CNI International News

ဝါရှင်တန်၊ ဒီဇင်ဘာ ၁

ဗင်နီဇွဲလားနိုင်ငံပေါ်နှင့် အနီးဝန်းကျင်ရှိ လေပိုင်နက်သည် ပိတ်ထားပြီဟု ယူဆသင့်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့သည်ဟု အေပီမှ ဖော်ပြခဲ့သည်။

ထိုပြောကြားချက်ကြောင့် ဗင်နီဇွဲလားသမ္မတ မာဒူရို (Nicolás Maduro) အပေါ် အမေရိကန်၏ ဖိအားများနှင့် ပတ်သက်ပြီး မေးခွန်းများ ပိုမိုထွက်ပေါ်လာစေခဲ့သည်။

မာဒူရို အစိုးရအဖွဲ့ကမူ ထရမ့်၏ ပြောကြားချက်သည် နယ်ချဲ့ဝါဒီ ခြိမ်းခြောက်မှု ဖြစ်ကြောင်းနှင့် ဗင်နီဇွဲလား၏ အချုပ်အခြာအာဏာကို လျော့ကျစေရန် ကြိုးပမ်းနေခြင်းဖြစ်ကြောင်း စွပ်စွဲခဲ့သည်။

အိမ်ဖြူတော်ကမူ ဗင်နီဇွဲလား လေပိုင်နက်နှင့်ပတ်သက်ပြီး Truth Social လူမှုမီဒီယာတွင် တင်ခဲ့သည့် ထရမ့်၏ ပြောကြားချက်နှင့်ပတ်သက်ပြီး မေးခွန်းများကို ဖြေကြားခဲ့ခြင်းမရှိပေ။

ထရမ့်၏ လူမှုမီဒီယာတွင် ရေးသားချက်အရ "လေကြောင်းလိုင်းများ၊ ပိုင်းလော့များ၊ မူးယစ်ဆေးဝါး မှောင်ခို ကူးသူ များနှင့် လူမှောင်ခို ကူးသူများသို့" ဟူ၍ ခေါင်းစဉ်တပ်ထားပြီး "ဗင်နီဇွဲလားနိုင်ငံပေါ်နှင့် အနီးတစ်ဝိုက် လေပိုက် နက်များကို ပိတ်ထားပြီဟု ယူဆကြပါ" ဟု ရေးသားခဲ့ခြင်းဖြစ်သည်။

ဗင်နီဇွဲလားသမ္မတ မာဒူရိုကို တွေ့ရစဉ်

ဗင်နီဇွဲလားအစိုးရကမူ ထရမ့်၏ အဆိုပါ ရေးသားချက်နှင့်ပတ်သက်ပြီး ပြင်းထန်စွာ ဆန့်ကျင်ကြောင်း၊ ထိုရေးသား ချက်သည် နယ်ချဲ့ဝါဒီ ခြိမ်းခြောက်မှုဖြစ်ကြောင်း၊ ဗင်နီဇွဲလား၏ နယ်မြေတည်တံ့ခိုင်မြဲရေး၊ လေကြောင်းနှင့် ရေကြောင်း လုံခြုံရေးနှင့် အချုပ်အခြာအာဏာကို လျော့ပါးစေရန် ရည်ရွယ်ခြင်းဖြစ်ကြောင်း ပြောကြားခဲ့သည်။

ထိုကဲ့သို့ ရေးသားပြောဆိုမှုများသည် ရန်လိုပြီး တစ်ဖက်သတ်ဆန်သည့် ထင်ရာစိုင်းသော လုပ်ရပ်ဖြစ်ကြောင်း ဗင်နီဇွဲလားနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ထို့ပြင် အမေရိကန် လူဝင်မှု အာဏာပိုင်များသည် အမေရိကန်ရှိ ဗင်နီဇွဲလားရွှေ့ပြောင်းများကို နေရပ်ပြန်ပို့နေ သည့် လေကြောင်းလိုင်းများကိုလည်း တစ်ဖက်သတ် ဆိုင်းငံ့ခဲ့ကြောင်း ထုတ်ပြန်ချက်တွင် ဖော်ပြခဲ့သည်။

အမေရိကန် ဖက်ဒရယ်လေကြောင်း အုပ်ချုပ်ရေးအဖွဲ့က စစ်ရေးလှုပ်ရှားမှုများ မြင့်တက်နေသဖြင့် ဗင်နီဇွဲလား နိုင်ငံနှင့် အနီးတစ်ဝိုက်တွင် ပျံသန်းနေသည့် လေယာဉ်မှူးများ အနေဖြင့် ဂရုစိုက်ကြရန် ပြောကြားခဲ့ပြီးနောက် ပြီးခဲ့သည့် သီတင်းပတ်ကတည်းက နိုင်ငံတကာ လေကြောင်းလိုင်းအချို့သည် ဗင်နီဇွဲလားသို့ ပြေးဆွဲသော  လေကြောင်း ခရီးစဉ်များကို ဆိုင်းငံ့ခဲ့သည်။

Source: အေပီ