CNI Sport News
၂၀၂၅ ခုနှစ်၊ အောက်တိုဘာ ၂၃
အင်တာမီလန်အသင်း အားကစားဒါရိုက်တာ အူဆီလီယိုက အသင်းဟာ ဘရာဇီးလ်ကြယ်ပွင့် နေမာကို အလွတ်နဲ့ ခေါ်ယူလို့ရမယ်ဆိုရင် ခေါ်ယူဖွယ်ရှိတယ်ဆိုတဲ့ ထင်ကြေးသတင်းတွေကို ပယ်ချခဲ့ပါတယ်။
ပြီးခဲ့တဲ့နှစ်တွေ အတွင်းမှာ ဒဏ်ရာတွေနဲ့ ရုန်းကန်ခဲ့ရတဲ့ နေမာဟာ ငယ်ဘဝကလပ် ဆန်းတို့စ်အသင်းမှာ ကစား နေပြီး ဒီဇင်ဘာအထိ စာချုပ်ရှိနေတာပါ။
ဆန်းတို့စ်အသင်းအတွက် ဘရာဇီးလ်လိဂ်ပွဲစဉ် ၁၃ ပွဲ ပါဝင်ကစားထားပြီး ၃ ဂိုး သွင်းယူထားတဲ့ နေမာဟာ လက်ရှိ အချိန်မှာ တံကောက်ကြောဒဏ်ရာ ခံစားနေရတာ ဖြစ်ပါတယ်။
နေမာဟာ ဆန်းတို့စ်အသင်းနဲ့ စာချုပ် ကုန်ဆုံးချိန်မှာ ဥရောပ ဒါမှမဟုတ် မေဂျာလိဂ်ထံ ပြောင်းရွှေ့ဖွယ်ရှိတဲ့ ထင်ကြေးတွေဟာ ပြီးခဲ့တဲ့ ရက်သတ္တပတ်တွေ အတွင်းမှာ ထွက်ပေါ်ခဲ့တာပါ။
အင်တာမိုင်ယာမီအသင်းဟာ ဘာစီလိုနာ အသင်းဖော်ဟောင်းတွေဖြစ်တဲ့ မက်ဆီ၊ ဆွာရက်ဇ်တို့နဲ့ ထပ်ပြီး အတူတွဲ ကစားနိုင်ဖို့အတွက် နေမာကို အသင်းထံ ခေါ်ယူဖို့ စိတ်ဝင်စားနေတာ ဖြစ်ပါတယ်။
နေမာကို တွေ့ရစဉ်
အင်တာမီလန်အသင်းကလည်း နေမာကို အံ့အားသင့်ဖွယ် ကမ်းလှမ်းမှု ပြုလုပ်လာနိုင်တယ်လို့ သတင်းထွက်ပေါ် ခဲ့ပေမယ့် အသင်းအကြီးအကဲ အူဆီလီယိုက ဒါက အဓိပ္ပါယ်မရှိဘူးလို့ Corriere dello Sport အင်တာဗျူးမှာ အခိုင်အမာ ပြောခဲ့တာပါ။
နည်းပြ ချီဗူး ကိုင်တွယ်နေတဲ့ အင်တာမီလန်အသင်းဟာ ဒီရာသီ တိုက်စစ်ပိုင်းအတွက် အခက်အခဲ မရှိဘဲ စီးရီးအေ ၇ ပွဲမှာ ၁၈ ဂိုး သွင်းယူထားသလို ချန်ပီယံလိဂ် ၃ ပွဲမှာ ၉ ဂိုး သွင်းယူထားပါတယ်။
အသင်းခေါင်းဆောင် လောတရိုမာတီနက်ဇ်က ပြိုင်ပွဲစုံ ၆ ဂိုးနဲ့ ဂိုးအများဆုံး သွင်းယူထားပြီး မားကပ်စ်သူရမ်က ၅ ဂိုးနဲ့ ဒုတိယနေရာမှာ ရပ်တည်နေပါတယ်။
အင်တာမီလန်အသင်းဟာ စီးရီးအေပြိုင်ပွဲမှာ အဆင့် ၂ နေရာ ရပ်တည်နေသလို ချန်ပီယံလိဂ် ပြိုင်ပွဲမှာ အဆင့် ၃ နေရာ ရပ်တည်နေတာ ဖြစ်ပါတယ်။
Source: Sportsmole
