CNI News

၂၀၂၅ ခုနှစ်၊ မတ် ၇

ပြိုကွဲလုနီးပါး ဖြစ်နေသည့် လက်ရှိ မြန်မာ့နိုင်ငံရေး အခင်းအကျင်း‌တွင် ကျရှုံးနိုင်ငံမဖြစ်စေဖို့ သက်ဆိုင်ရာ ခေါင်းဆောင်အသီးသီးမှ ကိုယ့်အကျိုးစီးပွားနှင့် ရရှိထားသည့် အာဏာများကို လျှော့သင့်ကြောင်း တိုင်းရင်းသား လက်နက်ကိုင် ၇ ဖွဲ့ဖြင့် စုဖွဲ့ထားသော 7 EAO Alliance မှ ပြောရေးဆိုခွင့်ရှိသူ နိုင်အောင်မငေးက CNI သတင်းဌာနသို့ ပြောသည်။

ကျရှုံးနိုင်ငံ ဖြစ်ရေး၊ မဖြစ်ရေးသည် သက်ဆိုင်ရာ ခေါင်းဆောင်အသီးသီး အပေါ်တွင်သာ မူတည်ကြောင်း ၎င်းက ပြောသည်။

နိုင်အောင်မငေးက “နိုင်ငံခေါင်းဆောင်တွေရဲ့ အပေါ်မှာ တာဝန်ရှိ၊ SAC တစ်ခုတည်းကို ပြောတာမဟုတ်ဘူးနော်။ နိုင်ငံခေါင်းဆောင်တွေက သူ့လူမျိုးအလိုက်၊  သူ့ဒေသအလိုက်၊ သူ့လမ်းကြောင်းအလိုက် ခေါင်းဆောင်တွေ ရှိကြ တာပဲ။ နယ်မြေကျယ်တာ၊ အင်အားများတာ၊ အင်အားသေးတာ၊ ဒါကမဆိုင်ဘူးပေါ့။ နိုင်ငံခေါင်းဆောင်ဆိုတာ သူ့ အမျိုးသား သူ့လူမျိုးစုတွေအတွက် သူ့မှာလည်း သူ့ခေါင်းဆောင်နဲ့သူဆိုတာ ရှိကြတယ်။ ဒီလိုနိုင်ငံ ခေါင်းဆောင် တွေ အပေါ်မှာပဲ မူတည်တယ်ပေါ့။ ပြည်သူ့မျက်နှာ ဘယ်လိုထောက်မလဲ၊ သာတူညီမျှ ဘယ်လိုလုပ်မလဲ၊ အသိအမှတ်ပြုမှု ဘယ်လိုရှိမလဲ၊ တန်းတူညီမျှမှု ဘယ်လိုရှိမလဲ၊ အဲဒါတွေ အားလုံးကြည့်နေမယ်ဆိုရင်တော့ လုပ်လို့ရပါတယ်။ ကိုယ့်အကျိုးစီးပွား လျှော့လိုက်၊ ကိုယ့်မြေ၊ ကိုယ့်ဒေသ၊ ကိုယ့်လူမျိုး၊ ကိုယ့်ပါတီ၊ ကိုယ်ရထား တဲ့အာဏာ အဲဒါတွေကို လျှော့လိုက်ရင် ဖြစ်နိုင်ပါတယ်။ မဖြစ်စရာ အကြောင်းမရှိဘူး” ဟု ပြောသည်။

တိုင်းရင်းသား လက်နက်ကိုင်များ ညီလာခံလုပ်နေစဉ်

၂၀၂၁ ခုနှစ်နောက်ပိုင်း တိုင်းရင်းသားလက်နက်ကိုင်များ အနေဖြင့် နယ်မြေများကို ရသလောက် သိမ်းယူထား သောကြောင့် နယ်မြေစိုးမိုးမှုများ ကျယ်ပြန့်လာသည်နှင့်အမျှ အငြင်းပွားမှု ပြဿနာများမှာလည်း ပိုမိုဖြစ်ပေါ်လာ လျက်ရှိသည်။

ထို့အပြင် တိုင်းရင်းသားလက်နက်ကိုင်များ အားလုံးတွင် မတူညီသည့် တောင်းဆိုမှုများကြောင့် ယခုအနေအထား တိုင်း ဆက်သွားနေမည်ဆိုပါက ကျရှုံးနိုင်ငံ ဖြစ်သွားနိုင်ကြောင်း စစ်ရေးနှင့်နိုင်ငံရေးအကဲခတ်များက သုံးသပ်ထား ကြသည်။

လက်ရှိ (၄)နှစ်ကျော်ကြာ ဖြစ်ပေါ်လာသည့် မြန်မာ့နိုင်ငံရေး အခင်းအကျင်းသည် အဆိုးရွားဆုံး အခြေအနေကို ရောက်ရှိနေကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD)မှ ဥက္ကဋ္ဌ ဦးစိုင်းညွန့်လွင်က CNI သတင်းဌာနသို့ ပြောသည်။

လက်နက်ကိုင် ခေါင်းဆောင်တချို့ကိုတွေ့ရစဉ်

၎င်းက “အခု မြန်မာ့နိုင်ငံရေး အခင်းအကျင်းက တော်တော်ဆိုးရွားတဲ့ အနေအထားကို ရောက်သွားပြီ။ အဆိုးရွား ဆုံး အခြေအနေကို ရောက်နေပါပြီ။ ကမ္ဘာစစ်ကြီးလိုမျိုး မြို့တွေ အများကြီး ပျက်စီးတာ မဟုတ်တောင်မှ တော်တော်လေးကို ထိခိုက်နစ်နာနေပြီ။ အထူးသဖြင့် လူထုတွေမှာ စားဝတ်နေရေး ပြဿနာတွေ ရှိလာတယ်ပေါ့။ လူထုရဲ့ ဆန္ဒကိုပြောမယ်ဆိုရင် မြန်မြန်ပြီးစေချင်ကြတာပေါ့။ မြန်မြန်ကောင်းစေချင်ကြတာပေါ့။ ဖြစ်နိုင်ရင်လည်း အားလုံးပြေပြေလည်လည် ဖြစ်စေချင်ကြတာပေါ့” ဟု ပြောသည်။

လက်ရှိတွင် တိုင်းရင်းသားလက်နက်ကိုင်များအကြား နယ်မြေစိုးမိုးမှုများ၌ ရှမ်းပြည်နယ်၌ KIA နှင့် TNLA ကြား လည်းကောင်း၊ KIA နှင့် MNDAA ကြားလည်းကောင်း၊ TNLA နှင့် SSPP ကြားလည်းကောင်း၊ RCSS နှင့် SSPP ကြားလည်းကောင်း၊ PNO နှင့် PNLO ကြားလည်းကောင်း နယ်မြေအငြင်းပွား၍ ပွတ်တိုက်မှုများ ဖြစ်ပွားနေသည်။

အလားတူ တနင်္သာရီတိုင်းဒေသကြီးနှင့် ကရင်ပြည်နယ်အတွင်းမှာ NMSP နှင့် KNU ကြားလည်းကောင်း၊ KNU နှင့် KTLA ကြားလည်းကောင်း နယ်မြေအငြင်းပွား၍ ပွတ်တိုက်မှုများ ဖြစ်ပွားနေခြင်းဖြစ်သည်။

လက်ရှိ မြန်မာ့နိုင်ငံရေး အခင်းအကျင်းတွင် တွေ့ဆုံဆွေးနွေးခြင်း နည်းလမ်းဖြင့် အဖြေရှာရန် တိုက်တွန်းနေကြ သော်လည်း ပြုပြင်ပြောင်းလဲရေး အရွေ့တစ်ခုကို သွားနိုင်သော နိုင်ငံရေး တွေ့ဆုံဆွေးနွေးမှုမျိုး မရှိသေးကြောင်း လည်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

CNI News

၂၀၂၅ ခုနှစ်၊ မတ်လ ၆

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဘယ်လာရုစ်နိုင်ငံသို့ တရားဝင် ချစ်ကြည်ရေးခရီးသွားရောက်၍ မတ်လ ၇ ရက်တွင် ဘယ်လာရုစ်သမ္မတ လူကာရှန်ကိုနှင့် တွေ့ဆုံဆွေးနွေးမည်ဖြစ်သည်။

နစကဥက္ကဋ္ဌကို ဘယ်လာရုစ်သမ္မတ လူကာရှန်ကိုက ဘယ်လာရုစ်နိုင်ငံသို့ ချစ်ကြည်ရေးခရီး လာရောက်ရန် ဖိတ် ခေါ်ခဲ့ပြီးနောက် ဘယ်လာရုစ်ခရီးစဉ် ပေါ်ပေါက်လာခဲ့သည်။

ဗိုလ်ချုပ်မှူးကြီးမင်းအောင်လှိုင်သည် မတ်လ ၇ ရက်တွင် ဘယ်လာရုစ်နိုင်ငံ၊ မင့်စ်မြို့ရှိ သမ္မတနန်းတော်မှာ သမ္မတ လူကာရှန်ကိုနှင့် တွေ့ဆုံကြမည်ဖြစ်သည်။

 ၂၀၂၄ ခုနှစ်တုန်းက ဗိုလ်ချုပ်မှူးကြီးမင်းအောင်လှိုင်နဲ့ ဘယ်လာရုစ်သမ္မတ လူကာရှန်ကို တွေ့ဆုံစဉ်

ထို့နောက် နှစ်နိုင်ငံခေါင်းဆောင်များသည် ကုန်သွယ်ရေး၊ စီးပွားရေးနှင့် လူသားချင်းစာနာ ထောက်ထားမှုဆိုင်ရာ ကိစ္စရပ်များတွင် ပူးပေါင်းဆောင်ရွက်ရေးတို့ကို ဆွေးနွေးကြမည်ဖြစ်ပြီး အနာဂတ်အတွက် အစီအစဉ်များကို အကောင်အထည်ဖော်ရေး ဆွေးနွေးကြမည်ဖြစ်သည်။ 

အထူးသဖြင့် စက်မှုလုပ်ငန်း၊ စိုက်ပျိုးရေး၊ ဆေးဝါးနှင့် သိပ္ပံနည်းပညာတို့တွင် ပူးပေါင်းဆောင်ရွက်ရေးတို့ကို ဆွေးနွေးကြမည်ဖြစ်သည်။

ဆွေးနွေးပွဲအပြီးတွင် နှစ်နိုင်ငံကြား သဘောတူညီချက် အများအပြားကို လက်မှတ်ရေးထိုးကြမည်ဖြစ်ကြောင်း ဘယ်လာရုစ်သမ္မတရုံးက ထုတ်ပြန်ခဲ့သည်။

နစကဥက္ကဋ္ဌသည် ရုရှားသမ္မတ ပူတင်၏ ဖိတ်ကြားချက်အရ ရုရှားနိုင်ငံသို့ မတ်လ ၃ ရက်မှစတင်၍ ချစ်ကြည်ရေး ခရီးသွားရောက်ပြီး မတ်လ ၄ ရက်တွင် သမ္မတ ပူတင်၊ ရုရှားဝန်ကြီးချုပ်၊ ရုရှားလုံခြုံရေးကောင်စီ 
အတွင်းရေးမှူး၊ ရုရှားလွှတ်တော်ဥက္ကဋ္ဌနှင့် ရုရှားအစိုးရအဖွဲ့ တာဝန်ရှိသူများဖြင့် သီးခြားစီ တွေ့ဆုံဆွေးနွေးခဲ့သည်။

ထို့နောက် နျူကလီးယား ဓာတ်အားပေးစက်ရုံ တည်ဆောက်ရေးနှင့် ကုန်သွယ်ရေးဆိုင်ရာ သဘောတူညီချက် ၁၀ ခုကို လက်မှတ်ရေးထိုးခဲ့ကြသည်။

CNI News

၂၀၂၅ ခုနှစ်၊ မတ်လ ၆

ရုရှားနိုင်ငံသည် မြန်မာပြည်တွင်းသို့ လာရောက်ရင်းနှီးမြှုပ်နှံလာပါက ရုရှားနိုင်ငံမှ ပုဂ္ဂလိကလုံခြုံရေးတပ်များ သည် ၎င်းတို့၏ ရင်းနှီးမြှုပ်နှံမှုများအား ကာကွယ်ရန် မြန်မာပြည်တွင်းသို့ ဝင်ရောက်လာနိုင်ကြောင်း စစ်ရေးနှင့် နိုင်ငံရေးအကဲခတ်များက ပြောသည်။

ပုဂ္ဂလိကလုံခြုံရေးဝန်ဆောင်မှုဆိုင်ရာဥပဒေအား ၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၁၉ အရ ပြဋ္ဌာန်းလိုက် ကြောင်း နစက-က ၂၀၂၅ ခုနှစ်၊ ဖေဖော်ဝါရီ ၁၈ ရက်တွင် ထုတ်ပြန်ခဲ့သည်။

ရုရှား-မြန်မာကြား ထားဝယ်ရေနက်ဆိပ်ကမ်း၊ နျူကလီးယား ဓာတ်ပေါင်းဖို စာချုပ်များ ချုပ်ဆိုပြီးဖြစ်ကာ စီးပွားရေးလုပ်မည့် သူများအနေဖြင့် လုံခြုံရေးအတွက် စဥ်းစားမည်ဖြစ်၍ ရုရှားတပ်များလည်း ပြည်တွင်းသို့ ဝင်ရောက်လာနိုင်ကြောင်း အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

ဦးထက်အောင်ကျော်က “ခုနက ထားဝယ်ရေနက်ဆိပ်ကမ်းတို့၊ ပြီးတော့ အခုဒီတစ်ခါကလည်း နျူကလီးယား ဓာတ်ပေါင်းဖိုတို့တော့ စာချုပ်ချုပ်လာတယ်လို့တော့ ကြားတာပေါ့နော်၊ ဘာတွေ ထပ်ချုပ်ဦးမလဲ မပြောတတ် သေးဘူး နည်းနည်းလေး ရက်က ရှည်မှာဆိုတဲ့အခါကျ‌တော့ အဲဟာတွေ အတွက်ကတော့ ဘာပဲဖြစ်ဖြစ် ဒီအချိန်မှာ စီးပွားရေး လုပ်မယ့်သူတွေ အကုန်လုံး အနေနဲ့ကတော့ လုံခြုံရေးအတွက်ကိုက စဥ်းစားမှာပဲလေ၊ စဥ်းစားမှာပဲဆိုတော့ ဒီလုံခြုံရေး ဥပဒေလည်း ပြဋ္ဌာန်းပြီးသား ဆိုတဲ့အခါကျတော့ ဖြစ်နိုင်တာပေါ့၊ ရုရှားလည်း ဖြစ်နိုင်တာပဲ၊ တရုတ်လည်း ဖြစ်နိုင်တာပဲ၊ အိန္ဒိယလည်း ဖြစ်နိုင်တာပဲ၊ ဒါပေမယ့် တစ်ခုပဲရှိတာ ကျနော်တို့က ဒီနည်းဥပဒေပေါ့၊ နည်းဥပဒေကို ကျနော်တို့က မတွေ့ရသေးတဲ့ အခါကျတော့ ဒီအပေါ်ကနေပဲ ကြည့်နေတာ၊ နည်းဥပဒေလာပြီးမှ ဆိုလို့ရှိရင် နည်းနည်းပိုပြီးတော့မှ ရှင်းရှင်းလင်းလင်း ပိုဖြစ်လာမယ်လို့တော့ ထင်ပါတယ်” ဟု ပြောသည်။

ရုရှားရဲ့ ဝဂ္ဂနာလုံခြုံရေးကုမ္ပဏီကို တွေ့ရစဉ်

ပုဂ္ဂလိကလုံခြုံရေးဝန်ဆောင်မှုဆိုင်ရာ ဥပဒေအရ မြန်မာနိုင်ငံအတွင်း ရင်းနှီးမြှုပ်နှံထားကြသည့် တရုတ်၊ အိန္ဒိယ၊ ထိုင်း၊ စင်္ကာပူ အပါအဝင် ပြည်ပနိုင်ငံများသည် လုံခြုံရေးကုမ္ပဏီများ ထူထောင်၍ ၎င်းတို့၏ စီမံကိန်းများနှင့် ရင်းနှီးမြှုပ်နှံမှုများ၊ ဝန်ထမ်းများ၊ ကုမ္ပဏီများကို ကာကွယ်ရေး ကြိုးပမ်းလာနိုင်သည်ဟု ထောက်ပြကြသည်။

ထို့အတူ ရုရှားနိုင်ငံမှ မြန်မာနိုင်ငံတွင် လာရောက်ရင်းနှီးမြှုပ်နှံပါကလည်း ရုရှားလုံခြုံရေးတပ်ဖွဲ့ဝင်များ ပြည်တွင်းသို့ ဝင်ရောက်လာပြီး ၎င်းတို့၏ လုံခြုံရေးနှင့် စီမံကိန်းများအတွက် ပုဂ္ဂလိကလုံခြုံရေးကုမ္ပဏီများ ထူထောင်နိုင်သည်ဟု ထောက်ပြကြသည်။

အကယ်၍ ရုရှားသည် ထားဝယ်ဆိပ်ကမ်းတွင် ရင်နှီးမြှုပ်နှံမှုများ လုပ်မည်ဆိုလျှင်တော့ ရုရှားလုံခြုံရေးတပ်များ ဝင်ရောက်လာနိုင်ကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာန သို့ ပြောသည်။

ဒေါက်တာလှကျော်ဇောက “တရုတ်လုံခြုံရေး ကုမ္ပဏီတွေကို သူလက်ခံတာက တရုတ်ရဲ့ ရင်းနှီးမြှုပ်နှံမှုတွေကို ကာကွယ်ဖို့ဆိုပြီး ခေါ်တာဖြစ်တာကိုး၊ အဲတော့ တရုတ်ကလည်း အဲလိုဟာမျိုးအတွက် သွားတတ်တာတွေ ရှိပါ တယ်၊ သူ အာဖရိကတိုက်တို့၊ ပါကစ္စတန်တို့ ဘာတို့မှာလည်း ဆူဒန်တို့ ဘာတို့မှာလည်း အဲလိုသူ့လုံခြုံရေးတပ်ဖွဲ့ တွေ လွှတ်ထားတာတွေတော့ ရှိပါတယ်၊ အဲတော့ တကယ်လို့ ရုရှားကလည်း ထားဝယ်ဆိပ်ကမ်းလား ဘာလား အဲဒီမှာ ရင်းနှီးမြှုပ်နှံဖို့ လုပ်မယ်ဆိုရင်တော့ ဖြစ်ကောင်းဖြစ်လာ နိုင်တာပေါ့ဗျာ၊ ကျမ သိသလောက်ပေါ့နော် ရုရှားရဲ့တပ်တော့ ကျမ သိပ်မသိဘူး၊ တရုတ်ရဲ့ တပ်ကတော့ ဥပမာ ပါကစ္စတန်တို့၊ အာဖရိကတို့ သွားတဲ့တပ်တွေ ကတော့ သူတို့ရင်းနှီးမြှုပ်နှံမှုဆိုင်ရာ ကုမ္ပဏီတွေ ခုနပြောတဲ့ သူတို့တည်ဆောက်နေတဲ့ တံတားဆိုလည်း တံတား၊ လေယာဥ်ပျံကွင်းဆိုလည်း လေယာဥ်ပျံကွင်း၊ သင်္ဘောဆိပ် အဲဒီနေရာတွေမှာပဲ သူတို့ လက်နက်ကိုင်ဆောင်ပြီး သူတို့ရဲ့ လူတွေပေါ့နော် သူတို့အင်ဂျင်နီယာတွေ၊ သူတို့ရဲ့ လုပ်သားတွေ အဲဒီလုံခြုံ‌ရေးအတွက်ပဲ သူတို့တာဝန်ယူ ရတယ်ဗျ၊ အဲဒီဟာ ကျော်လွန်ပြီး ထွက်သွားပြီဆိုရင် သူတို့လက်နက် ကိုင်ဆောင်ခွင့်မရှိဘူး” ဟု ပြောသည်။

 နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နဲ့ ရုရှားသမ္မတ ပူတင်တို့ သဘောတူညီချက် ၁၀ ခု လက်မှတ်ထိုးအပြီး တွေ့ရစဉ်

ရုရှားနိုင်ငံသည် မြန်မာနိုင်ငံတွင် ဆိပ်ကမ်းနှင့် ရေနံချက်စက်ရုံ တည်ဆောက်ရေး အပါအဝင် ထားဝယ် အထူးစီးပွားရေးဇုန်၌ ရင်းနှီးမြှုပ်နှံရန် နစကနှင့် သဘောတူ လက်မှတ်ထိုးလိုက်သည့်အကြောင်း ရုရှားစီးပွားရေး ဖွံဖြိုးမှုဝန်ကြီးဌာနက ၂၀၂၅ ခုနှစ်၊ ဖေဖော်ဝါရီ ၂၃ ရက်တွင် ထုတ်ပြန်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ရုရှားနိုင်ငံသို့ မတ်လ ၃ ရက်မှ စတင်၍သွားရောက်နေပြီး ရုရှားသမ္မတပူတင်၊ ရုရှားဝန်ကြီးချုပ်၊ ရုရှားလုံခြုံရေးကောင်စီ အတွင်းရေးမှူး၊ ရုရှားလွှတ်တော်ဥက္ကဋ္ဌတို့နှင့် သီးခြားစီ တွေ့ဆုံ ဆွေးနွေးပြီးနောက် ရုရှား-မြန်မာ သဘောတူညီချက် ၁၀ ခုအား လက်မှတ်ရေးထိုးခဲ့ကြောင်း နှစ်နိုင်ငံပူးတွဲ ထုတ်ပြန်ခဲ့သည်။

အလားတူ နှစ်နိုင်ငံ ကုန်သွယ်ရေး၊ စီးပွားရေး ရင်းနှီးမြှုပ်နှံ‌ရေး၊ လုံခြုံရေးကဏ္ဍ ပူးပေါင်းဆောင်ရွက်‌ရေး၊ စက်မှု လုပ်ငန်းများ တည်ဆောက်ရေး စသည့် အခြေအနေများအား ဆွေးနွေးခဲ့ကြကြောင်း သိရသည်။

CNI News

၂၀၂၅ ခုနှစ်၊ မတ်လ ၆

ရုရှားနိုင်ငံ၏ အမျိုးသားအောင်ပွဲနေ့ ရင်ပြင်နီချီတက်ပွဲ အခမ်းအနားကို တက်ရောက်ဖို့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ဖိတ်ကြားခဲ့သလို မြန်မာ့တပ်မတော်ကိုလည်း ချီတက်ပွဲမှာ ပါဝင်ချီတက်ရန် ရုရှားသမ္မတ ပူတင်က ဖိတ်ကြားခဲ့သည်။

၂၀၂၅ ခုနှစ်၊ မေလ ၉ ရက်တွင် (၈၂)ကြိမ်မြောက် အမျိုးသားအောင်ပွဲ့နေ့ကို မော်စကိုမြို့မှာ ကျင်းပမည်ဖြစ်ပြီး ရင်ပြင်နီမှာ ချီတက်ပွဲလုပ်မည်ဖြစ်သည်။

အဆိုပါ အခမ်းအနားသို့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို အခမ်းအနား တက်ရောက်ရန် ရုရှားသမ္မတ ပူတင်က ဖိတ်ကြားခဲ့သလို မြန်မာ့တပ်မတော်ကိုလည်း ရင်ပြင်နီချီတက်ပွဲမှာ ပါဝင်ချီတက်စေ လိုကြောင်း ပြောကြားခဲ့သည်။

ရုရှားသမ္မတ ပူတင်က “ မေလ ၉ ရက်နေ့မှာ ၈၂ ကြိမ်မြောက် အမျိုးသားအောင်ပွဲနေ့ကို မော်စကိုမှာ ကျင်းပမှာ ဖြစ်ပြီးတော့ အဆွေတော်ဝန်ကြီးချုပ်ကို အခမ်းအနားကို ပါဝင်တက်ရောက်နိုင်ဖို့ ကျနော်ဖိတ်ခေါ်ပါတယ်။ မြန်မာနိုင်ငံက ကိုယ်စားပြုတပ်ဖွဲ့ကိုလည်း ရင်ပြင်နီချီတက်ပွဲမှာ ပါဝင်ချီတက်စေလိုပါတယ်”ဟု ပြောသည်။

ထို့နောက် နိုင်ငံတကာကိစ္စရပ်များကို ဆွေးနွေးလိုကြောင်း၊ နိုင်ငံတကာ ပြဿနာအများစုနှင့် ပတ်သက်ပြီး ရုရှား-မြန်မာ ရပ်တည်ချက်များ ကိုက်ညီကြောင်း၊ နိုင်ငံတကာမျက်နှာစာမှာ ပူးပေါင်းဆောင်ရွက်မှုများရှိကြောင်း ၎င်းက ပြောသည်။

နစကဥက္ကဋ္ဌနဲ့ သမ္မတပူတင် ပူးတွဲသတင်းစာ ရှင်းလင်းပွဲလုပ်နေစဉ်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားသမ္မတပူတင်၏ ဖိတ်ကြားချက်ဖြင့် ရုရှားနိုင်ငံသို့ မတ်လ ၃ ရက်မှ စတင်၍ ချစ်ကြည်ရေးခရီးသွားရောက်ခဲ့ပြီး မတ်လ ၄ ရက်က သမ္မတပူတင်၊ ရုရှားဝန်ကြီးချုပ်၊ ရုရှား လုံခြုံရေးကောင်စီ အတွင်းရေးမှူး၊ ရုရှားလွှတ်တော်ဥက္ကဋ္ဌ၊ ရုရှားအစိုးရအဖွဲ့ တာဝန်ရှိသူများနှင့် သီးခြားစီ တွေ့ဆုံ ဆွေးနွေးခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ကျနော်တို့ ချစ်ကြည်ရေးခရီးစဉ်ကို အစစအရာရာ ပြည့်စုံအောင် ဆောင်ရွက်ပေးမှုများ၊ နွေးထွေးစွာ ကြိုဆိုမှုများအတွက်ကိုလည်း လှိုက်လှဲစွာ ကျေးဇူးတင်ရှိပါကြောင်းနဲ့ အဆွေ တော် သမ္မတကြီးကို အခါအခွင့်သင့်တဲ့အချိန်မှာ မြန်မာနိုင်ငံကို ချစ်ကြည်ရေးခရီးလာရောက်နိုင်ဖို့အတွက်ကို လည်း ဖိတ်ကြားအပ်ပါတယ်”ဟု ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၏ ရုရှားခရီးစဉ်အတွင်းမှာ နှစ်နိုင်ငံ သဘောတူညီချက် ၁၀ ခုကို လက်မှတ်ရေးထိုးခဲ့ကြသည်။

ထို့နောက် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဘယ်လာရုစ်သမ္မတ လူကာရှန်ကို၏ ဖိတ်ကြားချက် အရ ဘယ်လာရုစ်နိုင်ငံသို့ ချစ်ကြည်ရေးခရီးစဉ် ဆက်လက်သွားရောက်မည်ဖြစ်ပြီး ဘယ်လာရုစ်သမ္မတနှင့် တွေ့ ဆုံ၍ ဆွေးနွေးကြမည်ဖြစ်သည်။

CNI News

၂၀၂၅ ခုနှစ်၊ မတ်လ ၅

နိုင်ငံတော်နှင့်တပ်မတော်အပေါ် သစ္စာရှိရန် လိုအပ်သလို နိုင်ငံ့ဝန်ထမ်းများ ဖြစ်သည့်အတွက် ပါတီနိုင်ငံရေးများ ကင်းရှင်းကြရန်လိုအပ်ကြောင်း ရုရှားရောက် စစ်ဘက်/အရပ်ဘက်မှ ပညာတော်သင် အရာရှိများကို နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ရုရှားနိုင်ငံသို့ ချစ်ကြည်ရေးခရီးစဉ်အဖြစ် ရောက်ရှိနေစဉ် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၅ ခုနှစ်၊ မတ်လ ၄ ရက်က ရုရှားနိုင်ငံရောက် စစ်ဘက်/အရပ်ဘက် ပညာတော်သင် အရာရှိသင်တန်းသားများနှင့် တွေ့ဆုံစဉ် အထက်ပါအတိုင်း ပြောကြားခဲ့ခြင်း ဖြစ်သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ပညာတော်သင်အရာရှိများအနေဖြင့် နိုင်ငံတော်အပေါ် သစ္စာ စောင့်သိရန်လိုကြောင်း၊ တပ်မတော်သားများသည် နိုင်ငံတော်အတွက် မိမိတို့၏ အသက်ကို ပေးဆပ်မည်ဟု သစ္စာ ဆို၍ ဝင်လာသူများဖြစ်သဖြင့် နိုင်ငံတော်၏ အကျိုးစီးပွားကို ထိခိုက်စေနိုင်သည့် ကိစ္စရပ်များဆောင်ရွက်ခြင်း မပြု မိအောင် စောင့်ထိန်းရန်လိုကြောင်း၊ နိုင်ငံတော်နှင့် တပ်မတော်အပေါ် သစ္စာရှိရှိဖြင့် ခံယူချက်ရှိစွာဖြင့် ဆောင်ရွက် ကြရန်လိုကြောင်း၊ အလားတူ နိုင်ငံ့ဝန်ထမ်းများ ဖြစ်သည့်အတွက်လည်း ပါတီနိုင်ငံရေးများ ကင်းရှင်းကြရန်လို တယ်”ဟု ပြောသည်။

၂၀၂၅ ခုနှစ်၊ မတ်လ ၅ ရက်က ပညာတော်သင်များနဲ့ နစကဥက္ကဋ္ဌ တွေ့ဆုံစဉ်

၂၀၀၈ ဖွဲ့စည်းပုံအခြေခံဥပဒေ ပုဒ်မ ၂၆ (က)တွင် နိုင်ငံ့ဝန်ထမ်းများသည် ပါတီနိုင်ငံရေးနှင့် ကင်းရှင်းရမည်ဟု ပြဋ္ဌာန်းထားသည်။

ထို့နောက် ယနေ့ခေတ်သည် AI နည်းပညာခေတ်ဖြစ်၍ AI နည်းပညာများကို စဉ်ဆက်မပြတ် လေ့လာနေရန်လို ကြောင်း၊ မိမိတို့နိုင်ငံအတွက် လိုအပ်သည့် နည်းပညာများ တိုးတက်စေရေး ကြိုးပမ်းသင်ယူကြရန်လိုကြောင်း၊ နည်းပညာနှင့်ပတ်သက်၍ နောက်ကျ မကျန်နေစေရေး မိမိတို့အနေဖြင့် ကြိုးပမ်းအားထုတ်နေရန်လိုကြောင်း ၎င်းက ပြောသည်။

နိုင်ငံ့ဝန်ထမ်းများ ပါတီနိုင်ငံရေး ကင်းရှင်းရမည်ဟု နစကဥက္ကဋ္ဌက ပြောနေသော်လည်း ၂၀၀၈ ဖွဲ့စည်းပုံအခြေခံ ဥပဒေ ပုဒ်မ ၆(စ)တွင် နိုင်ငံတော်၏ အမျိုးသားနိုင်ငံရေး ဦးဆောင်မှုအခန်းကဏ္ဍတွင် တပ်မတော်က ပါဝင် ထမ်း ဆောင်နိုင်ရေးတို့ကို အစဉ်တစိုက် ဦးတည်သည်ဟု ပြဋ္ဌာန်းထားကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

အလားတူ ရွေးကောက်ပွဲများကနေတဆင့် ဖြစ်တည်လာသော လွှတ်တော်များတွင်လည်း ရွေးကောက်ခံ မဟုတ်သလို နိုင်ငံရေးပါတီဝင်များ မဟုတ်ဘဲ ကိုယ်စားလှယ် ၂၅ ရာခိုင်နှုန်း နေရာယူ၍ နိုင်ငံရေးမှာ ပါဝင်နေ ခြင်းကလည်း ပါတီနိုင်ငံရေး ကင်းရှင်းရမည်ဟု ပြောကြားမှုအပေါ် မေးခွန်းထုတ်စရာ ဖြစ်နေကြောင်း ၎င်းတို့က ထောက်ပြသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား NLD အစိုးရက မဖြေရှင်းဘဲ အစိုးရဖွဲ့စည်းရေးကြိုးပမ်းသည်ဟုဆိုကာ မြန်မာ့တပ်မတော်မှ နိုင်ငံတော်ကို အရေးပေါ် ကြေညာ၍ အာဏာရယူခဲ့သည်။

ထို့နောက် နိုင်ငံရေး အကျပ်အတည်းများ ပေါ်ပေါက်လာပြီး မြန်မာ့တပ်မတော်နှင့် နစကကို စစ်ဘက်/အရပ်ဘက် မှ နိုင်ငံ့ဝန်ထမ်းများ အပါအဝင် ပြည်သူလူထုများနှင့် လက်နက်ကိုင် အင်အားစုများက ဆန့်ကျင် ကန့်ကွက်ခဲ့ကြ သည်။

ထို့ပြင် နိုင်ငံ့ဝန်ထမ်း တချို့သည် အာဏာဖီဆန်ခြင်းလှုပ်ရှားမှု(CDM)တွင် ပါဝင်ခဲ့ကြသလို နိုင်ငံ့ဝန်ထမ်း အဖြစ်မှ နှုတ်ထွက်သွားခဲ့ကြသော အခြေအနေများထိ ဆောင်ရွက်ခဲ့ကြမှုများ ရှိခဲ့သည်။

CNI News

၂၀၂၅ ခုနှစ်၊ မတ်လ ၅

မြန်မာနိုင်ငံတွင် အသေးစားအနုမြူဓာတ်အားပေးစက်ရုံ ဆောက်လုပ်ရေးအတွက် ရုရှားနှင့်မြန်မာ သဘောတူညီခဲ့ ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ရုရှားသမ္မတ ပူတင်တို့က ပူးတွဲထုတ်ပြန်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားနိုင်ငံသို့ တရားဝင် ချစ်ကြည်ရေးခရီးကို မတ်လ ၃ ရက်က စတင်သွားရောက်ခဲ့ပြီးနောက် မတ်လ ၄ ရက်တွင် ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ ကျနော်တို့ နှစ်နိုင်ငံရဲ့ အစိုးရအချင်းချင်း ပူးပေါင်းဆောင်ရွက်မှု ကော်မရှင်ကလည်း တက်တက်ကြွကြွ ပူးပေါင်းဆောင်ရွက်နေပါတယ်။ မကြာခင်က ကုန်သွယ်ရေးကော်မရှင် အစည်းအဝေးကို နေပြည်တော်မှာ ကျင်းပခဲ့ပါတယ်။ စွမ်းအင်အခန်းကဏ္ဍမှာလည်း ပူးပေါင်းဆောင်ရွက်လျက်ရှိ ပြီး မဟာဗျူဟာမြောက် ပူးပေါင်းဆောင်ရွက်ဖို့ စီစဉ်နေပါတယ်။ အခြားနယ်ပယ်တွေမှာလည်း ပူးပေါင်းဆောင် ရွက်သွားဖို့ စီစဉ်နေပါတယ်။ အခြားနယ်ပယ်တွေမှာလည်း ပူးပေါင်းဆောင်ရွက်သွားဖို့ မိမိတို့ အနေနဲ့အသင့်ရှိပါ တယ်။ အထူးသဖြင့် ပြန်လည်ပြည့်ဖြိုးမြဲ စွမ်းအင်အရင်းအမြစ်များ တိုးတက်ရေး၊ မြန်မာနိုင်ငံတွင် အသေးစား အနုမြူဓာတ်အားပေးစက်ရုံ ဆောက်လုပ်ရေးအတွက် သဘောတူညီခဲ့ပါတယ်”ဟု ပြောသည်။

အဆိုပါ အနုမြူဓာတ်အားပေး စက်ရုံ တည်ဆောက်ပြီးပါက မြန်မာနိုင်ငံ စီးပွားရေးအတွက် လိုအပ်သည့် လျှပ်စစ်ဓာတ်အား ပေါပေါများများ ပေးနိုင်မည်ဟု ၎င်းက ပြောသည်။

လက်ရှိ မြန်မာနိုင်ငံတွင် လျှပ်စစ်ဓာတ်အားသည် တစ်နေလျှင် ၄ နာရီခြား တစ်ခါသာ ပေးနိုင်သည့်အတွက် စက်ရုံ၊ အလုပ်ရုံများနှင့် ရုံးလုပ်ငန်းများ အပါအဝင် နေအိမ်များသည် လုပ်ငန်းလည်ပတ်ရန် နှေးကွေးသွားသလို လူမှုကုန် ကျစရိတ်များလည်း မြင့်တက်ခြင်း အခြေအနေဖြင့် ရင်ဆိုင်နေကြရသည်။

ထို့ကြောင့် နစကသည် လျှပ်စစ်ဓာတ်အား အပြည့်အဝ ပြန်လည်ရရှိရေးအတွက် ဆိုလာစနစ်ဖြင့် လည်ပတ်ရန် လည်း စီမံကိန်းများ အကောင်အထည်ဖော်လျက်ရှိနေသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားခရီးစဉ်တွင် ရုရှား-မြန်မာ သဘောတူညီချက် ၁၀ ခုကို လက်မှတ်ရေးထိုးခဲ့ကြောင်း နှစ်နိုင်ငံ ပူးတွဲထုတ်ပြန်ချက်ခဲ့သည်။

အလားတူ နှစ်နိုင်ငံ ကုန်သွယ်ရေး၊ စီးပွားရေး ရင်းနှီးမြှုပ်နှံရေး၊ လုံခြုံရေးကဏ္ဍပူးပေါင်းဆောင်ရွက်ရေး၊ စက်မှု လုပ်ငန်းများ တည်ဆောက်ရေး စသည့် အခြေအနေများကိုလည်း ဆွေးနွေးခဲ့ကြကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၂ ခုနှစ်၊ စက်တင်ဘာလကလည်း ရုရှားနိုင်ငံသို့ သွားရောက် ခဲ့ပြီး စက်တင်ဘာ ၇ ရက်တွင် သမ္မတပူတင်နှင့် တွေ့ဆုံ ဆွေးနွေးခဲ့ကြသေးသည်။

CNI News

၂၀၂၅ ခုနှစ်၊ မတ်လ ၅

မြန်မာနိုင်ငံအတွင်းရှိ လက်နက်ကိုင်ထားသော အဖွဲ့အစည်းများအနေဖြင့် လက်နက်ကိုင်၍ စီးပွားရှာရသည်မှာ လွယ်ကူနေသဖြင့် လက်နက်စွန့်ရန်အတွက် အင်မတန်ဝန်လေးကြကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

ဦးစိုင်းဋ္ဌေးအောင်က “လက်နက်ကိုင် အဖွဲ့အစည်းများက သေနတ်ကိုင်ပြီး စီးပွားရှာရတာ လွယ်ကူနေတဲ့ အခါကြ တော့ လက်နက်စွန့်ဖို့ အင်မတန် ဝန်လေးပါတယ်။ ပွင့်ပွင့်လင်းလင်းပြောရရင် ဖက်ဒရယ်တို့၊ ဒီမိုကရေစီတို့ သူတို့ ပါးစပ်ဖျားက အော်နေကြတာက အလကားပါ။ အခုသူတို့လုပ်ရပ်တွေက သက်သေပြနေပါတယ်။ နိုင်ငံအတွက်ကို ချစ်ပေးကြပါ။ လူပုဂ္ဂိုလ်ကို မချစ်ပါနဲ့။ လူပုဂ္ဂိုလ်အကြောင်းပြပြီးမှ ကိုယ်ကျိုးစီးပွား မရှာကြပါနဲ့လို့ မေတ္တာရပ်ခံ ချင်တယ်။ ကိုယ်ကျိုး အတ္တတွေနည်းပြီး နိုင်ငံကိုချစ်စိတ်တွေ စုပေါင်းသွားပြီဆိုရင်တော့ ငြိမ်းချမ်းရေးက မရစရာ အကြောင်းမရှိဘူးလို့ မြင်ပါတယ်” ဟု ပြောသည်။

လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်းအထန် ဖြစ်ပွားနေပြီး တိုက်ပွဲများအတွင်း လက်နက်ကိုင်အင်အားစုများက အရှေ့မြောက်ပိုင်းတိုင်းစစ်ဌာနချုပ်(ရမခ)၊ အနောက်ပိုင်းတိုင်းစစ်ဌာနချုပ်(နပခ) ဆိုသည့် စစ်ဌာန ၂ ခု အပါအဝင် မြို့နယ်ပေါင်း ၉၀ ကျော်ကို ထိန်းချုပ် ထားနိုင်နေသည်။

 လက်နက်ကိုင်ထားသူများကို တွေ့ရစဉ်

တွေ့ဆုံဆွေးနွေးရေးနှင့်ပတ်သက်၍ နစကမှ ဖိတ်ခေါ်ထားသကဲ့သို့ ညီနောင်မဟာမိတ် ၃ ဖွဲ့တို့ကလည်း တွေ့ဆုံ ဆွေးနွေးရန် အသီးသီး ထုတ်ပြန်ထားကြသော်လည်း ကျန်လက်နက်ကိုင်အဖွဲ့များကတော့ ထုတ်ပြန်ထားခြင်း မတွေ့ရပေ။

နိုင်ငံရေးပြဿနာအား လက်နက်ဖြင့် ဖြေရှင်း၍ ရသွားသည့်ကိစ္စမှာ အင်မတန်ရှားပါးကြောင်း၊ လက်ရှိတွင် နစကမှ ဗဟို အားနည်းနေသည့်အတွက် တွေ့ဆုံဆွေးနွေးရေး ဖိတ်ခေါ်မှုအပေါ် လာရောက်ကြရန်မှာ လက်နက် ကိုင် အဖွဲ့များအတွက် ခဲယဉ်းကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေး ပါတီ(TNDP)မှဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

NSPNC နဲ့ နိုင်ငံရေးပါတီများ ဆွေးနွေးကြစဉ်

၎င်းက “အမှန်က နိုင်ငံရေးကိစ္စဆိုတာ လက်နက်နဲ့ ဖြေရှင်းလို့ရသွားတဲ့ကိစ္စ တော်တော်ရှားပါတယ်။ နိုင်ငံရေး ပြဿနာ မပြေလည်လို့ လက်နက်ကိုင်ကြတာ။ ဒါပေမယ့် စားပွဲဝိုင်းယဉ်ကျေးမှုနဲ့ပဲ သွားကြရတဲ့ ကိစ္စတွေပါ။ အဲဒီ အခါကြတော့ စားပွဲဝိုင်းကို ရောက်လာဖို့လည်း ဒီဖက်ကလည်း ဖိတ်ခေါ်တယ်။ နစကတော့ တစ်ဖွဲ့ချင်း ဆွေးနွေး မယ် ဘာညာ ဖိတ်ခေါ်ခဲ့တာတွေ အာဏာသိမ်းခဲ့တုန်းက ရှိတယ်။ ဒါပေမယ့် ယနေ့ လက်ရှိလည်း သူတို့ပြန်ပြီး တော့မှ ဖိတ်ခေါ်တယ်။ လာဖို့တော့ အင်မတန် ခဲယဉ်းပါတယ်။ ဘာကြောင့်လဲဆိုတော့ ဗဟိုအားနည်းတဲ့ အခါကြ တော့ ပြည်နယ်တွေမှာရှိတဲ့ လက်နက်ကိုင် အဖွဲ့အစည်းတွေက မခန့်လေးစားဖြစ်တဲ့အခါ ငါတို့သွားစရာ မလိုဘူး ဆိုတဲ့ မာနလေးတွေနဲ့ နေထားကြတာ အများကြီးရှိပါတယ်။ တွေ့ဆုံဆွေးနွေးရေးဖြစ်ဖို့ရယ်၊ နိုင်ငံငြိမ်းချမ်းရေး ရဖို့ရယ် ဒီအဖွဲ့အစည်းပေါင်းစုံတွေ အနေနဲ့ကတော့ လက်နက်ကိုင် အဖွဲ့အစည်းတွေအနေနဲ့က မာနတွေလျှော့ပြီး နိုင်ငံကိုချစ်ဖို့ နံပါတ်တစ် ပြောချင်တယ်” ဟု ပြောသည်။

(၄)နှစ်ကျော်ကြာ မြန်မာ့နိုင်ငံရေး အခင်းအကျင်းတွင် တွေ့ဆုံဆွေးနွေးခြင်း နည်းလမ်းဖြင့် အဖြေရှာရန်အတွက် စတင်လုပ်ဆောင်ရာမှာ တိုင်းရင်းသားလက်နက်ကိုင် ၂ ဖွဲ့ဖြစ်သည့် ကိုးကန့်တပ်ဖွဲ့(MNDAA)နှင့် ပလောင်တပ်ဖွဲ့ (TNLA) တို့ဖြင့်သာ ဆွေးနွေးရသေးပြီးTNLA နှင့် နစကတို့အကြား အဆင်မပြေခဲ့ကြကြောင်း သိရသည်။

တိုင်းရင်းသားများ အချင်းချင်း အပြန်အလှန် လေးစားခြင်း၊ တစ်ဦးနှင့်တစ်ဦးအကြား ပူးပေါင်းဆောင်ရွက်မှု ဖြစ်ပေါ်စေပြီး နားလည်မှုလွဲမှားခြင်းနှင့် ပဋိပက္ခများကို လျှော့ချကာ တွေ့ဆုံဆွေးနွေးခြင်းဖြင့် ဖြေရှင်းနိုင်ကြ ကြောင်း နစကဥက္ကဋ္ဌက ပြောကြားထားဖူးသည်။

CNI News

၂၀၂၅ ခုနှစ်၊ မတ် ၅

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၏ တရားဝင် ရုရှားခရီးစဉ်ကို ကြည့်ခြင်းအားဖြင့် နစကအပေါ် နိုင်ငံတကာ၏ အသိအမှတ်ပြုမှု အဆင့်အတန်း ပိုမိုမြင့်တက်သွားသည်ဟု တရုတ်အနေဖြင့် သဘောပေါက်သွား နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ရုရှားသမ္မတ ပူတင်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ ၂၀၂၅ ခုနှစ်၊ မတ်လ ၄ ရက်က ကရင်မလင်နန်းတော်တွင် တွေ့ဆုံဆွေးနွေးခဲ့ကြသည်။

ရုရှားသမ္မတ ကိုယ်တိုင်က ဖိတ်ခေါ်သည့်အတွက် နိုင်ငံတကာ၏ အသိအမှတ်ပြုမှု အဆင့်အတန်း ပိုမိုမြင့်တက် သွားသည်ကို တရုတ်အနေဖြင့် သဘောပေါက်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “တရုတ်အနေနဲ့ ရုရှားကို မင်းအောင်လှိုင် သွားတဲ့အ‌ပေါ်မှာ တရုတ်က မလိုလားတဲ့သ‌ဘော၊ ဝေဖန်လိုတဲ့ သဘောတော့ ရှိပုံမရပါဘူး၊ သို့သော် တစ်ခုတော့ရှိတာပေါ့၊ အခု ရုရှားက ဖိတ်တာက ပူတင် ကိုယ်တိုင်က ဖိတ်တဲ့ အတွက် မင်းအောင်လှိုင်ရဲ့ နိုင်ငံတကာရဲ့ အသိအမှတ်ပြုမှု အဆင့်အတန်းကတော့ ပိုမိုမြင့်တက် သွားတယ်ဆိုတာ ကို တရုတ်ကတော့ သဘောပေါက်ပါတယ်၊ သို့သော်ငြားလည်း တရုတ်ကတော့ မင်းအောင်လှိုင်နဲ့ ပတ်သက်လို့ တစ်ဆင့်လျှော့ပြီးတော့ အသိအမှတ်ပြုထားတဲ့အတွက် အခုကသူက ရှီကျင့်ဖျင်လို တရုတ်အစိုးရရဲ့ ထိပ်သီး ခေါင်းဆောင်နဲ့တော့ တွေ့ရတဲ့ အဆင့်အတန်း မရှိသေးခဲ့ပါဘူး၊ ရုရှားကတော့ ပူတင် ကိုယ်တိုင်နဲ့ တွေ့ဆုံရတာ ဖြစ်တဲ့အတွက် သူ့အတွက် ရုရှားဟာ ပိုမိုယုံကြည်စိတ်ချရတဲ့ မဟာမိတ်လို့ သူယူဆပါလိမ့်မယ်၊ ဒါကြောင့်လည်း ဒီတစ်ခေါက်သွားတဲ့ အခါမှာ သူ့အနေနဲ့ လက်ရှိ ဗမာပြည်မှာ ရှိနေတဲ့ ဘက်ပေါင်းစုံ စစ်ရေးအရ ရှုံးနိမ့်နေတဲ့ အနေအထားပေါ်မှာ သူ့အတွက် အာမခံချက်ရှိတဲ့ အနေအထား တစ်ရပ်၊ လုံခြုံတဲ့ နေထိုင်ရာ တစ်ရပ်ကိုတော့ ရုရှားမှာ ရှာဖွေလိမ့်မယ်လို့ ယုံကြည်မျှော်လင့်ပါတယ်” ဟု ပြောသည်။ 

ဗိုလ်ချုပ်မှူးကြီးမင်းအောင်လှိုင်နဲ့ ရုရှားသမ္မတ ပူတင်ကို တွေ့ရစဉ်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ရုရှားသမ္မတ ပူတင်က တရားဝင်ချစ်ကြည်ရေးခရီး လာရောက်ရန် အတွက် ဖိတ်ကြားခဲ့ပြီးနောက် နစကဥက္ကဋ္ဌသည် ၂၀၂၅ ခုနှစ်၊ မတ်လ ၃ ရက်နေ့ နံနက်ပိုင်းက နေပြည်တော်မှ ထွက်ခွာသွားခဲ့သည်။

ထို့နောက် နစကဥက္ကဋ္ဌသည် ရုရှားသမ္မတ ပူတင်နှင့် ကရင်မလင်နန်းတော်၌ တွေ့ဆုံခဲ့သလို ရုရှားနိုင်ငံ၊ မော်စကိုမြို့တွင် ရုရှားနိုင်ငံဝန်ကြီးချုပ် မီခေးလ် မီရှူစတင်၊ ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu၊ ဒူးမားလွှတ်တော်ဥက္ကဋ္ဌတို့နှင့်လည်း မတ်လ ၄ ရက်က သီးခြားစီ တွေ့ဆုံ၍ ဆွေးနွေးခဲ့ ကြောင်း သိရသည်။

ထိုတွေ့ဆုံ ဆွေးနွေးပွဲများ၌ လုံခြုံရေးဆိုင်ရာ ကိစ္စရပ်များ ပူးပေါင်းဆောင်ရွက်မှု ပိုမိုမြှင့်တင်ရေး၊ နိုင်ငံရေးပါတီ များ ဖွဲ့စည်းထားမှု အခြေအနေ၊ မြန်မာ-ရုရှား လွှတ်တော် ၂ ရပ်ကြား ပူးပေါင်းဆောင်ရွက်မည့် အခြေအနေ၊ ၂၀၂၀ ရွေးကောက်ပွဲ မဲစာရင်း အငြင်းပွားမှုကနေ နစကမှ တာဝန်ယူခဲ့ရမှု အခြေအနေများ စသည်တို့အား ဆွေးနွေးခဲ့ ကြောင်း သိရသည်။

ရုရှားနှင့်တရုတ်သည် မဟာမိတ်ဖြစ်သောကြောင့် နစကဥက္ကဋ္ဌ၏ ခရီးစဥ်အား တရုတ်အနေဖြင့် ဘာမှသိပ်ဖြစ်စရာ မရှိကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ရုရှားဝန်ကြီးချုပ်ကိုတွေ့ရစဉ်

၎င်းက “ကျမ ကြားတာတော့ ရုရှားနဲ့တရုတ်နဲ့က အစောကြီးကတည်းက မင်းအောင်လှိုင်က သွားချင်လို့ ကြိုးစား နေတယ်လို့ ပြောတာပဲ၊ တရုတ်ပြည်က ပြန်သွားကတည်းက သူက ရုရှားသွားဖို့ ဆက်ကြိုးစားနေတယ်လို့ ပြော တယ်၊ အဲတော့ တရုတ်ကတော့ ဘာမှသိပ်ဖြစ်မှာ မဟုတ်ဘူးလေ၊ ဘာဖြစ်လို့လဲဆို‌တော့ ရုရှားကသူ့ရဲ့ မဟာမိတ် ပဲ ဖြစ်တာကိုး၊ အဲတော့ ဘာမှသိပ်ပြဿနာ မရှိဘူးထင်တယ်၊ အခုတရုတ်နဲ့ ရုရှားရဲ့ ဆက်ဆံရေးက ဒီလောက် ကောင်းနေတဲ့ဟာကြီးကို အစောကြီးထဲက မင်းအောင်လှိုင်က ရုရှားကို သွားတိုင်မလိုတောင် ပြောနေသေးတာ လေ၊ ကျနော်တို့က ငြိမ်းချမ်းရေးရအောင် အများကြီးကြိုးစားပါတယ်၊ ဒါပေမယ့် အိမ်နီးနားချင်း နိုင်ငံကြီးက လက်နက်တွေ အဲဒီ နယ်ခြားက တပ်တွေကို ထောက်ပံ့နေလို့ ကျနော်တို့က ငြိမ်းချမ်းရေး လုပ်လို့မရတာပါ နဲ့တောင် ရုရှားကို သွားတိုင်နေသေးတာပဲ အစောပိုင်းလေ သူအာဏာ မသိမ်းခင်က အဲတော့ ဗမာပြည်ရဲ့ ငြိမ်းချမ်းရေး မရတာဟာ တရုတ်ကြောင့် ဆိုပြီး‌တော့တောင် ရုရှားသွားတိုင် နေသေးတာပဲ၊ အဲတာတောင် တရုတ်က ဂရုမစိုက်ပါဘူး” ဟု ပြောသည်။ 

ရုရှားသမ္မတ ပူတင်နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့၏ ယခုတွေ့ဆုံမှုသည် ဒုတိယ အကြိမ် မြောက်ဖြစ်ပြီး ၂၀၂၂ ခုနှစ်၊ စက်တင်ဘာလ ၄ ရက်ကလည်း ရုရှားနိုင်ငံဗလာဒီဗော့ စတော့ခ်မြိုတွင် ပြုလုပ်ခဲ့သည့် (၇) ကြိမ်မြောက် အရှေ့ဖျားစီးပွားရေးဖိုရမ် (EEF) အား နစကဥက္ကဋ္ဌက တက်ရောက်ခဲ့ကာ စက်တင်ဘာ ၇ ရက် တွင် ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့ကြသေးသည်။

CNI News
၂၀၂၅ ခုနှစ်၊ မတ်လ ၄

ရုရှားနိုင်ငံ၊ မော်စကိုမြို့မှာ ရုရှားနိုင်ငံဝန်ကြီးချုပ် မီခေးလ် မီရှူစတင်၊ ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu၊ ဒူးမား လွှတ်တော်ဥက္ကဋ္ဌတို့နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် သည် မတ်လ ၄ ရက်က သီးခြားစီ တွေ့ဆုံ၍ ဆွေးနွေးခဲ့ကြောင်း သိရသည်။

ရုရှားလုံခြုံရေးကောင်စီ အတွင်းရေးမှူးနှင့် တွေ့ဆုံရာမှာတော့ လုံခြုံရေးဆိုင်ရာကိစ္စရပ်များ ပူးပေါင်းဆောင်ရွက်မှု ပိုမိုမြှင့်တင်ရေးကို အဓိကထား ဆွေးနွေးခဲ့ကြသည်။

ထို့နောက် ဒူးမားလွှတ်တော်ဥက္ကဋ္ဌ H.E. Mr.Vyacheslav Volodin နှင့် တွေ့ဆုံ၍ နိုင်ငံရေးပါတီများ ဖွဲ့စည်းထားမှု အခြေအနေ၊ မြန်မာ-ရုရှား လွှတ်တော် ၂ ရပ်ကြား ပူးပေါင်းဆောင်ရွက်မည့် အခြေအနေ၊ ၂၀၂၀ ရွေးကောက်ပွဲ မဲစာ ရင်း အငြင်းပွားမှုကနေ နစကမှ တာဝန်ယူခဲ့ရမှု အခြေအနေများကို ဆွေးနွေးခဲ့ကြောင်း သိရသည်။

ရုရှားလုံခြုံရေးကောင်စီ အတွင်းရေးမှူး Mr. Sergey Kuzhugetovich Shoigu နဲ့ နစကဥက္ကဋ္ဌ တွေ့ဆုံ ဆွေးနွေးစဉ်

ထို့ပြင် လွတ်လပ်၍ တရားမျှတသည့် ရွေးကောက်ပွဲ ကျင်းပနိုင်ရေး ကြိုတင်ပြင်ဆင် ဆောင်ရွက်လျက်ရှိမှု အခြေအနေများနှင့် မြန်မာနိုင်ငံ ရွေးကောက်ပွဲ ကျင်းပချိန်မှာ ရုရှားနိုင်ငံက ထောက်ခံအားပေးသွားမည့် အခြေအနေများကိုလည်း ဆွေးနွေးခဲ့ကြကြောင်း နစကဘက်က သတင်းထုတ်ပြန်ခဲ့သည်။

ဒူးမားလွှတ်တော်ဥက္ကဋ္ဌ H.E. Mr.Vyacheslav Volodin နဲ့ နစကဥက္ကဋ္ဌ တွေ့ဆုံစဉ်

ပြည်ပမှ အကူအညီများ ရယူသည့် ပါတီများကြောင့် နိုင်ငံတည်ငြိမ်အေးချမ်းမှုကို ထိခိုက်စေမှု အခြေအနေများကို လည်း ဒူးမားလွှတ်တော်ဥက္ကဋ္ဌနှင့် နစကဥက္ကဋ္ဌတို့ ဆွေးနွေးခဲ့ကြကြောင်း သိရသည်။