CNI Sport News
၂၀၂၅ ခုနှစ်၊ အောက်တိုဘာ ၂၅
ဂရိထိပ်သီးကလပ် ပါနာသီနိုင်ကို့စ်အသင်းဟာ စပိန်လူမျိုးနည်းပြ ဘင်နီတက်ဇ်ကို နည်းပြသစ်အဖြစ် ခန့်အပ် ကြောင်း အတည်ပြု ကြေညာခဲ့ပါတယ်။
ဗလင်စီယာ၊ ရီးရယ်လ်၊ အင်တာမီလန်၊ နာပိုလီ၊ လီဗာပူးလ်နဲ့ ချယ်လ်ဆီးအသင်းတို့ကို ကိုင်တွယ်ခဲ့တဲ့ ဘင်နီတက်ဇ်ဟာ သူ့ရဲ့နည်းပြဘဝ ၁၇ သင်းမြောက် အသင်းအဖြစ် ပါနာသီနိုင်ကို့စ်အသင်းကို ကိုင်တွယ် တော့မှာပါ။
ဘင်နီတက်ဇ်ဟာ ပါနာသီနိုင်ကို့စ်အသင်းနဲ့ ၂ နှစ်ခွဲ စာချုပ်ချုပ်ခဲ့ပြီး သူဟာ ဂရိလိဂ်မှာ စံချိန်တင်နည်းပြ လုပ်ခလစာ ပေါင် ၃.၄၇ သန်း ရရှိမယ်လို့ ဒတ်ချ်သတင်းစာ De Telegraaf က ဖော်ပြထားပါတယ်။
ပါနာသီနိုင်ကို့စ်အသင်းဟာ အိုလံပီယာကို့စ်အသင်းပြီးရင် ဂရိမှာ ဒုတိယမြောက် အအောင်မြင်ဆုံး အသင်းဖြစ်ပြီး လိဂ်ဖလားအကြိမ် ၂၀ ၊ ပြိုင်ပွဲစုံ ဆုဖလား အားလုံးပေါင်း ၄၄ ခု ရရှိထားကာ ထိပ်တန်းလိဂ်ကနေ တန်းဆင်း ဖူးခြင်း မရှိတာဖြစ်ပါတယ်။
ဘင်နီတက်ဇ်ကို တွေ့ရစဉ်
ပါနာသီနိုင်ကို့စ်အသင်းဟာ ဒီရာသီမှာ ရလဒ်တွေ ဆိုးနေပြီး လိဂ်ပွဲစဉ် ၆ ပွဲ ကစားအပြီးမှာ ရမှတ် ၉ မှတ်သာ ရရှိကာ ထိပ်ဆုံးနေရာက PAOK အသင်းနဲ့ ၈ မှတ်ကွာဟနေတာပါ။
တစ်ပွဲကစားဖို့ ကျန်ရှိနေတဲ့ ပါနာသီနိုင်ကို့စ်အသင်းဟာ ဂရိစူပါလိဂ် အမှတ်ပေးဇယား အဆင့် ၇ နေရာမှာ ရပ်တည်နေတာ ဖြစ်ပါတယ်။
ပါနာသီနိုင်ကို့စ်အသင်းဟာ လိဂ်ဖလားကို အကြိမ် ၂၀ အထိ ရရှိထားပေမယ့် ၂၀၀၉-၁၀ ရာသီနောက်ပိုင်း ဒီဆုဖလားနဲ့ ဝေးကွာနေတာပါ။
ဂရိစူပါလိဂ်ကို ပြန်လည် ရယူနိုင်ဖို့ ပစ်မှတ်ထားနေတဲ့ ပါနာသီနိုင်ကို့စ်အသင်းဟာ နည်းပြဘဝမှာ ဆုဖလား အောင်မြင်မှုတွေ ရယူနိုင်ခဲ့တဲ့ ဘင်နီတက်ဇ်ကို နည်းပြသစ်အဖြစ် ခန့်အပ်ခဲ့ပါတယ်။
ဗလင်စီယာအသင်းနဲ့ လာလီဂါဖလား ၂ ကြိမ်၊ လီဗာပူးလ်အသင်းနဲ့ ချန်ပီယံလိဂ်ဖလား၊ ချယ်လ်ဆီးအသင်းနဲ့ ယူရိုပါလိဂ်ဖလား ရယူနိုင်ခဲ့တဲ့ ဘင်နီတက်ဇ်ဟာ ပြီးခဲ့တဲ့နှစ် မတ်လက ဆယ်လ်တာဗီဂိုအသင်းကနေ ထုတ်ပယ် ခံရပြီးနောက်ပိုင်း နည်းပြလောကနဲ့ ဝေးကွာခဲ့ပြီး အခုအချိန်မှာ ပါသီနိုင်ကို့စ်အသင်းနဲ့အတူ နည်းပြလောကထဲကို ပြန်လည်ဝင်ရောက်လာခဲ့တာဖြစ်ပါတယ်။
Source: dailymail
