CNI News
၂၀၂၅ ခုနှစ်၊ ဩဂုတ် ၃၀

တရုတ်နိုင်ငံ၊ ထျန်းကျင်းမြို့မှာ တရုတ်သမ္မတ ရှီကျင့်ဖျင်နှင့် မြန်မာနိုင်ငံ ယာယီသမ္မတ ဗိုလ်ချုပ်မှူးကြီးမင်းအောင်လှိုင်တို့ ၂၀၂၅ ခုနှစ်၊ ဩဂုတ် ၃၀ ရက်က တွေ့ဆုံ ဆွေးနွေးခဲ့သည်ဟု ဆင်ဟွာသတင်းဌာနက ဖော်ပြခဲ့သည်။

သို့သော် မည်သည့် အကြောင်းအရာများ ဆွေးနွေးခဲ့သည်ကိုတော့ ဖော်ပြမထားပေ။

နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို မြန်မာနိုင်ငံ၏ ယာယီသမ္မတအဖြစ် သုံးနှုန်းကာ ဖော်ပြခဲ့သည်။

လက်ရှိတွင် ဗိုလ်ချုပ်မှူးကြီးမင်းအောင်လှိုင်သည် မြန်မာနိုင်ငံ၌ ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ တပ်မတော်ကာကွယ်ရေးဦးစီးချုပ် စသည့် ရာထူးများကို ရယူထားသည်။

ဗိုလ်ချုပ်မှူးကြီးမင်းအောင်လှိုင်သည် တရုတ်သမ္မတ ရှီကျင့်ဖျင်၏ ဖိတ်ကြားချက်အရ တရုတ်နိုင်ငံသို့ အလုပ်သဘောဖြင့် ဩဂုတ် ၃၀ ရက်က ထွက်ခွာ သွားခဲ့သည်။

တရုတ်ခရီးစဉ်အတွင်းမှာ တရုတ်သမ္မတ ရှီကျင့်ဖျင်၊ တရုတ်အစိုးရအဖွဲ့တာဝန်ရှိသူများ အပါအဝင် ကမ္ဘာ့နိုင်ငံများမှ ခေါင်းဆောင် များဖြင့် သီးခြားစီ တွေ့ဆုံ ဆွေးနွေးမှုများ ပြုလုပ်သွားရန် ရှိကြောင်း နေပြည်တော်နှင့်နီးစပ်သူများက ပြောသည်။

ဗိုလ်ချုပ်မှူးကြီးမင်းအောင်လှိုင်သည် တရုတ်နိုင်ငံ၊ ထျန်းကျင်းမြို့မှာ ကျင်းပမည့် ရှန်ဟိုင်းပူးပေါင်းဆောင်ရွက်မှု အဖွဲ့ ထိပ်သီးအစည်းအဝေး (Shanghai Cooperation Organisation – SCO SUMMIT 2025) ကို တက်‌ရောက် မည်ဖြစ်သလို ဘေဂျင်းမြို့မှာ ကျင်းပမည့် တရုတ်ပြည်သူများ၏ ဂျပန်ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ် ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားကိုလည်း တက်ရောက် မည် ဖြစ်သည်။