CNI International News

ဝါရှင်တန်၊ ဇွန်လ ၃

အမေရိကန်က အီရန်နိုင်ငံအတွင်း စစ်စခန်းများကို ဗုံးကြဲတိုက်ခိုက်ခဲ့ပြီးနောက် အီရန်ကလည်း ကူဝိတ်နိုင်ငံ အတွင်းရှိ အမေရိကန်စစ်စခန်းများအား ဒုံးကျည်များဖြင့် ပစ်ခတ်တိုက်ခိုက်ခဲ့သည်ဟု အေပီမှ ဖော်ပြခဲ့သည်။

အီရန်နိုင်ငံက ပြီးခဲ့သည့် သီတင်းပတ်ကုန်ပိုင်းတွင် အမေရိကန်ဒရုန်း တစ်စင်းကို ပစ်ချခဲ့ပြီးနောက် အမေရိကန်က တုံ့ပြန်သည့် အနေဖြင့် အီရန်နိုင်ငံအတွင်းရှိ ရေဒါနှင့် ဒရုန်းစခန်းများကို ဇွန်လ ၁ ရက်တွင် ဗုံးကြဲတိုက်ခိုက်ခဲ့ သည်။

အမေရိကန်၏ တိုက်ခိုက်မှုများ ဖြစ်ပွားခဲ့ပြီးနောက် အီရန်ဘက်ကလည်း ကူဝိတ်နိုင်ငံရှိ အမေရိကန်တပ်ဖွဲ့များကို ဒုံးကျည်များဖြင့် ပစ်မှတ်ထား တိုက်ခိုက်ခဲ့သော်လည်း ထိုဒုံးကျည်များကို ကြားဖြတ်ပစ်ချခဲ့ကြောင်း အမေရိကန် စစ်တပ်က ပြောကြားခဲ့သည်။

အီရန်နှင့် အမရိကန် နှစ်ဖက်စလုံးမှ တာဝန်ရှိသူများသည် စစ်ပွဲ အဆုံးသတ်ရေးအတွက် ဆွေးနွေးညှိနှိုင်းရန် ကြိုးပမ်းနေကြဆဲ ဖြစ်သော်လည်း အပြန်အလှန် တိုက်ခိုက်မှုများကြောင့် အပစ်အခတ်ရပ်စဲရေး သဘောတူ ညီချက်သည် ကျိုးပျက်လွယ်သည့် အနေအထားတွင် ရှိနေသည်။

ဟော်မုဇ်ရေလက်ကြားကို တွေ့ရစဉ်

အမေရိကန်စစ်တပ်၏ ဗဟိုစစ်ဌာနချုပ် (CENTCOM) က ၎င်းတို့သည် မေလ ၃၀ နှင့် ၃၁ ရက်နေ့များတွင် အီရန်နိုင်ငံအတွင်းရှိ ဂီရက်ခ် (Geruk) မြို့အနီးနှင့် ကက်ရှ်မ် (Qeshm) ကျွန်းပေါ်ရှိ လေကြောင်းရန် ကာကွယ်ရေး စနစ်များ၊ မြေပြင်ထိန်းချုပ်ရေး စခန်းတစ်ခုနှင့် ဒေသတွင်းရှိ သင်္ဘောများကို ခြိမ်းခြောက်နေသည့် တိုက်ခိုက်ရေး ဒရုန်းနှစ်စင်းတို့ကို ပစ်မှတ်ထား တိုက်ခိုက်ခဲ့ကြောင်း ထုတ်ပြန်ခဲ့သည်။

“နိုင်ငံတကာ ရေပိုင်နက်အထက်မှာ ပျံသန်းနေတဲ့ အမေရိကန်ရဲ့ MQ-1 ဒရုန်းတစ်စင်းကို ပစ်ချခဲ့တာ အပါအဝင် အီရန်ရဲ့ ရန်လိုတဲ့ လုပ်ရပ်တွေကို တုံ့ပြန်တဲ့အနေနဲ့ ယခုလို တိုက်ခိုက်မှုတွေကို လုပ်ဆောင်ခဲ့တာ ဖြစ်ပါတယ်” ဟု CENTCOM က ပြောကြားခဲ့သည်။

အီရန်၏ တိုက်ခိုက်မှု အန္တရာယ်ကြောင့် သင်္ဘောပိုင်ရှင်များက စိုးရိမ်နေသဖြင့် ဟော်မုဇ်ရေလက်ကြားကို ဖြတ်သန်းသွားလာသည့် သင်္ဘောအရေအတွက်မှာ စစ်ပွဲ မတိုင်ခင် ကာလနှင့် နှိုင်းယှဉ်ပါက အနည်းငယ်သာ ရှိသည်။

မေလ ၂၃ ရက်မှ မေလ ၂၉ ရက်အထိ ၇ ရက်တာ ကာလအတွင်း ဟော်မုဇ်ရေလက်ကြားကို ဖြတ်သန်းခဲ့သည့် သင်္ဘောအရေအတွက်သည် ၃၆ စင်းသာရှိခဲ့ပြီး ထိုသင်္ဘောများထဲမှာ ၃ ပုံ ၁ ပုံသည် ရေနံစိမ်းများ၊ ရေနံထွက် ပစ္စည်းများကို သယ်ဆောင်ခဲ့ခြင်းဖြစ်ကြောင်း ကမ္ဘောလုံးဆိုင်ရာ ရေနံနှင့် ကုန်တင်သင်္ဘောများကို စာရင်း ကောက်ယူသည့် Lloyd's List Intelligence ကုမ္ပဏီက ထုတ်ပြန်ခဲ့သည်။

ဟော်မုဇ်ရေလက်ကြားကို တွေ့ရစဉ်

ထိုသင်္ဘော အရေအတွက်သည် စစ်ပွဲ မစတင်မီက တစ်ရက်လျှင် ပျမ်းမျှ သင်္ဘောအစင်းရေ ၁၃၀ ကျော် ဖြတ်သန်း ခဲ့သည့် အခြေအနေနှင့် နှိုင်းယှဉ်ပါက အလွန်လျော့နည်းသွားခြင်း ဖြစ်သည်။

တစ်ချိန်တည်းမှာပင် အစ္စရေးနှင့် လက်ဘနွန် အခြေစိုက် ဟစ်ဇ်ဘိုလာ လက်နက်ကိုင်အဖွဲ့ကြား အပစ်အခတ် ရပ်စဲထားသော်လည်း တိုက်ပွဲများမှာ ဆက်လက် ပြင်းထန်လာသည်။

ဇွန်လ ၁ ရက် မွန်းလွဲပိုင်းတွင်မူ အမေရိကန်သမ္မတ ဒေါ်နယ်ထရမ့် (Donald Trump) က အစ္စရေးဝန်ကြီးချုပ် နေတန်ယာဟု (Benjamin Netanyahu ) နှင့် ဆွေးနွေးမှုများ ပြုလုပ်ခဲ့ပြီးနောက် ကြားဝင်စေ့စပ်ပေးသူများမှ တဆင့် ဟစ်ဇ်ဘိုလာအဖွဲ့ထံ ဆက်သွယ်ကာ တိုက်ပွဲများကို လျှော့ချရန် အစ္စရေးနှင့် ဟစ်ဇ်ဘိုလာတို့ သဘောတူ ညီခဲ့ကြောင်း ပြောကြားခဲ့သည်။

သို့သော်လည်း ထိုသို့ ပြောကြားပြီး မကြာမီ အချိန်အတွင်းမှာပင် လက်ဘနွန်နိုင်ငံဘက်မှ ဒုံးကျည်များ ပစ်ခတ် မှုကို တွေ့ရှိခဲ့ရကြောင်း အစ္စရေးဘက်က ပြောကြားခဲ့သလို အစ္စရေး မြောက်ပိုင်းဒေသအချို့ရှိ ပြည်သူများ အနေဖြင့် ဘေးကင်းလုံခြုံသည့် အကာအကွယ်များအောက်တွင် ခိုလှုံကြရန် သတိပေးခဲ့သည်။

Source: အေပီ

CNI International News

ဒါကာ၊ ဇွန်လ ၃

ဘင်္ဂလားဒေ့ရှ်နှင့် အိန္ဒိယနိုင်ငံကြား နယ်စပ်ဖြတ်ကျော် ရေခွဲဝေသုံးစွဲရေးဆိုင်ရာ သဘောတူညီချက်များ ရရှိရန် သံတမန်နည်းလမ်းအရ ကြိုးပမ်းခဲ့သော်လည်း ထိရောက်သော ရလဒ်များ ထွက်ပေါ်မလာခဲ့သဖြင့် လက်ရှိတွင် ဘင်္ဂလားဒေ့ရှ်သည် ရေအရင်းအမြစ် စီမံခန့်ခွဲမှုအတွက် တရုတ်နိုင်ငံ၏ အကူအညီကို ရယူရန် ကြိုးပမ်းလာခဲ့ ကြောင်း Nikkei Asia မှ ဖော်ပြခဲ့သည်။

ဘင်္ဂလားဒေ့ရှ်သည် လူသန်းပေါင်းများစွာကို ထိခိုက်စေခဲ့သည့် မိုးခေါင်ရေရှားမှု၊ ရေကြီးရေလျှံမှုနှင့် ရေငန်များ ဝင်ရောက်မှုပြဿနာကို ဖြေရှင်းရန် ဆည်များနှင့် ရေလှောင်တမံ စီမံကိန်းများကို တွန်းအားပေး လုပ်ဆောင်နေ ချိန်တွင် တရုတ်နိုင်ငံ၏ နည်းပညာနှင့်ဘဏ္ဍာရေး အကူအညီများကို ပိုမိုရယူရန် ခြေလှမ်းပြင်လာခြင်းဖြစ်သည်။

ဘင်္ဂလားဒေ့ရှ်နှင့် အိန္ဒိယနိုင်ငံအကြား နယ်စပ် ဖြတ်ကျော်ပြီး စီးဆင်းနေသည့် မြစ်ပေါင်း ၅၄ စင်း ရှိသည့်အနက် တီစတာမြစ် (Teesta River) သည် ဘင်္ဂလားဒေ့ရှ်မြောက်ပိုင်း စိုက်ပျိုးရေးကဏ္ဍအတွက် အသက်သွေးကြော ဖြစ်သည်။

နှစ်နိုင်ငံကြား တီစတာမြစ်ရေ ခွဲဝေသုံးစွဲရေး သဘောတူညီချက်တစ်ရပ် ရရှိရန် ဆယ်စုနှစ် တစ်ခုကျော်ကြာ ကြိုးပမ်းခဲ့သော်လည်း အိန္ဒိယနိုင်ငံ အနောက်ဘန်ဂေါပြည်နယ် (West Bengal) အစိုးရ၏ ကန့်ကွက်မှုကြောင့် အကောင်အထည်မဖော်နိုင်ဘဲ ဖြစ်နေခဲ့သည်။

တရုတ်အကူအညီနဲ့ ဘင်္ဂလားဒေ့ရှ် တည်ဆောက်လိုတဲ့ ရေလှောင်တမံ ဒီဇိုင်းကို တွေ့ရစဉ်

အကျိုးဆက် အနေဖြင့် နွေရာသီတွင် အိန္ဒိယဘက်က ရေလွှဲဆည်များဖြင့် ပိတ်ဆို့ထား၍ ဘင်္ဂလားဒေ့ရှ်ဘက်၌ မြစ်ရေခမ်းခြောက်ကာ စိုက်ပျိုးမြေ အများအပြား မိုးခေါင်မှုဒဏ် ခံရကြောင်း၊ မိုးရာသီတွင်မူ အိန္ဒိယဘက်မှ ရေ အလွန်အကျွံ ဖွင့်ချခြင်းကြောင့် ဘင်္ဂလားဒေ့ရှ်တွင် ရေကြီးရေလျှံမှုများကို ဆိုးရွားစွာ ကြုံတွေ့နေရသည်။

အိန္ဒိယနှင့် သံတမန်နည်းအရ ဆွေးနွေးမှုများ အရာမထင်တော့သည့် နောက်တွင် ဘင်္ဂလားဒေ့ရှ်သည် တရုတ် နိုင်ငံ၏ အကူအညီဖြင့် ကုန်ကျစရိတ် ကြီးမားသော တီစတာမြစ်ဝှမ်း ဘက်စုံစီမံခန့်ခွဲမှု စီမံကိန်းကို အကောင် အထည်ဖော်ရန် ပြင်ဆင်လာခြင်းဖြစ်သည်။

ဒေါ်လာ ၁ ဘီလျံနီးပါး ကုန်ကျမည့် အဆိုပါ စီမံကိန်းတွင် မြစ်ကြောင်းများကို ပြန်လည်တူးဖော်ခြင်း၊ မြစ်ကမ်း ပါးများ မြှင့်တင်ခြင်းနှင့် မိုးရာသီတွင် ရေကို သိုလှောင်ပြီး နွေရာသီတွင် ပြန်လည်အသုံးပြုနိုင်မည့် အကြီးစား ရေလှောင်တမံများ တည်ဆောက်ခြင်းတို့ ပါဝင်သည်။

ထိုစီမံကိန်း အောင်မြင်ပါက ဘင်္ဂလားဒေ့ရှ် အနေဖြင့် အိန္ဒိယဘက်မှ စီးဆင်းလာမည့် ရေအပေါ်တွင်သာ လုံးလုံးလျားလျား မှီခိုနေရသည့် အခြေအနေကို လျှော့ချနိုင်မည် ဖြစ်သည်။

 ဘင်္ဂလား‌ဒေ့ရှ်နိုင်ငံရဲ့ ရေအရင်းအမြစ်ကို တွေ့ရစဉ်

အိန္ဒိယအစိုးရကမူ မိမိတို့နှင့် နယ်စပ်ချင်း ထိစပ်နေသည့် မဟာဗျူဟာမြောက် နယ်မြေများအနီးတွင် တရုတ်နိုင်ငံ က အခြေခံ အဆောက်အအုံများနှင့် နည်းပညာရှင်များ စေလွှတ်ကာ အခြေစိုက်လာမည့် အရေးကို အလွန် စိုးရိမ် လျက်ရှိသည်။

သို့သော် ရာသီဥတု ဖောက်ပြန်မှုဒဏ်နှင့် ရေအရင်းအမြစ် ရှားပါးမှုဒဏ်ကို နှစ်စဉ် အလူးအလဲ ခံနေရသည့် ဘင်္ဂလားဒေ့ရှ် အစိုးရအတွက်မူ အမျိုးသား အကျိုးစီးပွားနှင့် ပြည်သူ့စားနပ်ရိက္ခာ ဖူလုံရေးအတွက် အိန္ဒိယ၏ သံတမန်ရေးထက် တရုတ်၏ လက်တွေ့ကျသော အကူအညီကို ရွေးချယ်ရမည့် အခြေအနေသို့ ရောက်ရှိနေသည်။

ထိုကဲ့သို့ ဘင်္ဂလားဒေ့ရှ်က တရုတ်ဘက်သို့ ယိမ်းယိုင်လာမှုသည် ရေအရင်းအမြစ်ဆိုင်ရာ ပဋိပက္ခတစ်ခုသာ မဟုတ်ဘဲ တောင်အာရှဒေသတွင်း အိန္ဒိယနှင့် တရုတ်တို့အကြား ဩဇာလွှမ်းမိုးရေး ယှဉ်ပြိုင်မှုကိုပါ ပိုမို ပြင်းထန် လာစေမည့် အလှည့်အပြောင်းတစ်ခု ဖြစ်လာကြောင်း ကျွမ်းကျင်သူများက သုံးသပ်ခဲ့သည်။

Source: Nikkei Asia

CNI International News

နယူးဒေလီ၊ ဇွန်လ ၃

မြန်မာနိုင်ငံအတွင်း လှုပ်ရှားနေသော အိန္ဒိယသူပုန်အဖွဲ့များသည် အိန္ဒိယနိုင်ငံ၏ လုံခြုံရေးအား ခြိမ်းခြောက်မှု ဖြစ်မလာစေရန် နှိမ်နင်းရန် လိုအပ်တာမှန်သမျှ အားလုံးကို လုပ်ဆောင်သွားမည်ဟု မြန်မာနိုင်ငံဘက်က အိန္ဒိယ ကို ဇွန်လ ၁ ရက်တွင် ကတိပြုခဲ့ကြောင်း ANI မှ ဖော်ပြခဲ့သည်။

အိန္ဒိယနိုင်ငံ၏ နယူးဒေလီမြို့တော်ရှိ ဟိုက်ဒရာဘတ် အိမ်တော် (Hyderabad House) တွင် အိန္ဒိယဝန်ကြီးချုပ် မိုဒီ (Narendra Modi) နှင့် အိန္ဒိယနိုင်ငံသို့ ရောက်ရှိနေသော မြန်မာနိုင်ငံသမ္မတ ဦးမင်းအောင်လှိုင်တို့ကြား ပြုလုပ် ခဲ့သည့် ထိပ်သီးအဆင့် ဆွေးနွေးပွဲအတွင်း ယခုကဲ့သို့ အရေးပါသော ကတိကဝတ် ထွက်ပေါ်လာခြင်း ဖြစ်သည်။

နိုင်ငံတော်သမ္မတ ဦးမင်းအောင်လှိုင်သည် မေလ ၃၀ ရက်နေ့မှ ဇွန်လ ၂ ရက်နေ့အထိ လေးရက်ကြာ အိန္ဒိယနိုင်ငံ ခရီးစဉ်အဖြစ် ရောက်ရှိခဲ့ခြင်းသည်။

ထိုခရီးစဉ်နှင့် ပတ်သက်ပြီး အိန္ဒိယနိုင်ငံခြားရေးဝန်ကြီးဌာန အတွင်းဝန် ဗစ်ကရမ် မစ်ဆရီ (Vikram Misri) က မီဒီယာများကို ရှင်းလင်း ပြောကြားရာတွင် ဝန်ကြီးချုပ် မိုဒီ အနေဖြင့် မြန်မာသမ္မတနှင့် ဆွေးနွေးခဲ့ချိန်အတွင်း နယ်စပ်ဖြတ်ကျော် သူပုန်လှုပ်ရှားမှုများ အရေးကိစ္စကို အလေးထား ထည့်သွင်း ဆွေးနွေးခဲ့ကြောင်း ထုတ်ဖော် ပြောကြားခဲ့သည်။

အိန္ဒိယနိုင်ငံခြားရေးဝန်ကြီးဌာန အတွင်းဝန် ဗစ်ကရမ် မစ်ဆရီကို တွေ့ရစဉ်

“ကျနော်တို့ နယ်စပ်နဲ့ နီးကပ်တဲ့ မြန်မာနိုင်ငံအတွင်းက အိန္ဒိယသူပုန်အဖွဲ့တွေရဲ့ လှုပ်ရှားမှုတွေနဲ့ ပတ်သက်လို့ အလွန်အရေးကြီးတဲ့ မေးခွန်းရှိနေပါတယ်။ ဒါဟာ ဝန်ကြီးချုပ်က မြန်မာသမ္မတနဲ့အတူ ထပ်မံဆွေးနွေးခဲ့တဲ့ အချက်လည်း ဖြစ်ပါတယ်” ဟု မစ်ဆရီက ပြောကြားခဲ့သည်။

“မြန်မာနိုင်ငံအနေနဲ့ ဒီလိုစိုးရိမ် ပူပန်မှုတွေအပေါ် စာနာနားလည်မှုရှိပြီး အဲဒီသူပုန်အဖွဲ့တွေကို အရေးယူ ဆောင် ရွက်ဖို့နဲ့ သူပုန်အဖွဲ့တွေဟာ အိန္ဒိယနိုင်ငံရဲ့ လုံခြုံရေးကို ခြိမ်းခြောက်တဲ့ အကြောင်းအရင်းတစ်ခု ဖြစ်မလာစေဖို့ အတွက် လိုအပ်တာမှန်သမျှ အားလုံးကို လုပ်ဆောင်သွားမှာဖြစ်ကြောင်း သမ္မတ ဦးမင်းအောင်လှိုင်က နောက် တစ်ကြိမ် ကတိပြုခဲ့ပါတယ်”ဟု မစ်ဆရီက ဆက်လက် ပြောကြားခဲ့သည်။

မြန်မာနိုင်ငံ၏ ပြည်တွင်းလုံခြုံရေး အခြေအနေနှင့်ပတ်သက်ပြီး မြန်မာ့တပ်မတော်နှင့် တိုင်းရင်းသား လက်နက် ကိုင် အဖွဲ့များအကြား နယ်စပ်ဒေသများတွင် လက်ရှိ ဖြစ်ပွားနေသော တိုက်ပွဲများအရေးနှင့် ငြိမ်းချမ်းရေး လုပ်ငန်း စဉ်ကို ရှေ့ဆက်နိုင်ရန်အတွက် နိုင်ငံတော်၏ ကြိုးပမ်းအားထုတ်မှုများသည် အဓိကကျသည့် အချက်များဖြစ် ကြောင်း ၎င်းက ဆိုသည်။

မြန်မာသမ္မတ ဦးမင်းအောင်လှိုင်နဲ့ အိန္ဒိယဝန်ကြီးချုပ် မိုဒီ တွေ့ဆုံ ဆွေးနွေးကြစဉ်

ကျယ်ပြန့်သည့် အမျိုးသားပြန်လည်သင့်မြတ်ရေးကို တည်ဆောက်နိုင်ရန်အတွက် မြန်မာနိုင်ငံ၏ အုပ်ချုပ်ရေးပုံစံ တွင် လိုအပ်လာနိုင်သော ပြောင်းလဲမှုများအား ထိုငြိမ်းချမ်းရေး လုပ်ငန်းစဉ်မှတစ်ဆင့် ရှာဖွေရန် ကြိုးပမ်းနေခြင်း ဖြစ်ကြောင်း မစ်ဆရီက ပြောကြားခဲ့သည်။

“ပြည်တွင်းလုံခြုံရေးရဲ့ အသွင်သဏ္ဌာန် တစ်ခုကတော့ နိုင်ငံရဲ့ မတူညီတဲ့ဒေသတွေ၊ အထူးသဖြင့် နယ်စပ် အနီး ဝန်းကျင်ဒေသတွေမှာ တပ်မတော်နဲ့ တိုင်းရင်းသား လက်နက်ကိုင် အဖွဲ့တွေအကြား ဖြစ်ပွားနေတဲ့ တိုက်ပွဲတွေပဲ ဖြစ်ပါတယ်။ အခြား ရှုထောင့် တစ်ခုကတော့ ငြိမ်းချမ်းရေးလုပ်ငန်းစဉ်ကို ရှေ့ဆက်နိုင်ဖို့အတွက် တိုင်းရင်းသား လက်နက်ကိုင် အဖွဲ့အစည်းတွေနဲ့ အစုအဖွဲ့အားလုံးကို တစ်စုတစ်စည်းတည်း ခေါ်ဆောင်လာဖို့ မြန်မာအစိုးရရဲ့ ကြိုးပမ်းအားထုတ်မှုပဲ ဖြစ်ပါတယ်”ဟု မစ်ဆရီက ပြောကြားခဲ့သည်။

၁၆၄၃ ကီလိုမီတာ ထိစပ်နေသည့် မြန်မာ-အန္ဒိယ နယ်စပ်တစ်လျှောက် နေထိုင်ကြသည့် ပြည်သူများ၏ ဘေးကင်း လုံခြုံရေး၊ အရှေ့တောင်အာရှသို့ ဒေသတွင်း ချိတ်ဆက်မှု၏ အရေးပါပုံ၊ မြန်မာ့အရေးနှင့် အာဆီယံ၏ စည်းလုံး ညီညွတ်မှုတို့ကို ထည့်သွင်းစဉ်းစားပါက မြန်မာနိုင်ငံ တည်ငြိမ်အေးချမ်းရေးသည် အိန္ဒိယအတွက် အဓိက အကျိုး စီးပွား တစ်ခုဖြစ်ကြောင်း ၎င်းက ပြောကြားခဲ့သည်။

Source: ANI

CNI International News

မနီလာ၊ ဇွန်လ ၂

ဖိလစ်ပိုင်နှင့် ဗီယက်နမ်နိုင်ငံတို့သည် ၎င်းတို့၏ ဆက်ဆံရေးကို မဟာဗျူဟာမြောက် မိတ်ဖက်အဆင့်သို့ တိုးမြှင့်ခဲ့ ကြောင်း Nikkei Asia မှ ဖော်ပြခဲ့သည်။

ဗီယက်နမ်သမ္မတ တိုလမ် (To Lam) သည် ဖိလစ်ပိုင်နိုင်ငံ၊ မနီလာ (Manila) မြို့တော်သို့ နိုင်ငံတော်အဆင့် ခရီးစဉ်အဖြစ် လာရောက်ခဲ့ပြီး ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr) နှင့် တွေ့ဆုံ ခဲ့ချိန်တွင် နှစ်နိုင်ငံဆက်ဆံရေးများကို တိုးမြှင့်ရန် သဘောတူခဲ့ခြင်းဖြစ်သည်။

ဖိလစ်ပိုင်သမ္မတ မားကို့စ်က မိမိတို့ဒေသတွင်း ငြိမ်းချမ်းရေး၊ တည်ငြိမ်ရေးနှင့် စည်းမျဉ်းအခြေပြု အခင်းအကျင်း ကို ထိန်းသိမ်းရန်အတွက် ဖိလစ်ပိုင်နှင့် ဗီယက်နမ်နိုင်ငံကြား ဘုံအကျိုးစီးပွားများ တူညီနေကြသည်မှာ သံသယ ဖြစ်စရာ မရှိကြောင်း ပြောကြားခဲ့သည်။

တည်ငြိမ်မှုမရှိဘဲ ပြောင်းလဲနေသည့် မရေရာသော နိုင်ငံတကာရေးရာ အခြေအနေကို ရင်ဆိုင်ဖြတ်သန်းနေ ရချိန်တွင် ယခုကဲ့သို့ မိတ်ဖက် ပူးပေါင်းဆောင်ရွက်မှုသည် ပိုမို အရေးကြီးလာပြီဖြစ်ကြောင်း မားကို့စ်က ပြောကြားခဲ့သည်။

ဗီယက်နမ်သမ္မတ တိုလမ်ကလည်း ဖိလစ်ပိုင်သည် တူညီသော မျှော်မှန်းချက်၊ မဟာဗျူဟာမြောက် အကျိုး စီးပွားများနှင့် ငြိမ်းချမ်းရေးနှင့် တည်ငြိမ်ရေးအတွက် ခိုင်မာသော ကတိကဝတ်များနှင့်အတူ ဗီယက်နမ်၏ အရေးပါသော ဒေသတွင်း မိတ်ဖက်နိုင်ငံ တစ်ခုဖြစ်ကြောင်း ပြောကြားခဲ့သည်။

ဗီယက်နမ်သမ္မတ တိုလမ်ကို တွေ့ရစဉ်

ဒေသတွင်း ရေကြောင်းလုံခြုံရေးကို မြှင့်တင်ရန်နှင့် အငြင်းပွားဖွယ်ရာ တောင်တရုတ်ပင်လယ်အတွင်း ငြိမ်းချမ်း ရေးကို ထိန်းသိမ်းရန်အတွက် စစ်ရေးဆိုင်ရာ ဆက်ဆံရေးကို ပိုမိုခိုင်မာအောင် လုပ်ဆောင်သွားရန်လည်း သဘောတူညီခဲ့ကြသည်။

ယခု တွေ့ဆုံမှုတွင် နှစ်နိုင်ငံကြား ၂၀၁၀ ပြည့်နှစ်က ချုပ်ဆိုခဲ့သော ကာကွယ်ရေး သဘောတူညီချက်ကို သက်တမ်းတိုးခဲ့ကြပြီး၊ လုံခြုံရေးနှင့် ကာကွယ်ရေးဆိုင်ရာ ကိစ္စရပ်များအတွက် ကိုယ်စားလှယ်အဖွဲ့များ အပြန်အလှန် စေလွှတ်သွားရန်နှင့် သတင်းအချက်အလက် ဖလှယ်မှုများကို ပိုမို တိုးမြှင့်လုပ်ဆောင်သွားရန် အတည်ပြုခဲ့သည်။

လွန်ခဲ့သော ၁၀ နှစ်ခန့်က တရုတ်နိုင်ငံကို တန်ပြန်ရာတွင် ညီညွတ်မှုပြသသည့် အနေဖြင့် နှစ်နိုင်ငံ ဆက်ဆံရေးကို အဆင့်မြှင့်တင်ခဲ့ပြီးနောက် ဗီယက်နမ်သည် အာဆီယံဒေသတွင်း၌ ဖိလစ်ပိုင်၏ တစ်ဦးတည်းသော မဟာဗျူဟာ မြောက် မိတ်ဖက်နိုင်ငံ ဖြစ်လာခဲ့သည်။

ဖိလစ်ပိုင်နှင့် ဗီယက်နမ် ကမ်းခြေစောင့်တပ်ဖွဲ့များသည် တောင်တရုတ် ပင်လယ်အတွင်းရှိ နယ်နိမိတ် ပိုင်ဆိုင်မှု နှင့် ပတ်သက်ပြီး အငြင်းပွားမှုများ ရှိနေဆဲဖြစ်သော်လည်း ၂၀၂၄ ခုနှစ်အတွင်းက ၎င်းတို့၏ ပထမဆုံး ပူးတွဲ စစ်ရေးလေ့ကျင့်မှုကို ပြုလုပ်ခဲ့ကြသည်။

Source: Nikkei Asia

CNI International News

စင်ကာပူ၊ ဇွန်လ ၂

တရုတ်နိုင်ငံ၏ လျင်မြန်သော စစ်ရေးအင်အား ကြီးထွားလာမှုနှင့် ယခင်က ဒေသတွင်းကို ရေရှည်စိုးမိုးထားခဲ့သည့် အမေရိကန်၏ ကတိကဝတ်များအပေါ် သံသယများ မြင့်တက်လာချိန်တွင် အင်ဒို-ပစိဖိတ်ဒေသတွင်း နိုင်ငံများ သည် လက်နက်တပ်ဆင်နိုင်ရန် အပြိုင်အဆိုင် ကြိုးပမ်းနေကြကြောင်း ရိုက်တာမှ ဖော်ပြခဲ့သည်။

မေလ ၃၀ ရက်က စင်္ကာပူနိုင်ငံတွင် ပြုလုပ်ခဲ့သော အာရှ၏ ထိပ်တန်း ကာကွယ်ရေး ဖိုရမ်ဖြစ်သည့် ရှန်ဂရီလာ ဆွေးနွေးပွဲ၌ အမေရိကန်ကာကွယ်ရေးဝန်ကြီး ပိ ဟက်ဆက် (Pete Hegseth)က ဒေသတွင်း မိတ်ဖက်နိုင်ငံများ အနေဖြင့် လုံခြုံရေးတာဝန်များကို ယခုထက်ပို၍ ပူးတွဲထမ်းဆောင်ကြရန် တိုက်တွန်းခဲ့သည်။

သို့သော် အီရန်နိုင်ငံနှင့် ဖြစ်ပွားနေသော ပဋိပက္ခများကြောင့် အမေရိကန်၏ အာရုံစိုက်မှု နည်းပါးနေပြီး ဦးစားပေး လုပ်ငန်းစဉ်များ လမ်းကြောင်း လွဲချော်သွားနိုင်ကြောင်း စိုးရိမ်မှုများ ထွက်ပေါ်နေသည်။

“ကျနော်တို့ အလုပ်နှစ်ခုကို တစ်ပြိုင်နက်တည်း လုပ်ဆောင်နိုင်ပါတယ်” ဟု ဟက်ဆက်က ကမ္ဘာတစ်ဝန်းရှိ ကာကွယ်ရေးဦးစီးချုပ်များ၊ စစ်ဘက်နှင့် ထောက်လှမ်းရေးအရာရှိများ တက်ရောက်ခဲ့သည့် ရှန်ဂရီလာဆွေးနွေး ပွဲတွင် ပြောကြားခဲ့သည်။

အမေရိကန်ကာကွယ်ရေးဝန်ကြီး ပိ ဟက်ဆက်ကို တွေ့ရစဉ်

ဂျပန်ကာကွယ်ရေးဝန်ကြီး ရှင်းဂျီရို ကိုအီဇူမီ (Shinjiro Koizumi) က အမေရိကန်၏ ကတိကဝတ်အပေါ် စိုးရိမ် စရာ မရှိကြောင်း ပြောကြားခဲ့သော်လည်း အချို့နိုင်ငံများကမူ အမေရိကန်၏ ကတိကဝတ်အပေါ် မေးခွန်းများရှိနေ ကြောင်း ပြောကြားခဲ့သည်။

ထို့ပြင် ရိုက်တာသတင်းဌာနနှင့် ပြုလုပ်ခဲ့သော သီးသန့် အင်တာဗျူးများတွင်လည်း ဒေသတွင်း ကာကွယ်ရေး ဦးစီးချုပ်များနှင့် စစ်ဘက်အရာရှိများက အမေရိကန်၏ အကာအကွယ်အောက်မှ ကျော်လွန်ပြီး တစ်နိုင်ငံနှင့် တစ်နိုင်ငံ ပိုမို ပူးပေါင်းဆောင်ရွက်ရန် တွန်းအားပေးမှုများ ရှိနေကြောင်း ရှင်းလင်းစွာ ပြောကြားခဲ့ကြသည်။

“ဒီနေရာကို တက်ရောက်လာကြတဲ့ ကာကွယ်ရေးဝန်ကြီး အားလုံးဟာ မိမိတို့ရဲ့ တစ်ဦးချင်း ကာကွယ်ရေး စွမ်းရည်တွေကို လျင်မြန်စွာနဲ့ ထိရောက်စွာ မြှင့်တင်ဖို့ လိုအပ်တယ်ဆိုတဲ့ အချက်ကို တညီတညွတ်တည်း သဘောတူညီကြပါတယ်”ဟု ဖိလစ်ပိုင်ကာကွယ်ရေးဝန်ကြီး ဂီလ်ဘာတို တီအိုဒိုရို (Gilberto Teodoro) က ရိုက်တာကို ပြောကြားခဲ့သည်။

ဂျပန်ကာကွယ်ရေးဝန်ကြီး ရှင်းဂျီရို ကိုအီဇူမီကို တွေ့ရစဉ် 

ထို့ပြင် ဖိလစ်ပိုင် အနေဖြင့် ဂျပန်၊ သြစတြေးလျ၊ ကနေဒါနှင့် နယူးဇီလန် ကဲ့သို့သော မိတ်ဖက်နိုင်ငံများနှင့် ကာကွယ်ရေးဆိုင်ရာ ဆက်ဆံရေးကို ပိုမိုနက်ရှိုင်းအောင် လုပ်ဆောင်နေကြောင်း ၎င်းက ဆိုသည်။

ဂျပန်နိုင်ငံကလည်း တရုတ်နိုင်ငံကို ကျော်လွန်ပြီး ပိုမိုနီးကပ်သော ဒေသတွင်း ပူးပေါင်း ဆောင်ရွက်မှုများအတွက် ချိတ်ဆက်မှု ဗဟိုချက်အဖြစ် ဆောင်ရွက်ရန် ရည်မှန်းထားကြောင်း ဂျပန်ကာကွယ်ရေးဝန်ကြီး ကိုအီဇူမီက ပြောကြားခဲ့သည်။

Source: ရိုက်တာ

CNI International News

ဂျေရုဆလင်၊ ဇွန်လ ၂

အစ္စရေးစစ်တပ်သည် လက်ဘနွန်တောင်ပိုင်းရှိ မဟာဗျူဟာမြောက် ခရူးဆိတ် စစ်ပွဲကာလက ခံတပ်ဟောင်း ရဲတိုက်ကို သိမ်းပိုက်ခဲ့ကြောင်း CNN မှ ဖော်ပြခဲ့သည်။

ထို့နောက် အစ္စရေးဝန်ကြီးချုပ် နေတန်ယာဟု (Benjamin Netanyahu)က လက်ဘနွန်နိုင်ငံအတွင်း စစ်ဆင် ရေးကို ပိုမို တိုးမြှင့်လုပ်ဆောင်ရန် တပ်ဖွဲ့ဝင်များကို ညွှန်ကြားခဲ့သည်။

အစ္စရေးတပ်ဖွဲ့များသည် အစ္စရေးနယ်စပ်မှ ၉ မိုင် (၁၄ ဒသမ ၅ ကီလိုမီတာ) ခန့် ကွာဝေးသော နာဘာတီးယား (Nabatiyeh) မြို့အနီးရှိ ဘူးဖော့ ခံတပ်(Beaufort Castle) ကို သိမ်းပိုက်နိုင်ခဲ့ခြင်းဖြစ်သည်။

“ဒီစစ်ဆင်ရေးက ဘူးဖော့တောင်ကြော (Beaufort Ridge) နဲ့ ဝါဒီ အယ်လ်-ဆာလူကီ (Wadi al-Saluki) ဒေသ တွေကို စစ်ရေးအရ ထိန်းချုပ်နိုင်ဖို့ အဓိက ဦးတည်ထားတာ ဖြစ်ပါတယ်”ဟု အစ္စရေးကာကွယ်ရေးတပ်ဖွဲ့ (IDF) က မေလ ၃၁ ရက်တွင် ကြေညာခဲ့သည်။

ထိုဒေသများတွင်ရှိသည့် ဟစ်ဇ်ဘိုလာအဖွဲ့၏ အခြေခံ အဆောက်အအုံများကို ဖျက်ဆီးပစ်ရန် ရည်ရွယ်ထား ကြောင်းလည်း အစ္စရေးစစ်တပ်က  ဖြည့်စွက်ဖော်ပြခဲ့သည်။

အစ္စရေးသိမ်းပိုက်လိုက်တဲ့ ခံတပ်ဟောင်းကို တွေ့ရစဉ်

လွန်ခဲ့သော နှစ်ပေါင်း ၉၀၀ ခန့်က ခရူးဆိတ် စစ်သည်များက လီတာနီမြစ် (Litani River) ကို အပေါ်စီးမှ မြင်တွေ့နိုင်သည့် မြင့်မားသော ကျောက်ဆောင် ကမ်းပါးယံပေါ်တွင် တည်ဆောက်ခဲ့သည့် ထိုခံတပ်သည် လက်ဘနွန်တောင်ပိုင်း၏ မဟာဗျူဟာမြောက် နယ်မြေတစ်ခုအဖြစ် သတ်မှတ်ခံထားရသည်။

ယခင်က ဖြစ်ပွားခဲ့သော ပဋိပက္ခများအတွင်းကလည်း အစ္စရေးတပ်ဖွဲ့များသည် ထိုခံတပ်ကို အကြိမ်ကြိမ် သိမ်းပိုက်ခဲ့ဖူးပြီး ယခုအကြိမ် မတိုင်မီ လွန်ခဲ့သည့် ၂၆ နှစ်က နောက်ဆုံးအကြိမ်အဖြစ် ထိန်းချုပ်ခဲ့ဖူးသည်။

“စစ်ဆင်ရေးကို လွန်ခဲ့တဲ့ ရက်အနည်းငယ်ကတည်းက စတင်ခဲ့တာဖြစ်ပြီး အဲဒီအချိန်အတောအတွင်းမှာ အစ္စရေး ကာကွယ်ရေးတပ်ဖွဲ့ရဲ့ မြေပြင်တပ်သား အမြောက်အမြားဟာ ရှေ့တန်း ကာကွယ်ရေးစည်းကို တိုးချဲ့ဖို့ ရည်ရွယ် တဲ့ ထိုးစစ်ဆင်မှုတွေကို စတင် လုပ်ဆောင်ခဲ့ကြပါတယ်”ဟု IDF က ထုတ်ပြန်ခဲ့သည်။

အစ္စရေးဝန်ကြီးချုပ် နေတန်ယာဟုကမူ မေလ ၃၁ ရက်တွင် စစ်တပ်၏ စစ်ဆင်ရေးကို ချီးကျူးဂုဏ်ပြုခဲ့သည်။

“ကျနော်တို့ရဲ့ ရဲစွမ်းသတ္တိရှိတဲ့ စစ်သားတွေဟာ ဘူးဖော့ရှေ့တန်း စခန်းကို သိမ်းပိုက်နိုင်ခဲ့ပါပြီ။ သူတို့ဟာ အဲဒီ နေရာမှာ အစ္စရေး နိုင်ငံတော်အလံနဲ့ ဂိုလာနီတပ်မဟာ (Golani Brigade) ရဲ့ အလံကို ဂုဏ်ယူဝင့်ကြွားစွာ လွှင့်ထူ နိုင်ခဲ့ကြပါတယ်” ဟု နေတန်ယာဟုက ပြောကြားခဲ့သည်။

ဘူးဖော့ခံတပ်ကို အလယ်ခေတ် ခံတပ်များအနက် မူလလက်ရာ အကောင်းဆုံး ထိန်းသိမ်းထားနိုင်သည့် စံပြ ပြယုဂ်တစ်ခုအဖြစ် ယူနက်စကို (UNESCO) က တင်စားဖော်ပြထားသည်။

Source: CNN

CNI International News

နယူးဒေလီ၊ ဇွန်လ ၂

ပြီးခဲ့သည့် လအနည်းငယ်အတွင်း အိန္ဒိယလုံခြုံရေးတပ်ဖွဲ့များသည် မော်ဝါဒီသူပုန်အဖွဲ့၏ ခေါင်းဆောင် အများ အပြားကို ရှင်းလင်းနိုင်ခဲ့ပြီး အောက်ခြေအဆင့် ရဲဘော်များကလည်း လက်နက်ချကာ အလင်းဝင်လာခဲ့ကြောင်း CNN မှ ဖော်ပြခဲ့သည်။

တစ်ဖက်တွင်လည်း အိန္ဒိယ၏ အရင်းရှင် စီးပွားရေးစနစ်သည် အရှိန်အဟုန်ဖြင့် တိုးတက်နေပြီး အာဏာရ ဟိန္ဒူအမျိုးသားရေးဝါဒီ အစိုးရသည်လည်း ပြည်တွင်းရှိ လက်ဝဲအုပ်စု အတိုက်အခံများကို ရွေးကောက်ပွဲတွင် အနိုင်ရရှိခဲ့သည်။

အိန္ဒိယအစိုးရကမူ ယခုနှစ်အတွင်း မော်ဝါဒီသူပုန်များကို အမြစ်ပြတ် တိုက်ဖျက် ချေမှုန်းသွားမည်ဟု ကြွေးကြော် ထားသည်။

မတ်လအတွင်းက မော်ဝါဒီသူပုန် ၁၈ ဦး အလင်းဝင်လာခဲ့ပြီး အိန္ဒိယအစိုးရက ၎င်းတို့ကို မီဒီယာများနှင့် တွေ့ဆုံ ပေးခဲ့သည်။

အလင်းဝင်လာသည့် မော်ဝါဒီသူပုန်များ၏ နောက်ကျောဘက်ရှိ ပိုစတာကြီးတွင်မူ အင်္ဂလိပ်နှင့် ဟင်ဒီဘာသာ စကားတို့ဖြင့် “လူ့ဘောင်အဖွဲ့အစည်းထဲသို့ ပြန်လည်ဝင်ရောက်လာခြင်း” ဟု ရေးသားထားသည်။

အိန္ဒိယမော်ဝါဒီ သူပုန်တချို့ အလင်းဝင်လာစဉ်

၎င်းတို့ လက်နက်ချပြီး ပေးအပ်ခဲ့သည့် ခေတ်ဟောင်း လက်နက်များကို ပြသထားသလို၊ စားပွဲများပေါ်ရှိ ကျည်ကတ်များကို ဟင်ဒီဘာသာစကားဖြင့် “သန့်ရှင်းသော ကတိသစ္စာ”ဟု အဓိပ္ပာယ်ရသည့် စာလုံးပုံစံဖြင့် ပုံဖော်ပြသထားသည်။

အိန္ဒိယနိုင်ငံတွင် မော်ဝါဒီ သူပုန်များကို အခြားအမည် တစ်ခုဖြစ်သော “နက်ဆယ်လ်”(Naxals) ဟူသည့် အမည်ဖြင့်လည်း လူသိများကြသည်။

နက်ဆယ်လ် ဟူသည့် အမည်သည် ၁၉၆၇ ခုနှစ်က အိန္ဒိယအရှေ့မြောက်ပိုင်း ဟိမဝန္တာတောင်ခြေအနီးရှိ နက်ဆယ်လ်ဘာရီ (Naxalbari) ကျေးရွာတွင် ဖိနှိပ်ချုပ်ချယ်သော မြေရှင်ကြီးများကို ဆန့်ကျင်တော်လှန်ခဲ့သည့် လယ်သမားများ၏ အကြမ်းဖက် ပုန်ကန်မှုမှ ဆင်းသက်လာခြင်း ဖြစ်သည်။

ထိုပုန်ကန်မှု၏ အောင်မြင်မှုသည် အခြား လက်နက်ကိုင် တော်လှန်မှုများစွာကို ဖြစ်ပေါ်စေရန် လှုံ့ဆော်ပေးနိုင်ခဲ့ သည်။

၁၉၇၀ ပြည့်နှစ်တွင် မော်စီတုန်း (Mao Zedong) အစိုးရ၏ အင်္ဂလိပ်ဘာသာဖြင့် ရေးသားသည့် သတင်းစာ ဖြစ် သော Peking Review က အိန္ဒိယလယ်သမားများသည် မော်စီတုန်း အတွေးအခေါ်ကို လိုက်နာကျင့်သုံးနေကြပြီး ပဒေသရာဇ် ထောက်တိုင်များကို ရိုက်ချိုးကာ ဖိနှိပ်ချုပ်ချယ်သည့် မင်းဆိုးမင်းညစ်စနစ်အား ဖြုတ်ချနိုင်ခဲ့ ကြသည်ဟု ထောက်ခံအားပေးသည့် သဘောဖြင့် ရေးသားဖော်ပြခဲ့သည်။

အိန္ဒိယမော်ဝါဒီ သူပုန်များကို တွေ့ရစဉ်

သို့သော် တရုတ်အစိုးရသည် နက်ဆယ်လ်သူပုန်များကို လက်နက်များ တိုက်ရိုက် ထောက်ပံ့ပေးခဲ့သည့် အဆင့်အထိ ရောက်ရှိခဲ့ဖွယ်မရှိပေ။

ပြည်ထဲရေးဝန်ကြီးဌာန၏ ခန့်မှန်းချက်အရ ၂၀၀၇ ခုနှစ်တွင် နက်ဆယ်လ်သူပုန်များသည် အိန္ဒိယနိုင်ငံတစ်ဝန်း စတုရန်းကီလိုမီတာ ၉၂,၀၀၀ ခန့် (အမေရိကန်နိုင်ငံ အင်ဒီယားနားပြည်နယ်၏ အကျယ်အဝန်းနီးပါး) ရှိသော နယ်မြေများအပေါ် ဩဇာလွှမ်းမိုးထားနိုင်ခဲ့သည်။

၂၀၀၉ ခုနှစ်တွင် ဝန်ကြီးချုပ် မန်မိုဟန်ဆင်း (Manmohan Singh) က နက်ဆယ်လ် (Naxals) သူပုန်များကို အိန္ဒိယနိုင်ငံအတွက် အကြီးမားဆုံး ပြည်တွင်းလုံခြုံရေး စိန်ခေါ်မှုဖြစ်ကြောင်း ကြေညာခဲ့သည်။

ထို့နောက် လက်ရှိ ဝန်ကြီးချုပ် မိုဒီ (Narendra Modi) လက်ထက်တွင် နက်ဆယ်လ်သူပုန်များကို အပြင်းအထန် နှိမ်နင်းခဲ့ပြီးနောက် မတ်လအတွင်း အိန္ဒိယပြည်ထဲရေးဝန်ကြီး အမစ်ရှား (Amit Shah) က နက်ဆယ်လ်ဝါဒကို ဆန့်ကျင်တိုက်ခိုက်သည့် တိုက်ပွဲတွင် အနိုင်ရရှိသွားပြီဖြစ်ကြောင်း ကြေညာခဲ့သည်။

Source: CNN

CNI International News

လန်ဒန်၊ ဇွန်လ ၁

ဗြိတိန်အစိုးရသည် ဂျပန်၊ အီတလီတို့နှင့် ပူးတွဲတီထွင်နေသော မျိုးဆက်သစ် တိုက်လေယာဉ် စီမံကိန်းအတွက် ရန်ပုံငွေကို မကြာမီ အတည်ပြုပေးရန် ဖိအားများနှင့် ရင်ဆိုင်နေရကြောင်း Nikkei Asia မှ ဖော်ပြခဲ့သည်။

အဆိုပါ မျိုးဆက်သစ် တိုက်လေယာဉ် စီမံကိန်းကို ဂျာမနီနှင့် ကနေဒါကဲ့သို့ မဟာမိတ် နိုင်ငံများကလည်း ပူးပေါင်းပါဝင်ရန် စိတ်ဝင်စားနေသည်။

ကမ္ဘာလုံးဆိုင်ရာ တိုက်ပွဲဝင် လေကြောင်း စီမံကိန်း (Global Combat Air Programme - GCAP) ဟု အမည် ပေးထားသည့် ထိုတိုက်လေယာဉ် စီမံကိန်းအရ ဆဋ္ဌမမျိုးဆက် တိုက်လေယာဉ်များကို ၂၀၃၅ ခုနှစ်တွင် စတင် ပျံသန်း အသုံးပြုနိုင်ရန် ရည်မှန်းထားသည်။

ထိုတိုက်လေယာဉ်များကို ဗြိတိန်နှင့် အီတလီတို့ လက်ရှိ အသုံးပြုနေသော Eurofighter Typhoon တိုက်လေယာဉ်များ၊ ဂျပန်က အသုံးပြုနေသည့် F-2 တိုက်လေယာဉ်များ နေရာတွင် အစားထိုးမည်ဖြစ်သည်။

ဗြိတိန်-ဂျပန်-အီတလီ ပူးတွဲထုတ်မယ့် တိုက်လေယာဉ် ဒီဇိုင်းကို တွေ့ရစဉ်

ထိုစီမံကိန်းကို အရှိန်အဟုန်ဖြင့် ရှေ့ဆက်နိုင်ရန်အတွက် ဗြိတိန်အစိုးရ အနေဖြင့် ယခုနှစ် (၂၀၂၅-၂၀၂၆ ဘဏ္ဍာနှစ်) အတွင်း ရန်ပုံငွေဆိုင်ရာ အတည်ပြုချက်ကို အပြီးသတ် ချမှတ်ရမည်ဖြစ်သည်။

သို့သော် ဗြိတိန်အစိုးရသစ် တက်လာပြီးနောက် နိုင်ငံ၏ ကာကွယ်ရေး အသုံးစရိတ်နှင့် မဟာဗျူဟာကို ပြန်လည် စစ်ဆေးနေခြင်းကြောင့် ဘီလီယံနှင့်ချီတန်ဖိုးရှိသော စီမံကိန်းအပေါ် ရန်ပုံငွေ အပြည့်အဝ စိုက်ထုတ်နိုင်မည် ဟုတ်၊ မဟုတ် သံသယများ ထွက်ပေါ်လာခဲ့သည်။

ဗြိတိန်ဘက်က ဘဏ္ဍာရေး အာမခံချက်ပေးရန် ကြန့်ကြာနေပါက ၂၀၃၅ ခုနှစ် ရည်မှန်းချက်ကို အပြီးမသတ်နိုင် တော့ဘဲ စီမံကိန်းတစ်ခုလုံး နှောင့်နှေးသွားမည်ကို ဂျပန်နှင့် အီတလီနိုင်ငံတို့က စိုးရိမ်နေကြသည်။

ဥရောပနှင့် မြောက်အတ္တလန္တိတ်ဒေသ၏ လုံခြုံရေး အခြေအနေများကြောင့် ဂျာမနီနှင့် ကနေဒါနိုင်ငံတို့ကလည်း GCAP စီမံကိန်းတွင် အဖွဲ့ဝင်အဖြစ် သို့မဟုတ် နည်းပညာပူးပေါင်း ဆောင်ရွက်သူအဖြစ် ပါဝင်ရန် စိတ်ဝင်စားနေ သည်။

ဆော်ဒီအာရေဗျနိုင်ငံသည်လည်း ထိုစီမံကိန်းတွင် ငွေကြေး အမြောက်အမြား စိုက်ထုတ်ပြီး အဓိက မိတ်ဖက် အဖြစ် ပါဝင်ရန် အစောပိုင်း ကတည်းက ကမ်းလှမ်းထားသည်။

Source: Nikkei Asia

CNI International News

ကိယက်ဗ်၊ ဇွန်လ ၁

ဘယ်လာရုစ်နိုင်ငံသည် ရုရှားနိုင်ငံအား ယူကရိန်းကို ကျူးကျော် တိုက်ခိုက်ရန်အတွက် ဘယ်လာရုစ်၏ နယ်မြေကို အသုံးပြုခွင့် ထပ်မံ ပေးလာနိုင်ကြောင်း ယူကရိန်းအရာရှိများက သတိပေးခဲ့သည်ဟု အေပီမှ ဖော်ပြခဲ့သည်။

လွန်ခဲ့သည့် လေးနှစ်ကျော်က ဘယ်လာရုစ်သမ္မတ လူကာရှန်ကို (Alexander Lukashenko) သည် ၎င်း၏ မဟာမိတ်ဖြစ်သော ရုရှားနိုင်ငံအား ယူကရိန်းကို ကျူးကျော် တိုက်ခိုက်ရန်အတွက် ဘယ်လာရုစ်၏ နယ်မြေကို အသုံးပြုခွင့်ပေးခဲ့သည်။

လက်ရှိတွင်လည်း ရုရှားစစ်တပ်အတွက် စစ်မျက်နှာဖွင့်ရန် နောက်ထပ် နယ်မြေများ အသုံးပြုခွင့် ပေးလာနိုင် သည်ဟု ယူကရိန်းအရာရှိများက ပြောသည်။ 

ဘယ်လာရုစ်သည် ယူကရိန်းစစ်ပွဲအတွင်း တိုက်ရိုက် ပါဝင်နေခြင်း မရှိသော်လည်း လူကာရှန်ကိုသည် ရုရှား၏ နျူကလီးယား လက်နက်များနှင့် စစ်ဘက်ဆိုင်ရာ အခြေခံ အဆောက်အအုံများကို ဘယ်လာရုစ်နိုင်ငံအတွင်း လက်ခံထားရှိခဲ့သည်။

ထို့ပြင် ရုရှား၏ စစ်ဘက်ဆိုင်ရာ စက်မှုလုပ်ငန်းများအတွက် ပစ္စည်း အစိတ်အပိုင်းများကို ထုတ်လုပ်ပေးခြင်းဖြင့် ရုရှားသမ္မတ ပူတင် (Vladimir Putin) ၏ စစ်ပွဲဆင်နွှဲမှုအား သွယ်ဝိုက် ကူညီပေးခဲ့သည်။

 ယူကရိန်းသမ္မတ ဇာလန်းစကီးကို တွေ့ရစဉ်

ယခုလ အစောပိုင်းကလည်း နှစ်နိုင်ငံစလုံးသည် ဘယ်လာရုစ်တွင် ဖြန့်ကြက်ချထားသည့် ရုရှားလက်နက်များ ပါဝင်သော နျူကလီးယား တပ်ဖွဲ့များ၏ ပူးတွဲစစ်ရေး လေ့ကျင့်မှုများကို ပြုလုပ်ခဲ့ကြသည်။

နှစ်ပေါင်း ၃၀ ကျော်ကြာ အာဏာချုပ်ကိုင်ထားသည့် လူကာရှန်ကိုသည် လူဦးရေ ၉ ဒသမ ၅ သန်းရှိသော ဘယ်လာရုစ်နိုင်ငံကို တင်းကျပ်စွာ အုပ်ချုပ်ခဲ့ပြီး အတိုက်အခံများအား နှိမ်နင်းခြင်း၊ ရုရှားနှင့် ဆက်ဆံရေးကို တိုးမြှင့်ခြင်းအပြင် အနောက်အုပ်စု၏ ပိတ်ဆို့ အရေးယူမှုများအား တုံ့ပြန်ရန်အတွက် ရုရှားအစိုးရထံမှ ငွေကြေး ထောက်ပံ့မှုများဖြင့် ရပ်တည်ခဲ့သည်။

ထိုကဲ့သို့ ရုရှားနှင့် ဘယ်လာရုစ်ကြား စစ်ရေးအရ ပူးပေါင်းဆောင်ရွက်မှု တိုးမြှင့်လာခြင်းသည် ယူကရိန်း၏ မဟာမိတ်နိုင်ငံများကို ပိုမိုစိုးရိမ်စေခဲ့သည်။

၂၀၂၂ ခုနှစ်၊ ဖေဖော်ဝါရီ ၂၄ ရက်တွင် ပူတင်က ယူကရိန်းကို ကျူးကျော်စစ် စတင်ခဲ့ချိန်၌ စစ်ရေးလေ့ကျင့်မှု အသွင်ဖြင့် ဘယ်လာရုစ်နိုင်ငံအတွင်း စုရုံးရောက်ရှိနေခဲ့သည့် ရုရှားစစ်တပ်များသည် ဘယ်လာရုစ်နယ်စပ်၏ တောင်ဘက် ၉၀ ကီလိုမီတာ (၅၆ မိုင်) ခန့်သာ ကွာဝေးသော ကိယက်ဗ်မြို့တော်ဆီသို့ ချီတက်လာခဲ့ကြသည်။

ပူတင်သည် ကိယက်ဗ်မြို့တော်ကို အလျင်အမြန် သိမ်းပိုက်နိုင်လိမ့်မည်ဟု မျှော်လင့်ခဲ့သော်လည်း ယူကရိန်း၏ ကြံ့ကြံ့ခံ ခုခံမှုကြောင့် သိမ်းပိုက်နိုင်ခဲ့ခြင်း မရှိခဲ့ပေ။

ရုရှားက ပဲ့ထိန်းဒုံးကျည် ပစ်လွှတ်နေစဉ်

စစ်ပွဲသည် နှစ်ဖက်စလုံး အင်အားပြုန်းတီးလာခဲ့သည့် ရေရှည်စစ်ပွဲ ဖြစ်လာသည်နှင့်အမျှ ဘယ်လာရုစ်နိုင်ငံသည် ရုရှား၏ စစ်ပွဲဆင်နွှဲမှုများကို ပံ့ပိုးကူညီရာတွင် အဓိကကဏ္ဍမှ ပါဝင်လာခဲ့သည်။

ဘယ်လာရုစ် စက်ရုံများသည် မိုက်ခရို ချစ်ပ်ပြားများနှင့် အခြား အီလက်ထရွန်နစ်ပစ္စည်းများ၊ ပဲ့ထိန်းစနစ်များ၊ အမြှောက်ကျည်များနှင့် ရုရှား၏ ပဲ့ထိန်းဒုံးကျည်များကို သယ်ဆောင်သည့် ထရပ်ကားကြီးများ အပါအဝင် အရေးကြီးသော စစ်ဘက်ဆိုင်ရာ အစိတ်အပိုင်းများကို ထုတ်လုပ်ပေးခဲ့သည်။

ထို့ပြင် ဘယ်လာရုစ်သည် ရုရှားစစ်တပ်အတွက် စစ်ရေးလေ့ကျင့်ရေး နေရာများကို ပံ့ပိုးပေးခြင်း၊ ပူးတွဲစစ်ရေး လေ့ကျင့်မှုများကို လက်ခံ ကျင်းပခြင်းနှင့် ဒဏ်ရာရရှိခဲ့သော ရုရှားစစ်သားများကို ကုသပေးရန်အတွက် ဆေးရုံ များကို ဖွင့်လှစ်ပေးခြင်းတို့ ပြုလုပ်ခဲ့သည်။

Source: အေပီ