CNI Sport News

၂၀၂၄ ခုနှစ်၊ ဇွန်လ ၁

ချယ်လ်ဆီးအသင်းနည်းပြဟောင်း ဖရန့်လမ်းပတ်ဟာ ဘန်လေအသင်းနည်းပြသစ် ဖြစ်လာနိုင်တဲ့ စာရင်းထဲမှာ အံ့အားသင့်ဖွယ် ပါဝင်လာတယ်လို့ ဒေးလီးမေးလ်က ဖော်ပြထားပါတယ်။

ဘန်လေအသင်းနည်းပြ ကွန်ပနီဟာ ပြီးခဲ့တဲ့ရက်ပိုင်းကမှ အသင်းနဲ့ လမ်းခွဲပြီး ဘိုင်ယန်မြူးနစ်အသင်းရဲ့ နည်းပြသစ်အဖြစ် ၃ နှစ် စာချုပ်ချုပ်ဆိုခဲ့တာပါ။ 

အဲဒါကြောင့် ဘန်လေအသင်းဟာ ကွန်ပနီရဲ့ လက်ထောက်နည်းပြ ဘယ်လာမီကို ယာယီနည်းပြအဖြစ် ခန့်အပ်ထားပါတယ်။ 

ဘန်လေအသင်းဟာ ဘယ်လာမီကို ယာယီနည်းပြအဖြစ် တာဝန်ပေးထားပေမယ့် နည်းပြသစ်ရှာဖွေမှုတွေကို ပြုလုပ်နေတာပါ။

ဘန်လေအသင်းရဲ့ နည်းပြသစ် ရှာဖွေမှုစာရင်းထဲမှာ ဖရန့်လမ်းပတ်လည်း ပါဝင်လာခဲ့ပြီး အင်္ဂလန် ကစားသမား ဟောင်းဟာ ၂၀၂၂-၂၃ ရာသီအကုန်က ချယ်လ်ဆီးအသင်းကို ယာယီကိုင်တွယ်ပြီးနောက် ဘယ်အသင်းကိုမှ ကိုင်တွယ်ရခြင်း မရှိသေးတာ ဖြစ်ပါတယ်။ 

လမ်းပတ်ကို တွေ့ရစဉ်

ဖရန့်လမ်းပတ်ဟာ ချယ်လ်ဆီးအသင်းကို မကိုင်တွယ်ခင် အဲဗာတန်အသင်းကို ကိုင်တွယ်ခဲ့ပြီး နောက်ဆုံး ကိုင်တွယ်ခဲ့တဲ့ ၁၁ ပွဲမှာ ၁ ပွဲသာ အနိုင်ရတဲ့အထိ ရလဒ်တွေဆိုးရွားခဲ့တာပါ။

ဖရန့်လမ်းပတ်ဟာ ချယ်လ်ဆီးအသင်းက ထွက်ခွာပြီးနောက် ကနေဒါလက်ရွေးစင်အသင်း နည်းပြရာထူး အပါအဝင် ကလပ်အသင်းအချို့ရဲ့ ကမ်းလှမ်းမှုကို ရရှိခဲ့ပေမယ့် ဘယ်အသင်းကိုမှ ကိုင်တွယ်ရခြင်း မရှိသေးတာ ဖြစ်ပါတယ်။ 

ဖရန့်လမ်းပတ်က သူဟာ နည်းပြလောကထဲကို ပြန်လည်ဝင်ရောက်ချင်တယ်လို့ ပြောထားတာကြောင့် ဘန်လေအသင်းကို ကိုင်တွယ်ဖွယ်ရှိနေတာပါ။ 

ဖရန့်လမ်းပတ်ဟာ သူ့ရဲ့နည်းပြဘဝအစမှာ ချန်ပီယံရှစ်ကလပ် ဒါဘီအသင်းကို ကိုင်တွယ်ခဲ့တာကြောင့် ချန်ပီယံရှစ်ပြိုင်ပွဲရဲ့ အတွေ့အကြုံကို ရရှိထားပါတယ်။

ဘန်လေအသင်းဟာ ပြီးခဲ့တဲ့ ပရီးမီးယားလိဂ်ပြိုင်ပွဲမှာ အဆင့် ၁၉ နဲ့ ရာသီ အဆုံးသတ်ခဲ့တာကြောင့် လာမယ့်ရာသီ ချန်ပီယံရှစ်ပြိုင်ပွဲမှာ ယှဉ်ပြိုင်ရမှာဖြစ်ပါတယ်။

Source: Dailymail

CNI Sport News

၂၀၂၄ ခုနှစ်၊ ဇွန်လ ၁

ယူနိုက်တက်အသင်းကနေ ထွက်ခွာခဲ့တဲ့ တိုက်စစ်မှူး မာရှယ်ကို ခေါ်ယူဖို့ ကလပ်အသင်း ၃ သင်းက စိတ်ဝင် စားနေတယ်လို့ Sky Sports က ဖော်ပြခဲ့ပါတယ်။

ပြင်သစ်တိုက်စစ်မှူး မာရှယ်ဟာ ယူနိုက်တက်အသင်းက သူ့ကို စာချုပ်သက်တမ်း မတိုးတော့တာကြောင့် စာချုပ် ကုန်ဆုံးမယ့် ဇွန်လအကုန်မှာ အသင်းက ထွက်ခွာတော့မှာပါ။ 

Sky Sports က ပြင်သစ်ကလပ်တွေဖြစ်တဲ့ လိုင်ယွန်၊ မာဆေးလ်နဲ့ တူရကီကလပ် ဘက်ဆီးတက်အသင်းတို့က မာရှယ်ကို ခေါ်ယူဖို့ စိတ်ဝင်စားနေတယ်လို့ ဖော်ပြထားတာဖြစ်ပါတယ်။ 

မာရှယ်ဟာ ပြီးခဲ့တဲ့အပတ်ကမှ ၉ နှစ်ကြာကစားခဲ့တဲ့ ယူနိုက်တက်အသင်းကနေ ထွက်ခွာပြီလို့ သူ့ရဲ့ ဆိုရှယ်မီဒီယာမှာ အတည်ပြုခဲ့တာပါ။

မာရှယ်ဟာ ပြီးခဲ့တဲ့ ရာသီတွေအတွင်းမှာ ဒဏ်ရာတွေနဲ့ ရုန်းကန်ခဲ့ရပေမယ့် သူ့ကို ခေါ်ယူဖို့ ကလပ်အသင်း အချို့က စိတ်ဝင်စားနေတာ ဖြစ်ပါတယ်။ 

မာရှယ်ကိုတွေ့ရစဉ်

မက္ကဆီကို၊ မေဂျာလိဂ်နဲ့ ဆော်ဒီပရိုလိဂ် ကလပ်အသင်းတွေဟာ မာရှယ်ကို ခေါ်ယူဖို့ စောင့်ကြည့်နေပေမယ့် ကစားသမားကတော့ ဥရောပမှာပဲ ဆက်ရှိချင်နေတာပါ။ 

အသက် ၂၈ နှစ်အရွယ်ရှိ မာရှယ်ဟာ ယူနိုက်တက်အသင်းအတွက် ၃၁၇ ပွဲကစားပြီး ဂိုး ၉၀ သွင်းယူနိုင်ခဲ့ပေမယ့် ပြီးခဲ့တဲ့ ၃ ရာသီစလုံး ဒဏ်ရာတွေနဲ့ ရုန်းကန်ခဲ့ရတာ ဖြစ်ပါတယ်။

ပြင်သစ်တိုက်စစ်မှူးဟာ ဒီရာသီမှာ ယူနိုက်တက်အသင်းအတွက် ၁၉ ပွဲသာ ကစားနိုင်ခဲ့ပြီး ၂ ဂိုးသွင်းယူနိုင်ခဲ့တာ ပါ။ 

မာရှယ်ဟာ ဒီရာသီ ယူနိုက်တက်အသင်းရဲ့ အိမ်ကွင်း နောက်ဆုံးပွဲစဉ်မှာ အသင်းပရိသတ်တွေကို နှုတ်ဆက် သွားခဲ့ပြီး မန်စီးတီးအသင်းကို အနိုင်ရခဲ့တဲ့ FA ဖလားဗိုလ်လုပွဲမှာ အသင်းအတွက် ပါဝင်နိုင်ခဲ့ခြင်းမရှိပါဘူး။ 

မာရှယ်ဟာ မကြာခင်မှာ သူ့ကို စိတ်ဝင်စားနေတဲ့ အသင်းတွေနဲ့ ဆွေးနွေးမှုတွေ ပြုလုပ်ကာ ရာသီသစ်အတွက် လေ့ကျင့်ပြင်ဆင်မှုတွေ ပြုလုပ်သွားမယ်လို့ သိရပါတယ်။

Source: Goal

CNI Sport News

၂၀၂၄ ခုနှစ်၊ ဇွန်လ ၁

ဒေါ့မွန်အသင်းနည်းပြ တာဇစ်က ချန်ပီယံလိဂ် ဗိုလ်လုပွဲမှာ ဗိုလ်စွဲဖို့ ရီးရယ်လ်အသင်းက ရေပန်းအစားဆုံး ဖြစ်ပေမယ့် သူတို့ဒါကို ဂရုစိုက်သွားမှာ မဟုတ်ဘူးလို့ ပြောလိုက်ပါတယ်။

တာဇစ်က “ကျနော်တို့ဟာ အမြင့်ဆုံးအဆင့်မှာ ယှဉ်ပြိုင်ဖို့ အဆင်သင့် ဖြစ်နေပါပြီ။ ရီးရယ်လ်နဲ့ ကစားရမှာဟာ ခက်ခဲမှာဖြစ်ပေမယ့် တစ်ပွဲတည်း ဗိုလ်လုပွဲမှာ အရာအားလုံးဖြစ်အောင်လုပ်နိုင်ပါတယ်။ ဗိုလ်စွဲဖို့ သူတို့ ရေပန်းစား တယ်ဆိုတာ ရှင်းပါတယ်။ ကျနော်တို့ ဒါကိုဂရုစိုက်မှာမဟုတ်ပါဘူး။ ကျနော်တို့ဟာ ပြီးခဲ့တဲ့ အသလက်တီကိုနဲ့ ပီအက်စ်ဂျီတို့ပွဲတွေမှာလည်း ရေပန်းမစားပါဘူး။ ဗိုလ်လုပွဲမှာ အနိုင်ရဖို့က ကျနော်တို့ရဲ့ ရည်မှန်းချက်ပါ “လို့ ပြောခဲ့တာပါ။

ပြီးခဲ့တဲ့ ဘွန်ဒက်လီဂါပြိုင်ပွဲမှာ အဆင့် ၅ နေရာ ရပ်တည်ခဲ့တဲ့ ဒေါ့မွန်အသင်းဟာ ၂၀၁၃ ခုနှစ်က ဝင်ဘာလေ ဗိုလ်လုပွဲမှာ ဘိုင်ယန်မြူးနစ်အသင်းကို အရေးနိမ့်ပြီးနောက် ပထမဆုံးအကြိမ် ချန်ပီယံလိဂ်ဗိုလ်လုပွဲကို တက်နိုင် ခဲ့တာ ဖြစ်ပါတယ်။ 

ဒေါ့မွန်အသင်းဟာ ဒီရာသီ ချန်ပီယံလိဂ်အုပ်စု အဆင့်မှာ အေစီမီလန်၊ နယူးကာဆယ်အသင်းတို့ကို ကျော်ဖြတ်နိုင် ခဲ့သလို ၁၆ သင်းအဆင့်မှာ PSV ၊ ကွာတားဖိုင်နယ်မှာ အသလက်တီကို၊ ဆီမီးဖိုင်နယ်မှာ ပီအက်စ်ဂျီအသင်းတို့ကို အနိုင်ယူကာ ဗိုလ်လုပွဲ တက်နိုင်ခဲ့တာပါ။

ဒေါ့မွန်အသင်းကို တွေ့ရစဉ်

ဒေါ့မွန်အသင်းဟာ ချန်ပီယံလိဂ်ဗိုလ်လုပွဲမှာ ပြီးခဲ့တဲ့နွေရာသီက ရီးရယ်လ်အသင်းကို ရောင်းခဲ့တဲ့ ကစားသမား ဟောင်း ဘယ်လင်ဂမ်နဲ့ ပြိုင်ဘက်အဖြစ် ပြန်လည်တွေ့ဆုံရတော့မှာ ဖြစ်ပါတယ်။ 

ဒီပွဲစဉ်မှာ ဒေါ့မွန်အသင်း ကွင်းလယ်လူ မာကိုရူးစ်နဲ့ ရီးရယ်လ်အသင်း ကွင်းလယ်လူ တိုနီကရူးစ်တို့ဟာ သူတို့ရဲ့ ကလပ်တွေအတွက် နောက်ဆုံးပွဲစဉ်အဖြစ် ပါဝင်ကစားကြမှာလည်း ဖြစ်တာပါ။ 

ဒေါ့မွန်အသင်း နောက်ခံလူ ရှလိုတာဘတ်က သူတို့ဟာ ပီအက်စ်ဂျီအသင်းကို ပေးဂိုးမပေးရဘဲ ၂ ပွဲစလုံး အနိုင်ယူခဲ့သလို ရီးရယ်လ်အသင်းကို အနိုင်ရယူဖို့အတွက် အခွင့်အရေးကောင်းတွေ ရှိတယ်ဆိုတာ ယုံကြည် တယ်လို့ ပြောခဲ့ပါတယ်။

ရီးရယ်လ်အသင်းကတော့ ချန်ပီယံလိဂ်ဖလားကို စံချိန်တင် ၁၅ ကြိမ်မြောက် ရယူနိုင်ဖို့ ပစ်မှတ်ထားနေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၁

အယ်လ်နာဆာအသင်းဟာ ဆော်ဒီဘုရင့်ဖလားဗိုလ်လုပွဲမှာ အယ်လ်ဟီလယ်အသင်းကို ပင်နယ်တီ အဆုံးအဖြတ်မှာ အရေးနိမ့်ပြီးနောက် အသင်းခေါင်းဆောင် ရော်နယ်ဒိုဟာ ငိုကြွေးနေခဲ့တာ ဖြစ်ပါတယ်။

အယ်လ်နာဆာအသင်းနဲ့ အယ်လ်ဟီလယ်အသင်းတို့ရဲ့ ဗိုလ်လုပွဲဟာ ပွဲကစားချိန်မိနစ် ၉၀ အတွင်း ၁ ဂိုးစီ သရေကျခဲ့လို့ အချိန်ပို ဆက်ကစားခဲ့ရပြီး အချိန်ပိုမှာလည်း ဂိုးမသွင်းနိုင်တဲ့အတွက် ပင်နယ်တီ အဆုံးအဖြတ် ခံယူခဲ့ရတာပါ။ 

ပင်နယ်တီမှာ အယ်လ်ဟီလယ်အသင်းက ၅ ဂိုး- ၄ ဂိုးနဲ့ အနိုင်ရပြီး ဆော်ဒီဘုရင့်ဖလား ချန်ပီယံဆုကို ရယူ သွားနိုင်ခဲ့တာ ဖြစ်ပါတယ်။ အယ်ဟီလယ်အသင်းဟာ ဒီရာသီမှာ အမှတ်ပေးလိဂ်၊ ဘုရင့်ဖလားနဲ့ စူပါဖလားတို့ကို ရယူနိုင်ခဲ့တာပါ။

အယ်လ်နာဆာအသင်းကတော့ ဒီရာသီကို ဆုဖလားလက်မဲ့နဲ့ အဆုံးသတ်ခဲ့ရတာကြောင့် ရော်နယ်ဒိုဟာ ငိုကြွေး နေခဲ့ပြီး အသင်းဖော်တွေနဲ့ နည်းပြအဖွဲ့ဝင်တွေက သူ့ကိုဝိုင်းပြီး နှစ်သိမ့်ခဲ့ရတာ ဖြစ်ပါတယ်။ 

အယ်လ်ဟီလယ်အသင်း အောင်ပွဲခံနေစဉ်

ရော်နယ်ဒိုဟာ ဒီဆုဖလားကို ရယူနိုင်ဖို့ ပစ်မှတ်ထားခဲ့တာကြောင့် အလွန်စိတ်ပျက်ပြီး စိတ်ခံစားချက်တွေကို မထိန်းချုပ်နိုင်တော့တာပါ။ 

အသက် ၃၉ နှစ်အရွယ်ရှိ ရော်နယ်ဒိုဟာ ဆော်ဒီပရိုလိဂ် ရာသီအပြည့် ကစားခဲ့ရတဲ့ ဒီရာသီမှာ စံချိန်တင် ၃၅ ဂိုး သွင်းယူနိုင်ခဲ့ပေမယ့် အသင်းကို ဆုဖလားအောင်မြင်မှုတော့ ရယူပေးနိုင်ခဲ့ခြင်း မရှိတာဖြစ်ပါတယ်။

အယ်လ်ဟီလယ်အသင်းဟာ ဆော်ဒီဘုရင့်ဖလား ချန်ပီယံဆုကို နောက်ဆုံး ၂ နှစ်ဆက်တိုက် ရယူနိုင်ခဲ့တာ အပါအဝင် ဆုဖလားကို ၁၁ ကြိမ်အထိ ရယူထားတာပါ။ 

ဒဏ်ရာကြောင့် တစ်ရာသီလုံးနီးပါး အယ်လ်ဟီလယ်အသင်းအတွက် ပါဝင်နိုင်ခဲ့ခြင်းမရှိတဲ့ နေမာဟာ ပွဲအပြီး ဆုဖလား အောင်ပွဲခံ အခမ်းအနားမှာ အသင်းနဲ့အတူ အောင်ပွဲခံမှုပြုလုပ်သွားခဲ့တာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ မေလ ၃၁

ဘရာဇီးလ်ဂန္ထဝင် ရီဗယ်လ်ဒိုက ရီးရယ်လ်နဲ့ ဒေါ့မွန်အသင်းတို့ရဲ့ ချန်ပီယံလိဂ်ဗိုလ်လုပွဲမှာ ဒေါ့မွန်အသင်း အနိုင် ရမယ်လို့ ခန့်မှန်းသုံးသပ်သွားခဲ့ပါတယ်။

ရီဗယ်လ်ဒိုက “ရီးရယ်လ်အသင်းက ဗိုလ်လုပွဲမှာ ရေပန်းအစားဆုံးဖြစ်ပါတယ်။ ဒါပေမယ့် ဒေါ့မွန်အသင်းက ချန်ပီယံဖြစ်မယ်လို့ ကျနော်ပြောချင်ပါတယ်။ ရီးရယ်လ်အသင်း ချန်ပီယံဖြစ်ဖို့ ရေပန်းစားတာ သေချာပေမယ့် ဒေါ့မွန်အသင်းကလည်း ယုံကြည်မှုအပြည့်နဲ့ ရောက်လာပါတယ်။ ဒေါ့မွန်အသင်းဟာ ပြီးခဲ့တဲ့ ပီအက်စ်ဂျီအသင်းနဲ့ ၂ ပွဲစလုံးအနိုင်ရခဲ့ပြီး ဒီပြိုင်ပွဲမှာ ဘယ်လိုကစားရမလဲနဲ့ ခက်ခဲတဲ့ပွဲတွေမှာ ဘယ်လိုကစားရမလဲဆိုတာ သိပါ တယ်။ အဲဒါကြောင့် ကျနော်က ဒေါ့မွန်အသင်း ချန်ပီယံဖြစ်မယ်လို့ထင်ပါတယ်”လို့ Betfair မှာ ပြောခဲ့တာပါ။

ရီးရယ်လ်အသင်းဟာ ချန်ပီယံလိဂ်ပြိုင်ပွဲမှာ ချန်ပီယံဆုကို ၁၄ ကြိမ်ရရှိထားပြီး ဗိုလ်လုပွဲတက်ခဲ့တဲ့ နောက်ဆုံး ၈ ကြိမ်စလုံးလည်း ချန်ပီယံဆုကို ရယူနိုင်ခဲ့တာဖြစ်ပါတယ်။ 

ဒေါ့မွန်အသင်းဟာ ချန်ပီယံလိဂ်ပြိုင်ပွဲမှာ ၁ ကြိမ်သာ ဗိုလ်စွဲခဲ့ပြီး ၂၀၁၂-၁၃ ရာသီက ဗိုလ်လုပွဲတက်ခဲ့တာမှာ ဘိုင်ယန်မြူးနစ်အသင်းကို အရေးနိမ့်ခဲ့တာပါ။

လက်ရှိ အချိန်မှာ နှစ်သင်းကြားကွာခြားမှုအနည်းငယ်ရှိနေတဲ့အတွက် ဒီနှစ်ချန်ပီယံလိဂ်ပြိုင်ပွဲမှာ ရီးရယ်လ်အသင်းပဲ ဗိုလ်စွဲမယ်လို့ ရေပန်းစားနေတာဖြစ်ပါတယ်။

ဒါပေမယ့် ရီဗယ်လ်ဒိုကတော့ ဒီနှစ်ဗိုလ်လုပွဲမှာ ဒေါ့မွန်အသင်း ချန်ပီယံဖြစ်မယ်လို့ ယုံကြည်နေတာပါ။ 

ဒေါ့မွန် အသင်းနည်းပြ တာဇစ်က ပွဲမတိုင်ခင်ပြုလုပ်ခဲ့တဲ့ ပွဲကြိုသတင်းစာရှင်းလင်းပွဲမှာ ရီးရယ်လ်အသင်းရဲ့ ချန်ပီယံလိဂ် ဗိုလ်လုပွဲတက်တိုင်း အနိုင်ရတဲ့ မှတ်တမ်းကောင်းကို သူတို့ရပ်တန့်ပစ်မယ်လို့ ပြောထားတာ ဖြစ်ပါတယ်။ 

ရီးရယ်လ်နဲ့ ဒေါ့မွန်အသင်းတို့ဟာ ချန်ပီယံလိဂ်ပြိုင်ပွဲမှာ ၁၄ ကြိမ်တွေ့ဆုံထားပြီး ရီးရယ်လ် အသင်းက ၆ ကြိမ် အနိုင်ရရှိကာ ဒေါ့မွန်အသင်းက ၃ ကြိမ်အနိုင်ရပြီး သရေရလဒ်က ၅ ကြိမ်ထွက်ပေါ်ခဲ့တာပါ။

ဒီနှစ်သင်း ချန်ပီယံလိဂ်ပြိုင်ပွဲမှာ နောက်ဆုံးအကြိမ်တွေ့ဆုံခဲ့တဲ့ ၂၀၁၇-၁၈ ရာသီမှာ ရီးရယ်လ်အသင်းဟာ ၂ ပွဲ စလုံးအနိုင်ရယူခဲ့ပါတယ်။ ရီးရယ်လ်နဲ့ ဒေါ့မွန်အသင်းတို့ရဲ့ ချန်ပီယံလိဂ်ဗိုလ်လုပွဲကို ဇွန် ၂ ရက် မနက်ပိုင်း ဝင်ဘာလေကွင်းမှာ ယှဉ်ပြိုင်သွားမှာဖြစ်ပါတယ်။

Source:Metro

CNI Sport News

၂၀၂၄ ခုနှစ်၊ မေလ ၃၁

အာဂျင်တီးနားအသင်းဟာ ဂါနာချိုကို လာမယ့်အိုလံပစ်ပြိုင်ပွဲမှာ အသုံးပြုနိုင်ဖို့အတွက် ယူနိုက်တက်အသင်းရဲ့ ဆုံးဖြတ်ချက်ကို စောင့်ဆိုင်းနေတယ်လို့ သိရပါတယ်။

အာဂျင်တီးနား ယူ-၂၃ အသင်းနည်းပြ မာရှေယာနိုဟာ နွေရာသီအိုလံပစ်ပြိုင်ပွဲအတွက် ဂါနာချိုကို အသင်းထံ စေလွှတ်ပေးဖို့ ယူနိုက်တက်အသင်းထံ တရားဝင် တောင်းဆိုထားတယ်လို့ TNT Sports က ဖော်ပြထားတာပါ။ 

ဒါပေမယ့် အာဂျင်တီးနားအသင်းဟာ ယူနိုက်တက်အသင်းဆီကနေ အကြောင်းပြန်မှုကို မရရှိသေးပါဘူး။ 

မာရှေယာနိုဟာ ကွင်းလယ်လူ အန်ဇိုဖာနန်ဒက်ဇ် အတွက်လည်း ချယ်လ်ဆီး အသင်းဆီကနေ အကြောင်းပြန်မှုကို စောင့်ဆိုင်းနေရတာ ဖြစ်ပါတယ်။

အာဂျင်တီးနား ယူ-၂၃ အသင်းဟာ အိုလံပစ်ပြိုင်ပွဲမှာ အောင်မြင်မှု ရယူနိုင်ဖို့အတွက် ဂါနာချိုနဲ့ အန်ဇိုဖာနန်ဒက်ဇ် အပြင် အက်စတွန်ဗီလာအသင်း ဂိုးသမား အီမီမာတီနက်ဇ်ကိုပါ ခေါ်ယူချင်နေတာပါ။ 

ဂါနာချိုဟာ ကိုပါအမေရိကဖလား ပြိုင်ပွဲဝင်မယ့် အာဂျင်တီးနားအသင်းရဲ့ ပဏာမလူစာရင်းမှာ အန်ဇိုဖာနန်ဒက်ဇ်၊ အီမီမာတီနက်ဇ်တို့နဲ့အတူ ရွေးချယ်ခံထားရပါတယ်။

 ဂါနာချိုကို တွေ့ရစဉ် 

ဂါနာချိုအနေနဲ့ ကိုပါအမေရိကဖလား ပြိုင်ပွဲအတွက် အာဂျင်တီးနားအသင်းရဲ့ အပြီးသတ် လူစာရင်းမှာ ပါဝင်ပြီး အိုလံပစ်ပြိုင်ပွဲမှာပါ ထပ်မံ ပါဝင်ကစားခဲ့ရင် ယူနိုက်တက်အသင်းအတွက် အခက်တွေ့နိုင်တာ ဖြစ်ပါတယ်။

ဇွန်လ ၂၀ ရက်မှာစတင်မယ့် ကိုပါအမေရိကဖလားပြိုင်ပွဲဟာ ဇူလိုင် ၁၄ ရက်မှာ ပြီးဆုံးမှာဖြစ်ပြီး အိုလံပစ် ဘောလုံးပြိုင်ပွဲက ဇူလိုင် ၂၄ ရက်က စတင်ကာ သြဂုတ် ၁၀ ရက်မှာ ပြီးဆုံးမှာပါ။ 

ယူနိုက်တက်အသင်းဟာ သြဂုတ် ၁၀ ရက်မှာ မန်စီးတီးအသင်းနဲ့ ကွန်မြူနတီဒိုင်း ပွဲစဉ်ကစားဖို့ ရှိနေတာကြောင့် ဂါနာချိုကို အာဂျင်တီးနား အိုလံပစ်အသင်းထံ စေလွှတ်ပေးဖို့ ဆုံးဖြတ်ရခြင်း မရှိသေးတာ ဖြစ်ပါတယ်။ 

အိုလံပစ်ပြိုင်ပွဲထံ စေလွှတ်ခဲ့ရင် ဂါနာချိုဟာ ယူနိုက်တက်အသင်းရဲ့ ရာသီသစ် ပရီးမီးယားလိဂ်ပွဲစဉ် အချို့ကို လည်း လွဲချော်နိုင်တာပါ။

ဂါနာချိုဟာ ဒီရာသီမှာ ယူနိုက်တက်အသင်းအတွက် ပွဲပေါင်း ၅၀ ပါဝင်ကစားခဲ့ပြီး ၁၀ ဂိုးသွင်းယူကာ ၅ ဂိုး ဖန်တီးနိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ မေလ ၃၁ 

ဘိုကာဂျူနီယာအသင်း တိုက်စစ်မှူး ကာဗာနီဟာ ဥရုဂွေးလက်ရွေးစင်အသင်း ကစားသမားဘဝက အနားယူပြီလို့ တရားဝင် ကြေညာလိုက်ပါတယ်။

၂၀၀၈ ခုနှစ်မှာ ဥရုဂွေးအသင်းအတွက် စတင်ပွဲထွက်ခွင့်ရခဲ့တဲ့ ကာဗာနီဟာ ကိုပါအမေရိကဖလား ပြိုင်ပွဲဝင်မယ့် နိုင်ငံအသင်း လူစာရင်းမှာ ရွေးချယ်ခံထားရပေမယ့် အနားယူဖို့ ဆုံးဖြတ်ခဲ့တာပါ။ 

အသက် ၃၇ နှစ်အရွယ်ရှိ ကာဗာနီဟာ ဥရုဂွေးအသင်းနဲ့အတူ ကမ္ဘာ့ဖလားပြိုင်ပွဲ ၄ ကြိမ် ပါဝင်ကစားခဲ့ပြီး ဂါနာ အသင်းကို ၂ ဂိုး- ဂိုးမရှိနဲ့ အနိုင်ရတဲ့ ၂၀၂၂ ကမ္ဘာ့ဖလားပြိုင်ပွဲမှာ နိုင်ငံအသင်းအတွက် နောက်ဆုံး ပါဝင်ကစား ခဲ့တာ ဖြစ်ပါတယ်။

ကာဗာနီဟာ ဘိုကာဂျူနီယာအသင်းအတွက် အပြည့်အ ဝအာရုံစိုက်ချင်တာကြောင့် နိုင်ငံအသင်းက အနားယူဖို့ ဆုံးဖြတ်ခဲ့တာလို့ ပြောခဲ့ပါတယ်။

ကာဗာနီဟာ ဥရုဂွေးအသင်းအတွက် ၁၃၆ ပွဲ ပါဝင်ကစားခဲ့ပြီး ၅၈ ဂိုးသွင်းယူခဲ့တာပါ။ 

ဥရုဂွေးအသင်းကို တွေ့ရစဉ်

ယူနိုက်တက်အသင်း တိုက်စစ်မှူးဟောင်းဟာ နိုင်ငံအသင်းဖော်ဟောင်း ဆွာရက်ဇ်ရဲ့အနောက်မှာ ဥရုဂွေး အသင်းရဲ့ တတိယမြောက် ပွဲအရေအတွက် အများဆုံး ကစားသမားနဲ့ ဒုတိယမြောက် ဂိုးအများဆုံး သွင်းယူ ထားတဲ့သူအဖြစ် ရှိနေတာ ဖြစ်ပါတယ်။ 

ကာဗာနီဟာ ဥရုဂွေးအသင်းနဲ့ အောင်မြင်မှုအဖြစ်၂၀၁၁ ကိုပါအမေရိကဖလားကို ရယူနိုင်ခဲ့တာပါ။ 

ဥရုဂွေးအသင်းဟာ ၂၀၂၄ ကိုပါအမေရိကဖလားပြိုင်ပွဲမှာ အိမ်ရှင် အမေရိကန်၊ ပနားမား၊ ဘိုလီးဗီးယားအသင်းတို့နဲ့ တစ်အုပ်စုတည်း ကျရောက်နေပြီး ဇွန်လ ၂၃ ရက်မှာ အဖွင့်ပွဲစဉ်အဖြစ် ပနားမားအသင်းနဲ့ ယှဉ်ပြိုင်ရမှာ ဖြစ်ပါတယ်။ 

ဥရုဂွေးအသင်းဟာ ကိုပါအမေရိကဖလားပြိုင်ပွဲမှာ ချန်ပီယံဆုကို ၁၅ ကြိမ် ရရှိထားပြီး အာဂျင်တီးနားအသင်းနဲ့ အတူ အအောင်မြင်ဆုံး အသင်းအဖြစ် ရပ်တည်နေတာပါ။ 

ဥရုဂွေးအသင်းဟာ ကိုပါအမေရိကဖလားပြိုင်ပွဲမှာ ၂၀၁၁ ခုနှစ်က ချန်ပီယံဆုရယူပြီးနောက်ပိုင်း ဆုဖလား အောင်မြင်မှုနဲ့ ဝေးကွာနေတာ ဖြစ်ပါတယ်။ 

ဥရုဂွေးအသင်းဟာ ကိုပါအမေရိကဖလား ပြိုင်ပွဲမတိုင်ခင်မှာ ကော်စတာရီကာ၊ မက္ကဆီကိုအသင်းတို့နဲ့ ခြေစမ်းပွဲ ယှဉ်ပြိုင်ဖို့ စီစဉ်ထားတာ ဖြစ်ပါတယ်။

Source: DailyMail

CNI Sport News

၂၀၂၄ ခုနှစ်၊ မေလ ၃၁

ရီးရယ်လ်အသင်း ဂိုးသမား လူနင်ဟာ ဖျားနာနေတာကြောင့် အသင်းနဲ့အတူ လေ့ကျင့်မှုတွေ ပြုလုပ်နိုင်ခြင်း မရှိတဲ့အတွက် ချန်ပီယံလိဂ်ဗိုလ်လုပွဲကို ပါဝင်နိုင်ဖွယ်မရှိဘူးလို့ ပြောလိုက်ပါတယ်။

လူနင်က “ရာသီရဲ့ အရေးကြီးဆုံးပွဲနဲ့ ကျနော့်ဘဝရဲ့ အရေးကြီးဆုံးပွဲအတွက် အသင်းနဲ့အတူ ပြင်ဆင်မှု ပြုလုပ်နိုင် ခဲ့ခြင်းမရှိလို့ စိတ်မကောင်းဖြစ်မိပါတယ်။ ခင်ဗျားတို့ရဲ့ မက်ဆေ့ချ်တွေ၊ ပံ့ပိုးမှုတွေ၊ အားပေးမှုတွေအတွက် ကျေးဇူး တင်ပါတယ်”လို့ အင်စတာဂရမ်မှာ ရေးသားထားတာပါ။

ဒီရာသီ ရီးရယ်လ်အသင်းရဲ့ နံပါတ်တစ်ဂိုးသမားအဖြစ် လက်စွမ်းပြသနေတဲ့ လူနင်ဟာ ဒီရက်သတ္တပတ်ထဲမှာ တုပ်ကွေးရောဂါ ခံစားခဲ့ရတာကြောင့် တနင်္လာနေ့ကနေ ဗုဒ္ဓဟူးနေ့အထိ အသင်းနဲ့ လေ့ကျင့်မှု ပြုလုပ်နိုင်ခဲ့ခြင်း မရှိပါဘူး။ 

ဒါအပြင် လူနင်ဟာ ရီးရယ်လ်အသင်း ဖော်တွေနဲ့အတူ ချန်ပီယံလိဂ် ဗိုလ်လုပွဲကစားမယ့် လန်ဒန်ကို လိုက်ပါ လာခဲ့ခြင်းမရှိတာ ဖြစ်ပါတယ်။

အသက် ၂၅ နှစ်အရွယ်ရှိ လူနင်ဟာ ဗိုလ်လုပွဲ မစတင်ခင် ဒါမှမဟုတ် ဒီထက်စောပြီး သူတစ်ဦးတည်း လန်ဒန်ကို လာရောက်မယ်လို့ သတင်းတွေ ထွက်ပေါ်နေတာပါ။

အဲဒါကြောင့် လူနင်ဟာ ချန်ပီယံလိဂ် ဗိုလ်လုပွဲကို ပါဝင်ကစားနိုင်ဖို့ အခွင့်အရေး နည်းလာခဲ့တာ ဖြစ်ပါတယ်။ 

ရီးရယ်လ် ဂိုးသမားကို တွေ့ရစဉ်

အခုအချိန်မှာတော့ လူနင် ကိုယ်တိုင်က ဒီပွဲမှာ သူပါဝင်နိုင်ဖွယ်မရှိဘူးလို့ ပြောလာခဲ့တာပါ။

လူနင်ဟာ အဓိကဂိုးသမား ကော့တွိုက်စ် ဒဏ်ရာကြောင့် အနားယူနေရချိန်မှာ ဒီရာသီ ရီးရယ်လ်အသင်းရဲ့ ဂိုးပေါက်ကို အကောင်းဆုံး ကာကွယ်နိုင်ခဲ့ပြီး လာလီဂါ ဆုဖလားရရှိအောင် စွမ်းဆောင်ပေးနိုင်ခဲ့တာ ဖြစ်ပါတယ်။ 

ဒါအပြင် လူနင်ဟာ မန်စီးတီးအသင်းကို အနိုင်ရခဲ့တဲ့ ချန်ပီယံလိဂ် ကွာတားဖိုင်နယ်ပွဲစဉ်မှာ ပင်နယ်တီ ၂ လုံး ကာကွယ်ပေးခဲ့ပြီး အသင်းကို ဆီမီးဖိုင်နယ်တက်စေခဲ့တာပါ။

လက်ရှိအချိန်မှာ ကော့တွိုက်စ်ဟာ ဒဏ်ရာကနေ ပြန်သက်သာလာပြီဖြစ်ပေမယ့် အားလုံးက ချန်ပီယံလိဂ် ဗိုလ်လုပွဲမှာ လူနင်ကို ဆက်ပြီး အသုံးပြုစေချင်နေတာ ဖြစ်ပါတယ်။ 

ဒါပေမယ့် လူနင်ကိုယ်တိုင်က ချန်ပီယံလိဂ်ဗိုလ်လုပွဲကို ပါဝင်နိုင်ဖွယ် မရှိဘူးလို့ ပြောခဲ့တာကြောင့် နည်းပြ အန်ဆယ်လော့တီဟာ ကော့တွိုက်စ်ကိုသာ ပွဲထွက်ဂိုးသမားအဖြစ် အသုံးပြုတော့မှာပါ။

ကော့တွိုက်စ်ဟာ လီဗာပူးလ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ၂၀၂၂ ချန်ပီယံလိဂ်ဗိုလ်လုပွဲမှာ ရီးရယ်လ် အသင်းကို ချန်ပီယံဆုရရှိအောင် လက်စွမ်းပြသနိုင်ခဲ့တာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ မေလ ၃၀

ပြင်သစ်တိုက်စစ်မှူး ဘတ်ပီက သူဟာ အေစီမီလန်အသင်းရဲ့ ပရိသတ်ဖြစ်တာကြောင့် အီတလီမှာ ကစား ဖြစ်မယ်ဆိုရင် အေစီမီလန်အသင်းမှာ ကစားချင်တယ်လို့ ဖွင့်ဟခဲ့ပါတယ်။

ဘတ်ပီက “ကျနော်ဟာ ကလေးဘဝကတည်းက မီလန်ရဲ့ အမာခံပရိသတ်ပါ။ အဲဒါကြောင့် ကျနော်တစ်နေ့နေ့ အီတလီမှာ ကစားဖြစ်ခဲ့မယ်ဆိုရင် အေစီမီလန်မှာ ကစားချင်တယ်လို့ အမြဲတမ်းပြောခဲ့ပါတယ်။ ဘာဖြစ်လာနိုင် မလဲဆိုတာ မသိပေမယ့် ကျနော်ဟာ အေစီမီလန်ပါဝင်တဲ့ အီတလီလိဂ်ပွဲတိုင်းကို အခုထိ ကြည့်ဖြစ်ပါတယ်။ ကျနော့်ရဲ့ မိသားစုဟာ အေစီမီလန်ရဲ့အမာခံ ပရိသတ်တွေဖြစ်တယ်”လို့ Sky Sport Italia နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

ဇွန်လအကုန်မှာ ပီအက်စ်ဂျီအသင်းနဲ့ စာချုပ်ကုန်ဆုံးမယ့် ဘတ်ပီဟာ ရီးရယ်လ်အသင်းထံ ပြောင်းရွှေ့ဖို့ နီးစပ် နေပြီး မကြာခင်ရက်ပိုင်းအတွင်းမှာ နှစ်ဖက်စလုံးက ဒီအပြောင်းအရွှေ့ကို ကြေညာဖို့ရှိနေတာ ဖြစ်ပါတယ်။ 

ပီအက်စ်ဂျီအသင်းအတွက် ၃၀၈ ပွဲ ပါဝင်ကစားခဲ့ပြီး ၂၅၆ ဂိုး သွင်းယူနိုင်ခဲ့တဲ့ ဘတ်ပီဟာ ရီးရယ်လ်အသင်းနဲ့ အပြောင်းအရွှေ့ မကြေညာခင်မှာတင် အေစီမီလန်အသင်းမှာ ကစားချင်တဲ့ သူ့ရဲ့အစီအစဉ်ကို ပြောလာခဲ့တာပါ။ 

အဲဒါကြောင့် ဘတ်ပီဟာ ရီးရယ်လ်အသင်းမှာ ကစားပြီးရင် အီတလီစီးရီးအေမှာ သွားရောက် ကစားဖွယ်ရှိနေတာ ဖြစ်ပါတယ်။

ဘတ်ပီကို တွေ့ရစဉ်

ဘတ်ပီဟာ ပြီးခဲ့တဲ့ Globe Soccer Awards ဆုပေးပွဲမှာ အကောင်းဆုံး ကစားသမားဆုကို ရယူပြီးနောက် သူ့ရဲ့ အသင်းသစ်ကို ရက်ပိုင်းအတွင်း သိရမှာပါလို့ CNN နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။ 

ဘတ်ပီဟာ လက်ရှိ အချိန်မှာတော့ ယူရို ၂၀၂၄ ပြိုင်ပွဲဝင်ဖို့အတွက် လေ့ကျင့်မှုတွေ စတင်နေတဲ့ ပြင်သစ်အသင်းနဲ့ ပူးပေါင်းပြီး လေ့ကျင့်မှုတွေ ပြုလုပ်နေပြီ ဖြစ်ပါတယ်။

ပြင်သစ်အသင်းဟာ ယူရို ၂၀၂၄ ပြိုင်ပွဲအတွက် ဂျာမနီကို မသွားရောက်ခင်မှာ လူဇင်ဘတ်၊ ကနေဒါအသင်းတို့နဲ့ ခြေစမ်းပွဲ ယှဉ်ပြိုင်သွားမှာပါ။

ပြင်သစ်အသင်းဟာ ယူရို ၂၀၂၄ ပြိုင်ပွဲမှာ သြစတြီးယား၊ နယ်သာလန်၊ ပိုလန်အသင်းတို့နဲ့ တစ်အုပ်စုတည်း ကျရောက်နေပြီး အုပ်စုအဖွင့်ပွဲစဉ်အဖြစ် ဇွန်လ ၁၇ ရက်မှာ သြစတြီးယားအသင်းနဲ့ ယှဉ်ပြိုင်ရမှာဖြစ်ပါတယ်။

Source: Sportsmole