CNI International News
ဒီမာပူရ၊ ဧပြီ ၂၁

အိန္ဒိယ-နာဂ နိုင်ငံရေးအခင်းအကျင်းတွင် သိသာထင်ရှားသည့် အပြောင်းအလဲ တစ်ခုအဖြစ် နာဂအမျိုးသားဆိုရှယ် လစ်ကောင်စီ-ကပ္ပလန်/အန်းမိုင်(NSCN-K/AM) နှင့် အိန္ဒိယအစိုးရတို့သည် အပစ်အခတ်ရပ်စဲရေးကို ရှေးရှုသည့် အပြုသဘောဆောင်သော ဆွေးနွေးမှုများ ပြုလုပ်ခဲ့သည်ဟု Eastern Mirror သတင်းဝက်ဘ်ဆိုက်မှ ဖော်ပြခဲ့ သည်။

အပစ်အခတ်ရပ်စဲရေး ကြီးကြပ်ကွပ်ကဲမှုအဆင့်တွင် စတုတ္တအကြိမ်မြောက် တွေ့ဆုံဆွေးနွေးမှုကို  မတ်လ ၂၇ ရက်က နယူးဒေလီ (New Delhi)တွင် ပြုလုပ်ခဲ့သည်။

ထိုဆွေးနွေးမှုကို NSCN-K/AM အဖွဲ့၏ အတွင်းရေးမှူးချုပ်  Kughalu Mülatonu က ဦးဆောင်တက်ရောက်ခဲ့ သည်ဟု NSCN-K/AM က ဧပြီ ၂၀ ရက်တွင် ကြေညာချက် ထုတ်ပြန်ခဲ့သည်။

“နှစ်ဖက်စလုံးက ဒေသတွင်း လက်နက်ကိုင် ပဋိပက္ခတွေ အဆုံးသတ်ရေး နည်းလမ်းတွေကို စိတ်အားထက်သန် စွာ ရှာဖွေနေကြပါတယ်။ မကြာခင်မှာ နောက်ထပ် အစည်းအဝေးတစ်ခုကို ကြားနေနိုင်ငံ တစ်နိုင်ငံမှာ ပြုလုပ်ဖို့ နားလည်မှုရရှိခဲ့ပါတယ်။ အာရှနိုင်ငံ တစ်နိုင်ငံမှာ ဖြစ်ပါတယ်" ဟု ထုတ်ပြန်ချက်တွင် ဖော်ပြခဲ့သည်။

အဆိုပါ နိုင်ငံမှာ မည်သည့် နိုင်ငံဖြစ်သည်ကိုတော့ ဖော်ပြထားခြင်းမရှိပါ။

ဥက္ကဋ္ဌ၊ ဒုဥက္ကဋ္ဌနှင့် အတွင်းရေးမှူးချုပ်တို့သည် အိန္ဒိယနှင့် နာဂလူမျိုးများ၏ အရေးကိစ္စများနှင့် အခြားကိစ္စရပ်များ ကို ဆွေးနွေးရန် အိန္ဒိယဗဟိုအစိုးရမှ ကိုယ်စားလှယ်များနှင့် ပူးပေါင်းဆောင်ရွက်ရန် မျှော်လင့်ကြောင်းလည်း ထုတ်ပြန်ချက်တွင် ဖော်ပြခဲ့သည်။

၂၀၂၃  ခုနှစ်မှစပြီး နာဂ NGO များနှင့် အိန္ဒိယအေဂျင်စီ အသီးသီးက လုပ်ဆောင်ခဲ့သော ချဉ်းကပ်ဆောင်ရွက်မှုများ အပြီးတွင် အိန္ဒိယအစိုးရနှင့် အပစ်အခတ်ရပ်စဲရေးအတွက် ထိတွေ့ဆက်ဆံရန် ဆန္ဒရှိလာခဲ့သည်။

ထိုအခြေအနေသည် တည်ငြိမ်မှုရရှိပြီး တင်းမာမှုများ လျော့ကျလာသည့် လက္ခဏာဖြစ်ကြောင်း ထုတ်ပြန်ချက် တွင် ဖော်ပြခဲ့သည်။ 

အိန္ဒိယ-မြန်မာနယ်စပ်တွင် နေထိုင်သည့် နာဂလူမျိုးများသည် မျှော်လင့်ချက်များနှင့် ပြည့်နှက်နေပြီး လက်ရှိ အခြေအနေကို အနီးကပ်စောင့်ကြည့် နေကြသည်ဟုလည်း ဆိုသည်။

NSCN-K/AM သည် အိန္ဒိယနှင့် မြန်မာနိုင်ငံမှ ထိပ်သီးခေါင်းဆောင်များ ပါဝင်သည့် တစ်ခုတည်းသော အဖွဲ့အစည်း ဖြစ်ကြောင်းလည်း ထုတ်ပြန်ချက်တွင် ဖော်ပြခဲ့သည်။

“လက်ရှိအချိန်မှာတော့ နာဂကိုယ်ပိုင်အုပ်ချုပ်ခွင့်ရဒေသတွေထဲက စစ်ကိုင်းတိုင်းဒေသကြီးမှာ မြန်မာအစိုးရနဲ့ အပစ်အခတ်ရပ်စဲရေးကို ဆက်လက် ထိန်းသိမ်းထားပါတယ်။ ဒီအပစ်အခတ် ရပ်စဲရေးဟာ ၂၀၁၄ ခုနှစ်က SS Khaplang က စတင်ခဲ့တဲ့ အပစ်အခတ်ရပ်စဲရေးကို ဆက်လက် ထိန်းသိမ်းထားတယ်လို့ မှတ်ယူနိုင်ပါတယ်။ အိန္ဒိယနဲ့ အလားတူ သဘောတူညီချက် ပြုလုပ်မှုဟာ ၂၀၀၁ ခုနှစ် မူဘောင်သဘောတူညီချက်ရဲ့ အနှစ်သာရကို ထိခိုက်စေမှာ မဟုတ်ဘူး” ဟု ဖော်ပြထားသည်။ 

အိန္ဒိယတွင် နောက်ထပ် အစည်းအဝေးများ ပြုလုပ်ရန် ဖြစ်နိုင်ခြေ ရှိနေသော်လည်း မြန်မာနိုင်ငံတွင် ဆက်လက် ဖြစ်ပွားနေသော ပြည်တွင်းပဋိပက္ခများနှင့် မကြာသေးမီက လှုပ်ခတ်ခဲ့သည့် အင်အားပြင်း ငလျင်ကြောင့် NSCN ၏ ထိပ်တန်းခေါင်းဆောင် ၃ ဦး၏ အိန္ဒိယသို့ သွားရောက်မည့် ခရီးစဉ်သည် မသေချာတော့ကြောင်း ထုတ်ပြန်ချက် ၌ ဖော်ပြခဲ့သည်။ 

“ဘယ်လိုပဲဖြစ်ဖြစ် အပစ်အခတ်ရပ်စဲရေးနဲ့ ပတ်သက်ပြီး အိန္ဒိယအစိုးရနဲ့ အတွင်းရေးမှူးချူပ် Kughalu Mulatonu က တခြား အဖွဲ့ဝင်တွေနဲ့အတူ သဘောတူညီချက်ကို အပြီးသတ် လုပ်ဆောင်နိုင်လိမ့်မယ်လို့ မျှော်လင့်ပါတယ်။ ဥက္ကဋ္ဌ၊ ဒုဥက္ကဋ္ဌနဲ့ အတွင်းရေးမှူးချုပ်တွေဟာ အနာဂတ်မှာ အိန္ဒိယမှာပဲဖြစ်ဖြစ်၊ မြန်မာနိုင်ငံ မှာပဲဖြစ်ဖြစ် နိုင်ငံရေး ဆွေးနွေးပွဲတွေကို ပါဝင်နိုင်ခြေရှိပါတယ်”ဟု ထုတ်ပြန်ချက်တွင် ဖော်ပြခဲ့သည်။

Source: Eastern Mirror

CNI News
၂၀၂၅ ခုနှစ်၊ ဧပြီ ၁၇

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် မစ္စတာအန်ဝါနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တို့ ၂၀၂၅ ခုနှစ်၊ ဧပြီ ၁၇ ရက်တွင် ထိုင်းနိုင်ငံ၊ ဘန်ကောက်မြို့မှာ တွေ့ဆုံဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးပွဲကို ထိုင်းဝန်ကြီးချုပ်ဟောင်း သက်ဆင်လည်း တက်ရောက်ခဲ့သည်ဟု နစက,က သတင်းထုတ်ပြန်ခဲ့သည်။

ဗိုလ်ချုပ်မှူးကြီးမင်းအောင်လှိုင်၊ ထိုင်းဝန်ကြီးချုပ်ဟောင်း သက်ဆင်နှင့် အာဆီယံအလှည့်ကျဥက္ကဋ္ဌ မလေးရှားဝန် ကြီးချုပ် အန်ဝါတို့ သုံးပွင့်ဆိုင် တွေ့ဆုံမှုတွင် မြန်မာငလျင်ဘေး ပြန်လည်ထူထောင်ရေးတွင် အာဆီယံ အသိုက် အဝန်းမှ ဆက်လက်ကူညီဆောင်ရွက်ရေး ဆွေးနွေးခဲ့ကြသည်။

ထို့နောက် မြန်မာ-အာဆီယံ အသိုက်အဝန်းမှ ပူးပေါင်းဆောင်ရွက်ကိစ္စများလည်း ဆွေးနွေးခဲ့ကြောင်း သိရသည်။

CNI News
၂၀၂၅ ခုနှစ်၊ ဧပြီ ၁၇ 

၂၀၂၅ ခုနှစ်၊ ဒီဇင်ဘာလမှာ ကျင်းပရန် ကြိုးပမ်းနေသည့် အထွေထွေရွေးကောက်ပွဲ အောင်မြင်ဖို့အတွက် ပြည်သူ လူထုက ပူးပေါင်းပါဝင်ကြရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၇ ရက်တွင် ကျရောက်သည့် မြန်မာ့နှစ်သစ်ကူး နှစ်ဆန်းတစ်ရက်နေ့ နှုတ်ခွန်းဆက်မင်္ဂလာ စကား ပြောကြားစဉ် ၎င်းက ထည့်သွင်း ပြောကြားခဲ့ခြင်း ဖြစ်သည်။

နစကဥက္ကဋ္ဌက “ နိုင်ငံတော်မှာ စစ်မှန်စည်းကမ်းပြည့်ဝတဲ့ ပါတီစုံဒီမိုကရေစီစနစ် ခိုင်မာစေရေး၊ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စု တည်ဆောက်ရေးကို ကျနော်တို့ အစိုးရက ရည်မှန်းချက်ထား ဆောင်ရွက်လျက်ရှိနေပါတယ်။ ပြည်သူလူထု လိုလားတဲ့ ပါတီစုံဒီမိုကရေစီစနစ်ကို အမြန်ဆုံး ပြန်လည် အကောင်အထည်ဖော်ပေးနိုင်ဖို့ လည်း လာမယ့် ဒီဇင်ဘာလအတွင်းမှာ လွတ်လပ်ပြီး တရားမျှတမှု အပြည့်ရှိတဲ့ ပါတီစုံဒီမိုကရေစီ အထွေထွေရွေး ကောက်ပွဲကို ကျင်းပပေးနိုင်ဖို့ ကြိုးပမ်းဆောင်ရွက်လျက်ရှိနေပါတယ်။ ပါတီစုံ ဒီမိုကရေစီစနစ်ကို အမှန်တကယ် လိုလားတယ်ဆိုရင် အဓိကဖြစ်တဲ့ ရွေးကောက်ပွဲ အောင်အောင်မြင်မြင် ပြီးမြောက်နိုင်ဖို့အတွက် မိဘပြည်သူများအနေနဲ့ ပူးပေါင်းပါဝင်ဆောင်ရွက်ပေးကြဖို့ မေတ္တာရပ်ခံလိုပါတယ်။ နိုင်ငံ တော်က ဆက်လက် လျှောက်လှမ်းမယ့် ပါတီစုံဒီမိုကရေစီစနစ်မှာ နိုင်ငံသူ/သားများ အားလုံး ပူးပေါင်း ပါဝင် ဆောင်ရွက်ကြပါဆို့လို ပြောကြားလိုပါတယ်”ဟု ပြောသည်။

နစကသည် ရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ တတိယအပတ်နှင့် စတုတ္တအပတ်တွင်လည်းကောင်း၊ ၂၀၂၆ ခုနှစ်၊ ဇန်နဝါရီလ တတိယအပတ်နှင့် စတုတ္တအပတ်တွင်လည်းကောင်း ကျင်းပပြီးစီးရန် ပြင်ဆင်လျက် ရှိကြောင်း သိရသည်။ 

တခြားတစ်ဖက်မှာတော့ တိုင်းရင်းသားလက်နက်ကိုင်များ(EAOs)၊ ပြည်သူ့ကာကွယ်ရေးတပ်ဖွဲ့(PDF)၊ အမျိုးသား ညီညွတ်ရေးအစိုးရ(NUG)နှင့် တက်ကြွလှုပ်ရှားသူများက နစကကျင်းပမည့် ရွေးကောက်ပွဲကို မပျက်ပျက်အောင် ဖျက်မည်ဟု ကြေညာထားသည်။

ဖက်ဒရယ်နှင့် ဒီမိုကရေစီအရေး ကြိုးပမ်းနေသူတချို့ကတော့ နိုင်ငံရေးသဘောတူညီချက် တစ်ခုကို ကြိုတင် ရယူ ထားပြီးမှ ရွေးကောက်ပွဲ ကျင်းပမည်ဆိုပါက ပိုမိုသင့်တော်ကြောင်း၊ သို့မဟုတ်ပါက ရွေးကောက်ပွဲ ကျင်းပပြီး နောက်ပိုင်း ပေါ်ပေါက်လာမည့် အစိုးရသစ်လက်ထက်မှာ ပိုမို အကျပ်အတည်းများဖြင့် ရင်ဆိုင်ရနိုင်ကြောင်း ထောက်ပြလျက်ရှိသည်။

CNI News
၂၀၂၅ ခုနှစ်၊ ဧပြီ ၁၇

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်နေ့ နှစ်ဆန်းတစ်ရက်နေ့တွင် ဘွဲ့တံဆိပ်များ ချီးမြှင့်ပေးအပ်လျက်ရှိသည်။

အဆိုပါ ဘွဲ့တံဆိပ်များသည် နိုင်ငံတော်ဖွံ့ဖြိုးတိုးတက်ရေးအတွက် လုပ်ငန်းနယ်ပယ်အလိုက် ထူးချွန်ပြောင် မြောက်စွာ ကြိုးပမ်းဆောင်ရွက်ခဲ့ကြသည့် ပုဂ္ဂိုလ်များကို ဂုဏ်ထူးဆောင်ဘွဲများ ချီးမြှင့်ခြင်းဖြစ်သည်။

ဧပြီ ၁၇ ရက်တွင် ပေးအပ်ခဲ့သည် စည်သူဘွဲ့ကို နစကအဖွဲ့ဝင်များ၊ အနုပညာရှင်များ၊ မြန်မာ့တပ်မတော် ဒုတိယဗိုလ်ချုပ်ကြီးများ၊ အရပ်ဘက် အဆင့်မြင့်ဝန်ထမ်းများ၊ ပြည်နယ်ဝန်ကြီးချုပ်များ ရရှိခဲ့သည်။

CNI News
၂၀၂၅ ခုနှစ်၊ ဧပြီ ၁၇

မြန်မာနှစ်သစ်အခါသမယ အထိမ်းအမှတ်အနေဖြင့် အကျဉ်းထောင်/အချုပ်ထောင် အသီးသီးတွင် ပြစ်ဒဏ်ကျခံ လျက်ရှိသော အကျဉ်းသား/သူ ၄၈၉၃ ဦးကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်တွင် လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

ထို့နောက် နိုင်ငံခြားသား ၁၃ ဦးကိုလည်း လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

CNI News
၂၀၂၅ ခုနှစ်၊ ဧပြီ ၁၄

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါနှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ လာမည့် ရက်ပိုင်းအတွင်း ထိုင်းနိုင်ငံ၊ ဘန်ကောက်မြို့မှာ တွေ့ဆုံဆွေးနွေးကြမည်ဖြစ်သည်။

အဆိုပါ တွေ့ဆုံမှုတွင် ထိုင်းဝန်ကြီးချုပ်ဟောင်း အာဆီယံဥက္ကဋ္ဌ အကြံပေး သက်ဆင် ရှင်နာဝပ်လည်း ပါဝင်မည် ဖြစ်ကြောင်း သိရသည်။

အာဆီယံဥက္ကဋ္ဌနှင့် နစကဥက္ကဋ္ဌတို့ မည်သည့် အရေးကိစ္စများကို တွေ့ဆုံ ဆွေးနွေးကြမည်ကိုတော့ မသိရသေးပေ။

သို့သော် မြန်မာငလျင်ဘေးသင့် ပြည်သူများအတွက် လိုအပ်သော အကူအညီများနှင့် ဆေးဝါး အကူအညီများ ပေး အပ်နိုင်ရေး အပါအဝင် အကူအညီများ ပေးအပ်သည့်အခါ လွယ်ကူချောမွေ့စေရေးတို့ကို ဆွေးနွေးရန်ရှိကြောင်း အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါက ပြောကြားထားသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီ ၄ ရက်က ထိုင်းနိုင်ငံ၊ ဘန်ကောက်မြို့မှာ ကျင်းပခဲ့သည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကိုလည်း တက်ရောက် ဆွေးနွေးခဲ့သေးသည်။

အဆိုပါ အစည်းအဝေး၏ ပြင်ပတွင် ထိုင်းဝန်ကြီးချုပ် ပေတုန်တန်နှင့်လည်းကောင်း၊ အိန္ဒိယဝန်ကြီးချုပ် မိုဒီနှင့် လည်းကောင်း၊ သီရိလင်္ကာဝန်ကြီးချုပ်နှင့်လည်းကောင်း၊ ဘူတန်ဝန်ကြီးချုပ်နှင့်လည်းကောင်း၊ နီပေါဝန်ကြီးချုပ် နှင့်လည်းကောင်း အသီးသီး တွေ့ဆုံ ဆွေးနွေးခဲ့သေးသည်။

အလားတူ ထိုင်းဝန်ကြီးချုပ်ဟောင်းလည်းဖြစ် အာဆီယံဥက္ကဋ္ဌ အကြံပေးလည်းဖြစ်သူ သက်ဆင်နှင့်လည်း တွေ့ဆုံ ဆွေးနွေးခဲ့သေးကြောင်း သိရသည်။

CNI News
၂၀၂၅ ခုနှစ်၊ ဧပြီ ၁၂

မြန်မာနိုင်ငံမှာ လှုပ်ခတ်ခဲ့သော ဖျက်အားပြင်း ငလျင်ကြောင့် လူဦးရေ ၁ ဒသမ ၁ သန်းကို လူသားချင်း စာနာ ထောက်ထားမှုဆိုင်ရာ အကူအညီများပေးနိုင်ရန်အတွက် အမေရိကန် ဒေါ်လာ ၂၇၅ သန်း လိုအပ်ကြောင်း ကုလသမဂ္ဂက ထုတ်ပြန်ခဲ့သည်။

အဆိုပါ အကူအညီလိုအပ်ချက်သည် ပြန်လည်ထူထောင်ရေးအတွက် မပါသေးဘဲ လတ်တလော ငလျင်ဘေးသင့် သူများအတွက် လိုအပ်သည့် ကူညီကယ်ဆယ်ရေးနှင့် စားဝတ်နေရေးအတွက် လိုအပ်ချက်သာရှိသေးကြောင်း သိရသည်။

မြန်မာနိုင်ငံဆိုင်ရာ ကုလသမဂ္ဂရုံးက “ မြန်မာနိုင်ငံမှာ အဖျက်အားကြီးတဲ့ ငလျင်ကြီး လှုပ်ခဲ့အပြီး  ၂၀၂၅ ခုနှစ် လူသားချင်းစာနာမှုဆိုင်ရာ လိုအပ်ချက်များနှင့် တုန့်ပြန်ရေး အစီအစဉ်ရဲ့ နောက်ဆက်တွဲ အရေးပေါ် အဆိုပြု လွှာတစ်ခုကို ရေးဆွဲခဲ့ပါတယ်။ ထိခိုက်မှု အပြင်းထန်ဆုံး ဒေသတွေက လူဦးရေ ၁ ဒသမ ၁သန်းကို အကူအညီတွေ ပေးနိုင်ဖို့ ကန်ဒေါ်လာ ၂၇၅ သန်းလိုအပ်ပါတယ်”ဟု ထုတ်ပြန်ခဲ့သည်။

မြန်မာနိုင်ငံတွင် ၂၀၂၅ ခုနှစ်၊ မတ်လ ၂၈ ရက်က မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်လျက်ရှိသည်။

အဆိုပါ ငလျင်ကြောင့် ၂၀၂၅ ခုနှစ်၊ ဧပြီ ၁၁ ရက်အထိ စာရင်းအရ သေဆုံးသူ ၃၆၇၅ ဦးရှိပြီး ထိခိုက်ဒဏ်ရာရရှိသူ ၅၀၂၀ ဦးနှင့် ပျောက်ဆုံးနေသူ ၁၄၁ ဦးရှိသည်။

ထို့နောက် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ စာသင်ကျောင်းများ၊ ဆေးရုံများ၊ ဆက်သွယ်ရေးကွန်ရက်များ၊ လျှပ်စစ်ဓာတ်အား ဖြန့်ဖြူး ရေး ကွန်ရက်များ ပြိုကျပျက်စီးခဲ့သည်။

CNI News
၂၀၂၅ ခုနှစ်၊ ဧပြီ ၁၂

DENKO နှင့် MAB ဘဏ်ဥက္ကဋ္ဌ ဦးချစ်ခိုင်သည် မန္တလေး အိုးဘိုထောင်ကနေ လွတ်ငြိမ်းချမ်းသာခွင့်ဖြင့် ယနေ့ (ဧပြီ ၁၂ ရက်) နံနက်ပိုင်းက ပြန်လွတ်လာပြီးဖြစ်ကြောင်း မိသားစုနှင့်နီးစပ်သူက CNI သတင်းဌာနသို့ ပြောသည်။

၎င်းက “ဒီနေ့ ဦးချစ်ခိုင်ကို မန္တလေး အိုးဘိုထောင်ကနေ လွတ်ငြိမ်းနဲ့လွှတ်ပေးလိုက်တယ်။ အခု အပြင်ရောက် နေပြီး”ဟု ပြောသည်။

အလားတူ ဇေကမ္ဘာဦးခင်ရွှေ၏ သားဖြစ်သူ ကိုဇေသီဟလည်း ရန်ကုန် အင်းစိန်ထောင်ကနေ လွတ်ငြိမ်းချမ်းသာ ခွင့်ဖြင့် ပြန်လည်လွတ်မြောက်လာကြောင်း နီးစပ်သူများထံမှ သိရသည်။

ကိုဇေသီဟကို တွေ့ရစဉ်

ထို့ပြင် စားအုန်းဆီကို မတရားဈေးတင်၍ ရောင်းချခြင်းနှင့် မသမာမှုများ ပြုလုပ်၍ ဖမ်းဆီးခံထားရသော စားအုန်ဆီ ကုန်သည်များလည်း ပြန်လည်လွတ်မြောက်လာကြောင်း သိရသည်။

ဦးချစ်ခိုင်သည် ၂၀၂၂ ခုနှစ်၊ ဧပြီလက ဖမ်းဆီးခံခဲ့ရခြင်းဖြစ်ပြီး ၂၀၂၅ ခုနှစ်၊ ဧပြီ ၁၂ ရက်မှာ လွတ်ငြိမ်းချမ်းသာခွင့် ဖြင့် ပြန်လွတ်လာခြင်းဖြစ်သည်။

ကိုဇေသီဟသည် ၂၀၂၂ ခုနှစ်၊ မတ်လ ၂၂ ရက် ဖမ်းဆီးခံခဲ့ရခြင်းဖြစ်ပြီး ၂၀၂၅ ခုနှစ်၊ ဧပြီ ၁၂ ရက်မှ လွတ်ငြိမ်းချမ်း သာခွင့်ဖြင့် ပြန်လွတ်လာခြင်းဖြစ်သည်။

CNI News
၂၀၂၅ ခုနှစ်၊ ဧပြီ ၁၁

အဆောက်အဦများ ဆောက်လုပ်ရာတွင် အနည်းဆုံး ရက်ချ်စတာစကေး ၈ အထိခံနိုင်သည့် အဆောက်အဦများ ဆောက်လုပ်ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၁ ရက်က ငလျင်ဘေးသင့် အင်းလေးဒေသသို့ သွားရောက်စစ်ဆေး၍ ပြည်သူများဖြင့် တွေ့ဆုံ စဉ် ၎င်းက ပြောကြားလိုက်ခြင်း ဖြစ်သည်။

အဆောက်အဦများ ဆောက်လုပ်ရာတွင် ယခင် မိမိတို့နိုင်ငံ၌ အမြင့်ဆုံးလှုပ်ခတ်ခဲ့သည့် ရက်ချ်တာစကေး ၈ အထိ ခံနိုင်သော အဆောက်အဦများ ဆောက်လုပ်ရမည်ဖြစ်သော်လည်း ဆောက်လုပ်ခဲ့ခြင်း မရှိမှုများကြောင့် အချို့ အဆောက်အဦများမှာ ပျက်စီးပြီး ထိခိုက်သေဆုံးမှုများ ဖြစ်ပေါ်ခဲ့ခြင်းဖြစ်သည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

၎င်းက “နောင်အချိန်တွင် ယခုကဲ့သို့ ပျက်စီးမှုများ မရှိစေရေး အဆောက်အဦများ ဆောက်လုပ်ရာတွင် အနည်းဆုံး ရက်ချ်စတာစကေး ၈ အထိခံနိုင်သည့် အဆောက်အဦများ ဆောက်လုပ်ရန် ညွှန်ကြားထားပြီးဖြစ်ကြောင်း၊ အဆောက်အဦများ တည်ဆောက်ရာတွင် နောက်လာနောက်သားများ၏ ကာလ၌ ငလျင်ဒဏ်ကြောင့် ထိခိုက်မှု မရှိစေရေး မိမိတို့အနေဖြင့် တည်ဆောက်ရေး လုပ်ငန်းများ ဆောင်ရွက်ရာ၌ စနစ်တကျဖြင့် ကြိုတင်ပြင်ဆင် ဆောင်ရွက်ပေးသွားရမည်”ဟု ပြောသည်။

နိုင်ငံတော်ပြန်လည်ထူထောင်ရေး လုပ်ငန်းများ ဆောင်ရွက်ရာတွင် တစ်ဦးနှင့်တစ်ဦး ညီညီညွတ်ညွတ်ဖြင့် တောင်ပေါ်မြေပြန့် မခွဲခြားဘဲ ဝိုင်းဝန်း ဆောင်ရွက်သွားကြရမည်ဟု နစကဥက္ကဋ္ဌက ပြောသည်။

နစကဥက္ကဋ္ဌသည် အဆောက်အဦများ ဆောက်လုပ်ရာတွင် ရက်ချ်စတာစကေး ၈ အထိ အနည်းဆုံးခံနိုင်ရမည်ဟု ညွှန်ကြားမှုသည် ကောင်းမွန်ကြောင်း၊ သို့သော် ကန်ထရိုက်တာများနှင့် စည်ပင်သာယာရေးကော်မတီ/ဌာနများက ထိုညွှန်ကြားချက်ကို လိုက်နာရန် ပို၍ အရေးကြောင်း၊ မြန်မာနိုင်ငံရှိ အဆောက်အဦများသည် စံချိန်စံနှုန်း မီခြင်း မရှိဘဲ ကန်ထရိုက်တာများနှင့် စည်ပင်သာယာရေးကော်မတီ/ဌာနများက လာဘ်ပေးလာဘ်ယူဖြင့် အဆင်ပြေ သလို ဆောက်နေကြကြောင်း ရန်ကုန်မြို့နေ ကိုမင်းမင်းက ပြောသည်။

၎င်းက “နစကဥက္ကဋ္ဌ ညွှန်ကြားတဲ့အတိုင်း အောက်ခြေက ဌာနဆိုင်ရာတွေက ကန်ထရိုက်တာတွေကို ကြပ်မတ် ရင်တော့ ကောင်းတာပေါ့။ အခုက အဆောက်အဦ ဆောက်မယ်ဆိုရင် စည်ပင်နဲ့ ကန်ထရိုက်တာနဲ့က လာဘ်ပေး လာဘ်ယူလုပ်လိုက်ပြီးတော့ အဆင်ပြေသလို ဆောက်နေကြတာ။ အဆောက်အဦ ပြီးလို့ ဝယ်သူတွေကို ကန်ထရိုက်တာက အပ်တဲ့အခါမှာ စံချိန်စံနှုန်း မပြီးလို့ ဝယ်သူတွေက ဌာနဆိုင်ရာကို တိုင်ကြားတဲ့အခါမှာလည်း အရေးယူ တာမရှိဘူး၊ လာစိစစ်တာလည်းမရှိဘူး စိစစ်ခဲ့ရင်လည်း ကန်ထရိုက်တာဆီက သူတို့ ငွေယူထားတဲ့ အတွက် သူတို့ပါ ပြန်ထိမှာဆိုတော့ ကန်ထရိုက်တာက အမှန်ပဲ လုပ်သွားကြတာ။ ရန်ကုန်က အဆောက်အဦတွေ လိုက်စစ်ကြည့်လိုက်ရင် ပေါ်လာပါလိမ့်မယ်။ မန္တလေးနဲ့ စစ်ကိုင်းကို အခြေပြုပြီးတော့ မတ်လ ၂၈ ရက်က လှုပ်ခဲ့ တဲ့ ပြင်းအား ၇ ဒသမ ၇ အဆင့်ရှိတဲ့ ငလျင်သာ ရန်ကုန်မှာ လှုပ်ကြည့် အကုန်ပြိုကျမှာ။ အကုန်နီးပါး သေသွားနိုင် တယ်”ဟု ပြောသည်။

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်တစ်ခု ၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့သည်။

အဆိုပါ ငလျင်ကြောင့် ၂၀၂၅ ခုနှစ်၊ ဧပြီ ၁၁ ရက်အထိ စာရင်းအရ သေဆုံးသူ ၃၆၇၅ ဦးရှိပြီး ထိခိုက်ဒဏ်ရာရရှိသူ ၅၀၂၀ ဦးနှင့် ပျောက်ဆုံးနေသူ ၁၄၁ ဦးရှိသည်။

ထို့နောက် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ စာသင်ကျောင်းများ၊ ဆေးရုံများ၊ ဆက်သွယ်ရေးကွန်ရက်များ၊ လျှပ်စစ်ဓာတ်အား ဖြန့်ဖြူး ရေး ကွန်ရက်များ ပြိုကျပျက်စီးခဲ့သည်။

ထို့ကြောင့် ပြည်သူလူထုများသည် ငလျင်ဘေးသင့်ကာ အိုးမဲ့အိမ်မဲ့ဘဝရောက်၍ လမ်းပေါ်များတွင် အိပ်နေကြရ သလို တချို့ကလည်း ငလျင်စိုးရိမ်မှုကြောင့် နေအိမ်များကနေ ထွက်ခွာပြီး လမ်းမနှင့်ကွင်းပြင်များမှာ နေထိုင်နေ ကြရသည်။

ဤအခြေအနေများကြောင့် စံချိန်စံနှုန်းများ ပြည့်မီအောင် မဆောက်ဘဲ ကိုယ်ကျိုးအတွက် ကြည့်၍ အထပ်မြင့် အဆောက်အဦများ ဆောက်လုပ်နေသည့် ကန်ထရိုက်တာများနှင့် အရည်အသွေး မမှီသည်ကို သိလျှက်နှင့်ခွင့်ပြု ပေးနေသော ဌာနဆိုင်ရာများကို ထိထိရောက်ရောက် အရေးယူပေးရန် ပြည်သူလူထုက တောင်းဆိုလျက်ရှိသည်။