CNI News
၂၀၂၅ ခုနှစ်၊ ဩဂုတ် ၂၉
ရွေးကောက်ပွဲကျင်းပမည့်ရက် ထုတ်ပြန်ကြေညာပြီးနောက် မြန်မာ့တပ်မတော်ဘက်မှ စစ်ရေးအရှိန်မြှင့် လာခြင်း က ဘာကြောင့် ဖြစ်နိုင်လဲဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများ ရှိနေကြသည်။
နိုင်ငံရေးအရ ညှိနှိုင်း၍ မရသည့်အတွက် စစ်ရေးကို ဦးတည်လာခြင်းဖြစ်ကြောင်း၊ စစ်ရေးနှင့် နိုင်ငံရေးကို ကွဲပြား စွာ လုပ်ဆောင်လာပါက ထူးခြားသည့် ရလဒ်များ တွေ့လာရမည်ဖြစ်ကြောင်း သေနင်္ဂမဟာဗျူဟာ လေ့လာရေး အဖွဲ့မှ အမှုဆောင်ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။
၎င်းက “စစ်ရေးကတော့ ကျနော်တို့ ပြောထားပြီးသားပါ။ အရင်တုန်းက နိုင်ငံရေးအရ ဒီလိုလုပ်ဖို့ စဉ်းစားတယ်။ သို့သော် ဒါပေမယ့် နိုင်ငံရေးအရ ညှိနှိုင်းလို့မရတဲ့ အခါကြတော့ စစ်ရေးကို တဖြေးဖြေး ဦးတည်လာတယ်ပေါ့ ဒါက တော့ ရှင်းပါတယ်။ နိုင်ငံရေး ဆွေးနွေးညှိနှိုင်းရေး အချိန်ပေးထားတဲ့အတွင်းမှာ စစ်ရေးက အရေးနိမ့်တာတွေ ဖြစ် လာတယ်။ ပြောရရင်တော့ ပထမပိုင်းမှာ နိုင်ငံရေး ပိုပြီးအားသာတဲ့အချိန်မှာ နိုင်ငံရေးပိုင်း ဦးတည်ပြီးလုပ်တဲ့ အတွက်ကြောင့် တချို့သော စစ်ရေးပိုင်းတွေမှာ ဒီဘက်က အားနည်းချက်တွေ ဖြစ်သွားခဲ့တာတွေ၊ မလိုလားအပ် ဘဲနဲ့ ကျနော်တို့ဘက်က အဆုံးအရှုံးများခဲ့တာတွေရှိတယ်။ ဒါပေမယ့် အခုကတော့ စစ်ရေးကို ပြင်းပြင်းပြပြ လုပ် လာတဲ့ကိစ္စကို နိုင်ငံရေးနဲ့စစ်ရေး ကွဲကွဲပြားပြား အလုပ်လုပ်လာတာကို မြင်ရတယ်ဆိုရင် ထူးခြားတဲ့ ရလဒ်တွေ တွေ့လာရမှာပေါ့။ အဲဒီတော့ လက်ရှိ စစ်ရေးအခြေအနေက ပိုပြီးတော့ အလုပ်များများ လုပ်လာတယ်ဆိုတာ လည်း ဒီသဘောပါပဲ” ဟု ပြောသည်။
ပြီးခဲ့သည့် ရက်ပိုင်းက ရခိုင်ပြည်နယ်မှာ အာရက္ခတပ်တော်(AA) ထိန်းချုပ်ထားသည့် ဒေသများသို့ လေကြောင်း ဖြင့် ထိုးစစ်ဆင် တိုက်ခိုက်ခဲ့ပြီး ရှမ်းပြည်မြောက်ပိုင်း ကျောက်မဲမြို့၌လည်း တိုက်ပွဲများ ပြင်းထန်လျက်ရှိသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
ထို့ပြင် စစ်ကိုင်းတိုင်းဒေသကြီး အပါအဝင် ကချင်ပြည်နယ် ဗန်းမော်မြို့နှင့် ကရင်ပြည်နယ်၊ ကော့ကရိတ်တို့ တွင်လည်း ထိုးစစ်ဆင် တိုက်ခိုက်မှုများ ပြုလုပ်နေသည်ကို တွေ့ရသည်။
ယခုကဲ့သို့ မြန်မာ့တပ်မတော်မှ ထိုးစစ်ဆင်မှု ပိုများလာနေခြင်းသည် ရွေးကောက်ပွဲ၌ အနှောင့်အယှက်မရှိဘဲ လုပ်ဆောင်နိုင်မည့် နယ်မြေဧရိယာများ ပေါ်ထွက်လာရေးကို ရည်မှန်းကာ စစ်ရေးမြှင့်နေသည်ဟု ထင်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာန သို့ ပြောသည်။
၎င်းက “တစ်စုံတစ်ရာတော့ ရွေးကောက်ပွဲနဲ့ပတ်သက်ပြီး သူ့အချိန်ကာလ ရောက်ရင်တော့ အနှောင့်အယှက် မရှိ ဘဲ လုပ်နိုင်တဲ့ ဧရိယာတွေ ပေါ်လာမှာပေါ့။ အဲဒါကို ရည်မှန်းပြီးတော့ အခုစစ်ရေး မြှင့်တာနဲ့တူပါတယ်။ ဒါပေမယ့် ရွေးကောက်ပွဲ ကာလအထိတော့ မရောက်ဘူးထင်တယ်။ ဒီကြားထဲမှာပဲ အဖြေကပေါ်ပါပြီ။ ဘယ်နှစ်နေရာ ရွေးကောက်ပွဲ လုပ်နိုင်မယ်၊ ဘယ်မဲဆန္ဒနယ်မြေတွေက ဖြစ်နိုင်တယ်ဆိုတာ အဖြေပေါ်ပါပြီ။ အဲဒီအဖြေပေါ်ဖို့ အတွက်ပဲ လက်ရှိစစ်ရေးလှုပ်ရှားမှုက ဦးတည်နေတယ်လို့ ယူဆရပါတယ်။ ဖျက်မယ်လို့ ကြိမ်းဝါးနေတဲ့ အဖွဲ့က လည်း သူတို့ တတ်စွမ်းသရွေ့ဖျက်ပေါ့။ ဒါကတော့ ကျနော်တို့လည်း ထောက်ခံလို့လည်း မရဘူး။ ကန့်ကွက်လို့ လည်းမရဘူး။ သူ့ပေါ်လစီနဲ့သူကို။ ဒါကြောင့် ရွေးကောက်ပွဲ ဖြစ်အောင်လုပ်မယ့် အာဏာပိုင်အဖွဲ့ကလည်း ဖြစ်အောင်လုပ်ပေါ့။ သူ့ပေါ်လစီနဲ့ သူပေါ့” ဟု ပြောသည်။
ရွေးကောက်ပွဲ အပိုင်း (၁)ကို ၂၀၂၅ ခုနှစ်၊ ဒီဇင်ဘာ ၂၈ ရက်နေ့တွင် ကျင်းပမည်ဖြစ်ပြီး မြို့နယ်ပေါင်း ၁၀၂ မြို့နယ် ၌ ကျင်းပသွားမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်(UEC)က ထုတ်ပြန်ထားသည်။
KNU ကို အကြမ်းဖက်အဖွဲ့အဖြစ် ကြေညာထား
ရွေးကောက်ပွဲကို KIA, KNU, AA, KNPP နှင့် အခြားတော်လှန်ရေးအဖွဲ့အစည်းများက လက်မခံကြောင်း ပြောဆို ထားသကဲ့သို့ ဆန့်ကျင် ကျော်လွှားကြရန် NUG ကလည်း တိုက်တွန်းထားသည်။
ရွေးကောက်ပွဲသည် “စစ်တပ်အတွက် အကျိုးရှိမည့် လူနှင့် ပါတီရွေးချယ်ပွဲ” ဖြစ်သဖြင့် ကရင်လက်နက်ကိုင်အဖွဲ့ များ၊ ကရင်နိုင်ငံရေး အင်အားစုများ၊ ကရင်ပါတီများနှင့် ပြည်သူလူထု တစ်ရပ်လုံးသည် အကြမ်းမဖက်သော နည်းလမ်းများဖြင့် ဆန့်ကျင်ကြရန် KNU က ဩဂုတ် ၂၆ ရက်နေ့တွင် သဘောထား ထုတ်ပြန်ထားသည်။
ထို့နောက် ဩဂုတ် ၂၈ ရက်နေ့တွင် KNU ကို မတရားအသင်းနှင့် အကြမ်းဖက်အဖွဲ့အဖြစ် နိုင်ငံတော်လုံခြုံရေးနှင့် အေးချမ်းသာယာရေးကော်မရှင် လက်အောက်ရှိ အကြမ်းဖက်မှုတိုက်ဖျက်ရေးဗဟိုအဖွဲ့နှင့် ပြည်ထဲရေးဝန်ကြီးဌာန တို့မှ ထုတ်ပြန်ကြေညာခဲ့ သည်။
ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေး ဥပဒေအရ နှောင့်ယှက်ဟန့်တား ဖျက်ဆီးခြင်းနှင့် လူသေဆုံးအောင် လုပ်ပါက ထောင်ဒဏ် အနည်းဆုံး ၁၀ နှစ်မှ တစ်သက်တစ်ကျွန်းအပြင် သေဒဏ်အထိ ချမှတ်နိုင်သည်။
