CNI News

၂၀၂၅ ခုနှစ်၊ ဩဂုတ် ၂၉

မန္တလေး PDF(MDY-PDF)နှင့် တအာင်းတပ်ဖွဲ့(TNLA)တို့ထိန်းချုပ်ထားသော မန္တလေးတိုင်းဒေသကြီးအတွင်းရှိ ဖယောင်းတောင်သတ္တုတွင်းနှင့် အယ်လ်ဖာဘိလပ်မြေစက်ရုံကို မြန်မာ့တပ်မတော်က ၂၀၂၅ ခုနှစ်၊ ဩဂုတ် ၂၈ ရက်တွင် ပြန်လည် ထိန်းချုပ်လိုက်ကြောင်း ထုတ်ပြန်ခဲ့သည်။

TNLA နှင့် MDY-PDF တို့ ပူးပေါင်း၍ မန္တလေးမြို့ သိမ်းပိုက်ရေး ၂၀၂၄ ခုနှစ်၊ ဇွန်လ ၂၅ ရက်တွင် မတ္တရာစစ် ကြောင်း၊ ပုသိမ်ကြီးစစ်ကြောင်း၊ ပြင်ဦးလွင် စစ်ကြောင်းများဖြင့် ရှမ်း-မန်း စစ်ဆင်ရေးကို ဖော်ဆောင်၍ တိုက်ခိုက်ခဲ့သည်။

ထို့နောက် ၂၀၂၄ ခုနှစ်၊ ဇူလိုင်လတွင် မတ္တရာမြို့၏ မြောက်ဘက် ရေနံ့သာကျေးရွာတစ်ဝိုက်၊ အရှေ့ဘက်ရှိ အယ်လ်ဖာဘိလပ်မြေစက်ရုံနှင့် ဖယောင်းတောင်သတ္တုတွင်းကို TNLA နှင့် MDY-PDF တို့ ပူးပေါင်းတပ်ဖွဲ့က ထိန်းချုပ်ခဲ့သည်။

TNLA နှင့် MDY-PDF တို့ ပူးပေါင်းတပ်ဖွဲ့ ထိန်းချုပ်ထားသည့် အယ်လ်ဖာဘိလပ်မြေစက်ရုံနှင့် ဖယောင်းတောင် သတ္တုတွင်းကို ပြန်လည် ထိန်းချုပ်နိုင်ရေးအတွက် မြန်မာ့တပ်မတော်က ၂၀၂၅ ခုနှစ်၊ ဇူလိုင် ၂၁ ရက်မှစ၍ မတ္တရာ - ဘိုကုန်း- ကျောက်တံတားဘက်မှ စစ်ကြောင်းတစ်ကြောင်း၊ မြကန်သာကျေးရွာဘက်မှ စစ်ကြောင်းတစ်ကြောင်း၊ ပန်းစလောင်းတောင်ဘက်မှ စစ်ကြောင်းတစ်ကြောင်း၊ ဘိုင်ပင်ရွာဘက်မှ စစ်ကြောင်းတစ်ကြောင်း စသည့် စစ်ကြောင်း ၄ ကြောင်းဖြစ် ထိုးစစ်ဆင် တိုက်ခိုက်လာခဲ့သည်။

အယ်လ်ဖာဘိလပ်မြေစက်ရုံကို မြန်မာ့တပ်မတော်က ပြန်ထိန်းချုပ်လိုက်စဉ်

အဆိုပါ ထိုးစစ်ဆင် တိုက်ခိုက်မှုအတွင်း ၂၀၂၅ ခုနှစ်၊ ဩဂုတ် ၂၄ ရက်တွင် ဖယောင်းတောင်သတ္တုတွင်းကို လည်းကောင်း၊ ဩဂုတ် ၂၈ ရက်တွင် အယ်လ်ဖာဘိလပ်မြေစက်ရုံကိုလည်းကောင်း မြန်မာ့တပ်မတော်က ပြန် လည် ထိန်းချုပ်ခဲ့သည်။

ထိုစစ်ဆင်ရေးအတွင်း မြန်မာ့တပ်မတော်နှင့် TNLA နှင့် MDY-PDF တို့ ပူးပေါင်းတပ်ဖွဲ့ကြား တိုက်ပွဲကြီးငယ် ၂၄ ကြိမ်ဖြစ်ပွားခဲ့ပြီး လက်နက်ကိုင်များဘက်က လက်နက်မျိုးစုံ ၄၆ လက်၊ ခဲယမ်းနှင့် ဆက်စပ်ပစ္စည်းများ သိမ်း ဆည်းရမိခဲ့ကြောင်း မြန်မာ့တပ်မတော်ဘက်က ထုတ်ပြန်ခဲ့သည်။

ထို့နောက် မြန်မာ့တပ်မတော်သည် မတ္တရာနှင့် သပိတ်ကျင်းမြို့နယ်အကြားက နယ်မြေရှင်းလင်းရေးကို ဆက် လက် လုပ်ဆောင်သွားမည်ဟု ထုတ်ပြန်ခဲ့သည်။

မြန်မာ့တပ်မတော်နှင့် TNLA ကြား အပစ်ရပ်စဲရေးအတွက် ၂၀၂၅ ခုနှစ်၊ ဩဂုတ် ၂၇ ရက်က တရုတ်နိုင်ငံ၊ ကူမင်းမြို့မှာ တတိယအကြိမ် တွေ့ဆုံ ဆွေးနွေးခဲ့ကြသော်လည်း အဆင်မပြေဘဲ ဆွေးနွေးပွဲအဆုံးသတ်ခဲ့သည်။

ဖယောင်းတောင်သတ္တုတူးကို မြန်မာ့တပ်မတော်က ပြန်ထိန်းချုပ်လိုက်စဉ်

မြန်မာ့တပ်မတော်ဘက်က TNLA ထိန်းချုပ်ထားသည့် နမ့်ခမ်း၊ မန်တုံ၊ နမ့်ဆန်၊ မိုင်းငေါ့၊ မိုင်းလုံ၊ နမ္မတူ၊ ကျောက်မဲ၊ သီပေါ၊ မိုးမိတ်၊ ကွတ်ခိုင်၊ မိုးကုတ် စသည့် မြို့နယ်များအနက် မန်တုံနှင့် နမ့်ဆန် မြို့နယ်ကလွဲပြီး ကျန်မြို့နယ်များ ပြန်ပေးရန် တောင်းဆိုခဲ့သည်။

သို့သော် TNLA ဘက်က ကျောက်မဲနှင့်သီပေါမြို့နယ်ကို ပြန်ပေးမည်ဖြစ်ပြီး ကျန်မြို့နယ်များကို မြန်မာ့တပ်မ တော်က အသိအမှတ်ပြုပေးရန် တောင်းဆိုခဲ့သည်။

ထို့ကြောင့် ဆွေးနွေးပွဲ ပျက်ပြယ်ကာ စက်တင်ဘာလမှာ ပြန်လည် တွေ့ဆုံ ဆွေးနွေးရန်ဖြင့် အဆုံးသတ်ခဲ့သည်။

မြန်မာ့တပ်မတော်နှင့် TNLA သည် ၂၀၂၅ ခုနှစ်၊ ဖေဖော်ဝါရီ ၁၆-၁၇ ရက်က ပထမအကြိမ်၊ ဧပြီလ ၂၈-၂၉ ရက်က ဒုတိယအကြိမ်၊ ဩဂုတ် ၂၇ ရက်က တတိယအကြိမ် စသဖြင့် တွေ့ဆုံ ဆွေးနွေးထားပြီးဖြစ်သည်။