CNI Sport News
၂၀၂၃ ခုနှစ်၊ ဧပြီ
စီးရီးအေကလပ် ဂျူဗင်တပ်စ်အသင်းဟာ အပြောင်းအရွှေ့ ကိစ္စရပ်တွေကြောင့် ရမှတ်လျှော့ခံထားရတဲ့ ပြစ်ဒဏ်ကို အယူခံဝင်ပြီးနောက် ရမှတ်လျှော့ခံရတာကို ယာယီပြန်လည် ရုပ်သိမ်းခဲ့လို့ ရမှတ် ၁၅ မှတ် ပြန်လည် ရရှိသွားခဲ့ပါတယ်။
ဂျူဗင်တပ်စ်အသင်းဟာ ၂၀၁၉ ကနေ ၂၀၂၁ အထိ ၂ နှစ်တာ ကာလအတွင်း အပြောင်းအရွှေ့ ကိစ္စရပ်တွေကို စုံစမ်းခံရပြီးနောက် အီတလီဘောလုံးအဖွဲ့ချုပ်က ရမှတ်လျှော့ ပြစ်ဒဏ် ချမှတ်ခဲ့တာပါ။
ဂျူဗင်တပ်စ်အသင်းဟာ ရမှတ်လျှော့ခံထားရတဲ့ ၁၅ မှတ်ကို ပြန်လည် ရရှိခဲ့ပေမယ့် ကြားနာမှုအသစ် ပြုလုပ်တဲ့ အချိန် နောက်ပိုင်းတွေမှာ အပြစ်ပေးခံရနိုင်တဲ့ အခြေအနေမှာ ဆက်လက်ရှိနေတာ ဖြစ်ပါတယ်။
ဒါပေမယ့် စီးရီးအေ ထိပ်သီးအသင်းဟာ အခုအချိန်မှာ ရမှတ် ၁၅ မှတ် ပြန်လည်ရခဲ့လို့ အဆင့် ၇ နေရာကနေ ရိုးမား၊ အေစီမီလန်နဲ့ အင်တာမီလန်တို့ရဲ့ အထက် အဆင့် ၃ နေရာကို တက်လှမ်းသွားနိုင်ခဲ့တာပါ။
ဂျူဗင်တပ်စ်အသင်းကို ပြစ်ဒဏ် ချမှတ်ချိန်မှာ ပါဝင်ခဲ့တဲ့ ဒါရိုက်တာဟောင်း ပါရာတီချီကတော့ လပေါင်း ၃၀ ကြာ ပိတ်ပင်တဲ့ ပြစ်ဒဏ်အပေါ် အယူခံဝင်မှု အရေးနိမ့်ခဲ့ပါတယ်။
စီးရီးအေ အမှတ်ပေးဇယားကိုတွေ့ရစဉ်
ပါရာတီချီလိုပဲ ဂျူဗင်တပ်စ်အသင်း ဥက္ကဋ္ဌဟောင်း အက်ဂ်နယ်လီ၊ အမှုဆောင်ချုပ်ဟောင်း အာရီဗာဘီနီနဲ့ အားကစားဒါရိုက်တာ ချီရူဘီနီတို့ရဲ့ အယူခံတွေကလည်း ပယ်ချခံခဲ့ရတာပါ။
ကစားသမားဟောင်းနဲ့ ဒါရိုက်တာ နတ်ဗတ်၊ ဂါရင်မ်ဘာတီနဲ့ ဗယ်လာနိုတို့ရဲ့ အယူခံကတော့ အောင်မြင်ခဲ့တာ ဖြစ်ပါတယ်။ ဂျူဗင်တပ်စ်ရဲ့ အမှုကိစ္စရပ်တွေဟာ ကနဦး ပြစ်ဒဏ်ချခဲ့တဲ့ အီတလီဘောလုံးအဖွဲ့ချုပ် အယူခံ တရားရုံးကို ပြန်လည် ရောက်ရှိသွားမှာ ဖြစ်ပြီး ဂျူဗင်တပ်စ်အကြီးအကဲ ကယ်လ်ဗိုက ပြန်လည် ရရှိခဲ့တဲ့ ဒီ ရမှတ်တွေဟာ သူတို့နဲ့အတူ အဆုံးထိရှိဖို့ မျှော်လင့်တယ်လို့ ပြောခဲ့ပါတယ်။
ဂျူဗင်တပ်စ်အသင်းဟာ ရမှတ် လျှော့ခံထားရတဲ့ ရမှတ် ၁၅ မှတ် ပြန်လည်ရရှိတာနဲ့အတူ ယူရိုပါလိဂ် ပြိုင်ပွဲ မှာလည်း ဆီမီးဖိုင်နယ် အဆင့်အထိ တက်လှမ်းနိုင်ခဲ့တာပါ။
ယူရိုပါလိဂ် ကွာတားဖိုင်နယ် ဒုတိယအကျော့ပွဲစဉ်မှာ ဂျူဗင်တပ်စ်အသင်းဟာ စပို့တင်းလစ္စဘွန်းအသင်းနဲ့ ၁ ဂိုးစီ သရေကျခဲ့ပြီး ပထမအကျော့က ၁ ဂိုး- ဂိုးမရှိနဲ့ အနိုင်ရခဲ့လို့ နှစ်ကျော့ပေါင်း ရလဒ် ၂ ဂိုး- ၁ ဂိုးနဲ့ အနိုင်ရကာ ဆီမီး ဖိုင်နယ် တက်နိုင်ခဲ့တာ ဖြစ်ပါတယ်။
ဂျူဗင်တပ်စ်အသင်းဟာ ဒီတစ်ပတ် စီးရီးအေ ပွဲစဉ်အဖြစ် ထိပ်ဆုံးနေရာက နာပိုလီအသင်းကို အိမ်ကွင်းမှာ လက်ခံ ယှဉ်ပြိုင်ရမှာ ဖြစ်ပါတယ်။
Source: Goal
