိဂ်မှာ ရလဒ်တွေဆိုးရွားနေတဲ့ ဝုလ်ဗ်စ်အသင်းဟာ နည်းပြသစ်ခန့်အပ်နိုင်ဖို့ အလျင်အမြန် ရှာဖွေ နေပြီး ဗစ်တာပါရဲရားကို နည်းပြသစ်အဖြစ် ခန့်အပ်မယ်ဆိုရင် အယ်လ်ရှာဘတ်အသင်းကို လျော်ကြေးအဖြစ် ပေါင် ၈၀၀,၀၀၀ ပေးရဖို့ ရှိနေတာပါ။ 

ဝုလ်ဗ်စ်အသင်းဟာ အခြားနည်းပြအချို့ကိုလည်း သူတို့ရဲ့နည်းပြသစ် စာရင်းထဲမှာ ထည့်သွင်းထားပြီး ဒီအထဲမှာ ယူနိုက်တက်နဲ့ ဝက်စ်ဟမ်းအသင်းနည်းပြဟောင်း ဒေးဗစ်မိုယက်စ် လည်း ပါဝင်နေပါတယ်။ 

ဒါပေမယ့် ဗစ်တာပါရဲရားဟာ ဝုလ်ဗ်စ်အသင်းရဲ့ ဦးစားပေးဖြစ်တယ်လို့ ကလပ်သတင်း ရင်းမြစ်တွေက BBC Sport ကို ပြောခဲ့တာပါ။ 

ဗစ်တာပါရဲရားဟာ ပြီးခဲ့တဲ့ ဖေဖော်ဝါရီကတည်းက အယ်လ်ရှာဘတ်အသင်းကို ကိုင်တွယ်ခဲ့ပြီး မနှစ်ကရာသီ ဆော်ဒီပရိုလိဂ်ပြိုင်ပွဲမှာ အဆင့် ၈ နေရာနဲ့ ရာသီအဆုံးသတ်ခဲ့တာဖြစ်ပါတယ်။ ဒီရာသီမှာတော့ အယ်ရှာဘတ် အသင်းဟာ အဆင့် ၆ နေရာမှာရပ်တည်နေတာပါ။ 

အသက် ၅၆ နှစ်အရွယ်ရှိ ပေါ်တူဂီလူမျိုးနည်းပြဟာ ပေါ်တို အသင်းကို ၂၀၁၂ နဲ့ ၂၀၁၃ ခုနှစ်တွေမှာ ပေါ်တူဂီအမှတ်ပေးဖလားရယူပေးနိုင်ခဲ့ပြီး ၂၀၁၅ ခုနှစ်မှာ အိုလံပီယာကို့စ် အသင်းနဲ့ ဂရိလိဂ်ဖလားရရှိခဲ့ပါတယ်။ 

ဝုလ်ဗ်စ်အသင်းအနေနဲ့ ဗစ်တာပါရဲရားနဲ့ ဆွေးနွေးညှိနှိုင်းမှုအဆင်ပြေရင် ပေါ်တူဂီလူမျိုးနည်းပြဟာ လာမယ့် လက်စတာအသင်းနဲ့ ပရီးမီးယားလိဂ်ပွဲစဉ်ကို စတင်ကိုင်တွယ်ရဖို့ရှိနေတာပါ။ 

ဝုလ်ဗ်စ်အသင်းဟာ နောက်ဆုံး ကစားခဲ့တဲ့ ပရီးမီးယားလိဂ်ပွဲစဉ်မှာ အစ်စဝှစ်ချ်အသင်းကို အရေးနိမ့်ပြီးနောက် နည်းပြဂယ်ရီအိုနေးလ်ကို ရာထူး ကနေ ထုတ်ပယ်ခဲ့တာဖြစ်ပါတယ်။ 

ဂယ်ရီအိုနေးလ်ရဲ့ နည်းပြအဖွဲ့ဝင်တွေအားလုံးလည်း ဝုလ်ဗ်စ် အသင်းကနေ ထွက်ခွာခဲ့တာပါ။

ဝုလ်ဗ်စ်အသင်းဟာ ဒီရာသီပရီးမီးယားလိဂ်ပွဲစဉ် ၁၆ ပွဲကစားအပြီးမှာ ရမှတ် ၉ မှတ်နဲ့ အမှတ်ပေးဇယား အဆင့် ၁၉ နေရာမှာရပ်တည်နေတာဖြစ်ပါတယ်။ 

Source:BBC

CNI Sport News

၂၀၂၄ ခုနှစ်၊ ဒီဇင်ဘာ ၁၆

ချယ်လ်ဆီးအသင်းဟာ ဘရန်ဖို့ဒ်အသင်းကို ၂ ဂိုး-၁ ဂိုးနဲ့ အနိုင်ရပြီး ပြိုင်ပွဲစုံ ၇ ပွဲဆက်တိုက် အနိုင်ရရှိကာ အကောင်းဆုံးပုံစံတွေ ပြသနေပေမယ့် နည်းပြမာရက်စ်ကာက အသင်းဟာ ပရီးမီးယားလိဂ် ဆုဖလားစိန်ခေါ်ဖို့ အဆင်သင့် မဖြစ်သေးဘူးလို့ ပြောခဲ့ပါတယ်။ 

မာရက်စ်ကာက “ကျနော်တို့ဟာ ပိုကောင်းအောင်လုပ်ရမယ့် အရာတွေ အများကြီးရှိပါတယ်။ အဲဒါကြောင့် ကျနော့်အတွက်ရော ကျနော်တို့အတွက်ရော အဆင်သင့် မဖြစ်သေးဘူးလို့ ပြောတာပါ။ ပရိသတ်တွေကတော့ ဆုဖလားအကြောင်းတွေးပြီး အိပ်မက်မက်လို့ရပါတယ်။ ဒါပေမယ့် ကျနော်တို့ဟာ အသင်းတစ်သင်းအနေနဲ့ ကစားသမားတွေ၊ နည်းပြအဖွဲ့ဝင်တွေက လက်တွေ့ဆန်ဖို့လိုပါတယ်”လို့ ပြောခဲ့တာပါ။ 

ချယ်လ်ဆီးအသင်းဟာ ဘရန်ဖို့ဒ်အသင်းကို အနိုင်ရရှိခဲ့တာကြောင့် ပရီးမီးယားလိဂ် ထိပ်ဆုံးနေရာမှာ ဦးဆောင် နေတဲ့ လီဗာပူးလ်အသင်းထက် ၁ ပွဲ ပိုကစားထားပြီး ရမှတ် ၂ မှတ်လျော့ကာ အဆင့် ၂ နေရာမှာ ရပ်တည်နေတာ ဖြစ်ပါတယ်။ 

ချယ်လ်ဆီးအသင်းကို တွေ့ရစဉ်

ချယ်လ်ဆီးအသင်းဟာ အဆင့် ၃ နေရာက အာဆင်နယ်အသင်းကို ၄ မှတ်၊ အဆင့် ၄ နေရာက နော်တင်ဟမ် ဖောရက်စ်အသင်းကို ၆ မှတ် အသာရထားတာပါ။ 

ဒါပေမယ့် ချယ်လ်ဆီးအသင်းနည်းပြ မာရက်စ်ကာက သူတို့ ဆုဖလားစိန်ခေါ်ဖို့ အဆင်သင့် မဖြစ်သေးဘူးဆိုတာ ကို ထပ်ပြီး ပြောနေခဲ့ပါတယ်။ 

ဘရန်ဖို့ဒ်အသင်းနည်းပြ သောမတ်စ်ဖရန့်က ချယ်လ်ဆီးအသင်းဟာ ပရီးမီးယားလိဂ် ဆုဖလားပြိုင်ပွဲထဲကို ရောက်ရှိနေပြီး သူတို့အလွန်ကောင်းတယ်လို့ ပွဲအပြီးမှာ ပြောခဲ့တာပါ။ 

ဘရန်ဖို့ဒ်အသင်းဟာ ချယ်လ်ဆီးအသင်းကို အရေးနိမ့်ခဲ့တာကြောင့် ပရီးမီးယားလိဂ်ပွဲစဉ် ၁၆ ပွဲ ကစားအပြီးမှာ ရမှတ် ၂၃ မှတ်နဲ့ အဆင့် ၁၁ နေရာမှာ ရပ်တည်နေပါတယ်။

ချယ်လ်ဆီးအသင်းဟာ ဒီအပတ် ပရီးမီးယားလိဂ် ပွဲစဉ်အဖြစ် အဲဗာတန်အသင်းနဲ့ ယှဉ်ပြိုင်ရမှာဖြစ်ပြီး ဘရန်ဖို့ဒ် အသင်းက နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI International News

အန်ကာရာ၊ ဒီဇင်ဘာ ၁၆

ဆီးရီးယားနိုင်ငံက စစ်သင်တန်းများ လေ့ကျင့်သင်ကြားပေးရန် တောင်းဆိုခဲ့မည်ဆိုပါက တူရကီအနေဖြင့် စစ်သင်တန်းများ ကူညီသင်ကြားပေးရန် အသင့်ရှိကြောင်း တူရကီကာကွယ်ရေးဝန်ကြီး ယာဆာ ဂူလာ (Yasar Guler) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

နေတိုးအဖွဲ့ဝင်ဖြစ်သည့် တူရကီသည် ပြီးခဲ့သည့် သီတင်းပတ်က ဆီးရီးယားသမ္မတ ဘာရှာ အယ်အာဆတ် (Bashar al-Assad) ကို ရာထူးမှ ဖြုတ်ချခဲ့သည့် ဆီးရီးယားသူပုန်များကို ထောက်ပံ့ပေးခဲ့သည်။

အာဆတ် ပြုတ်ကျသွားမှုကြောင့် ၁၃ နှစ်ကြာ ဖြစ်ပွားသည့် ပြည်တွင်းစစ် အဆုံးသတ်သွားမှုနှင့်အတူ တူရကီက ဒမတ်စကတ် (Damascus) မြို့တော်ရှိ တူရကီသံရုံးကို ဒီဇင်ဘာ ၁၄ ရက်က ပြန်လည်ဖွင့်လှစ်ခဲ့သည်။

အာဆတ်ကို ဖြုတ်ချခဲ့သည့် အစိုးရအဖွဲ့သစ်က နိုင်ငံအတွင်းရှိ အစိုးရရုံးဌာနများ၊ ကုလသမဂ္ဂနှင့် အခြား နိုင်ငံတကာ အဖွဲ့အစည်းများကို လေးစားမည်ဖြစ်ကြောင်း ကြေညာခဲ့သည်ဟု ဂူလာက သတင်းထောက်များကို ပြောကြားခဲ့သည်။

"အစိုးရအဖွဲ့သစ် ဘာတွေ ဆက်လုပ်မလဲဆိုတာ ကျနော်တို့ စောင့်ကြည့်ဖို့ လိုအပ်ပြီး သူတို့ကို အခွင့်အရေး ပေးသင့်တယ်လို့ ကျနော်တို့ ယူဆထားပါတယ်" ဟု ဂူလာက ပြောသည်။

အာဆတ် ဖြုတ်ချခံလိုက်ရလို့ အောင်ပွဲခံနေကြစဉ်

တူရကီအနေဖြင့် ဆီးရီးယားအစိုးရအဖွဲ့သစ်နှင့် စစ်ရေး ပူးပေါင်းဆောင်ရွက်မည် ဟုတ်၊ မဟုတ် မေးမြန်းခံရချိန် တွင် ဂူလာက တူရကီသည် ယခင်ကတည်းက နိုင်ငံအများအပြားနှင့် စစ်ရေး ပူးပေါင်းဆောင်ရွက်မှု၊ စစ်သင်တန်း လေ့ကျင့် သင်ကြားပေးသည့် သဘောတူညီချက်များရှိခဲ့ကြောင်း ဖြေကြားခဲ့သည်။

"တကယ်လို့ သူတို့ (ဆီးရီးယားအစိုးရအဖွဲ့သစ်) ဘက်က တောင်းဆိုလာမယ်ဆိုရင် တူရကီကလည်း လိုအပ်တဲ့ စစ်ရေး အထောက်အကူတွေ ပေးဖို့ အသင့်ပါပဲ" ဟု ဂူလာက ပြောကြားခဲ့သည်။

၂၀၁၆ ခုနှစ်ကတည်းက တူရကီသည် ၎င်း၏ အမျိုးသားလုံခြုံရေးအတွက် ခြိမ်းခြောက်မှုများကို အကြောင်းပြပြီး ဆီးရီးယားနိုင်ငံ မြောက်ပိုင်းရှိ နယ်မြေဒေသများတွင် စစ်ဆင်ရေးများ ပြုလုပ်ခဲ့သည်။

ထို့ပြင် လက်ရှိတွင်လည်း တူရကီသည် ဆီးရီးယားနိုင်ငံ အနောက်မြောက်ဘက်ရှိ အဖရင် (Afrin) ၊ အာဇက် (Azez) နှင့် ဂျာရာဘလူစ် (Jarablus) မြို့များ အပါအဝင် မြို့အချို့တွင် ထောင်နှင့်ချီသည့် တူရကီစစ်သားများကို ဖြန့်ကြက်ချထားခဲ့သည်။

Source: ရိုက်တာ

CNI Sport News 

၂၀၂၄ ခုနှစ်၊ ဒီဇင်ဘာ ၁၆

ယူနိုက်တက်အသင်းဟာ မန်ချက်စတာဒါဘီပွဲစဉ်မှာ မန်စီးတီးအသင်းကို ၂ ဂိုး-၁ ဂိုးနဲ့ အနိုင်ရခဲ့ပြီးနောက် နည်းပြ အာမိုရင်က ဒီနိုင်ပွဲဟာ အသင်းအတွက် ထိုက်တန်တယ်လို့ ပြောခဲ့ပါတယ်။ 

အာမိုရင်က “Fergie Time ဖြစ်ပြီး မယုံနိုင်လောက်စရာပါပဲ။ အလွန်ခက်ခဲတဲ့ပွဲ ဖြစ်ခဲ့ပေမယ့် ကျနော်တို့အဆုံးထိ ယုံကြည်မှုရှိခဲ့ပြီး ဒါက ကျနော်တို့နဲ့ ထိုက်တန်တယ်လို့ ထင်ပါတယ်။ ကျနော်တို့ ဂိုးသွင်းနိုင်ခဲ့ပြီး လိုအပ်နေတဲ့ နိုင်ပွဲရယူနိုင်ခဲ့ပါတယ်။ ဒါဟာ ကျနော်တို့အတွက်ရော ကျနော်တို့ ပရိသတ်တွေအတွက်ပါ အရေးကြီးပါတယ်။ ကျနော်တို့အတွက် ကောင်းမွန်တဲ့နေ့တစ်နေ့ပါ”လို့ ပြောခဲ့တာပါ။

ယူနိုက်တက်အသင်းဟာ ဒီပွဲမှာ ပွဲချိန် ၈၇ မိနစ်အထိ မန်စီးတီးအသင်းရဲ့ ၁ ဂိုး-ဂိုးမရှိနဲ့ ဦးဆောင်ခြင်းကို ခံခဲ့ရ ပေမယ့် ၈၈ မိနစ်မှာ ဘရူနိုဖာနန်ဒက်စ်က ပင်နယ်တီကနေ ချေပဂိုး၊ ၈၉ မိနစ်မှာ အာမတ်က ယူနိုက်တက်အသင်း အတွက် အနိုင်ဂိုး သွင်းယူပေးခဲ့တာ ဖြစ်ပါတယ်။

ယူနိုက်တက်အသင်းဟာ ဂန္ထဝင်နည်းပြကြီး ဖာဂူဆန် ကိုင်တွယ်ခဲ့ချိန်က ပွဲပြီးခါနီးတွေမှာ သွင်းဂိုးတွေ သွင်းယူနိုင် ခဲ့တာကြောင့် Fergie Time ဆိုပြီး နာမည်ကျော်ကြားခဲ့တာပါ။ 

ယူနိုက်တက်အသင်းနည်းပြ အာမိုရင်ကလည်း မန်စီးတီးအသင်းနဲ့ပွဲမှာ သူတို့ Fergie Time မှာ သွင်းဂိုးတွေ သွင်းယူနိုင်ခဲ့တယ်လို့ ပွဲအပြီး သတင်းထောက်တွေနဲ့ တွေ့ဆုံချိန် ပြောခဲ့ပါတယ်။

ယူနိုက်တက်အသင်းနဲ့မန်စီးတီးအသင်း ယှဉ်ပြိုင်နေစဉ်

ယူနိုက်တက်အသင်းဟာ ဒီနိုင်ပွဲကြောင့် ပြီးခဲ့တဲ့ ပရီးမီးယားလိဂ် ၂ ပွဲဆက် ရှုံးနိမ့်မှုကို ရပ်တန့်နိုင်ခဲ့တာပါ။ 

ဒီပွဲမှာ ယူနိုက်တက်အသင်းအတွက် ချေပဂိုးဖြစ်စေမယ့် ပင်နယ်တီ ရယူပေးခဲ့ပြီး အနိုင်ဂိုးလည်း သွင်းယူခဲ့တဲ့ အာမတ်ကို နည်းပြအာမိုရင်နဲ့ အသင်းခေါင်းဆောင် ဘရူနိုဖာနန်ဒက်စ်တို့က ပွဲအပြီးမှာ ချီးကျူးမှုတွေ ပြုလုပ်ခဲ့ပါတယ်။ 

ယူနိုက်တက်အသင်းကို အရေးနိမ့်ခဲ့တဲ့ မန်စီးတီးအသင်းဟာ ဒီရာသီမှာ ရလဒ် အလွန်ဆိုးရွားနေပြီး နောက်ဆုံး ကစားခဲ့တဲ့ ၁၁ ပွဲမှာ ၁ ပွဲသာ အနိုင်ရခဲ့တာပါ။ 

မန်စီးတီးအသင်းနည်းပြ ဂွာဒီယိုလာက သူဟာ လုံလောက်တဲ့ ကောင်းမွန်မှု မရှိခဲ့ဘူးလို့ ပွဲအပြီးမှာ ပြောခဲ့ပါတယ်။ 

ဒီပွဲရလဒ်ကြောင့် မန်စီးတီးအသင်းဟာ ပရီးမီးယားလိဂ်ပွဲစဉ် ၁၆ ပွဲ ကစားအပြီးမှာ ရမှတ် ၂၇ မှတ်နဲ့ အဆင့် ၅ နေရာ ရပ်တည်နေပြီး ယူနိုက်တက်အသင်းက ရမှတ် ၂၂ မှတ်နဲ့ အဆင့် ၁၃ နေရာမှာ ရပ်တည်နေတာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၁၄

အင်္ဂလန်အသင်းနည်းပြသစ် တူချယ်လ်က တိုက်စစ်မှူး ဟာရီကိန်းဟာ အင်္ဂလန်အသင်း ခေါင်းဆောင်အဖြစ် ဆက်ရှိမယ်လို့ ပြောခဲ့ပါတယ်။

တူချယ်လ်က “လက်ရှိအချိန်မှာ အပြောင်းအလဲအတွက် စဉ်းစားဖို့ မလိုအပ်ပါဘူး။ ဟာရီက အင်္ဂလန်အတွက် အမြဲတမ်း ထိပ်တန်း ခေါင်းဆောင်တစ်ဦးပါ။ ဒါကြောင့် အခုအချိန်မှာ ဒီအကြောင်းကို ဘာလို့ စဉ်းစားနေမှာလဲ။ ဟာရီ အပါအဝင် ကြီးမားတဲ့ ကိုယ်ရည်ကိုယ်သွေး၊ အရည်အသွေးတွေရှိတဲ့ ကစားသမားအစုအဖွဲ့နဲ့ အလုပ်လုပ် ရမှာဖြစ်လို့ ကျနော်ပျော်ရွှင်ပါတယ်”လို့ ပြောခဲ့တာပါ။ 

တူချယ်လ်ဟာ ၂၀၂၆ ကမ္ဘာ့ဖလားခြေစစ်ပွဲ(ဥရောပဇုန်)မဲခွဲမှုကို တက်ရောက်ပြီးနောက် အင်္ဂလန်အသင်း ခေါင်းဆောင်ရာထူးနဲ့ ပတ်သက်တဲ့ မေးခွန်းကို ဖြေခဲ့တာပါ။ 

၂၀၁၈ ခုနှစ်ကတည်းက အင်္ဂလန်အသင်းရဲ့ အသင်းခေါင်းဆောင် လက်ပတ်ကို ဝတ်ဆင်ခွင့်ရခဲ့တဲ့ ဟာရီကိန်းဟာ နည်းပြတူချယ်လ်နဲ့ ဘိုင်ယန်မြူးနစ်အသင်းမှာ အတူတွဲ အလုပ်လုပ်ခဲ့ဖူးပါတယ်။ 

ဟာရီကိန်းနဲ့တူချယ်လ်ကို တွေ့ရစဉ်

ဟာရီကိန်းဟာ အင်္ဂလန်အသင်းရဲ့ အသင်းခေါင်းဆောင်အဖြစ် အဓိကပြိုင်ပွဲကြီး ၄ ခုမှာ ဦးဆောင်ထားခဲ့တာပါ။

အင်္ဂလန်အသင်းဟာ ၂၀၂၆ ကမ္ဘာ့ဖလားခြေစစ်ပွဲ(ဥရောပဇုန်)ရဲ့ အုပ်စု K မှာ ဆားဘီးယား၊ အယ်လ်ဘေးနီးယား၊ လတ်ဗီးယား၊ အန်ဒိုရာတို့နဲ့ တစ်အုပ်စုတည်း ကျရောက်နေပါတယ်။ 

ဒီအုပ်စုမှာ ထိပ်ဆုံးနေရာ ရပ်တည်တဲ့ အသင်းဟာ ခြေစစ်ပွဲတိုက်ရိုက် အောင်မြင်မှာဖြစ်ပြီး ဒုတိယရတဲ့အသင်းက ပလေးအော့ဖ် ယှဉ်ပြိုင်ရမှာပါ။ 

၂၀၂၅ ခုနှစ်၊ ဇန်နဝါရီ ၁ ရက်မှ အင်္ဂလန်အသင်းကို နည်းပြသစ်အဖြစ် တရားဝင် စတင်ကိုင်တွယ်မယ့် တူချယ်လ် ဟာ မတ်မှာကစားမယ့် အယ်လ်ဘေးနီးယား၊ လတ်ဗီးယားအသင်းတို့နဲ့ ခြေစစ်ပွဲတွေမှာ အင်္ဂလန်အသင်းကို ပထမဆုံး ပွဲစဉ်တွေအဖြစ် စတင်တာဝန်ယူသွားမှာဖြစ်ပါတယ်။ 

Source: Goal