CNI International News

ဘန်ကောက်၊ ဇူလိုင် ၃၁

မကြာသေးမီက ထိုင်းနှင့်ကမ္ဘောဒီးယား နယ်စပ်တွင် ဖြစ်ပွားခဲ့သည့် တိုက်ခိုက်မှုများအတွင်း ကမ္ဘောဒီးယား၏ လက်ရွေးစင် သက်တော်စောင့်ဌာနချုပ် (BHQ)မှ စစ်သားများသည် ထိုင်းတပ်ဖွဲ့များကို အရေးနိမ့်ခဲ့ကြောင်း The Nation မှ ဖော်ပြခဲ့သည်။

ဇူလိုင် ၂၈ ရက် ညသန်းခေါင်မတိုင်ခင် ကမ္ဘောဒီးယားဝန်ကြီးချုပ်ဟောင်း ဟွန်ဆန် (Hun Sen) က  BHQ တပ်ဖွဲ့ ဝင်များကို ထိုင်းစစ်သားများနှင့်တိုက်ခိုက်ရန် အမိန့်ပေးခဲ့သည်ဟု ဆိုသည်။

ထိုလက်ရွေးစင် စစ်သားများသည် လော့ဘူရီ (Lopburi) ပြည်နယ်တွင် အထိုင်ချထားသည့် ထိုင်း၏ အမှတ် ၃၁ ခြေလျင်တပ်ရင်း၊ ဘုရင့်အစောင့်တပ်ဖွဲ့တို့နှင့် ရင်ဆိုင်တွေ့ခဲ့သည်။

လေ့ကျင့်မှုများ အပြည့်အဝရှိခဲ့သည့် ထိုင်းစစ်သားများက လျှင်မြန်စွာ နေရာယူ၍ ကျူးကျော်ဝင်ရောက်လာသော ကမ္ဘောဒီးယား လက်ရွေးစင် စစ်သားများကို တွန်းလှန်တိုက်ခိုက်ခဲ့ပြီး တာကဝိုင် (Ta Kwai) ဒေသကို ထိန်းချုပ် နိုင်ခဲ့သည်။

၂၀၁၁ ခုနှစ်ကလည်း ကမ္ဘောဒီးယား လက်ရွေးစင် စစ်သားများသည် ကမ္ဘောဒီးယား၏ အမှတ် ၇၀ ခြေလျင် တပ်မဟာနှင့်အတူ Preah Vihear ပြည်နယ်သို့ ဖြန့်ကြက်ချခဲ့ဖူးသည်။

ကမ္ဘောဒီးယားဝန်ကြီးချုပ်ဟောင်း ဟွန်ဆန်ကို တွေ့ရစဉ်

သို့သော် ၎င်းတို့ ဝင်ရောက်လာမှုကို ထိုင်းနိုင်ငံ၏ ၁၅၅ မမ အမြောက်များ၏ သာလွန်ပစ်အားဖြင့် ဟန့်တားနိုင် ခဲ့ဖူးသည်ဟု The National က ‌ဖော်ပြခဲ့သည်။

နောက်ဆုံး ထိတွေ့တိုက်ပွဲများသည် မေလ ၂၈ ရက်နောက်ပိုင်း ဖြစ်ပွားခဲ့ခြင်းဖြစ်ပြီး ကမ္ဘောဒီးယားဝန်ကြီးချုပ် ဟွန်မာနက် (Hun Manet) က Preah Vihear နှင့် Oddar Meanchey ပြည်နယ်များသို့ စစ်သား ၁၀,၀၀၀ ကျော် စေလွှတ်ခဲ့သည်။

BHQ ၏ တပ်မှူး ဗိုလ်ချုပ်ကြီး Hing Bun Hieng သည် ၎င်း၏ တပ်ဖွဲ့ဝင်အနည်းငယ်ကို Preah Vihear ပြည်နယ်ကို စေလွတ်ခဲ့ပြီး ကမ္ဘောဒီးယား၏ Kandal ပြည်နယ် Ta Khmau မြို့သို့ BHQ စစ်သားအများစုကို စေလွှတ်ခဲ့သည်။

သို့သော် BHQ စစ်သားများသည် ကောင်းမွန်စွာ လက်နက်တပ်ဆင် ထားခဲ့သည့်တိုင် ထိုင်း၏ လက်ရွေးစင် စစ်သားများနှင့် ရင်ဆိုင်ရချိန်တွင် ၎င်းတို့၏ ရည်မှန်းချက်ကို အကောင်အထည်ဖော်ခွင့် မရခဲ့ဘဲ အရေးနိမ့်ခဲ့ သည်ဟု The Nation မှ ရေးသားဖော်ပြခဲ့သည်။

Source: The Nation

CNI International News

ဘေဂျင်း၊ ဇူလိုင် ၃၁

တရုတ်ကွန်မြူနစ်ပါတီသည် လာမည့် အောက်တိုဘာလတွင် နှစ်စဉ်ပြုလုပ်နေကျ သီးသန့် ဆွေးနွေးပွဲကို ပြုလုပ်ရန် စီစဉ်ထားကြောင်း South China Morning Post မှ ဖော်ပြခဲ့သည်။

ထိုဆွေးနွေးပွဲတွင် တရုတ်နိုင်ငံ၏ စီးပွားရေး၊ နိုင်ငံရေး၊ လူမှုရေး ရည်မှန်းချက်များအတွက် နောက်ထပ် ၅ နှစ်စာ အစီအစဉ်ကို ရေးဆွဲသွားမည်ဟု ဆိုသည်။

ကွန်မြူနစ်ပါတီ၏ ဗဟိုကော်မတီဝင် ၃၇၀ ဦးကျော် တက်ရောက်မည့် ဆွေးနွေးပွဲ ပြုလုပ်မည့်အကြောင်းကို ဇူလိုင် ၃၀ ရက်က ပေါ်လစ်ဗျူရို၏ အစည်းအဝေးအပြီးတွင် ကြေညာခဲ့ခြင်းဖြစ်သည်။

ထိုဆွေးနွေးပွဲကို ဘေဂျင်းမြို့တော်တွင် ပြုလုပ်သွားမည်ဟုလည်း နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့ သည်။

တရုတ်သမ္မတ ရှီကျင့်ဖျင်ကိုတွေ့ရစဉ်

ဆွေးနွေးပွဲ ကျင်းပမည့် ရက်အတိအကျကို လူသိရှင်ကြား ကြေညာခြင်း မရှိသေးသော်လည်း ယခင်နှစ်များ၏ လုပ်ထုံးလုပ်နည်းများအရ အောက်တိုဘာလ၏ ဒုတိယလဝက်အတွင်း ၄ ရက်ကြာ ပြုလုပ်သွားဖွယ်ရှိသည်။

ထို့ကြောင့် ထိုဆွေးနွေးပွဲသည် တောင်ကိုရီးယားနိုင်ငံ ဆိုးလ်မြို့တော်၌ အောက်တိုဘာ ၃၁ ရက်တွင် ပြုလုပ်မည့် အာရှ-ပစိဖိတ် စီးပွားရေး ပူးပေါင်းဆောင်ရွက်ရေး (Apec-အေပက်စ်) အစည်းအဝေးထက် စော၍ပြုလုပ်လိမ့်မည် ဖြစ်သည်။

အေပက်စ်(Apec) အစည်းအဝေးတွင် အမေရိကန်သမ္မတ ဒေါ်နယ်ထရမ့် (Donald Trump) နှင့် တရုတ်သမ္မတ ရှီကျင့်ဖျင် (Xi Jinping) တို့ တွေ့ဆုံနိုင်ခြေ ရှိသည်ဟုလည်း သတင်းများ ထွက်ပေါ်နေသည်။

ဒုတိကကမ္ဘာစစ် ပြီးဆုံးသည့် အထိမ်းအမှတ်အဖြစ် ဘေဂျင်းတွင် စစ်ရေးပြ အခမ်းအနား မပြုလုပ်မီ ၁ လကျော် စောပြီး ထိုသီးသန့်ဆွေးနွေးပွဲကို ပြုလုပ်ရန် စီစဉ်ခဲ့ခြင်းလည်းဖြစ်သည်။

စက်တင်ဘာ ၃ ရက်၌ ဘေဂျင်းမြို့တော်၏ တီအန်မင် ရင်ပြင် (Tiananmen Square) တွင် ပြုလုပ်မည့် စစ်ရေးပြ အခမ်းအနားကို ရုရှားသမ္မတ ပူတင် (Vladimir Putin) အပါအဝင် ကမ္ဘာ့ခေါင်းဆောင်များ တက်ရောက်မည် ဖြစ်သည်။

Source: South China Morning Post

CNI International News

ဖနွမ်ပင်၊ ဇူလိုင် ၃၀

ထိုင်းနှင့်ကမ္ဘောဒီးယားကြား ဇူလိုင် ၂၄ ရက်မှ ဇူလိုင် ၂၈ ရက်အထိ နယ်စပ်ဒေသတွင် ၅ ရက်ကြာ ပစ်ခတ် တိုက်ခိုက်မှုများ ဖြစ်ပွားခဲ့ပြီးနောက် ဇူလိုင် ၂၈ ရက် ညသန်းခေါင်၌ အပစ်အခတ်ရပ်စဲရေး သဘောတူညီမှု စတင် အသက်ဝင်ခဲ့ကာ တိုက်ခိုက်မှုများ ရပ်တန့်သွားခဲ့သည်။

စစ်အင်အားချင်း ယှဉ်ပါက ကမ္ဘောဒီးယားဘက်မှ အားနည်းနေသည့်တိုင် အဘယ်ကြောင့် စစ်ဘောင်ကို ချဲ့ခဲ့ သနည်း ဆိုခြင်းကို မေးခွန်းများ ထွက်ပေါ်နေသည်။

The Nation သတင်းစာတွင်မူ ထိုမေးခွန်းနှင့်ဆက်စပ်သည့် မေးခွန်းများကို လေ့လာသုံးသပ် ဖော်ပြထားသည်။

မေးခွန်း ။        ။ ကမ္ဘောဒီးယားက တိုက်ပွဲကို မြေပြင်နှင့် ရေပြင် နယ်စပ်ဒေသအားလုံး နီးပါးအထိ ပါဝင်စေရန် အဘယ်ကြောင့် စစ်ဘောင်ချဲ့ခဲ့သနည်း။

အဖြေ   ။        ။ ကမ္ဘောဒီးယားသည် ၎င်းပိုင်ဆိုင်ကြောင်း ကြေညာထားသည့် နယ်နိမိတ် အားလုံးတွင် တိုက်ခိုက် မှုများနှင့် တင်းမာမှုများ အရှိန်မြှင်တင်ရန် ရည်ရွယ်ခဲ့ပုံပေါ်သည်။

ထိုအချိန်မျိုးတွင် နိုင်ငံတကာ အသိုင်းအဝိုင်းက နယ်စပ်ပဋိပက္ခကို ပိုမိုအာရုံစိုက် လာလိမ့်မည်ဟု ကမ္ဘောဒီးယား က ယူဆခဲ့သည်။

မလေးရှား၊ ကမ္ဘောဒီးယား၊ ထိုင်း ဝန်ကြီးချုပ်များကိုတွေ့ရစဉ်

မေးခွန်း ။        ။ ကမ္ဘောဒီးယားက ထိုင်းထက် စစ်သားအင်အား၊ လက်နက်အင်အား နည်းပါးနေသည့်တိုင် ပဋိပက္ခကို အဘယ်ကြောင့် အရှိန်မြှင့်ခဲ့သနည်း။

အဖြေ  ။         ။ ကမ္ဘောဒီးယား၏ ရည်ရွယ်ချက်မှာ ကုလသမဂ္ဂလုံခြုံရေးကောင်စီ၏ အာရုံကို ရယူလိုခြင်းဖြစ်ပြီး ကုလသမဂ္ဂက ကြားဝင်ပြီး ကြေညာချက် ထုတ်ပြန်ခြင်း၊ လေ့လာသူများ စေလွှတ်ခြင်းတို့ လုပ်ဆောင်လိမ့်မည်ဟု မျှော်လင့်ခဲ့ဖွယ်ရှိသည်။ 

ဆွေးနွေးမှုများ ပြုလုပ်နိုင်မည်ဆိုပါက ကမ္ဘောဒီးယားသည် နယ်နိမိတ် အငြင်းပွားမှုကို စားပွဲဝိုင်းပေါ်တွင် တင်ပြီး ဖြေရှင်းရန် ရည်ရွယ်ခဲ့သည်။

မေးခွန်း ။       ။ ကမ္ဘောဒီးယား၏ မဟာဗျူဟာမြောက် အစီအစဉ်က ဘာလဲ။

အဖြေ   ။       ။ နယ်စပ်ပဋိပက္ခတွင် ထိုင်းသည် ခံစစ်ထက်၊ ထိုးစစ်ကို ပိုမိုအသုံးပြုခဲ့သည်ဟု ကမ္ဘောဒီးယားက စွပ်စွဲမည်ဖြစ်ပြီး ထိုင်းနိုင်ငံကို အရင် ရန်စ ကျူးကျော်သူအဖြစ် ပုံဖော်ကာ ကမ္ဘောဒီးယားဘက်မှ သံတမန်ရေး အသာစီးရယူရန် စီစဉ်ခဲ့ခြင်းဖြစ်နိုင်သည်။

Source: The Nation

CNI International News

ပေကျင်း၊ ဇူလိုင် ၃၀

တရုတ်နိုင်ငံခြားရေးဝန်ကြီး ဝမ်ယိ (Wang Yi) သည် တောင်ကိုရီးယားနိုင်ငံခြားရေးဝန်ကြီး ချိုဟွမ် (Cho Hyun ) နှင့် ဇူလိုင် ၂၈ ရက်က ဖုန်းဆက်သွယ် ပြောဆိုရာတွင် တောင်ကိုရီးယားအနေဖြင့် လွတ်လပ်သည့် ကိုယ်ပိုင်မူဝါဒ ချမှတ်ရန် တိုက်တွန်းခဲ့သည်ဟု South China Morning Post မှ ဖော်ပြခဲ့သည်။

ဝမ်သည် တောင်ကိုရီးယားကို အမေရိကန်၏ ဩဇာလွှမ်းမိုးမှုအောက်မှ ရုန်းထွက်ပြီး လွတ်လပ်သည့် မူဝါဒ ချမှတ်ရန် တိုက်တွန်းခြင်း ဖြစ်နိုင်သည်ဟု ကျွမ်းကျင်သူများက ပြောကြားခဲ့သည်။

တောင်ကိုရီးယားအနေဖြင့် တရုတ်နှင့်ပတ်သက်ပြီး တည်ငြိမ်မှု၊ ရေရှည်တည်မြဲမှုနှင့် ခန့်မှန်းနိုင်သည့် မူဝါဒကို ချမှတ်ရန်၊ ပူးပေါင်းဆောင်ရွက်မှုကို မြှင့်တင်ရန် ဝမ်က တိုက်တွန်းခဲ့သည်ဟု တရုတ်နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ဝမ်နှင့် ချိုတို့သည် ၄၅ မိနစ်ကြာ ဖုန်းပြောဆိုမှုအတွင်း နှစ်နိုင်ငံ မဟာဗျူဟာမြောက် ပူးပေါင်းဆောင်ရွက်မှုကို တည်ငြိမ်ရင့်ကျက်မှုရှိသည့် သဘောထားဖြင့် မြှင့်တင်သွားမည့် ကတိကဝတ်များအား ထပ်လောင်း အတည်ပြု ခဲ့ကြသည်ဟု တောင်ကိုရီးယား၏ ယွန်ဟပ် သတင်းအေဂျင်စီက ဖော်ပြခဲ့သည်။

တောင်ကိုရီးယားသမ္မတသစ် လီဂျေမြောင်ကို တွေ့ရစဉ်

“တောင်ကိုရီးယားနိုင်ငံ ဂျောင်ဂျူ (Gyeongju) မြို့မှာ ပြလုပ်မယ့် APEC အစည်းအဝေးမှာ ပူးပေါင်းဆောင်ရွက် မှုတွေ ပြုလုပ်ဖို့ သဘောတူညီမှု ရခဲ့ပါတယ်။ အဲဒီသဘောတူညီမှုဟာ နှစ်နိုင်ငံ ပြည်သူတွေ အကျိုးရှိစေမယ့် လက်တွေ့ကျတဲ့ ပူးပေါင်းဆောင်ရွက်မှုရဲ့ ရလဒ်တွေ ထွက်ပေးစေဖို့နဲ့ ဆက်ဆံရေးတိုးမြှင့်ဖို့ အခွင့်အလမ်းတစ်ခု ဖြစ်လာခဲ့ပါတယ်” ဟု တောင်ကိုရီးယား နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

တရုတ်သည် တောင်ကိုရီးယားသမ္မတသစ် လီဂျေမြောင် (Lee Jae-myung) ၏ အစိုးရလက်ထက်တွင် ဆက်ဆံရေးများကို ပြန်လည်ထိန်းသိမ်းရန် ကြိုးပမ်းလျက်ရှိသည်။

တောင်ကိုရီးယားတွင် လီ အာဏာရ လာခဲ့ပြီးနောက်ပိုင်း ယခင်က အေးစက်နေသည့် တရုတ်နှင့် တောင်ကိုရီးယား ကြား ဆက်ဆံရေးသည် နွေးထွေးပျော့ပြောင်း လာခဲ့သည်။

ပြီးခဲ့သည့် လကလည်း လီသည် တရုတ်သမ္မတ ရှီကျင့်ဖျင် (Xi Jinping) နှင့် ဖုန်းဆက်သွယ် ပြောကြားခဲ့သည်။

ထိုဖုန်းပြောကြားမှုအတွင်း ရှီက ဒုတိယကမ္ဘာစစ် ပြီးဆုံးသည့် နှစ်ပေါင်း ၈၀ ပြည့် အထိန်းအမှတ်အတွက် တီအန်မင်ရင်ပြင်တွင် စက်တင်ဘာ ၃ ရက်၌ ပြုလုပ်မည့် စစ်ရေးပြ အခမ်းအနားကို တက်ရောက်ရန် လီကို ဖိတ်ကြားခဲ့သည်ဟု ဆိုသည်။

Source: South China Morning Post

CNI International News

ဘဂ္ဂဒက်၊ ဇူလိုင် ၃၀

အီရတ်ဝန်ကြီးချုပ် မိုဟာမက် ရှီယာ အယ် ဆူဒါနီ (Mohammed Shia al-Sudani) သည် အမေရိကန်၊ အီရန်တို့ နှင့် ဆက်ဆံရေးကောင်းမွန်ဖို့ ကြိုးပမ်းနေသည်ဟု အေပီမှ ဖော်ပြခဲ့သည်။

အီရတ်သည် အမေရိကန်နှင့်သာမက အမေရိကန်၏ ရန်ဘက်ဖြစ်သည့် အီရန်နှင့်ပါ ဆက်ဆံရေး ရှိနေသဖြင့် ကြားညှပ်နေသော အနေအထားသို့ ရောက်ရှိနေသည်။

အထူးသဖြင့် ပြီးခဲ့သည့်လက အစ္စရေး၊ အမေရိကန်တို့နှင့် အီရန်ကြား စစ်ပွဲဖြစ်ပွားခဲ့ချိန်က အမေရိကန်သည် အီရန်၏ နျူကလီးယားစက်ရုံများကို တိုက်ခိုက်ခဲ့စဉ် အီရတ်သည် ကြားနေရပ်တည်ခဲ့ရသည်။

အယ်ဆူဒါနီက သူသည် အီရန်နှင့် မဟာမိတ်ဖွဲ့ထားသည့်  အီရတ်၏ လက်နက်ကိုင်အဖွဲ့များကို ပဋိပက္ခအတွင်းသို့ ဝင်ရောက်ခြင်း မပြုရန် နိုင်ငံရေးနှင့် စစ်ရေးဖိအားများ အသုံးပြုခဲ့ရသည်ဟု ဆိုသည်။

အီရန်နဲ့ အမေရိကန် စစ်ပွဲပြသထားစဉ်

အေပီသတင်းဌာနနှင့်ပြုလုပ်သည့် အင်တာဗျူးတွင် အယ်ဆူဒါနီက သူသည် ဒုတိယသက်တမ်းအတွက် ပြန်လည် ရွေးကောက်ခံရန် ပြင်ဆင်နေချိန်၌ အီရတ်၏ လက်နက်ကိုင်အဖွဲ့များကို ပဋိပက္ခထဲသို့ မဝင်စေလိုသဖြင့် ထိုကဲ့သို့ လုပ်ဆောင်ခြင်းဖြစ်ကြောင်း ပြောကြားခဲ့သည်။

ထို့ကြောင့် ၂၀၂၂ ခုနှစ်တွင် ဝန်ကြီးချုပ်အဖြစ် အာဏာရစေရန် ကူညီပေးခဲ့သည့် အီရန်၏ ကျောထောက်နောက်ခံ ပြု ပါတီများနှင့် ဆက်ဆံရေးကို ထိန်းသိမ်းထားသလို တစ်ဖက်တွင်လည်း အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့နှင့်လည်း ဆက်ဆံရေးနီးစပ်အောင် ကြိုးပမ်းနေခြင်း ဖြစ်သည်ဟု အယ်ဆူဒါနီက ပြောသည်။

အစ္စရေး၊ အမေရိကန်နှင့် အီရန်တို့ စစ်ပွဲဖြစ်ပွားခဲ့ချိန်က အီရန်သည် အီရတ်နိုင်ငံရှိ အမေရိကန်စစ်စခန်းများကို ဒုံးကျည်များ၊ ဒရုန်းများဖြင့် တိုက်ခိုက်ခဲ့ရာတွင် အီရတ်အစိုးရက လုံခြုံရေး အကြောင်းပြချက်ဖြင့် အီရန်၏ ဒရုန်းများ၊ ဒုံးကျည်များကို ၂၉ ကြိမ် ကြားဖြတ်ပစ်ချပေးခဲ့သည်။

“အစ္စရေးအစိုးရရဲ့ မူဝါဒကိုလည်း ကျနော်တို့ သိပါတယ်။သူတို့က စစ်ပွဲကို ချဲ့ထွင်ချင်တာပါ။ အဲဒါကြောင့် ကျနော်တို့က အီရတ်ကို ဘယ်နိုင်ငံကမှ ပစ်မှတ်မထားနိုင်အောင် လုပ်ဆောင်ခဲ့ရာတာ ဖြစ်ပါတယ်”ဟု အယ်ဆူဒါနီက ပြောကြားခဲ့သည်။

ထို့ပြင် ၎င်း၏ အစိုးရသည် အီရန်ကို စိတ်ထိန်းရန်နှင့် ဆွေးနွေးညှိနှိုင်းမှုများ ပြုလုပ်ရန် တိုက်တွန်းခဲ့ရသည်ဟု လည်း အယ်ဆူဒါနီက ပြောကြားခဲ့သည်။

Source: အေပီ

CNI International News

ဝါရှင်တန်၊ ဇူလိုင် ၃၀

အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့သည် မြန်မာနိုင်ငံရှိ မြေရှားသတ္တုရရှိရေး အတွက် ကချင်လွတ်လပ်ရေးတပ်မတော်(KIA)နှင့် ဆွေးနွေးဖွယ်ရှိသည်ဟု ရိုက်တာမှ ဖော်ပြခဲ့သည်။

ဒေါ်နယ်ထရမ့်သည် မြန်မာနိုင်ငံအပေါ် ထားရှိသည့် အမေရိကန်၏ မူဝါဒကို ပြောင်းလဲစေမည့် အဆိုပြုချက် များကို စဉ်းစားသုံးသပ်နေကြောင်း သတင်းရင်းမြစ် ၄ ဦးက ပြောကြားခဲ့သည်ဟု ရိုက်တာမှ ရေးသားခဲ့သည်။

အမေရိကန်သည် မြန်မာနိုင်ငံ၏ မြေရှားသတ္တုများ တရုတ်ထံသို့ ရောက်ရှိနေသည့် အခြေအနေကို လမ်းကြောင်း လွှဲပြီး ထိုမြေရှားသတ္တုများကို အမေရိကန်က ရယူရန် ရည်ရွယ်ထားသည်ဟုလည်း ထိုအကြောင်းအရာနှင့် နီးစပ် သည့် သတင်းရင်းမြစ် ၄ ဦးက ပြောကြားခဲ့သည်။

မြန်မာနိုင်ငံမှာ မြေရှားသတ္တု တူးဖော်မှုကို ပြသထားစဉ်

သို့သော် သယ်ယူပို့ဆောင်ရေးတွင် ကြီးမားသည့် စိန်ခေါ်မှုများရှိနေကြောင်း ကျွမ်းကျင်သူများက ထောက်ပြကြ သည်။

အလားတူ ထိုကိစ္စနှင့် ပတ်သက်ပြီး အပြီးသတ် ဆုံးဖြတ်ချက်ကို ချမှတ်ရခြင်း မရှိသေးပေ။

အမေရိကန်အနေဖြင့် မြန်မာနိုင်ငံ၏ မြေရှားသတ္တုများကို ရယူရန် ဆုံးဖြတ်ခဲ့မည်ဆိုလျှင် ထိုသတ္တုများ တည်ရှိ သည့် နယ်မြေများကို ထိန်းချုပ်ထားသော တိုင်းရင်းသားလက်နက်ကိုင်များနှင့် သဘောတူညီချက် ရရှိရန် လိုအပ် မည်ဖြစ်သည်။

ထရမ့်အစိုးရအဖွဲ့ကို အဆိုပြုထားသည့် အဆိုပြုချက်များအနက် တစ်ချက်မှာ မြန်မာ့တပ်မတော် အနေဖြင့် ကချင်လက်နက်ကိုင်အဖွဲ့(KIA)နှင့် ငြိမ်းချမ်းရေးယူရန် ဆွေးနွေးမှုများ ပြုလုပ်အောင် တိုက်တွန်းရေးဖြစ်ပြီး အခြားအဆိုပြုချက် တစ်ခုမှာ အမေရိကန်အနေဖြင့် KIA နှင့် တိုက်ရိုက် ဆွေးနွေးရေးဖြစ်သည်။

လက်ရှိတွင် အမေရိကန်သည် ၂၀၂၁ ခုနှစ်က မြန်မာနိုင်ငံတွင် အာဏာကို ရယူခဲ့သည့် မြန်မာ့တပ်မတော်နှင့် တိုက်ရိုက် ဆွေးနွေးမှုများ ပြုလုပ်ခြင်း မရှိသေးပေ။

မြန်မာနိုင်ငံမှာ မြေရှားသတ္တု တူးဖော်နေမှုကိုတွေ့ရစဉ်

ထရမ့်အစိုးရအဖွဲ့အား ထိုအဆိုပြုချက်များကို အမေရိကန်စီးပွားရေး လော်ဘီတစ်ဦးက တင်သွင်းခဲ့ခြင်းဖြစ်သည် ဟု သတင်းရင်းမြစ်များက ပြောကြားခဲ့သည်။

ထိုစီးပွားရေးလော်ဘီသည် KIA နှင့် အခြားပြည်ပ ကျွမ်းကျင်သူများနှင့် သွယ်ဝိုက်ဆွေးနွေးမှုများ ပြုလုပ်ခဲ့ကြောင်း သတင်းရင်းမြစ်များက ပြောကြားခဲ့သည်။

ထိုနွေးမှုများအကြောင်းသည် ယခင်က ထွက်ပေါ်ခဲ့ခြင်းမရှိပေ။

သတ္တု ၁၇ မျိုးပါဝင်သည့် မြေရှားသတ္တု အုပ်စုသည် နည်းပညာမြင့် ပစ္စည်းများ၊ တိုက်လေယာဉ်များနှင့် အဆင့်မြင့် လက်နက်စနစ်များ ပြုလုပ်ရာတွင် မရှိမဖြစ် အသုံးပြုရသည့် သတ္တုအမျိုးအစားများဖြစ်သည်။

ရိုက်တာသတင်းဌာန၏ ဖော်ပြချက်နှင့်ပတ်သက်ပြီး မြန်မာ့တပ်မတော်နှင့် KIA  တို့က မှတ်ချက်ပေးရန် တောင်းဆိုချက်ကို တုံ့ပြန်ခဲ့ခြင်းမရှိပေ။

Source: ရိုက်တာ

CNI International News

ဂိုလ်ပါရ ၊ ဇူလိုင် ၂၉

အိန္ဒိယနိုင်ငံ အာသံပြည်နယ်တွင် ရွေးကောက်ပွဲ မပြုလုပ်ခင် မကြာသေးမီ သီတင်းပတ်များအတွင်း မူဆလင် အိမ်ပေါင်း ၃၄၀၀ ကျော်ကို ဘူဒိုဇာများဖြင့် ဖျက်ဆီးခဲ့သည်ဟု ရိုက်တာမှ ဖော်ပြခဲ့သည်။

ထို့နောက် ဘင်္ဂါလီ စကားပြောသည့် မွတ်ဆလင် မိသားစုများကို တရားမဝင် နေထိုင်သူများအဖြစ် စွပ်စွဲခဲ့ကြ သည်။

လာမည့်နှစ် အစောပိုင်းတွင် အိန္ဒိယဝန်ကြီးချုပ် မိုဒီ (Narendra Modi) ၏ ဟိန္ဒူအမျိုးသားရေး BJP ပါတီ ရွေးကောက်ပွဲ နောက်တစ်ကြိမ် ဝင်ရောက်ယှဉ်ပြိုင်မည့် အာသံပြည်နယ်၌ မွတ်ဆလင်များ၏ နေအိမ်များကို ဖျက်ဆီးနေခြင်းသည် ဘင်္ဂါလီ ဘာသာစကား ပြောသည့် မွတ်ဆလင်များအား ဘင်္ဂလားဒေ့ရှ်မှ တရားမဝင် ဝင်ရောက်လာသူများဟု တံဆိပ်ကပ်ပြီး နှိမ်နင်းနေချိန်နှင့်လည်း တိုက်ဆိုင်နေသည်။

လုံခြုံရေးအဖွဲ့ဝင်များကို တွေ့ရစဉ်

၂၀၂၁ ခုနှစ်၊ မေလတွင် အာသံပြည်နယ် ဝန်ကြီးချုပ်အဖြစ် ရွေးကောက်ခံခဲ့သည့် ဟီမန်တာ ဘစ္စဝါ ဆာမာ (Himanta Biswa Sarma) ၏ ပြည်နယ်အစိုးရအဖွဲ့သည် လူပေါင်း ၅၀,၀၀၀ ခန့်ကို ပြည်နယ်အတွင်းမှ နှင်ထုတ်မှုကို ကြီးကြပ်ခဲ့ပြီး အများစုမှ ဘင်္ဂါလီမွတ်ဆလင်များဖြစ်သည်။

အချို့ကို တရားရေးအရ ပြန်လည်သုံးသပ်ခြင်းမရှိ၊ နိုင်ငံသား မဟုတ်သည့် အထောက်အထားများကို စစ်ဆေး ခြင်းမရှိဘဲ ဘင်္ဂလားဒေ့ရှ် နယ်စပ်တစ်လျှောက် နှင်ထုတ်ခဲ့ခြင်းဖြစ်သည်ဟု ဆိုသည်။

ထိုလုပ်ဆောင်မှုများသည် ရွေးကောက်ပွဲ မတိုင်မီ လူဝင်မှုနှင့် လူမျိုးရေးတို့အပေါ် မဲဆန္ဒရှင်များကြား အယူဝါဒ ကွဲပြားမှု ဖြစ်စေမည့် နိုင်ငံရေးစေ့ဆော်ချက်ဖြင့် ပြုလုပ်ခဲ့ခြင်းဖြစ်သည်ဟု ဝေဖန်ရေးသမားများနှင့် အတိုက်အခံ ပါတီများက ယူဆခဲ့ကြသည်။

လူ့အခွင့်အရေး လေ့လာစောင့်ကြည့်ရေးအဖွဲ့နှင့် နိုင်ငံတကာ စောင့်ကြည့်သူများက အိန္ဒိယနိုင်ငံသားများ အပါအဝင် ရာနှင့်ချီသည့် မွတ်ဆလင်များသည် အာသံ (Assam) ၊ ဂူဂျာရတ် (Gujarat) ၊ မဟာရက်ရှ်ထရာ (Maharashtra) ၊ ရာဂျက်စ်သန် (Rajasthan) နှင့် အခြား ပြည်နယ်များမှတဆင့် ဘင်္ဂလားဒေ့ရှ်သို့ တရားမဝင် ပို့ဆောင်ခံခဲ့ရသည်ဟု ပြောကြားခဲ့သည်။

၂၀၂၅ ခုနှစ်၊ ဧပြီလမှ ဇူလိုင်လအတွင်း လူပေါင်း ၁၈၈၀ ခန့် နှင်ထုတ်ခံခဲ့ရပြီး ၎င်းတို့အနက် အိန္ဒိယနိုင်ငံသား ဖြစ်ကြောင်း ခိုင်လုံသည့် သက်သေ အထောက်အထားများ ပိုင်ဆိုင်ထားသူများလည်း ပါဝင်ကြောင်း ဝါရှင်တန်ပို့စ် မှ ဖော်ပြခဲ့သည်။

အာသံပြည်နယ်၏ ပြည်ပနိုင်ငံသားရေးရာခုံအဖွဲ့သည် ၂၀၂၅ ခုနှစ် အစောပိုင်းကလည်း လူပေါင်း ၁၆၅,၀၀၀ ကျော်ကို ဘောင်မဝင်သည့် ရွှေ့ပြောင်းနေထိုင်သူများအဖြစ် ကြေညာခဲ့ပြီး အများစုသည် ဘင်္ဂါလီ မွတ်ဆလင် များဖြစ်သည်

Source: ရိုက်တာ 

CNI International News

ပြုံယမ်း၊ ဇူလိုင် ၂၉

တောင်ကိုရီးယား၏ ပြန်လည်ပေါင်းစည်းရေး အဆိုပြုချက်ကို စိတ်မဝင်စားကြောင်း မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) ၏ ညီမဖြစ်သည့် ကင်မ်ယိုဂျုံ (Kim Yo Jong) က ပြောကြားခဲ့ သည်ဟု ရိုက်တာမှ ဖော်ပြခဲ့သည်။

မြောက်ကိုရီးယားသည် တောင်ကိုရီးယား၏ လစ်ဘရယ်သမ္မတ လီဂျေမြောင် (Lee Jae Myung) ၏ ငြိမ်းချမ်းရေး ချဉ်းကပ်မှုကို တုံ့ပြန်သည့်အနေဖြင့် သူမက အထက်ပါအတိုင်း ပြောကြားလိုက်ခြင်း ဖြစ်သည်။

တောင်နှင့် မြောက်ကိုရီးယားတို့သည် နယ်စပ်ဒေသများရှိ ၎င်းတို့၏ ဝါဒဖြန့် အသံချဲ့စက်များကို ပိတ်ခဲ့ပြီးနောက် ဆွေးနွေးညှိနှိုင်းဖွယ်ရှိသော အလားအလားများကို တောင်ကိုရီးယားမှ မျှော်လင့်နေသည့်တိုင် မြောက်ကိုရီးယားက ၎င်း၏ တင်းမာသည့် သဘောထားကို ပြသခဲ့ခြင်းဖြစ်သည်။

မြောက်ကိုရီးယားက ခေါင်းဆောင် ကင်မ်ဂျုံအန်ကို တွေ့ရစဉ်

မြောက်ကိုရီးယား အာဏာရပါတီ၏ ထိပ်သီး အရာရှိတစ်ဦးဖြစ်သော ကင်မ်ယိုဂျုံက အမေရိကန်နှင့် ဆက်ဆံရေး တိုးမြှင့်နေသည့် တောင်ကိုရီးယားသမ္မတ လီ၏ လုပ်ဆောင်ချက်များသည် ယခင် သမ္မတ၏ သဘောထားနှင့် အတူတူပင်ဖြစ်ကြောင်း ပြောကြားခဲ့သည်။

“တောင်ကိုရီးယားက စကားလုံးလေးတွေသုံးပြီး သူတို့လုပ်ရပ်တွေကို ဖုံးကွယ်နိုင်လိမ့်မယ်လို့ ထင်ထားတယ် ဆိုရင် အမှားကြီး မှားပါလိမ့်မယ်” ဟု ကင်မ်ယိုဂျုံက ပြောကြားခဲ့ကြောင်း မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

ဇွန်လ ၄ ရက်က အာဏာရလာခဲ့သည့် တောင်ကိုရီးယားသမ္မတ လီသည် မကြာသေးမီ နှစ်များအတွင်းက တင်းမာမှုများ မြင့်တက်ခဲ့‌သော မြောက်ကိုရီးယားနှင့် ဆက်ဆံရေးကို တိုးတက်ကောင်းမွန်စေရန် လုပ်ဆောင် မည်ဟု ကတိပြုထားသည်။

လီသည် ၎င်း၏ သဘောထား ပျော့ပျောင်းမှုကို ပြသသည့်် အနေဖြင့် နယ်စပ်ဒေသရှိ မြောက်ကိုရီးယားအား ဆန့်ကျင်သော ဝါဒဖြန့်မှုများ ထုတ်လွှင့်နေသည့် အသံချဲ့စက်များကိုပိတ်ခြင်း၊ မြောက်ကိုရီးယားဘက်သို့ ဝါဒဖြန့် မိုးပျံပူဖောင်းများ လွှတ်တင်နေခြင်းကို တားမြစ်ခြင်းတို့ ပြုလုပ်ခဲ့သည်။

ပြန်လည်ပေါင်းစည်းရေးဝန်ကြီးဌာန၏ ပြောရေးဆိုခွင့်ရှိသူ ကူးဗြောင်ဆမ်ကို တွေ့ရစဉ်

ကင်မ်ယိုဂျုံကမူ လီ၏ အထက်ပါ လုပ်ဆောင်ချက်များသည် တောင်ကိုရီးယား၏ ဆိုးရွားသည့် လှုပ်ရှားမှုများကို ဖုံးကွယ်နိုင်လိမ့်မည် မဟုတ်ကြောင်း၊ ထိုလုပ်ဆောင်ချက်များသည် မိမိတို့ လေ့လာရလောက်သည်အထိ တန်ဖိုး မရှိကြောင်း ပြောကြားခဲ့သည်။

ကင်မ်ယိုဂျုံ ၏ မှတ်ချက် စကားများသည် မကြာသေးမီ နှစ်များအတွင်းက တောင်နှင့် မြောက်ကိုရီးယား နိုင်ငံများ ကြား ထိပ်တိုက်တွေ့သည့် မူဝါဒများ၏ အကျိုးဆက်များဖြစ်ပြီး နှစ်နိုင်ငံကြား ယုံကြည်မှု ပျက်ယွင်းနေသည်ကို ပြသရာရောက်ကြောင်း တောင်ကိုရီးယား၏ ပြန်လည်ပေါင်းစည်းရေးဝန်ကြီးဌာနက ပြောကြားခဲ့သည်။
 
တောင်ကိုရီးယားသည် မြောက်ကိုရီးယားနှင့် ပြန်လည်ပေါင်းစည်းရေးနှင့် ပူးပေါင်းဆောင်ရွက်ရေးတို့အတွက် အားထုတ်ကြိုးပမ်းမှုများကို ဆက်လက် လုပ်ဆောင်သွားမည်ဟုလည်း ပြန်လည်ပေါင်းစည်းရေးဝန်ကြီးဌာန၏ ပြောရေးဆိုခွင့်ရှိသူ ကူးဗြောင်ဆမ် (Koo Byoung-sam) က ပြောကြားခဲ့သည်။

Source: Reuters

CNI International News

ဘန်ကောက်၊ ဇူလိုင် ၂၉

ထိုင်းစစ်တပ်သည် ကမ္ဘောဒီးယားနှင့် နယ်စပ်ဒေသတွင် ဖြစ်ပွားခဲ့သည့် တိုက်ခိုက်မှုများ၌ ဓာတုလက်နက်များ အသုံးမပြုခဲ့ကြောင်း ထိုင်းနိုင်ငံခြားရေးဝန်ကြီးဌာနက ငြင်းဆိုခဲ့သည်ဟု The Nation မှ ဖော်ပြခဲ့သည်။

ကမ္ဘောဒီးယားက ထိုင်းစစ်တပ်သည် ဓာတုလက်နက်များ အသုံးပြုခဲ့သည်ဟု စွပ်စွဲခဲ့ခြင်းသည် အမှန်တရားကို တမင်တကာ ပုံဖျက်ပြောဆိုခြင်းဖြစ်သည်ဟု နိုင်ငံခြားရေးဝန်ကြီးဌာန၏ ညွှန်ကြားရေးမှူးချုပ် နစ်ခွန်းဒက်ဂျ် ဘာလန်ကူရာ (Nikorndej Balankura) က ပြောကြားခဲ့သည်။

ထိုစွပ်စွဲချက်များသည် အဓိပ္ပာယ်မရှိဘဲ နိုင်ငံတကာ အသိုင်းအဝိုင်းတွင် ထိုင်းနိုင်ငံ၏ ဂုဏ်သိက္ခာကို ကျဆင်းစေ ရန် ရည်ရွယ်ခြင်းဖြစ်ကြောင်း နစ်ခွန်းဒက်ဂျ်က ပြောသည်။

နိုင်ငံခြားရေးဝန်ကြီးဌာန၏ ညွှန်ကြားရေးမှူးချုပ် နစ်ခွန်းဒက်ဂျ် ဘာလန်ကူရာကို တွေ့ရစဉ်

ထိုင်းနိုင်ငံသည် ဓာတုလက်နက်များ ကွန်ဗန်းရှင်း  (CWC) အရ မိမိတို့၏ တာဝန်များကို အပြည့်အဝ လေးစား လိုက်နာကြောင်း၊ ဓာတုလက်နက်များကို မည်သည့်နေရာတွင် မည်သူကမှ မည်သည့် အကြောင်းပြချက်နှင့်မဆို အသုံးပြုခြင်းကို ရှုတ်ချကြောင်း ၎င်းက ပြောကြားခဲ့သည်။

ထိုင်းသည် ၂၀၀၃ ခုနှစ်က CWC အဖွဲ့ဝင် ဖြစ်ခဲ့ပြီးနောက်ပိုင်း ဓာတုလက်နက်များ ပိတ်ပင်တားမြစ်ရေးအဖွဲ့ (OPCW) နှင့် အခြား သဘာတူညီချက်များနှင့်အတူ နီးကပ်စွာ ပူးပေါင်းဆောင်ရွက်ခဲ့ပြီး မိမိတို့၏ ကတိတည်မှုကို ပြသခဲ့ကြောင်း ၎င်းက ဆိုသည်။

ယခုကဲ့သို့ မှန်ကန်မှု မရှိသည့် စွပ်စွဲချက်များသည် နှစ်နိုင်ငံ ဆွေးနွေးညှိနှိုင်းမှုများကို ထိခိုက်စေပြီး နိုင်ငံတကာ တွင် ထိုင်း၏ ဂုဏ်သိက္ခာအား ကျဆင်းစေရန် ရည်ရွယ်ချက်ရှိရှိ လုပ်ဆောင်ခြင်း ဖြစ်သည်ဟုလည်း  နစ်ခွန်းဒက်ဂျ် က ပြောကြားခဲ့သည်။

Source: The Nation