CNI Sport News
၂၀၂၅ ခုနှစ်၊ ဒီဇင်ဘာ ၂
ရှက်ဖီးဝင်းစ်ဒေးအသင်းဟာ ငွေပေးချေမှုနဲ့သက်ဆိုင်တဲ့ အင်္ဂလိပ်ဘောလုံးလိဂ်ရဲ့စည်းမျဉ်းတွေကို ချိုးဖောက်မှုကြောင့် ရမှတ် ၆ မှတ်လျှော့ခံခဲ့ရကြောင်း EFL က ကြေညာချက်ထုတ်ပြန်ခဲ့ပါတယ်။
ဘဏ္ဍာရေးပြဿနာတွေကြောင့် အသင်းကို စီမံခန့်ခွဲမှုအဖွဲ့လက်ထဲထည့်ခဲ့ရတဲ့ ချန်ပီယံရှစ်ကလပ် ရှက်ဖီးဝင်းစ်ဒေးအသင်းဟာ အောက်တိုဘာလမှာ ရမှတ် ၁၂ မှတ်လျှော့ခြင်းခံထားရပါတယ်။
ရှက်ဖီးဝင်းစ်ဒေး အသင်းဟာ အခုအချိန်မှာ နောက်ထပ် ၆ မှတ်လျှော့ခံခဲ့ရတဲ့အတွက် - ၁၀ မှတ်နဲ့ အမှတ်ပေးဇယား အောက်ဆုံးနေရာ ရပ်တည်နေပြီး အဆင့် ၂၃ နေရာက နော်ဝစ်ချ်အသင်းနဲ့ ၂၃ မှတ် ကွာဟနေတာပါ။
ကစားသမားများကိုတွေ့ရစဉ်
ရှက်ဖီးဝင်းစ်ဒေးအသင်းဟာ ရမှတ်လျှော့ပြစ်ဒဏ်တွေကြောင့် ဒီရာသီချန်ပီယံရှစ်ပွဲစဉ် ၁၈ ပွဲသာ ကစားရသေးပေမယ့် ရာသီမကုန်မီမှာ တန်းဆင်းရဖို့ ရှိနေပါတယ်။
ရှက်ဖီးဝင်းစ်ဒေးအသင်းရဲ့ ပိုင်ရှင်ဟောင်း ချန်စီရီကိုလည်း လာမယ့် ၃ နှစ်အတွင်း EFL ကလပ်အသင်းတွေရဲ့ ပိုင်ရှင် ဒါမှမဟုတ် ဒါရိုက်တာအဖြစ်လုပ်ခွင့် ပိတ်ပင်ထားပါတယ်။
ရှက်ဖီးဝင်းစ်ဒေးအသင်းဟာ ကစားသမားတွေရဲ့ လုပ်ခလစာကို အချိန်မီပေးချေဖို့ ပျက်ကွက်ခဲ့ပြီးနောက် စည်းမျဉ်းချိုးဖောက်မှုအများအပြားနဲ့ EFL က ဇွန်လမှာ စွဲချက်တင်ခဲ့ပါတယ်။
အင်္ဂလန်ရဲ့ ရှေးအကျဆုံးကလပ်အသင်းတွေထဲက တစ်သင်းဖြစ်ပြီး ၁၅၈ နှစ် သက်တမ်းရှိပြီဖြစ်တဲ့ ရှက်ဖီးဝင်းစ်ဒေးအသင်းဟာ ကလပ်ကို ရောင်းချဖို့ လုပ်ဆောင်နေပါတယ်။
ရှက်ဖီးဝင်းစ်ဒေးအသင်းကို ဝယ်ယူဖို့ နယူးကာဆယ်အသင်းပိုင်ရှင်ဟောင်း မိုက်အက်ရှ်လေက စိတ်ဝင်စားနေတယ်လို့ သိရပါတယ်။
