အားကစား

: By CNI; Category: အားကစား; Hits: 965

CNI Sport News

၂၀၂၄ ခုနှစ်၊ နိုဝင်ဘာ ၂၈

လက်စတာအသင်းဟာ ယူနိုက်တက်အသင်းကို ယာယီနည်းပြအဖြစ်ကိုင်တွယ်ခဲ့တဲ့ နစ္စတယ်ရွိုင်းကို နည်းပြ သစ်အဖြစ်ခန့်အပ်မယ်လို့ ဘီဘီစီအပါအဝင် ဗြိတိန်မီဒီယာအများအပြားက ဖော်ပြထားပါတယ်။

အသက် ၄၈ နှစ်အရွယ်ရှိ နစ္စတယ်ရွိုင်းဟာ ချယ်လ်ဆီးအသင်းကို ၂ ဂိုး-၁ ဂိုးနဲ့ အရေးနိမ့်ပြီးနောက် လက်စတာ အသင်းနည်းပြရာထူးကနေ ထုတ်ပယ်ခံခဲ့ရတဲ့ စတိဗ်ကူးပါးရဲ့နေရာမှာ နည်းပြသစ်အဖြစ် အစားထိုး ဝင်ရောက် ကိုင်တွယ်မှာပါ။

နစ္စတယ်ရွိုင်းဟာ ယူနိုက်တက်အသင်းကနေ ထွက်ခွာခဲ့တဲ့ ၂ ပတ်အကြာမှာ ပရီးမီးယားလိဂ်ကို ပြန်လာပြီး နည်းပြချုပ်ရာထူးကို ရယူနိုင်တော့မှာဖြစ်ပါတယ်။

ယူနိုက်တက်အသင်းကို ပြီးခဲ့တဲ့နွေရာသီက လက်ထောက်နည်းပြအဖြစ်နဲ့ ရောက်လာခဲ့တဲ့ နစ္စတယ်ရွိုင်းဟာ ဒတ်ချ်လူမျိုးနည်းပြ အဲရစ်တန်ဟတ်ထုတ်ပယ်ခံရအပြီးမှာ အသင်းကို ယာယီနည်းပြအဖြစ် ၄ ပွဲကိုင်တွယ် ခဲ့တာပါ။

နစ္စတယ်ရွိုင်းဟာ ယာယီနည်းပြအဖြစ်ယူနိုက်တက်အသင်းကို ၃ ပွဲနိုင်၊ ၁ ပွဲသရေရရှိအောင် ကိုင်တွယ် ပေးနိုင်ခဲ့ပြီးနောက် နည်းပြသစ် အာမိုရင်ရောက်ရှိလာချိန်မှာ အသင်းကနေ ထွက်ခွာခဲ့တာဖြစ်ပါတယ်။

နစ္စတယ်ရွိုင်းဟာ ယူနိုက်တက်အသင်းကို အနိုင်ရလဒ်ရရှိအောင် ကိုင်တွယ်ပေးနိုင်ခဲ့တဲ့ ၃ ပွဲထဲမှာ ၂ ပွဲက လက်စတာအသင်းကို အနိုင်ရရှိခဲ့တာပါ။

နစ္စတယ်ရွိုင်းဟာ ယူနိုက်တက်အသင်းကို လက်ထောက်နည်းပြအဖြစ်နဲ့ မလာရောက်ခင်မှာ PSV အသင်းကို ကိုင်တွယ်ခဲ့ပြီး ဆုဖလားအောင်မြင်မှုတွေ ရယူပေးနိုင်ခဲ့ပါတယ်။

လက်စတာအသင်းဟာ ဒီရာသီ ပရီးမီးယား လိဂ်ပွဲစဉ် ၁၂ ပွဲကစားအပြီးမှာ အဆင့် ၁၆ နေရာရပ်တည်နေကာ တန်းဆင်းဇုန်နဲ့ ၁ မှတ်သာကွာဟနေတာပါ။ အဲဒါကြောင့် နစ္စတယ်ရွိုင်းဟာ လက်စတာအသင်းကို တန်းဆင်းဇုန်နဲ့ ဝေးကွာအောင် ကိုင်တွယ်ပေးရတော့ မှာဖြစ်ပါတယ်။

လက်စတာအသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် ဘရန်ဖိုဒ့်အသင်းနဲ့ ယှဉ်ပြိုင်ရမှာဖြစ်ပြီး နစ္စတယ်ရွိုင်းဟာ ဒီပွဲကို ကိုင်တွယ်နိုင်ဖွယ်မရှိသေးပါဘူး။

နစ္စတယ်ရွိုင်းဟာ ဝက်စ်ဟမ်းအသင်းနဲ့ပွဲစဉ်မှသာ လက်စတာအသင်းကို နည်းပြသစ်အဖြစ် စတင်ကိုင်တွယ်သွားဖို့ရှိနေတာဖြစ်ပါတယ်။

Source:BBC

Share

powered by social2s

: By CNI; Category: အားကစား; Hits: 990

CNI Sport News

၂၀၂၄ ခုနှစ်၊ နိုဝင်ဘာ ၂၈

လီဗာပူးလ်အသင်းဟာ ချန်ပီယံလိဂ်ပွဲစဉ်မှာ ရီးရယ်လ်အသင်းကို ၂ ဂိုး-ဂိုးမရှိနဲ့ အနိုင်ရခဲ့ပြီးနောက် နည်းပြ အာနီဆလော့က အသင်းရဲ့ နှစ်ပေါင်းများစွာကြာ မက်ဒရစ်နာကျင်မှုကို အဆုံးသတ်နိုင်ခဲ့လို့ ဝမ်းမြောက်ကြောင်း ပြောခဲ့ပါတယ်။

အာနီဆလော့က “ချန်ပီယံလိဂ်ကို အကြိမ်ပေါင်းများစွာ ရယူထားတဲ့ အသင်းနဲ့ ကစားရတာဟာ ဘယ်လောက် ထူးခြားလဲဆိုတာ ခင်ဗျားတို့ သိပါတယ်။ လီဗာပူးလ်အတွက်လည်း နှစ်ပေါင်းများစွာကြာ နာကျင်ခဲ့ရတာပါ။ ဒါက ကြီးမားတဲ့ ရက်သတ္တပတ်ဖြစ်ပြီး မြင်ရတာ အလွန်ကောင်းပါတယ်။ ဒီလိုပွဲကြီးပွဲကောင်းတွေကို အနိုင်ရတာက အမြဲတမ်းကောင်းတယ်လို့ ကျနော်ထင်ပါတယ်။ ၁၆ သင်းအဆင့်မှာ ရီးရယ်လ်နဲ့ ထပ်တွေ့ပြီး အနိုင်ယူနိုင်ခဲ့ရင် ပိုကြီးမားတဲ့ ကြေညာချက် ဖြစ်လာပါလိမ့်မယ်”လို့ ပြောခဲ့တာပါ။

ဒီပွဲမှာ လီဗာပူးလ်အသင်းအတွက် ဂိုးတွေကို မက်အလစ္စတာနဲ့ ဂတ်ပိုတို့က သွင်းယူခဲ့ကြပြီး ဘတ်ပီနဲ့ ဆာလက်တို့ ပင်နယ်တီလွဲချော်ခဲ့ကြပါတယ်။

လီဗာပူးလ်အသင်းဟာ ရီးရယ်လ်အသင်းကို ၂၀၁၈ နဲ့ ၂၀၂၂ ချန်ပီယံလိဂ် ဗိုလ်လုပွဲတွေ အပါအဝင် နောက်ဆုံး တွေ့ဆုံခဲ့တဲ့ ၆ ကြိမ်စလုံး အနိုင်ရယူနိုင်ခဲ့ခြင်း မရှိပါဘူး။

လီဗာပူးလ်နဲ့ရီးရယ်လ် ယှဉ်ပြိုင်နေစဉ်

ဒီနိုင်ပွဲဟာ လီဗာပူးလ်အသင်းအတွက် ရီးရယ်လ်အသင်းကို ၂၀၀၉ ခုနှစ်နောက်ပိုင်း ၁၅ နှစ်အကြာမှ ပထမဆုံး နိုင်ပွဲပြန်လည်ရယူနိုင်ခဲ့တာပါ။

လီဗာပူးလ်အသင်းဟာ ဒီနိုင်ပွဲကြောင့် ဒီရာသီချန်ပီယံလိဂ်ပွဲစဉ် ၅ ပွဲစလုံးကို ရာနှုန်းပြည့် နိုင်ပွဲရယူထားတဲ့ တစ်သင်းတည်းသော အသင်းအဖြစ် ရပ်တည်နေပါတယ်။

လီဗာပူးလ်အသင်းဟာ ဒီနိုင်ပွဲတွေကြောင့် ချန်ပီယံလိဂ် ၁၆ သင်းအဆင့်ကို တိုက်ရိုက်တက်ရောက်နိုင်ဖို့ နီးစပ် သွားခဲ့ပြီဖြစ်တာပါ။

ရီးရယ်လ်အသင်းကတော့ ပွဲစဉ် ၅ ပွဲ ကစားအပြီးမှာ ၃ ပွဲအထိ ရှုံးပွဲကြုံတွေ့ထားကာ အဆင့် ၂၄ နေရာမှာ ရပ်တည်နေတာ ဖြစ်ပါတယ်။

အဲဒါကြောင့် ရီးရယ်လ်အသင်း အနေနဲ့ နောက်တဆင့် တက်ရောက်နိုင်ဖို့အတွက် လက်ကျန် ၃ ပွဲစလုံး ရလဒ် ကောင်း ရယူနိုင်ဖို့ လိုအပ်နေပါတယ်။

ရီးရယ်လ်အသင်းနည်းပြ အန်ဆယ်လော့တီက သူတို့နောက်တဆင့်ကို တက်ရောက် နိုင်မယ်ဆိုတာ ယုံကြည်တယ်လို့ ပွဲအပြီးမှာ ပြောခဲ့ပါတယ်။

ရီးရယ်လ်အသင်းဟာ ဒီတစ်ပတ် လာလီဂါပွဲစဉ်အဖြစ် ဂီတာဖေးအသင်းနဲ့ ယှဉ်ပြိုင်ရမှာဖြစ်ပြီး လီဗာပူးလ် အသင်းက ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Share

powered by social2s

: By CNI; Category: အားကစား; Hits: 900

CNI Sport News

၂၀၂၄ ခုနှစ်၊ နိုဝင်ဘာ ၂၇

အာဆင်နယ်အသင်းဟာ လူငယ်ကြယ်ပွင့် နွမ်နရီကို အသင်းမှာ ကာလရှည်ကြာရှိမယ့် စာချုပ်သစ်ချုပ်ဆိုဖို့ ပြင်ဆင်နေတယ်လို့ နာမည်ကြီးဂျာနယ်လစ် ဖာဘရီဇီယိုရိုမန်နိုက ဖော်ပြထားပါတယ်။

အသက် ၁၇ နှစ်အရွယ်ရှိ နွမ်နရီဟာ အာဆင်နယ်အသင်း လူငယ်စီမံကိန်းကနေ ထွက်ပေါ်လာတဲ့သူဖြစ်ပြီး အသင်းရဲ့ အနာဂတ် အစီအစဉ်မှာ အရေးပါတဲ့သူအဖြစ် သတ်မှတ်ခြင်းခံထားရတာပါ။

အာဆင်နယ်အသင်းဟာ နွမ်နရီကို ဥရောပပြိုင်ဘက် အသင်းတွေရဲ့ စိတ်ဝင်စားမှု ခံရခြင်းကနေ ရှောင်ရှား ဖို့အတွက် ကာလရှည် စာချုပ်ချုပ်ဆိုဖို့ ပြင်ဆင်နေတာ ဖြစ်ပါတယ်။

နွမ်နရီဟာ ဒီရာသီမှာ ပြသနေတဲ့ သူ့ရဲ့ခြေစွမ်းတွေကြောင့် ဥရောပကလပ်အသင်းအချို့ရဲ့ စိတ်ဝင်စားခြင်းကို ခံနေရတာပါ။

နွမ်နရီဟာ ဒီရာသီမှာ အာဆင်နယ်အသင်းအတွက် ၁၀ ပွဲ ပါဝင်ကစားထားပြီး ၄ ဂိုး သွင်းယူထားပါတယ်။

နွမ်နရီကို တွေ့ရစဉ်

အသက် ၁၇ နှစ်အရွယ်ရှိ ကစားသမားဟာ ပြီးခဲ့တဲ့ အာဆင်နယ်အသင်းက နော်တင်ဟမ်ဖောရက်စ် အသင်းကို ၃ ဂိုး-ဂိုး မရှိနဲ့ အနိုင်ရခဲ့တဲ့ပွဲမှာ ပထမဆုံး ပရီးမီယားလိဂ် သွင်းဂိုးကို သွင်းယူနိုင်ခဲ့တာပါ။

အာဆင်နယ်အသင်းဟာ နွမ်နရီကို စာချုပ်သစ်အတွက် မကြာခင်မှာ သဘောတူညီမှု ရယူနိုင်ဖို့ မျှော်လင့်နေပြီး ကစားသမားကလည်း အသင်းမှာ ပျော်ရွှင်နေတာကြောင့် စာချုပ်သစ် အမြန်ဆုံးချုပ်ဆိုနိုင်ဖို့ ရှိနေပါတယ်။

နွမ်နရီဟာ အာဆင်နယ်အသင်းက စပို့တင်းလစ္စဘွန်းအသင်းကို ၅ ဂိုး-၁ ဂိုးနဲ့ အနိုင်ရခဲ့တဲ့ ချန်ပီယံလိဂ်ပွဲစဉ်မှာ လူစားဝင်အဖြစ် ပါဝင်ကစားသွားခဲ့တာပါ။

နွမ်နရီဟာ အင်္ဂလန်သက်တမ်းလိုက် အသင်းတွေမှာလည်း ခြေစွမ်းပြသနေပြီး လက်ရှိအချိန်မှာ အင်္ဂလန် ယူ-၁၉ အသင်းအတွက် ပါဝင်ကစားထားတဲ့ ၇ ပွဲမှာ ၆ ဂိုး သွင်းယူထားပါတယ်။

အာဆင်နယ်အသင်းနည်းပြ အာတီတာဟာ နွမ်နရီကို ပရီးမီးယားလိဂ်နဲ့ ချန်ပီယံလိဂ်ပြိုင်ပွဲတွေမှာ ပွဲကစားချိန် မိနစ်ပိုပြီးပေးနိုင်ဖို့ မျှော်လင့်ထားတာပါ။

အာဆင်နယ်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာဖြစ်ပြီး နွမ်နရီဟာ လူစားဝင်အဖြစ်သာ ပါဝင်ရဖို့ရှိနေတာဖြစ်ပါတယ်။

Share

powered by social2s

: By CNI; Category: အားကစား; Hits: 887

CNI Sport News

၂၀၂၄ ခုနှစ်၊ နိုဝင်ဘာ ၂၇

အာဂျင်တီးနား၊ လီဗာပူးလ်နဲ့ ဘာစီလိုနာအသင်း ကွင်းလယ်လူဟောင်း မာရှေယာနိုဟာ မေဂျာလိဂ်ကလပ် အင်တာမိုင်ယာမီအသင်းရဲ့ နည်းပြသစ်အဖြစ် ခန့်အပ်ခြင်း ခံခဲ့ရပါတယ်။

အင်တာမိုင်ယာမီအသင်းဟာ မာရှေယာနိုကို ၂၀၂၇ ခုနှစ် မေဂျာလိဂ်ရာသီ အကုန်ထိရှိမယ့် ၃ နှစ် စာချုပ် ချုပ်ဆိုခဲ့တာပါ။

မာရှေယာနိုဟာ ပြီးခဲ့တဲ့ရက်သတ္တပတ်ကမှ ပုဂ္ဂိုလ်ရေးဆိုင်ရာ အကြောင်းပြချက်နဲ့ အင်တာမိုင်ယာမီအသင်းကနေ ထွက်ခွာခဲ့တဲ့ နည်းပြ မာတီနိုရဲ့နေရာမှာ အစားထိုး ဝင်ရောက်ပြီး နည်းပြသစ်အဖြစ် တာဝန်ယူရမှာဖြစ်ပါတယ်။

မာရှေယာနိုဟာ အင်တာမိုင်ယာမီအသင်းမှာ အာဂျင်တီးနားနဲ့ ဘာစီလိုနာ အသင်းဖော်ဟောင်းဖြစ်တဲ့ မက်ဆီနဲ့ ပြန်လည် လက်တွဲရတော့မှာပါ။

မာရှေယာနိုက “အင်တာမိုင်ယာမီလို ကလပ်တစ်ခုကို ဦးဆောင်ရမှာက ကျနော့်အတွက် ဂုဏ်ယူစရာဖြစ်ပြီး အခွင့်ထူးအနေနဲ့ အကောင်းဆုံးဖြစ်အောင် ကျနော်ကြိုးစားသွားမယ်”လို့ ပြောခဲ့ပါတယ်။

မာရှေယာနိုကို တွေ့ရစဉ်

မာရှေယာနိုဟာ ဘာစီလိုနာသင်းနဲ့ လာလီဂါဖလား ၅ ကြိမ်၊ ချန်ပီယံလိဂ်ဖလား ၂ ကြိမ် အပါအဝင် ကစားသမား ဘဝမှာ ဆုဖလားပေါင်း ၂၁ ခုအထိ ရယူနိုင်ခဲ့တာပါ။

အာဂျင်တီးနားအသင်းအတွက် ပွဲပေါင်း ၁၄၇ ပွဲ ပါဝင်ကစားခဲ့တဲ့ မာရှေယာနိုဟာ ၂၀၂၀ ခုနှစ်မှာ ကစားသမား ဘဝကနေ အနားယူပြီးနောက် အာဂျင်တီးနား ယူ-၂၀ အသင်းရဲ့ နည်းပြအဖြစ် ခန့်အပ်ခံခဲ့ရပါတယ်။

မာရှေယာနိုဟာ ပြီးခဲ့တဲ့ အိုလံပစ်ပြိုင်ပွဲမှာ အာဂျင်တီးနားအသင်းကို နည်းပြအဖြစ် တာဝန်ယူခဲ့ပါတယ်။

အင်တာမိုင်ယာမီအသင်းဟာ မာရှေယာနိုရဲ့ နည်းပြဘဝမှာ ပထမဆုံး ကလပ်ဖြစ်ပြီး ဆုဖလားအောင်မြင်မှုတွေ ရရှိအောင် ကိုင်တွယ်ပေးရတော့မှာပါ။

အင်တာမိုင်ယာမီအသင်းဟာ ၂၀၂၅ ခုနှစ်ရာသီမှာ ဖီဖာကလပ် ကမ္ဘာ့ဖလား၊ မေဂျာလိဂ်ပြိုင်ပွဲ အပါအဝင် ဖလားပြိုင်ပွဲ အချို့ကို ဝင်ရောက် ယှဉ်ပြိုင်သွားမှာ ဖြစ်ပါတယ်။

Source: BBC

Share

powered by social2s

: By CNI; Category: အားကစား; Hits: 1781

CNI Sport News

၂၀၂၄ ခုနှစ်၊ နိုဝင်ဘာ ၂၇

ဘာစီလိုနာအသင်းတိုက်စစ်မှူး လီဝန်ဒေါစကီးဟာ ချန်ပီယံလိဂ်ပြိုင်ပွဲမှာ ရော်နယ်ဒို၊ မက်ဆီတို့နဲ့အတူ သွင်းဂိုး ၁၀၀ ကျော်သွင်းယူနိုင်တဲ့ စာရင်းထဲကို ဝင်ရောက်လာခဲ့ပါတယ်။

လီဝန်ဒေါစကီးဟာ ဘာစီလိုနာအသင်းက ဘရက်စ်အသင်းကို ၃ ဂိုး-ဂိုးမရှိနဲ့ အနိုင်ရခဲ့တဲ့ ချန်ပီယံလိဂ်ပြိုင်ပွဲမှာ ၂ ဂိုး သွင်းယူပြီးနောက် သူ့ရဲ့ကစားသမားဘဝမှာ ချန်ပီယံလိဂ်သွင်းဂိုး ၁၀၁ ဂိုးအထိ ရှိလာခဲ့တာပါ။

အဲဒါကြောင့် ဘာစီလိုနာအသင်း တိုက်စစ်မှူး လီဝန်ဒေါစကီးဟာ ချန်ပီယံလိဂ်ပြိုင်ပွဲမှာ သွင်းဂိုး ၁၀၀ ကျော်တဲ့ တတိယမြောက် ကစားသမားအဖြစ် ရော်နယ်ဒို၊ မက်ဆီတို့ရဲ့ အနောက်ကို ရောက်ရှိလာခဲ့တာဖြစ်ပါတယ်။

ပေါ်တူဂီအသင်းခေါင်းဆောင် ရော်နယ်ဒိုက ၁၄၀ ဂိုးနဲ့ ချန်ပီယံလိဂ်ပြိုင်ပွဲရဲ့ ဂိုးသွင်းအများဆုံး ကစားသမားအဖြစ် ရပ်တည်နေပြီး အာဂျင်တီးနားအသင်းခေါင်းဆောင် မက်ဆီက ၁၂၉ ဂိုးနဲ့ ဒုတိယနေရာမှာ ရပ်တည်နေတာပါ။

လီဝန်ဒေါစကီးကို တွေ့ရစဉ်

လီဝန်ဒေါစကီးက “ကျနော် အရမ်းကျေနပ်သလို အရမ်းလည်း ပျော်ပါတယ်။ ချန်ပီယံလိဂ်ပြိုင်ပွဲမှာ ဒီလို အထင်ကြီးစရာကောင်းတဲ့ ကိန်းဂဏန်းတွေ ကျနော် ရရှိမယ်ဆိုတာကို မယုံကြည်ဖူးပါဘူး။ ရော်နယ်ဒို၊ မက်ဆီတို့ နဲ့အတူ ဒီစာရင်းထဲကို ဝင်ရောက်ခွင့်ရတာဟာ အလွန်ကောင်းပါတယ်။ ကျနော့်အတွက် အရေးကြီးဆုံးက ပွဲတိုင်း ကို အနိုင်ရအောင် ကြိုးစားဖို့နဲ့ ကျနော့် ဂိုးသွင်းနိုင်ရင် ဒါက ပြီးပြည့်စုံတဲ့အဖြေပါ”လို့ Movistar ကို ပြောခဲ့ပါ တယ်။

အသက် ၃၆ နှစ်အရွယ်ရှိ လီဝန်ဒေါစကီးဟာ ဒီရာသီမှာ ဘာစီလိုနာအသင်းအတွက် ခြေစွမ်းပြသနေပြီး ပြိုင်ပွဲစုံ ၁၉ ပွဲကစားထားတာမှာ ၂၂ ဂိုးအထိ သွင်းယူထားတာပါ။

ဘာစီလိုနာအသင်းဟာ ဘရက်စ်အသင်းကို အနိုင်ရခဲ့တာကြောင့် ဒီရာသီ ချန်ပီယံလိဂ်ပွဲစဉ် ၅ ပွဲကစားအပြီးမှာ ရမှတ် ၁၂ မှတ်နဲ့ အဆင့် ၂ နေရာမှာ ရပ်တည်နေတာ ဖြစ်ပါတယ်။

ဘာစီလိုနာအသင်းအနေနဲ့ လက်ရှိပုံစံကို ဆက်ထိန်းသိမ်းနိုင်ရင် ချန်ပီယံလိဂ် ၁၆ သင်းအဆင့်ကို တိုက်ရိုက် တက်ရောက်နိုင်မှာပါ။

လာလီဂါပြိုင်ပွဲမှာလည်း ထိပ်ဆုံးနေရာ ရပ်တည်နေတဲ့ ဘာစီလိုနာအသင်းဟာ ဒီတစ်ပတ် လိဂ်ပွဲစဉ်အဖြစ် လက်စ်ပါးမက်စ်အသင်းနဲ့ ယှဉ်ပြိုင်ရမှာဖြစ်ပါတယ်။

Share

powered by social2s

: By CNI; Category: အားကစား; Hits: 1264

CNI Sport News

၂၀၂၄ ခုနှစ်၊ နိုဝင်ဘာ ၂၇

မန်စီးတီးအသင်းဟာ ဖီယင်နုအသင်းနဲ့ ချန်ပီယံလိဂ်ပွဲစဉ်မှာ ၃ ဂိုးစီသရေကျပြီး နောက်ဆုံး ၆ ပွဲဆက်တိုက် နိုင်ပွဲပျောက်ဆုံးခဲ့ပြီးနောက် နည်းပြ ဂွာဒီယိုလာက အသင်းအတွက် ခက်ခဲတဲ့ရာသီလို့ ပြောခဲ့ပါတယ်။

ဂွာဒီယိုလာက “ကျနော်တို့အတွက် ခက်ခဲတဲ့ရာသီဖြစ်ပြီး အခြေအနေများစွာအတွက် ကျနော်တို့ ဒါကို လက်ခံ ရမှာပါ။ ကံမကောင်းစွာနဲ့ ပွဲကိုအဆုံးသတ်ခဲ့ရပြီး မှန်ကန်တဲ့အခိုက်အတန့်မှာ သူတို့ကို အပြစ်ပေးလို့မရခဲ့ပါဘူး။ အသင်းဟာ ဒီပွဲမှာ အကောင်းဆုံးလုပ်နိုင်ခဲ့ပေမယ့် ကံမကောင်းစွာနဲ့ တစ်ခုခုဖြစ်ပျက်နေချိန်မှာ ကျနော်တို့ဟာ လုံလောက်တဲ့ တောင့်တင်းမှုတွေမရှိခဲ့ပါဘူး။ ကျနော်တို့ဟာ ကြိုးစားပြီး အမှားတွေကိုရှောင်ရမယ်”လို့ ပြောခဲ့တာပါ။

မန်စီးတီးအသင်းဟာ ဒီပွဲမှာ ဟာလန်းရဲ့သွင်းဂိုး၂ ဂိုး၊ဂွန်ဒိုဂန်ရဲ့သွင်းဂိုးနဲ့ ပွဲချိန်မိနစ် ၇၀ ကျော်အထိ ဖီယင်နု အသင်းကို ၃ ဂိုး-ဂိုးမရှိနဲ့ ဦးဆောင်နိုင်ခဲ့တာဖြစ်ပါတယ်။

ဒါပေမယ့် မန်စီးတီးအသင်းဟာ ပွဲပြီးခါနီးတွေမှာ ဖီယင်နုအသင်းကို ချေပဂိုး ၃ ဂိုးဆက်တိုက်ပြန်ပေးခဲ့ရတာကြောင့် သရေနဲ့သာ ကျေနပ်ခဲ့ရတာပါ။

မန်စီးတီး အသင်းဟာ ဖီယင်နုအသင်းနဲ့ပွဲမတိုင်ခင် နောက်ဆုံးကစားခဲ့တဲ့ ၅ ပွဲစလုံးအရေးနိမ့်ခဲ့ပြီး ဒီပွဲမှာလည်း နိုင်ပွဲ မရခဲ့တဲ့အတွက် ၆ ပွဲဆက်တိုက်နိုင်ပွဲပျောက်ဆုံးခဲ့တာ ဖြစ်ပါတယ်။

မန်စီးတီးအသင်းဟာ ဖီယင်နုအသင်းနဲ့ သရေကျခဲ့တာကြောင့် ချန်ပီယံလိဂ်ပွဲစဉ် ၅ ပွဲကစားအပြီးမှာ ရမှတ် ၈ မှတ်နဲ့ အမှတ်ပေးဇယားအဆင့် ၁၅ နေရာအထိ ရောက်ရှိသွားခဲ့တာပါ။

မန်စီးတီးအသင်းအနေနဲ့ ချန်ပီယံလိဂ် ပြိုင်ပွဲရဲ့ ၁၆ သင်းအဆင့်ကို တိုက်ရိုက်တက်ချင်တယ်ဆိုရင် ချန်ပီယံလိဂ်လက်ကျန်ပွဲတွေမှာ ရလဒ်ကောင်းရယူ နိုင်ဖို့ လိုအပ်နေပြီဖြစ်ပါတယ်။

ရလဒ်တွေဆိုးရွားနေတဲ့ မန်စီးတီးအသင်းဟာ ဒီတစ်ပတ် ပရီးမီးယားလိဂ်ပွဲစဉ် အဖြစ် လီဗာပူးလ်အသင်းနဲ့ ယှဉ်ပြိုင်ရမှာပါ။

မန်စီးတီးအသင်းဟာ ဒီပွဲမှာ အရေးနိမ့်ခဲ့မယ်ဆိုရင် ပရီးမီးယားလိဂ်ပြိုင်ပွဲမှာ ထိပ်ဆုံးနေရာရပ်တည်နေတဲ့ လီဗာပူးလ်အသင်းနဲ့ ရမှတ် ၁၁ မှတ်အထိ ကွာဟသွားတော့မှာဖြစ်ပါတယ်။

မန်စီးတီးအသင်းနည်းပြ ဂွာဒီယိုလာ က လီဗာပူးလ်အသင်းနဲ့ပွဲစဉ်မှာ သူတို့အကောင်းဆုံးရလဒ်ရရှိအောင် ကြိုးစားသွားမယ်လို့ ပြောခဲ့တာဖြစ်ပါတယ်။

Source:ESPN

Share

powered by social2s

: By CNI; Category: အားကစား; Hits: 1709

CNI Sport News

၂၀၂၄ ခုနှစ်၊ နိုဝင်ဘာ ၂၆

လက်စတာအသင်းဟာ ထုတ်ပယ်ခဲ့တဲ့ နည်းပြ စတိဗ်ကူးပါးရဲ့ နေရာမှာ အစားထိုးဖို့အတွက် ပရီးမီးယားလိဂ် နည်းပြဟောင်းတွေဖြစ်တဲ့ ဂရေဟမ်ပေါ်တာ၊ ဒေးဗစ်မိုယက်စ်နဲ့ နစ္စတယ်ရွိုင်းတို့ကို စဉ်းစားနေပါတယ်။

လက်စတာအသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ ချယ်လ်ဆီးအသင်းကို အရေးနိမ့်ပြီး အမှတ်ပေးဇယားအဆင့် ၁၆ နေရာအထိ ရောက်ရှိနေခဲ့တာကြောင့် နည်းပြ စတိဗ်ကူးပါးကို ရာထူးကနေ ထုတ်ပယ်ခဲ့တာပါ။

စတိဗ်ကူးပါးဟာ ပြီးခဲ့တဲ့နွေရာသီကမှ ချယ်လ်ဆီးအသင်းကို ကိုင်တွယ်ဖို့ ထွက်ခွာသွားခဲ့တဲ့ မာရက်စ်ကာရဲ့ နေရာကို ဝင်ရောက်ပြီး လက်စတာအသင်းကို ကိုင်တွယ်ခဲ့တာ ဖြစ်ပါတယ်။

စတိဗ်ကူးပါးဟာ လက်စတာအသင်းကို ပရီးမီးယားလိဂ် ၁၂ ပွဲ ကိုင်တွယ်ခဲ့တာမှာ နိုင်ပွဲ ၂ ပွဲသာ ရယူပေး နိုင်ခဲ့တာပါ။

ချယ်လ်ဆီးအသင်း နည်းပြဟောင်း ပေါ်တာနဲ့ ယူနိုက်တက်အသင်း ယာယီနည်းပြဟောင်း နစ္စတယ်ရွိုင်းတို့ဟာ စတိဗ်ကူးပါးရဲ့ နေရာကို အစားထိုးဝင်ရောက်ပြီး လက်စတာအသင်းကို နည်းပြသစ်အဖြစ် ကိုင်တွယ်ဖို့ ရေပန်း အစားဆုံး ဖြစ်နေတယ်လို့ သတင်းထွက်ပေါ်နေပါတယ်။

လက်စတာအသင်းကို တွေ့ရစဉ်

ဂရေဟမ်ပေါ်တာဟာ အရင်က လက်စတာအသင်းရဲ့ ချဉ်းကပ်မှု ၂ ကြိမ်စလုံးကို ငြင်းပယ်ထားခဲ့ပြီး နောက်ထပ် ကမ်းလှမ်းမှုကိုလည်း ငြင်းပယ်ဖွယ်ရှိနေတာပါ။

နစ္စတယ်ရွိုင်းဟာ ယူနိုက်တက်အသင်းကို ယာယီနည်းပြအဖြစ် ၄ ပွဲ ကိုင်တွယ်ခဲ့ပြီး ၃ ပွဲနိုင်၊ ၁ ပွဲ သရေကျကာ ရှုံးပွဲမရှိခဲ့ပေမယ့် နည်းပြသစ် အာမိုရင်ရောက်ရှိလာချိန်မှာ ထွက်ခွာခဲ့တာ ဖြစ်ပါတယ်။

နစ္စတယ်ရွိုင်းဟာ လက်ရှိအချိန်မှာ နည်းပြလောကထဲကို ပြန်လည် ဝင်ရောက်ဖို့ စိတ်အားထက်သန်နေတာပါ။

ယူနိုက်တက်၊ အဲဗာတန်နဲ့ ဝက်စ်ဟမ်းအသင်း နည်းပြဟောင်း ဒေးဗစ်မိုယက်စ်ကလည်း လက်စတာအသင်း နည်းပြသစ် ဖြစ်လာနိုင်မယ့် သူတွေထဲက တစ်ဦးအဖြစ်ရှိနေပါတယ်။

လက်စတာအသင်း နည်းပြသစ် ဖြစ်လာနိုင်တဲ့ စာရင်းထဲမှာ ဝက်စ်ဘရွမ်းအသင်းနည်းပြ ကော်ဘီရန်၊ မယ်ဒယ် ဘရော့အသင်းနည်းပြ ကာရစ်နဲ့ ကိုဗင်ထရီအသင်း နည်းပြဟောင်း မာခ့်ရော်ဘင်တို့လည်း ပါဝင်နေတာပါ။

လက်စတာအသင်းဟာ ဒီအပတ်ကစားမယ့် ပရီးမီးယားလိဂ် ပွဲစဉ်မတိုင်ခင်မှာ နည်းပြသစ်ခန့်အပ်နိုင်ဖို့ မျှော်လင့်နေတာ ဖြစ်ပါတယ်။

Share

powered by social2s

: By CNI; Category: အားကစား; Hits: 767

CNI Sport News

၂၀၂၄ ခုနှစ်၊ နိုဝင်ဘာ ၂၆

လီဗာပူးလ်အသင်း တိုက်စစ်မှူး ဆာလက်ဟာ လီဗာပူးလ်အသင်းဆီကနေ စာချုပ်သစ် ကမ်းလှမ်းမှု မရရှိသေးတဲ့ အတွက် စိတ်ပျက်မိတယ်လို့ ပြောလိုက်ပါတယ်။

ဆာလက်က “ဒီဇင်ဘာထဲကို ရောက်ဖို့နီးနေပြီဖြစ်ပေမယ့် ကျနော်ဟာ ကလပ်မှာ ဆက်ပြီးရှိနေဖို့အတွက် ကမ်းလှမ်းမှု မရရှိသေးပါဘူး။ ကျနော် စိတ်ပျက်မိပါတယ်။ ဒါကြောင့် ဆက်ရှိဖို့ထက် ထွက်ခွာဖို့က ပိုဖြစ်နိုင်ပါ တယ်။ ကျနော်ဒီမှာ နှစ်ပေါင်းများစွာကြာရှိခဲ့တာကို ခင်ဗျားတို့လည်း သိပါတယ်။ ဒီလိုကလပ်မျိုးလည်း မရှိပါဘူး။ ပရိသတ်တွေကို ကျနော်ချစ်သလို၊ ပရိသတ်တွေကလည်း ကျနော့်ကို ချစ်ပါတယ်။ အဆုံးသတ်မှာ ဒါက ကျနော့်ရဲ့ လက်ထဲ ဒါမှမဟုတ် ပရိသတ်တွေရဲ့ လက်ထဲမှာ မရှိပါဘူး။ စောင့်ဆိုင်းပြီး ကြည့်ရမှာပါ”လို့ ဆောက်သမ်တန် အသင်းနဲ့ပွဲအပြီး သတင်းထောက်တွေနဲ့တွေ့ဆုံချိန်မှာ ပြောခဲ့တာပါ။

ဆာလက်ဟာ ဒီရာသီမှာ လီဗာပူးလ်အသင်းအတွက် ပြိုင်ပွဲစုံ ၁၂ ဂိုး သွင်းယူထားပြီး ခြေစွမ်းပြသနေပေမယ့် သူနဲ့ အသင်းတို့ ချုပ်ဆိုထားတဲ့ စာချုပ်ဟာ ရာသီကုန်ရင် ကုန်ဆုံးပြီဖြစ်ပါတယ်။

ဒါပေမယ့် ဆာလက်ဟာ လီဗာပူးလ်အသင်းဆီကနေ စာချုပ်သစ် ကမ်းလှမ်းမှု မရရှိသေးတဲ့အတွက် စိတ်ပျက်နေ တာပါ။

ဆာလက်၊ ဗန်ဒိုက်နဲ့ အာနိုးလ်တို့ကို တွေ့ရစဉ်

ဆာလက်ဟာ လက်ရှိ အခြေအနေကြောင့် ၂၀၂၅ ခုနှစ်၊ ဇန်နဝါရီ ၁ ရက်မှာ အင်္ဂလန်ပြင်ပ ကလပ်အသင်းတွေနဲ့ စာချုပ်အကြို ချုပ်လို့ရမှာဖြစ်ပြီး နွေရာသီမှာ အလွတ်နဲ့ ပြောင်းရွှေ့လို့ရမှာဖြစ်ပါတယ်။

၂၀၁၇ ခုနှစ်နွေရာသီက ရိုးမားအသင်းကနေ ရောက်ရှိလာခဲ့တဲ့ ဆာလက်ဟာ လီဗာပူးလ်အသင်းဆီကနေ စာချုပ်သစ် ကမ်းလှမ်းမှု မရထားပေမယ့် ဒီရာသီကို အာရုံစိုက်ပြီး ပရီးမီးယားလိဂ်နဲ့ ချန်ပီယံလိဂ်ဖလား ရယူနိုင်ဖို့ ကြိုးစားသွားမယ်လို့ ပြောထားပါတယ်။

အသက် ၃၂ နှစ်အရွယ်ရှိ ဆာလက်ကို ခေါ်ယူဖို့ ဆော်ဒီပရိုလိဂ် ကလပ်အသင်းတွေအပြင် ဥရောပထိပ်သီး အချို့ကလည်း စောင့်ကြည့်မှုတွေ ပြုလုပ်နေတာပါ။

လီဗာပူးလ်အသင်းဟာ ဆာလက်အပြင် ရာသီအကုန်မှာ စာချုပ်ကုန်ဆုံးမယ့် အသင်းခေါင်းဆောင် ဗန်ဒိုက်နဲ့ ညာနောက်ခံလူ အာနိုးလ်တို့ကိုလည်း စာချုပ်သစ်အတွက် သဘောတူညီမှု မရရှိသေးပါဘူး။

အဲဒါကြောင့် လီဗာပူးလ်အသင်းဟာ အသင်းရဲ့အဓိက ကစားသမား ၃ ဦးစလုံးကို လာမယ့်နွေရာသီမှာ အလွတ်နဲ့ ဆုံးရှုံးရနိုင်တာဖြစ်ပါတယ်။

Share

powered by social2s

: By CNI; Category: အားကစား; Hits: 2660

CNI Sport News

၂၀၂၄ ခုနှစ်၊ နိုဝင်ဘာ ၂၆

အယ်လ်နာဆာအသင်းက အယ်လ်ဂါရာဖာအသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ အာရှချန်ပီယံလိဂ်ပွဲစဉ်မှာ အသင်း ခေါင်းဆောင် ရော်နယ်ဒိုဟာ ၂ ဂိုးသွင်းပြီး အသင်းကို နောက်တဆင့် တက်နိုင်အောင် ကူညီပေးနိုင်ခဲ့ပါတယ်။

ရော်နယ်ဒိုဟာ ဒီပွဲစဉ်ရဲ့ ပထမပိုင်းမှာ ဂိုးမသွင်းနိုင်ခဲ့လို့ စိတ်ပျက်နေပေမယ့် ဒုတိယပိုင်းအစ ပွဲချိန် ၄၆ မိနစ်နဲ့ ၆၄ မိနစ်မှာ အယ်လ်နာဆာအသင်းအတွက် ၂ ဂိုးသွင်းယူပေးခဲ့တာပါ။

အယ်လ်နာဆာအသင်းအတွက် နောက်ထပ် သွင်းဂိုးကို ဂါဘရီရယ်လ်က သွင်းယူခဲ့ပြီး အယ်လ်ဂါရာဖာအသင်း အတွက် ချေပဂိုးကို ဟိုဆေးလူက သွင်းယူခဲ့တာ ဖြစ်ပါတယ်။

အယ်လ်နာဆာအသင်းဟာ ဒီနိုင်ပွဲကြောင့် အာရှချန်ပီယံလိဂ် အုပ်စုပွဲစဉ် ၅ ပွဲ ကစားအပြီးမှာ ၄ ပွဲနိုင်၊ ၁ ပွဲ သရေကျကာ ရမှတ် ၁၃ မှတ်နဲ့ နောက်တဆင့်တက်ဖို့ သေချာသွားခဲ့တာပါ။

ရော်နယ်ဒိုဟာ ဒီပွဲမှာသွင်းယူခဲ့တဲ့ ၂ ဂိုးကြောင့် ဒီရာသီမှာ အယ်လ်နာဆာအသင်းအတွက် ပြိုင်ပွဲစုံ ၁၇ ပွဲ ကစားအပြီးမှာ ၁၃ ဂိုး သွင်းယူထားတာ ဖြစ်ပါတယ်။

ဒါအပြင် ရော်နယ်ဒိုအတွက် ကစားသမားဘဝသွင်းဂိုး ၉၁၃ ဂိုးအထိ ရှိလာခဲ့ပြီဖြစ်တာပါ။

ရော်နယ်ဒိုကို တွေ့ရစဉ်

ရော်နယ်ဒိုက အသင်းအနိုင်ရခဲ့ရင် သူအလွန်ပျော်ရွှင်ပြီး ဒီနိုင်ပွဲကို ပရိသတ်တွေနဲ့ ကလပ်အတွက် ရည်စူးတယ်လို့ ပွဲအပြီးမှာ ပြောခဲ့ပါတယ်။

အယ်လ်နာဆာအသင်းဟာ အာရှချန်ပီယံလိဂ်ပြိုင်ပွဲမှာ နောက်တဆင့် တက်ခဲ့ပြီးနောက် ဆော်ဒီပရိုလိဂ်ပြိုင်ပွဲကို ပြန်ပြီး အာရုံစိုက်ရတော့မှာပါ။

အယ်လ်နာဆာအသင်းဟာ နောက်ဆုံး ကစားခဲ့တဲ့ပွဲမှာ အယ်လ်ကတ်ဆီယာအသင်းကို အရေးနိမ့်ပြီး ဒီရာသီ ဆော်ဒီပရိုလိဂ်ပြိုင်ပွဲမှာ ပထမဆုံး ရှုံးပွဲကြုံတွေ့ခဲ့ရတာ ဖြစ်ပါတယ်။

အဲဒါကြောင့် အယ်လ်နာဆာအသင်းဟာ အမှတ်ပေးဇယား ထိပ်ဆုံးနေရာမှာ ရပ်တည်နေတဲ့ အယ်လ်အစ်တီဟတ် အသင်းနဲ့ ၈ မှတ်အကွာ အဆင့် ၃ နေရာမှာ ရပ်တည်နေတာပါ။

အယ်လ်နာဆာအသင်းဟာ ဒီတစ်ပတ် ဆော်ဒီပရိုလိဂ်ပွဲစဉ်အဖြစ် ဒါမက်အသင်းနဲ့ ယှဉ်ပြိုင်ရမှာဖြစ်ပြီး ဒီပွဲပြီးရင် အာရှချန်ပီယံလိဂ်ပွဲစဉ်အဖြစ် အယ်လ်ဆတ်ဒ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

Share

powered by social2s

: By CNI; Category: အားကစား; Hits: 1122

CNI Sport News

၂၀၂၄ ခုနှစ်၊ နိုဝင်ဘာ ၂၃

အင်တာမိုင်ယာမီအသင်း ပူးတွဲပိုင်ရှင် ဂျော့ချ်မက်စ်က အသင်းခေါင်းဆောင် မက်ဆီကို ၂၀၂၆ မေဂျာလိဂ်ရာသီအထိ အသင်းမှာ အစိတ်အပိုင်းတစ်ခုအဖြစ် ဆက်ရှိဖို့မျှော်လင့်တယ်လို့ ပြောခဲ့ပါတယ်။

၂၀၂၃ ခုနှစ်၊ဇူလိုင်က အင်တာမိုင်ယာမီအသင်းထံ ရောက်ရှိလာခဲ့တဲ့ မက်ဆီရဲ့ စာချုပ်ဟာ ၂၀၂၅ ခုနှစ်ရာသီကုန်ရင် ကုန်ဆုံးပြီဖြစ်တာပါ။

မက်ဆီနဲ့ အင်တာမိုင်ယာမီအသင်းတို့ရဲ့ စာချုပ်ထဲမှာ နောက်ထပ် သက်တမ်းတိုးဖို့ ရွေးချယ်ခွင့် မပါဝင်တာကြောင့် လာမယ့်ရာသီဟာ သူ့အတွက် အင်တာမိုင်ယာမီအသင်းကစားသမားဘ၀ နောက်ဆုံးရာသီဖြစ်သွားနိုင်ပါတယ်။

အင်တာမိုင်ယာမီအသင်း ပူးတွဲပိုင်ရှင် ဂျော့ချ်မက်စ်က “မက်ဆီရဲ့ စာချုပ်ဟာ ၂၀၂၅ ခုနှစ်အထိရှိနေပါတယ်။ ကျနော်တို့ သူနဲ့အတူထိုင်ပြီး အနာဂတ်အတွက် ဆွေးနွေးသွားမှာပါ။

မက်ဆီကို တွေ့ရစဉ်

၂၀၂၆ မှာ ကျနော်တို့ရဲ့ ကွင်းသစ်ဖွင့်ပွဲနဲ့ ၂၀၂၆ မေဂျာလိဂ်ရာသီအဖွင့်ပွဲမှာ မက်ဆီဟာ ကျနော်တို့ရဲ့ နံပတ် ၁၀ အဖြစ်ဆက်ရှိဖို့ အပြည့်အ၀ မျှော်လင့်ထားတယ်”လို့ ပြောခဲ့တာပါ။

မက်ဆီဟာ အင်တာမိုင်ယာမီအသင်းကို ကလပ်အသင်း သမိုင်းတစ်လျှောက် ပထမဆုံးဆုဖလားတွေဖြစ်တဲ့ ၂၀၂၃ ခုနှစ်က လိဂ်ဖလားနဲ့ ၂၀၂၄ ခုနှစ်မှာ Supporters Shield ဖလားရရှိအောင် ဦးဆောင်နိုင်ခဲ့ပါတယ်။

အသက် ၃၇ နှစ်အရွယ်ရှိ မက်ဆီဟာ အင်တာမိုင်ယာမီအသင်းအတွက် ၃၉ ပွဲ ကစားထားပြီး ၃၄ ဂိုးသွင်းယူထားတာပါ။

အင်တာမိုင်ယာမီအသင်းဟာ ပုဂ္ဂိုလ်ရေးဆိုင်ရာအကြောင်းပြချက်နဲ့ နည်းပြရာထူးကနေ နုတ်ထွက်ခဲ့တဲ့ မာတီနိုရဲ့နေရာမှာ မက်ဆီရဲ့ဘာစီလိုနာနဲ့ အာဂျင်တီးနားအသင်းဖော်ဟောင်း မာရှေယာနိုကို နည်းပြသစ်အဖြစ် ခန့်အပ်မယ်လို့လည်း သိရပါတယ်။

အင်တာမိုင်ယာမီအသင်းဟာ လာမယ့် ၂၀၂၅ ရာသီမှာ မေဂျာလိဂ်ပြိုင်ပွဲအပြင် ဖီဖာကလပ်ကမ္ဘာ့ဖလား၊ကွန်ကာကပ်ဖ်ချန်ပီယံလိဂ်၊လိဂ်ဖလားပြိုင်ပွဲတွေကိုလည်း ပါဝင်ယှဉ်ပြိုင်ရမှာ ဖြစ်ပါတယ်။

Source: ESPN

Share