CNI International News

ဘန်ကောက်၊ ဇူလိုင် ၁၈

ထိုင်းနိုင်ငံ ဘန်ကောက်မြို့ရှိ ကြယ်ငါးပွင့်ဟိုတယ် တစ်ခုတွင် ဇူလိုင် ၁၆ ရက်က သေဆုံးနေသော ဗီယက်နမ် နိုင်ငံသား ၄ ဦးနှင့် တခြား ပြည်ပနိုင်ငံသား ၂ ဦး စုစုပေါင်းအမှုကို ဗီယက်နမ်သံရုံးက ပူးပေါင်း၍ အမှုမှန် ပေါ်ပေါက်ရေး ဖော်ထုတ်မည်ဟု Thai PBS World မှ ဖော်ပြခဲ့သည်။

၎င်းတို့ သေဆုံးမှုနှင့်ပတ်သက်ပြီး စုံစမ်းစစ်ဆေးမှုတွင် ထိုင်းအာဏာပိုင်များနှင့်အတူ ထိုင်းနိုင်ငံရှိ ဗီယက်နမ်သံရုံး က အနီးကပ် ပူးပေါင်းဆောင်ရွက် သွားမည်ဖြစ်ကြောင်း ထုတ်ပြန်ခဲ့သည်။

ထိုင်းနိုင်ငံဆိုင်ရာ ဗီယက်နမ်သံအမတ်ကြီး ဖန်းဗီယက်ဟွန်း(Pham Viet Hung)က ၎င်း၏သံရုံးအနေဖြင့် သေဆုံးသွားသော ဗီယက်နမ်နိုင်ငံသားများ၏ ကျန်ရစ်သူ မိသားစုကို ထောက်ပံ့ကူညီသွားမည်ဟု ပြောကြားခဲ့ သည်။ 

ထိုင်း၀န်ကြီးချုပ် ဆရီသာကို တွေ့ရစဉ်

ဗီယက်နမ်သံရုံးအနေဖြင့် လျင်မြန်ပြီး ထိရောက်သော စုံစမ်းစစ်ဆေးမှု ဖြစ်စေရန် ပူးပေါင်းကူညီပေးသွားမည် ဖြစ်ကြောင်း Vietnam Plus online တွင် ဖော်ပြထားသည်။

ဘန်ကောက်မြို့တော် ပါသူယန်ဝမ်ခရိုင်ရှိ ဟိုတယ်တွင် ဗီယက်နမ် နိုင်ငံသားလေးဦး အပါအဝင် ပြည်ပနိုင်ငံသား ခြောက်ဦး သေဆုံးနေကြောင်း တွေ့ရှိခဲ့သည်။

Vietnam Plus online တွင် ဖော်ပြချက်အရ သံရုံးအနေဖြင့် ထိုင်းအာဏာပိုင်များနှင့် အနီးကပ် ပူးပေါင်း လုပ်ဆောင်လျက်ရှိပြီး သေဆုံးသူများ၏ ကိုယ်ရေးအချက်အလက်များကို ဖော်ထုတ်နိုင်ရန်၊ ၎င်းတို့၏ ကျန်ရစ်သူ မိသားစုဝင်များအား လိုအပ်သော ကူညီထောက်ပံ့မှုများ စီစဉ်ပေးနိုင်ရန်နှင့် လိုအပ်သော နိုင်ငံသား ကာကွယ်ရေး စီမံချက်များ ချမှတ်လုပ်ဆောင်နိုင်ရန်အတွက် ဗီယက်နမ်နိုင်ငံခြားရေးဝန်ကြီးဌာနရှိ သက်ဆိုင်ရာဌာနများနှင့်အတူ ပူးပေါင်းဆောင်ရွက်လျက်ရှိကြောင်း သံအမတ်ကြီးက ပြောကြားခဲ့သည်ဟု ဆိုသည်။

ထိုင်းရဲတပ်ဖွဲ့ကိုတွေ့ရစဉ်

နိုင်ငံကူးလက်မှတ် သတင်းအချက်အလက်များအပေါ် အခြေခံကာ သေဆုံးသူ ဗီယက်နမ်နိုင်ငံသားလေးဦး၏ ကိုယ်ရေးအချက်အလက်များကို ဖော်ထုတ်နိုင်ရန်အတွက် ဗီယက်နမ်၏ လူဝင်မှုကြီးကြပ်ရေးဌာနနှင့် ပူးပေါင်း ဆောင်ရွက်သွားမည်ဖြစ်ကြောင်းလည်း သံအမတ်ကြီးက ပြောကြားခဲ့သည်။

အတည်ပြုပြီးသည်နှင့် တစ်ပြိုင်နက် ၎င်းတို့၏ မိသားစုများကို အကြောင်းကြားကာ အလောင်းများကို ထိုင်း အာဏာပိုင်များထံမှ ပြန်လည်လွှဲပြောင်းရေး လုပ်ငန်းများစဉ်များအား ကူညီဆောင်ရွက်ပေးသွားမည်ဟုလည်း ပြောကြားခဲ့သည်။

ဗီယက်နမ်သံရုံးက ချက်ချင်းတုန့်ပြန် ဆောင်ရွက်မှုအတွက် ထိုင်းဝန်ကြီးချုပ် ဆရီသာ သာဗီဆင်(Srettha Thavisin) နှင့် အခင်းဖြစ်ပွားရာ နေရာရှိ ထိုင်းရဲတပ်ဖွဲ့တာဝန်ရှိသူများကို ကျေးဇူးတင်စကား ပြောကြားခဲ့သည်။

Source: Thai PBS World