CNI News
၂၀၂၅ ခုနှစ်၊ ဩဂုတ် ၂၉
အမျိုးသားဒီမိုကရေစီအဖွဲ့ချုပ်(NLD)ပါတီဝင်ဖြစ်ခဲ့သူ ဒေါ်စန္ဒာမင်းသည် အမျိုးသားဒီမိုကရေစီအင်အားစုပါတီ (NDF)တွင် ဒုဥက္ကဋ္ဌအဖြစ် တာဝန်ယူလိုက်ကြောင်း နီးစပ်သူများထံမှ သိရသည်။
ဒေါ်စန္ဒာမင်းသည် ၂၀၁၂ ကြားဖြတ်ရွေးကောက်ပွဲတွင် NLD ပါတီကိုယ်စားပြု၍ ပြည်သူ့လွှတ်တော်ကိုယ်စားလှယ် အဖြစ် ဝင်ရောက်ယှဉ်ပြိုင်ကာ အရွေးချယ်ခံခဲ့ရသည်။
ထို့နောက် ၂၀၁၅ အထွေထွေရွေးကောက်ပွဲ၌ NLD ပါတီကိုယ်စားပြု၍ ရန်ကုန်တိုင်းဒေသကြီး ဆိပ်ကြီးခနောင်တို မဲဆန္ဒနယ် တိုင်းဒေသကြီးလွှတ်တော် ကိုယ်စားလှယ်အဖြစ် ဝင်ရောက်ယှဉ်ပြိုင်ပြီး ရန်ကုန်တိုင်းလွှတ်တော် ကိုယ်စားလှယ်အဖြစ် ရွေးချယ်ခံခဲ့ရသည်။
အနိုင်ရပြီးနောက် ရန်ကုန်တိုင်းဒေသကြီးလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီဥက္ကဋ္ဌ အဖြစ် တာဝန်ယူခဲ့သည်။
၂၀၂၀ အထွေထွေရွေးကောက်ပွဲမှာတော့ ရွေးကောက်ပွဲ ဝင်ရောက်ယှဉ်ပြိုင်ခြင်းမရှိတော့ဘဲ NLD ပါတီ အောင်နိုင်ရေးအတွက် ဆောင်ရွက်ခဲ့ရသည်။
ထို့နောက် ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုအား မဖြေရှင်းဘဲ ဒေါ်အောင်ဆန်းစုကြည် ဦးဆောင်သည့် NLD ပါတီအစိုးရက အစိုးရဖွဲ့စည်းရေး ကြိုးပမ်းသည်ဟုဆိုကာ ၂၀၂၁ ခုနှစ်၊ ဖေဖော်ဝါရီ ၁ ရက်တွင် ဖြုတ်ချ၍ နိုင်ငံတော်အား အရေးပေါ် အခြေအနေ ကြေညာခဲ့သည်။
ဒေါ်စန္ဒာမင်းနဲ့ NDF ခေါင်းဆောင်တချို့ကို တွေ့ရစဉ်
ထိုသို့ နိုင်ငံရေး အပြောင်းအလဲ ဖြစ်ပေါ်လာပြီးနောက် ၂၀၂၃ ခုနှစ်၊ ဇန်နဝါရီ ၃၁ ရက်တွင် နိုင်ငံရေးပါတီများကို ပါတီမှတ်ပုံတင်များ အသစ်ပြန်လည် မှတ်ပုံတင်ရန် ပြည်ထောင်စုရွေးကောက်ပွဲကော်မရှင်က ထုတ်ပြန်ခဲ့သည်။
သို့သော် NLD ပါတီသည် နိုင်ငံရေးပါတီကို ပြန်လည် မှတ်ပုံတင်ခြင်းမရှိ၍ ပါတီဖျက်သိမ်းခံလိုက်ရသလို ရွေး ကောက်ပွဲလည်း ဝင်ရောက်ယှဉ်ပြိုင်ခွင့်မရှိတော့ပေ။
ဒေါ်စန္ဒာမင်းသည် ဖမ်းဆီးခံထားရသော ဒေါ်အောင်ဆန်းစုကြည်နှင့် တွေ့ဆုံ၍ ပါတီ မှတ်ပုံတင် ပြန်လည် တင်ရန် ဆန္ဒရှိ/မရှိ သဘောထား တောင်းခံခဲ့သူဖြစ်သည်။
လက်ရှိတွင် ဒေါ်စန္ဒာမင်းသည် အတိတ်သမိုင်းက NLD ပါတီကနေ ခွဲထွက်သွားသူများ တည်ထောင်ခဲ့သော အမျိုးသားဒီမိုကရေစီအင်အားစုပါတီ(NDF)မှာ ဒုဥက္ကဋ္ဌအဖြစ် တာဝန်ယူ၍ ရွေးကောက်ပွဲ အောင်နိုင်ရေး ကြိုးပမ်းနေကြောင်း သိရသည်။
မြန်မာနိုင်ငံတွင် ရွေးကောက်ပွဲကို ၂၀၂၅ ခုနှစ်၊ ဒီဇင်ဘာ ၂၈ ရက်၌ အပိုင်း(၁) အနေဖြင့် မြို့နယ် ၁၀၂ မြို့နယ်မှာ ကျင်းပမည်ဖြစ်ပြီး NDF ပါတီက တစ်နိုင်ငံလုံး အတိုင်းအတာဖြင့် ဝင်ရောက်ယှဉ်ပြိုင်ရန် မှတ်ပုံတင်ထားသည်။
