CNI International News

ဘန်ကောက်၊ နိုဝင်ဘာ ၂၀

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် လက်ရှိတွင် တရားရေးနှင့် နိုင်ငံရေး ပြဿနာများဖြင့် ရင်ဆိုင်နေရခြင်းကြောင့် ဖြူးထိုင်းပါတီကို အန္တရာယ်ဖြစ်လာစေနိုင်သည်ဟု ကျွမ်းကျင်သူများက သုံးသပ်နေကြောင်း ဘန်ကောက်ပို့စ်မှ ဖော်ပြခဲ့သည်။

သက်ဆင်သည် အမှုများစွာဖြင့် ရင်ဆိုင်နေရခြင်းကြောင့် ထောင်ဒဏ် နှစ်ရှည် ချမှတ်ခံရဖွယ်ရှိနေသည်။

ကျွမ်းကျင်သူများကမူ သက်ဆင်သည် လာမည့် အထွေထွေရွေးကောက်ပွဲ ကာလထက် ကျော်လွန်ပြီး အကျဉ်းချ ခံရဖွယ် ရှိနေသဖြင့် ဖြူးထိုင်းပါတီ၏ ညွန့်ပေါင်းအစိုးရအဖွဲ့ ဦးဆောင်နိုင်စွမ်းကို ထိခိုက်စေလိမ့်မည်ဟု သုံးသပ် ထားကြသည်။

နိုဝင်ဘာ ၁၇ ရက်က သက်ဆင်နှင့် ၎င်း၏ မိသားစုသည် အကြီးစား ထိုးနှက်ချက် ၂ ခုဖြင့် ရင်ဆိုင်ခဲ့ရသည်။

ဖြူးထိုင်းပါတီ ခေါင်းဆောင်ဖြစ်ခဲ့သူ သက်ဆင်သမီး ပေတုန်တန်ကို တွေ့ရစဉ်

ပထမတစ်ခုမှာ အစိုးရရှေ့နေများက သက်ဆင်အား တော်ဝင်အသရေဖျက်မှု စွဲချက်များမှ တရားသေ လွှတ်ပေး ခဲ့သည့် တရားရုံး၏ ဆုံးဖြတ်ချက်ကို အယူခံဝင်မည်ဟု ပြောကြားခဲ့ခြင်းဖြစ်သည်။

ထိုအမှုတွင် သက်ဆင်သည် ၂၀၁၅ ခုနှစ်က တောင်ကိုရီးယား သတင်းစာ တစ်စောင်နှင့် ပြုလုပ်ခဲ့သည့် အင်တာဗျူး၌ ထိုင်းဘုရင် မိသားစုကို ဝေဖန်သည့် မှတ်ချက်များ ပြောကြားခဲ့သဖြင့် တော်ဝင် အသရေဖျက်မှု စွဲချက်များဖြင့် ရင်ဆိုင်ခဲ့ရခြင်း ဖြစ်သည်။

ဒုတိယတစ်ခုမှာ တရားရုံးချုပ်က သက်ဆင်အား ဘတ် ၁၇ ဒသမ ၆ ဘီလျံ အခွန်ပေးဆောင်ရန် စီရင်ချက်ချခဲ့ခြင်း ဖြစ်သည်။

၂၀၀၆ ခုနှစ်က သက်ဆင်၏ Shin Corp ကုမ္ပဏီ ရှယ်ယာများဖြင့် ဆက်နွှယ်ပြီး အခွန်ဆောင်ရန် တရားရုံးချုပ်က အမိန့်ချခဲ့ခြင်းဖြစ်သည်။

အစောပိုင်း စီရင်ချက်များတွင် သက်ဆင်သည် အသာရခဲ့သော်လည်း တရားရုံးချုပ်က ထိုစီရင်ချက်များကို ပလပ် ခဲ့ပြီး သက်ဆင်၏ အမှု၌ အခွန်ဌာန၏ အခွန် လေ့လာဆန်းစစ်ချက်သည် တရားဝင်မှုရှိကြောင်း ကြေညာခဲ့သည်။

ဖြူးထိုင်းပါတီ ခေါင်းဆောင်ဖြစ်ခဲ့သူ သက်ဆင်သမီး ပေတုန်တန်ကို တွေ့ရစဉ်

ထိုကဲ့သို့ တရားရေးပြဿနာများသည် ဖြူးထိုင်းပါတီ၏ ရွေးကောက်ပွဲ ပြင်ဆင်မှုများကို အားနည်းစေနိုင်ပြီး ဖြူးထိုင်းပါတီအတွင်းမှ ဩဇာကြီးမားသည့် နိုင်ငံရေးသမားများသည် ပါတီမှ ထွက်ခွာဖွယ်ရှိကြောင်း နိုင်ငံရေး လေ့လာသုံးသပ်သူဖြစ်သော ပီချိုင်း ရတ်နာတီလာကာ နာ ဘူကက် (Phichai Ratnatilaka Na Bhuket) က ပြောကြားခဲ့သည်။

ဖြူးထိုင်းပါတီ၏ ဩဇာကြီးမားသည် နိုင်ငံရေးသမားများသည် လာမည့် ရွေးကောက်ပွဲတွင် နောက်တစ်ကြိမ် ပြန်လည် ရွေးကောက်ခံရရန် အခွင့်အလမ်း နည်းပါးနေမည်ကို စိုးရိမ်နေကြသည်ဟု ၎င်းက ဆိုသည်။

လူထုသဘောထား ကောက်ယူမှု စစ်တမ်းများတွင်လည်း ဖြူးထိုင်းပါတီ၏ လူကြိုက်များမှုနှုန်းသည် ကျဆင်း နေပြီး လာမည့် ရွေးကောက်ပွဲတွင် လွှတ်တော်နေရာ ၅၀ သို့မဟုတ် ၆၀ ကိုသာ အနိုင်ရရှိလိမ့်မည်ဟု ဖော်ပြ ထားသည်။

Source: ဘန်ကောက်ပို့စ်

CNI International News

မက္ကဆီကို စီးတီး၊ နိုဝင်ဘာ ၂၀

မက္ကဆီကိုနိုင်ငံအတွင်းရှိ မူးယစ်ဆေးဝါးဂိုဏ်းများကို နှိမ်နင်းရာတွင် ကူညီပေးသည့် အနေဖြင့် အမေရိကန် တပ်ဖွဲ့များက ဝင်ရောက် တိုက်ခိုက်ပေးမည်ဆိုသော အမေရိကန်သမ္မတ ဒေါ်နယ်ထရမ့် (Donald Trump) ၏ ကမ်းလှမ်းချက်ကို မက္ကဆီကိုသမ္မတ ကလော်ဒီယာ ရှိန်းဘမ်း (Claudia Sheinbaum) က ငြင်းဆိုခဲ့သည်ဟု အေပီမှ ဖော်ပြခဲ့သည်။

ထရမ့်က အမေရိကန်နိုင်ငံအတွင်း မူးယစ်ဆေးဝါးများ ဝင်ရောက်မှုကို ရပ်တန့်ရန် ဘာပဲလုပ်ရလုပ်ရ လုပ်ဆောင် ရန် ဆန္ဒရှိကြောင်း ပြောကြားခဲ့ပြီးနောက် တစ်ရက်အကြာတွင် ရှိန်းဘမ်း၏ မှတ်ချက်စကား ထွက်ပေါ်လာခြင်း ဖြစ်သည်။

“ဒါက ဖြစ်လာမှာ မဟုတ်ပါဘူး။ သူ (ထရမ့်) က ဒီအကြောင်းကို ခဏခဏ ပြောခဲ့ဖူးပါတယ်။ မက္ကဆီကိုမှာ အမေရိကန်စစ်တပ်က ဝင်ရောက်ကူညီပေးဖို့နဲ့ ရာဇဝတ်ဂိုဏ်းတွေကို တိုက်ခိုက်ဖို့ လိုအပ်တာမှန်သမျှ ကူညီပေး မယ်လို့ ထရမ့်က ကမ်းလှမ်းခဲ့ပါတယ်။ ဒါပေမယ့် ကျမတို့ ပူးပေါင်းဆောင်ရွက်နိုင်တဲ့အကြောင်း၊ ထောက်လှမ်းရေး သတင်းတွေနဲ့ ကူညီပေးနိုင်တဲ့အကြောင်းကို ကျမက ပြန်ပြောခဲ့ပါတယ်။ ပြီးတော့ ကျမတို့ နိုင်ငံထဲမှာ ပြည်ပ အစိုးရက ဝင်ရောက် စွက်ဖက်မှာကိုတော့ လက်ခံမှာ မဟုတ်ဘူးဆိုတာကိုလည်း ကျမက ပြန်ပြောခဲ့ပါတယ်”ဟု ရှိန်းဘမ်းက ပြောကြားခဲ့သည်။

ရှိန်းဘမ်းက ထိုအကြောင်းကို ထရမ့်နှင့် အမေရိကန်နိုင်ငံခြားရေးဝန်ကြီး မာကို ရူဘီယို (Marco Rubio) တို့ကို ယခင်ကတည်းက ပြောကြားခဲ့ပြီး ၎င်းတို့ကလည်း နားလည်ကြသည်ဟု ဆိုသည်။

မက္ကဆီကိုသမ္မတ ကလော်ဒီယာ ရှိန်းဘမ်းကို တွေ့ရစဉ်

ထရမ့်ကမူ နိုဝင်ဘာ ၁၇ ရက်တွင် မက္ကဆီကိုနိုင်ငံ၏ မူးယစ်ဆေးဝါး နှိမ်နင်းရေးနှင့်ပတ်သက်ပြီး ၎င်း၏ သဘောထားကို ထုတ်ဖော် ပြောဆိုခဲ့သည်။

“မူးယစ်ဆေးဝါးတွေကို တားဆီးဖို့ မက္ကဆီကိုမှာ တိုက်ခိုက်မှုတွေ လုပ်ချင်လားလို့ မေးမယ်ဆိုရင် ကျနော်ကတော့ မူးယစ်ဆေးဝါးတွေကို ရပ်တန့်ဖို့ ဘာမဆို လုပ်ဆောင်သွားမှာပါ” ဟု ပြောကြားခဲ့သည်။

ထိုနေ့မှာပင် မက္ကဆီကို၏ အမေရိကန်သံရုံးကလည်း အမေရိကန်သည် မက္ကဆီကိုတွင် တစ်ဖက်သတ် လုပ်ရပ်ကို လုပ်ဆောင်မည် မဟုတ်ကြောင်း ပြောကြားထားသည့် ရူဘီယို၏ မှတ်ချက်ပါဝင်သော ဗွီဒီယိုတစ်ခုအား X လူမှု မီဒီယာ၌ မျှဝေခဲ့သည်။

နိုဝင်ဘာ ၁၈ ရက်တွင်လည်း ထိုအကြောင်းအရာနှင့်ပတ်သက်ပြီး အမေရိကန်နှင့် မက္ကဆီကို သံတမန်များ ဆွေးနွေးခဲ့ကြသည်။

Source: အေပီ

CNI International News

ကိယက်ဗ်၊ နိုဝင်ဘာ ၂၀

ယူကရိန်းစစ်တပ်သည် စစ်မှုထမ်းများနှင့် စစ်လက်နက်ပစ္စည်းများ လျော့နည်းလာကာ စစ်တပ်၏ တပ်ရင်းတပ်ဖွဲ့ အချို့သည် ရုရှားတပ်များ၏ ပိတ်ဆို့မှုကို ခံနေရမှုနှင့်အတူ ယူကရိန်းသည် အန္တရာယ်ဇုန်အတွင်းသို့ ဝင်ရောက်လာ ကြောင်း ကျွမ်းကျင်သူများက ပြောကြားခဲ့သည်ဟု Asia Times သတင်းတွင် ဖော်ပြထားသည်။

ရုရှားတပ်များ၏ ဝိုင်းဝန်းပိတ်ဆို့မှုကို ခံထားရသည့် ဒေသများထဲတွင် ယူကရိန်း၏ ပိုခရော့ဗ်စ် (Pokrovsk) ၊ ဇာပိုရီရှား (Zaphorize) နှင့် အခြားနေရာ ဒေသများလည်း ပါဝင်နေပြီး တစ်ချိန်တည်းမှာပင် ရုရှားက ယူကရိန်း၏ အရေးကြီးသည့် အခြေခံ အဆောက်အအုံများကို ဆက်လက် တိုက်ခိုက်နေသည်။

ထိုအခြေအနေများကြောင့် ယူကရိန်းစစ်တပ်သည် အရေးနိမ့်တော့မည့် အခြေအနေသို့ ရောက်ရှိလာသည်ကို အနောက်နိုင်ငံများမှ ထောက်လှမ်းရေးအေဂျင်စီများက နားလည်လာကြသည်ဟု ဆိုသည်။

ယူကရိန်းစစ်တပ် အနေဖြင့် ရုရှားကို မည်သည့် အချိန်အထိ တွန်းလှန်နိုင်မည်ကို သေချာစွာ မသိရသော်လည်း ယူကရိန်းစစ်သား အများအပြား စစ်တပ်ကို စွန့်ခွာထွက်ပြေးခြင်း၊ ထိခိုက်၊ သေဆုံးမှု မြင့်မားနေခြင်း အစရှိသည့် အချက်များက ယူကရိန်းနိုင်ငံသားများ ပေးဆပ်နေရသည့် စစ်ပွဲ၏ အခြေအနေကို ပြသရာရောက်နေသည်။

ယူကရိန်းစစ်သားကို တွေ့ရစဉ်

ထိုအချိန်မျိုးတွင် စစ်ပွဲကို ဥရောပအထိ ပျံ့နှံ့စေရန် စစ်ကို ချဲ့ထွင်ရေးအတွက် ရန်လိုမှုများ ဖန်တီးရန် ယူကရိန်းက အကောင်းဆုံး ကြိုးပမ်းနေပြီး အကျပ်အတည်းမှ ရုန်းထွက်ဖို့ ပြင်ဆင်နေသည်။

နေတိုးနှင့် ဥရောပနိုင်ငံများ တိုက်ရိုက် ပါဝင်လာမည်ဆိုပါက ယူကရိန်းပဋိပက္ခသည် ပိုမိုဆိုးရွား ပြင်းထန်သည့် အခြေအနေမျိုးကို ရောက်ရှိသွားမည်ဖြစ်သည်။

လက်ရှိအချိန်အထိ ရုရှားနှင့် အမေရိကန်သည် ကြားခံစစ်များတွင် ပါဝင်နေသော်လည်း တိုက်ရိုက် ထိပ်တိုက် တွေ့ခြင်း မရှိသေးပေ။

ရုရှားရော အမေရိကန်ပါ နျူကလီးယား လက်နက်အင်အားကြီး နိုင်ငံများ ဖြစ်သဖြင့် မကြုံစဖူး ထိခိုက် ပျက်စီးစေနိုင်သည့် လုပ်နိုင်စွမ်းများ ရှိနေကြသည်။

လတ်တလော အနေအထားများအရ ပဋိပက္ခကို ပြေလည်စေရန် ဆွေးနွေး ညှိနှိုင်းမှုများအတွက် စစ်မှန်သည့် အခွင့်အလမ်း မရှိပေ။

အမေရိကန်သမ္မတ ဒေါ်နယ်ထရမ့် (Donald Trump) သည် ရုရှားသမ္မတ ပူတင် (Vladimir Putin) နှင့် အလက်စကာ (Alaska) တွင် အစည်းအဝေး ပြုလုပ်ခဲ့သော်လည်း ယူကရိန်းအရေးနှင့်ပတ်သက်ပြီး မည်သည့် သဘောတူညီချက်မှ မရရှိခဲ့ပေ။

Source: DW

CNI International News

နယူးယောက်၊ နိုဝင်ဘာ ၁၉

ဂါဇာကမ်းမြောင်ဒေသကို ဘေးကင်းလုံခြုံစေရန်နှင့် အုပ်ချုပ်ရန် အမေရိကန်သမ္မတ ဒေါ်နယ်ထရမ့် (Donald Trump) ၏ အစီအစဉ်ကို ကုလသမဂ္ဂလုံခြုံရေးကောင်စီတွင် မဲခွဲဆုံးဖြတ်ခဲ့ရာ ထောက်ခံမဲ ၁၃ မဲရရှိပြီး ကန့်ကွက် မဲမရှိဘဲ အတည်ပြုခဲ့သည်ဟု DW သတင်းတွင် ဖော်ပြခဲ့သည်။

တရုတ်နှင့် ရုရှားကမူ ထိုအစီအစဉ် မဲခွဲဆုံးဖြတ်မှုကို မဲမပေးဘဲ လက်ရှောင်ခဲ့ကြသည်။

ဟားမာ့စ်အဖွဲ့ကမူ ထရမ့်၏ ဂါဇာအစီအစဉ်အား အတည်ပြုမှုကို သဘောမတူကြောင်း ပြောကြားခဲ့ပြီး ထိုအစီအစဉ်သည် ပါလက်စတိုင်းများ၏ နိုင်ငံရေးနှင့် လူသားချင်း စာနာထောက်ထားမှုဆိုင်ရာ တောင်းဆိုမှုများ၊ အခွင့်အရေးများနှင့် ကိုက်ညီမှုမရှိကြောင်း ဝေဖန်ခဲ့သည်။

အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ၏ ရုံးကမူ ကုလသမဂ္ဂ လုံခြုံရေးကောင်စီ က ထရမ့်၏ ငြိမ်းချမ်းရေး အစီအစဉ်ကို အတည်ပြုခဲ့သည့်အတွက် ထရမ့်ကို ကျေးဇူးတင်ကြောင်း ပြောကြားခဲ့ သည်။

အစ္စရေး ဝန်ကြီးချုပ် နေတန်ယာဟုနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ်

"အစ္စရေးနိုင်ငံနဲ့ ဝန်ကြီးချုပ် နေတန်ယာဟုတို့က သမ္မတထရမ့်နဲ့အတူ သူ့ရဲ့ အားကြိုးမာန်တက်ရှိပြီး သစ္စာရှိတဲ့ အဖွဲ့ကို ချီးမွမ်းဂုဏ်ပြုပါတယ်။ သမ္မတထရမ့်ရဲ့ အစီအစဉ်ဟာ ငြိမ်းချမ်းရေးနဲ့ ချမ်းသာကြွယ်ဝရေးတို့ကို ဖြစ်စေ ပါလိမ့်မယ်။ ဘာလို့လဲဆိုတော့ အဲဒီအစီအစဉ်ထဲမှာ ဂါဇာဒေသအတွင်း စစ်တပ်မထားဖို့ ၊ လက်နက်တွေ ဖြုတ်သိမ်းဖို့ နဲ့ အစွန်းရောက်မှုကို တိုက်ဖျက်ဖို့ အလေးထား ဖော်ပြထားလို့ ဖြစ်ပါတယ်" ဟု အစ္စရေးဝန်ကြီးချုပ် ရုံးက X လူမှုမီဒီယာတွင် ရေးသားခဲ့သည်။

ထို့ပြင် အစ္စရေး၏ အိမ်နီးချင်းများ အနေဖြင့်လည်း Abraham Accords အမည်ရှိ သဘောတူညီချက်ကို ပြန်လည် ပါဝင်ကြရန် နေတန်ယာဟု၏ ရုံးက တိုက်တွန်းခဲ့သည်။

Abraham Accords သည် အစ္စရေးနှင့် ဒေသတွင်း အာရပ်နိုင်ငံများကြား ဆက်ဆံရေး ပုံမှန်ပြန်လည်ထူထောင်ရန် ထရမ့်၏ ပထမ သက်တမ်းအတွင်းက လုပ်ဆောင်ခဲ့သည့် သဘောတူညီချက်ဖြစ်သည်။

 ဂါဇာဒေသကို တွေ့ရစဉ်

"အစ္စရေးက ငြိမ်းချမ်းရေးနဲ့ ချမ်းသာကြွယ်ဝရေးအတွက် မိမိတို့ရဲ့ အိမ်နီးချင်းတွေ အားလုံးကို လက်ကမ်းထား ပါတယ်။ ပြီးတော့ အစ္စရေးနဲ့ ဆက်ဆံရေး ပုံမှန်ပြန်လည် ထူထောင်ပြီး ဟားမာ့စ်အဖွဲ့နဲ့ ဟားမာ့စ်အဖွဲ့ ထောက်ခံ သူတွေကို ဒေသတွင်းက မောင်းထုတ်ရာမှာ မိမိတို့နဲ့ ပူးပေါင်းပါဝင်ကြဖို့ တိုက်တွန်းပါတယ်" ဟု ထုတ်ပြန်ချက် တွင် ဖော်ပြခဲ့သည်။

ကုလသမဂ္ဂ လုံခြုံရေးကောင်စီ အဖွဲ့ဝင် မဟုတ်သည့် ဂျာမနီနိုင်ငံ၏ ဝန်ကြီးချုပ် ယိုဟန် ဝါဒီဖူလ် (Johann Wadephul) ကလည်း ထရမ့်၏ ဂါဇာငြိမ်းချမ်းရေး အစီအစဉ်ကို ကုလသမဂ္ဂ လုံခြုံရေးကောင်စီတွင် အတည်ပြု ထုတ်ပြန်ခဲ့ခြင်းကို ကြိုဆိုကြောင်း ပြောကြားခဲ့သည်။

ထို့ပြင် ဂျာမနီသည် ဂါဇာဒေသ ပြန်လည် ထူထောင်ရေးတွင် အဓိကအခန်းကဏ္ဍမှ ပါဝင်ရန် အသင့်ရှိကြောင်း ယိုဟန်က ပြောကြားခဲ့သည်။

Source: DW

CNI News

၂၀၂၅ ခုနှစ်၊ နိုဝင်ဘာ ၁၉

မြန်မာနိုင်ငံတွင် မကြာခင် ရွေးကောက်ပွဲ ကျင်းပတော့မည် ဖြစ်သည့်အတွက် လူငယ်နှင့်လူကြီး ပေါင်းစပ်ပြီး လွှတ်တော်နိုင်ငံရေးကို တည်ဆောက်သင့်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

မြန်မာနိုင်ငံတွင် ရွေးကောက်ပွဲ အပိုင်း(၁) ကို ၂၀၂၅ ခုနှစ်၊ ဒီဇင်ဘာလ ၂၈ ရက်၌ ကျင်းပမည်ဖြစ်ပြီး ၂၀၂၆ ခုနှစ်၊ ဇန်နဝါရီ ၁၁ ရက်မှာတော့ အပိုင်း(၂)ကိုလည်းကောင်း၊ ဇန်နဝါရီလ နောက်ဆုံးပတ်တွင် အပိုင်း(၃)ကိုလည်း ကောင်း ကျင်းပသွားမည်ဖြစ်သည်။

အဆိုပါ ရွေးကောက်ပွဲသည် လက်ရှိ မြန်မာနိုင်ငံရေး အကျပ်အတည်းကို ကျော်လွှားနိုင်ရေးနှင့် လွှတ်တော်နိုင်ငံ ရေးအား ပြန်လည် အသက်ဝင်ရန် ကြိုးပမ်းခြင်းဖြစ်ပြီး လူငယ် ကိုယ်စားလှယ်လောင်းများလည်း ဝင်ရောက်ယှဉ် ပြိုင်ကြမည်ဖြစ်သည်။

လူငယ် လွှတ်တော်ကိုယ်စားလှယ်များ လွှတ်တော်ထဲ ရောက်သွားလျှင် ၎င်းတို့၏ အားသာချက်များနှင့် မိမိတို့ ဖြတ်သန်းခဲ့သည့် အတွေအကြုံများဖြင့် ပေါင်းစပ်၍ ဒီမိုကရေစီကို ပြန်လည် တည်ဆောက်ရန် လိုအပ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

လွှတ်တော်ကျင်းပနေစဉ်

၎င်းက “နိုင်ငံ‌တော်အတွက် ကောင်းနိုးရာရာပေါ့၊ ကိုယ်ကောင်းမယ်ထင်တဲ့ အရာတွေကို တင်ပြကြတဲ့အခါမှာ တစ်ခါ‌တစ်လေ အာဏာရအစိုးရ၊ အာဏာရပါတီနဲ့ မတူကွဲပြားတာမျိုး ရှိနိုင်တယ်။ အခုဟာက ကျနော်တို့ ဒီမိုကရေစီ ယုံကြည်တဲ့သူတွေအတွက်က နိုင်ငံရေး ပလက်ဖောင်းကို ပျောက်နေတာ။ အဲ့တော့ လွှတ်တော် ပေါ်လာရင်တော့ ဒီမိုကရေစီဘက်က ကိုယ်စားပြုမယ့် သူတွေရဲ့အသံတွေ လွှတ်တော်ထဲ ရောက်သွားမယ် ပြောရေးဆိုခွင့် တစ်စုံတစ်ရာ ရလာမယ် အဲ့ဒီကနေမှ တစ်ဆင့်ဆင့်နဲ့ နိုင်ငံရေးဘောင်ကို ချဲ့သွားရမယ်။ အဲ့တော့ လူငယ်တွေမှာ သူတို့ရဲ့ဆန်းသစ်တဲ့ ဒီနုပျိုတဲ့အမြင်တွေ အတွေးအခေါ်တွေရှိတယ်။ ကျနော်တို့ရဲ့ အတွေ့အကြုံ တွေ အဲ့တာတွေနဲ့ ပေါင်းစပ်ပြီးလုပ်သွားရင် ခုနက လူငယ်လူကြီး ဆိုတာလည်း သီးခြား ကွဲပြားမှုကြီး တစ်ခုလို့ တော့ မမြင်ပါဘူး။ ဒါကြောင့် အခု လူငယ်လွှတ်တော် ကိုယ်စားလှယ်တွေ လွှတ်တော်ထဲ ရောက်သွားရင် သူတို့ ဆီက အားသာချက်တွေနဲ့ ကျနော်တို့ ဖြတ်သန်းခဲ့တဲ့ အတွေ့အကြုံတွေနဲ့ ပေါင်းစပ်ဖို့ပဲ”ဟု ပြောသည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်က NLD အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ မြန်မာ့တပ်မတော်က ဖြုတ်ချ၍ အရေး ပေါ် အခြေအနေ ကြေညာထားသည်။

ထို့နောက် လွှတ်တော်နိုင်ငံရေး ပျောက်ဆုံးကာ တရားစီရင်ရေး၊ ဥပဒေပြုရေး၊ အုပ်ချုပ်ရေး စသည့် အာဏာ ၃ ရပ်သည် ဗိုလ်ချုပ်မှူးကြီးမင်းအောင်လှိုင် တစ်ဦးထံမှာ စုစည်းထားခဲ့သည်။

ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

ထို့ကြောင့် နိုင်ငံရေးပါတီများနှင့် ဒီမိုကရေစီအရေး တက်ကြွလှုပ်ရှားသူများသည် ရွေးကောက်ပွဲ ကျင်းပပြီး လွှတ်တော်နိုင်ငံရေးကို ပြန်လည် ဖော်ဆောင်နိုင်ရန်အတွက် ကြိုးပမ်းလျက်ရှိသည်။

နိုင်ငံရေးနည်းလမ်းအား ယုံကြည်ပြီး လွှတ်တော်ရွေးကောက်ပွဲမှ ဝင်လာသည့် သူများကြားထဲတွင် တူညီသည့် နည်းလမ်းတစ်ခုကလည်း ရှိနေကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “တစ်ခုကတော့ ဒါလူငယ်လူလတ် ကြားထဲမှာတင် မကပါဘူး၊ ပြည်သူတွေ ကြားထဲမှာလည်း ရွေးကောက် ပွဲက ထူးထူးခြားခြား အပြောင်းအလဲတွေ ဖြစ်ပါ့မလားဆိုတဲ့ သံသယတွေကလည်း ရှိနေတယ်၊ အဲ့တော့ ရွေးကောက်ပွဲ နည်းလမ်း၊ နိုင်ငံရေးနည်းလမ်းကို ယုံကြည်လို့ လွှတ်တော် ရွေးကောက်ပွဲကနေ ဝင်လာတဲ့သူတွေ ကြားထဲမှာကလည်း တူညီတဲ့ နည်းလမ်း တစ်ခုကလည်း ရှိနေတယ်။ ဒီရွေးကောက်ပွဲ နည်းလမ်း၊ နိုင်ငံရေး နည်းလမ်းနဲ့ ပြဿနာလေးတွေ ဖြေရှင်းမယ်ဆိုတဲ့ တူညီမှုကလည်း ရှိနေတယ်။ အဲ့အပေါ်မှာ ကျနော်တို့က မဏ္ဍိုင် ထားပြီး‌တော့ ပေါင်းစည်းဖို့ လိုတယ်။ အဲ့တော့ လူတစ်ဦးနဲ့ တစ်ဦးကြားထဲမှာ မတူကွဲပြားမှုတွေကလည်း ရှိမှာပဲ ရှိပေမယ့် အဲ့အထဲကနေပြီးတော့ပဲ ညှိနှိုင်းပြီးတော့ ဆောင်ရွက်ကြရတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်ကတော့ လက်နက်တောင်းဆိုခြင်းထက် ပါတီစုံဒီမိုကရေစီစနစ်အရ ရွေးကောက်ပွဲ ဝင်၍ လွှတ်တော်အတွင်းကနေ နိုင်ငံရေး တောင်းဆိုကြရန်၊ မိမိအနေဖြင့် ဂုဏ်သိဏ္ခာရှိသည့် လွှတ်တော်ဖြစ်ရန် ကြိုးပမ်းမည်ဖြစ်ကြောင်း ပြောကြားထားသည်။

CNI International News

ပြုံယမ်း၊ နိုဝင်ဘာ ၁၉

တောင်ကိုရီးယားနှင့် အမေရိကန်ကြား နျူကလီးယားစွမ်းအင်သုံး ရေငုပ်သင်္ဘောများ တည်ဆောက်ရန် သဘော တူညီချက် ရရှိခဲ့ခြင်းသည် နျူကလီးယား ဒိုမီနို သက်ရောက်မှု (nuclear domino effect) ဖြစ်စေလိမ့်မည်ဟု မြောက်ကိုရီးယားက နိုဝင်ဘာ ၁၈ ရက်တွင် ပြောကြားခဲ့ကြောင်း DW သတင်းဌာနမှ ဖော်ပြထားသည်။

ပြီးခဲ့သည့် သီတင်းပတ်က တောင်ကိုရီးယားသမ္မတ လီဂျေမြောင် (Lee Jae Myung) က နျူကလီးယား စွမ်းအင်သုံး ရေငုပ်သင်္ဘောများ ထုတ်လုပ်ရေး အပါအဝင် အမေရိကန်နှင့် လုံခြုံရေး၊ ကုန်သွယ်ရေး သဘောတူညီ မှု ရရှိကြောင်း ကြေညာခဲ့သည်။

တောင်ကိုရီးယားသည် ယူရေနီယံ သန့်စင်ရေး၊ အသုံးပြုပြီး လောင်စာများကို ပြန်လည် ထုတ်လုပ်ရေးတို့နှင့် ပတ်သက်ပြီး မိမိတို့၏ လုပ်ပိုင်ခွင့်ကို ချဲ့ထွင်ရေးအတွက် အမေရိကန်၏ ထောက်ခံမှုအား ရရှိခဲ့ကြောင်း လီက ပြောကြားခဲ့သည်။

တောင်ကိုရီးယားသမ္မတ လီနဲ့ အမေရိကန်သမ္မတ ထရမ့်ကို တွေ့ရစဉ်

ထိုအကြောင်းအရာနှင့်ပတ်သက်ပြီး မြောက်ကိုရီးယားက ပထမဆုံးအကြိမ်အဖြစ် မှတ်ချက်ပေးရာတွင် တောင်ကိုရီးယားနှင့် အမေရိကန်၏ နျူကလီးယား ရေငုပ်သင်္ဘော သဘောတူညီချက်သည် ထိပ်တိုက်တွေ့သည့် အန္တရာယ်များသော ကြိုးပမ်းမှုဖြစ်ကြောင်း ပြောကြားခဲ့သည်။

ထိုသဘောတူညီချက်သည် ကိုရီးယားကျွန်းဆွယ်ထက် ကျော်လွန်ပြီး အာရှ-ပစိဖိတ်ဒေသ၏ စစ်ဘက်ဆိုင်ရာ လုံခြုံရေး အခြေအနေကို ပျက်ပြားစေနိုင်ပြီး ကမ္ဘာလုံးဆိုင်ရာ မထိန်းချုပ်နိုင်သည့် နျူကလီးယား ရပ်ဝန်းကို ဖြစ်စေနိုင်ကြောင်း မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

"အမေရိကန်နဲ့ တောင်ကိုရီးယားရဲ့ ပူးတွဲ သဘောတူညီချက် မှတ်တမ်းတွေအရ အမေရိကန်နဲ့ တောင်ကိုရီးယား ဟာ မိမိတို့ကို ဆက်ပြီး ထိပ်တိုက် တွေ့သွားမယ်ဆိုတာကို ပြသရာ ရောက်နေပါတယ်။ ပြီးတော့ အမေရိကန်-တောင်ကိုရီးယား မဟာမိတ်ဟာ ပိုပြီးအန္တရာယ်များတဲ့ အခြေအနေကို ရောက်ရှိသွားပါလိမ့်မယ်" ဟု KCNA က ထုတ်ပြန်ခဲ့သည်။

နျူကလီးယား ရေငုပ်သင်္ဘောကို တွေ့ရစဉ်

တောင်ကိုရီးယား၏ နျူကလီးယား ရေငုပ်သင်္ဘောများ ပိုင်ဆိုင်မှုသည် ဒေသတွင်း နျူကလီးယားဒိုမီနို ဖြစ်စဉ်ကို ဖြစ်စေနိုင်ပြီး လက်နက်ပြိုင်ဆိုင်မှုကိုလည်း ပြင်းထန်စေကြောင်း မြောက်ကိုရီးယားအစိုးရက ပြောကြားခဲ့သည်။

နျူကလီးယားဒိုမီနို ဖြစ်စဉ်ဆိုသည်မှာ ဒေသတွင်း နျူကလီးယားနှင့် ပတ်သက်ပြီး အလားတူ ဖြစ်စဉ်များ ဆက် တိုက် ဖြစ်ပွားလာမည်ကို ဆိုလိုခြင်းဖြစ်သည်။ 

ဥပမာ ပြောရမည်ဆိုပါက နိုင်ငံတစ်နိုင်ငံ နျူကလီးယား ပိုင်ဆိုင်ခဲ့မည်ဆိုပါက နောက်ထပ် နိုင်ငံများကလည်း နျူကလီးယားပိုင်ဆိုင်ရန် ကြိုးပမ်းလာကြလိမ့်မည်ကို ဆိုလိုသည်။

မြောက်ကိုရီးယားသည် ပြီးခဲ့သည့်လက ပဲ့ထိန်းဒုံးကျည် အင်ဂျင်၏ နောက်ဆုံးအဆင့်ကို စမ်းသပ်ခဲ့ကြောင်း ကြေညာခဲ့သဖြင့် မကြာမီ ကာလအတွင်း တိုက်ချင်းပစ် ပဲ့ထိန်းဒုံးကျည် စမ်းသပ်မှုများ ပြုလုပ်ဖွယ်ရှိကြောင်း ကျွမ်းကျင်သူများက ပြောကြားခဲ့သည်။

Source: DW

CNI International News

ဝါရှင်တန်၊ နိုဝင်ဘာ ၁၉

ဗင်နီဇွဲလားနိုင်ငံတွင် အမေရိကန်တပ်ဖွဲ့များကို ထားရှိမည် မဟုတ်ဟု မပြောနိုင်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က နိုဝင်ဘာ ၁၇ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် အမေရိကန်နှင့် ဗင်နီဇွဲလားကြား စစ်ရေးတင်းမာမှုကို ရှောင်ရှားရန် ဗင်နီဇွဲလားသမ္မတ မာဒူရို (Nicolas Maduro) ထံမှ အဆိုပြုချက်များကို တိုက်ရိုက် ကြားချင်သည်ဟုလည်း ထရမ့်က ပြောကြားခဲ့သည်။

ဗင်နီဇွဲလားနိုင်ငံ၏ မြေပေါ်သို့ အမေရိကန်စစ်သားများ ထားရှိရန် ရှိ/မရှိ သတင်းထောက်များက မေးမြန်းချိန်တွင် ထရမ့်က "နိုးပါ။ ဒါကို ကျနော် မပြောနိုင်ပါဘူး။ ကျနော် ဘာကိုမှ အတတ်မပြောနိုင်ပါဘူး" ဟု ဖြေကြားခဲ့သည်။

ထို့ပြင် ၎င်းအနေဖြင့် မာဒူရိုနှင့် တိုက်ရိုက် စကားပြောရန် ရှိ/မရှိ မေးမြန်းချိန်တွင် ထရမ့်က "ကျနော် သူနဲ့ စကား ပြောဖြစ်ချင် ပြောဖြစ်ပါလိမ့်မယ်။ ကျနော်က လူတိုင်းနဲ့ စကားပြောပါတယ်" ဟု ဖြေကြားခဲ့သည်။

ဗင်နီဇွဲလားသမ္မတ မာဒူရိုနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ထရမ့်၏ ပြောကြားချက်များနှင့် ပတ်သက်ပြီး မာဒူရိုကို သတင်းထောက်များက မေးမြန်းရာတွင် မာဒူရိုက မတူကွဲပြားမှုများကို သံတမန် နည်းလမ်းဖြင့် ဖြေရှင်းသင့်ကြောင်း၊ ၎င်းအနေဖြင့် မည်သူနှင့်မဆို မျက်နှာချင်းဆိုင် ဆွေးနွေးရန် ဆန္ဒရှိကြောင်း ပြောကြားခဲ့သည်။

"အမေရိကန်မှာရှိတဲ့ ဘယ်သူပဲဖြစ်ဖြစ်၊ ဗင်နီဇွဲလားနဲ့ စကားပြောချင်တယ်၊ မျက်နှာချင်းဆိုင် တွေ့ချင်တယ်ဆိုရင် ပြဿနာမရှိပါဘူး" ဟု မာဒူရိုက နိုင်ငံပိုင်ရုပ်သံမှ အပတ်စဉ်ပြောနေကျ အစီအစဉ်တွင် ပြောကြားခဲ့သည်။

အမေရိကန်သည် ဗင်နီဇွဲလား ကမ်းလွန်နှင့် လက်တင်အမေရိကန်၏ ပစိဖိတ်ကမ်းလွန် ရေပြင်များတွင် မူးယစ် ဆေးဝါး မှောင်ခိုကူးသည်ဟု သံသယရှိသည့် သင်္ဘောများကို တိုက်ခိုက်နေသော စစ်ဆင်ရေး ပြုလုပ်နေသည်။

မာဒူရိုကမူ ကာရစ်ဘီယံပင်လယ်တွင် အမေရိကန်၏ စစ်အင်အား ထူထောင်မှုသည် ၎င်းအား ရာထူးမှ ဖြုတ်ချရန် ဖြစ်ပြီး ဗင်နီဇွဲလား၌ အစိုးရသစ်တင်ရန် ကြိုးပမ်းနေခြင်းဖြစ်ကြောင်း စွပ်စွဲခဲ့သည်။

ထရမ့်က သူသည် ကိုလံဘီယာနိုင်ငံအတွင်းရှိ ကိုကင်း စက်ရုံများကိုလည်း နှိမ်နင်းရန် ဆန္ဒရှိကြောင်း ပြောကြား ခဲ့သော်လည်း ကိုလံဘီယာကို စစ်ရေးအရ ဝင်ရောက်ရန် ရှိ/မရှိကိုတော့ ကြေညာခဲ့ခြင်း မရှိပေ။

Source: ရိုက်တာ

CNI International News

တိုကျို၊ နိုဝင်ဘာ ၁၉

တရုတ်နိုင်ငံတွင် ရှိနေသည့် ဂျပန်နိုင်ငံသားများ အနေဖြင့် လုံခြုံရေးအတွက် ကြိုတင်ပြင်ဆင်မှုများ ပြုလုပ်ထား ရန်နှင့် လူထူထပ်သော နေရာများသို့ သွားရောက်ခြင်း မပြုရန် ဂျပန်အစိုးရက သတိပေးခဲ့သည်ဟု ရိုက်တာမှ ဖော်ပြခဲ့သည်။

ထိုင်ဝမ် အရေးနှင့်ပတ်သက်ပြီး ဂျပန်ဝန်ကြီးချုပ် ဆာနာအဲ တာကာအီချီ (Sanae Takaichi) ၏ မှတ်ချက်စကား များကြောင့် ဂျပန်နှင့်တရုတ်ကြား ဆက်ဆံရေး တင်းမာနေချိန်တွင် ဂျပန်က ထိုကဲ့သို့ သတိပေးခဲ့ခြင်းဖြစ်သည်။

တရုတ်က ထိုင်ဝမ်ကို တိုက်ခိုက်မည်ဆိုပါက ဂျပန်အတွက် ခြိမ်းခြောက်မှု ဖြစ်လာနိုင်ပြီး စစ်ရေးဖြင့် တုန့်ပြန် သွားမည်ဟု တာကာအီချီက ယခုလအတွင်း လွှတ်တော်အမတ်များကို ပြောကြားခဲ့ခြင်းဖြစ်သည်။

ဂျပန်ရဲကိုတွေ့ရစဉ်

ထိုမှတ်ချက် စကားနှင့်ပတ်သက်ပြီး တရုတ်က ဂျပန်သံအမတ်ကို ဆင့်ခေါ်ခဲ့သလို ဂျပန်ကလည်း တရုတ်သံ အမတ်ကို ဆင့်ခေါ်ခဲ့ပြီး အပြန်အလှန် ဝေဖန်မှုများ ပေါ်ပေါက်လာခဲ့ကာ တရုတ်က ၎င်း၏ နိုင်ငံသားများကို ဂျပန်သို့ သွားရောက်ခြင်း မပြုရန် တိုက်တွန်းထားသည်။

ထို့နောက် ဂျပန်ထိပ်သီး အရာရှိတစ်ဦးသည် နိုဝင်ဘာ ၁၈ ရက်တွင် ဘေဂျင်း (Beijing ) ၌ တရုတ်ထိပ်သီး အရာရှိ တစ်ဦးနှင့်တွေ့ဆုံပြီး တင်းမာမှုများကို လျှော့ချရန် ကြိုးပမ်းခဲ့သော်လည်း တစ်စုံတစ်ရာ အောင်မြင်မှု ရရှိခဲ့ပုံ မပေါ် ပေ။

ဘေကျင်းမြို့တော်ရှိ ဂျပန်သံရုံးကမူ တရုတ်တွင် ရှိနေသည့် ဂျပန်နိုင်ငံသားများ အနေဖြင့် တရုတ်၏ ရိုးရာ ဓလေ့ ထုံးတမ်းများကို လေးစားရန်နှင့် တရုတ်လူမျိုးများနှင့် ဆက်ဆံရာတွင် ဂရုစိုက်ရန် ထုတ်ပြန်ခဲ့သည်။

တရုတ်နိုင်ငံသားတွေကို တွေ့ရစဉ်

ထို့ပြင် တရုတ်နိုင်ငံရှိ ဂျပန်နိုင်ငံသားများ အနေဖြင့် အပြင်ထွက်လျှင် မိမိတို့၏ ဘေးပတ်ဝန်ကျင်ကို သတိထားရန်၊ တစ်ဦးတည်း သွားလာခြင်း မပြုရန်၊ ကလေးများ ပါလာပါက ပိုပြီး သတိထားရန် ဂျပန်သံရုံးက တိုက်တွန်းခဲ့သည်။

"တကယ်လို့ သင်ဟာ သံသယဖြစ်စရာ ကောင်းတဲ့ လူတွေ ဒါမှမဟုတ် လူအုပ်စုကို မြင်တွေ့ခဲ့မယ်ဆိုရင် သူတို့ အနားကို မကပ်ပါနဲ့။ အဲဒီနေရာက ချက်ချင်းထွက်ခွာပါ" ဟု ဂျပန်သံရုံးက သတိပေးထားသည်။

တရုတ်သည် ထိုင်ဝမ်ကို ၎င်း၏ နယ်နိမိတ် တစ်ခုအဖြစ် ကြေညာထားပြီး လိုအပ်လာပါက အင်အားသုံး သိမ်းယူ မည်ဟု ကြေညာထားကာ ယခုအခါတွင် ထိုင်ဝမ် အရေးနှင့်ပတ်သက်ပြီး ဂျပန်နှင့် ဆက်ဆံရေး တင်းမာနေခြင်း ဖြစ်သည်။

Source: ရိုက်တာ

CNI International News

ဝါရှင်တန်၊ နိုဝင်ဘာ ၁၈

အမေရိကန်က ဗင်နီဇွဲလားနိုင်ငံကို ခြိမ်းခြောက်မှုများ ဆက်လက် ထုတ်ပြန်နေချိန်တွင် ကာရစ်ဘီယံပင်လယ်ပြင် အတွင်းသို့ အမေရိကန်၏ နောက်ဆုံးပေါ် တိုက်ခိုက်ရေး စစ်သင်္ဘောများ ရောက်ရှိနေပြီဖြစ်ကြောင်း အမေရိကန် ရေတပ်က နိုဝင်ဘာ ၁၆ ရက်တွင်  အတည်ပြုခဲ့သည်ဟု DW သတင်းဝက်ဘ်ဆိုက်မှ ဖော်ပြခဲ့သည်။

USS Gerald R. Ford လေယာဉ်တင် သင်္ဘောနှင့် ၎င်း၏ တိုက်ခိုက်ရေး စစ်သင်္ဘောအုပ်စုသည် Operation Southern Spear စစ်ဆင်ရေး၏ တစ်စိတ်တစ်ပိုင်းအနေဖြင့် ကာရစ်ဘီယံပင်လယ်တွင် ယခင်ကတည်းက ရောက်ရှိနေသည့် အမေရိကန်စစ်သင်္ဘောများနှင့် ပူးပေါင်းခဲ့ကြောင်း အမေရိကန်ရေတပ်က ထုတ်ပြန်ခဲ့သည်။

ထိုတိုက်ခိုက်ရေး စစ်သင်္ဘောအုပ်စုတွင် တိုက်လေယာဉ်များ၊ ပဲ့ထိန်းဒုံးကျည်တပ် ဖျက်သင်္ဘော ၂ စင်းနှင့် အခြား ထောက်ပံ့ရေး သင်္ဘောများ အပါအဝင် လေယာဉ်တစ်စင်းလည်း ပါဝင်ခဲ့သည်။

လက်ရှိတွင် အမေရိကန်သည် Operation Southern Spear စစ်ဆင်ရေးအတွက် ကာရစ်ဘီယံတွင် ဒါဇင်နှင့်ချီ သည့် ရေတပ် စစ်သင်္ဘောများ၊ သင်္ဘောသားများနှင့် မရိန်းတပ်ဖွဲ့ဝင် ၁၂,၀၀၀ ခန့်ကို ဖြန့်ကြက်ချထားသည်။

အမေရိကန်စစ်သင်္ဘောအုပ်စုကို တွေ့ရစဉ်

အမေရိကန်၏ တောင်ပိုင်းစစ်ဌာနချုပ် (SOUTHCOM) ၏ အကြီးအကဲဖြစ်သည့် ရေတပ်ဗိုလ်ချုပ်ကြီး အယ်လ်ဗင် ဟိုလ်ဆေး (Alvin Holsey) က အမေရိကန်တပ်ဖွဲ့များသည် မိမိတို့ဒေသ တည်ငြိမ်ရေးကို ဖျက်ဆီးရန် ကြိုးပမ်းနေ သည့် နိုင်ငံဖြတ်ကျော် ခြိမ်းခြောက်မှုများကို တိုက်ခိုက်ချေမှုန်းရန် အသင့်ရှိနေကြောင်း ပြောကြားခဲ့သည်။

အမေရိကန်သည် လက်တင်အမေရိကန်နိုင်ငံများ၊ အထူးသဖြင့် ဗင်နီဇွဲလားနိုင်ငံ၏ ကမ်းလွန်ရေပြင်များတွင် စစ်ရေး လှုပ်ရှားမှုများ ပြုလုပ်ခဲ့ပြီး မူးယစ်-အကြမ်းဖက်မှုကို စစ်ပွဲဆင်နွဲနေကြောင်း ကြေညာခဲ့သည်။

ထိုကဲ့သို့ မူးယစ်-အကြမ်းဖက်မှုအပေါ် စစ်ပွဲဆင်နွှဲကြောင်း ကြေညာချက် ထုတ်ပြန်ထားသဖြင့် အမေရိကန်စစ်တပ် သည် တိုက်ခိုက်မှုများအတွက် အင်အားကို အသုံးပြုခွင့်ရှိနေသည်။

ပြီးခဲ့သည့် သီတင်းပတ်များအတွင်း အမေရိကန်သည် ကာရစ်ဘီယံပင်လယ်နှင့် ပစိဖိတ်သမုဒ္ဒရာတွင် မူးယစ် ဆေးဝါးများ တင်ဆောက်လာသည်ဟု ယူဆရသည့် အသေးစား သင်္ဘောများကို တိုက်ခိုက်မှုပေါင်း အကြိမ် ၂၀ ခန့် ပြုလုပ်ခဲ့သဖြင့် လူ ၈၀ သေဆုံးခဲ့သည်။

သေဆုံးသူများသည် မူးယစ်ဆေးဝါး မှောင်ခိုကူးသူများဖြစ်ကြောင်း အမေရိကန်က ထုတ်ပြန်ခဲ့သော်လည်း ခိုင်လုံသည့် သက်သေ အထောက်အထားများကို ထုတ်ပြန်ခဲ့ခြင်းမရှိပေ။

Source: DW