CNI News

၂၀၂၅ ခုနှစ်၊ ဖေဖော်ဝါရီ ၁၉

မြန်မာ့တပ်မတော်မှ ကစထ(၁)မှူး ဒုဗိုလ်ချုပ်ကြီးကိုကိုဦးနှင့် တအာင်းအမျိုးသားလွတ်မြောက်ရေးတပ်မတော်(TNL A)တို့ တရုတ်နိုင်ငံ၊ ကူမင်းမြို့မှာ တွေ့ဆုံ ဆွေးနွေးခဲ့ရာမှာ သဘောတူညီမှုမရဘဲ ဆွေးနွေးပွဲပြီးဆုံးခဲ့ကြောင်း သိရသည်။

TNLA နှင့် မြန်မာ့တပ်မတော်တို့ တရုတ်နိုင်ငံ၊ ကူမင်းမြို့မှာ ဖေဖော်ဝါရီ ၁၆ ရက်မှ ၁၇ ရက်ထိ နှစ်ရက် ဆွေးနွေးခဲ့ ကြသော်လည်း သဘောတူညီမှု မရဘဲ ဆွေးနွေးပွဲကို အဆုံးသတ်ခဲ့ခြင်းဖြစ်သည်။

TNLA က “နှစ်ဖက်ညှိနှိုင်းဆွေးနွေးမှု ခက်ခဲသည့် အခြေအနေရှိသောကြောင့် သက်ဆိုင်ရာ အဖွဲ့အစည်းများ အကြား ဆွေးနွေးပြင်ဆင်မှုများ ပြုလုပ်ပြီးပါက နောက်ထပ်တစ်ကြိမ် ပြန်လည်တွေ့ဆုံနိုင်ရန် တရုတ်အစိုးရ အထူးကိုယ်စားလှယ် မစ္စတာ တိန့်ရှီကျွင်းက ဦးဆောင်ဆွေးနွေးပြီး တွေ့ဆုံမှုကို အဆုံးသတ်ခဲ့ပါသည်”ဟု ပြော သည်။

ကစထ(၁)မှူး ဒုတိယဗိုလ်ချုပ်ကြီးကိုကိုဦးကို တွေ့ရစဉ်

TNLA သည် ကူမင်းမြို့ ဆွေးနွေးပွဲမှာ အချက် ၃ ချက်ကို တောင်းဆိုခဲ့သည်။

ထိုအချက်များမှာ (၁) နှစ်ဖက်တပ် ရောက်ရှိသည့်နေရာတွင် ရပ်တန့်ထားပြီး အပစ်အခတ်ရပ်စဲရန်၊ (၂) နှစ်ဖက် စလုံး ထိုးစစ်များပြုလုပ်ခြင်း၊ ဒရုန်းဖြင့်တိုက်ခိုက်ခြင်း၊ လက်နက်ကြီးများ ပစ်ခတ်ခြင်း၊ လေယာဉ် ဗုံးကြဲချခြင်း အစရှိသည့် စစ်ရေးလှုပ်ရှားမှုများအားလုံး ရပ်တန့်ရန်၊ (၃) နှစ်ဖက်ထိန်းချုပ်နယ်မြေဒေသများတွင် ဒေသခံပြည်သူ များ စားဝတ်နေရေးနှင့် ဆေးဝါးများ သယ်ဆောင်နိုင်ရန်အတွက် ဖြတ်သန်းသွားလာခွင့်ပြုရန် တို့ဖြစ်သည်။

လက်ရှိတွင် TNLA သည် ရှမ်းပြည်နယ်မြောက်ပိုင်းရှိ နမ့်ဆန်၊ မန်တုံ၊ မိုင်းငေါ့၊ မိုင်းလုံ၊ နမ္မတူ၊ ကျောက်မဲ၊ နောင်ချို၊ သီပေါ၊ ကွတ်ခိုင်၊ နမ့်ခမ်း နှင့် မန္တလေးတိုင်းဒေသကြီးအတွင်းက မိုးကုတ်၊ မိုးမိတ်၊ မဘိမ်းတို့ကို ၁၀၂၇ စစ်ဆင်ရေး အတွင်းမှာ ထိန်းချုပ်ထားသည်။

CNI News

၂၀၂၅ ခုနှစ်၊ ဖေဖော်ဝါရီ ၁၉

မြန်မာနိုင်ငံ၊ ကရင်ပြည်နယ်အတွင်းရှိ ကျားဖြန့်လုပ်ငန်းများမှ ဖမ်းဆီးရမိထားသူများအား ထိန်းသိမ်းစောင့်ရှောက် ရာတွင် အခက်အခဲများရှိကြောင်း ကရင်ပြည်နယ်နယ်ခြားစောင့်တပ်(BGF)၏ သတင်းထုတ်ပြန်ရေး တာဝန်ခံ ဒုတိယဗိုလ်မှူးကြီး နိုင်မောင်ဇော်က CNI သတင်းဌာနသို့ ပြောသည်။

ဖမ်းဆီးရမိထားသည့် လူဦးရေ ထောင်ကျော်ကို ထိန်းသိမ်းထားရခြင်းမှာ တာဝန်ကြီးကြောင်းနှင့် နေရပ်သို့ အမြန်ဆုံး ပြန်ပို့နိုင်မည်ဆိုပါက အခက်အခဲမရှိကြောင်း ၎င်းက ပြောသည်။

ဒုဗိုလ်မှူးကြီးနိုင်‌မောင်ဇော်က “လက်ရှိ အခုပြန်ပို့မယ့် နေရာမှာ ပြန်ပို့ဖို့အတွက် စောင့်ဆိုင်းနေတဲ့ နေရာမှာ မြဝတီမြို့ စည်းကမ်းထိန်းသိမ်းရေးက  လက်ခံရတာကို။ အဲဒီလို လက်ခံတဲ့အခါ ခုနက လူတွေ အရေအတွက် များလာတာနဲ့အမျှ ချက်ပြုတ်ကျွေးမွေးရတာ တစ်နေ့ကို ၃ နပ် ကျွေးတယ်။ နောက်ပြီး ကျန်းမာရေး စောင့်ရှောက် မှုတွေ တချို့တွေ ကျန်းမာရေး မကောင်းဘဲနဲ့ ၉၆ ပါးရောဂါနဲ့ ပါလာတဲ့လူတွေရှိတယ်။ အဲဒီသူတွေကို ကျန်းမာရေး စောင့်ရှောက်မှုတွေ ပေးရတယ်။ အစစ အရာရာပေါ့။ တွေးကြည့်ပေါ့ ကျနော်တို့ လူ ၁၀၀၀ ကျော်ကို နေရာတစ်ခု တည်းမှာ ထားထား ရတယ်ဆိုတာက တော်တော်လေးကို ဝန်ကြီးတယ်လေ။ အခက်အခဲတွေတော့ အများကြီးရှိ တာပေါ့။ လက်ရှိကတော့ ကျနော်တို့ အမြန်ဆုံး ပြန်ပို့နိုင်ရင်တော့လည်း တစ်သုတ်ပြီးတစ်သုတ် အချိန်မကြာဘဲ ပြန်ပို့နိုင်ရင်တော့ ကျနော်တို့အတွက် အခက်အခဲ သိပ်မရှိဘူးပေါ့။ ကျနော်တို့ကတော့ နှိမ်နင်းရေးက လုပ်သွား မှာပဲ။ တစ်ဖက်က ပြန်လည်လက်ခံတဲ့အပေါ်မှာ မူတည်တယ်။ ပြန်လည်လက်ခံတာ စောစောများများ လက်ခံနိုင် ရင် စောစောပြီးသွားမယ်။ ဒီအပေါ်မှာမှ အခက်အခဲတွေက အိမ်နီးချင်းထိုင်းနိုင်ငံနဲ့ ဆက်စပ်မှုမရှိတဲ့ သံရုံးတွေက နိုင်ငံသားတွေဆိုရင်တော့ ပြန်ပို့ဖို့က နည်းနည်း အခက်အခဲရှိတယ်ပေါ့” ဟု ပြောသည်။

တရုတ်ဒုဝန်ကြီး မြဝတီကို ရောက်လာပြီး ကျားဖြန့်လုပ်ငန်းလူတွေကို တွေ့ဆုံစဉ်

ထိုသို့ ပြန်ပို့ရန် အခက်အခဲရှိသည့် နိုင်ငံသားများကိုမူ မြန်မာဘက်အခြမ်းမှ တာဝန်ရှိသူတို့၏ အစီအစဉ်ဖြင့် ပြန်လည်ဆောင်ရွက်ရမည်ဖြစ်ကြောင်း သိရသည်။

လက်ရှိတွင် ဖမ်းဆီးရမိထားသူ ၂၀၀၀ ကျော်ရှိပြီး တစ်ဦးချင်းစီကို စစ်ဆေးမေးမြန်းမှုများ ပြုလုပ်ရာတွင် ထိုင်း ဗီဇာဖြင့် ဝင်ရောက်လာကြသူများ ဖြစ်ကြကြောင်း၊ ထိုထဲတွင် တရုတ်နိုင်ငံသား အများဆုံးဖြစ်ကြောင်း သိရသည်။

ထိုင်းအာဏာပိုင်များမှ ကျားဖြန့်များအား နှိမ်နှင်းရန် မြဝတီမြို့ အပါအဝင် ထိုင်း-မြန်မာနယ်စပ် နေရာ ၅ ခုကို ဖေဖော်ဝါရီ ၅ ရက်နေ့မှ စတင်ကာ လျှပ်စစ်မီး၊ အင်တာနက်နှင့် လောင်စာဆီများ ဖြတ်တောက်ထားသည်။

ထို့‌နောက်၂၀၂၅ ခုနှစ်၊ ဖေဖော်ဝါရီ ၁၂ ရက်နေ့မှ စတင်ကာ မိုဘိုင်းဖုန်း၊ အင်ဗက်တာ၊ ဆိုလာပြား စသည့် လျှပ်စစ်ပစ္စည်းများ အပါအဝင် ထိုင်းနိုင်ငံ၏ ထုတ်ကုန် ၁၂ မျိုးကိုလည်း မြန်မာပြည်ထဲ တင်ပို့ခွင့်ကို ပိတ်ပင်ထား သည်။

ထိုကိစ္စကြောင့် ဒေသခံပြည်သူများ အခက်အခဲဖြစ်နေရသည့်အတွက် တာဝန်ရှိ အကြီးအကဲများအနေဖြင့် ဆွေးနွေးမှုများ ပြုလုပ်နေကြောင်း ကရင်ပြည်နယ်နယ်ခြားစောင့်တပ်(BGF)၏ သတင်းထုတ်ပြန်ရေး တာဝန်ခံ ဒုတိယဗိုလ်မှူးကြီး နိုင်မောင်ဇော်က CNI သတင်းဌာနသို့ ပြောသည်။

ထိုင်း-မြန်မာ-တရုတ် သုံးနိုင်ငံ ဆွေးနွေးနေစဉ်

၎င်းက “အဓိကကတော့ ကျနော်တို့အတွက် မဟုတ်ပါဘူး။ ကျနော်တို့ မြင်နေရတယ် မြေပြင်မှာ ကျနော်တို့ ဒေသမှာ ကျနော်တို့ရှိတဲ့အတွက် ကျနော်တို့ဒေသက ပြည်သူ ကျနော်တို့ချစ်တယ်။ ကျနော်တို့ဒေသက ပြည်သူ တွေ ဒီလိုအခက်အခဲဖြစ်နေရတာ နေ့တိုင်းမြင်နေရတာ အရမ်းဝမ်းနည်းတယ်။ ကျားဖြန့် အရေးနဲ့ပတ်သက်ပြီး ကျနော်တို့ အရှိန်အဟုန်နဲ့လုပ်နေပြီ။ အလုပ်လုပ်ပြနေပြီ။ ပါးစပ်နဲ့ပြောတာ မဟုတ်ဘူး။ လက်တွေ့ အကောင် အထည်ဖော်နေပြီ။ ဒါကိုလည်း အကုန်လုံးသိတာပဲ။ ကျနော်တို့ သေသေချာချာ လုပ်နေတယ်။ ၃ နိုင်ငံတောင်မှ ကျနော်တို့နိုင်ငံထဲမှာ လက်ရှိ မြဝတီမြေပေါ်မှာ နယ်စပ်ပေါ်မှာ ကျနော်ကြုံဖူးတာဆို ဒါပထမဦးဆုံးပဲ။ ထိုင်းနဲ့ မြန်မာနိုင်ငံ ဆွေးနွေးတာကတော့ ခဏခဏ တွေ့ဖူးပါတယ်။ အခုလို ထိပ်ပိုင်း ခေါင်းဆောင်တချို့တွေ ဒီလို လာဆွေးနွေးတာ ပထမဆုံးပဲ။ ဒါက ကျ‌နော်တို့ရဲ့ ပူးပေါင်းဆောင်ရွက်မှုအပေါ်မှာ အကြီးအကဲတွေက အသိအမှတ် ပြုတယ်လို့မှတ်ယူပါတယ်” ဟု ပြောသည်။

လက်ရှိတွင် ဖမ်းဆီးရမိသူများထဲမှာ လူဦးရေ ၁၀၀၀ ‌ကျော်အား နေရပ်ပြန်ပို့ရေးကို လုပ်ဆောင်နေကြောင်း သိရသည်။

ပြီးခဲ့သည့် ဖေဖော်ဝါရီ ၁၇ ရက်နေ့က မြန်မာ-ထိုင်း-တရုတ် ၃ နိုင်ငံမှ အဆင့်မြင့် ကိုယ်စားလှယ်များသည် မြန်မာနိုင်ငံ၊ ကရင်ပြည်နယ်၊မြဝတီမြို့၊ ရွှေကုက္ကိုလ်မြို့နှင့် KK Park နယ်မြေများသို့ သွားရောက်၍ ကျားဖြန့် ဂိုဏ်းများမှလူကုန်ကူးခံထားရသူများကို တွေ့ဆုံခဲ့ကြသည်။

ထို့ပြင် မြန်မာ-ထိုင်းနယ်စပ်ရှိ ရွှေကုက္ကိုလ်နှင့်မြဝတီမြို့များမှ ကျားဖြန့်ဂိုဏ်းများကို နှိမ်နင်းရန် အပါအဝင် လူကုန်ကူး ခံထားရသူများ ကယ်ထုတ်နိုင်ရေးကိုလည်း အစည်းအဝေးပြုလုပ်ခဲ့ကြကြောင်း သိရသည်။

CNI News

၂၀၂၅ ခုနှစ်၊ ဖေဖော်ဝါရီ ၁၉

စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသကို ကချင်လွတ်လပ်‌ရေးတပ်မတော်(KIA) မဝင်ရောက် လာရေးနှင့် မနှောင့်ယှက်ရန် ပြောထားသည်ဟု နာဂအမျိုးသားဆိုရှယ်လစ်ကောင်စီ-ကပ္ပလန်/အန်းမိုင်(NSCN-K/ AM)အဖွဲ့က စာပို့၍ ပြောကြားထားကြောင်း သိရသည်။

NSCN-K/AM အဖွဲ့သည် တည်ငြိမ်နေသော နာဂဒေသကို ဆက်လက်၍ တည်ငြိမ်အေးချမ်းစေရန် ထိန်းသိမ်းလျက် ရှိသလို ဖွံ့ဖြိုးမှု နိမ့်ကျနေခြင်းကိုလည်း ပြန်လည်ကုစားနိုင်ရေးအတွက် မြန်မာ့တပ်မတော်၊ အိန္ဒိယအစိုးရ တို့ဖြင့် ငြိမ်းချမ်းရေး ဆွေးနွေးနေသည်ဟု NSCN-K/AM မှ ငြိမ်းချမ်းရေးဖော်ဆောင်မှုအဖွဲ့ဥက္ကဋ္ဌ ဦးချင်းအောင်က CNI သတင်းဌာနသို့ ပြောသည်။

ဦးချင်းအောင်က “ ဟုတ်ကဲ့ပါ ကျနော်တို့ကတော့ ဘာပဲဖြစ်ဖြစ် လောလောဆယ်ကတော့ ပွင့်ပွင့်လင်းလင်း ပြောရမယ်ဆိုရင် ကျနော်တို့ဒေသမှာ အခု အဖွဲ့အစည်း အများကြီး ရှိနေတဲ့အတွက်ကြောင့်မလို့ သူတို့ အဖွဲ့တွေနဲ့ လည်း ကျနော်တို့ ချိတ်ဆက်နေတယ်။ ကျနော်တို့ KIA ဘာညာကိုလည်း ချိတ်ဆက်ထားတယ်။ သူတို့ကိုလည်းပဲ ကျနော်တို့ကတော့ နာဂဒေသကို လုံးဝ အနှောင့်အယှက်မပေးပါနဲ့ဆိုတဲ့ အတိုင်းအတာကို ကျနော်တို့ ချိတ်ဆက် နေတာရှိတယ်”ဟု ပြောသည်။

KIA – PDF ကိုတွေ့ရစဉ်

NSCN-K/AM သည် KIA ကို စာပို့၍ နာဂဒေသကို မဝင်ရောက်လာရန်နှင့် တည်ငြိမ်မှုပျက်ပြားအောင် မလုပ်ရန် ပြောကြားထားသော်လည်း လူချင်းတွေ့ဆုံ ဆွေးနွေးမှု မလုပ်ရသေးကြောင်း၊ KIA ဘက်ကလည်း တစ်စုံတစ်ရာ အကြောင်းပြန်ကြားမှုမရှိသေးကြောင်း သိရသည်။

KIA သည် နာဂဒေသနှင့် ခန္တီးမြို့နယ်အတွင်းမှာ စစ်ရေးလှုပ်ရှားလျက်ရှိပြီး ၂၀၂၁ ခုနှစ်၊ မေလ ၂၂ ရက် ခန္တီးမြို့နယ် နမ်စီမွန်စခန်းကို တိုက်ခိုက်သိမ်းပိုက်ခဲ့သေးသည်။

နာဂဒေသနှင့် ခန္တီးမြို့နယ်အတွင်းမှာ KIA က စစ်သင်တန်းပေး၍ လက်နက်ခဲယမ်း ထောက်ပံ့ပေးထားသော နာဂ ပြည်သူ့ကာကွယ်ရေးတပ်ဖွဲ့(NPDF)နှင့် အရှေ့နာဂကာကွယ်ရေးတပ်မတော်(ENDA/ENNO)တို့ လှုပ်ရှားကာ တိုက်ပွဲများ ဖော်ဆောင်လျက်ရှိသည်။

ထို့အပြင် နာဂဒေသတွင် NSCN-K/AM ၊ ယုံးအောင်ဦးဆောင်သည့် NSCN-K/YA၊ အိုက်ဇက်ချီရှီဆူနှင့် ဗွီဗား ဦးဆောင်သည့် NSCN-IM၊ ဟန်ရှီရမ်ဆန် ဦးဆောင်သည့် NSCN-HS တို့လည်း အခြေစိုက် လှုပ်ရှားလျက်ရှိသည်။

နာဂဒေကို အေးချမ်းသည့်၊ ငြိမ်းချမ်းသည့် ဒေသအဖြစ် အမြဲထိန်းသိမ်းထားရန် ဒုတိယဝန်ကြီးချုပ်နှင့် ကာကွယ် ရေးဝန်ကြီး ဗိုလ်ချုပ်ကြီးမောင်မောင်အေးက ၂၀၂၅ ခုနှစ်၊ ဇန်နဝါရီ ၁၅ ရက်က နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့မှာ ကျင်းပခဲ့သည့် နာဂရိုးရာ နှစ်သစ်ကူးပွဲတော်သို့ တက်ရောက်စဉ် ပြောကြားထားသည်။

CNI News

၂၀၂၅ ခုနှစ်၊ ဖေဖော်ဝါရီ ၁၈

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC)အား  နစက-က ပြင်ဆင်ဖွဲ့စည်းလိုက်သော်လည်း ငြိမ်းချမ်း‌‌ရေး ဦးတည်ချက်သည် မသွေဖည်သွားကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

နစကသည် အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) အား ပြင်ဆင်ဖွဲ့စည်းလိုက်ကြောင်း ၂၀၂၅ ခုနှစ်၊ ဖေဖော်ဝါရီ ၄ ရက်တွင် ထုတ်ပြန်ခဲ့သည်။

နစကသည် NSPNC အား ပြင်ဆင်ဖွဲ့စည်းလိုက်သော်လည်း အဓိကဦးတည်ချက်ဖြစ်သည့် ငြိမ်းချမ်းရေး လမ်းကြောင်းသည် မသွေဖည်သွားကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

NSPNC ပြင်ဆင်ဖွဲ့စည်းကြောင်း ထုတ်ပြန်ချက်ကို တွေ့ရစဉ်

၎င်းက “နစကလည်းပဲ ခဏခဏ ပြောင်းတာပဲလေ၊ နစက အဖွဲ့ကိုလည်း ပြောင်းတယ်ဗျာ၊ နောက်ဝန်ကြီးတွေ ဌာနတွေလည်း ပြောင်းတယ်၊ ဝန်ကြီးတွေလည်း ပြောင်းတာပဲ၊ အဲတော့ ကျနော် နားလည်တာက NSPNC သည် ငြိမ်းချမ်း‌ရေးနဲ့ပတ်သက်တဲ့ ဗဟိုကော်မတီ၊ လုပ်ငန်းကော်မတီ စသည်ဖြင့်ပေါ့နော်၊ အဲဒီရဲ့ အောက်မှာရှိတဲ့ NSPNC ဖြစ်တာကိုး၊ ဒါပေမယ့် အဓိကဦးတည်ချက်ကတော့ ငြိမ်းချမ်းရေးပါပဲ၊ အမျိုးသားပြန်လည် ရင်ကြားစေ့‌ ရေး၊ ငြိမ်းချမ်းရေး တစ်နည်းအားဖြင့် လက်နက်ကိုင် အဖွဲ့အစည်းတွေနဲ့ တွေ့ဆုံဆွေးနွေးပြီးမှ အထူးသဖြင့် အခြေခံဥပဒေဆိုင်ရာတွေ လက်နက်နဲ့ပတ်သက်တဲ့ DDR-SSR စသည်ဖြင့်ပေါ့ဗျာ၊ အပစ်အခတ်ရပ်မယ်၊ ငြိမ်းချမ်းမှု ဖြစ်စဥ်ယူမယ်၊ အခြေခံဥပဒေဆိုင်ရာ ဆွေးနွေးသဘောတူတဲ့ အချက်အလက်တွေကို ငြိမ်းချမ်းရေးညီလာခံကို တင်မယ်၊ ဒါသူ့ရဲ့ ပင်မလုပ်ငန်းစဥ်အတွင်းမှာ ပါတာပေါ့၊ မူလပင်မ လမ်းကြောင်းကတော့ မသွေဖည်ပါဘူး ဒီတိုင်းပဲ သွားမှာပေါ့၊ လူနဲ့မဆိုင်ဘူးဗျ၊ ရာထူးအရ လူပုဂ္ဂိုလ်ကို နေရာချထားတဲ့ပုံ တွေ့ရပါတယ်၊ လူပုဂ္ဂိုလ်ထက် လေ ရာထူးအရ နေရာချထားပေးတဲ့ပုံ ပေါက်ပါတယ်” ဟု ပြောသည်။

အဆိုပါ ပြင်ဆင်ဖွဲ့စည်းလိုက်သည့် NSPNC တွင် ဥက္ကဋ္ဌအဖြစ် ဒုဗိုလ်ချုပ်ကြီးရာပြည့် (နယ်စပ်‌ရေးရာဝန်ကြီး) က တာဝန်ယူမည်ဖြစ်ပြီး အတွင်းရေးမှူးအဖြစ် ဒုဗိုလ်ချုပ်ကြီးမင်းနိုင်က တာဝန်ယူမည်ဖြစ်သည်။

ထို့နောက် အဖွဲ့ဝင်များအဖြစ် ဗိုလ်ချုပ်အောင်ကျော်ကျော် (ပြည်ထဲရေးဒုဝန်ကြီး)၊ ဒုရဲဗိုလ်ချုပ်ကြီး ဝင်းဇော်မိုး (ရဲချုပ်)၊ ဗိုလ်မှူးကြီး-၁ ဦး (စရဖချုပ်ရုံး)၊ ဗိုလ်မှူးကြီး ဝဏ္ဏအောင် (JMC)၊ ဦးလှမောင်ရွှေ၊ ဒုဗိုလ်ချုပ်ကြီး ဝင်းဗိုလ် ရှိန် (ငြိမ်း)၊ ဒုဗိုလ်ချုပ်ကြီးစိန်ဝင်း (ငြိမ်း)/ မြန်မာနိုင်ငံစစ်မှုထမ်းဟောင်းအဖွဲ့-ဥက္ကဋ္ဌ)၊ ဒုဗိုလ်ချုပ်ကြီး မျိုးသန့်နိုင်၊ ဦးမြင့်ကြိုင်(လူဝင်မှုကြီးကြပ်ရေးနှင့်ပြည်သူ့အင်အားဝန်ကြီး)၊ ဦးခင်မောင်ရီ (သယံဇာတနှင့် သဘာဝပတ်ဝန်း ကျင်ထိန်း သိမ်းရေးဝန်ကြီး)၊ တို့က တာဝန်ယူကြမည်ဖြစ်သည်။

NSPNC ဥက္ကဋ္ဌအဖြစ် တာဝန်ယူခဲ့သော ဒုဗိုလ်ချုပ်ကြီးထွန်းထွန်းနောင် လက်ထက်က နိုင်ငံရေးပါတီများနှင့် တွေ့ဆုံ ဆွေးနွေးစဉ်

နစက-က NSPNC အား ပြင်ဆင်ဖွဲ့စည်းခြင်း အပြီးတွင် ရှေ့လျှောက် ဆွေးနွေးမည့် အရာများ၌ အပြုသဘော ဆောင်သည့် ဆွေးနွေးချက်များ ရလာနိုင်ရန် မျှော်လင့်ကြောင်း အမျိုးသားဒီမိုကရေစီ အင်အားစုပါတီ (NDF) မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

၎င်းက “အဓိက,ကတော့ ဝန်ကြီးအပြောင်းအလဲ ဖြစ်လို့ပေါ့လေ ဒါပါပဲ၊ အပေါ်က ခုနက NSPCC တို့ဘာတို့ NSPWC တို့ ဒါတွေက အပြောင်းအလဲမရှိဘူး၊ အပြောင်းအလဲ မရှိတဲ့အတွက်ကြောင့် ဒီအောက်က တကယ်ကို အကောင်အထည် ဖော်ဆောင်တဲ့ ဟာကလည်း အပေါ်က မူဝါဒတွေ ဘာမှ မပြောင်းတဲ့အတွက်ကြောင့်မို့လို့ သိပ်တော့ ဘာမှအဲအပေါ်မှာ ခက်မယ်လို့ မထင်ဘူးပေါ့နော်၊ ဒီတိုင်းပဲသွားမှာပါ၊ အခုဆိုလို့ရှိရင် ကျနော်တို့က တော့ အဓိက ပတ်သက်ရတဲ့ ကိစ္စကတော့ နိုင်ငံရေးပါတီနဲ့ NSPNC နဲ့အစည်းအဝေးပေါ့၊ အဲအပေါ်မှာ ကျနော်တို့ တောက်လျှောက် ဆွေးနွေးခဲ့ရတဲ့ အနေအထားအရတော့ တော်တော်လေးကို ပျော့ပျော့ပြောင်းပြောင်းနဲ့ တော်တော်ကို အဆင်ပြေပြေ ဆွေးနွေးလို့ ရတယ်ပေါ့လေ၊ အဲဒီအတွက်လည်း အပြုသဘောဆောင်တဲ့ ရလဒ်တွေ တော်တော်များများ ကျနော်တို့ ရခဲ့တယ်ပေါ့၊ ကျနော်တို့ ၄၃ ချက်ပေါ့နော် လက်မှတ်ထိုးပြီးပြီ၊ နောက်ထပ် ဆက် ဆွေးနွေးရမယ့် ဟာတွေလည်း အများကြီး ရှိသေးတယ်ပေါ့၊ ဒီအတိုင်းပဲ ဆက်ပြီးတော့မှ ကျနော်တို့ ကောင်း ကောင်းမွန်မွန်နဲ့ အပြုသဘောဆောင်တဲ့ ဆွေးနွေးချက်တွေ ရလိမ့်မယ်လို့ ကျနော်ကတော့ မျှော်လင့်ပါတယ်” ဟု ပြောသည်။

NSPNC သည် မြန်မာနိုင်ငံ၏ ငြိမ်းချမ်းရေးဆွေးနွေးမှု လုပ်ငန်းများကို တာဝန်ယူ ဆောင်ရွက်ရသော ကော်မတီ ဖြစ်ပြီး အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှုဗဟိုကော်မတီ (NSPCC) မှ ချမှတ်ပေးသော လုပ်ငန်းတာဝန်များကို အကောင်အထည်ဖော်ရသည်။

လက်ရှိတွင် NSPNC သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲ‌ရေးသဘောတူစာချုပ် (NCA) ထိုးထားသည့် တိုင်းရင်းသား လက်နက်ကိုင်အဖွဲ့အစည်းများ၊ နိုင်ငံရေးပါတီများဖြင့် တွေ့ဆုံ၍ ငြိမ်းချမ်းရေးလုပ်ငန်းစဉ်များ အကောင်အထည်ဖော်နိုင်ရေး ဆွေးနွေးလျက်ရှိနေသည်။

CNI News

၂၀၂၅ ခုနှစ်၊ ဖေဖော်ဝါရီ ၁၈

ထိုင်း-မြန်မာနယ်စပ် ကရင်ပြည်နယ်အတွင်းရှိ အွန်လိုင်းငွေလိမ်လုပ်ငန်း(ကျားဖြန့်)များတွင် ကရင်နယ်ခြားစောင့် တပ်(BGF) အနေဖြင့် ရှယ်ယာထည့်ကာ အကျိုးအမြတ် ယူထားခြင်းမရှိကြောင်း BGF ၏ သတင်းထုတ်ပြန်ရေး တာဝန်ခံ ဒုတိယဗိုလ်မှူးကြီး နိုင်မောင်ဇော်က CNI သတင်းဌာနသို့ ပြောသည်။

လက်ရှိ ဖြစ်ပွားနေသည့် ကျားဖြန့်လုပ်ငန်းများတွင် BGF အနေဖြင့် လုံးဝ ပါဝင်ပတ်သက်ခြင်းမရှိဘဲ မြေငှားရမ်းရုံ သာ ဖြစ်ကြောင်း၊ မြေရှင်ဖြစ်နေသည့်အတွက် ကျားဖြန့်လုပ်ငန်းတွင် ပါဝင်သည်ဟု စွပ်စွဲခံရခြင်း ဖြစ်ကြောင်း ၎င်းက ပြောသည်။

ဒုဗိုလ်မှူးကြီးနိုင်မောင်ဇော်က “ကျနော်တို့က မြေငှားတာပဲ။ ဒီအပေါ်မှာ အဆောက်အဦ လာဆောက်တာလည်း တရုတ်နိုင်ငံဘက်က လာဆောက်တယ်။ သူတို့ဘာသာသူတို့ ရင်းနှီးမြှုပ်နှံတယ်။ သူတို့ဘာသာ သူတို့ ဒီအလုပ်တွေ လုပ်တယ်။ ကျနော်တို့က လုံးဝ ပါဝင်ပတ်သက်တာမရှိဘူး။ ကျနော်တို့က မြေငှားသက်သက်ပဲ။ ကျနော်တို့က တော့ လုံးဝ ပတ်သက်ခြင်းမရှိဘူး။ ကျနော်တို့ကိုယ်တိုင် လုပ်ငန်းတွေမှာ ရှယ်ယာထည့်ဝင်ပြီး အကျိုးအမြတ်ယူ နေတာလည်း မရှိဘူး။ ကျနော်တို့က မြေကြီးကိုငှားတယ်။ ဒီအပေါ်မှာ အဆောက်အဦဆောက်တယ် ဒီသဘော တရားပဲ။ ဥပမာ ခြံဝင်းတစ်ခြံကို ငှားလိုက်တယ်။ ဒီအပေါ်မှာ လူတစ်ယောက်က အိမ်ဆောက်တယ်။ အဲဒီအိမ်ပေါ် မှာ မကောင်းမှုလုပ်တာ တစ်ခုခုဆို မြေပိုင်ရှင်နဲ့ ပတ်သက်မှုရှိသလားဆိုတာ ဥပမာပြောပြတာပေါ့။ အဆင်မပြေ တဲ့ လူကတော့လည်း မျိုးစုံစွပ်စွဲ ပြောဆိုနေမှာပဲလေ။ ဒါကတော့ ရှင်းရှင်းပြောရရင် ကျနော်တို့က မြေရှင်ဖြစ်တာ ကို။ မြေရှင်ဖြစ်တော့ အနီးစပ်ဆုံး စွပ်စွဲခံရတာ မဆန်းပါဘူး။ ဒါပေမယ့် ကျနော်တို့ ပထမ ပြောထားပြီးသားပဲ ဒီကိစ္စမှာ လုံးဝ ပါဝင်ပတ်သက်ခြင်းမရှိဘူး” ဟု ပြောသည်။

 ထိုင်းဘက်ကို ကျားဖြန့်ဂိုဏ်းမှ အလုပ်သမားများကို ပို့နေစဉ်

တရုတ်နိုင်ငံခြားရေးဝန်ကြီးဌာန၊ ပြည်သူ့လုံခြုံရေးဝန်ကြီးဌာန ဒုဝန်ကြီး မစ္စတာလျှိုကျုံးရီသည် မြဝတီမြို့သို့ ၂၀၂၅ ခုနှစ်၊ ဖေဖော်ဝါရီ ၁၇ ရက်နေ့ က ရောက်ရှိလာခဲ့သည်။

ထို့နောက် မြန်မာ-ထိုင်းနယ်စပ်ရှိ ရွှေကုက္ကိုလ်နှင့်မြဝတီမြို့များမှ ကျားဖြန့်ဂိုဏ်းများကို နှိမ်နင်းရန် အပါအဝင် လူကုန်ကူး ခံထားရသူများ ကယ်ထုတ်နိုင်ရေးအတွက် ထိုင်း-တရုတ်-မြန်မာ သုံးနိုင်ငံ အစည်းအဝေး ပြုလုပ်ခဲ့ ကြကာ ရလဒ်ကောင်းများ ရခဲ့ကြောင်း BGF ၏ သတင်းထုတ်ပြန်ရေးတာဝန်ခံ ဒုတိယဗိုလ်မှူးကြီး နိုင်မောင်ဇော် က CNI သတင်းဌာနသို့ ပြောသည်။

ကျားဖြန့်သည် သတင်းများပေါ်တွင်သာ ကြောက်စရာကောင်းခြင်းဖြစ်ပြီး တကယ့်တကယ်မှာ ဘာမှမဟုတ် ကြောင်း ၎င်းက ဆက်ပြောသည်။

BGF က ကျားဖြန့်ဂိုဏ်းကို စစ်ဆေးနေစဉ်

ဒုဗိုလ်မှူးကြီးနိုင်မောင်ဇော်က “ထူးတာကတော့ နေရပ်ပြန်ရေးကိစ္စတွေ၊ ဒီမှာလည်း အလုပ်လုပ်နေပြီ ဆိုတာ သိတော့ ဘာမှထွေထွေထူးထူး မပြောဘူး။ မြန်မာနိုင်ငံ တာဝန်ရှိသူတွေ၊ ထိုင်းနိုင်ငံ တာဝန်ရှိသူတွေ၊ တရုတ်နိုင်ငံ တာဝန်ရှိသူတွေ အဲဒီ ၃ ဖွဲ့ ဆွေးနွေးတာပေါ့။ ဒါပေမယ့် ရလဒ်ကောင်းတွေ ရတယ်လို့တော့ သိရပါတယ်။ လက်ရှိ ကတော့ ကျနော်တို့ ဖမ်းဆီးရမိထားတာ ၂၀၀၀ ကျော်နေပြီ။ ဒါက နေ့တိုင်းလုပ်နေတာပေါ့။ အခုကတော့ စစ်ဆေး နေဆဲပေါ့။ စစ်ဆေးပြီးတာကတော့ ပြန်ပို့ဖို့ အသင့်ဖြစ်နေတာကတော့ ၁၀၀၀ ကျော်ကျော်ရှိပြီ။ ကျားဖြန့်တွေ ပိုပိုများတာက သတင်းတွေအရပေါ့။ သတင်းတွေပေါ်မှာလည်း ဖတ်ရင်တော့ ကြောက်စရာကောင်းတာပေါ့။ အရင်တုန်းက ကျနော်တို့ မြဝတီမြို့လိုပေါ့ သတင်းတွေ ဖတ်ပြီးမလာရဲကြဘူး။ ဒီတိုင်းပါပဲ။ တကယ်တမ်း လာကြည့်တော့လည်း ဘာမှမဟုတ်ပါဘူး။ ကျနော်တို့ ဒီဘက်ခြမ်းမှာက သတင်းတွေကြောင့်ပါ။ တစ်ခုခုဆို ရွှေကုက္ကိုလ်ပဲ ခေါင်းစဉ်တပ်လို့ ကောင်းနေတော့ ရွှေကုက္ကိုလ်ပဲ လက်ညှိုးထိုးစရာရှိနေတာပေါ့ ဒီသဘောတရား ပါပဲ” ဟု ပြောသည်။

ဖေဖော်ဝါရီ ၁၇ ရက်နေ့က သုံးနိုင်ငံ အဆင့်မြင့်ကိုယ်စားလှယ်များသည် မြန်မာနိုင်ငံ၊ ကရင်ပြည်နယ်၊ မြဝတီမြို့၊ ရွှေကုက္ကိုလ်မြို့နှင့် KK Park နယ်မြေများသို့ သွားရောက်၍ ကျားဖြန့်ဂိုဏ်းများမှ လူကုန်ကူးခံထားရသူများကို တွေ့ဆုံခဲ့ကြကြောင်း သိရသည်။

ထို့နောက် သုံးနိုင်ငံကိုယ်စားလှယ်များသည် မြဝတီမြို့၌ ထိန်းသိမ်းထားသည့် ပြည်ပနိုင်ငံသားများကို သက်ဆိုင်ရာ နိုင်ငံများသို့ အမြန်ဆုံး လွှဲပြောင်းပေးအပ်နိုင်ရေး ဆွေးနွေးခဲ့ကြကာ ဥပဒေနှင့်အညီ ပြန်လည် လွှဲပြောင်းပေးအပ်နိုင်ရေး ဆောင်ရွက်လျက်ရှိကြောင်း သိရသည်။

လက်ရှိမှာတော့ BGF သည် ကျားဖြန့်နှိမ်နင်းရေးအဖွဲ့များ ဖွဲ့စည်း၍ ဆောင်ရွက်လျက်ရှိနေသည်။

CNI News

၂၀၂၅ ခုနှစ်၊ ဖေဖော်ဝါရီ ၁၇

မြန်မာနိုင်ငံ၊ ကရင်ပြည်နယ်အတွင်းက ကျားဖြန့်(အွန်လိုင်းငွေလိမ်လည်ဂိုဏ်း)နှိမ်နင်းရေးအတွက် တရုတ်-ထိုင်း-မြန်မာ သုံးနိုင်ငံမှ အဆင့်မြင့်အရာရှိကြီးများ တွေ့ဆုံ၍ ၂၀၂၅ ခုနှစ်၊ ဖေဖော်ဝါရီ ၁၇ ရက်က ဆွေးနွေးခဲ့ကြသည်။

အဆိုပါ တွေ့ဆုံဆွေးနွေးပွဲကို မြန်မာဘက်ခြမ်းတွင် ပြုလုပ်ခဲ့ပြီး မြန်မာဘက်က ပြည်ထဲရေးဒုဝန်ကြီး ဗိုလ်ချုပ် အောင်ကျော်ကျော်နှင့် ဒုတိယရဲချုပ်တို့ ဦးဆောင်တက်ရောက်ခဲ့သလို တရုတ်ဘက်က ပြည်သူ့လုံခြုံရေးဒုဝန်ကြီး မစ္စတာလျှိုကျုံးရီနှင့် တရုတ်-မြန်မာ-ထိုင်း သုံးနိုင်ငံညှိနှိုင်းရေးအဖွဲ့ အတွင်းရေးမှူးတို့ ဦးဆောင်တက်ရောက်ခဲ့ သည်။

ထို့နောက် ထိုင်းဘက်က ကာကွယ်ရေးဝန်ကြီးကိုယ်စား General Trisak Indraransmi နှင့် ကာကွယ်ရေးဝန်ကြီး ဌာနအကြံပေး Mr. Sakhorn Boongullaya တို့ ဦးဆောင်တက်ရောက်ခဲ့သည်။

ထိုသုံးနိုင်ငံ အဆင့်မြင့်ကိုယ်စားလှယ်များသည် မြန်မာနိုင်ငံ၊ ကရင်ပြည်နယ်၊ မြဝတီမြို့၊ ရွှေကုက္ကိုလ်မြို့နှင့် KK Park နယ်မြေများသို့ သွားရောက်၍ ကျားဖြန့်ဂိုဏ်းများမှ လူကုန်ကူးခံထားရသူများကို တွေ့ဆုံခဲ့သည်။

ထို့နောက် သုံးနိုင်ငံကိုယ်စားလှယ်များသည် မြဝတီမြို့၌ ထိန်းသိမ်းထားသည့် ပြည်ပနိုင်ငံသားများကို သက်ဆိုင်ရာ နိုင်ငံများသို့ အမြန်ဆုံး လွှဲပြောင်းပေးအပ်နိုင်ရေး ဆွေးနွေးခဲ့ကြသည်။

မြန်မာအစိုးရသည် ကရင်ပြည်နယ်၊ မြဝတီမြို့၊ ရွှေကုက္ကိုလ်မြို့နှင့် KK Park နယ်မြေများရှိ ကျားဖြန့်ဂိုဏ်းများနှင့် လုပ်ငန်းများကို စစ်ဆေးဖော်ထုတ်ခဲ့ရာ ၂၀၂၅ ခုနှစ်၊ ဇန်နဝါရီ ၃၀ ရက်မှ ဖေဖော်ဝါရီ ၁၆ ရက်အထိ ပြည်ပနိုင်ငံသား ၁၀၃၀ ဦးကို ထိန်းသိမ်းနိုင်ခဲ့သည်။

အဆိုပါ ထိန်းသိမ်းထားသည့် ပြည်ပနိုင်ငံသားများအား ဥပဒေနှင့်အညီ သက်ဆိုင်ရာနိုင်ငံများသို့ ပြန်လည် လွှဲပြောင်းပေးအပ်နိုင်ရေး ဆောင်ရွက်လျက်ရှိသည်။

မြဝတီ၊ ရွှေကုက္ကိုလ်နှင့် KK Park နယ်မြေများကို ဒီမိုကရေစီအကျိုးပြုကရင်တပ်မတော်(DKBA)၊ ကရင်နယ်ခြား စောင့်တပ်ဖွဲ့(BGF)တို့က ထိန်းချုပ်ထားသည်။

CNI News

၂၀၂၅ ခုနှစ်၊ ဖေဖော်ဝါရီ ၁၇

မြန်မာနိုင်ငံ၊ ပဲခူးတိုင်းဒေသကြီးအတွင်း တိုက်ပွဲဖြစ်ပွားနေသည့် KNLA-PDF ပူးပေါင်းတပ်များသည် စစ်တောင်း မြစ် အနောက်ဘက်ခြမ်းမှ စိမ့်ဝင်ကာ အမြန်လမ်းပေါ်သို့ တက်လာနိုင်ကြောင်း စည်းလုံးညီညွတ်သော တိုင်းရင်းသား လူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

ပဲခူးတိုင်းဒေသကြီးအတွင်းရှိ ကျောက်ကြီး၊ ကျောက်တံခါး၊ ဖြူး၊ ညောင်လေးပင် စသည့် မြို့နယ်များအတွင်းရှိ မြန်မာ့တပ်မတော်၏ ဂိတ်စခန်းများနှင့် ကာကင်းစခန်းများအား ကရင်အမျိုးသားလွတ်မြောက်ရေးတပ်မတော် (KNLA) နှင့် PDF များက တပြိုင်တည်း ပူးပေါင်းတိုက်ခိုက်ခဲ့ကြောင်း ၂၀၂၅ ခုနှစ်၊ ဖေဖော်ဝါရီ ၁၆ ရက်နေ့တွင် ကရင်အမျိုးသားအစည်းအရုံး(KNU) သတင်းပြန်ကြားရေးဌာနက ထုတ်ပြန်ခဲ့သည်။

KNLA-PDF ပူးပေါင်းတပ်များသည် အမြန်လမ်းပေါ်သို့ ရောက်လာနိုင်ပြီး အမြန်လမ်းအား သိမ်းဆည်းနိုင်ပါက နေပြည်တော်၊ ရန်ကုန် စသည့် မြို့ကြီးများအား ဖြတ်တောက်၍ ရသွားနိုင်ကြောင်း စည်းလုံးညီညွတ်သော တိုင်းရင်းသား လူမျိုးများမဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

မြန်မာ့တပ်မတော်ကို တိုက်ခိုက်နေတဲ့ ကော်ဘရာစစ်ကြောင်းမှူးကို တွေ့ရစဉ်

ဦးမျိုးကျော်က “ပြောရမယ်ဆိုရင်တော့ ပဲခူးတိုင်းထဲမှာဆိုရင် စစ်တောင်းမြစ်ရဲ့ အနောက်ခြမ်းပေါ့ဗျာ၊ နဂို လမ်းဟောင်းဘက်ကိုတော့ နဂိုကတည်းက စိမ့်ဝင်နေတဲ့ ဟာမျိုးတွေတော့ သတင်းလေးတွေ ကြားတယ်ပေါ့လေ၊ ဆိုတော့ အဲဒီကနေ ဆိုရင်တော့ အမြန်လမ်းကို တက်ရမှာ‌ပေါ့ဗျာ၊ လမ်းသစ်ဘက်က ပိုပြီးတော့ ခရီးပေါက်တာ ကိုး၊ ဒါလေးတွေတော့ ရှိလာမယ်၊ နောက် ဒီအမြန်လမ်းကိုသာ သိမ်းဆည်းနိုင်သွားမယ်ဆိုရင်တော့ နေပြည်တော်၊ ရန်ကုန်ဆိုတဲ့ ဟာမျိုးတွေ ဖြတ်တောက်လို့ ရသွားနိုင်တယ်၊ အဲဒါလေးလည်း တစ်ချက်အ‌ရေးပါတယ်၊ ကျောက်တံခါးတို့ အဲဒီညောင်လေးပင်တို့ ဆိုတဲ့ဟာက မူလကတည်းကကိုက မကြာမကြာလည်း အဲလို ကျည် ဖောက်တဲ့ဟာ ရှိတယ်၊ ကျောက်ကြီး ဆိုတာကတော့ ပိုဆိုးတာပေါ့ဗျာ၊ ကျောက်ကြီးကတော့ တော်လှန်ရေး အင်အားစုတွေက အဲဒီပတ်ချာလည် ဝိုင်းပြီး အခိုင်အမာ (တပ်)စွဲလေ့ရှိတော့လေ၊ ကျောက်ကြီး ဒီဘက်ကိုလာရင် နတ်သံကွင်းတို့ ဘာတို့ဆိုတဲ့ဟာကလေ တော်လှန်‌ရေးအင်အားစုတွေက အဲဒီဘက်မှာကတော့ အားကြီးတယ်၊ တော်တော်များများကလည်း ၂၀၂၅ မှာ ဒီဖက်မှာရှိတဲ့ တော်လှန်ရေးအင်အားစုတွေက ပြည်မကို ထိုးဖောက်မယ် ဆိုတဲ့ အသံတွေလည်း ထွက်တယ်လေ၊ အဲဒီဟာတွေရဲ့ လုပ်ငန်းကို လက်တွေ့ အကောင်အထည် ဖော်တာလို့ပဲ ကျနော်ကတော့ အဲလိုမြင်ပါတယ်” ဟု ပြောသည်။

မြန်မာ့တပ်မတော်၏ ခမရ(၅၆၀) လက်အောက်ခံ နရွဲပင်တပ်စခန်း၊ တောဝိရွာနှင့် ထိန်တပင်ကြားရှိ တပ်စခန်းနှင့် ကျွန်းကုန်းကျေးရွာတွင် တပ်စွဲထားသည့် တပ်စခန်းများအား ၂၀၂၅ ခုနှစ်၊ ဖေဖော်ဝါရီ ၁၅ ရက်နေ့တွင် ဝင်ရောက် တိုက်ခိုက်သိမ်းပိုက်ခဲ့ကြောင်း KNU ၏ ထုတ်ပြန်ချက်တွင် ဖော်ပြထားသည်။

KNLA နဲ့မဟာမိတ်တွေကိုတွေ့ရစဉ်

မြန်မာ့တပ်မတော်၏ စခန်းငယ်လေးများအား တိုက်နိုင်သည့်အတွက် တော်လှန်ရေးဘက်တွင် စိတ်ဓာတ်တက်ကြွ နိုင်သော်လည်း စစ်ဆင်ရေး အကြီးစားများလုပ်ရန် အချိန်လိုအပ်သေးကြောင်း NCA ထိုးထားသည့် ပအိုဝ်း အမျိုးသားလွတ်မြောက်ရေးအ ဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ဗိုလ်မှူးကြီးခွန်ဥက္ကာက “မူလအားဖြင့် ကြည့်ရင်တော့ ကြည်းတပ်ပေါ့လေ၊ မြေပြင်တပ်တွေ အားနည်းနေတဲ့ အချိန် ဖြစ်နေတယ်၊ SAC ဘက်က မြေပြင်တပ်တွေ အားနည်းနေတဲ့ အချိန်မှာ ပြင်ဆင်မှု ကောင်းကောင်းနဲ့ဆိုရင် ကာကင်းတို့ စခန်းအကင်းလေးတွေက တိုက်ရခိုက်ရ ပိုပြီးတော့ လွယ်မယ့်စခန်းတွေ ဖြစ်လာနိုင်တာပေါ့၊ နောက်ပြီးတော့ အလစ်အငိုက်ပေါ့ဗျာ၊ စစ်ရေးမှာ အလစ်အငိုက်က အရေးကြီးတော့ အလစ်အငိုက် အတိုက်ခံကြ ရတာနဲ့ တူပါတယ်၊ အဲဒီစခန်းငယ်လေးတွေ တိုက်တဲ့အတွက် စိတ်ဓာတ်အရတော့ ဒီတော်လှန်ရေးဘက်က တက်စရာရှိပေမယ့် စီမံချက်ချပြီးတော့ စစ်ဆင်ရေး အကြီးစားတွေပေါ့ဗျာ၊ မြောက်ပိုင်းကလုပ်သလို AA က လုပ်သလို မြို့သိမ်း၊ လမ်းသိမ်း၊ စခန်းသိမ်း အကြီးစားတွေပေါ့၊ အဲဒါမျိုးကတော့ နည်းနည်း လိုဦးမယ်လို့ ထင်ပါ တယ်” ဟု ပြောသည်။

လက်ရှိတွင် ကရင်ပြည်နယ်နှင့် ပဲခူးတိုင်းဒေသကြီးတွင် တိုက်ပွဲရှောင် ၁ သန်းကျော်ရှိပြီး လူသားချင်းစာနာမှု အကူအညီ လိုအပ်နေကြောင်း ကရင်ငြိမ်းချမ်းရေး အထောက်အကူပြုကွန်ရက် (KPSN) က ၂၀၂၄ ခုနှစ်၊ နိုဝင်ဘာ ၂၈ ရက်၌ ထုတ်ပြန်ခဲ့သည်။

CNI News

၂၀၂၅ ခုနှစ်၊ ဖေဖော်ဝါရီ ၁၇

တရုတ်နိုင်ငံခြားရေးဝန်ကြီးဌာန၊ ပြည်သူ့လုံခြုံရေးဝန်ကြီးဌာန ဒုဝန်ကြီး မစ္စတာလျှိုကျုံးရီသည် ကျားဖြန့်နှိမ်နင်းရေးအတွက် မြဝတီမြို့သို့ ၂၀၂၅ ခုနှစ်၊ ဖေဖော်ဝါရီ ၁၇ ရက်နေ့ နံနက်ပိုင်းက ရောက်ရှိလာကြောင်း သိရသည်။

ထိုင်းနိုင်ငံ၊ မဲဆောက်မြို့မှတဆင့် မြန်မာနိုင်ငံ၊ မြဝတီမြို့သို့ ရောက်ရှိလာခြင်းဖြစ်ပြီး မြဝတီမြို့မှာ ရှိနေသည့် ကျားဖြန့်ဂိုဏ်းများထံမှ ကယ်ထုတ်ထားသူများကို တွေ့ဆုံခဲ့ကြောင်း ထိုင်းသတင်းဌာန The Reporter သတင်းဌာနက ဖော်ပြခဲ့သည်။

မြန်မာ-ထိုင်းနယ်စပ်ရှိ ရွှေကုက္ကိုလ်နှင့်မြဝတီမြို့များမှ ကျားဖြန့်ဂိုဏ်းများကို နှိမ်နင်းရန် အပါအဝင် လူကုန်ကူး ခံထားရသူများ ကယ်ထုတ်နိုင်ရေးအတွက် ထိုင်း-တရုတ်-မြန်မာ သုံးနိုင်ငံ အစည်းအဝေးကို ဖေဖော်ဝါရီ ၁၇ ရက်တွင် ကျင်းပမည်ဖြစ်သည်။

ထို့နောက် ဒုဝန်ကြီး မစ္စတာလျှိုကျုံးရီသည် နစက၏ နိုင်ငံခြားရေးဝန်ကြီး ဦးသန်းဆွေနှင့် ပြည်ထဲရေးဝန်ကြီး ဒုတိယဗိုလ်ချုပ်ကြီးထွန်းထွန်းနောင်တို့ကို ပြီးခဲ့သည့် ရက်ပိုင်းက တွေ့ဆုံ၍ ကျားဖြန့်နှိမ်နင်းရေး အစီအစဉ်များကို ဆွေးနွေးခဲ့သည်။

CNI News
၂၀၂၅ ခုနှစ်၊ ဖေဖော်ဝါရီ ၁၅

တအာင်းအမျိုးသားလွတ်မြောက်ရေးတပ်မတော်(TNLA)နှင့် မြန်မာ့တပ်မတော်မှ ကိုယ်စားလှယ်များ တရုတ်နိုင်ငံ၊ ကူမင်းမြို့မှာ တွေ့ဆုံ၍ ဆွေးနွေးကြမည်ဖြစ်သည်။

အဆိုပါ တွေ့ဆုံ ဆွေးနွေးမှုကို ဖေဖော်ဝါရီ ၁၆ ရက်နေ့မှာ စတင်မည်ဖြစ်ပြီး မြန်မာ့တပ်မတော်ဘက်က ကစထ(၁)မှူး ဒုဗိုလ်ချုပ်ကြီး ကိုကိုဦး ဦးဆောင်မည်ဖြစ်သလို TNLA ဘက်က ဒုဥက္ကဋ္ဌ ဒုဗိုလ်ချုပ်ကြီးတားဂျုဂျား ဦးဆောင်မည်ဖြစ်သည်။

ထို့နောက် TNLA သည် ဒုဥက္ကဋ္ဌ ဒုဗိုလ်ချုပ်ကြီးတားဂျုဂျားနှင့် မဟာမိတ်ဆက်ဆံရေးဌာနမှူး ဗိုလ်မှူးကြီး တာမိုးဟိန်း အပါအဝင် ကိုယ်စားလှယ် ၉ ဦး တက်ရောက်မည်ဖြစ်ကြောင်း TNLA ဘက်က ပြောသည်။

လက်ရှိမှာတော့ TNLA ကိုယ်စားလှယ်များသည် တရုတ်နိုင်ငံ၊ ကူမင်းမြို့မှာ ရောက်ရှိနေပြီးဖြစ်ကြောင်း သိရသည်။

TNLA သည် ၁၀၂၇ စစ်ဆင်ရေးအတွင်းမှာ ရှမ်းပြည်နယ်မြောက်ပိုင်းရှိ ကွတ်ခိုင်၊ နမ့်ခမ်း၊ ကျောက်မဲ၊ နောင်ချို၊ နမ့်ဆန်၊ မန်တုံ၊ မိုင်းငေါ့၊ နမ္မတူ၊ သီပေါ၊ မိုးကုတ်၊ မိုးမိတ် တို့ကို သိမ်းပိုက်ထားသည်။