CNI News

၂၀၂၅ ခုနှစ်၊ နိုဝင်ဘာ ၂၁

မကြာခင် မြန်မာနိုင်ငံတွင် ကျင်းပမည့် ရွေးကောက်ပွဲ၌ အနိုင်ရရှိသော ပါတီတစ်ခုတည်းက အစိုးရဖွဲ့ခြင်းထက် ပါတီအသီးသီးမှ တော်သည့်လူပုဂ္ဂိုလ် အသီးသီးကို စုစည်း၍ ညီညွတ်‌ရေးအစိုးရပုံစံသွားသင့်ကြောင်း နိုင်ငံရေးလေ့ လာသုံးသပ်သူ ဦးထက်အောင်ကျော်က CNI သတင်းဌာနသို့ ပြောသည်။

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ရွေးကောက်ပွဲ အပိုင်း(၁) အနေဖြင့် မြို့နယ် ၁၀၂ မြို့နယ်မှာ ကျင်းပမည် ဖြစ်သည်။

ထို့နောက် ရွေးကောက်ပွဲ အပိုင်း(၂)အား ၂၀၂၆ ခုနှစ်၊ ဇန်နဝါရီ ၁၁ ရက်တွင် မြို့နယ် ၁၀၀ မှာ ကျင်းပမည်ဖြစ်ပြီး ဇန်နဝါရီလ နောက်ဆုံးအပတ်မှာတော့ ရွေးကောက်ပွဲ အပိုင်း(၃)ကို ကျင်းပမည်ဖြစ်သည်။

အနိုင်ရသည့်ပါတီမှ အစိုးရဖွဲ့သွားခြင်းထက် ပါတီအသီးသီးက တော်သည့်သူများ စုစည်းပြီး ညီညွတ်ရေးအစိုးရ ပုံစံမျိုး နိုင်ခဲ့သည့်ပါတီက လုပ်ပေးလျှင် တစ်မျိုးစဥ်းစား၍ရကြောင်း နိုင်ငံရေးလေ့လာသုံးသပ်သူ ဦးထက်အောင် ကျော်က CNI သတင်းဌာနသို့ ပြောသည်။

၎င်းက “မဲဘယ်လောက် လာပေးအောင် လူထုကို ဘယ်လောက်အထိ လှုံ့ဆော်နိုင်မလဲပေါ့။ လူထုကို လှုံ့ဆော်နိုင် တယ်၊ မဲများများ လာပေးတယ် ဆိုလို့ရှိရင် ဒါအတိုက်အခံ ပါတီတွေ ပိုပြီးတော့မှ နိုင်ဖို့ ဒါမျိုးလေး မျှော်လင့်လို့ရ တယ်။ အဲ့ဒီပေါ်မှာ မူတည်ပြီးတော့မှပဲ ဘာဖြစ်မလဲ၊ ဘယ်လောက်ထိ လုပ်လို့ရသလဲဆိုတဲ့ဟာကို ဆက်ပြီး မျှော် လင့်လို့ ရမှာပေါ့။ တစ်ခုတော့ရှိတယ် လက်ရှိ ဒီအတိုင်း ဆိုလို့ရှိရင် ဒါတိုင်းပြည်ရဲ့ အကျပ်အတည်းကပဲ ပြောင်း စရာရှိတော့ အနိုင်ရတဲ့ ပါတီတစ်ခုထဲ အနေနဲ့ အစိုးရဖွဲ့သွားတာမျိုး ထက်စာလို့ရှိရင် ပါတီအသီးသီးက တော်တဲ့လူ တွေကို စုစည်းပြီးတော့မှ ညီညွတ်ရေးပေါ့နော်။  ညီညွတ်ရေးအစိုးရ ပုံစံမျိုး လုပ်ပြီးတော့မှ တိုင်းပြည်ရဲ့ ဘက်က နေ အားလုံး ဝိုင်းဝန်းဖြေရှင်းကြမယ်ဆိုတဲ့ ပုံသဏ္ဍာန်မျိုးကို နိုင်ခဲ့တဲ့ပါတီက လုပ်ပေးတယ်ဆိုရင်တော့ ဒါ တစ်မျိုး စဥ်းစားလို့ ရတယ်”ဟု ပြောသည်။

နိုင်ငံရေးပါတီ ခေါင်းဆောင် တချို့ကို တွေ့ရစဉ်

လက်ရှိ မြန်မာနိုင်ငံတွင် ကျင်းပရန် စီစဉ်နေသော ရွေးကောက်ပွဲ၌ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP)က နိုင်ငံရေး အခြေအနေနှင့် ဥပဒေလမ်းကြောင်းများအရ အသာစီးကနေ ရရှိနေကြောင်း၊ အစိုးရအဖွဲ့ သစ်ကို USDP နှင့် မြန်မာ့တပ်မတော်က ဦးဆောင် ဖွဲ့စည်းသွားနိုင်ကြောင်း နိုင်ငံရေးလေ့လာစောင့်ကြည့်သူ များက ထောက်ပြကြသည်။

ထို့ကြောင့် ရွေးကောက်ပွဲတွင် အနိုင်ရရှိသည့် ပါတီအနေဖြင့် မြန်မာနိုင်ငံ၏ နိုင်ငံရေး အကျပ်အတည်းနှင့် လက်နက်ကိုင် ပဋိပက္ခများ အပါအဝင် နိုင်ငံတကာ ပိတ်ဆို့အရေးယူမှုများကို ကျော်လွှားနိုင်ရန်အတွက် အမျိုးသားညီညွတ်ရေးအစိုးရပုံစံမျိုး ဖွဲ့စည်းသင့်ကြောင်း ၎င်းတို့က အကြံပြုလျက်ရှိနေသည်။

ပြည်သူ့အသံ များများပြောပေးနိုင်သည့် လွှတ်တော်ကိုယ်စားလှယ်လောင်းများ ပြည်သူ့ကိုယ်စားပြု ပြောပေးနိုင် မည့် လွှတ်တော်ကိုယ်စားလှယ်များ လွှတ်တော်ထဲ များများရောက်သွားရန် လိုအပ်ကြောင်း တိုင်းလိုင်(ရှမ်းနီ) အ မျိုးသားများ ဖွံ့ဖြိုးတိုးတက်ရေးပါတီ(TNDP)မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ နိုင်ငံရေးခေါင်းဆောင်များကို တွေ့ရစဉ်

၎င်းက “အခုလက်ရှိ အခြေအနေထက်ကတော့ အများကြီး ကောင်းလာမယ်လို့ ကျနော်မြင်ပါတယ်။ ဘာကြောင့် လဲဆိုတော့ ခုရွေးကောက်ပွဲ နည်းဗျူဟာလည်း နိုင်ငံတကာကအတိုင်း ရွေးကောက်ပွဲ လေ့လာရေးတွေ ဖိတ်ခေါ် ထားတယ်၊ ရွေးကောက်ပွဲက လုပ်တဲ့စနစ်တွေ ရှိ/မရှိ လွတ်လပ်၍ တရားမျှတသော ရွေးကောက်ပွဲ ရှိ/မရှိ လာ ရောက် စောင့်ကြည့်ဖို့ပေါ့။ အဲ့အခါကြတော့ ရွေးကောက်ပွဲ ပြီးသွားပြီဆိုရင်တော့ လူထုတင်မြှောက်တဲ့ အစိုးရ တစ်ရပ် ဖြစ်နိုင်တယ်။ လွှတ်တော် ပေါ်လာပြီဆိုရင် ပြည်သူတွေရဲ့ အသံတွေကို ကျနော်တို့ ပြောနိုင်မှာ ဖြစ်ပါ တယ်။ ယနေ့ အချိန်ကတော့ ပြည်သူ့အသံတွေ ပျောက်နေတာ ၅ နှစ်ရှိပါပြီ။ လွှတ်တော်ပေါ်လာရင် ပြည်သူ့အသံ တွေ ပေါ်လာမယ်၊ ပြည်သူ့အသံတွေ ပေါ်လာပြီဆိုရင်တော့ ကျနော်တို့တွေ အနေနဲ့ ပြည်သူတွေရဲ့ ထောက်ခံမှုနဲ့ လွှတ်တော်ထဲမှာ များများပြောနိုင်ပြီဆိုရင် နိုင်ငံတော်က တဖြေးဖြေးနဲ့ တည်ငြိမ် အေးချမ်းလာမယ်လို့တော့ ကျနော် မြင်တယ်။ ပြည်သူ့အသံ များများထွက်နိုင်အောင်ဆိုရင် ပြည်သူကို ကိုယ်စားပြု ပြောပေးနိုင်မယ့် လွှတ်တော်ကိုယ်စားလှယ်တွေ လွှတ်တော်ထဲ များများရောက်သွားဖို့ လိုအပ်ပါတယ်၊ အဲ့တာမှပဲ ပြည်သူ့အသံ အစစ်အမှန်တွေ ကြားရမှာ ဖြစ်ပါတယ်။ ဘယ်သူက ပြည်သူ့အသံ များများ ဖတ်ပေးနိုင်လဲ ဆိုတာ စဥ်းစားချင့်ချိန် တိုင်ပင်ဆွေးနွေးပြီးမှ ရင်ဆိုင်ကျော်လွှားနိုင်မယ်လို့ မြင်ပါတယ်”ဟု ပြောသည်။

ပြည်သူလူထုသည် ရွေးကောက်ပွဲ ဝင်ရောက် ယှဥ်ပြိုင်ကြမည့် နိုင်ငံရေးပါတီများနှင့် ကိုယ်စားလှယ်လောင်များကို သေချာစိစစ်ရွေးချယ်ရန် လိုအပ်ကြောင်း၊ ပြည်သူအကျိုး၊ နိုင်ငံအကျိုးကို တကယ် လုပ်ဆောင်မည့် ကိုယ်စား လှယ်လောင်းနှင့် နိုင်ငံရေးပါတီများအား ရွေးချယ်ရန် လိုအပ်သည်ဟု နိုင်ငံရေးလေ့လာစောင့်ကြည့်သူများက အကြံပြုကြသည်။

CNI News

၂၀၂၅ ခုနှစ်၊ နိုဝင်ဘာ ၂၁ 

လာမည့် ရွေးကောက်ပွဲသည် တိုင်းပြည်၏ အလှည့်အပြောင်းဖြစ်မည့် ရွေးကောက်ပွဲဟု နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ နိုဝင်ဘာ ၂၀ ရက်က ကျင်းပခဲ့သော ၂၀၂၄ ခုနှစ်အတွက် အမျိုးသားစာပေ တစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆု ဆုနှင်း သဘင် အခမ်းအနားမှာ ၎င်းက ပြောကြားလိုက်ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “နိုင်ငံတော်အစိုးရက နိုင်ငံရေး တည်ငြိမ်ရေးနှင့် ရွေးကောက်ပွဲများ စနစ်တကျ အောင်မြင်အောင် ကျင်းပနိုင်ရေး ကြိုးပမ်းဆောင်ရွက်နေချိန်တွင် ပြည်သူများ အနေဖြင့်လည်း တိုင်းပြည်၏ အလှည့်အပြောင်းဟု ဆိုရမည့် ရွေးကောက်ပွဲများ အောင်မြင်စွာ ကျင်းပနိုင်ရေးအတွက် အမျိုးသားရေးတာဝန် အဖြစ် ပါဝင်ကူညီပေးကြရန်နှင့် မိမိတို့ နိုင်ငံသား အချင်းချင်း စည်းလုံးညီညွတ်မှု၊ စိတ်ရှည်သည်းခံမှုနှင့် ပိုမို ကောင်းမွန်သည့် အနာဂတ်ကို မျှော်တွေးကြိုးပမ်းကြရန် တိုက်တွန်းလိုသည်”ဟု ပြောသည်။

ရွေးကောက်ပွဲကို အပိုင်းလိုက် တစ်ဆက်တည်း ကျင်းပသွားမည်ဖြစ်ပြီး အကြောင်းအမျိုးမျိုးကြောင့် ရွေးကောက် ပွဲ မပြုလုပ်နိုင်သည့် မြို့နယ်များကိုလည်း ကျင်းပနိုင်သည့် အချိန်တွင် ဆက်လက် ဆောင်ရွက်သွားမည်ဖြစ် ကြောင်း၊ ရွေးကောက်ပွဲကာလ နီးကပ်လာသည့်နှင့်အမျှ နိုင်ငံတည်ငြိမ်အေးချမ်းမှုရှိရန်လည်း အဓိကကျကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ နိုင်ငံတော်၏ အမျိုးသားအကျိုးစီးပွားကို အလေးထားပြီး စစ်မှန်စည်းကမ်း ပြည့်ဝသည့် ပါတီစုံဒီမိုကရေစီစနစ်ကို အကောင်အထည်ဖော်ရာတွင် ပြည်ထောင်စုကြီး အဘက်ဘက်က ဖွံ့ဖြိုး တိုးတက်ရေး၊ ပြည်တွင်းငြိမ်းချမ်းရေး၊ ပြည်သူတို့၏ လူမှုစီးပွားဘဝ စဉ်ဆက်မပြတ် ဖွံ့ဖြိုးတိုးတက်ရေး စသည်တို့ နှင့်အတူ ပါတီစုံဒီမိုကရေစီ အထွေထွေရွေးကောက်ပွဲ လုပ်ငန်းစဉ်များ အောင်မြင်ရေးတို့အတွက် ပြည်သူလူထု၏ ပူးပေါင်းပါဝင်မှုသည် အလွန်အရေးကြီးကြောင်း၊ မိမိတို့ ပြည်သူအားလုံး ဒီမိုကရေစီ အလေ့အထကောင်းများ ရရှိ အောင်၊ အသိဥာဏ်ပညာများ ပြည့်ဝအောင်၊ ခေတ်မီ ဗဟုသုတများ ဆည်းပူးနိုင်အောင် စာပေဖြင့် ထိန်းကျောင်း လေ့ကျင့်ပေးရမည်”ဟု ပြောသည်။

မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ရွေးကောက်ပွဲ အပိုင်း(၁)ကို မြို့နယ် ၁၀၂ မြို့နယ်မှာ ကျင်းပမည် ဖြစ်ပြီး ၂၀၂၆ ခုနှစ်၊ ဇန်နဝါရီ ၁၁ ရက်မှာတော့ ရွေးကောက်ပွဲ အပိုင်း(၂)အား မြို့နယ် ၁၀၀ မြို့နယ်မှာ ကျင်းပမည် ဖြစ်သည်။

ထို့နောက် ရွေးကောက်ပွဲ အပိုင်း(၃)အား ၂၀၂၆ ခုနှစ်၊ ဇန်နဝါရီလ နောက်ဆုံးအပတ်မှာ ကျင်းပမည်ဖြစ်သည်။

လက်ရှိ ကျင်းပမည့် ‌ရွေးကောက်ပွဲတွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)က ပြိုင်ဘက်ကောင်း မရှိသည့်အတွက် ရွေးကောက်ပွဲအနိုင်ရပြီး အစိုးရဖွဲ့ရန် အရေးသာနေကြောင်း၊ ထို့ကြောင့် ရွေးကောက်ပွဲအလွန် အစိုးရသစ်သည် လက်ရှိ စုဖွဲ့မှုနှင့်မူဝါဒအတိုင်း သွားမည်ဆိုပါက တိုင်းပြည်အပြောင်းအလဲမှာ သိပ်မျှော်လင့်၍ မရကြောင်း နိုင်ငံရေးလေ့လာစောင့်ကြည့်သူများက ထောက်ပြကြသည်။

မြန်မာနိုင်ငံတွင် လက်ရှိဖြစ်ပေါ်နေသော နိုင်ငံရေးအကျပ်အတည်းနှင့် လက်နက်ကိုင် ပဋိပက္ခများ ချုပ်ငြိမ်းရေး အပါအဝင် နိုင်ငံတကာ စီးပွားရေး ပိတ်ဆို့မှု လွတ်ကင်းရေး၊ လူမှုဘဝ ဖွံ့ဖြိုးတိုးတက်ရေးအတွက် အပြောင်းအလဲ ဖြစ်ဖို့အတွက် ရွေးကောက်ပွဲအလွန် အစိုးရသစ်သည် အမျိုးသားညီညွတ်ရေးအစိုးရကို ဖွဲ့စည်းရန်လိုအပ်သည်ဟု ၎င်းတို့က ထောက်ပြကြသည်။

CNI News

၂၀၂၅ ခုနှစ်၊ နိုဝင်ဘာ ၂၁

အနိုင်ရသည့် ပါတီနှင့် ကိုယ်စားလှယ်လောင်း စာရင်းများအား ရွေးကောက်ပွဲ အပိုင်းအားလုံးပြီးမှသာ ကြေညာ မည်ဖြစ်ကြောင်း ကရင်အမျိုးသားဒီမိုကရက်တစ်ပါတီ (KNDP) မှ ဥက္ကဋ္ဌ ဦးမန်းအောင်ပြည်စိုးက CNI သတင်းဌာန သို့ ပြောသည်။

၎င်းက “မကြေညာဘူး။ မေးထားပြီးပြီ အဲဒါကတော့။ မကြေညာသေးဘူး။ အကုန်လုံးပြီးမှပဲ ကြေညာမယ်လို့ ပြောတယ်။ အန်ကယ်တို့ အပိုင်း (၁)၊ အပိုင်း (၂)၊ အပိုင်း (၃) ပါရှိရင် အပိုင်း (၃) အကုန်လုံးပြီးမှ အနိုင်ရသူကို ကြေညာမယ်လို့ ပြောတယ်။ အားလုံးပေါ့ ရွေးကောက်ပွဲလုပ်နိုင်မယ့် အနေအထားမျိုးပေါ့။ ဥပမာ အပိုင်း (၂) နဲ့ပဲ တော်လိုက်ပြီဆိုရင်တော့ ဆက်ပြီးတော့ အပိုင်း (၃) မလာတော့ဘူးဆိုရင်တော့ ကြေညာလိုက်မယ်ဆိုတဲ့ သဘော မျိုးပေါ့။ အပိုင်း (၃) ဆက်လုပ်ဖို့ ရှိသေးတယ်ဆိုရင်တော့ အပိုင်း (၃) ပြီးမှပဲ ကြေညာမှာပေါ့” ဟု ပြောသည်။

လက်ရှိတွင် ပါတီစုံဒီမိုက‌‌ရေစီအထွေထွေရွေးကောက်ပွဲကို အပိုင်း (၃) ပိုင်းဖြင့် ကျင်းပမည်ဟု အမျိုးသား ကာကွယ်ရေးနှင့် လုံခြုံရေးကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောထား သည်။

ရွေးကောက်ပွဲ မဲပေးစက်ကို တွေ့ရစဉ်

ရွေးကောက်ပွဲ အပိုင်း (၁) ကို ၂၀၂၅ ခုနှစ်၊ ဒီဇင်ဘာလ ၂၈ ရက်နေ့ စတင်ကျင်းပမည်ဖြစ်ပြီး ၂၀၂၆ ခုနှစ်၊ ဇန်နဝါရီ ၁၁ ရက်နေ့တွင် အပိုင်း (၂) ကို ကျင်းပမည်ဖြစ်သည်။

ထို့နောက် ရွေးကောက်ပွဲ အပိုင်း (၂) ကျင်းပပြီး နှစ်ပတ်အကြာတွင် အပိုင်း (၃) အား ကျင်းပသွားမည်ဟု အမျိုး သားကာကွယ်ရေးနှင့် လုံခြုံရေးကောင်စီ သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက နိုဝင်ဘာလ (၁၀) ရက်တွင် ထုတ်ပြန် ပြောကြားထားသည်။

လက်နက်ကိုင်ပဋိပက္ခများ ကြီးမားကျယ်ပြန့်နေသည့် လက်ရှိ မြန်မာ့နိုင်ငံရေး အခင်းအကျင်းတွင် ပြည်မပါတီ ကြီးများထက် တိုင်းရင်းသားပါတီများသည် ရွေးကောက်ပွဲ မဲဆွယ်စည်းရုံးရေးကာလ၌ အခက်အခဲများစွာကို ရင်ဆိုင်နေရကြောင်း သိရသည်။

ကရင်အမျိုးသားဒီမိုကရက်တစ်ပါတီ အနေဖြင့် အာဏာရခြင်းထက် တိုင်းရင်းသားများ၏ အခွင့်အရေးများ၊ ကိုယ်ပိုင်ပြဋ္ဌာန်းခွင့်များနှင့်ပတ်သက်၍ လွှတ်တော်ထဲတွင် ပြောဆိုနိုင်ခွင့် ရရှိစေရန် ရွေးကောက်ပွဲ ဝင်ရခြင်း ဖြစ်ကြောင်း KNDP ပါတီ ဥက္ကဋ္ဌ ဦးမန်းအောင်ပြည်စိုးက CNI သတင်းဌာနသို့ ပြောသည်။

နိုင်ငံရေးပါတီများနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

၎င်းက “ရွေးကောက်ပွဲကတော့ ကျနော်တို့က ပါတီတော့ ပါတီငယ်ပဲ။ ဒါပေမယ့် ကျနော်တို့ကို ဖိအားပေးတဲ့ အပိုင်းပေါ့။ ခုနက ရွေးကောက်ပွဲ မဝင်နဲ့ ဘာညာ အဲဒီလိုတော့ ရှိတယ်။ ကျနော်တို့ ပါတီထောင်ကတည်းကိုက ကျနော်တို့ရဲ့ တိုင်းရင်းသားတွေအတွက် ပြောရေးဆိုခွင့်၊ ပြောပိုင်ဆိုပိုင်ခွင့် လွှတ်တော်မှာ ရရှိအောင် စဉ်းစားထား တယ်။ ဆိုတော့ အဲဒီလိုရည်ရွယ်တဲ့ အလျောက် ပါတီထောင်လိုက်တယ်။ ပါတီထောင်ပြီးမှတော့ ရွေးကောက်ပွဲဝင် ရတော့မယ်။ ရွေးကောက်ပွဲ မဝင်ဘဲနဲ့ ပါတီထောင်တာဟာ အလကားပဲပေါ့နော်။ ဆိုတော့ ကျ‌နော်တို့ပြောချင် တာက ရွေးကောက်ပွဲ ဝင်လိုက်တာဟာ အာဏာရဖို့ထက်ကို အာဏာမရချင်လို့တော့ မပြောဘူး။ အာဏာလည်း ရချင်တယ်၊ အာဏာရဖို့ထက်ကို ခုနက ပြောရေးဆိုခွင့်၊ ပြောနိုင်ဆိုနိုင်၊ တိုင်းရင်းသားတွေရဲ့ ရပိုင်ခွင့်၊ တန်းတူ ညီမျှပိုင်ခွင့်ပေါ့၊ လွတ်လပ်ခြင်း၊ ညီမျှခြင်း၊ တန်းတူခြင်း၊ ကိုယ်ပိုင်ပြဋ္ဌာန်းခွင့်ရှိခြင်း ဆိုတဲ့ဟာတွေ ရရှိအောင် ကျနော်တို့ လွှတ်တော်မှာ ပြောနိုင် ဆိုနိုင်ခွင့်၊ ပြောပိုင် ဆိုပိုင်ခွင့်ရအောင် ရွေးကောက်ပွဲ ဝင်ရခြင်းဖြစ်တယ်၊ ပါတီ ထောင်ရခြင်း ဖြစ်တယ်ဆိုတာကိုတော့ သက်ဆိုင်သူတွေ အားလုံးကို ပြောချင်ပါတယ်” ဟု ပြောသည်။

နယ်မြေအခြေအနေများကြောင့် ပါတီကြီးများ အနေဖြင့် မဲဆွယ်စည်းရုံးရေး၊ ကိုယ်စားလှယ်လောင်း ဆိုင်းဘုတ် များ စိုက်ထူခြင်းတို့ကို ကောင်းမွန်စွာ ပြုလုပ်နိုင်သည်ကို တွေ့ရသည်။

သို့သော် အချို့သော တိုင်းရင်းသား ပြည်နယ်များတွင် ဝင်ရောက် ယှဉ်ပြိုင်မည့် တိုင်းရင်းသားပါတီများ အနေဖြင့် လက်နက်ကိုင်တပ်ဖွဲ့များ၏ ကန့်ကွက်မှုများအကြား ယနေ့အထိ မည်သည့် လှုပ်ရှားမှုမျိုးမှ ကောင်းမွန်စွာ မပြု လုပ်နိုင် ကြသေးကြောင်းလည်း သိရသည်။

CNI News

၂၀၂၅ ခုနှစ်၊ နိုဝင်ဘာ ၂၀

ရှမ်းပြည်သားများ၊ ရှမ်းလူမျိုးများက အမိမြေရှမ်းပြည်ကို ကာကွယ်စောင့်ရှောက်ခြင်း မပြုပါက လူမျိုးခြားအပိုင် ဖြစ်သွားလိမ့်မည်ဟု ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီးယွက်စစ်က ပြော သည်။

၂၀၂၅ ခုနှစ်၊ နိုဝင်ဘာ ၁၉ ရက်က ကျရောက်ခဲ့သော ၂၁၂၀ ပြည့်နှစ် ရှမ်းနှစ်သစ်ကူးနေ့သို့ ပေးပို့သော သဝဏ်လွှာ တွင် ၎င်းက ပြောကြားခဲ့ခြင်းဖြစ်သည်။

ဗိုလ်ချုပ်ကြီးယွက်စစ်က “ရှမ်းပြည်သူများ၊ ရှမ်းလူမျိုးများတို့က အမိမြေ ရှမ်းပြည်ကို ချစ်မြတ်နိုးခြင်း၊ ကာကွယ် စောင့်ရှောက်ခြင်းတို့ မပြုပါက မိမိတို့ရဲ့သားမေး စဉ်ဆက် လက်ထက်မှာ တိုင်းခြားပြည်ခြား လူမျိုးများက ရှမ်း ပြည်အတွင်း ဝင်ရောက်နေထိုင်ပြီး မိမိတို့ ပိုင်ဆိုင်တဲ့ နယ်မြေသည်လည်း လူမျိုးခြားတို့ရဲ့ အပိုင်ဖြစ်သွား ပါလိမ့် မယ်။ အဲဒီလို ဖြစ်သွားပါက ရှမ်းပြည်သားတို့ရဲ့ ဘဝဟာ နိမ့်ကျရုံတင်မကဘဲ မျက်နှာငယ်ပြီး အခြားနေရာ၊ အခြား တိုင်းပြည်ထံမှာ သွားရောက် ခိုလုံနေထိုင် လုပ်ကိုင်စားသောက်ရမှာ ဖြစ်ပါတယ်”ဟု ပြောသည်။

ထို့ကြောင့် မိမိတို့ သမိုင်းကို ချစ်ပါ၊ မိမိတို့ အမိမြေ တိုင်းပြည်ကို မြတ်နိုးပါ၊ မိမိတို့ အိမ်ယာပစ္စည်းဥစ္စာများ၊ လယ်ယာခြံမြေများကို ထိန်းသိမ်းခြင်းအားဖြင့် အမိမြေ ရှမ်းပြည်ကို ဝိုင်းဝန်း ကာကွယ်စောင့်ရှောက်ပေးကြပါဟု ၎င်းက တိုက်တွန်းခဲ့သည်။

ဗိုလ်ချုပ်ကြီးယွက်စစ်က “ မည်သည့်အခါမှ မပြောင်းလဲနိုင် မရွှေ့ပြောင်းနိုင်တာက အမိတိုင်းပြည်ရဲ့ နယ်မြေပဲ ဖြစ်ပါတယ်။ မိမိတို့ ရှမ်းပြည်ဟာ ဘုရင်များ၊ စော်ဘွားများက ခေတ်အဆက်ဆက် အုပ်စိုးတဲ့ တိုင်းပြည်ဖြစ်ပါ တယ်။ ရှမ်းပြည်ဟာ ရှမ်းပြည်သား အားလုံးက ပိုင်ဆိုင်တဲ့ တိုင်းပြည်ဖြစ်ပါတယ်။ ထို့ကြောင့် ရှမ်းပြည်သား အားလုံး အနေနဲ့ အနာဂတ်မှာ ရေရှည်တည်တံ့ခိုင်မြဲတဲ့ တိုင်းပြည်ဖြစ်ဖို့အတွက် အမိမြေ ရှမ်းပြည်ကို စုပေါင်း ကာကွယ်စောင့်ရှောက်ရမှာ ဖြစ်ပါတယ်”ဟု ပြောသည်။

ရှမ်းနှစ်သစ်ကူးပွဲတော် ကျင်းပနေစဉ်

ရှမ်းပြည်နယ်တွင် RCSS၊ ရှမ်းပြည်တိုးတက်ရေးပါတီ(SSPP/SSA)၊ အမျိုးသားဒီမိုကရေစီမဟာမိတ်တပ်မတော်- မိုင်းလား(NDAA)၊ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)၊ “ဝ”ပြည်သွေးစည်းညီညွတ် ရေးတပ်မတော်(UWSA)၊ တအာင်းအမျိုးသားလွတ်မြောက်ရေးတပ်မတော်(TNLA)၊ ကချင်လွတ်လပ်ရေးတပ် မတော်(KIA)၊ အာရက္ခတပ်တော်(AA)၊ ပြည်သူ့ကာကွယ်ရေးတပ်ဖွဲ့(PDF)များ၊ ပြည်သူ့စစ်တပ်ဖွဲ့များ စသည့် လက်နက်ကိုင်များ လှုပ်ရှားလျက်ရှိသည်။

ထို့ကြောင့် လက်နက်ကိုင် အဖွဲ့အချင်းချင်းကြားလည်းကောင်း၊ လက်နက်ကိုင်အဖွဲ့များနှင့် မြန်မာ့တပ်မ‌တော် ကြား လည်းကောင်း တိုက်ပွဲများ ဖြစ်ပွားလျက်ရှိပြီ နေရပ်စွန့်ခွာ ထွက်ပြေးတိမ်းရှောင်နေကြရသူများလည်း သိန်းနှင့်ချီရှိသည်။

အလားတူ ရှမ်းပြည်နယ်အတွင်းရှိ သံယဇာတများကိုလည်း လက်နက်ကိုင် အင်အားစုများနှင့် စီးပွားရေး လုပ်ငန်း ရှင်များ ပူးပေါင်း၍ တူးဖော်ရောင်းချလျက်ရှိသည်။

CNI News

၂၀၂၅ ခုနှစ်၊ နိုဝင်ဘာ ၂၀

နိုင်ငံ‌ရေးပါတီများသည် လက်နက်ကိုင် ပဋိပက္ခကြားတွင် ရှင်သန်အောင် ကြိုးစားနေရကြောင်း ရခိုင့်ဦးဆောင် ပါတီ (AFP)မှ ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

လက်ရှိ မြန်မာနိုင်ငံ တစ်ဝန်းတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ ပြင်းထန် စွာ ဖြစ်ပွားနေပြီး နိုင်ငံရေးပါတီများကိုလည်း ရွေးကောက်ပွဲ ပူးပေါင်းဆောင်ရွက်မှု မလုပ်ရန် လက်နက်ကိုင် အင်အားစုများက သတိပေးထားသည်။

မိမိတို့ နိုင်ငံရေးပါတီများသည် လက်နက်ကိုင်ပဋိပက္ခများကြား ရှင်သန်အောင် ကြိုးစားနေရကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

 စိုင်းဋ္ဌေးအောင်ကို တွေ့ရစဉ်

၎င်းက “ရွေးကောက်ပွဲ မတိုင်ခင်ကာလ ပြဿနာပေါင်းစုံရှိတာကို အထူးသဖြင့် ရခိုင်ဒေသသည် စစ်ဘေးဒုက္ခ သည်များ လက်ရှိကာလမှာ တကယ် များများစားစားရှိတဲ့ ဒေသမှာပါတာကို ဒါကြောင့် စစ်ပြေးရှောင်နေတဲ့ အင်အားစုတွေ အများစု ပါတယ်၊ အဲ့တာကြောင့် တွေ့ဆုံတာတို့ တည်ငြိမ်အေးချမ်းတဲ့ နေရာတွေမှာ လုပ်တာတို့ ဘာတို့က နည်းတယ် အထူးသဖြင့် ပြည်မကိုရောက်တဲ့ ဒုက္ခသည်တွေ ကြားထဲမှာတောင်မှ နိုင်ငံရေးပါတီ မှတ်ပုံတင်ခြင်း ဥပဒေအရဆို သွားရောက် တွေ့ဆုံ စည်းရုံး၊ စုရုံးခြင်းပေါ့ဗျာ။ ဆွေးနွေးခြင်းတို့ ဘာတို့လုပ်လို့ ရခြင်း မရခြင်းဆိုတဲ့ အပိုင်းတွေ ဖွင့်ဆိုဖို့ခက်ပါတယ်။ ကျနော်တို့ ပါတီစည်းရုံးရေးလုပ်တဲ့ကဏ္ဍက အဲ့ဒီမှာ နိုင်ငံ ရေးအရ လက်နက်ကိုင်ပဋိပက္ခကြားမှာ ရှင်သန်အောင် ကြိုးစားရတာပေါ့။ ကျန်တဲ့အပိုင်းကတော့ စာသင်ကျောင်း တွေက အစအကုန်လုံး တော်တော်လေးကို နောက်ပြန် ဆုတ်သွားတာပေါ့”ဟု ပြောသည်။
တခြားတစ်ဖက်မှာတော့ လက်နက်ကိုင် အဖွဲ့အစည်းများနှင့် နွေဦးတော်လှန်ရေး အင်အားစုများက မြန်မာနိုင်ငံ တွင် ကျင်းပမည့် ရွေးကောက်ပွဲအား မပျက်ပျက်အောင် ဖျက်မည်ဟု ကြွေးကြော်ထားသလို ရွေးကောက်ပွဲ ပူး ပေါင်း ပါဝင်သူများကိုလည်း အရေးယူသွားမည်ဟု ထုတ်ပြန်ထားသည်။

ယခု လက်ရှိကာလတွင် နိုင်ငံရေးပါတီများ စွန့်စားရမှာဖြစ်ပြီး လက်နက်ကိုင် အဖွဲ့အစည်းများအား ထိပ်တိုက် မတွေ့ရန် အရေးကြီးကြောင်းလည်း တိုင်းလိုင်(ရှမ်းနီ)အမျိုးသားများ ဖွံ့ဖြိုးတိုးတက်ရေးပါတီ (TNDP) ဥက္ကဋ္ဌ စိုင်းဋ္ဌေးအောင် က CNI သတင်းဌာနသို့ ပြောသည်။

လက်နက်ကိုင်ထားသူ တစ်ဦးကို တွေ့ရစဉ် 

၎င်းက “ဒါလက်နက်ကိုင် များလာတဲ့ အခါကြတော့ စစ်ဘောင်ကျယ်လာတယ်၊ အခုနိုင်ငံရေးဘောင် ကျယ်အောင် ကတော့ စွန့်စားရပါလိမ့်မယ်။ နိုင်ငံရေးဘောင်ကျယ်မှ ပြည်သူလူထုရဲ့ လုပ်ကိုင်စား သောက်မှု ဘဝလုံခြုံရေးတွေက အားလုံး အာမခံချက်ရှိမှာ။ ဒါကြောင့် ယနေ့ ကျနော်တို့ နိုင်ငံရေးသမားတွေက တော့ မြန်မာနိုင်ငံရဲ့ သမိုင်းပေး တာဝန်လို့လည်း ပြောလို့ရတာပေါ့။ နိုင်ငံရေးဘောင် ကျယ်အောင်တော့ စွန့်စား ပြီးမှ အလုပ်လုပ်ကြရမယ်လို့ မြင်တယ်။ အဓိကတော့  information ပေါ့နော် ပါတီဆိုတာလည်း ပြည်သူ့ကြားထဲ ပေါက်ဖွားလာခဲ့တာဆိုတဲ့ အခါကြတော့ သတင်းစကားတွေ ကျနော်တို့ information ရဖို့ လက်ဦးမှု ရဖို့တော့ လိုတာပေါ့။  ဥပမာဆိုရင်တော့ ကျနော် ၂ ရက်နေ့မှာ ပြန်တော့မယ်ဆိုတဲ့ အခါကြတော့ မြစ်ကြီးနားကို ကျ‌နော် ပြန်မယ်ဆိုတော့ ကျနော်တို့ ပါတီကလည်း ပါတီစည်းရုံးရေး စာမျက်နှာမှာ UEC ကို တင်ပြထားတာ ရှိပါတယ်။ အဲ့မှာ ကျ‌နော် ပြန်မယ့်နေ့မှာပဲ မြစ်ကြီးနားနဲ့ မရမ်းကြားထဲမှာ KIA က စစ်ကြောင်းတစ်ကြောင်းကို တာဝန် ပေးထားတယ်ဆိုတဲ့အကြောင်း လက်ပံတန်းက PDF တွေ နောက်ပြီးတော့ နတ်မောက်,နန့်ဆန်က PDF တွေကို KIA က လက်နက် တပ်ဆင်ပေးထားတယ်ဆိုတဲ့ အကြောင်းတွေ သတင်းပို့လာတာပေါ့နော်။ ဒါပေမယ့်လည်း အလုပ်တစ်ခုကို သူတို့လုပ်ဖို့အတွက်ကို ပြင်နေပြီဆိုတဲ့ အကြောင်းလေးကို သတင်းပို့လာတဲ့ အခါကြတော့ ကျနော့် အနေနဲ့ ဆင်ခြင်ပြီးမှ အလုပ်လုပ်ရတာပေါ့။ ဘာလို့ဆို လက်နက်ကိုင် အဖွဲ့အစည်းကို ကျနော်တို့ ထိပ်တိုက် မတွေ့ဖို့တော့ အရေးကြီးပါတယ်။ ယနေ့ လောလောဆယ် နိုင်ငံရေးပါတီတွေကတော့ စွန့်စားရပါ လိမ့်မယ်၊ ဒါပေမယ့် သတိဝိရိယရှိစွာနဲ့ အလုပ်လုပ်ရမှာ ဖြစ်တယ်လို့ ပြောချင်တယ်”ဟု ပြောသည်။

မြန်မာနိုင်ငံတွင် လက်နက်ကိုင်ပဋိပက္ခ ဖြစ်ပွားလာခဲ့သည်မှာ ၁၉၄၈ ခုနှစ် လွတ်လပ်ရေး ရပြီးနောက်ပိုင်းက တည်းကနေ ယနေ့အချိန်ထိ ဖြစ်သည်။

လက်ရှိ အချိန်ထိ မြန်မာနိုင်ငံတွင် တည်ရှိနေသော လက်နက်ကိုင် အင်အားစုများ လျှော့ချရေးနှင့် ပပျောက်ရေး အတွက် ဆောင်ရွက်နိုင်သော နည်းလမ်းနှင့် အဖြေကို ရှာမတွေ့သေးပေ။

အဆိုပါ အခြေအနေများကြားမှာပဲ နိုင်ငံရေးပါတီများသည် ၂၀၂၅ ခုနှစ်၊ ဒီဇင်ဘာ ၂၈ ရက်တွင် ကျင်းပမည့် ရွေးကောက်ပွဲအား ဝင်ရောက် ယှဉ်ပြိုင်ရန် ပြင်ဆင်နေကြသည်။

CNI News

၂၀၂၅ခုနှစ်၊ နိုဝင်ဘာ ၂၀

မြန်မာနိုင်ငံ ငြိမ်းချမ်း‌ရေးရရှိအောင် နိုင်ငံတော်အစိုးရ-တပ်မတော်နှင့် လက်နက်ကိုင်အဖွဲ့အစည်းများကြား ဘယ်လို နိုင်ငံရေးနည်းလမ်းဖြင့် ဆောင်ရွက်သင့်သလဲ ဆိုသည့်အပေါ် စစ်ရေးနှင့်နိုင်ငံရေးအကဲခတ်များက မေးခွန်းထုတ်လျက်ရှိသည်။ 

လူမှုစီးပွားဘဝ ဖွံ့ဖြိုးတိုးတက်ရေးအတွက် အခြေခံ လိုအပ်ချက်များစွာ ရှိနေသည့်အတွက် ငြိမ်းချမ်းရေး ရရှိ‌ရေး နှင့် တိုင်းရင်းသား စည်းလုံးညီညွတ်ရေးသည် အရေးကြီးကြောင်း၊ ငြိမ်းချမ်းရေး ရရှိရေးအတွက် နိုင်ငံရေး နည်းလမ်းဖြင့် ဆောင်ရွက်ရန် လိုအပ်ကြောင်း NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားထား သည်။ 

ငြိမ်းချမ်းရေး ဆောင်ရွက်ရာတွင် ပဋိပက္ခ၏အခြေခံ အကြောင်းတရားများဖြစ်သည့် နိုင်ငံရေး ခံယူချက်များ၊ သမိုင်းနောက်ခံ အဖြစ်အပျက်များ၊ ဝါဒရေးရာ အငြင်းပွားမှုများ ထည့်မစဥ်းစားသရွေ့ ငြိမ်းချမ်းရေးဖြစ်စဥ် အလုပ်မဖြစ်နိုင်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

KNU ဥက္ကဋ္ဌဟောင်း ‌စောမူတူးစေးဖိုးနဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

နိုင်ငံရေးနည်းလမ်းဆိုသည်မှာ ငြိမ်းချမ်းရေး ရရှိရေးအတွက် ပြည်တွင်း အုပ်ချုပ်ရေးကို ပို၍ကောင်းမွန်လာအောင် လုပ်ဆောင်ပြီး ပြည်သူလူထု ထောက်ခံမှုရ‌အောင် ကြိုးစားရန်လိုကြောင်း နိုင်ငံရေးလေ့လာသုံးသပ်သူ ဒေါက်တာ‌ အောင်မျိုးမှ CNI သတင်းဌာနသို့ ပြောသည်။ 

၎င်းက “နိုင်ငံရေးနည်းလမ်းက တစ်ယောက်နဲ့တစ်ယောက် ကျနော်တို့က စားပွဲဝိုင်းမှာ ဆွေးနွေးပြီးတော့ ကျနော် တို့က အပေးအယူ လုပ်စရာရှိ လုပ်တယ်ပေါ့၊ ဘာပဲပြောပြော သူတို့လည်း အခုဆိုလို့ရှိရင် ကိုးကန့်ဆိုလည်း သူတို့ ဒေသမှာ သူတို့နေဖို့ အစိုးရက ဘာပဲပြောပြော၊ မူအားဖြင့်တော့ ခွင့်ပြုထားတယ် ဆိုတဲ့သဘော တပ်မတော်က ရှိသွားပြီပဲလေ။ ဒါသူတို့ ကျေနပ်တော့‌ပေါ့။ မကျေနပ်ပဲနဲ့ အခုလို ထပ်ပြီးတော့ ဆက်လုပ်လာမယ်ဆိုရင်တော့ တစ်နေ့ကျလို့ရှိရင်တော့ ပြည်သူလူထုရဲ့ တပ်နဲ့ပြည်သူလူထုက သွေးစည်းသွားတယ်ဆိုရင်တော့ အဆော်ခံရမှာ ပေါ့နော်၊ ဒီလိုပဲပြောရမှာပေါ့။ ပြည်တွင်းရဲ့ အုပ်ချုပ်ရေးကို ကောင်းသထက် ကောင်းအောင် လုပ်ပြီးတော့ ကျနော် တို့က လူထုထောက်ခံမှုရအောင် လုပ်ရမယ်ပေါ့။ ဒါက မကြာခင် ရလာမှာပဲလေ နောက်ပေါ်လာမယ့် အစိုးရက မကြာတော့ဘူးလေ ဒီမိုကရေစီအစိုးရ ပေါ်လာလို့ရှိရင် ဒီအခြေအနေကောင်းတွေ ရလာမှာ‌ပေါ့” ဟု ပြောသည်။

ငြိမ်းချမ်းရေး လုပ်ငန်းစဥ်များကို လုပ်ဆောင်ကြသည့် နေရာတွင် အယူအဆ အမျိုးမျိုး၊ အတွေးအခေါ် အမျိုးမျိုး၊ ကြိုးပမ်းဆောင်ရွက်မှု အမျိုးမျိုးရှိကြောင်း နိုင်ငံရေးလေ့လာစောင့်ကြည့်သူများကလည်းက ထောက်ပြကြသည်။ 

 လက်နက်ကိုင်၊ နိုင်ငံရေးပါတီ၊ စစ်ဘက် ခေါင်းဆောင်များကို တွေ့ရစဉ်

ငြိမ်းချမ်း‌ရေး ရရှိရန်အတွက် နိုင်ငံတော်အစိုးရနှင့် လက်နက်ကိုင် အဖွဲ့အစည်းတို့သည် ဆွေးနွေး ညှိနှိုင်းမှုများကို ကြိမ်ဖန်များစွာ လုပ်သင့်ကြောင်း၊ ထိုသို့ တစ်ဖက်နှင့်တစ်ဖက် ပေါင်းစပ်ညှိနှိုင်းမှုများ လုပ်ဆောင်ရင်းမှ ငြိမ်းချမ်း ရေး ဖြစ်ပေါ်လာမည်ဟု ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)၏ ပြောရေးဆိုခွင့်သူ ဦးသိန်းထွန်းဦးမှ CNI သတင်းဌာနသို့ ပြောသည်။ 

၎င်းက “ကျနော်တို့ တွေ့ဆုံဆွေးနွေးမှုတွေ ဆောင်ရွက်မယ်၊ ဒါနိုင်ငံတော်ကလည်းပဲ အခု ဆောင်ရွက်နေတဲ့ လုပ်ငန်းစဥ်တွေ ရှိတယ်ပေါ့။ အဲ့လို တွေ့ဆုံဆွေးနွေးမှုတွေမှာ တစ်ဖက်ကလည်းပဲ ဖြစ်နိုင်ခြေကို ပြောမယ်၊ တစ်ဖက်ကလည်းပဲ လိုက်လျောနိုင်သမျှ လိုက်လျောမယ်ဆိုတဲ့ ပေါင်းစပ်ညှိနှိုင်း ဆောင်ရွက်မှုမျိုးကို ကြိမ်ဖန် များစွာ လုပ်ရင်းလုပ်ရင်း ကနေပြီးတော့ ဒီငြိမ်းချမ်းရေး ကျနော်တို့ဆီကို ရောက်သွားမယ်။ အဲ့လို ရောက်သွားတဲ့ အခါမှာလည်းပဲ ဒီလိုအခြေအနေမျိုးတွေ အဆင်‌ပြေလာပြီ ဆိုလို့ရှိရင် အဲဒီအဖွဲ့အစည်း တွေကနေပြီး တော့ပေါ့ နော် လက်နက်ကိုင် အဖွဲ့အစည်းတွေ ကနေပြီးတော့ ငြိမ်းချမ်းရေး ရယူပြီးတဲ့အခါမှာ ကျနော်တို့ နိုင်ငံတော်ကနေ ပြီးတော့ ကျင်းပပြုလုပ်နေတဲ့ ရွေးကောက်ပွဲတွေမှာ ပါဝင်ယှဥ်ပြိုင်ပြီးတော့ ၎င်းတို့ ဒေသကနေပြီးတော့ ကိုယ်စား လှယ်တွေ ပေါ်ထွန်းလာမယ်။ အဲ့ပေါ်ထွန်းလာတဲ့ ကိုယ်စားလှယ်ကနေတဆင့် ကျနော်တို့ ပြည်သူ့အကျိုး၊ တိုင်းပြည်အကျိုးကို ဆောင်ရွက် သွားနိုင်လိမ့်မယ်။ ဆိုလိုတာကတော့ ပေါင်းစပ်ညှိနှိုင်းမှုတွေ လုပ်ရင်းလုပ်ရင်း ကနေ ဒီငြိမ်းချမ်းရေးဆိုတာ ဖြစ်ပေါ်လာမှာ ဖြစ်ပါတယ်” ဟု ပြောသည်။ 

လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများအကြား တိုက်ပွဲများ အပြင်းအထန် ဖြစ်ပွားနေပြီး ငြိမ်းချမ်း‌ရေး လုပ်ငန်းစဥ်များလည်း အကောင်အထည် မဖော်နိုင်ဘဲ ဖြစ်နေသည်။ 

မြန်မာနိုင်ငံတွင် ဖြစ်ပွားနေသော ပြည်တွင်းစစ်သည် ၁၉၄၇ ခုနှစ်၊ ဇန်နဝါရီ ၄ ရက်နေ့ လွတ်လပ်ရေး ရပြီး ကတည်းကနေ ယနေ့အချိန်ထိ ဖြစ်သည်။

CNI News

၂၀၂၅ ခုနှစ်၊ နိုဝင်ဘာ ၂၀

ရှမ်းနီအမျိုးသားများတပ်မတော် (SNA) အနေဖြင့် စစ်ကိုင်းတိုင်းဒေသကြီး အထက်ပိုင်းရှိ ဗန်းမောက်မြို့ကို ပြန်လည်ထိုးစစ်ဆင်နိုင်ရေးအတွက် ဘယ်လို အခက်အခဲများ ရှိနေလဲဆိုသည့်အပေါ် စစ်ရေးနှင့်နိုင်ငံရေး အကဲခတ်များကြား သုံးသပ်မှုများ ရှိနေကြသည်။

ဗန်းမောက်မြို့ကို KIA-PDF-ကဒူး ပူးပေါင်းတပ်ဖွဲ့များက ၂၀၂၅ ခုနှစ်၊ စက်တင်ဘာ ၁၅ ရက်က ထိုးစစ်ဆင် တိုက်ခိုက်ခဲ့ပြီး စက်တင်ဘာ ၂၀ ရက်တွင် သိမ်းပိုက်ခဲ့သည်။

SNA ဘက်မှ ဗန်းမောက်မြို့ ပြန်လည်ရရှိရေးကို ထိုးစစ်ဆင် တိုက်ခိုက်မှုများ လက်ရှိတွင် ငြိမ်သက်နေခြင်းသည် လက်နက်ခဲယမ်းများ အားနည်းခြင်းကြောင့်ဖြစ်နိုင်ကြောင်း တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေး ပါတီ(TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

စစ်ကိုင်းတိုင်းဒေသကြီး၌ KIA ၏ နယ်မြေစိုးမှု ကျယ်ပြန့်လာနိုင်ဖွယ် ရှိ၊ မရှိသည် SNA ၏ စွမ်းဆောင်ရည် အပေါ်တွင် မူတည်နေကြောင်း ၎င်းက ပြောသည်။

စိုင်းဋ္ဌေးအောင်က “သိရသလောက်ပေါ့လေ။ ဗန်းမောက်မှာက သိရသလောက်တော့ SNA ဘက်က ကိုင်ဆောင် ထားတဲ့ လက်နက်တွေပေါ့နော်။ အားနည်းတယ်လို့တော့ ကျနော် သိရတာပေါ့။ နောက်တစ်ခုက သူတို့က အင်းတော်မှာ ရသွားတဲ့ jumper တွေဘာတွေက အင်မတန်မှ ကောင်းတယ်လို့ ပြောတယ်။ တပ်မတော်ဘက်က jumper တွေ။ နောက် ဒရုန်းတွေက အဲဒီ jumper တွေကို မကျော်နိုင်တဲ့ အခါကြတော့ ဗန်းမောက်မှာ စစ်ရေး လှုပ်ရှားမှုက ရပ်တန့်နေသလို ဖြစ်တာပေါ့။ ဗန်းမောက်ရဲ့ အနီးအနား နားယကားဆိုရင် ဗန်းမောက်နဲ့ တစ်မိုင် လောက်ပဲ ဝေးတော့တာ။ အဲဒီကိုတော့ ရောက်ရှိနေပေမယ့် ဗန်းမောက်ကို မြို့သိမ်းဖို့ အတွက်ကတော့ နည်းနည်း အခက်အခဲ ရှိနေတာပေါ့။ နောက်တစ်ချက်က ဗန်းမောက်မှာ ကျနော်တို့ ရှမ်းနီတွေ များတဲ့အခါကြတော့ သူတို့ အတင်းတိုးလိုက်ရင် ပြည်သူတွေရဲ့ အိုးအိမ်တွေ မီးလောင်ပျက်စီးမှာလည်း ထိန်းထိန်းသိမ်းသိမ်း လုပ်နေရတဲ့ အပိုင်းတွေလည်း ရှိတဲ့အတွက်ကြောင့်မို့လို့ စစ်ရေးရပ်တန့်ထားတယ်လို့တော့ ကျနော် မြင်မိတယ်။ စစ်ပွဲကတော့ ကြာရင်တော့ သိပ်မကောင်းဘူး။ ဒါပေမယ့် စစ်ပွဲဆိုတာကတော့ တိုက်ပြီဆိုရင်တော့ မြန်မြန်ဆန်ဆန် ပြီးပြတ် သွားတာကတော့ လူထုထိခိုက်မှု အနည်းဆုံးနဲ့ ပြီးပြတ်တာ အကောင်းဆုံးပေ့ါလေ။ KIA ရဲ့ နယ်မြေစိုးမိုးမှု ရှိမှု၊ မရှိမှုဆိုတာက SNA ရဲ့ စွမ်းဆောင်မှုလည်း ပါတာပေါ့။ ရှမ်းနီအမျိုးသားတပ်မတော်က ရှိနေတဲ့အခါကြတော့ သူ့အနေနဲ့ စစ်နိုင်အောင် တိုက်နိုင်ရင်တော့ KIA နယ်မြေစိုးမိုးမှုက ကျုံ့သွားနိုင်မယ်။ နိုင်အောင် မတိုက်နိုင်ဘူး ဆိုရင် KIA ကတော့ နယ်မြေ ကျယ်လာမှာပေါ့” ဟု ပြောသည်။

ဗန်းမောက်မြို့ကို သိမ်းပိုက်ခဲ့တဲ့ KIA-PDF- ကဒူး ပူးပေါင်းတပ်ဖွဲ့ကို‌ တွေ့ရစဉ်

SNA သည် စစ်ကိုင်းတိုင်းဒေသကြီး အလယ်ပိုင်းကနေ အထက်ပိုင်းအထိ လှုပ်ရှားနေသော ရှမ်းနီ လက်နက်ကိုင် အဖွဲ့ ဖြစ်သည်။

SNA အနေဖြင့် ဗန်းမောက်မြို့ကို မိမိမြို့အဖြစ် ခံယူထားသည့်အတွက် ၎င်းအဖွဲ့ အားပြန်သာလာသည့်အခါတွင် ပြန်လည်တိုက်ခိုက်မည့် အနေအထားရှိကြောင်း နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။

၎င်းက “ဒါက သမိုင်းအရ ကြည့်ရလို့ရှိရင်တော့ လူမျိုးရေးက ရှမ်းနီနဲ့ KIA က ပြဿနာက တောက်လျှောက် တက် လာနေတယ်။ အဲဒါက တကယ့်ကို စေတနာမှန်နဲ့ မဖြေရှင်းလို့ရှိရင် လူမျိုးရေး ပြဿနာကတော့ ပိုပြီး ကြီးလာနိုင် တဲ့ အလားအလာရှိတယ်။ အခုအခြေအနေက ရှမ်းနီကလည်း အတော်အသင့် အင်အားရှိလာနေ တယ်လေ။ အဲဒီ ဒေသဘက်ကတော့ တစ်ဖက်ကလည်း KIA ဦးဆောင်တဲ့ PDF တွေ၊ တော်လှန်ရေးတပ်တွေနဲ့ ပူးပေါင်းပြီးတော့မှ တိုက်ပွဲဆင်နွှဲနေတယ်ဆိုတော့ အလားအလာကတော့ လျော့ကျမယ့်ပုံတော့ မပေါ်ပါဘူး။ စစ်ကောင်စီနဲ့ တိုက်ပွဲ ဖြစ်နေသရွေ့ SNA နဲ့လည်း အဲဒီဒေသဘက်မှာ KIA နဲ့ PDF တွေနဲ့ တိုက်ပွဲက ဆက်တိုက် ရှိနေဦးမှာပဲ။ အဖက်ဖက် တိုက်နေတာက ဒီတိုက်ပွဲဆိုတဲ့ဟာက သာတဲ့အချိန်ဘက်ကတော့ ဝင်သိမ်းတယ်။ နောက်ဆုတ်တယ်၊ ပြန်တိုက် တယ်။ အဲဒါ သဘာဝပဲလို့တော့ မြင်မိတယ်။ ဘာပဲဖြစ်ဖြစ် ဗန်းမောက်က SNA က သူ့ရဲ့မြို့ဆိုတော့ သူက အဲဒီလို မျိုး ခံယူထားတော့ သူအားပြန်သာတဲ့ ရက်ကတော့ သူပြန်တိုက်မယ့် အနေအထားတော့ ရှိတာပေါ့နော်။ ဒါပေမယ့် လက်ရှိ အနေအထားကတော့ ဘယ်လောက် လုပ်နိုင်မယ်ဆိုတဲ့ အဆင့်ကတော့ ပြောရတော့ ခက်တာပေါ့” ဟု ပြောသည်။

ရှမ်းနီအမျိုးသားများတပ်မတော်(SNA)ကို တွေ့ရစဉ် 

KIA ဦးဆောင်သည့် ပူးပေါင်းတပ်ဖွဲ့သည် ဗန်းမော်၌ မြန်မာ့တပ်မတော်နှင့် စစ်ရေးပြင်းထန်ပြီး ရှုံးနိမ့်နေချိန်တွင် ဗန်းမောက်မြို့သို့ ၂၀၂၅ ခုနှစ်၊ စက်တင်ဘာ ၁၅ ရက်၌ စတင် တိုက်ခိုက်ကာ စက်တင်ဘာ ၂၀ ရက်မှာ သိမ်းပိုက် နိုင်ခဲ့သည်။ 

အဆိုပါ တိုက်ပွဲများကြောင့် ဗန်းမောက်မြို့အနီးရှိ ကျေးရွာများမှ ကဒူးလူမျိုးများသည် ရှမ်းနီအမျိုးသားများတပ် မတော်(SNA) ထိန်းချုပ်ထားသော ဗန်းမောက်မြို့ အနောက်ခြမ်းသို့ ထွက်ပြေး တိမ်းရှောင်လာခဲ့ကြသည်။

ဗန်းမောက်မြို့တွင် ရှမ်းနီလူမျိုး အများဆုံးနေထိုင်ပြီး ဒုတိယအများဆုံးမှာ ကဒူးလူမျိုးများ ဖြစ်ကြသည်။

KIA အနေဖြင့် ဗန်းမောက်ကို ရရှိသွားသည့်အတွက် စစ်ကိုင်းတိုင်းအထက်ပိုင်းအား ရိက္ခာ၊ လူ၊ လက်နက် ပို့ဆောင်ရန် အဆင်ပြေသွားကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

လက်ရှိတွင် SNA တပ်ဖွဲ့သည် ဗန်းမောက်မြို့ အနောက်ဘက်ခြမ်းကို ထိန်းချုပ်ထားပြီး ဗန်းမောက်မြို့ရှိ တစ်မိုင် အကွာမှာ ရောက်ရှိကာ ပြန်လည် သိမ်းပိုက်ရေး ကြိုးပမ်းနေကြောင်း သိရသည်။

CNI News

၂၀၂၅ ခုနှစ်၊ နိုဝင်ဘာ ၁၉

မြန်မာနိုင်ငံဆိုင်ရာ အိန္ဒိယသံရုံးသည် တိုင်းရင်းသား လက်နက်ကိုင်များ၊ နိုင်ငံရေးပါတီများ၊ နိုင်ငံရေးသမားများနှင့် NSPNC မှ ကိုယ်စားလှယ်များကို ဖိတ်ကြား၍ ဖက်ဒရယ်ရေးရာ အလုပ်ရုံ ဆွေးနွေးပွဲကို ၂၀၂၅ ခုနှစ်၊ နိုဝင်ဘာ ၁၈ ရက်က ကျင်းပခဲ့ကြောင်း သံရုံးက ထုတ်ပြန်ခဲ့သည်။

အဆိုပါ အလုပ်ရုံ ဆွေးနွေးပွဲသို့ နိုင်ငံရေးပါတီများဘက်မှ ဦးကိုကိုကြီး၊ စိုင်းဋ္ဌေးအောင်၊ ဦးခင်မောင်စိုး၊ ဒေါ်သန်းသန်းနု၊ ဒေါက်တာအေးမောင်၊ ဒေါ်နန့်ခင်အေးဦး၊ ဦးဘရှိန်၊ နိုင်တလညီ၊ ဦးခင်မောင်စိုး၊ ဦးသက်ဇော် တို့တက်‌ရောက်ခဲ့သည်။

ထို့နောက် တစ်သီးပုဂ္ဂလ နိုင်ငံရေးသမားများ အနေဖြင့် ဦးထက်အောင်ကျော်၊ ဒေါ်စန္ဒာမင်း၊ ဒေါက်တာအောင်မျိုး၊ ဦးအန်ကောလ၊ ဒေါက်တာညိုညိုသင်းတို့ တက်ရောက်ခဲ့ပြီး EAOs များကတော့ ရဲဘော်မျိုးဝင်း၊ ဗိုလ်မှူးကြီး စောကျော်ညွန့်၊ ဗိုလ်မှူးကြီးစောကျော်သန်းဋ္ဌေး၊ နိုင်အောင်မငေး၊ နန်းယဉ်ယဉ်စိုးတို့ တက်ရောက်ခဲ့သည်။

 ၂၀၂၅ ခုနှစ်၊ နိုဝင်ဘာ ၁၈ ရက်က အိန္ဒိယသံရုံးမှာ ကျင်းပသည့် ဖက်ဒရယ်အလုပ်ရုံ ဆွေးနွေးပွဲကို တွေ့ရစဉ်

အလားတူ အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်ရေး ညှိနှိုင်းရေးကော်မတီ(NSPNC)ဘက်မှ အဖွဲ့ဝင် ဗိုလ်ချုပ်စိုးနိုင်ဦး(ငြိမ်း) တက်ရောက်ခဲ့သလို တပ်မတော်မှ အငြိမ်းစား အရာရှိကြီးများဖြစ်သည့် ဒုတိယ ဗိုလ်ချုပ်ကြီး ခင်ဇော်ဦးနှင့် ဒုတိယဗိုလ်ချုပ်ကြီး မြင့်စိုးတို့လည်း တက်ရောက်ခဲ့ကြသည်။

ထို့ပြင် CPR မှ ဦးလှမောင်ရွှေနှင့် ငြိမ်းချမ်းရေး လုပ်ငန်းစဉ်တွင် ပါဝင်ခဲ့သူ ဦးအောင်နိုင်ဦးတို့လည်း တက်ရောက် ခဲ့သည်။

အိန္ဒိယနိုင်ငံဘက်ကမူ အိန္ဒိယသံအမတ်ကြီး Mr.Abhay Thakur၊ အာသံရိုင်ဖယ်တပ်ဖွဲ့ ညွှန်ကြားရေးမှူးချုပ် ဟောင်း Mr.Pradeep Nair၊ Asian Confluence ၏ အမှုဆောင် ဒါရိုက်တာ Mr. Sabyasachi Dutta နှင့် India Foundation မှ Ms. Rami Desai တို့ တက်ရောက်၍ ဦးဆောင်ကာ အပြန်အလှန် ဆွေးနွေးခဲ့ကြသည်။

အဆိုပါ ဖက်ဒရယ်ရေးရာ အလုပ်ရုံဆွေးနွေးပွဲတွင် အိန္ဒိယသည် အရှေ့မြောက်ဒေသ အခြေအနေနှင့် နာဂ လက်နက်ကိုင်များ အခြေအနေကို ချပြ ဆွေးနွေးခဲ့ကြောင်း သိရသည်။

CNI News

၂၀၂၅ ခုနှစ်၊ နိုဝင်ဘာ ၁၉

စစ်ကိုင်းတိုင်းဒေသကြီးအထက်ပိုင်း၊ ဗန်းမောက်မြို့နယ်၊ မံစီကြီးဒေသစိတ်မှာ မဟာရှမ်းနှစ်(၂၁၁၉)မှ (၂၁၂၀)သို့ အကူးအပြောင်းပွဲတော် ရှမ်းနှစ်သစ်ကူးပွဲကို ၂၀၂၅ ခုနှစ်၊ နိုဝင်ဘာ ၁၉ ရက် ကျင်းပခဲ့ကြသည်။

အဆိုပါ ရှမ်းနှစ်သစ်ကူးပွဲတော် ကျင်းပသည့် မံစီကြီးဒေသစိတ်ကို ရှမ်းနီအမျိုးသားများတပ်မတော်(SNA)က ထိန်းချုပ်ထားပြီး လုံခြုံရေးဆောင်ရွက် ပေးလျက်ရှိသည်။

ဗန်းမောက်မြို့ အပါအဝင် ဗန်းမောက်မြို့၏ တောင်-မြောက်-အရှေ့ စသည့် နယ်မြေများကို KIA-PDF- ကဒူး စသည့် ပူးပေါင်းတပ်ဖွဲ့များက ထိန်းချုပ်ထားသည်။

KIA-PDF- ကဒူး ပူးပေါင်းတပ်ဖွဲ့သည် ဗန်းမောက်မြို့ကို ၂၀၂၅ ခုနှစ်၊ စက်တင်ဘာ ၁၅ ရက်က ထိုးစစ်ဆင် တိုက်ခိုက်ခဲ့ပြီး စက်တင်ဘာ ၂၀ ရက်မှာ သိမ်းပိုက်ခဲ့သည်။

ထို့နောက် SNA က ဗန်းမောက်မြို့ကို ပြန်လည် သိမ်းပိုက်နိုင်ရန်အတွက် ထိုးစစ်ဆင်လျက်ရှိပြီး ဗန်းမောက်မြို့နှင့် တစ်မိုင်အကွာသို့ ရောက်ရှိလာကြောင်း ဒေသခံများက ပြောသည်။

လက်ရှိတွင် SNA နှင့် KIA-PDF- ကဒူး ပူးပေါင်းတပ်ဖွဲ့ကြား ဗန်းမောက်မြို့နယ်အတွင်းမှာ နေ့စဉ် တိုက်ပွဲများ ဖြစ်ပွားလျက်ရှိသည်။

အဆိုပါ တိုက်ပွဲများ အရှိန်မြင့်နေခြင်းနှင့်အတူ ရှမ်းမျိုးနွယ်စုများသည် ရှမ်းနှစ်သစ်ကူးပွဲတော်ကို ရိုးရာမပျက် ကျင်းပလျက်ရှိသည်။

ထိုရှမ်းနှစ်သစ်ကူးပွဲတော်ကို ကဒူးတိုင်းရင်းသားများကလည်း ပူးပေါင်း ဆင်နွှဲခဲ့သည်။