CNI News
၂၀၂၅ ခုနှစ်၊ ဩဂုတ် ၃၀
နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် တရုတ်နိုင်ငံသို့ သွားရောက်မည့် ခရီးစဉ်ကို ယနေ့ (ဩဂုတ် ၃၀ ရက်) နံနက်ပိုင်းက စတင်ခဲ့ကြောင်း သိရသည်။
အဆိုပါ တရုတ် ခရီးစဉ်အတွင်းမှာ တရုတ်သမ္မတရှီကျင့်ဖျင်၊ တရုတ်အစိုးရအဖွဲ့ တာဝန်ရှိသူများ အပါအဝင် ကမ္ဘာ့ခေါင်းဆောင်များဖြင့် တွေ့ဆုံ ဆွေးနွေးသွားရန် ရှိကြောင်း နေပြည်တော်ဘက်က သတင်းထုတ်ပြန်ထားသည်။
ဗိုလ်ချုပ်မှူးကြီးမင်းအောင်လှိုင်သည် တရုတ်နိုင်ငံ၊ ထျန်းကျင်းမြို့မှာ ကျင်းပမည့် ရှန်ဟိုင်းပူးပေါင်းဆောင်ရွက်မှုအဖွဲ့ ထိပ်သီးအစည်းအဝေး (Shanghai Cooperation Organisation – SCO SUMMIT 2025) ကို တက်ရောက် မည်ဖြစ်သလို ဘေဂျင်းမြို့မှာ ကျင်းပမည့် တရုတ်ပြည်သူများ၏ ဂျပန်ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ်ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားကိုလည်း တက်ရောက်မည် ဖြစ်သည်။
အဆိုပါ တရုတ်ခရီးစဉ်အတွင်းမှာ ဗိုလ်ချုပ်မှူးကြီးမင်းအောင်လှိုင်နှင့်အတူ တပ်မတော်(ကြည်း၊ရေ၊လေ) ညှိနှိုင်းကွပ်ကဲရေးမှူး ဗိုလ်ချုပ်ကြီး ကျော်စွာလင်း၊ တပ်မတော်စစ်ဘက်ဆိုင်ရာလုံခြုံရေးအရာရှိချုပ် ဗိုလ်ချုပ်ကြီးရဲဝင်းဦး ၊ နိုင်ငံခြားရေးဝန်ကြီး ဦးသန်းတို့လည်း လိုက်ပါသွားသည်။
ဗိုလ်ချုပ်မှူးကြီးမင်းအောင်လှိုင်သည် တရုတ်သမ္မတရှီကျင့်ဖျင်နှင့် ၂၀၂၅ ခုနှစ်၊ မေလ ၉ ရက်က မော်စကိုမြို့ (ရုရှားနိုင်ငံ)တွင်လည်းကောင်း၊ အိန္ဒိယဝန်ကြီးချုပ် မိုဒီနှင့် ၂၀၂၅ ခုနှစ်၊ ဧပြီ ၄ ရက်က ဘန်ကောက်မြို့(ထိုင်းနိုင်ငံ) တွင်လည်းကောင်း၊ ရုရှားသမ္မတ ပူတင်နှင့် ၂၀၂၅ ခုနှစ်၊ မတ်လ ၄ ရက်က မော်စကိုမြို့(ရုရှားနိုင်ငံ)တွင်လည်း ကောင်း တွေ့ဆုံ ဆွေးနွေးထားကြသည်။
