CNI News
၂၀၂၅ ခုနှစ်၊ ဩဂုတ် ၂၉
ရှမ်းပြည်နယ်မြောက်ပိုင်း၊ နောင်ချိုမြို့နယ်အတွင်းက ဂုတ်တွင်း တံတားနှင့် ဂုတ်ထိပ်မီးရထားလမ်း နေရာတစ် ဝိုက်ကို မြန်မာ့တပ်မတော်က ပြန်လည်ထိန်းချုပ်လိုက်ကြောင်း ၂၀၂၅ ခုနှစ်၊ ဩဂုတ် ၂၉ ရက်တွင် ထုတ်ပြန်ခဲ့ သည်။
တအာင်းအမျိုးသားလွတ်မြောက်ရေးတပ်မတော်(TNLA)နှင့် PDF ပူးပေါင်းတပ်ဖွဲ့များ ထိန်းချုပ်ထားသည့် နောင်ချိုမြို့ကို မြန်မာ့တပ်မတော်က ၂၀၂၅ ခုနှစ်၊ ဇူလိုင် ၁၆ ရက်တွင် ပြန်လည်ထိန်းချုပ်ခဲ့ပြီး ကျောက်မဲမြို့အား ဆက်လက် ထိုးစစ်ဆင်ခဲ့သည်။
ထို့နောက် နောင်ချို ဂုတ်တွင်းတံတားနှင့် ဂုတ်ထိပ်မီးရထားလမ်း နေရာတစ်ဝိုက်မှာ ခံစစ်ပြင်၍ TNLA နှင့် PDF ပူးပေါင်းတပ်ဖွဲ့များက တိုက်ခိုက်နေခြင်းကြောင့် ဂုတ်ထိပ်တံတား တောင်ဘက် ၈ ကီလိုမီတာခန့် အကွာနေရာမှ တဆင့် နမ့်ပန်စီချောင်းကို ဖြတ်သန်း၍ နောက်ကျောကနေ နောင်ပိတ်ကျေးရွာက ဝင်ရောက် တိုက်ခိုက်ခဲ့သည်။
ထို့ကြောင့် ၂၀၂၅ ခုနှစ်၊ ဩဂုတ် ၁၉ ရက်တွင် ခဲတုံကြိုင်ကျေးရွာ၊ ၂၁ ရက်တွင် ကောင်းပိုကျေးရွာ၊ ၂၂ ရက်တွင် ထန်းတပင်ကျေးရွာ၊ ၂၃ ရက်တွင် ပန်တိကျေးရွာ၊ ၂၄ ရက်တွင် နောင်ပိတ်ကျေးရွာ၊ ပင်ပေါကျေးရွာနှင့် ဇီးပင်စခန်း ကျေးရွာ၊ ၂၅ ရက်တွင် ကျောင်းကုန်းကျေးရွာ၊ ၂၆ ရက်တွင် စန္ဒမုနိကျောင်းတိုက်၊ ၂၇ ရက်တွင် နောင်ပစ်လမ်းခွဲနှင့် ဂုတ်တွင်းတံတား၊ ၂၈ ရက်တွင် ရှုခင်းသာ၊ ၂၉ ရက်တွင် ဂုတ်ထိပ်တံတားနှင့် အဆိုပါ ဒေသတစ်ဝိုက်တို့ကို ပြန်လည် သိမ်းပိုက်ထိန်းချုပ်ခဲ့သည်ဟု မြန်မာ့တပ်မတော်က ထုတ်ပြန်ခဲ့သည်။
အဆိုပါ စစ်ဆင်ရေးသည် ၁၂ ရက် ကြာခဲ့ကြောင်း၊ ထိုစစ်ဆင်ရေးအတွင်း တိုက်ပွဲကြီး/ငယ် ၄၇ ကြိမ်ဖြစ်ပွားခဲ့ပြီး လက်နက်မျိုးစုံ ၂၃ လက် သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားသည်။
နောင်ချိုမြို့သည် မန္တလေး-လားရှိုး-မူဆယ်- ဂျယ်ခေါင်(တရုတ်ပြည်) ကုန်သွယ်ရေးလမ်းကြောင်းပေါ်တွင် တည်ရှိ ပြီး ဂုတ်တွင်းတံတားနှင့် ဂုတ်ထိပ်မီးရထားလမ်းသည်လည်း ကုန်သွယ်ရေးလမ်းကြောင်းပေါ်က အရေးပါသော နေရာများဖြစ်သည်။
