CNI News

၂၀၂၅ ခုနှစ်၊ ဖေဖော်ဝါရီ ၁၇

မြန်မာနိုင်ငံ၊ ပဲခူးတိုင်းဒေသကြီးအတွင်း တိုက်ပွဲဖြစ်ပွားနေသည့် KNLA-PDF ပူးပေါင်းတပ်များသည် စစ်တောင်း မြစ် အနောက်ဘက်ခြမ်းမှ စိမ့်ဝင်ကာ အမြန်လမ်းပေါ်သို့ တက်လာနိုင်ကြောင်း စည်းလုံးညီညွတ်သော တိုင်းရင်းသား လူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

ပဲခူးတိုင်းဒေသကြီးအတွင်းရှိ ကျောက်ကြီး၊ ကျောက်တံခါး၊ ဖြူး၊ ညောင်လေးပင် စသည့် မြို့နယ်များအတွင်းရှိ မြန်မာ့တပ်မတော်၏ ဂိတ်စခန်းများနှင့် ကာကင်းစခန်းများအား ကရင်အမျိုးသားလွတ်မြောက်ရေးတပ်မတော် (KNLA) နှင့် PDF များက တပြိုင်တည်း ပူးပေါင်းတိုက်ခိုက်ခဲ့ကြောင်း ၂၀၂၅ ခုနှစ်၊ ဖေဖော်ဝါရီ ၁၆ ရက်နေ့တွင် ကရင်အမျိုးသားအစည်းအရုံး(KNU) သတင်းပြန်ကြားရေးဌာနက ထုတ်ပြန်ခဲ့သည်။

KNLA-PDF ပူးပေါင်းတပ်များသည် အမြန်လမ်းပေါ်သို့ ရောက်လာနိုင်ပြီး အမြန်လမ်းအား သိမ်းဆည်းနိုင်ပါက နေပြည်တော်၊ ရန်ကုန် စသည့် မြို့ကြီးများအား ဖြတ်တောက်၍ ရသွားနိုင်ကြောင်း စည်းလုံးညီညွတ်သော တိုင်းရင်းသား လူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

မြန်မာ့တပ်မတော်ကို တိုက်ခိုက်နေတဲ့ ကော်ဘရာစစ်ကြောင်းမှူးကို တွေ့ရစဉ်

ဦးမျိုးကျော်က “ပြောရမယ်ဆိုရင်တော့ ပဲခူးတိုင်းထဲမှာဆိုရင် စစ်တောင်းမြစ်ရဲ့ အနောက်ခြမ်းပေါ့ဗျာ၊ နဂို လမ်းဟောင်းဘက်ကိုတော့ နဂိုကတည်းက စိမ့်ဝင်နေတဲ့ ဟာမျိုးတွေတော့ သတင်းလေးတွေ ကြားတယ်ပေါ့လေ၊ ဆိုတော့ အဲဒီကနေ ဆိုရင်တော့ အမြန်လမ်းကို တက်ရမှာ‌ပေါ့ဗျာ၊ လမ်းသစ်ဘက်က ပိုပြီးတော့ ခရီးပေါက်တာ ကိုး၊ ဒါလေးတွေတော့ ရှိလာမယ်၊ နောက် ဒီအမြန်လမ်းကိုသာ သိမ်းဆည်းနိုင်သွားမယ်ဆိုရင်တော့ နေပြည်တော်၊ ရန်ကုန်ဆိုတဲ့ ဟာမျိုးတွေ ဖြတ်တောက်လို့ ရသွားနိုင်တယ်၊ အဲဒါလေးလည်း တစ်ချက်အ‌ရေးပါတယ်၊ ကျောက်တံခါးတို့ အဲဒီညောင်လေးပင်တို့ ဆိုတဲ့ဟာက မူလကတည်းကကိုက မကြာမကြာလည်း အဲလို ကျည် ဖောက်တဲ့ဟာ ရှိတယ်၊ ကျောက်ကြီး ဆိုတာကတော့ ပိုဆိုးတာပေါ့ဗျာ၊ ကျောက်ကြီးကတော့ တော်လှန်ရေး အင်အားစုတွေက အဲဒီပတ်ချာလည် ဝိုင်းပြီး အခိုင်အမာ (တပ်)စွဲလေ့ရှိတော့လေ၊ ကျောက်ကြီး ဒီဘက်ကိုလာရင် နတ်သံကွင်းတို့ ဘာတို့ဆိုတဲ့ဟာကလေ တော်လှန်‌ရေးအင်အားစုတွေက အဲဒီဘက်မှာကတော့ အားကြီးတယ်၊ တော်တော်များများကလည်း ၂၀၂၅ မှာ ဒီဖက်မှာရှိတဲ့ တော်လှန်ရေးအင်အားစုတွေက ပြည်မကို ထိုးဖောက်မယ် ဆိုတဲ့ အသံတွေလည်း ထွက်တယ်လေ၊ အဲဒီဟာတွေရဲ့ လုပ်ငန်းကို လက်တွေ့ အကောင်အထည် ဖော်တာလို့ပဲ ကျနော်ကတော့ အဲလိုမြင်ပါတယ်” ဟု ပြောသည်။

မြန်မာ့တပ်မတော်၏ ခမရ(၅၆၀) လက်အောက်ခံ နရွဲပင်တပ်စခန်း၊ တောဝိရွာနှင့် ထိန်တပင်ကြားရှိ တပ်စခန်းနှင့် ကျွန်းကုန်းကျေးရွာတွင် တပ်စွဲထားသည့် တပ်စခန်းများအား ၂၀၂၅ ခုနှစ်၊ ဖေဖော်ဝါရီ ၁၅ ရက်နေ့တွင် ဝင်ရောက် တိုက်ခိုက်သိမ်းပိုက်ခဲ့ကြောင်း KNU ၏ ထုတ်ပြန်ချက်တွင် ဖော်ပြထားသည်။

KNLA နဲ့မဟာမိတ်တွေကိုတွေ့ရစဉ်

မြန်မာ့တပ်မတော်၏ စခန်းငယ်လေးများအား တိုက်နိုင်သည့်အတွက် တော်လှန်ရေးဘက်တွင် စိတ်ဓာတ်တက်ကြွ နိုင်သော်လည်း စစ်ဆင်ရေး အကြီးစားများလုပ်ရန် အချိန်လိုအပ်သေးကြောင်း NCA ထိုးထားသည့် ပအိုဝ်း အမျိုးသားလွတ်မြောက်ရေးအ ဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ဗိုလ်မှူးကြီးခွန်ဥက္ကာက “မူလအားဖြင့် ကြည့်ရင်တော့ ကြည်းတပ်ပေါ့လေ၊ မြေပြင်တပ်တွေ အားနည်းနေတဲ့ အချိန် ဖြစ်နေတယ်၊ SAC ဘက်က မြေပြင်တပ်တွေ အားနည်းနေတဲ့ အချိန်မှာ ပြင်ဆင်မှု ကောင်းကောင်းနဲ့ဆိုရင် ကာကင်းတို့ စခန်းအကင်းလေးတွေက တိုက်ရခိုက်ရ ပိုပြီးတော့ လွယ်မယ့်စခန်းတွေ ဖြစ်လာနိုင်တာပေါ့၊ နောက်ပြီးတော့ အလစ်အငိုက်ပေါ့ဗျာ၊ စစ်ရေးမှာ အလစ်အငိုက်က အရေးကြီးတော့ အလစ်အငိုက် အတိုက်ခံကြ ရတာနဲ့ တူပါတယ်၊ အဲဒီစခန်းငယ်လေးတွေ တိုက်တဲ့အတွက် စိတ်ဓာတ်အရတော့ ဒီတော်လှန်ရေးဘက်က တက်စရာရှိပေမယ့် စီမံချက်ချပြီးတော့ စစ်ဆင်ရေး အကြီးစားတွေပေါ့ဗျာ၊ မြောက်ပိုင်းကလုပ်သလို AA က လုပ်သလို မြို့သိမ်း၊ လမ်းသိမ်း၊ စခန်းသိမ်း အကြီးစားတွေပေါ့၊ အဲဒါမျိုးကတော့ နည်းနည်း လိုဦးမယ်လို့ ထင်ပါ တယ်” ဟု ပြောသည်။

လက်ရှိတွင် ကရင်ပြည်နယ်နှင့် ပဲခူးတိုင်းဒေသကြီးတွင် တိုက်ပွဲရှောင် ၁ သန်းကျော်ရှိပြီး လူသားချင်းစာနာမှု အကူအညီ လိုအပ်နေကြောင်း ကရင်ငြိမ်းချမ်းရေး အထောက်အကူပြုကွန်ရက် (KPSN) က ၂၀၂၄ ခုနှစ်၊ နိုဝင်ဘာ ၂၈ ရက်၌ ထုတ်ပြန်ခဲ့သည်။

CNI News

၂၀၂၅ ခုနှစ်၊ ဖေဖော်ဝါရီ ၁၇

တရုတ်နိုင်ငံခြားရေးဝန်ကြီးဌာန၊ ပြည်သူ့လုံခြုံရေးဝန်ကြီးဌာန ဒုဝန်ကြီး မစ္စတာလျှိုကျုံးရီသည် ကျားဖြန့်နှိမ်နင်းရေးအတွက် မြဝတီမြို့သို့ ၂၀၂၅ ခုနှစ်၊ ဖေဖော်ဝါရီ ၁၇ ရက်နေ့ နံနက်ပိုင်းက ရောက်ရှိလာကြောင်း သိရသည်။

ထိုင်းနိုင်ငံ၊ မဲဆောက်မြို့မှတဆင့် မြန်မာနိုင်ငံ၊ မြဝတီမြို့သို့ ရောက်ရှိလာခြင်းဖြစ်ပြီး မြဝတီမြို့မှာ ရှိနေသည့် ကျားဖြန့်ဂိုဏ်းများထံမှ ကယ်ထုတ်ထားသူများကို တွေ့ဆုံခဲ့ကြောင်း ထိုင်းသတင်းဌာန The Reporter သတင်းဌာနက ဖော်ပြခဲ့သည်။

မြန်မာ-ထိုင်းနယ်စပ်ရှိ ရွှေကုက္ကိုလ်နှင့်မြဝတီမြို့များမှ ကျားဖြန့်ဂိုဏ်းများကို နှိမ်နင်းရန် အပါအဝင် လူကုန်ကူး ခံထားရသူများ ကယ်ထုတ်နိုင်ရေးအတွက် ထိုင်း-တရုတ်-မြန်မာ သုံးနိုင်ငံ အစည်းအဝေးကို ဖေဖော်ဝါရီ ၁၇ ရက်တွင် ကျင်းပမည်ဖြစ်သည်။

ထို့နောက် ဒုဝန်ကြီး မစ္စတာလျှိုကျုံးရီသည် နစက၏ နိုင်ငံခြားရေးဝန်ကြီး ဦးသန်းဆွေနှင့် ပြည်ထဲရေးဝန်ကြီး ဒုတိယဗိုလ်ချုပ်ကြီးထွန်းထွန်းနောင်တို့ကို ပြီးခဲ့သည့် ရက်ပိုင်းက တွေ့ဆုံ၍ ကျားဖြန့်နှိမ်နင်းရေး အစီအစဉ်များကို ဆွေးနွေးခဲ့သည်။

CNI News
၂၀၂၅ ခုနှစ်၊ ဖေဖော်ဝါရီ ၁၅

တအာင်းအမျိုးသားလွတ်မြောက်ရေးတပ်မတော်(TNLA)နှင့် မြန်မာ့တပ်မတော်မှ ကိုယ်စားလှယ်များ တရုတ်နိုင်ငံ၊ ကူမင်းမြို့မှာ တွေ့ဆုံ၍ ဆွေးနွေးကြမည်ဖြစ်သည်။

အဆိုပါ တွေ့ဆုံ ဆွေးနွေးမှုကို ဖေဖော်ဝါရီ ၁၆ ရက်နေ့မှာ စတင်မည်ဖြစ်ပြီး မြန်မာ့တပ်မတော်ဘက်က ကစထ(၁)မှူး ဒုဗိုလ်ချုပ်ကြီး ကိုကိုဦး ဦးဆောင်မည်ဖြစ်သလို TNLA ဘက်က ဒုဥက္ကဋ္ဌ ဒုဗိုလ်ချုပ်ကြီးတားဂျုဂျား ဦးဆောင်မည်ဖြစ်သည်။

ထို့နောက် TNLA သည် ဒုဥက္ကဋ္ဌ ဒုဗိုလ်ချုပ်ကြီးတားဂျုဂျားနှင့် မဟာမိတ်ဆက်ဆံရေးဌာနမှူး ဗိုလ်မှူးကြီး တာမိုးဟိန်း အပါအဝင် ကိုယ်စားလှယ် ၉ ဦး တက်ရောက်မည်ဖြစ်ကြောင်း TNLA ဘက်က ပြောသည်။

လက်ရှိမှာတော့ TNLA ကိုယ်စားလှယ်များသည် တရုတ်နိုင်ငံ၊ ကူမင်းမြို့မှာ ရောက်ရှိနေပြီးဖြစ်ကြောင်း သိရသည်။

TNLA သည် ၁၀၂၇ စစ်ဆင်ရေးအတွင်းမှာ ရှမ်းပြည်နယ်မြောက်ပိုင်းရှိ ကွတ်ခိုင်၊ နမ့်ခမ်း၊ ကျောက်မဲ၊ နောင်ချို၊ နမ့်ဆန်၊ မန်တုံ၊ မိုင်းငေါ့၊ နမ္မတူ၊ သီပေါ၊ မိုးကုတ်၊ မိုးမိတ် တို့ကို သိမ်းပိုက်ထားသည်။

CNI News
၂၀၂၅ ခုနှစ်၊ ဖေဖော်ဝါရီ ၁၄

နယ်စပ်ဒေသရှိ အွန်လိုင်း လောင်းကစားနှင့် လိမ်လည်မှုကွန်ရက်(ကျားဖြန့်ဂိုဏ်း)များ နှိမ်နင်းရေး တရုတ်နိုင်ငံ ခြားရေးဝန်ကြီးဌာန၊ ပြည်သူ့လုံခြုံရေးဝန်ကြီးဌာန ဒုဝန်ကြီး မစ္စတာလျှိုကျုံးရီနှင့် နစက၏ ဒုဝန်ကြီးချုပ်နှင့် နိုင်ငံခြားရေးဝန်ကြီး ဦးသန်းဆွေတို့ ဖေဖော်ဝါရီ ၁၄ ရက် နေပြည်တော်မှာ တွေ့ဆုံ ဆွေးနွေးခဲ့သည်။

အဆိုပါ နှစ်နိုင်ငံ ဆွေးနွေးပွဲကို ဖေဖော်ဝါရီ ၁၄ ရက်နေ့ နေ့လယ် ၂ နာရီက ကျင်းပခဲ့ခြင်းဖြစ်ပြီး မြန်မာနိုင်ငံဆိုင် ရာ တရုတ်သံအမတ်ကြီး မစ္စမာကျားလည်း ပါဝင်ခဲ့သည်။

ထို့နောက် မြန်မာ-တရုတ် နှစ်နိုင်ငံ ပူးပေါင်းဆောင်ရွက်မှုဆိုင်ရာ စီမံကိန်းများ ဆက်လက် အကောင်အထည်ဖော် ရေး၊ နယ်စပ်ဖြတ်ကျော် မှုခင်းများ တိုက်ဖျက်ရေးအတွက် တရားဥပဒေဆိုင်ရာ ပူးပေါင်းဆောင်ရွက်မှုမြှင့်တင်ရေး၊ နယ်စပ်ဒေသရှိ အွန်လိုင်းလောင်းကစားနှင့် လိမ်လည်မှုကွန်ရက်(ကျားဖြန့်ဂိုဏ်း)များ ပူးပေါင်းတိုက်ဖျက်ရေး အတွက် နှစ်နိုင်ငံ သက်ဆိုင်ရာဌာနများအကြား ပူးပေါင်းဆောင်ရွက်မှု တိုးမြှင့်ဆောင်ရွက်သွားရေးတို့ကို ဆွေးနွေး ခဲ့ကြသည်။

 တရုတ်ပြည်သူ့လုံခြုံရေးဒုဝန်ကြီး မစ္စတာလျှိုကျုံးရီနဲ့ ပြည်ထဲရေးဝန်ကြီး ဒုဗိုလ်ချုပ်ကြီးထွန်းထွန်းနောင်ကို တွေ့ရစဉ်

အလားတူ မြန်မာ-တရုတ် နှစ်နိုင်ငံနယ်စပ်ဒေသများ တည်ငြိမ်အေးချမ်းရေး ပိုမိုမြှင့်တင်ရန် ဆက်လက် ပူးပေါင်း ဆောင်ရွက်သွားရေးကိစ္စရပ်များကိုလည်း ဆွေးနွေးခဲ့ကြသည်။

တရုတ်ပြည်သူ့လုံခြုံရေးဒုဝန်ကြီး မစ္စတာလျှိုကျုံးရီသည် ပြည်ထဲရေးဝန်ကြီး ဒုဗိုလ်ချုပ်ကြီးထွန်းထွန်းနောင်နှင့် လည်း တွေ့ဆုံ၍ ကျားဖြန့်ဂိုဏ်းများ နှိမ်နင်းရေး ဆွေးနွေးခဲ့ကြသည်။

မြန်မာနိုင်ငံ၊ ကရင်ပြည်နယ်၊ မြဝတီဒေသရှိ အွန်လိုင်းအသုံးပြုလိမ်လည်မှုနှင့် အွန်လိုင်းလောင်းကစားမှု တိုက်ဖျက်ရေးလုပ်ငန်းများကို ထိရောက်စွာ အကောင်အထည်ဖော်နိုင်ရေးအတွက် တရုတ်-မြန်မာ-ထိုင်း ၃ နိုင်ငံ အကြား အဆင့်မြင့် အရာရှိကြီးများ အစည်းအဝေး ကျင်းပရေးကိစ္စများကိုလည်း ဆွေးနွေးခဲ့ကြောင်း နစက-က ထုတ်ပြန်ခဲ့သည်။

ရွှေကုက္ကိုလ်မြို့မှာ BGF က ကျားဖြန့်ဂိုဏ်းကို ရှာဖွေနှိမ်နင်းနေစဉ်

ထိုင်း-မြန်မာနယ်စပ် မြဝတီမြို့၊ ရွှေကုက္ကိုလ်မြို့၊ ဘုရားသုံးဆူမြို့တို့တွင် ကျားဖြန့်ဂိုဏ်းများနှင့် လူမှောင်ခို ကူးခံရ သူများရှိနေပြီ တရုတ်က နှိမ်နင်းပေးရန် ထိုင်းနှင့်မြန်မာကို ဖိအားပေးလျက်ရှိသည်။

ထို့နောက် ထိုင်းအစိုးရက မြဝတီမြို့၊ ရွှေကုက္ကိုလ်မြို့၊ ဘုရားသုံးဆူမြို့တို့ကို လျှပ်စစ်ဓာတ်အား၊ အင်တာနက်၊ လောင်စာဆီများ ဖြတ်တောက်လိုက်ပြီး ကျားဖြန့်ဂိုဏ်များ နှိမ်နင်းရေးနှင့် လူမှောင်ခို ကူးခံထားရသော နိုင်ငံ ခြားသားများကို လွှဲပြောင်းပေးရန် ဒီမိုကရေစီအကျိုးပြုကရင်တပ်မတော်(DKBA)နှင့် ကရင်နယ်ခြားစောင့်တပ် (BGF)တို့ကို ဖိအားပေးခဲ့သည်။

အဆိုပါ ဒေသများကို DKBA နှင့် BGF က ထိန်းချုပ်ထားခြင်းဖြစ်ပြီး ဖေဖော်ဝါရီ ၁၂ ရက်နှင့် ၁၃ ရက်များက လူမှောင်ခို ကူးခံထားရသူ နိုင်ငံခြားသား ၄၀၀ ကျော်ကို ထိုင်းဘက်သို့လွှဲပြောင်းပေးခဲ့သလို ရွှေကုက္ကိုလ်မြို့ အတွင်း BGF က စစ်ဆေးမှုများ ပြုလုပ်နေသည်။

CNI News

၂၀၂၅ ခုနှစ်၊ ဖေဖော်ဝါရီ ၁၄ 

နစက-ကသည် အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)ကို ပြင်ဆင်ဖွဲ့စည်းကြောင်း ၂၀၂၅ ခုနှစ်၊ ဖေဖော်ဝါရီ ၄ ရက်က ထုတ်ပြန်ခဲ့သည်။

အဆိုပါ ပြင်ဆင်ဖွဲ့စည်းလိုက်သည့် NSPNC တွင် ဥက္ကဋ္ဌအဖြစ် ဒုဗိုလ်ချုပ်ကြီးရာပြည့် (နယ်စပ်ရေးရာဝန်ကြီး)က တာဝန်ယူမည်ဖြစ်ပြီး အတွင်းရေးမှူးအဖြစ် ဒုဗိုလ်ချုပ်ကြီးမင်းနိုင်မှ တာဝန်ယူမည်ဖြစ်သည်။

ထို့နောက် အဖွဲ့ဝင်များအဖြစ် ဗိုလ်ချုပ်အောင်ကျော်ကျော်(ပြည်ထဲရေးဒုဝန်ကြီး)၊ ဒုရဲဗိုလ်ချုပ်ကြီး ဝင်းဇော်မိုး (ရဲချုပ်)၊ ဗိုလ်မှူးကြီး-၁ ဦး(စရဖချုပ်ရုံး)၊ ဗိုလ်မှူးကြီးဝဏ္ဏအောင် (JMC)၊ ဦးလှမောင်ရွှေ၊ ဒုဗိုလ်ချုပ်ကြီးဝင်းဗိုလ်ရှိန် (ငြိမ်း)၊ ဒုဗိုလ်ချုပ်ကြီးစိန်ဝင်း(ငြိမ်း/ မြန်မာနိုင်ငံစစ်မှုထမ်းဟောင်းအဖွဲ့-ဥက္ကဋ္ဌ)၊ ဒုဗိုလ်ချုပ်ကြီးမျိုးသန့်နိုင်၊ ဦးမြင့် ကြိုင်(လူဝင်မှုကြီးကြပ်ရေးနှင့်ပြည်သူ့အင်အားဝန်ကြီး)၊ ဦးခင်မောင်ရီ (သယံဇာတနှင့်သဘာဝပတ်ဝန်းကျင်ထိန်း သိမ်းရေးဝန်ကြီး)၊ တို့က တာဝန်ယူကြမည်ဖြစ်သည်။

NSPNC ဥက္ကဋ္ဌ ဒုဗိုလ်ချုပ်ကြီးရာပြည့်နဲ့ ငြိမ်းချမ်းရေးသံတမန် ဂုရုကို တွေ့ရစဉ်

NSPNC သည် မြန်မာနိုင်ငံ၏ ငြိမ်းချမ်းရေးဆွေးနွေးမှု လုပ်ငန်းများကို တာဝန်ယူ ဆောင်ရွက်ရသော ကော်မတီ ဖြစ်ပြီး အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုဗဟိုကော်မတီ(NSPCC)မှ ချမှတ်ပေးသော လုပ်ငန်းတာဝန်များကို အကောင်အထည်ဖော်ရသည်။

လက်ရှိတွင် NSPNC သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲ‌ရေးသဘောတူစာချုပ်(NCA)ထိုးထားသည့် တိုင်းရင်းသား လက်နက်ကိုင်အဖွဲ့အစည်းများ၊ နိုင်ငံရေးပါတီများဖြင့် တွေ့ဆုံ၍ ငြိမ်းချမ်းရေးလုပ်ငန်းစဉ်များ အကောင်အထည်ဖော်နိုင်ရေး ဆွေးနွေးလျက်ရှိနေသည်။

CNI News

၂၀၂၅ ခုနှစ်၊ ဖေဖော်ဝါရီ ၁၄

မြန်မာနိုင်ငံ၊ ကရင်ပြည်နယ်၊ မြဝတီမြို့နှင့် ရွှေကုက္ကိုလ်မြို့တို့တွင် အခြေစိုက်၍ လူကုန်ကူးမှုနှင့် ကျားဖြန့် (လိမ်လည်လှည်ဖျားမှုလုပ်ငန်း)များ လုပ်ကိုင်နေသူများအား တိုက်ဖျက်နှိမ်နင်းရေး ထိုင်းဒုဝန်ကြီးချုပ်နှင့် ကာကွယ်ရေးဝန်ကြီး ဖွန်သမ် ဝဲချ ရာချိုင်မှ လိုအပ်သလို လမ်းညွန်ကူညီမှုပေးရန် နယ်ခြားစောင့်တပ်(BGF)မှ အထွေထွေအတွင်းရေး မှူး ဗိုလ်ချုပ်စောချစ်သူက စာပို့ခဲ့သည်။

အဆိုပါ စာကို ဗိုလ်ချုပ်စောချစ်သူက ၂၀၂၅ ခုနှစ်၊ ဖေဖော်ဝါရီ ၁၃ ရက်နေ့စွဲဖြင့် ပေးပို့ခြင်း ဖြစ်သည်။

စာထဲတွင် နယ်ခြားစောင့်တပ်(ကရင်ပြည်နယ်)သည် မိမိဒေသအတွင်းရှိ ရင်းနှီးမြှုပ်နှံမှု လုပ်ငန်းများတွင် တရားမဝင် လာရောက်လုပ်ကိုင်နေကြသည့် လူကုန်ကူးမှု ကျူးလွန်သူများနှင့် လိမ်လည်လှည့်ဖျားသူများအား ဖော်ထုတ်ဖမ်းဆီး စစ်ဆေးလျက် ထိုင်းနိုင်ငံမှတဆင့် သက်ဆိုင်ရာ သံရုံးများသို့ ပို့ဆောင်ပေးလျက်ရှိပါသည်ဟု ဖော်ပြထားသည်။

ထို့သို့ ပြန်လည်ပို့ဆောင်ရာတွင် မြဝတီမြို့ရှိ ချစ်ကြည်ရေးတံတား(၂)မှတဆင့် မြန်မာနိုင်ငံအစိုးရ၊ ထိုင်းနိုင်ငံအစိုး ရတို့နှင့် ပူးပေါင်းဆေင်ရွက်လျက်ရှိပါကြောင်း ဗိုလ်ချုပ်စောချစ်သူက ပြောထားသည်။

ရွှေကုက္ကိုလ်မှာ BGF က ကျားဖြန့်နှိမ်နင်းနေစဉ်

၎င်းက “ သို့ဖြစ်ပါ၍ ဒုစရိုက်မှုတိုက်ဖျက်ရေး လုပ်ငန်းများ၊ လူကုန်ကူးမှုနှင့် လိမ်လည်လှည့်ဖျားမှု လုပ်ဆောင်သူ များအား ထိုင်းနိုင်ငံအစိုးရနှင့် မြန်မာနိုင်ငံအစိုးရတို့ ပူးပေါင်း၍ လျှင်မြန်စွာ ပြန်လည်ပို့ဆောင်မည်ဖြစ်ပြီး ပိုမို မြန် ဆန်ချောမွေ့စွာ ပူးပေါင်းဆောင်ရွက်နိုင်ရေးအတွက် ဒုတိယဝန်ကြီးချုပ်မှ လိုအပ်သလို လမ်းညွန်ကူညီမှု ပြုနိုင်ပါ ရန် လေးစားစွာ တင်ပြအပ်ပါသည်”ဟု ပြောထားသည်။

BGF သည် ကျားဖြန့်/လူမှောင်ခို ပပျောက်နှိမ်နင်းရေးအထူးအဖွဲ့ကို ဖေဖော်ဝါရီ ၁၂ ရက် ဖွဲ့စည်းခဲ့သည်။

ထို့နောက်  BGF သည် မြဝတီနှင့် ရွှေကုက္ကိုလ်မြို့ရှိ ကျားဖြန့်လုပ်ငန်း လုပ်ကိုင်သူများနှင့် လူမှောင်ခိုကူးခံရသူ များကို ဖေဖော်ဝါရီ ၁၄ ရက်က စတင်၍ ရှာဖွေစစ်ဆေးလျက်ရှိနေသည်။

CNI News

၂၀၂၅ ခုနှစ်၊ ဖေဖော်ဝါရီ ၁၄

မြန်မာနိုင်ငံ၏ အခြေအနေသည် ၂၀၀၈ ဖွဲ့စည်းပုံအခြေခံဥပဒေကို ပြောင်းလဲရုံဖြင့် ထိန်းသိမ်းနိုင်မလား ဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများ ရှိနေကြသည်။

၂၀၀၈ ဖွဲ့စည်းပုံအခြေခံဥပဒေကို ပြုပြင်၊ ပြင်ဆင်ပြောင်းလဲရေးမှာ အရပ်သားအစိုးရ လက်ထက်ကတည်းက ဆွေးနွေးခဲ့ကြခြင်းဖြစ်သော်လည်း အထမြောက်ခဲ့ခြင်း မရှိသည်ကို တွေ့ရသည်။

၂၀၀၈ ဖွဲ့စည်းပုံအခြေခံဥပဒေကို ပြင်ဆင်ရာတွင် တိုင်းရင်းသား ဒေသများနှင့်ပတ်သက်၍ ညှိနှိုင်းနိုင်မည်ဆိုပါက အပြောင်းအလဲတစ်ခု မြင်တွေ့ရနိုင်ဖွယ်ရှိသည်ဟု သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

၎င်းက “အဲဒါကြတော့ ရွေးကောက်ပွဲပြီးသွားလို့ အစိုးရတစ်ရပ် ပေါ်လာမယ်၊ လွှတ်တော်တွေဘာတွေ ပြန်ပြီးတော့ ကျင်းပမယ် အဲဒီအပေါ်မှာ ဆွေးနွေးကြမယ်၊ ပြန်သုံးသပ်ကြမယ်ပေါ့။ အဲဒါပြီးတော့မှပဲ အခြေခံဥပဒေကို ပြင်ဆင် ရေးက ဖြစ်လာမှာကို။ သို့သော်လည်း အရင်တုန်းက ညီလာခံမှာ ငြိမ်းချမ်း‌ရေးညီလာခံတွေမှာ ဆွေးနွေးခဲ့တာအရ တိုင်းရင်းသား ဒေသတွေနဲ့ပတ်သက်ပြီး ဘတ်ဂျက်ခွဲဝေမှု၊ ကိုယ်ပိုင်အုပ်ချုပ်ခွင့်တို့ ဒါမျိုးတွေ ရှိတယ်။ အဲဒါတွေနဲ့ ပတ်သက်ပြီး ညှိနှိုင်းနိုင်မယ်ဆိုရင်တော့ အပြောင်းအလဲတစ်ခု မြင်တွေ့ရဖို့ရှိပါတယ်” ဟု ပြောသည်။

NSPNC နဲ့ နိုင်ငံရေးပါတီအစုအဖွဲ့ ဆွေးနွေးကြစဉ်

၂၀၀၈ ဖွဲ့စည်းပုံပြင်ဆင်ရေးကို တပ်မတော်အနေဖြင့် သဘောတူထားပြီး ပြင်ဆင်သင့်သည့် ဥပဒေများကို လွှတ်တော်လမ်းကြောင်းဖြင့် ပြင်ဆင်မည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က  ၂၀၂၄ ခုနှစ်၊ ‌ဖေဖော်ဝါရီ ၁၃ ရက်တွင် ပြောကြားထားသည်။

ဖွဲ့စည်းပုံအခြေခံဥပဒေအရ ခွင့်ပြုထားသောကဏ္ဍများ၌ တိုင်းဒေသကြီးနှင့် ပြည်နယ်များအလိုက် ဥပဒေပြဋ္ဌာန်း ပြီး လုပ်ဆောင်၍ ရသည်များရှိသော်လည်း မလုပ်သည့်အတွက် အချို့နေရာများတွင် အခက်အခဲများ ဖြစ်ပေါ်နေ ခြင်းဖြစ်ကြောင်း ၎င်းက ပြောကြားခဲ့ဖူးသည်။ 

သို့သော် လက်ရှိ မြန်မာနိုင်ငံ၏ အခြေအနေရ ၂၀၀၈ ခြေ/ဥကို ပြောင်းလဲရုံဖြင့် ထိန်းသိမ်းနိုင်ခြေ မရှိကြောင်း ငြိမ်းချမ်းရေးလုပ်ငန်းစဉ်မှာ ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

NSPNC နဲ့ နိုင်ငံရေးပါတီအစုအဖွဲ့ ဆွေးနွေးကြစဉ်

၎င်းက “အခုလောလောဆယ် သူတို့လုပ်တာတွေ ကြည့်လိုက်လို့ရှိရင် ၂၀၀၈ ခြေ/ဥကို ပြောင်းဖို့ဆိုတာလောက်ပဲ သူတို့လုပ်တာ တွေ့ရတယ်။ သို့သော်လည်းပဲ တိုင်းပြည်အခြေအနေက အခြေခံ ဥပဒေကို ပြောင်းရုံနဲ့ ထိန်းသိမ်း နိုင်ဖို့ အခြေအနေ လုံးဝမရှိဘူးပေါ့။ တစ်ဖက်ကလည်း ပြောနေကြတော့ တကယ်လို့ ရွေးကောက်ပွဲ လုပ်မယ်ဆိုရင် လည်း အများအားဖြင့်ကတော့ တက်လာမယ့် သူတွေက ရုတ်တရက် ချက်ချင်း SAC လုပ်ခဲ့တဲ့ ဟာတွေကို ကပြောင်းကပြန် ချက်ချင်းလုပ်ဖို့ ရှိဦးမယ်လို့ မထင်ဘူးပေါ့” ဟု ပြောသည်။

၂၀၂၄ ခုနှစ်၊ ဇွန်လကလည်း အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC)နှင့် နိုင်ငံရေးပါတီများ အစုအဖွဲ့၏ အလုပ်အဖွဲ့များသည် ၂၀၀၈ ဖွဲ့စည်းပုံအခြေခံဥပဒေမှ ပြင်ဆင်ရန် သင့်သည်ဟု သုံးသပ်ယူဆရသော အချက်များကို ဆွေးနွေးခဲ့ကြသည်။

၂၀၀၈ ဖွဲ့စည်းပုံအခြေခံဥပဒေမှ ပြင်ဆင်ရန်သင့်သည်ဟု သုံးသပ်ယူဆရသော အချက်များ၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်ရေးဆိုင်ရာ အထွေထွေ ဆွေးနွေးချက်များအား ဆွေးနွေးညှိနှိုင်းခဲ့ကြသည်ဟု နစက-က သတင်းထုတ်ပြန်ထားခဲ့သည်။

ပြည်သူ့ပါတီ(PP)ဥက္ကဋ္ဌ ဦးကိုကိုကြီးကတော့ ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး အချက် ၄၀ ကျော်ကို သဘောတူညီမှုရထားပြီးဟု မီဒီယာများကို ထုတ်ဖော်ပြောကြားထားသည်။

CNI News

၂၀၂၅ ခုနှစ်၊ ဖေဖော်ဝါရီ ၁၄

အင်အားစု ၉ ဖွဲ့မှ စတင်ရေးဆွဲနေသည့် ဖက်ဒရယ်အသွင်ကူးပြောင်းရေး အစီအမံဆိုင်ရာ အခြေခံဥပဒေသည် အင်အားကြီး အစုအဖွဲ့များအပေါ် လွှမ်းခြုံနိုင်သော ဥပဒေရေးဆွဲမှု ဖြစ်ရန်လိုအပ်ကြောင်း စစ်ရေးနှင့်နိုင်ငံရေး အကဲခတ်များက ထောက်ပြကြသည်။ 

အသွင်ကူးပြောင်းရေး ကာလအတွက် ဖွဲ့စည်းပုံအခြေခံဥပဒေကဲ့သို့ သက်ရောက်မှုရှိသော ဖက်ဒရယ် အသွင် ကူးပြောင်းရေး အစီအမံဆိုင်ရာ အခြေခံဥပဒေအား စတင်ပြင်ဆင်ရေးဆွဲနေပြီဖြစ်ကြောင်း တိုင်းရင်းသား လက်နက်ကိုင်များနှင့် ပြည်နယ်/လူမျိုး ကိုယ်စားပြု ဖက်ဒရယ်ကောင်စီများ စသည့် အဖွဲ့ ၉ ဖွဲ့မှ ၂၀၂၅ ခုနှစ်၊ ဖေဖော်ဝါရီ ၁၂ ရက်နေ့တွင် ထုတ်ပြန်ခဲ့သည်။ 

လက်ရှိရေးဆွဲနေသည့် အခြေခံဥပ‌ဒေတွင် အင်အားကြီး အစုအဖွဲ့များဖြစ်သော “ဝ” ၊ မိုင်းလားနှင့် မြောက်ပိုင်း အင်အားစုများ မပါဝင်သေးကြောင်း အမျိုးသမီးများအဖွဲ့ချုပ်(WLB-မြန်မာနိုင်ငံ)မှ အတွင်းရေးမှူး ‌ဒေါ်နန်းမို့မို့က CNI သတင်းဌာနသို့ ပြောသည်။

၎င်းက “တခြားအဖွဲ့တွေလည်း ပါပါတယ်၊ ဒီ ၉ ဖွဲ့ကတော့ အဲဒီရေးဆွဲတာအပြင်ကို တခြားကိစ္စတွေမှာ ပူးပေါင်း ဆောင်ရွက်တာတွေ ရှိတယ်ပေါ့နော်၊ အဲတော့ ဒီ ၉ ဖွဲ့ပဲ မကပါဘူး၊ တခြားသော နိုင်ငံရေးအင်အားစုတွေ၊ တော်လှန်ရေး အင်အားစုတွေ အများအပြားပါတယ်ရှင့်၊ အဓိကကတော့ “ဝ” တို့ပဲ မကဘူးပေါ့နော်၊ တခြား မြောက်ပိုင်းဘက်မှာ ရှိနေတဲ့ အင်အားစုတို့ ဒါတွေကတော့ လက်ရှိ ရေးဆွဲနေတဲ့အထဲမှာတော့ မပါသေးတဲ့ အနေအထား ဖြစ်တယ်ပေါ့နော်၊ အခုက ကြားကာလအစီမံ ရေးဆွဲတာနဲ့ ပတ်သက်ပြီးတော့ တခြားသော ကျန်ရှိ နေသေးတဲ့ မပါဝင်နိုင်သေးတဲ့ အစုအဖွဲ့တွေကို ဆက်လက် ညှိနှိုင်းတာမျိုးတို့၊ အဲဒီဟာတွေကိုတော့ ကျမတို့ ဆက်သွားဖို့တွေ ရှိတာပေါ့နော်၊ အခုက ချိတ်ဆက်မှုတွေတော့ ရှိပါတယ်၊ ကျမတို့ အစုအဖွဲ့ ၉ စုအနေနဲ့ တိုက်ရိုက် ချိတ်ဆက်တာမျိုးတွေ မရှိပေမယ့်လည်း ဒီ ၉ ဖွဲ့ထဲမှာပါတဲ့ အဖွဲ့တွေကနေမှ သူတို့ ချိတ်ဆက်တာတွေလည်း လုပ်ဆောင်နေတယ်ရှင့်၊ လုပ်ဆောင်တာတွေ ရှိနေပါတယ်” ဟု ပြောသည်။

 UWSA ကို တွေ့ရစဉ်

ယခုထုတ်ပြန်ချက်အား ကရင်နီအမျိုးသားတိုးတက်ရေးပါတီ (KNPP)၊ ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF)၊ မွန်ပြည်သစ်ပါတီ (စစ်အာဏာရှင်ဆန့်ကျင်ရေး- NMSP/AD)၊ ကရင်နီပြည်နယ် အတိုင်ပင်ခံကောင်စီ (KSCC)၊ ပအိုဝ်းအမျိုးသား ဖက်ဒရယ်ကောင်စီ (PNFC)၊ မွန်ပြည်နယ် ဖက်ဒရယ်ကောင်စီ (MSFC)၊ တအာင်းနိုင်ငံရေး အတိုင်ပင်ခံကော်မတီ (TPCC)၊ အမျိုးသမီးများအဖွဲချုပ်(WLB-မြန်မာနိုင်ငံ)တို့က ပူးပေါင်းထုတ်ပြန်ခြင်းဖြစ်သည်။

စစ်အာဏာရှင်စနစ် ချုပ်ငြိမ်း‌ရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် အတူတကွ လက်တွဲတော်လှန် တိုက်ပွဲဝင်နေကြသည့် အဖွဲ့များ၏ ဘုံသဘောထား ရပ်တည်ချက်အား ထုတ်ပြန်ကြေညာခြင်း၊ နောက်ဆက်တွဲ ထောက်ခံပါဝင်ခြင်းနှင့် ပိုမိုကျယ်ပြန့်သောအဖွဲ့များ ပါဝင်လာရေး ဆက်လက်‌ဆွေးနွေး ညှိနှိုင်း မှုများ အား မြှင့်တင်‌ဆောင်ရွက်နေကြောင်း ထုတ်ပြန်ချက်တွင် ဖော်ပြထားသည်။

လက်ရှိ ဥပဒေရေးဆွဲနေသည့် အဖွဲ့အစည်းများအတွင်း အင်အားကောင်းရန် လုပ်ဆောင်ရမည်ဖြစ်ပြီး တိုင်းပြည်၏ ခေတ်၊စနစ်များအား ပြောင်းလဲရန် ဦးတည်သွားနေခြင်းဖြစ်ကြောင်း ပအိုဝ်းအမျိုးသား ဖက်ဒရယ်ကောင်စီ (PNFC) မှ ဥက္ကဋ္ဌ ဦးခွန်မြင့်ထွန်းက CNI သတင်းဌာနသို့ ပြောသည်။

၂၀၁၆ ခုနှစ်၊ ဇူလိုင်လက မိုင်ဂျာယန်ညီလာခံမှာ KIA ဥက္ကဋ္ဌ ဗိုလ်ချုပ်ကြီးအင်ဘန်လကို တွေ့ရစဉ်

၎င်းက “ဒါကိုတော့ အင်အားကောင်းအောင် လုပ်ရမှာပါ၊ အင်အားကောင်းအောင် လုပ်ဖို့ဆိုရင်တော့ ကျန်တဲ့ အဖွဲ့အစည်းတွေနဲ့ အားလုံးနဲ့ပေါ့နော် တတ်နိုင်သမျှ ညှိနှိုင်းပြီးတော့ ဆောင်ရွက်ရမှာကိုး၊ ဒါကြောင့်မို့လို့ ဒီဟာ ကလည်း အားကောင်းဖို့ ဆိုရင်တော့ ကျန်တဲ့လူတွေ ပါဝင်ဖို့က လိုတယ်လေ၊ အဲဒါတော့ ဒီလိုပဲ ကျနော်တို့ ကတော့ ဆောင်ရွက်သွားရမှာပဲ၊ ကျနော်တို့ တိုင်းပြည်မှာကတော့ စစ်အာဏာရှင်စနစ်အောက်မှာ ပုံသဏ္ဍာန် အမျိုးမျိုးနဲ့ပဲ ရှိခဲ့တာကိုးနော်၊ အဖွဲ့အစည်း၊ အုပ်ချုပ်မှု၊ အစိုးရတွေ အပြောင်းအလဲ လုပ်လိုက်တယ်၊ အာဏာက သိမ်းလိုက်တယ်၊ ဘယ်ပုံစံဘယ်ပုံစံ ပုံစံမျိုးစုံလုပ်နေတယ်၊ အခြေခံအားဖြင့်တော့ စစ်အာဏာရှင်စနစ် ကျောရိုးကို တော့ ယူထားတာကို၊ ဆိုတော့ အခုကျနော်တို့ လိုချင်တာက အဲလိုပေါ့နော် အစိုးရတစ်ရပ်ကို ပြောင်းလဲပြတာမျိုး၊ ရွေးကောက်ပွဲလုပ်ပြီးတော့ အခြေခံစနစ် မပြောင်းဘဲနဲ့ အစိုးရလောက်ပဲ ပြောင်းပြတာမျိုး အဲတာမျိုး‌တွေ မဟုတ် တော့ဘဲ ကျ‌နော်တို့တိုင်းပြည်မှာ ဒီတကယ့်ကို စနစ်ပြောင်း၊ ခေတ်ပြောင်းဖြစ်မယ့် System Change ကို ဦးတည်သွားနေတာ ဖြစ်ပါတယ်” ဟု ပြောသည်။

လက်ရှိတွင် အာရက္ခတပ်တော်(AA)သည် အနိမ့်ဆုံးအဆင့်အနေဖြင့် ကွန်ဖက်ဒရေးရှင်းကို ရလိုပြီး အမြင့်ဆုံး အနေဖြင့် ရခိုင်နိုင်ငံတော် ထူထောင်ရေး ရည်မှန်းချက်များရှိနေကြောင်း ပြောကြားထားသလို TNLA ကလည်း လိုအပ်ပါက နိုင်ငံထူထောင် နိုင်ရေးအတွက် တအာင်း(ပလောင်)လူမျိုးများ ပြင်ဆင်ထားကြရန် TNLA အထွေထွေ အတွင်းရေးမှူး ဗိုလ်ချုပ်တားဘုန်းကျော်က ပြောထားသည်။

ထို့အတူ KIA ခေါင်းဆောင် ဒုဗိုလ်ချုပ်ကြီးဂွမ်မော်ကလည်း ၂၀၂၅ ခုနှစ်တွင် တိုင်းရင်းသားလက်နက်ကိုင်များ သည် ဖက်ဒရယ်ထက် ကျော်လွန်သော စဉ်းစားချက်များကို ချပြလာကြလိမ့်မည်ဟု ပြောကြားထားသည်။

“ဝ”နှင့် မိုင်းလားအဖွဲ့များကလည်း သီးခြား အုပ်ချုပ်ရေးစနစ်ကို ထူထောင်ထားပြီး လွတ်လပ်စွာရပ်တည်နေခြင်း ကြောင့် တခြားသော အင်အားစုများ ကြိုးပမ်းနေသည့် ဒီမိုကရေစီနှင့်ဖက်ဒရယ်စနစ်၏ ပြင်ပကို ‌ရောက်ရှိနေ သည်။

CNI News

၂၀၂၅ ခုနှစ်၊ ဖေဖော်ဝါရီ ၁၃

နာမည်ကြီးနေသည့် ကျားဖြန့်အား ပျက်စီးယိုယွင်းသွားအောင် အမှုန့်ချေမည်ဟု ဒီမိုကရေစီအကျိုးပြု ကရင် တပ်မတော်(DKBA)မှ စစ်ဦးစီးအရာရှိချုပ် ဗိုလ်ချုပ်စောဆန်းအောင်က CNI သတင်းဌာနသို့ ပြောသည်။

ကရင်ပြည်နယ်၊ မြဝတီမြို့နယ် ကျောက်ခက်ဒေသရှိ ကျားဖြန့်လုပ်ငန်းများမှ လူကုန်ကူးခံထားရသည့် နိုင်ငံခြား သား ၂၆၁ ဦးအား ဒီမိုကရေစီအကျိုးပြု ကရင်တပ်မတော် (DKBA)က ၂၀၂၅ ခုနှစ်၊ ဖေဖော်ဝါရီ ၁၂ ရက်တွင် ထိုင်းနိုင်ငံသို့ လွှဲပြောင်း ပေးအပ်ခဲ့သည်။
ကျားဖြန့်သည် လူသားချင်း မစာနာသည့် အလုပ်ဖြစ်ကြောင်း ထင်ပေါ်လာသည့်အတွက် တိုက်ဖျက်ရမည်ဟု ဗိုလ်ချုပ်စောဆန်းအောင်က CNI သတင်းဌာနသို့ ပြောသည်။

ဗိုလ်ချုပ်စောဆန်းအောင်က “နာမည်ကြီးတဲ့ ကျားဖြန့်ကိုတော့ ပျက်စီးယိုယွင်းအောင် အမှုန့်ချေရဖို့ပဲ နေမှာဗျ နော်၊ နောက်ပြီးတော့ ဒီကျားဖြန့်ဆိုတာ နာမည်ဆိုးကြီး ဖြစ်နေတယ်လေ၊ ကျားဖြန့်ရဲ့အလုပ် အစဘာလုပ်လဲဆို တော့ လူသားချင်းချင်း မစာနာဘူး၊ ရက်စက်ကြမ်းကြုတ်တယ်၊ ကျနော်တို့လည်း မသိနေ၊ မကြားရ မမြင်ရဘူး လားနော်၊ အခုနယ်မြေ ထိလာတဲ့အပေါ်မှာ မူတည်ပြီးတော့ ကျားဖြန့်ဆိုတဲ့အရာဟာ လူသားချင်းကို တကယ့် တကယ် မစာနာတဲ့ အလုပ်ဖြစ်နေတယ်ဆိုတာ ထင်ပေါ်လာပြီ၊ ကျော်ကြားလာပြီလေ၊ ဒီဥစ္စာကိုတော့ ကျနော်တို့ တိုက်ဖျက်ရမှာ ပေါ့နော်၊ ဒီဒေသ အကြောင်းအရာလည်း အေးအေးချမ်းချမ်းပဲ ဖြစ်စေချင်တယ်ပေါ့လေ” ဟု ပြောသည်။

DKBA ဒုစစ်ဦးစီးချုပ် ဒုဗိုလ်ချုပ်ကြီးစောရွှေဝ၊ ဗိုလ်ချုပ်စောဆန်းအောင်၊ ဗိုလ်မှူးချုပ်စိုင်းကျော်လှနဲ့ BGF ခေါင်းဆောင် စောချစ်သူတို့ကို တရုတ်လုပ်ငန်းရှင်တွေနဲ့အတူ တွေ့ရစဉ်

ဒီမိုကရေစီအကျိုးပြု ကရင်တပ်မတော် (DKBA) က လွှဲပြောင်းပေးခဲ့သော နိုင်ငံခြားသားများတွင် ဖိလစ်ပိုင် နိုင်ငံသား ၂၆ ဦး၊ ဘင်္ဂလားဒေ့ရှ်နိုင်ငံသား ၁၃ ဦး၊ ဘရာဇီးလ်နိုင်ငံသား ၂ ဦး၊ နီပေါနိုင်ငံသား ၁ ဦး၊ ကင်ညာနိုင်ငံ သား ၃၃ ဦး၊ လာအိုနိုင်ငံသား ၁၉ ဦး၊ အီသီရိုပီးယား နိုင်ငံသား ၄၆ ဦး၊ ပါကစ္စတန်နိုင်ငံသား ၃၁ ဦး၊ တန်ဇန်းနီးယား နိုင်ငံသား ၁ ဦး၊ သီရိလင်္ကာနိုင်ငံသား ၁ ဦး၊ ယူဂန်ဒါနိုင်ငံသား ၂ ဦးနှင့် ထိုင်ဝမ် ၄ ဦးတို့ ပါဝင်ကြောင်း သိရသည်။

ပြည်သူလူထု ထိခိုက်မည်ဆိုပါက ကျားဖြန့်အား နှိမ်နင်းရမည်ဖြစ်ကြောင်း ဒီမိုကရေစီအကျိုးပြု ကရင်တပ်မတော် (DKBA)မှ ဒုတိယစစ်ဦးစီးချုပ် ဒုဗိုလ်ချုပ်ကြီး စောရွှေဝက CNI သတင်းဌာနသို့ ပြောသည်။

ထိုင်းဘက်ကို DKBA ကလွှဲပြောင်းပေးလိုက်တဲ့ နိုင်ငံခြားသားတွေကိုတွေ့ရစဉ်

ဒုဗိုလ်ချုပ်ကြီး စောရွှေဝက “ပြန်လွှတ်ပေးတာတော့ ၂၆၁ ယောက်၊ နောက်ပြီးတော့လည်း ကျားဖြန့်နဲ့ ပတ်သက် တာတော့ ဘယ်လိုပြောမလဲ၊ ကျနော်တို့ မြန်မာနိုင်ငံ၊ ကရင်ပြည်နယ် နယ်စပ်မှာလည်း အဲဒီ လေယာဥ်နဲ့လာ တယ်၊ နောက်ပြီးတော့ ကားနဲ့လာတယ်၊ ကျနော်တို့ သဘောကတော့ နယ်စပ်မှာ ယိုးဒယားနဲ့ မြန်မာနယ်စပ် ကရင်ပြည်နယ်မှာလည်း တစ်ယောက်နဲ့တစ်ယောက် ရန်မရှာဘူးလေ၊ မကောင်းတဲ့ အလုပ်ကိုလည်း ပြန်ပို့မှာ ပေါ့နော်၊  ကျားဖြန့်နဲ့ ပတ်သက်တာတော့ လုပ်ရမှာပဲလေ၊ ကျနော်တို့ တစ်ခါမှ နာမည်မပေါက်ခဲ့တာနော်၊ ကျ‌နော် တို့လည်း စစ်ဦးစီးချုပ် တက်တာလည်း မကြာသေးဘူး၊ လပိုင်းကျော်ကျော်လောက်ပဲ ရှိသေးတယ်၊ ဒါပေမယ့် ပို့တာတော့ ၂၀၀ ကျော် အဲဒါကြောင့် အလုပ်လုပ်တဲ့သူက နာမည်ပေါ်တယ်ပေါ့နော်၊ အလုပ်မလုပ်တဲ့သူက နာမည်ဘယ် ပေါ်မလဲ၊ အကောင်းဆုံး ကျနော်တို့ ပြည်သူလူထု ထိခိုက်မယ်ဆိုလို့ရှိရင် လုပ်ရမယ်လေဒါ မဟုတ်ဘူးလား အဲဒါပဲ” ဟု ပြောသည်။

ကရင်ပြည်နယ်၊ ဘုရားသုံးဆူမြို့နယ်အတွင်း ကာစီနိုလောင်းကစားရုံများနှင့် စားသောက်ကုန်များတွင် လုပ်ကိုင် နေကြသည့် တရုတ်နိုင်ငံသားများအနေဖြင့် လာမည့် ဖေဖော်ဝါရီ ၂၈ ရက်နေ့ နောက်ဆုံးထား၍ ထွက်ခွာသွားရန် ၂၀၂၅ ခုနှစ်၊ ဖေဖော်ဝါရီ ၉ ရက်တွင် ဒီမိုကရေစီအကျိုးပြု ကရင်တပ်မတော် (DKBA)က ထုတ်ပြန်ခဲ့သည်။

ထိုင်းဘက်ကို DKBA ကလွှဲပြောင်းပေးလိုက်တဲ့ နိုင်ငံခြားသားတွေကိုတွေ့ရစဉ်

ထို့ပြင် ဘုရားသုံးဆူမြို့နယ်အတွင်း ကျားဖြန့်လုပ်ငန်းများ လုပ်ဆောင်နိုင်ခြင်း မရှိစေရန်နှင့် ထိုင်းနိုင်ငံမှ လျှပ်စစ်မီးနှင့် လောင်စာဆီများ ယခင်အတိုင်း အမြန်ဆုံး ပြန်လည်ရရှိစေရေးအတွက် DKBA၊ အမှတ် (၂) နည်းဗျူဟာအနေဖြင့် အစွမ်းကုန် ကြိုးပမ်းလုပ်ဆောင်သွားမည် ဖြစ်ကြောင်း ထုတ်ပြန်ချက်တွင် ဖော်ပြထား သည်။

မိမိတို့အဖွဲ့အစည်းအနေဖြင့် လက်ရှိနိုင်ငံတကာမှ တိုက်ဖျက်လျက်ရှိသည့် လူကုန်ကူးခြင်း၊ လူလူချင်း ညှင်းပန်း နှိပ်စက်ခြင်းအား နိုင်ငံတကာနှင့်အတူ ပူးပေါင်းတိုက်ဖျက်သွားမည်ဖြစ်ကြောင်း DKBA က ၂၀၂၅ ခုနှစ်၊ ဖေဖော်ဝါရီ ၅ ရက်တွင် ထုတ်ပြန်ခဲ့သည်။

ထို့ပြင် မိမိတို့ ထိန်းချုပ်နယ်မြေအတွင်းတွင် လူကုန်ကူး ခံရသူများအား မြန်မာနိုင်ငံသံရုံးနှင့်အတူ နိုင်ငံတကာ သံရုံးများမှ တောင်းခံလာပါက ရှာဖွေပေးသွားမည်ဖြစ်သလို မူးယစ်ဆေးဝါးနှင့် ပတ်သက်၍လည်း တားဆီး နှိမ်နင်းသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။