CNI Sport News
၂၀၂၅ ခုနှစ်၊ အောက်တိုဘာ ၂၇
ရီးရယ်လ်အသင်းက ဘာစီလိုနာအသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ Clasico ပွဲအပြီးမှာ ယာမဲလ်ကို ရန်စခဲ့တဲ့ ကာဗာဟယ်လ်ရဲ့ လုပ်ရပ်ကို ဘာစီလိုနာအသင်း ကွင်းလယ်လူ ဒီဂျောင်က ဝေဖန်ခဲ့ပြီး ပွဲပြီးဆုံးချိန်မှာ နှစ်သင်း ကစားသမားတွေဟာ ကွင်းအတွင်း ရုန်းရင်းဆန်ခတ်တွေ ဖြစ်ခဲ့ကြပါတယ်။
ဒီဂျောင်က “ကာဗာဟယ်လ်ဟာ ယာမဲလ်နဲ့ စကားပြောချင်ရင် သူသီးသန့် ပြောလို့ရပါတယ်။ သူတို့က စပိန် လက်ရွေးစင်မှာ အသင်းဖော်တွေ ဖြစ်တဲ့အတွက် တစ်ဦးအကြောင်းတစ်ဦး သိပါတယ်။ ဘာကြောင့် ကွင်းထဲမှာ ဒီလိုတွေ ဖြစ်အောင် လုပ်တာလဲဆိုတာ နားမလည်နိုင်ဘူး”လို့ ပွဲအပြီး သတင်းထောက်တွေကို ပြောခဲ့တာပါ။
ယာမဲလ်ဟာ ဒီပွဲမတိုင်မီ ဘာစီလိုနာအသင်း ကစားသမားဟောင်း ပီကေး တည်ထောင်ထားတဲ့ Kings League YouTube Channel မှာ ရီးရယ်လ်အသင်းဟာ ဒိုင်လူကြီးရဲ့ ဆုံးဖြတ်ချက်တွေကို လုယူဖို့ ကြိုးစားသလို အမြဲတမ်း ညည်းညူကြတယ်လို့ ဒီပြိုင်ပွဲမှာ ပါဝင်နေတဲ့ အသင်းတစ်သင်းနဲ့ နှိုင်းယှဉ်ပြီး ပြောသွားခဲ့ပါတယ်။
ယာမဲလ်ဟာ ဒီမှတ်ချက်ကြောင့် ပွဲချိန်တစ်လျှောက်လုံး ရီးရယ်လ်အသင်း ပရိသတ်တွေရဲ့ လှောင်ပြောင်မှုတွေ ခံခဲ့ရတာပါ။
ဘာစီလိုနာနဲ့ရီးရယ်လ် အချင်းများနေကြစဉ်
ပွဲအပြီးမှာ ကာဗာဟယ်လ်က ယာမဲလ်ကို စကားတွေ အများကြီး ပြောလွန်းတယ်ဆိုပြီး လက်အမူအရာနဲ့ ပြုလုပ်ခဲ့သလို ယာမဲလ်ကလည်း သူ့ရဲ့စပိန်အသင်းဖော်ထံ သွားရောက်ဖို့ ပြုလုပ်ခဲ့ပါတယ်။
ဒီအချိန်မှာ ရီးရယ်လ်အသင်း ကွင်းလယ်လူ ကာမာဗင်ဂါက ယာမဲလ်ကို တားဆီးနိုင်ခဲ့ပေမယ့် ကစားသမား အများအပြား ဝင်ရောက်လာခဲ့ပြီး ကော့တွိုက်စ်က ယာမဲလ်ကို တွန်းထုတ်မှုတွေ ပြုလုပ်ခဲ့တာပါ။
ဗီနီစီးယက်စ်ကလည်း ယာမဲလ်နဲ့ ထိပ်တိုက်တွေ့ဖို့ လုပ်ခဲ့ပေမယ့် သူဟာ တားဆီးခံခဲ့ရပြီး ယာမဲလ်ကို လုံခြုံရေး တွေက ကွင်းထဲကနေ ခေါ်ထုတ်သွားခဲ့ပါတယ်။
ဘာစီလိုနာအသင်း ကွင်းလယ်လူ ပက်ဒရီ နှစ်ဝါတစ်နီနဲ့ ထုတ်ပယ်ခံခဲ့ရတဲ့ ပွဲပြီးခါနီးမှာလည်း အရန်ခုံတန်းမှာရှိတဲ့ ရီးရယ်လ်နဲ့ ဘာစီလိုနာအသင်း ကစားသမားတွေဟာ အချင်းများမှုတွေ ဖြစ်ခဲ့ကြပါတယ်။
ဒီပွဲမှာ ရီးရယ်လ်အသင်းအတွက် ဂိုးတွေကို ဘတ်ပီနဲ့ ဘယ်လင်ဂမ်တို့က သွင်းယူခဲ့ပြီး ဘာစီလိုနာအသင်းအတွက် ချေပဂိုးကို ဖာမင်လိုပက်ဇ်က သွင်းယူခဲ့တာပါ။
ရီးရယ်လ်အသင်းဟာ ဒီနိုင်ပွဲကြောင့် ဘာစီလိုနာအသင်းကို ၅ မှတ်ဖြတ်ပြီး လာလီဂါအမှတ်ပေးဇယား ထိပ်ဆုံး နေရာမှာ ဦးဆောင်နေတာ ဖြစ်ပါတယ်။
Source: ESPN
