CNI News
၂၀၂၅ ခုနှစ်၊ မတ်လ ၁၅

United States Agency for Global Media(USAGM)ကို တခြား အေဂျင်စီတချို့နှင့်အတူ မလိုသည့် ကဏ္ဍ/အဖွဲ့အစည်း အဖြစ်သတ်မှတ်၍ ဖျက်သိမ်းကြောင်း အမေရိကန်အစိုးရ အိမ်ဖြူတော်က ၂၀၂၅ ခုနှစ်၊ မတ်လ ၁၄ ရက်နေ့စွဲဖြင့် ထုတ်ပြန်ကြေညာခဲ့သည်။

ထို့ကြောင့် USAGM ၏ အောက်မှာ လုပ်ငန်းလည်ပတ်နေသည့် အမေရိကန်အခြေစိုက် အမေရိကန်အသံ(VOA)နှင့် လွတ်လပ်တဲ့အာရှအသံ(RFA) သတင်းဌာနများ လုပ်ငန်းလည်ပတ်ရန် အဟန့်အတားများဖြစ်ပေါ်ခဲ့ကြောင်း သိရသည်။

VOA မြန်မာပိုင်းအကြီးအကဲအဖြစ် တာဝန်ထမ်းဆောင်ခဲ့ဖူးသူ ဦးသန်းလွင်ထွန်းက “VOA/RFA ဖျက်သိမ်းခံရပြီ” ဟု သူ၏ ‌ဖေ့စ်ဘွတ်ခ် လူမှုကွန်ရက်စာမျက်နှာပေါ်မှာ ရေးသားထုတ်လွှင့်ခဲ့သည်။

၎င်းက “VOA နဲ့ RFA တို့ရဲ့ခေါင်းကိုင် (Umbrella)အေဂျင်စီအဖွဲ့ကြီးဖြစ်တဲ့ USAGM (United States Agency for Global Media) ကို (တခြားအေဂျင်စီအချို့နဲ့အတူ) အမေရိကန်ဖက်ဒရယ်ဗြုရိုကရေစီ အုပ်ချုပ်ရေးရဲ့ မလိုအပ်တဲ့ ကဏ္ဍ/အဖွဲ့အစည်းတွေ အဖြစ်သတ်မှတ်ပြီး ဖျက်သိမ်းကြောင်း အမေရိကန်သမ္မတအိမ်ဖြူတော်က ၁၄ မတ်လ ၂၀၂၅ နေ့စွဲနဲ့ ကြေငြာချက်ထုတ်ပြန်လိုက်ပါပြီ”ဟု ရေးသားခဲ့သည်။

အမေရိကန်အစိုးရ အိမ်ဖြူတော်၏ ညွှန်ကြားချက်ထွက်ပေါ်လာပြီးနောက်မှာတော့ VOA မြန်မာပိုင်းမှာ အချိန်ပြည့် ဝန်ထမ်းအဖြစ် လုပ်ကိုင်နေသူများထံသို့ အလုပ်ကနေ ချက်ခြင်း ခွင့်ပေးကြောင်း၊ ရုံးကို လာရောက်စရာ မလိုတော့ ကြောင်း ညွှန်ကြားချက် အီးမေးလ်များ ပေးပို့လာကြောင်း သိရသည်။

တပြိုင်တည်းမှာပဲ VOA မြန်မာပိုင်းက ထုတ်လွှင့်နေသော တိုက်ရိုက်အစီအစဉ်များကို Website နှင့် ဆိုရှယ်မီဒီယာ များမှာ ကြည့်ရှုမရတော့ကြောင်း သိရသည်။

CNI News
၂၀၂၅ ခုနှစ်၊ မတ်လ ၁၅

နစက၏ နိုင်ငံခြားရေးဝန်ကြီးဌာနမှ အငယ်တန်း အရာထမ်း ၃၀ ဦးကို အိန္ဒိယနိုင်ငံမှာ အထူးသံတမန် သင်တန်း ပေးအပ်သွားမည်ဟု အိန္ဒိယသံရုံးက ထုတ်ပြန်ခဲ့သည်။

အဆိုပါ သင်တန်းကို နစက၏ နိုင်ငံခြားရေးဝန်ကြီးဌာန၊ မဟာဗျူဟာလေ့လာရေးနှင့် လေ့ကျင့်ရေးဦးစီးဌာနနှင့် အိန္ဒိယနိုင်ငံ၊ ပြည်ပရေးရာဝန်ကြီးဌာန Sushma Swaraj Institute of Foreign Service-SSIFS တို့အကြား လက်မှတ်ထိုးထားသည့် ပူးပေါင်းဆောင်ရွက်ခြင်းဆိုင်ရာ နားလည်မှုစာချွန်လွှာ(MOU)အရ အိန္ဒိယနိုင်ငံမှာ မတ် ၁၇ ရက်မှ ၂၇ ရက်အထိ ပို့ချမည်ဖြစ်သည်။

ထိုသင်တန်း တက်ရောက်မည့် ဝန်ထမ်း ၃၀ ဦးသည် မတ်လ ၁၅ ရက်တွင် ရန်ကုန်မှ အိန္ဒိယနိုင်ငံသို့ ထွက်ခွာသွား ကြပြီးဖြစ်သည်။

အထူးသံတမန်သင်တန်းတွင် ပထဝီနိုင်ငံ‌ရေး၊ အိန္ဒိယနိုင်ငံ၏ နိုင်ငံခြားရေးမူဝါဒ၊ မြန်မာ-အိန္ဒိယ နှစ်နိုင်ငံ ချစ်ကြည်ရေး ပူးပေါင်းဆောင်ရွက်မှု၊ နိုင်ငံတကာအဖွဲ့အစည်းများ စသည့် အခြေအနေများကို ပို့ချမည်ဖြစ်သည်။

ထို့နောက် မြန်မာသံတမန်ငယ်များအား သံတမန်ရေးရာ စွမ်းရည်များ မြှင့်တင်ရန်နှင့် အိန္ဒိယနိုင်ငံ၏ ယဉ်ကျေးမှု အမွေအနှစ်များ လေ့လာခြင်းတို့လည်း ပါဝင်မည်ဖြစ်ကြောင်း အိန္ဒိယသံရုံးနှင့် နစက၏ နိုင်ငံခြားရေးဝန်ကြီးဌာနတို့က ထုတ်ပြန်ခဲ့သည်။

CNI News

၂၀၂၅ ခုနှစ်၊ မတ်လ ၁၄

အိန္ဒိယ-မြန်မာနယ်စပ်အနီး တမူးဒေသတွင် နာဂအမျိုးသားဆိုရှယ်လစ်ကောင်စီ-ကပ္ပလန်(NSCN-K) နှင့် ပြည်သူ့ကာကွယ်ရေးတပ်ဖွဲ့ (PDF) တို့အကြား ၂၀၂၅ ခုနှစ်၊ မတ်လ ၁၂ ရက်က တိုက်ပွဲဖြစ်ပွားခဲ့သည်ဟု India Today NE ဝက်ဘ်ဆိုက်မှ ဖော်ပြခဲ့သည်။

ကနဦး ထွက်ပေါ်နေသည့် သတင်းများအရ PDF ဘက်မှ ၃၂ ဦး သေဆုံးကာ ၅၀ ကျော် ဒဏ်ရာရရှိခဲ့ပြီး NSCN-K ဘက်မှာတော့ ဗိုလ်ကြီးအဆင့် တစ်ဦး အပါအဝင် ၃ ဦး သေဆုံးခဲ့ကြောင်း အိန္ဒိယ မီဒီယာက ဖော်ပြခဲ့သည်။

ထိုတိုက်ပွဲတွင် NSCN-K ဘက်မှ သေဆုံးခဲ့သူ ၃ ဦးမှာ ဗိုလ်ကြီး Thiangjeng Liangmai (၃၀ နှစ်) ၊ တပ်သား Hoilamlung Phiang (၂၂ နှစ်) နှင့် တပ်သား Chapyang Zemi (၃၅ နှစ်) တို့ဖြစ်သည်။

NSCN-K/YA အဖွဲ့ကို တွေ့ရစဉ်

သေဆုံးသွားသော PDF အချို့သည် ဒေသတွင်း လှုပ်ရှားနေသည့် ကူကီးအမျိုးသားတပ်မတော်-မြန်မာနိုင်ငံ(KNA-B) နှင့် ဆက်နွှယ်မှုရှိကြောင်း သတင်းရင်းမြစ်များက ဖော်ပြခဲ့သည်။

လုံခြုံရေးတပ်ဖွဲ့များက ထိုဖြစ်ရပ်ကို စောင့်ကြည့်နေပြီး အခြေအနေမှာ တင်းမာနေဆဲဖြစ်သည်။

တမူးဒေသတွင် NSCN-K လှုပ်ရှားနေသည်ဟု India Today NE မှ ဖော်ပြခဲ့သော်လည်း ဒေသတွင်း သတင်းရင်း မြစ်များ၏ အဆိုအရ NSCN-K မဟုတ်ဘဲ NSCN-IM နှင့် ကသည်းလက်နက်ကိုင် PLA တို့သာ လှုပ်ရှားလျက်ရှိ ကြောင်း သိရသည်။

NSCN-K တွင် ယုံးအောင် ဦးဆောင်သည့် NSCN-K/YA နှင့် အန်းမိုင် ဦးဆောင်သော NSCN-K/AM ဟု၍ ၂ ဖွဲ့ရှိရာ ထို ၂ ဖွဲ့စလုံးသည် စစ်ကိုင်းတိုင်းဒေသကြီး၊ အိန္ဒိယ-မြန်မာနယ်စပ် နာဂဒေသများတွင် လှုပ်ရှားလျက်ရှိကြောင်း သိရသည်။

Source: India Today NE

CNI News

၂၀၂၅ ခုနှစ်၊ မတ် ၁၄

ပါတီမှတ်ပုံတင် အသစ်ကျသည့် တိုင်းရင်းသားပါတီများ ရှိလာသောကြောင့် နိုင်ငံရေးပါတီများ အစုအဖွဲ့ တိုးချဲ့ရန် ပါတီများအချင်းချင်း ဆွေးနွေးကြမည်ဖြစ်ကြောင်း ပြည်သူ့ပါတီ(PP)မှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

နိုင်ငံရေးပါတီများအချင်းချင်း ၂၀၂၅ ခုနှစ်၊ မတ်လ ၁၇ ရက်နေ့တွင် အစည်းအဝေးခေါ်၍ ဆွေးနွေးကြမည် ဖြစ်ကြောင်း သိရသည်။

နိုင်ငံရေးပါတီများ အချင်းချင်း ဆွေးနွေးမည့် အစည်းအဝေးတွင် နိုင်ငံရေးပါတီများ အစုအဖွဲ့တိုးချဲ့ရန်ကိစ္စများ ဆွေးနွေးမည်ကြောင်း၊ ရှေ့လုပ်ငန်းစဥ်များထဲ၌ သဘောတူညီမှု ရရှိပြီးသား အချက်များနှင့် နောက်ထပ် အသစ် သဘောတူညီမှုရရှိရန် ဆွေးနွေးမည့် ကိစ္စများလည်း ပါဝင်ကြောင်း ပြည်သူ့ပါတီ(PP)မှဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “ကျ‌နော်တို့ ဒီနိုင်ငံရေးပါတီများ အလုပ်အဖွဲ့ဆိုပြီးတော့ ကျနော်တို့ ပါတီများအားလုံးထဲမှာ ‌ရွေးချယ်ထား တာ ရှိတယ်ပေါ့နော် ၁၆ ပါတီ၊ အဲတော့ ၁၆ ပါတီ ကနေပြီးတော့မှ ဦးဆောင်ပါတီ ၄ ပါတီ ပြီးတော့မှ အလှည့်ကျ ခေါင်း‌ဆောင် တာဝန်ယူမှုနဲ့ သွားတဲ့အခါကျတော့ အဲဒီနောက်ပိုင်းမှာ ပါတီမှတ်ပုံတင် အသစ်ကျတဲ့ တိုင်းရင်းသား ပါတီတွေလည်း တော်တော်များများ ရှိလာတယ်၊ ရှိလာတော့ ကျနော်တို့က ဒီဟာကို အစုအဖွဲ့ တိုးချဲ့ဖို့ကိစ္စ အဲတာ ကို ပြီးခဲ့တဲ့ NSPNC နဲ့ အစည်းအဝေးမှာလည်းပဲ ဒါကျနော်တို့ အကြံပြု လမ်းညွှန်ခဲ့တာရှိတယ်၊ ဆိုတော့ အဲဒါ ကြောင့် ဒီကိစ္စလေးတွေလည်း ဆွေးနွေးမယ်၊ နောက်ကျနော်တို့ ရှေ့လုပ်ငန်းစဥ်တွေပေါ့နော် အဲဒါနဲ့ ပတ်သက်ပြီး တော့လည်း နိုင်ငံရေးပါတီရဲ့ အစုအဖွဲ့ထဲမှာ ဆွေးနွေးကြဖို့အတွက် ကျနော်တို့ စီစဥ်ထားတာ ဖြစ်ပါတယ်၊ ရှေ့လုပ်ငန်းစဥ်တွေထဲမှာ သဘောတူညီမှု ရရှိပြီးသား အချက်တွေရယ်၊ နောက်ထပ် အသစ် ထပ်မံပြီးတော့ သဘောတူညီမှု ရဖို့အတွက် ဆွေးနွေးမယ့်ကိစ္စတွေ ဒါတွေလည်း ကျနော်တို့ ဆွေးနွေးကြမှာပါ” ဟု ပြောသည်။

နိုင်ငံရေးပါတီများနဲ့ NSPNC တွေ့ဆုံ ဆွေးနွေးနေစဉ်

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် နိုင်ငံရေးပါတီ များ အစုအဖွဲ့၏ အလုပ်အဖွဲ့တို့သည် ၂၀၂၅ ခုနှစ်၊ ဇန်နဝါရီ ၂၃ ရက်နှင့် ၂၄ ရက်များတွင် တွေ့ဆုံဆွေးနွေးခဲ့သည်။

အဆိုပါ ဆွေးနွေးပွဲတွင် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး သဘောထားစုစည်းချက် ၄၃ ချက်အား သဘောတူညီချက် လက်မှတ်ရေးထိုးနိုင်ခဲ့ကြောင်း၊ ဒီမိုကရေစီနှင့် ဖက်ဒရယ်စနစ်အား အခြေခံသည့် ပြည်ထောင်စုအဖြစ် ဖွဲ့စည်းတည်ဆောက်သည်ဟူ၍ ဖွဲ့စည်းပုံအခြေခံဥပဒေတွင် ပြင်ဆင်ပြဋ္ဌာန်းရန် သဘောတူ ဆုံးဖြတ်နိုင်ခဲ့သည့်အပြင် ဆွေးနွေးဆဲ ၇ ချက်နှင့် ပြင်ဆင်ရန် ထပ်မံတင်ပြ ထားသည်များလည်းရှိကြောင်း သိရ သည်။

နိုင်ငံရေးပါတီများ အလုပ်အဖွဲ့ တိုးချဲ့ ဖွဲ့စည်းရန် အစည်းအဝေးခေါ်ယူ၍ ဆွေးနွေးကြမည်ဖြစ်ကြောင်း၊ NSPNC နှင့် ဆွေးနွေးရန် မည်သည့်အချက်များအား ထပ်မံထည့်ရမည်ဆိုသည့် ကိစ္စများလည်း ဆွေးနွေးမည်ဖြစ်ကြောင်း အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

နိုင်ငံရေးပါတီ ခေါင်းဆောင်များနဲ့ နစကဥက္ကဋ္ဌ တွေ့ဆုံစဉ်

၎င်းက “ကျနော်တို့ ၁၆ ပါတီပေါ့နော် အလုပ်အဖွဲ့ရှိတာကိုး၊ အလုပ်အဖွဲ့ကို ရှေ့မှာတုန်းက NSPNC ကနေမှ ထပ်တိုးလာတဲ့ တိုင်းရင်းသားပါတီတွေ ရှိတယ်၊ အဲအတွက်ကြောင့်မို့လို့  ၂၄ ပါတီလောက်ထိ တိုးချဲ့ပြီး ဖွဲ့စည်းဖို့ ဆိုပြီးတော့မှ ဗိုလ်ချုပ်ထွန်းထွန်းနောင် ဥက္ကဋ္ဌ ဖြစ်စဥ်မှာတုန်းက လုပ်ခဲ့တာပေါ့၊ အခုကျနော်တို့က ၁၇ ရက်နေ့မှာ၊ ၁၇ ရက်နေ့ နေ့လည် ၁ နာရီပေါ့နော် အစည်းအဝေးတော့ ခေါ်ထားတယ်၊ ၁၆ ပါတီများ အစည်းအဝေးပြီးတော့မှ လုပ်ကြကိုင်ကြတဲ့ ဟာလေးကိုတော့ ပြောဖို့ပေါ့၊ အဲဟာတစ်ခုတော့ရှိတယ်။ ကျန်တာကတော့ ကျနော်တို့ NSPNC နဲ့ကျနော်တို့ ဆွေးနွေးနေတဲ့ အချက်တွေရှိတယ်လေ၊ အဲမှာ ကျနော်တို့က စုစုပေါင်း ၄၃ ချက်ကတော့ သဘောတူ ညီပြီးသား ရတယ်ပေါ့လေ၊ အဲမှာ နောက်ပိုင်း ဆက်ဆွေးနွေးမယ့် အကြိမ်ရေတွေမှာ ကျနော်တို့ ဘာတွေ ထပ်ထည့်ကြမလဲ ဆိုတဲ့ဟာပေါ့ အဲတာကို ဆွေးနွေးဖို့ပေါ့” ဟု ပြောသည်။

လက်ရှိ မှတ်ပုံတင်ခွင့်ပြုပြီးသား ပါတီများကြားထဲတွင် နိုင်ငံရေးပြုပြင်ပြောင်းလဲမှု အဆိုပြုချက်တစ်ခုကို သဘောတူညီချက် ဖြစ်လာရန် အဓိကဆောင်ရွက်နေကြောင်း နိုင်ငံရေးပါတီများက ပြောသည်။

ထို့ပြင် ရွေးကောက်ပွဲအပြီးတွင် မည်သည့်ပုံသဏ္ဍာန် သွားကြမည်ဆိုခြင်းကို ပါတီများအချင်းချင်း ကြိုတင်ညှိနှိုင်း ထားခြင်းအားဖြင့် ပို၍ကောင်းမွန်သည့် ဖက်ဒရယ်ပုံသဏ္ဍာန်၊ ပို၍ကောင်းမွန်သည့် ဒီမိုကရေစီ ပုံသဏ္ဍာန်များအား ပီပီပြင်ပြင် ဖြစ်စေရန် ဖော်ဆောင်နိုင်မည်ဖြစ်ကြောင်း နိုင်ငံရေးပါတီများက ပြောသည်။

CNI News

၂၀၂၅ ခုနှစ်၊ မတ်လ ၁၄

အိန္ဒိယနိုင်ငံ အနေဖြင့် မိမိ၏ နိုင်ငံရေးလိုဘ(ဘက်) တစ်ခုတည်းကို ကြည့်ပြီး နှစ်နိုင်ငံ ဆက်ဆံရေးကို ပျက်ပြားအောင် မလုပ်သင့်သလို မြန်မာနိုင်ငံ၏ အချုပ်အခြာ အာဏာနယ်မြေပိုင်ဆိုင်မှုကို လေးစားသင့်ကြောင်း နစက၏ သတင်း ထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

အိန္ဒိယနိုင်ငံ မီဇိုရမ်ပြည်နယ် လွှတ်တော်အမတ် K. Vanlalvena သည် အိန္ဒိယနှင့်ထိစပ်နေသော ချင်းပြည်နယ်သို့ ဝင်ရောက်၍ ချင်းအမျိုးသားတပ်ဦး(CNF/CNA)ဌာနချုပ်ကို သွားရောက်ခဲ့ကြောင်း၊ ထို့နောက် ချင်းပြည်နယ်ကို အိန္ဒိယနိုင်ငံနှင့် ပေါင်းစည်းရန် ဆွေးနွေးခဲ့ကြောင်း The Hindu သတင်းဌာနက ဖော်ပြခဲ့သည်။

ထို့နောက် အိန္ဒိယအထက် လွှတ်တော်အစည်းအဝေးမှာ မဏိပူရပြည်နယ် လွှတ်တော်အမတ်က တမူး-ကဘော် ချိုင့်ဝှမ်းကို အိန္ဒိယနှင့်ပေါင်းစည်းရေး ဆွေးနွေးခဲ့သည်။

အလားတူ အိန္ဒိယနိုင်ငံ၊ မီဇိုရမ်ပြည်နယ်ကို ဖြတ်သန်း၍ မြန်မာနိုင်ငံအတွင်းသို့ နိုင်ငံခြားသားများ ဝင်ရောက်နေပြီး ချင်းတောင်တန်းပေါ်မှာ မြန်မာသူပုန်များကို စစ်သင်တန်းများပေးနေကြောင်း  ၂၀၂၅ ခုနှစ်၊ မတ်လ ၁၀ ရက်က မီဇိုရမ်ပြည်နယ်ဝန်ကြီးချုပ် လာဒူဟိုမာက မီဇိုရမ်ပြည်နယ်လွှတ်တော်မှာ ပြောကြားခဲ့သည်။

 မီဇိုရမ်ပြည်နယ်လွှတ်တော်အမတ်ကို CNF ဌာနချုပ်မှာ တွေ့ရစဉ်

မြန်မာနှင့် အိန္ဒိယနိုင်ငံဆိုသည်မှာ မိတ်ဆွေကောင်း နိုင်ငံများဖြစ်ကြောင်း၊ အိန္ဒိယ၏ Act East Policy နဲ့ ပတ်သက်ပြီး မြန်မာနိုင်ငံအနေဖြင့် ပူးပေါင်းဆောင်ရွက်နေကြောင်း၊ မြန်မာနိုင်ငံအနေဖြင့် အိန္ဒိယနယ်မြေကို အသုံးပြုပြီး မြန်မာကို ဆန့်ကျင်နေသည့် အုပ်စုများကို မလိုလားသလို မြန်မာ့နယ်မြေကို အသုံးပြုပြီး အိန္ဒိယ အစိုးရကို ဆန့်ကျင်နေသည့် အုပ်စုများကိုလည်း မြန်မာနိုင်ငံအနေဖြင့် လက်ခံမထားကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

ဗိုလ်ချုပ်ဇော်မင်းထွန်းက “ ကျနော့် အနေနဲ့ ပြောကြားချင်တာကတော့ မြန်မာနိုင်ငံအနေနဲ့ အိန္ဒိယနိုင်ငံအတွက် အိမ်နီးချင်းကောင်း မိတ်ဆွေကောင်းအဖြစ် အမြဲရပ်တည် ဆောင်ရွက်သွားမှာဖြစ်ပါတယ်။ အိန္ဒိယနိုင်ငံမှာရှိတဲ့ အချို့သော နိုင်ငံရေးသမားတွေ အနေနဲ့ မိမိရဲ့ နိုင်ငံရေးလိုဘ တစ်ခုတည်းကိုကြည့်ပြီး နှစ်နိုင်ငံဆက်ဆံရေးကို ပျက်ပြားအောင် မလုပ်သင့်ဘူးဆိုတာ ပြောကြားလိုပါတယ်”ဟု ပြောသည်။

အိန္ဒိယနိုင်ငံရေးသမားတချို့၏ ပြောကြားချက်များနှင့် ပတ်သက်ပြီး မြန်မာနိုင်ငံအနေဖြင့် အသိပေးသင့်တာများ နှင့် ပြောသင့်တာများကို ဆက်ဆက် လုပ်ဆောင်သွားမှာဖြစ်ကြောင်း ၎င်းက ပြောသည်။

၂၀၁၃ ခုနှစ်တုန်းကလည်း အိန္ဒိယ၏ BJP ပါတီက တမူး-ကလေး-မင်းကင်းမြို့နယ်များ ပါဝင်သည့် ကဘော် ချိုင့်ဝှမ်း ဒေသကို ပြန်ယူပေးမည်ဆို၍ မဲဆွယ်ခြင်းမျိုး ရှိခဲ့၍ ဒေသတွင်းနေ ပြည်သူများက ဆန္ဒပြကန့်ကွက် ခဲ့ကြသေးသည်။

 မီဇိုရမ်ပြည်နယ်ဝန်ကြီးချုပ်နဲ့ ချင်းသူပုန် ၂ ဖွဲ့ ပေါင်းစည်းရေး သဘောတူညီမှုရသည်ကို တွေ့ရစဉ်

မြန်မာ-အိန္ဒိယနယ်စပ်သည် ၁၀၁၀ မိုင်ကျော် ရှည်လျားပြီး ၁၆၂၆ ကီလိုမီတာရှိကြောင်း၊ တိုင်းတာပြီး ၉၀၇ မိုင် ကျော်ရှိပြီး ကီလိုမီတာအားဖြင့် ၁၄၆၀ ကျော် တိုင်းတာပြီးဖြစ်ကြောင်း၊ ယခုပြောနေသည့် က‌ဘော်ချိုင့်ဝှမ်းဒေသ ဆိုသည်မှာလည်း ယခင် တိုင်းတာပြီး အသိအမှတ်ပြုပြီးထဲမှာ ပါပြီးဖြစ်ကြောင်း နစကဘက်က သတင်းထုတ်ပြန် ခဲ့သည်။

မြန်မာ-အိန္ဒိယ နှစ်နိုင်ငံနယ်ခြား သတ်မှတ်ချက် အနေဖြင့် ၂၀၁၄ ခုနှစ်၊ မေလ ၈ ရက်နေ့မှာ ချုပ်ဆိုထားသည့် မြန်မာ-အိန္ဒိယ နှစ်နိုင်ငံနယ်စပ်ဒေသ ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာလည်း ရှိပြီးဖြစ် ကြောင်း နစကဘက်က သတင်းထုတ်ပြန်ခဲ့သည်။

လက်ရှိ မြန်မာနိုင်ငံ တစ်ဝန်းတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်းအထန်ဖြစ်ပွားနေပြီး အိမ်နီးချင်းနိုင်ငံများဖြစ်သည့် တရုတ်၊ အိန္ဒိယ၊ ထိုင်း၊ ဘင်္ဂလားဒေ့ရှ်နိုင်ငံများ၏ ပါဝင် ပတ်သက်မှုများလည်း ရင်ဆိုင်နေရကြောင်း စစ်ရေးနှင့်နိုင်ငံရေးအကဲခတ်များက ပြောသည်။

အဆိုပါ အခြေအနေကို မကိုင်တွယ်နိုင်ပါက မြန်မာနိုင်ငံ ပြိုကွဲသွားနိုင်သလို ကျဆုံးနိုင်ငံအဖြစ် ဦးတည်သွားနိုင် ကြောင်း ၎င်းတို့က သတိပေးထားသည်။

CNI News

၂၀၂၅ ခုနှစ်၊ မတ်လ ၁၄

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ပြောကြားခဲ့သည့် ၂၀၂၅ ခုနှစ်၊ ဒီဇင်ဘာလ သို့မဟုတ် ၂၀၂၆ ခုနှစ်၊ ဇန်နဝါရီလအတွင်း ရွေးကောက်ပွဲ ကျင်းပနိုင်မှု ရှိ၊မရှိ ဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား မေးခွန်းထုတ်သုံး သပ်မှုများရှိနေကြသည်။

နစကဥက္ကဋ္ဌသည် ရွေးကောက်ပွဲ ကျင်းပမည့်ကာလအား ထုတ်ဖော်ပြောကြားခဲ့ပြီး အစောဆုံးဆိုသည့် စကားလုံး ကို ထည့်သွင်းအသုံးပြုသွားသဖြင့် နောက်အကျဆုံးကာလ ရှိနိုင်မလားဟူ၍ မေးခွန်းထုတ်မှုများ ရှိနေကြောင်း ငြိမ်းချမ်းရေးလုပ်ငန်းစဉ်တွင် ပါဝင်လုပ်ကိုင်နေသူ ဦးခွန်းဆိုင်က CNI သတင်းဌာနသို့ ပြောသည်။

၎င်းက “နစကဥက္ကဋ္ဌ ပြောတဲ့စကားနဲ့ပတ်သက်ပြီး အရင်သုံးသပ်ရမှာပေါ့။ နစကဥက္ကဋ္ဌ အနေနဲ့ သူပြောတာက လွတ်လပ်ပြီးတရားမျှတတဲ့ ရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ သို့မဟုတ် ၂၀၂၆ ခုနှစ်၊ ဇန်နဝါရီလ အစောဆုံး ကျင်းပသွားဖို့ စီစဉ်ထားကြောင်း ပြောလိုပါတယ်လို့ ပြောသွားတယ်။ ဒီနေရာမှာ အစောဆုံးဆိုတဲ့ စကားလုံးကို မေးမြန်းမှုရှိပါတယ်။ အစောဆုံးဆိုတာ ဘာကိုဆိုလိုတာလဲပေါ့။ တကယ်လို့ ဒီဇင်ဘာလ သို့မဟုတ် ဇန်နဝါရီလမှာ အစောဆုံးဆိုရင် နောက်အကျဆုံးဆိုတာလည်း ရှိမလားဆိုပြီး မေးတာတွေ ရှိပါတယ်။ အခု နောက် အကျဆုံးဆိုတာ ပြောတာ မကြားရဘူး။ မကြားရဘူးဆိုတဲ့ အခါကြတော့ ၂၀၀၈ ခြေ/ဥက ပုဒ်မ ၄၂၁(ခ)မှာ  သာမန် အားဖြင့်ဆိုတဲ့ အခါကြတော့ အဲဒါကို ၆ လတစ်ကြိမ် ဆက်တိုးသွားဖို့ရှိမလားဆိုပြီးမှ မေးကြပါတယ်။ အဲဒီလိုမေးတဲ့ အခါကြတော့ ဒီကိစ္စနဲ့ပတ်သက်ပြီး အဖြေပေးနိုင်တာကတော့ နစကဥက္ကဋ္ဌပါပဲ။ ၂၀၀၈ ကလည်း အခွင့်ပေးပြီးသားလို့ အဲဒီလို အဓိပ္ပါယ်ကောက်ယူတာကို။ ဒီလိုမျိုး အဓိပ္ပါယ်ကောက်ယူတယ် ဆိုတဲ့အခါကြတော့ သူက ရာသက်ပန် တိုးသွားချင်လည်း ရတယ်ပေါ့။ သို့သော်လည်းပဲ နစကဥက္ကဋ္ဌ အနေနဲ့ ရာသက်ပန်တိုးဖို့ ရည်ရွယ်ချက်တော့ ရှိပုံမရပါဘူး” ဟု ပြောသည်။

နိုင်ငံရေးပါတီ ခေါင်းဆောင်တချို့နဲ့ နစကဥက္ကဋ္ဌကို တွေ့ရစဉ်

နစကဥက္ကဋ္ဌဘက်မှ ရွေးကောက်ပွဲ ကျင်းပပေးမည့် ကာလအတိအကျကို ထုတ်ဖော် ပြောကြားသွားသဖြင့် လက်ရှိ ၆ လသက်တမ်း ကုန်ပါက ရွေးကောက်ပွဲအတွက် အစုအဖွဲ့ အင်အားစုပုံစံတစ်မျိုး ပေါ်လာနိုင်ကြောင်း စစ်ရေးနှင့် နိုင်ငံရေးအကဲခတ်များက သုံးသပ်ထားကြသည်။

တရုတ်နိုင်ငံခြားရေးဝန်ကြီးဌာန၊ အာရှရေးရာအထူးကိုယ်စားလှယ် မစ္စတာတိန့်ရှီကျွင်းကလည်း မြန်မာနိုင်ငံ ရွေးကောက်ပွဲ ကျင်းပနိုင်ရေးအတွက် တရုတ်နိုင်ငံက ပူးပေါင်းဆောင်ရွက်မည့်အကြောင်း မတ်လ ၁၁ ရက်နေ့က နစကဥက္ကဋ္ဌနှင့် တွေ့ဆုံစဉ် ဆွေးနွေးခဲ့ကြသည်။

သို့သော် ပြီးခဲ့သည့် ၂၀၂၃ ခုနှစ်ကလည်း ဩဂုတ်လ၌ ရွေးကောက်ပွဲ ကျင်းပမည်ဟု ပြောခဲ့ပြီး အကောင်အထည် မဖော်နိုင်ခဲ့သည့်အတွက် ယခုတစ်ကြိမ်တွင်လည်း အကောင်အထည် ဖော်နိုင်မှု ရှိ၊မရှိ ဆိုသည့်အပေါ် သုံးသပ် မှုများလည်း ရှိနေကြသည်။

နစကဥက္ကဋ္ဌနဲ့ ဘယ်လာရုစ်သမ္မတ လူကာရှန်ကို ကိုတွေ့ရစဉ်

စည်းလုံးညီညွတ်သော တိုင်းရင်းသားလူမျိုးများ မဟာမိတ်(UNA)မှ ဦးမျိုးကျော်က “သက်တမ်းတိုးတာနဲ့ မတိုး တာကတော့ ကျနော်တို့က သိပ်ထူးတယ်လို့ မမြင်ဘူး။ ဘာဖြစ်လို့လဲဆိုတော့ သူတို့ကတော့ သက်တမ်းတိုး နေတယ်ဆိုတာ ၂၀၀၈ ကို ကိုင်ပြီးတော့ ၂၀၀၈ ပေးထားချက်အရ တိုးတယ် ဆိုပြီးတော့ ပြောတာလေ။ မတည် ငြိမ်တဲ့အခါ တိုးလို့ရတယ်ဆိုတာမျိုး။ ဒါပေမယ့် တကယ့်တကယ် အရှိတရားကို ကြည့်မယ်ဆိုရင် သိမ်းတာလည်း သူပဲ၊ နိုင်ငံတော်ရဲ့ သမ္မတဆိုတာလည်း သူပဲ၊ ဝန်ကြီးချုပ် ကလည်းသူပဲ၊ ဥက္ကဋ္ဌကလည်း သူပဲ။ သက်တမ်းတိုး တယ်ဆိုတာလည်း တစ်ဦးတည်းကနေပြီး အဲဒီလို လုပ်နေတဲ့ဟာကို ရှင်းရှင်းလင်းလင်း မြင်ထားတယ်ဆိုရင် ဒီဟာ ကျနော်တို့အတွက်တော့ ရင်မခုန်လောက်ပါဘူး”ဟု CNI သတင်းဌာနသို့ ပြောသည်။

ထို့ပြင် နစကဥက္ကဋ္ဌသည် ပါတီစုံဒီမိုကရေစီ ရွေးကောက်ပွဲအား အခိုင်အမာ လုပ်ဆောင်မည်ဖြစ်ပြီး ကဏ္ဍကောစ မလုပ်ဘဲ ပူးပေါင်းဆောင်ရွက်မှုသာလိုကြောင်း၊ ပါတီစုံဒီမိုကရေစီ ရွေးကောက်ပွဲ ပြုလုပ်မည်ဆိုပါက မြန်မာနိုင်ငံ အနေဖြင့် မုချအောင်မြင်မည်ဖြစ်ကြောင်း မတ်လ ၉ ရက်က ရုရှားနှင့်ဘယ်လာရုစ်နိုင်ငံသို့ တရားဝင် ချစ်ကြည်ရေး ခရီးစဉ်မှ မြန်မာနိုင်ငံသို့ ပြန်လာစဉ်တွင် ပြောကြားခဲ့သည်။

လက်ရှိ၌ မြန်မာနိုင်ငံတစ်ဝှမ်း ဖြစ်ပွားနေသည့် လက်နက်ကိုင်ပဋိပက္ခများကြောင့် နစကအနေဖြင့် မြို့နယ်ပေါင်း ၉၀ ကျော် အပါအဝင် စစ်စခန်းပေါင်း ရာချီတို့ကို လက်လွှတ်ထားရသကဲ့သို့ စစ်ဌာနချုပ် အချို့တို့ကိုလည်း လက်လွှတ်ထားရသည့် အနေအထားဖြစ်သည်။

ထိုအခြေအနေများကြားတွင် ရွေးကောက်ပွဲအား မည်သည့်ပုံစံဖြင့် ကျင်းပသွားမည်ကိုလည်း အားလုံးက မေးခွန်း ထုတ်လျက်ရှိနေကြသည်။

CNI News

၂၀၂၅ ခုနှစ်၊ မတ်လ ၁၂

ရွေးကောက်ပွဲ ကျင်းပပေးမည့်ကာလကို ထုတ်ဖော်ပြောကြားထားသော်လည်း ယခု ၂၀၂၅ ခုနှစ်၌ နိုင်ငံရေး အပြောင်းအလဲ ကြီးကြီးမားမား မဖြစ်နိုင်သေးကြောင်း စစ်ရေးနှင့်နိုင်ငံရေးအကဲခတ်များက CNI သတင်းဌာနသို့ ပြောသည်။

နိုင်ငံရေး အပြောင်းအလဲ ဖြစ်လိုပါက နှစ်ဖက်အတိုက်အခံ အင်အားစုများ အားလုံးအနေဖြင့် လမ်းဖွင့်ရန်လို ကြောင်း ငြိမ်းချမ်းရေးလုပ်ငန်းစဉ်တွင် ပါဝင်လုပ်ကိုင်နေသူ ဦးခွန်းဆိုင်က CNI သတင်းဌာနသို့ ပြောသည်။

၎င်းက “အခု လောလောဆယ်ကတော့ ဖြစ်ဖို့အလားအလာကို မတွေ့ရသေးဘူးလို့ပဲ ရှင်းရှင်းပြောရမယ်။ သို့သော် လည်း ဒီလိုမျိုးဖြစ်နိုင်ဖို့ အလားအလာကို တွေ့ရဖို့ဆိုရင် အဓိက အတိုက်အခံတွေ၊ အဓိက အတိုက်အခံတွေလို့ ပြောရရင် တစ်ဖက်တည်းကို မဟုတ်ဘူး။ နှစ်ဖက်စလုံးကို ပြောတာဖြစ်တယ်။ အတိုက်အခံ ဖြစ်နေတဲ့အဖွဲ့တွေ အများအားလုံးက သူတို့အားလုံးက လမ်းဖွင့်ဖို့ လိုပါလိမ့်မယ်။ သူတို့အားလုံးက မင်းကိုပဲ ငါစောင့်နေတယ်။ ငါ့ကိုပဲ မင်းစောင့်နေတယ်ဆိုရင်တော့ ဒါကတော့ လမ်းပွင့်မှာမဟုတ်ဘူး” ဟု ပြောသည်။

ဘယ်လာရုစ်နိုင်ငံခရီးစဉ်မှာ နစကဥက္ကဋ္ဌကို တွေ့ရစဉ်

နစကဥက္ကဋ္ဌဘက်မှ ၂၀၂၁ ခုနှစ် အာဏာရယူပြီး နောက်ပိုင်းကတည်းက ရွေးကောက်ပွဲကျင်းပ၍ အရပ်သား အစိုးရထံသို့ အာဏာလွှဲပြောင်းပေးမည်ဟု ထုတ်ဖော်ပြောကြားထားခဲ့သော်လည်း လက်ရှိအထိ အကောင်အထည် မဖော်နိုင်သေးသည်ကို တွေ့ရသည်။

သို့သော် ရုရှားနှင့်ဘယ်လာရုစ် နိုင်ငံများသို့ သွားရောက်သည့် ခရီးစဉ်အတွင်း ၂၀၂၅ ခုနှစ်၊ ဒီဇင်ဘာလကုန် သို့မဟုတ် ၂၀၂၆ ခုနှစ်၊ ဇန်နဝါရီလ၌ အစောဆုံး ကျင်းပနိုင်ရေး စီစဉ်ထားကြောင်း ထုတ်ဖော်ပြောကြားခဲ့သည်။

လက်ရှိ မြန်မာနိုင်ငံ၏ အနေအထားအရ ရွေးကောက်ပွဲ ကျင်းပဖြစ်ခဲ့ပါက မြို့နယ်အားလုံးနှင့် တိုင်းရင်းသား အားလုံးကို ကိုယ်စားမပြုသည့် အနေအထား ဖြစ်သွားမည်ဟု စည်းလုံးညီညွတ်သော တိုင်းရင်းသားလူမျိုးများ မဟာမိတ်(UNA)မှ ဦးမျိုးကျော်က CNI သတင်းဌာနသို့ ပြောသည်။

NCA နှစ်ပတ်လည် အခမ်းအနားကျင်းပစဉ်

၎င်းက “မထင်ပါဘူးဗျာ။ သူတို့က အာဏာသိမ်းစဉ် ကာလကတည်းက ရွေးကောက်ပွဲ လုပ်မယ်ဆိုတဲ့ဟာကို ကြေညာခဲ့ပြီးသားလေ။ ပြီးတော့မှ ၆ လတစ်ကြိမ် ၆ လတစ်ကြိမ် သက်တမ်းတွေ တိုးလာတာလေ။ နောက်ပြီး တော့ ရွေးကောက်ပွဲ လုပ်မယ်ဆိုတာက အခုမှ ပြောတာလည်း မဟုတ်ဘူး။ ၂၀၂၃ နောက်ပိုင်းမှာ လုပ်မယ်၊ အခု ၂၅ အကုန် ၂၆ အ(နှစ်)ဆန်းဆိုပြီး ပြောလာတယ်လေ။ သူ့ဘက်က သူကတော့ ဖြစ်ချင်တဲ့ဟာတွေကို ပြောနေတာ လို့ပဲ ကျနော်တို့ကတော့ နားလည်တယ်။ လုပ်လို့မရတာကိုလည်း သူတို့လည်း နားလည်တယ်။ အဲဒါကြောင့်လည်း ကော်မရှင် ကိုယ်တိုင်က မြန်မာနိုင်ငံမှာရှိတဲ့ မြို့နယ်ရဲ့ သုံးပုံတစ်ပုံမှာ လုပ်ဖို့ကိုတောင် တော်တော်လေး အားခဲ နေရတဲ့ အနေအထားလေ။ မြို့နယ် ၁၀၀ စွန်းစွန်းပဲ လုပ်မယ်ဆိုတဲ့ အနေအထားက မြန်မာနိုင်ငံမှာရှိတဲ့ မြို့နယ် တွေ၊ တိုင်းရင်းသားတွေကို ကိုယ်စားမပြုဘူးဆိုတဲ့အဓိပ္ပါယ်ရောက်နေတယ်ပေါ့” ဟု ပြောသည်။

လက်ရှိ မြန်မာ့နိုင်ငံရေး အခင်းအကျင်းသည် ၄ နှစ်တာ ကာလအတွင်း နိုင်ငံတစ်ဝန်း လက်နက်ကိုင်ပဋိပက္ခများ ပိုမို ကျယ်ပြန့် များပြားလာနေသည့်အတွက် တစ်နိုင်ငံလုံး တည်ငြိမ်ရေးကို နစကအနေဖြင့် မည်ကဲ့သို့ လုပ်ဆောင် နိုင်မည်နည်း ဆိုသည့်အပေါ် စစ်ရေးနှင့်နိုင်ငံရေးအကဲခတ်များက မေးခွန်းထုတ်လျက်ရှိကြသည်။

ထိုအခင်းအကျင်း၌ ရွေးကောက်ပွဲ ကျင်းပနိုင်ရေး လုံခြုံရေးပိုင်းနှင့်ပတ်သက်၍ နစကဘက်မှ တာဝန်ယူရမည့် အနေအထားများ ရှိကြောင်းလည်း ထောက်ပြကြသည်။

CNI News

၂၀၂၅ ခုနှစ်၊ မတ်လ ၁၂

တရုတ်အနေဖြင့် ရုရှားနှင့် နစက ညှိနှိုင်းသဘောတူခဲ့သည့် ကိစ္စများ၊ ရှေ့လျှောက်လုပ်မည့် လုပ်ငန်းစဥ်များအား အသေးစိတ်နားလည်ဖို့အတွက် မြန်မာနိုင်ငံသို့ တရုတ်အထူးကိုယ်စားလှယ် မစ္စတာတိန့်ရှီးကျွင်း ရောက်ရှိလာခြင်း ဖြစ်နိုင်သည်ဟု နိုင်ငံ‌ရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ရုရှားနှင့် ဘယ်လာရုစ် နိုင်ငံများသို့  ချစ်ကြည်ရေးခရီး သွားရောက်ပြီး ပြန်လည်‌ရောက်ရှိလာသည့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကို ၂၀၂၅ ခုနှစ်၊ မတ်လ ၁၁ ရက်တွင် တရုတ်အထူးကိုယ်စားလှယ် မစ္စတာ တိန့်ရှီးကျွင်းက လာရောက်တွေ့ဆုံ၍ ဆွေးနွေးခဲ့သည်။

နစကနှင့်ရုရှားတို့ မည်မျှအတိုင်းအတာအထိ သဘောထားများ ညှိနှိုင်းပြီး ပြည်တွင်းတွင် ဆက်လက် လုပ်ဆောင် သွားရန် ရှိသလဲဆိုသည့်အပေါ် အသေးစိတ်နားလည်ဖို့ မြန်မာနိုင်ငံသို့ လာရောက်၍ တွေ့ဆုံဆွေးနွေးမှု လုပ်ခြင်း ဖြစ်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

နစကဥက္ကဋ္ဌနဲ့ ရုရှားသမ္မတ ပူတင်ကို သဘောတူညီချက် လက်မှတ်ထိုးသည့် ကိုယ်စားလှယ်နဲ့အတူ တွေ့ရစဉ်

၎င်းက “ကျနော့် အမြင်ကတော့ တရုတ်အနေနဲ့ သူ့ရဲ့မဟာမိတ် ရုရှားနဲ့ ဗမာပြည်က စစ်ကောင်စီ ဘာတွေများ ညှိနှိုင်း သဘောတူခဲ့သလဲ၊ ‌ရှေ့လျှောက် ဘယ်လိုလုပ်ငန်းစဥ်တွေ လုပ်မှာလဲဆိုတာကို အသေးစိတ် နားလည်ဖို့ အတွက် ရောက်ရှိလာတာ ဖြစ်တယ်လို့ ကျနော်တော့ ယူဆပါတယ်၊ စစ်ကောင်စီဥက္ကဋ္ဌကို ရုရှားက ပူတင် ကိုယ်တိုင် ကြိုဆိုတာ နောက်ပြီးတော့ စာချုပ်တွေ ချုပ်ဆိုတာ စသည်အားဖြင့် နောက်ပြီး အဲဒီပေါ်မှာ (ဦး)မင်းအောင်လှိုင်ကလည်း သိပ်ပြီးတက်ကြွအားရနေတဲ့ ပုံပေါ်နေတဲ့အခါမှာ တရုတ်အနေနဲ့ ဘာတွေများ ဘယ်လောက် အတိုင်းအတာအထိ သဘောထားတွေ ညှိနှိုင်းပြီးတော့ ဘယ်လို သဘောတူညီချက်တွေနဲ့ ဗမာ ပြည်မှာ ဘာဆက်လုပ်မှာလဲဆိုတဲ့ ကိစ္စတွေ အသေးစိတ် နားလည်ဖို့အတွက် လာရောက်ပြီးတော့ နားလည်မှု‌ ရအောင် ကြိုးစားတယ်လို့ ယူဆပါတယ်”ဟု ပြောသည်။ 

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားနှင့်ဘယ်လာရုစ် နိုင်ငံများသို့ မတ်လ ၃ ရက်မှ ၉ ရက်အထိ ချစ်ကြည်ရေးခရီး သွားရောက်၍ သမ္မတပူတင်၊ သမ္မတလူကာရှန်ကိုတို့နှင့် သီးခြားစီ တွေ့ဆုံကာ ရွေးကောက်ပွဲ ကျင်းပနိုင်ရေး အပါအဝင် စီးပွားရေးရင်းနှီးမြှုပ်နှံရေး အခြေအနေများအား ဆွေးနွေးခဲ့သည်။

ထို့နောက် တရုတ်အထူးကိုယ်စားလှယ် မစ္စတာတိန့်ရှီးကျွင်းသည် မြန်မာနိုင်ငံသို့ ရောက်ရှိလာပြီး မတ်လ ၁၀ ရက် တွင် နစက၏ ဒုဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ ဦးသန်းဆွေအား တွေ့ဆုံဆွေးနွေးခဲ့သည်။

နစကဥက္ကဋ္ဌနှင့် တရုတ်အထူးကိုယ်စားလှယ်တို့ တွေ့ဆုံမှုတွင် ရွေးကောက်ပွဲကျင်းပနိုင်ရေး ကြိုတင်ပြင်ဆင်နေမှု အခြေအနေများ၊ တရုတ်နိုင်ငံမှ အပြုသ‌ဘောဆောင်သည့် ပူးပေါင်းဆောင်ရွက်မှုများ ပြုလုပ်သွားမည့် အခြေအနေ များအား ဆွေးနွေးခဲ့ကြသည်။

ထို့အတူ မြန်မာနိုင်ငံ၏ ငြိမ်းချမ်းရေးဖြစ်စဥ်၌ တရုတ်နှင့် ပူးပေါင်း‌ဆောင်ရွက်လျက်ရှိမှု အခြေအနေများနှင့် နှစ်နိုင်ငံနယ်စပ်ဒေသ ကုန်သွယ်ရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြကြောင်း သိရသည်။

တရုတ်အထူးကိုယ်စားလှယ် တိန့်ရှီးကျွင်းနဲ့ နိုင်ငံခြားရေးဝန်ကြီး ဦးသန်းဆွေကို တွေ့ရစဉ်

တရုတ်အထူးကိုယ်စားလှယ် မြန်မာပြည်လာခြင်းသည် TNLA ၏ ပျက်သွားသည့် အစည်းအဝေးအား နောက် တစ်ကြိမ် ပြန်ခေါ်ရန် ကြိုးစားနေခြင်း ဖြစ်နိုင်ကြောင်း တရုတ်-မြန်မာအ‌ရေး လေ့လာသုံးသပ်သူ ‌ဒေါက်တာလှကျော်ဇောက CNI သတင်းဌာနသို့ ပြောသည်။

၎င်းက “ဒီလိုဗျ တိန့်ရှီးကျွင်းက ဗမာပြည်ကို သွားတာလည်း ရေထွက်မတက်ပါပဲ၊ နောက်ဟို နယ်စပ်မှာရှိတဲ့ အဖွဲ့အစည်းတွေဆီလည်း သွားနေတာပဲလေ၊ အဲတော့ အဲဒီကြားထဲမှာသူက ညှိနှိုင်းသူအဖြစ် လုပ်နေတာပဲလေ၊ အဲတော့ ဟိုတလောကဖြစ်တဲ့ TNLA အစည်းအဝေး ပျက်သွားပြီးတော့ နောက်တစ်ကြိမ် ပြန်ခေါ်ဖို့များ ကြိုးစားနေ လား မသိဘူးဗျ၊ အဲတာ ဖြစ်လိမ့်မယ်ထင်တယ် ကျမ စဥ်းစားနေတာလေ၊ ဘာဖြစ်လို့လဲဆိုတော့ TNLA နဲ့ အစည်းအဝေးက ပျက်သွားတာ ဖြစ်တာကိုး၊ ပျက်သွားပြီးတော့ ဒါပေမယ့် TNLA ကပြောတာ နောက်ထပ်လည်း ဆွေးနွေးဖို့တော့ ရှိပါတယ်လို့ပြောတော့ အဲဒီကိစ္စများ ထပ်ညှိနှိုင်းဖို့ သွားသလား မသိဘူးဗျ၊ အဲတာဖြစ်နိုင်မယ် ထင်တယ်၊ အကုန်လုံးပါမှာပါပဲ အခုဟာက AA ကလည်း ကျောက်ဖြူ၊ စစ်တွေတို့နားမှာ တိုက်နေတယ်ဆိုတော့ အဲဒီက လုံခြုံရေးကိစ္စတွေလည်း ပါကောင်းပါမှာပေါ့နော်၊ ဘာဖြစ်လို့လဲဆိုတော့ ကျမကြားတာဆို တရုတ်ရဲ့ လုံခြုံရေး အဖွဲ့သားတွေတောင် ကျောက်ဖြူ‌ ရောက်နေတယ်လို့ ကြားတာကိုး အဲတော့ အကုန်လုံးပါမှာပဲ” ဟု ပြောသည်။

တရုတ်နိုင်ငံသည် မြန်မာ့တပ်မတော်နှင့် မြောက်ပိုင်းမဟာမိတ်အဖွဲ့ (AA-TNLA-MNDAA) တို့ကြား အပစ်အခတ် ရပ်စဲရေး ဆွေးနွေးနိုင်ရန် ကြားဝင်စေ့စပ်ညှိနှိုင်း ပေးလျက်ရှိသည်။

တရုတ်၏ ကြားဝင်စေ့စပ်ညှိနှိုင်းပေးမှုဖြင့် မြန်မာ့တပ်မတော်နှင့် MNDAA တို့ ၂၀၂၅ ခုနှစ်၊ ဇန်နဝါရီ ၁၆ ရက်က တွေ့ဆုံဆွေးနွေးပြီးတဲ့နောက် ယာယီအပစ်ရပ်စဲ‌ရေး သဘောတူညီခဲ့သည်။

ထို့နောက် မြန်မာ့တပ်မတော်နှင့် TNLA တို့ ၂၀၂၅ ခုနှစ်၊ ဖေဖော်ဝါရီ ၁၆ ရက်က တရုတ်နိုင်ငံတွင် တွေ့ဆုံဆွေးနွေး ခဲ့ကြသော်လည်း သ‌ဘောတူညီချက်မရဘဲ ဆွေးနွေးပွဲအား အဆုံးသတ်ခဲ့ပြီး နောက်ထပ်တစ်ကြိမ် ပြန်လည် တွေ့ဆုံမည်ဖြစ်ကြောင်း TNLA က ၂၀၂၅ ခုနှစ်၊ ဖေဖော်ဝါရီ ၁၉ ရက်တွင် ထုတ်ပြန်ခဲ့သည်။

ထို့အတူ တရုတ်နိုင်ငံ၏ ကြားဝင်စေ့စပ်မှုဖြင့် AA နှင့် နစကကြား တရုတ်နိုင်ငံတွင် မတ်လ၌ တွေ့ဆုံဆွေးနွေး သွားရန် ရှိကြောင်းလည်း နီးစပ်သူများထံမှ သိရသည်။

CNI News
၂၀၂၅ ခုနှစ်၊ မတ်လ ၁၁

ရုရှားနှင့် ဘယ်လာရုစ်နိုင်ငံများမှ ချစ်ကြည်ရေးခရီးသွားရောက်ပြီး ပြန်လည်ရောက်ရှိလာသည့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို မတ်လ ၁၁ ရက်တွင် တရုတ်အထူးကိုယ်စားလှယ် မစ္စတာတိန့်ရှီးကျွင်း လာရောက်တွေ့ဆုံ၍ ဆွေးနွေးခဲ့သည်။

အဆိုပါ တွေ့ဆုံပွဲသို့ နစက၏ တွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ နစကအဖွဲ့ဝင် NSPNC ဥက္ကဋ္ဌ ဒုတိယ ဗိုလ်ချုပ်ကြီးရာပြည့်၊ ပြည်ထဲရေးဝန်ကြီး ဒုတိယဗိုလ်ချုပ်ကြီးထွန်းထွန်းနောင်တို့ တက်ရောက်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားနှင့် ဘယ်လာရုစ် နိုင်ငံများသို့ မတ်လ ၃ ရက်မှ ၉ ရက်နေ့ အထိ ချစ်ကြည်ရေးခရီးသွားရောက်၍ သမ္မတပူတင်၊ သမ္မတလူကာရှန်ကိုတို့နှင့် သီးခြားစီ တွေ့ဆုံ၍ ရွေးကောက် ပွဲ ကျင်းပနိုင်ရေး အပါအဝင် စီးပွားရေး ရင်းနှီးမြှုပ်နှံရေး အခြေအနေများကို ဆွေးနွေးခဲ့သည်။

ထို့နောက် တရုတ်အထူးကိုယ်စားလှယ် မစ္စတာတိန့်ရှီးကျွင်းသည် မြန်မာနိုင်ငံသို့ ရောက်ရှိလာပြီး မတ်လ ၁၀ ရက်က နစက၏ ဒုဝန်ကြီးချုပ်နှင့်နိုင်ငံခြားရေးဝန်ကြီးဖြစ်သူ ဦးသန်းဆွေကို တွေ့ဆုံဆွေးနွေးခဲ့သည်။

နစကဥက္ကဋ္ဌနှင့် တရုတ်အထူးကိုယ်စားလှယ်တို့ တွေ့ဆုံစဉ် ရွေးကောက်ပွဲ ကျင်းပနိုင်ရေး ကြိုတင်ပြင်ဆင်နေမှု အခြေအနေများ၊ တရုတ်နိုင်ငံမှ အပြုသဘော ဆောင်သည့် ပူးပေါင်းဆောင်ရွက်မှုများ ပြုလုပ်သွားမည့် အခြေအနေများကို ဆွေးနွေးခဲ့ကြသည်။

ထို့နောက် မြန်မာနိုင်ငံ၏ ငြိမ်းချမ်းရေးဖြစ်စဉ်၌ တရုတ်နှင့် ပူးပေါင်းဆောင်ရွက်လျက်ရှိမှု အခြေအနေများ၊ မူးယစ် ဆေးဝါး တားဆီး ကာကွယ်ရေးလုပ်ငန်းများ၊ အွန်လိုင်းလောင်းကစားမှုနှင့် အွန်လိုင်းငွေကြေးလိမ်လည်မှုများ ပ ပျောက်ရေး နှစ်နိုင်ငံ ပူးပေါင်းဆောင်ရွက်လျက်ရှိသည့် အခြေအနေများကိုလည်း ဆွေးနွေးခဲ့ကြသည်ဟု နစက,က သတင်းထုတ်ပြန်ခဲ့သည်။

အလားတူ နှစ်နိုင်ငံနယ်စပ်ဒေသ ကုန်သွယ်ရေးဆိုင်ရာကိစ္စရပ်များကိုလည်း နစကဥက္ကဋ္ဌနှင့် တရုတ်အထူး ကိုယ်စားလှယ် တိန့်ရှီးကျွင်းတို့ ဆွေးနွေးခဲ့ကြသည်။

တရုတ်နိုင်ငံသည် မြန်မာ့တပ်မတော်နှင့် မြောက်ပိုင်းမဟာမိတ်အဖွဲ့(AA-TNLA-MNDAA)တို့ကြား အပစ်အခတ်ရပ် စဲရေး ဆွေးနွေးနိုင်ရန် ကြားဝင် စေ့စပ်ညှိနှိုင်းပေးလျက်ရှိသည်။

တရုတ်၏ ကြားဝင်စေ့စပ်ညှိနှိုင်းပေးမှုဖြင့် မြန်မာ့တပ်မတော်နှင့် MNDAA တို့ ၂၀၂၅ ခုနှစ်၊ ဇန်နဝါရီ ၁၆ ရက်က တွေ့ဆုံဆွေးနွေးပွဲနောက် ယာယီအပစ်ရပ်စဲရေး သဘောတူညီခဲ့သည်။

ထို့နောက် မြန်မာ့တပ်မတော်နှင့် TNLA တို့ ၂၀၂၅ ခုနှစ်၊ ဖေဖော်ဝါရီ ၁၆ ရက်က တရုတ်နိုင်ငံမှာ တွေ့ဆုံ ဆွေးနွေး ခဲ့ကြသော်လည်း သဘောတူညီချက် မရဘဲ ဆွေးနွေးပွဲကို အဆုံးသတ်ခဲ့သည်။