CNI International News

ဟောင်ကောင်၊ မတ်လ ၁၁

မြန်မာနိုင်ငံတွင် လက်နက်ကိုင်ပဋိပက္ခများ ဖြစ်ပွားနေမှုနှင့်အတူ တောင်သူလယ်သမားများသည် ကောက်ပဲသီးနှံ များအစား အသက်ရှင် ရပ်တည်ရေးအတွက် ဘိန်းပင်များကို စိုက်ပျိုးရသည့် အခြေအနေသို့ ရောက်ရှိစေခဲ့သည်ဟု South China Morning Post မှ ဖော်ပြခဲ့သည်။ 

ပဋိပက္ခကြောင့် အိမ်ပစ်ရာပစ် ထွက်ပြေးတိမ်းရှောင်ခဲ့ရသည့် လယ်သမားတစ်ဦးဖြစ်သူ ဦးအောင်လှကမူ သူသည် အသက်ရှင် ရပ်တည်ရေးအတွက် ဘိန်းပင်များ စိုက်ပျိုးရန်သာ ရွေးချယ်ခဲ့ရသည်ဟု ဆိုသည်။
အသက် ၃၅ နှစ်အရွယ် ဦးအောင်လှသည် ၂၀၂၁ ခုနှစ်တွင် တပ်မတော်က အာဏာကို လွှဲပြောင်းမရယူမီက စပါးစိုက်တောင်သူတစ်ဦးအဖြစ် အသက်မွေးဝမ်းကြောင်း ပြုခဲ့သည်ဟု ဆိုသည်။

လက်နက်ကိုင်ပဋိပက္ခများ ဖြစ်ပွားလာချိန်တွင် ဦးအောင်လှသည် ၎င်းနေထိုင်သည့် မိုးဗြဲကျေးရွာရှိ စိုက်ခင်းကို ဆုံးရှုံးခဲ့ရပြီးနောက် ပြန်လည် အခြေချနေထိုင်ရချိန်၌ စပါးများစိုက်ရန် အခြေအနေ မပေးသဖြင့် စားဝတ်နေရေး အတွက် ဘိန်းစိုက်ရန် ရွေးချယ်ခဲ့ရသည်ဟုဆိုသည်။

မြန်မာနိုင်ငံက ဘိန်းခင်းတစ်ခုကို တွေ့ရစဉ်

“လူတိုင်းကတော့ ချမ်းသာချင်လို့ ဘိန်းစိုက်ကြတာလို့ ထင်မိကြမှာပါ။ ဒါပေမယ့် ကျနော်တို့က အသက်ရှင် ရပ်တည်ဖို့ အတွက် လုပ်နေရတာပါ” ဟု ရှမ်းပြည်နယ်အရှေ့ပိုင်း ဖယ်ခုံမြို့နယ်၏ ကျေးလက်ဒေသတွင် နေထိုင်သည့် ဦးအောင်လှက ပြောသည်။

ဘိန်းစိုက်ပျိုးရသည့်အတွက် စိတ်မကောင်း ဖြစ်မိသော်လည်း ဘိန်းစိုက်ပျိုးမှုမှရရှိသည့် ဝင်ငွေသည် ၎င်းအတွက် ထမင်းမငတ်စေရန် တစ်ခုတည်းသော နည်းလမ်းဖြစ်သည်ဟု ပြောကြားခဲ့သည်။

မြန်မာနိုင်ငံသည် အရှေ့တောင်အာရှ၏ အဆင်းရဲဆုံး နိုင်ငံများထဲတွင် ပါဝင်နေမှုနှင့်အတူ ကျေးလက်ဒေသတွင် နေထိုင်သူများအတွက် ဝင်ငွေအရင်းအမြစ်များမှာ နည်းပါးလှသည်။

ထို့ကြောင့် တောင်သူလယ်သမားများသည် စပါးနှင့် ဟင်းသီးဟင်းရွက်ကဲ့သို့ ကောက်ပဲသီးနှံများထက် ပိုမိုဝင်ငွေ ရရှိနိုင်သည့် ဘိန်းပင်များကို စိုက်ပျိုးရန် ရွေးချယ်လာခြင်းဖြစ်သည်ဟု ကျွမ်းကျင်သူများက ပြောကြားခဲ့သည်။

မြန်မာနိုင်ငံသည် ဘိန်းထုတ်လုပ်မှု အများဆုံး နိုင်ငံများစာရင်းတွင် ပါဝင်နေပြီး ဘိန်းများကို ဘိန်းဖြူအဆင့်သို့ ထုတ်လုပ်ကာ တရုတ်နှင့် အိမ်နီးချင်းနိုင်ငံများသို့ မှောင်ခိုတင်ပို့နေသည်ဟု ကုလသမဂ္ဂက ဖော်ပြခဲ့သည်။

Source: South China Morning Post

CNI International News

ဝါရှင်တန်၊ မတ်လ ၁၁

အမေရိကန်သမ္မတ ဒေါ်နယ်ထရမ့် (Donald Trump) သည် ဂျပန်နှင့် တောင်ကိုရီးယားတို့အား အမေရိကန်၏ အကာအကွယ်ကို ရယူထားသည့်အတွက် လုံခြုံရေးထောက်ပံ့ကြေးများ ပိုမိုပေးဆောင်ရန် တောင်းဆိုဖွယ်ရှိ ကြောင်း South China Morning Post မှ ဖော်ပြခဲ့သည်။

ထို့ကြောင့် ထရမ့်၏ အစိုးရအဖွဲ့သည် အနောက်ပစိဖိတ်ဒေသရှိ အမေရိကန်၏ အနီးကပ်ဆုံး မဟာမိတ်ဖြစ်သည့် ဂျပန်နှင့် တောင်ကိုရီးယားတို့ထံမှ လုံခြုံရေးနှင့်ကုန်သွယ်ရေးဆိုင်ရာ တောင်းဆိုမှုများပြုလုပ်ရန် ပြင်ဆင်နေဖွယ်ရှိ သည်ဟု ကျွမ်းကျင်သူများက ပြောကြားခဲ့သည်။

ဂျပန်နှင့် တောင်ကိုရီးယားတို့တွင် အမေရိကန်စစ်သားများ ဖြန့်ကြက်ချထားပြီး ကာကွယ်ပေးထားရသဖြင့် ထရမ့် သည် ဂျပန်နှင့်တောင်ကိုရီးယားထံမှ အခကြေးငွေများ ပိုမိုတောင်းဆိုဖွယ်ရှိသည်။

ထိုတောင်းဆိုချက်ကို လိုက်နာခြင်းမပြုပါက ထိုနိုင်ငံများတွင် ဖြန့်ကြက်ချထားသည့် အမေရိကန်စစ်သားများကို ဒေါ်နယ်ထရမ့်က ပြန်လည်ရုပ်သိမ်းမည်ဟု ခြိမ်းခြောက်ထားသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“အရေးအကြီးဆုံး အချက်ကတော့ အမေရိကန်ဟာ ဂျပန်၊ တောင်ကိုရီးယား ဒါမှမဟုတ် ထိုင်ဝမ်တို့ကို အကာအကွယ်ပေးသွားမယ့် သန္နိဋ္ဌာန်မျိုး မရှိတော့တာကို ထရမ့်ရဲ့ မှတ်ချက်စကားတွေအရ သတိထားမိပါတယ်” ဟု တိုကျိုမြို့တော်ရှိ Temple University မှ မျက်မှောက်ခေတ် အာရှရေးရာလေ့လာရေးဌာနမှ တွဲဖက်ညွှန်ကြား ရေးမှူး ရောဘတ် ဒူဂျာရစ် (Robert Dujarric) က ပြောကြားခဲ့သည်။

“တကယ်လို့ ခင်ဗျားဟာ ဂျပန်အစိုးရအဖွဲ့ထဲက အရာရှိတစ်ဦးဖြစ်နေပြီး အမေရိကန်ရဲ့ လုံခြုံရေးထီးရိပ် (လုံခြုံရေး အကာအကွယ်) ကို ယုံကြည်နေသေးတယ်ဆိုရင်တော့ ထရမ့်ဟာ သူ့ရဲ့ အိမ်ထောင်ရေးမှာ သစ္စာစောင့် သိတဲ့ လူမျိုးဖြစ်တယ်လို့ ယုံကြည်နေတဲ့ လူတွေထဲမှာ ပါဝင်သွားပါလိမ့်မယ်”ဟု ရောဘတ်က South China Morning Post ၏ This Week in Asia အစီအစဉ်ကို ပြောကြားခဲ့သည်။

ထရမ့်သည် ကာလကြာရှည် တည်ရှိခဲ့သည့် အမေရိကန်-ဂျပန် လုံခြုံရေးစာချုပ်ကို မျှတမှုမရှိကြောင်း ပြောကြား ခဲ့ပြီး တောင်ကိုရီးယားသည်လည်း အမေရိကန်ကို စီးပွားရေးအရ အမြတ်ထုတ်နေကြောင်း စွပ်စွဲခဲ့သည်။

ထို့ကြောင့် ဂျပန်နှင့် တောင်ကိုရီးယားတို့သည် အမေရိကန်၏ လုံခြုံရေး အကူအညီအတွက် ထရမ့်ဘက်မှ တောင်းဆိုမှုများအတွက် ကြိုတင်ပြင်ဆင်ထားရန် လိုအပ်ကြောင်း ကျွမ်းကျင်သူများက ပြောကြားခဲ့သည်။

Source: South China Morning Post

CNI International News

ဘေဂျင်း၊ မတ်လ ၁၁

တရုတ်သည် လွန်ခဲ့သည့် ၅ နှစ်အတွင်း ပြည်ပမှ လက်နက်များကို တင်သွင်းဝယ်ယူမှုသည် ၃ ပုံ ၂ ပုံနီးပါး လျော့ကျခဲ့သဖြင့် ကိုယ့်အားကိုကိုယ်မှုကို ပြသရာ ရောက်ခဲ့သည်ဟု South China Morning Post မှ ဖော်ပြခဲ့ သည်။

အဘယ်ကြောင့်ဆိုသော တရုတ်သည် ပြည်တွင်းလုပ် နည်းပညာများဖြင့် လက်နက်များကို ကိုယ်တိုင် ထုတ်လုပ် နိုင်သည့် အခြေအနေသို့ ရောက်ရှိလာခြင်းကြောင့် ဖြစ်သည်။

ဆွီဒင်နိုင်ငံအခြေစိုက် စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (SIPRI) ၏ မတ်လ ၁၀ ရက် ထုတ်ပြန်ချက်အရ ၂၀၂၀ ပြည့်နှစ်မှ ၂၀၂၄ ခုနှစ်ကြား တရုတ်၏ လက်နက်ဝယ်ယူမှုသည် ၂၀၁၅ ခုနှစ်မှ ၂၀၁၉ ခုနှစ်နှင့် နှိုင်းယှဉ်ပါက ၆၄ ရာခိုင်နှုန်း ကျဆင်းသွားကြောင်း ဖော်ပြထားသည်။

ထိပ်သီးသုတေသနပညာရှင်တစ်ဦးဖြစ်သူ ဆီမွန် ဝိဇ်မန်းကို တွေ့ရစဉ်

ထိုအပြောင်းအလဲအရ တရုတ်၏ ပြည်တွင်း လက်နက် ထုတ်လုပ်ရေး လုပ်ငန်းများ ကြီးထွားလာမှုကို ဖော်ပြရာ ရောက်နေသည်ဟု ဆိုသည်။

တရုတ်သည် ယခင်က ရုရှားထံမှ ဝယ်ယူတင်သွင်းနေရသည့် လက်နက်ပစ္စည်း အစိတ်ပိုင်းများကို ပြည်တွင်းမှာပင် ဒီဇိုင်းဆွဲပြီး ထုတ်လုပ်နေသဖြင့် လာမည့်နှစ်များတွင်လည်း တရုတ်သည် ပြည်ပမှ လက်နက်ဝယ်ယူမှုများ လျော့ကျလာလိမ့်မည်ဟု SIPRI ၏ ထုတ်ပြန်ချက်တွင် သုံးသပ်ဖော်ပြထားသည်။

တရုတ်သည် နည်းပညာမြင့် လက်နက်များကို ပြည်ပမှ ဝယ်ယူတင်သွင်းမည့်အစား ပြည်တွင်းမှာပင် ထုတ်လုပ်နိုင် သည့် နည်းပညာကို အောင်မြင်စွာရရှိရန် နှစ်ပေါင်း ၃၀ ခန့် အချိန်ယူခဲ့ရသည်ဟု SIPRI ၏ လက်နက် အရောင်း အဝယ် လေ့လာစောင့်ကြည့်ရေးအစီအစဉ်မှ ထိပ်သီးသုတေသနပညာရှင်တစ်ဦးဖြစ်သူ ဆီမွန် ဝိဇ်မန်း (Siemon Wezeman) က ပြောကြားခဲ့သည်။

“ပြီးခဲ့တဲ့ ၅ နှစ်တာ ကာလအတွင်း တရုတ်က ရုရှားဆီက အများဆုံးဝယ်ယူခဲ့တဲ့ ပစ္စည်း ၂ မျိုးပဲ ရှိခဲ့ပါတယ်။ အဲဒါ တွေကတော့ ရဟတ်ယာဉ်တွေနဲ့ အင်ဂျင်တွေ ဖြစ်ပါတယ်။ အဲဒီအရာတွေကို ထုတ်လုပ်ဖို့အတွက် လုံလောက်တဲ့ နည်းပညာတွေမရှိရင် ပြည်တွင်းမှာ ထုတ်လုပ်ဖို့ ခက်ခဲပါလိမ့်မယ်။ ဒါပေမယ့် တရုတ်ကတော့ အခုချိန်မှာ အစဉ်အလာကို ချိုးဖျက်နိုင်ခဲ့ပါပြီ” ဟု ၎င်းက ဆိုသည်။

တရုတ်စစ်တပ်ကို တွေ့ရစဉ်

လက်ရှိတွင် တရုတ်သည် တိုက်လေယာဉ်များ၊ သယ်ယူပို့ဆောင်ရေး လေယာဉ်များနှင့် သင်္ဘောများအတွက် ၎င်း၏ ကိုယ်ပိုင်အင်ဂျင်များကို ထုတ်လုပ်နိုင်စွမ်းရှိလာသည်ဟု ဝိဇ်မန်းက ဆိုသည်။

ထို့ပြင် တရုတ်သည် ၎င်း၏ ကိုယ်ပိုင် ရဟတ်ယာဉ်များကိုလည်း တရုတ်ပြည်တွင်းမှာပင် ထုတ်လုပ်နိုင်လာသဖြင့် ရုရှားနှင့် ဥရောပနိုင်ငံများ၏ ဒီဇိုင်းများနှင့် ရဟတ်ယာဉ်များကို တင်သွင်းဝယ်ယူမှုအား လျှော့ချနိုင်ခဲ့ပြီဖြစ်သည်ဟု ဝိဇ်မန်းက ပြောကြားခဲ့သည်။

ထို့ပြင် တရုတ်သည် ကမ္ဘာပေါ်တွင် လက်နက်တင်ပို့ ရောင်းချမှုအများဆုံး ထိပ်သီး ၅ နိုင်ငံစာရင်း၌ ပါဝင်လာခဲ့ပြီး တရုတ်လုပ်လက်နက်များကို ပါကစ္စတန်၊ မြန်မာနှင့် အယ်လ်ဂျီးရီးယား အပါအဝင် နိုင်ငံအများအပြားသို့ ရောင်းချ နေသည်ဟုလည်း SIPRI က ဖော်ပြခဲ့သည်။

Source: South China Morning Post

CNI International News

အင်ဖာ၊ မတ်လ ၁၀

အိန္ဒိယနိုင်ငံတွင် လူမျိုးစုပဋိပက္ခ ဖြစ်ပွားခဲ့သည့် မဏိပူရပြည်နယ်၏ နယ်မြေအားလုံးတွင် လုံခြုံရေးတပ်ဖွဲ့များနှင့် ဆန္ဒပြသူများအကြား အဓိကရုဏ်းများ ဖြစ်ပွားခဲ့ကြောင်း Deccan Herald သတင်းဝက်ဘ်ဆိုက်မှ ဖော်ပြခဲ့သည်။

မဏိပူရပြည်နယ်၏ ကန်းပေါ့ပီ (Kangpokpi) ခရိုင်တွင် မတ်လ ၉ ရက် မနက်ပိုင်းက ကူကီး-ဇိုအဖွဲ့များက လမ်းများကို အလုံးစုံပိတ်ပစ်ရန် တိုက်တွန်းချက်ကြောင့် အခြေအနေမှာ အနည်းငယ် တည်ငြိမ်သွားခဲ့သည်ဟု ဆိုသည်။

မတ်လ ၈ ရက်က ထိုခရိုင်၏ နယ်မြေဒေသများတွင် ကူကီး ဆန္ဒပြသူများနှင့် လုံခြုံရေးတပ်ဖွဲ့များအကြား ခိုက်ရန် ဖြစ်ပွားခဲ့ပြီး ဆန္ဒပြသူ ၁ ဦးသေဆုံးသည်။

ထို့နောက် အမျိုးသမီးများနှင့် ရဲတပ်ဖွဲ့ဝင်များ အပါအဝင် လူပေါင်း ၄၀ ကျော် ဒဏ်ရာ ရရှိခဲ့ကြောင်း တာဝန်ရှိ သူများက ပြောကြားခဲ့သည်။

လုံခြုံရေးတပ်ဖွဲ့နဲ့ ကူကီးများ အဓိကရုဏ်းဖြစ်နေစဉ်

အိန္ဒိယပြည်ထဲရေးဝန်ကြီး အမစ်ရှား (Amit Shah) က ပြည်နယ်အတွင်း လွတ်လပ်စွာ လှုပ်ရှားသွားလာခွင့် ရှိစေရန် အမိန့်ထုတ်ပြန်ခဲ့ပြီးနောက် ထိုအမိန့်ကို ဆန့်ကျင်သူများက ဆန္ဒပြခဲ့ခြင်းဖြစ်သည်။

ရဲတပ်ဖွဲ့က ဆန္ဒပြသူများကို မျက်ရည်ယိုဗုံးများ အသုံးပြုပြီး လူစုခွဲခဲ့ချိန်တွင် ကူကီးများ လွှမ်းမိုးထားသည့် ရပ်ကွက်များ၌ ဆန္ဒပြသူများနှင့် လုံခြုံရေးတပ်ဖွဲ့များ ခိုက်ရန်ဖြစ်ပွားခဲ့ခြင်းဖြစ်သည်။

အာဏာပိုင်များက ဂမ်ဂီဖီ (Gamghiphai) ကျေးရွာနှင့် အင်ဖာ-ဒီမာပူလမ်းမကြီး (Imphal-Dimapur Road) ဖြစ်သည့် NH-2 လမ်းမပေါ်တွင် လုံခြုံရေးတပ်ဖွဲ့များ ဖြန့်ကြက်ချထားခဲ့ပြီး တရားဥပဒေစိုးမိုးမှုကို စိတ်ချ သေချာစေရန် ကင်းလှည့်မှုများ ပြုလုပ်လျက်ရှိသည်ဟု ခရိုင်အရာရှိတစ်ဦးက ပြောကြားခဲ့သည်။

ဆန္ဒပြသူများသည် မတ်လ ၈ ရက် ညပိုင်းအထိ လုံခြုံရေးတပ်ဖွဲ့များနှင့် အဓိကရုဏ်း ဖြစ်ပွားခဲ့ပြီး လုံခြုံရေး တပ်ဖွဲ့ဝင်များ၏ ကား ၅ စီးက လေကာမှန်များ ထိခိုက်ပျက်စီးခဲ့သည်ဟု ဆိုသည်။

ကူကီး-ဇို အဖွဲ့ဖြစ်သည့် တိုင်းရင်းသားလူမျိုးစု ခေါင်းဆောင်များဖိုရမ် (ITLF) ကမူ လုံခြုံရေးတပ်ဖွဲ့များ၏ အင်အားသုံးဖြိုခွင်းမှုကို ဆန့်ကျင်သည့် အနေဖြင့် ပြည်နယ်အတွင်းရှိ ကူကီးများ အခြေချနေထိုင်သော နေရာ ဒေသအားလုံးတွင် လမ်းများပိတ်ဆို့မှု ပြုလုပ်ရန် တိုက်တွန်းခဲ့သည့် ကူကီး-ဇိုကောင်စီ (KZC) ၏ တိုက်တွန်း ချက်ကို ထောက်ခံခဲ့သည်။

ကူကီး-ဇို လူမျိုးများ နေထိုင်သည့်ဒေသများတွင် ကသည်းလူမျိုးများအား ဖြတ်သန်းသွားလာခွင့် ပြုခဲ့သည့် အိန္ဒိယ အစိုးရ၏ ဆုံးဖြတ်ချက်ကြောင့် ကန်းပေါ့ပီခရိုင်တွင် ဆန္ဒပြမှုများ ဖြစ်ပွားခဲ့ပြီး လုံခြုံရေးတပ်ဖွဲ့များက အင်အား သုံး ဖြိုခွင်းခဲ့ကြောင်း ထို့ကြောင့် ကူကီး-ဇို လူမျိုးများနေထိုင်သည့် နေရာဒေသများ အားလုံးကို သွားရေးလာရေး ပိတ်ဆို့ပစ်ရန် တောင်းဆိုချက်အား ထောက်ခံကြောင်း ITLF က ထုတ်ပြန်ခဲ့သည်။

ထို့ပြင် မတ်လ ၈ ရက်က ဆန္ဒပြမှုများတွင် ပါဝင်ခဲ့သူတိုင်းကိုလည်း မိမိတို့က လေးစားကြောင်း ထုတ်ပြန်ချက်၌  ဖော်ပြခဲ့သည်။

Source: Daccan Herald

CNI International News

တီဟီရန်၊ မတ်လ ၁၀

အီရန်အနေဖြင့် အမေရိကန်၏ အနိုင်ကျင့် ဗိုလ်ကျမှုများအောက်တွင် ဆွေးနွေးညှိနှိုင်းမှုများ ပြုလုပ်သွားမည် မဟုတ်ကြောင်း အီရန်၏ အမြင့်ဆုံးခေါင်းဆောင် အယာတိုလာ အလီခါမေနီ ( Ayatollah Ali Khamenei) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) က သူသည် အီရန် နျူကလီးယား သဘောတူညီချက်ကို ဆွေးနွေးရန် အီရန်၏ အမြင့်ဆုံးခေါင်းဆောင်ထံ စာတစ်စောင် ရေးသားပေးပို့ခဲ့ကြောင်း ပြောကြားခဲ့ပြီးနောက် ခါမေနီ၏ မှတ်ချက်စကား ထွက်ပေါ်ခဲ့ခြင်းဖြစ်သည်။

ထရမ့်သည့် Fox Business နှင့် ပြုလုပ်ခဲ့သည့် အင်တာဗျူးတွင် “အီရန်လုပ်နိုင်တာ ၂ ခုရှိပါတယ်။ စစ်ရေးအရ အရေးယူခံမလား ဒါမှမဟုတ် သဘောတူညီချက်အတွက် ဆွေးနွေးမလား ဆိုတာပါပဲ” ဟု ပြောကြားခဲ့သည်။

ခါမေနီကမူ အီရန်အစိုးရ အရာရှိများနှင့် ပြုလုပ်သည့် အစည်းအဝေးတွင် အမေရိကန်သည် ၎င်းတို့၏ တစ်ဖက် သတ် ထင်မြင်ယူဆချက်များကို အကောင်အထည်ဖော်ရန်သာ ရည်ရွယ်ထားကြောင်း ပြောကြားခဲ့သည်။

“ဆွေးနွေးညှိနှိုင်းမှုတွေနဲ့ ပတ်သက်ပြီး အနိုင်ကျင့်ဗိုလ်ကျတဲ့ အစိုးရအချို့ရဲ့ တောင်းဆိုမှုတွေဟာ ပြဿနာတွေကို မဖြေရှင်းနိုင်ပါဘူး။ သူတို့ရဲ့ တောင်းဆိုချက်တွေက အီရန်ရဲ့ နျူကလီးယား စီမံကိန်းအတွက်သာ မဟုတ်ဘဲ လုံးဝ လက်ခံလို့မရတဲ့ သူတို့ရဲ့ ထင်မြင်ယူဆချက်တွေကို ဖော်ပြနေတာဖြစ်ပါတယ်”ဟု ခါမေနီက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ အီရန်ခေါင်းဆောင် အလီခါမေနီကို တွေ့ရစဉ်

ခါမေနီ၏ မှတ်ချက်စကားများကို တုန့်ပြန်သည့် အနေဖြင့် အိမ်ဖြူတော် အမျိုးသားလုံခြုံရေးကောင်စီ ပြောရေးဆိုခွင့်ရှိသူ ဘရိုင်ယန် ဟုချ် (Brian Hughes) ကလည်း အီရန်အပေါ် သမ္မတထရမ့်၏ ပြောကြားချက် ကဲ့သို့ တင်းမာသည့် စကားလုံးများဖြင့် ပြောကြားခဲ့သည်။

“အီရန် အစိုးရအနေနဲ့ ကြောက်မက်ဖွယ် အခြေအနေတွေထက် သူ့ပြည်သူတွေနဲ့ အကောင်းဆုံး အကျိုးစီးပွားတွေ ကို ရှေ့တန်းတင်ဖို့ ကျနေည်တို့ မျှော်လင့်ပါတယ်”ဟုချ်က ပြောကြားခဲ့သည်။

မတ်လ ၇ ရက်တွင် ထရမ့်က သူသည် အီရန်၏ အမြင့်ဆုံးခေါင်းဆောင်ထံ စာတစ်စောင် ရေးသားပေးပို့ခဲ့ပြီး အီရန်၏ နျူကလီးယား စီမံကိန်းနှင့်ပတ်သက်ပြီး ဆွေးနွေးပွဲအသစ်များ ပြုလုပ်ရန် တိုက်တွန်းခဲ့ကြောင်း၊ သို့သော် အီရန်အနေဖြင့် ငြင်းဆိုမည်ဆိုပါက  စစ်ရေးဖြင့် အရေးယူသွားမည်ဟု သတိပေးခဲ့ကြောင်း ပြောကြားခဲ့သည်။

အီရန်နိုင်ငံခြားရေးဝန်ကြီး အာဘက်စ် အာရက်ချီ (Abbas Araghchi) ကမူ အီရန်သည် မတ်လ ၈ ရက်အထိ အမေရိကန်သမ္မတထံမှ ပေးပို့သည့်စာကို လက်ခံရရှိခြင်း မရှိသေးကြောင်း ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ မတ်လ ၁၀

တရုတ်သည် အမေရိကန်နှင့် ဖြစ်ပွားနေသော ကုန်သွယ်ရေးစစ်ပွဲတွင် ယခင်လက်ထက်က အခြေအနေများကို သုံးသပ်၍ နည်းဗျူဟာ ပြောင်းလဲဖွယ်ရှိကြောင်း အေပီသတင်းဌာနမှ ဖော်ပြခဲ့သည်။

အမေရိကန်၏ အခွန်များ တိုးမြှင့်ကောက်ခံမှုနှင့်ပတ်သက်ပြီး အငြင်းပွားမှုများကို အဖြေရှာရန် ကနေဒါနှင့် မက္ကဆီ ကို ခေါင်းဆောင်များက အမေရိကန်သမ္မတ ဒေါ်နယ်ထရမ့် (Donald Trump) နှင့် ဖုန်းဆက်သွယ်ဆွေးနွေးမှုများ ပြုလုပ်ခဲ့သော်လည်း တရုတ်သမ္မတ ရှီကျင့်ဖျင် (Xi Jinping) ကမူ ထိုကဲ့သို့ လုပ်ဆောင်ဖွယ်မရှိကြောင်း ပြော သည်။

တရုတ်သည် အမေရိကန်နှင့် ဆက်ဆံရေးတွင် ကနေဒါ၊ မက္ကဆီကိုတို့နှင့် မတူဘဲ အမေရိကန်နှင့်လည်း နှစ်ပေါင်း များစွာကြာ ကုန်သွယ်ရေးနှင့်နည်းပညာစစ်ပွဲ ဖြစ်ပွားခဲ့သည်။

တရုတ်သမ္မတ ရှီကျင့်ဖျင်ကို တွေ့ရစဉ်

ထို့ကြောင့် ကနေဒါနှင့် မက္ကဆီကိုတို့က ထရမ့်နှင့် ဖုန်းဆက်သွယ် ဆွေးနွေးမှုများ ပြုလုပ်နေချိန်တွင် တရုတ်က မတူကွဲပြားသည့် ချဉ်းကပ်မှုကို လုပ်ဆောင်ခဲ့ပြီး မည်သည့် ဆွေးနွေးညှိနှိုင်းမှုမဆို သာတူညီမျှ လုပ်ဆောင်သင့် ကြောင်း ရှင်းလင်းစွာ ပြောကြားခဲ့သည်။

တရုတ်ခေါင်းဆောင်များကလည်း အမေရိကန်နှင့် ဆွေးနွေးပွဲများအတွက် လမ်းဖွင့်ထားကြောင်း ပြောကြားခဲ့ သော်လည်း အမေရိကန်၏ အခွန်တိုးကောက်မှု အတွက်လည်း ပြင်ဆင်မှုများ ပြုလုပ်ထားကြောင်း ပြောကြား ခဲ့သည်။

အမေရိကန်သမ္မတ ထရမ့်သည် တရုတ်၏ ပို့ကုန်များအပေါ် အခွန် ၂၀ ရာခိုင်နှုန်း တိုးမြှင့် ကောက်ခံခဲ့ပြီးနောက် တရုတ်ကလည်း ပြီးခဲ့သည့် သီတင်းပတ်မှစပြီး အမေရိကန်၏ ကုန်စည်များကို အခွန်များ ပြန်လည် တိုးမြှင့် ကောက်ခံခဲ့သည်။

“အမေရိကန်က အခွန်တိုးကောက်မယ်ဆိုရင် ကျနော်တို့ဘက်ကလည်း လက်တုန့်ပြန်ဖို့ကလွဲပြီး ကျန်တာ ရွေးစရာမရှိပါဘူး။ တရုတ်က ဆွေးနွေးချင်စိတ်မရှိတာ မဟုတ်ပါဘူး။ ဒါပေမယ့် ဆွေးနွေးဖို့အတွက်လည်း အသနားခံတာမျိုးတွေ လုပ်မှာမဟုတ်ပါဘူး”ဟု ဝါရှင်တန်အခြေစိုက် Stimson Center မှ တရုတ်ရေးရာ ညွှန်ကြားရေးမှူး ဆွန်းယန်း (Sun Yun) က ပြောကြားခဲ့သည်။

 အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“ရှီကတော့ နိုင်ငံရေးနဲ့ မဟာဗျူဟာ အကြောင်းတရားတွေအရ သူ့အတွက် ထိခိုက်နစ်နာမယ့်အရာကို လုပ်မှာ မဟုတ်ပါဘူး။ အမေရိကန်နဲ့ ကုန်သွယ်ရေးစစ်ပွဲမှာ ရှီက အသနားခံမယ့် နေရာမှာ နေမှာမဟုတ်ပါဘူး။ အဲဒီအစား အမေရိကန်ကို ပြန်လည် ထိုးနှက်သွားပါလိမ့်မယ်” ဟု အာရှ လူမှုရေးမူဝါဒ အင်စတီကျုမှ နိုင်ငံတကာ လုံခြုံရေး နှင့်သံတမန်ရေး ဒုဥက္ကဋ္ဌ ဒန်နီယယ် ရပ်ဆဲလ် ( Daniel Russel) က ပြောကြားခဲ့သည်။

တရုတ်သည် ကမ္ဘာ့ဒုတိယစီးပွားရေး အင်အားအကြီးဆုံး နိုင်ငံဖြစ်သည်နှင့်အညီ ဒေသတွင်းနှင့် ကမ္ဘာလုံးဆိုင်ရာ စင်မြင့်ထက်တွင် ကြီးမားသည့် အင်အားစုတစ်ခုဖြစ်ပြီး အမေရိကန် အပါအဝင် နိုင်ငံအားလုံး၏ လေးစားမှုကို ရရှိထားသည်။

မတ်လ ၄ ရက်က တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက အမေရိကန်နှင့်ပတ်သက်ပြီး တင်းမာ သည့် မှတ်ချက်စကားကို ပြောကြားခဲ့ခြင်းဖြင့် အမေရိကန်၏ အခွန်တိုးကောက်မှုကို ပြင်းထန်စွာတုန့်ပြန်ခဲ့သည်။

“တကယ်လို့ အမေရိကန်က တခြား အစီအစဉ်တစ်ခု ရှိနေမယ်ဆိုရင်၊ အမေရိကန်ရဲ့ ဆန္ဒက စစ်ဖြစ်ဖို့ဆိုရင် အခွန် စစ်ပွဲပဲဖြစ်ဖြစ်၊ ကုန်သွယ်ရေးစစ်ပွဲပဲဖြစ်ဖြစ် ဘယ်လိုစစ်ပွဲမျိုးကိုမဆို ကျနော်တို့က အဆုံးအထိ တိုက်သွားဖို့ အဆင်သင့်ပါပဲ”ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက မတ်လ ၄ ရက်တွင် ပြောကြားခဲ့ သည်။

Source: အေပီ

CNI International News

ဆိုးလ်၊ မတ် ၁၀

တောင်ကိုရီးယားတွင် သမ္မတယွန်းဆော့ရွဲ(Yoon Suk Yeol )သည် ထိန်းသိမ်းခံထားရမှုမှ အံ့အားသင့်ဖွယ် ပြန်လည် လွတ်မြောက်လာခဲ့ပြီးနောက် တစ်ရက်အကြာ၌ ယွန်းအား ဆန့်ကျင်သူများက ဆိုးလ် (Seoul)  မြို့တော်တွင် စုရုံးဆန္ဒပြမှုများ ပြုလုပ်ခဲ့ကြသည်ဟု The Korea Times မှ ဖော်ပြခဲ့သည်။

ကွန်ဆာဗေးတစ် တက်ကြွလှုပ်ရှားသည့် ခရစ်ယာန်ဘုန်းတော်ကြီး ဂျွန်ကွမ်ဟွန်း (Jeon Kwang-hoon) ဦးဆောင် သော Sarang Jeil ဘုရားကျောင်းသည် ဆိုးလ်မြို့တော် အလယ်ပိုင်းရှိ သမ္မတနေအိမ်အနီးတွင် တနင်္ဂနွေဘုရား ဝတ်ပြုမှုကို ဘုရားကျောင်းအပြင်ဘက်တွင် ပြုလုပ်ခဲ့သည်။

ထိုစုရုံးပွဲကို လူပေါင်း ၄၅၀၀ ခန့် ပါဝင်ခဲ့သည်ဟု ဆိုသည်။

သမ္မတယွန်းဆော့ရွဲကို တွေ့ရစဉ်

“သမ္မတယွန်း လွတ်မြောက်လာမှုကြောင့် သူ့ကို စွပ်စွဲပြစ်တင်တဲ့ တရားရင်ဆိုင်မှုက အဓိပ္ပာယ်မရှိသလို ဖြစ်လာခဲ့ ပါတယ်။ အားလုံးပြီးသွားးပါပြီ”ဟု ဘုန်းတော်ကြီး ဂျွန်က ပြောကြားခဲ့သည်။

“အခြေခံဥပဒေဆိုင်ရာခုံရုံးက ရီဖို့ကောင်းတဲ့ ဆုံးဖြတ်ချက်ကို ချမှတ်တဲ့ အချိန်မှာဆိုရင်တော့ ကျနော်တို့ဟာ လည်း တစ်ချက်တည်းနဲ့ သူတို့ကို ရိုက်ချနိုင်မယ့် လူထုရဲ့ ဆန့်ကျင် ကန့်ကွက်ပိုင်ခွင့်ကို ကျင့်သုံးဖို့ပဲ ရှိပါတော့ တယ်”ဟု ၎င်းက ဆိုသည်။

စွပ်စွဲပြစ်တင် ခံထားရသည့် ယွန်းကို ဆိုးလ်ဗဟို ခရိုင်တရားရုံးက ဖမ်းဝရမ်း ပယ်ဖျက်ပေးလိုက်သည့် ဆုံးဖြတ် ချက်ကို အစိုးရရှေ့နေများက အယူခံမဝင်ရန် ဆုံးဖြတ်ခဲ့ပြီးနောက် ယွန်းသည် ပြန်လည် လွတ်မြောက် လာခဲ့ခြင်း ဖြစ်သည်။

ယွန်းသည် ၎င်းအား ထိန်းသိမ်းထားသည့် အဆောက်အအုံမှ သက်သောင့်သက်သာနှင့် ပြုံးရွှင်ကာ လမ်းလျှောက် ထွက်လာခဲ့သည်။

ထို့နောက် သူ၏ ကားပေါ်သို့ တက်ပြီး ၎င်းအား ထောက်ခံသူများကို လက်ပြနှုတ်ဆက်ခဲ့သည်။

သမ္မတယွန်းဆော့ရွဲကို တောင်ကိုရီးယားပြည်သူများ ဆန္ဒပြနေကြစဉ်

ယွန်းသည် ထိန်းသိမ်းမှုမှ လွတ်မြောက်လာသည့်တိုင် ပုန်ကန်မှုစွဲချက်များနှင့် တရားရင်ဆိုင် ရဦးမည်ဖြစ်ပြီး အခြေခံဥပဒေဆိုင်ရာခုံရုံးကလည်း ယွန်းအား ရာထူးမှ ဖယ်ရှားရန် သင့်/မသင့် ဆုံးဖြတ်သွားမည်ဖြစ်သည်။

အဓိက အတိုက်အခံဖြစ်သည့် ဒီမိုကရက်တစ်ပါတီကမူ တရားရုံး၏ ဆုံးဖြတ်ချက်ကို အယူခံမဝင်ခဲ့သည့် အစိုးရ ရှေ့နေများ၏ ဆုံးဖြတ်ချက်သည် နိုင်ငံနှင့် ပြည်သူလူထုကို အကျပ်အတည်းအတွင်းသို့ ပစ်ချခဲ့ခြင်းဖြစ်ကြောင်း ဝေဖန်ခဲ့သည်။

ထို့နောက် အခြေခံဥပဒေဆိုင်ရာ ခုံရုံးအနေဖြင့် ယွန်းအား သမ္မတရာထူးမှ အမြန်ဆုံးဖယ်ရှားရန် တိုက်တွန်းခဲ့ သည်။

ထို့ပြင် သမ္မတယွန်း လွတ်မြောက်လာမှုနှင့် ပတ်သက်ပြီး အစိုးရရှေ့နေချုပ် ရှင်မ်ဝူဂျွန်း (Shim Woo-jung) အနေဖြင့် ရာထူးမှ ချက်ချင်းနှုတ်ထွက်ရန်နှင့် ထိုကိစ္စအတွက် တာဝန်ယူရန် ဒီမိုကရက်တစ်ပါတီက တိုက်တွန်းခဲ့ သည်။

Source: The Korea Times

CNI International News

အိုင်ဇော ၊ မတ်လ ၈

အိန္ဒိယနိုင်ငံ၊ မီဇိုရမ်ပြည်နယ်၏ လွှတ်တော်အမတ် ကေ ဗန်လယ်ဗီနာ (MP K. Vanlalvena) သည် အိန္ဒိယနှင့် နယ်စပ်ချင်း ထိစပ်နေသည့် မြန်မာနိုင်ငံ အနောက်မြောက်ဘက် နေရာဒေသများကို ထိန်းချုပ်ထားသည့် လက်နက်ကိုင်အဖွဲ့ဖြစ်သည့် ချင်းပြည်ကောင်စီ၏ ရုံးခန်းများနှင့် စစ်စခန်းများကို ပြီးခဲ့သည့် သီတင်းပတ်က သွားရောက်ခဲ့သည်ဟု The Hindu သတင်းဝက်ဘ်ဆိုက်တွင် ဖော်ပြထားသည်။

မြန်မာနိုင်ငံတွင် တရားဝင်အစိုးရ မရှိသည့်အချက်ကို ထောက်ရှုပြီး ချင်းပြည်နယ်အား အိန္ဒိယနိုင်ငံနှင့် ပူးပေါင်းရန် ဗန်လယ်ဗီနာက ချင်းပြည်ကောင်စီကို ကမ်းလှမ်းခဲ့ပြီး အိန္ဒိယနှင့် မြန်မာနယ်စပ်၏ နှစ်ဖက်စလုံးတွင် လူမျိုးစု အချင်းချင်း ရင်းနှီးမှု သံယောဇဉ်ရှိကြောင်း  ပြောကြားခဲ့သည်။

မီဇိုအမျိုးသားတပ်ဦး (MNF) ပါတီမှ အထက်လွှတ်တော်အမတ်ဖြစ်သည့် မစ္စတာ ဗန်လယ်ဗီနာက သူသည် ပြီးခဲ့သည့် သီတင်းပတ်က မီဇိုရမ်ပြည်နယ်မှ မြန်မာနိုင်ငံအတွင်းသို့ နယ်စပ်ဖြတ်ကျော်ပြီး ခြေလျင်သွားရောက် ခဲ့ခြင်းမပြုမီ ၎င်း၏ ခရီးစဉ်နှင့်ပတ်သက်ပြီး မီဇိုရမ်ပြည်နယ် အုပ်ချုပ်ရေးမှူး ဗွီကေ ဆင်း (V.K. Singh) နှင့် အာသံရိုင်ဖယ် နယ်ခြားစောင့်တပ်ကို အသိပေး အကြောင်းကြားခဲ့သည်ဟု The Hindu သတင်းဝက်ဘ်ဆိုက်ကို ပြောကြားခဲ့သည်။

သူသည် ချစ်ကြည်ရင်းနှီးမှုနှင့် ညီရင်းအစ်ကို ဆက်ဆံရေးကို ထူထောင်ရန် ချင်းပြည်ကောင်စီဝင်များနှင့် တွေ့ဆုံခဲ့သည်ဟု ဗန်လယ်ဗီနာက ပြောသည်။

မီဇိုရမ်ပြည်နယ်ဝန်ကြီးချုပ်ကို အသိသက်သေထားပြီး ချင်းသူပုန် ၂ ဖွဲ့ ပေါင်းစည်းရေး လက်မှတ်ထိုးကြစဉ်

မီဇိုရမ်ပြည်နယ်နှင့် နယ်စပ်ချင်း ထိစပ်နေသည့် မြန်မာနယ်စပ်ဒေသများကို ချင်းပြည်ကောင်စီ၏ လက်နက်ကိုင် များက လွန်ခဲ့သည့် ၆ လကတည်းက နယ်မြေစိုးမိုးပြီး အုပ်ချုပ်ထားခြင်းဖြစ်သည်။

ချင်းပြည်နယ်ကောင်စီတွင် ချင်းအမျိုးသားတပ်ဦး(CNF/CNA)နှင့် ချင်း PDF များ ပါဝင်ကြသည်။

ချင်းပြည်ကောင်စီသည် မီဇိုမိသားစုဝင်များဖြစ်ပြီး ၎င်း၏ ခရီးစဉ်နှင့် တွေ့ဆုံဆွေးနွေးခဲ့မှု အကြောင်းအရာများကို အိန္ဒိယ ပြည်ထဲရေးဝန်ကြီး၊ နိုင်ငံခြားရေးဝန်ကြီးများကို ရှင်းလင်းတင်ပြ သွားမည်ဟုလည်း ဗန်လယ်ဗီနာက ပြောကြားခဲ့သည်။

ပြီးခဲ့သည့် ရက်ပိုင်းကလည်း မြန်မာနိုင်ငံမှ သူပုန် ၂ ဖွဲ့ဖြစ်သည့် ချင်းပြည်ကောင်စီ(CC) နှင့် ကြားကာလ ချင်းအမျိုးသား အတိုင်ပင်ခံကောင်စီ (Chin National Consultative Council (ICNCC) တို့သည် အိန္ဒိယနိုင်ငံ၊ မီဇိုရမ်ပြည်နယ်ဝန်ကြီးချုပ် လယ်ဒူဟိုမာ (Lalduhoma) ၏ ရှေ့မှောက်တွင် ပေါင်းစည်းရေး သဘောတူစာချုပ်ကို လက်မှတ်ရေးထိုးခဲ့သည်ဟု Hindustan Times မှ ဖော်ပြခဲ့သည်။

Source: The Hindu

CNI International News

ဘရပ်ဆဲလ်၊ မတ်လ ၈

ဥရောပသမဂ္ဂ ခေါင်းဆောင်များသည် ဥရောပတိုက်၏ ကာကွယ်ရေးကဏ္ဍနှင့် လုံခြုံရေးကို မြှင့်တင်ရန် အတူတကွ ပူးပေါင်းဆောင်ရွက်သွားရန်နှင့် လုံခြုံရေးအတွက် ယူရို ဘီလျံချီ သုံးစွဲရန် မတ်လ ၆ ရက်က ကတိပြုခဲ့ကြသည်ဟု အေပီမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ရုရှား၏ ခြိမ်းခြောက်မှုများကို ရင်ဆိုင်နေရသည့် ဥရောပကို ကာကွယ်ပေးထားမှုအား လျှော့ချသွားမည်ဟု မကြာခဏ ပြောကြားခဲ့သဖြင့် ဥရောပခေါင်းဆောင် များက ထိုအရေးကိစ္စကို ခေါင်းချင်းဆိုင်ပြီး အဖြေရှာနေကြခြင်းဖြစ်သည်။

လက်ရှိတွင် ဥရောပနိုင်ငံများသည် ၎င်းတို့၏ လုံခြုံရေးကို ၎င်းတို့ကိုယ်တိုင် ကာကွယ်ရတော့မည်ဖြစ်သဖြင့် စိုးရိမ်မှုများ မြင့်တက်နေကာ မတ်လ ၆ ရက်က ဘရပ်ဆဲလ် (Brussels) မြို့တွင် အရေးပေါ် အစည်းအဝေး ပြုလုပ်ခဲ့ခြင်းဖြစ်သည်။

 ဥရောပသမဂ္ဂခေါင်း‌ဆောင်များကို တွေ့ရစဉ်

ထိုအစည်းအဝေးတွင် အနာဂတ်၌ ယူကရိန်းအတွက် ကာကွယ်ပေးမှုကို စိတ်ချသေချာစေရန်နှင့် ဥရောပ၏ လုံခြုံရေးကို မြှင့်တင်နိုင်မည့် နည်းလမ်းများကို ရှာဖွေခဲ့ကြသည်။

“ဒီနေ့မှာတော့ သမိုင်းတစ်ခုကို ရေးထိုးနိုင်ခဲ့ပါပြီ” ဟု ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန် (Ursula von der Leyen) က အစည်းအဝေးအပြီးတွင် သတင်းထောက်များကို ပြောကြားခဲ့သည်။

ဥရောပသမဂ္ဂခေါင်းဆောင် ၂၇ ဦးသည် ဥရောပ၏ လုံခြုံရေးအတွက် စိတ်ချာသေချာစေအောင် လုပ်ဆောင်ရန် ဆုံးဖြတ်ခဲ့ကြပြီး စိန်ခေါ်မှုများကို ဖြေရှင်းဖို့ လိုအပ်ချက်နှင့်အညီ အရှိန်မြှင့် လုပ်ဆောင်သွားမည်ဟု ၎င်းက ပြောကြားခဲ့သည်။

ထို့ပြင် ကာကွယ်ရေးကဏ္ဍတွင် ငွေကြေးများ ပိုမိုရင်းနှီးမြှုပ်နှံသွားရန်လည်း ဆုံးဖြတ်ခဲ့ကြောင်း ဗွန်ဒါလီယန်က ပြောသည်။

မတ်လ ၅ ရက်ကလည်း  ဗွန်ဒါလီယန်သည် ယူရို ၈၀၀ ဘီလျံတန်ဖိုးရှိ "ReArm Europe" အမည်ရှိ ကာကွယ်ရေး အသုံးစရိတ် တိုးမြှင့်ရေး အစီအစဉ်ကို ထုတ်ဖော် ပြောကြားခဲ့သည်။

အဖွဲ့ဝင်နိုင်ငံအားလုံး အနေဖြင့် ကာကွယ်ရေး အသုံးစရိတ်ကို ၁ ဒသမ ၅ ရာခိုင်နှုန်းစီ ပိုမိုအသုံးပြုမည်ဆိုပါက လာမည့် (၄)နှစ်အတွင်း စစ်ဘက်ဆိုင်ရာ ရင်းနှီးမြှုပ်နှံမှုအတွက် ယူရို ၆၅၀ ဘီလျံနီးပါး ရှိလာမည်ဖြစ်သည်။

ထို့နောက် ဥရောပသမဂ္ဂ ဘတ်ဂျက်မှ  ယူရို ၁၅၀ ဘီလျံ တန်ကြေးရှိသည့် ချေးငွေယန္တရား တစ်ခုကိုလည်း ထူထောင်သွားမည်ဖြစ်ကြောင်း ဗွန်ဒါလီယန်က ပြောကြားခဲ့သည်။

Source: အေပီ