CNI International News

ဂျာကာတာ၊ စက်တင်ဘာ ၅

အင်ဒိုနီရှားနိုင်ငံတွင် ကျောင်းသားများဦးဆောင်သည့် ဆန္ဒပြသူများက စက်တင်ဘာ ၄ ရက်တွင် ဂျာကာတာ (Jakarta) မြို့တော်ရှိ လွှတ်တော် အဆောက်အအုံရှေ့တွင် စုရုံးဆန္ဒပြခဲ့ကြောင်း ရိုက်တာမှ ဖော်ပြခဲ့သည်။

ပြီးခဲ့သည့် သီတင်းပတ်က ကမ္ဘာ့ တတိယအကြီးဆုံး ဒီမိုကရေစီနိုင်ငံဖြစ်သည့် အင်ဒိုနီးရှားတွင် ဆန္ဒပြမှုများ စတင်ဖြစ်ပွားခဲ့ကာ ရဲတပ်ဖွဲ့နှင့် ဆန္ဒပြမှုများကြား အထိကရုဏ်းများ ဖြစ်ပွားခဲ့သည်။

BEM SI ဟု လူသိများသည် ကျောင်းသားအဖွဲ့အစည်းများ စုပေါင်းထားသည့် ညွန့်ပေါင်းအဖွဲ့ကမူ ပြည်သူများ အနေဖြင့် ငြိမ်းချမ်းစွာ ဆန္ဒထုတ်ဖော်မှုတွင် ပူးပေါင်းပါဝင်ကြရန် တိုက်တွန်းထားသည်။

“ပြည်သူတွေကြားမှာ တည်ငြိမ်မှု ပျက်ယွင်းစေတာက လမ်းပေါ်က ဆန္ဒပြမှုတွေကြောင့် မဟုတ်ပါဘူး။ အဂတိ လိုက်စားမှုတွေ၊ နိုင်ငံရေးသဘော သက်ဝင်နေတဲ့ ဥပဒေတွေ၊ ပုံဖျက်ထားတဲ့ သမိုင်းကြောင်းနဲ့ ပြည်သူတွေကို မျက်ကွယ်ပြုထားတဲ့ အစိုးရရဲ့မူဝါဒတွေကြောင့် ဖြစ်ပါတယ်” ဟု BEM SI အဖွဲ့က ပြောကြားခဲ့သည်။

အင်ဒိုနီးရှား ဆန္ဒပြ ကျောင်းသား/သူတွေကို တွေ့ရစဉ်

ပြီးခဲ့သည့် သီတင်းပတ်က ဆန္ဒပြမှုတွင် ရဲကားတစ်စီးက အသက် ၂၁ နှစ်အရွယ် ဆိုင်ကယ် ယာဉ်မောင်းတစ်ဦးကို ဝင်တိုက်ခဲ့သဖြင့် ဆိုင်ကယ်သမား သေဆုံးပြီးနောက် ဆန္ဒပြမှုများသည် ဆူပူအုံကြွမှုအဖြစ် ပြောင်းလဲသွားခဲ့သည်။

ထိုဆိုင်ကယ် ယာဉ်မောင်း သေဆုံးခဲ့သည့် ဖြစ်စဉ်နှင့်ပတ်သက်ပြီး ဘင်္ဂလားဒေ့ရှ်အစိုးရက ရဲတပ်ဖွဲ့အရာရှိ တစ်ဦးကို ကျင့်ဝတ်သိက္ခာ ချိုးဖောက်မှုဖြင့် ပြစ်မှုထင်ရှားတွေ့ရှိပြီး ရာထူးမှ ထုတ်ပယ်ခဲ့သည်။

လက်ရှိ အချိန်အထိ အင်ဒိုနီးရှားနိုင်ငံတစ်ဝန်း ဆန္ဒပြမှုများအတွင်း လူပေါင်း ၃၀၀၀ ကျော် ဖမ်းဆီးခံခဲ့ရကြောင်း လူ့အခွင့်အရေးစောင့်ကြည့်ရေးအဖွဲ့က ထုတ်ပြန်ခဲ့သည်။

ဆူပူအုံကြွမှုများ၊ ပစ္စည်းများကို ဝင်ရောက် လုယက်သည့် ဖြစ်စဉ်များအတွင်း သေဆုံးသူ ၁၀ ဦးရှိပြီး ၁၀၀၀ ကျော် ဒဏ်ရာ ရရှိခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

“အင်ဒိုနီးရှား အာဏာပိုင်တွေ အနေနဲ့ အစိုးရမူဝါဒတွေနဲ့ ပတ်သက်တဲ့ ဆန္ဒပြမှုတွေကို အင်အား အလွန်အကျွံ သုံးပြီး မဖြိုခွဲသင့်ပါဘူး”ဟု လူ့အခွင့်အရေးစောင့်ကြည့်ရေးအဖွဲ့၏ အာရှရေးရာ လက်ထောက်ညွှန်ကြားရေးမှူး မီနာစီ ဂန်ဂူလီ (Meenakshi Ganguly) က ပြောကြားခဲ့သည်။

Source: ရိုက်တာ

CNI International News

ဘေဂျင်း၊ စက်တင်ဘာ ၄

တရုတ်နိုင်ငံ ဘေဂျင်းမြို့တော်တွင် ဒုတိယကမ္ဘာစစ် ပြီးဆုံးသည့် နှစ်ပေါင်း ၈၀ ပြည့် အထိမ်းအမှတ်အဖြစ် စက်တင်ဘာ ၃၀ ရက်က တီအန်မင်ရင်ပြင် (Tiananmen Square)၌ ပြုလုပ်သည့် စစ်ရေးပြ အခမ်းအနားကို နိုင်ငံပေါင်း ၂၀ ကျော်မှ ကမ္ဘာ့ခေါင်းဆောင်များ တက်ရောက်ခဲ့သည်ဟု South China Morning Post မှ ဖော်ပြခဲ့သည်။

ထိုစစ်ရေးပြ အခမ်းအနားသည် ဘေဂျင်းတွင် ပြုလုပ်သည့် ဒုတိယအကြိမ်မြောက် စစ်ရေးပြ အခမ်းအနားဖြစ်ပြီး ပထမအကြိမ်က စစ်ရေးပြ အခမ်းနားကို ၂၀၁၅ ခုနှစ်က ပြုလုပ်ခဲ့သည်။

ဒေသစံတော်ချိန် နံနက် ၉ နာရီမှ စတင်ပြီး မိနစ် ၉၀ နီးပါးကြာ ပြုလုပ်ခဲ့သည့် စစ်ရေးပြ အခမ်းအနားသည် တရုတ်၏ စစ်အင်အား ကြီးမားလာမှုကို ပြသသော အခမ်းအနားအဖြစ် ရှုမြင်ခံခဲ့ရသည်။

ထို့ပြင် တရုတ်သည် ၎င်း၏ ကမ္ဘာလုံးဆိုင်ရာ ခေါင်းဆောင်မှုကဏ္ဍကို ပိုမိုခိုင်မာစေရန်နှင့် သံတမန်ရေး ဩဇာ အာဏာ မြင့်တက်လာမှုကို ပြသသည့် အားထုတ်ကြိုးပမ်းမှု အဖြစ်လည်း ကျွမ်းကျင်သူများ ယူဆခဲ့သည်။

ထိုစစ်ရေးပြ အခမ်းအနားတွင် သတိပြုရမည့် အချက် ၅ ချက်ရှိခဲ့ပြီး ထိုအချက်များကို ဖော်ပြပေးသွားမည် ဖြစ်သည်။

နံပါတ်(၁) ရှီ၊ ပူတင်နှင့် ကင်မ်ဂျုံအန်
*********************************
ထိုစစ်ရေးပြ အခမ်းအနားကို ကမ္ဘာ့ခေါင်းဆောင်ပေါင်း ၂၀ ခန့် တက်ရောက်ခဲ့သော်လည်း တရုတ်သမ္မတ ရှီကျင့်ဖျင် (Xi Jinping)၊ ရုရှားသမ္မတ ဗလာဒီမာ ပူတင် (Vladimir Putin) နှင့် မြောက်ကိုရီးယားခေါင်းဆောင် ကင်မ်ဂျုံအန် (Kim Jong-un) ကိုသာ မီဒီယာများက ဦးစားပေး ဖော်ပြခဲ့ကြသည်။

၎င်းတို့ ၃ ဦးသည် ကော်ဇောနီပေါ်တွင် လမ်းလျှောက်ရင်း တစ်ယောက်နှင့်တစ်ယောက် ရင်းနှီးစွာ စကားပြောပြီး လက်ဆွဲ နှုတ်ဆက်နေပုံများသည် အနောက်နိုင်ငံများကို ဖီဆန်သည့် အမှာစကားတစ်ခု ဖြစ်သည်ဟု ကျွမ်းကျင် သူများက သုံးသပ်ခဲ့ကြသည်။

တရုတ်စစ်တပ် လက်နက်သစ်ကိုတွေ့ရစဉ်

နံပါတ်(၂) ဘယ်သူတွေ မတက်ရောက်ခဲ့သလဲ
*****************************************
တရုတ်၏ စစ်ရေးပြ အခမ်းအနားကို အမေရိကန်၊ အနောက်ဥရောပ၊ ဂျပန်၊ အိန္ဒိယနှင့် တောင်ကိုရီးယားနိုင်ငံများမှ ခေါင်းဆောင်များ တက်ရောက်ခဲ့ခြင်း မရှိပေ။

နံပါတ်(၃) ရှီက ဘာတွေ သတင်းစကား ပါးခဲ့သလဲ
********************************************
စစ်ရေးပြ အခမ်းအနား၏ အဖွင့်မိန့်ခွန်းတွင် ရှီက ကမ္ဘာကြီးသည် ငြိမ်းချမ်းရေးနှင့် စစ်ပွဲကို ရွေးချယ်ရမည့် အခြေ အနေနှင့် ရင်ဆိုင်နေရကြောင်း၊ တရုတ်သည် မည်သည့် ပုံစံမျိုးနှင့်မဆို မည်သည့်အခါမျှ ခြိမ်းခြောက်ခံရမည့် မဟာနိုင်ငံ တစ်ခုဖြစ်ကြောင်း ပြောကြားခဲ့သည်။

ထိုမှတ်ချက် စကားများသည် အမေရိကန်နှင့် ၎င်း၏ မဟာမိတ်များကို ရည်ညွှန်းခဲ့ခြင်း ဖြစ်နိုင်သည်ဟု ကျွမ်းကျင် သူများက ပြောကြားခဲ့သည်။

ရှီ၊ ပူတင်နှင့် ကင်မ်တို့၏ ဓာတ်ပုံများအရ တရုတ်သည် ၎င်း၏ မိတ်ဆွေများနှင့်အတူ ရပ်တည်ရန် တွန့်ဆုတ်နေ မည် မဟုတ်ဘဲ၊ ၎င်း၏ မိတ်ဆွေများသည် နိုင်ငံတကာတွင် ဝေဖန်ရှုတ်ချ ခံနေရသည့်တိုင် ထိုမိတ်ဆွေများကို ထောက်ခံသွားမည့် သဘောထားကို ပြသခြင်းဖြစ်ကြောင်း အတ္တလန္တိတ်ကောင်စီ၏ Global China Hub မှ ကျွမ်းကျင်သူ ဝမ်တီဆောင်း (Wen-ti Sung) က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) ကလည်း ထိုစစ်ရေးပြ အခမ်းအနားနှင့်ပတ်သက်ပြီး ၎င်း၏ မှတ်ချက်စကားကို Truth Social လူမှုမီဒီယာတွင် ရေးသားခဲ့သည်။

“သူတို့က အမေရိကန်ကို ဆန့်ကျင်နေပေမယ့်လည်း ဗလာဒီမာပူတင်နဲ့ ကင်မ်ဂျုံအန်ကို ကျနော်က အလေးထား ပါတယ်လို့ ပြောပါရစေ” ဟု ထရမ့်က ထေ့ငေါ့သည့် ပုံစံဖြင့် ရေးသားခဲ့သည်။

နံပါတ်(၄) စစ်အင်အားပြသမှု
**************************
ထိုစစ်ရေးပြ အခမ်းအနားအတွင်း တရုတ်သည် တင့်ကားများနှင့် ဒရုန်းများမှအစ တာဝေးပစ် ဒုံးကျည်များနှင့် နျူကလီးယားထိပ်ဖူး တပ်ဆင်နိုင်သည့် ဒုံးကျည်များ၊ တိုက်လေယာဉ်များ၊ ကိုယ်ပျောက် လေယာဉ်များအဆုံး နောက်ဆုံးပေါ် စစ်လက်နက်ပစ္စည်းများကို ထုတ်ဖော်ပြသခဲ့သည်။

နံပါတ်(၅) ထိုင်ဝမ်အရေး
**********************
ရှီ၏ မိန့်ခွန်းထဲတွင် “တရုတ်နိုင်ငံ၏ အမျိုးသားပြန်လည် အားသစ်လောင်းမှု”ဆိုသည့် စကားလုံးကို ထည့်သွင်း ပြောကြားခဲ့သည်။

ထိုစကားလုံးသည် ထိုင်ဝမ်ကို တရုတ်၏ တရားဝင် နယ်နိမိတ်ဖြစ်စေရန် တရုတ်၏ အနာဂတ်အတွက် ရှီ၏ ကြီးမားသည့် နှစ်ရှည်စီမံကိန်းကို ဖော်ပြသည့် စကားလုံးဖြစ်သည်။

ထိုင်ဝမ်သမ္မတ လိုင်ချင်တေး (Lai Ching-te)က တရုတ်၏ စစ်ရေးပြ အခမ်းအနားကို လျစ်လျူရှုခဲ့ပြီး ထိုင်ဝမ် ဒေသခံများသည် ငြိမ်းချမ်းရေးကို မြတ်နိုးကြောင်း၊ ထိုင်ဝမ်သည် သေနတ်ပြောင်းဝမှလာသည့်  ငြိမ်းချမ်းရေးကို အထိမ်းအမှတ် ပြုလုပ်မည် မဟုတ်ကြောင်း ပြောကြားခဲ့သည်။

Source: South China Morning Post

CNI International News

ဝါရှင်တန်၊ စက်တင်ဘာ ၄

တရားမဝင် မူးယစ်ဆေးဝါးများ သယ်ဆောင်လာသည်ဟု ယူဆရသည့် ဗင်နီဇွဲလားမှ ထွက်ခွာလာသော  သင်္ဘော တစ်စင်းကို အမေရိကန်စစ်တပ်က စက်တင်ဘာ ၂ ရက်တွင် တိုက်ခိုက်ခဲ့သဖြင့် လူ ၁၁ ဦးသေဆုံးခဲ့သည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထိုဖြစ်စဉ်သည် ကာရစ်ဘီယံတောင်ပိုင်း ရေပြင်များသို့ အမေရိကန် စစ်သင်္ဘောများ ဖြန့်ကြက်ချထားပြီး နောက်ပိုင်း ပထမဆုံး စစ်ဆင်ရေးတစ်ခု ဖြစ်ခဲ့သည်။

“ကျနော်တို့က နောက်ဆုံး မိနစ်အချိန်မှာပဲ သင်္ဘောတစ်စင်းကို ပစ်ခဲ့ပါတယ်။ မူးယစ်ဆေးဝါးတွေ သယ်ဆောင် လာတဲ့ သင်္ဘောပါ။ သင်္ဘောပေါ်မှာ မူးယစ်ဆေးဝါးတွေ အများကြီး ပါပါတယ်” ဟု ထရမ့်က အိမ်ဖြူတော်တွင် သတင်းထောက်များကို ပြောကြားခဲ့သည်။

“ဒါပေမယ့် ပြဿနာက မပြီးသေးပါဘူး။ ကျနော်တို့ နိုင်ငံထဲကို မူးယစ်ဆေးဝါးတွေ အများကြီး ဝင်ရောက်ခဲ့ ပြီးပါပြီ။ ဟိုးအရင်ကတည်းကပါ။ အဲဒီ မူးယစ်ဆေးဝါးတွေက ဗင်နီဇွဲလားနိုင်ငံက ထွက်လာတာ ဖြစ်ပါတယ်” ဟု ထရမ့်က ပြောကြားခဲ့သည်။

ထရမ့်သည် နောက်ပိုင်းတွင် ၎င်း၏ Truth Social လူမှုမီဒီယာတွင် ပင်လယ်ပြင်၌ စပိဘုတ်တစ်စင်းကို ဒရုန်း တစ်စင်းဖြင့် တိုက်ခိုက်နေသည့် ဗွီဒီယိုနှင့် စပိတ်ဘုတ် မီးလောင် ပေါက်ကွဲသွားသော ဗွီဒီယိုမှတ်တမ်းများကို တင်ခဲ့သည်။

ထရမ့် ထုတ်ပြန်တဲ့ ဗွီဒီယိုထဲက တိုက်ခိုက်ခံရတယ်ဆိုတဲ့ သင်္ဘောကို တွေ့ရစဉ်

“ဒီတိုက်ခိုက်မှုမှာ အကြမ်းဖက်သမား ၁၁ ယောက် သေဆုံးသွားပါတယ်။ ကျနော်တို့ အမေရိကန်တပ်ဖွဲ့တွေ ဘက်က ထိခိုက်ဒဏ်ရာ မရခဲ့ပါဘူး”ဟု ထရမ့်က ပြောကြားခဲ့သည်။

စပိဘုတ်ပေါ်တွင် လိုက်ပါလာသည့် သင်္ဘောသားများသည် ဗင်နီဇွဲလား၏ Tren de Aragua လူဆိုးဂိုဏ်းဝင်များ ဖြစ်ကြောင်း အမေရိကန်စစ်တပ်က စုံစမ်းဖော်ထုတ်နိုင်ခဲ့သည်ဟု ဆိုသည်။

Tren de Aragua အဖွဲ့သည် အမေရိကန်တွင် အကြမ်းဖက်အဖွဲ့ သတ်မှတ်ခံထားရပြီး ထိုအဖွဲ့ကို ဗင်နီဇွဲလား သမ္မတ မာဒူရို (Nicolas Maduro) က ထိန်းချုပ်ထားကြောင်း ထရမ့်က ပြောကြားခဲ့သည်။

ဗင်နီဇွဲလားနိုင်ငံ၏ ဆက်သွယ်ရေးဝန်ကြီး ဖရက်ဒီ နာနက်ဇ် (Freddy Nanez) ကမူ လူမှုမီဒီယာပေါ်တွင် ထရမ့် တင်ထားသည့် ဗွီဒီယိုသည် AI ဖြင့် ဖန်တီးထားသော ဗွီဒီယိုဖြစ်ကြောင်း ပြောကြားခဲ့သည်။

Source: ရိုက်တာ

CNI International News

ဘေဂျင်း၊ စက်တင်ဘာ ၄

အနာဂတ်ခေါင်းဆောင်အဖြစ် ရှေ့ပြေးနေသူ ဆယ်ကျော်သက်အရွယ် သမီးဖြစ်သူကို မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un)က တရုတ်နိုင်ငံ ဘေဂျင်းမြို့တော်သို့ ခေါ်ဆောင်လာခဲ့ပြီး ပွဲထုတ် ခဲ့သည်ဟု ရိုက်တာမှ ဖော်ပြခဲ့သည်။

ထိုခရီးစဉ်သည် ကင်မ်၏ သမီးဖြစ်သူအတွက် ပထမဆုံး ပြည်ပခရီးစဉ်တွင် လူထုရှေ့မှောက်သို့ ထွက်ပေါ်လာ ခဲ့ခြင်းဖြစ်ကြောင်း ရိုက်တာမှ ဖော်ပြခဲ့သည်။

ထို့ကြောင့် မြောက်ကိုရီးယား ခေါင်းဆောင် ကင်မ်၏ သမီးဖြစ်သူသည် သားစဉ်မြေးဆက် အုပ်ချုပ်လာခဲ့သည့် မြောက်ကိုရီးယား မိသားစု၏ အရိုက်အရာကို ဆက်ဆံရဖွယ်ရှိကြောင်း ထင်ကြေးပေးမှုများ ထွက်ပေါ်လာခဲ့သည်။

မြောက်ကိုရီးယားသည် ကင်မ်၏ သမီးဖြစ်သူ၏ အမည်နှင့် အသက်တို့ကို မည်သည့် အခါကမျှ ထုတ်ပြန်ခဲ့ခြင်း မရှိသော်လည်း တောင်ကိုရီးယား ထောက်လှမ်းရေး အရာရှိများကမူ ကင်မ်၏ သမီး၏အမည်မှာ ကင်မ်ဂျူအဲ (Kim Ju Ae) ဖြစ်ကြောင်း အမေရိကန် ဘတ်စ်ကက်ဘော ကစားသမား ဒန်းနစ် ရော့မန်း (Dennis Rodman)၏ ပြော ကြားချက်ကို ကိုးကားဖော်ပြခဲ့သည်။

ရော့မန်းသည် ၂၀၁၃ ခုနှစ်က ကင်မ်၏ မိသားစုနှင့်အတူ နေထိုင်ခဲ့ဖူးပြီး ထိုအချိန်က ကလေးအရွယ်သာ ရှိသေး သည့် ကင်မ်၏ သမီးကို ချီခဲ့ဖူးသည်ဟု ဆိုသည်။

မြောက်ကိုရီးယားခေါင်းဆောင် ကင်မ် စီးနင်းလိုက်ပါလာသည့် ရထားသည် ဘေဂျင်းမြို့တော်သို့ ရောက်ရှိချိန်တွင် ကင်မ်ဂျူအဲသည် ဖခင်ဖြစ်သူ၏ နောက်မှကပ်ပြီး ရထားပေါ်မှ ဆင်းလာသည်ကို မြင်တွေ့ရသည်။

ကင်မ်ဂျုံအန် တရုတ်နိုင်ငံကို ရောက်လာစဉ် သမီးဖြစ်သူကို နောက်မှာတွေ့ရစဉ်

“အခုချိန်အထိတော့ ဂျူအဲဟာ မြောက်ကိုရီးယား ခေါင်းဆောင်သစ်ဖြစ်ဖို့ ရေပန်းစားနေတဲ့သူပါ။ သူဟာ လက်တွေ့ကျတဲ့ လုပ်ငန်းစဉ်တွေကို အတွေ့အကြုံ ရယူနေတာကြောင့် မြောက်ကိုရီးယား ခေါင်းဆောင်သစ် ဖြစ်လာလိမ့်မယ် ထင်ကြေး ပေးခံထားရပါတယ်”ဟု အမေရိကန်အခြေစိုက် Stimson Center မှ မြောက်ကိုရီးယားအရေး ကျွမ်းကျင်သူ မိုက်ကယ် မက်ဒန် (Michael Madden) က ပြောကြားခဲ့သည်။

ယခု ခရီးစဉ်သည် ဂျူအဲအတွက် ဖခင်ဖြစ်သူ ကင်မ်နှင့် မြောက်ကိုရီးယား နိုင်ငံပြင်ပကို ပထမဆုံးအကြိမ် လိုက်ပါ လာခြင်းဖြစ်ပြီး ထိုအတွေ့အကြုံကို ဖခင်ဖြစ်သူ ကင်မ်နှင့် အဒေါ်ဖြစ်သူ ကင်မ်ယိုဂျုံ (Kim Yo Jong) တို့ တစ်ခါမှ မရခဲ့ဖူးကြောင်း မက်ဒန်က ပြောကြားခဲ့သည်။

ကင်မ်သည့ ဆယ်ကျော်သက် ဘဝက ၎င်း၏ ဖခင် ကင်မ်ဂျုံအီ (Kim Jong Il) နှင့် ပြည်ပခရီးစဉ် မလိုက်ခဲ့ရဖူးဘဲ ကင်မ်ယိုဂျုံသည်လည်း ဆယ်ကျော်သက်ဘဝက ပြည်ပခရီးစဉ်တွင် ပါဝင်ခဲ့ဖူးခြင်း မရှိပေ။

ကင်မ်၏ ဖခင်ဖြစ်သူ ကင်မ်ဂျုံအီသည် မြောက်ကိုရီးယားနိုင်ငံကို ထူထောင်ခဲ့သည့် ၎င်း၏ ဖခင် ကင်အီဆွန်း (Kim Il Sung) နှင့်အတူ ပြည်ပခရီးစဉ်များတွင် လိုက်ပါခွင့်ရခဲ့သည်။

Source: ရိုက်တာ

CNI International News

ဘန်ကောက်၊ ဩဂုတ် ၄

ထိုင်း၏ အာဏာရပါတီဖြစ်သည့် ဖြူးထိုင်းပါတီမှ ယာယီဝန်ကြီးချုပ် ဖွမ်သမ် ဝီချာယာချိုင်း (Phumtham Wechayachai) က ရွေးကောက်ပွဲ ကျင်းပရန်အတွက် လွှတ်တော်ကို ဖျက်သိမ်းရန် ဘုရင့်ထံမှ ခွင့်ပြုချက်ရရှိဖို့ အဆိုပြုထားကြောင်း Nikkei Asia မှ ဖော်ပြခဲ့သည်။

အောက်လွှတ်တော်ရှိ အတိုက်အခံ အင်အားစုမှ အစိုးရသစ်ဖွဲ့စည်းရန် အခြားပါတီတစ်ခုကို ထောက်ခံသွားမည်ဟု ပြောကြားခဲ့ပြီးနောက် စက်တင်ဘာ ၂ ရက်တွင် ဖွမ်သမ်က လွှတ်တော်ဖျက်သိမ်းရေးအတွက် ဘုရင့်ထံ အဆိုပြု တင်သွင်းခဲ့ခြင်း ဖြစ်သည်။

ပြီးခဲ့သည့် သီတင်းပတ်က အခြေခံဥပဒေဆိုင်ရာ တရားရုံးက ဖြူးထိုင်းပါတီ၏ ဝန်ကြီးချုပ် ပေတုန်တန် (Paetongtarn Shinawatra) ကို ကျင့်ဝတ်သိက္ခာ ချိုးဖောက်မှုဖြင့် ဝန်ကြီးချုပ်ရာထူးမှ ဖယ်ရှားခဲ့ပြီးနောက် ဖြူထိုင်းပါတီသည် ရွေးကောက်ပွဲ အသစ်တစ်ခု ပြုလုပ်ရန် ပြင်ဆင်နေခြင်းဖြစ်သည်။

ဘူဂျထိုင်းပါတီ၏ ခေါင်းဆောင် အနူတင် ချန်ဗီယာကူလ်ကို တွေ့ရစဉ်

ပြီးခဲ့သည် ရက်ပိုင်းက အောက်လွှတ်တော်၏ နေရာ ၃ ပုံ ၁ ပုံကို ထိန်းချုပ်ထားသည့် အတိုက်အခံ ပြည်သူ့ပါတီ ကမူ လွှတ်တော်ကို မဖျက်သိမ်းဘဲ နောက်ထပ် အစိုးရသစ်ဖွဲ့စည်းရန်နှင့် ထိုအစိုးရအဖွဲ့သစ်ကို ဘူဂျထိုင်းပါတီ၏ ခေါင်းဆောင် အနူတင် ချန်ဗီယာကူလ် (Anutin Charnvirakul) အား ဝန်ကြီးချုပ်အဖြစ် အဆိုပြုရန် ထောက်ခံ ကြောင်း ကြေညာခဲ့သည်။

ထို့ကြောင့် လွှတ်တော်ကို ဖျက်သိမ်းပြီး ရွေးကောက်ပွဲ ပြုလုပ်ရန် ကြိုးပမ်းနေသည့် ဖြူးထိုင်းပါတီနှင့် လွှတ်တော် ကို မဖျက်သိမ်းဘဲ ဝန်ကြီးချုပ်သစ် ရွေးချယ်ကာ အစိုးရသစ်ဖွဲ့ရန် ကြိုးပမ်းနေသော အတိုက်အခံအင်အားစုများ ကြား ပွတ်တိုက်မှုများ ဖြစ်ပွားနေသည်။

ပေတုန်တန် ထုတ်ပယ်ခံရပြီးနောက် ၎င်း၏ ဖြူးထိုင်းပါတီသည် ညွန့်ပေါင်းအစိုးရအဖွဲ့သစ်ဖွဲ့ရန် ခက်ခဲလာခဲ့ သဖြင့် လွှတ်တော်ကို ဖျက်သိမ်းပြီး ရွေးကောက်ပွဲအသစ် ပြုလုပ်ရန် စီစဉ်ခဲ့ခြင်းဖြစ်သည်။

ပေတုန်တန်ကို တွေ့ရစဉ်

ပေတုန်တန် ရှင်နာဝပ်သည် ရှင်နာဝပ် မိသားစု၏ ထောက်ခံမှုကို ရရှိခဲ့ပြီး ရာထူးမှ ဖယ်ရှားခံရသည့် ဆဋ္ဌမမြောက် ဝန်ကြီးချုပ် ဖြစ်လာခဲ့မှုနှင့်အတူ ထိုင်းနိုင်ငံ၏ ပြိုင်ဘက် အီလစ်များကြား နှစ်ပေါင်း ၂၀ ကြာ အာဏာလွန်ဆွဲမှု အခြေအနေကို ပေါ်လွင်စေခဲ့သည်။

ရာထူးမှ ဖယ်ရှားခံခဲ့ရသည့် ရှင်နာဝပ် မိသားစုဝင်များနှင့် ရှင်နာဝပ် မိသားစုက ထောက်ခံခဲ့သည့် ဝန်ကြီးချုပ် ၆ ဦး ရှိခဲ့သည်။

ထိုကဲ့သို့ ဝန်ကြီးချုပ်ရာထူးမှ ဖြုတ်ချ သို့မဟုတ် ဖယ်ရှားခံရသူများမှာ သက်ဆင် ရှင်နာဝပ် (Thaksin Shinawatra)၊ ဆမ်မက် ဆန်ဒါရာဗီဂျ် (Samak Sundaravej)၊ ဆွမ်ချိုင်း ဝေါင်ဆာဝတ် (Somchai Wongsawat)၊ ယင်းလပ် ရှင်နာဝပ် (Yingluck Shinawatra)၊ ဆရီသာ သာဗီဆင် (Srettha Thavisin) နှင့် ယခု ပေတုန်တန်တို့ ဖြစ်သည်။

လက်ရှိတွင် ယာယီအစိုးရအဖွဲ့က လွှတ်တော်ကို ဖျက်သိမ်းပိုင်ခွင့် ရှိ၊မရှိ အငြင်းအခုံများ ဖြစ်ပွားနေသော်လည်း ထိုင်း၏ အခြေခံဥပဒေအရ ဘုရင်က လွှတ်တော်ဖျက်သိမ်းရေး အဆိုပြုချက်ကို အတည်ပြုခဲ့မည်ဆိုပါက ရွေးကောက်ပွဲကို ၄၅ ရက်မှ ရက်ပေါင်း ၆၀ ကြား ပြုလုပ်ရမည်ဖြစ်သည်။

Source: Nikkei Asia

CNI International News

ဘေဂျင်း၊ စက်တင်ဘာ ၃

တရုတ်သမ္မတ ရှီကျင့်ဖျင် (President Xi) သည် စက်တင်ဘာ ၂ ရက်က တရုတ်နိုင်ငံ၊ ဘေဂျင်းမြို့တော်တွင် အနောက်အုပ်စုကို စိန်‌‌ခေါ်နေသည့် ရုရှားသမ္မတ ဗလာဒီမာပူတင် (Vladimir Putin)၊ မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) တို့နှင့် တွေ့ဆုံ၍ အစည်းအဝေး ပြုလုပ်ခဲ့ကြောင်း ရိုက်တာမှ ဖော်ပြခဲ့သည်။

ဥရောပတွင် နှစ်ပေါင်း ၈၀ အတွင်း အဆိုးရွားဆုံး စစ်ပွဲဖြစ်သည့် ယူကရိန်းစစ်ပွဲ၌ ၎င်းတို့၏ အခန်းကဏ္ဍနှင့် ပတ်သက်ပြီး အနောက်နိုင်ငံများ၏ ဖယ်ကြဉ်မှု ခံထားရချိန်မှာ ၎င်းတို့ကြား စည်းလုံးညီညွတ်မှုကို ပြသခြင်း ဖြစ်နိုင်ကြောင်း ကျွမ်းကျင်သူများက ပြောကြားခဲ့သည်။

ရှီသည် ပြည်သူ့မဟာ ခန်းမဆောင်တွင် ပူတင်နှင့် အစည်းအဝေး ပြုလုပ်ခဲ့ပြီး ရှီက ပူတင်ကို မိတ်ဆွေဟောင်း ကြီးဟု ခေါ်ဆိုခဲ့သည်။

ထို့နောက် နာရီပိုင်းအကြာတွင် ဘေဂျင်းမြို့တော်သို့ ကျည်ကာရထားဖြင့် ရောက်ရှိလာသည့် ကင်မ်နှင့် အစည်းအဝေး ပြုလုပ်ခဲ့သည်။

၎င်းတို့ ၃ ဦးသည် စက်တင်ဘာ ၃ ရက်တွင် ပြုလုပ်မည့် တရုတ်၏ စစ်ရေးပြ အခမ်းအနားတွင် အတူတကွ တက်ရောက်မည်ဖြစ်သည်။

 ရုရှားသမ္မတ ပူတင်နဲ့ တရုတ်သမ္မတ ရှီကျင့်ဖျင်ကို တွေ့ရစဉ်

အမေရိကန်သမ္မတ ဒေါ်နယ်ထရမ့် (Donald Trump) ၏ အမေရိကန်ပထမ မူဝါဒကြောင့် အမေရိကန်၏ မဟာမိတ်နိုင်ငံများနှင့် ဆက်ဆံရေး တင်းမာနေချိန်တွင် ရှီသည် ကမ္ဘာ့အခင်းအကျင်းသစ်အတွက် ၎င်း၏အမြင်ကို ထုတ်ဖော်ပြသမည် ဖြစ်သည်။

ရှီသည် စက်တင်ဘာ ၂ ရက်ကလည်း အိန္ဒိယဝန်ကြီးချုပ် မိုဒီ (Narendra Modi) နှင့် ဆွေးနွေးခဲ့ပြီး အိန္ဒိယသည် ရုရှားထံမှ ရေနံများကို ဆက်လက် ဝယ်ယူနေသဖြင့် ထရမ့်က အိန္ဒိယကို ပစ်မှတ်ထားကာ ကုန်သွယ်ခွန်များ မြှင့်တင်ခဲ့သည်။

ထရမ့်၏ ဘဏ္ဍာရေးဝန်ကြီး စကော့ ဘက်ဆန့် (Scott Bessent) ကမူ ရုရှားထံမှ ရေနံများ အများဆုံး ဝယ်ယူနေ သည့် တရုတ်နှင့် အိန္ဒိယသည် ယူကရိန်းစစ်ပွဲတွင် ရုရှား၏ စစ်ရေးကြိုးပမ်းမှုများကို အားပေးလှုံ့ဆော်နေကြောင်း စွပ်စွဲခဲ့သည်။

Source: ရိုက်တာ

CNI International News

ကာရာကက်စ်၊ စက်တင်ဘာ ၃

ကာရစ်ဘီယံတွင် ဖြန့်ကြက်ချထားသည့် အမေရိကန်တပ်ဖွဲ့များ၏ တိုက်ခိုက်မှုကို ခံရမည်ဆိုလျှင် တုံ့ပြန်ရန် အသင့်ရှိကြောင်းနှင့် အမြင့်ဆုံး အခြေအနေအထိ ပြင်ဆင်ထားကြောင်း ဗင်နီဇွဲလားသမ္မတ မာဒူရို (Nicolás Maduro)က စက်တင်ဘာ ၁ ရက်တွင် ပြောကြားခဲ့သည်ဟု အေပီမှ ဖော်ပြခဲ့သည်။

အမေရိကန်အစိုးရက လက်တင်အမေရိကမှ မူးယစ်ဆေးဝါးဂိုဏ်းများ၏ ခြိမ်းခြောက်မှုကို တိုက်ဖျက်ရန်အတွက် ဗင်နီဇွဲလားနိုင်ငံ၏ ကမ်းလွန်ရေပြင်များသို့ စစ်သင်္ဘောများ စေလွှတ်ခဲ့သည်။

ထို့နောက် မာဒူရိုက အမေရိကန်စစ်အင်အားကို တုံ့ပြန်ရန် အသင့်ရှိသည်ဟု ပြောကြားခဲ့ခြင်း ဖြစ်သည်။

အမေရိကန်အစိုးရကတော့ ဗင်နီဇွဲလား ကမ်းလွန်ရေပြင်များတွင် ထောင်နှင့်ချီသည့် စစ်သားများ ဖြန့်ကြက်ချထား ခဲ့ပြီးနောက် မြေပြင်ကျူးကျော် ဝင်ရောက်မည့် အစီအစဉ်ကို အချက်ပြခဲ့ခြင်း မရှိသော်လည်း မာဒူရို၏ အစိုးရ သည် ၎င်း၏ ကမ်းရိုးတန်းဒေသနှင့် ကိုလံဘီယာ နယ်စပ်ဒေသများတွင် စစ်သားများကို ဖြန့်ကြက်ချထားခဲ့သည်။

ထို့ပြင် ဗင်နီဇွဲလား နိုင်ငံသားများ အနေဖြင့် ပြည်သူ့စစ်အဖွဲ့ အနေဖြင့် ပါဝင်ကြရန် မာဒူရိုက တိုက်တွန်းထား သည်။

“အခုလို အဆုံးစွန် စစ်ရေးဖိအားနဲ့ ရင်ဆိုင်နေရချိန်မှာ ဗင်နီဇွဲလားရဲ့ ကာကွယ်ရေးအတွက် အဆုံးစွန် ကြိုတင် ပြင်ဆင်မှုတွေ လုပ်ဆောင်ထားတဲ့အကြောင်း ကျနော်တို့ ကြေညာပါတယ်” ဟု ၎င်းက ပြောသည်။

စစ်သင်္ဘောတစ်စင်းကို တွေ့ရစဉ်

ထို့ပြင် အမေရိကန်၏ စစ်အင်အား ဖြန့်ကြက်ချထားမှုသည် တရားလွန်ဖြစ်ခြင်း၊ တရားမျှတမှုမရှိခြင်း၊ စောင့်စည်း မှု မရှိခြင်း၊ အကြွင်းမဲ့ ရာဇဝတ်မှု မြောက်ခြင်းနှင့် ဆိုးရွားသည့် ခြိမ်းခြောက်မှုဖြစ်ကြောင်း မာဒူရိုက ပြောကြားခဲ့ သည်။

အကယ်၍ အမေရိကန်က ဗင်နီဇွဲလားကို တိုက်ခိုက်ခဲ့မည်ဆိုပါက ဗင်နီဇွဲလားအစိုးရသည် လက်နက်စွဲကိုင် ခုခံ တော်လှန်သွားမည်ဟု ၎င်းက ပြောကြားခဲ့သော်လည်း အသေးစိတ် ဖော်ပြခဲ့ခြင်းမရှိပေ။

အမေရိကန်ရေတပ်သည် ကာရစ်ဘီယံဒေသတွင် Aegis အမျိုးအစား ပဲ့ထိန်းဒုံးကျည်တပ် ဖျက်သင်္ဘော ၂ စင်းဖြစ် သည့် USS Gravely နှင့် USS Jason Dunham သင်္ဘောနှစ်စင်းကို ဖြန့်ကြက်ချထားပြီး လက်တင်အမေရိက၏ ကမ်းလွန် ရေပြင်များတွင်လည်း USS Sampson ဖျက်သင်္ဘောနှင့် USS Lake Erie ခရူဇာစစ်သင်္ဘောတို့ကို ဖြန့်ကြက်ချထားသည်။

ထို့ပြင် ကုန်း၊ရေ နှစ်သွယ် စစ်ဆင်ရေး ပြုလုပ်နိုင်သည့် စစ်သင်္ဘော သုံးစင်းသည်လည်း ရေတပ်သင်္ဘောသားများ၊ မရိန်းတပ်သား ၄၀၀၀ ကျော်နှင့်အတူ လက်တင်အမေရိက ရေပြင်များသို့ ယခုသီတင်းပတ်အတွင်း ရောက်ရှိလာ မည်ဖြစ်သည်။

Source: အေပီ

CNI International News

တီအန်ကျင်း၊ စက်တင်ဘာ ၃

မြန်မာနိုင်ငံတွင် ပြုလုပ်မည့် ရွေးကောက်ပွဲသည် တရားမျှတမှုနှင့် သက်ဆိုင်သူအားလုံးပါဝင်မှု ရှိလိမ့်မည်ဟု အိန္ဒိယအနေဖြင့် မျှော်လင့်ထားကြောင်း အိန္ဒိယဝန်ကြီးချုပ် မိုဒီ (Narendra Modi)က ပြောကြားခဲ့သည်ဟု Hindustan Times မှ ဖော်ပြခဲ့သည်။

မိုဒီသည် ဩဂုတ် ၃၁ ရက်က တရုတ်နိုင်ငံ၊ တီယန်ကျင်း (Tianjin) မြို့တွင် ပြုလုပ်ခဲ့သည့် ရှန်ဟိုင်းပူးပေါင်း ဆောင်ရွက်မှုအဖွဲ့(SCO) အစည်းအဝေးတွင် မြန်မာနိုင်ငံ၏ နိုင်ငံတော်လုံခြုံရေးနှင့်အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် သီးသန့် တွေ့ဆုံချိန်၌ ပြောကြားခဲ့ခြင်းဖြစ်သည်။

ဗိုလ်ချုပ်မှူးကြီးမင်းအောင်လှိုင်သည် တီယန်ကျင်းမြို့၌ ပြုလုပ်သည့် SCO အစည်းအဝေးတွင် အထူးဧည့်သည် တော်အဖြစ် ဖိတ်ကြားခံရသည့် နိုင်ငံတကာခေါင်းဆောင်များထဲတွင် တစ်ဦး အပါအဝင် ဖြစ်သည်။

အိန္ဒိယဝန်ကြီးချုပ် မိုဒီနဲ့ ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ် 

မြန်မာနိုင်ငံတွင် တပ်မတော်က အာဏာကို ရယူခဲ့သည့် ၂၀၂၁ ခုနှစ်နောက်ပိုင်း လက်နက်ကိုင်ပဋိပက္ခများ ဖြစ်ပွားခဲ့သဖြင့် အိန္ဒိယနိုင်ငံ အထူးသဖြင့် အိန္ဒိယအရှေ့မြောက်ပိုင်းဒေသအတွက် လုံခြုံရေးကို စိုးရိမ်မှုများ မြင့်တက်စေခဲ့သည်။

အိန္ဒိယသည် အိမ်နီးချင်းနိုင်ငံများ ပထမမူဝါဒ (Neighbourhood First)၊ အရှေ့မျှော် မူဝါဒ (Act East) နှင့် အင်ဒို-ပစိဖိတ် မူဝါဒများ၏ တစ်စိတ်တစ်ပိုင်းအဖြစ် မြန်မာနိုင်ငံနှင့် ဆက်ဆံရေးများကို အရေးကြီးသည့် နေရာတွင် ထားရှိကြောင်း မိုဒီက ဗိုလ်ချုပ်မှူးကြီးမင်းအောင်လှိုင်ကို ပြောကြားခဲ့သည်။

မြန်မာနိုင်ငံတွင် ပြုလုပ်ရန် စီစဉ်ထားသည့် ရွေးကောက်ပွဲများသည် တရားမျှတမှုရှိပြီး သက်ဆိုင်သူအားလုံး ပါဝင်သည့်ပုံစံဖြင့် ကျင်းပလိမ့်မည်ဟု အိန္ဒိယအနေဖြင့် မျှော်လင့်ကြောင်း အိန္ဒိယပြည်ထဲရေးဝန်ကြီးဌာနက ပြောကြားခဲ့သည်။

အိန္ဒိယသည် မြန်မာနိုင်ငံက ဦးဆောင်သည့် မြန်မာနိုင်ငံ၏ ကိုယ်ပိုင် ငြိမ်းချမ်းရေး လုပ်ငန်းစဉ်ကို ထောက်ခံ ကြောင်း မိုဒီက ပြောကြားခဲ့သည်။

မြန်မာ့တပ်မတော် အစိုးရသည် ဒီဇင်ဘာ ၂၈ ရက်တွင် တစ်ဆင့်ချင်းစီ ပြုလုပ်မည့် ရွေးကောက်ပွဲ အစီအစဉ်များ ကို ဩဂုတ်လက ကြေညာခဲ့သည်။

အတိုက်အခံ အင်အားစုများကမူ ထိုရွေးကောက်ပွဲကို သပိတ်မှောက်မည်ဟု ပြောကြားခဲ့သည်။

အိန္ဒိယဝန်ကြီးချုပ် မိုဒီနဲ့ ကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ် 

လတ်တလောတွင် လက်နက်ကိုင်အဖွဲ့များသည် အိန္ဒိယ၏ အရှေ့မြောက်ပိုင်း ပြည်နယ်များနှင့် မြန်မာနိုင်ငံကြား ထိစပ်နေသည့် နယ်စပ်ဒေသ တစ်လျှောက်ရှိ ကုန်သွယ်ရေးလမ်းကြောင်းများနှင့် အဓိကနယ်နိမိတ်များကို ထိန်းချုပ်ထားသည်။

ထို့ပြင် အိန္ဒိယ၏ မီဇိုရမ် (Mizoram) ပြည်နယ်တွင် မြန်မာဒုက္ခသည် ထောင်နှင်ချီ ခိုလှုံနေထိုင်လျက်ရှိပြီး နယ်စပ် တစ်ဖက်တစ်ချက်စီရှိ လက်နက်ကိုင်အဖွဲ့များကြား ချိတ်ဆက် ဆောင်ရွက်မှုများကို အိန္ဒိယအစိုးရက စိုးရိမ်ခဲ့ သည်။

ထို့ပြင် မိုဒီနှင့် ဗိုလ်ချုပ်မှူးကြီး မင်းအောင်လှိုင်တို့သည် မိတ်ဖက်ဆက်ဆံရေး မြှင့်တင်ရေး၊ ကာကွယ်ရေး၊ လုံခြုံရေး၊ နယ်စပ်အရေး စီမံခန့်ခွဲရေး၊ နယ်စပ်ကုန်သွယ်ရေးတို့ အပါအဝင် နယ်ပယ်ကဏ္ဍ အများအပြားတွင် ဆွေးနွေးခဲ့ပြီး နှစ်နိုင်ငံဆက်ဆံရေးကို သုံးသပ်ခဲ့ကြသည်ဟု ဆိုသည်။

ထို့ပြင် အိန္ဒိယသည် မြန်မာနိုင်ငံ၏ ဖွံ့ဖြိုးတိုးတက်ရေးဆိုင်ရာ လိုအပ်ချက်များကို ထောက်ပံ့ပေးရန် အသင့်ရှိ ကြောင်းလည်း မိုဒီက ပြောကြားခဲ့သည်။

Source: Hindustan Times

CNI International News

တီအန်ကျင်း၊ စက်တင်ဘာ ၂

တရုတ်နိုင်ငံ တီယန်ကျင်း (Tianjin) မြို့တွင် စက်တင်ဘာ ၁ ရက်က ပြုလုပ်ခဲ့သည့် ရှန်ဟိုင်းပူးပေါင်းဆောင်ရွက် ရေးအဖွဲ့ (SCO) အစည်းအဝေးတွင် တရုတ်သမ္မတ ရှီကျင့်ဖျင် (Xi Jinping) က ဒေသတွင်း နိုင်ငံများအနေဖြင့် ဖွံ့ဖြိုးတိုးတက်ရေး မဟာဗျူဟာများကို ပူးပေါင်းဆောင်ရွက်ရန် တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။

ရုရှားသမ္မတ ဗလာဒီမာပူတင် (Vladimir Putin) ကလည်း အမေရိကန်ကို စိန်ခေါ်နိုင်မည့် ကမ္ဘာလုံးဆိုင်ရာ လုံခြုံရေးနှင့် စီးပွားရေးအခင်းအကျင်းအတွက် ရှီ၏ ရည်မှန်းချက်ကို ထောက်ခံကြောင်း ပြောကြားခဲ့သည်။

SCO သည် နိုင်ငံတကာ ဆက်ဆံရေးများတွင် ပုံစံအသစ်တစ်မျိုး ချမှတ်ခဲ့ကြောင်း ရှီက သြဂုတ် ၃၁ ရက်နှင့် စက်တင်ဘာ ၁ ရက်တွင် ပြုလုပ်ခဲ့သည့် နှစ်ရက်ကြာ အစည်းအဝေး၏ ဒုတိယနေ့တွင် အဖွင့်မိန့်ခွန်း ပြောကြားခဲ့သည်။

“ကျနော်တို့အနေနဲ့ သာတူညီမျှမှု ပိုရှိစေတဲ့ ကမ္ဘောလုံးဆိုင်ရာ ပူးပေါင်းဆောင်ရွက်ရေး၊ ဘက်စုံပါဝင်တဲ့ စီးပွားရေး နဲ့ ဝင်ရိုးစုံကမ္ဘာ အခင်းအကျင်းကို ထူထောင်ဖို့အတွက် အားကြိုးမာန်တက် ဆောင်ရွက်သင့်ပါတယ်”ဟု ရှီက ပြောကြားခဲ့သည်။

SCO ထိပ်သီး အစည်းအဝေး ကျင်းပနေစဉ်

SCO အဖွဲ့အနေဖြင့် စွမ်းအင်၊ အခြေခံ အဆောက်အအုံ၊ သိပ္ပံနှင့် နည်းပညာ၊ AI နည်းပညာ အပါအဝင် နယ်ပယ် ကဏ္ဍ အသီးသီးတွင် ပူးပေါင်းဆောင်ရွက်မှုများကို မြှင့်တင်ရန်လည်း ရှီက တိုက်တွန်းခဲ့သည်။

နိုင်ငံပေါင်းစုံပါဝင်သည့် ကုန်သွယ်ရေးစနစ်များကို ထောက်ခံရန်၊ စစ်အေးကာလ စိတ်သဘောထားများနှင့် အုပ်စုလိုက် ထိပ်တိုက်တွေ့မှုကို ရှောင်ကြဉ်ရန်လည်း ရှီက အစည်းအဝေး တက်ရောက်လာသော နိုင်ငံ ခေါင်းဆောင်များကို ပြောကြားခဲ့သည်။

ပူတင်ကလည်း မတူကွဲပြားသည့် နိုင်ငံသုံး ငွေကြေးများနှင့်အတူ စစ်မှန်ပြည့်ဝသော နိုင်ငံပေါင်းစုံ ပါဝင်မှု ဝါဒကို ပြန်လည်အသက်သွင်းခြင်းသည် ဥရောပနှင့် အာရှ တည်ငြိမ်ရေးနှင့် လုံခြုံရေး၏ စနစ်သစ်တစ်ခုကို ဖွဲ့စည်းရာ တွင် နိုင်ငံရေးနှင့် လူမှု-စီးပွားမူဘောင်အား ချမှတ်ရာရောက်ကြောင်း ပြောကြားခဲ့သည်။

“အဲဒီ လုံခြုံရေးစနစ်ဟာ ဥရောပဗဟိုပြုပုံစံ နဲ့ ဥရောပ-အန္တလန္တိတ်ဗဟိုပြု ပုံစံတွေနဲ့ မတူဘဲ နိုင်ငံပေါင်းစုံရဲ့ အကျိုးစီးပွားတွေကို ထည့်သွင်းစဉ်းစားသွားမှာ ဖြစ်ပါတယ်။ ပြီးတော့ တစ်နိုင်ငံက အကျိုးရှိစေဖို့အတွက် ကျန်တဲ့ နိုင်ငံတွေက အကျိုးယုတ်မယ့် အဖြစ်မျိုးကို လုံးဝအဖြစ်ခံမှာ မဟုတ်ပါဘူး”ဟု ပူတင်က ပြောကြားခဲ့သည်။

SCO အဖွဲ့ကို ဥရောပနှင့်အာရှရှိ နိုင်ငံ ၆ နိုင်ငံနှင့် စတင်ဖွဲ့စည်းခဲ့ခြင်းဖြစ်ပြီး နောက်ပိုင်းတွင် အမြဲတမ်းအဖွဲ့ဝင် ၁၀ နိုင်ငံအထိ ရှိလာခဲ့ကာ မိတ်ဖက်နိုင်ငံများနှင့် လေ့လာစောင့်ကြည့်သူ နိုင်ငံပေါင်း ၁၆ နိုင်ငံ ရှိလာခဲ့သည်။

Source: ရိုက်တာ