CNI Sport News

၂၀၂၄ ခုနှစ်၊ မေလ ၁၇

လာမယ့်ရာသီ ပရီးမီးယားလိဂ်ကို တန်းတက်နိုင်ဖို့အတွက် ယှဉ်ပြိုင်နေတဲ့ ချန်ပီယံရှစ်ပလေးအောဖ့် ဆီမီးဖိုင်နယ် ဒုတိယအကျော့ပွဲစဉ်မှာ လိဒ်စ်အသင်းဟာ နော်ဝစ်ချ်အသင်းကို အနိုင်ရပြီး ဗိုလ်လုပွဲတက်နိုင်ခဲ့ပါတယ်။

ဒီပွဲစဉ်မှာ လိဒ်စ်အသင်းဟာ နော်ဝစ်ချ်အသင်းကို ၄ ဂိုး-ဂိုးမရှိနဲ့ ဂိုးပြတ် အနိုင်ရရှိခဲ့တာပါ။ 

ဒီနှစ်သင်းရဲ့ ပထမအကျော့ပွဲစဉ်က ဂိုးမရှိ သရေကျခဲ့တာကြောင့် နှစ်ကျော့ပေါင်းရလဒ် ၄ ဂိုး-ဂိုးမရှိနဲ့ လိဒ်စ် အသင်း အနိုင်ရရှိခဲ့တာ ဖြစ်ပါတယ်။ 

လိဒ်စ်အသင်းဟာ ပရီးမီးယားလိဂ်ကို တိုက်ရိုက်တန်းတက်နိုင်ဖို့ မျှော်လင့်ချက်ရှိခဲ့ပေမယ့် နောက်ပိုင်းပွဲစဉ်တွေမှာ ရလဒ်တွေ မကောင်းခဲ့လို့ အဆင့် ၃ နေရာနဲ့ ပလေးအော့ဖ်ပွဲစဉ်တွေ ယှဉ်ပြိုင်နေရတာပါ။ 

ပြီးခဲ့တဲ့ရာသီက ပရီးမီးယားလိဂ်ကနေ တန်းဆင်းခဲ့တဲ့ လိဒ်စ်အသင်းဟာ ပလေးအော့ဖ် ဗိုလ်လုပွဲ တက်နိုင်ခဲ့ တာကြောင့် ပရီးမီးယားလိဂ်ကို ချက်ချင်း တန်းပြန်တက်နိုင်ဖို့ မျှော်လင့်ချက်တွေ ရှင်သန်ခဲ့ပါတယ်။ 

လိဒ်စ်အသင်းကို တွေ့ရစဉ်

လိဒ်စ်အသင်းနည်းပြ ဖာကီက ဒီပွဲစဉ်က အသင်းရဲ့ ခြေစွမ်းကို ချီးကျူးခဲ့ပြီး သူတို့ဒီထက်ပိုပြီး ဂိုးသွင်းခဲ့သင့် တယ်လို့ ပြောခဲ့ပါတယ်။

ဖာကီက “ပထမဆုံးအနေနဲ့ ကောင်းမွန်တဲ့ ရာသီတစ်ခုအတွက် နော်ဝစ်ချ်အသင်းကို ဂုဏ်ပြုကြောင်း ပြောချင်ပါ တယ်။ သူတို့ဟာ ပြိုင်ဘက်ကောင်း ဖြစ်ခဲ့ပါတယ်။ ရိုးရိုးသားသားပြောရရင် ဒီပွဲမှာ ကျနော်တို့ ဂိုးတွေပိုပြီး သွင်းယူ ခဲ့သင့်တာပါ။ ဂိုးမပေးရလို့ ပျော်ရွှင်မိသလို ငယ်ရွယ်တဲ့ ကျနော့်အသင်းကို ချီးကျူးချင်ပါတယ်။ ပရိသတ်တွေရဲ့ အားပေးမှုကလည်း တကယ့်ကို မယုံနိုင်စရာပါပဲ”လို့ ပွဲအပြီး အင်တာဗျူးမှာ ပြောခဲ့ပါတယ်။

လိဒ်စ်အသင်းဟာ ပလေးအော့ဖ် ဗိုလ်လုပွဲအဖြစ် ဆောက်သမ်တန်နဲ့ ဝက်စ်ဘရွန်းအသင်းတို့ပွဲစဉ်က အနိုင်ရတဲ့ အသင်းနဲ့ ယှဉ်ပြိုင်ရမှာပါ။ 

ဒီနှစ်သင်းရဲ့ ပထမအကျော့ပွဲစဉ်က ဂိုးမရှိ သရေကျခဲ့တာဖြစ်ပြီး ဒုတိယအကျော့ပွဲစဉ်ကို မေလ ၁၈ ရက် မနက်ပိုင်းမှာ ယှဉ်ပြိုင်သွားမှာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ မေလ ၁၇

ပေါ်တူဂီအသင်းခေါင်းဆောင် ရော်နယ်ဒိုဟာ ၂၀၂၄ ခုနှစ်အတွက် Forbes က ထုတ်ပြန်တဲ့ လုပ်ခလစာအများဆုံး အားကစားသမားစာရင်းမှာ ထိပ်ဆုံးနေရာက ရပ်တည်ခဲ့ပါတယ်။

ရော်နယ်ဒိုဟာ Forbes ရဲ့ လုပ်ခလစာအများဆုံး အားကစားသမားစာရင်းမှာ စတုတ္ထအကြိမ်မြောက်အဖြစ် ထိပ်ဆုံးနေရာ ရပ်တည်ခဲ့တာပါ။

ပေါ်တူဂီ အသင်းခေါင်းဆောင်ဟာ ဆော်ဒီပရိုလိဂ်ကလပ် အယ်လ်နာဆာအသင်းထံ ပြောင်းရွှေ့ပြီးနောက်မှာ ကမ္ဘာ့လုပ်ခလစာ အများဆုံး အားကစားသမား ဖြစ်လာခဲ့ပါတယ်။ 

စီးပွားရေးမဂ္ဂဇင်း Forbes က ရော်နယ်ဒိုဟာ ဒေါ်လာသန်း ၂၆၀ အထိ ရရှိတယ်လို့ ဖော်ပြခဲ့တာပါ။

အသက် ၃၉ နှစ်အရွယ်ရှိ ရော်နယ်ဒိုရဲ့ ကွင်းအတွင်းဝင်ငွေဟာ ဒေါ်လာသန်း ၂၀၀ ရှိပြီး စပွန်ဆာ သဘောတူညီမှု အပါအဝင် အခြားအရာတွေကြောင့် ကွင်းပြင်ပဝင်ငွေက ဒေါ်လာသန်း ၆၀ အထိရှိနေတာ ဖြစ်ပါတယ်။ 

ရော်နယ်ဒိုဟာ အသက် ၄၀ ပြည့်ဖို့ နီးလာပေမယ့် သူ့ရဲ့ ကစားသမားဘဝကို မြင့်မားတဲ့အဆင့်မှာ ဆက်ပြီး ဖြတ်သန်းသွားဖို့ ရည်ရွယ်ထားတယ်လို့ ပြောခဲ့ပါတယ်။

မက်ဆီကို တွေ့ရစဉ်

နံပါတ် ၂ နေရာမှာတော့ စပိန်ဂေါ့ဖ်ကစားသမား ဂျွန်ရမ်က ရပ်တည်နေပါတယ်။

ဂျွန်ရမ်ဟာ ဆော်ဒီထောက်ပံထားတဲ့ LIV Golf Tour ကို ပြောင်းရွှေ့ပြီးနောက်မှာ ဒေါ်လာ ၂၁၈ သန်းနဲ့ ဒီစာရင်းရဲ့ နံပါတ် ၂ နေရာအထိ တက်လာခဲ့တာ ဖြစ်ပါတယ်။ 

ရော်နယ်ဒိုရဲ့ ပြိုင်ဘက်ကြီးဖြစ်တဲ့ အင်တာမိုင်ယာမီ အသင်းခေါင်းဆောင် မက်ဆီက ဒေါ်လာ ၁၃၅ သန်းနဲ့ နံပါတ် ၃ နေရာမှာ ရပ်တည်နေတာပါ။ 

မက်ဆီဟာ ကွင်းအတွင်းဝင်ငွေ ဒေါ်လာ ၆၅ သန်းနဲ့ ကွင်းပြင်ပဝင်ငွေ ဒေါ်လာသန်း ၇၀ ရရှိတာ ဖြစ်ပါတယ်။

နာမည်ကြီး ဘတ်စကတ်ဘော ကစားသမား လီဘရွန်ဂျိမ်းစ်က ဒေါ်လာ ၁၂၈.၂ သန်းနဲ့ နံပါတ် ၄၊ နောက်ထပ် ဘတ်စကတ်ဘော ကစားသမားဖြစ်တဲ့ ဂျီယန်နစ်က ဒေါ်လာ ၁၁၁ သန်းနဲ့ နံပါတ် ၅ နေရာမှာ ရပ်တည်နေတာပါ။ 

ဘောလုံးသမားတွေဖြစ်တဲ့ ဘတ်ပီ၊ နေမာနဲ့ ဘန်ဇီမာတို့ဟာ ဒီစာရင်းရဲ့ နံပါတ် ၆၊၇ နဲ့ ၈ နေရာတွေမှာ ရပ်တည်နေတာ ဖြစ်ပါတယ်။ 

ပြီးခဲ့တဲ့ ၁၂ လအတွင်း အခွန်နဲ့ အေးဂျင့်တွေကို အခကြေးငွေတွေ မပေးခင် ကမ္ဘာ့လုပ်ခလစာ အများဆုံး အားကစားသမား ၁၀ ဦးရဲ့ စုစုပေါင်း ဝင်ငွေဟာ ဒေါ်လာ ၁.၃၈ ဘီလီယံအထိ ရှိတယ်လို့ Forbes က ပြောထားပါတယ်။

Source: BBC

CNI Sport News

၂၀၂၄ ခုနှစ်၊ မေလ ၁၆

အင်တာမိုင်ယာမီအသင်းခေါင်းဆောင် မက်ဆီဟာ အော်လန်ဒိုစီးတီးအသင်းနဲ့ မေဂျာလိဂ်ပွဲစဉ်မှာ ဒဏ်ရာကြောင့် မပါဝင်နိုင်ခဲ့ပေမယ့် ဒီစီယူနိုက်တက်အသင်းနဲ့ပွဲမှာ ပါဝင်နိုင်ဖို့ မျှော်လင့်တယ်လို့ နည်းပြ မာတီနိုက ပြောခဲ့ ပါတယ်။

မာတီနိုက “လီယိုဟာ သက်သောင့်သက်သာမရှိပေမယ့် နေ့တိုင်းလေ့ကျင့်မှုတွေပြုလုပ်သလို သူ့ကိုစစ်ဆေးမှု တွေပြုလုပ်တာမှာလည်း ကောင်းမွန်ပါတယ်။ တစ်ပတ်အတွင်း ၃ ပွဲကစားပြီးတော့ သူဟာ နာကျင်မှုတွေ ရှိနေပါတယ်။ လာမယ့်စနေနေ့မှာ သူပါဝင်ကစားဖို့ စီစဉ်ထားပေမယ့် တစ်ရက်ပြီးတစ်ရက် စောင့်ကြည့် သွားရမှာပါ။ ကျနော်တို့သူ့ကို ဘယ်လိုစွန့်စားမှုမှပြုလုပ်သွားမှာမဟုတ်ဘူး”လို့ ပြောခဲ့တာပါ။

အင်တာမိုင်ယာမီအသင်းဟာ မက်ဆီမပါဝင်နိုင်တဲ့ ပွဲစဉ်မှာ အော်လန်ဒိုစီးတီးအသင်းနဲ့ ဂိုးမရှိသရေကျခဲ့တာ ဖြစ်ပါတယ်။ 

အင်တာမိုင်ယာမီအသင်းဟာ မက်ဆီပါဝင်ခဲ့တဲ့ ပြီးခဲ့တဲ့ ၅ ပွဲစလုံးနိုင်ပွဲရယူနိုင်ခဲ့ပေမယ့် သူမ ပါဝင်နိုင်တဲ့အချိန်မှာ နိုင်ပွဲဆက်မှုရပ်တန့်သွားခဲ့တာပါ။ 

အင်တာမိုင်ယာမီအသင်းဟာ ဒီပွဲအနိုင်မရခဲ့ပေမယ့် မေဂျာလိဂ်အရှေ့ပိုင်းဇုန် အမှတ်ပေးဇယားမှာ အဆင့် ၁ နေရာဆက်လက်ရပ်တည်နေတာဖြစ်ပါတယ်။ 

မေဂျာလိဂ်ကလပ်ဟာ မက်ဆီမပါဝင်နိုင်ခဲ့တဲ့ ဒီရာသီအစပွဲစဉ်တွေမှာလည်း ရလဒ်တွေမကောင်းဖြစ်ခဲ့တာပါ။

အဲဒါကြောင့် နည်းပြ မာတီနိုက လာမယ့် ဒီစီယူနိုက်တက်အသင်းနဲ့ပွဲစဉ်မှာ မက်ဆီပါဝင်နိုင်ဖို့ မျှော်လင့် နေတာဖြစ်ပါတယ်။ 

မက်ဆီဟာ ဒီရာသီ မေဂျာလိဂ်ပြိုင်ပွဲမှာ အင်တာမိုင်ယာမီအသင်းအတွက် ၁၀ ဂိုး သွင်းယူထားပြီး အသင်းဖော်တိုက်စစ်မှူး ဆွာရက်ဇ်က ၁၁ ဂိုးသွင်းယူထားတာပါ။ 

သူတို့ ၂ ဦးစလုံးဟာ မေဂျာလိဂ်ပြိုင်ပွဲရဲ့ တစ်လတာအကောင်းဆုံးကစားသမားဆုတွေကို ရရှိထားတာဖြစ်ပါတယ်။ 

မက်ဆီဟာ အင်တာမိုင်ယာမီအသင်းအတွက် လာမယ့် ပွဲစဉ် ၄ ပွဲပါဝင်ကစားပေးပြီးရင် ကိုပါအမေရိကဖလားပြိုင်ပွဲဝင်မယ့် အာဂျင်တီးနားအသင်းနဲ့ သွားရောက်ပူးပေါင်းရတော့မှာပါ။

ကိုပါအမေရိကဖလားပြိုင်ပွဲကျင်းပနေချိန်မှာ မေဂျာလိဂ်ပြိုင်ပွဲလည်း ဆက်လက်ကျင်းပနေမှာဖြစ်လို့ အင်တာ မိုင်ယာမီအသင်းဟာ မက်ဆီမပါဝင်ဘဲ ပွဲစဉ်အချို့ကို ယှဉ်ပြိုင်ရတော့မှာဖြစ်ပါတယ်။

Source:Goal

CNI Sport News

၂၀၂၄ ခုနှစ်၊ မေလ ၁၆

ဝုလ်ဗ်စ်အသင်းဟာ လာမယ့် ဘောလုံးရာသီက စတင်ပြီး VAR အသုံးပြုမှုကို ဖယ်ရှားဖို့ တရားဝင် တောင်းဆို ခဲ့ပြီးနောက် ပရီးမီးယားလိဂ် ကလပ်အသင်းတွေဟာ VAR နည်းပညာကို ဖယ်ရှားမယ့် အဆိုပြုချက်ကို မဲခွဲဆုံးဖြတ်မှာ ဖြစ်ပါတယ်။

VAR နည်းပညာကို ၂၀၁၉ ခုနှစ်ကတည်းက ပရီးမီးယားလိဂ်ပြိုင်ပွဲမှာ အသုံးပြုခဲ့ပေမယ့် ပြီးခဲ့တဲ့ ၂ ရာသီအတွင်းမှာ အငြင်းပွားမှုတွေ အများအပြား ဖြစ်ခဲ့ပြီးနောက် ဒီနည်းပညာကို အသုံးပြုတဲ့အပေါ် အငြင်းအခုံတွေရှိနေဆဲ ဖြစ်ပါ တယ်။

နည်းပြတွေဟာ VAR အသုံးပြုတာနဲ့ ပတ်သက်ပြီး ဝေဖန်မှု အများအပြား ပြုလုပ်ခဲ့ကြပြီး ဝုလ်ဗ်စ်အသင်းကတော့ အခုနွေရာသီမှာ VAR ကို ဖယ်ရှားပေးဖို့ တရားဝင် တောင်းဆိုခဲ့တာ ဖြစ်ပါတယ်။

ဝုလ်ဗ်စ်အသင်းရဲ့ အဆိုပြုချက်အပေါ် ဇွန်လ ၆ ရက်မှာ ကျင်းပမယ့် နှစ်ပတ်လည် တွေ့ဆုံပွဲမှာ ပရီးမီးယားလိဂ် အသင်း ၂၀ စလုံးဟာ မဲခွဲဆုံးဖြတ်ကျမှာပါ။

VAR နည်းပညာကို ဖယ်ရှားမယ့် အဆိုပြုချက်ကို အတည်ပြုနိုင်ဖို့ဆိုရင် ထောက်ခံမဲအနည်းဆုံး ၁၄ မဲရရှိဖို့ လိုအပ် တယ်လို့ သိရပါတယ်။ 

VAR နည်းစနစ်ကို တွေ့ရစဉ်

ဝုလ်ဗ်စ်အသင်းကတော့ VAR ဟာ ပရိသတ်နဲ့ ဘောလုံးအကြား ဆက်ဆံရေးကို ပျက်ဆီးစေပြီး ပရီးမီးယားလိဂ် အမှတ်တံဆိပ်ရဲ့ တန်ဖိုးကိုလည်း ထိခိုက်စေတယ်လို့ သူတို့ရဲ့ ထုတ်ပြန်ချက်ထဲမှာ ဖော်ပြထားတာပါ။

ဒီရာသီမှာ VAR နဲ့ ပတ်သက်ပြီး ကြီးမားတဲ့ အငြင်းပွားမှုတွေ ဖြစ်ခဲ့တာက စက်တင်ဘာက စပါးအသင်းနဲ့ ပွဲစဉ်မှာ လီဗာပူးလ်အသင်း သွင်းယူတဲ့ဂိုးကို လူကျွံဘောဆိုပြီး ပယ်ဖျက်ခဲ့တာ အပါအဝင် နောက်ဆုံးဖြစ်ပျက်ခဲ့ တာက တော့ ပြီးခဲ့တဲ့လက အဲဗာတန်အသင်းနဲ့ ပွဲစဉ်မှာ နော်တင်ဟမ်ဖောရက်စ် အသင်းဘက်ကို ပင်နယ်တီပေးဖို့ ပျက်ကွက်ခဲ့တာ ဖြစ်ပါတယ်။ 

ဆွီဒင်နိုင်ငံဟာ ပြီးခဲ့တဲ့လက VAR ကို အသုံးပြုဖို့ ငြင်းပယ်တဲ့ ပထမဆုံးနိုင်ငံ ဖြစ်လာခဲ့တာပါ။

ပရီးမီးယားလိဂ်ဟာ လာမယ့်ရာသီက စတင်ပြီး လူကျွံဘော ဖမ်းရာမှာ ပိုပြီးတိကျတဲ့ semi-automated offside နည်းပညာကို စတင်အသုံးပြုလာတော့မှာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ မေလ ၁၆

ဂျူဗင်တပ်စ်အသင်းဟာ အတ္တလန်တာအသင်းနဲ့ ကစားခဲ့တဲ့ ကိုပါအီတာလီယာဖလား ဗိုလ်လုပွဲမှာ ၁ ဂိုး- ဂိုးမရှိနဲ့ အနိုင်ရပြီး ချန်ပီယံဆုကို စံချိန်တင် ၁၅ ကြိမ်မြောက် ရရှိသွားခဲ့ပါတယ်။

ဂျူဗင်တပ်စ်အသင်းအတွက် တစ်လုံးတည်းသော သွင်းဂိုးကို ပွဲချိန် ၄ မိနစ်မှာ တိုက်စစ်မှူး ဗလာဟိုဗစ်က သွင်းယူခဲ့တာပါ။ 

ဂျူဗင်တပ်စ်အသင်းအတွက်တော့ ကိုပါအီတာလီယာဖလားဟာ ၃ နှစ်အတွင်း ပထမဆုံးရယူနိုင်ခဲ့တဲ့ အဓိက ဆုဖလားလည်း ဖြစ်ခဲ့ပါတယ်။ 

ဂျူဗင်တပ်စ်အသင်းနည်းပြ အယ်လီဂရီဟာ ကိုပါအီတာလီယာဖလားကို ၅ ကြိမ် ရယူနိုင်တဲ့ ပထမဆုံးနည်းပြ အဖြစ်လည်း မှတ်တမ်းသစ် ရေးထိုးနိုင်ခဲ့တာပါ။

အယ်လီဂရီဟာ ဂျူဗင်တပ်စ်အသင်းကို ဆုဖလား ရယူပေးနိုင်ခဲ့ပေမယ့် လာမယ့်ရာသီ ဆက်ရှိဖို့ မသေချာပါဘူး။

 ဂျူဗင်တပ်စ်အသင်းကို တွေ့ရစဉ်

အယ်လီဂရီက “ကောင်လေးတွေအတွက် ကျနော် အလွန်ပျော်ရွှင်ပါတယ်။ သူတို့တွေဟာ ကလပ်အတွက်၊ ပရိသတ်တွေ အတွက်နဲ့ ကျနော့်အတွက် ပျော်ရွှင်မှုတွေကို ယူဆောင်လာပေးပါတယ်။ ဆုဖလားရယူဖို့က ဘယ်တော့မှ မလွယ်ကူပေမယ့် ဒါက ကျနော်တို့ရဲ့ DNA ပါ။ လာမယ့်ရာသီအသင်းမှာ ကျနော် ဆက်မရှိတော့ ဘူးဆိုရင်လည်း တောင့်တင်းတဲ့ အသင်းကို ထားခဲ့မှာပါ။ ကလပ်က အကဲဖြတ်မှုတွေ ပြုလုပ်ပါလိမ့်မယ်”လို့ ပြောခဲ့ပါတယ်။

ဂျူဗင်တပ်စ်အသင်းဟာ ဒီရာသီ စီးရီးအေ ပွဲစဉ်တွေကစားဖို့ ၂ ပွဲသာ ကျန်ရှိတော့တဲ့အချိန်မှာ အဆင့် ၄ နေရာ ရပ်တည်နေပြီး လာမယ့်ရာသီ ချန်ပီယံလိဂ် ဝင်ခွင့်ရယူနိုင်ခဲ့တာပါ။ 

ဂျူဗင်တပ်စ်အသင်း တိုက်စစ်မှူး ဗလာဟိုဗစ်က အသင်းဟာ အခက်အခဲတွေ ကြုံတွေ့ခဲ့ရပေမယ့် ရာသီ အစကတည်းက ချမှတ်ခဲ့တဲ့ ရည်မှန်းချက်တွေ အောင်မြင်ခဲ့လို့ ပျော်ရွှင်ကြောင်း ပွဲအပြီး အင်တာဗျူးမှာ ပြောခဲ့ပါတယ်။ 

အတ္တလန်တာအသင်းကတော့ ၁၉၆၃ ခုနှစ်က ကိုပါအီတာလီယာဖလား ရယူပြီးနောက်ပိုင်း ပထမဆုံးဆုဖလားကို ရယူနိုင်ဖို့ နှစ်ပေါင်းများစွာကြာ စောင့်ဆိုင်းနေရတာပါ။

အတ္တလန်တာအသင်းဟာ ကြားရက်ထဲမှာ ယူရိုပါလိဂ်ဗိုလ်လုပွဲအဖြစ် လေဗာကူဆင်အသင်းနဲ့ ယှဉ်ပြိုင်ရမှာဖြစ်ပြီး ဆုဖလား မရယူနိုင်မှုကို အဆုံးသတ်နိုင်ဖို့ အခွင့်အရေးရှိနေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၁၆

အပြောင်းအရွှေ့သတင်းတွေ ထွက်ပေါ်နေတဲ့ ယူနိုက်တက်အသင်းခေါင်းဆောင် ဘရူနိုဖာနန်ဒက်စ်က အသင်းက သူ့ကိုလိုအပ်တဲ့အထိ ဆက်ရှိမယ်လို့ နယူးကာဆယ်အသင်းကို အနိုင်ရတဲ့ပွဲအပြီးမှာ ပြောခဲ့ပါတယ်။

ဘရူနိုဖာနန်ဒက်စ်က “ကလပ်က ကျနော့်ကို လိုအပ်တယ်လို့ ပြောတဲ့အထိ ဒီမှာဆက်ရှိနေမှာပါ။ ကလပ်က ကျနော့်ကို အနာဂတ်ရဲ့ အစိတ်အပိုင်း ဖြစ်စေချင်တယ်လို့ ခံစားရပါတယ်။ ကျနော်အမြဲတမ်း ပြောခဲ့သလိုပဲ ကလပ်အသင်းက အလိုမရှိတဲ့ ကစားသမားမျိုး မဖြစ်ချင်ပါဘူး။ အကြောင်းပြချက် တစ်ခုကြောင့် ကလပ်က ကျနော့်ကို အလိုမရှိတော့ဘူးဆိုရင် ထွက်သွားမှာပါ။ ဒါပေမယ့် သူတို့လိုချင်တယ်ဆိုရင်တော့ ကျနော်ဆက် ရှိမှာပါ”လို့ Sky Sports နဲ့ ပြုလုပ်ခဲ့တဲ့ အင်တာဗျူးမှာ ပြောသွားခဲ့ပါတယ်။

ဘရူနိုဖာနန်ဒက်စ်ဟာ ပြီးခဲ့တဲ့နှစ် အနည်းငယ်အတွင်းမှာ အသင်းရဲ့ အကောင်းဆုံး ကစားသမားအဖြစ် သတ်မှတ် ခြင်းခံခဲ့ရတာ ဖြစ်ပါတယ်။ 

ဒါပေမယ့် ယူနိုက်တက်အသင်းရဲ့ ပူးတွဲပိုင်ရှင်ဖြစ်လာတဲ့ ဆာဂျင်ရက်ကလစ်ဖ်ရဲ့ INEOS ဟာ အသင်းကို ပြန်လည် တည်ဆောက်မှုတွေ စတင်ဖို့ ဘရူနိုဖာနန်ဒက်စ်ကို သူနဲ့ ထိုက်တန်တဲ့ ပြောင်းရွှေ့ကြေးရရင် ရောင်းချသွားဖို့ စဉ်းစားနေတယ်လို့ သတင်းတွေ ထွက်ပေါ်လာခဲ့ပါတယ်။ 

ဒီအချိန်မှာ ဘရူနိုဖာနန်ဒက်စ်ကို ခေါ်ယူဖို့ ဘိုင်ယန်မြူးနစ်နဲ့ အင်တာမီလန်အသင်းတို့က ချိတ်ဆက်မှုတွေ ပြုလုပ်လာခဲ့တာ ဖြစ်ပါတယ်။

ဘရူနိုဖာနန်ဒက်စ်ကိုတွေ့ရစဉ်

ဒါအပြင် ယူနိုက်တက် အသင်းဖော်ဟောင်း ရော်နယ်ဒို ကစားနေတဲ့ အယ်လ်နာဆာအသင်းကလည်း ပေါ်တူဂီ ကွင်းလယ်လူကို ခေါ်ယူဖို့ စိတ်ဝင်စားနေတာပါ။ 

ဒီလိုသတင်းတွေ ထွက်ပေါ်နေပေမယ့် ဘရူနိုဖာနန်ဒက်စ်က သူဟာ ယူနိုက်တက်အသင်းမှာ ဆက်ရှိချင်တယ်လို့ ပြောခဲ့ပြီး ကလပ်အသင်းဘက်က အလိုမရှိတော့ဘူးဆိုရင်တော့ ထွက်ခွာမယ်လို့ ပြောခဲ့တာ ဖြစ်ပါတယ်။ 

ဘရူနိုဖာနန်ဒက်စ်နဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်၊ ဇွန်လအထိ သက်တမ်း ရှိနေတာပါ။

ယူနိုက်တက်အသင်းနည်းပြ အဲရစ်တန်ဟတ်ကလည်း အသင်းဟာ ဘရူနိုဖာနန်ဒက်စ်ကို ဆက်ပြီးရှိစေချင်တယ်လို့ ပြောခဲ့ပါတယ်။

အဲရစ်တန်ဟတ်က “ကျနော် သိသလောက်ဆိုရင် ဘရူနိုဟာ ယူနိုက်တက်အသင်းကို ချစ်တဲ့သူပါ။ သူဟာ ပရိသတ်တွေကို ချစ်သလို ဒီမှာကစားရတာကိုလည်း နှစ်သက်ပါတယ်။ သူဟာ အမြဲတမ်း အကောင်းဆုံး အရာတွေကိုပဲ ပေးနေတာဖြစ်ပြီး ကလပ်အသင်းက သူ့ကို ဆက်ပြီးရှိစေချင်တယ်”လို့ ပြောခဲ့ပါတယ်။ ဘရူနိုဖာနန်ဒက်စ်ဟာ ဒဏ်ရာကြောင့် ပဲလေ့စ်၊ အာဆင်နယ်အသင်းတို့နဲ့ ပွဲတွေမှာ ယူနိုက်တက်အသင်းအတွက် မပါဝင်နိုင်ခဲ့ပေမယ့် နယူးကာဆယ်အသင်းကို ၃ ဂိုး-၂ ဂိုးနဲ့ အနိုင်ရခဲ့တဲပွဲမှာ အသင်းအတွက် ပြန်လည် ကစားပေး နိုင်ခဲ့တာ ဖြစ်ပါတယ်။ 

Source: DailyMail

CNI Sport News

၂၀၂၄ ခုနှစ်၊ မေလ ၁၅

ရက်စ်ဟမ်းအသင်းရဲ့ ချိတ်ဆက်မှုတွေ ခံနေရတဲ့ ဝါရင့်တိုက်စစ်မှူး ဗာဒီက လက်စတာအသင်းနဲ့ စာချုပ်သစ် ချုပ်ဆိုနိုင်ဖို့ မျှော်လင့်နေတာ ဖြစ်ပါတယ်။

ရက်စ်ဟမ်းအသင်းဟာ လိဂ်ဝမ်းကို တန်းတက်နိုင်ခဲ့ပြီးနောက် ဗာဒီကို ခေါ်ယူနိုင်ဖို့ ပစ်မှတ်ထားနေတာပါ။

ဗာဒီနဲ့ လက်စတာအသင်းတို့ ချုပ်ဆိုထားတဲ့ စာချုပ်ဟာ ဇွန်လ ၃၀ ရက်ကျရင် ကုန်ဆုံးတော့မှာဖြစ်ပြီး အင်္ဂလန် ကစားသမားဟောင်းကတော့ အသင်းနဲ့ ၁ နှစ်သက်တမ်းတိုး စာချုပ်ချုပ်ဆိုနိုင်ဖို့ မျှော်လင့်နေတာ ဖြစ်ပါတယ်။ 

လက်စတာအသင်းနည်းပြ မာရက်စကာကလည်း ဗာဒီနဲ့ ဒိန်းမတ်ကစားသမား ဗာစတာဂတ်တို့ကို စာချုပ်သစ် ချုပ်ဆိုဖို့ ဆန္ဒရှိနေတာပါ။

ဗာဒီဟာ လက်စတာအသင်း ချန်ပီယံရှစ်ပြိုင်ပွဲမှာ ရှိခဲ့တဲ့ ၂၀၁၂ ခုနှစ်ကတည်းက အသင်းမှာ ရှိခဲ့တာဖြစ်ပြီး ပရီးမီးယားလိဂ်ကို တန်းတက်ကာ ချန်ပီယံဆုကို ရယူနိုင်ခဲ့ချိန်မှာလည်း ရှိခဲ့သလို တန်းပြန်ဆင်းသွားတဲ့ အချိန်မှာ လည်း အတူရှိနေခဲ့တာ ဖြစ်ပါတယ်။ 

ဗာဒီကို တွေ့ရစဉ်

ဗာဒီဟာ ဒီရာသီမှာ လက်စတာအသင်းကို ချန်ပီယံရှစ်ပြိုင်ပွဲကနေ ပရီးမီးယားလိဂ်ကို တန်းတက်နိုင်အောင် သွင်းဂိုးတွေနဲ့ ကူညီနိုင်ခဲ့ပြီးနောက် ပရီးမီးယားလိဂ်ပြိုင်ပွဲထံ ပြန်လည်လိုက်ပါချင်နေတာပါ။

ဟောလီးဝုဒ်မင်းသားတွေ ပိုင်ဆိုင်တဲ့ ရက်စ်ဟမ်းအသင်းဟာ လိဂ်ဝမ်းကို တန်းတက်နိုင်ခဲ့ပြီးနောက် အသင်းကို ပြန်လည်တည်ဆောက်နိုင်ဖို့အတွက် အလွတ်ပြောင်းရွှေ့ကြေးနဲ့ ခေါ်ယူလို့ရမယ့် ဗာဒီကို စိတ်ဝင်စားနေတာပါ။ 

ဒါပေမယ့် ဗာဒီကတော့ နှစ်ပေါင်း ၁၂ နှစ်ကြာ ကစားခဲ့တဲ့ လက်စတာအသင်းမှာပဲ ဆက်ပြီးရှိနေချင်တာ ဖြစ်ပါတယ်။ 

လက်စတာအသင်းဟာ လက်ရှိအချိန်မှာ စာချုပ်သစ် ညှိနှိုင်းတာ အပါအဝင် အပြောင်းအရွှေ့ ပြုလုပ်ခြင်းမပြုလုပ် ဖို့ ပိတ်ပင်ခံထားရပေမယ့် လာမယ့်လမှာတော့ ပိတ်ပင်မှုကို ရုပ်သိမ်းခံရဖို့ ရှိနေတာပါ။

လက်စတာအသင်းဟာ ဗာဒီကို စာချုပ်သစ် ချုပ်ဆိုနိုင်ခဲ့ရင်တောင် အယ်လ်ဘရိုက်တန်၊ အန်ဒီဒီ၊ အီဟီနာချိုနဲ့ ပါရက်တို့ကို နွေရာသီ အပြောင်းအရွှေ့မှာ ဆုံးရှုံးရဖွယ်ရှိနေတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၁၅

ပြင်သစ်လက်ရွေးစင်တိုက်စစ်မှူး ဂီရော့ဒ်ဟာ အေစီမီလန်အသင်းနဲ့ စာချုပ်ကုန်ဆုံးမယ့် ရာသီအကုန်မှာ မေဂျာလိဂ်ကလပ် LAFC အသင်းထံ ပြောင်းရွှေ့မှာဖြစ်ပါတယ်။

အာဆင်နယ်နဲ့ ချယ်လ်ဆီးအသင်း တိုက်စစ်မှူးဟောင်းဟာ LAFC အသင်းနဲ့ ၂၀၂၅ ခုနှစ်အထိ စာချုပ် ချုပ်ဆိုခဲ့ ပေမယ့် နောက်ထပ် တစ်နှစ်သက်တမ်းတိုးဖို့ ရွေးချယ်ခွင့်ရှိနေတာပါ။ 

အသက် ၃၇ နှစ်အရွယ်ရှိ ဂီရော့ဒ်ဟာ အေစီမီလန်အသင်းမှာ ၃ ရာသီကြာ ကစားခဲ့ပြီး ၂၀၂၁-၂၂ ရာသီက စီးရီးအေ ဖလား ရရှိအောင် အကူအညီပေးနိုင်ခဲ့ပါတယ်။

ဂီရော့ဒ်ဟာ နွေရာသီမှာ ကျင်းပမယ့် ယူရို ၂၀၂၄ ပြိုင်ပွဲမှာ ပြင်သစ်အသင်းအတွက် ပါဝင်ကစားပေးပြီးမှ LAFC အသင်းနဲ့ ပူးပေါင်းမှာပါ။

ဂီရော့ဒ်က “LAFC အသင်းထံ ပြောင်းရွှေ့ခွင့်ရတဲ့အတွက် ပျော်ရွှင်ပြီး စိတ်လှုပ်ရှားနေပါတယ်။ LAFC အသင်း အတွက်နဲ့ အသင်းပရိသတ်တွေ အရှေ့မှာ ကစားပေးနိုင်ဖို့ကို မစောင့်နိုင်တော့ဘူး”လို့ အသင်းရဲ့ တရားဝင် ဝက်ဘ်ဆိုက်မှာ ပြောခဲ့တာ ဖြစ်ပါတယ်။

ဂီရော့ဒ်ကို တွေ့ရစဉ်

ဂီရော့ဒ်ဟာ LAFC အသင်းမှာ တစ်နှစ်လုပ်ခယူရို ၃ သန်းဝန်းကျင် ရရှိလိမ့်မယ်လို့ ESPN က ဖော်ပြထားတာပါ။ 

LAFC အသင်းမှာ ပြင်သစ်အသင်း ဂိုးသမားဟောင်း ဟူဂိုလိုရစ် ကစားနေတာကြောင့် ဂီရော့ဒ်ဟာ မေဂျာလိဂ်ကို ပြောင်းရွှေ့ချိန်မှာ သူ့ရဲ့ လက်ရွေးစင် အသင်းဖော်ဟောင်းနဲ့ ပြန်ပြီးတွဲဖက် ကစားရတော့မှာ ဖြစ်ပါတယ်။ 

ဂီရော့ဒ်ဟာ ဒီရာသီမှာ အေစီမီလန်အသင်းအတွက် ၄၅ ပွဲ ကစားထားပြီး ၁၆ ဂိုး သွင်းယူထားကာ အသင်းကို စီးရီးအေပြိုင်ပွဲမှာ အဆင့် ၂ နေရာ ရပ်တည်နိုင်အောင် စွမ်းဆောင်ပေးထားတာပါ။

LAFC အသင်းဟာ ဒီရာသီ မေဂျာလိဂ် ပွဲစဉ်ပေါင်း ၁၂ ပွဲ ကစားထားအပြီးမှာ ရမှတ် ၁၈ မှတ်နဲ့ အနောက်ပိုင်းဇုန် အမှတ်ပေးဇယား အဆင့် ၅ နေရာမှာ ရပ်တည်နေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ မေလ ၁၅

အက်စတွန်ဗီလာအသင်းဟာ ပရီးမီးယားလိဂ် အဆင့် ၄ ပြိုင်ဘက်ဖြစ်တဲ့ စပါးအသင်းက မန်စီးတီးအသင်းကို အရေးနိမ့်သွားခဲ့တာကြောင့် ချန်ပီယံလိဂ်ပြိုင်ပွဲကို ပထမဆုံးအကြိမ်ယှဉ်ပြိုင်ခွင့် ရရှိသွားခဲ့ပြီဖြစ်ပါတယ်။ 

စပါးအသင်းရဲ့ အရှုံးရလဒ်ကြောင့် အက်စတွန်ဗီလာအသင်းဟာ ဒီရာသီ ပရီးမီးယားလိဂ်ပွဲစဉ်ကစားဖို့ ၁ ပွဲသာ ကျန်ရှိတော့တဲ့အချိန် အဆင့် ၄ နေရာမှာ ရမှတ် ၅ မှတ်ဖြတ်ပြီး ရပ်တည်နိုင်ခဲ့တာပါ။

 အက်စတွန်ဗီလာ အသင်း ဟာ ၁၉၉၁-၉၂ ရာသီကစတင်ပြီး ဥရောပဖလားပြိုင်ပွဲကနေ ချန်ပီယံလိဂ်ဖလားလို့ အမည်ပြောင်းလဲပြီး နောက်မှာ ဒီပြိုင်ပွဲကို ယှဉ်ပြိုင်ခွင့်မရရှိသေးတာဖြစ်ပါတယ်။ အက်စတွန်ဗီလာအသင်းဟာ ဥရောပဖလားပြိုင်ပွဲကို လွန်ခဲ့တဲ့ ၄၁ နှစ် ၁၉၈၂-၈၃ ရာသီက နောက်ဆုံးယှဉ်ပြိုင်ခဲ့ရတာပါ။

အက်စတွန်ဗီလာအသင်းဟာ သူတို့ရဲ့ ဆုပေးပွဲနဲ့ ညစာစားပွဲအခမ်းအနားမှာ စပါးအသင်းရဲ့ ရလဒ်ထွက်ပေါ် ပြီးနောက် အောင်ပွဲခံခဲ့ကြတာဖြစ်ပါတယ်။ အက်စတွန်ဗီလာအသင်းဟာ သူတို့ရဲ့ ဆိုရှယ်မီဒီယာမှာ နည်းပြ အူနှိုင်းအမ်မရီနဲ့ ကစားသမားတွေ ရှန်းပိန်ဖြန်းပက်ပြီး အောင်ပွဲခံမှုပြုလုပ်နေတာကို တင်ထားခဲ့တာပါ။

အူနှိုင်းအမ်မရီက “ဒါက ကျနော်တို့အတွက် အထူးနေ့နဲ့ ကျနော်တို့ရဲ့ အိပ်မက်ပါ။ ကျနော်တို့မှာ ဒဏ်ရာတွေ ရှိနေပေမယ့် အသင်းက အမြဲတမ်းအာရုံစိုက်ထားပါတယ်။ အသင်းဟာ အလွန်ကောင်းမွန်ခဲ့ပြီး ချန်ပီယံလိဂ်မှာ ကစားရတာက အကောင်းဆုံးပါပဲ”လို့ ပြောခဲ့ပါတယ်။

အက်စတွန်ဗီလာအသင်းရဲ့ ပရိသတ်ဖြစ်တဲ့ ဝေလမင်းသား ဝီလျံကလည်း အသင်းရဲ့ အောင်မြင်မှုအတွက် ဂုဏ်ယူ မိပြီး တစ်သင်းလုံးကို ကျေးဇူးတင်ကြောင်းနဲ့ လာမယ့်ရာသီကို မစောင့်နိုင်တော့ဘူးလို့ ဆိုရှယ်မီဒီယာ X မှာ ရေးသားခဲ့တာပါ။ 

အက်စတွန်ဗီလာအသင်းဟာ နည်းပြ အူနှိုင်းအမ်မရီကို ခန့်အပ်ပြီးကတည်းက ရလဒ်ကောင်း တွေရရှိခဲ့ပြီး မနှစ်ကရာသီက တန်းဆင်းဇုန်အနားကနေ ဥရောပဝင်ခွင့်ရရှိအောင် ကိုင်တွယ်ပေးနိုင်ခဲ့တာ ဖြစ်ပါတယ်။

အက်စတွန်ဗီလာအသင်းဟာ ဒီရာသီယူရိုပါကွန်းဖရန့်လိဂ်ပြိုင်ပွဲမှာ ဆီမီးဖိုင်နယ်အဆင့်ထိ တက်နိုင်ခဲ့ပြီး အိုလံပီယာကို့စ်အသင်းကို အရေးနိမ့်ခဲ့တာပါ။ အက်စတွန်ဗီလာအသင်းဟာ ဒီရာသီ ပရီးမီးယားလိဂ် နောက်ဆုံး ပွဲစဉ်အဖြစ် ပဲလေ့စ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC