CNI News
၂၀၂၄ ခုနှစ်၊ ဇူလိုင် ၁၈
မြန်မာနိုင်ငံတွင် နစကမှ ကျင်းပမည့် ရွေးကောက်ပွဲအပေါ် တရုတ်အနေဖြင့် မည်ကဲ့သို့ သဘောထားသလဲ ဆိုသည်နှင့် ပတ်သက်၍ နိုင်ငံရေးအသိုင်းအဝိုင်းကြား သုံးသပ်ဆွေးနွေးလျက်ရှိနေသည်။
ပြီးခဲ့သည့် ဇူလိုင်လ အစောပိုင်းက ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အစည်းအဝေးကို တက်ရောက် ခဲ့သည့် နစကဒုဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်း၏ တရုတ်ပြည်ခရီးစဉ်မှာ ရွေးကောက်ပွဲ ကျင်းပနိုင်ရေးနှင့် ပတ်သက်၍ တရုတ်နှင့် ဆွေးနွေးမှုများ ရှိခဲ့သည်။
ရွေးကောက်ပွဲသည် မြန်မာပြည် ငြိမ်းချမ်းရေးအတွက် အဖြေတစ်ခု ဖြစ်မည်ဆိုပါက တရုတ်အနေဖြင့် ရွေးကောက်ပွဲ ကျင်းပစေလိုကြောင်း ကရင်အမျိုးသားဒီမိုကရက်တစ်ပါတီ - ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။
၎င်းက “ရွေးကောက်ပွဲက ငြိမ်းချမ်းရေးအတွက် အဖြေတစ်ခုရယ်လို့ ဖြစ်မယ်ဆိုရင်တော့ သူတို့ (တရုတ်) ကတော့ ကျနော့်စိတ်ထင် ရွေးကောက်ပွဲ လုပ်စေချင်မှာပဲ၊ ရွေးကောက်ပွဲကြောင့် ငြိမ်းချမ်းရေး ဖြစ်ပေါ်လာဖို့တို့ ရှိတယ်ဆို ရင်တော့ သူတို့တော့ ရွေးကောက်ပွဲ ကျင်းပတာကို ကြိုက်မယ်လို့တော့ ထင်တာပဲ၊ ဒါယေဘုယျအားဖြင့် ကျနော် က အဲဒီလိုပဲ သုံးသပ်လိုတယ်လေ” ဟု ပြောသည်။
ဦးသိန်းစိန်နဲ့ ရှီကျင့်ဖျင်ကို တွေ့ရစဉ်
သို့သော်လည်း လက်ရှိ တိုင်းပြည်တွင် ဖြစ်ပွားနေသော လက်နက်ကိုင်ပဋိပက္ခများကြောင့် ရွေးကောက်ပွဲကို မည်သည့် အတိုင်းအတာအထိ လုပ်ဆောင်နိုင်မလဲဆိုသည်ကို မသိရှိနိုင်ကြောင်း မန်းအောင်ပြည့်စိုးက ပြောသည်။
ရွေးကောက်ပွဲမှာ နစက၏ နိုင်ငံရေးထွက်ပေါက် ဖြစ်သလို တရုတ်အနေဖြင့်လည်း ၎င်းတို့၏ အကျိုးစီးပွားအပေါ် မူတည်၍ စဉ်းစားမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာန သို့ ပြောသည်။
၎င်းက “သူက ရွေးကောက်ပွဲကို ပြောနေတဲ့ အဓိပ္ပာယ်က ဒီလိုဗျ၊ ရွေးကောက်ပွဲ တကယ်လုပ်ဖြစ်၊ မလုပ်ဖြစ်က တစ်ပိုင်း၊ သူရွေးကောက်ပွဲကို ပြောနေတဲ့ဟာက သူတို့ အာဏာသိမ်းတာ တရားပါတယ်လို့ ဖြစ်အောင် ပြောနေ တာ၊ သူအာဏာသိမ်းတုန်းက NLD က ရွေးကောက်ပွဲကို မတရားလုပ်လို့ သူတို့က သိမ်းပြီးတော့ တရားမျှတတဲ့ ရွေးကောက်ပွဲတွေ လုပ်ပြီးတော့ တက်လာတဲ့ အစိုးရကို လွှဲပေးပါမယ် ပြောထားတာဖြစ်တာကိုး အဲဒီ လမ်းကြောင်းအတိုင်း သူကဆက်လိုက်လာတာ၊ တရုတ်ကလည်း တကယ်လို့ ရွေးကောက်ပွဲလုပ်ရင် NLD ပါပါဖို့။ ဗမာပြည်မှာရှိတဲ့ နိုင်ငံရေး အင်အားစုတွေ အရေးကြီးတဲ့ အင်အားစုတွေ အကုန်ပါဖို့လိုတော့ ပြောနေတာပဲ၊ အဲဒါကို အပြန်အလှန် ဆွေးနွေးနေကြတယ်ထင်တယ်၊ ဘယ်လောက်အထိ ဖြစ်လာမလဲ၊ ကျမကတော့ စစ်ကောင်စီက လုပ်ပေးမယ့် ရွေးကောက်ပွဲကို ဘယ်သူ့ကိုမှ သိပ်ပြီး စိတ်ကူးမယဉ်စေချင်ဘူး။ တရုတ်က လုပ်ပေး လည်း လုပ်ပေးပေါ့ဗျာ၊ တရုတ်ကလည်း သူ့နိုင်ငံအကျိုးစီးပွားပေါ်က စဉ်းစားပြီး လုပ်တာပေါ့” ဟု ပြောသည်။
နစကသည် ယခုနှစ် အောက်တိုဘာလအတွင်း လူဦးရေနှင့် သန်းခေါင်စာရင်း ကောက်ယူမှာဖြစ်ပြီး လာမည့်နှစ် တွင် အထွေထွေရွေးကောက်ပွဲ ကျင်းပမည်ဖြစ်ကြောင်း ပြောကြားထားသည်။
နစက ထိန်းချုပ်မှုအောက်တွင် ရှိသော ဒေသများကို ရွေးကောက်ပွဲ ကျင်းပပြီး သတ်မှတ်သည့် ရာခိုင်နှုန်းရရှိပါက လွှတ်တော်ခေါ်မည်ဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။
၎င်းက “ခြေနိုင်၊ လက်နိုင်ဖြစ်တဲ့နေရာတွေ အရင်လုပ်မှာပဲ၊ နောက်တော့မှ ခြေနိုင်၊ လက်နိုင်ဖြစ်တဲ့နေရာမှာ တစ်ခါလုပ်၊ လုပ်ပြီးရင်တော့ သတ်မှတ်တဲ့ ခွဲတမ်းရပြီဆိုလို့ရှိရင် လွှတ်တော်မှာ တစ်ဝက်ကျော်ကျော်လောက် ရရင် လွှတ်တော်ခေါ်မှာပဲ၊ ကျန်တဲ့ဟာတွေ ဖြည်းဖြည်း လုပ်ယူသွားလိမ့်မယ်လေ” ဟု ပြောသည်။
ပြည်သူ့ပါတီ(PP)ခေါင်းဆောင် ဦးကိုကိုကြီးကိုတွေ့ရစဉ်
၂၀၀၈ ဖွဲ့စည်းပုံ အခြေခံဥပဒေအရ လွှတ်တော်ကိုယ်စားလှယ် ၂၅ ရာခိုင်နှုန်း ကျင်းပနိုင်ပါက တပ်ကိုယ်စားလှယ် ၂၅ ရာခိုင်နှုန်းဖြင့် ပေါင်းစည်းလျှင် လွှတ်တော်အထမြောက်ကြောင်း၊ ရွေးကောက်ပွဲ ကျင်းပခြင်းဖြင့် နိုင်ငံရေး အကျပ်အတည်းကို ကျော်လွှားလိုကြောင်း နိုင်ငံရေးပါတီများက ပြောသည်။
ပြည်တွင်း/ပြည်ပ သံတမန်အသိုင်းအဝိုင်းကြားမှာတော့ တရုတ်သည် နစက ကျင်းပမည့် ရွေးကောက်ပွဲကို ထောက်ခံသလို ရွေးကောက်ပွဲဖြစ်မြောက်အောင်လည်း ကူညီပေးမည်ဆိုသော သဘောထားများရှိနေကြောင်း သတင်းများထွက်ပေါ်နေသည်။
ထို့နောက် ပြည်ထောင်စုရွေးကောက်ပွဲကော်မရှင်(UEC)တွင် ပါတီမှတ်ပုံတင်ခွင့် ကျထားသည့် ပြည်သူ့ပါတီ(PP)၊ ရခိုင့်ဦးဆောင်ပါတီ(AFP)၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)၊ ရှမ်းနှင့် တိုင်းရင်းသားများ ဒီမိုက ရက်တစ်ပါတီ(ကျားဖြူပါတီ)မှ ခေါင်းဆောင်များလည်း တရုတ်နိုင်ငံသို့ ယခုလအတွင်း သွားရောက်ရန် ရှိနေသည်။
အခြားတစ်ဖက်တွင် နစက ကျင်းပမည့် ရွေးကောက်ပွဲကို အသိအမှတ်ပြုမှာ မဟုတ်ဘဲ မပျက်ပျက်အောင် ဖျက်မည်ဖြစ်ကြောင်း အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလက ပြောကြားထား သည်။
