CNI Sport News

၂၀၂၄ ခုနှစ်၊ ဒီဇင်ဘာ ၉

ချယ်လ်ဆီးအသင်းဟာ စပါးအသင်းကို ၄ ဂိုး-၃ ဂိုးနဲ့ အနိုင်ရရှိကာ ပရီးမီးယားလိဂ် ချန်ပီယံဆုပြိုင်ဆိုင်မှုမှာ ရှိနေပြီးနောက် နည်းပြမာရက်စ်ကာက အသင်းပရိသတ်တွေ အိပ်မက်မက်နိုင်တယ်လို့ ပြောခဲ့ပါတယ်။

မာရက်စ်ကာက “အပြင်ဘက်ကနေကြည့်ရင် အလွန်ရှင်းတာကြောင့် ပရိသတ်တွေ အိပ်မက်မက်နိုင်ပါတယ်။ အထဲကို ကြည့်ရင်တော့ ကျနော်တို့ အဆင်သင့် မဖြစ်သေးပါဘူး။ ဒါပေမယ့် အရေးကြီးဆုံးက တစ်နေ့ပြီး တစ်နေ့ တိုးတက်ဖို့ပါပဲ။ အာဆင်နယ်၊ မန်စီးတီးနဲ့ လီဗာပူးလ်အသင်းတို့ဟာ ကူကူရယ်လာ ခြေချော်လဲသလိုမျိုး ဖြစ်မှာ မဟုတ်ဘူး”လို့ ပြောခဲ့တာပါ။ 

ချယ်လ်ဆီးအသင်းဟာ စပါးအသင်းနဲ့ပွဲစဉ်မှာ ဦးဆောင်ဂိုး ၂ ဂိုး ပေးခဲ့ရပေမယ့် အနောက်ကနေလိုက်ပြီး ချေပဂိုး တွေနဲ့ အနိုင်ဂိုးတွေ သွင်းယူကာ နိုင်ပွဲရယူနိုင်ခဲ့တာ ဖြစ်ပါတယ်။ 

ချယ်လ်ဆီးအသင်းဟာ စပါးအသင်းကို အနိုင်ရရှိခဲ့တာကြောင့် နောက်ဆုံး ကစားခဲ့တဲ့ ပရီးမီးယားလိဂ် ၄ ပွဲစလုံး အနိုင်ရရှိကာ အမှတ်ပေးဇယားအဆင့် ၂ နေရာမှာ ရပ်တည်နေတာပါ။ 

ချယ်လ်ဆီးအသင်းဟာ အဆင့် ၁ နေရာက လီဗာပူးလ်အသင်းထက် ၁ ပွဲပို ကစားထားပြီး ရမှတ် ၄ မှတ်သာ ကွာဟတော့တာကြောင့် ချန်ပီယံဆုအတွက် ပြိုင်ဆိုင်မှုထဲမှာ ဆက်ပြီးရှိနေခဲ့တာဖြစ်ပါတယ်။ 

ချယ်လ်ဆီးအသင်းကို တွေ့ရစဉ်

ချယ်လ်ဆီးအသင်းနည်းပြ မာရက်စ်ကာက အသင်းဟာ ချန်ပီယံဆုအတွက် ပြိုင်ဆိုင်မှုပါဝင်ဖို့ အဆင်သင့် ဖြစ်နေ တယ်ဆိုတာ မယုံကြည်သေးပေမယ့် ပရိသတ်တွေကိုတော့ အိပ်မက်မက်နိုင်တယ်လို့ ပြောခဲ့တာပါ။ 

ဒါအပြင် ချယ်လ်ဆီးအသင်းနည်းပြ မာရက်စ်ကာဟာ ဒီပွဲမှာ အသင်းအတွက် ပင်နယ်တီကနေ ၂ ဂိုးသွင်းပြီး ခြေစွမ်းပြသခဲ့တဲ့ ကိုးလ်ပါလ်မာဟာ ဘောလုံးကိုချစ်ပြီး နှိမ့်ချတဲ့သူဖြစ်ကာ သူ့အတွက် ပျော်ရွှင်တယ်လို့ ပြောခဲ့ပါတယ်။ 

ချယ်လ်ဆီးအသင်းကို ရောက်ရှိလာပြီးကတည်းက ခြေစွမ်းပြသနေတဲ့ ကိုးလ်ပါလ်မာဟာ ဒီပွဲမှာသွင်းခဲ့တဲ့ ပင်နယ်တီ သွင်းဂိုး ၂ ဂိုးကြောင့် ပရီးမီးယားလိဂ် ပြိုင်ပွဲမှာ ပင်နယ်တီ လွဲချော်မှုမရှိဘဲ ဂိုးအများဆုံး သွင်းယူနိုင်တဲ့ သူအဖြစ် မှတ်တမ်းဝင်ခဲ့တာပါ။ 

အသက် ၂၂ နှစ်အရွယ်ရှိ ကိုးလ်ပါလ်မာဟာ ဒီရာသီမှာ ချယ်လ်ဆီး အသင်းအတွက် ပြိုင်ပွဲစုံ ၁၇ ပွဲ ပါဝင် ကစား ထားပြီး ၁၁ ဂိုး သွင်းယူထားပါတယ်။ 

ချယ်လ်ဆီးအသင်းဟာ ကြားရက်ထဲမှာ ကွန်းဖရန့်လိဂ် ပွဲစဉ်အဖြစ် အက်စ်တာနာအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ ဒီဇင်ဘာ ၇

ချယ်လ်ဆီးအသင်းနည်းပြ မာရက်စ်ကာက ကွင်းလယ်လူ ကိုင်စီဒိုဟာ အာဆင်နယ်အသင်း ကွင်းလယ်လူ ဒီကလန်ရိုက်စ်၊ မန်စီးတီးအသင်း ကွင်းလယ်လူ ရိုဒရီတို့နဲ့ တူညီတဲ့အဆင့်မှာရှိတယ်လို့ ပြောခဲ့ပါတယ်။

မာရက်စ်ကာက “ကိုင်စီဒိုက ဒီအဆင့်မှာ ရှိတယ်ဆိုတာ သေချာပြီး သံသယဖြစ်စရာ မရှိပါဘူး။ အခုအချိန်မှာ ရိုဒရီက ဒဏ်ရာရရှိနေပြီး ဒီကလန်ရိုက်စ်က ကစားနေပါတယ်။ ကိုင်စီဒိုဟာ ဒီလိုကွင်းလယ် ကစားသမားမျိုးနဲ့ စားပွဲတစ်ခုမှာ အတူထိုင်နိုင်မယ်”လို့ ထင်ကြောင်းပြောခဲ့တာပါ။

၂၀၂၃ နွေရာသီ အပြောင်းအရွှေ့က ဘရိုက်တန်အသင်းကနေ ပေါင် ၁၁၅ သန်းနဲ့ ပြောင်းရွှေ့လာခဲ့တဲ့ ကိုင်စီဒိုဟာ နည်းပြ ပိုချက်တီနို လက်အောက်မှာ ခြေစွမ်းပုံမှန်ပြသနိုင်ဖို့ ရုန်းကန်ခဲ့ရတာ ဖြစ်ပါတယ်။

ဒါပေမယ့် ကိုင်စီဒိုဟာ နည်းပြ မာရက်စ်ကာ လက်ထက်မှာတော့ အကောင်းဆုံး ခြေစွမ်းပြသနေပြီး ချယ်လ်ဆီး အသင်းရဲ့ အဓိက ကစားသမားတွေထဲက တစ်ဦးအဖြစ်ရှိနေတာပါ။

ကိုင်စီဒိုကို တွေ့ရစဉ်

အဲဒါကြောင့် မာရက်စ်ကာက ကိုင်စီဒိုဟာ အာဆင်နယ်နဲ့ မန်စီးတီးအသင်းတွေမှာ အရေးပါတဲ့ သူတွေအဖြစ် ရှိနေတဲ့ ဒီကလန်ရိုက်စ်၊ ရိုဒရီတို့နဲ့ တူညီတဲ့အဆင့်မှာ ရှိတယ်လို့ ပြောခဲ့တာဖြစ်ပါတယ်။ 

အသက် ၂၃ နှစ်အရွယ်ရှိ အီကွေဒေါ ကစားသမားဟာ ချယ်လ်ဆီးအသင်းအတွက် ပြိုင်ပွဲစုံ ၆၄ ပွဲ ပါဝင် ကစား ထားပြီး ၂ ဂိုး သွင်းယူထားတာပါ။ 

ချယ်လ်ဆီးအသင်းဟာ ဒီရာသီမှာ ရလဒ်ကောင်းတွေ ရရှိထားပေမယ့် နည်းပြ မာရက်စ်ကာကတော့ သူ့ရဲ့အသင်း ဟာ ပရီးမီးယားလိဂ် ချန်ပီယံဆုပြိုင်ပွဲမှာ မပါဝင်ဘူးလို့ ပြောထားပါတယ်။ 

ဒါပေမယ့် မာရက်စ်ကာက ချယ်လ်ဆီးအသင်းဟာ လာမယ့် ၅ နှစ်ကနေ ၁၀ နှစ်အတွင်း ပရီးမီးယားလိဂ်ကို ကြီးစိုးမယ်လို့ ပြောထားတာပါ။

ချယ်လ်ဆီးအသင်းဟာ ဒီဇင်ဘာ ၈ ရက်မှာ ပရီးမီးယားလိဂ် ပွဲကြီးပွဲကောင်းအဖြစ် စပါးအသင်းနဲ့ ယှဉ်ပြိုင်ရမှာ ဖြစ်ပါတယ်။ 

CNI Sport News

၂၀၂၄ ခုနှစ်၊ ဒီဇင်ဘာ ၇

စပိန်လူမျိုးနည်းပြ အာတီတာက အာဆင်နယ်အသင်းကို စတုတ်စီးတီးအသစ်လို့ ယူနိုက်တက်အသင်း တိုက်စစ်မှူးဟောင်း ဘာဘာတော့ဗ်က ပြောခဲ့တဲ့အပေါ် တုန့်ပြန်ခဲ့ပါတယ်။ 

အာတီတာက “ဘာဘာတော့ဗ် ပြောတာကို ကျနော်ကောင်းမွန်စွာ နားလည်ပါတယ်။ စတုတ်စီးတီးအသင်းက အလွန်ကောင်းခဲ့တာကြောင့် ဒါကို ကျနော်ချီးကျူးမှု တစ်ခုအဖြစ် မှတ်ယူပါတယ်။ ကျနော်တို့ဟာ တည်ကန် ဘောမှ မဟုတ်ပါဘူး၊ အရာအားလုံးရဲ့ဘုရင်နဲ့ ကမ္ဘာ့အကောင်းဆုံး ဖြစ်ချင်ပါတယ်။ ကျနော်တို့ဟာ အရင်က လုံလောက်တဲ့ ဂိုးလည်း မသွင်းနိုင်၊ စိန်ခေါ်နိုင်ခြင်းလည်းမရှိလို့ လွန်ခဲ့တဲ့နှစ် ၂၀ တုန်းက ပွဲကြီးတွေမှာ အနိုင်မရ ခဲ့ပါဘူး။ အခုအချိန်မှာတော့ ကျနော်တို့ အရာအားလုံးရဲ့ အကောင်းဆုံးဖြစ်ချင်ပါတယ်”လို့ ပြောခဲ့တာပါ။

အာဆင်နယ်အသင်းဟာ ပြီးခဲ့တဲ့ကြားရက်က ယူနိုက်တက်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ပွဲမှာ ထောင့်ကန် ဘော ကနေတဆင့် ဂိုးတွေ သွင်းယူနိုင်ခဲ့တာ ဖြစ်ပါတယ်။ 

အာဆင်နယ်အသင်းဟာ ပြီးခဲ့တဲ့ ရာသီကနေစတင်ပြီး တည်ကန်ဘောတွေကနေ ဂိုးတွေ အများကြီး သွင်းယူကာ ပြိုင်ဘက် အသင်းတွေဆီကနေ ရမှတ်တွေ ရယူနိုင်ခဲ့တာပါ။

အာဆင်နယ်အသင်းနည်းပြ အာတီတာကို တွေ့ရစဉ်

အဲဒါကြောင့် ဘာဘာတော့ဗ်က အာဆင်နယ်အသင်းဟာ စတုတ်စီးတီးအသစ်လို့ နောက်ပြောင်မှု ပြုလုပ်ခဲ့တာ ဖြစ်ပါတယ်။

တိုနီပူးလစ်ကိုင်တွယ်ခဲ့တဲ့ စတုတ်စီးတီးအသင်းဟာ ပရီးမီးယားလိဂ်မှာရှိချိန်က လက်ပစ်ဘောတွေ၊ တည်ကန် ဘောတွေကို အားသာချက်အဖြစ် အသုံးပြုပြီး သွင်းဂိုးတွေ ရယူနိုင်ခဲ့တာပါ။ 

အာဆင်နယ်အသင်း ကိုယ်တိုင်လည်း စတုတ်စီးတီးအသင်းနဲ့ ယှဉ်ပြိုင်ခဲ့တုန်းက ဒီလိုအခြေအနေတွေကနေ ဂိုးတွေပေးခဲ့ရတာ ဖြစ်ပါတယ်။ 

အာဆင်နယ်အသင်း နည်းပြ အာတီတာကတော့ သူတို့ဟာ တည်ကန်ဘောတွေတင် မဟုတ်ဘဲ အရာအားလုံးမှာ အကောင်းဆုံး ဖြစ်ချင်တယ်လို့ ပြောခဲ့တာပါ။ 

အာဆင်နယ်အသင်းဟာ ပရီးမီးယားလိဂ် ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ပြီးရင် ကြားရက်မှာ မိုနာကို အသင်းနဲ့ ချန်ပီယံလိဂ်ပွဲစဉ် ယှဉ်ပြိုင်မှာဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဒီဇင်ဘာ ၇

ပေါ်တူဂီလူမျိုးနည်းပြ အာမိုရင်က ယူနိုက်တက်အသင်းဟာ ကြီးမားတဲ့ကလပ် ဖြစ်ပေမယ့် ကြီးမားတဲ့အသင်း မဟုတ်ဘူးလို့ ပြောလိုက်ပါတယ်။

အာမိုရင်က “ဒါက အလွန်ရှင်းပါတယ်။ ယူနိုက်တက်က ကြီးမားတဲ့ကလပ် ဖြစ်ပေမယ့် ကြီးမားတဲ့အသင်း မဟုတ် ပါဘူး။ ဒါကို ကျနော်တို့သိတဲ့အတွက် ပြောဖို့ ပြဿနာမရှိပါဘူ။ ကျနော်တို့ဟာ လိဂ်ရဲ့အကောင်းဆုံး အသင်း တစ်သင်း မဟုတ်ဘူးလို့ ပြောချင်ပါတယ်။ ကျနော်တို့ ဒါကို ရှင်းရှင်းလင်းလင်း ပြောဖို့လိုပါတယ်။ ဒါပေမယ့် ကျနော်တို့ဟာ အတိတ်တုန်းက လိဂ်ရဲ့ အကောင်းဆုံး အသင်းတွေထဲက တစ်သင်းဖြစ်နိုင်ပါတယ်။ ကျနော်တို့ဟာ အသေးစိတ် အချက်အလက်တွေကို အာရုံစိုက်ပြီးရင် အသင်းလိုက်တိုး တက်လာမှာပါ”လို့ ပြောခဲ့တာပါ။ 

ယူနိုက်တက်အသင်းဟာ အမှတ်ပေးဖလားကို အကြိမ် ၂၀ အထိရယူပြီး အအောင်မြင်ဆုံး အသင်းအဖြစ် ရပ်တည် နိုင်ခဲ့ပေမယ့် ပြီးခဲ့တဲ့ ဆယ်စုနှစ်အတွင်းမှာ အမှတ်ပေးဖလား အောင်မြင်မှုတွေနဲ့ ဝေးကွာခဲ့တာဖြစ်ပါတယ်။ 

ယူနိုက်တက်ကစားသမားတွေကို တွေ့ရစဉ်

ယူနိုက်တက်အသင်းဟာ ကြားရက်မှာ ကစားခဲ့တဲ့ အာဆင်နယ်အသင်းနဲ့ပွဲစဉ်မှာ ၂ ဂိုး-ဂိုးမရှိနဲ့ အရေးနိမ့်ပြီးနောက် ပရီးမီးယားလိဂ် အမှတ်ပေးဇယားအဆင့် ၁၃ နေရာအထိ ကျဆင်းသွားခဲ့တာပါ။ 

အာမိုရင်အတွက်လည်း ယူနိုက်တက်အသင်း နည်းပြဘဝမှာ ပထမဆုံး ရှုံးပွဲကြုံတွေ့ခဲ့တာဖြစ်ပါတယ်။

အာမိုရင်က ယူနိုက်တက်အသင်း ကစားသမားတွေဟာ ကြိုးစားအားထုတ်မှု ပြုလုပ်တာကို မြင်တွေ့နေရပေမယ့် တိုးတက်ဖို့ နေရာတွေ အများကြီးရှိသလို ပရီးမီးယားလိဂ်ဖလားကို ရယူချင်တယ်ဆိုရင် ခွေးရူးတွေလို ပြေးရမှာ ဖြစ်ပြီး ဒီလိုမှမဟုတ်ရင် ရမှာမဟုတ်ဘူးလို့ ပြောခဲ့ပါတယ်။ 

ယူနိုက်တက်အသင်းဟာ ပရီးမီးယားလိဂ်ပွဲစဉ် ၁၅ အဖြစ် နော်တင်ဟမ်ဖောရက်စ်အသင်းကို အိမ်ကွင်း ယှဉ်ပြိုင်ရမှာပါ။ 

နော်တင်ဟမ်ဖောရက်စ်အသင်းဟာ ဒီရာသီမှာ ရလဒ်ကောင်းတွေ ရယူထားပြီး ပရီးမီးယားလိဂ်အဆင့် ၇ နေရာမှာ ရပ်တည်နေတာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ ဒီဇင်ဘာ ၇

အင်တာမိုင်ယာမီအသင်း ခေါင်းဆောင် မက်ဆီဟာ ၂၀၂၄ မေဂျာလိဂ်ပြိုင်ပွဲရဲ့ တန်ဖိုးအရှိဆုံး ကစားသမားဖြစ်တဲ့ (MVP)ဆုကို ရရှိသွားခဲ့ပါတယ်။ 

မက်ဆီဟာ ဒီဆုကို ကိုလံဘတ်စ်အသင်းက ကူချိုဟာနန်ဒက်ဇ်၊ ပေါ့တ်လန်းတင်ဘာစ်အသင်းက အီဗန်ဒါ၊ ဒီစီယူနိုက်တက်အသင်းက ဘန်တီကီနဲ့ အင်တာမိုင်ယာမီအသင်းဖော် ဆွာရက်ဇ်တို့ကို မဲအသာရပြီး ရရှိခဲ့တာပါ။ 

မက်ဆီဟာ ၂၀၂၄ မေဂျာလိဂ်ပြိုင်ပွဲမှာ အင်တာမိုင်ယာမီအသင်းအတွက် ၁၉ ပွဲသာ ပါဝင်ကစားနိုင်ခဲ့ပေမယ့် သွင်းဂိုး ၂၀ သွင်းပြီး ဂိုးဖန်တီးမှု ၁၀ ကြိမ်ပြုလုပ်ကာ အသင်းကို Supporter’s Shield ဖလားရရှိအောင် ကူညီပေးနိုင်ခဲ့တာ ဖြစ်ပါတယ်။ 

မေဂျာလိဂ်ပြိုင်ပွဲရဲ့ MVP ဆုကို ကစားသမားတွေ၊ ကလပ်နည်းစနစ်ပိုင်းအဖွဲ့ဝင်နဲ့ မီဒီယာအဖွဲ့ဝင်တွေပါဝင်တဲ့ စစ်တမ်းတစ်ခုက ဆုံးဖြတ်တာပါ။

မက်ဆီဟာ ပျှမ်းမျှမဲ ၃၈.၄၃ ရာခိုင်နှုန်း ရရှိခဲ့ပြီး ဒုတိယနေရာမှာ ရပ်တည်ခဲ့တဲ့ ဘန်တီကီက မဲ ၃၃.၇၀ ရာခိုင်နှုန်း ရရှိခဲ့ပါတယ်။ 

မက်ဆီကိုတွေ့ရစဉ်

၂၀၂၃ ခုနှစ်၊ ဇူလိုင်က အင်တာမိုင်ယာမီအသင်းထံ ပြောင်းရွှေ့ခဲ့တဲ့ မက်ဆီဟာ ပထမဆုံးရာသီ အပြည့်ကစား ခဲ့ရတဲ့ ဒီရာသီမှာ MVP ဆုကို ရရှိခဲ့တာပါ။

မက်ဆီဟာ ဒီဆုကို သားဖြစ်သူ ၃ ဦး၊ အင်တာမိုင်ယာမီ အကယ်ဒမီ ကစားသမားတွေဆီကနေ လက်ခံရရှိခဲ့တာ ဖြစ်ပါတယ်။

မက်ဆီက “မင်းတို့အားလုံးဆီကနေ ဒီဆုကို လက်ခံရယူတာဟာ ဂုဏ်ယူစရာပါပဲ။ မင်းတို့နဲ့အတူ ဒီမှာနေ့တိုင်း ရှိရတာကို ငါအလွန်ပျော်ပါတယ်။ တိုးတက်နေတဲ့ ဒီကလပ်နဲ့ ဒီမြို့မှာ နေရတာကို အလွန်ပျော်ရွှင်ပြီး မင်းတို့ရဲ့ အိပ်မက်တွေအတွက် ကြိုးစားပြီး ဆက်တိုက်ပွဲဝင်ဖို့ ငါဖိတ်ခေါ်ပါတယ်”လို့ အကယ်ဒမီ ကစားသမားတွေကို ပြောခဲ့တာပါ။ 

မက်ဆီဟာ မေဂျာလိဂ်ပုံမှန်ရာသီ ပွဲပေါင်း ၃၄ ပွဲမှာ ၅၅ ရာခိုင်နှုန်းသာ ပါဝင်ကစားခဲ့ပြီး ဒဏ်ရာကြောင့် ပွဲ အများအပြား လွဲချော်ခဲ့ပေမယ့် ပါဝင်ကစားခဲ့တဲ့ပွဲတွေက ကိန်းဂဏန်းတွေနဲ့ သက်ရောက်မှုတွေကြောင့် MVP ဆုကို ရရှိခဲ့ပါတယ်။ 

အင်တာမိုင်ယာမီအသင်းဟာ မေဂျာလိဂ်ပုံမှန်ရာသီမှာ စံချိန်တင်ရမှတ်နဲ့ Supporter’s Shield ဖလားရခဲ့ပေမယ့် မေဂျာလိဂ်ဖလားပြိုင်ပွဲကနေ စောစီးစွာ ထွက်ခွာခဲ့ရတာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၆

ဂျာမနီဘောလုံးအဖွဲ့ချုပ်(DFB)ဟာ ဘိုင်ယန်မြူးနစ်အသင်း ခေါင်းဆောင်ဖြစ်တဲ့ ဝါရင့်ဂိုးသမား နူအာကို လေဗာကူဆင်အသင်းနဲ့ပွဲစဉ်မှာ ပြသခံခဲ့ရတဲ့ အနီကတ်ကြောင့် ဂျာမန်ဖလား ၂ ပွဲပယ် ပြစ်ဒဏ် ချမှတ်ခဲ့ပါတယ်။ 

အသက် ၃၈ နှစ်အရွယ်ရှိ နူအာဟာ ဂျာမန်ဖလားပွဲစဉ်မှာ လေဗာကူဆင်အသင်း ကစားသမား ဖရင်ပေါင်ကို ဂိုးစည်း အပြင်ဘက်မှာ ပြစ်ဒဏ်ကျူးလွန်ခဲ့တာကြောင့် ကွင်းလယ်ဒိုင်လူကြီးရဲ့ တိုက်ရိုက်အနီကတ်ပြ ထုတ်ပယ် ခြင်းကို ခံခဲ့ရတာပါ။ 

နူအာအတွက်တော့ သူ့ရဲ့နှစ်ပေါင်း ၂၀ နီးပါး ကစားသမားဘဝမှာ ပထမဆုံးအကြိမ် အနီကတ်ပြသခြင်းကို ခံခဲ့ရတာ ဖြစ်ပါတယ်။

ဘိုင်ယန်မြူးနစ်အသင်းဟာ နူအာရဲ့ အနီကတ်နဲ့အတူ လေဗာကူဆင်အသင်းကို ၁ ဂိုး-ဂိုးမရှိနဲ့ အရေးနိမ့်ပြီး ဂျာမန်ဖလားပြိုင်ပွဲကနေ ထွက်ခွာခဲ့ရတာပါ။

 နူအာကို တွေ့ရစဉ် 

နူအာဟာ ၂ ပွဲပယ်ကို ပြည်တွင်းဖလား ပြိုင်ပွဲမှာသာ ကျခံရမှာဖြစ်ပြီး ဘိုင်ယန်မြူးနစ်အသင်းဟာ ဂျာမန်ဖလား ပြိုင်ပွဲကနေ ထွက်ခဲ့ရတဲ့အတွက် လာမယ့်ရာသီမှသာ ပွဲပယ်ပြစ်ဒဏ် ကျခံရဖို့ ရှိနေတာဖြစ်ပါတယ်။

ဒါပေမယ့် နူအာနဲ့ ဘိုင်ယန်မြူးနစ်အသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးတော့မှာပါ။ 

ဘိုင်ယန်မြူးနစ်အသင်းဟာ စာချုပ်သက်တမ်းမတိုးဖို့ ဆုံးဖြတ်ခဲ့လို့ နူအာ အနားယူခဲ့ရင် ဒါမှမဟုတ် သူဟာ ဂျာမန် ဘောလုံးကနေ ထွက်ခွာခဲ့ရင်တော့ ပွဲပယ်ပြစ်ဒဏ် ကျခံရမှာ မဟုတ်ပါဘူး။ 

ဘိုင်ယန်မြူးနစ်အသင်းဟာ ဒီဇင်ဘာ ၇ ရက်မှာ ဘွန်ဒက်လီဂါ ပွဲစဉ်အဖြစ် ဟိုင်ဒမ်ဟိုင်းအသင်းနဲ့ ယှဉ်ပြိုင်ရမှာ ဖြစ်ပြီး နူအာဟာ ဘိုင်ယန်မြူးနစ်အသင်းရဲ့ ပွဲထွက်လူစာရင်းထဲ ပါဝင်လာမှာဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဒီဇင်ဘာ ၆

ပြင်သစ်ကွင်းလယ်လူဟောင်း ပီတစ်က စပို့တင်းလစ္စဘွန်းအသင်း တိုက်စစ်မှူး ယိုကီရက်စ်ကို ယူနိုက်တက် အသင်းရဲ့ ကမ်းလှမ်းမှုကို ငြင်းပယ်ပြီး အာဆင်နယ်အသင်းထံ ပြောင်းရွှေ့ဖို့ တိုက်တွန်းခဲ့ပါတယ်။

ပီတစ်က “ယူနိုက်တက်မှာ ယိုကီရက်စ်ရဲ့ နည်းပြဟောင်း ရှိတယ်ဆိုတာသိပေမယ့် သူတို့မှာ တိုက်စစ်မှူး နေရာ အတွက် ရက်ရှ်ဖို့ဒ်၊ ဟော့ဂျ်လန်းနဲ့ ဇက်ခ်ဇီတို့ ရှိပြီးသားပါ။ အာဆင်နယ်မှာ သူ့အတွက် ပိုဆွဲဆောင်မှုရှိတဲ့ အရာတွေရှိပါတယ်။ ဟာဗက်ဇ်ဟာ နံပါတ် ၉ ပုံစံလို မဟုတ်သလို ဂျီးဆပ်စ်ကလည်း ကောင်းမွန်စွာ စွမ်းဆောင် နိုင်ခြင်း မရှိပါဘူး။ ယိုကီရက်စ်အနေနဲ့ အာဆင်နယ်ကို အမှန်တကယ် စဉ်းစားသင့်ပြီး နည်းပြ အာတီတာအတွက် သူဟာ အသင်းမှာ နောက်ဆုံးပျောက်ဆုံးနေတဲ့ ဂျစ်ဆော အစိတ်အပိုင်း ဖြစ်နိုင်တယ်လို့ထင်ကြောင်း”ပြောခဲ့ တာပါ။ 

စပို့တင်းလစ္စဘွန်းအသင်းကို ရောက်ရှိလာပြီးကတည်းက ခြေစွမ်းပြသနေတဲ့ ဆွီဒင်တိုက်စစ်မှူး ယိုကီရက်စ်ဟာ ထိပ်တန်းအသင်းကြီးတွေရဲ့ ပစ်မှတ်အဖြစ်ရှိနေတာ ဖြစ်ပါတယ်။ 

ယူနိုက်တက်အသင်းဟာ စပို့တင်းလစ္စဘွန်းအသင်း နည်းပြဟောင်း အာမိုရင်ကို နည်းပြသစ်အဖြစ် ခန့်အပ် ပြီးနောက်မှာ ယိုကီရက်စ်ဟာ အိုးထရက်ဖို့ဒ်ထံ ရောက်ရှိဖို့ ရေပန်းအစားဆုံး ဖြစ်နေခဲ့တာပါ။ 

ယိုကီရက်စ်ကို တွေ့ရစဉ်

ယိုကီရက်စ်ဟာ ကိုဗင်ထရီအသင်းနဲ့အတူ ချန်ပီယံရှစ်ပြိုင်ပွဲမှာ ကစားခဲ့ပေမယ့် အခုအချိန်မှာတော့ သူဟာ ဥရောပရဲ့ အကောင်းဆုံး တိုက်စစ်မှူးတွေထဲက တစ်ဦးအဖြစ် သတ်မှတ်ခြင်း ခံနေရပါတယ်။ 

ယိုကီရက်စ်ကို လာမယ့် ဇန်နဝါရီ အပြောင်းအရွှေ့နဲ့ နွေရာသီ အပြောင်းအရွှေ့တွေမှာ ခေါ်ယူနိုင်ဖို့ မန်စီးတီး အသင်း အပါအဝင် ဥရောပထိပ်သီး ကလပ်အချို့က ပြင်ဆင်နေကြတာပါ။

ဒီအချိန်မှာ အာဆင်နယ်အသင်း ကွင်းလယ်လူဟောင်း ပီတစ်က ယိုကီရက်စ်ကို ယူနိုက်တက်အသင်းထံ မပြောင်းဘဲ အာဆင်နယ်အသင်းထံ ပြောင်းရွှေ့တာက ပိုပြီးအဓိပ္ပါယ်ရှိတယ်လို့ ပြောခဲ့တာဖြစ်ပါတယ်။ 

အာဆင်နယ်အသင်းဟာ ရလဒ်ကောင်းတွေ ရရှိနေပေမယ့် ပရီးမီးယားလိဂ် ချန်ပီယံဆု ရယူနိုင်ဖို့အတွက် ယိုကီရက်စ် အပါအဝင် တိုက်စစ်မှူးတစ်ဦးခေါ်ယူဖို့ ပစ်မှတ်ထားနေတာပါ။ 

အသက် ၂၆ နှစ်အရွယ်ရှိ ယိုကီရက်စ်ဟာ စပို့တင်းလစ္စဘွန်းအသင်းအတွက် ၇၂ ပွဲ ကစားထားပြီး ၆၈ ဂိုးသွင်း ယူကာ ပေါ်တူဂီအမှတ်ပေးဖလား တစ်ကြိမ် ရယူထားနိုင်တာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဒီဇင်ဘာ ၆

ပရီးမီးယားလိဂ် လက်ရှိချန်ပီယံ မန်စီးတီးအသင်းဟာ လာမယ့်နှစ် အမေရိကန်နိုင်ငံမှာ ကျင်းပမယ့် ဖီဖာကလပ် ကမ္ဘာ့ဖလား ပြိုင်ပွဲအတွက် အုပ်စုမဲခွဲမှုမှာ ဂျူဗင်တပ်စ်၊ ဝိုင်ဒတ်၊ အယ်လ်အိန်းအသင်းတို့နဲ့ တစ်အုပ်စုတည်း ကျရောက်နေခဲ့ပါတယ်။ 

မက်ဆီ ဦးဆောင်တဲ့ အင်တာမိုင်ယာမီအသင်းဟာ အယ်လ်အာလီ၊ ပေါ်တို၊ ပါလ်မီးရက်စ်အသင်းတို့နဲ့ ကျရောက်နေတာပါ။ 

အသင်းပေါင်း ၃၂ သင်းနဲ့ တိုးချဲ့ကျင်းပတဲ့ ဖီဖာကလပ် ကမ္ဘာ့ဖလားပြိုင်ပွဲကို ကမ္ဘာပေါ်မှာရှိတဲ့ ထိပ်တန်း ကလပ်တွေ အများအပြား ပါဝင်ပြီး အားကစားကွင်း ၁၂ ကွင်းမှာ ကျင်းပသွားမှာ ဖြစ်ပါတယ်။

ပုံစံအဟောင်းနဲ့ ကျင်းပခဲ့တဲ့ ၂၀၂၃ ခုနှစ် ဖီဖာကလပ် ကမ္ဘာ့ဖလားပြိုင်ပွဲမှာ မန်စီးတီးအသင်းက ချန်ပီယံဆု ရယူနိုင်ခဲ့တာပါ။ 

ဖီဖာ ကလပ်ကမ္ဘာ့ဖလားဆုကို တွေ့ရစဉ်

၂၀၂၅ ခုနှစ်မှာ ကျင်းပမယ့် ပြိုင်ပွဲအတွက် အခြားအုပ်စုတွေမှာ ဥရောပချန်ပီယံ ရီးရယ်လ်အသင်းဟာ အယ်လ်အာလီ၊ ပါချူကာ၊ ဆဲလ်ဘတ်အသင်းတို့နဲ့ ကျရောက်နေပြီး ဘိုင်ယန်မြူးနစ်အသင်းက အော့ကလန် စီးတီး၊ ဘိုကာဂျူနီယာ၊ ဘင်ဖီကာအသင်းတို့နဲ့ တစ်အုပ်စုတည်း ကျရောက်နေပါတယ်။ 

အင်တာမီလန်အသင်းက ရေးဗားပလိတ်၊ အူရာဝါရတ်၊ မွန်တာရေး၊ ပီအက်စ်ဂျီအသင်းက အသလက်တီကို၊ ဘိုတာဖိုဂို၊ ဆီတဲလ်ဆောင်းဒါးအသင်းတို့နဲ့ အုပ်စုကျရောက်နေပါတယ်။ 

ချယ်လ်ဆီးအသင်းက လီယွန်၊ ဖလာမင်ဂို၊ အက်စ်ပီးရန့်စ်၊ ဒေါ့မွန်အသင်းက ဖလူမင်နန့်စ်၊ အူလ်ဆန်ဟွန်ဆိုင်း၊ မာမီလိုဒီတို့နဲ့ တစ်အုပ်စုတည်း ကျရောက်နေတာပါ။ 

၂၀၂၅ ဖီဖာကလပ် ကမ္ဘာ့ဖလားပြိုင်ပွဲကို ဇွန်လ ၁၅ ရက်ကနေ ဇူလိုင် ၁၃ ရက်အထိ ကျင်းပသွားမှာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဒီဇင်ဘာ ၆

စပါးအသင်းက ဘုန်းမောက်အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ ပရီးမီးယားလိဂ် ပွဲစဉ်အပြီးမှာ နည်းပြ ပိုစတီကိုဂလူးနဲ့ စပါးအသင်း ပရိသတ်တွေ ထိပ်တိုက် တွေ့ဆုံမှုဖြစ်ခဲ့ပါတယ်။ 

စပါးအသင်းဟာ ဒီရှုံးပွဲကြောင့် မန်စီးတီးအသင်းကို ၄ ဂိုး-ဂိုးမရှိနဲ့ အနိုင်ရခဲ့ပြီးနောက် ပြိုင်ပွဲစုံ ၃ ပွဲဆက်တိုက် နိုင်ပွဲ ပျောက်ဆုံးခဲ့တာပါ။

ဘုန်းမောက်အသင်းကို အရေးနိမ့်ခဲ့တာဟာ ဒီရာသီပရီးမီးယားလိဂ်ပွဲစဉ် ၁၄ ပွဲကစားအပြီးမှာ စပါးအသင်းအတွက် ၆ ပွဲမြောက် ရှုံးပွဲဖြစ်ခဲ့ပြီး အမှတ်ပေးဇယားအဆင့် ၁၀ နေရာကို ရောက်ရှိသွားခဲ့ပါတယ်။

အဝေးကွင်းကို လာရောက်အားပေးတဲ့ စပါးအသင်း ပရိသတ်တွေဟာ ပွဲအပြီးမှာ လှောင်ပြောင်မှုတွေ ပြုလုပ်ခဲ့တာကြောင့် နည်းပြပိုစတီကိုဂလူးနဲ့ ထိပ်တိုက်တွေ့ဆုံမှုဖြစ်ခဲ့တာပါ။ 

ပိုစတီကိုဂလူးက “ပရိသတ်တွေ စိတ်ပျက်နေကြတာ မှန်ပါတယ်။ သူတို့က ကျနော့်ကို တိုက်ရိုက်တုန့်ပြန်ချက် အချို့ ပေးခဲ့ပါတယ်။ ကျနော်ဟာ လူသားတစ်ဦးဖြစ်လို့ ပြောခံရတာကို မကြိုက်ပါဘူး။ ကျနော် ပြောနိုင်တာက ကျနော် အလွန်စိတ်ပျက်မိတဲ့အတွက် ဒါကို မှန်ကန်အောင်လုပ်ဖို့ ဆုံးဖြတ်ထားပြီး အဆုံးထိဆက်တိုက် ပွဲဝင် သွားမှာပါ”လို့ ပွဲအပြီးမှာ ပြောခဲ့ပါတယ်။ 

စပါးအသင်း ယှဉ်ပြိုင်နေစဉ်

စပါးအသင်းဟာ ဒီရာသီမှာ ရလဒ်ပိုင်း မတည်မငြိမ်မှုတွေကြောင့် နည်းပြ ပိုစတီကိုဂလူးအတွက်လည်း ဖိအားတွေ တိုးလာခဲ့ပါတယ်။ 

စပါးအသင်းဟာ လာမယ့် ရက်ပိုင်းမှာ ပွဲကြီးပွဲကောင်းတွေအဖြစ် ချယ်လ်ဆီးအသင်းနဲ့ ပရီးမီးယားလိဂ်ပွဲစဉ်၊ ရိန်းဂျားစ် အသင်းနဲ့ ယူရိုပါလိဂ်ပွဲစဉ်ယှဉ်ပြိုင်ရမှာပါ။

ဒါအပြင် စပါးအသင်းဟာ ဆောက်သမ်တန်၊ လီဗာပူးလ်အသင်းတို့နဲ့ ပရီးမီးယားလိဂ်ပွဲစဉ်၊ ယူနိုက်တက်အသင်းနဲ့ လိဂ်ဖလား ကွာတားဖိုင်နယ်ပွဲစဉ် ယှဉ်ပြိုင်ရမှာဖြစ်ပါတယ်။

ဘုန်းမောက်အသင်းဟာ ဒီရာသီ ပရီးမီးယားလိဂ် အိမ်ကွင်းပွဲစဉ်တွေမှာ ရလဒ်ကောင်း ရရှိနေပြီး စပါးအသင်း မတိုင်ခင် မန်စီးတီးနဲ့ အာဆင်နယ်အသင်းတို့ကိုလည်း အနိုင်ရရှိထားတာပါ။ 

ဘုန်းမောက်အသင်းဟာ စပါးအသင်းကို အနိုင်ရရှိခဲ့တာကြောင့် ပရီးမီးယားလိဂ် အမှတ်ပေးဇယားအဆင့် ၉ နေရာ မှာ ရပ်တည်နေတာဖြစ်ပါတယ်။ 

Source: ESPN