CNI International News

ဂျေရုဆလင်၊ အောက်တိုဘာ ၂

လက်ဘနွန်နိုင်ငံတောင်ပိုင်းတွင် အစ္စရေးလေထီးတပ်သားများ၊ ကွန်မန်ဒိုများနှင့် ကျည်ကာတပ်များက မြေပြင်စစ်ဆင်ရေးစတင်ခဲ့ပြီးနောက် ဟစ်ဇ်ဘိုလာအဖွဲ့နှင့် တိုက်ပွဲပြင်းထန်စွာ ဖြစ်ပွားနေကြောင်း  ရိုက်တာမှ ဖော်ပြခဲ့သည်။

ပြီးခဲ့သည့် သီတင်းပတ်က လက်ဘနွန်နိုင်ငံ၊ ဘေရွတ် (Beirut) မြို့တော်တွင် ဟစ်ဇ်ဘိုလာခေါင်းဆောင် ဟက်ဆန် နာဆရာလာ (Hassan Nasrallah) ကို လေကြောင်းဖြင့် တိုက်ခိုက်၍ ချေမှုန်းခဲ့ပြီးနောက် အစ္စရေးက လေကြောင်းတိုက်ခိုက်မှုများ တိုးမြှင့်လုပ်ဆောင်ခဲ့သည်။

လက်ဘနွန်တွင် စက်တင်ဘာ ၃၀ ရက် ညအချိန်က စတင်ခဲ့သည့် စစ်ဆင်ရေးများအတွင်း အစ္စရေး၏ လက်ရွေးစင် အမှတ် ၉၈ တပ်ခွဲပါဝင်ခဲ့သည်။

ထိုတပ်ခွဲကို ပြီးခဲ့သည့် သီတင်းပတ်က ဂါဇာမှ ပြန်လည်ခေါ်ယူပြီး မြောက်ပိုင်းစစ်မျက်နှာတွင် ဖြန့်ကြက်ချထားခဲ့ခြင်းဖြစ်သည်။

လက်ဘနွန်တောင်ပိုင်း ဒေသကိုတွေ့ရစဉ်

လက်ဘနွန်နိုင်ငံတောင်ပိုင်း ကျေးရွာများရှိ ဟစ်ဇ်ဘိုလာအဖွဲ့ကို တိုက်ခိုက်ရာမှာ အကန့်အသတ်ရှိပြီး တည်နေရာအလိုက် ပစ်မှတ်တိကျစွာ တိုက်ခိုက်သည့် မြေပြင်စစ်ဆင်ရေးဖြင့် လုပ်ဆောင်နေကြောင်း၊ လေတပ်နှင့် အမြောက်တပ်ဖွဲ့များက မြေပြင်တပ်ဖွဲ့များကို ထောက်ကူပေးနေသည်ဟု အစ္စရေးက ပြောကြားခဲ့သည်။

လက်ဘနွန်တောင်ပိုင်းရှိ ကျေးရွာများတွင် နေထိုင်သည့် ဟစ်ဇ်ဘိုလာအဖွဲ့များသည် အစ္စရေးနိုင်ငံမြောက်ပိုင်းရှိ အစ္စရေး လူနေရပ်ကွက်များအတွက် ခြိမ်းခြောက်မှုဖြစ်နေကြောင်း အစ္စရေးစစ်တပ်က ပြောကြားခဲ့သည်။

အစ္စရေး၏ မြေပြင်စစ်ဆင်ရေးသည် နယ်စပ်ဒေသတစ်လျှောက် ဟစ်ဇ်ဘိုလာအဖွဲ့၏ ခြေကုပ်စခန်းများကို ပစ်မှတ်ထားခြင်းဖြစ်ပြီး လက်ဘနွန်ပြည်သူများအပေါ် စစ်ပွဲဆင်နွှဲခြင်းမဟုတ်ကြောင်း အစ္စရေးစစ်တပ်က အောက်တိုဘာ ၁ ရက်တွင် ပြောကြားခဲ့သည်။

အစ္စရေးစစ်သား ၂ ဦးကို တွေ့ရစဉ်

"ဟစ်ဇ်ဘိုလာအဖွဲ့က အစ္စရေးကျေးရွာတွေ အနားမှာရှိတဲ့ လက်ဘနွန်ကျေးရွာတွေကို အစ္စရေးကို တိုက်ခိုက်ဖို့အတွက် စစ်စခန်းတွေအဖြစ် ပြောင်းလဲအသုံးပြုနေပါတယ်" ဟု အစ္စရေးစစ်တပ်အကြီးအကဲ ရေတပ်ဗိုလ်ချုပ်ကြီး ဒန်နီယယ် ဟာဂရီ (Daniel Hagari) က ပြောကြားခဲ့သည်။

အစ္စရေး၏ တိုက်ခိုက်မှုများကြောင့် လက်ဘနွန်နိုင်ငံတောင်ပိုင်းတွင် နေထိုင်သည့် ဒေသခံများသည် စက်တင်ဘာ ၃၀ ရက်နှင့် အောက်တိုဘာ ၁ ရက်တွင် ဘေးလွတ်ရာသို့ ထွက်ပြေးတိမ်းရှောင်ခဲ့ကြသည်။

လက်ဘနွန် ယာယီဝန်ကြီးချုပ် နာဂျစ် မီကာတီ (Najib Mikati) ကမူ လက်ဘနွန်သည် သမိုင်းတစ်လျှောက် အန္တရာယ်အများဆုံး အခြေအနေများထဲမှ တစ်ခုနှင့် ရင်ဆိုင်နေရကြောင်း အောက်တိုဘာ ၁ ရက်က ပြောကြားခဲ့သည်။

ဟစ်ဇ်ဘိုလာအဖွဲ့ကလည်း ၎င်းတို့သည် အစ္စရေးနိုင်ငံအတွင်းရှိ အစ္စရေးစစ်စခန်းများကို ဒုံးကျည်များ၊ အမြောက်များဖြင့် ပစ်ခတ်တိုက်ခိုက်ခဲ့ကြောင်း ပြောကြားခဲ့သည်။

Source: ရိုက်တာ

CNI International News

နယူးယောက်၊ အောက်တိုဘာ ၂

မြန်မာနိုင်ငံတွင် ဖြစ်ပွားနေသော အကြမ်းဖက်မှုများ ရပ်တန့်နိုင်ဖို့အတွက် အပစ်အခတ်ရပ်စဲရေး ညှိနှိုင်းမှုများနှင့် တွေ့ဆုံဆွေးနွေးမှုများ ပေါ်ပေါက်လာစေရေး အခြေအနေကို မြှင့်တင်ပေးရမည်ဟု ကမ္ဘောဒီးယားနိုင်ငံခြားရေးနှင့် နိုင်ငံတကာ ပူးပေါင်းဆောင်ရွက်ရေးဝန်ကြီး ဆွတ် ချန်ဒါ ဆိုဖီယာ (Sok Chenda Sophea) က ပြောသည်။

ချန်ဒါဆိုဖီယာသည် (၇၈)ကြိမ်မြောက် ကုလသမဂ္ဂအထွေထွေညီလာခံတွင် စက်တင်ဘာ ၂၈ ရက်နေ့က ပြောကြားခဲ့ကြောင်း ANN မှ ဖော်ပြခဲ့သည်။

ထို့နောက် မြန်မာနိုင်ငံတွင်ဖြစ်ပွားနေသည့် အကျပ်အတည်းအပေါ် ကမ္ဘောဒီးယားနိုင်ငံက စိုးရိမ်ကြောင်း ၎င်းက ပြောကြားခဲ့သည်။

ကမ္ဘောဒီးယားနိုင်ငံသည် အာဆီယံအဖွဲ့ဝင် နိုင်ငံများနှင့်အတူ မြန်မာ့အရေး အာဆီယံ၏ ဘုံသဘောတူညီချက် ၅ ချက်ကို ဖော်ဆောင်ရာတွင် အထောက်အကူပေးနေကြောင်း ချန်ဒါဆိုဖီယာက ပြောကြားခဲ့သည်။

၎င်းက "အပစ်အခတ်ရပ်စဲရေး ညှိနှိုင်းမှုတွေ၊ ဆွေးနွေးမှုတွေ ပေါ်ပေါက်စေမယ့် အခြေအနေကို မြှင့်တင်ဖို့ အရေးကြီးတယ်ဆိုတာကို ကျနော် အဓိကပြောချင်ပါတယ်။ ငြိမ်းချမ်းရေးနဲ့ ပြန်လည်ပေါင်းစည်းရေး အောင်မြင်စေဖို့အတွက် ရည်ရွယ်ထားတဲ့ နိုင်ငံရေးလုပ်ငန်းစဉ်တွေနဲ့ လူသားချင်းစာနာ ထောက်ထားမှုဆိုင်ရာ ကူညီထောက်ပံ့မှုတွေ လိုအပ်တဲ့အကြောင်းကိုလည်း ကျနော်တို့ အလေးထားပြောဆိုပါတယ်" ဟု ပြောသည်။

လာအို၏ အာဆီယံအလှည့်ကျဥက္ကဋ္ဌ သက်တမ်းအတွက် ကမ္ဘောဒီးယားက ထောက်ခံကြောင်းနှင့် မြန်မာနိုင်ငံကို ပုံမှန်အခြေအနေအတိုင်း ပြန်လည်ရောက်ရှိစေရန် ကူညီသည့် အားထုတ်ကြိုးပမ်းမှုများကိုလည်း ဆက်လက်လုပ်ဆောင်သွားမည်ဟု ချန်ဒါဆိုဖီယာက ပြောသည်။

ကမ္ဘောဒီးယားနိုင်ငံခြားရေးဝန်ကြီး ဆွတ် ချန်ဒါ ဆိုဖီယာကို တွေ့ရစဉ်

ကုလသမဂ္ဂအတွင်းရေးမှူးချုပ်၏  မြန်မာနိုင်ငံဆိုင်ရာ အထူးသံတမန်အဖြစ် ဂျူလီဘစ်ရှော့ (Julie Bishop) ကို ခန့်အပ်မှုကိုလည်း ကမ္ဘောဒီးယားက ကြိုဆိုကြောင်း ၎င်းက ပြောသည်။

ကမ္ဘောဒီးယားသည် မြန်မာ့အကျပ်အတည်းကို အဖြေရှာရန် ကြီးမားသည့် အားထုတ်ကြိုးပမ်းမှုကို လုပ်ဆောင်ခဲ့ကြောင်း ကမ္ဘောဒီးယား တော်ဝင်အကယ်ဒမီ၏ အတွင်းရေးမှူးချုပ် ယန်းပူ (Yang Peou) က ပြောကြားခဲ့သည်။

၂၀၂၂ ခုနှစ်က အာဆီယံဥက္ကဋ္ဌအဖြစ် တာဝန်ထမ်းဆောင်ခဲ့သည့် ကမ္ဘောဒီးယားဝန်ကြီးချုပ်ဟောင်း ဟွန်ဆန် (Hun Sen) သည် မြန်မာနိုင်ငံသို့ သွားရောက်ခဲ့ပြီး နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံခဲ့သည်။

ယန်းပူက "ဟွန်ဆန်ဟာ ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံချိန်က အာဆီယံခေါင်းဆောင်အချို့နဲ့ စူပါပါဝါနိုင်ငံတွေက သူ့ကို ဝေဖန်ခဲ့ပါတယ်။ ဒါပေမယ့် အခုအခါမှာတော့ ဝေဖန်သူတွေထဲက ဘယ်သူကမှ  မြန်မာ့အရေးကို ကမ္ဘောဒီးယားထက်ပိုပြီး အားထုတ်ကြိုးပမ်းပြီး ကောင်းမွန်တဲ့ နည်းလမ်းကို ရှာဖွေဖို့ မလုပ်ဆောင်နိုင်ခဲ့ပါဘူး။သူတို့ဟာ မြန်မာနိုင်ငံကို ပြည်တွင်းစစ်ထဲကို တွန်းပို့နေတယ်လို့ ယူဆရပါတယ်။ အဲဒီလုပ်ဆောင်မှုတွေဟာ လိုတစ်မျိုး ၊ မလိုတစ်မျိုး မူဝါဒကို ဖော်ပြရာရောက်နေပါတယ်။ စူပါပါဝါနိုင်ငံတွေဟာ နိုင်ငံငယ်တွေရဲ့ အားထုတ်ကြိုးပမ်းမှုတွေကို အလေးထားပုံ မပေါ်ပါဘူး" ဟု ပြောကြားခဲ့သည်။

ထိုတွေ့ဆုံမှုအတွင်း ဟွန်ဆန်က မြန်မာ့အရေးတွင် နှစ်ဦးနှစ်ဖက်စလုံး အကျိုးရှိစေမည့် မူဝါဒများကို မျှဝေခဲ့ကြောင်း၊ ထိုမဟာဗျူဟာသည် ကမ္ဘောဒီးယားတွင် ခမာနီခေတ်အပြီး ပြည်တွင်းရေးပဋိပက္ခကို အဆုံးသတ်ရန် အထောက်အကူ ဖြစ်စေခဲ့ကြောင်း ယန်းပူက ဆိုသည်။

Source: ANN

CNI International News

ဝါရှင်တန်၊ အောက်တိုဘာ ၁

နယ်သာလန်ဝန်ကြီးချုပ်ဟောင်း မာ့ခ် ဟူတေး (Mark Rutte) သည် အောက်တိုဘာ ၁ ရက်မှစပြီး ကမ္ဘာ့အင်အား အကြီးဆုံး စစ်ရေးမဟာမိတ်အုပ်စုဖြစ်သည့် နေတိုးအဖွဲ့၏ အကြီးအကဲနေရာကို ရယူမည်ဖြစ်သော်လည်း သူသည် မူဝါဒပြောင်းလဲမှုများကို လုပ်ဆောင်ဖွယ်မရှိကြောင်း Economic Times မှ ဖော်ပြခဲ့သည်။

မာ့ခ်ဟူတေးသည် ယခင်နေတိုးအကြီးအကဲ ဂျန်းစ် စတိုတန်ဘာ့ချ် (Jens Stoltenberg) လက်ထက်က မူဝါဒများ ကို ပြုပြင်ပြောင်းလဲလိုသည့် ဆန္ဒရှိသော်လည်း ပြုပြင်ပြောင်းလဲလိမ့်မည် မဟုတ်ကြောင်း ကျွမ်းကျင်သူများက ပြောကြားခဲ့သည်။

နေတိုးအကြီးအကဲ၏ တာဝန်အရ ဟူတေးသည် အန္တရာယ်နှင့် ထိပ်တိုက်မတိုးသည့် အရပ်ဖက် ဗျူရိုကရေစီစနစ် ကို ကျင့်သုံးလိမ့်မည်ဖြစ်ပြီး အမေရိကန်ဦးဆောင်သော နေတိုးအဖွဲ့ဝင် နိုင်ငံများနှင့်အတူ ပါဝါအမာကို ကိုင်စွဲရ မည်ဖြစ်သည်။

နေတိုးအဖွဲ့ဝင် ၃၂ နိုင်ငံသည် ဥရောပမြောက်ပိုင်းမှ သဘောထား သင်တင့်မျှတပြီး သက်လတ်ပိုင်းအရွယ် အမျိုးသားဝန်ကြီးချုပ်ဟောင်းများကိုသာ နေတိုးအဖွဲ့၏ အကြီးအကဲအဖြစ် ရွေးချယ်လေ့ရှိသည်။

"အခုလို ခက်ခဲတဲ့ ပထဝီနိုင်ငံရေး အခြေအနေမျိုးမှာ တူညီတဲ့ နိုင်ငံခြားရေးမူဝါဒနဲ့ လုံခြုံရေးမူဝါဒကို ဆက်လက် ကျင့်သုံးဖို့က အရမ်းအရေးကြီးပါတယ်" ဟု အမည်မဖော်လိုသည့် နေတိုးထိပ်သီး သံတမန်တစ်ဦးက ပြောကြား ခဲ့သည်။

ယခင်နေတိုးအကြီးအကဲ ဂျန်းစ် စတိုတန်ဘာ့ချ်ကို တွေ့ရစဉ်

စတိုတန်ဘာ့ချ်သည် နေတိုး အကြီးအကဲအဖြစ် တာဝန်ထမ်းဆောင်သည့် ၁၀ နှစ်ကျော် ကာလအတွင်း တည်ငြိမ် သော နေထိုင်ပြောဆိုပုံများကြောင့် အများစု၏ ထောက်ခံမှုကို ရရှိခဲ့သည်။

နော်ဝေနိုင်ငံသားဖြစ်သည့် စတိုတန်ဘာ့ချ်သည် ယူကရိန်းအရေးတွင် အမေရိကန်သမ္မတဟောင်း ဒေါ်နယ်ထရမ့် (Donald Trump) ၏ ထောက်ခံမှုကို ရရှိအောင် စွမ်းဆောင်နိုင်ခဲ့ပြီး နေတိုးအဖွဲ့ကိုလည်း ရုရှားနှင့် တိုက်ရိုက် စစ်ပွဲ မဖြစ်ပွားစေရန် ရှောင်ရှားနိုင်ခဲ့သည်။

"မဟာမိတ်တွေကတော့ စတိုတန်ဘာ့ချ်ကို တူညီတဲ့ အရည်အချင်းရှိတဲ့ လူမျိုးကိုပဲ လိုချင်နေကြပါတယ်။ သူ့ရဲ့ လမ်းစဉ်အတိုင်း ဆက်သွားပါလိမ့်မယ်။ နေတိုးအကြီးအကဲဟာ အဆက်အသွယ်ကောင်းရမယ်။ အတွေ့အကြုံ ရှိရမယ်။ ကောင်းမွန်တဲ့နိုင်ငံမှာ နေထိုင်ရသူ ဖြစ်ရမယ်။ ပြီးနောက် ထရမ့်ကို စည်းရုံးနိုင်ရပါမယ်"ဟု နေတိုး ထိပ်သီး အရာရှိဟောင်းတစ်ဦးဖြစ်သည့် ဂျေမီရှီးယား (Jamie Shea) က ပြောကြားခဲ့သည်။

အသစ်တက်လာမည့် နေတိုးအကြီးအကဲ ဟူတေးသည်လည်း အထက်ဖော်ပြပါ အချက်အားလုံးနဲ့ ကိုက်ညီနေပြီး အမေရိကန်၊ ဗြိတိန်၊ ပြင်သစ်နှင့် ဂျာမနီတို့လို ထိပ်သီးနိုင်ငံများ၏ ထောက်ခံမှုကို ရရှိခဲ့သူဖြစ်သည်။

Source: Economic Times

CNI International News

နယူးယောက်၊ အောက်တိုဘာ ၁

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိက အပါအဝင် နိုင်ငံအချို့ပါဝင်သည့် BRICS အဖွဲ့၊ စီးပွားရေး ပူးပေါင်းဆောင်ရွက်ရေးနှင့် ဖွံ့ဖြိုးတိုးတက်ရေးအဖွဲ့ (OECD) အဖွဲ့များအတွင်းသို့ ဝင်ရောက်လိုသည့် ထိုင်း၏ အားထုတ်ကြိုးပမ်းမှုသည် အရေးကြီးကြောင်း ထိုင်းနိုင်ငံခြားရေးဝန်ကြီး မာရစ် ဆန်ဂီယမ်ပွန်ဆာ (Maris Sangiampongsa) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

စက်တင်ဘာ ၂၄ ရက်မှ စက်တင်ဘာ ၂၉ ရက်အထိ ပြုလုပ်ခဲ့သည့် (၇၉)ကြိမ်မြောက် ကုလသမဂ္ဂအထွေထွေ ညီလာခံ၏ အထွေထွေဆွေးနွေးပွဲတစ်ခုတွင် မစ္စတာမာရစ်က ပြည်သူကိုဗဟိုပြုသော မူဝါဒများနှင့် ရေရှည်ခံသည့် စီးပွားရေးဖွံ့ဖြိုးတိုးတက်မှုကို အာရုံစိုက်လုပ်ဆောင်မည့် ထိုင်းအစိုးရအဖွဲ့၏ ကတိကဝတ်များအား အလေးထား ပြောဆိုခဲ့သည်။

ထို့ပြင် ကမ္ဘာလုံးဆိုင်ရာ စိန်ခေါ်မှုများ၊ ကမ္ဘာတစ်ဝန်းတွင် ဖြစ်ပွားနေသည့် ပဋိပက္ခကို ဖြေရှင်းရန် ငြိမ်းချမ်းရေးနှင့် လုံခြုံရေးကို မြှင့်တင်ရေးရာ၌ ကုလသမဂ္ဂတွင် ပြုပြင်ပြောင်းလဲမှုများ၏ အရေးကြီးပုံကိုလည်း မာရစ်က ပြောကြားခဲ့သည်။

ထိုင်း၀န်ကြီးချုပ် ပေတုန်တန်ကို တွေ့ရစဉ်

ထိုင်း၏ အိမ်နီးချင်းဖြစ်သည့် မြန်မာနိုင်ငံ အရေးနှင့်ပတ်သက်ပြီး မာရစ်က ရည်ညွှန်းပြောဆိုရာတွင် မြန်မာနိုင်ငံ အတွက် လူသားချင်းစာနာထောက်ထားမှု အကူအညီပေးမည်ဖြစ်ပြီး ငြိမ်းချမ်းစွာ အဖြေရှားရန် သက်ဆိုင်ရာ အဖွဲ့အစည်းများအားလုံးကို တိုက်တွန်းကြောင်း ပြောကြားခဲ့သည်။

OECD နှင့် BRICS အဖွဲ့များကို ဝင်ရောက်မှုမှတစ်ဆင့် ကမ္ဘာ့မြောက်ခြမ်းနှင့် ကမ္ဘာတောင်ခြမ်းအကြား ပူးပေါင်း ဆောင်ရွက်မှုအား မြှင့်တင်ရာတွင် ထိုင်းနိုင်ငံ၏ အခန်းကဏ္ဍနှင့် ရေရှည်တည်တံ့သည့် ဖွံ့ဖြိုးတိုးတက်ရေး ရည်ရွယ်ချက်များရရှိရန် အရေးကြီးကြောင်းလည်း မာရစ်က ပြောသည်။

ထိုပူးပေါင်းဆောင်ရွက်မှုသည် ရာသီဥတု ဖောက်ပြန်ပြောင်းလဲမှုကဲ့သို့ ကမ္ဘာလုံးဆိုင်ရာ ပြဿနာများကို ဖြေရှင်း ရာတွင် အရေးကြီးသည်ဟု ၎င်းက ဆိုသည်။

ထိုင်းအလံကိုတွေ့ရစဉ်

လူ့အခွင့်အရေးနှင့် လူသားများ၏ လုံခြုံရေးအပေါ် သက်ရောက်နေသည့် ရာသီဥတု ဖောက်ပြန်ပြောင်းလဲမှုကို လျှော့ချရန် နိုင်ငံတိုင်းတွင် တာဝန်ရှိသည်ဟုလည်း ၎င်းက ဆိုသည်။

ကုလသမဂ္ဂလူ့အခွင့်အရေးကောင်စီတွင် ၂၀၂၅-၂၀၂၇ ခုနှစ်သက်တမ်းအတွက် ထိုင်းနိုင်ငံ ပါဝင်ခွင့်ရရန် အဆိုပြု ထားမှုနှင့်ပတ်သက်ပြီး လူ့အခွင့်အရေးကို ကာကွယ်မြှင့်တင်သွားမည်ဆိုသည့် ထိုင်းနိုင်ငံ၏ ကတိကဝတ်အား မာရစ်က အလေးထားပြောဆိုခဲ့သည်။

မာရစ်သည် ကုလသမဂ္ဂအထွေထွေညီလာခံ တက်ရောက်သည့် ခရီးစဉ်အတွင်း နယူးယောက် (New York) မြို့တွင် နေထိုင်သော ထိုင်းလူမျိုးများ၊ စီးပွားရေးလုပ်ငန်းများနှင့် မီဒီယာများမှ ကိုယ်စားလှယ်များနှင့်လည်း တွေ့ဆုံခဲ့သည်။

Source: ဘန်ကောက်ပို့စ်

CNI International News

ဝါရှင်တန်၊ အောက်တိုဘာ ၁

အမေရိကန်သမ္မတ ဂျိုးဘိုင်ဒန်သည် ထိုင်ဝမ်အတွက် ကာကွယ်ရေးထောက်ပံ့မှုအဖြစ် ဒေါ်လာ ၅၆၇ သန်းကို စက်တင်ဘာ ၃၁ ရက်တွင် အတည်ပြုခဲ့ကြောင်း အိမ်ဖြူတော်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထိုအကူအညီသည် တရုတ်နှင့် တင်းမာမှု မြင့်တက်နေသည့် ထိုင်ဝမ်စစ်တပ်အတွက် စစ်အင်အား မြှင့်တင်ပေး နိုင်သော အမေရိကန်၏ နောက်ဆုံး လုပ်ဆောင်ချက်တစ်ခု ဖြစ်သည်။

အမေရိကန်သည် ထိုင်ဝမ်နှင့် တရားဝင် ဆက်ဆံရေးမရှိသော်လည်း ထိုင်ဝမ်အတွက် အရေးအကြီးဆုံး အင်အားစု တစ်ခုဖြစ်ပြီး အဓိကလက်နက် ထောက်ပံ့ပေးနေသည့် နိုင်ငံဖြစ်သည်။

တရုတ်ကမူ အမေရိကန်အနေဖြင့် ထိုင်ဝမ်ကို လက်နက်ရောင်းချမှုများအား ရပ်တန့်ရန် မကြာခဏ တောင်းဆိုခဲ့ သည်။

ထိုင်ဝမ်ပြည်သူများကို တွေ့ရစဉ်

အိမ်ဖြူတော်၏ ထုတ်ပြန်ချက်တွင် ဘိုင်ဒန်သည် ထိုင်ဝမ်အတွက် ကာကွယ်ရေး အထောက်အပံ့အဖြစ် ကာကွယ်ရေးဝန်ကြီးဌာန၏ လက်အောက်မှ ဒေါ်လာ ၅၆၇ သန်းကို ထုတ်ပေးရန် နိုင်ငံခြားရေးဝန်ကြီးအား တာဝန်ပေးခဲ့သည်ဟု ဖော်ပြခဲ့သည်။

ထိုအကူအညီပေးသည့် အစီအစဉ်တွင် စစ်ဘက်ဆိုင်ရာ လေ့ကျင့်သင်ကြားမှုများ ပါဝင်သော်လည်း အသေးစိတ် အချက်အလက်များကိုမူ ထုတ်ပြန်ခဲ့ခြင်းမရှိပေ။

ဧပြီလအတွင်းကလည်း ဘိုင်ဒန်သည် အစ္စရေးနှင့် ထိုင်ဝမ် အပါအဝင် ရုရှားနှင့်စစ်ပွဲ ဖြစ်ပွားနေသည့် ယူကရိန်း အတွက် ဒေါ်လာ ဘီလျံချီ တန်ကြေးရှိသော စစ်ရေးအကူအညီများကို ထောက်ပံ့ပေးမည့် ဥပဒေမူကြမ်းကို လက်မှတ်ရေးထိုးခဲ့သည်။

ထိုင်ဝမ်ကမူ အမေရိကန်၏ F-14 တိုက်လေယာဉ်များ အပါအဝင် လက်နက်များဖြန့်ချိမှု နှောင့်နှေးကြန့်ကြာနေ ခြင်းအပေါ် စောဒကတက်ခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး မကြားသေးမီ နှစ်များအတွင်း ထိုင်ဝမ် အပေါ် စစ်ရေးနှင့် နိုင်ငံရေးဖိအားများ တိုးမြှင့်ခဲ့သည်။

Source: ရိုက်တာ

CNI International News

နယူးယောက်၊ စက်တင်ဘာ ၃၀

အစ္စရေး၏ လေကြောင်းတိုက်ခိုက်မှုကြောင့် လက်ဘနွန်ရှိ ဟစ်ဇ်ဘိုလာခေါင်းဆောင် ဟက်ဆန် နာဆရာလာ (Hassan Nasrallah) သေဆုံးခဲ့ပြီးနောက် အရှေ့အလယ်ပိုင်းဒေသတွင် ချက်ချင်းအပစ်အခတ်ရပ်စဲရန် တရုတ်နိုင်ငံခြားရေးဝန်ကြီး ဝမ်ယိ (Wang Yi) က စက်တင်ဘာ ၂၈ ရက်တွင် ပြုလုပ်သည့် ကုလမသဂ္ဂအထွေထွေ ညီလာခံတွင် မိန့်ခွန်းပြောကြားစဉ် ထည့်သွင်းပြောကြားသွားခဲ့ကြောင်း Nikkei Asia မှ ဖော်ပြခဲ့သည်။

ယူကရိန်းနှင့် အရှေ့အလယ်ပိုင်းတွင် ဖြစ်ပွားနေသည့် ပဋိပက္ခများကို အရှိန်လျှော့ချရန်၊ ဂါဇာအရေးတွင် အစ္စရေး-ပါလက်စတိုင်း နှစ်ပြည်ထောင် အတူယှဉ်တွဲနေထိုင်ရေးကို တရုတ်ကထောက်ခံကြောင်း၊ ကုလသမဂ္ဂတွင် ပါလက်စတိုင်း၏ အဖွဲ့ဝင်ဖြစ်ရေးကို ထောက်ခံကြောင်း ဝမ်ယိက ပြောကြားခဲ့သည်။

"အာဏာဟာ တရားမျှတမှုကို ကိုယ်စားမပြုပါဘူး။ ပါလက်စတိုင်းအရေးဟာ ပါလက်စတိုင်းတွေ ခံစားခဲ့ရတဲ့ သမိုင်းဝင် တရားမမျှတမှုနဲ့ လူသားတွေရဲ့ စိတ်ဓာတ်အတွက် ကြီးမားတဲ့ ဒဏ်ရာဒဏ်ချက်တစ်ခု ဖြစ်ပါတယ်။ ဒီအရေးကို ရေရှည်မှာ လျစ်လျူရှုနိုင်မှာ မဟုတ်ဘဲ ချက်ချင်း အပစ်အခတ်ရပ်စဲရပါမယ်" ဟု ဝမ်က ပြောကြားခဲ့ သည်။

အရှေ့အလယ်ပိုင်းဒေသ ဗုံးကြဲခံရစဉ်

ထိုအချိန်အတောအတွင်း အမေရိကန်နှင့် ဥရောပသမဂ္ဂက ရုရှားအပေါ် တရုတ်၏ ထောက်ခံမှုကို ဝေဖန်မှုများကို အရှိန်မြှင့်တင်နေပြီး ရုရှားအတွက် စစ်ရေးနှင့်ဆက်နွှယ်သည့် ကုန်ပစ္စည်းများ ပေးပို့နေသည်ဟု စွပ်စွဲထားသည်။

အလားတူ တရုတ်ကုမ္ပဏီများကိုလည်း ပိတ်ဆို့မှုများ ပြုလုပ်ခဲ့သည်။

စက်တင်ဘာ ၂၇ ရက်က ဝမ်သည် အမေရိကန်နိုင်ငံခြားရေးဝန်ကြီး အန်တိုနီဘလင်ကင် (Antony Blinken) နှင့် တွေ့ဆုံသည့် အစည်းအဝေးတွင် အမေရိကန်၏ ပိတ်ဆို့မှုများအပေါ် စိုးရိမ်ကြောင်း ထပ်လောင်းပြောကြားခဲ့ သည်။

တရုတ်နိုင်ငံခြားရေးဝန်ကြီး ဝမ်ယိကို တွေ့ရစဉ်

"ဒီနေ့မှာ ကမ္ဘာပေါ်က နိုင်ငံအားလုံးရဲ့ အချုပ်အခြာအာဏာဟာ သာတူညီမျှရှိပါတယ်။ ကမ္ဘာ့တောင်ခြမ်းက နိုင်ငံ အများအပြားဟာ ချမ်းသာကြွယ်ဝနေပါတယ်။ အင်အားကြီးနိုင်ငံ ၁ နိုင်ငံ ဒါမှမဟုတ် ၂ နိုင်ငံ လောက်ပဲရှိတဲ့ခေတ် က ထာဝရ ကုန်ဆုံးသွားပါပြီ" ဟု ဝမ်ယိက ပြောကြားခဲ့သည်။

ယူကရိန်းအရေးနှင့်ပတ်သက်ပြီး ဝမ်က စစ်မြေပြင်ကို ထပ်မံချဲ့ထွင်ခြင်းမပြုရန်၊ တိုက်ပွဲများကို အရှိန်မြှင့်တင်ခြင်း မပြုရန်နှင့် တင်းမာမှုများကို လျှော့ချရန် တိုက်တွန်းခဲ့သည်။

ယူကရိန်းကမူ ရုရှားနှင့် ဆွေးနွေးညှိနှိုင်းရန် တရုတ်၏ တိုက်တွန်းချက်များကို အလေးမထားခဲ့သော်လည်း ဝမ်ကမူ ယူကရိန်းပဋိပက္ခကို တရုတ်က ကြားဝင်စေ့စပ်ပေးမည့်အကြောင်းကို ထပ်လောင်းပြောဆိုခဲ့သည်။

"တရုတ်ကတော့ ငြိမ်းချမ်းရေး ဆွေးနွေးပွဲတွေအတွက် ခိုင်မာပြီး ထိရောက်မှုရှိတဲ့ ကြားဝင်စေ့စပ်ပေးတဲ့ အခန်း ကဏ္ဍမှာ ပါဝင်လုပ်ဆောင်ပေးမယ်လို့ ကတိပြုထားခဲ့ပြီး ဖြစ်ပါတယ်။ တရုတ်အနေနဲ့ ကိုယ်ကျိုးအတွက် အမြတ်ထုတ်တာတွေလုပ်မှာ မဟုတ်ပါဘူး" ဟု ဝမ်က ပြောကြားခဲ့သည်။

Source: Nikkei Asia

CNI International News

တဲလ်အဗစ်၊ စက်တင်ဘာ ၃၀

လက်ဘနွန်နိုင်ငံ၊ ဘေရွတ်(Beirut) မြို့တော်တွင် အစ္စရေး၏ လေကြောင်းတိုက်ခိုက်မှုကြောင့် ဟစ်ဇ်ဘိုလာ ခေါင်းဆောင် ဆေးယက် ဟက်ဆန် နာဆရာလာ (Sayyed Hassan Nasrallah) သေဆုံးခဲ့မှုသည် ဟစ်ဇ်ဘိုလာ အတွက်သာမက အီရန်အတွက်လည်း ကြီးမားသည့် ထိုးနှက်ချက်ဖြစ်ခဲ့သည်ဟု Nikkei Asia မှ ဖော်ပြခဲ့သည်။

စက်တင်ဘာ ၂၇ ရက်က ဘေရွတ်မြို့တော်တောင်ပိုင်း ဆင်ခြေဖုံးရပ်ကွက်တွင် ဟစ်ဇ်ဘိုလာအဖွဲ့၏ ဌာနချုပ်အား လေကြောင်းတိုက်ခိုက်ခဲ့ရာတွင် နာဆရာလာကို ချေမှုန်းနိုင်ခဲ့ကြောင်း အစ္စရေးစစ်တပ်က စက်တင်ဘာ ၂၈ ရက်၌ ထုတ်ပြန်ခဲ့သည်။

ထို့နောက် ဟစ်ဇ်ဘိုလာအဖွဲ့ကလည်း နာဆရာလာ သေဆုံးကြောင်းကို အတည်ပြုခဲ့သည်။

အစ္စရေးဝန်ကြီးချုပ် ဘင်ဂျာမင် နေတန်ယာကို တွေ့ရစဉ်

နာဆရာလာ၏ သေဆုံးမှုသည် အာရပ်ကမ္ဘာတွင် အီရန်အတွက် မဟာမိတ်လက်နက်ကိုင်အဖွဲ့များ ကွန်ရက်တွင် အဓိက အခန်းကဏ္ဍမှ ပါဝင်နေသည့်  ဩဇာကြီးမားသော မဟာမိတ်တစ်ဦးကို လက်လွတ်ဆုံးရှုံးခဲ့ရခြင်းဖြစ်သည်။

အစ္စရေးဝန်ကြီးချုပ် ဘင်ဂျာမင် နေတန်ယာဟု (Benjamin Netanyahu) ကမူ နာဆရာလာအား ချေမှုန်းရခြင်း သည် လာမည့်နှစ်များအတွင်း ဒေသတွင်း အာဏာဟန်ချက်ညီမှုကို ပြောင်းလဲရန်အတွက် မဖြစ်မနေ လုပ်ဆောင် လိုက်ရသည့် ခြေလှမ်းတစ်ရပ်ဖြစ်ကြောင်း ပြောကြားခဲ့သည်။

"နာဆရာလာက အကြမ်းဖက်သမား တစ်ယောက်ပါ" ဟု နေတန်ယာဟုက ပြောကြားခဲ့ပြီး စိန်ခေါ်မှုများနှင့် ပြည့်နေသည့် နေ့ရက်များကို ရင်ဆိုင်ရမည်ဟုလည်း သတိပေးခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) ကလည်း နာဆရာလာ၏ သေဆုံးမှုသည် ထောင်နှင့်ချီသည့် အမေရိကန်များ၊ အစ္စရေးများနှင့် လက်ဘနွန်ပြည်သူများ အပါအဝင် သူ့ကြောင့် နစ်နာခဲ့ရသူများအတွက် တရားစီရင်မှုတစ်ခုဖြစ်ကြောင်း၊ အစ္စရေး၏ မိမိကိုယ်ကိုယ် ခုခံပိုင်ခွင့်ကို အမေရိကန်က အပြည့်အဝ ထောက်ခံ ကြောင်း ပြောကြားခဲ့သည်။

အမေရိကန်သမ္မတ ဂျိုးဘိုင်ဒန်ကို တွေ့ရစဉ်

ဘေရွတ်မြို့တော်တွင် ဖြစ်ပွားခဲ့သည့် အစ္စရေး၏ လေကြောင်း တိုက်ခိုက်မှုများအတွင်း အီရန် တော်လှန်ရေး အစောင့်တပ်ဖွဲ့၏ ဒုတပ်မှူးတစ်ဦးဖြစ်သူ အာဘက်စ် နီလ်ဖိုရူရှန် (Abbas Nilforoushan) လည်း သေဆုံးသွားခဲ့ ကြောင်း အီရန်မီဒီယာများက ထုတ်ပြန်ခဲ့သည်။

နာဆရာလာ သေဆုံးခဲ့ပြီးနောက် အီရန်၏ အမြင့်ဆုံးခေါင်းဆောင် အယာတိုလာ အလီ ခါမေနီ ( Ayatollah Ali Khamenei) သည်လည်း နိုင်ငံအတွင်းရှိ ဘေးကင်းလုံခြုံသည့် နေရာသို့ ရွှေ့ပြောင်းနေထိုင်ခဲ့ကြောင်း သတင်း ရင်းမြစ်များက ရိုက်တာသတင်းဌာနသို့ ပြောကြားခဲ့သည်။

ပြီးခဲ့သည့် သီတင်းပတ် နှစ်ပတ်အတွင်း လက်ဘနွန်တွင် အစ္စရေး၏ တိုက်ခိုက်မှုများကြောင့် လူပေါင်း ၁၀၀၀ ကျော် သေဆုံးခဲ့ကာ ၆၀၀၀ ကျော် ဒဏ်ရာရရှိခဲ့သလို လူပေါင်း ၁ သိန်းခန့် အိမ်ပစ်ရာပစ် စွန့်ခွာထွက်ပြေးခဲ့ရ ကြောင်း လက်ဘနွန်ကျန်းမာရေးဝန်ကြီးဌာနက ပြောကြားခဲ့သည်။

Source: Nikkei Asia

CNI International News

ဘန်ကောက်၊ စက်တင်ဘာ ၃၀

ထိုင်းနိုင်ငံတွင် ပြုလုပ်ခဲ့သည့် စစ်တမ်းတစ်ရပ်တွင် ဝန်ကြီးချုပ် ရာထူးနေရာအတွက် လူကြိုက်အများဆုံးအဖြစ် ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ရွေးချယ်ခံခဲ့ရသည်ဟု ဘန်ကောက်ပို့စ်မှ ဖော်ပြခဲ့သည်။

သို့သော် ထိုင်းတွင် လူကြိုက်အများဆုံး နိုင်ငံရေးပါတီသည် လက်ရှိအာဏာရ ဖြူးထိုင်းပါတီမဟုတ်ဘဲ ယခင် Move Forward ပါတီကို ဖျက်သိမ်းပြီး အသစ်ဖွဲ့စည်းခဲ့သည့် ပြည့်သူ့ပါတီ ဖြစ်နေသည်ဟု အမျိုးသား ဖွံ့ဖြိုးတိုး တက်ရေးအုပ်ချုပ်မှု အင်စတီကျု (Nida Poll) က ပြုလုပ်သည့် စစ်တမ်းတွင် ဖော်ပြခဲ့သည်။

၂၀၂၄ ခုနှစ် တတိယ ၃ လပတ် ကာလအတွက် ပြုလုပ်သည့် အဆိုပါ လူထုသဘောဆန္ဒ ကောက်ခံမှုစစ်တမ်းတွင် အသက် ၁၈ နှစ်နှင့်အထက် နယ်ပယ်ကဏ္ဍအသီးသီးမှ ပါဝင်ဖြေဆိုသူ ၂၀၀၀ ကို စက်တင်ဘာ ၁၆ ရက်မှ ၂၃ ရက် အကြာ ဖုန်းဖြင့်ဆက်သွယ်ပြီး အင်တာဗျူးများ ပြုလုပ်ခဲ့ခြင်းဖြစ်သည်။

ပေတုန်တန်၊ ပြည်သူ့ပါတီခေါင်းဆောင်နဲ့ ဒီမိုကရက်တစ်ပါတီခေါင်းဆောင်ကိုတွေ့ရစဉ်

ဝန်ကြီးချုပ်နေရာအတွက် ထောက်ခံမှု အများဆုံးစစ်တမ်းတွင် ပေတုန်တန်သည် စစ်တမ်းတွင် ပါဝင်ဖြေဆိုသူ စုစုပေါင်း၏ ၃၁ ဒသမ ၃၅ ရာခိုင်နှုန်း၏ ထောက်ခံမှုကိုရရှိခဲ့ပြီး ၂၃ ဒသမ ၅၀ ရာခိုင်နှုန်းကမူ ဝန်ကြီးချုပ်နေရာ အတွက် သင့်တော်သူ မရှိသေးကြောင်း ဖြေကြားခဲ့သည်။

၂၂ ဒသမ ၉၀ ရာခိုင်နှုန်းကမူ ပြည်သူ့ပါတီမှ နက်သန်ပွန် ရူအန်ပန်ယာဝပ် (Natthaphong Ruengpanyawut) ကို ထောက်ခံခဲ့ကြပြီး ၈ ဒသမ ၆၅ ရာခိုင်နှုန်းကမူ United Thai Nation ပါတီ၏ ပီရာပန် ဆာလီရာသာဗီဟာဂါ (Pirapan Salirathavibhaga) ကို ထောက်ခံခဲ့ကြသည်။

ထိုင်းတွင် လူထုထောက်ခံမှု အများဆုံး နိုင်ငံရေးပါတီ စစ်တမ်းတွင် ပြည်သူ့ပါတီက ၃၄ ဒသမ ၂၅ ရာခိုင်နှုန်း ဖြင့် ထောက်ခံမှု အများဆုံးရရှိခဲ့ပြီး ၂၇ ဒသမ ၁၅ ရာခိုင်နှုန်းကမူ ဖြူးထိုင်းပါတီကို ထောက်ခံခဲ့ရသည်။

၁၅ ဒသမ ၁၀ ရာခိုင်နှုန်းကမူ ထောက်ခံရန် သင့်တော်သည့်ပါတီ မရှိသေးကြောင်း ဖြေကြားခဲ့ပြီး ၉ ဒသမ ၉၅ ရာခိုင်နှုန်းက United Thai Nation ပါတီ၊ ၄ ဒသမ ၄၀ ရာခိုင်နှုန်းက ဒီမိုကရက်ပါတီ၊ ၃ ဒသမ ၅၅ ရာခိုင်နှုန်းက Bhumjaithai ပါတီ၊ ၂ ဒသမ ၀၅ ရာခိုင်နှုန်းက Palang Pracharath ပါတီနှင့် ၁ ဒသမ ၇၉ ရာခိုင်နှုန်းက Thai Sang Thai  ပါတီတို့ကို ထောက်ခံခဲ့ကြသည်။

Source: ဘန်ကောက်ပို့စ်

CNI International News

နယူးယောက်၊ စက်တင်ဘာ ၃၀

ဖိလစ်ပိုင်နိုင်ငံတွင် ဖြန့်ကြက်ချထားသည့် အမေရိကန်၏ တာလတ်ပစ် ဒုံးကျည်များသည် ဒေသတွင်း ငြိမ်းချမ်းရေးနှင့် တည်ငြိမ်ရေးကို လျော့ကျစေလိမ့်မည်ဟု တရုတ်နိုင်ငံခြားရေးဝန်ကြီး ဝမ်ယိက ပြောကြားခဲ့ ကြောင်း ဘန်ကောက်ပို့စ်မှ ဖော်ပြခဲ့သည်။

ဝမ်ယိသည် စက်တင်ဘာ ၂၈ ရက်က နယူးယောက်တွင် တောင်ကိုရီးယား နိုင်ငံခြားရေးဝန်ကြီး ချိုတေးယူ (Cho Tae-yul) နှင့်တွေ့ဆုံခဲ့ချိန်က ကိုရီးယားကျွန်းဆွယ်ပေါ်၌ စစ်ပွဲ သို့မဟုတ် ပရမ်းပတာ အခြေအနေကို ရှောင်လွှဲရန် တိုက်တွန်းခဲ့သည်ဟု တရုတ်နိုင်ငံခြားရေးဝန်ကြီးဌာန၏ ဝက်ဘ်ဆိုက်မှာ ဖော်ပြခဲ့သည်။

ယခုနှစ်အတွင်း အမေရိကန်က ဖိလစ်ပိုင်တွင် တရုတ်၏ ပစ်မှတ်များကို တိုက်ခိုက်နိုင်စွမ်းရှိသည့် ခရုဇ်ဒုံးကျည် များအား ပစ်လွှတ်နိုင်သော Typhon ဒုံးကျည်စနစ်ကို ဖြန့်ကြက်ချထားခဲ့သည်။

ဖိလစ်ပိုင်မှာ ဖြန့်ကြက်ထားတဲ့ အမေရိကန်ရဲ့ ဒုံးကျည်စနစ်ကိုတွေ့ရစဉ်

တရုတ်ကမူ ထိုဒုံးကျည်စနစ်များကို ရုပ်သိမ်းရန် တောင်းဆိုခဲ့ပြီး အင်ဒို-ပစိဖိတ်ဒေသတွင် ထိုကဲ့သို့ ဒုံကျည်စနစ် များ ဖြန့်ကြက်ချထားမှုအား ရုရှားနှင့်အတူ ပူးပေါင်းပြီး ဝေဖန်ရှုတ်ချခဲ့သလို အမေရိကန်သည် လက်နက် အပြိုင်အဆိုင်တပ်ဆင်ရန် လှုံ့ဆော်နေကြောင်း စွပ်စွဲခဲ့သည်။

ထိုလက်နက်စနစ်များ ဖြန့်ကြက်ချထားမှုသည် ဒေသတွင်းနိုင်ငံများ၏ အကျိုးစီးပွားအတွက် မဟုတ်ကြောင်း လည်း ဝမ်ယိက ပြောကြားခဲ့သည်။

ဖိလစ်ပိုင်သည် အာရှတွင် အမေရိကန်၏ မဟာဗျူဟာ၌ အရေးကြီးသည့် နိုင်ငံများထဲတွင်ပါဝင်ပြီး ထိုင်ဝမ်ကို တရုတ်က တိုက်ခိုက်လာပါက အမေရိကန်သည် ထိုင်ဝမ်အား စစ်ရေးအကူအညီပေးရန် ဖိလစ်ပိုင်သည် မဟာဗျူဟာကျသော တည်နေရာတွင် ရှိနေသည်။

ဝမ်ယိကတော့ တရုတ်နှင့် တောင်ကိုရီးယားအကြား ပူးပေါင်းဆောင်ရွက်မှုများသည် ယခုနှစ်အတွင်း ပိုမိုမြင့်တက် လာခဲ့သည်ဟု တောင်ကိုရီးယားနိုင်ငံခြားရေးဝန်ကြီးကို ပြောကြားခဲ့သည်။

Source: ဘန်ကောက်ပို့စ်