CNI News
၂၀၂၅ ခုနှစ်၊ ဧပြီ ၂၂

မြန်မာနိုင်ငံတွင် ငလျင်လှုပ်ခတ်မှုကြောင့် လူသားချင်းစာနာထောက်ထားမှု အကူအညီပေးအပ်နိုင်ရေးအတွက် ဧပြီ ၂ ရက်မှ ၂၂ ရက်အထိ အပစ်အခတ်ရပ်စဲကြောင်း ထုတ်ပြန်ထားခြင်းကို ထပ်မံ သက်တမ်းတိုးလိုက်ကြောင်း  တပ်မတော်ကာကွယ်ရေးဦးစီးချုပ်ရုံးက ယနေ့ ထုတ်ပြန်ခဲ့သည်။

မြန်မာ့တပ်မတော်သည် အပစ်ရပ်စဲခြင်းကို ဧပြီ ၃၀ ရက်နေ့အထိ သက်တမ်းတိုးလိုက်ခြင်း ဖြစ်သည်။

နိုင်ငံတော်အနေဖြင့် ငလျင်ဒဏ်သင့် ဒေသများ၌ ပြန်လည်တည်ဆောက်ရေးနှင့် ပြန်လည်ထူ‌ထောင်ရေး လုပ်ငန်း များကို အရှိန်အဟုန်ဖြင့် ဆက်လက်ဆောင်ရွက်နိုင်စေရန်၊ နိုင်ငံတော်နှင့် နိုင်ငံသားအားလုံး၏ အကျိုးစီးပွားကို ပိုမို လျှင်မြန်စွာ ဖော်ဆောင်နိုင်ရန်၊ ရေရှည်တည်တံ့ပြီး စစ်မှန်သည့် ငြိမ်းချမ်းရေးကို ဖော်ဆောင်နိုင်စေရန်နှင့် တည် ငြိမ်အေးချမး်မှုကို ရှေးရှုလျက် တပ်မတော်အနေဖြင့် ၂၀၂၅ ခုနှစ်၊ ဧပြီ ၂၃ ရက်မှ ၃၀ ရက်အထိ ယာယီပစ်ခတ် တိုက်ခိုက်မှုရပ်စဲရေးကာလအဖြစ် ထပ်မံ တိုးမြှင့်ကြောင်း ထုတ်ပြန်ခဲ့သည်။

ယာယီပစ်ခတ်တိုက်ခိုက်မှု ထုတ်ပြန်ကြေညာထားသည့် ကာလအတွင်း တိုင်းရင်းသား လက်နက်ကိုင်အဖွဲ့များနှင့် အခြား လက်နက်ကိုင်အဖွဲ့များအနေဖြင့် အများပြည်သူသွားလာအသုံးပြုလျက်ရှိသည့်  ဆက်သွယ်ရေးလမ်း ကြောင်းများအား နှောင့်ယှက်တိုက်ခိုက်ခြင်းနှင့် ထိခိုက်ပျက်စီးစေခြင်း၊ ပြည်သူလူထု၏ အသက်အိုးအိမ် စည်းစိမ် ကို ထိခိုက်ပျက်စီးစေခြင်း၊ လုံခြုံရေးနှင့် တရားဥပဒေစိုးမိုးရေး တာဝန် ထမ်းဆောင်လျက်ရှိသည့် လုံခြုံရေးတပ်ဖွဲ့ ဝင်များ၏ တပ်စခန်းများအား ထိခိုက်ပျက်စီးစေမည့် အင်အားစုဆောင်းခြင်း၊ ပြင်ဆင်စုဖွဲ့ခြင်း၊ နယ်မြေချဲ့ထွင်ခြင်း များကို မပြုရန်နှင့် ထိုကဲ့သို့ ဆောင်ရွက်လာပါက တပ်မတော်အနေ ဖြင့် ပြည်သူလူထုကို ကာကွယ်သောအားဖြင့် လိုအပ်သည့်အရေးယူတုန့်ပြန်မှုများ ဆောင်ရွက်သွားမည်ဟု ထုတ်ပြန်ခဲ့သည်။

CNI News

၂၀၂၅ ခုနှစ်၊ ဧပြီ ၂၂

ရှမ်းပြည်နယ်မြောက်ပိုင်းရှိ မြို့နယ်အများစုကို နစကမှ လက်လွှတ်ဆုံးရှုံးထားရသော်လည်း လားရှိုးမြို့ကို ပြန်ရပါက အရှုံးမရှိသည့်အပြင် အမြတ်ထွက်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

လားရှိုးမြို့ကို တိုက်ခိုက်သိမ်းပိုက်ကာ အုပ်ချုပ်ရေးလုပ်ငန်း စတင်ထားသည့် ကိုးကန့်တပ်ဖွဲ့သည် ၂၀၂၅ ခုနှစ်၊ ဧပြီ ၂၁ ရက်နေ့ နောက်ဆုံးထား၍ နစကထံသို့ လားရှိုးမြို့အား ပြန်လည် လွှဲပြောင်းရေး လုပ်ငန်းစဉ်များ စတင်နေ သည်။

နစက အနေဖြင့် ရှမ်းပြည်နယ်မြောက်ပိုင်း၌ မည်သည့်အရာမျှ မရရှိခြင်းနှင့် နှိုင်းယှဉ်ပါက ယခုကဲ့သို့  လားရှိုးမြို့ ကို ရရှိခြင်းသည် မရှုံးကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

လားရှိုးမြို့အဝိုင်းဘက်မှာ MNDAA အလံများ မရှိတော့သည်ကို တွေ့ရစဉ်

၎င်းက “ဘာမှမရတာထက် စာရင်တော့ လားရှိုး ရတယ်ဆိုတာက မရှုံးပါဘူး။ ဂုဏ်သိက္ခာလည်း ပြန်တက်သေး တယ်။ ဘာလို့ဆို လားရှိုးက အချက်အခြာမြို့ ဖြစ်နေတာကို။ မူဆယ်ကိုသွားတဲ့ ကုန်သွယ်ရေးလမ်းကြောင်းကို ထိန်းထားတယ်။ မန္တလေးကိုဆင်းတဲ့ လမ်းကြောင်းကို ထိန်းထားတယ်။ အဲဒီလမ်းကြောင်းကို ထိန်းသိမ်းနိုင်ဖို့နဲ့ အဲဒီလမ်းကြောင်းမှာ ကုန်သွယ်ရေးလုပ်ငန်းတွေကို ပြန်ပြီးအသက်ဝင်ဖို့က တရုတ်ကလည်း လိုချင်တယ်။ ဒါကို SAC ကလည်း လိုချင်တယ်။ ဒါကြောင့် ဂုဏ်သိက္ခာထိန်းတဲ့အနေနဲ့ လားရှိုးမှာ ပြန်ထိုင်ပြီးတော့ အာဏာပြတ်တာ က စစ်အင်အားသုံးထက်ကို ပိုကုန်ကျစရိတ်နည်းတယ်၊ အသေအပျောက်နည်းတယ်၊ သို့သော် နေပြည်တော်ရဲ့ ဩဇာအာဏာ ပြန်ပြီးတော့ တက်တယ်ဆိုတဲ့ သဘောက သူ့အတွက် အမြတ်ထွက်ပါတယ်။ မရှုံးပါဘူး”ဟု ပြော သည်။

မြန်မာ့တပ်မတော်နဲ့ ကိုးကန့်တပ်ဖွဲ့(MNDAA)တို့အကြား ယာယီအပစ်ရပ်ရေးကို တရုတ်က ကြားဝင်စေ့စပ် ခဲ့ပြီးနောက် လားရှိုးမြို့ကနေ ကိုးကန့်တပ်များ ပြန်လည်ဆုတ်ခွာရန် ဖြစ်လာခဲ့သည်။

ဧပြီ ၂၁ ရက်နေ့တွင် ကိုးကန့်တပ်ဖွဲ့များ လားရှိုးမြို့၏ အုပ်ချုပ်ရေးမှ ထွက်ခွာခဲ့ကာ မြို့ထဲတွင် ကိုးကန့်အလံများ မရှိတော့ဘဲ မြန်မာနိုင်ငံအလံ တစ်ခုတည်းသာ လွှင့်ထူထားကြောင်းလည်း သတင်းဖော်ပြချက်များအရ သိရသည်။

ထိုသို့ လားရှိုးမြို့ကို ကိုးကန့်တပ်ဖွဲ့မှ နစကထံ ပြန်လည် လွှဲပြောင်းပေးခြင်းသည် တရုတ်၏ ဖိအားကြောင့် ဖြစ်သည်ဟု ယူဆနေကြသည်။

ထိုယူဆချက်များအပေါ် တရုတ်နိုင်ငံခြားရေးဝန်ကြီးဌာနမှ ဧပြီ ၂၁ ရက်နေ့က သတင်းစာရှင်းလင်းပွဲတွင် တရုတ် နိုင်ငံ အနေဖြင့် မြန်မာက သက်ဆိုင်ရာ အစုအဖွဲ့များကို နိုင်ငံရေး ပြန်လည်သင့်မြတ်ရန်နှင့် နိုင်ငံရေးပြုပြင် ပြောင်းလဲရေး လုပ်ငန်းစဉ် ပြန်လည်စတင်နိုင်ရန် မိတ်ဆွေသဘောဖြင့်သာ အကြံပြုပေးနေခြင်းဖြစ်သည်ဟု ပြောဆိုထားသည်။

လားရှိုးမြို့အတွင်း တစ်နေရာကိုတွေ့ရစဉ်

ယခုကဲ့သို့ နစကဘက်မှ လားရှိုးမြို့ကို ပြန်ရခြင်းသည် ၎င်းတို့အတွက် အားတက်စရာဖြစ်ကြောင်း တရုတ်-မြန်မာ အရေး လေ့လာသုံးသပ်သူ ဒေါက်တာလှကျော်ဇော်က CNI သတင်းဌာနသို့ ပြောသည်။

၎င်းက “မနေ့က ထူးခြားတာက တရုတ်ကလည်း ဗမာပြည်ရဲ့ ပြည်တွင်းရေးမှာ သူတို့ဝင်မပါပါဘူးလို့ ပြောတယ်။ ဒါပေမယ့် စေ့စပ်ဆွေးနွေးရေး ကိစ္စတွေပဲဖြစ်ဖြစ်၊ လားရှိုးကိစ္စမှာပဲဖြစ်ဖြစ် တရုတ်က ကမကထ လုပ်နေတာတွေ လည်း ရှိတာကို။ တရုတ်က ဒါမျိုးတွေလည်း လုပ်တတ်တယ်။ အရင်တုန်းက ကမ္ဘောဒီးယားမှာ ခမာတွေ ကိစ္စတို့၊ နောက်သီရိလင်္ကာက ကိစ္စတို့၊ အရှေ့တီမောကိစ္စတို့ ဒါတွေမှာလည်း သူတို့လုပ်တတ်တယ်။ အဲဒီတုန်းက ကျမ သိသလောက်ကတော့ ငြိမ်းချမ်းရေးစောင့် တပ်သားများအဖြစ်ဝင်ပြီးတော့ ဘက်နှစ်ဘက်ကြားမှာ ဝင်ပြီးတော့ အပစ်ခတ်ရပ်စဲရေး လုပ်လိုက်တယ်။ အဲဒီဒေသရဲ့ ဖွံ့ဖြိုးတိုးတက်ရေးလုပ်တာ တွေ့ဖူးတယ်။ အခုတော့ မပြော တတ်ဘူး။ ဆွေးနွေးနေကြဆဲပဲ ဖြစ်တာကို။ အဲဒီတော့ စစ်ကောင်စီဘက်ကလည်း လားရှိုးပြန်ရတယ်ဆိုရင် သူ့အတွက် စိတ်ဓါတ်ရေးရာ အားတက်စရာဖြစ်တာပေါ့။ MNDAA ဘက်ကလည်း သူက ကိုးကန့်လူမျိုးအတွက်ပဲ အခြေခံဒေသရဖို့ဆိုရင် လားရှိုးအထိ မလိုဘူးလေ။ သူ့အရင်ဒေသ ပတ်ဝန်းကျင်နဲ့ နည်းနည်းပါးပါးလောက်ပဲ ရတာပေါ့။ အဲဒီတော့ အဲဒီဟာတွေကို ဘယ်လိုထိန်းညှိမလဲတော့မသိဘူး။ စောင့်ကြည့်ရလိမ့်မယ်” ဟု ပြောသည်။

ရှမ်းပြည်နယ်မြောက်ပိုင်းရှိ မြောက်ပိုင်းသုံးဖွဲ့ အပါအဝင် PDF များအနေဖြင့် မူဆယ်-မန္တလေးကြားက မြို့များ အားလုံးကို ဆုတ်ခွာရမည်ဖြစ်ကာ ကွတ်ခိုင်၊ သိန္နီ၊ သီပေါ၊ ကျောက်မဲ၊ နောင်ချိုတို့ ပါဝင်ကြောင်း သိရသည်။

MNDAA အနေဖြင့် တရုတ်၏ ညွှန်ကြားမှုအတိုင်း သွားရမှာဖြစ်သော်လည်း လားရှိုးမြို့ပြင်မှာတော့ တပ်စွဲထား ကြောင်းလည်း သိရသည်။

CNI News

၂၀၂၅ ခုနှစ်၊ ဧပြီ ၂၂

နစကဥက္ကဋ္ဌကို အာဆီယံက ထိတွေ့ဆက်ဆံလာခြင်းသည် မြန်မာနိုင်ငံရေး အခင်းအကျင်းအား အလှည့်အကွေ့ တစ်ခုဖြစ်စေရန် ပုံဖော်ဖို့ ကြိုးစားနေခြင်းဖြစ်သည်ဟု စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA)မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် မစ္စတာအန်ဝါ၊ အာဆီယံဥက္ကဋ္ဌအကြံပေး ထိုင်းဝန်ကြီးချုပ် ဟောင်း သက်ဆင်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ ၂၀၂၅ ခုနှစ်၊ ဧပြီ ၁၇ ရက်တွင် ထိုင်းနိုင်ငံ၊ ဘန်ကောက်မြို့၌ တွေ့ဆုံဆွေးနွေးခဲ့ကြသည်။

ထို့ပြင် မလေးရှားဝန်ကြီးချုပ် မစ္စတာအန်ဝါနှင့် အမျိုးသားညီညွတ်ရေးအစိုးရ (NUG) ဝန်ကြီးချုပ် မန်းဝင်းခိုင်သန်း တို့ ၂၀၂၅ ခုနှစ်၊ ဧပြီ ၁၈ ရက်က အွန်လိုင်းကတဆင့် ဆွေးနွေးခဲ့ကြောင်း NUG က ထုတ်ပြန်ခဲ့သည်။

လက်ရှိ မြန်မာနိုင်ငံတွင် စစ်ရေးအခြေအနေများ၊ အကြမ်းဖက်မှုများနှင့် တိုက်ပွဲရှောင်ရသည့် ကိစ္စများသည် အာဆီယံ အပေါ်တွင်လည်း ထိခိုက်လာသောကြောင့် မြန်မာ့အ‌ရေးအား ပိုမိုပါဝင် စွက်ဖက်လာခြင်းဖြစ်ကြောင်း စည်းလုံးညီညွတ်သော တိုင်းရင်းသားလူမျိုးများမဟာမိတ်(UNA)မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

အာဆီယံဥက္ကဋ္ဌ အကြံပေး သက်ဆင်နဲ့ နစကဥက္ကဋ္ဌကို တွေ့ရစဉ်

၎င်းက “မြန်မာနိုင်ငံဆိုတာလည်း ဒါအိမ်နီးချင်း ဥပမာ ဒီဖက်မှာ ထိုင်းတို့၊ လာအိုတို့ နယ်နိမိတ်ချင်း အာဆီယံ အဖွဲ့ဝင် နိုင်ငံတွေနဲ့  ဆက်စပ်နေတယ်၊ ဒီတော့ မြန်မာနိုင်ငံရဲ့ အနေအထားဟာလည်း အာဆီယံတင်မကဘူး၊ အာရှမှာရော၊ ကမ္ဘာ့အတိုင်းအတာမှာ‌ရော တော်တော်လေး ရုပ်ပျက်ဆင်းပျက်မျိုးတော့ ဖြစ်လာတယ်၊ နိုင်ငံတွင်း မှာ နေပြီးတော့ အကြမ်းဖက် သတ်ဖြတ်မှုတွေ၊ စစ်ဘေးရှောင်ရတဲ့ဟာတွေ ကျနော်တို့ ဒီအာဆီယံရဲ့ အပေါ်မှာ လည်း ထိခိုက်လာတယ်ပေါ့နော်၊ နောက်ဒီအပေါ်မှာ မူတည်ပြီးတော့ မြန်မာနိုင်ငံရဲ့ အနောက်ဖက် တံခါးမှာ မဟာဗျူဟာအရ နေပြီးတော့ စစ်ရေးအခြေအနေပေါ့ဗျာ၊ ဒီဟာတွေလည်း တော်တော်လေး တင်းတင်းမာမာ ဖြစ်လာနိုင်ခြေ တွေ့နေရတယ်၊ အဲဒီတော့ အခုက အာဆီယံက ငြိမ်နေလို့ မရတော့ဘူးပေါ့နော်၊ အဲဒါကြောင့် လည်း မြန်မာ့အရေးကို ပိုပြီးတော့ ပါဝင်စွက်ဖက်လာတယ်ဆိုတဲ့ဟာ မြင်ရတယ်၊ အထူးသဖြင့် ထိုင်းဝန်ကြီးချုပ် ဟောင်း သက်ဆင်တို့ကတော့ မြန်မာ့စစ်ခေါင်းဆောင်တွေနဲ့ သူတို့က ထည်ထည်ဝင်ဝင် ရှိခဲ့တယ်ဆိုတဲ့ အခါမှာ သူတို့လည်း တစ်ချိန်က အာဆီယံမှာ တာဝန်ရှိခဲ့တဲ့ ခေါင်းဆောင်တွေထဲမှာ ပါတဲ့အတွင်းမှာ သူတို့တွေရဲ့ ပူးပေါင်း ပါဝင်မှုနဲ့ မြန်မာ့နိုင်ငံရေး အခင်းအကျင်း အလှည့်အ‌ကွေ့တစ်ခုကို သူတို့ ပုံဖော်ဖို့ ကြိုးစားနေတယ်လို့ မြင်ပါ တယ်” ဟု ပြောသည်။ 

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၊ ထိုင်းဝန်ကြီးချုပ်ဟောင်း သက်ဆင်နှင့် အာဆီယံ အလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါတို့ တွေ့ဆုံမှုတွင် မြန်မာငလျင်ဘေး ပြန်လည်ထူထောင်ရေးတွင် အာဆီယံ အသိုက် အဝန်းမှ ဆက်လက်ကူညီ ဆောင်ရွက်ရေး ဆွေးနွေးခဲ့ကြသည်။

ထို့ပြင် မြန်မာ-အာဆီယံ အသိုက်အဝန်းမှ ပူးပေါင်းဆောင်ရွက်ရေး ကိစ္စများလည်း ဆွေးနွေးခဲ့ကြောင်း သိရသည်။

အာဆီယံအလှည့်ကျဥက္ကဋ္ဌ အန်ဝါနဲ့ NUG က မန်းဝင်းခိုင်သန်း အွန်လိုင်းက ဆွေးနွေးစဉ်

ဒေသတွင်းနိုင်ငံရေး အပြောင်းအလဲ တစ်ခုခုတွင် အာဆီယံအနေဖြင့် ဝင်ရောက်ညှိနှိုင်းပေးသည့် ပုံစံသာဖြစ် ကြောင်း၊ ပြဿနာများအား နိုင်ငံရေးအရ ဖြေရှင်းရန် လှုပ်ရှားကြည့်သည့် သဘောမျိုးသာ ဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။    

၎င်းက “ပြောရရင် အာဆီယံကိုယ်တိုင်က ဟိုးအရင်တုန်းက ပြောခဲ့ဖူးတာတွေ ရှိတယ်၊ သူတို့ကိုယ်တိုင်က ဘယ်သူ့ဘက် ပိုပြီးတော့ အားသာမလဲ၊ ပွင့်ပွင့်လင်းလင်း ပြောရရင်တော့ တရုတ်နဲ့အမေရိကန်အကြား ဘယ်ဘက်ကို ကပ်မလဲဆိုတဲ့ ပုံစံမျိုးနဲ့ သူတို့ကစားတာတွေ ရှိတယ်၊ အဲဒီတော့ ဘယ်လိုပဲဖြစ်ပါစေ၊ ဒေသတွင်း နိုင်ငံရေး အပြောင်းအလဲတစ်ခုခုမှာ သူတို့ဝင်ပြီးတော့ ဘာတွေ လှုပ်ရှားကြည့်လို့ရမလဲ၊ ဒါမျိုးညှိနှိုင်းပေးတဲ့ ပုံစံပဲ၊ အဲဒီတော့ အာဆီယံရဲ့ အခန်းကဏ္ဍ ဘယ်လိုရှိလဲဆိုတဲ့ဟာက တကယ်တမ်း ဘယ်လောက်ထိ အလုပ်ဖြစ်မလဲ ဆိုတဲ့ အပေါ်မှာပဲ မူတည်တယ်၊ အထူးသဖြင့် မြန်မာဆိုတာ အာဆီယံအတွက် ဒေသတွင်းမိတ်ဖက်ပဲ၊ Regionalization အရ သူတို့သည် ဒေသတွင်းနိုင်ငံ အဖွဲ့ထဲမှာလည်း ပါနေတယ်၊ နောက်ဒီမှာလည်း ဖြစ်နေတဲ့ ပြဿနာတွေကို သူဘယ်လောက် ဖြေရှင်းပေးလို့ရမလဲ နိုင်ငံရေးနည်းအရ ဒါကိုသူလှုပ်ရှားကြည့်တဲ့ သဘောပဲ၊ အာဆီယံဝင်ကူပေးလို့ အကုန်လုံးပြီးသွားနိုင်လား ဆိုတဲ့ဟာမျိုးလည်း ပုံသေမျှော်မှန်းလို့မရဘူး၊ ဒါပေမယ့် ဒီထက် ပိုပြီးတော့ ဘယ်လောက်ထိ လုပ်နိုင်မလဲ ဒါကတော့ စောင့်ကြည့်ရပါလိမ့်မယ်” ဟု ပြောသည်။

NUG ကတော့ ယခုနှစ် ၂၀၂၅ ခုနှစ်သည် ကြီးမားသည့် တော်လှန်ရေး အလှည့်အပြောင်းဖြစ်ပြီး တော်လှန်ရေး အောင်ရန် ပို၍ ကြိုးစားသွားမည်ဟု NUG ၏ ယာယီသမ္မတ ဒူဝါလရှီးလက ၂၀၂၅ ခုနှစ်၊ ဧပြီ ၁၇ ရက်နေ့ နှစ်သစ်မိန့်ခွန်းတွင် ထည့်သွင်းပြောကြားခဲ့သည်။

CNI International News
ဒီမာပူရ၊ ဧပြီ ၂၁

အိန္ဒိယ-နာဂ နိုင်ငံရေးအခင်းအကျင်းတွင် သိသာထင်ရှားသည့် အပြောင်းအလဲ တစ်ခုအဖြစ် နာဂအမျိုးသားဆိုရှယ် လစ်ကောင်စီ-ကပ္ပလန်/အန်းမိုင်(NSCN-K/AM) နှင့် အိန္ဒိယအစိုးရတို့သည် အပစ်အခတ်ရပ်စဲရေးကို ရှေးရှုသည့် အပြုသဘောဆောင်သော ဆွေးနွေးမှုများ ပြုလုပ်ခဲ့သည်ဟု Eastern Mirror သတင်းဝက်ဘ်ဆိုက်မှ ဖော်ပြခဲ့ သည်။

အပစ်အခတ်ရပ်စဲရေး ကြီးကြပ်ကွပ်ကဲမှုအဆင့်တွင် စတုတ္တအကြိမ်မြောက် တွေ့ဆုံဆွေးနွေးမှုကို  မတ်လ ၂၇ ရက်က နယူးဒေလီ (New Delhi)တွင် ပြုလုပ်ခဲ့သည်။

ထိုဆွေးနွေးမှုကို NSCN-K/AM အဖွဲ့၏ အတွင်းရေးမှူးချုပ်  Kughalu Mülatonu က ဦးဆောင်တက်ရောက်ခဲ့ သည်ဟု NSCN-K/AM က ဧပြီ ၂၀ ရက်တွင် ကြေညာချက် ထုတ်ပြန်ခဲ့သည်။

“နှစ်ဖက်စလုံးက ဒေသတွင်း လက်နက်ကိုင် ပဋိပက္ခတွေ အဆုံးသတ်ရေး နည်းလမ်းတွေကို စိတ်အားထက်သန် စွာ ရှာဖွေနေကြပါတယ်။ မကြာခင်မှာ နောက်ထပ် အစည်းအဝေးတစ်ခုကို ကြားနေနိုင်ငံ တစ်နိုင်ငံမှာ ပြုလုပ်ဖို့ နားလည်မှုရရှိခဲ့ပါတယ်။ အာရှနိုင်ငံ တစ်နိုင်ငံမှာ ဖြစ်ပါတယ်" ဟု ထုတ်ပြန်ချက်တွင် ဖော်ပြခဲ့သည်။

အဆိုပါ နိုင်ငံမှာ မည်သည့် နိုင်ငံဖြစ်သည်ကိုတော့ ဖော်ပြထားခြင်းမရှိပါ။

ဥက္ကဋ္ဌ၊ ဒုဥက္ကဋ္ဌနှင့် အတွင်းရေးမှူးချုပ်တို့သည် အိန္ဒိယနှင့် နာဂလူမျိုးများ၏ အရေးကိစ္စများနှင့် အခြားကိစ္စရပ်များ ကို ဆွေးနွေးရန် အိန္ဒိယဗဟိုအစိုးရမှ ကိုယ်စားလှယ်များနှင့် ပူးပေါင်းဆောင်ရွက်ရန် မျှော်လင့်ကြောင်းလည်း ထုတ်ပြန်ချက်တွင် ဖော်ပြခဲ့သည်။

၂၀၂၃  ခုနှစ်မှစပြီး နာဂ NGO များနှင့် အိန္ဒိယအေဂျင်စီ အသီးသီးက လုပ်ဆောင်ခဲ့သော ချဉ်းကပ်ဆောင်ရွက်မှုများ အပြီးတွင် အိန္ဒိယအစိုးရနှင့် အပစ်အခတ်ရပ်စဲရေးအတွက် ထိတွေ့ဆက်ဆံရန် ဆန္ဒရှိလာခဲ့သည်။

ထိုအခြေအနေသည် တည်ငြိမ်မှုရရှိပြီး တင်းမာမှုများ လျော့ကျလာသည့် လက္ခဏာဖြစ်ကြောင်း ထုတ်ပြန်ချက် တွင် ဖော်ပြခဲ့သည်။ 

အိန္ဒိယ-မြန်မာနယ်စပ်တွင် နေထိုင်သည့် နာဂလူမျိုးများသည် မျှော်လင့်ချက်များနှင့် ပြည့်နှက်နေပြီး လက်ရှိ အခြေအနေကို အနီးကပ်စောင့်ကြည့် နေကြသည်ဟုလည်း ဆိုသည်။

NSCN-K/AM သည် အိန္ဒိယနှင့် မြန်မာနိုင်ငံမှ ထိပ်သီးခေါင်းဆောင်များ ပါဝင်သည့် တစ်ခုတည်းသော အဖွဲ့အစည်း ဖြစ်ကြောင်းလည်း ထုတ်ပြန်ချက်တွင် ဖော်ပြခဲ့သည်။

“လက်ရှိအချိန်မှာတော့ နာဂကိုယ်ပိုင်အုပ်ချုပ်ခွင့်ရဒေသတွေထဲက စစ်ကိုင်းတိုင်းဒေသကြီးမှာ မြန်မာအစိုးရနဲ့ အပစ်အခတ်ရပ်စဲရေးကို ဆက်လက် ထိန်းသိမ်းထားပါတယ်။ ဒီအပစ်အခတ် ရပ်စဲရေးဟာ ၂၀၁၄ ခုနှစ်က SS Khaplang က စတင်ခဲ့တဲ့ အပစ်အခတ်ရပ်စဲရေးကို ဆက်လက် ထိန်းသိမ်းထားတယ်လို့ မှတ်ယူနိုင်ပါတယ်။ အိန္ဒိယနဲ့ အလားတူ သဘောတူညီချက် ပြုလုပ်မှုဟာ ၂၀၀၁ ခုနှစ် မူဘောင်သဘောတူညီချက်ရဲ့ အနှစ်သာရကို ထိခိုက်စေမှာ မဟုတ်ဘူး” ဟု ဖော်ပြထားသည်။ 

အိန္ဒိယတွင် နောက်ထပ် အစည်းအဝေးများ ပြုလုပ်ရန် ဖြစ်နိုင်ခြေ ရှိနေသော်လည်း မြန်မာနိုင်ငံတွင် ဆက်လက် ဖြစ်ပွားနေသော ပြည်တွင်းပဋိပက္ခများနှင့် မကြာသေးမီက လှုပ်ခတ်ခဲ့သည့် အင်အားပြင်း ငလျင်ကြောင့် NSCN ၏ ထိပ်တန်းခေါင်းဆောင် ၃ ဦး၏ အိန္ဒိယသို့ သွားရောက်မည့် ခရီးစဉ်သည် မသေချာတော့ကြောင်း ထုတ်ပြန်ချက် ၌ ဖော်ပြခဲ့သည်။ 

“ဘယ်လိုပဲဖြစ်ဖြစ် အပစ်အခတ်ရပ်စဲရေးနဲ့ ပတ်သက်ပြီး အိန္ဒိယအစိုးရနဲ့ အတွင်းရေးမှူးချူပ် Kughalu Mulatonu က တခြား အဖွဲ့ဝင်တွေနဲ့အတူ သဘောတူညီချက်ကို အပြီးသတ် လုပ်ဆောင်နိုင်လိမ့်မယ်လို့ မျှော်လင့်ပါတယ်။ ဥက္ကဋ္ဌ၊ ဒုဥက္ကဋ္ဌနဲ့ အတွင်းရေးမှူးချုပ်တွေဟာ အနာဂတ်မှာ အိန္ဒိယမှာပဲဖြစ်ဖြစ်၊ မြန်မာနိုင်ငံ မှာပဲဖြစ်ဖြစ် နိုင်ငံရေး ဆွေးနွေးပွဲတွေကို ပါဝင်နိုင်ခြေရှိပါတယ်”ဟု ထုတ်ပြန်ချက်တွင် ဖော်ပြခဲ့သည်။

Source: Eastern Mirror

CNI News
၂၀၂၅ ခုနှစ်၊ ဧပြီ ၁၇

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် မစ္စတာအန်ဝါနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တို့ ၂၀၂၅ ခုနှစ်၊ ဧပြီ ၁၇ ရက်တွင် ထိုင်းနိုင်ငံ၊ ဘန်ကောက်မြို့မှာ တွေ့ဆုံဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးပွဲကို ထိုင်းဝန်ကြီးချုပ်ဟောင်း သက်ဆင်လည်း တက်ရောက်ခဲ့သည်ဟု နစက,က သတင်းထုတ်ပြန်ခဲ့သည်။

ဗိုလ်ချုပ်မှူးကြီးမင်းအောင်လှိုင်၊ ထိုင်းဝန်ကြီးချုပ်ဟောင်း သက်ဆင်နှင့် အာဆီယံအလှည့်ကျဥက္ကဋ္ဌ မလေးရှားဝန် ကြီးချုပ် အန်ဝါတို့ သုံးပွင့်ဆိုင် တွေ့ဆုံမှုတွင် မြန်မာငလျင်ဘေး ပြန်လည်ထူထောင်ရေးတွင် အာဆီယံ အသိုက် အဝန်းမှ ဆက်လက်ကူညီဆောင်ရွက်ရေး ဆွေးနွေးခဲ့ကြသည်။

ထို့နောက် မြန်မာ-အာဆီယံ အသိုက်အဝန်းမှ ပူးပေါင်းဆောင်ရွက်ကိစ္စများလည်း ဆွေးနွေးခဲ့ကြောင်း သိရသည်။

CNI News
၂၀၂၅ ခုနှစ်၊ ဧပြီ ၁၇ 

၂၀၂၅ ခုနှစ်၊ ဒီဇင်ဘာလမှာ ကျင်းပရန် ကြိုးပမ်းနေသည့် အထွေထွေရွေးကောက်ပွဲ အောင်မြင်ဖို့အတွက် ပြည်သူ လူထုက ပူးပေါင်းပါဝင်ကြရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဧပြီ ၁၇ ရက်တွင် ကျရောက်သည့် မြန်မာ့နှစ်သစ်ကူး နှစ်ဆန်းတစ်ရက်နေ့ နှုတ်ခွန်းဆက်မင်္ဂလာ စကား ပြောကြားစဉ် ၎င်းက ထည့်သွင်း ပြောကြားခဲ့ခြင်း ဖြစ်သည်။

နစကဥက္ကဋ္ဌက “ နိုင်ငံတော်မှာ စစ်မှန်စည်းကမ်းပြည့်ဝတဲ့ ပါတီစုံဒီမိုကရေစီစနစ် ခိုင်မာစေရေး၊ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စု တည်ဆောက်ရေးကို ကျနော်တို့ အစိုးရက ရည်မှန်းချက်ထား ဆောင်ရွက်လျက်ရှိနေပါတယ်။ ပြည်သူလူထု လိုလားတဲ့ ပါတီစုံဒီမိုကရေစီစနစ်ကို အမြန်ဆုံး ပြန်လည် အကောင်အထည်ဖော်ပေးနိုင်ဖို့ လည်း လာမယ့် ဒီဇင်ဘာလအတွင်းမှာ လွတ်လပ်ပြီး တရားမျှတမှု အပြည့်ရှိတဲ့ ပါတီစုံဒီမိုကရေစီ အထွေထွေရွေး ကောက်ပွဲကို ကျင်းပပေးနိုင်ဖို့ ကြိုးပမ်းဆောင်ရွက်လျက်ရှိနေပါတယ်။ ပါတီစုံ ဒီမိုကရေစီစနစ်ကို အမှန်တကယ် လိုလားတယ်ဆိုရင် အဓိကဖြစ်တဲ့ ရွေးကောက်ပွဲ အောင်အောင်မြင်မြင် ပြီးမြောက်နိုင်ဖို့အတွက် မိဘပြည်သူများအနေနဲ့ ပူးပေါင်းပါဝင်ဆောင်ရွက်ပေးကြဖို့ မေတ္တာရပ်ခံလိုပါတယ်။ နိုင်ငံ တော်က ဆက်လက် လျှောက်လှမ်းမယ့် ပါတီစုံဒီမိုကရေစီစနစ်မှာ နိုင်ငံသူ/သားများ အားလုံး ပူးပေါင်း ပါဝင် ဆောင်ရွက်ကြပါဆို့လို ပြောကြားလိုပါတယ်”ဟု ပြောသည်။

နစကသည် ရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ တတိယအပတ်နှင့် စတုတ္တအပတ်တွင်လည်းကောင်း၊ ၂၀၂၆ ခုနှစ်၊ ဇန်နဝါရီလ တတိယအပတ်နှင့် စတုတ္တအပတ်တွင်လည်းကောင်း ကျင်းပပြီးစီးရန် ပြင်ဆင်လျက် ရှိကြောင်း သိရသည်။ 

တခြားတစ်ဖက်မှာတော့ တိုင်းရင်းသားလက်နက်ကိုင်များ(EAOs)၊ ပြည်သူ့ကာကွယ်ရေးတပ်ဖွဲ့(PDF)၊ အမျိုးသား ညီညွတ်ရေးအစိုးရ(NUG)နှင့် တက်ကြွလှုပ်ရှားသူများက နစကကျင်းပမည့် ရွေးကောက်ပွဲကို မပျက်ပျက်အောင် ဖျက်မည်ဟု ကြေညာထားသည်။

ဖက်ဒရယ်နှင့် ဒီမိုကရေစီအရေး ကြိုးပမ်းနေသူတချို့ကတော့ နိုင်ငံရေးသဘောတူညီချက် တစ်ခုကို ကြိုတင် ရယူ ထားပြီးမှ ရွေးကောက်ပွဲ ကျင်းပမည်ဆိုပါက ပိုမိုသင့်တော်ကြောင်း၊ သို့မဟုတ်ပါက ရွေးကောက်ပွဲ ကျင်းပပြီး နောက်ပိုင်း ပေါ်ပေါက်လာမည့် အစိုးရသစ်လက်ထက်မှာ ပိုမို အကျပ်အတည်းများဖြင့် ရင်ဆိုင်ရနိုင်ကြောင်း ထောက်ပြလျက်ရှိသည်။

CNI News
၂၀၂၅ ခုနှစ်၊ ဧပြီ ၁၇

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်နေ့ နှစ်ဆန်းတစ်ရက်နေ့တွင် ဘွဲ့တံဆိပ်များ ချီးမြှင့်ပေးအပ်လျက်ရှိသည်။

အဆိုပါ ဘွဲ့တံဆိပ်များသည် နိုင်ငံတော်ဖွံ့ဖြိုးတိုးတက်ရေးအတွက် လုပ်ငန်းနယ်ပယ်အလိုက် ထူးချွန်ပြောင် မြောက်စွာ ကြိုးပမ်းဆောင်ရွက်ခဲ့ကြသည့် ပုဂ္ဂိုလ်များကို ဂုဏ်ထူးဆောင်ဘွဲများ ချီးမြှင့်ခြင်းဖြစ်သည်။

ဧပြီ ၁၇ ရက်တွင် ပေးအပ်ခဲ့သည် စည်သူဘွဲ့ကို နစကအဖွဲ့ဝင်များ၊ အနုပညာရှင်များ၊ မြန်မာ့တပ်မတော် ဒုတိယဗိုလ်ချုပ်ကြီးများ၊ အရပ်ဘက် အဆင့်မြင့်ဝန်ထမ်းများ၊ ပြည်နယ်ဝန်ကြီးချုပ်များ ရရှိခဲ့သည်။

CNI News
၂၀၂၅ ခုနှစ်၊ ဧပြီ ၁၇

မြန်မာနှစ်သစ်အခါသမယ အထိမ်းအမှတ်အနေဖြင့် အကျဉ်းထောင်/အချုပ်ထောင် အသီးသီးတွင် ပြစ်ဒဏ်ကျခံ လျက်ရှိသော အကျဉ်းသား/သူ ၄၈၉၃ ဦးကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဧပြီ ၁၇ ရက်တွင် လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

ထို့နောက် နိုင်ငံခြားသား ၁၃ ဦးကိုလည်း လွတ်ငြိမ်းချမ်းသာခွင့် ပေးလိုက်ကြောင်း ထုတ်ပြန်ခဲ့သည်။

CNI News
၂၀၂၅ ခုနှစ်၊ ဧပြီ ၁၄

အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါနှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ လာမည့် ရက်ပိုင်းအတွင်း ထိုင်းနိုင်ငံ၊ ဘန်ကောက်မြို့မှာ တွေ့ဆုံဆွေးနွေးကြမည်ဖြစ်သည်။

အဆိုပါ တွေ့ဆုံမှုတွင် ထိုင်းဝန်ကြီးချုပ်ဟောင်း အာဆီယံဥက္ကဋ္ဌ အကြံပေး သက်ဆင် ရှင်နာဝပ်လည်း ပါဝင်မည် ဖြစ်ကြောင်း သိရသည်။

အာဆီယံဥက္ကဋ္ဌနှင့် နစကဥက္ကဋ္ဌတို့ မည်သည့် အရေးကိစ္စများကို တွေ့ဆုံ ဆွေးနွေးကြမည်ကိုတော့ မသိရသေးပေ။

သို့သော် မြန်မာငလျင်ဘေးသင့် ပြည်သူများအတွက် လိုအပ်သော အကူအညီများနှင့် ဆေးဝါး အကူအညီများ ပေး အပ်နိုင်ရေး အပါအဝင် အကူအညီများ ပေးအပ်သည့်အခါ လွယ်ကူချောမွေ့စေရေးတို့ကို ဆွေးနွေးရန်ရှိကြောင်း အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ် အန်ဝါက ပြောကြားထားသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဧပြီ ၄ ရက်က ထိုင်းနိုင်ငံ၊ ဘန်ကောက်မြို့မှာ ကျင်းပခဲ့သည့် ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကိုလည်း တက်ရောက် ဆွေးနွေးခဲ့သေးသည်။

အဆိုပါ အစည်းအဝေး၏ ပြင်ပတွင် ထိုင်းဝန်ကြီးချုပ် ပေတုန်တန်နှင့်လည်းကောင်း၊ အိန္ဒိယဝန်ကြီးချုပ် မိုဒီနှင့် လည်းကောင်း၊ သီရိလင်္ကာဝန်ကြီးချုပ်နှင့်လည်းကောင်း၊ ဘူတန်ဝန်ကြီးချုပ်နှင့်လည်းကောင်း၊ နီပေါဝန်ကြီးချုပ် နှင့်လည်းကောင်း အသီးသီး တွေ့ဆုံ ဆွေးနွေးခဲ့သေးသည်။

အလားတူ ထိုင်းဝန်ကြီးချုပ်ဟောင်းလည်းဖြစ် အာဆီယံဥက္ကဋ္ဌ အကြံပေးလည်းဖြစ်သူ သက်ဆင်နှင့်လည်း တွေ့ဆုံ ဆွေးနွေးခဲ့သေးကြောင်း သိရသည်။