CNI New
၂၀၂၅ ခုနှစ်၊ ဩဂုတ် ၂၉
ကမ္ဘောဒီးယားနိုင်ငံ၏ အာဏာရပါတီဖြစ်သည့် ဝန်ကြီးချုပ်ဟောင်း ဟွန်ဆန် ဦးဆောင်သော ကမ္ဘောဒီးယား ပြည်သူ့ပါတီ(CPP)နှင့် ဦးခင်ရီ ဦးဆောင်သည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)တို့ ပူးပေါင်း ဆောင်ရွက်ရေး MOU လက်မှတ်ရေးထိုးခြင်းက ဘာကြောင့်ဖြစ်နိုင်လဲဆိုသည့်အပေါ် နိုင်ငံရေးလေ့လာသုံးသပ်သူ များကြား မေးခွန်းထုတ်လျက်ရှိနေသည်။
ပြည်ထောင်စုကြံ့ခိုင်ရေးနှင့် ဖွံဖြိုးရေးပါတီ(USDP)သည် ကမ္ဘောဒီးယားပြည်သူ့ပါတီနှင့် ပါတီချင်း ပူးပေါင်း ဆောင်ရွက်ရေးအတွက် ကမ္ဘောဒီးယားနိုင်ငံကို သွားရောက် ဆွေးနွေးခဲ့ကြသည်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီသည် ကမ္ဘာဒီးယားက ပါတီတင်မက ရုရှားနိုင်ငံမှ ပါတီများနှင့်လည်း MOU ထိုးထားကြောင်း၊ နိုင်ငံတော်နှင့်နိုင်ငံသားများအတွက် အခြေခံ ဆောင်ရွက်ခြင်း ဖြစ်နိုင်သည်ဟု ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)မှ ပြောရေးဆိုခွင့်ရှိသူ ဦးသိန်းထွန်းဦးက CNI သတင်းဌာနသို့ ပြောသည်။
ဦးခင်ရီနဲ့ မစ္စတာ ဟွန်ဆန်ကို တွေ့ရစဉ်
၎င်းက “ကျနော်တို့ ဒီတစ်နိုင်ငံထဲတင် မဟုတ်ဘူး ရုရှားတို့ ဘာတို့က ပါတီတွေလည်းပဲ ကျနော်တို့က MOU ထိုးတယ်။ အခု ဒီထိုးတဲ့ဟာဆိုရင် ကျနော်တို့က လူငယ်၊ အမျိုးသမီး၊ မီဒီယာ အဲဒီဟာတွေကို အပြန်အလှန် ပူးပေါင်းဆောင်ရွက်မယ့် ကိစ္စလေးတွေပါမယ်။ သက်ဆိုင်ရာပါတီ အဆင့်ဆင့် အလိုက်ပေါ့။ အမြင်ချင်း ဖလှယ် မှုတွေ ဆောင်ရွက်သွားမယ်ဆိုတဲ့ သဘောတူ MOU ထိုးကြခြင်း ဖြစ်ပါတယ်။ အဓိက,ကတော့ နိုင်ငံအတွက်ပေါ့၊ အခြားသော နိုင်ငံတွေရဲ့ အမြင်တွေ ကောင်းမွန်တဲ့ ဆောင်ရွက်ချက်တွေ ကျနော်တို့ပါတီက ယူဆောင်လာပြီး တော့ ကျနော်တို့ နိုင်ငံအတွက်ကို ကျနော်တို့ ပြန်လည်ပြီးတော့ ဆောင်ရွက်မယ့် ကိစ္စပဲဖြစ်တယ်၊ နှစ်နိုင်ငံ ကျနော်တို့ ဥပဒေများကို လေးစားလိုက်နာကြရမယ်ဆိုတဲ့ အချက်လည်း ပါဝင်ကြပါတယ်၊ အဓိက,ကတော့ ကျနော်တို့ ဆောင်ရွက်ခြင်းက ကျနော်တို့ နိုင်ငံတော်နဲ့နိုင်ငံသားများအတွက်ကို အခြေခံပြီး ဆောင်ရွက်ခြင်းပဲ ဖြစ်ပါတယ်”ဟု ပြောသည်။
USDP ပါတီဥက္ကဋ္ဌ ဦးခင်ရီနှင့်အဖွဲ့သည် ကမ္ဘောဒီးယားနိုင်ငံသို့ ၂၀၂၅ ခုနှစ်၊ ဩဂုတ် ၂၇ ရက်က သွားရောက်၍ ဩဂုတ် ၂၈ ရက်တွင် ကမ္ဘောဒီးယားပြည်သူ့ပါတီဒုဥက္ကဋ္ဌ လက်ရှိ ဝန်ကြီးချုပ် ဟွန်မာနက်နှင့် တွေ့ဆုံပြီး ဆွေးနွေး ခဲ့သည်။
ထို့နောက် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP) နှင့် ကမ္ဘောဒီးယားပြည်သူ့ပါတီ(CPP)တို့ နှစ်နိုင်ငံ ပါတီချင်း ပူးပေါင်းဆောင်ရွက်ရေးဆိုင်ရာ သဘောတူစာချုပ်(MOU) လက်မှတ်ရေးထိုးပွဲ အခမ်းအနားကို ဩဂုတ် ၂၈ ရက်က ကမ္ဘောဒီးယားပြည်သူ့ပါတီ(CPP) ရုံးချုပ်တွင် ကျင်းပခဲ့သည်။
USDP နဲ့ CPP တွေ့ဆုံ ဆွေးနွေးစဉ်
ပါတီနှစ်ခုသည် လာသည့် အခြေခံခြင်း တူနေကြောင်း၊ အတိတ်သမိုင်းကြောင်းလည်း တူနေသည့်အတွက် ပူးပေါင်းဆောင်ရွက်မှုက မထူးဆန်းဘူးဟုထင်ကြောင်း နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။
၎င်းက “အကျိုးစီးပွား ဆိုတာထက်ကို ပါတီချင်း ပူးပေါင်းမှုကတော့ ရှိကြမှာပဲလေ။ ဒီတော့ မူဝါဒအားဖြင့်ကလည်း ကျနော် ထင်တယ်၊ တူညီမှုရှိကြပါလိမ့်မယ် တစ်ယောက် အတွေ့အကြုံ တစ်ယောက်ကလည်း ယူလို့ရတယ်လေ၊ အထူးသဖြင့်တော့ ကမ္ဘောဒီးယားက လက်ရှိမှာ ပိုပြီးတော့ ရှည်ကြာနေတဲ့ အတွက်ကြောင့်မို့လို့ ကမ္ဘောဒီးယား ပါတီဆီကနေပြီးတော့ အတွေ့အကြုံတွေ ယူနိုင်တယ်။ နောက်တစ်ခုကလည်း ပြည်ထောင်စု ကြံ့ခိုင်ရေးနဲ့ဖွံ့ဖြိုး ရေးပါတီကြီး ကိုယ်တိုင်လည်း ဒီပွဲမှာ သူတို့နိုင်မယ်လို့ ယုံကြည်မှု ခိုင်မာနေတဲ့ အတွက်ကြောင့်မို့လို့လည်း ဖြစ်နိုင် တယ်လို့ ကျနော်ထင်ပါတယ်၊ ပြောချင်တဲ့ သဘောကတော့ ပါတီနှစ်ခုသည် လာတဲ့အခြေခံချင်း တူနေတယ်တူတဲ့ အခါကြတော့ အရှေ့တောင်အာရှ နိုင်ငံချင်းလည်းဖြစ်တယ်။ စရိုက်ချင်းကလည်း တူတယ်။ အတိတ် သမိုင်း ကြောင်းကလည်း တူနေတဲ့ အခါကြတော့ ပူးပေါင်းဆောင်ရွက်မှုဟာ မဆန်းဘူးလို့ ထင်တယ်။ ဘာပဲပြောပြော ကမ္ဘောဒီးယားက အောင်မြင်တယ်လေ ကျနော်မြင်တာကတော့ စီးပွားရေး ပိုဖြစ်နိုင်ပါတယ်။ ကမ္ဘောဒီးယား စီးပွားရေးက အခုဘာပဲပြောပြော မြန်မာပြည်နဲ့စာရင် အရမ်းအောင်မြင်နေတဲ့ အခါဖြစ်တဲ့ အတွက်ကြောင့်မို့လို့ တိုင်းပြည် စီးပွားရေးမှာ ဘယ်လိုဦးဆောင်ရမလဲဆိုတာ အဲတာကို သူတို့လေ့လာ ရှာကြံတယ်လို့ ကျနော်ထင်ပါ တယ်”ဟု ပြောသည်။
အဆိုပါ နှစ်နိုင်ငံပါတီချင်း ပူးပေါင်းဆောင်ရွက်ရေး သဘောတူ လက်မှတ်ရေးထိုးခြင်းသည် USDP ပါတီဥက္ကဋ္ဌ ဦးခင်ရီက ၂၀၂၄ ခုနှစ်၊ နိုဝင်ဘာ ၂၁ ရက်မှ ၂၃ ရက်အထိ ကမ္ဘောဒီးယားနိုင်ငံ၊ ဖနွမ်ပင်မြို့တွင် ကျင်းပခဲ့သော (၁၂)ကြိမ်မြောက် အာရှနိုင်ငံရေးပါတီများဆိုင်ရာ အထွေထွေညီလာခံ တက်ရောက်စဉ် မစ္စတာဟွန်ဆန်နှင့် တွေ့ဆုံ၍ ဆွေးနွေးခဲ့ပြီးနောက် MOU ရေးထိုးခဲ့ခြင်းဖြစ်သည်။
USDP ပါတီသည် မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ ကျင်းပရန် စီစဉ်ထားသည့် ရွေးကောက်ပွဲမှာ ဝင်ရောက်ယှဉ်ပြိုင်မည်ဖြစ်ပြီး အစိုးရဖွဲ့စည်းနိုင်ရေး ရည်မှန်းထားသော ပါတီဖြစ်သည်။
