CNI News
၂၀၂၅ ခုနှစ်၊ ဩဂုတ် ၃၀

တရုတ်နိုင်ငံသို့ ရောက်ရှိနေသော ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တရုတ်သမ္မတ ရှီကျင့်ဖျင်တို့ ၂၀၂၅ ခုနှစ်၊ ဩဂုတ် ၃၀ ရက်က တီယန်ကျင်းမြို့ ရှိ တီယန်ကျင် ဧည့်ဂေဟာ၌ တွေ့ဆုံဆွေးနွေးခဲ့ကြသည်။

သမ္မတ ရှီကျင့်ဖျင်နှင့် ဗိုလ်ချုပ်မှူးကြီးမင်းအောင်လှိုင်တို့ မည်သည့် ကိစ္စရပ်များ ဆွေးနွေးမလဲဆိုသည်ကို ပြည်တွင်း/ပြည်ပမှ စောင့်ကြည့်လေ့လာနေကြသည်။

တရုတ်သမ္မတ ရှီကျင့်ဖျင်က “ တရုတ်နှင့် မြန်မာသည် ခိုင်မာသည့် ဆွေမျိုးပေါက်ဖော် ဆက်ဆံရေးရှိသည့် အိမ်နီးချင်း နိုင်ငံများဖြစ်ပြီး တရုတ်နိုင်ငံအနေဖြင့် မြန်မာနိုင်ငံ၏ ဖွံ့ဖြိုးတိုးတက်ရေးနှင့် တည်ငြိမ်ရေးကို အမြဲ ထောက်ခံ ရပ်တည် အားပေးလျက်ရှိကြောင်း၊ မြန်မာနိုင်ငံ၏ နိုင်ငံရေး တည်ဆောက်မှုများကိုလည်း ထောက်ခံပြီး မြန်မာပြည်သူလူထု ဖွံ့ဖြိုးတိုးတက်မှုနှင့် နှစ်နိုင်ငံ အေးအတူပူအမျှ အသိုက်အဝန်း တည်ဆောက်ရေးကို ခိုင်မာစွာ ရပ်တည်လျက်ရှိကြောင်း၊ နှစ်နိုင်ငံငြိမ်းချမ်းစွာ အတူယှဉ်တွဲနေထိုင်စေ မူကြီး (၅)ရပ်အတိုင်း ဆက်လက် ရပ်တည် ဆောင်ရွက်သွားမည်”ဟု ပြောကြားခဲ့သည်။

ထို့နောက် ဗိုလ်ချုပ်မှူးကြီးမင်းအောင်လှိုင်က ရှန်ဟိုင်းပူးပေါင်းဆောင်ရွက်ရေး ညီလာခံသည် နိုင်ငံတကာ ပူးပေါင်း ဆောင်ရွက်မှုကို မြှင့်တင်ပေးနိုင်မည့် အလေးထားရသော ညီလာခံဖြစ်ကြောင်း၊ မြန်မာနိုင်ငံအနေဖြင့် ၂၀၂၃ ခုနှစ်၊ မေလတွင် SCO ၏ ဆွေးနွေးဖက်နိုင်ငံ ဖြစ်လာပြီး အစည်းအဝေးများ စတင်တက်ရောက်ခဲ့ကြောင်း၊ အဖွဲ့ဝင်နိုင်ငံ ဖြစ်လာစေရေး တရုတ်နိုင်ငံအနေဖြင့် ဆက်လက် ထောက်ခံပေးစေလိုကြောင်း၊ ယခုတွေ့ဆုံ ဆွေးနွေးမှုမှသည် နှစ်နိုင်ငံအကြား ကောင်းမွန်သည့် ဆက်ဆံရေးကို ပိုမို အရှိန်အဟုန်မြှင့်တင် ဆောင်ရွက်သွား နိုင်မည်ဟု ယုံကြည်ပါကြောင်း ပြောကြားခဲ့သည်။

၂၀၂၅ ခုနှစ်၊ ဩဂုတ် ၃၀ ရက်က တီယန်ကျင်းမြို့ ရှိ တီယန်ကျင် ဧည့်ဂေဟာ၌ တရုတ်သမ္မတရှီကျင့်ဖျင်နဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

ထို့ပြင် မြန်မာနိုင်ငံ၏ ငြိမ်းချမ်းရေး လုပ်ငန်းစဉ်များ၌ ပူးပေါင်းဆောင်ရွက်ရေးကိစ္စရပ်များ၊ ကုန်သွယ်မှု မြှင့်တင် ရေးဆိုင်ရာ ကိစ္စရပ်များ၊ OBOR စီမံကိန်းနှင့် မြန်မာစီးပွားရေးစင်္ကြန်(CMEC)၌ ပါဝင်သည့် စီမံကိန်းများ အရှိန် အဟုန် မြှင့်တင် ဆောင်ရွက်ရေးဆိုင်ရာကိစ္စရပ်များ၊ သဘာဝ သယံဇာတများအား အကျိုးရှိစွာ အသုံးပြုနိုင်ရေး ဆိုင်ရာ ကိစ္စရပ်များ၊ မန္တလေးငလျင်ကြီးနှင့် ပတ်သက်၍ အကူအညီ ပေးရေးဆိုင်ရာ ကိစ္စရပ်များ၊ နိုင်ငံတကာ မျက်နှာစာ၌ တရုတ်နိုင်ငံ၏ မြန်မာနိုင်ငံအပေါ် ထောက်ခံအားပေး ရပ်တည်ချက်အပေါ် အထူးအလေးထားမှုနှင့် နှစ်နိုင်ငံအကြား ဆက်ဆံရေး ပိုမိုအရှိန်မြှင့်တင် နိုင်ရေးဆိုင်ရာ ကိစ္စရပ်များ၊ မြန်မာနိုင်ငံတွင် ဒီဇင်ဘာ ၂၈ ရက်၌ စတင်ကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေးနှင့် နိုင်ငံတကာ ရွေးကောက်ပွဲ စောင့်ကြည့်လေ့လာရေးအဖွဲ့များ ဖိတ်ခေါ်ထားသည့် အခြေအနေများနှင့်ပတ်သက်၍ ၎င်းက ပြန် လည် ဆွေးနွေးခဲ့ကြောင်း သိရသည်။

တရုတ်သမ္မတရှီကျင့်ဖျင်က ၂၀၂၅ ခုနှစ်၊ မေလတွင် မော်စကိုမြို့၌ တရုတ်- မြန်မာ ခေါင်းဆောင်နှစ်ဦး တွေ့ဆုံ ဆွေးနွေးစဉ် သဘောတူညီခဲ့သည့် ဆက်လက် ဆောင်ရွက်ရန် ကိစ္စရပ်များ၊ မြန်မာနိုင်ငံ၏ နိုင်ငံရေး၌ ပြည်ပမှ ဝင်ရောက်စွက်ဖက်မှုကို ဆန့်ကျင်မှု၊ တရုတ်-မြန်မာ မဟာဗျူဟာမြောက် ပူးပေါင်းဆောင်ရွက်မှု မြှင့်တင်ရေး အတွက် ပူးပေါင်းဆောင်ရွက်ရမည့် ကိစ္စရပ်များ၊ မြန်မာနိုင်ငံ၏ တည်ငြိမ်အေးချမ်းရေးအတွက် တရုတ်နိုင်ငံ၏ အပြုသဘောဆောင်သော ရပ်တည်ချက်များနှင့် ဆက်လက် ဆောင်ရွက်သွားမည့် ကိစ္စရပ်များ၊ နိုင်ငံတကာ မျက်နှာစာ၊ ဒေသတွင်း အဖွဲ့အစည်းများနှင့် ဆက်ဆံရေးတို့ ၌ မြန်မာနိုင်ငံအနေဖြင့် သိက္ခာမြင့်မားစွာ ရပ်တည်နိုင် ရေး ကိစ္စရပ်များကို ပြန်လည် ဆွေးနွေးခဲ့သည်။ 

အလားတူ မြန်မာနိုင်ငံ၏ ပါတီစုံဒီမိုကရေစီ အထွေထွေရွေးကောက်ပွဲအတွက် ပြင်ဆင်နေမှုများအပေါ် တရုတ် နိုင်ငံ၏ ထောက်ခံအားပေးမှုနှင့် သံတမန်ရေးရာအရ ဆက်လက် ဆောင်ရွက်မည့် ကိစ္စရပ်များ၊ SCO အဖွဲ့ဝင်နိုင်ငံ အဖြစ် ထောက်ခံပေးမည့် အခြေအနေများ၊ နှစ်နိုင်ငံကဏ္ဍပေါင်းစုံ ပူးပေါင်းဆောင်ရွက်ရေးအတွက် သက်ဆိုင်ရာ ဌာနများအလိုက် ဆက်လက်ဆွေးနွေး ဆောင်ရွက်သွားမည့် အခြေအနေများနှင့် ပတ်သက်ပြီးလည်း ဆွေးနွေးခဲ့ ကြောင်း သိရသည်။

တရုတ်သမ္မတ ရှီကျင့်ဖျင်နှင့် တွေ့ဆုံ ဆွေးနွေးပွဲသို့ ဗိုလ်ချုပ်မှူးကြီးမင်းအောင်လှိုင်နှင့်အတူ ကော်မရှင်အတွင်း ရေးမှူး တွဲဖက်အမှုဆောင်ချုပ် ဗိုလ်ချုပ်ကြီးရဲဝင်းဦး၊ နိုင်ငံခြားရေးဝန်ကြီး ဦးသန်းဆွေ၊ ကော်မရှင်အဖွဲ့ဝင် ညှိနှိုင်းကွပ်ကဲရေးမှူး(ကြည်း၊ရေ၊လေ) ဗိုလ်ချုပ်ကြီးကျော်စွာလင်းတို့ တက်ရောက်ခဲ့သည်။

တရုတ်ဘက်ကတော့ တရုတ်သမ္မတ ရှီကျင့်ဖျင်နှင့်အတူ တရုတ်နိုင်ငံခြားရေးဝန်ကြီး ဝမ်ယိ၊ မြန်မာနိုင်ငံဆိုင်ရာ တရုတ်သံအမတ်ကြီး မစ္စစ်မာကျားနှင့် အစိုးရအဖွဲ့တာဝန်ရှိသူများ တက်‌ရောက်ခဲ့ကြသည်။