CNI International News

ဝါရှင်တန်၊ ဇွန်လ ၂၄

အီရန်၏ နျူကလီးယားစက်ရုံများကို အမေရိကန်က ဗုံးကြဲတိုက်ခိုက်ခဲ့သဖြင့် အမေရိကန်၏ စီးပွားရေး အပါအဝင် ကမ္ဘာ့စီးပွားရေးနှင့်  ငွေကြေးဖောင်းပွမှု အလားအလာအပေါ် မရေရာမှုများ ထပ်မံမြင့်တက်ခဲ့ကြောင်း ရိုက်တာမှ ဖော်ပြခဲ့သည်။

အမေရိကန်ဗဟိုဘဏ်ဥက္ကဋ္ဌ ဂျရုမ်း ပါဝဲလ် ( Jerome Powell) က ဇွန်လ ၂၄ ရက်နှင့် ၂၅ ရက်တွင် လွှတ်တော်၌ အစီအရင်ခံထွက်ဆိုမှု အပါအဝင် ဗဟိုဘဏ်မှ တာဝန်ရှိသူများက စီးပွားရေး အချက်အလက်များနှင့် ကြေညာချက် များ ထုတ်ပြန်နေချိန်၌ ထိုတိုက်ခိုက်မှုများ ဖြစ်ပွားခဲ့ခြင်းဖြစ်သည်။

အဓိက စိုးရိမ်စရာ ကိစ္စတစ်ခုမှာ စွမ်းအင်စျေးနှုန်းများ မြင့်တက်မည့် အလားအလာဖြစ်ပြီး ရေနံဈးနှုန်းများ မြင့်တက်ခြင်းသည် စားသုံးသူများနှင့် စီးပွားရေး လုပ်ငန်းများအပေါ် ယုံကြည်မှုတို့ကို ထိခိုက်စေနိုင်၍  အသုံး စရိတ်များအား လျှော့ချရမည့် အနေအထားဖြစ်သည်။

စက်သုံးဆီ ထည့်နေစဉ်

အီရန်က လက်တုံ့ပြန် လာခဲ့ချိန်တွင်လည်း ပဋိပက္ခသည် ပင်လယ်ကွေ့ဒေသထက် ကျော်လွန်ပြီး ကမ္ဘာလုံးဆိုင်ရာ အန္တရာယ်များ ပေါ်ပေါက်လာစေနိုင်သည်ဟု ကျွမ်းကျင်သူများက ပြောကြားခဲ့သည်။

Morgan Stanley ဘဏ်မှ စီးပွားရေး မဟာဗျူဟာပညာရှင် အယ်လန် ဇန်တနာ (Ellen Zentner) ကမူ ထိုပဋိပက္ခ သည် အိမ်ထောင်စုများ၏ အသုံးစရိတ်အတွက် ဖိအားများ ဖြစ်လာစေနိုင်ပြီး အမေရိကန်၏ စီးပွားရေး ဖွံ့ဖြိုး တိုးတက်မှုကို နှေးကွေးစေလိမ့်မည်ဟု ပြောသည်။

အမေရိကန်သည် ကမ္ဘာတစ်ဝန်း ကုန်သွယ်ခွန်များ တိုးမြှင့်ကောက်ခံခဲ့သဖြင့် ယခင်ကတည်းက ကုန်သွယ်ရေးနှင့် စီးပွားရေးတွင် စိန်ခေါ်မှုများနှင့် ရင်ဆိုင်နေရသည်ဟုလည်း ၎င်းက ဆိုသည်။

 အမေရိကန်က အီရန်ကို ဗုံးကြဲနေပုံကို ဖော်ညွန်းထားစဉ်

သို့သော် ကျွမ်းကျင်သူအချို့ကမူ အီရန်ကို တိုက်ခိုက်ခြင်းသည် အရှေ့အလယ်ပိုင်းဒေသတွင် ရေရှည်တည်တံ့သည့် တည်ငြိမ်မှုကို ရရှိစေနိုင်သည်ဟုလည်း သုံးသပ်ခဲ့ကြသည်။

အထူးသဖြင့် အီရန်ကို တိုက်ခိုက်ခဲ့ပြီးနောက် အစ္စရေး၏ စတော့ရှယ်ယာ စျေးကွက်သည် စံချိန်တင် မြင့်တက်လာ ခဲ့ကြောင်း၊ ထိုအချက်က ရင်းနှီးမြှုပ်နှံသူများက အစ္စရေးအပေါ် ယုံကြည်ချက်ရှိသည့် အရိပ်လက္ခဏာ ဖြစ်သည်ဟု Yardeni Research သုတေသနကုမ္ပဏီက ပြောကြားခဲ့သည်။

မည်သို့ပင်ဆိုစေ စီးပွားရေးတွင် အားနည်းချက်များ ပိုမိုမြင့်တက်နေပြီး အမေရိကန် အလုပ်သမား စျေးကွက်လည်း အရှိန်လျော့ခဲ့သည်။

ငွေကြေးဖောင်းပွမှုနှုန်းသည် အမေရိကန်ဗဟိုဘဏ်က သတ်မှတ်ထားသည့် ၂ ရာခိုင်နှုန်းအနီးသို့ ရောက်ရှိဖွယ်ရှိပြီး ဗဟိုဘဏ် တာဝန်ရှိသူများက လာမည့်လများအတွင်း ကုန်သွယ်ခွန်နှင့် စွမ်းအင် ကုန်ကျစရိတ်များသည် ထပ်မံ မြင့်တက်လာနိုင်ကြောင်း သတိပေးခဲ့သည်။

Source: ရိုက်တာ

CNI International News

ဝါရှင်တန်၊ ဇွန်လ ၂၃

ဇွန်လ ၂၂ ရက်က အီရန်၏ နျူကလီးယားစက်ရုံ ၃ ခုကို အမေရိကန်က ဗုံးကြဲတိုက်ခိုက်မှုနှင့်ပတ်သက်ပြီး ကမ္ဘာ့ ခေါင်းဆောင်များက အမျိုးမျိုးတုံ့ပြန်ခဲ့ကြကြောင်း ရိုက်တာသတင်းတွင် ဖော်ပြခဲ့သည်။

အစ္စရေးဝန်ကြီးချုပ် နေတန်ယာဟု (BENJAMIN NETANYAHU)က “ဂုဏ်ယူပါတယ် သမ္မတကြီး ထရမ့်။ အမေရိကန်ရဲ့ အံ့ဩထိတ်လန့်ဖို့ ကောင်းပြီး တရားမျှတတဲ့ လုပ်နိုင်စွမ်းနဲ့အတူ အီရန်ရဲ့ နျူကလီးယား စက်ရုံ တွေကို ပစ်မှတ်ထားခဲ့တဲ့ သင့်ရဲ့ ရဲဝံ့တဲ့ဆုံးဖြတ်ချက်ဟာ သမိုင်းကို ပြောင်းလဲစေပါလိမ့်မယ်။ သမ္မတထရမ့်ဟာ ကမ္ဘာ့အန္တရာယ် အရှိဆုံးနိုင်ငံကို ကမ္ဘာ့အန္တရာယ်အရှိဆုံး လက်နက်တွေ မပိုင်ဆိုင်အောင် လုပ်ဆောင်ခဲ့တယ်ဆို တာ သမိုင်းမှာ မှတ်တမ်းဝင်သွားပါလိမ့်မယ်”ဟု ပြောကြားခဲ့သည်။

ထို့နောက် အီရန်နိုင်ငံခြားရေးဝန်ကြီး အာဘက် အာရက်ချီ (ABBAS ARAQCHI)က “ကုလသမဂ္ဂ လုံခြုံရေး ကောင်စီရဲ့ အမြဲတမ်းအဖွဲ့ဝင်ဖြစ်တဲ့ အမေရိကန်ဟာ ကုလသမဂ္ဂ ပဋိညာဉ်၊ နိုင်ငံတကာဥပဒေနဲ့ နျူကလီးယား မပျံ့ပွားရေးစာချုပ်ကို ချိုးဖောက်ပြီး အီရန်ရဲ့ ငြိမ်းချမ်းတဲ့ နျူကလီးယားစက်ရုံတွေကို တိုက်ခိုက်ခဲ့ပါတယ်။ ဒီဖြစ်ရပ်တွေကြောင့် နောက်ဆက်တွဲ အကျိုးဆက်တွေ ရှိလာပါလိမ့်မယ်”ဟု တုံ့ပြန်ခဲ့သည်။

 အီရန်ကို တိုက်ခိုက်မှု သမ္မတ ဒေါ်နယ်ထရမ့် ကြေညာနေစဉ်

အလားတူ ဥရောပကော်မရှင်ဥက္ကဋ္ဌ အာဆူလာဗွန်ဒါလီယန် (URSULA VON DER LEYEN)ကလည်း “အီရန်အနေနဲ့ ဘယ်တော့မှ နျူကလီးယားဗုံး မပိုင်ဆိုင်ရပါဘူး။ အရှေ့အလယ်ပိုင်းမှာ တင်းမာမှုဟာ အမြင့်ဆုံး အခြေအနေကို ရောက်နေပါပြီ။ တည်ငြိမ်ရေးကို ဦးစားပေး လုပ်ဆောင်ရပါမယ်။ နိုင်ငံတကာဥပဒေကို လေးစားဖို့ လိုပါတယ်။ အီရန်အနေနဲ့ သံတမန်နည်းလမ်းနဲ့ ဖြေရှင်းဖို့ အချိန်ကျပါပြီ။ ငြိမ်းချမ်းရေး စားပွဲဝိုင်းကပဲ ဒီပဋိပက္ခကို အဆုံးသတ် စေနိုင်မှာပါ”ဟု ပြောကြားခဲ့သည်။ 

ရုရှားလုံခြုံရေးကောင်စီ ဒုဥက္ကဋ္ဌ ဒီမီထရီ မက်ဗီးဒက် (DMITRY MEDVEDEV)ကတော့ “ငြိမ်းချမ်းရေး ဖော်ဆောင် သူ တစ်ဦးဖြစ်ခဲ့တဲ့ ထရမ့်ဟာ အမေရိကန်အတွက် စစ်ပွဲအသစ်တစ်ခုကို စတင်ခဲ့ပါတယ်။ ဒီပုံစံအတိုင်းသာဆိုရင် ထရမ့်ဟာ ငြိမ်းချမ်းရေးနိုဘယ်ဆု ရမှာမဟုတ်ပါဘူး”ဟု တုံ့ပြန် ပြောကြားခဲ့သည်။

ပြင်သစ်နိုင်ငံခြားရေးဝန်ကြီး ယန်းနိုအယ် ဘာရော့ (JEAN-NOEL BARROT) က “နျူကလီးယား မပြန့်ပွားရေး စာချုပ်ရဲ့ မူဘောင်အတွင်းမှာ ပြဿနာကို ဖြေရှင်းဖို့ ပြင်သစ်က အကြံပြုပါတယ်”ဟု ပြောသည်။

ဗြိတိန်ဝန်ကြီးချုပ် ကီယာ စတာမာ (KEIR STARMER)ကလည်း “အီရန်ရဲ့ နျူကလီးယား စီမံကိန်းက နိုင်ငံတကာ လုံခြုံရေးအတွက် ဆိုးရွားတဲ့ ခြိမ်းခြောက်မှုပါ။ အီရန်အနေနဲ့ နျူကလီးယားလက်နက် ထုတ်လုပ်ခွင့် ဘယ်တော့မှ ရမှာ မဟုတ်ပါဘူး။ အမေရိကန်က ခြိမ်းခြောက်မှုကို လျော့ပါးစေဖို့ အရေးယူ လုပ်ဆောင်ခဲ့တာပါ။ အရှေ့အလယ် ပိုင်းရဲ့ လုံခြုံရေး အခြေအနေက ကျိုးပျက်လွယ်နေပါတယ်။ အီရန်အနေနဲ့ ဆွေးနွေးပွဲ စားပွဲဝိုင်းကို ပြန်လာဖို့ ကျနော်တို့ တိုက်တွန်းပါတယ်”ဟု သူ၏ သဘောထားကို ထုတ်ဖော် ပြောကြားခဲ့သည်။

အမေရိကန် ဗုံးကြဲလေယာဉ် အုပ်စုကိုတွေ့ရစဉ်

ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ် (ANTONIO GUTERRES)က “အရင်ကတည်းက ချောက်ကမ်းပါးစွန်းကို ရောက်နေတဲ့ အရှေ့အလယ်ပိုင်းဒေသအတွက် ဒီဖြစ်ရပ်က အန္တရာယ်ရှိပါတယ်။ ဒါဟာ နိုင်ငံတကာ ငြိမ်းချမ်းရေးနဲ့ လုံခြုံရေးကို တိုက်ရိုက် ခြိမ်းခြောက်နေပါတယ်။ ပဋိပက္ခက ထိန်းမနိုင်သိမ်းမရ အခြေအနေ ဖြစ်လာနိုင်ပြီး အရပ်သားတွေအတွက် ကံဆိုးမိုးမှောင်ကျစေနိုင်ပါတယ်။ ကုလအဖွဲ့ဝင် နိုင်ငံတွေ အနေနဲ့ ကုလသမဂ္ဂ ပဋိညာဉ်နဲ့ နိုင်ငံတကာဥပဒေကို လိုက်နာပြီး တင်းမာမှုကို လျှော့ချဖို့ တိုက်တွန်းပါတယ်”ဟု ပြောသည်။

ထို့နောက် ဂျပန်ဝန်ကြီးချုပ် ရှီဂီရူ အီရှီဘာ (SHIGERU ISHIBA)က “ပဋိပက္ခကို အမြန်ဆုံးလျှော့ချဖို့က အရေးကြီးပါတယ်။ အခြေအနေကို စိုးရိမ်စွာနဲ့ အနီးကပ်စောင့်ကြည့်နေပါတယ်”ဟု တုံ့ပြန်ခဲ့သည်။

အလားတူ အီတလီနိုင်ငံခြားရေးဝန်ကြီး အန်တိုနီယိုတာဂျာနီ (ANTONIO TAJANI)က “ဒီတိုက်ခိုက်မှု ဖြစ်ပွားပြီး တဲ့နောက် အီရန်အနေနဲ့ ဆွေးနွေးပွဲ စားပွဲဝိုင်းမှာ ထိုင်ဖို့နဲ့ တင်းမာမှုတွေ လျှော့ချနိုင်ဖို့ မျှော်လင့်ပါတယ်”ဟု ပြော သည်။

ထို့ပြင် နယူးဇီလန်နိုင်ငံခြားရေးဝန်ကြီး ဝင်စတွန် ပီတာ (WINSTON PETERS)ကလည်း “အီရန် နျူကလီးယား စက်ရုံတွေကို တိုက်ခိုက်ကြောင်း ကြေညာတဲ့ သမ္မတထရမ့်ရဲ့ ကြေညာချက် အပါအဝင် ပြီးခဲ့တဲ့ ၂၄ နာရီအတွင်း က အဖြစ်အပျက်တွေကို ကျနော်တို့ သိရှိထားပါတယ်။ အရှေ့အလယ်ပိုင်းမှာ စစ်ရေးအရ တိုက်ခိုက်မှုတွေ ဆက် လက် ဖြစ်ပွားနေတာဟာ အရမ်းစိုးရိမ်ဖို့ ကောင်းပါတယ်။ စစ်ရေးထက် သံတမန်ရေးနဲ့ ဖြေရှင်းတာက အဖြေကို ရှာဖွေတွေ့ရှိပါလိမ့်မယ်”ဟု ပြောကြားခဲ့သည်။

ဗင်နီဇွဲလား နိုင်ငံခြားရေးဝန်ကြီး ယဗင်ဂျီလ် (YVAN GIL)ကတော့ “အီရန်အပေါ် အမေရိကန်ရဲ့ တိုက်ခိုက်မှုကို ဗင်နီဇွဲလားက ရှုတ်ချပါတယ်။ ပြီးတော့ ရန်လိုတိုက်ခိုက်မှုတွေကို ချက်ချင်းရပ်တန့်ဖို့ တိုက်တွန်းပါတယ်”ဟု တုံ့ ပြန် ပြောကြားခဲ့သည်။

အလားတူ ကျူးဘားသမ္မတ မီဂူယယ် ဒီယက်ဇ် ကာနယ် (MIGUEL DIAZ-CANEL)ကလည်း “အီရန်ရဲ့ နျူကလီး ယား စက်ရုံတွေကို အမေရိကန်ရဲ့ ဗုံးကြဲတိုက်ခိုက်မှုအပေါ် ကျနော်တို့ ရှုတ်ချပါတယ်။ ဒါက အရှေ့အလယ်ပိုင်း ပဋိပက္ခကို ပိုပြီး အန္တရာယ်ရှိစေပါတယ်။ ပြီးတော့ ကုလသမဂ္ဂ ပဋိညာဉ်နဲ့ နိုင်ငံတကာဥပဒေကို ချိုးဖောက်မှု ဖြစ်ပြီး လူသားတွေကို အစားထိုးမရတဲ့ ဆုံးရှုံးနစ်နာမှုတွေ ခံစားစေခဲ့ပါတယ်”ဟု ပြောသည်။

Source: ရိုက်တာ

CNI International News

ကူမင်း၊ ဇွန်လ ၂၃

တရုတ်၊ ပါကစ္စတန်နှင့် ဘင်္ဂလားဒေ့ရှ် နိုင်ငံခြားရေးဝန်ကြီးဌာနများမှ ထိပ်သီးအရာရှိများ ပါဝင်သည့် ပထမဆုံး အကြိမ် သုံးပွင့်ဆိုင် အစည်းအဝေးကို ဇွန်လ ၁၉ ရက်က ပြုလုပ်ခဲ့ကြောင်း တရုတ်နိုင်ငံခြားရေးဝန်ကြီးဌာနမှ ထုတ်ပြန်ခဲ့ကြောင်း Indian Express မှ ဖော်ပြခဲ့သည်။

ထိုအစည်းအဝေးကို တရုတ်နိုင်ငံတောင်ပိုင်း၊ ယူနန် (Yunnan) ပြည်နယ်၊ ကူမင်း (Kunming) မြို့တော်တွင် ပြုလုပ်ခဲ့ခြင်းဖြစ်သည်။

တရုတ်သည် ပြီးခဲ့သည့် လကလည်း ပါကစ္စတန်၊ အာဖဂန်နစ္စတန် နိုင်ငံခြားရေးဝန်ကြီးများနှင့် သုံးပွင့်ဆိုင် အစည်းအဝေးကို ပြုလုပ်ခဲ့ပြီးနောက် ယခုအစည်းအဝေးသည် တရုတ်အတွက် အိန္ဒိယ၏ အိမ်နီးချင်း နိုင်ငံများ ပါဝင်သည့် ဒုတိယအကြိမ်မြောက် သုံးပွင့်ဆိုင် အစည်းအဝေး ဖြစ်သည်။

ပါကစ္စတန်၊ တရုတ်၊ အာဖဂန်နစ္စတန် နိုင်ငံခြားရေးဝန်ကြီးများကိုတွေ့ရစဉ်

ကူမင်းတွင် ပြုလုပ်သည့် အစည်းအဝေးကို တရုတ်၏ ဒုတိယနိုင်ငံခြားရေးဝန်ကြီး စွန်းဝေတုန်း (Sun Weidong)၊ ဘင်္ဂလားဒေ့ရှ် ယာယီနိုင်ငံခြားရေးဝန်ကြီး ရာဟူးလ် အလမ် ဆစ်ဒစ် (Ruhul Alam Siddique) နှင့် ပါကစ္စတန်၏ အရန်နိုင်ငံခြားရေးအတွင်းဝင် အမ်မရန် အာမက် ဆစ်ဒီကွီ (Imran Ahmed Siddiqui) တို့ တက်ရောက်ခဲ့သည်။

ထို့ပြင် ပါကစ္စတန် နိုင်ငံခြားရေးအတွင်းဝန် အမ်နာ ဘာလို့ချ် (Amna Baloch) ကလည်း အစည်းအဝေး အစပိုင်း ဆွေးနွေးမှုများကို ဗွီဒီယို ဆက်သွယ်မှုမှတဆင့် တက်ရောက်ခဲ့သည်။

ဘင်္ဂလားဒေ့ရှ်နှင့် ပါကစ္စတန်သည် တရုတ်၏ မိတ်ဆွေကောင်း၊ မိတ်ဖက်ကောင်း၊ အိမ်နီးချင်းကောင်းများ ဖြစ်ကြောင်း တရုတ်ဒုတိယနိုင်ငံခြးရေးဝန်ကြီး စွန်းက ပြောကြားခဲ့သည်။

ထိုနှစ်နိုင်ငံစလုံးသည် တရုတ်၏ ပတ်လမ်း၊ရပ်ဝန်းစီမံကိန်းအတွက် အဓိကမိတ်ဖက်နိုင်ငံများဖြစ်ကြောင်း ၎င်းက ထပ်လောင်း ပြောကြားခဲ့သည်။

တရုတ်၊ ပါကစ္စတန်၊ ဘင်္ဂလားဒေ့ရှ် သံတမန်အရာရှိများကို တွေ့ရစဉ်

သုံးနိုင်ငံအရာရှိများသည် ၎င်းတို့ကြား ပူးပေါင်းဆောင်ရွက်ရေးကို မြှင့်တင်ရေးအတွက် သဘောထားများအား ဖလှယ်ခဲ့ကြပြီး နောက်ထပ် သဘောတူညီချက်များနှင့် အတွေးအမြင်များကို အကောင်အထည်ဖော်ရန်အတွက် ပူးတွဲအဖွဲ့တစ်ဖွဲ့ထူထောင်ရန်လည်း သဘောတူညီခဲ့ကြသည်ဟု သတင်းစာ ရှင်းလင်းပွဲတွင် ထုတ်ပြန်ခဲ့သည်။

တရုတ်၊ ပါကစ္စတန်နှင့် ဘင်္ဂလားဒေ့ရှ်တို့ကြား ပိုမိုနီးကပ်စွာ ပူးပေါင်းဆောင်ရွက်မှုသည် ၃ နိုင်ငံစလုံးရှိ ပြည်သူ များ၏ ဘုံအကျိုးစီးပွားနှင့် ကိုက်ညီကြောင်း၊ ဒေသတွင်း ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေးနှင့် သာယာဝပြောရေးတို့ကို အထောက်အကူ ပြုနိုင်ကြောင်း စွန်းက ပြောကြားခဲ့သည်။

ယခုကဲ့သို့ ကနဦး ဆွေးနွေးမှုများကို အခြေခံပြီး အနာဂတ် ပူးပေါင်းဆောင်ရွက်မှုအတွက် လက်တွေ့ကျသော ခြေလှမ်းများကို ရှာဖွေရန်နှင့် နောက်ထပ် အစည်းအဝေးများ ထပ်မံကျင်းပရန် မျှော်လင့်ထားကြောင်း ထုတ်ပြန်ချက်တွင် ဖော်ပြခဲ့သည်။

Source: Indian Express

CNI International News

ဝါရှင်တန်၊ ဇွန်လ ၂၃

အမေရိကန်သမ္မတ ဒေါ်နယ်ထရမ့် (Donald Trump) သည် ဇွန်လ ၂၂ ရက်က အီရန်၏ နျူကလီးယား စက်ရုံများ ကို တိုက်ခိုက်ခဲ့မှုနှင့်အတူ အကြီးမားဆုံးနှင့် အရဲစွန့်လုပ်ဆောင်ခြင်းက နိုင်ငံခြားရေးမူဝါဒ အလောင်းအစား တစ်ခု ဖြစ်ကြောင်း ရိုက်တာမှ ဖော်ပြခဲ့သည်။

 အီရန်အနေဖြင့် နျူကလီးယား သဘောတူညီမှု ရယူရန် သို့မဟုတ် တိုက်ခိုက်မှုများနှင့် ရင်ဆိုင်ရနိုင်ကြောင်း ထရမ့်က ဇွန်လ ၂၁ ရက်တွင် ပြောကြားခဲ့ပြီးနောက် အီရန်ကို တိုက်ခိုက်ခဲ့ခြင်းဖြစ်သည်။

ထို့ကြောင့် အီရန်သည် ကမ္ဘာပေါ်တွင် ရေနံနှင့်ပတ်သက်ပြီး အသက်သွေးကြောတစ်ခု ဖြစ်နေသည့် ဟော်မုဇ်ရေ လက်ကြား (Strait of Hormuz) ကို ပိတ်ပြီး အရှေ့အလယ်ပိုင်းဒေသရှိ အမေရိကန်စစ်စခန်းများကို တိုက်ခိုက်ကာ လက်တုံ့ပြန်ဖွယ်ရှိနေသည်။

တစ်ချိန်တည်းမှာပင် အီရန်နှင့် ၎င်း၏ လက်အောက်ခံ အဖွဲ့များသည် အစ္စရေးကို ဒုံးကျည်များဖြင့် တိုက်ခိုက်မှုကို အရှိန်မြှင့်တင်နေပြီး ကမ္ဘာတစ်ဝန်းရှိ အစ္စရေးနှင့် အမေရိကန်၏ အကျိုးစီးပွားများအား တိုက်ခိုက်ဖွယ်ရှိကြောင်း ကျွမ်းကျင်သူများက ပြောကြားခဲ့သည်။

အီရန်ကို တိုက်ခိုက်မှု သမ္မတထရမ့် ကြေညာနေစဉ်

ထိုအခြေအနေများတွင် စစ်ပွဲသည် ထရမ့် ခန့်မှန်းခဲ့သည်ထက် ပိုမိုကျယ်ပြန့်လာနိုင်ပြီး အီရတ်နှင့် အာဖဂန် နစ္စတန်တွင် အမေရိကန်၏ ရှည်ကြာသော စစ်ပွဲများကဲ့သို့ ဖြစ်လာနိုင်သည်။

ထရမ့်က အီရတ်နှင့် အာဖဂန်စစ်ပွဲများကို မိုက်မဲသည့် ဆုံးဖြတ်ချက်များဟု ပြောဆိုခဲ့ဖူးသလို ထိုစစ်ပွဲများကဲ့သို့ နောက်တစ်ကြိမ် မည်သည့်အခါမျှ ဖြစ်စေရမည် မဟုတ်ကြောင်း ကတိပြုခဲ့သည်။

“အီရန်က အားနည်းနေပြီး စစ်ရေးစွမ်းဆောင်ရည်တွေလည်း ကျဆင်းနေပါတယ်။ ဒါပေမယ့် သူတို့ဟာ အင်အား မျှတဲ့ စစ်ပွဲကို တိုက်ခိုက်နိုင်တဲ့ နည်းလမ်းတွေရှိနေပြီး အဲဒီစစ်ပွဲဟာလည်း ခနလေးနဲ့ ပြီးသွားမှာ မဟုတ်ပါဘူး”ဟု အရှေ့အလယ်ပိုင်းဒေသတွင် စေ့စပ်ညှိနှိုင်းသူအဖြစ် တာဝန်ယူခဲ့ဖူးသည့် အမေရိကန်အရာရှိဟောင်း အာရွန် ဒေးဗစ် မီလာ (Aaron David Miller) က ပြောကြားခဲ့သည်။

ထရမ့်သည် အီရန်ကို မတိုက်ခိုက်မီ ဇွန်လ ၂၁ ရက် ညပိုင်းက အီရန်ကို စစ်ရေးအရ ခြိမ်းခြောက်မှုများ ပြုလုပ်ခဲ့ သလို နျူကလီးယားစီမံကိန်းကို ဖျက်သိမ်းရန် သဘောတူညီချက်ရယူဖို့ အီရန်ကို စည်းရုံးပြောဆိုခဲ့သည်။

အီရန်ဘက်က နျူကလီးယား သဘောတူညီချက် ရယူရန် စိတ်မဝင်စားကြောင်း ထရမ့်က ယူဆခဲ့ချိန်တွင် အီရန်ကို တိုက်ခိုက်ခြင်းသည် မှန်ကန်သည့် လုပ်ရပ်အား ဆုံးဖြတ်ခဲ့ကြောင်း အိမ်ဖြူတော်အရာရှိတစ်ဦးက ပြောကြားခဲ့သည်။

Source: ရိုက်တာ

အီရန်နှင့်မပူးပေါင်းရန် ဟစ်ဇ်ဘိုလာအဖွဲ့ကို အစ္စရေးက သတိပေး

CNI International News

ဂျေရုဆလင်၊ ဇွန်လ ၂၁

လက်ဘနွန်နိုင်ငံ၏ ဟစ်ဇ်ဘိုလာအဖွဲ့အနေဖြင့် အီရန်နှင့်ပူးပေါင်းပြီး အစ္စရေးကို မတိုက်ခိုက်ရန် အစ္စရေး ကာကွယ်ရေးဝန်ကြီး အစ္စရေး ကက်ဇ် (Israel Katz) က သတိပေးခဲ့သည်ဟု ရိုက်တာမှ ဖော်ပြခဲ့သည်။

အစ္စရေးကို ခြိမ်းခြောက်နေသည့် ဟစ်ဇ်ဘိုလာအဖွဲ့အပေါ် စိတ်ရှည်သည်းခံမှုသည် ကုန်ဆုံးလာပြီဖြစ်ကြောင်း ဇွန်လ ၂၀ ရက်တွင် ၎င်းက ပြောကြားခဲ့သည်။

ပုံစာ- အစ္စရေး ကာကွယ်ရေးဝန်ကြီး အစ္စရေး ကက်ဇ်ကို တွေ့ရစဉ်

အီရန်က ကျောထောက်နောက်ခံ ပေးထားသည့် ဟစ်ဇ်ဘိုလာအဖွဲ့ အကြီးအကဲ နာအင် ကက်ဆင် (Naim Qassem) က ၎င်းတို့အဖွဲ့သည် အစ္စရေးနှင့် အမေရိကန်တို့၏ ရန်လိုမှုကို ရင်ဆိုင်နေရသည့် အီရန်နိုင်ငံဘက်မှ ရပ်တည်သွားမည်ဟု ဇွန်လ ၁၉ ရက်က ပြောကြားခဲ့ပြီးနောက် အစ္စရေးကာကွယ်ရေးဝန်ကြီး၏ သတိပေးချက် ထွက်ပေါ်လာခြင်းဖြစ်သည်။

ဟစ်ဇ်ဘိုလာအဖွဲ့၏ အခြားထုတ်ပြန်ချက်များတွင် အီရန်နှင့်ပူးပေါင်းပြီး အစ္စရေးကို တိုက်ခိုက်မည့် အကြောင်းကို ရှင်းရှင်းလင်းလင်း ဖော်ပြထားခြင်းမရှိဘဲ ပြီးခဲ့သည့် သီတင်းပတ်အတွင်း ဟစ်ဇ်ဘိုလာ အရာရှိတစ်ဦးက ၎င်းတို့ အဖွဲ့သည် အစ္စရေးကို စတင်တိုက်ခိုက်ရန် ရည်ရွယ်ချက်မရှိကြောင်း ရိုက်တာသတင်းဌာနကို ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇွန်လ ၂၁

ထိုင်းနိုင်ငံအတွင်း လက်ရှိဖြစ်ပွားနေသည့် နိုင်ငံရေး မတည်ငြိမ်မှုမျာသည် စီးပွားရေးကို ထိခိုက်စေနိုင်ကြောင်း နယ်ပယ်ကဏ္ဍအသီးသီးမှ ထင်ရှားသော စီးပွားရေးပညာရှင်များက စိုးရိမ်နေသည်ဟု The Nation တွင် ဖော်ပြခဲ့သည်။

နိုင်ငံရေး မတည်ငြိမ်မှုများ ဆက်လက် ဖြစ်ပွားနေခြင်းသည် ယခင်ကတည်းက ကျိုးပျက်လွယ်သည့် ထိုင်း၏ စီးပွားရေးကို ပိုမိုအားနည်း သွားစေနိုင်ပြီး အစိုးရအနေဖြင့် အမျိုးသားစည်းလုံးညီညွတ်ရေးနှင့် ရေရှည်စီးပွားရေး တည်ငြိမ်မှု ရရှိအောင် ဦးစားပေး လုပ်ဆောင်သင့်ကြောင်း ကျွမ်းကျင်သူများက တိုက်တွန်းခဲ့သည်။

ထိုင်း၏ အိမ်ခြံမြေ အရောင်းအဝယ် ဘုတ်အဖွဲ့ဥက္ကဋ္ဌ အစ္စာရာ ဘွန်ယန်း (Isara Boonyoung) က ယခုကဲ့သို့ အတိမ်းအစောင်းမခံနိုင်သည့် အချိန်မျိုးတွင် လွှတ်တော်ကို ဖျက်သိမ်းမည်ဆိုပါက အန္တရာယ်ကြီးမားသော  နိုင်ငံရေး လေဟာနယ်တစ်ခု ဖြစ်ပွားလာနိုင်ကြောင်း သတိပေးခဲ့သည်။

ပေတုန်တန်ကို တွေ့ရစဉ်

ကမ္ဘာလုံးဆိုင်ရာ စီးပွားရေး ကျဆင်းမှုများ၊ အမေရိကန်၏ ကုန်သွယ်ခွန် တိုးမြှင့်ကောက်ခံမှု၊ ကမ္ဘောဒီးယားနှင့် ဖြစ်ပွားနေသည့် နယ်စပ်ဒေသ အငြင်းပွားမှုများနှင့်အတူ ထိုင်း၏ နိုင်ငံရေး အခြေအနေသည် ကျိုးပျက်လွယ်သည့် အနေအထားသို့ ရောက်ရှိနေသည်။

“သေချာရေရာမှုမရှိတဲ့ နိုင်ငံရေးအခြေအနေက ထိုင်းရဲ့ စီးပွားရေး ယိမ်းယိုင်မှုကို ပိုပြီးဆိုးရွားစေပါလိမ့်မယ်။ သက်ဆိုင်ရာ အဖွဲ့အစည်းတွေ အနေနဲ့ အောက်လွှတ်တော်ကို မဖျက်သိမ်းအောင်နဲ့ အခြေအနေကို ပုံမှန်အတိုင်း ပြန်လည်ထိန်းသိမ်းသင့်ပါတယ်။ ဘာလို့လဲဆိုတော့ ထိုင်းနိုင်ငံဟာ အခုချိန်မှာ တည်ငြိမ်မှု လိုအပ်နေပြီး အကျပ်အတည်းကို စည်းလုံးညီညွတ်စွာ ဖြေရှင်းရပါမယ်” ဟု အစ္စာရာက ပြောကြားခဲ့သည်။

အစိုးရအဖွဲ့အနေဖြင့်လည်း ပြည်သူလူထု၏ ယုံကြည်မှုကို တည်ဆောက်ရန်၊ အထူးသဖြင့် နယ်စပ်ပြဿနာကို ဖြေရှင်းရန် အမျိုးသားလုံခြုံရေးအေဂျင်စီများနှင့် လက်တွဲဆောင်ရွက်ရန်လည်း ၎င်းက တိုက်တွန်းခဲ့သည်။

ပေတုန်တန်ကို တွေ့ရစဉ်

ထိုင်းဟိုတယ်များအဖွဲ့ချုပ် (THA) ၏ ဥက္ကဋ္ဌ သီယန်ပရာဆစ် ချိုင်ယာပါထရာနန် (Thienprasit Chaiya patranun) ကလည်း ပြည်တွင်းနိုင်ငံရေး တင်းမာမှုနှင့် ထိုင်း-ကမ္ဘောဒီးယား ဆက်ဆံရေး တင်းမာမှုများသည် ခရီးသွားကဏ္ဍအပေါ် သက်ရောက်မှု ရှိနေခြင်းသည် စိုးရိမ်စရာကောင်းကြောင်း ပြောကြားခဲ့သည်။

ပြောင်းလဲမှုများ ပြုလုပ်ရန်၊ အခွင့်အလမ်းသစ်များ ဖန်တီးရန်နှင့် အစိုးရအသစ် ဖွဲ့စည်းပြီး ပြည်သူလူထု၏ ယုံကြည်မှုကို ပြန်လည် တည်ဆောက်ရေးအတွက် အောက်လွှတ်တော်ကို ဖျက်သိမ်းခြင်းသည် အကောင်းဆုံး ရွေးချယ်မှုဖြစ်နိုင်ကြောင်း ၎င်းက မတူကွဲပြားသည့် သဘောထားကို ထုတ်ဖော်ပြောဆိုခဲ့သည်။

ထိုင်းလက်လီရောင်းချသူများအဖွဲ့ချုပ်၏ အကြံပေးပုဂ္ဂိုလ် ဆွမ်ချိုင်း ပွန်ရတ္တနချာရွန် (Somchai Pornratana charoen) ကမူ မကြာသေးမီက နိုင်ငံရေးဖြစ်စဉ်များသည် စားသုံးသူများ၏ ယုံကြည်မှုကို ကျဆင်းစေခဲ့သဖြင့် အစိုးရအဖွဲ့အနေနှင့် ထိရောက်သည့် အစီအစဉ်များဖြင့် လုပ်ဆောင်ရန် တိုက်တွန်းခဲ့သည်။

Source: The Nation

CNI International News

ဂျေရုဆလင်၊ ဇွန်လ ၂၁

အီရန်ခေါင်းဆောင်ပိုင်း အပြောင်းအလဲဖြစ်ခြင်း သို့မဟုတ် ကျဆုံးရေးသည် အစ္စရေး၏ ရည်ရွယ်ချက် ပန်းတိုင် မဟုတ်သော်လည်း စစ်ရေးတိုက်ခိုက်မှုများ၏ ရလဒ်ဖြစ်လာနိုင်ကြောင်း အစ္စရေးဝန်ကြီးချုပ် နေတန်ယာဟု (Benjamin Netanyahu) က ဇွန်လ ၁၉ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

“အီရန်အစိုးရကို ပြုပြင်ပြောင်းလဲဖို့ ဒါမှမဟုတ် အီရန်အစိုးရ ပြုတ်ကျစေဖို့ဟာ အီရန်ပြည်သူတွေအတွက် ပထမဆုံးနဲ့ အရေးအကြီးဆုံး ကိစ္စပါ။ အီရန်ပြည်သူတွေနဲ့ပဲ သက်ဆိုင်ပါတယ်” ဟု ၎င်းက ဆိုသည်။

ထိုအခြေအနေများသည် အစ္စရေး၏ ရည်ရွယ်ချက် မဟုတ်ဘဲ စစ်ရေးတိုက်ခိုက်မှုများ၏ ရလဒ်တစ်ခု ဖြစ်လာ နိုင်ကြောင်း နေတန်ယာဟုက အစ္စရေး၏ Kan ရုပ်သံလိုင်းနှင့် ပြုလုပ်သည့် အင်တာဗျူးတွင် ပြောကြားခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) က အစ္စရေး၏ တိုက်ခိုက်မှုတွင် ပူးပေါင်းမည်ဖြစ်စေ မပူးပေါင်းမည်ဖြစ်စေ အီရန်၏ နျူကလီးယားစက်ရုံများ အားလုံးကို ဖျက်ဆီးရန် အစ္စရေး၌ ပါဝါရှိကြောင်း ၎င်းက ပြောကြားခဲ့သည်။

ထရမ့်သည် ထိုကိစ္စနှင့်ပတ်သက်ပြီး လာမည့် သီတင်းနှစ်ပတ်အတွင်း ဆုံးဖြတ်ချက် ချသွားမည်ဟု အိမ်ဖြူတော်မှ မထုတ်ပြန်မီ နေတန်ယာဟုက အထက်ပါအတိုင်း ပြောကြားခဲ့ခြင်းဖြစ်သည်။

အီရန်ခေါင်းဆောင် အလီခါမေနီကို တွေ့ရစဉ်

အီရန်၏ ကွမ် (Qom) မြို့အနီးရှိ တောင်အောက်တွင် တည်ဆောက်ထားသည့် အီရန်နျူကလီးယား စီမံကိန်း၏ အဓိကစက်ရုံဖြစ်သည့် Fordow ယူရေနီယံသန့်စင်သော စက်ရုံကို ဖျက်ဆီးရန်အတွက် အစ္စရေးသည် အမေရိကန် စစ်တပ်၏ ဘန်ကာဖျက် ဗုံးများနှင့် အကူအညီ လိုအပ်လိမ့်မည်ဟု စစ်ရေးလေ့လာသူများက ယုံကြည်ကြသည်။

Fordow စက်ရုံကို အမေရိကန်က ပါသည်ဖြစ်စေ၊ မပါသည်ဖြစ်စေ ဖျက်ဆီးနိုင်စွမ်း ရှိ/မရှိ မေးမြန်းခံရချိန်တွင် နေတန်ယာဟုက “ကျနော်တို့ရဲ့ ပစ်မှတ်တွေအားလုံး၊ သူတို့ (အီရန်) ရဲ့ နျူကလီးယား စက်ရုံတွေ အားလုံးကို ဖယ်ရှားနိုင်တဲ့ စွမ်းအားဟာ ကျနော်တို့ဆီမှာ ရှိပါတယ်၊ ဒါပေမယ့် သူ (ထရမ့်) ပါဝင်မလား၊ မပါဝင်ဘူးလား ဆိုတာကတော့ သူ့ရဲ့ ဆုံးဖြတ်ချက်အပေါ် မူတည်ပါတယ်” ဟု ပြောကြားခဲ့သည်။

“သူကတော့ အမေရိကန်အတွက် ကောင်းတာကိုပဲ လုပ်မှာပါ။ ကျနော်ကလည်း အစ္စရေးနိုင်ငံအတွက် ကောင်းတာ တွေကိုလည်း လုပ်ဆောင်သွားမှာ ဖြစ်ပါတယ်။ ဒီအချိန်အထိတော့ လူတိုင်းက သူတို့လုပ်ရမယ့် ကိစ္စတွေကို လုပ်ဆောင်နေကြတယ်လို့ ပြောနိုင်ပါတယ်”ဟု နေတန်ယာဟုက ပြောကြားခဲ့သည်။ 

ဇွန်လ ၁၈ ရက်တွင် ထရမ့်က အမေရိကန်သည် Fordow နျူကလီးယားစက်ရုံကို ဖျက်ဆီးနိုင်စွမ်းရှိကြောင်း၊ သို့သော် ထိုကဲ့သို့ တိုက်ခိုက်ဖျက်စီးရန် လုပ်ဆောင်နေခြင်းမရှိသေးကြောင်း ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇွန်လ ၂၁

ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ညွန့်ပေါင်းအစိုးရ ပြိုကွဲမည့်အရေးကို ရှောင်လွှဲရန်အတွက် ရာထူးမှနုတ်ထွက်ရန် တောင်းဆိုခံရဖွယ်ရှိကြောင်း ရိုက်တာမှ ဖော်ပြခဲ့သည်။

ပေတုန်တန်၏ ဖြူးထိုင်းပါတီ ဦးဆောင်သည့် ညွန့်ပေါင်းအစိုးရအဖွဲ့အတွင်းရှိ အဓိကပါတီတစ်ခုဖြစ်သည့် ယူနိုက်တက် ထိုင်းနေရှင်ပါတီ (UTN) က အစိုးရအဖွဲ့ မပြိုကွဲစေရန် ပေတုန်တန်ကို ဝန်ကြီးချုပ်ရာထူးမှ နုတ်ထွက်ရန် တောင်းဆိုလိမ့်မည်ဟု သတင်းရင်းမြစ်များတွင် ဖော်ပြနေသည်။

ထို့ကြောင့် ပြီးခဲ့သည့် ၁၀ လကမှ ဝန်ကြီးချုပ်ရာထူး ရရှိခဲ့သည့် ပေတုန်တန်သည် အစိုးရအဖွဲ့ကို ကယ်တင်ရန် ရာထူးကို လက်လွှတ်ရမည့် အခြေအနေသို့ ရောက်ရှိလာခဲ့သည်။

ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra)၏ သမီးဖြစ်သည့် ပေတုန်တန် (၃၈ နှစ်)သည် အမေရိကန်၏ ကုန်သွယ်ခွန် တိုးမြှင့်ကောက်ခံမှု၊ စီးပွားရေး နာလန်ထူမှု၊ ကမ္ဘောဒီးယားနှင့် နယ်စပ်ဒေသ အငြင်းပွားမှု အပါအဝင် ဘက်ပေါင်းစုံမှ စိန်ခေါ်မှုများနှင့် ရင်ဆိုင်နေရသည်။

“သူ ရာထူးက မနုတ်ထွက်ဘူးဆိုရင် ယူနိုက်တက်ထိုင်းနေရှင်ပါတီက ညွန်ပေါင်းအစိုးရထဲက ထွက်ခွာမှာပါ။ သူ့ကို ရာထူးက ထွက်ပေးဖို့ ကျနော်တို့ ပါတီခေါင်းဆောင်ကို တောင်းဆိုစေချင်ပါတယ်” UTN ပါတီ၏ သတင်းရင်းမြစ် တစ်ခုက ပြောကြားခဲ့သည်။

ပေတုန်တန်သည် ကမ္ဘောဒီးယားဝန်ကြီးချုပ်ဟောင်း ဟွန်ဆန်နှင့် ဖုန်းဆက်သွယ် ပြောဆိုသည့် အသံဖိုင် ပေါက်ကြားလာခဲ့ပြီး ထိုင်းပြည်သူများက ဒေါသထွက်ခဲ့သည်။

ပေတုန်တန်ကို ဆန္ဒပြနေကြစဉ်

ထို့နောက် ဇွန်လ ၁၈ ရက်တွင် ဘူဂျထိုင်းပါတီက ညွန့်ပေါင်းအစိုးရအဖွဲ့ထဲမှ နုတ်ထွက်ခဲ့သည်။

ထိုအသံဖိုင်ထဲတွင် ပေတုန်တန်က ဟွန်ဆန်ကို ဦးလေးဟု ခေါ်ဆိုခဲ့ကာ ထိုင်းနိုင်ငံ အရှေ့မြောက်ဘက်ရှိ ထိုင်း စစ်တပ်၏ တပ်မှူးတစ်ဦးကို ၎င်း၏ ပြိုင်ဘက်တစ်ဦးအဖြစ် ရည်ညွှန်းပြောဆိုခဲ့သဖြင့် လူမှုမီဒီယာ များပေါ်၌  ပေတုန်တန်ကို ဝေဖန်မှုများ ထွက်ပေါ်လာခဲ့သည်။

ထို့နောက် ဘန်ကောက်မြို့တော်တွင် ရှပ်ဝါများက ဆန္ဒပြခဲ့ကြပြီး ပေတုန်တန်ကို ရာထူးမှ နုတ်ထွက်ရန် တောင်းဆိုခဲ့ကြသည်။

ထို့ကြောင့် ပေတုန်တန်သည် ဇွန်လ ၁၉ ရက်က ပြည်သူများကို တောင်းပန်စကား ပြောကြားခဲ့ပြီး  ၎င်း၏ ပြိုင်ဘက်တစ်ဦးအဖြစ် ရည်ညွှန်းပြောဆိုခဲ့သည့် ထိုင်းစစ်တပ်၏ တပ်မှူးကိုလည်း ဖုန်းဆက်ပြီး တောင်းပန်စကား ပြောကြားခဲ့သည်။

Source: ရိုက်တာ

CNI International News

၂၀၂၅ ခုနှစ်၊ ဇွန်လ ၂၀

ထိုင်း-ကမ္ဘောဒီးယားနယ်စပ်အရေး ကိုင်တွယ်နေသော အမှတ် ၂ စစ်ဒေသသို့ ထိုင်းဝန်ကြီးချုပ် ပေတုန်တန်သည် ဒုဝန်ကြီးချုပ်နှင့်ကာကွယ်ရေးဝန်ကြီးဖြစ်သူနှင့်အတူ ၂၀၂၅ ခုနှစ်၊ ဇွန်လ ၂၀ ရက်က သွားရောက်ခဲ့သည်။

ဝန်ကြီးချုပ် ပေတုန်တန်သည် ကမ္ဘောဒီးယားဝန်ကြီးချုပ်ဟောင်း ဟွန်ဆန်နှင့် ဖုန်းပြောစဉ် အမှတ် ၂ စစ်ဒေသ တိုင်းမှူးကို ဝေဖန်ခဲ့သည့် အသံဖိုင် ပေါက်ကြားလာပြီးနောက် ရာထူးက နုတ်ထွက်ရန် ဖိအားပေးခံနေရသလို စစ်တပ်၏ အာဏာသိမ်းမှုကို ခံရနိုင်ကြောင်းလည်း သုံးသပ်နေကြသည်။

ထို့နောက် ပေတုန်တန်သည် Ubon Ratchathani  ပြည်နယ်ရှိ  အမှတ် ၂ စစ်ဒေသသို့ သွားရောက်၍ တိုင်းမှူးနှင့် အဖွဲ့ကို တွေ့ဆုံခဲ့သည်။

Ubon Ratchathani မြို့ရှိ Wing 21 လေတပ်စခန်းတွင် အမှတ် ၂ စစ်ဒေသမှူး ဒုတိယဗိုလ်ချုပ်ကြီး Boonsin Padklang က ဝန်ကြီးချုပ် ပေတုန်တန်ကို လက်ခံတွေ့ဆုံခဲ့သည်။