CNI Sport News

၂၀၂၄ ခုနှစ်၊ ဇွန်လ ၂၀

အင်္ဂလန်ကွင်းလယ်လူ ကိုဘီမိုင်နူးက နည်းပြ အဲရစ်တန်ဟတ်ကို အသင်းမှာ ဆက်ထိန်းထားတဲ့ ယူနိုက်တက် အသင်းရဲ့ ဆုံးဖြတ်ချက်ကို ထောက်ခံတယ်လို့ ပြောလိုက်ပါတယ်။

ကိုဘီမိုင်နူးက “သူနဲ့အတူ အသင်းကို တည်ဆောက်ရတာ ပျော်ပါတယ်။ သူဟာ အသင်းအတွက် ဆုဖလား ၂ လုံး ရယူပေးထားပြီး နောက်ထပ် ရယူနိုင်ဖို့လည်း မျှော်လင့်ပါတယ်။ သူဟာ ကျနော့်ကို ယုံကြည်မှုအပြည့်နဲ့ အသင်းမှာ ကစားခွင့်ပေးတဲ့အတွက် ကျနော်အများကြီး ကျေးဇူးတင်ပါတယ်”လို့ ပြောခဲ့တာပါ။

ဒတ်ချ်လူမျိုးနည်းပြ အဲရစ်တန်ဟတ်ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ ယူနိုက်တက်အသင်းရဲ့ ရလဒ်ဆိုး တွေကြောင့် ထုတ်ပယ်ခံရမယ်လို့ သတင်းတွေ ထွက်ခဲ့ပေမယ့် FA ဖလား ရယူနိုင်ခဲ့တာကြောင့် လာမယ့်ရာသီ အသင်းကို ဆက်ပြီး ကိုင်တွယ်ခွင့်ရမှာ ဖြစ်ပါတယ်။ 

အသက် ၁၉ နှစ်အရွယ်ရှိ ကိုဘီမိုင်နူးဟာ နည်းပြ အဲရစ်တန်ဟတ် လက်ထက်မှာ အဓိက ကစားသမားအဖြစ် ခြေစွမ်းပြသနိုင်ခဲ့ပြီး ယူရို ၂၀၂၄ ပြိုင်ပွဲဝင် အင်္ဂလန်အသင်း လူစာရင်းမှာ ပါဝင်ခဲ့တာပါ။

ကိုဘီမိုင်နူးကို တွေ့ရစဉ်

အဲဒါကြောင့် ကိုဘီမိုင်နူးဟာ နည်းပြ အဲရစ်တန်ဟတ်ကို အသင်းမှာ ဆက်ပြီးထားတဲ့ ယူနိုက်တက်အသင်းရဲ့ ဆုံးဖြတ်ချက်ကို ထောက်ခံခဲ့တာ ဖြစ်ပါတယ်။

ယူနိုက်တက်ကြယ်ပွင့်ဟာ ပြီးခဲ့တဲ့ ဆားဘီးယားအသင်းနဲ့ပွဲစဉ်မှာ အင်္ဂလန်အသင်းအတွက် လူစားဝင်ကစားသမား အဖြစ် ပါဝင်ကစားခွင့်ရခဲ့တာပါ။ 

အင်္ဂလန်အသင်းဂန္ထဝင် ဝိန်းရွန်နီက နိုင်ငံအသင်းအနေနဲ့ ယူရိုပြိုင်ပွဲမှာ ရှုံးထွက်အဆင့်ရောက်ခဲ့ရင် ကိုဘီမိုင်နူးကို ပွဲထွက်လူစာရင်းမှာ အသုံးပြုဖို့ အကြံကြုထားပါတယ်။

ကိုဘီမိုင်နူးက “အရန်ခုံမှာပဲဖြစ်ဖြစ် ပွဲထွက်လူစာရင်းမှာပဲဖြစ်ဖြစ် ကျနော်ဟာ ပွဲကစားဖို့ အမြဲတမ်းအဆင်သင့် ဖြစ်နေပါတယ်။ ဒါပေမယ့် ကျနော်တို့ လူစာရင်းမှာ အလွန်ကောင်းမွန်တဲ့ ကွင်းလယ်ကစားသမားတွေရှိပါတယ်။ ကျနော်ဟာ ပြင်းပြင်းထန်ထန်လေ့ကျင့်နေပြီး အသုံးပြုဖို့ ရွေးချယ်ခံရတဲ့အခါမှာ အဆင်သင့်ဖြစ်နေမှာပါ”လို့ ပြောခဲ့ပါတယ်။

၂၀၂၄ ခုနှစ်ထဲမှာ အင်္ဂလန်အသင်းအတွက် ပွဲဦးထွက်ခွင့်ရခဲ့တဲ့ ကိုဘီမိုင်နူးဟာ လက်ရှိအချိန်ထိ နိုင်ငံအသင်း အတွက် ၄ ပွဲ ပါဝင်ကစားထားတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဇွန်လ ၂၀

ကမ္ဘာ့အဆင့် နံပါတ် ၃ နေရာမှာ ရပ်တည်နေတဲ့ ဂျိုကိုဗစ်ဟာ ၂၀၂၄ ပဲရစ်အိုလံပစ်ပြိုင်ပွဲမှာ ဝင်ရောက်ယှဉ်ပြိုင် မယ်လို့ ဆားဘီးယားအိုလံပစ်ကော်မတီက ကြေညာခဲ့ပါတယ်။

၂၀၀၈ ခုနှစ်ကတည်းက အားကစားပြိုင်ပွဲတိုင်းကို ဝင်ရောက်ယှဉ်ပြိုင်ခဲ့တဲ့ ဂျိုကိုဗစ်ဟာ သူ့ရဲ့ ၅ ကြိမ်မြောက် အိုလံပစ်ပြိုင်ပွဲအဖြစ် ပဲရစ်အိုလံပစ်ပြိုင်ပွဲကို ဝင်ရောက်ယှဉ်ပြိုင်မှာပါ။ 

ဂျိုကိုဗစ်ဟာ ပထမဆုံးအကြိမ် ဝင်ရောက်ယှဉ်ပြိုင်ခဲ့တဲ့ အိုလံပစ်ပြိုင်ပွဲမှာ ကြေးတံဆိပ် ရရှိခဲ့ပေမယ့် နောက်ဆုံး ယှဉ်ပြိုင်ခဲ့တဲ့ ၃ ကြိမ်မှာ ၂ ကြိမ်က အဆင့် ၄ နေရာနဲ့ အဆုံးသတ်ခဲ့ရတာ ဖြစ်ပါတယ်။

ဂျိုကိုဗစ်ဟာ အိုလံပစ်ပြိုင်ပွဲမှာ ရွှေတံဆိပ်ဆု ရယူနိုင်ဖို့ ပစ်မှတ်ထားနေတာကြောင့် ပဲရစ်အိုလံပစ်ပြိုင်ပွဲဟာ သူ့အတွက် ဦးစားပေးဖြစ်တယ်လို့ ပြီးခဲ့တဲ့ ဧပြီက ပြောထားပါတယ်။

ဂျိုကိုဗစ်ကို တွေ့ရစဉ်

ဆားဘီးယားတင်းနစ်သမားဟာ ပြီးခဲ့တဲ့လက ပြင်သစ်အိုးပန်းပြိုင်ပွဲရဲ့ ကွာတားဖိုင်နယ် ပွဲစဉ်မတိုင်ခင် ဒူးဒဏ်ရာ ကြောင့် ပြိုင်ပွဲက နုတ်ထွက်ခဲ့ရပြီးနောက် ပဲရစ်အိုလံပစ်ပြိုင်ပွဲဟာ သူ့ရဲ့ပထမဆုံး ပြိုင်ပွဲဖြစ်လာမှာပါ။ 

နိုင်ငံအများအပြားဟာ တင်းနစ်ပြိုင်ပွဲမှာ ပါဝင်မယ့် သူတို့ရဲ့ ကစားသမားစာရင်းကို အတည်ပြု ထုတ်ပြန်ထား ကြပါတယ်။

နာမည်ကြီး တင်းနစ်ကစားသမားတွေဖြစ်တဲ့ ရာဖေးလ်နာဒယ်လ်နဲ့ အန်ဒီမာရေးတို့လည်း ဒီပြိုင်ပွဲမှာ ဝင်ရောက် ယှဉ်ပြိုင်ကြမှာဖြစ်ပေမယ့် အချို့ကစားသမားတွေကတော့ ဝင်ရောက်ယှဉ်မပြိုင်ဖို့ ဆုံးဖြတ်ခဲ့ကြတာပါ။

ပဲရစ်အိုလံပစ်ပြိုင်ပွဲရဲ့ တင်းနစ်ပြိုင်ပွဲတွေကို ဇူလိုင် ၂၄ ရက်ကနေ သြဂုတ် ၇ ရက်အထိ Roland Garros မှာ ကျင်းပသွားမှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၁၉

သြစတြီးယားအသင်းနဲ့ပွဲစဉ်မှာ နှာခေါင်းရိုးကျိုးသွားခဲ့တဲ့ ဘတ်ပီဟာ နယ်သာလန်အသင်းနဲ့ကစားမယ့် ယူရို ၂၀၂၄ ပြိုင်ပွဲ အုပ်စုဒုတိယပွဲစဉ်မှာ ပြင်သစ်အသင်းအတွက် ပါဝင်ဖို့ မသေချာဘူးလို့ သိရပါတယ်။

ပြင်သစ်အသင်းက သြစတြီးယားအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ပွဲစဉ်မှာ ဘတ်ပီဟာ ဘောလုံးကို ခေါင်းခုန် တိုက်ရာ ပြိုင်ဘက်အသင်း နောက်ခံလူ ဒန်ဆိုရဲ့ ပခုံးနဲ့ သူ့ရဲ့မျက်နှာထိခိုက်မိပြီး နှာခေါင်းရိုးကျိုးသွားခဲ့တာပါ။ 

အဲဒါကြောင့် ဘတ်ပီဟာ ဆေးရုံကို ခေါ်ဆောင်သွားခံခဲ့ရပြီး အခုအချိန်မှာတော့ ပြင်သစ်လက်ရွေးစင် အသင်းနဲ့ အတူ ရှိနေခဲ့တာ ဖြစ်ပါတယ်။ 

ပြင်သစ်ဘောလုံးအဖွဲ့ချုပ်က ဘတ်ပီဟာ နှာခေါင်းရိုးကျိုးခဲ့ပေမယ့် ခွဲစိတ်ဖို့မလိုအပ်ဘူးလို့ ထုတ်ပြန်ထားတာပါ။

ဘတ်ပီအနေနဲ့ ပြင်သစ်အသင်းရဲ့ လာမယ့် အုပ်စုပွဲတွေမှာ ပါဝင်ခဲ့မယ်ဆိုရင် မျက်နှာဖုံးတပ်ဆင်ပြီး ကစားရမှာ ဖြစ်ပါတယ်။ 

ဘတ်ပီကိုတွေ့ရစဉ်

သြစတြီးယားအသင်းကို အနိုင်ရခဲ့တဲ့ပွဲအပြီးမှာ ပြင်သစ်အသင်းနည်းပြ ဒက်ချမ့်စ်က ဘတ်ပီရဲ့ဒဏ်ရာ အခြေအနေ ဟာ မကောင်းဘူးလို့ ပြောထားတာပါ။

ဒါပေမယ့် ပြင်သစ်အသင်းနည်းပြ ဒက်ချမ့်စ်နဲ့ ဘောလုံးအဖွဲ့ချုပ်တို့က ဘတ်ပီအနေနဲ့ အမြန်ဆုံး ပြန်ကောင်းမွန် ပြီး ယူရိုအုပ်စုပွဲစဉ်တွေမှာ ပါဝင်နိုင်ဖို့ မျှော်လင့်နေတာ ဖြစ်ပါတယ်။

အသက် ၂၅ နှစ်အရွယ်ရှိ ဘတ်ပီဟာ ပြင်သစ်အသင်းအတွက် ပွဲပေါင်း ၈၀ ပါဝင်ကစားထားပြီး ၄၇ ဂိုး သွင်းယူထား ပေမယ့် ယူရိုပြိုင်ပွဲမှာ ဂိုးသွင်းယူနိုင်ခြင်း မရှိသေးပါဘူး။ 

ယူရိုပြိုင်ပွဲမှာ ချန်ပီယံဆု ၂ ကြိမ် ရရှိထားတဲ့ ပြင်သစ်အသင်းဟာ ယူရို ၂၀၂၄ အုပ်စု လက်ကျန်ပွဲစဉ်တွေအဖြစ် ဇွန်လ ၂၁ ရက်မှာ နယ်သာလန်၊၂၅ ရက်မှာ ပိုလန်အသင်းနဲ့ ယှဉ်ပြိုင်ရမှာပါ။

ပြင်သစ်အသင်းအနေနဲ့ အုပ်စုဒုတိယ ပွဲစဉ်ဖြစ်တဲ့ နယ်သာလန်အသင်းနဲ့ပွဲစဉ်မှာ နိုင်ပွဲရယူနိုင်ခဲ့ရင် ၁၆ သင်း အဆင့်ကို စောစီးစွာ တက်ရောက်နိုင်မှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၁၉

ယူရိုပြိုင်ပွဲကို ၆ ကြိမ်မြောက် ယှဉ်ပြိုင်တဲ့ ပထမဆုံး ကစားသမားအဖြစ် အသင်းခေါင်းဆောင် ရော်နယ်ဒို စံချိန်တင်တဲ့ပွဲမှာ ပေါ်တူဂီအသင်းဟာ ချက်အသင်းကို နောက်ကျသွင်းဂိုးနဲ့ အနိုင်ရရှိသွားခဲ့ပါတယ်။ 

ပေါ်တူဂီအသင်းဟာ ယူရို ၂၀၂၄ အုပ်စု အဖွင့်ပွဲစဉ်အဖြစ် ကစားခဲ့တဲ့ပွဲစဉ်မှာ ချက်အသင်းကို ၂ ဂိုး-၁ ဂိုးနဲ့ အနိုင် ရရှိခဲ့တာပါ။ 

ဒီပွဲစဉ်မှာ ချက်အသင်းဟာ ပရိုဗော့ဒ်ရဲ့ သွင်းဂိုးနဲ့ ဦးဆောင်ခဲ့ပေမယ့် ဟရာနက်က ကိုယ့်ဂိုးကိုယ် ပြန်သွင်းယူခဲ့လို့ ပွဲချိန်မိနစ် ၉၀ ပြည့်တဲ့အထိ ပေါ်တူဂီအသင်းနဲ့ ၁ ဂိုးစီ သရေကျနေခဲ့တာပါ။ 

ဒါပေမယ့် နာကျင်အချိန်ပို ၉၂ မိနစ်မှာ ကွန်ဆီကာအိုက အဖိုးတန် အနိုင်ဂိုး သွင်းယူပေးခဲ့တာကြောင့် ပေါ်တူဂီ အသင်းဟာ အဖွင့်ပွဲစဉ်ကို နိုင်ပွဲနဲ့ စတင်နိုင်ခဲ့တာ ဖြစ်ပါတယ်။

ယူရို ၂၀၀၄ ပြိုင်ပွဲကတည်းက ပေါ်တူဂီအသင်းအတွက် ပါဝင်ကစားခဲ့တဲ့ ရော်နယ်ဒိုဟာ သူ့ရဲ့ ၆ ကြိမ်မြောက် ယူရိုပြိုင်ပွဲဖြစ်တဲ့ ယူရို ၂၀၂၄ ပြိုင်ပွဲရဲ့ အဖွင့်ပွဲစဉ်မှာ နိုင်ငံအသင်းအတွက် ဂိုးမသွင်းနိုင်ခဲ့ပေမယ့် ပွဲချိန်ပြည့် ပါဝင်ကစားသွားခဲ့တာပါ။ 

ပေါ်တူဂီအသင်းနဲ့ ချက်အသင်း ယှဉ်ပြိုင်နေစဉ်

ရော်နယ်ဒိုက ပေါ်တူဂီအသင်းနဲ့အတူ နောက်ထပ် ဆုဖလားအတွက် အတူတူ တိုက်ပွဲဝင်သွားမှာဖြစ်ပြီး သူတို့ဟာ ရပ်တန့်လို့မရကြောင်း သူ့ရဲ့ဆိုရှယ်မီဒီယာမှာ ရေးသားခဲ့ပါတယ်။

ရော်နယ်ဒိုက “ဒီနေ့မှာ ကျနော်တို့သမိုင်းရဲ့ နောက်ထပ် အခန်းတစ်ခန်းကို စတင်လိုက်ပါပြီ။ စိန်ခေါ်မှုတွေ၊ အောင်ပွဲတွေနဲ့ ပြည့်နေတဲ့ နိုင်ငံအသင်းရဲ့ ပထမဆုံးနေ့ကို သတိရမိပါတယ်။ အခုအချိန်မှာတော့ အရည်အချင်း တွေ၊ စိတ်ပိုင်းဖြတ်မှု အပြည့်ရှိတဲ့ ချန်ပီယံအသင်းနဲ့အတူ ရှိရတာကို ကျနော်ဂုဏ်ယူမိပါတယ်။ လူတိုင်းရဲ့ခွန်အား တွေ၊ ပံ့ပိုးမှုတွေနဲ့ အိပ်မက်တွေကို လက်တွေ့အဖြစ် ပြောင်းလဲလိုက်ပါ”လို့ ရေးသားခဲ့ပါတယ်။

ချက်အသင်းနဲ့ပွဲစဉ်မှာ ရော်နယ်ဒိုအပြင် ပေါ်တူဂီအသင်း ဝါရင့်နောက်ခံလူ ပီပီကလည်း ယူရိုပြိုင်ပွဲမှာ စံချိန်သစ် တစ်ခုတင်နိုင်ခဲ့ပါတယ်။

ပီပီဟာ အသက် ၄၁ နှစ် ၁၁၃ ရက်နဲ့ ယူရိုပြိုင်ပွဲသမိုင်းမှာ အသက်အကြီးဆုံး ကစားသမားအဖြစ် စံချိန်မှတ်တမ်း ရေးထိုးနိုင်ခဲ့တာပါ။ 

အဖွင့်ပွဲစဉ်မှာ အနိုင်ရခဲ့တဲ့ ပေါ်တူဂီအသင်းဟာ ယူရို ၂၀၂၄ ပြိုင်ပွဲ အုပ်စုဒုတိယပွဲစဉ်အဖြစ် ဇွန်လ ၂၂ ရက်မှာ တူရကီအသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၁၈

အက်စတွန်ဗီလာအသင်း ကွင်းလယ်လူ မက်ဂင်းက ဆွစ်ဇာလန်အသင်းနဲ့ ကစားမယ့် ယူရို ၂၀၂၄ အုပ်စု ဒုတိယ ပွဲစဉ်မှာ ဂျာမနီအသင်းနဲ့ပွဲစဉ်က မတူညီတဲ့ စကော့တလန်အသင်းကို မြင်တွေ့ရမယ်လို့ ပရိသတ်တွေကို ကတိ ပေးခဲ့ပါတယ်။

မက်ဂင်းက “ဆွစ်ဇာလန်နဲ့ပွဲမှာ မတူညီတဲ့ စကော့တလန်ကို ခင်ဗျားတို့ မြင်တွေ့ရမှာပါ။ ကျနော်တို့အတွက် အခွင့်အရေး ရှိနေဆဲဆိုတာ မေ့ထားလို့ မရပါဘူး။ အသက်ကြီးလာတာနဲ့ ဒီလိုအရာတွေကို ကိုင်တွယ် ဖြေရှင်း ရတာ ပိုပြီးအဆင်ပြေလာပါတယ်။ လွယ်တော့ မလွယ်ပါဘူး။ ကျနော်တို့ဟာ ဝေဖန်မှုတွေ အများကြီးရှိခဲ့ပြီး ဒါကလည်း ထိုက်တန်တယ်ဆိုတာ သေချာပါတယ်။ ကျနော်တို့ဟာ ဒါတွေကို အကောင်းဆုံး တုန့်ပြန်သွားမှာပါ”လို့ ပြောခဲ့တာပါ။

စကော့တလန်အသင်းဟာ ယူရို ၂၀၂၄ ပြိုင်ပွဲ အုပ်စုအဖွင့်ပွဲစဉ်မှာ အိမ်ရှင်ဂျာမနီ အသင်းကို ၅ ဂိုး-၁ ဂိုးနဲ့ ဂိုးပြတ် အရေးနိမ့်ခဲ့တာ ဖြစ်ပါတယ်။ 

စကော့တလန်အသင်း ပရိသတ် အများအပြားဟာ သူတို့ရဲ့နိုင်ငံအသင်းကို အားပေးဖို့ ဂျာမနီနိုင်ငံကို ရောက်ရှိခဲ့ ကြပေမယ့် အုပ်စုအဖွင့်ပွဲရလဒ်က စိတ်ပျက်စရာ ဖြစ်ခဲ့ရတာပါ။

စကော့တလန်အသင်းအနေနဲ့ ယူရိုပြိုင်ပွဲမှာ နောက်တစ်ဆင့် တက်ချင်ရင် လက်ကျန် ၂ ပွဲမှာ အနည်းဆုံး ရမှတ် ၄ မှတ် ရယူနိုင်ဖို့ လိုအပ်နေတာ ဖြစ်ပါတယ်။

 စကော့တလန်အသင်း ပရိသတ်ကိုတွေ့ရစဉ်

အဲဒါကြောင့် စကော့တလန်အသင်းဟာ ဆွစ်ဇာလန်အသင်းနဲ့ ပွဲစဉ်မှာ ရလဒ်ကောင်းရရှိဖို့ ပြင်ဆင်နေပြီး ကွင်းလယ်လူ မက်ဂင်းက မတူညီတဲ့ စကော့တလန်အသင်းကို မြင်တွေ့ရမယ်လို့ ပြောခဲ့တာပါ။ 

စကော့တလန်အသင်းဟာ ယူရိုပြိုင်ပွဲနဲ့ ကမ္ဘာ့ဖလားပြိုင်ပွဲတွေမှာ အုပ်စုအဆင့်ကနေ ကျော်ဖြတ်နိုင်ခြင်းမရှိတဲ့ မှတ်တမ်းဆိုးကို ယူရို ၂၀၂၄ ပြိုင်ပွဲမှာ အဆုံးသတ်ဖို့လည်း မျှော်လင့်နေတာ ဖြစ်ပါတယ်။ 

ဆွစ်ဇာလန်အသင်းကတော့ အုပ်စုအဖွင့်ပွဲစဉ်မှာ ဟန်ဂေရီအသင်းကို ၃ ဂိုး-၁ ဂိုးနဲ့ အနိုင်ရရှိခဲ့တာပါ။

စကော့တလန်အသင်းနဲ့ ဆွစ်ဇာလန်အသင်းတို့ရဲ့ ယူရို ၂၀၂၄ ပြိုင်ပွဲအုပ်စု ဒုတိယပွဲစဉ်ကို ဇွန်လ ၂၀ ရက်မှာ ယှဉ်ပြိုင်သွားမှာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇွန်လ ၁၈

ဘယ်လ်ဂျီယံအသင်းနည်းပြ တီဒက်စ်ကိုဟာ ဆလိုဗက်ကီးယားအသင်းကို အရေးနိမ့်ခဲ့တဲ့ ယူရို ၂၀၂၄ ပြိုင်ပွဲအုပ်စု အဖွင့်ပွဲစဉ်မှာ ကစားသမား တစ်ဦးချင်းစီရဲ့ စွမ်းဆောင်ရည်အပေါ် အပြစ်တင်ဖို့ ငြင်းဆန်သွားခဲ့ပါတယ်။

တီဒက်စ်ကိုက “ရှုံးနိမ့်ခဲ့တာကြောင့် ကျနော့်အတွက် နာကျင်ရပါတယ်။ လူတွေကို လက်ညှိုးမထိုးချင်ပါဘူး။ ကျနော်တို့ဟာ အကြောင်းအရာတွေ အများကြီး ပြောမယ်ဆိုတာ သေချာပေမယ့် အတွင်းပိုင်းမှာပဲ လုပ်မှာဖြစ်ပြီး မီဒီယာကနေ လုပ်မှာမဟုတ်ပါဘူး။ ကျနော်တို့ဟာ ဒီပွဲမှာ အခွင့်အရေး အများကြီးကို ဖန်တီးနိုင်ခဲ့ပြီး ဒီထဲက တစ်ကြိမ်သာ ရယူနိုင်ခဲ့ရင် ပွဲက လွယ်ကူသွားမှာပါ။ ရိုးရိုးသားသားပြောရရင် အသင်းကို တိုးတက်အောင်လုပ်ဖို့ ကျနော်ပြောနိုင်တဲ့ အရာအများကြီးမရှိပါဘူး”လို့ ပြောခဲ့တာပါ။

ဘယ်လ်ဂျီယံအသင်းဟာ ဒီပွဲစဉ်မှာ ဆလိုဗက်ကီးယားအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့ပြီး ယူရိုအဖွင့်ပွဲစဉ်ကို ရှုံးပွဲနဲ့ စတင်ခဲ့ရတာ ဖြစ်ပါတယ်။

ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာလည်း ရလဒ်တွေ ဆိုးရွားခဲ့တဲ့ ဘယ်လ်ဂျီယံအသင်းဟာ နည်းပြ တီဒက်စ်ကို လက်ထက် ၁၆ ပွဲမှာ ပထမဆုံး ရှုံးပွဲကြုံတွေ့ခဲ့ရတာပါ။ 

ဘယ်လ်ဂျီယံအသင်းကို တွေ့ရစဉ်

တိုက်စစ်မှူး လူကာကူဟာ ဒီပွဲမှာ အခွင့်အရေးတွေ အများကြီးကို လွဲချော်ခဲ့ပြီး သူသွင်းယူခဲ့တဲ့ ၂ ဂိုးကလည်း VAR ရဲ့ ပယ်ဖျက်ခြင်းခံခဲ့ရတာ ဖြစ်ပါတယ်။

ဘယ်လ်ဂျီယံအသင်း ခေါင်းဆောင် ဒီဘရိုင်းက သူတို့ဟာ ဒီပွဲမှာ အနိုင်ရဖို့ ထိုက်တန်ခဲ့ပေမယ့် သွင်းဂိုး မသွင်းနိုင်ခဲ့တဲ့အတွက် စိတ်ပျက်မိတယ်လို့ ပွဲအပြီးမှာ ပြောခဲ့ပါတယ်။

ဒီဘရိုင်းက “ပထမပိုင်း မိနစ် ၂၀ မှာ ကျနော်တို့ အလွန်ကောင်းမွန်ခဲ့ပေမယ့် အမှားအယွင်းကြောင့် အပြစ်ပေး ခံခဲ့ရပါတယ်။ ဒုတိယပိုင်းမှာ ပိုကောင်းခဲ့ပြီး အရှိန်ကိုလည်း မြှင့်နိုင်ခဲ့ပေမယ့် ဂိုးမသွင်းနိုင်ခဲ့တာကြောင့် အရှုံးပေး ခဲ့ရပါတယ်။ ကျနော်တို့ဟာ ဒီပွဲမှာ အနည်းဆုံးသရေ ၁ မှတ်တော့ ရယူနိုင်ခဲ့သင့်ပါတယ်”လို့ ပြောခဲ့ပါတယ်။

ဘယ်လ်ဂျီယံအသင်းဟာ ယူရို ၂၀၂၄ ပြိုင်ပွဲအုပ်စု ဒုတိယပွဲစဉ်အဖြစ် ဇွန်လ ၂၂ ရက်မှာ ရိုမေးနီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၁၈

ပြင်သစ်အသင်းက သြစတြီးယားအသင်းကို အနိုင်ရခဲ့တဲ့ ယူရို ၂၀၂၄ အုပ်စုအဖွင့်ပွဲစဉ်မှာ နှာခေါင်းရိုးကျိုးသွားခဲ့တဲ့ တိုက်စစ်မှူး ဘတ်ပီဟာ ဆေးရုံကို ပို့ဆောင်ခံခဲ့ရပေမယ့် ခွဲစိတ်မှုခံယူဖို့ မလိုအပ်ဘူးလို့ ပြင်သစ်ဘောလုံးအဖွဲ့ချုပ် က အတည်ပြုခဲ့ပါတယ်။

ပြင်သစ်အသင်းက သြစတြီးယားအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ပွဲစဉ်မှာ ဘတ်ပီဟာ ဘောလုံးကို ခေါင်းတိုက်တာမှာ သြစတြီးယားအသင်း နောက်ခံလူ ဒန်ဆိုနဲ့ ထိခိုက်ပြီး နှာခေါင်းရိုး ကျိုးသွားခဲ့တာပါ။ 

အဲဒါကြောင့် ဘတ်ပီအနေနဲ့ ခွဲစိတ်မှုခံယူရရင် ယူရို ၂၀၂၄ ပြိုင်ပွဲကို လွဲချော်နိုင်တယ်ဆိုပြီး စိုးရိမ်မှုတွေရှိနေကြတာ ဖြစ်ပါတယ်။

ဒါပေမယ့် ဘတ်ပီရဲ့ ဒဏ်ရာ အခြေအနေကို စစ်ဆေးမှုတွေ ပြုလုပ်အပြီးမှာ ခွဲစိတ်မှုခံယူဖို့ မလိုအပ်ဘူးလို့ ပြင်သစ်ဘောလုံးအဖွဲ့ချုပ်က အတည်ပြုခဲ့တာပါ။

ဘတ်ပီအနေနဲ့ နှာခေါင်းရိုးကျိုးဒဏ်ရာကို ခွဲစိတ်ဖို့ မလိုအပ်ပေမယ့် လာမယ့်ပွဲစဉ်တွေမှာ မျက်နှာဖုံး တပ်ဆင်ပြီး ကစားသွားရမှာ ဖြစ်ပါတယ်။ 

ပြင်သစ်အသင်းနည်းပြ ဒက်ချမ့်စ်က ဘတ်ပီရဲ့နှာခေါင်းဟာ အခြေအနေ ဆိုးတာကြောင့် သူတို့အတွက် ဆိုးရွားတဲ့ သတင်းဖြစ်ခဲ့ပေမယ့် လာမယ့်ပွဲတွေမှာ သူပါဝင်နိုင်ဖို့ မျှော်လင့်တယ်လို့ ပွဲအပြီး သတင်းစာ ရှင်းလင်းပွဲမှာ ပြောခဲ့ တာပါ။ 

ဘတ်ပီကိုတွေ့ရစဉ်

ဘတ်ပီဟာ ဒီပွဲစဉ်မှာ လူစားမလဲခင် ဂိုးရနိုင်မယ့် အခွင့်အရေးတွေကို ရခဲ့ပေမယ့် လွဲချော်ခဲ့တာ ဖြစ်ပါတယ်။

အဲဒါကြောင့် ဘတ်ပီဟာ ယူရိုပြိုင်ပွဲမှာ အခုထိ သွင်းဂိုးမရရှိသေးတဲ့ မှတ်တမ်းဆိုးကြီးကို ပိုင်ဆိုင်ထားတာပါ။ 

ဒီပွဲစဉ်မှာ ပြင်သစ်အသင်းအတွက် အကောင်းဆုံး ခြေစွမ်းပြသနိုင်ခဲ့တဲ့ ကွင်းလယ်လူ ကန်တီဟာ အကောင်းဆုံး ကစားသမားဆုကိုလည်း ရရှိသွားခဲ့ပါတယ်။ 

ကန်တီဟာ ဆော်ဒီကလပ် အယ်လ်အစ်တီဟတ်အသင်းမှာ ခြေစွမ်းပြသနိုင်ခဲ့လို့ ယူရိုပြိုင်ပွဲဝင်မယ့် ပြင်သစ် လူစာရင်းမှာ ပြန်လည် ရွေးချယ်ခံခဲ့ရတာပါ။

ကန်တီက “ကျနော်တို့ဟာ ဒီပွဲစဉ်မှာ အရာအားလုံး ပြီးပြည့်စုံခြင်း မရှိခဲ့ပေမယ့် လိုချင်တဲ့ရလဒ်တော့ ရရှိခဲ့ပါ တယ်။ ဒါက ကောင်းမွန်တဲ့ စတင်မှုပါ။ ပြင်သစ်အသင်းအတွက် ပြန်လာရတာဟာ ကျနော့်ကို ပျော်ရွှင်စေပါတယ်။ အပြောင်းအလဲတွေဖြစ်ခဲ့ပြီး ဒီဂျာစီကို ပြန်ဝတ်ဆင်ရတာဟာ အလွန်ကောင်းမွန်တဲ့ ခံစားမှုပါပဲ”လို့ ပြောခဲ့ပါ တယ်။

ပြင်သစ်အသင်းဟာ အုပ်စုဒုတိယပွဲစဉ်အဖြစ် ဇွန် ၂၁ ရက်မှာ နယ်သာလန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၁၇

မက်ဆီရဲ့ သားအကြီးဆုံးဖြစ်တဲ့ သီယာဂိုမက်ဆီဟာ နိုင်ငံကိုယ်စားပြုအဖြစ် အာဂျင်တီးနားအသင်းနဲ့ စပိန်အသင်း ကြားမှာ အာဂျင်တီးနားအသင်းကို ရွေးချယ်မယ်လို့ ပြောသွားခဲ့ပါတယ်။

သီယာဂိုမက်ဆီက “အဖေ ကစားတာကို ကြည့်ရတာထက် ကျနော်ကိုယ်တိုင် ကစားတာက ကျနော့်ကို ပိုပြီး စိတ်လှုပ်ရှားစေပါတယ်။ ကျနော်ဟာ ဘယ်ခြေနဲ့ ကောင်းမွန်စွာ မလုပ်နိုင်ပါဘူး။ ကျနော်ဟာ အာဂျင်တီးနား အသင်းနဲ့ ကစားချင်ပါတယ်။ စပိန်က ကျနော့်ကို ဆွဲဆောင်နိုင်မယ့် နည်းလမ်းရှိတယ်လို့ မထင်ကြောင်း”Mundo Deportivo နဲ့ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

အသက် ၁၁ နှစ်အရွယ်ရှိ သီယာဂိုဟာ ဖခင်ဖြစ်သူ ဘာစီလိုနာအသင်းမှာ ကစားချိန် မွေးဖွားခဲ့တာ ဖြစ်ပါတယ်။ 

သီယာဂိုဟာ ကတ်တလန်ဇာတိ ဖြစ်တာကြောင့် စပိန်အသင်းကို ကိုယ်စားပြုခွင့် ရှိနေတာပါ။

ဒါပေမယ့် မက်ဆီနဲ့ ဇနီးသည် အန်တိုနယ်လာတို့ဟာ အာဂျင်တီးနားလူမျိုးတွေ ဖြစ်တာကြောင့် သီယာဂိုက သူ့မိဘတွေရဲ့ အာဂျင်တီးနားနိုင်ငံအတွက်ပဲ ကစားဖို့ ရွေးချယ်ခဲ့တာ ဖြစ်ပါတယ်။

သီယာဂိုမက်ဆီနဲ့ မိသားစုကိုတွေ့ရစဉ် 

သီယာဂိုဟာ ဖခင်ဖြစ်သူလို ဘာစီလိုနာအသင်းမှာ ကစားဖို့လည်း ဆန္ဒရှိနေတာပါ။

သီယာဂိုက သူဟာ လက်ရှိ ဘာစီလိုနာအသင်း ကြယ်ပွင့်ဖြစ်တဲ့ ယာမဲလ်နဲ့အတူ တွဲဖက်ပြီး ကစားချင်တယ်လို့ အင်တာဗျူးမှာ ပြောထားပါတယ်။ 

ယာမဲလ်ဟာ အသက် ၁၆ နှစ်အရွယ်နဲ့ ဘာစီလိုနာ၊ စပိန်အသင်းတွေမှာ ခြေစွမ်းပြသနေပြီး စံချိန်သစ်တွေ အများအပြားကို တင်ရှိထားတာပါ။ 

သီယာဂိုဟာ လက်ရှိအချိန်မှာ ဖခင်ဖြစ်သူ ကစားနေတဲ့ အင်တာမိုင်ယာမီအသင်းရဲ့ အကယ်ဒမီမှာ ကစားနေပြီး ခြေစွမ်းပြ သွင်းဂိုးတွေ သွင်းယူနေတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇွန်လ ၁၇

ယူနိုက်တက်အသင်းနည်းပြ အဲရစ်တန်ဟတ်က အသင်းနဲ့ စာချုပ်သစ်အတွက် သဘောတူညီမှု မရရှိသေးဘဲ စာချုပ်သစ်က လွယ်လွယ်နဲ့မပြီးဘူးလို့ ပြောခဲ့ပါတယ်။

အဲရစ်တန်ဟတ်က “ယူနိုက်တက်နဲ့ ကျနော်ဟာ စာချုပ်သစ်အတွက် သဘောတူညီချက်ကို ရှာဖွေနေပါတယ်။ ဒါက လွယ်လွယ်နဲ့ ပြီးမှာမဟုတ်ပါဘူး။ ကျနော်တို့ ဆက်ပြီးဆွေးနွေးမှုတွေ ပြုလုပ်ရမှာပါ။ ယူနိုက်တက်က သူတို့ဟာ တူချယ်လ်နဲ့ စကားပြောခဲ့တယ်ဆိုတာ ကျနော့်ကို ပြောခဲ့ပါတယ်။ ဒါပေမယ့် နောက်ဆုံးမှာတော့ သူတို့မှာ အကောင်းဆုံးနည်းပြ ရှိပြီးသားဖြစ်တဲ့အတွက် ဒါက အဆုံးသတ်သွားခဲ့ပါတယ်”လို့ ဒတ်ချ်ရုပ်သံလိုင်း NOS ကို ပြောခဲ့တာပါ။

အဲရစ်တန်ဟတ်ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ ယူနိုက်တက်အသင်းရဲ့ ရလဒ်ဆိုးတွေကြောင့် ထုတ်ပယ်ခံရမယ်လို့ သတင်းတွေ ထွက်ခဲ့တာပါ။ 

ဒါပေမယ့် အဲရစ်တန်ဟတ်ဟာ ယူနိုက်တက်အသင်းကို FA ဖလား ရယူပေးနိုင်ခဲ့တာကြောင့် လာမယ့်ရာသီ အသင်းနည်းပြအဖြစ် ဆက်ရှိမယ်လို့ INEOS က သူ့ကို ပြီးခဲ့တဲ့အပတ်က အကြောင်းကြားခဲ့တာ ဖြစ်ပါတယ်။ 

အဲရစ်တန်ဟတ်ရဲ့ စာချုပ်ဟာ နောက်ဆုံးနှစ်ထဲကို ရောက်ရှိလာပြီဖြစ်လို့ ယူနိုက်တက်အသင်းဟာ သူ့ကို စာချုပ်သက်တမ်းတိုးဖို့ လုပ်ဆောင်နေတာပါ။

အဲရစ်တန်ဟတ်ကတော့ စာချုပ်သစ်အတွက် ယူနိုက်တက်အသင်းနဲ့ နောက်ထပ် ဆွေးနွေးမှုတွေ ပြုလုပ်ဖို့ လိုအပ်တယ်လို့ ပြောပါတယ်။

အဲရစ်တန်ဟတ်ကို တွေ့ရစဉ်

၂၀၂၂ ခုနှစ်က ယူနိုက်တက်အသင်းကို စတင်ကိုင်တွယ်ခဲ့တဲ့ အဲရစ်တန်ဟတ်ဟာ သူ့ရဲ့အနာဂတ်ကို ဖြေရှင်းဖို့ အားလပ်ရက် အပန်းဖြေ အနားယူနေတဲ့ အိုင်ဘစ်ဇာမှာ အသင်းတာဝန်ရှိသူတွေနဲ့ တွေ့ဆုံမှုပြုလုပ်ခဲ့တာပါ။ 

အဲရစ်တန်ဟတ်ဟာ ယူနိုက်တက်အသင်းကို ကိုင်တွယ်ခဲ့တဲ့ ၂ ရာသီမှာ ကာရာဘောင်းဖလားနဲ့ FA ဖလားကို ရယူနိုင်ခဲ့ပါတယ်။

ဒတ်ချ်လူမျိုးနည်းပြဟာ ဇူလိုင်အစပိုင်းမှာ ပြန်လည်စတင်မယ့် ယူနိုက်တက်အသင်းရဲ့ လေ့ကျင့်ခန်း အစီအစဉ်ကို ပူးပေါင်းဖို့ မကြာခင် ရက်ပိုင်းအတွင်း ကာရင်တန်ကို ရောက်လာဖို့ ရှိနေတာပါ။ 

ယူနိုက်တက်အသင်းဟာ ရာသီသစ်မတိုင်ခင် ပထမဆုံး ခြေစမ်းပွဲအဖြစ် ဇူလိုင် ၁၅ ရက်မှာ ရိုဆင်ဘော့အသင်းနဲ့ ယှဉ်ပြိုင်မှာဖြစ်ပါတယ်။

Source: ESPN