CNI Sport News
၂၀၂၄ ခုနှစ်၊ မေလ ၁၂

ပြီးခဲ့တဲ့ ဇန်နဝါရီလ အပြောင်းအရွှေ့ကမှ အေဂျက်စ်အသင်းထံ ပြောင်းရွှေ့လာခဲ့တဲ့ ဟန်ဒါဆန်ဟာ နွေရာသီမှာ အသင်းကနေ ထွက်ခွာဖွယ်ရှိတယ်လို့ The Times သတင်းမှာ ဖော်ပြထားပါတယ်။

ဟန်ဒါဆန်ဟာ ပြီးခဲ့တဲ့နွေရာသီက လီဗာပူးလ်အသင်းက ထွက်ခွာပြီး ဆော်ဒီပရိုလိဂ်ကလပ် အယ်လ်အက်တီဖတ် အသင်းထံ ပြောင်းရွှေ့ခဲ့ပေမယ့် ပျော်ရွှင်မှုမရှိတာကြောင့် ရာသီဝက်သာကစားပြီး အေဂျက်စ်အသင်းထံ ပြောင်းရွှေ့ခဲ့တာပါ။

ဟန်ဒါဆန်ဟာ ဒီရာသီ ဒတ်ချ်လိဂ်မှာ ရုန်းကန်နေရတဲ့ အေဂျက်စ်အသင်းအတွက် ရာသီကုန်အထိ ပါဝင်ကစား ပေးအပြီးမှာ ထွက်ခွာဖွယ်ရှိနေတယ်လို့ သတင်းတွေ ထွက်ပေါ်လာခဲ့တာ ဖြစ်ပါတယ်။

အေဂျက်စ်အသင်းဟာ လာမယ့်ရာသီ ချန်ပီယံလိဂ်ဝင်ခွင့် ဆုံးရှုံးခဲ့တာကြောင့် ဘဏ္ဍာရေး အခက်အခဲတွေနဲ့ ရင်ဆိုင်နေရတဲ့အတွက် ဟန်ဒါဆန်ကို အသင်းက ထွက်ခွာဖို့ တွန်းအားပေးနိုင်တယ်လို့ The Times ရဲ့ ဖော်ပြချက်ထဲမှာ ပါရှိပါတယ်။ 

ဥရောပချန်ပီယံဆုကို ၄ ကြိမ် ရယူထားတဲ့ အေဂျက်စ်အသင်းဟာ ဟန်ဒါဆန်ကို ဆက်ထားပြီး အခြားကစားသမား တွေကို ရောင်းချချင်နေပေမယ့် ဟန်ဒါဆန်ကို ရောင်းချတာက ဖြစ်နိုင်ဖွယ်ရှိတဲ့ အရာအဖြစ် သတ်မှတ်နေကြတာပါ။

အေဂျက်စ်အသင်းဟာ ဟန်ဒါဆန်နဲ့အတူ စပါးအသင်း ကစားသမားဟောင်း ဘာဂျ့်ဝင်းကိုလည်း ရောင်းချဖို့ စဉ်းစားနေတယ်လို့ သိရပါတယ်။ 

အေဂျက်စ်အသင်းဟာ လက်ရှိအချိန်မှာ နည်းပြသစ် ခန့်အပ်နိုင်ဖို့ ကြိုးစားနေပြီး ချယ်လ်ဆီးအသင်း နည်းပြ ဟောင်း ဂရေဟမ်ပေါ်တာနဲ့ ဆွေးနွေးမှုတွေ ပြုလုပ်ခဲ့သေးတာပါ။

ဒါပေမယ့် ဂရေဟမ်ပေါ်တာက ငြင်းပယ်ခဲ့တာကြောင့် အေဂျက်စ်အသင်းဟာ နည်းပြသစ်ရှာဖွေမှုတွေ ဆက်ပြီး ပြုလုပ်နေတာ ဖြစ်ပါတယ်။

အေဂျက်စ်အသင်းဟာ ဒီရာသီ ဒတ်ချ်လိဂ်ပြိုင်ပွဲမှာ အဆင့် ၅ နေရာ ရပ်တည်နေပြီး လက်ကျန် ၂ ပွဲစလုံး အနိုင် ရလဒ် ရယူနိုင်ရင် လာမယ့်ရာသီ ယူရိုပါလိဂ်ဝင်ခွင့် ရယူနိုင်မှာပါ။

အေဂျက်စ်အသင်းဟာ ဒတ်ချ်လိဂ်လက်ကျန် ၂ ပွဲအဖြစ် အယ်လ်မီရီစီးတီး၊ ဗီတက်ဆီအသင်းတို့နဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၁၁

ဘရာဇီးလ်အသင်းနည်းပြ ဒိုရီဗယ်လ်ဂျူနီယာဟာ ဇွန်လမှာ ကျင်းပမယ့် ကိုပါအမေရိက ဖလားပြိုင်ပွဲအတွက် ကစားသမား ၂၃ ဦးစာရင်း ထုတ်ပြန်ခဲ့တာမှာ ယူနိုက်တက်အသင်း ကွင်းလယ်လူ ကတ်စမဲရိုးကို ချန်လှပ်သွား ခဲ့ပါတယ်။

ဘရာဇီးလ်အသင်းအတွက် ၇၅ ပွဲ ပါဝင်ကစားထားတဲ့ ကတ်စမဲရိုးဟာ ဒီရာသီမှာ ယူနိုက်တက်အသင်းအတွက် ခြေစွမ်းပြသနိုင်ဖို့ ရုန်းကန်နေရပြီး ဝေဖန်မှုတွေ အများအပြား ခံနေရတာပါ။

ဘရာဇီးလ်နည်းပြ ဒိုရီဗယ်လ်ဂျူနီယာကတော့ ကတ်စမဲရိုးရဲ့ လက်ရှိ အခြေအနေတွေကြောင့်သာ ချန်လှပ်ခဲ့ ပေမယ့် အနာဂတ်မှာ သူဟာ လက်ရွေးစင်အသင်းအတွက် ပါဝင်နိုင်ဖို့ အခွင့်အရေး ရှိသေးတယ်လို့ ပြောခဲ့ပါတယ်။ 

ဘရာဇီးလ်အသင်း လူစာရင်းမှာ ကတ်စမဲရိုးအပြင် အာဆင်နယ်အသင်း တိုက်စစ်မှူး ဂျီးဆပ်စ်နဲ့ စပါးအသင်း တိုက်စစ်မှူး ရစ်ချာလီဆန်တို့လည်း ချန်လှပ်ခံခဲ့ရပါတယ်။

နေမာကလည်း ဒူးအရွတ် ဒဏ်ရာကနေ ပြန်လည် ကောင်းမွန်အောင် လုပ်ဆောင်နေတဲ့အတွက် ဘရာဇီးလ် အသင်း လူစာရင်းမှာ ပါဝင်လာခဲ့ခြင်း မရှိပါဘူး။ 

ဘရာဇီးလ်အသင်းနည်းပြ ဒိုရီဗယ်လ်ဂျူနီယာဟာ ကိုပါအမေရိက ဖလားပြိုင်ပွဲအတွက် ဘရာဇီးလ်အသင်း လူစာရင်းမှာ ပရီးမီးယားလိဂ်က ၉ ဦးအထိ ရွေးချယ်ခဲ့ပါတယ်။ 

 ဘရာဇီးလ်အသင်းလူစာရင်းကိုတွေ့ရစဉ်

ဒီကစားသမားတွေကတော့ လီဗာပူးလ်အသင်းဂိုးသမား အလီဆန်၊ မန်စီးတီးအသင်း ဂိုးသမား အီဒါဆန်၊ အာဆင်နယ်အသင်းက ဂါဘရီရယ်လ်နဲ့ မာတင်နယ်လီ၊ နယူးကာဆယ်အသင်းက ဘရူနိုဂွီမာရေ့စ်၊ ဗီလာအသင်းက ဒေါက်ကလပ်စ်လူးဝစ်ဇ်၊ ဖူလ်ဟမ်အသင်းက ပါရဲရား၊ ဝက်စ်ဟမ်းအသင်းက ပါကွေတာနဲ့ ဝုလ်ဗ်စ်အသင်းက ဂိုးမက်စ်တို့ ဖြစ်ပါတယ်။

ပြီးခဲ့တဲ့ အင်္ဂလန်၊ စပိန်အသင်းတို့နဲ့ ခြေစမ်းပွဲမှာ ဘရာဇီးလ်အသင်းအတွက် ဂိုးသွင်းနိုင်ခဲ့တဲ့ ဆယ်ကျော်သက် တိုက်စစ်မှူး အန်းဒရစ်လည်း ဒီလူစာရင်းထဲမှာ ပါဝင်ခဲ့ပါတယ်။ 

ဘရာဇီးလ်အသင်းဟာ ကိုပါအမေရိကဖလား ပြိုင်ပွဲမတိုင်ခင်မှာ မက္ကဆီကို၊ အမေရိကန်အသင်းတို့နဲ့ ခြေစမ်းပွဲ ကစားဖို့ စီစဉ်ထားပါတယ်။

ဘရာဇီးလ်အသင်းဟာ ကိုပါအမေရိကဖလားပြိုင်ပွဲမှာ ကိုလံဘီယာ၊ ပါရာဂွေး၊ ကော်စတာရီကာအသင်းတို့နဲ့ တစ်အုပ်စုတည်း ကျရောက်နေတာပါ။

၂၀၂၄ ကိုပါအမေရိကဖလားပြိုင်ပွဲကို ဇွန်လ ၂၀ ရက်ကနေ ဇူလိုင် ၁၄ ရက်အထိ အမေရိကန်နိုင်ငံက အိမ်ရှင်အဖြစ် ကျင်းပသွားမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၁၁

ပြင်သစ်တိုက်စစ်မှူး ဘတ်ပီဟာ ဒီရာသီအကုန်မှာ ပီအက်စ်ဂျီ အသင်းကနေ ထွက်ခွာမယ်လို့ သူ့ရဲ့ ဆိုရှယ်မီဒီယာ အကောင့်ကနေ ကြေညာသွားခဲ့ပါတယ်။

ဘတ်ပီက “အချိန်တန်ရင် စကားပြောမယ်လို့ ကျနော် အမြဲတမ်း ပြောခဲ့ဖူးပါတယ်။ ဒီနှစ်က ပီအက်စ်ဂျီမှာ ကျနော့်ရဲ့ နောက်ဆုံးနှစ်ပါ။ စာချုပ်သက်တမ်းတိုးတော့မှာ မဟုတ်ဘဲ ဒီစွန့်စားခန်းကို ရက်သတ္တပတ် အနည်းငယ် အတွင်း အဆုံးသတ်တော့မှာပါ။ ကမ္ဘာ့အကောင်းဆုံး အသင်းတွေထဲက တစ်သင်းမှာ ပါဝင်ခွင့်ရတဲ့အတွက် ဂုဏ်ယူမိပါတယ်။ ထွက်ခွာတော့မယ်လို့ ကြေညာရတာဟာ ခက်ခဲပါတယ်။ ၇ နှစ်အကြာမှာ စိန်ခေါ်မှုအသစ် လိုအပ်တယ်လို့ ကျနော်ထင်ကြောင်း”ပြောခဲ့ပါတယ်။

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ဇွန်လမှာ ကုန်ဆုံးတော့မှာဖြစ်ပြီး ကစားသမားဟာ နွေရာသီမှာ ရီးရယ်လ်အသင်းထံ ပြောင်းရွှေ့ဖို့ သဘောတူညီမှု ရရှိထားတာ ဖြစ်ပါတယ်။ 

ပီအက်စ်ဂျီအသင်းအတွက် ၂၅၅ ဂိုး သွင်းယူထားပြီး စံချိန်တင် ဂိုးသွင်းရှင်အဖြစ် ရပ်တည်နေတဲ့ ဘတ်ပီဟာ တနင်္ဂနွေနေ့မှာ သူ့ရဲ့ ပီအက်စ်ဂျီအသင်းကစားသမားဘဝ နောက်ဆုံး အိမ်ကွင်းပွဲစဉ်အဖြစ် တူးလူးစ်အသင်းနဲ့ ယှဉ်ပြိုင်ရမှာပါ။ 

ဘတ်ပီကို တွေ့ရစဉ်

ဘတ်ပီဟာ ပီအက်စ်ဂျီအသင်းကို ၂၀၁၇ ခုနှစ်၊ သြဂုတ်က ပေါင် ၁၆၅.၇ သန်းနဲ့ မိုနာကိုအသင်းကနေ ပြောင်းရွှေ့ လာခဲ့တာ ဖြစ်ပါတယ်။

ဘတ်ပီဟာ သူ့ရဲ့ ပီအက်စ်ဂျီအသင်း ကစားသမားဘဝ နောက်ဆုံးရာသီမှာ ချန်ပီယံလိဂ်ဖလား ရယူနိုင်ဖို့ ပစ်မှတ် ထားခဲ့ပေမယ့် ဆီမီးဖိုင်နယ်ပွဲစဉ်မှာ ဒေါ့မွန်အသင်းကို အရေးနိမ့်ပြီးနောက် အသင်းက ထွက်ခွာမယ့်အကြောင်းကို ကြေညာခဲ့ပါတယ်။ 

ဘတ်ပီဟာ ရီးရယ်လ်အသင်းနဲ့ (၅)နှစ်စာချုပ် ချုပ်ဆိုမှာဖြစ်ပြီး တစ်နှစ်လုပ်ခ ပေါင် ၁၂.၈ သန်းနဲ့ လက်မှတ် ထိုးကြေးအတွက် ပေါင် ၁၂၈ သန်းရရှိမယ်လို့ သိရပါတယ်။

ရီးရယ်လ်အသင်းဟာ ချန်ပီယံလိဂ် ဗိုလ်လုပွဲစဉ် အပြီးမှသာ ဘတ်ပီကို ခေါ်ယူနိုင်ကြောင်း ကြေညာဖို့ ရှိနေတာပါ။ 

နွေရာသီမှာ မိုဒရစ်အသင်းကနေ ထွက်ခွာမှာ ဖြစ်တာကြောင့် ဘတ်ပီဟာ ရီးရယ်လ်အသင်းမှာ ကျောနံပါတ် ၁၀ ဝတ်ဆင်သွားမှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ မေလ ၁၀

ယူနိုက်တက်အသင်းကွင်းလယ်ကစားသမားဟောင်း ဒေးဗစ်ဘက်ခမ်းက ၁၉၉၈-၉၉ ရာသီမှာ အသင်းရရှိခဲ့တဲ့ ဆုဖလား ၃ လုံးအောင်မြင်မှုရဲ့ မှတ်တမ်းရုပ်ရှင်ဟာ လက်ရှိရုန်းကန်နေရတဲ့ အသင်းကို စိတ်အားတက်ကြွစေဖို့ မျှော်လင့်ကြောင်း ပြောခဲ့ပါတယ်။

ဒေးဗစ်ဘက်ခမ်းက “ဒီမှတ်တမ်းရုပ်ရှင်ကို ကြည့်ပြီး ယူနိုက်တက်အသင်းနဲ့ ဆက်စပ်တဲ့သူတိုင်းဟာ စိတ်အား တက်ကြွလာပါလိမ့်မယ်။ ပြီးခဲ့တဲ့နှစ်အနည်းငယ်အတွင်းမှာ အသင်းဟာ ခက်ခဲတဲ့အချိန်ဖြစ်ခဲ့ပါတယ်။ ကျနော်တို့ အောင်မြင်မှုရယူနိုင်ခဲ့တဲ့အချိန်ဟာ အနည်းငယ်ကြာသွားပြီဖြစ်ပေမယ့် ဒီမှာရှိတဲ့ကစားသမားတွေ အနေနဲ့ ဒီအခိုက်အတန့်အကြောင်းကို ပြောရင်း သူတို့ကို စိတ်အားတက်ကြွစေဖို့ မျှော်လင့်တယ်”လို့ ပြောခဲ့တာပါ။

Amazon Prime က ၁၉၉၉ ဆုဖလား ၃ လုံးရယူနိုင်ခဲ့တဲ့ ယူနိုက်တက်အသင်းအကြောင်းကို ပြသမယ့် မှတ်တမ်းရုပ်ရုပ်အခမ်းအနားကို အသင်းရဲ့ဂန္ထဝင်တွေဖြစ်တဲ့ ဒေးဗစ်ဘက်ခမ်း၊ဂယ်ရီနဗီးလ်၊ ရှရင်ဂမ်၊ ပီတာရှမိုက်ကယ်၊ဒွိုက်ယော့ခ်၊အင်ဒီကိုးလ်နဲ့ နစ်ကီဘတ်တို့ တက်ရောက်ခဲ့ကြပါတယ်။ 

Amazon Prime ဟာ ဒီမှတ်တမ်းရုပ်ရှင်ကို မေလအကုန်ပိုင်းမှာ ပြသသွားမယ်လို့ ကြေညာထားတာပါ။

ယူနိုက်တက်အသင်းဟာ လွန်ခဲ့တဲ့ ၂၅ နှစ်က နည်းပြကြီး ဆာအဲလက်စ်ဖာဂူဆန်ရဲ့ လက်အောက်မှာ ပရီးမီးယားလိဂ်၊ FA ဖလားနဲ့ ချန်ပီယံလိဂ်ဖလားတို့ကို ရယူနိုင်ခဲ့ပြီး တစ်ရာသီအတွင်း ဆုဖလား ၃ လုံးရယူနိုင်တဲ့ ပထမဆုံးအင်္ဂလန်ကလပ်အဖြစ် မှတ်တမ်းတင်နိုင်ခဲ့တာဖြစ်ပါတယ်။ 

ဒါပေမယ့် ယူနိုက်တက်အသင်းဟာ ဒီ ရာသီမှာ ရလဒ်တွေဆိုးရွားနေပြီး ပရီးမီးယားလိဂ်အဆင့် ၈ နေရာမှာ ရပ်တည်နေကာ ၂၀၁၃ ခုနှစ်နောက်ပိုင်း ပရီးမီးယားလိဂ်ဆုဖလားအောင်မြင်မှုနဲ့ ဝေးကွာနေတာပါ။

ယူနိုက်တက်အသင်းဟာ ချန်ပီယံလိဂ်ဖလားကို ၂၀၀၈ ၊ FA ဖလားကို ၂၀၁၆ ၊ ယူရိုပါလိဂ်ဖလားကို ၂၀၁၇ နဲ့ ကာရာဘောင်းဖလားကို ၂၀၂၃ ခုနှစ်က နောက်ဆုံးရယူနိုင်ခဲ့ပါတယ်။ ယူနိုက်တက်အသင်းဟာ ဒီရာသီမှာ ရယူနိုင်စရာတစ်လုံးတည်းသော ဆုဖလားအဖြစ် မေ ၂၅ ရက်မှာ မန်စီးတီးအသင်းနဲ့ FA ဖလားဗိုလ်လုပွဲ ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ မေလ ၁၀

အာဆင်နယ်အသင်းဟာ ဒီရာသီ ပရီးမီးယားလိဂ်ဖလားကို ရယူနိုင်ခဲ့ရင် အမိုးဖွင့်ဘတ်စ်ကားနဲ့ အောင်ပွဲခံမယ့် သူတို့ရဲ့ အစီအစဉ်ကို ကြေညာခဲ့ပါတယ်။

အာဆင်နယ်အသင်းဟာ ပရီးမီးယားလိဂ်ဖလားကို ရယူနိုင်ဖို့ လက်ရှိချန်ပီယံ မန်စီးတီးအသင်းနဲ့ ယှဉ်ပြိုင်တာဟာ ပြီးဆုံးဖို့ နီးစပ်နေပြီဖြစ်ပါတယ်။ 

လက်ရှိအချိန်မှာ အာဆင်နယ်အသင်းဟာ အဆင့် ၂ နေရာမှာ ရပ်တည်နေတဲ့ မန်စီးတီးအသင်းထက် ၁ ပွဲပို ကစားထားပြီး ရမှတ် ၁ မှတ်အသာနဲ့ ပရီးမီးယားလိဂ် အမှတ်ပေးဇယားကို ဦးဆောင်နေတာ ဖြစ်ပါတယ်။ 

ပရီးမီးယားလိဂ်ပြိုင်ပွဲရဲ့ နောက်ဆုံးပွဲစဉ်တွေကို မေလ ၁၉ ရက်မှာ ကျင်းပသွားမှာဖြစ်ပြီး ဒီအချိန်မှသာ ဘယ်အသင်းချန်ပီယံဆု ရယူနိုင်မလဲဆိုတာ အဖြေပေါ်ဖို့ရှိနေတာပါ။

ဒေးလီးမေးလ်က အာဆင်နယ်အသင်းဟာ မေလ ၂၀ ရက်မှာ အောင်ပွဲခံ အခမ်းအနား ကျင်းပဖို့ စီစဉ်ထားတယ်လို့ ဖော်ပြထားတာ ဖြစ်ပါတယ်။ 

အာဆင်နယ်အသင်းကို တွေ့ရစဉ်

အာဆင်နယ်အသင်းအနေနဲ့ အောင်ပွဲခံ အခမ်းအနား ကျင်းပနိုင်ဖို့ဆိုရင် မန်စီးတီးအသင်းဟာ ကစားဖို့ကျန်ရှိနေတဲ့ လက်ကျန် ၃ ပွဲမှာ အနည်းဆုံး ၁ ပွဲ အမှတ်လျော့ရမှာဖြစ်သလို သူတို့လည်း လက်ကျန် ၂ ပွဲစလုံး အနိုင်ရဖို့ လိုအပ်နေတာပါ။ 

ပရီးမီးယားလိဂ်ပြိုင်ပွဲ ပြီးဆုံးဖို့ ကျန်ရှိနေသေးပေမယ့် အာဆင်နယ်အသင်းဟာ အောင်ပွဲခံဖို့အတွက် လမ်းပိတ်တာ အပါအဝင် အခြားကိစ္စရပ်တွေကို ကြိုတင်စီစဉ်နေတာ ဖြစ်ပါတယ်။

ဒေးလီးမေးလ်က အာဆင်နယ်အသင်းဟာ ဆုဖလားနဲ့အောင်ပွဲခံမယ့် အစီအစဉ်ကို မေလ ၂၀ ရက်မှာ ပြုလုပ်မှာ ဖြစ်ပြီး အမ်းမရိတ်စ်ကွင်းက စတင်လှည့်လှည် အောင်ပွဲခံကာ အမ်းမရိတ်စ်ကွင်းမှာပဲ ပြန်ပြီးအဆုံးသတ်ဖို့ ရှိနေတယ်လို့ ဖော်ပြထားတာပါ။ 

ပရီးမီးယားလိဂ် နောက်ဆုံးပွဲစဉ်တွေအဖြစ် မန်စီးတီးအသင်းက ဝက်စ်ဟမ်း၊ အာဆင်နယ်အသင်းက အဲဗာတန် အသင်းနဲ့ ယှဉ်ပြိုင်ရမှာ ဖြစ်ပါတယ်။ 

အာဆင်နယ်အသင်းဟာ ပရီးမီးယားလိဂ်ဖလားကို ၂၀၀၃-၀၄ ရာသီက နောက်ဆုံး ရယူနိုင်ခဲ့တာ ဖြစ်တဲ့အတွက် နှစ်ပေါင်း ၂၀ အကြာမှ ပထမဆုံးအကြိမ် ပြန်လည်ရယူနိုင်ဖို့ မျှော်လင့်နေတာဖြစ်ပါတယ်။

Source:Goal

CNI Sport News

၂၀၂၄ ခုနှစ်၊ မေလ ၁၀

အိုလံပီယာကို့စ်အသင်းကို အရေးနိမ့်ပြီး ယူရိုပါကွန်းဖရန့်လိဂ် ပြိုင်ပွဲကနေ အက်စတွန်ဗီလာအသင်း ထွက်ခဲ့ရ ပြီးနောက် အသင်းခေါင်းဆောင် မက်ဂင်းက အသင်းအနေနဲ့ ဥရောပပြိုင်ပွဲမှ ထွက်ခွာခဲ့ရမှုကနေ သင်ယူမှုတွေ ပြုလုပ်ရမယ်လို့ ပြောခဲ့ပါတယ်။

မက်ဂင်းက “လာမယ့်ရာသီ ဥရောပပြိုင်ပွဲတွေ ယှဉ်ပြိုင်ဖို့အတွက် ဒီအခိုက်အတန့်တွေကို ပိုကောင်းအောင် စီမံခန့်ခွဲနိုင်ဖို့ သင်ယူရမှာပါ။ ကျနော်တို့ဟာ ဒီနှစ်မှာ ပိုကောင်းအောင်လုပ်ပြီး ဥရောပဗိုလ်လုပွဲ တက်ချင်တယ် ဆိုတာ သေချာပါတယ်။ ပြိုင်ပွဲကနေ ထွက်ခဲ့ရတာက ကျနော်တို့အတွက် ကြီးမားတဲ့ သင်ယူမှုလို့ ထင်ပါတယ်။ ချောမွေ့တဲ့ခရီး မဟုတ်ခဲ့ပါဘူး”လို့ ပြောပါတယ်။

အက်စတွန်ဗီလာအသင်းဟာ ယူရိုပါကွန်းဖရန့်လိဂ် ဆီမီးဖိုင်နယ် ဒုတိယအကျော့ပွဲစဉ်မှာ အိုလံပီယာကို့စ် အသင်းကို ၂ ဂိုး-ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။ 

ပထမအကျော့တုန်းကလည်း အက်စတွန်ဗီလာအသင်းဟာ အိုလံပီယာကို့စ်အသင်းကို ၄ ဂိုး-၂ ဂိုးနဲ့ အရေးနိမ့်ခဲ့ တာကြောင့် နှစ်ကျော့ပေါင်းရလဒ် ၆ ဂိုး-၂ ဂိုးနဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရတာပါ။ 

မက်ဂင်းကိုတွေ့ရစဉ်

အက်စတွန်ဗီလာအသင်းဟာ ၁၉၈၂ ခုနှစ်နောက်ပိုင်း ပထမဆုံးအကြိမ် ဥရောပဗိုလ်လုပွဲ တက်နိုင်မယ့် မျှော်လင့် ချက်ကို အဆုံးသတ်ခဲ့ရတာ ဖြစ်ပါတယ်။

အက်စတွန်ဗီလာအသင်းဟာ ယူရိုပါကွန်းဖရန့်လိဂ် ပြိုင်ပွဲကနေ ထွက်ခွာခဲ့ရပေမယ့် လာမယ့်ရာသီ ချန်ပီယံလိဂ် ပြိုင်ပွဲယှဉ်ပြိုင်ခွင့်ရဖို့ နီးစပ်နေတာပါ။ 

ပရီးမီးယားလိဂ်အဆင့် ၄ နေရာမှာ ရပ်တည်နေတဲ့ အက်စတွန်ဗီလာအသင်းဟာ ပွဲစဉ် ၃၆ ပွဲ ကစားအပြီးမှာ တစ်ပွဲလျော့နေတဲ့ အဆင့် ၅ နေရာက စပါးအသင်းကို ၇ မှတ် အသာရထားတာ ဖြစ်ပါတယ်။ 

အဲဒါကြောင့် လက်ကျန် ၂ ပွဲမှာ ၁ ပွဲ အနိုင်ရတာနဲ့ အက်စတွန်ဗီလာအသင်း ချန်ပီယံလိဂ်ဝင်ခွင့်ရရှိမှာပါ။

အက်စတွန်ဗီလာအသင်းကို အနိုင်ရခဲ့တဲ့ အိုလံပီယာကို့စ်အသင်းဟာ ယူရိုပါကွန်းဖရန့်လိဂ် ဗိုလ်လုပွဲအဖြစ် ဖီအိုရင်တီးနားအသင်းနဲ့ ယှဉ်ပြိုင်ရမှာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ မေလ ၁၀

လေဗာကူဆင်အသင်းဟာ ဒီရာသီမှာ သူတို့ရရှိနိုင်တဲ့ ဆုဖလား ၃ လုံးစလုံး ရယူဖို့ထိုက်တန်တယ်လို့ နည်းပြ ဇာဘီအလွန်ဆိုက အသင်းကို ယူရိုပါလိဂ်ဗိုလ်လုပွဲ ပို့ဆောင်ပေးပြီးနောက် ပြောခဲ့ပါတယ်။

ဇာဘီအလွန်ဆိုက “ကျနော်တို့ဟာ တစ်ပတ်ထဲမှာ ဗိုလ်လုပွဲ ၂ ပွဲ ကစားရတော့မှာပါ။ ရိုးမားအသင်းက ဒုတိယဂိုး သွင်းယူအပြီးမှာ ကျနော်တို့ဟာ အလွန်ကောင်းမွန်တဲ့ စရိုက်လက္ခဏာကို ပြသနိုင်ခဲ့ပါတယ်။ ကျနော့် ကစားသမားတွေရဲ့ မျက်လုံးတွေကို ကြည့်လိုက်တဲ့အချိန်မှာ သူတို့ဟာ ဒီထက်ပိုပြီး လိုချင်နေတာကို မြင်တွေ့ခဲ့ ရပါတယ်။ ကျနော်တို့ဟာ ဆုဖလား ၃ လုံး ရယူနိုင်ဖို့ အခွင့်အရေးရှိနေပြီး ကျနော့်ရဲ့ ကစားသမားတွေဟာ ဒီဆုဖလားတွေ အားလုံးရယူဖို့ ထိုက်တန်တယ်”လို့ ပြောပါတယ်။

ယူရိုပါလိဂ်ဆီမီးဖိုင်နယ် ဒုတိယအကျော့အဖြစ် ကစားခဲ့တဲ့ လေဗာကူဆင်အသင်းနဲ့ ရိုးမားအသင်းတို့ပွဲစဉ်ဟာ ၂ ဂိုး စီ သရေရလဒ်နဲ့ ပြီးဆုံးခဲ့တာ ဖြစ်ပါတယ်။ 

ပထမအကျော့မှာ လေဗာကူဆင်အသင်းက ၂ ဂိုး-ဂိုးမရှိနဲ့ အနိုင်ရခဲ့တဲ့အတွက် နှစ်ကျော့ပေါင်းရလဒ် ၄ ဂိုး-၂ ဂိုးနဲ့ အနိုင်ရပြီး လေဗာကူဆင်အသင်း ဗိုလ်လုပွဲတက်နိုင်ခဲ့တာပါ။

လေဗာကူဆင်အသင်းဟာ ဒုတိယအကျော့ပွဲစဉ်မှာ ၉၆ မိနစ်အထိ ရိုးမားအသင်းကို ၂ ဂိုး-၁ ဂိုးနဲ့ အရေးနိမ့် နေခဲ့ပေမယ့် ၉၇ မိနစ်မှာ ချေပဂိုးသွင်းပြီး သူတို့ရဲ့ ရှုံးပွဲမရှိစံချိန်ကို ဆက်ထိန်းနိုင်ခဲ့တာ ဖြစ်ပါတယ်။

လေဗာကူဆင်အသင်းကိုတွေ့ရစဉ်

အဲဒါကြောင့် လေဗာကူဆင်အသင်းဟာ ဒီရာသီပြိုင်ပွဲစုံ ၄၉ ပွဲ ဆက်တိုက် ရှုံးပွဲမရှိစံချိန်နဲ့ လွန်ခဲ့တဲ့ ၅၉ နှစ်က ဘင်ဖီကာအသင်းတင်ရှိထားတဲ့ စံချိန်ကိုချိုးဖျက်ပြီး စံချိန်သစ်တင်နိုင်ခဲ့ပါတယ်။

လေဗာကူဆင်အသင်းဟာ ဒီရာသီမှာ ကစားဖို့ ၄ ပွဲသာ ကျန်ရှိတော့ပြီး ဒီ ၄ ပွဲစလုံး ရှုံးပွဲမရှိကစားကာ နောက်ထပ် ချန်ပီယံဆု ၂ ခုကို ရယူနိုင်မယ်ဆိုရင် တစ်ရာသီလုံး ရှုံးပွဲမရှိစံချိန်နဲ့ ဆုဖလား ၃ လုံး ရယူနိုင်တဲ့ အသင်းအဖြစ် စံချိန်သစ်တစ်ခုတင်နိုင်မှာ ဖြစ်ပါတယ်။

လေဗာကူဆင်အသင်းဟာ ယူရိုပါလိဂ်ဗိုလ်လုပွဲအဖြစ် မာဆေးလ်အသင်းကို အနိုင်ရခဲ့တဲ့ အတ္တလန်တာအသင်းနဲ့ ယှဉ်ပြိုင်ရမှာပါ။ 

အတ္တလန်တာအသင်းဟာ ယူရိုပါလိဂ် ဆီမီးဖိုင်နယ် ဒုတိယအကျော့ပွဲစဉ်မှာ မာဆေးလ်အသင်းကို ၃ ဂိုး-ဂိုးမရှိနဲ့ အနိုင်ရပြီး နှစ်ကျော့ပေါင်းရလဒ် ၄ ဂိုး-၁ ဂိုးနဲ့ အနိုင်ရကာ ဗိုလ်လုပွဲတက်နိုင်ခဲ့တာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၉

ယူနိုက်တက်နဲ့ ရီးရယ်လ်အသင်း တိုက်စစ်မှူးဟောင်း နစ္စတယ်ရွိုင်းက နည်းပြလောကထဲကို ပြန်လည် ဝင်ရောက်နိုင်ဖို့ မျှော်လင့်နေပြီး စပိန်ကလပ် အသင်းတွေကို ကိုင်တွယ်ချင်တယ်လို့ ပြောခဲ့ပါတယ်။

နစ္စတယ်ရွိုင်းက “ကျနော်စပိန်မှာ အလုပ်လုပ်ချင်ပါတယ်။ စပိန်ကလပ်တွေနဲ့လည်း စကားပြောခဲ့ပါတယ်။ ဒါပေမယ့် ကျနော်ကစားခဲ့ဖူးတဲ့ အခြားလိဂ်တွေမှာလည်း နည်းပြအဖြစ် ဆောင်ရွက်ချင်ပါတယ်။ ပရီးမီးယားလိဂ်နဲ့ ဘွန်ဒက်လီဂါပြိုင်ပွဲတွေမှာပါ”လို့ AS နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။ 

နစ္စတယ်ရွိုင်းဟာ အသင်းကြီး နည်းပြဘဝအဖြစ် PSV အသင်းကို ကိုင်တွယ်ခဲ့ပြီး ဒတ်ချ်ဖလား ရယူပေးနိုင် ခဲ့ပေမယ့် အသင်းအတွင်းမှာ သူ့ကို ပံ့ပိုးပေးမှုတွေ အားနည်းခဲ့တာကြောင့် ၂၀၂၂-၂၃ ရာသီအကုန်မှာ နည်းပြရာထူး က နုတ်ထွက်ခဲ့တာ ဖြစ်ပါတယ်။ 

နစ္စတယ်ရွိုင်းဟာ PSV အသင်းကို မကိုင်တွယ်ခင် နယ်သာလန် လက်ရွေးစင်အသင်းမှာ လက်ထောက်နည်းပြ အဖြစ် ၂ ကြိမ် ဆောင်ရွက်ခဲ့တာဖြစ်ပြီး အခုအချိန်မှာတော့ နည်းပြလောကထဲကို ပြန်လည် ဝင်ရောက် ချင်နေတာပါ။

 နစ္စတယ်ရွိုင်းကို တွေ့ရစဉ်

နစ္စတယ်ရွိုင်းဟာ ကစားသမားဘဝမှာ ဒန်ဘော့ရှ်၊ ဟီရန်ဗင်း၊ PSV၊ ယူနိုက်တက်၊ ရီးရယ်လ်၊ မာလာဂါ နဲ့ ဟမ်းဘတ်အသင်းတွေမှာ ကစားခဲ့တာ ဖြစ်ပါတယ်။ 

ဒါပေမယ့် နစ္စတယ်ရွိုင်းဟာ လာလီဂါကလပ် အသင်းတွေကို ဦးစားပေး ကိုင်တွယ်ချင်နေပြီး ပရီးမီးယားလိဂ်နဲ့ ဘွန်ဒက်လီဂါကလပ်တွေကိုလည်း ကိုင်တွယ်ချင်နေတာပါ။ 

အသက် ၄၇ နှစ်အရွယ်ရှိ နစ္စတယ်ရွိုင်းဟာ လာလီဂါကလပ်တွေဖြစ်တဲ့ ရီးရယ်လ်အသင်းမှာ ၉၆ ပွဲ ကစားခဲ့ပြီး ၆၄ ဂိုးသွင်းယူကာ မာလာဂါအသင်းမှာတော့ ၃၂ ပွဲကစားပြီး ၅ ဂိုးသွင်းယူနိုင်ခဲ့ပါတယ်။

နစ္စတယ်ရွိုင်းဟာ ကစားသမားဘဝမှာ PSV၊ ယူနိုက်တက်၊ ရီးရယ်လ်အသင်းတို့နဲ့အတူ ဆုဖလား အောင်မြင်မှုတွေ ရယူနိုင်ခဲ့ပြီး တစ်ဦးချင်း အောင်မြင်မှုတွေလည်း အများကြီးရယူနိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၉

ဒေါ့မွန်အသင်းကွင်းလယ်လူ မာကိုရူးစ်ဟာ မေဂျာလိဂ်ကလပ် စိန့်လူးဝစ် SC အသင်းနဲ့ အကြိုဆွေးနွေးမှု တွေပြုလုပ်နေတာကြောင့် ချန်ပီယံလိဂ်ဗိုလ်လုပွဲအပြီးမှာ မေဂျာလိဂ်ထံ ပြောင်းရွှေ့ဖို့ စဉ်းစားနေတယ်လို့ သတင်းတွေထွက်ပေါ်လာခဲ့ပါတယ်။

ဒီရာသီအကုန်မှာ ဒေါ့မွန်အသင်းကနေ ထွက်ခွာမယ့် မာကိုရူးစ်ကို ခေါ်ယူဖို့ တူရကီနဲ့ ဆော်ဒီကလပ် အသင်း တွေကလည်း ချိတ်ဆက်မှုတွေပြုလုပ်နေတာပါ။ 

ဒါပေမယ့် ဒေါ့မွန်အသင်းမှာ သူနဲ့ ၇ နှစ်ကြာလက်တွဲခဲ့တဲ့ ဂိုးသမား ရိုမန်ဘာကီရှိတဲ့ စိန့်လူးဝစ် SC အသင်းဟာ မာကိုရူးစ်အတွက် အဓိက ရွေးချယ်မှုဖြစ်လာနိုင်ပါတယ်။ ဒီလိုသတင်းတွေထွက်ပေါ်နေပေမယ့် စိန့်လူးဝစ်အသင်းဟာ သူတို့ရဲ့ ရှာဖွေမှု စာရင်းထဲမှာ မာကိုရူးစ်ရဲ့ နာမည်ကို မထည့်သွင်းရသေးဘူးလို့ The Athletic က ဖော်ပြထားပါတယ်။

မေဂျာလိဂ်ကလပ်အသင်းတွေဟာ ခေါ်ယူမယ့်ကစားသမားတွေကို သူတို့ရဲ့ ရှာဖွေတွေ့ရှိမှုစာရင်းထဲ ထည့်သွင်း ပြီးမှသာ လက်မှတ်ထိုးခေါ်ယူလို့ ရရှိမှာပါ။ 

မာကိုရူးစ်ဟာ ဒေါ့မွန်အသင်းမှာ ကစားခဲ့တဲ့ ၁၂ နှစ်အတွင်း အသင်းကို ချန်ပီယံလိဂ်ပြိုင်ပွဲဗိုလ်လုပွဲ ၂ ကြိမ်ရောက်ရှိအောင် ပို့ဆောင်ပေးနိုင်ခဲ့ပြီး ပိုကယ်လ်ဖလားနဲ့ စူပါဖလား ၂ ကြိမ်စီ ရယူနိုင်ပေးနိုင်ခဲ့တာဖြစ်ပါတယ်။ 

၂၀၁၈ ကနေ ၂၀၂၃ ခုနှစ်အထိ ဒေါ့မွန်အသင်းခေါင်းဆောင်အဖြစ် ဆောင်ရွက် ခဲ့တဲ့ မာကိုရူးစ်ဟာ ဘွန်ဒက်လီဂါပြိုင်ပွဲမှာ သွင်းဂိုးနဲ့ ဂိုးဖန်တီးမှု ၁၀၀ ကျော်စီပြုလုပ်နိုင်တဲ့ ကစားသမား ၃ ဦး ထဲက တစ်ဦးလည်းဖြစ်တာပါ။

မာကိုရူးစ်ဟာ ဂျာမနီတစ်နှစ်တာအကောင်းဆုံးဘောလုံးသမားဆုကို ၂ ကြိမ်ရယူနိုင်ခဲ့ပြီး ဘွန်ဒက်လီဂါ တစ်နှစ်တာအကောင်းဆုံး ကစားသမားဆုကို ၃ ကြိမ်ရယူနိုင်ခဲ့တာဖြစ်ပါတယ်။ 

မာကိုရူးစ်ဟာ ဂျာမနီ အသင်းအတွက် ၄၈ ပွဲပါဝင်ကစားထားပြီး ဒဏ်ရာတွေကြောင့် ချန်ပီယံဖြစ်ခဲ့တဲ့ ၂၀၁၄ ကမ္ဘာ့ဖလားပြိုင်ပွဲ၊ ယူရို ၂၀၁၆၊ ၂၀၂၀ နဲ့ ၂၀၂၂ ကမ္ဘာ့ဖလားပြိုင်ပွဲတွေမှာ ပါဝင်ကစားနိုင်ခဲ့ခြင်းမရှိပါဘူး။ 

ဒေါ့မွန်ကွင်းလယ်လူဟာ ယူရို ၂၀၁၂ နဲ့ ၂၀၁၈ ကမ္ဘာ့ဖလားပြိုင်ပွဲမှာသာ ဂျာမနီအသင်းအတွက် ပါဝင်ကစားနိုင်ခဲ့တာပါ။

ပြင်သစ်နဲ့ အာဆင်နယ်အသင်းကစားသမားဟောင်း နာဆရီက မာကိုရူးစ်နဲ့ စကားပြောခဲ့တာမှာ သူဟာ လာမယ့် ရာသီ မေဂျာလိဂ်မှာ သွားကစားချင်တယ်လို့ ပြောခဲ့ကြောင်း Canal+ နဲ့ အင်တာဗျူးမှာ ပြောခဲ့တာ ဖြစ်ပါတယ်။

Source:DailyMail