CNI Sport News
၂၀၂၅ ခုနှစ်၊ အောက်တိုဘာ ၁၅
ဝက်စ်ဟမ်းအသင်း နည်းပြဟောင်း ဂရေဟမ်ပေါ်တာဟာ ထုတ်ပယ်ခံရတဲ့ နည်းပြတိုမာဆန်ရဲ့ နေရာမှာ အစားထိုး ဝင်ရောက်ပြီး ဆွီဒင်အသင်း နည်းပြရာထူးကို ရယူဖို့ဆန္ဒရှိကြောင်း ဖွင့်ဟခဲ့ပါတယ်။
ဆွီဒင်အသင်းဟာ ပြီးခဲ့တဲ့ ၂၀၂၆ ကမ္ဘာ့ဖလား ခြေစစ်ပွဲမှာ ကိုဆိုဗိုအသင်းကို ၁ ဂိုး-ဂိုးမရှိနဲ့ အရေးနိမ့်ပြီးနောက် ခြေစစ်ပွဲ ၄ ပွဲ ကစားထားတာမှာ ရမှတ် ၁ မှတ်နဲ့ အုပ်စုနောက်ဆုံးနေရာမှာ ရပ်တည်နေတာပါ။
အဲဒါကြောင့် ဆွီဒင်ဘောလုံးအဖွဲ့ချုပ်ဟာ နည်းပြတိုမာဆန်ကို ရာထူးကနေ ထုတ်ပယ်ဖို့ ဆုံးဖြတ်ခဲ့ပါတယ်။
ပြီးခဲ့တဲ့စက်တင်ဘာက ဝက်စ်ဟမ်းအသင်း နည်းပြရာထူးကနေ ထုတ်ပယ်ခံခဲ့ရတဲ့ ဂရေဟမ်ပေါ်တာဟာ သူ့ရဲ့ နည်းပြဘဝ အောင်မြင်မှုရခဲ့တဲ့ ဆွီဒင်နိုင်ငံထံ ပြန်သွားပြီး ဆွီဒင်လက်ရွေးစင်အသင်းကို ကိုင်တွယ်ချင်နေတာပါ။
ဂရေဟမ်ပေါ်တာက “ဆွီဒင်လက်ရွေးစင်အသင်းရဲ့ နည်းပြရာထူးက အံ့မခန်းပါပဲ။ ဆွီဒင်အတွက် ကျနော့်မှာ ခံစားချက်တွေ အများကြီးရှိပြီး ကျနော်ဒီနိုင်ငံကို ချစ်သလို ဆွီဒင်ဘောလုံးကိုလည်း ချစ်ပါတယ်။ ဆွီဒင်ဘောလုံး အပေါ် ကျေးဇူးတင်ဖို့တွေလည်း အများကြီးရှိပါတယ်။ ဆွီဒင်နည်းပြရာထူးက ကျနော့်အတွက် ကောင်းမွန်တဲ့ အခွင့်အရေးဖြစ်မယ်ဆိုတာ သေချာတယ်”လို့ Fotbollskanalen နဲ့ အင်တာဗျူးမှာ ပြောခဲ့ပါတယ်။
ဆွီဒင်အသင်း ယှဉ်ပြိုင်နေစဉ်
အသက် ၅၀ နှစ်အရွယ်ရှိ ဂရေဟမ်ပေါ်တာဟာ ဆွီဒင်ကလပ် အိုစတာဆန့်အသင်းကို ၇ နှစ်ကြာ ကိုင်တွယ်ခဲ့ပြီး စတုတ္ထတန်းအဆင့်ကနေ ဆွီဒင်ထိပ်တန်းလိဂ်အဆင့်ထံ ရောက်ရှိအောင် ပို့ဆောင်ပေးနိုင်ခဲ့သလို ယူရိုပါလိဂ် ပြိုင်ခွင့် ရရှိအောင် စွမ်းဆောင်ပေးနိုင်ခဲ့တာပါ။
ဂရေဟမ်ပေါ်တာဟာ ဒီနောက်ပိုင်းမှာ ဆွမ်ဆီး၊ ဘရိုက်တန်၊ ချယ်လ်ဆီးနဲ့ ဝက်စ်ဟမ်းအသင်းတွေကို ကိုင်တွယ် ခဲ့တာ ဖြစ်ပါတယ်။
ဆွီဒင်ဘောလုံးအဖွဲ့ချုပ်ဟာ လာမယ့် နိုဝင်ဘာ နိုင်ငံတကာပွဲစဉ်တွေ မတိုင်မီ နည်းပြသစ် ခန့်အပ်နိုင်ဖို့ စီစဉ်နေ ပါတယ်။
ဆွီဒင်အသင်းဟာ ကမ္ဘာ့ဖလား ခြေစစ်ပွဲမှာ ရလဒ်ဆိုးနေပေမယ့် နေးရှင်းလိဂ်မှာ လိဂ် B ကို တန်းတက်နိုင်ခဲ့ တာကြောင့် ပလေးအော့ဖ်ကနေ တစ်ဆင့် ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရဖို့ မျှော်လင့်ချက်ရှိနေတာ ဖြစ်ပါတယ်။
Source: CNA
