CNI Sport News
၂၀၂၅ ခုနှစ်၊ ဒီဇင်ဘာ ၁၀
အတ္တလန်တာအသင်းကို ၂ ဂိုး-၁ ဂိုးနဲ့ အရေးနိမ့်ခဲ့တဲ့ ချန်ပီယံလိဂ်ပွဲစဉ်မှာ ချယ်လ်ဆီးအသင်းဟာ ချေပဂိုးပေး ရပြီးနောက်ပိုင်း ပွဲကိုထိန်းချုပ်နိုင်စွမ်း ဆုံးရှုံးသွားခဲ့တယ်လို့ နည်းပြ မာရက်စ်ကာက ပြောခဲ့ပါတယ်။
မာရက်စ်ကာက “ဂိုးပေးလိုက်ရပြီးနောက် ကျနော်တို့ ထိန်းချုပ်နိုင်စွမ်း ဆုံးရှုံးသွားခဲ့ပါတယ်။ ဒုတိယပိုင်းမှာ ကျနော်တို့ နောက်ထပ် သွင်းဂိုးရနိုင်မယ့် အခွင့်အရေး ၂ ကြိမ်ရခဲ့ပါတယ်။ ၁ ဂိုးစီ သရေဖြစ်သွားတဲ့အချိန်မှာ ကျနော်တို့ အာရုံစူးစိုက်မှုတွေ လျော့သွားခဲ့တာပါ။ ပေးခဲ့ရတဲ့ ၂ ဂိုးစလုံးကို ကျနော်တို့ တားဆီးနိုင်သင့်ပြီး ဒါက လွယ်ကူတဲ့ သွင်းဂိုးတွေလို့ “ပြောခဲ့ပါတယ်။
ချယ်လ်ဆီးအသင်းဟာ ဒီပွဲရဲ့ ပထမပိုင်းမှာ ပက်ဒရိုရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဒုတိယပိုင်းမှာ ချေပဂိုးနဲ့ အနိုင်ဂိုးခွင့်ပြုခဲ့ရပြီး အတ္တလန်တာအသင်းကို အရေးနိမ့်ခဲ့တာဖြစ်ပါတယ်။
ချယ်လ်ဆီးအသင်းဟာ ဒီရှုံးပွဲကြောင့် ချန်ပီယံလိဂ် League Phase ပွဲစဉ် ၆ ပွဲ ကစားအပြီးမှာ ရမှတ် ၁၀ မှတ်နဲ့ အဆင့် ၁၁ နေရာမှာ ရပ်တည်နေပါတယ်။
ချယ်လ်ဆီးနဲ့ အတ္တလန်တာ ယှဉ်ပြိုင်နေစဉ်
ချယ်လ်ဆီးအသင်းအနေနဲ့ ထိပ်ဆုံး ၈ သင်းထဲ ဝင်ရောက်ပြီး ၁၆ သင်းအဆင့်ကို တိုက်ရိုက် တက်ချင်တယ်ဆိုရင် ချန်ပီယံလိဂ် လက်ကျန်ပွဲစဉ် ၂ ပွဲစလုံးကို အနိုင်ရဖို့ လိုအပ်သွားပြီဖြစ်ပါတယ်။
ချယ်လ်ဆီးအသင်းဟာ လက်ကျန် ၂ ပွဲအဖြစ် ပါဖို့စ်၊ နာပိုလီအသင်းတို့နဲ့ ယှဉ်ပြိုင်ရမှာပါ။
ချယ်လ်ဆီးအသင်းနည်းပြ မာရက်စ်ကာက ပလေးအော့ဖ် ယှဉ်ပြိုင်ရရင် ပွဲစဉ်ဇယား အလွန်ကျပ်သွားမှာ ဖြစ်တဲ့ အတွက် ထိပ်ဆုံး ၈ သင်းထဲ ဝင်ချင်ရင် နောက်ဆုံး ၂ ပွဲစလုံး အနိုင်ရဖို့ လိုအပ်တယ်လို့ ပြောခဲ့ပါတယ်။
ချယ်လ်ဆီးအသင်းဟာ အတ္တလန်တာအသင်းနဲ့ပွဲစဉ် အပါအဝင် နောက်ဆုံး ကစားထားတဲ့ ပြိုင်ပွဲစုံ ၄ ပွဲ ဆက်တိုက်နိုင်ပွဲ ပျောက်ဆုံးနေတာပါ။
ချယ်လ်ဆီးအသင်းဟာ လာမယ့် ပရီးမီးယားလိဂ် ပွဲစဉ်အဖြစ် အဲဗာတန်အသင်းနဲ့ ယှဉ်ပြိုင်ရမှာဖြစ်ပြီး နည်းပြ မာရက်စ်ကာက ပွဲတွေအနိုင်ရဖို့ လိုအပ်တဲ့အတွက် အာရုံစိုက်ပြီး အကောင်းဆုံး ပြင်ဆင်သွားမယ်လို့ ပြောခဲ့ ပါတယ်။
Source: ESPN
