CNI News
၂၀၂၅ ခုနှစ်၊ ဩဂုတ် ၃၀

မြန်မာနိုင်ငံကို ရှန်ဟိုင်းပူးပေါင်းဆောင်ရွက်ရေး(SCO)အဖွဲ့ဝင် နိုင်ငံဖြစ်ရေး တရုတ်သမ္မတရှီကျင့်ဖျင်နှင့် ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ တွေ့ဆုံ ဆွေးနွေးကြသည်။

၂၀၂၅ ခုနှစ်၊ ဩဂုတ် ၃၀ ရက်က တရုတ်နိုင်ငံ၊ တီယန်ကျင်းမြို့ရှိ တီယန်ကျင်းဧည့်ဂေဟာ၌ ၎င်းတို့နှစ်ဦး တွေ့ဆုံ ဆွေးနွေးကြခြင်း ဖြစ်သည်။

တရုတ်သမ္မတ ရှီကျင့်ဖျင်က SCO အဖွဲ့ဝင်နိုင်ငံအဖြစ် ထောက်ခံပေးမည့် အခြေအနေများကို ချပြဆွေးနွေးခဲ့သည်။

၎င်းက “ မြန်မာနိုင်ငံသည် SCO အဖွဲ့၏ ဆွေးနွေးဖက် နိုင်ငံဖြစ်ပြီး ဖက်ဆစ်တော်လှန်ရေးတွင်လည်း ပါဝင်ခဲ့သည့် နိုင်ငံဖြစ်ကြောင်း၊ တရုတ်နှင့်မြန်မာသည် ခိုင်မာသည့် ဆွေမျိုးပေါက်ဖော် ဆက်ဆံရေးရှိသည့် အိမ်နီးချင်းနိုင်ငံများ ဖြစ်ပြီး တရုတ်နိုင်ငံအနေဖြင့် မြန်မာနိုင်ငံ၏ ဖွံ့ဖြိုးတိုးတက်ရေးနှင့်တည်ငြိမ်ရေးကို အမြဲထောက်ခံ ရပ်တည်အား ပေးလျက်ရှိကြောင်း၊ မြန်မာနိုင်ငံ၏ နိုင်ငံရေးတည်ဆောက်မှုများကိုလည်း ထောက်ခံပြီး မြန်မာပြည်သူလူထု ဖွံ့ဖြိုးတိုးတက်မှုနှင့် နှစ်နိုင်ငံ အေးအတူပူအမျှ အသိုက်အဝန်း တည်ဆောက်ရေးကို ခိုင်မာစွာ ရပ်တည်လျက်ရှိ ကြောင်း၊ နှစ်နိုင်ငံ ငြိမ်းချမ်းစွာ အတူယှဉ်တွဲ နေထိုင်ရေးမူကြီး ၅ ရပ်အတိုင်း ဆက်လက် ရပ်တည် ဆောင်ရွက် သွားမည်”ဟု ပြောသည်။

မြန်မာနိုင်ငံအနေဖြင့် ၂၀၂၃ ခုနှစ်၊ မေလတွင် SCO ၏ ဆွေးနွေးဖက် နိုင်ငံဖြစ်လာပြီး အစည်းအဝေးများ စတင် တက်ရောက်ခဲ့ကြောင်း၊ အဖွဲ့ဝင်နိုင်ငံ ဖြစ်လာစေရေး တရုတ်နိုင်ငံအနေဖြင့် ဆက်လက် ထောက်ခံပေးစေလို ကြောင်း၊ ယခုတွေ့ဆုံ ဆွေးနွေးမှုမှသည် နှစ်နိုင်ငံအကြား ကောင်းမွန်သည့် ဆက်ဆံရေးကို ပိုမိုအရှိန်အဟုန် မြှင့်တင် ဆောင်ရွက်သွားနိုင်မည်ဟု ယုံကြည်ကြောင်း ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

ထို့နောက် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များ၌ ပူးပေါင်းဆောင်ရွက်ရေးကိစ္စရပ်များ၊ ကုန်သွယ်မှု မြှင့် တင်ရေးဆိုင်ရာ ကိစ္စရပ်များ၊ OBOR စီမံကိန်းနှင့် မြန်မာစီးပွားရေးစင်္ကြန်(CMEC)၌ ပါဝင်သည့် စီမံကိန်းများ အရှိန် အဟုန်မြှင့်တင် ဆောင်ရွက်ရေးဆိုင်ရာကိစ္စရပ်များ၊ သဘာဝ သယံဇာတများအား အကျိုးရှိစွာ အသုံးပြုနိုင်ရေး ဆိုင်ရာကိစ္စရပ်များကိုလည်း ဗိုလ်ချုပ်မှူးကြီးမင်းအောင်လှိုင်က ချပြ ဆွေးနွေးခဲ့သည်။

ရှန်ဟိုင်းပူးပေါင်းဆောင်ရွက်ရေး(SCO)ကို ၂၀၀၁ ခုနှစ်၊ ဇွန်လ ၁၅ ရက်က စတင် ဖွဲ့စည်းခဲ့ပြီး လုံခြုံရေး၊ နိုင်ငံရေး၊ စီးပွားရေး ပူးပေါင်းဆောင်ရွက်ကြသည်။

လက်ရှိ အဖွဲ့ဝင်နိုင်ငံများ တရုတ်၊ ကာဇက်စတန်၊ ကာဂျစ္စတန်၊ ရုရှား၊ တာဂျစ်ကစ္စတန်၊ ဥဇဘက်ကစ္စတန်၊ အိန္ဒိယ၊ ပါကစ္စတန်၊ အီရန်၊ ဘယ်လာရုစ် တို့ဖြစ်ပြီး မွန်ဂိုးလီးယားနိုင်ငံကတော့ လေ့လာသူနိုင်ငံအဖြစ် ရှိနေသည်။

ထို့နောက် မြန်မာ၊ သီရိလင်္ကာ၊ တူရကီ၊ ကမ္ဘောဒီးယား၊ အဇာဘိုင်ဂျန်၊ နီပေါ၊ အာမေးနီးယား၊ အီဂျစ်၊ ကာတာ၊ ဆော်ဒီ၊ ကူဝိတ်၊ မော်လဒိုက်၊ အာရပ်စော်ဘွားပြည်ထောင်စု၊ ဘာရိန်း စသည့်နိုင်ငံများကတော့ ဆွေးနွေးဖက်နိုင်ငံ များဖြစ်သည်။