CNI Sport News

၂၀၂၄ ခုနှစ်၊ ဇူလိုင် ၁၈

ရီးရယ်လ်အသင်းဟာ ဝါရင့်ကွင်းလယ်လူ မိုဒရစ်ကို ၁ နှစ် သက်တမ်းတိုး စာချုပ်ချုပ်ဆိုပြီး အသင်းခေါင်းဆောင် အဖြစ် ခန့်အပ်ခဲ့ပါတယ်။

ရီးရယ်လ်အသင်းနဲ့ မိုဒရစ်တို့ရဲ့ စာချုပ်ဟာ ပြီးခဲ့တဲ့ ဇွန်လက ကုန်ဆုံးခဲ့ပေမယ့် စာချုပ်သက်တမ်း တိုးခဲ့တာ ကြောင့် ခရိုအေးရှား ကစားသမားဟာ စပိန်ကလပ်မှာ သူ့ရဲ့ ၁၃ ရာသီမြောက်အတွက် ပြင်ဆင်မှုတွေ ပြုလုပ်ရ တော့မှာပါ။

အသက် ၃၈ နှစ်အရွယ်ရှိ မိုဒရစ်ဟာ ရီးရယ်လ်အသင်းကို ၂၀၁၂ ခုနှစ်က စပါးအသင်းကနေ ရောက်ရှိလာခဲ့တာ ဖြစ်ပြီး ပွဲပေါင်း ၅၃၄ ပွဲ ပါဝင်ကစားထားကာ ၃၉ ဂိုး သွင်းယူပြီး လာလီဂါဖလား ၄ ကြိမ်၊ ချန်ပီယံလိဂ်ဖလား ၆ ကြိမ် အပါအဝင် ဆုဖလားပေါင်း ၂၆ ခု ရယူနိုင်ခဲ့တာ ဖြစ်ပါတယ်။

ပြီးခဲ့တဲ့ရာသီက ရီးရယ်လ်အသင်း ခေါင်းဆောင်အဖြစ် တာဝန်ယူခဲ့တဲ့ နာချိုဟာ အသင်းက ထွက်ခွာသွားခဲ့သလို တိုနီကရူးစ်ကလည်း အနားယူသွားခဲ့တာကြောင့် မိုဒရစ်ဟာ ကလပ်အသင်းရဲ့ အသင်းခေါင်းဆောင်သစ် ဖြစ်လာ ခဲ့တာပါ။ 

မိုဒရစ်ကို တွေ့ရစဉ်

မိုဒရစ်ဟာ ရီးရယ်လ်အသင်းနဲ့ သက်တမ်းတိုး စာချုပ်ချုပ်ဆိုပြီးနောက် ကမ္ဘာ့အကောင်းဆုံးအသင်းမှာ နောက်ထပ် တစ်နှစ်ထပ်ပြီး ကစားခွင့်ရလို့ အလွန်ပျော်ရွှင်ကြောင်း ပြောသွားခဲ့ပါတယ်။ 

မိုဒရစ်ဟာ ရီးရယ်လ်အသင်းနဲ့အတူ အောင်မြင်မှု အများအပြား ရယူနိုင်ခဲ့သလို တစ်ဦးချင်းဆုတွေလည်း သိမ်းပိုက် နိုင်ခဲ့တာပါ။

မိုဒရစ်ဟာ ၂၀၁၈ ခုနှစ်ထဲမှာ ဘောလွန်းဒီအောဆု၊ ဖီဖာတစ်နှစ်တာ အကောင်းဆုံး ကစားသမားဆုနဲ့ UEFA တစ်နှစ်တာ အကောင်းဆုံး ကစားသမားဆုတို့ကို ရယူနိုင်ခဲ့တာ ဖြစ်ပါတယ်။ 

မိုဒရစ်ဟာ ပြီးခဲ့တဲ့ ယူရို ၂၀၂၄ ပြိုင်ပွဲမှာ အုပ်စုအဆင့်က ထွက်ခွာခဲ့ရတဲ့ ခရိုအေးရှားအသင်းအတွက် အုပ်စုပွဲစဉ် ၃ ပွဲစလုံး ပါဝင်ကစားခဲ့ပြီး ၁ ဂိုးသွင်းယူကာ ယူရိုပြိုင်ပွဲသမိုင်းမှာ အသက်အကြီးဆုံး ဂိုးသွင်းတဲ့သူအဖြစ် မှတ်တမ်း ဝင်ခဲ့တာပါ။

ရီးရယ်လ်အသင်းဟာ ရာသီသစ်မှာ ပြီးခဲ့တဲ့ရာသီက အောင်မြင်မှုတွေကို ဆက်ပြီး ထိန်းနိုင်ဖို့အတွက် ဘတ်ပီကို ခေါ်ယူနိုင်ခဲ့သလို မိုဒရစ်ကိုလည်း စာချုပ်သက်တမ်းတိုးခဲ့တာ ဖြစ်ပါတယ်။

CNI Sport News 

၂၀၂၄ ခုနှစ်၊ ဇူလိုင် ၁၈

အင်္ဂလန်အသင်း နည်းပြရာထူးအတွက် ထင်ကြေးတွေ ထွက်ပေါ်နေပေမယ့် ပိုစတီကိုဂလူးက စပါးနည်းပြ အလုပ်ကို အာရုံစိုက်ထားတယ်လို့ ပြောခဲ့ပါတယ်။

ပိုစတီကိုဂလူးက “ကျနော်ဟာ စပါးအသင်း နည်းပြဖြစ်တဲ့အတွက် ဒီအသင်းကို အောင်မြင်မှုတွေ ယူဆောင်ပေး နိုင်ဖို့ ကြိုးစားနေပြီး တခြားဘာကိုမှ မစဉ်းစားပါဘူး။ ကျနော်ဟာ နေ့လည်ခင်းမှာ ခဏအိပ်ပျော်သွားတာကြောင့် ထင်ကြေးတွေ ထွက်ပေါ်ခဲ့တာကို ကျနော် မသိပါဘူး။ စပါးအသင်းကိုပဲ အာရုံစိုက်ထားပါတယ်”လို့ ပြောခဲ့တာပါ။

အင်္ဂလန်အသင်းနည်းပြ ဆောက်ဂိတ်ဟာ စပိန်အသင်းကို အရေးနိမ့်ခဲ့တဲ့ ယူရို ၂၀၂၄ ပြိုင်ပွဲ ဗိုလ်လုပွဲအပြီး ၂ ရက် အကြာမှာ နည်းပြရာထူးက နုတ်ထွက်ခဲ့တာကြောင့် အင်္ဂလန်ဘောလုံးအဖွဲ့ချုပ်(FA)ဟာ နည်းပြသစ် ရှာဖွေမှုတွေ ကို လုပ်ဆောင်နေတာ ဖြစ်ပါတယ်။ 

အင်္ဂလန်အသင်း နည်းပြသစ် ရာထူးအတွက် အင်္ဂလန် ယူ-၂၁ အသင်းနည်းပြ လီကာစလေ၊ နယူးကာဆယ်အသင်း နည်းပြ အက်ဒီဟောင်း၊ မန်စီးတီးအသင်းနည်းပြ ဂွာဒီယိုလာ၊ လီဗာပူးလ်အသင်း နည်းပြဟောင်း ကလော့ပ်၊ ချယ်လ်ဆီးအသင်း နည်းပြဟောင်းတွေဖြစ်တဲ့ ပိုချက်တီနို၊ တူချယ်လ်၊ ဂရေဟမ်ပေါ်တာတို့နဲ့အတူ ချိတ်ဆက်ခံ နေရတဲ့ သူတွေထဲမှာ ပိုစတီကိုဂလူးလည်း ပါဝင်နေတာပါ။

အင်္ဂလန်အသင်း နည်းပြရာထူး ယာထားခံရသူများကိုတွေ့ရစဉ်

အင်္ဂလန်အသင်းဟာ နည်းပြသစ် ရှာဖွေမှု လုပ်ဆောင်နေချိန်အတွင်း ယာယီနည်းပြခန့်အပ်ကာ လာမယ့် နေးရှင်းလိဂ်ပွဲစဉ်တွေကို ယှဉ်ပြိုင်ကစားသွားဖို့ ရှိနေပါတယ်။

ပိုစတီကိုဂလူးဟာ ပြီးခဲ့တဲ့ရာသီက စပါးအသင်းကို ပရီးမီးယားလိဂ်ပြိုင်ပွဲမှာ အဆင့် ၅ နေရာ ရပ်တည်ပြီး ရာသီသစ်မှာ ယူရိုပါလိဂ်ပြိုင်ပွဲ ယှဉ်ပြိုင်ခွင့်ရရှိအောင် ကိုင်တွယ်ပေးနိုင်ခဲ့တာပါ။ 

ပိုစတီကိုဂလူးဟာ ၂၀၁၃ ကနေ ၂၀၁၇ ခုနှစ်အထိ သြစတြေးလျ လက်ရွေးစင်အသင်းကို ကိုင်တွယ်ခဲ့ဖူးပြီး ၂၀၁၅ ခုနှစ်က အာရှဖလား ချန်ပီယံဆုကို ရယူပေးနိုင်ခဲ့ပါတယ်။ 

ပိုစတီကိုဂလူးက သူဟာ နိုင်ငံအသင်းကို ကိုင်တွယ်ရတာ နှစ်သက်ပြီး အနာဂတ်မှာ ဘာဖြစ်မလဲဆိုတာ မသိဘူး လို့လည်း ပြောခဲ့ပါတယ်။

ရာသီသစ်မတိုင်ခင် ခြေစမ်းပွဲတွေ ယှဉ်ပြိုင်နေတဲ့ ပိုစတီကိုဂလူးရဲ့ စပါးအသင်းဟာ စကော့တလန်ကလပ် ဟာ့တ်စ်အသင်းနဲ့ ကစားခဲ့တဲ့ ခြေစမ်းပွဲမှာ ၅ ဂိုး-၁ ဂိုးနဲ့ ဂိုးပြတ် အနိုင်ရရှိခဲ့တာပါ။ 

စပါးအသင်းဟာ ဇူလိုင် ၂၀ ရက်မှာ နောက်ထပ် ခြေစမ်းပွဲအဖြစ် ကျူပီအာအသင်းနဲ့ ယှဉ်ပြိုင်သွားမှာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ ဇူလိုင် ၁၇

ရီးရယ်လ်အသင်းဟာ လီဗာပူးလ်အသင်းမှာ အနာဂတ် မရေမရာဖြစ်နေတဲ့ ညာနောက်ခံလူ အာနိုးလ်ကို ခေါ်ယူဖို့ စိတ်ဝင်စားနေတယ်လို့ သတင်းတွေ ထွက်ပေါ်နေပါတယ်။

Bild ဂျာနယ်လစ် ခရစ်စတီယန်ဖော့ခ်က ရီးရယ်လ်အသင်းဟာ အာနိုးလ်ကို ခေါ်ယူဖို့ စိတ်ဝင်စားမှု မြင့်တက်နေ ပြီး ကစားသမားကလည်း ဒီအပြောင်းအရွှေ့ကို လမ်းဖွင့်ထားတယ်လို့ ပြောခဲ့တာပါ။

အာနိုးလ်နဲ့ လီဗာပူးလ်အသင်းတို့ ချုပ်ဆိုထားတဲ့ စာချုပ်ဟာ နောက်ဆုံးနှစ်ထဲကို ရောက်ရှိနေပြီဖြစ်ပါတယ်။ 

လီဗာပူးလ်အကယ်ဒမီထွက် အာနိုးလ်ဟာ အသင်းရဲ့ဂန္ထဝင်ကစားသမား အဆင့်ကို လျင်မြန်စွာ ချဉ်းကပ်နေပေ မယ့် လာမယ့်ရာသီအကုန်မှာ စာချုပ်ကုန်ဆုံးတော့မှာပါ။

အဲဒါကြောင့် လီဗာပူးလ်အသင်း အနေနဲ့ အာနိုးလ်ကို စာချုပ်သစ် မချုပ်ဆိုနိုင်ရင် လာမယ့်ရာသီဟာ သူ့ရဲ့ အန်ဖီးလ် ကစားသမားဘဝ နောက်ဆုံးရာသီ ဖြစ်လာတော့မှာ ဖြစ်ပါတယ်။ 

အာနိုးလ်ဟာ နှစ်ပေါင်းများစွာ လီဗာပူးလ်အသင်းရဲ့ အဓိက ကစားသမားအဖြစ် ရှိနေပေမယ့် နည်းပြကလော့ပ် အသင်းက ထွက်ခွာသွားပြီးနောက် သူ့ဘက်ကလည်း အပြောင်းအလဲ လုပ်ဆောင်လာဖွယ်ရှိနေတာပါ။ 

အာနိုးလ်ကိုတွေ့ရစဉ်

ရီးရယ်လ်အသင်းဟာ ဝါရင့်ညာနောက်ခံလူ ကာဗာဂျဲလ်ရဲ့ နေရာမှာ အစားထိုးဖို့အတွက် အာနိုးလ်ကို စိတ်ဝင် စားနေပြီး ခေါ်ယူနိုင်ဖို့ ပစ်မှတ်ထားနေတာ ဖြစ်ပါတယ်။

လီဗာပူးလ်အသင်းအတွက် ၂၀၁၆ ခုနှစ်မှာ စတင်ပွဲထွက်ခဲ့တဲ့ အာနိုးလ်ဟာ ပွဲပေါင်း ၃၁၀ ပွဲအထိ ပါဝင် ကစားထားပြီး ၁၉ ဂိုး သွင်းယူကာ ပရီးမီးယားလိဂ်၊ ချန်ပီယံလိဂ်၊ ဥရောပစူပါဖလား၊ ကလပ်ကမ္ဘာ့ဖလား အပါအဝင် ပြည်တွင်း ဆုဖလားတွေကို ရယူနိုင်ခဲ့တာပါ။ 

အာနိုးလ်ဟာ အင်္ဂလန်အသင်းအတွက် ၂၉ ပွဲ ပါဝင်ကစားထားပြီး ၃ ဂိုး သွင်းယူထားတာ ဖြစ်ပါတယ်။ 

အာနိုးလ်ဟာ အင်္ဂလန်အသင်းနဲ့ ယူရို ၂၀၂၄ ပြိုင်ပွဲ ပါဝင်ယှဉ်ပြိုင်ထားတဲ့အတွက် အနားယူနေပြီး လီဗာပူးလ် အသင်းနဲ့ လာမယ့်ရက်သတ္တပတ် အနည်းငယ်မှ ပူးပေါင်းဖို့ရှိနေတာပါ။

အာနိုးလ်ကို ခေါ်ယူဖို့ ရီးရယ်လ်အသင်းက စိတ်ဝင်စားနေပေမယ့် လီဗာပူးလ်အသင်းက သူ့ကို လာမယ့်ရာသီ နည်းပြသစ် အာနီစလော့လက်ထက် အသင်းမှာဆက်ရှိဖို့ မျှော်လင့်ထားပြီး စာချုပ်သစ်ချုပ်ဆိုဖို့ပါ လုပ်ဆောင် သွားဖွယ်ရှိနေတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇူလိုင် ၁၇

အာဂျင်တီးနားအသင်း ခေါင်းဆောင် မက်ဆီဟာ ကိုပါအမေရိကဖလားပြိုင်ပွဲ ဗိုလ်လုပွဲမှာ ရရှိခဲ့တဲ့ ဒဏ်ရာကြောင့် အင်တာမိုင်ယာမီအသင်းရဲ့ ပွဲစဉ် ၂ ပွဲကို လွဲချော်မယ်လို့ သိရပါတယ်။

မက်ဆီဟာ အာဂျင်တီးနားအသင်းက ကိုလံဘီယာအသင်းကို အနိုင်ရခဲ့တဲ့ ဗိုလ်လုပွဲစဉ်မှာ ရရှိခဲ့တဲ့ ဒဏ်ရာကြောင့် ပွဲချိန်ပြည့် မကစားနိုင်ခဲ့ဘဲ ငိုကြွေးပြီး ကွင်းထဲက ထွက်ခွာခဲ့ရတာပါ။ 

မက်ဆီရဲ့ ဒဏ်ရာ အခြေအနေကို စစ်ဆေးမှုတွေ ပြုလုပ်အပြီးမှာ ညာဘက်ခြေချင်းဝတ် အရွတ်ဒဏ်ရာ ရရှိခဲ့တယ် လို့ အင်တာမိုင်ယာမီအသင်းက ဖော်ပြခဲ့ပါတယ်။ 

အဲဒါကြောင့် မက်ဆီဟာ အင်တာမိုင်ယာမီအသင်းရဲ့ လာမယ့် မေဂျာလိဂ်ပွဲစဉ် ၂ ပွဲကို လွဲချော်တော့မှာပါ။ 

မက်ဆီအနေနဲ့ ဒဏ်ရာ အခြေအနေ မသက်သာရင် ဇူလိုင် ၂၄ ရက်မှာ ကျင်းပမယ့် မေဂျာလိဂ် အောလ်စတား ပွဲစဉ်ကိုလည်း ပါဝင်နိုင်ဖွယ်မရှိပါဘူး။ 

မက်ဆီကတော့ ဒဏ်ရာ အခြေအနေကနေ အမြန်ဆုံး ပြန်လာမယ်လို့ ကတိပြုထားပေမယ့် ဘယ်အချိန် ပြန်လာ နိုင်မလဲဆိုတာ ပြောဆိုခဲ့ခြင်းမရှိတာ ဖြစ်ပါတယ်။ 

 မက်ဆီကိုတွေ့ရစဉ်

အင်တာမိုင်ယာမီအသင်းဟာ လာမယ့်ပွဲစဉ် ၂ ပွဲအဖြစ် တိုရွန်တို၊ ချီကာဂိုအသင်းတို့နဲ့ ယှဉ်ပြိုင်ရမှာပါ။

အင်တာမိုင်ယာမီအသင်းဟာ မေဂျာလိဂ် အရှေ့ပိုင်းဇုန်မှာ အမှတ်ပေးဇယားအဆင့် ၂ နေရာ ရပ်တည်နေပြီး အဆင့် ၁ နေရာက စင်စင်နာတီအသင်းနဲ့ ၁ မှတ်ကွာဟနေတာ ဖြစ်ပါတယ်။ 

အင်တာမိုင်ယာမီအသင်းဟာ မက်ဆီနဲ့ ဆွာရက်ဇ်တို့ ကိုပါအမေရိကဖလားပြိုင်ပွဲ သွားရောက် ယှဉ်ပြိုင်နေချိန်မှာ ရလဒ်ကောင်း ရရှိအောင် စွမ်းဆောင်ထားပြီး နောက်ဆုံးပွဲစဉ်မှာသာ စင်စင်နာတီအသင်းကို ဂိုးပြတ် အရေးနိမ့် ခဲ့တာပါ။ 

အင်တာမိုင်ယာမီအသင်းဟာ ဇူလိုင် ၂၇ ရက်မှာ လိဂ်ဖလား ချန်ပီယံဆုကို ကာကွယ်ဖို့အတွက် အုပ်စုပွဲစဉ်အဖြစ် မက္ကဆီကိုကလပ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇူလိုင် ၁၇

လူမျိုးရေးခွဲခြားတဲ့ ပြောဆိုမှုတွေ ပါဝင်တယ်လို့ ပြင်သစ်ဘောလုံးအဖွဲ့ချုပ်က ပြောထားတဲ့ ကွင်းလယ်လူ အန်ဇိုဖာနန်ဒက်ဇ်ရဲ့ ဆိုရှယ်မီဒီယာပေါ်က video ကို ချယ်လ်ဆီးအသင်းက စုံစမ်းစစ်ဆေးမှုတွေ ပြုလုပ်နေ ပါတယ်။

အာဂျင်တီးနား ကစားသမားအချို့က ပြင်သစ် ကစားသမားတွေရဲ့ အကြောင်းကို သီဆိုထားတဲ့ video နဲ့ ပတ်သက် ပြီး ပြင်သစ်ဘောလုံးအဖွဲ့ချုပ်ဟာ ကမ္ဘာ့ဘောလုံးအဖွဲ့ချုပ်(ဖီဖာ)ထံ တိုင်ကြားမယ်လို့ ဇူလိုင် ၁၆ ရက်က ပြော ထားတာပါ။

အာဂျင်တီးနားအသင်းဟာ ကိုလံဘီယာအသင်းကို အနိုင်ရပြီး ကိုပါအမေရိကဖလား ချန်ပီယံဆုကို စံချိန်တင် ၁၆ ကြိမ်မြောက် ရရှိပြီးနောက် မကြာခင်မှာ အန်ဇိုဖာနန်ဒက်ဇ်နဲ့ သူ့ရဲ့အသင်းဖော်တို့ဟာ ပြင်သစ်အသင်းကို လူမျိုး ရေးခွဲခြားတဲ့ သီချင်းသီဆိုနေတဲ့ video ထွက်ပေါ်ခဲ့တာ ဖြစ်ပါတယ်။ 

ဒီသီဆိုမှုထဲမှာ “သူတို့ဟာ ပြင်သစ်အတွက် ကစားနေကြပေမယ့် မိဘတွေက အန်ဂိုလာကပါ။ သူတို့အမေက ကင်မရွန်းဖြစ်ပြီး အဖေကတော့ နိုင်ဂျီးရီးယားကပါ။ ဒါပေ မယ့် သူတို့ရဲ့ ပတ်စပို့မှာ ပြင်သစ်လို့ ပြောထား ပါတယ်”လို့ ပါဝင်ခဲ့တာပါ။ 

အန်ဇိုဖာနန်ဒက်ဇ်ကို တွေ့ရစဉ်

ချယ်လ်ဆီးအသင်းရဲ့ ပြင်သစ်ကစားသမားတွေဟာ ဒီလိုပြောဆိုမှုကို ဒေါသထွက်နေပြီး အန်ဇိုဖာနန်ဒက်ဇ်ကို ဆိုရှယ်မီဒီယာပေါ်မှာ unfollow ပြုလုပ်ခဲ့ကြပါတယ်။ 

အန်ဇိုဖာနန်ဒက်ဇ်ကတော့ ဒီဖြစ်ရပ်နဲ့ ပတ်သက်ပြီး သူ့ရဲ့ဆိုရှယ်မီဒီယာကနေ ပြန်လည် တောင်းပန်ခဲ့တာပါ။

အန်ဇိုဖာနန်ဒက်ဇ်က “အောင်ပွဲခံ အခမ်းအနား ကျင်းပချိန်အတွင်း ကျနော့်ရဲ့ အင်စတာဂရမ်ချန်နယ်မှာ တင်ခဲ့တဲ့ video အတွက် အလေးအနက် တောင်းပန်ချင်ပါတယ်။ ဒီသီချင်းထဲမှာ ရိုင်းပြတဲ့ စာသားတွေပါဝင်ခဲ့ပြီး ဒီစကား လုံးတွေအတွက် ဆင်ခြေမရှိပါဘူး။ ကျနော်ဟာ ခွဲခြားမှုတွေကို ဆန့်ကျင်တဲ့သူဖြစ်ပြီး ဒီဖြစ်ရပ်
အတွက် တောင်းပန်ပါတယ်”လို့ ရေးသားခဲ့တာပါ။

ချယ်လ်ဆီးအသင်းဟာ ဒီအဖြစ်အပျက်နဲ့ ပတ်သက်ပြီး အလေးအနက်ထား စုံစမ်းစစ်ဆေးမှုတွေ ပြုလုပ်နေတာ ကြောင့် အန်ဇိုဖာနန်ဒက်ဇ် အနေနဲ့ အရေးယူခံရမလားဆိုတာ စောင့်ကြည့်ရမှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇူလိုင် ၁၇

ရီးရယ်လ်အသင်း ကစားသမားသစ်အဖြစ် ပရိသတ် ၈ သောင်းကျော်အရှေ့မှာ တရားဝင် မိတ်ဆက်ခံခဲ့ရပြီဖြစ်တဲ့ ဘတ်ပီက အသင်းအတွက် အရာအားလုံးကို ပေးသွားမယ်လို့ ပြောခဲ့ပါတယ်။

ဘတ်ပီက “ရီးရယ်လ်မှာကစားဖို့ နှစ်ပေါင်းများစွာ အိပ်မက် မက်ခဲ့ရပြီး အခုတော့ အိပ်မက်တွေ အမှန်တကယ် ဖြစ်လာပါပြီ။ ရီးရယ်လ်အသင်းထံ ကျနော်ရောက်ရှိဖို့ ကြိုးစားပေးခဲ့တဲ့ သူတွေအားလုံးကို ကျေးဇူးတင်ချင်ပါ တယ်။ ကျနော်ဟာ ငယ်ငယ်လေးကတည်းက ဒီမှာကစားဖို့ အိပ်မက်ရှိခဲ့တာပါ။ ဒီမှာရှိနေရတာက ကျနော့် အတွက် အများကြီး အဓိပ္ပါယ်ရှိပြီး အခုအချိန်မှာ နောက်ထပ် အိပ်မက်တစ်ခုကို အကောင်အထည်ဖော်ချင်ပါ တယ်။ ဒီကလပ်နဲ့ တံဆိပ်အတွက် ကျနော်အရာအားလုံးကို ပေးသွားမှာပါ”လို့ ပြောခဲ့ပါတယ်။

အသက် ၂၅ နှစ်အရွယ်ရှိ ဘတ်ပီဟာ ပြီးခဲ့တဲ့နွေရာသီက ပီအက်စ်ဂျီအသင်းနဲ့ စာချုပ်ကုန်ဆုံးပြီးနောက် ရီးရယ်လ် အသင်းထံ ၅ နှစ် စာချုပ်ချုပ်ဆိုကာ ပြောင်းရွှေ့ခဲ့တာ ဖြစ်ပါတယ်။ 

ရီးရယ်လ်အသင်းဟာ ဘတ်ပီကို ခေါ်ယူဖို့ ၂၀၁၇ နဲ့ ၂၀၂၂ ခုနှစ်တွေမှာ နီးစပ်ခဲ့ပေမယ့် ကစားသမားက ပီအက်စ်ဂျီ အသင်းမှာ ဆက်နေဖို့ ဆုံးဖြတ်ခဲ့တာပါ။

ဒါပေမယ့် ဘတ်ပီဟာ ပီအက်စ်ဂျီအသင်းနဲ့ စာချုပ်ကုန်ဆုံးချိန်မှာ သူငယ်ငယ်လေးကတည်းက ကစားချင်တဲ့ ရီးရယ်လ်အသင်းထံ ပြောင်းရွှေ့လာခဲ့တာ ဖြစ်ပါတယ်။ 

ဘတ်ပီကို တွေ့ရစဉ်

ဘတ်ပီဟာ ပြီးခဲ့တဲ့ ယူရို ၂၀၂၄ ပြိုင်ပွဲအုပ်စု အဖွင့်ပွဲစဉ်ဖြစ်တဲ့ သြစတြီးယားအသင်းနဲ့ ပွဲစဉ်မှာ နှာခေါင်းရိုး ကျိုးခဲ့တာကို ရီးရယ်လ်အသင်း ဆရာဝန်တွေက စစ်ဆေးမှုတွေ ပြုလုပ်ခဲ့ပါတယ်။ 

ဘတ်ပီက သြဂုတ် ၁၄ ရက်မှာ ယှဉ်ပြိုင်မယ့် ဥရောပစူပါဖလားပွဲစဉ်မှာ ရီးရယ်လ်အသင်းအတွက် ပါဝင်ကစားချင် တယ်လို့ သတင်းစာ ရှင်းလင်းပွဲမှာ ပြောခဲ့ပါတယ်။

ဘတ်ပီက “ကျနော်တို့ဟာ ဆေးအဖွဲ့နဲ့ စကားပြောဆိုခဲ့ပြီး အတူတူ လုပ်ဆောင်သွားကြမှာပါ။ စူပါဖလားပွဲစဉ်မှာ ပါဝင်ကစားဖို့ ကျနော်မျှော်လင့်ထားပေမယ့် နည်းပြအပေါ်မှာ မူတည်ပါတယ်။ ကျနော်ကတော့ အသင်းကို အကူအညီပေးဖို့ အဆင်သင့်ဖြစ်နေပါပြီ”လို့ ပြောခဲ့တာပါ။

ရီးရယ်လ်အသင်းဟာ ဒီလ အကုန်ပိုင်းမှာ အေစီမီလန်၊ ဘာစီလိုနာ၊ ချယ်လ်ဆီး အသင်းတို့နဲ့ ရာသီကြိုခြေစမ်းပွဲ ယှဉ်ပြိုင်ဖို့ အမေရိကန်နိုင်ငံကို ထွက်ခွာမှာဖြစ်ပြီး ဘတ်ပီကတော့ ဒီခရီးစဉ်ကိုပါ အသင်းသစ်နဲ့အတူ လိုက်ပါနိုင်ဖို့ မျှော်လင့်နေတာ ဖြစ်ပါတယ်။

Source: ESPN

CNI Sport News
၂၀၂၄ ခုနှစ်၊ ဇူလိုင် ၁၆

အင်္ဂလန်အသင်းဟာ ယူရို ၂၀၂၄ ပြိုင်ပွဲ ဗိုလ်လုပွဲမှာ စပိန်အသင်းကို အရေးနိမ့်ပြီးနောက် ၂ ရက်အကြာမှာ ဆောက်ဂိတ်ဟာ အင်္ဂလန်အသင်း နည်းပြရာထူးက နုတ်ထွက်ခဲ့ပါတယ်။

အင်္ဂလန်အသင်းကို ၂၀၁၆ ခုနှစ်ကတည်းက စတင်ကိုင်တွယ်ခဲ့တဲ့ ဆောက်ဂိတ်ဟာ သူ့ရဲ့လက်ထက်မှာ နိုင်ငံ အသင်းကို ယူရိုပြိုင်ပွဲဗိုလ်လုပွဲ ၂ ကြိမ်ဆက် တက်နိုင်အောင် ပို့ဆောင်ပေးခဲ့ပေမယ့် ၂ ကြိမ်စလုံး အရေးနိမ့်ခဲ့တာပါ။ 

ဆောက်ဂိတ်ဟာ အင်္ဂလန်ဘောလုံးအဖွဲ့ချုပ်(FA)နဲ့ ချုပ်ဆိုထားတဲ့ စာချုပ်ကုန်ဆုံးမယ့် ဒီဇင်ဘာမတိုင်ခင် နည်းပြရာထူးက နုတ်ထွက်ခဲ့တာပါ။

ဆောက်ဂိတ်က "အင်္ဂလန်အသင်းအတွက် ကစားရတာနဲ့ နည်းပြအဖြစ် ကိုင်တွယ်ခွင့်ရတာဟာ ကျနော့်ဘဝ အတွက် ဂုဏ်ယူစရာပါပဲ။ ဒါဟာ ကျနော့်အတွက် အဓိပ္ပါယ် အများကြီးရှိပြီး ကျနော်ဟာ အားလုံးကို ပေးခဲ့ပါ တယ်။ ဒါပေမယ့် ပြောင်းလဲဖို့ အချိန်ရောက်ပါပြီ။ စပိန်အသင်းနဲ့ ဗိုလ်လုပွဲဟာ အင်္ဂလန်အသင်းနည်းပြဘဝ ကျနော့်ရဲ့နောက်ဆုံးပွဲပါ"လို ပြောခဲ့ပါတယ်။

ဆောက်ဂိတ်ဟာ အင်္ဂလန်အသင်းကို အဓိကပြိုင်ပွဲကြီး(၄)ခု ကိုင်တွယ်ခဲ့ပြီး ယူရိုပြိုင်ပွဲမှာ ဗိုလ်လုပွဲ(၂)ကြိမ်၊ ၂၀၁၈ ကမ္ဘာ့ဖလားပြိုင်ပွဲမှာ ဆီမီးဖိုင်နယ်နဲ့ ၂၀၂၂ ကမ္ဘာ့ဖလားပြိုင်ပွဲမှာ ကွာတားဖိုင်နယ် ရောက်ရှိအောင် ကိုင်တွယ်ပေး နိုင်ခဲ့တာပါ။ 

ဆောက်ဂိတ်ဟာ အင်္ဂလန်အသင်းကို ၁၀၂ ပွဲ ကိုင်တွယ်ခဲ့ပြီး ၆၄ ပွဲအနိုင်၊ ၂၀ ပွဲသရေနဲ့ ၁၈ ပွဲရှုံးနိမ့်ခဲ့ကာ အနိုင် ၆၃ ရာခိုင်နှုန်းအထိ ရှိခဲ့ပါတယ်။

အင်္ဂလန်ဘောလုံးအဖွဲ့ချုပ်ဟာ စက်တင်ဘာလမှာ ကစားမယ့် UEFA နေရှင်းလိဂ်ပွဲစဉ် မတိုင်ခင် နည်းပြသစ် ခန့်အပ်ဖို့ အမြန်ဆုံး လုပ်ဆောင်နေတယ်လို့ အတည်ပြုထားပါတယ်။ 

Source: BBc

CNI Sport News

၂၀၂၄ ခုနှစ်၊ ဇူလိုင် ၁၆

ယူရို ၂၀၂၄ ပြိုင်ပွဲမှာ စွမ်းဆောင်ရည်ကောင်းတွေ မပြသနိုင်လို့ ဝေဖန်မှုတွေ ခံခဲ့ရတဲ့ ဟာရီကိန်းက အင်္ဂလန် အင်္ကျီနဲ့ တိုက်ပွဲထပ်ဝင်ဖို့ အဆင်သင့်ဖြစ်နေပြီလို့ ပြောခဲ့ပါတယ်။

ဟာရီကိန်းက “ကျနော်တို့ အလွန်ကြိုးစားပြီး မအောင်မြင်ခဲ့တဲ့အတွက် ကြေကွဲရပါတယ်။ ဒီပြိုင်ပွဲက ရှည်လျား ခက်ခဲတဲ့ ပြိုင်ပွဲဖြစ်ပြီး ဗိုလ်လုပွဲကို တက်နိုင်ခဲ့တဲ့အတွက် အသင်းဖော်တွေနဲ့ နည်းပြအဖွဲ့ဝင်တွေကို ဂုဏ်ယူပါ တယ်။ ကျနော်တို့ရဲ့ပစ်မှတ် ပျက်ပြယ်သွားခဲ့ပေမယ့် ကျနော်တို့ အမြဲတမ်း လုပ်ဆောင်နေတဲ့ အရာအတိုင်း လုပ်ဆောင်သွားမှာပါ။ ကျနော်ဟာ အင်္ဂလန်အင်္ကျီနဲ့ တိုက်ပွဲထပ်ဝင်ဖို့ အဆင်သင့်ဖြစ်နေပါပြီ”လို့ သူ့ရဲ့ ဆိုရှယ် မီဒီယာမှာ ရေးသားခဲ့တာပါ။

ဘိုင်ယန်မြူးနစ်အသင်း တိုက်စစ်မှူး ဟာရီကိန်းဟာ ယူရို ၂၀၂၄ ပြိုင်ပွဲမှာ အင်္ဂလန်အသင်းအတွက် ၃ ဂိုး သွင်းယူပြီး ရွှေဖိနပ်ဆုကို အခြားကစားသမား ၅ ဦးနဲ့ ပူးတွဲရရှိခဲ့တာ ဖြစ်ပါတယ်။ 

ဟာရီကိန်းဟာ အင်္ဂလန်အသင်းကို ယူရိုဗိုလ်လုပွဲ ၂ ကြိမ်ဆက် တက်နိုင်အောင် ကူညီပေးခဲ့ပေမယ့် ချန်ပီယံဆု ရရှိအောင်တော့ စွမ်းဆောင် ပေးနိုင်ခဲ့ခြင်း မရှိပါဘူး။ 

ဟာရီကိန်းဟာ ယူရို ၂၀၂၄ ပြိုင်ပွဲမှာ ပုံစံကောင်း ပျောက်ဆုံးခဲ့လို့ ဝေဖန်မှုတွေ ခံခဲ့ရပြီး အင်္ဂလန်အသင်းရဲ့ ရှုံးထွက်အဆင့်ပွဲစဉ်တွေမှာ လူစားလဲခြင်းကို ခံခဲ့ရတာပါ။

ဟာရီကိန်းကို တွေ့ရစဉ်

ဒါပေမယ့် ဟာရီကိန်းကတော့ အင်္ဂလန်အသင်းအတွက် ဆက်ပြီးတိုက်ပွဲဝင်ဖို့ ဆုံးဖြတ်ထားတာ ဖြစ်ပါတယ်။ 

ဟာရီကိန်းဟာ အင်္ဂလန်အသင်းအတွက် ၉၈ ပွဲ ကစားထားပြီး ၆၆ ဂိုးသွင်းယူကာ နိုင်ငံအသင်းရဲ့ ဂိုးသွင်း အများဆုံးကစားသမားအဖြစ် ထိပ်ဆုံးက ရပ်တည်နေတာပါ။ 

ဟာရီကိန်းဟာ ရာသီသစ်အတွက် ဘိုင်ယန်မြူးနစ်အသင်းနဲ့ မပူးပေါင်းခင် အားလပ်ရက်အနားယူဖို့ ရှိနေတာ ဖြစ်ပါတယ်။ 

ဘိုင်ယန်မြူးနစ်အသင်းဟာ ဇူလိုင် ၂၄ ရက်က စတင်ကာ ရာသီကြို ခြေစမ်းပွဲစဉ်တွေ စတင်ယှဉ်ပြိုင်မှာဖြစ်ပြီး ဘွန်ဒစ်လီဂါ အဖွင့်ပွဲစဉ်အဖြစ် ဝုလ်ဖ်ဘတ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇူလိုင် ၁၆

အေစီမီလန်အသင်း တိုက်စစ်မှူးဟောင်း ဂီရော့ဒ်ဟာ ပြင်သစ်လက်ရွေးစင် ကစားသမားဘဝက အနားယူပြီလို့ ကြေညာခဲ့ပါတယ်။

ဂီရော့ဒ်က “စာမျက်နှာတစ်ခုပြောင်းပြီး အခြားစွန့်စားခန်းတွေဆီကို ကျနော် သွားရောက်နေပါပြီ။ ကျနော်ဟာ အခုအချိန်ကစပြီး ပြင်သစ်အသင်းကို အားပေးတဲ့သူ ဖြစ်လာပါပြီ။ ၁၃ နှစ်ကြာ ကစားခဲ့တဲ့ ပြင်သစ်အသင်းဟာ ကျနော့် နှလုံးသားထဲမှာ အမြဲတမ်းရှိနေမှာပါ။ ဒါဟာ ကျနော့်အတွက် အကြီးမားဆုံးဂုဏ်ယူမှုနဲ့ အလှပဆုံး အမှတ်တရပါပဲ”လို့ အင်စတာဂရမ်မှာ ရေးသားခဲ့တာပါ။

အသက် ၃၇ နှစ်အရွယ်ရှိ ဂီရော့ဒ်ဟာ ယူရို ၂၀၂၄ ပြိုင်ပွဲ မတိုင်ခင်ကတည်းက ဒီပြိုင်ပွဲဟာ သူ့ရဲ့နောက်ဆုံး နိုင်ငံတကာပြိုင်ပွဲ ဖြစ်မယ်လို့ ပြောထားတာ ဖြစ်ပါတယ်။

ဂီရော့ဒ်ဟာ စပိန်အသင်းကို အရေးနိမ့်ခဲ့တဲ့ ဆီမီးဖိုင်နယ်ပွဲစဉ်မှာ ပြင်သစ်ကစားသမားဘဝ သူ့ရဲ့နောက်ဆုံး ပွဲစဉ်အဖြစ် လူစားဝင် ပါဝင်ကစားခဲ့တာပါ။ 

ဂီရော့ဒ်ကို တွေ့ရစဉ်

ဂီရော့ဒ်ဟာ ပြင်သစ်အသင်းအတွက် ၅၇ ဂိုး သွင်းယူခဲ့ပြီး နိုင်ငံအသင်းရဲ့ ဂိုးသွင်း အများဆုံး ကစားသမားအဖြစ် ရပ်တည်ခဲ့ပါတယ်။

ဒါအပြင် ဂီရော့ဒ်ဟာ ပြင်သစ်အသင်းရဲ့ ပွဲအရေအတွက် အများဆုံး ကစားထားတဲ့ ကစားသမားစာရင်းမှာ ၁၃၇ ပွဲနဲ့ လိုရစ်၊ သူရမ်တို့ရဲ့နောက် တတိယနေရာမှာ ရပ်တည်နေတာပါ။ 

ဂီရော့ဒ်ဟာ ပြင်သစ်အသင်းနဲ့အတူ ၂၀၁၈ ကမ္ဘာ့ဖလားပြိုင်ပွဲ၊ ၂၀၂၀-၂၁ UEFA နေးရှင်းလိဂ်ပြိုင်ပွဲတွေမှာ ချန်ပီယံဆုကို ရယူနိုင်ခဲ့တာ ဖြစ်ပါတယ်။ 

အေစီမီလန်အသင်းနဲ့ စာချုပ် ကုန်ဆုံးခဲ့ပြီဖြစ်တဲ့ ဂီရော့ဒ်ဟာ သူ့ရဲ့ ဥရောပ ကစားသမားဘဝကို အဆုံးသတ်ကာ မေဂျာလိဂ်ကလပ် LAFC အသင်းမှာ သွားရောက် ကစားတော့မှာပါ။

ဂီရော့ဒ်ဟာ LAFC အသင်းနဲ့ ၂၀၂၅ ခုနှစ်အထိ စာချုပ်ချုပ်ဆိုထားပြီး ၂၀၂၆ ခုနှစ်အထိ စာချုပ်သက်တမ်း တိုးဖို့အတွက် ရွေးချယ်ခွင့်ရှိနေတာ ဖြစ်ပါတယ်။ 

Source: Goal