CNI Sport News
၂၀၂၅ ခုနှစ်၊ ဒီဇင်ဘာ ၃
ဘာစီလိုနာအသင်းဟာ အက်သလက်တီကိုအသင်းကို ၃ ဂိုး-၁ ဂိုးနဲ့အနိုင်ရပြီး လာလီဂါ အမှတ်ပေးဇယားကို ၄ မှတ်ဖြတ်ကာ ဦးဆောင်နိုင်ခဲ့ပြီးနောက် တောင်ပံကစားသမား ရာဖင်ညာက ဒီနိုင်ပွဲဟာ ချန်ပီယံဆုကို အဆုံး အဖြတ်ပေးနိုင်တဲ့ နိုင်ပွဲမျိုးလို့ ပြောခဲ့ပါတယ်။
ရာဖင်ညာက “ကျနော်တို့ဟာ တစ်ပွဲပြီးတစ်ပွဲ ယုံကြည်မှုတွေ တိုးလာတယ်လို့ ကျနော်ထင်ပါတယ်။ ဒီပွဲက လာလီဂါမှာ ကြီးမားတဲ့ ပွဲတစ်ပွဲဖြစ်တယ်ဆိုတာ ကျနော်တို့ သိပါတယ်။ ဒီနိုင်ပွဲဟာ ချန်ပီယံလမ်းကြောင်းကို အဆုံးအဖြတ်ပေးနိုင်တဲ့ နိုင်ပွဲမျိုးပါ။ တစ်ပွဲပြီးတစ်ပွဲ ရမှတ်တွေကို ကျနော်တို့ စုဆောင်းနိုင်မယ်ဆိုရင် အရာ အားလုံးက ပိုပြီးကောင်းလာမှာပါ”လို့ ပွဲအပြီးအင်တာဗျူးမှာ ပြောခဲ့တာပါ။
ဒီပွဲမှာ အဲလက်စ်ဘေနာက အက်သလက်တီကိုအသင်းအတွက် ဦးဆောင်ဂိုး သွင်းယူနိုင်ခဲ့ပေမယ့် ဒဏ်ရာကြောင့် ၂ လကြာ အနားယူရပြီးနောက် ဘာစီလိုနာအသင်းအတွက် ပြန်ပါဝင်ကစားနိုင်ပြီဖြစ်တဲ့ ရာဖင်ညာက ချေပဂိုး သွင်းယူနိုင်ခဲ့ပါတယ်။
ဘာစီလိုနာအသင်းအတွက် အနိုင်ဂိုးတွေကို အော်လ်မိုနဲ့ ဖာရန်တောရက်စ်တို့က သွင်းယူခဲ့တာဖြစ်ပါတယ်။
ရာဖင်ညာကို တွေ့ရစဉ်
ဘာစီလိုနာအသင်းဟာ ဒီနိုင်ပွဲကြောင့် နောက်ဆုံးကစားခဲ့တဲ့ လာလီဂါ ၅ ပွဲဆက်တိုက် အနိုင်ရပြီး အမှတ်ပေး ဇယားကို ဦးဆောင်ခွင့် ရရှိထားတာပါ။
အက်သလက်တီကိုအသင်း နည်းပြဆီမြွန်နီက ဘာစီလိုနာအသင်း နည်းပြ ဟန်ဆီဖလစ်ရဲ့ လောက်အောက်မှာ အလွန်ကောင်းမွန်တဲ့ စွမ်းဆောင်ရည်တွေ ပြသထားတဲ့ ရာဖင်ညာ Ballon d'Or မရတာကို သူမယုံနိုင်လောက် အောင် ဖြစ်မိတယ်လို့ ပြောခဲ့ပါတယ်။
ဘာစီလိုနာအသင်းနည်းပြ ဟန်ဆီဖလစ်ကလည်း ရာဖင်ညာဟာ အသင်းအတွက် အလွန်အရေးပါတဲ့ ကစားသမား ဖြစ်ပြီး သူပါဝင်လာချိန်မှာ လူတိုင်းအပေါ် သက်ရောက်မှုရှိတာကို ကွင်းထဲမှာ မြင်တွေ့နိုင်တယ်လို့ ပြောခဲ့တာပါ။
ဒါ့အပြင် ဟန်ဆီဖလစ်က ဒီပွဲဟာ အသင်းတစ်သင်းအနေနဲ့ ဒီရာသီရဲ့ အကောင်းဆုံး ပွဲစဉ်တွေထဲက တစ်ပွဲဖြစ်ပြီး သူတို့ရဲ့ အကောင်းဆုံးအဆင့်ကို ပြန်ရနေပြီလို့ ပြောခဲ့ပါတယ်။
အက်သလက်တီကိုအသင်းဟာ ဒီရှုံးပွဲကြောင့် ဘာစီလိုနာအသင်းနဲ့ ၆ မှတ်ကွာဟသွားခဲ့ပါတယ်။
Source: ESPN
