CNI Sport News

၂၀၂၅ ခုနှစ်၊ ဒီဇင်ဘာ ၃

စပိန်ဘယ်နောက်ခံလူ ကူကူရယ်လ်လာက သူဟာ ချယ်လ်ဆီးအသင်းထံ မပြောင်းရွှေ့မီ မန်စီးတီးအသင်းထံ ပြောင်းရွှေ့ချင်ခဲ့တယ်လို့ El Desmarque နဲ့ အင်တာဗျူးမှာ ဖွင့်ဟခဲ့ပါတယ်။ 

ကူကူရယ်လ်လာက “မန်စီးတီးအသင်းက အလွန်ကောင်းပြီး ကမ္ဘာ့အကောင်းဆုံး အသင်းတွေထဲက တစ်သင်းပါ။ ကျနော် လုံးဝသွားချင်ခဲ့ပါတယ်။ မန်စီးတီးအသင်းရော၊ နည်းပြဂွာဒီယိုလာပါ ကျနော့်ကို လိုချင်ခဲ့ပေမယ့် ကလပ် အသင်းတွေ ပြောင်းရွှေ့ကြေး သဘောတူညီမှု မရခဲ့ပါဘူး။ ဘရိုက်တန်ရဲ့တောင်းဆိုမှုတွေကြောင့် ဒီအပြောင်း အရွှေ့ မဖြစ်ခဲ့ဘူး”လို့ ပြောခဲ့တာပါ။ 

ကူကူရယ်လ်လာဟာ ဘရိုက်တန်အသင်းမှာ အထင်ကြီးဖွယ်ကောင်းတဲ့ ရာသီတစ်ခုကို ဖြတ်သန်းခဲ့တာကြောင့် ပရီးမီးယားလိဂ် ကလပ်အသင်းအချို့ရဲ့ ပစ်မှတ်ဖြစ်ခဲ့ပြီး ချယ်လ်ဆီးအသင်းက သူ့ကို ပေါင်သန်း ၆၀ နဲ့ ခေါ်ယူခဲ့ တာဖြစ်ပါတယ်။ 

ကူကူရယ်လ်လာအတွက် အသုံးပြုခဲ့တဲ့ ပေါင်သန်း ၆၀ ဟာ များလွန်းတယ်ဆိုပြီး ချယ်လ်ဆီးအသင်းရဲ့ အပြောင်းအရွှေ့ လှုပ်ရှားမှုတွေကို ဝေဖန်မှုတွေ ရှိခဲ့ပေမယ့် သူကတော့ သံသယရှိတဲ့သူတွေ မှားယွင်းကြောင်း သက်သေပြသနိုင်ခဲ့ပါတယ်။ 

 ကူကူရယ်လ်လာကို တွေ့ရစဉ်

ဘာစီလိုနာအကယ်ဒမီထွက် ကူကူရယ်လ်လာဟာ ချယ်လ်ဆီးအသင်းနဲ့အတူ ကွန်းဖရန့်လိဂ်၊ ဖီဖာကလပ် ကမ္ဘာ့ဖလား ချန်ပီယံဆုတို့ကို ရယူနိုင်ခဲ့ပြီး ကမ္ဘာ့အကောင်းဆုံး ဘယ်နောက်ခံလူတွေထဲက တစ်ဦးအဖြစ် ဖော်ပြခြင်းခံနေရတာပါ။

ဒါပေမယ့် ကူကူရယ်လ်လာဟာ ချယ်လ်ဆီးအသင်းထံ မပြောင်းရွှေ့မီမှာ နည်းပြဂွာဒီယိုလာ ကိုင်တွယ်နေတဲ့ မန်စီးတီးအသင်းထံ ပြောင်းရွှေ့ချင်ခဲ့တာဖြစ်ပါတယ်။

မန်စီးတီးအသင်းရဲ့ စိတ်ဝင်စားမှုကြောင့် ကူကူရယ်လ်လာဟာ ဘရိုက်တန်အသင်းကို ထွက်ခွာခွင့် တောင်းဆိုခဲ့ ပါတယ်။ 

ဒါပေမယ့် ကူကူရယ်လ်လာအတွက် မန်စီးတီးအသင်းရဲ့ ပေါင်သန်း ၃၀ နဲ့ ကမ်းလှမ်းမှုကို ဘရိုက်တန်အသင်းက လက်မခံတာကြောင့် အပြောင်းအရွှေ့ ပျက်ပြယ်ခဲ့တာပါ။

မန်စီးတီးအသင်းဟာ ကူကူရယ်လ်လာကို မခေါ်ယူနိုင်ခဲ့တဲ့အတွက် သူ့အစား ဆာဂျီယိုဂိုမက်ဇ်ကို ခေါ်ယူခဲ့ပေမယ့် စပိန်ကစားသမားဟာ ပရီးမီးယားလိဂ်မှာ ခြေစွမ်းပြသနိုင်ခဲ့ခြင်း မရှိတာဖြစ်ပါတယ်။ 

Source: Metro