CNI International News

ဝါရှင်တန်၊ ဇန်နဝါရီ ၁၀

ထိုင်းနှင့် ကမ္ဘောဒီးယားကြား အချိန်မရွေး ကျိုးပျက်လွယ်သည့် အပစ်အခတ်ရပ်စဲရေး သဘောတူညီမှုကို ခိုင်မာစေ ရန် ကြိုးပမ်းသည့် အနေဖြင့် ဒေါ်လာ ၄၅ သန်းခန့် ထောက်ပံ့ကူညီသွားမည်ဖြစ်ကြောင်း အမေရိကန်က ဇန်နဝါရီ ၉ ရက်တွင် ကြေညာခဲ့သည်ဟု CNA မှ ဖော်ပြခဲ့သည်။

အမေရိကန် နိုင်ငံခြားရေးဝန်ကြီးဌာန၏ အရှေ့အာရှဆိုင်ရာ ထိပ်သီးအရာရှိ မိုက်ကယ် ဒီဆွမ်ဘရီ (Michael DeSombre) သည် ထိုအပစ်အခတ်ရပ်စဲရေးကို ပိုမိုခိုင်မာစေမည့် နည်းလမ်းများ ဆွေးနွေးရန် ထိုင်းနှင့် ကမ္ဘောဒီး ယား နိုင်ငံများသို့ သွားရောက်ခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ထိုင်းနှင့်ကမ္ဘောဒီးယားကြား ရရှိခဲ့သည့် အပစ်အခတ် ရပ်စဲရေး သဘောတူညီချက်ကို ၎င်း၏ အောင်မြင်မှု တစ်ခုအဖြစ် အလေးပေးဖော်ပြရန် ကြိုးပမ်းနေသည်။

ဒီဆွမ်ဘရီ၏ ပြောကြားချက်အရ အမေရိကန်သည် နှစ်နိုင်ငံစလုံးတွင် အဓိက စိုးရိမ်စရာ ဖြစ်လာသည့် မူးယစ် ဆေးဝါး မှောင်ခိုကူးမှုနှင့် ဆိုက်ဘာ လိမ်လည်မှုများကို တိုက်ဖျက်ရာတွင် ကူညီရန် ဒေါ်လာ သန်း ၂၀ ကမ်းလှမ်း သွားမည်ဟု ဆိုသည်။

ထို့ပြင် မကြာသေးမီက နှစ်နိုင်ငံကြား ဖြစ်ပွားခဲ့သော နယ်စပ်တိုက်ပွဲများကြောင့် နေရပ်စွန့်ခွာ ခဲ့ရသူများကို ကူညီရန် ဒေါ်လာ ၁၅ သန်းနှင့် မိုင်းရှင်းလင်းရေး လုပ်ငန်းများအတွက် ဒေါ်လာ ၁၀ သန်း ထောက်ပံ့ပေးသွားမည် ဖြစ်ကြောင်း ဒီဆွမ်ဒဘရီက ဆိုသည်။

 မလေးရှား၊ ထိုင်း၊ ကမ္ဘောဒီးယား ဝန်ကြီးချုပ် ၃ ဦးနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“အမေရိကန်အနေနဲ့ ထိုင်းနဲ့ ကမ္ဘောဒီးယား အစိုးရနှစ်ဖွဲ့စလုံးကို ဆက်လက် ပံ့ပိုးပေးသွားမှာ ဖြစ်ပါတယ်။ သူတို့ အနေနဲ့ ကွာလာလမ်ပူ ငြိမ်းချမ်းရေး သဘောတူညီချက် (Kuala Lumpur Peace Accords) ကို အကောင်အထည် ဖော်ပြီး သူတို့ရဲ့ ပြည်သူတွေနဲ့ ဒေသတွင်း ငြိမ်းချမ်းရေး၊ ချမ်းသာကြွယ်ဝရေးနဲ့ တည်ငြိမ်မှုတွေဆီ ပြန်လည် ထိန်းသိမ်းနိုင်ဖို့ ကူညီပေးသွားမှာပါ” ဟု ဒီဆွမ်ဘရီက ပြောကြားခဲ့သည်။

ထိုင်းနှင့်ကမ္ဘောဒီးယားသည် ၂၀၂၅ ခုနှစ်၊ အောက်တိုဘာလအတွင်းက အာဆီယံ အလှည့်ကျ ဥက္ကဋ္ဌဖြစ်သော မလေးရှားနိုင်ငံသို့ ထရမ့် လာရောက်ခဲ့ချိန်က ထရမ့်၏ ရှေ့မှောက်တွင် ကွာလာလမ်ပူ ငြိမ်းချမ်းရေး သဘောတူ ညီချက်ကို လက်မှတ်ရေးထိုးခဲ့သည်။

သို့သော် ပြီးခဲ့သည့်လက တိုက်ခိုက်မှုတစ်ခု ဖြစ်ပွားခဲ့သည်။ 

ထိုတိုက်ခိုက်မှုနှင့်ပတ်သက်ပြီး ထိုင်းနှင့် ကမ္ဘောဒီးယားတို့က အပစ်အခတ်ရပ်စဲရေးစာချုပ်ကို ချိုးဖောက်ကြောင်း အပြန်အလှန် စွပ်စွဲခဲ့သည်။

ကမ္ဘောဒီးယားအစိုးရက ၎င်းတို့ပိုင်ဆိုင်ကြောင်း ကြေညာထားသည့် နယ်စပ်ဒေသအချို့မှ ထိုင်းတပ်ဖွဲ့များကို ပြန်လည် ရုပ်သိမ်းပေးရန် တောင်းဆိုထားသည်။

ထိုင်းနှင့်ကမ္ဘောဒီးယားသည် ကီလိုမီတာ ၈၀၀ ကျော် ရှည်လျားသည့် နယ်စပ်ဒေသတစ်လျှောက်တွင် နယ်နိမိတ် ပိုင်ဆိုင်မှုများ အငြင်းပွားခဲ့သည်မှာ နှစ်ပေါင်းများစွာ ကြာမြင့်ခဲ့ပြီဖြစ်သည်။

Source: CAN

CNI International News

ဘေရွတ်၊ ဇန်နဝါရီ ၉

ပြီးခဲ့သည့်နှစ်ကုန်ပိုင်းတွင် လက်ဘနွန်စစ်တပ်သည် နိုင်ငံတောင်ပိုင်းရှိ အစ္စရေးနှင့် ထိစပ်နေသော နယ်စပ် တစ်လျှောက်ရှိ ဟစ်ဇ်ဘိုလာအဖွဲ့၏ စစ်ဘက်ဆိုင်ရာ အခြေခံ အဆောက်အအုံများကို ဖျက်သိမ်းရာတွင် မည်မျှ အထိ အောင်မြင်မှု ရရှိခဲ့သည်ကို ပြသရန်အတွက် သတင်းထောက်များနှင့် နိုင်ငံတကာ သံတမန်များကို ဖိတ်ခေါ် ပြီး လေ့လာရေးခရီးစဉ်များ ပြုလုပ်ပေးခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုအချိန်အတောအတွင်း လက်ဘနွန်အစိုးရ အနေဖြင့် ဟစ်ဇ်ဘိုလာအဖွဲ့ကို လက်နက် ဖြုတ်သိမ်းနိုင်ခြင်း မရှိပါ က တိုက်ခိုက်မှုများကို ပိုမိုတိုးမြှင့် လုပ်ဆောင်သွားမည်ဟု အစ္စရေးက ခြိမ်းခြောက်ခဲ့သည်။

လက်ဘနွန် နိုင်ငံအတွင်းရှိ လက်နက်များအားလုံးကို အစိုးရ၏ ထိန်းချုပ်မှုအောက်သို့ ရောက်ရှိစေမည့် စီမံကိန်း၏ ပထမအဆင့်ကို အပြီးသတ်ရန် လက်ဘနွန်စစ်တပ်က ၂၀၂၅ ခုနှစ်ကုန်ပိုင်းကို နောက်ဆုံးထားပြီး သတ်မှတ်ခဲ့ သည်။

ဟစ်ဇ်ဘိုလာအဖွဲ့အား လက်နက်ဖြုတ်သိမ်းရေး လုပ်ငန်းစဉ်တွင် စစ်တပ်၏ လုပ်ဆောင်နိုင်စွမ်းသည် အကန့် အသတ် ရှိနေသော်လည်း စစ်တပ်၏ ကတိကဝတ်ထားမှုကို အလေးပေး ပြသရန် ယခုကဲ့သို့ လေ့လာရေး ခရီးစဉ် များကို စီစဉ်ရခြင်းဖြစ်ကြောင်း လက်ဘနွန်စစ်တပ်တပ်မှူး ရိုဒေါ့ဖ် ဟေးကယ် (Rodolphe Haykal) က ပြောကြားခဲ့သည်။

 လက်ဘနွန်အစိုးရအဖွဲ့ကိုတွေ့ရစဉ်

သို့သော် အစ္စရေး၏ စစ်ရေး လှုပ်ရှားမှုများနှင့် နယ်စပ်တစ်လျှောက် လက်ဘနွန် ပိုင်နက်များကို ကျူးကျော် သိမ်းပိုက်ထားမှုများသည် မိမိတို့စစ်တပ် ကြိုးပမ်းအားထုတ်မှုများကို ရှုပ်ထွေးစေပြီး အားနည်းစေသည်ဟု ဟေးကယ်က အပြစ်တင် ပြောဆိုခဲ့သည်။

အစ္စရေးကမူ ဟစ်ဇ်ဘိုလာအဖွဲ့သည် အစ္စရေးနယ်စပ်နှင့် နီးကပ်သော နေရာများတွင် ရှိနေဆဲဖြစ်ကြောင်း ပြောကြားခဲ့သည်။

ဟစ်ဇ်ဘိုလာအဖွဲ့၏ စစ်ရေး စွမ်းဆောင်ရည်များ ပြန်လည် တည်ဆောက်နေသည့် နှုန်းသည် လက်ဘနွန်စစ်တပ် ၏ လက်နက်ဖြုတ်သိမ်းရေး စွမ်းဆောင်ရည်ထက် ပိုမိုမြန်ဆန်နေသည်ဟုလည်း အစ္စရေးက ထုတ်ပြန်ခဲ့သည်။

သို့သော် လက်ဘနွန်တောင်ပိုင်းရှိ ကုလသမဂ္ဂ ငြိမ်းချမ်းရေး ထိန်းသိမ်းရေးတပ်ဖွဲ့ (UNIFIL) ကမူ ဟစ်ဇ်ဘိုလာ အဖွဲ့သည် ၎င်းတို့၏ အခြေခံ အဆောက်အအုံများကို ပြန်လည် တည်ဆောက်နေသည့် အထောက်အထား မရှိကြောင်း ပြောကြားခဲ့သည်။

 လက်နက်ဖြုတ်သိမ်းရေး ဒုတိယအဆင့်တွင် လက်ဘနွန်၏ လီတာနီမြစ် (Litani River) မြောက်ဘက်မှ ဆီဒွန် (Sidon) မြို့မြောက်ဘက်ရှိ အာဝါလီမြစ် (Awali River) အထိ စစ်ဆင်ရေးများကို တိုးချဲ့ဆောင်ရွက် သွားမည် ဖြစ်သည်။

“လီတာနီမြစ် မြောက်ဘက်ခြမ်းမှာတော့ လက်နက်ဖြုတ်သိမ်းမှာ မဟုတ်ဘူးလို့ ဟစ်ဇ်ဘိုလာအဖွဲ့က ရှင်းရှင်း လင်းလင်း ပြောထားပါတယ်။ ဒါဟာ နိုင်ငံရေးအရ တင်းမာမှုတွေ ဖြစ်လာနိုင်ခြေရှိတဲ့ သဘောပါပဲ” ဟု နိုင်ငံရေး ကျွမ်းကျင်သူတစ်ဦးဖြစ်သည့် ဂျိုး မက်ခရွန် ( Joe Macaron) က ပြောကြားခဲ့သည်။

Source: အယ်လ်ဂျာဇီးယား

CNI International News

အစ္စလာမ်မာဘက်၊ ဇန်နဝါရီ ၉

ပါကစ္စတန်နိုင်ငံက ဆော်ဒီထံမှ ရယူထားသော ချေးငွေ ဒေါ်လာ ၂ ဘီလီယံခန့်ကို JF-17 တိုက်လေယာဉ် အရောင်း အဝယ်အဖြစ် ပြောင်းလဲသတ်မှတ်ရန် နှစ်နိုင်ငံကြား ဆွေးနွေးလျက်ရှိကြောင်း ရိုက်တာမှ ဖော်ပြခဲ့သည်။

ပြီးခဲ့သည့်နှစ်က ဆော်ဒီနှင့် ပါကစ္စတန်ကြား အပြန်အလှန် ကာကွယ်ရေးစာချုပ် ချုပ်ဆိုခဲ့ပြီးနောက် ယခု အစီအစဉ်သည် စစ်ရေး ပူးပေါင်းဆောင်ရွက်မှုကို ပိုမိုနက်ရှိုင်းစေသည့် လုပ်ရပ်တစ်ခုဖြစ်သည်။

ပါကစ္စတန်နိုင်ငံသည် ဘဏ္ဍာရေး အကျပ်အတည်းနှင့် ရင်ဆိုင်နေရပြီး ဆော်ဒီကလည်း အရှေ့အလယ်ပိုင်းဒေသ အပေါ် အမေရိကန်၏ ကတိကဝတ်များ မရေရာမှုကြောင့် ၎င်း၏ လုံခြုံရေးဆိုင်ရာ မဟာမိတ်ဖွဲ့မှုများကို ပြန်လည် ပုံဖော်နေချိန်တွင် ယခုဆွေးနွေးမှုများသည် ကာကွယ်ရေးပူးပေါင်းဆောင်ရွက်မှုကို လက်တွေ့ အကောင်အထည် ဖော်ရန် လုပ်ဆောင်နေခြင်းဖြစ်ကြောင်း ကျွမ်းကျင်သူများက ပြောကြားခဲ့သည်။

ဆော်ဒီနှင့် ပါကစ္စတန်ကြား အပြန်အလှန် ကာကွယ်ရေးစာချုပ်ကို ကာတာနိုင်ငံ၊ ဒိုဟာ (Doha) မြို့တော်တွင် ချုပ်ဆိုခဲ့ခြင်းဖြစ်သည်။

ဆွေးနွေးမှုများနှင့် နီးစပ်သည့် သတင်းရင်းမြစ် တစ်ခုကမူ ပါကစ္စတန်သည် ဆော်ဒီထံမှ ရယူထားသည့် ချေးငွေ ဒေါ်လာ ၂ ဘီလျံကို ငွေသားဖြင့် ပြန်လည်ပေးဆပ်ရမည့်အစား ပါကစ္စတန်နှင့် တရုတ် ပူးတွဲထုတ်လုပ်သည့်  JF-17 Thunder တိုက်လေယာဉ်များအား ဒေါ်လာ ၂ ဘီလျံဖိုး ထုတ်လုပ်ပေးရမည်ဟု ဖော်ပြခဲ့သည်။

ပါကစ္စတန်နိုင်ငံက ထုတ်လုပ်နေတဲ့ တိုက်လေယာဉ်ကိုတွေ့ရစဉ် 

စုစုပေါင်း အရောင်းအဝယ် တန်ဖိုးမှာ ဒေါ်လာ ၄ ဘီလီယံ ရှိပြီး အကြွေးအဖြစ်မှ လေယာဉ် အရောင်းအဝယ်အဖြစ် ပြောင်းလဲသတ်မှတ်မည့် ဒေါ်လာ ၂ ဘီလျံအပြင် ဆော်ဒီသည် စစ်လက်နက်ပစ္စည်းများအတွက် ဒေါ်လာ ၂ ဘီလျံ ထပ်မံ သုံးစွဲသွားမည်ဖြစ်ကြောင်း အမည်မဖော်လိုသည့် သတင်းရင်းမြစ်တစ်ခုက ပြောကြားခဲ့သည်။

ထိုအကြောင်းအရာနှင့်ပတ်သက်ပြီး ပါကစ္စတန် စစ်တပ်၊ ဘဏ္ဍာရေးနှင့် ကာကွယ်ရေးဝန်ကြီးဌာနများက ရိုက်တာ သတင်းဌာန၏ မှတ်ချက်တောင်းခံမှုကို ချက်ချင်းတုန့်ပြန်ခဲ့ခြင်းမရှိဘဲ ဆော်ဒီအစိုးရမီဒီယာရုံးကလည်း တုန့်ပြန်ခဲ့ ခြင်း မရှိပေ။

ပါကစ္စတန် လေတပ်အကြီးအကဲ ဇာဟီး အာမက် ဘာဘာ ဆီဒူး (Zaheer Ahmed Baber Sidhu) သည် ယခု သီတင်းပတ်အတွင်း ဆော်ဒီသို့ သွားရောက်ခဲ့ပြီး ဆော်ဒီလေတပ်အကြီးအကဲ တာကီ ဘင် ဘန်ဒါ ဘင် အဗ္ဗဒူလာဇစ် (Turki bin Bander bin Abdulaziz) နှင့် ဆွေးနွေးမှုများ ပြုလုပ်ခဲ့သည်ဟု ပါကစ္စတန် စစ်တပ်က ဇန်နဝါရီ ၈ ရက်တွင် ထုတ်ပြန်ခဲ့သည်။

၎င်းတို့နှစ်ဦးသည် နှစ်နိုင်ငံ ကာကွယ်ရေး ပူးပေါင်းဆောင်ရွက်မှု၊ ဒေသတွင်း လုံခြုံရေး အခြေအနေနှင့် အနာဂတ် တွင် ဆက်လက် ပူးပေါင်းဆောင်ရွက်နိုင်မည့် နည်းလမ်းများကို ဆွေးနွေးခဲ့ကြောင်း ထုတ်ပြန်ချက်၌ ဖော်ပြခဲ့ သည်။

Source: ရိုက်တာ

CNI International News

ဝါရှင်တန်၊ ဇန်နဝါရီ ၉

အမေရိကန်သမ္မတ ဒေါ်နယ်ထရမ့် (Donald Trump) သည် ၎င်းအား ပြင်းထန်စွာ ဝေဖန်လေ့ရှိသည့် ကိုလံဘီယာ သမ္မတ ဂူစတာဗို ပတ်ထရို (Gustavo Petro) ကို အိမ်ဖြူတော်သို့ လာရောက်ရန် ဖိတ်ကြားခဲ့ကြောင်း DW သတင်းဝက်ဘ်ဆိုက်တွင် ဖော်ပြခဲ့သည်။

ထရမ့်သည် ဇန်နဝါရီ ၇ ရက်က ပက်ထရိုနှင့် ခင်မင်ရင်းနှီးစွာ ဖုန်းဆက်သွယ် ပြောဆိုခဲ့ပြီးနောက် ၎င်း၏ သဘောထား တင်းမာမှု လျော့ကျသွားသည့်ပုံစံကို ပြသခဲ့သည်။

“မူးယစ်ဆေးဝါး ကိစ္စတွေနဲ့ ကျနော်တို့ကြားက သဘောထား ကွဲလွဲမှုတွေကို ရှင်းပြဖို့ ဖုန်းဆက်လာတဲ့ ကိုလံဘီယာသမ္မတ ဂူစတာဗို ပက်ထရိုနဲ့ စကားပြောရတာဟာ ဂုဏ်ယူစရာပါပဲ” ဟု ထရမ့်က ၎င်း၏ လူမှုမီဒီယာ တွင် ရေးသားခဲ့သည်။

“သူ့ရဲ့ ဖုန်းခေါ်ဆိုမှုနဲ့ ပြောဆိုပုံကို ကျနော် သဘောကျပါတယ်။ မကြာခင်မှာ သူ့ကို တွေ့ဆုံဖို့ မျှော်လင့်ပါတယ်” ဟု ထရမ့်က ပြောကြားခဲ့ပြီး ပက်ထရိုကို အိမ်ဖြူတော်သို့ လာရောက်ရန် ဖိတ်ကြားခဲ့သည်ဟု ဆိုသည်။

ထရမ့်သည် ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) ကို ဖမ်းဆီးခဲ့ပြီးနောက် ကိုလံဘီယာသမ္မတ ပက်ထရိုကိုလည်း ကိုကင်းများ ထုတ်လုပ်ပြီး အမေရိကန်ကို ရောင်းချရန် ဝါသနာပါသည့် “ကျန်းမာရေး မကောင်း သော လူ”ဟု သုံးနှုန်းပြောဆိုခဲ့ပြီးနောက် ရက်ပိုင်းအကြာတွင် ယခုကဲ့သို့ လေသံပြောင်းသွားခဲ့ခြင်းဖြစ်သည်။

ကိုလံဘီယာသမ္မတ ပက်ထရိုကို တွေ့ရစဉ် 

ပြီးခဲ့သည့် ရက်ပိုင်းအတွင်း သတင်းထောက်တစ်ဦးက အမေရိကန်အနေဖြင့် ကိုလံဘီယာတွင်လည်း ဗင်နီဇွဲလား ကဲ့သို့ အလားတူ စစ်ဆင်ရေးမျိုး လုပ်ဆောင်မည် ဟုတ်၊ မဟုတ် မေးမြန်းရာတွင် ထရမ့်က “အဲဒါက ကျနော့် အတွက်တော့ သဘောကျစရာပဲ”ဟု ပြန်လည်ဖြေကြားခဲ့သည်။

လက်ဝဲယိမ်း ခေါင်းဆောင်တစ်ဦးဖြစ်သည့် ပက်ထရိုသည် ထရမ့် အာဏာပြန်ရလာခဲ့သည့် ၂၀၂၅ ခုနှစ်ကတည်းက ၎င်းတို့နှစ်ဦးကြား အပြန်အလှန် ဝေဖန်ပြောဆိုမှုများ ရှိခဲ့သည်။

ဇန်နဝါရီ ၃ ရက်က ဗင်နီဇွဲလားတွင် ပြုလုပ်ခဲ့သည့် အမေရိကန်၏ စစ်ဆင်ရေးကိုလည်း ပက်ထရိုက ပြင်းပြင်းထန် ထန် ရှုတ်ချခဲ့ပြီး ထိုလုပ်ရပ်သည် လက်တင်အမေရိက၏ အချုပ်အခြာအာဏာကို ရွံရှာဖွယ်ကောင်းစွာ ချိုးဖောက် ခြင်း ဖြစ်သည်ဟု ပြောကြားခဲ့သည်။

ထရမ့်အစိုးရကလည်း ပက်ထရိုသည် အမေရိကန်အတွင်းသို့ ကိုကင်းများ ဝင်ရောက်မှုကို တားဆီးရန် ပျက်ကွက်ခဲ့ သည်ဟု စွပ်စွဲကာ ပြီးခဲ့သည့်နှစ်က ပက်ထရိုနှင့် ၎င်း၏ မိသားစုဝင်များအပေါ်  ပိတ်ဆို့မှုများ ချမှတ်ခဲ့သည်။

ကိုလံဘီယာနိုင်ငံသည် လက်တင်အမေရိကတွင် အမေရိကန်၏ အခိုင်မာဆုံး မဟာမိတ်ဖြစ်ခဲ့သည်မှာ ကြာမြင့် လှပြီဖြစ်ပြီး အမေရိကန်၏ ပြည်ပမူးယစ်ဆေးဝါး တိုက်ဖျက်ရေး ဗျူဟာ၏ ဗဟိုချက်လည်း ဖြစ်သည်။

Source: DW

CNI International News

ကိုပင်ဟေဂင်၊ ဇန်နဝါရီ ၉

အမေရိကန်အနေဖြင့် ဂရင်းလန်းကျွန်းကို သိမ်းယူမည်ဆိုလျှင် နေတိုးမဟာမိတ်အဖွဲ့ အဆုံးသတ်သည့် သဘော ကို သက်ရောက်သွားလိမ့်မည်ဟု ဒိန်းမတ်ဝန်ကြီးချုပ် မက်တီ ဖရက်ဒရစ်ဆင် (Mette Frederiksen) က ဇန်နဝါရီ ၅ ရက်တွင် ပြောကြားခဲ့သည်ဟု DW သတင်းဝက်ဘ်ဆိုက်၌ ဖော်ပြခဲ့သည်။

ဖရက်ဒရစ်ဆင်သည် ဒီဇင်ဘာ ၆ ရက်က ဂျာမနီ၊ ပြင်သစ်၊ အီတလီ၊ ပိုလန်၊ စပိန်နှင့် ဗြိတိန် ခေါင်းဆောင်များနှင့် အတူ ပူးတွဲကြေညာချက်တစ်စောင် ထုတ်ပြန်ခဲ့ပြီး အာတိတ်ဒေသကို ဘေးကင်းအောင် ထိန်းသိမ်းရန်နှင့် ရန်သူ များကို ဟန့်တားရန် ဥရောပမဟာမိတ်များက ပိုမိုအင်တိုက်အားတိုက် ဆောင်ရွက်နေကြောင်း ထပ်လောင်း ပြောဆိုခဲ့သည်။

ဒိန်းမတ်နိုင်ငံ၏ ကိုယ်ပိုင်အုပ်ချုပ်ခွင့်ရ နယ်မြေဖြစ်သော အာတိတ်ဒေသရှိ ဂရင်းလန်းကျွန်းကို အမေရိကန်က လိုအပ်ကြောင်း  အမေရိကန်သမ္မတ ဒေါ်နယ်ထရမ့် (Donald Trump)က ပြောကြားခဲ့ပြီးနောက် ယခုကဲ့သို့ တုန့်ပြန်မှုများ ထွက်ပေါ်လာခြင်းဖြစ်သည်။

အကယ်၍ အမေရိကန်က နေတိုးအဖွဲ့ဝင် နိုင်ငံတစ်နိုင်ငံကို တိုက်ခိုက်လာပါက အမေရိကန်နှင့် ပူးပေါင်း ဆောင် ရွက်နေမှုများ အားလုံး ရပ်တန့်သွားလိမ့်မည်ဟု ဖရက်ဒရစ်ဆင်က ပြောကြားခဲ့သည်။

“တကယ်လို့ အမေရိကန်က အခြား နေတိုးအဖွဲ့ဝင်နိုင်ငံကို တိုက်ခိုက်ဖို့ ဆုံးဖြတ်ခဲ့မယ်ဆိုရင် အရာအားလုံး ရပ်တန့်သွားမှာပါ။ အဲဒီအထဲမှာ နေတိုးအဖွဲ့လည်း ပါဝင်သလို ဒုတိယကမ္ဘာစစ် နောက်ပိုင်း တည်ဆောက်ခဲ့တဲ့ လုံခြုံရေးစနစ်တွေလည်း ပျက်စီးသွားပါလိမ့်မယ်” ဟု ဖရက်ဒရစ်ဆင်က ဆိုသည်။

နေတိုးအဖွဲ့ အစည်းအဝေးကျင်းပနေစဉ်

ဂရင်းလန်းဝန်ကြီးချုပ် ယန်းစ် ဖရက်ဒရစ် နီလ်ဆင် (Jens-Frederik Nielsen) ကလည်း ၎င်းတို့အနေဖြင့် အမေရိကန်နှင့် ကောင်းမွန်သည့် ပူးပေါင်းဆောင်ရွက်မှုကို ပြန်လည်တည်ဆောက်ရန် တိုက်တွန်းခဲ့ပြီး ဂရင်းလန်း ဒေသခံများကိုလည်း ထိတ်လန့်တုန်လှုပ်ခြင်း မဖြစ်ကြရန် ပြောကြားခဲ့သည်။

“အခြေအနေက အမေရိကန်ဟာ ဂရင်းလန်းကို သိမ်းပိုက်နိုင်တဲ့ အနေအထားမျိုး မဟုတ်ပါဘူး။ အဲဒီလိုလည်း ဖြစ်လာမှာ မဟုတ်ပါဘူး။ ဒါကြောင့် ကျနော်တို့ မထိတ်လန့်သင့်ပါဘူး။ အရင်ကရှိခဲ့တဲ့ ကောင်းမွန်တဲ့ ပူးပေါင်း ဆောင်ရွက်မှုမျိုးကိုပဲ ပြန်လည်တည်ဆောက်ရမှာပါ” ဟု နီလ်ဆင်က ဂရင်းလန်းကျွန်း၏မြို့တော် နုခ် (Nuuk) တွင် ပြောကြားခဲ့သည်။

နီလ်ဆင်သည် ဇန်နဝါရီ ၅ ရက်က လူမှုမီဒီယာတွင် တင်ခဲ့သော ပို့စ်တစ်ခုတွင်လည်း ဂရင်းလန်းကို သိမ်းပိုက်မည် ဆိုသည့် စိတ်ကူးယဉ်မှုများကို စွန့်လွှတ်ရန် ထရမ့်အား တိုက်တွန်းခဲ့သည်။

“တော်လောက်ပါပြီ။ ဖိအားပေးတာတွေ၊ သွယ်ဝိုက်ပြောဆိုတာတွေ၊ သိမ်းပိုက်ဖို့ စိတ်ကူးယဉ်နေတာတွေ ထပ် မလုပ်ပါနဲ့တော့။ ကျနော်တို့က ဆွေးနွေးဖို့ အမြဲတမ်း တံခါးဖွင့်ထားပါတယ်။ ဒါပေမဲ့ မှန်ကန်တဲ့ လမ်းကြောင်း ကနေ တစ်ဆင့် နိုင်ငံတကာဥပဒေကို လေးစားမှုရှိရှိနဲ့ လုပ်ဆောင်ရမှာဖြစ်ပါတယ်” ဟု နီလ်ဆင်က ရေးသားခဲ့ သည်။

Source: DW

CNI International News

ရီးယာ့ဒ်၊ ဇန်နဝါရီ ၈

ယီမင်နိုင်ငံ တောင်ပိုင်းခွဲထွက်ရေးအဖွဲ့ဖြစ်သည့် (STC) အဖွဲ့ခေါင်းဆောင် အီဒါရုစ် အယ် ဇူဘာအီဒီ (Aidarous al-Zubaidi) သည် ထွက်ပြေး တိမ်းရှောင်နေကြောင်း STC အဖွဲ့က ဇန်နဝါရီ ၆ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဇူဘာအီဒီသည် ယီမင်တောင်ပိုင်း ခွဲထွက်ရေးနှင့်ပတ်သက်ပြီး အငြင်းပွားဖွယ် ပြဿနာကို အဖြေရှာရန် ဆော်ဒီ နိုင်ငံ ရီးယာ့ဒ် (Riyadh) မြို့တော်တွင် ပြုလုပ်သည့် ဆွေးနွေးပွဲကို တက်ရောက်ခဲ့ခြင်း မရှိဘဲ ရီးယာ့ဒ်သို့ ရောက်ရှိ နေသည့် STC ကိုယ်စားလှယ် အဖွဲ့နှင့်လည်း အဆက်အသွယ် ပြတ်တောက်နေသည်။

ယီမင်တောင်ပိုင်းတွင် STC အဖွဲ့၏ ခွဲထွက်ရေး လှုပ်ရှားမှုများကြောင့် ယီမင်၏ ပြိုင်ဘက်အဖွဲ့များကို ထောက်ခံ ပေးထားသည့် ပင်လယ်ကွေ့ အင်အားကြီး နိုင်ငံများဖြစ်သည့် ဆော်ဒီနှင့် ယူအေအီးကြား တင်းမာမှုများ မြင့်တက် ခဲ့သည်။

ယီမင်နိုင်ငံအတွင်းက လက်နက်ကိုင်တွေကို တွေ့ရစဉ်

ထို့ကြောင့် ယီမင်တွင် အီရန်က ထောက်ခံပေးထားသည့် ဟူရ်သီအဖွဲ့ကို တိုက်ခိုက်နေသော ဆော်ဒီဦးဆောင်သည့် အာရပ်ညွန့်ပေါင်းတပ်ဖွဲ့အတွင်း သဘောထား ကွဲလွဲမှုများကိုလည်း ဖြစ်ပွားစေခဲ့သည်။

ယူအေအီးနိုင်ငံသည် ယီမင်တွင် တောင်ပိုင်းခွဲထွက်ရေးအဖွဲ့ဖြစ်သည့် STC ကို ထောက်ခံပေးပြီး ဆော်ဒီကမူ နိုင်ငံတကာ အသိအမှတ်ပြုထားသည့် ယီမင်အစိုးရကို ထောက်ခံပေးထားသည်။

ယခင်က STC နှင့် နိုင်ငံတကာ အသိအမှတ်ပြု ယီမင်အစိုးရအဖွဲ့ကြား ဆက်ဆံရေး ကောင်းမွန်ပြီး ယီမင်အစိုးရ အဖွဲ့ထဲတွင် STC ခေါင်းဆောင် ဇူဘာအီဒီကို ဒုသမ္မတအဖြစ် ခန့်အပ်ထားသည်။

ထို့နောက် STC ၏ ခွဲထွက်ရေး လှုပ်ရှားမှုများကြောင့် ယီမင်အစိုးရအဖွဲ့နှင့် ဆက်ဆံရေး အဆင်မပြေ ဖြစ်လာခဲ့ သည်။

ယခုအခါတွင် ဇူဘာအီဒီသည် အဆက်အသွယ် မလုပ်ဘဲ ထွက်ပြေး တိမ်းရှောင်နေသဖြင့် ၎င်းအား နိုင်ငံတော် သစ္စာဖောက်မှုဖြင့် အစိုးရအဖွဲ့ထဲမှ ဖယ်ရှားလိုက်ပြီဖြစ်ကြောင်း နိုင်ငံတကာ အသိအမှတ်ပြု အစိုးရက ထုတ်ပြန် ခဲ့သည်။

လက်ရှိအချိန်အထိ ဇူဘာအီဒီသည် မည်သည့် နေရာသို့ ထွက်ပြေး တိမ်းရှောင်နေသည် ဆိုခြင်းကိုမူ မသိရ သေးကြောင်း ရိုက်တာသတင်းတွင် ဖော်ပြခဲ့သည်။

Source: ရိုက်တာ

CNI International News

ဝါရှင်တန်၊ ဇန်နဝါရီ ၈

ဗင်နီဇွဲလားနိုင်ငံသည် အမေရိကန်ကို ရေနံစိမ်း စည်ပေါင်း သန်း ၃၀ မှ သန်း ၅၀ အထိ ထောက်ပံ့ပေးလိမ့်မည်ဟု အမေရိကန်သမ္မတ ဒေါ်နယ်ထရမ့် (Donald Trump)က ဇန်နဝါရီ ၆ ရက်တွင် ပြောကြားခဲ့ကြောင်း အေပီမှ ဖော်ပြခဲ့သည်။

ထိုရေနံများ ရောင်းချမှုမှ ရရှိသည့်ငွေကို နှစ်နိုင်ငံစလုံးရှိ ပြည်သူများ၏ အကျိုးစီးပွားအတွက် အသုံးပြုသွားမည်ဟု ၎င်းက ပြောသည်။

ဗင်နီဇွဲလားတွင် ရေနံ အရင်းအမြစ် ကြွယ်ဝသော်လည်း အခြေခံ အဆောက်အအုံ အခက်အခဲများနှင့် ကြုံတွေ့ နေရသဖြင့် ထရမ့်အစိုးရသည် ဗင်နီဇွဲလား၏ ရေနံလုပ်ငန်း၌ အမေရိကန်၏ ရင်းနှီးမြှုပ်နှံမှုနှင့် နည်းပညာများ အတွက် ပိုမိုကျယ်ပြန့်စွာ လုပ်ပိုင်ခွင့်ပေးရန် ဖိအားပေးခဲ့သည်။

ထို့ပြင် ထရမ့်သည် ဗင်နီဇွဲလား အရေးနှင့် ပတ်သက်၍ ဆွေးနွေးရန် အမေရိကန် ရေနံကုမ္ပဏီကြီးများမှ အမှုဆောင်အရာရှိများနှင့် ဇန်နဝါရီ ၈ ရက်တွင် တွေ့ဆုံရန် စီစဉ်ထားသည်။

ထိုအစီအစဉ်နှင့် ပတ်သက်ပြီး သိရှိထားသည့် အမည်မဖော်လိုသူ တစ်ဦး၏ ပြောကြားချက်အရ ဇန်နဝါရီ ၈ ရက် တွင် အိမ်ဖြူတော်၌ ပြုလုပ်မည့် အစည်းအဝေးကို Exxon၊ Chevron နှင့် ConocoPhillips ကုမ္ပဏီများမှ ကိုယ်စားလှယ်များ တက်ရောက်လိမ့်မည်ဟု ဆိုသည်။

ဗင်နီဇွဲလား ယာယီသမ္မတ ဒယ်လ်စီ ရိုဒရီဂုဇ်ကို တွေ့ရစဉ်

ထရမ့်သည် မာဒူရိုအား ဖမ်းဆီးခဲ့ပြီးနောက် ဗင်နီဇွဲလား၏ ယာယီသမ္မတအဖြစ် တာဝန်ယူခဲ့သည့် ဒယ်လ်စီ ရိုဒရီဂုဇ် (Delcy Rodriguez) ကို ယခုသီတင်းပတ် အစောပိုင်းက သတိပေးခဲ့သည်။

ရိုဒရီဂုဇ် အနေဖြင့် ဗင်နီဇွဲလားတွင် အမေရိကန်စွမ်းအင်ကုမ္ပဏီများ ဝင်ရောက် လုပ်ကိုင်ခွင့်ပေးမှု အပါအဝင် အမေရိကန်၏ အကျိုးစီးပွားများနှင့် ကိုက်ညီသော နိုင်ငံဖြစ်အောင် ပြုပြင်ပြောင်းလဲမှုများ မလုပ်ဆောင်ပါ မာဒူရိုထက် ပိုမိုဆိုးရွားသော ရလဒ်နှင့် ရင်ဆိုင်ရလိမ့်မည်ဟု ထရမ့်က သတိပေးခဲ့ခြင်း ဖြစ်သည်။

သို့သော် ရိုဒရီဂုဇ်က ဇန်နဝါရီ ၆ ရက်တွင် စိုက်ပျိုးရေးနှင့် စက်မှုဆိုင်ရာ တာဝန်ရှိသူများကို ပြောကြားခဲ့သည့် မိန့်ခွန်းအတွင်း ထရမ့်၏ ခြိမ်းခြောက်သတိပေးမှုကို ပြန်လည်တုန့်ပြန်ခဲ့သည်။

“ကျမကို ခြိမ်းခြောက်နေတဲ့ သူတွေကို ပုဂ္ဂိုလ်ရေးအရ ပြောချင်တာကတော့ ကျမရဲ့ ကံကြမ္မာကို သူတို့က သတ်မှတ်တာ မဟုတ်ဘဲ ဘုရားသခင်ကသာ သတ်မှတ်တာ ဖြစ်ပါတယ်” ဟု ရိုဒရီဂုဇ်က ပြောကြားခဲ့သည်။

ဇန်နဝါရီ ၃ ရက်တွင် အမေရိကန်က ဗင်နီဇွဲလားကို တိုက်ခိုက်ပြီး ဗင်နီဇွဲလားသမ္မတ မာဒူရို (Nicolas Maduro) ကို ဖမ်းဆီးခဲ့သည့် စစ်ဆင်ရေးအတွင်း ဗင်နီဇွဲလားလုံခြုံရေးအရာရှိ ၂၄ ဦးထက်မနည်း သေဆုံးခဲ့ကြောင်း ဗင်နီဇွဲလားအစိုးရ၏ တာဝန်ရှိသူများက ဇန်နဝါရီ ၆ ရက်တွင် ထုတ်ပြန်ခဲ့သည်။

Source: အေပီ

CNI International News

ဝါရှင်တန်၊ ဇန်နဝါရီ ၈

ဂရင်းလန်းကျွန်းကို ပိုင်ဆိုင်ရေးအတွက် ရွေးချယ်စရာ နည်းလမ်းများထဲတွင် အမေရိကန်စစ်တပ်ကို အသုံးပြုမည့် ရွေးချယ်မှုလည်း ပါဝင်ကြောင်း အိမ်ဖြူတော်က ဇန်နဝါရီ ၆ ရက်တွင် ထုတ်ပြန်ခဲ့သည်ဟု ရိုက်တာမှ ဖော်ပြခဲ့ သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ဥရောပနိုင်ငံများ၏ ကန့်ကွက်မှုများ ရှိနေသည့်တိုင် ဂရင်းလန်း(Greenland)ကျွန်းကို ထိန်းချုပ်နိုင်မည့် နည်းလမ်းများကို ဆွေးနွေးနေသည်။

အာတိတ်ဒေသအတွင်းရှိ ရန်သူများကို ဟန့်တားရန်အတွက် ဂရင်းလန်းကျွန်းကို ရယူခြင်းသည် အမေရိကန်၏ အမျိုးသားလုံခြုံရေးအတွက် ဦးစားပေး လုပ်ဆောင်ရမည့် ကိစ္စအဖြစ် ထရမ့်က ရှုမြင်ထားကြောင်း အိမ်ဖြူတော်၏ ထုတ်ပြန်ချက်တွင် ဖော်ပြထားသည်။

အိမ်ဖြူတော် ပြောရေးဆိုခွင့်ရှိသူကို တွေ့ရစဉ်

“ဒီလိုအရေးကြီးတဲ့ နိုင်ငံခြားရေးမူဝါဒ ရည်မှန်းချက်ကို အကောင်အထည်ဖော်ဖို့အတွက် ထရမ့်နဲ့ သူ့အဖွဲ့ဟာ နည်းလမ်းမျိုးစုံကို ဆွေးနွေးနေကြပါတယ်။ အမေရိကန် စစ်တပ်ကို အသုံးပြုဖို့ ဆိုတာကလည်း စစ်ဦးစီးချုပ်ဖြစ် တဲ့ သမ္မတထရမ့်ရဲ့ လက်ထဲမှာ အမြဲတမ်းရှိနေတဲ့ ရွေးချယ်စရာတစ်ခု ဖြစ်ပါတယ်” ဟု အိမ်ဖြူတော်က ထုတ်ပြန် ခဲ့သည်။

ဂရင်းလန်းကျွန်း အာဏာပိုင်များကမူ ၎င်းတို့အနေဖြင့် အမေရိကန်၏ နယ်မြေ အစိတ်အပိုင်းတစ်ခု မဖြစ်လို ကြောင်း ထပ်တလဲလဲ ထုတ်ဖော်ပြောကြားခဲ့သည်။

ဥရောပ အင်အားကြီး နိုင်ငံများနှင့် ကနေဒါနိုင်ငံတို့မှ ခေါင်းဆောင်များကလည်း ဂရင်းလန်းကျွန်းကို ထိုကျွန်းပေါ် တွင် နေထိုင်သူများကသာ ပိုင်ဆိုင်ကြောင်း ပြောကြားခဲ့ပြီး ဂရင်းလန်းအာဏာပိုင်များဘက်မှ ဝိုင်းဝန်း ရပ်တည် ပေးခဲ့ကြသည်။

နှစ်ပေါင်းများစွာကြာအောင် မဟာမိတ်ဖြစ်ခဲ့သည့် ဒိန်းမတ်နိုင်ငံထံမှ ဂရင်းလန်းကျွန်းကို အမေရိကန်စစ်တပ်က အတင်းအဓမ္မ သိမ်းယူမည်ဆိုပါက နေတိုးမဟာမိတ်အဖွဲ့အတွင်း ကြီးမားသော ဂယက်ရိုက်ခတ်မှုများကို ဖြစ်ပေါ် စေမည်ဖြစ်ပြီး ထရမ့်နှင့် ဥရောပ ခေါင်းဆောင်များအကြား သဘောထား ကွဲလွဲမှုများကို ပိုမိုနက်ရှိုင်းစေမည် ဖြစ် သည်။

အမေရိကန်စစ်တပ်ကိုတွေ့ရစဉ်

ထရမ့်သည် ပထမအကြိမ် သမ္မတသက်တမ်းအတွင်း ၂၀၁၉ ခုနှစ်ကတည်းက ဂရင်းလန်းကျွန်းကို ရယူလိုကြောင်း ပြောကြားခဲ့ခြင်းဖြစ်သည်။

ထို့နောက် ဇန်နဝါရီ ၃ ရက်က ဗင်နီဇွဲလားသမ္မတ မာဒူရို (Nicolas Maduro) ကို အမေရိကန်က ဖမ်းဆီးခဲ့ပြီး နောက် ဂရင်းလန်းကျွန်းနှင့်ပတ်သက်သည့် ထရမ့်၏ စိတ်ဝင်စားမှုသည် နောက်တစ်ကြိမ် မြင့်တက်လာခဲ့သည်။

မာဒူရိုကို ဖမ်းဆီးနိုင်ခဲ့ခြင်းကြောင့် ပိုမိုရဲတင်းလာသည့် ထရမ့်က “အနောက်ကမ္ဘာခြမ်းမှာ အမေရိကန်ရဲ့ လွှမ်းမိုး မှုကို ဘယ်သူကမှ ထပ်ပြီး မေးခွန်းထုတ်နိုင်တော့မှာ မဟုတ်ဘူး” ဟု ပြောကြားခဲ့သည်။

ထို့နောက် ကိုလံဘီယာနှင့် ကျူးဘားနိုင်ငံများ အပေါ်လည်း ဖိအားများ တိုးမြှင့်ခဲ့သည်။

 Source: ရိုက်တာ

CNI International News

ဘေဂျင်း၊ ဇန်နဝါရီ ၈

တရုတ်နိုင်ငံသည် ရန်သူ့ဒရုန်းများကို တန်ပြန်တိုက်ခိုက်နိုင်သည့် စွမ်းအားမြင့် မိုက်ခရိုဝေ့ဖ် (Microwave) လက်နက်စနစ်သစ်ကို ထုတ်လုပ်နေသည်ဟု South China Morning Post မှ ဖော်ပြခဲ့သည်။

ထိုလက်နက်သည် အမေရိကန်စစ်တပ်တွင် အသုံးပြုနေသည့် အလားတူ လက်နက်စနစ်ထက် ပစ်ခတ်မှု အကွာအဝေး ပိုမိုရှည်လျားကြောင်း သိရသည်။

Hurricane 3000 ဟု အမည်ပေးထားပြီး ထရပ်ကားပေါ်တွင် တပ်ဆင် အသုံးပြုနိုင်သည့် ထိုလက်နက်စနစ်ကို ပြီးခဲ့သည့်နှစ် စက်တင်ဘာလအတွင်းက ပြုလုပ်ခဲ့‌သော တရုတ်နိုင်ငံ၏ စစ်ရေးပြ အခမ်းအနား၌  ထုတ်ဖော် ပြသခဲ့ခြင်း ဖြစ်သည်။

ထိုလက်နက်စနစ်သည် အလွန်အားကောင်းသော လျှပ်စစ်သံလိုက်လှိုင်းများကို အသုံးပြုကာ ဒရုန်းအတွင်းရှိ လျှပ်စစ်ပတ်လမ်းများအား လောင်ကျွမ်းစေခြင်းဖြင့် ဖျက်ချခြင်းဖြစ်သည်။

အဆိုပါ လက်နက်စနစ်ကို ထုတ်လုပ်သည့် တရုတ်နိုင်ငံပိုင် Norinco ကုမ္ပဏီ၏ အဆိုအရ Hurricane 3000 သည် အမေရိကန်ကြည်းတပ်၏ လက်နက်များထက် ပစ်ခတ်မှု အကွာအဝေး ပိုမိုရှည်လျားပြီး မတူကွဲပြားသော လေကြောင်းကာကွယ်ရေး တာဝန်များကို ထမ်းဆောင်နိုင်စွမ်းရှိသည်ဟု ဆိုသည်။

ဒရုန်းဖျက်ချနိုင်တဲ့ လက်နက်ကိုတွေ့ရစဉ် 

“ဒီလက်နက်စနစ်ရဲ့ ထိရောက်တဲ့ အကွာအဝေးဟာ အပေါ့စားနဲ့ အသေးစား ဒရုန်းတွေအပြင် အုပ်စုလိုက် လွှတ် တင်တဲ့ ဒရုန်းတွေ (Drone swarms) တွေကိုပါ ၃ ကီလိုမီတာ (၁.၈၆ မိုင်) ကျော် အကွာကနေ ချေမှုန်းနိုင်ပါတယ်။ ဒါဟာ ပြည်တွင်းမှာရော နိုင်ငံတကာမှာပါ ရှိနှင့်ပြီးသား အလားတူ စနစ်တွေထဲမှာ ရှေ့ဆုံးက ဦးဆောင်နေတဲ့ အနေအထား ဖြစ်ပါတယ်” ဟု Norinco ကုမ္ပဏီ၏ ကျွမ်းကျင်သူ ယူကျန်းကျွန်း (Yu Jianjun) က ပြောကြားခဲ့ သည်။

“ဒါဟာ အနီးကပ် ကာကွယ်ရေးလို့ခေါ်တဲ့ အကွာအဝေး တိုတိုအတွင်းမှာပဲ သတ်မှတ်ထားတဲ့ ပစ်မှတ် တစ်ခု ချင်းစီကို ကာကွယ်တဲ့ စနစ်ကနေ ပိုမိုကျယ်ပြန့်တဲ့ နယ်မြေတစ်ခုလုံးကို ရန်သူ့လက်နက်တွေ မဝင်နိုင်အောင် တားဆီးတဲ့ စနစ်အထိ အဆင့်မြှင့်တင်လိုက်တာ ဖြစ်ပါတယ်။ ဒီစနစ်မှာ ပိုမိုဝေးကွာတဲ့ ပစ်ခတ်မှု အကွာအဝေးနဲ့ ပေါင်းစပ်ညှိနှိုင်းဆောင်ရွက်တဲ့ နည်းလမ်းတွေ ပါဝင်လာပါတယ်” ဟု ယူက ရှန်ဟိုင်း (Shanghai) မြို့ အခြေစိုက် Guancha သတင်းဌာနနှင့် အင်တာဗျူးတွင် ပြောကြားခဲ့သည်။

Hurricane 3000 လက်နက်စနစ်သည် မစ်ရှင်ကို ၎င်းလက်နက် စနစ်တစ်မျိုးတည်းဖြင့် သီးခြား လုပ်ဆောင်နိုင် သည့်အပြင် သံမဏိတြိဂံ (Iron Triangle) ဗျူဟာဖြင့် အခြားလက်နက်များနှင့် ပူးတွဲခုခံတိုက်ခိုက်နိုင်သည်။

သံမဏိတြိဂံဗျူဟာ ဆိုသည်မှာ မိုက်ခရိုဝေ့ဖ်၊ လေဆာနှင့် အမြောက်တပ်ဆင်ထားသည့် လက်နက်စနစ် သုံးခုဖြင့် နည်းပညာ ၃ မျိုးကို ပေါင်းစပ်ပြီး ဘက်ပေါင်းစုံမှ ကာကွယ်သည့် ဗျူဟာဖြစ်သည်။

Source: South China Morning Post