CNI Sport News
၂၀၂၅ ခုနှစ်၊ အောက်တိုဘာ ၂၈
အင်တာမိုင်ယာမီအသင်း ခေါင်းဆောင် မက်ဆီဟာ လာမယ့် ၂၀၂၆ ပြိုင်ပွဲမှာ အာဂျင်တီးနားအသင်းရဲ့ ကမ္ဘာ့ဖလား ချန်ပီယံဆုကို ကာကွယ်နိုင်ဖို့ မျှော်လင့်နေပေမယ့် သူပါဝင်ကစားဖွယ် ရှိ/မရှိဆိုတဲ့ နောက်ဆုံး ဆုံးဖြတ်ချက်ကို ချမှတ်ရခြင်း မရှိသေးဘူးလို့ ပြောခဲ့ပါတယ်။
မက်ဆီက “ကမ္ဘာ့ဖလားမှာ ပါဝင်ခွင့်ရတာဟာ အံ့သြစရာကောင်းတဲ့ အရာဖြစ်ပြီး ကျနော် အဲ့နေရာမှာ ရှိချင် ပါ တယ်။ လာမယ့်နှစ် အင်တာမိုင်ယာမီအသင်းနဲ့ ရာသီကြို စတင်တဲ့အချိန်မှာ နေ့တိုင်း အကဲဖြတ်မှုတွေ ပြုလုပ် သွားမှာဖြစ်ပြီး ကျနော် ၁၀၀ ရာခိုင်နှုန်း လုပ်နိုင်မလားဆိုတာ ကြည့်သွားမှာပါ။ ကမ္ဘာ့ဖလားပြိုင်ပွဲ ဖြစ်တာကြောင့် ကျနော် အလွန်စိတ်အား ထက်သန်ပါတယ်။ ကမ္ဘာ့ဖလားကို ကွင်းထဲမှာ ပြန်ပြီးကာကွယ်နိုင်တာဟာ အံ့မခန်း ဖြစ်ပြီး ဒါကြောင့် ဘုရားသခင်က ကျနော့်ကို နောက်ထပ်တစ်ကြိမ် ထပ်ပြီး လုပ်ခွင့်ပေးနိုင်ဖို့ မျှော်လင့်တယ်”လို့ NBC News နဲ့ အင်တာဗျူးမှာ ပြောခဲ့တာပါ။
အသက် ၃၈ နှစ်အရွယ်ရှိ မက်ဆီဟာ အကောင်းဆုံးပုံစံတွေ ပြသနေပေမယ့် ၁၀၀ ရာခိုင်နှုန်း ကြံ့ခိုင်မှုပြည့်ဝပြီး အာဂျင်တီးနားအသင်းကို အရေးပါတဲ့ နည်းလမ်းတွေနဲ့ ကူညီမှုတွေပြုလုပ်နိုင်မှသာ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားဖို့ စီစဉ်ထားတာ ဖြစ်ပါတယ်။
မက်ဆီကို တွေ့ရစဉ်
မက်ဆီဟာ လက်ရှိအချိန်မှာ အင်တာမိုင်ယာမီအသင်းနဲ့ ၂၀၂၅ ရာသီကို ကောင်းမွန်စွာ အဆုံးသတ်နိုင်ဖို့ လုပ် ဆောင်နေပြီး အသင်းဟာ မေဂျာလိဂ်ဖလား ပလေးအော့ဖ် Round 1 ရဲ့ ပထမပွဲမှာ နက်ရှ်ဗေးလ်အသင်းကို ၃ ဂိုး-၁ ဂိုးနဲ့ အနိုင်ရရှိထားတာပါ။
အင်တာမိုင်ယာမီအသင်းနဲ့ ၂၀၂၈ မေဂျာလိဂ် ရာသီကုန်အထိ စာချုပ်သက်တမ်းတိုးထားတဲ့ မက်ဆီဟာ ၂၀၂၅ မေဂျာလိဂ်ပြိုင်ပွဲရဲ့ ဂိုးသွင်းအများဆုံး ရွှေဖိနပ်ဆုကို ရရှိထားပါတယ်။
ဒါ့အပြင် မက်ဆီဟာ ၂၀၂၅ မေဂျာလိဂ် အကောင်းဆုံး ကစားသမားဆု အတွက်လည်း နောက်ဆုံး ဆန်ခါတင် စာရင်းထဲမှာ ပါဝင်နေပြီး ဒီဆုကို ရယူနိုင်ခဲ့ရင် မေဂျာလိဂ် အကောင်းဆုံး ကစားသမားဆုကို ၂ ရာသီဆက် ရယူနိုင်တဲ့ ပထမဆုံး ကစားသမားအဖြစ် မှတ်တမ်းဝင်မှာပါ။
အင်တာမိုင်ယာမီအသင်းဟာ နိုဝင်ဘာ ၁ ရက်မှာ နက်ရှ်ဗေးလ်အသင်းနဲ့ Round 1 ဒုတိယမြောက် ပွဲစဉ် ကစားရ မှာဖြစ်ပြီး ဒီပွဲအနိုင်ရရင် အရှေ့ပိုင်းဇုန် ဆီမီးဖိုင်နယ်ကို တက်နိုင်မှာဖြစ်ပါတယ်။
Source: ESPN
