CNI News
၂၀၂၅ ခုနှစ်၊ ဩဂုတ် ၃၁ 

တရုတ်နိုင်ငံနှင့်အတူ အရည်အသွေးမြင့် “Belt and Road” ကို ပူးတွဲတည်ဆောက်ရန် ဆန္ဒရှိကြောင်း ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

တရုတ်နိုင်ငံသို့ ရောက်ရှိနေသော ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တရုတ်သမ္မတ ရှီကျင့်ဖျင်တို့ ၂၀၂၅ ခုနှစ်၊ ဩဂုတ် ၃၀ ရက်က တီယန်ကျင်းမြို့ ရှိ တီယန်ကျင် ဧည့်ဂေဟာ၌ တွေ့ဆုံဆွေးနွေးခဲ့ကြသည်။

ယာယီသမ္မတ ဗိုလ်ချုပ်မှူးကြီးမင်းအောင်လှိုင်က “ မြန်မာနိုင်ငံသည် တရုတ်တစ်နိုင်ငံတည်းမူဝါဒ（One China Policy）ကို ခိုင်ခိုင်မာမာ လက်ကိုင်စွဲထားမည်ဖြစ်ကြောင်း၊ တရုတ်နိုင်ငံနှင့်အတူ အရည်အသွေးမြင့် “Belt and Road” ကို ပူးတွဲတည်ဆောက်ရန်၊ ကုန်သွယ်မှု၊ ရင်းနှီးမြှုပ်နှံမှု၊ စွမ်းအင်၊ အခြေခံအဆောက်အအုံစသည့် နယ်ပယ် များတွင် ပူးပေါင်းဆောင်ရွက်မှုများ ချဲ့ထွင်ကာ နှစ်နိုင်ငံပြည်သူများအတွက် အကျိုးပြုမှုများ ပိုမိုဆောင်ကြဉ်း ပေး သွားရန် ဆန္ဒရှိကြောင်း၊ မြန်မာနိုင်ငံသည် ရှန်ဟိုင်း ပူးပေါင်းဆောင်ရွက်ရေးအဖွဲ့၏ ဆွေးနွေးဖက်အဖြစ် SCO ဖွံ့ဖြိုးတိုးတက်ရေးတွင် တက်ကြွစွာ ပါဝင်ကူညီရန် ဆန္ဒရှိပါကြောင်း” ပြောကြားခဲ့သည်။

ထို့နောက် တရုတ်သမ္မတရှီကျင့်ဖျင်က နှစ်နိုင်ငံသည် တရုတ်-မြန်မာ စီးပွားရေးစင်္ကြံ၏ အဓိကစီမံကိန်းများကို တွန်းအားပေးပြီး စီးပွားရေးနှင့် ကုန်သွယ်မှု ပူးပေါင်းဆောင်ရွက်မှုကို မြှင့်တင်သွားကြရမည် ဖြစ်ကြောင်း၊ တရုတ်-မြန်မာ နယ်စပ်ဒေသ တည်ငြိမ်အေးချမ်းရေးကို အတူတကွထိန်းသိမ်း၍ မြန်မာနိုင်ငံရှိ တရုတ်စီမံကိန်းမှ ဝန်ထမ်း များ၊ အဖွဲ့အစည်းများနှင့် စီမံကိန်းများ၏ ဘေးကင်းလုံခြုံမှုကို အာမခံပေးရမည်ဖြစ်ကြောင်း ပြောကြားခဲ့သည်ဟု တရုတ်သံရုံးက ထုတ်ပြန်ခဲ့သည်။

၎င်းက “ တရုတ်နိုင်ငံအနေဖြင့် မြန်မာနိုင်ငံက မိမိနိုင်ငံ အခြေအနေများနှင့် ကိုက်ညီသည့် ဖွံ့ဖြိုးတိုးတက်ရေး လမ်းစဉ်ကို လျှောက်လှမ်းခြင်း၊ နိုင်ငံတော်၏ အချုပ်အခြာအာဏာ၊ လုံခြုံရေး၊ ဖွံ့ဖြိုးတိုးတက်ရေး အကျိုးစီးပွား များကို ကာကွယ်စောင့်ရှောက်ခြင်းကို အားပေးထောက်ခံ လျက်ရှိပါကြောင်း၊ တရုတ်နိုင်ငံသည် မြန်မာနိုင်ငံ ငလျင်အပြီး ပြန်လည်တည်ဆောက်ရေးလုပ်ငန်း၊ ပြည်သူ့လူနေမှုဘဝမြှင့်တင်ခြင်း၊ မြန်မာနိုင်ငံ စည်းလုံး ညီညွတ် ပြီး ပြည်တွင်းနိုင်ငံရေး အင်အားစုများစွာကို စုစည်း၍ တည်ငြိမ်မှုနှင့် ဖွံ့ဖြိုးတိုးတက်မှု ပြန်လည်ရရှိစေရေးကို လည်း ထောက်ခံလျက်ရှိကြောင်း၊ နယ်စပ်ဖြတ်ကျော် ရာဇဝတ်မှုများကို ပူးတွဲတိုက်ဖျက်ခြင်း၊ ငြိမ်းချမ်းစွာ အတူ ယှဉ်တွဲနေထိုင်ရေးမူကြီး(၅) ရပ်၏ စိတ်ဓာတ်ကို ပြန့်ပွားပြီး ကုလသမဂ္ဂကို ဗဟိုပြုသော  နိုင်ငံတကာစနစ်အား  ပူးပေါင်းကာကွယ် သွားကြရမည်ဖြစ်ကြောင်း” ပြောကြားခဲ့သည်။ 

လက်ရှိ မြန်မာနိုင်ငံတစ်ဝန်းမှာ မြန်မာ့တပ်မတော်နှင့် တော်လှန်ရေး အင်အားစုများကြား တိုက်ပွဲများ အပြင်း အထန် ဖြစ်ပွားနေပြီ တရုတ်-မြန်မာ ကုန်သွယ်ရေးလမ်းကြောင်းများ ရပ်တန့်ထားရသလို တရုတ်စီမံကိန်းများနှင့် ရင်းနှီးမြှုပ်နှံမှုများအား ဆန့်ကျင်မှုများ ရှိနေကြသည်။

ထို့ကြောင့် တရုတ်အစိုးရသည် မြန်မာခေါင်းဆောင်များနှင့် မြန်မာကိုယ်စားလှယ်များဖြင့် တွေ့ဆုံတိုင်း တရုတ်နိုင်ငံသားများ၊ တရုတ်ရင်းနှီးမြှုပ်နှံမှုများနှင့် စီမံကိန်းများ၊ တရုတ်ကုမ္ပဏီများ၏ လုံခြုံရေးကို အာမခံ ပေးရန် တောင်းဆိုလျက်ရှိသည်။

တရုတ်နိုင်ငံသည် အစဥ်အမြဲ မြန်မာနိုင်ငံ၏ အိမ်နီးချင်းကောင်း မိတ်ဆွေကောင်းဖြစ်ကြောင်း၊ ‌ မြန်မာနိုင်ငံ၏ စီးပွားရေးနှင့် လူမှုရေးဖွံ့ဖြိုးတိုးတက်မှုအတွက် ရေရှည်အကူအညီများ ပေးလျက်ရှိကြောင်း၊ ငလျင်အပြီး ပြန်လည် တည်ဆောက်ရေးကို ထောက်ပံ့ပေးကြောင်းနှင့် မြန်မာနိုင်ငံ မြောက်ပိုင်း ငြိမ်းချမ်းရေးနှင့် တည်ငြိမ်ရေးအတွက် အပြုသဘောဆောင်သော အခန်းကဏ္ဍမှ ပါဝင်ကြောင်း ယာယီသမ္မတ ဗိုလ်ချုပ်မှူးကြီးမင်းအောင်လှိုင်က ပြော သည်။ 

ထို့နောက် နှစ်ဦးနှစ်ဖက်မှ အကောက်ခွန်နှင့် သတင်းမီဒီယာစသည့် နယ်ပယ်များ၌ နှစ်နိုင်ငံ ပူးပေါင်းဆောင်ရွက် ရေး လက်မှတ်ရေးထိုးခဲ့ကြသည်။

ဗိုလ်ချုပ်မှူးကြီးမင်းအောင်လှိုင်သည် တရုတ်သမ္မတရှီကျင့်ဖျင်၏ ဖိတ်ကြားချက်အရ တရုတ်နိုင်ငံသို့ ဩဂုတ် ၃၀ ရက်က ‌ရောက်ရှိနေပြီး တရုတ်သမ္မတရှီကျင့်ဖျင်နှင့်လည်းကောင်း၊ ဩဂုတ် ၃၁ ရက်တွင် တရုတ်-မြန်မာ စီးပွားရေး လုပ်ငန်းရှင်များဖြင့်လည်းကောင်း တွေ့ဆုံ ဆွေးနွေးထားသည်။

ဗိုလ်ချုပ်မှူးကြီးမင်းအောင်လှိုင်သည် တရုတ်နိုင်ငံ၊ ထျန်းကျင်းမြို့မှာ ကျင်းပမည့် ရှန်ဟိုင်းပူးပေါင်းဆောင်ရွက်မှု အဖွဲ့ ထိပ်သီးအစည်းအဝေး (Shanghai Cooperation Organisation – SCO SUMMIT 2025) ကို တက်‌ရောက် မည်ဖြစ်သလို ဘေဂျင်းမြို့မှာ ကျင်းပမည့် တရုတ်ပြည်သူများ၏ ဂျပန်ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ် ဆန့်ကျင်ရေးစစ်ပွဲ အောင်နိုင်ခြင်းနှစ် (၈၀) ပြည့် အထိမ်းအမှတ် စစ်ရေးပြ အခမ်းအနားကိုလည်း တက်ရောက် မည် ဖြစ်သည်။