CNI News

၂၀၂၅ခုနှစ်၊ နိုဝင်ဘာ ၁၈

ရွေးကောက်ပွဲအပြီး ပေါ်ပေါက်လာမည့် လွှတ်တော်တွင် ကိုယ်စားလှယ်လောင်းများ အနေဖြင့် မည်သည့် ကိစ္စရပ် များကို ပထမဆုံး ဦးစားပေးအနေဖြင့် ဆောင်ရွက်သင့်သလဲ ဆိုသည့်အပေါ်  နိုင်ငံရေးပါတီများနှင့် နိုင်ငံရေး လေ့လာသုံးသပ်သူများအကြား သုံးသပ်မှုများ ရှိနေကြသည်။ 

ရွေးကောက်ပွဲအလွန် တက်လာမည့် အစိုးရသည် လူမှုဘဝ ပြန်လည်ထူထောင်ရာတွင် နိုင်ငံရေး တည်ငြိမ်မှုရှိရန် လိုအပ်သည့်အတွက် နိုင်ငံ့ ငြိမ်းချမ်းရေး ကိစ္စရပ်များကို  ဦးစားပေး လုပ်‌ဆောင်သွားသင့်သလို အမျိုးသားညီညွတ် ရေးအစိုးရ အသွင်သဏ္ဍာန်မျိုး ဖွဲ့စည်းပါက နိုင်ငံရေးနှင့်စစ်ရေး အကျပ်အတည်းများကို ဖြေရှင်းနိုင်မည်ဟု နိုင်ငံရေးပါတီများနှင့် နိုင်ငံရေးလေ့လာသူများက ထောက်ပြကြသည်။ 

‌ရွေးကောက်ပွဲအလွန် ပေါ်‌ပေါက်လာမည့် အစိုးရတစ်ရပ် အနေဖြင့် အဓိကအားဖြင့် ကုန်စျေးနှုန်း တည်ငြိမ် ကျဆင်းမှု၊ ပြည်သူများ အလုပ်အကိုင် အခွင့်အလမ်းရရှိရေး၊ Sanction ရုတ်သိမ်းရန်အတွက် ကြိုးစားသင့် ကြောင်း၊ ပြည်သူလူထုများ လျှပ်စစ်မီး ပုံမှန် ရရှိရေးတို့ကို ဦးစားပေး ဆောင်ရွက်သင့်သည်ဟု ရှမ်းနှင့်တိုင်းရင်း သားများ ဒီမိုကရက်တစ်ပါတီ (SNDP)မှ ဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။ 

ကုန်ဈေးတန်းကို တွေ့ရစဉ်

၎င်းက “ရေတို စီမံကိန်းအနေနဲ့ အဓိက အရေးကြီးဆုံးက ကုန်စျေးနှုန်း တည်ငြိမ်ကျဆင်းရမယ်၊ အလုပ်အကိုင် တွေ ရရှိအောင် လုပ်ရမယ်၊ နိုင်ငံတကာနဲ့။ ဒီပေါ်လာပြီဆိုလို့ရှိရင် (Sanction) လည်း လွတ်ကင်းအောင် (Sanction Leave) လုပ်နိုင်အောင် အဲ့တာ ကြိုးစားပေးရမယ်။ Sanction ရုတ်သိမ်း ထားတယ်ဆိုလို့ရှိရင် အလိုလို နေရင်းနဲ့ နိုင်ငံခြားရင်းနှီးမြှုပ်နှံမှုတွေ လာတော့မယ်လေ။ လာရင် ဒါ အလုပ်အကိုင် အခွင့်အလမ်းတွေလည်းရမယ် ကုန်စျေးနှုန်းတွေလည်း အထိုက်အလျောက်တော့ တည်ငြိမ်သွားမယ်။ အလုပ်အကိုင် အခွင့်အလမ်းတွေလည်း ရမယ်၊ ကျပ်ငွေလည်း တန်ဖိုးတက်လာမယ်လို့ မြင်တယ်လေ။ အဲ့တာ အားချင်းလုပ်ရမယ် ရက် ၁၀၀ လေးပဲ ဆိုပေမယ့် ဒီလျှပ်စစ်ကို စက်မှုဇုန်တွေမှာ လျှပ်စစ်ရအောင် မြန်မြန်လုပ်ပေးရမယ်။ ပြည်သူလူထုလည်း လျှပ်စစ်မီး ရအောင် လုပ်ပေးရမယ် အဲ့တာတွေက အရေးကြီးတယ်။ ခုက ကုန်စျေးနှုန်းတွေက အရမ်းကြီး မြင့်နေတယ်၊ ပြည်သူလူထုက စားဝတ်နေရေး အခက်အခဲရှိတယ်၊ အထူးသဖြင့် အခြေခံ လူတန်းစားတွေမှာ အရမ်း အခက်အခဲ ဖြစ်တယ်၊ အဲတာကို ဦးစား‌ပေး လုပ်ရမယ် တက်လာတဲ့ အစိုးရက” ဟု ပြောသည်။

လက်ရှိ မြန်မာနိုင်ငံတွင် ပြည်သူလူထုများ၊ အဓိကအားဖြင့် အခြေခံ လူတန်းစားများ အခက်ကြုံတွေ့နေရသည့် ကုန်စျေးနှုန်း အဆမတန် ကြီးမြင့်မှုကို ဦးစားပေး ဆောင်ရွက်လိုကြောင်း၊ ၎င်းကိစ္စရပ်များသည် အချိန်တိုအတွင်း ဖြေရှင်းနိုင်သည့် ကိစ္စရပ်များဖြစ်ပြီး ပြည်သူနှင့်တိုက်ရိုက် သက်ဆိုင်သည့်အတွက် ဦးစွာ ဖြေရှင်းသင့်သည်ဟု နိုင်ငံရေးလေ့လာသုံးသပ်သူ ဦးထက်အောင်ကျော်မှ CNI သတင်းဌာနသို့ ပြောသည်။ 

မဲ‌ပေးရန် စောင့်နေကြသူများကို တွေ့ရစဉ်

၎င်းက “မဖြစ်သင့် မဖြစ်ထိုက်ဘဲ ဖြစ်နေတဲ့ ကုန်စျေးနှုန်း ကြီးမြင့်မှုပေါ့။ အဲ့ဒီဟာကိုက အခုတင်ပြလိုက် အခု ဖြေရှင်းလိုက် အခုပြီးသွားမယ့်ကိစ္စ ချက်ချင်း ပြီးသွားမယ့်ကိစ္စ လွယ်လွယ်လေးကို ကျနော်တို့ ဘာသာ ကျနော်တို့ နားရွက်ပတ်ကိုင်ပြီး ရှုပ်နေတဲ့ကိစ္စဖြစ်တဲ့ အတွက်ကြောင့်မို့လို့ အဲ့တာကတော့ အမြန်ဆုံး တင်ပြပြီးတာနဲ့ ချက်ချင်း ပြီးမယ့် ကိစ္စဆိုတော့ ပထမဦးဆုံး လုပ်သင့်တဲ့ကိစ္စလို့တော့ ကျနော်ကတော့ တိုက်တွန်းလိုတယ်ပေါ့။ ကျနော်တို့သာ ပါတီဆက်ရှိနေရင် ဆက်လုပ်မယ်ဆို ပထမဦးဆုံး လွှတ်တော်မှာ တင်မယ့် ဟာကတော့ အဲဒီအဆိုပေါ့။ အဲဒါပဲ ဖြစ်ပါလိမ့်မယ် အဲ့အတွက်ကြောင့်မို့လို့ ဒါမျိုးဟာတွေကို လုပ်လိုက်ခြင်းအားဖြင့် အခုလက်ရှိ ဆေးနဲ့ ပတ်သက်တဲ့ ဟာတွေ ဆိုလို့ရှိရင် ပြည်သူလူထု တော်တော် ခံစားနေရတဲ့ကိစ္စ ဆေးတွေ ဆေးဝါးစျေးတွေက အထိုက်အားလျော်စွာ မဟုတ်ပဲနဲ့ မတရား ကြီးမြင့်နေတဲ့ စျေးတွေရှိတယ်။ ဒါတွေ ချက်ချင်း ပြန်ပြုတ်ကျသွားမယ် တိုင်းပြည်လူထုရဲ့ ကျန်းမာရေးနဲ့လည်း တိုက်ရိုက် သက်ဆိုင်နေတဲ့ ဟာတွေဖြစ်တဲ့ အတွက်ကြောင့်မို့လို့ ဒါတွေကို အရင်ဆုံး ဖြေရှင်းသင့်တယ်လို့တော့ ကျနော် ယူဆတယ်” ဟု ပြောသည်။

ပြည်သူလူထုသည် ရွေးကောက်ပွဲ ဝင်ရောက် ယှဥ်ပြိုင်ကြမည့် နိုင်ငံရေးပါတီများနှင့် ကိုယ်စားလှယ်လောင်များကို သေချာ စိစစ်ရွေးချယ်ရန် လိုအပ်ကြောင်း၊ ပြည်သူအကျိုး၊ နိုင်ငံအကျိုးကို တကယ်လုပ်ဆောင်မည့် ကိုယ်စား လှယ်လောင်းနှင့် နိုင်ငံရေးပါတီများအား ရွေးချယ်ရန်လိုအပ်သည်ဟု နိုင်ငံရေးလေ့လာစောင့်ကြည့်သူများက အကြံပြုကြသည်။

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ရွေးကောက်ပွဲ အပိုင်း(၁)ကိုလည်းကောင်း၊ ၂၀၂၆ ခုနှစ်၊ ဇန်နဝါရီ ၁၁ ရက်မှာတော့ ရွေးကောက်ပွဲ အပိုင်း(၂)ကိုလည်းကောင်း၊ ဇန်နဝါရီ နောက်ဆုံးပတ်တွင် ရွေးကောက်ပွဲ အပိုင်း (၃)ကိုလည်းကောင်း အသီးသီး ကျင်းပသွားမည်ဖြစ်သည်။

ထို့နောက် အစိုးရသစ်နှင့် လွှတ်တော် ပေါ်ပေါက်လာမည်ဖြစ်သည်။

CNI News

၂၀၂၅ ခုနှစ်၊ နိုဝင်ဘာ ၁၈

ရွေးကောက်ပွဲတွင် ဦးဆောင်၍ အစိုးရဖွဲ့နိုင်သူ မည်သူပဲဖြစ်ဖြစ် အမျိုးသားညီညွတ်ရေးအစိုးရ ပုံစံမျိုးဖြစ်ရန် လိုကြောင်း ပြည်သူ့ပါတီ( PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ယခုနှစ်ကုန်ပိုင်းတွင် ရွေးကောက်ပွဲ ကျင်းပမည်ဖြစ်သည့်အတွက် မြန်မာနိုင်ငံ၌ မည်ကဲ့သို့ စုဖွဲ့မှု အစိုးရပုံစံမျိုး တက်လာနိုင်သလဲဆိုသည့်အပေါ် အားလုံးက စိတ်ဝင်တစား စောင့်ကြည့်နေကြသည်။

ဦးကိုကိုကြီးက “အခုကတော့လေ ရွေးကောက်ပွဲ မကျင်းပရသေးတော့ ရွေးကောက်ပွဲရလဒ်နဲ့ ပတ်သက်ပြီးတော့ ကျနော်တို့ ဘာမှကြိုပြီးတော့ ပြောလို့မရဘူးပေါ့၊ အဲ့တော့ ပြိုင်တာကတော့ ပြိုင်ကြတာပေါ့။ သို့သော် ဦးဆောင် ပြီး အစိုးရဖွဲ့နိုင်တဲ့ သူ‌တွေက ဘယ်သူပဲဖြစ်ဖြစ်ပါ။ ကျနော် ၂၀၂၀ ရွေးကောက်ပွဲ မတိုင်ခင်တုန်းကလည်း ဒီအယူ အဆပဲ ပြောခဲ့တယ်။ အဲ့တော့ ဒီအမျိုးသားညီညွတ်ရေးအစိုးရ ပုံစံမျိုးဖြစ်ဖို့လိုတယ်၊ ပါသင့်ပါထိုက်တဲ့ ပုဂ္ဂိုလ်တွေ၊ တိုင်းရင်းသားတွေ ပါဝင်ပြီးတော့ ပူးပေါင်းခြင်းအားဖြင့် ပြဿနာတွေကို စုပေါင်းဖြေရှင်းကြတယ်ဆိုတဲ့ ပုံရိပ်ပေါ့ နော်။ အဲ့ဒီဟာ ပေါ်လာဖို့ လိုတယ်လို့ ကျနော် အဲ့လိုပဲမြင်ပါတယ်” ဟု CNI သတင်းဌာနသို့ ပြောသည်။

အစိုးရတစ်ခု၏ပုံစံ သို့မဟုတ် နိုင်ငံတော်ကို အုပ်ချုပ်သည့် ပုံစံဟူသည် ပြည်ထောင်စု နိုင်ငံတော်တစ်ခု၏ အစိုးရ က ၎င်း၏အာဏာကို လွှတ်တော်တွင်း နိုင်ငံရေး အကောင်အထည် ဖော်သူများအပေါ် လွှမ်းခြုံနိုင်စေရန် ပြင်ဆင် ထားသည့် နိုင်ငံရေးပြဋ္ဌာန်းချက် ပုံစံကို ရည်ညွှန်းသည်။

နိုင်ငံရေးပါတီ ခေါင်းဆောင်များကို တွေ့ရစဉ် 

လာမည့် ရွေးကောက်ပွဲတွင် လူထုကို မျက်နှာမူသည့် အစိုးရဖြစ်ရန် လိုအပ်ကြောင်း၊ မိမိတို့ တိုင်းပြည်သည် ညီညွတ်မှု လျော့နေသည့်အတွက် လက်ရှိ အခြေအနေမျိုး ဖြစ်နေရသည်ဟု နိုင်ငံရေးလေ့လာသုံးသပ်သူ ဦးထက်အောင်ကျော် CNI သတင်းဌာနသို့ ပြောသည်။

၎င်းက “အဓိက,ကတော့ လူထုကို မျက်နှာမူရမှာပေါ့၊ လူထုကို မျက်နှာမူတဲ့ လွှတ်တော်ကြီးဖြစ်ရမယ်။ လူထုကို မျက်နှာမူတဲ့ အစိုးရဖြစ်ရမယ်ပေါ့။ တကယ်ကို အပြောင်းအလဲတွေ ဒီဘက် တကယ်ကို သိသာထင်ရှားတဲ့ ကောင်းမွန်သော ရလဒ်တွေကို ဆောင်ကျဉ်းပေးနိုင်မယ့် အစိုးရအဖွဲ့အစည်းတော့ ဖြစ်ဖို့လိုတာပေါ့။ အစိုးရ တစ်ရပ်မှ မဟုတ်ဘူး၊ ဒီ တိုင်းရင်းသားပြည်သူတွေ အကုန်လုံးပေါ့၊ လူမျိုးစုံ၊ ဘာသာစုံ ဒီလိုရှိနေတဲ့ အနေအထား မှာ အားလုံးက သဟဇာတဖြစ်ပြီး ညီညီညွတ်ညွတ်ဖြစ်ဖို့က အင်မတန် အရေးကြီးတယ်။ ကျနော်တို့ တိုင်းပြည်က ညီညွတ်မှု လျော့နေတဲ့အတွက်ကြောင့် လက်ရှိ အခြေအနေမျိုး ဖြစ်နေတာ။ အဲ့ဒီအတွက်ကြောင့် အားလုံး တစ်ယောက်နဲ့တစ်ယောက်နဲ့ အငြင်းပွား နေတဲ့ဟာတွေ ရပ်တန့်သွားနိုင်တဲ့ အားလုံးပါဝင်သော အစိုးရတစ်ရပ် ဖြစ်တယ်ဆိုရင်တော့ သိပ်လှပတဲ့ ခရီးစဉ်မျိုး ဖြစ်မှာ”ဟု ပြောသည်။

မကြာခင် ကျင်းပမည့် ရွေးကောက်ပွဲအပြီး ဖွဲ့စည်းလာမည့် အစိုးရသစ်ကို တပ်မတော်နှင့် USDP က ဦးဆောင်လာ မည် ဖြစ်ကြောင်း၊ သို့သော် တခြားသော တိုင်းရင်းသားနိုင်ငံရေးပါတီများမှ ကိုယ်စားလှယ်များကိုလည်း နေရာ ပေး ဖွဲ့စည်းခြင်းဖြင့် လက်ရှိ နိုင်ငံရေးအကျပ်အတည်းကို ကျော်လွှားရန် အထောက်အကူဖြစ်မည်ဟု နိုင်ငံရေး လေ့လာစောင့်ကြည့်သူများက ထောက်ပြကြသည်။

မြန်မာနိုင်ငံ၌ မည်ကဲ့သို့ စုဖွဲ့မှု အစိုးရပုံစံမျိုး တက်လာနိုင်သလဲဆိုခြင်းက ပြည်သူများက မည်သို့အပ်နှင်းမည်ဆို သည့်အပေါ်တွင် အခြေခံလိမ့်မည်ဟု ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)၏ ပြောရေးဆိုခွင့်ရှိသူ ဦးသိန်းထွန်းဦးက CNI သတင်းဌာနသို့ ပြောသည်။

နိုင်ငံရေးပါတီများနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ် 

၎င်းက “ရွေးချယ်ပေးလိုက်တဲ့ ပြည်သူတွေကနေပြီးတော့ ဘယ်လို အပ်နှင်းမယ်ဆိုတဲ့ အပေါ်မှာ အခြေခံလိမ့် မယ်လို့ မြင်တယ်။ ပြည်သူကနေပြီးတော့ တစ်ပါတီထဲကိုပဲ စုပြုံပြီးတော့ ပေးလိုက်မလား၊ အချိုးချပြီးတော့ ပေးလိုက် မလားဆိုတဲ့အပေါ်မှာ  အခြေခံပြီးတော့သာလျှင် ပေါ်ပေါက်လာမဲ့ အစိုးရဟာလည်းပဲ ဒါသူ့ရဲ့ သတ်မှတ် ချက်ဖြစ်ပါတယ်၊ ဖြစ်သင့်ဖြစ်အပ်တဲ့ အနေအထားတွေကတော့ များစွာရှိပါတယ်။ ဒါပေမယ့်လို့  ဒီလုပ်ပိုင်ခွင့် အာဏာ ပေးတာသည် ပြည်သူက ဖြစ်တဲ့အတွက် ပြည်သူသာလျှင် အဓိကလို့ပဲ ပြောချင်ပါတယ်။ ထိုင်ခုံပေါ်မှာ မူတည်ပါလိမ့်မယ်၊ ရလာတဲ့ လွှတ်တော်ကိုယ်စားလှယ်ရဲ့  Foot ပေါ်မှာ မူတည်လိမ့်မယ် ဟို ဖြစ်သင့်ခြင်း မဖြစ် သင့်ခြင်းကတော့ လက်ရှိ အနေအထားတွေပေါ်မှာ အခြေတည်ပြီးတော့ပဲ နောင်ဖြစ်လာမယ့် အနာဂတ်ပေါ်မှာ စဥ်းစားရမဲ့ကိစ္စတွေ ဖြစ်ပါတယ်”ဟု ပြောသည်။

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ရွေးကောက်ပွဲ အနိုင်ရသည့် နိုင်ငံရေးပါတီအား နိုင်ငံတော်အာဏာ လွှဲပြောင်းပေးမည်ဖြစ်ကြောင်း ပြောကြားထားသည်။

ပြည်တွင်း/ပြည်ပ သံတမန်များကတော့ မြန်မာနိုင်ငံတွင် ကျင်းပရန် စီစဉ်နေသော ရွေးကောက်ပွဲသည်အမည်ခံ သက်သက်သာဖြစ်ပြီး မည်သည့် ရလဒ်ထွက်လာပါစေ တပ်မတော်က ဦးဆောင်သည့် အစိုးရပုံစံ တစ်ရပ်သာ ထွက်လာမည်ဖြစ်ကြောင်း ထောက်ပြကြသည်။

သို့သော် မြန်မာနိုင်ငံတွင် ဖြစ်ပေါ်နေသော နိုင်ငံရေး အကျပ်အတည်းနှင့် လက်နက်ကိုင် ပဋိပက္ခကို ဖြေရှင်းနိုင်ရန် အတွက်ဆိုလျှင် လာမည့်အစိုးရသစ်သည် အမျိုးသားညီညွတ်ရေးအစိုးရ တစ်ရပ်ဖြစ်ရန် လိုအပ်ကြောင်း နိုင်ငံရေး လေ့လာစောင့်ကြည့်သူများက ထောက်ပြကြသည်။

CNI News

၂၀၂၅ ခုနှစ်၊ နိုဝင်ဘာ ၁၈

ကိုးကန့်တပ်(MNDAA)၏ တပ်စခန်းများ နောက်ဆုတ်ရန် ညှိနှိုင်းမှု အဆင်မပြေသည့်နောက် မြန်မာ့တပ်မတော်နှင့် တင်းမာမှုများ ဖြစ်ပေါ်လာသည့် အခင်းအကျင်း၌ တရုတ်၏ ကြားဝင်ပေးမှုက အရေးကြီးကြောင်း ပအိုဝ်းအမျိုး သား လွတ်မြောက်ရေးအဖွဲ့ချုပ် (PNLO-NCA/S) မှဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြော သည်။

ရှမ်းပြည်နယ်(မြောက်ပိုင်း) လားရှိုးမြို့ အပြင်ဘက်တွင် ကိုးကန့်တပ်(MNDAA)ဘက်မှ တပ်စွဲထားသည့် တပ်စခန်း များကို ပြန်လည်ဆုတ်ခွာပေးရန် မြန်မာ့တပ်မတော်က တောင်းဆိုမှုကြောင့် နှစ်ဖက် အဖွဲ့အစည်းအကြား တင်းမာ မှုများ ဖြစ်ပေါ်နေကြောင်း စစ်ရေးနှင့်နိုင်ငံရေးအကဲခတ်များထံမှ သိရသည်။

ထိုအခင်းအကျင်းသည် တရုတ်အထူးကိုယ်စားလှယ် မစ္စတာတိန့်ရှီကျွင်း ဦးဆောင်ကာ ကြားဝင်စေ့စပ် ပေးခဲ့သည့် လားရှိုးမြို့ ပြန်လည်လွှဲပြောင်းစဉ်က သဘောတူညီချက် အသေးစိတ် အချက်အလက်အပေါ် မူတည်နေကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO-NCA/S) မှဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ထိုသဘောတူညီချက်တွင် MNDAA ကို တပ်စွဲခွင့်၊ ဆက်လက် ရပ်တည်ခွင့် ပေးထားသည်ဆိုပါက မြန်မာ့ တပ်မတော်ဘက်မှ ပြန်လည်ဆုတ်ခွာခိုင်းမှုသည် သဘောတူညီချက်ကို ချိုးဖောက်ရာ ရောက်ကြောင်း ၎င်းက ပြောသည်။ 

ဗိုလ်မှူးကြီးခွန်ဥက္ကာကို တွေ့ရစဉ်

ဗိုလ်မှူးကြီးခွန်ဥက္ကာက “ဒါကြောင့် လားရှိုးကို ပြန်အပ်ပေမယ့် လားရှိုးပြင်ပ ရောက်နေရာတွေမှာ MNDAA ဆက်လက် ရပ်တည်ခွင့်၊ တပ်စွဲခွင့်ကို သဘောတူထားတယ် ဆိုရင်တော့ အခု စစ်ကော်မရှင်ဘက်က ပြန်ပြီးတော့ ဆုတ်ခိုင်းရင်တော့ ဒါသဘောတူညီချက် ဖောက်တာပေါ့။ ဒါကြောင့် မူလ သဘောတူညီချက်အပေါ် မူတည်ပြီး တော့ စဉ်းစားရမယ်လို့ ယူဆပါတယ်။ ဒါကြောင့် သဘောတူညီချက်ကလည်း ဘာမှန်း ကျနော်တို့ မသိတော့ စဉ်းစားရ နည်းနည်းခက်ပါတယ်။ နောက်ပြီးတော့ ဒီကိစ္စမှာ မူလသဘောတူညီချက်ကို ဦးဆောင်ခဲ့တာ တိန့်ရှီကျွင်း တရုတ်အထူးကိုယ်စားလှယ်ဆိုတော့ တရုတ်အထူးကိုယ်စားလှယ်ရဲ့ အဆုံးအဖြတ်ပေါ့လေ။ တရုတ် ကြားဝင်မှုကလည်း အရေးကြီးတယ်လို့ ထင်ပါတယ်။ တရုတ်က လျစ်လျူရှုမယ် ဆိုရင်တော့ လက်နက်ကိုင်တစ်ခါ ဖြစ်လာနိုင်ပါတယ်။ ဒါကို ကျနော်တို့လည်း ဘယ်လိုမှ မခန့်မှန်းနိုင်ဘူး။ တရုတ်က ဒီအခင်းအကျင်းမှာ ဘာမှ မပြောသေးဘူးဆိုတော့။ နည်းနည်းလေးများ စောနေသလားပေါ့ သို့တည်းမဟုတ် စစ်ကောင်စီဘက်ကလည်း စာချုပ်ကို ကျော်လွန်ပြီးတော့ တောင်းသလား၊ စာချုပ်ထဲကအတိုင်း အချိန်ကာလ အကန့်အသတ်၊ ရက်အကန့် အသတ် ပြည့်လို့များ တောင်းသလားတော့ မသိဘူးပေါ့လေ။ စာချုပ်ကို ကျနော်တို့မှ လုံးဝ မဖတ်ရတာ။ ဒါကြောင့် တရုတ်ရဲ့ လေသံကိုလည်း နားထောင်သင့်တယ်လို့ ယူဆပါတယ်” ဟု ပြောသည်။

MNDAA သည် လားရှိုးမြို့ကို မြန့်မာ့တပ်မတော်ထံ ပြန်လည်လွှဲပြောင်း ပေးအပ်ထားခြင်းဖြစ်သော်လည်း လားရှိုး မြို့ ပြင်ပ ပတ်ပတ်လည်၌ MNDAA တပ်စွဲထားမှု အများအပြား ရှိနေကြောင်း လားရှိုးဒေသခံထံမှ သိရသည်။

ရွေးကောက်ပွဲ လုံခြုံမှုနှင့် ကုန်သွယ်ရေးလမ်းကြောင်း ပြန်ဖွင့်နိုင်ရေးအတွက် သေချာစိတ်ချစေရန် တပ်မတော် ဘက်မှ MNDAA တပ်စခန်းများအား ဆုတ်ခွာခိုင်းမှု ဖြစ်နိုင်ကြောင်း၊ နှစ်ဖက် အဖွဲ့အစည်း အနေဖြင့် မူလ သဘော တူ ထားသည့်အတိုင်း လိုက်နာကြရန်လိုကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO-NCA/S) မှဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

MNDAA တပ်ဖွဲ့ကို တွေ့ရစဉ်

၎င်းက “ရေရှည် ရွေးကောက်ပွဲ မတိုင်ခင်မှာ ဒေသလုံခြုံရေးအတွက် သူတို့စိတ်ချရအောင် လုပ်တာနဲ့ တူပါတယ်။ ဒါကြောင့် နောက် လမ်းကလည်း ပွင့်ဖို့လိုလာတဲ့ အခါကြတော့ စစ်ကော်မရှင်ဘက်က ရွေးကောက်ပွဲ လုံခြုံမှုရယ်၊ ကုန်သွယ်ရေးလမ်းကြောင်း ပြန်ဖွင့်နိုင်မှုရယ် ဒီအပေါ်မှာ ပိုပြီးတော့ သေချာစိတ်ချရအောင် One Belt One Road ဘယ်၊ ညာ နှစ်ဖက်ရှိနေတဲ့ ရွာတွေမှာ အခြေခံနေတဲ့ ကိုးကန့်တပ်ကို ဆုတ်ခိုင်းနေတာလည်း ဖြစ်နိုင်ပါတယ်။ တရုတ်က ဘာမှ မေတ္တာရပ်ခံတာ မရှိဘူးဆိုရင်တော့ ဆုတ်မှာမဟုတ်ဘူးလေ။ မူလ သဘောတူချက် အတိုင်းပဲ သူရပ်မှာပဲ။ ကတိသစ္စာရှိတဲ့ အတိုင်းပေါ့ agreement ပေါ့ သဘောတူထားတဲ့ အတိုင်းကိုလည်း နှစ်ဖက်က လိုက်နာဖို့လိုတာပေါ့” ဟု ပြောသည်။

နိုဝင်ဘာ ၁၁ ရက်ကစပြီး လားရှိုးမြို့ ဆင်နှစ်ကောင်ဟိုတယ်၌ မြန်မာ့တပ်မတော်နှင့် ကိုးကန့်တပ်(MNDAA)တို့ တွေ့ဆုံဆွေးနွေးမှုများရှိကြောင်း သတင်းများ ထွက်ပေါ်နေသည်။

မြန်မာ့တပ်မတော်သည် အောက်တိုဘာ ၁၇ ရက်တွင် သီပေါမြို့ကို တအာင်းတပ်(TNLA)ထံမှ သိမ်းယူပြီးနောက်  ပြည်ထောင်စုလမ်း၏ မန္တလေး-သီပေါလမ်းပိုင်းကို နေရာယူထားခြင်း ဖြစ်သည်။

ထို့အတူ ကိုးကန့်တပ်(MNDAA)သည်လည်း ပြည်ထောင်စုလမ်း၏ သီပေါ-လားရှိုးလမ်းပိုင်းကို ထိန်းထားခြင်း ဖြစ်သည်။

နှစ်ဖက်အကြား စစ်ရေးတင်းမာနေသည့် အခြေအနေ၌ လားရှိုးမြို့တွင် စစ်သုံ့ပန်း ၂၀၀ ကျော်ကို MNDAA မှ ပြန်လွှတ်ပေးလိုက်ကြောင်း သိရသည်။

CNI News

၂၀၂၅ခုနှစ်၊ နိုဝင်ဘာ ၁၇

မကြာမီ ကျင်းပမည့် ရွေးကောက်ပွဲသည် လက်ရှိ မြန်မာနိုင်ငံတွင် ဖြစ်ပေါ်နေသည့် နိုင်ငံရေး အကျပ်အတည်းများ ကို ဖြေရှင်းနိုင်မည့် နည်းလမ်းတစ်ခု ဖြစ်သည်ဟု ရခိုင့်ဦးဆောင်ပါတီ(AFP)မှဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

နိုင်ငံတော်အစိုးရအနေဖြင့် ၂၀၂၅ ခုနှစ်၊ ဒီဇင်ဘာ ၂၈ ရက်တွင် ရွေးကောက်ပွဲ အပိုင်း(၁)ကိုလည်းကောင်း၊ ၂၀၂၆ ခုနှစ်၊ ဇန်နဝါရီ ၁၁ ရက်၌ ရွေးကောက်ပွဲ အပိုင်း(၂)ကိုလည်းကောင်း၊ ၂၀၂၆ ခုနှစ်၊ ဇန်နဝါရီနောက်ဆုံးပတ်တွင် ရွေးကောက်ပွဲ အပိုင်း(၃)ကိုလည်းကောင်း ကျင်းပရန် စီစဉ်၍ နိုင်ငံတည်ငြိမ်အောင် ကြိုးပမ်းလျက်ရှိနေသည်။

ရွေးကောက်ပွဲက လက်ရှိ နိုင်ငံ‌ရေး အကျပ်အတည်းကို ကျော်ဖြတ်နိုင်သည့် တစ်ခုတည်းသော ခြေလှမ်းအစ ဖြစ်သည်ဟု ယူဆ၍ရကြောင်း၊ လက်နက်ကိုင် လမ်းစဥ်သည် နိုင်ငံရေး အကျပ်အတည်းကို ဖြေရှင်းနိုင်မည့် နည်းလမ်းဟု မြင်လျှင် မြန်မာ့သမိုင်းကို ပြန်လေ့လာကြည့်ရန် လိုအပ်ကြောင်း ရခိုင့်ဦးဆောင်ပါတီ(AFP)မှဥက္ကဋ္ဌ‌ ဒေါက်တာအေးမောင်က CNI သတင်းဌာနသို့ ပြောသည်။ 

SNDP ပါတီဥက္ကဋ္ဌ စိုင်းအိုက်ပေါင်းကို တွေ့ရစဉ်

‌၎င်းက “ရွေး‌‌ကောက်ပွဲသည် လက်ရှိ အကျပ်အတည်းကို ကျော်ဖြတ်နိုင်တဲ့ တစ်ခုတည်းသော ခြေလှမ်းအစ ဖြစ်တယ်လို့ သုံးသပ်လို့လည်းရတယ်။ လက်မခံဘူးဆိုတဲ့ ပုဂ္ဂိုလ်တွေသည် ရွေးကောက်ပွဲ နည်းမဟုတ်ပဲနဲ့ ဘယ်လို နည်းများ သူတို့ တွေ့ထားကြပြီး(လဲ)။ လက်နက်ကိုင်တဲ့ နည်းနဲ့ လက်ရှိ အကျပ်အတည်းကို ကျော်ဖြတ်နိုင်မယ်လို့ ထင်သလား‌ပေါ့။ အဲ့သလိုဆိုရင် ဒီကာလ မတိုင်ခင် နှစ်ပေါင်း (၇၀)ကျော်လောက်ကို ဖြတ်သန်းခဲ့တဲ့ မြန်မာ့သမိုင်းကို ပြန်လေ့လာကြည့်လို့ရတယ်၊ အဲ့တာကြောင့် ဖွဲ့စည်းပုံအခြေခံဥပဒေအရပဲ မြန်မာ့နိုင်ငံရေး အကျပ်အတည်း တစ်နည်းအားဖြင့် လက်နက်ကိုင်ပဋိပက္ခရဲ့ နိုင်ငံရေး အရွေ့တစ်ခုဖြစ်အောင် ဆောင်ရွက်ရမယ်လို့ ကျနော်တို့က ယုံကြည်တာ အဲ့တာကြောင့် မြန်မာ့ငြိမ်းချမ်းရေးဆိုတဲ့ အရွေ့သည် ခုနက လက်နက်ကိုင်ပဋိပက္ခ ဖြေရှင်းရမယ့် နည်းတစ်ခု သွားတာပေါ့။ ဘယ်လို လက်နက်ကိုင်ပဋိပက္ခကို ဖြေရှင်းမှာ လဲဆိုရင် ခုနကပြောတဲ့ ဖွဲ့စည်းပုံအခြေခံဥပဒေအရ ကျနော်တို့ ကြွေးကြော်နေကြတဲ့ ဖက်ဒရယ်ဒီမိုကရေစီ နိုင်ငံတော်သစ်ဖြစ်အောင် တည်ဆောက်ကြရမှာပေါ့။ အဲ့တာကို အခြေခံဥပဒေအရ ပြဋ္ဌာန်းချက်တွေ ပေးထား ချက်တွေ ပြန်လည်ဖွဲ့စည်း စည်းနှောင်ဖို့လိုတာပေါ့” ဟု ပြောသည်။

ရွေးကောက်ပွဲသည်သာ နိုင်ငံ၏အရွေ့တစ်ခု ဖြစ်နိုင်မည်ဆိုသည်မှာ ရာနှုန်းပြည့် မှန်ကန်ကြောင်း၊ ရွေးကောက်ပွဲ အလွန် ပေါ်ပေါက်လာမည့် လွှတ်တော်သည် တိုင်းပြည်အတွက် ထွက်ပေါက်တစ်ခုဖြစ်သည်ဟု ရှမ်းနှင့်တိုင်းရင်း သားများ ဒီမိုကရက်တစ်ပါတီ(SNDP)မှဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။ 

နိုင်ငံရေးပါတီများနဲ့ UEC ကိုတွေ့ရစဉ်

၎င်းက “ဖြစ်တာပေါ့ ရာခိုင်နှုန်း အပြည့်ဖြစ်တာပေါ့။ လွှတ်တော် ပေါ်လာပြီဆိုလို့ရှိရင် အာဏာသုံးရပ်က ခွဲသွားပြီလေ၊ အစိုးရက အုပ်ချုပ်ရေးအာဏာ၊ လွှတ်တော်က ဥပဒေပြုရေးအာဏာ၊ တရားစီရင်ရေးအာဏာလည်း သီးသန့်ပြန်ဖြစ်သွားပြီလေ။ အာဏာသုံးရပ်က (Check and balance) ဖြစ်သွားပြီ (separation power) ဖြစ်သွား ပြီလေ။ အခု လောလောဆယ်က အခြေခံဥပဒေက ကာကွယ်ရေးဦးစီးချုပ် လက်ထဲမှာပဲ အာဏာသုံးရပ်က ရှိတာကို အခြေခံဥပဒေက သူ့ကိုပေးထားတယ်လေ၊ အဲဒီ လွှတ်တော်အသစ် ပေါ်လာပြီ၊ အစိုးရသစ် ပေါ်လာပြီ ဆိုရင် အာဏာသုံးရပ်က ခွဲသွားပြီ။ ခွဲသွားတယ်ဆိုလို့ရှိရင် ဒါက အစိုးရသစ်ဖြစ်သွားပြီ၊ ဘယ်လိုပဲပြောပြော အရပ်သား အစိုးရသစ်တော့ ပေါ်လာမှာပဲ ပြည်ထောင်စုအစိုးရတင် မဟုတ်ဘူး။ တိုင်းဒေသကြီး အစိုးရသစ်လည်း ပေါ်လာမယ် ပြည်နယ်အစိုးရသစ်လည်း ပေါ်လာမယ်။ အဲကျရင် လူတွေက စိတ်ဓာတ်ကလည်း တစ်မျိုးပြောင်း လဲတာပေါ့။ တိုင်းပြည်ဖွံ့ဖြိုးတိုးတက်အောင် ဘယ်လိုလုပ်မလဲ ဒါလွှတ်တော် ကိုယ်စားလှယ်တွေ လုပ်ရမယ့် အလုပ်တွေလေ။ လွှတ်တော်ကိုယ်စားလှယ်တွေရယ်၊ အစိုးရရယ် လုပ်ရမယ့် အလုပ်တွေ။ ဒါသူတို့အပေါ်မှာ အများကြီး တာဝန်ရှိသွားပြီ။ အမှန်အကန်ပဲလေ လွှတ်တော်က တိုင်းပြည်အတွက် ထွက်ပေါက်တစ်ခုပဲလေ ရွေးကောက်ပွဲဆိုတာ လုပ်လိုက်မှ အရပ်သားအစိုးရတစ်ရပ် ပေါ်လာမယ်လေ၊ ရွေးကောက် တင်မြှောက်တဲ့ အစိုးရ ပေါ်လာတယ်ဆိုလို့ရှိရင် နိုင်ငံတကာကလည်း အသိအမှတ်ပြုမှုက ရလာမယ်လေ”ဟု ပြောသည်။ 

ထို့ပြင် ပြည်သူလူထုများ အားလုံးအနေဖြင့် မကြာခင် ကျင်းပမည့် အထွေထွေရွေးကောက်ပွဲသို့  ပူးပေါင်းပါဝင်ပြီး မိမိတို့ ဆန္ဒပြုသည့် ပါတီများသို့ လာရောက် မဲပေးကြရန်အတွက် ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP)မှဥက္ကဋ္ဌ စိုင်းအိုက်ပေါင်းမှ တိုက်တွန်းပြောဆိုထားသည်။  

တခြားတစ်ဖက်မှာတော့ လက်နက်ကိုင်အဖွဲ့အစည်းများနှင့် နွေဦးတော်လှန်ရေး အင်အားစုများက မြန်မာနိုင်ငံ တွင် ကျင်းပမည့် ရွေးကောက်ပွဲအား မပျက်ပျက်အောင် ဖျက်မည်ဟု ကြွေးကြော်ထားသလို ရွေးကောက်ပွဲ ပူး ပေါင်း ပါဝင်သူများကိုလည်း အရေးယူသွားမည်ဟု ထုတ်ပြန်ထားသည်။

CNI News

၂၀၂၅ ခုနှစ်၊ နိုဝင်ဘာ ၁၇

၂၀၂၁ ခုနှစ်၊ ဖေဖော်ဝါရီ ၁ ရက်နေ့ နိုင်ငံရေးအပြောင်းအလဲ ဖြစ်ပြီးနောက်ပိုင်း ပေါ်ထွက်လာသည့် ပြည်သူ့ ကာကွယ်ရေးတပ်ဖွဲ့ (PDF) များသည် တိုင်းရင်းသား လက်နက်ကိုင် အဖွဲ့အစည်း(EAO)များအတွက် အသုံးချခံ ဖြစ်နေကြောင်း စစ်ရေးနှင့်နိုင်ငံရေး အကဲခတ်များက CNI သတင်းဌာနသို့ ပြောသည်။

လက်ရှိတွင် EAO-PDF ပူးပေါင်းတပ်ဖွဲ့များမှ သိမ်းပိုက် ရယူနိုင်ခဲ့သည့် နယ်မြေအချို့ကို မြန်မာ့တပ်မတော်နှင့် EAO တို့ကြား သဘောတူညီချက်များ ရရှိခဲ့ကြပြီး မြို့အချို့ကို ပြန်လည်လွှဲပြောင်း ပေးအပ်ခဲ့ကြသကဲ့သို့ ဆုတ်ခွာ မှုများ ပြုလုပ်ခဲ့ကြသည်။

ထိုသဘောတူညီမှုတွင် နွေဦးတော်လှန်ရေး အင်အားစုများနှင့်ပတ်သက်၍ အကျိုးအမြတ် မပါဝင်နိုင်ကြောင်း၊ PDF များသည် အသုံးချခံ သပ်သပ်သာ ဖြစ်နေကြောင်း တိုင်းလိုင်(ရှမ်းနီ)အမျိုးသားများ ဖွံ့ဖြိုးတိုးတက်ရေးပါတီ (TNDP)မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “နွေဦးတော်လှန်ရေးဆိုတဲ့ အပိုင်းကဏ္ဍ ကတော့လေ ကျနော့် အမြင်ကတော့ PDF တွေက အသုံးချခံ သပ်သပ် လောက်ပဲရှိတယ်။ ကျနော်တို့ ပြောမယ်ဆိုရင် တိုင်းရင်းသားလက်နက်ကိုင် အဖွဲ့အစည်းတွေက central  government ကို အယုံအကြည် မရှိဘူး။ အယုံအကြည် မရှိတဲ့အခါကြတော့ PDF ကိုလည်း သူတို့ ယုံကြည်မှာ မဟုတ်ဘူးလေ။ လူအင်အား လိုတာပေါ့။ လိုတဲ့အခါကြတော့ သူနယ်မြေ ချဲ့ထွင်ဖို့အတွက် အသုံးချမယ်။ ဆွေးနွေး ညှိနှိုင်းတဲ့ အခါကြရင် PDF တွေကတော့ ပါဝင်မှာ မဟုတ်ဘူး။ ယနေ့ TNLA ရဲ့ လုပ်ဆောင်ချက်ကိုကြည့် အဲဒီ အတိုင်းပဲလေ။ မိုးကုတ်နဲ့ မိုးမိတ်ကို ပြန်ပေးမယ်။ မိုးကုတ်ကို မန္တလေး PDF တွေကဝင်မယ် အဲဒီအပိုင်းကဏ္ဍတွေ မှာ အငြင်းပွားမှုတွေ ကျနော်တို့ ကြားနေရတယ်။ အဲဒါကတော့ တိုင်းရင်းသားလက်နက်ကိုင် အဖွဲ့အစည်းတွေရဲ့ ဆုံးဖြတ်ချက်တွေပဲ ဖြစ်သွားလိမ့်မယ်။ သူတို့ကတော့ သူတို့ဆီ ရောက်တဲ့လူကို အသုံးချမှာပဲလေ။ ဒါအင်အား တစ်ရပ်ပဲ။ ခါတိုင်းလည်း ပြောမယ်ဆို လူအင်အား မရတဲ့အခါကြ လိုက်ဆွဲတာတောင် ရှိသေးတာကို။ အခု လောလောဆယ် သူတို့ဆီကို လာခဲ့တဲ့အခါကြတော့ သူတို့ ကောင်းကောင်း အသုံးပြုမှာပေါ့ အဲဒါကတော့” ဟု ပြောသည်။ 

NUG နဲ့ MDY-PDF ခေါင်းဆောင်ကို တွေ့ရစဉ်

၂၀၂၁ ခုနှစ် နောက်ပိုင်း ပေါ်ထွက်လာသည့် PDF တပ်ဖွဲ့များသည် တိုင်းရင်းသားလက်နက်ကိုင်အဖွဲ့အစည်း (EAO)  နယ်မြေများသို့ သွားရောက်ကာ စစ်သင်တန်းများ တက်ရောက်သင်ကြား၍ EAO များ သိမ်းပိုက်လိုသော နယ်မြေ များကို ရှေ့တန်းကနေ တိုက်ခိုက်ပေးရလျက်ရှိသည်။ 

တိုက်ပွဲများ ပြင်းထန်ကာ နယ်မြေသိမ်းပိုက်မှု အများအပြား ရရှိခဲ့ကြသည့် ၁၀၂၇ စစ်ဆင်ရေးတွင် အဓိက ပါဝင်ခဲ့ ကြသော ကိုးကန့်တပ် (MNDAA) နှင့် တအာင်းတပ် (TNLA) တို့သည် လက်ရှိတွင် မြန်မာ့တပ်မတော်နှင့် အပစ်ရပ် လက်မှတ်ထိုးထားကြသည်။

ထို့အပြင် သိမ်းပိုက်ရရှိထားသည့် မြို့အချို့မှ ဆုတ်ခွာကာ မြန်မာ့တပ်မတော်ထံ ပြန်လည်လွှဲပြောင်း ပေးအပ်ခဲ့ရာ PDF ပူးပေါင်းတပ်များနှင့် သဘောထား ကွဲလွဲမှုများ ဖြစ်ပေါ်လာခဲ့သည်။

အလားတူ ကချင်လွတ်လပ်ရေးတပ်မတော်(KIA)သည်လည်း စစ်ကိုင်းတိုင်းဒေသကြီးနှင့် ကချင်ပြည်နယ်အတွင်း မှာ PDF များ၏ အင်အားကို ရယူ၍ မြို့သိမ်းတိုက်ပွဲများ ဖော်ဆောင်ခဲ့ပြီး သယံဇာတနှင့် ကုန်သွယ်ရေး အကျိုး အမြတ်ရှိသည့် နယ်မြေများကို သိမ်းပိုက်ရရှိထားသည်။

KIA နဲ့ PDF ကို တွေ့ရစဉ်

သို့သော် KIA သည် မြန်မာ့တပ်မတော်နှင့် လျှို့ဝှက် ဆက်သွယ်၍ တွေ့ဆုံ ဆွေးနွေးမှုများ ပြုလုပ်ရန် ကြိုးပမ်းနေ ပြီး နှစ်ဖက် တွေ့ဆုံဆွေးနွေးမည့် နေရာကို ညှိနှိုင်းနေသည်။

မိမိတို့၏ အမျိုးသားရေး အကျိုးစီးပွားကိုသာ ကြည့်နေမည်ဆိုပါက ပူးပေါင်းမှု၊ ဦးဆောင်မှု၊ မဟာမိတ်ဖွဲ့မှုများ သည် အတုအယောင်များသာ ဖြစ်နေမည်ဟု နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။

၎င်းက “ကိုယ်တို့နိုင်ငံကတော့ စစ်ကော်မရှင် အပါအဝင် စေတနာမှန်မှန်နဲ့ ဦးဆောင်ပြီး မလုပ်လို့ရှိရင်တော့ ပူးပေါင်းမှုကလည်း အတုပဲဖြစ်မှာပဲ။ နောက်ပြီး ပြည်ထောင်စုကလည်း အတုပြည်ထောင်စုပဲ ဖြစ်နေမှာပဲ။ မဟာမိတ်တွေနဲ့ ပူးပေါင်းရင်လည်း အတုမဟာမိတ်တွေ ဖြစ်လာမှာပဲ ဖြစ်နေမှာပဲ။ ဘာလို့ဆိုတော့ ကိုယ့် အမျိုးသားရေး အကျိုးပဲ ကြည့်နေကြတယ်။ အခု TNLA လည်း အဲဒီလိုပဲ။ TNLA က သူ့အမျိုးသားရေး အကျိုးပဲ ကြည့်တယ်။ PDF တွေရဲ့ အကျိုးစီးပွားကိုလည်း လှည့်မကြည့်ဘူး။ ပြည်ထောင်စုကြီး တစ်ခုလုံးရဲ့ အကျိုးစီးပွား ကိုလည်း မကြည့်ဘူးဆိုတော့ လက်တွေ့ အနေထားအရကတော့ ကိုယ်သာလို့ရှိရင် ကိုယ်ကသွားလိုက်တယ်၊ သူသာလို့ရှိရင် သူကသွားလိုက်တယ်။ အဲဒီလို အနေအထားပဲ ဖြစ်နေမှာပဲ” ဟု ပြောသည်။

EAOs များသည် မြန်မာ့တပ်မတော်ကို တိုက်ခိုက်နိုင်ရေးနှင့် နယ်မြေသိမ်း ထိန်းချုပ်နိုင်ရေးအတွက် လက်နက်ကိုင် လှုပ်ရှားမည့် အင်အားစု အများအပြားကို PDF များဆီကနေ ရလိုက်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

ထိုအခင်းအကျင်းတွင် အမှန်တကယ် အင်အားစုဆုံးရှုံးမှု၊ ထိခိုက်နစ်နာမှုများသည် PDF တို့သာ အဓိက ခံစားလိုက် ရခြင်းဖြစ်ကာ နိုင်ငံရေး အကျိုးအမြတ်ကိုမူ EAO များမှ ရရှိသွားကြသည်ဟုလည်း ၎င်းတို့က ထောက်ပြကြသည်။

CNI News

၂၀၂၅ ခုနှစ်၊ နိုဝင်ဘာ ၁၆

ကရင်ပြည်နယ်တည်ငြိမ်အေးချမ်းမှု ပျက်ယွင်းအောင် လုပ်ဆောင်နေသူများသည် ကရင်ပြည်နယ်အတွင်းရှိ လက်နက်ကိုင် အဖွဲ့အစည်းများပင် ဖြစ်သည်ဟု နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ နိုဝင်ဘာ ၁၅ ရက်တွင် ကရင်ပြည်နယ်၊ ဘားအံမြို့ရှိ ပြည်နယ်အဆင့် ဌာနဆိုင်ရာ တာဝန်ရှိသူများနှင့် ရပ်မိရပ်ဖများအား တွေ့ဆုံ၍ ၎င်းက ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ကရင်ပြည်နယ်သည် နိုင်ငံလွတ်လပ်ရေး ရပြီးချိန်ကတည်းက လက်နက်ကိုင် သောင်းကျန်းမှုများကြောင့် တည်ငြိမ်အေးချမ်းမှုများ ပျက်ယွင်းပြီး ပြည်နယ်အတွင်း နေထိုင်သည့် ပြည်သူများ ထိခိုက်သကဲ့သို့ နိုင်ငံတော်အနေဖြင့်လည်း ထိခိုက်မှုများရှိကြောင်း၊ ကရင်ပြည်နယ် တည်ငြိမ်အေးချမ်းမှု ပျက် ယွင်းအောင် လုပ်ဆောင်နေသူများသည် ကရင်ပြည်နယ်အတွင်းရှိ လက်နက်ကိုင်အဖွဲ့အစည်းများပင်ဖြစ်ကြောင်း၊ တည်ငြိမ်အေးချမ်းမှုရှိမှသာလျှင် ပညာသင်ကြားနိုင်မည်။ ပြည်သူများ ကျန်းမာရေး စောင့်ရှောက်မှု လုပ်ငန်းများ ကို ဆောင်ရွက်နိုင်မည်၊ ဒေသဖွံ့ဖြိုးတိုးတက်ရေး လုပ်ငန်းများကို ဆောင်ရွက်နိုင်မည်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ထို့ကြောင့် ပြည်နယ်၏ ဖွံ့ဖြိုးတိုးတက်မှုကို ဖျက်စိးနေသည့် တည်ငြိမ်အေးချမ်းမှု ပျက်ယွင်းအောင် ဆောင်ရွက် နေမှုများကို ပြည်နယ်အတွင်း နေထိုင်ကြသူများအနေဖြင့် နည်းလမ်းပေါင်းစုံဖြင့် ကာကွယ်ဆောင်ရွက် သွားကြရန် လိုကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “နိုင်ငံတော် အနေဖြင့် ကရင်ပြည်နယ်အတွင်း ဒေသတည်ငြိမ် အေးချမ်းမှု ပျက်ယွင်းအောင် လုပ်ဆောင်နေမှုများကို ရှင်းလင်း ဆောင်ရွက်လျက်ရှိကြောင်း၊ အွန်လိုင်းငွေကြေး လိမ်လည်မှု နှင့် အွန်လိုင်း လောင်းကစား လုပ်ငန်းများ လုပ်ဆောင်လျက်ရှိသည့် မြန်မာ-ထိုင်း နယ်စပ်အနီးရှိ KK Park  နေရာ အား တပ်မတော် အနေဖြင့် ရှင်းလင်းဆောင်ရွက်နေပြီး အမျိုးသားရေးတာဝန် တစ်ရပ်အနေဖြင့် အပြီးပြတ် ရှင်းလင်းဆောင်ရွက်သွားမည်”ဟု ပြောသည်။

ကရင်ပြည်နယ်အတွင်းမှာ ကရင်အမျိုးသားအစည်းအရုံး(KNU)၊ ဒီမိုကရေစီအကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)၊ ကရင်ပြည်နယ် နယ်ခြားစောင့်တပ်ဖွဲ့/ ကရင်အမျိုးသားတပ်မတော်(BGF/KNA)၊ KNU မှ ထုတ်ပယ် ထားသော နယ်ဒါးမြ ဦးဆောင်သည့် ကော်သူလေးတပ်မတော်(KTA)၊ မွန်ပြည်သစ်ပါတီ(NMSP)၊ ပြည်သူ့ ကာကွယ်ရေးတပ်ဖွဲ့(PDF)များ စသည့် လက်နက်ကိုင် အင်အားစုများ လှုပ်ရှားလျက်ရှိသည်။

ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

အဆိုပါ လက်နက်ကိုင်များထဲတွင် BGF/KNA သည် တပ်မတော်အောက်မှ ရပ်တည်သော အဖွဲ့ဖြစ်ပြီး DKBA၊ KNU/KNLA-PC၊ NMSP တို့သည် တစ်နိုင်ငံလုံးအပစ်အခတ်ရပ်စဲရေး သဘောတူစာချုပ်(NCA)ထိုးထားပြီး တပ်မတော်နှင့် တိုက်ပွဲမရှိပေ။

ထို့နောက် KNU သည် NCA ကနေ နုတ်ထွက်ထားပြီး PDF များကို ဦးဆောင်၍ တပ်မတော်အား ဖြုတ်ချရေး တိုက်ခိုက်လျက်ရှိသလို KTA ကလည်း တပ်မတော်ကို တိုက်ခိုက်လျက်ရှိသည်။

လက်ရှိတွင် မြန်မာ့တပ်မတော်နှင့် KNU-PDF ပူးပေါင်းတပ်ဖွဲ့များကြား ကရင်ပြည်နယ်အတွင်းမှာ တိုက်ပွဲများ အပြင်းအထန်ဖြစ်ပွားနေပြီး မြဝတီ-ကော့ကရိတ် အာရှလမ်းမကြီးလည်း ကုန်သွယ်ရေး ရပ်တန့်ထားရသည်။

CNI News

၂၀၂၅ ခုနှစ်၊ နိုဝင်ဘာ ၁၄

စစ်ကိုင်းတိုင်းဒေသကြီးအထက်ပိုင်း၊ ဗန်းမောက်မြို့နယ်အတွင်းရှိ ရှမ်းနီအမျိုးသားများတပ်မတော်(SNA)၏ တပ်မဟာ ၆၁၄ ထံသို့ PDF နှစ်ဦး လက်နက်ခဲယမ်းများဖြင့် ၂၀၂၅ ခုနှစ်၊ နိုဝင်ဘာ ၁၄ ရက်က အလင်းဝင်လာ ကြောင်း သိရသည်။

၂၀၂၅ ခုနှစ်၊ နိုဝင်ဘာ ၁၄ ရက်က SNA ထံ အလင်းဝင်လာသူ ၂ ဦးကို တွေ့ရစဉ်

SNA ထံ အလင်းဝင်လာသည့် PDF နှစ်ဦးမှာ PDF ရင်း SR-10 ကဖြစ်ကြောင်း၊ ၎င်းတို့ နှစ်ဦးကို SNA ဘက် ဆုငွေနှင့် အသုံးအဆောင်များ ပေးအပ်ခဲ့ကြောင်း သိရသည်။

ဗန်းမောက်မြို့နယ်အတွင်းမှာ KIA-PDF-ကဒူး ပူးပေါင်းတပ်ဖွဲ့နှင့် SNA ကြား တိုက်ပွဲများဖြစ်ပွားနေသည်။

CNI News

၂၀၂၅ ခုနှစ်၊ နိုဝင်ဘာ ၁၃

နိုင်ငံတော်အစိုး‌ရအနေဖြင့် ပြည်သူ့စစ်မှုထမ်း တာဝန်ကျေပွန်စွာ ထမ်းဆောင်ပြီးသူများအား မည်ကဲ့သို့ အခွင့်အလမ်းများ ပေးသင့်သလဲဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား မေးခွန်းထုတ်လျက်ရှိ သည်။

ပြည်သူ့စစ်မှုထမ်းဥပဒေကို ၂၀၂၄ ခုနှစ်၊ ဖေဖော်ဝါရီ ၁၀ ရက်တွင် စတင် အာဏာတည်စေခဲ့ပြီး တစ်ပတ်စဉ်လျှင် လူဦးရေ ၅၀၀၀ ဖြင့် စတင် သင်တန်းပေးခဲ့ရာ လက်ရှိအချိန်မှာ ပြည်သူ့စစ်မှုထမ်းသင်တန်း အပတ်စဥ် ၁၉ အထိ ရှိပြီဖြစ်သည်။

စစ်မှုထမ်းတာဝန် ကျေပွန်စွာ ပြီးဆုံးသွားသူများသည် ပြည်ပနိုင်ငံများသို့ သွားရောက်လုပ်ကိုင်လိုပါက အလုပ် အကိုင် ရှာဖွေ ဆောင်ရွက်ပေးမည်ဖြစ်ကြောင်း ပြည်ပအလုပ်အကိုင် ခန့်အပ်ပေးနိုင်ရေးလုပ်ငန်း‌ကော်မတီဥက္ကဋ္ဌ အလုပ်သမားဝန်ကြီးဌာန ဒုတိယဝန်ကြီး ဦးဝင်းရှိန်က နိုဝင်ဘာ ၈ ရက်တွင် ပြောကြားခဲ့သည်။

ပြည်သူ့စစ်မှုထမ်း တာဝန်ကျေပွန်စွာ ပြီးဆုံးသူများအား အစိုးရအနေဖြင့် ကောင်းမွန်သည့် အကျိုးခံစားခွင့်များ၊ အခွင့်အလမ်းများ ပေးသင့်ကြောင်း၊ နိုင်ငံတော်ပေါ်လစီကို ကိုင်တွယ်သည့်အခါတွင် မည်သည့် အကျိုးခံစားခွင့် များ ပေးမလဲဆိုခြင်းသည် အရေးကြီးသည်ဟု နိုင်ငံရေးလေ့လာသုံးသပ်သူ ဦးထက်အောင်ကျော်က CNI သတင်း ဌာနသို့ ပြောသည်။

စစ်မှုထမ်းဥပဒေကို ထောက်ခံကြသူများကို တွေ့ရစဉ်

၎င်းက “ပြည်ပထွက်ပြီး လုပ်ကိုင်တာ လောက်နဲ့တင်မကဘူး။ အဓိက,က ဒီဟာကို ဖြစ်စေချင်တယ် ဆိုလို့ရှိရင် ဒီနောက်ပိုင်းမှာ ဘာ Incentive ရှိသလဲဆိုတာ သေသေချာချာပြရမယ်၊ လုပ်သင့်တယ်‌ပေါ့‌နော်။ အဲ့လိုမျိုးကို ကျနော်တို့က‌တော့ တောက်လျှောက်ပြောခဲ့တာပေါ့။ ပြောခဲ့တယ်ဆိုတော့ အခါကျတော့ အခု ဒီလိုလေး လုပ် တာကတော့ ကျနော်တို့ ကြိုဆိုတယ်။ ဒီထက်တင် မကဘူး ဒီဟာပြီးစီး ပြီးသွားတယ်ဆိုတဲ့ အချိန်မှာ ကျနော်တို့ ဒါပြောရမယ်ဆိုလို့ရှိရင် စစ်ပြန်တွေပေါ့ဗျာ။ အမေရိကန်နိုင်ငံမှာ အမေရိကန်ကားတွေ ကြည့်ခဲ့သလိုပဲ စစ်ပြန်တွေ ကို သူတို့ ဘယ်လို Treat လုပ်လဲဆိုတာ ဒါမျိုးပုံစံမျိုးတွေက ပေးသင့်တယ် လုပ်သင့်တယ်ပေါ့။ အမှန်က Incentive ရှိမှ လေ အလကားနေရင်း ကိုယ့်အသက် အသေခံပြီး အသက်စွန့်ပြီးတော့မှ ဘာဆိုတဲ့ဟာ ဘာလုပ်ရမှာလဲပေါ့၊ ဘာ အတွက် လုပ်ရမှာလဲပေါ့။ အခုဖြစ်နေတဲ့ ဟာကြီးကလည်း ပြောရမယ်ဆိုလို့ရှိရင် နိုင်ငံသားချင်းဆိုတဲ့ဟာမျိုး ဖြစ်တဲ့ အခါကျတော့ လူတွေမှာ တော်တော် Confuse ဖြစ်တာကို နည်းနည်းခေါင်းထဲမှာ တစ်မျိုးဖြစ်စေတာ‌ပေါ့။ ဒါပေမယ့် ဘာပဲပြောပြော ဒါသည် နိုင်ငံတော်ပေါ်လစီဆိုတာ ဖြစ်တယ်ဆိုတဲ့အချိန်မှာ ဒီနိုင်ငံတော် ပေါ်လစီကို ကိုင်တွယ်တဲ့အခါမှာ တကယ့်ကို ဘယ်လို Incentive တွေ ပေးမလဲဆိုတဲ့ဟာက အရေးကြီးတာ‌ပေါ့။ အခုဒါက စပေးတာပေါ့လေ ကျနော်မြင်တာ သိပ်တောင် မလုံလောက်သေးဘူး ဒီထက်ပိုကောင်းအောင် လုပ်ပေးသင့်တယ် လို့တော့ ကျနော် မြင်ပါတယ်” ဟု ပြောသည်။

နိုင်ငံတော်အစိုးရ အနေဖြင့် ပြဋ္ဌာန်းထားသည့် ကိစ္စရပ်တစ်ခုသည် အကောင်အထည် မဖော်နိုင်စရာ မရှိကြောင်း၊ ပြည်သူ့စစ်မှု ထမ်းဆောင်သူများ ရလာနိုင်မည့် အခွင့်အလမ်းများသည် များစွာရှိနိုင်ပြီး အစိုးရ၏ စီမံကိန်းစည်းမျဥ်းစည်းကမ်း စသည့် အပေါ်မှာသာ မူတည်သည်ဟု သေနင်္ဂမဟာဗျူဟာ လေ့လာရေးအဖွဲ့မှ အမှုဆောင် ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

ပြည်သူ့စစ်မှုထမ်းများကိုတွေ့ရစဉ်

၎င်းက “နိုင်ငံ‌တော်အဆင့် Level က သုံးတဲ့ ကိစ္စရပ်တစ်ခုက အကောင်အထည် မဖော်နိုင်စရာတော့ ဘာမှမရှိ ဘူးလေ၊ ပြောရရင် အပြင် အေဂျင်စီတွေနဲ့တောင် ချိတ်ဆက်ပြီးတော့မှ နိုင်ငံခြားကို အလုပ်သွားလုပ်ဖို့ လုပ်နေ ကြတဲ့ဥစ္စာ နိုင်ငံတော်အဆင့်ကနေ စီမံဆောင်ရွက်ပေးမယ့်။ ကိစ္စတစ်ခုက ဘယ်လိုကြောင့် မအောင်မြင်ဘူးလို့ ကျနော်တို့က တွေးရမှာတုန်း။ နိုင်ငံခြားသွားပြီး အလုပ်လုပ်ချင်သလား နောက်ပိုင်းကျတော့ စပြီးတော့ ဥပဒေ ထွက်စဥ်တည်းက ဥပမာ အလုပ် တစ်ခုခုကနေပြီးတော့ နှုတ်ထွက်ပြီးတော့ တာဝန်ထမ်းဆောင်ခဲ့ရတယ်ဆို အဲ့ဒီ အလုပ်မှာ ပြန်လည်ထမ်းဆောင်ခွင့်တွေပါပဲ၊ အများကြီးပါပဲ။ အဲ့တာကတော့ ခုနကပြောသလိုပေါ့။ သက်ဆိုင်ရာ ဥပဒေချမှတ်ထားတဲ့ စည်းမျဥ်းစည်းကမ်း ဥပဒေအတိုင်းပဲ ဖြစ်ပါလိမ့်မယ်။ စီမံကိန်းအရ ဘယ်လိုလုပ်ထားလဲ ဘယ်လို အစီအစဥ် ဆွဲထားလဲဆိုတဲ့ အပေါ်မှာ မူတည်မှာ ကျနော့် အမြင်ကြီးနဲ့ ပြောလို့မရဘူး။ အဓိက,ကတော့ လက်ရှိ စည်းမျဥ်းစည်းကမ်း ချမှတ်ထားတာ ရေးဆွဲထားတာ အဲ့ဒီအပေါ်မှာပဲ အကုန်လုံး မူတည်ပါလိမ့်မယ်”ဟု ပြောသည်။

လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများကြား နှစ်ဖက်စလုံးမှ စစ်မှုထမ်းရန် အတွက် လူငယ်လူရွယ်များအား ခေါ်ဆောင်ခြင်း၊ ဖမ်းဆီးခြင်းများ လုပ်ဆောင်နေကြပြီး ပြည်သူလူထုများ အနေ ဖြင့် စိုးရိမ်ပူပန်မှုများဖြင့် နေထိုင်နေရကြောင်း သုံးသပ်မှုများ ရှိနေကြသည်။

CNI News

၂၀၂၅ ခုနှစ်၊ နိုဝင်ဘာ ၁၃

ပြည်သူလူထု၏ မဲကို ရယူပြီး လွှတ်တော်ထဲ ဝင်ရောက်ရန် နိုင်ငံရေးပါတီများ ပြင်ဆင်နေသည့်တိုင် ပြည်သူလူထု ရင်ဆိုင်ကြုံတွေ့နေရသော အခက်အခဲများကို ဖြေရှင်းပေးမှုအပိုင်းမှာ ပါတီများ အလွန်အားနည်းနေကြောင်း နိုင်ငံ ရေးလေ့လာစောင့်ကြည့်သူများက ထောက်ပြကြသည်။

လွှတ်တော်ထဲသို့ ဝင်ရောက်မည့် ကိုယ်စားလှယ်လောင်းများသည် ပါတီကို ကိုယ်စားပြု၍ ဝင်ပြိုင်ခြင်းဖြစ်သည့် အတွက် ရွေးကောက်ပွဲကာလ၌ ၎င်းတို့သည် ပါတီကိုယ်စားလှယ်များဖြစ်ကြောင်း၊ သို့သော် ပြည်သူများ၏ မဲ ပေးမှုအရ အနိုင်ရရှိပြီး လွှတ်တော်ထဲသို့ ရောက်ရှိချိန်တွင် ပါတီကိုယ်စားလှယ်တင်မက ပြည်သူ့ကိုယ်စားလှယ် လည်း ဖြစ်သွားပြီဟု ၎င်းတို့က ထောက်ပြကြသည်။

ပြည်သူလူထု အခက်အခဲများကို လက်တွေ့ကျကျ ဖြေရှင်းပေးမှုပိုင်းတွင် နိုင်ငံရေးပါတီတချို့က တော်တော်လေး အားနည်းနေကြကြောင်း ရန်ကုန်စောင့်ကြည့်အဖွဲ့ တည်ထောင်သူ ဒေါက်တာညိုညိုသင်းက CNI သတင်းဌာနသို့ ပြောသည်။

၎င်းက “ဒီရွေးကောက်ပွဲဟာ လူငယ်ထုအတွက်ကို အပေါင်းလက္ခဏဆောင်တဲ့ ဖြစ်ရပ်တွေ အကျိုးစီးပွားတွေ ရလဒ်တွေ ဖြစ်လာမယ်ဆိုတာကို လူငယ်တွေကို သက်သေပြဖို့လိုတယ်။ ဥပမာ ရှင်းရှင်းလေး ရှိနေတယ်၊ နယ်တွေ မှာ တချို့နေရာတွေမှာ ဥပဒေနဲ့မညီတဲ့ စစ်မှုထမ်း ဆင့်ခေါ်တာတွေရှိတယ်။ အဲ့ဒါတွေကို နိုင်ငံရေးပါတီတွေက ဒီလူငယ်တွေရှေ့ကနေ မားမားမတ်မတ် ရပ်ပြီးတော့ တိုက်တိုက်တွန်းတွန်း ပြောဆို ကာကွယ်ပေးခြင်းအားဖြင့် လူငယ်ထုက ရွေးကောက်ပွဲပေါ်မှာ စိတ်ဝင်စားလာမယ်။ လွှတ်တော်ကိုယ်စားလှယ်ဆိုတာက ငါတို့နဲ့အတူတူ ငါတို့ နဲ့ရပ်ပြီးတော့ ငါတို့ရဲ့ အကျိုးစီးပွားကို ကာကွယ်ပေးနိုင်တဲ့ လူတွေပါလားဆိုတာကို သူတို့ သဘောပေါက် လာလို့ရှိ ရင် ရွေးကောက်ပွဲကို စိတ်ဝင်စားလာမှာပဲ၊ ဒါကြောင့် နိုင်ငံရေးပါတီတွေက အလုပ်နဲ့ သက်သေပြဖို့ လိုတယ်။ တကယ်ကို လက်တွေ့ကျတဲ့ ကူညီမှုတွေ၊ လက်တွေ့ကျတဲ့ ဖြေရှင်းမှုတွေ ပြည်သူလူထု အခက်အခဲကို လက်တွေ့ ကျကျ ဖြေရှင်းပေးမှုတွေပိုင်းမှာ နိုင်ငံရေးပါတီတချို့က တော်တော်လေးကို အားနည်းနေကြတာ”ဟု ပြောသည်။

မြန်မာနိုင်ငံက လက်နက်ကိုင်နဲ့ ပြည်သူများကို တွေ့ရစဉ်

လက်ရှိတွင် မြန်မာနိုင်ငံသား ပြည်သူလူထုများသည် စီးပွားရေး အကျပ်အတည်း၊ အလုပ်အကိုင် ရှားပါးမှု၊ ငွေကြေး ဖောင်းပွမှု၊ ကုန်ဈေးနှုန်း ကြီးမြင့်မှု၊ လူနေမှုစရိတ် ကြီးမြင့်မှု၊ အသက်အန္တရာယ် မလုံခြုံမှု၊ စစ်မှုထမ်း ဥပဒေကို အသုံးချပြီး အာဏာပိုင်များက ငွေကြေးတောင်းဆိုနေမှု၊ စစ်ပွဲများကြောင့် နေရပ်စွန့်ခွာ တိမ်းရှောင်နေရမှု စသည့် အခြေအနေများကို ရင်ဆိုင်နေကြရသည်။

အဆိုပါ အခြေအနေများကို နိုင်ငံရေးပါတီများက ပြည်သူလူထု ရှေ့ကနေ ရပ်တည် ဖြေရှင်း မပေးနိုင်ဘဲ ရွေးကောက်ပွဲ ကာလမှာတော့ မဲပေးရန် တိုက်တွန်းလျက်ရှိနေကြသည်။

နိုင်ငံရေးပါတီများ အနေဖြင့် ယခုအချိန်သည် အခွင့်ကောင်း တစ်ရပ်ဖြစ်ပြီး လူထုဘက်က မားမားမတ်မတ် ရပ် တည် ပေးချင်းအားဖြင့် နှစ်ဖက်စလုံးက အနိုင်ရသည့် အနေအထားမျိုး ဖြစ်လာနိုင်တယ်ဟု ရန်ကုန်စောင့်ကြည့် အဖွဲ့ တည်ထောင်သူ ဒေါက်တာညိုညိုသင်းက CNI သတင်းဌာနသို့ ပြောသည်။

မဲထည့်နေကြစဉ် 

၎င်းက “ဥပဒေနဲ့မညီတဲ့ ဆောင်ရွက်ချက်တွေ ဖြစ်နေတယ်၊ နယ်တွေမှာဆိုရင် ပိုဆိုးတယ်။ တရားဥပဒေ စိုးမိုးရေး အလှမ်းကွာတဲ့ နေရာတွေ အားနည်းတဲ့ နေရာတွေ အဲ့လိုနေရာတွေ ဆိုလို့ရှိရင် ဒါတွေက ဥပဒေနဲ့အညီ နိုင်ငံရေး ကိုယ်စားလှယ်လောင်းတွေက ဥပဒေနဲ့အညီ ပြည်သူလူထုဘက်က မားမားမတ်မတ် ရပ်တည်ပြီးတော့ ကာကွယ် ပေးတာတွေ ရှိသင့်တယ်။ ဒီအချိန်မှာ အခွင့်ကောင်းတစ်ရပ်ပဲ တရားဥပဒေနဲ့ မညီမညွတ် ဖြစ်နေတာတွေ တရား ဥပဒေ စိုးမိုးမှု မရှိတဲ့ကိစ္စတွေကို ဖော်ထုတ်ပြီးတော့ လူထုဘက်က မားမားမတ်မတ် ရပ်တည်ပေးခြင်းအားဖြင့် ပြည်သူရော၊ ပါတီရော၊ နှစ်ဖက်စလုံးက အနိုင်ရတဲ့ အနေအထားမျိုး ဖြစ်လာနိုင်တယ်။ ရွေးကောက်ပွဲ ကာလတွေ မှာ ပြည်သူလူထု သက်သာ‌ချောင်ချိရေးတွေ စစ်မှုထမ်းဥပဒေနဲ့ ပတ်သက်ပြီးတော့ စနစ်တကျဖြစ်ဖို့တို့ တချို့ နေရာတွေမှာ တကယ်လို့ ဥပဒေနဲ့အညီ မလုပ်နိုင်ဘူးဆိုလို့ရှိရင် အဲ့ဒီနေရာတွေကို ခြွင်းချက်အနေနဲ့ ထားပြီး တော့ ရပ်ဆိုင်းထားဖို့တို့ ဖြစ်သင့်တယ်”ဟု ပြောသည်။

မြန်မာ့နိုင်ငံရေးတွင် ရွေးကောက်ပွဲအနိုင်ရ ကိုယ်စားလှယ်လောင်းများ အနေဖြင့် လွှတ်တော်ထဲသို့ ရောက်ရှိချိန်၌ ပြည်သူကို ကိုယ်စားပြုသည့် လွှတ်တော်ကိုယ်စားလှယ်ထက် ပါတီစွဲများဖြင့် ပါတီကိုယ်စားပြု လွှတ်တော် ကိုယ်စားလှယ်အဖြစ် အသွင်ပြောင်းသွားကြောင်း နိုင်ငံရေးလေ့လာစောင့်ကြည့်သူများက ထောက်ပြကြသည်။

ထို့ကြောင့် ပြည်သူလူထုသည် ရွေးကောက်ပွဲ ဝင်ရောက် ယှဉ်ပြိုင်ကြမည့် နိုင်ငံရေးပါတီများနှင့် ကိုယ်စားလှယ် လောင်းများကို သေချာ စိစစ်ရွေးချယ်ရန် လိုအပ်ကြောင်း၊ ပြည်သူလူထုနှင့် နိုင်ငံအကျိုးကို တကယ် လုပ်ဆောင် မည့် ကိုယ်စားလှယ်လောင်းနှင့် နိုင်ငံရေးပါတီများအား ရွေးချယ်ရန် လိုအပ်ကြောင်း နိုင်ငံရေးလေ့လာစောင့်ကြည့် သူများက အကြံပြုကြသည်။