CNI News
၂၀၂၅ ခုနှစ်၊ ဖေဖော်ဝါရီ ၁၃
နစကဥက္ကဋ္ဌ အနေဖြင့် ယခု ၂၀၂၅ ခုနှစ်အတွင်း ရွေးကောက်ပွဲ ကျင်းပနိုင်မလားဆိုသည့်အပေါ် စစ်ရေးနှင့် နိုင်ငံရေး အကဲခတ်များကြား မေးခွန်းထုတ် သုံးသပ်မှုများ ရှိနေကြသည်။
ရွေးကောက်ပွဲ ပြုလုပ်ဖြစ်ခဲ့ပါက နစကဥက္ကဋ္ဌအနေဖြင့် လက်ရှိရယူထားသည့် ရာထူးများထဲမှ အချို့ကို စွန့်လွှတ် ရမည်ဖြစ်သည့်အတွက် ရွေးကောက်ပွဲကျင်းပရန် တွန့်ဆုတ်နေဦးမည်ဟု ထင်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)မှ အထွေထွေအတွင်းရေးမှူး ဦးစိုင်းလိတ်က CNI သတင်းဌာနသို့ ပြောသည်။
ဦးစိုင်းလိတ်က “တကယ်တမ်းကြတော့ သူ့အတွက်လည်း စကစ ဥက္ကဋ္ဌအနေနဲ့ အင်မတန် စွန့်စားရမယ့်ကိစ္စ ဖြစ်ပါတယ်။ အခုလက်ရှိ သူရယူထားတဲ့ ရာထူးတာဝန်တွေ ကြည့်လိုက်ရင် အနည်းဆုံး ၄ ခုလောက်ရှိတာပေါ့။ ထိပ်သီး ရာထူးတွေ ယူထားတယ်။ တကယ်လို့ ရွေးကောက်ပွဲ ပြီးသွားတဲ့နောက်မှာ အဲဒီရာထူးတွေက အကုန် မဟုတ်တောင် အတော်များများ လက်လွှတ်ရလိမ့်မယ်။ အနည်းဆုံးအားဖြင့် ကာချုပ်အနေနဲ့ သူလုပ်လို့မရဘူး။ တခြားရာထူးတစ်ခု။ အဲဒီအနေအထားမျိုး အမှန်တကယ် လက်သင့်ခံနိုင်သလားဆိုတာ သူကိုယ်တိုင်ကပဲ ဖြေရှင်း ရလိမ့်မယ်။ အဲဒီလိုမျိုး သူ့ဘက်က ရှင်းရှင်းလင်းလင်း ရှိမနေသေးဘူးဆိုရင်တော့ ရွေးကောက်ပွဲ လုပ်ဖို့လည်းပဲ သူ့ အနေနဲ့က ဆက်ပြီးတော့ တွန့်ဆုတ်နေဦးမယ်လို့ ထင်ပါတယ်။ အခုထက်ထိတော့ ဖြစ်မယ်၊ မဖြစ်ဘူး ဆိုတာက သူက လုပ်မယ်လို့ ပြောနေပေမယ့်လို့ ဒါအပြောပဲ ရှိတယ်။ အလုပ်မှာကြတော့ တစ်မျိုးပေါ့။ ဘာလို့ဆို နယ်မြေ ဒေသတွေ တည်ငြိမ်အေးချမ်းဖို့ ဆက်ကြိုးစားရမယ်လို့ သူက ပြောနေပေမယ့်လို့ တည်ငြိမ်အေးချမ်းတဲ့ဒေသ မရှိ သလောက်ပဲ ဖြစ်နေပါသေးတယ်။ အဲဒါ တစ်ချက်ပေါ့။ နောက် သူကိုယ်တိုင်က ဘယ်နေ့ဘယ်ရက်မှာ လုပ်ပါမယ် ဆိုတာ အတိအကျ မပြောဘူး။ အဲဒါတွေလည်း ရှိတယ်” ဟု ပြောသည်။
နစကဥက္ကဋ္ဌကို တွေ့ရစဉ်
နစကဥက္ကဋ္ဌသည် ၂၀၂၅ ခုနှစ်အတွင်း ရွေးကောက်ပွဲ ကျင်းပနိုင်ရေး ပြည်တွင်းနှင့် နိုင်ငံတကာ အသိုင်းအဝိုင်းတို့ အပေါ် ကတိကဝတ်ပြုထားသည်။
သို့သော် မည်သည့် နေ့ရက်တွင် ကျင်းပမည်ကိုတော့ တိတိကျကျ ပြောကြားထားခြင်း မရှိသေးပေ။
ထို့နောက် နစကဥက္ကဋ္ဌက (၇၈) နှစ်ပြည့် ပြည်ထောင်စုနေ့ အထိမ်းအမှတ် မိန့်ခွန်း၌ ရွေးကောက်ပွဲတွင် မဲမသမာမှု မရှိစေရေးနှင့် တိကျမှန်ကန်ရေး Electronic Voting Machine ဖြင့် မဲပေးသည့်စနစ်ကို အသုံးပြုသွားမည်ဟု ပြောကြားသွားခဲ့သည်။
လက်ရှိ မြန်မာ့နိုင်ငံရေး အခင်းအကျင်းတွင် နစကအနေဖြင့် တရုတ်ကို အားကိုးနေရသည့် အခြေအနေ ဖြစ်နေ သောကြောင့် ယခုနှစ်အတွင်း ရွေးကောက်ပွဲ မဖြစ်မနေ ပြုလုပ်မည်ဖြစ်ကြောင်း ငြိမ်းချမ်းရေး လုပ်ငန်းစဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။
မဲပေးတဲ့စနစ်ကို ဗိုလ်ချုပ်မှူးကြီးမင်းအောင်လှိုင် လေ့လာနေစဉ်
ဦးခွန်းဆိုင်က “သူနဲ့ နီးစပ်တဲ့ သတင်းအရင်းအမြစ် အသိုင်းအဝိုင်းဘက်က သိရသလောက်ဆိုရင် လုပ်မယ်လို့တော့ သူတို့ အချင်းချင်းမှာလည်း သဘောတူညီချက် ရှိထားပြီးသား ဖြစ်တယ်ပေါ့။ ဒါပေမယ့် ဘယ်တော့လုပ်မယ်ဆိုတာ ကိုတော့ သူက အခုထိ ရက်တိတိကျကျ မပြောသေးဘူးပေါ့။ အဲဒီတော့ ဒီနှစ်အတွင်း လုပ်မယ်လို့တော့ ကျနော်တို့ ယူဆတယ်ပေါ့။ ၂၀၂၆ ကတော့ ဖြစ်ဖို့နည်းမယ်ပေါ့။ နောက်တစ်ဖက်ကလည်း အားလုံးသိတဲ့အတိုင်းပဲ တရုတ်က ဖြစ်စေချင်တယ်။ တရုတ်က ဖြစ်စေချင်တဲ့အတွက် သူတို့ကလည်း တရုတ်ကို အားကိုးနေရတဲ့ အခြေအနေဆို တော့ လုပ်ကိုလုပ်မှာပါ။ သို့သော်လည်းပဲ တရုတ်ကိုယ်တိုင်က အခုထိ ရက်အတိအကျကို မေးနေတာ မရသေးဘူး လို့ ပြောပါတယ်” ဟု ပြောသည်။
လက်ရှိ မြန်မာ့နိုင်ငံရေး အခင်းအကျင်းတွင် ရွေးကောက်ပွဲသည် မပါမဖြစ် အနေအထားမှာရှိပြီး နစကဥက္ကဋ္ဌ အနေဖြင့် ရွေးကောက်ပွဲ မြန်မြန်မပြုလုပ်နိုင်ဘဲ ယခုအတိုင်း ဆက်သွားနေမည်ဆိုပါက အာဏာထိန်းသည့် သဘော မသက်ဝင်တော့ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။
နစကဥက္ကဋ္ဌသည် ၂၀၂၅ ခုနှစ်၊ ဖေဖော်ဝါရီ ၁ ရက်မှ စတင်ကာ ရွေးကောက်ပွဲ ကျင်းပနိုင်ရေးအတွက် စိန်ခေါ်မှုများ ရှိနေသေးသည့်အပြင် တည်ငြိမ်အေးချမ်းမှု လိုအပ်နေသေး၍ ၂၀၀၈ ဖွဲ့စည်းပုံအခြေခံဥပဒေနှင့်အညီ ၆ လ သက်တမ်း ထပ်မံတိုးမြှင့်ထားသည်။
