CNI International News

ဘန်ကောက်၊ ဖေဖော်ဝါရီ ၇

မြန်မာဘက်ခြမ်းရှိ ကျားဖြန့်ကို ထိန်းချုပ်နှိမ်နင်းရေးအတွက် ထိုင်းက လျှပ်စစ်ဓာတ်အား၊ စက်သုံးဆီနှင့် အင်တာနက်များကို ဖြတ်တောက်လိုက်ကြောင်း The Nation မှ ဖော်ပြခဲ့သည်။ 

မြန်မာနိုင်ငံ၏ နယ်စပ်ဒေသ ၅ ခုကို လျှပ်စစ်ဓာတ်အား၊ အင်တာနက်နှင့် လောင်စာဆီ ထောက်ပံ့မှုများ ဖြတ်တောက်မှုအတွက် ထိုင်းနိုင်ငံကို မည်သူကမျှ အပြစ်မတင်နိုင်ကြောင်း ထိုင်းဒုဝန်ကြီးချုပ်နှင့် ပြည်ထဲရေး ဝန်ကြီး အနူတင် ချာဗီရာကူလ် ( Anutin Charnvirakul) က ပြောသည်။

မြန်မာနိုင်ငံ နယ်စပ်ဒေသရှိ ကျားဖြန့်လုပ်ငန်းများကို တိုက်ဖျက်သည့် အားထုတ်ကြိုးပမ်းမှုများ၏ တစ်စိတ် တစ်ပိုင်းအဖြစ် ထိုကဲ့သို့ လုပ်ဆောင်ခဲ့ခြင်း ဖြစ်သည်ဟု ဆိုသည်။

“သူတို့တွေဟာ စွမ်းအင်ရင်းမြစ်ရဖို့ တခြားတစ်နေရာက ယူချင်ယူ ဒါမှမဟုတ် သူတို့ကိုယ်ပိုင် လျှပ်စစ်ဓာတ်အား ထုတ်တာတွေ လုပ်ဆောင်နိုင်ပါတယ်”ဟု အနူတင်က ပြောသည်။

ထိုင်းဒုဝန်ကြီးချုပ်နှင့် ပြည်ထဲရေးဝန်ကြီး အနူတင် ချာဗီရာကူလ်ကို တွေ့ရစဉ်

ထိုင်း-မြန်မာ နယ်စပ်ဒေသတစ်လျှောက် အပါအဝင် အရှေ့တောင်အာရှတွင် ကျားဖြန့်စင်တာများသည် လူပေါင်း သောင်းနှင့်ချီပြီး ထိန်းသိမ်းထားကာ အွန်လိုင်းမှ ငွေလိမ်သည့် လုပ်ငန်းများကို အတင်းအဓမ္မ စေခိုင်းနေပြီး နှစ်စဉ် ဒေါ်လာ ဘီလျံချီ ရရှိနေကြောင်း ၂၀၂၃ ခုနှစ်က ကုလသမဂ္ဂ၏ ထုတ်ပြန်ချက်တွင် ဖော်ပြခဲ့သည်။

ပြီးခဲ့သည့်လက မြန်မာနိုင်ငံပိုင် Global New Light of Myanmar သတင်းစာ၏ ဆောင်းပါးတစ်ပုဒ်တွင်လည်း ကျားဖြန့်လုပ်ငန်းများအတွက် လျှပ်စစ်ဓာတ်အားနှင့် အင်တာနက် အပါအဝင် အခြေခံ လိုအပ်ချက်များကို မြန်မာနိုင်ငံက ထောက်ပံ့ပေးနေခြင်း မဟုတ်ဘဲ အခြားနိုင်ငံများထံမှ ရရှိနေခြင်းဖြစ်ကြောင်း ဖော်ပြခဲ့သည်။

ထိုင်းပြည်နယ်ဆိုင်ရာ လျှပ်စစ်ဓာတ်အားအာဏာပိုင်အဖွဲ့ (PEA) ကမူ ဖေဖော်ဝါရီ ၅ ရက် နံနက် ၉ နာရီမှစပြီး မြန်မာနယ်စပ်ရှိ နေရာဒေသ ၅ ခုကို ထောက်ပံ့ပေးနေသည့် လျှပ်စစ်ဓာတ်အား စုစုပေါင်း ၂၀ ဒသမ ၃၇ မဂ္ဂါဝပ်ကို ဖြတ်တောက်ခဲ့သည်။

ထိုကဲ့သို့ ဖြတ်တောက်မှုကြောင့် ထိုင်းအတွက် နှစ်စဉ်ဝင်ငွေ ဘတ် သန်း ၆၀၀ (ဒေါ်လာ ၁၇ ဒသမ ၈၄ သန်း) ဆုံးရှုံးနစ်နာလိမ့်မည်ဟု ကျွမ်းကျင်သူများက ပြောကြားခဲ့သည်။

ထိုင်းက လျှပ်စစ်ဓာတ်အားဖြတ်တောက်နေစဉ်

လျှပ်စစ်ဓာတ်အား ဖြတ်တောက်ခံရသည့် နေရာများသည် မြန်မာနိုင်ငံ၏ တာချီလိတ်၊ မြဝတီနှင့် ဘုရားသုံးဆူ မြို့တို့တွင် ရှိနေသည့် နေရာများဖြစ်သည်။

ဘုရားသုံးဆူမြို့တွင် နေထိုင်သည့် ဒေသခံတစ်ဦးကမူ ဖေဖော်ဝါရီ ၅ ရက် နံနက်ပိုင်းမှစပြီး လျှပ်စစ်ဓာတ်အားများ ပြတ်တောက်မှုကို ဒေသခံများခံစားခဲ့ရပြီး တရုတ်စီးပွားရေး လုပ်ငန်းများနှင့် ကျားဖြန့်စင်တာများကမူ မီးစက်များ အသုံးပြုပြီး လုပ်ငန်းများကို လည်ပတ်နေကြောင်း ပြောကြားခဲ့သည်။

“ပြီးခဲ့တဲ့ ၂ ရက်လောက်ကတည်းက မြို့ထဲကို မီးစက်အကြီးကြီးတွေ ရောက်လာတာကို ကျနော်တို့ မြင်ခဲ့ရပါ တယ်။ ဒီနေ့မှာတော့ အဲဒီမီးစက်ကြီးတွေကိုသုံးပြီး ကျားဖြန့်စင်တာတွေ အပါအဝင် သူတို့ စီးပွားရေးလုပ်ငန်းတွေ ကို ဆက်ပြီးလုပ်နေကြပါတယ်”ဟု အမည်မဖော်လိုသည့် ဘုရားသုံးဆူမြို့ခံတစ်ဦးက ပြောကြားခဲ့သည်။

“ဒေသခံတွေ ဖွင့်ထားတဲ့ စီးပွားရေး လုပ်ငန်းတွေကတော့ ရပ်တန့်သွားခဲ့ပြီး မြို့ထဲကလူတွေလည်း ဒုက္ခရောက် နေကြပါတယ်”ဟု ၎င်းက ဆက်လက် ပြောကြားခဲ့သည်။

Source: The Nation

CNI International News

ဝါရှင်တန်၊ ဖေဖော်ဝါရီ ၆

အမေရိကန်သမ္မတ ဒေါ်နယ်ထရမ့် (Donald Trump) အစိုးရအဖွဲ့က အမေရိကန်၏ နိုင်ငံတကာ ဖွံ့ဖြိုးတိုးတက် ရေး အေဂျင်စီဖြစ်သည့် USAID ၏ ဝန်ထမ်းအားလုံးနီးပါးကို အလုပ်နားပြီး ခွင့်ယူကြရန် ဖေဖော်ဝါရီ ၄ ရက်က အမိန့်ထုတ်ပြန်ခဲ့ကြောင်း အေပီမှ ဖော်ပြခဲ့သည်။

ထို့ကြောင့် ကမ္ဘာတစ်ဝန်း ငတ်မွတ်ခေါင်းပါးမှု တိုက်ဖျက်ရေး၊ ပညာရေး ထောက်ပံ့မှုများနှင့် ကပ်ရောဂါများကို တိုက်ဖျက်ရေးတို့အတွက် ဆယ်စုနှစ် ၆ စုကြာ လုပ်ဆောင်ခဲ့သည့် USAID သည် အဆုံးသတ်တော့မည့် အခြေအနေသို့ ရောက်ရှိစေခဲ့သည်။

USAID ဝန်ထမ်းများကို ပေးပို့သည့် အီးမေးလ်များနှင့် အွန်လိုင်းမှ နို့တစ်စာအရ USAID ၏ အဓိကကျသည့် တာဝန်များ၊ ခေါင်းဆောင်မှုပိုင်းနှင့် အထူးသတ်မှတ်ထားသော စီမံကိန်းများတွင် တာဝန်ယူထားသည့် ဝန်ထမ်း များမှလွဲပြီး ကျန်ငှားရမ်းထားသော ဝန်ထမ်းအားလုံးကို ဖေဖော်ဝါရီ ၇ ရက်မှစပြီး ခွင့်ယူရလိမ့်မည်ဟု ဖော်ပြ ထားသည်။

ထိုအမိန့်သည် ဖေဖော်ဝါရီ ၆ ရက် ညသန်းခေါင်တွင် စတင် အသက်ဝင်မည်ဖြစ်ပြီး ပြည်ပနိုင်ငံများရှိ USAID ဝန်ထမ်းများအနေဖြင့် ရက်ပေါင်း ၃၀ ကြာ အိမ်ပြန်ရမည်ဖြစ်သည်။

အီလွန်မာ့စ်နဲ့ ဒေါ်နယ်ထရမ့်ကို တွေ့ရစဉ်

ထိုအစီအစဉ်သည် လွတ်လပ်စွာ ဖွဲ့စည်းထားသည့် USAID ကို နိုင်ငံခြားရေးဝန်ကြီးဌာန လက်အောက်သို့ သွတ်သွင်းမည့် အဆိုပြုချက်များထဲမှ တစ်စိတ်တစ်ပိုင်းဖြစ်သည်။

အခြားအစီအစဉ်များတွင် USAID ၏ အသေးစား မစ်ရှင်များကို ပိတ်ပင်ခြင်းနှင့် အကြီးစား စီမံကိန်းများကို တစ်စိတ်တစ်ပိုင်း ပိတ်ပင်ခြင်းတို့လည်း ပါဝင်သည်။

ဒီမိုကရက်တစ် လွှတ်တော်အမတ်များ၏ ဝေဖန်မှုများရှိနေသည့်တိုင် USAID သည် အမေရိကန်အစိုးရအဖွဲ့သစ်နှင့် အီလွန်မာ့စ် (Elon Musk) ၏ ဘတ်ဂျက်လျှော့ချရေး ဌာနဖြစ်သည့် အစိုးရအကျိုးဆောင်ဌာနတို့၏ အဓိကပစ်မှတ် တစ်ခုဖြစ်ခဲ့သည်။

ပြည်ပနိုင်ငံများရှိ ထောင်နှင့်ချီသည့် USAID ဝန်ထမ်းများကို ဖယ်ရှားခြင်းသည် ယူကရိန်းနိုင်ငံကဲ့သို့ လုံခြုံရေး အထောက်အပံ့များ ရရှိနေသည့် နိုင်ငံများ အပါအဝင် နိုင်ငံပေါင်း ၁၂၀ ခန့်ရှိ ဒေါ်လာ ဘီလျံချီ တန်ကြေးရှိသော ပရော်ဂျက်များကို ထိခိုက်စေမည်ဖြစ်သည်။

ထို့ပြင် ပိုလီယို၊ ရေကျောက်ရောဂါများ တိုက်ဖျက်ရေးနှင့် HIV/AIDS ရောဂါ တားဆီးရေးတို့ကဲ့သို့ ကျန်းမာရေး အစီအစဉ်များသည်လည်း ရပ်တန့်သွားခဲ့ပြီဖြစ်သည်။

Source: အေပီ

CNI News

၂၀၂၅ ခုနှစ်၊ ဖေဖော်ဝါရီ ၆

အမေရိကန်နိုင်ငံသို့ နေထိုင်ခွင့် အထောက်အထားမဲ့ သို့မဟုတ် တရားမဝင် ရောက်ရှိနေသူဖြစ်ပါက အိမ်ရှင်အစိုးရ ၏ တာဝန်ရှိသူများက ပြည်နှင်ချိန်မှ ထွက်ခွာခြင်းထက် ကြိုတင်ထွက်ခွာသင့်ကြောင်း အမေရိကန်နိုင်ငံဆိုင်ရာ မြန်မာသံရုံးက ၂၀၂၅ ခုနှစ်၊ ဖေဖော်ဝါရီ ၅ ရက်တွင် ထုတ်ပြန်သတိပေးခဲ့သည်။

အမေရိကန်သမ္မတ ရွေးကောက်ပွဲတွင် အနိုင်ရရှိခဲ့သော ဒေါ်နယ်ထရမ့် တက်လာသည့်အခါမှာ အမေရိကန်အစိုးရ သည် နိုင်ငံအတွင်းသို့ အထောက်အထားမဲ့ သို့မဟုတ် တရားမဝင် ရောက်ရှိနေသော ရွှေ့ပြောင်းများကို ဖမ်းဆီး၍ မိခင်နိုင်ငံသို့ ပြန်လည် ဖော်ဆောင်လျက်ရှိနေသည်။

ထိုသို့ ဖော်ဆောင်ရာတွင် အမေရိကန်အစိုးရသည် စစ်တပ်သုံး လေယာဉ်များကို အသုံးပြု၍ လက်ထိပ်ခတ်ကာ ပို့ဆောင်နေခြင်းဖြစ်သလို နေရပ်မပြန်လိုသူများကို ဂွာတီနာမိုအကျဉ်းထောင်သို့ ပို့ဆောင်မည်ဖြစ်သည်။

“မိမိဘာသာပြန်ရင် သူတို့ရဲ့ ထောင်သားတယောက်လို လက်ထိပ်ခတ်ခြင်းမှ လွတ်ကင်းခြင်း၊ သူတို့ရဲ့ အကျဉ်း ချခြင်းမှ လွတ်မြောက်ခြင်း၊ မိမိအနေနဲ့ ပိုင်ဆိုင်မှုတွေကို ရောင်းချခွင့်ရပြီး ပြန်နိုင်ခြင်း၊ အနာဂါတ်မှာ ပြန်လာဖို့ ဗီဇာလျှောက်ရင် ဗီဇာရနိုင်ကိန်းပိုများကြောင်း စသဖြင့် သိရပါတယ်”ဟု Moe Chan ဆိုသော ဆိုရှယ်အကောင့် တစ်ခုက ရေးသား ဖော်ပြထားသည်။

အမေရိကန်ရောက် မြန်မာနိုင်ငံသားများအနေဖြင့် အကြောင်းကြောင်းကြောင့် နေထိုင်ခွင့်ဗီဇာ စသည့် တရားဝင် အထောက်အထားများ သက်တမ်းကုန်ဆုံးခြင်း စသည်တို့ ကြုံတွေ့နေရပါက အထောက်အထားမဲ့ နိုင်ငံခြားသား နေရပ်ရွှေ့ပြောင်းသူအဖြစ် သတ်မှတ်ခံရကာ ပြည်နှင်မည့် အနေအထားများ ဖြစ်‌ပေါ်လာနိုင်သဖြင့် ကာယကံရှင် များ၏ ပုဂ္ဂလိက အစီအစဉ်ဖြင့် နေထိုင်ခွင့်ရရှိရေး ကြိုတင်ဆောင်ရွက်နိုင်ကြပါရန် အသိပေးအကြောင်းကြားအပ် ပါသည်ဟု အမေရိကန်နိုင်ငံဆိုင်ရာ မြန်မာသံရုံးက ထုတ်ပြန်ခဲ့သည်။

အကယ်၍ နေထိုင်ခွင့် အထောက်အထားမဲ့ သို့မဟုတ် တရားမဝင် ရောက်ရှိနေသူဖြစ်ပါက အိမ်ရှင်အစိုးရ၏ တာဝန်ရှိသူများက ပြည်နှင်ချိန်မှ ထွက်ခွာခြင်းထက် ကြိုတင်ထွက်ခွာသင့်ပါကြောင်း၊ မြန်မာနိုင်ငံ အပြန်ခရီး အတွက် မည်သည့်ခရီးသွား လက်မှတ်အမျိုးအစားမျှ မရှိပါက သို့မဟုတ် နိုင်ငံကူးလက်မှတ်သည် ကာလကြာ မြင့်စွာ သက်တမ်းလွန်နေပါက မည်သူမည်ဝါဖြစ်ကြောင်း သက်သေခံလက်မှတ် လျှောက်ထားနိုင်ပါကြောင်း၊ လျှောက်ထားရန် ပုံစံနှင့် လိုအပ်ချက်များအား ဤသံရုံး၏ ဝက်ဘ်ဆိုက်မှ ရယူဖြည့်စွက်၍ အီးမေးလ်း/ဖုန်းတို့ဖြင့် ဆောလျင်စွာ ဆက်သွယ်ဆောင်ရွက်နိုင်ပါကြောင်း အသိပေးအကြောင်းကြားအပ်ပါသည်ဟု မြန်မာသံရုံးက ထုတ် ပြန်ချက်တွင် ဖော်ပြထားသည်။

အမေရိကန်အစိုးရသည် ဗင်နီဇွဲလားနိုင်ငံသား ၃ သိန်းကျော်ကိုလည်း အလုပ်လုပ်ခွင့် ရပ်ဆိုင်းထားပြီး ပြည်နှင် ဒဏ်ပေးထားသလို အိန္ဒိယနှင့် ကိုလံဘီယာနိုင်ငံသား ရွှေ့ပြောင်းများကိုလည်း အမေရိကန်စစ်လေယာဉ်များဖြင့် နေရပ်သို့ ပြန်လည် ပို့ဆောင်ခဲ့သည်။ 

အလားတူ မြန်မာနိုင်ငံသား ၇၀၀ နီးပါးကိုလည်း အမေရိကန် အစိုးရက နေရပ်ပြန်ပို့ရန် စာရင်းပြုစုထားကြောင်း ထုတ်ပြန်ထားသည်။

CNI International News

ဘေကျင်း၊ ဖေဖော်ဝါရီ ၆

အမေရိကန်နှင့် ကုန်သွယ်ရေးစစ်ပွဲတွင် တရုတ်ဗဟိုဘဏ်သည် ဖေဖော်ဝါရီ ၅ ရက်က ယွမ်ငွေတန်ဖိုးကို အမေရိကန်ဒေါ်လာနှင့် လဲလှယ်နှုန်းအတွက် မျှော်မှန်းထားသည်ထက် ပိုမိုခိုင်မာစေရန် လုပ်ဆောင်ခဲ့ကြောင်း South China Morning Post မှ ဖော်ပြခဲ့သည်။

ထိုသို့ လုပ်ဆောင်ခြင်းဖြင့် တရုတ်သည် ၎င်း၏ ငွေတန်ဖိုးကို လျှော့ချခြင်းဖြင့် အမေရိကန်၏ အခွန်တိုးကောက် မည့် သက်ရောက်မှုများ လျှော့ချလိုသည့် အစီအစဉ်မရှိကြောင်းကို ပြသရာရောက်ခဲ့သည်။

တရုတ်ဗဟိုဘဏ်သည် ဖေဖော်ဝါရီ ၅ ရက်က ပုံသေနှုန်းထား ငွေလှဲနှုန်းအဖြစ် တစ်ဒေါ်လာလျှင် ၇ ဒသမ ၁၆၉၃ ယွမ် သတ်မှတ်ခဲ့ပြီး ထိုပမာဏသည် ဇန်နဝါရီလကုန်ပိုင်းက တစ်ဒေါ်လာလျှင် ၇ ဒသမ ၁၆၉၈ နှင့်နှိုင်းယှဉ်ပါက ယွမ်ငွေတန်ဖိုး အနည်းငယ် ခိုင်မာလာအောင် လုပ်ဆောင်ခဲ့သည်ကို တွေ့ရမည်ဖြစ်သည်။

ထိုကဲ့သို့ ပုံသေနှုန်းထား ငွေလဲလှယ်နှုန်းသည် ပြည်တွင်း ယွမ်ငွေကြေး လဲလှယ်နှုန်းကို အဆုံးအဖြတ်ပေးရာတွင် အဓိကအခန်းကဏ္ဍမှ ပါဝင်နေပြီး တရုတ်ဗဟိုဘဏ်သည် နေ့စဉ် နှုန်းထားသတ်မှတ်ချက်ကို ၂ ရာခိုင်နှုန်းနှင့် အထက် သို့မဟုတ် ၂ ရာခိုင်နှုန်းအောက်သာ အတက်အကျ စျေးကစားမှုကို ခွင့်ပြုပေးထားသည်။

 တရုတ်ဗဟိုဘဏ်ကို တွေ့ရစဉ်

ကျွမ်းကျင်သူ အများစုကမူ တရုတ်ဗဟိုဘဏ်အနေဖြင့် ယခုနှစ်အတွင်း ယွမ်ငွေကြေးအတွက် နှုန်းထားလျှော့ချ ပေးရန် မျှော်မှန်းထားသည်။ 

ယွမ်ငွေကြေးကို လျှော့ချမည်ဆိုပါက တရုတ်၏ ပို့ကုန်များအပေါ် အမေရိကန်၏ အခွန်တိုးကောက်ခံမှုအား အနည်းငယ် ကာမိစေလိမ့်မည်ဟု ကျွမ်းကျင်သူများက ယူဆထားကြသည်။

အမေရိကန်သည် ဖေဖော်ဝါရီ ၄ ရက်မှစပြီး တရုတ်၏ ပို့ကုန်များအပေါ် အခွန် ၁၀ ရာခိုင်နှုန်း တိုးမြှင့်ကောက်ခံခဲ့ သည်။

“ဒီနေ့ ပုံသေနှုန်းထား သတ်မှတ်မှုဟာ စျေးကွက်ရဲ့ မျှော်လင့်ချက်တွေထက် ပိုမိုခိုင်မာနေပါတယ်။ ဒါကြောင့် တရုတ်ဟာ ယွမ်ငွေတန်ဖိုးကို လျှော့ချပြီး အမေရိကန်ရဲ့ အခွန်တိုးကောက်မယ့် အစီအစဉ်ကို တန်ပြန်မယ့်ပုံ မပေါ်ပါဘူး”ဟု Standard Chartered ဘဏ်၏ စီးပွားရေးပညာရှင် တင်းရွှမ် (Ding Shuang) က ပြောကြား ခဲ့သည်။

“တရုတ်နဲ့ အမေရိကန်အကြား ကုန်သွယ်ရေး ဆွေးနွေးမှုတွေ မပြုလုပ်ရသေးပါဘူး။ ငွေလဲနှုန်း ပုံသေနှုန်းထားကို ခိုင်မာအောင် လုပ်ဆောင်တာဟာ ဆွေးနွေးညှိနှိုင်းမှုတွေအတွက် ကောင်းမွန်တဲ့ အခြေအနေကို ဖြစ်စေပါလိမ့် မယ်။ အမေရိကန်ကလည်း ယွမ်ငွေတန်ဖိုး လျှော့ချတာမျိုးကို မလိုလားပါဘူး” ဟု ၎င်းက ပြောကြားခဲ့သည်။

Source: South China Morning Post

CNI International News

ဝါရှင်တန်၊ ဖေဖော်ဝါရီ ၆

အမေရိကန်သည် စစ်ပွဲကြောင့် ကြေမွနေသည့် ဂါဇာကမ်းမြောင်ဒေသကို လွှဲပြောင်းရယူပြီး အရှေ့အလယ်ပိုင်း၏ သာယာလှပသည့် ကမ်းခြေတစ်ခုအဖြစ် ထူထောင်ပေးမည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့နောက် ပါလက်စတိုင်းများကို အခြားနေရာတွင် ပြန်လည်နေရာချထားပေးသွားမည်ဖြစ်ကြောင်း ၎င်းက ပြောသည်။

“ကျနော် ကိုယ့်ကိုယ်ကို ချစ်ဖို့ကောင်းပြီး အသိပညာပြည့်စုံတဲ့ လူတစ်ယောက်လိုမျိုး မပြောချင်ပါဘူး။ ဒါပေမယ့် (ဂါဇာဟာ) အရှေ့အလယ်ပိုင်းရဲ့ သာယာလှပတဲ့ ကမ်းခြေတစ်ခု ဖြစ်လာမယ်ဆိုရင် ခမ်းနားကြီးကျယ်တဲ့ နေရာ တစ်ခု ဖြစ်လာပါလိမ့်မယ်”ဟု ထရမ့်က ပြောကြားခဲ့သည်။

ထိုပြောကြားချက်ကြောင့် အစ္စရေး-ပါလက်စတိုင်း ပဋိပက္ခတွင် ဆယ်စုနှစ်များစွာကြာ ထားရှိခဲ့သည့် အမေရိကန် ၏ မူဝါဒတွင် အပြောင်းအလဲတစ်ခု ဖြစ်လာစေခဲ့သည။

ထရမ့်သည် ဖေဖော်ဝါရီ ၄ ရက်က အိမ်ဖြူတော်တွင် အစ္စရေးဝန်ကြီးချုပ် နေတန်ယာဟု (Benjamin Netanyahu) နှင့် အစည်းအဝေး ပြုလုပ်ပြီးနောက် ထိုကဲ့သို့ ပြောကြားခဲ့ခြင်းဖြစ်သည်။

သို့သော် ဂါဇာကို အမေရိကန်က လွှဲပြောင်းရယူနိုင်မည့် အခွင့်အာဏာနှင့် မည်သို့ လုပ်ဆောင်မည်ဆိုသည့် အသေးစိတ် အချက်အလက်များကို ထရမ့်က ပြောကြားခဲ့ခြင်းမရှိပေ။

အစ္စရေးဝန်ကြီးချုပ် နေတန်ယာဟုနဲ့ အမေရိကန်သမ္မတဒေါ်နယ်ထရမ့်ကို တွေ့ရစဉ်

“အမေရိကန်က ဂါဇာကမ်းမြောင်ဒေသကို လွှဲပြောင်း ရယူသွားမှာပါ။ ပြီးတော့ ဂါဇာမှာ ကျနော်တို့ အလုပ်တစ်ခု လုပ်သွားမှာပါ။ ဂါဇာမှာရှိတဲ့ မပေါက်ကွဲသေးတဲ့ ဗုံးတွေနဲ့ အခြားလက်နက်တွေကို ဖယ်ရှားရှင်းလင်းဖို့ တာဝန် ယူသွားမှာပါ။ ပြီးတာ့ အဆောက်အအုံ အပျက်တွေကို ဖယ်ရှားရှင်းလင်းပြီး စီးပွားရေးဖွံ့ဖြိုးတိုးတက်အောင် လုပ်ဆောင်သွားမှာပါ။ အဲဒီဒေသမှာ နေထိုင်တဲ့သူတွေအတွက် အလုပ်အကိုင် အခွင့်အလမ်းတွေနဲ့ အိမ်ရာအသစ် တွေလည်း အများကြီး ပေါ်ပေါက်လာပါလိမ့်မယ်” ဟု ထရမ့်က ပြောကြားခဲ့သည်။

ဂါဇာတွင် ဟားမာ့စ်အဖွဲ့နှင့် တစ်နှစ်ကျော်ကြား စစ်ပွဲဖြစ်ပွားနေသည့် အစ္စရေးနိုင်ငံ၏ ဝန်ကြီးချုပ် နေတန်ယာဟု ကမူ ထရမ့်၏ ပြောကြားချက်နှင့်ပတ်သက်ပြီး အသေးစိတ် ထုတ်ပြန်ခဲ့ခြင်းမရှိပေ။

ထို့ပြင် ထရမ့်က ဂါဇာတွင် နေထိုင်သည့် ပါလက်စတိုင်းများကို ဂါဇာ၏ အိမ်နီးချင်း နိုင်ငံများဖြစ်သည့် ဂျော်ဒန်၊ အီဂျစ်နှင့် အခြားအာရပ်နိုင်ငံများ၌ အမြဲတမ်း ပြောင်းလဲနေရာ ချထားပေးရန်လည်း အဆိုပြုခဲ့သည်။

သို့သော် ဂါဇာဒေသခံများကို အတင်းအကျပ် နေရာရွှေ့ပြောင်းမှုသည် နိုင်ငံတကာဥပဒေကို ချိုးဖောက်ခြင်း ဖြစ်လာနိုင်ပြီး အနောက်မဟာမိတ်နိုင်ငံများက ပြင်းပြင်းထန်ထန် ကန့်ကွက်ဖွယ်ရှိသည်။

Source: ရိုက်တာ

CNI International News

ဘန်ကောက်၊ ဖေဖော်ဝါရီ ၆

မြန်မာနိုင်ငံ၏ နယ်စပ်တွင် ကျားဖြန့်စင်တာများ ဖွင့်လှစ်ထားသည်ဟု ယူဆချက်များ ထွက်ပေါ်နေချိန်၌ ထိုင်း ပြည်နယ်ဆိုင်ရာ လျှပ်စစ်ဓာတ်အား အာဏာပိုင်အဖွဲ့ (PEA)က ဖေဖော်ဝါရီ ၅ ရက် နံနက်ပိုင်းမှစပြီး မြန်မာ၏ နယ်စပ်ဒေသ ၅ ခုကို လျှပ်စစ်ဓာတ်အားများ ဖြတ်တောက်လိုက်ကြောင်း The Nation မှ ဖော်ပြခဲ့သည်။

လျှပ်စစ်ဓာတ်အားများ ဖြတ်တောက်သည့် နေရာဒေသများသည် ထိုင်းနိုင်ငံ၏ တာ့ခ် (Tak) ပြည်နယ်၊ ကန်ချနာဘူရီ (Kanchanaburi) ပြည်နယ်နှင့် ချင်းရိုင် (Chiang Rai) ပြည်နယ်များတွင် တည်ရှိသည်။

ပြည်ထဲရေးဝန်ကြီးဌာန၏ အမြဲတမ်းအတွင်းဝင် အန်ဆစ် ဆမ်ဖန်သာရတ် (Ansit Samphantharat) နှင့် PEA အုပ်ချုပ်ရေးမှူး အက်အွန်း (Ek-un) တို့က ဖေဖော်ဝါရီ ၅ ရက် နံနက် ၉ နာရီတွင်  လျှပ်စစ်ဓာတ်အား ဖြတ်တောက်မှုကို ကိုယ်တိုင်တက်ရောက် ကြည့်ရှုခဲ့သည်။

ထိုင်းပြည်ထဲရေးဝန်ကြီးကို တွေ့ရစဉ်

ထိုင်းအမျိုးသားလုံခြုံရေးကောင်စီ (NSC) က ဖေဖော်ဝါရီ ၄ ရက်တွင် အစည်းအဝေး ပြုလုပ်ခဲ့ပြီးနောက် လျှပ်စစ်ဓာတ်အားများ ဖြတ်တောက်ရန် ကြေညာချက် ထုတ်ပြန်ခဲ့ခြင်းဖြစ်သည်။

လျှပ်စစ်ဓာတ်အား ဖြတ်တောက်သည့် နယ်စပ်ဖြတ်ကျော် ဓာတ်အားလိုင်းများမှာ အောက်ပါအတိုင်းဖြစ်သည်။

မယ့်ဆိုင်မြစ်၊ ချင်းရိုင်- မြန်မာနိုင်ငံ ရှမ်းပြည်နယ်နယ်စပ်မြို့ဖြစ်သည့် တာချီလိတ်သို့ ဓာတ်အားထောက်ပံ့ပေးနေ သည့်လိုင်း၊ ဘန်မောင်းဒိုင် (Ban Mueang Daeng) ချင်းရိုင်- တာချီလိတ်မြို့သို့ ဓာတ်အား ထောက်ပံ့ပေးသည့် လိုင်းတို့ ဖြစ်သည်။

ထို့နောက် ဘန်ဟွေမောင်း (Ban Huay Muang) တာ့ခ် - မြဝတီသို့ ဓာတ်အားထောက်ပံ့ပေးသည့်လိုင်း၊ အမှတ်၂ ထိုင်း-မြန်မာ ချစ်ကြည်ရေးတံတား၊ တာ့ခ် - မြဝတီသို့ ဓာတ်အား ထောက်ပံ့ပေးသည့်လိုင်း အပါအဝင် ဖရာချီဒီ ဆမ်အွန် စစ်ဆေးရေးဂိတ် (Phra Chedi Sam Ong Checkpoint) ၊ ကန်ချနာဘူရီ - မြန်မာ နိုင်ငံ မွန်ပြည်နယ်ရှိ ဘုရားသုံးဆူမြို့သို့ ဓာတ်အားထောက်ပံ့ပေးသည့်လိုင်းတို့ ဖြစ်သည်။ 

မြန်မာဘက်ကို ထိုင်းက လျှပ်စစ်ဖြတ်တောက်နေစဉ်

ထိုကဲ့သို့ လျှပ်စစ်ဓာတ်အားများ ဖြတ်တောက်မှုအပြင် ထိုင်းအာဏာပိုင်များက ကျားဖြန့်ဂိုဏ်းများကို ပစ်မှတ် ထားသည့် အနေဖြင့် ထိုနေရာဒေသများသို့ စားသုံးဆီနှင့် စက်သုံးစီ ထောက်ပံ့မှုကို ရပ်တန့်ခြင်း အင်တာနက် လိုင်းများကို ပိတ်ပင်ခြင်းတို့ ပြုလုပ်ခဲ့သည်။

ထိုင်းနှင့်မြန်မာ ချုပ်ဆိုထားသည့် စာချုပ်အရ ထိုင်း၏ အမျိုးသားလုံခြုံရေးအတွက် အန္တရာယ်ရှိလာနိုင်သည်ဟု ယူဆရပါက လျှပ်စစ်ဓာတ်အားလိုင်းများ ထောက်ပံ့မှုကို ဖြတ်တောက်ခွင့်ရှိကြောင်း ထိုင်းပြည်ထဲရေးဝန်ကြီး အနူတင် ချာဗီရာကူလ် (Anutin Charnvirakul) က ပြောကြားခဲ့သည်။

ထိုကဲ့သို့ လျှပ်စစ်ဓာတ်အား ဖြတ်တောက်မှု၏ သက်ရောက်မှုများကို စီမံခန့်ခွဲရန် ထိုင်းနိုင်ငံခြားရေးဝန်ကြီး ဌာနက မြန်မာနိုင်ငံနှင့် ပူးပေါင်းဆောင်ရွက်သွားမည်ဟု ၎င်းက ဆိုသည်။

Source: The Nation

CNI International News

ဝါရှင်တန်၊ ဖေဖော်ဝါရီ ၅

အမေရိကန် အမိမြေလုံခြုံရေးဝန်ကြီး ခရစ္စတီ နိုအမ် (Kristi Noem) သည် အမေရိကန်သမ္မတ ဒေါ်နယ်ထရမ့် (Donald Trump) ၏ ရွှေ့ပြောင်းနေထိုင်သူများကို နှိမ်နင်းသည့် အစီအစဉ်၏ တစ်စိတ်တစ်ပိုင်းအဖြစ် အမေရိကန် နိုင်ငံရှိ သိန်းနှင့်ချီသည့် ဗင်နီးဇွဲလားနိုင်ငံသားများကို နေရပ်ပြန်မပို့စေရန် အကာအကွယ်ပေးထားသည့် စနစ် တစ်ခုကို ဖယ်ရှားရန် ဖေဖော်ဝါရီ ၃ ရက်က လုပ်ဆောင်ခဲ့ကြောင်း ရိုက်တာမှ ဖော်ပြခဲ့သည်။

ထိုဆုံးဖြတ်ချက်အရ ရွှေ့ပြောင်းနေထိုင်သူများကို နေရပ်ပြန်မပို့ရန် ယာယီအကာအကွယ်ဖြစ်သည့်  Temporary Protected Status အောက်ရှိ ဗင်နီဇွဲလားရွှေ့ပြောင်း ၃၄၈,၀၀၀ သည် ဧပြီလအတွင်း အလုပ်လုပ်ခွင့် ဆုံးရှုံးမည် ဖြစ်ကာ နေရပ်သို့ ပြန်ပို့ခံရမည်ဖြစ်ကြောင်း အစိုးရ၏ နို့တစ်စာတွင် ဖော်ပြထားသည်။

ရွှေ့ပြောင်းများအား အကာအကွယ် ပေးထားသည့် စနစ်သည် အမေရိကန်၏ အကျိုးစီးပွားနှင့် ဆန့်ကျင်နေပြီး ဗင်နီဇွဲလားနိုင်ငံရှိ အခြေအနေများကို ထောက်ရှု၍ ထိုစနစ်သည် ခိုင်လုံမှုမရှိတော့ကြောင်း နို့တစ်စာတွင် ဖော်ပြထားသည်။

ဇန်နဝါရီ ၂၀ ရက်က သမ္မတအဖြစ် ကျမ်းသစ္စာကျိန်ဆိုခဲ့သည့် ထရမ့်သည် တရားမဝင် ရွှေ့ပြောင်းများနှင့် အမေရိကန်ဥပဒေ၏ အထက်တွင် ရှိနေသော လူသားချင်းစာ နာထောက်ထားမှုဆိုင်ရာ အစီအစဉ်များကို နှိမ်နင်းဖျက်သိမ်း ပစ်မည်ဖြစ်ကြောင်း ကြုံးဝါးခဲ့သည်။

အမေရိကန် အမိမြေလုံခြုံရေးဝန်ကြီး ခရစ္စတီ နိုအမ်ကို တွေ့ရစဉ်

ထရမ့်သည် ၎င်း၏ ပထမသက်တမ်း အတွင်းကလည်း ရွှေ့ပြောင်းများအား အကာအကွယ်ပေးသည့် အစီအစဉ် တွင် စာရင်းသွင်းထားသူ အများဆုံးကို ပယ်ဖျက်ရန် ကြိုးပမ်းခဲ့သော်လည်း ဖက်ဒရယ်တရားရုံးများက ထရမ့်၏ ကြိုးပမ်းမှုအား တားမြစ်ပိတ်ပင်ခဲ့ဖူးသည်။

ရွှေ့ပြောင်းများကို အကာအကွယ်ပေးထားသည့် အစီအစဉ်တွင် ပါဝင် စာရင်းသွင်းခွင့် ရသူများသည် ၎င်းတို့၏ သက်ဆိုင်ရာ နိုင်ငံများတွင် သဘာဝဘေးအန္တရာယ်၊ လက်နက်ကိုင်ပဋိပက္ခ သို့မဟုတ် ပုံမှန်မဟုတ်သည့် အကျပ်အတည်းများ ဖြစ်ပွားနေသော အခြေအနေများနှင့် ရင်ဆိုင်နေရမှသာ အကျုံးဝင်မည်ဖြစ်သည်။

“ဘာတွေ ဆက်ဖြစ်လာမလဲဆိုတာ ကျမလည်း မသိသေးပါဘူး”ဟု ကယ်လီဖိုးနီးယားပြည်နယ်တွင် ရွှေ့ပြောင်း များအတွက် ယာယီအကာအကွယ် အစီအစဉ်အောက်တွင် နေထိုင်နေသည့် အသက် ၂၆ နှစ်အရွယ် ဗင်နီဇွဲလား နိုင်ငံသူ အန်နာ မာရီယာ ပီရီလာ ( Ana Maria Pirela) က ပြောကြားခဲ့သည်။

“မနေ့က ကျမ ယောကျာ်း အလုပ်ထုတ်ခံရတယ်။ ကျမ ယောကျာ်းက အစားအစာရောငင်းတဲ့ စတိုးဆိုင်မှာ လုပ်နေတာ ၂ လ ရှိပါပြီ။ ကျမမှာလည်း ကိုယ်ဝန် ၂ လရှိနေတယ်။ ဗင်နီဇွဲလားကို မပြန်ချင်ပါဘူး”ဟု အန်နာက ပြောကြားခဲ့သည်။

အမေရိကန် အမိမြေလုံခြုံရေးဝန်ကြီး ခရစ္စတီ နိုအမ်ကို တွေ့ရစဉ်

ယခင်သမ္မတ ဂျိုးဘိုင်ဒန် (Joe Biden) လက်ထက်က ရွှေ့ပြောင်းများကို ယာယီအကာအကွယ်ပေးသည့် အစီအစဉ်ကို ချဲ့ထွင်ခဲ့ပြီး ထိုအစီအစဉ်အောက်တွင် ပါဝင်စာရင်းသွင်းထားသူများမှာ နိုင်ငံပေါင်း ၁၇ နိုင်ငံမှ လူပေါင်း ၁ သန်းကျော်ရှိနေသည်။

၎င်းတို့အနက် အချို့သူများသည် အမေရိကန်တွင် ဆယ်စုနှစ်နှင့်ချီပြီး နေထိုင်လာခဲ့သူများဖြစ်ပြီး လက်ရှိတွင် ထိုအစီအစဉ် မရှိတော့ပါက နေရပ်သို့ ပြန်ပို့ခံရမည့် အရေးနှင့် ရင်ဆိုင်နေရသည်။

ဘိုင်ဒန် လက်ထက်က သိန်းနှင့်ချီသည့် ဗင်နီဇွဲလား နိုင်ငံသားများသည် လူသားချင်း စာနာထောက်ထားမှုဆိုင်ရာ လမ်းကြောင်းများမှတဆင့် ဝင်လာခဲ့ကြပြီး ၎င်းတို့အား နေရပ်ပြန်ပို့ရေးသည် အမေရိကန်နှင့် ဗင်နီဇွဲလားအကြား ဆက်ဆံရေးကို ပိုမိုတင်းမာစေမည်ဖြစ်သည်။

ထရမ့်ကမူ ဗင်နီဇွဲလားအစိုးရသည် နေရပ်ပြန်ပို့မည်သူ အားလုံးကို လက်ခံရန် သဘောတူခဲ့ကြောင်း ပြောကြားခဲ့ သော်လည်း အသေးစိတ် ထုတ်ပြန်ခဲ့ခြင်းမရှိပေ။

Source: ရိုက်တာ

CNI International News

ကိယက်ဗ်၊ ဖေဖော်ဝါရီ ၅

၂၀၂၂ ခုနှစ်တွင် ရုရှားက ယူကရိန်းကို ကျူးကျော်ဝင်ရောက် တိုက်ခိုက်ခဲ့ပြီးနောက် ယူကရိန်း၏ နိုင်ငံရေးသမား များသည် စစ်အုပ်ချုပ်ရေး အမိန့်အောက်တွင် ငြိမ်သက်ခဲ့ရကြောင်း ရိုက်တာမှ ဖော်ပြခဲ့သည်။

သို့သော် အမေရိကန်သမ္မတသစ် ဒေါ်နယ်ထရမ့် (Donald Trump) က ၎င်း၏ လက်ထက်တွင် ယူကရိန်-ရုရှား စစ်ပွဲကို အမြန်ဆုံး အဆုံးသတ်ပေးမည်ဟု ပြောကြားခဲ့သဖြင့် ယူကရိန်းနိုင်ငံရေးလောကသည် အနည်းငယ် ပြန်လည် အသက်ဝင်လာခဲ့သည်။

ပြီးခဲ့သည့် သီတင်းပတ်အတွင်း ယူကရိန်းနိုင်ငံရေးသမားများက သမ္မတဇာလန်းစကီး (Volodymyr Zelenskiy) သည် စစ်ပွဲထက် ရွေးကောက်ပွဲများကို အာရုံပိုစိုက်နေကြောင်း စွပ်စွဲခဲ့သည်။

“ထရမ့်နဲ့ လုပ်စရာရှိတာကတော့ ဆွေးနွေးညှိနှိုင်းမှုတွေပါပဲ။ ဒီလုပ်ဆောင်မှုတွေဟာ ပြည်တွင်း နိုင်ငံရေးလောက ပြန်လည်လှုပ်ရှား အသက်ဝင်လာတယ်ဆိုတာကို ပြသနေပါတယ်”ဟု ကိယက်ဗ်အခြေစိုက် နိုင်ငံရေးလေ့လာ သုံးသပ်သူ ဗိုလိုဒီမာ ဖက်ဆန်ကို (Volodymyr Fesenko) က ပြောကြားခဲ့သည်။

အမေရိကန်သမ္မတ ထရမ့်၏ အစိုးရအဖွဲ့က ယူကရိန်းကို ရုရှားနှင့် အပစ်အခတ်ရပ်စဲရေး သဘောတူညီမှု ရယူပြီး နှစ်ကုန်ပိုင်း၌ သမ္မတရွေးကောက်ပွဲ ကျင်းပစေလိုကြောင်း ရိုက်တာသတင်းတွင် ဖော်ပြထားသည်။

ယူကရိန်းနိုင်ငံရေးသမားတွေကို တွေ့ရစဉ်

ယူကရိန်းသမ္မတဟောင်းဖြစ်ပြီး အတိုက်အခံခေါင်းဆောင် တစ်ဦးဖြစ်သည့် ပက်ထရို ပိုရိုရှန်ကို (Petro Poroshenko) ကလည်း မကြာသေးမီ သီတင်းပတ်များအတွင်း ပြည်ပခေါင်းဆောင်များနှင့် လက်ဆွဲနှုတ်ဆက် နေပုံများ ထွက်ပေါ်လာခဲ့သည်။

ပိုရိုရှန်ကိုကမူ ရွေးကောက်ပွဲထက် စစ်ပွဲကို အနိုင်ရရှိရေးက ပိုပြီးအရေးကြီးကြောင်း ပြောဆိုခဲ့ပြီး ၎င်း၏  အတိုက်အခံပါတီဖြစ်သည့် ဥရောပစည်းလုံးညီညွတ်ရေးပါတီကမူ ဇာလန်းစကီးသည် ပိုရိုရှန်ကိုကို လွှတ်တော်မှ တားဆီးရန် ကြိုးပမ်းနေပြီး စစ်ပွဲကို အနိုင်ရရှိရေးထက် ရွေးကောက်ပွဲ ပြုလုပ်ရန်သာ တွန်းအားပေး လုပ်ဆောင် နေကြောင်း စွပ်စွဲခဲ့သည်။

ယူကရိန်းဝန်ကြီးချုပ်ဟောင်းဖြစ်သည့် ယူလီယာ တီမိုရှန်ကို (Yulia Tymoshenko) ကလည်း ပြီးခဲ့သည့်နှစ် မေလက ယူကရိန်း၏ ခံစစ်ပိုင်း အားနည်းမှုအတွက် စစ်ဗိုလ်ချုပ်ကြီး တစ်ဦးအား ဖမ်းဆီးခဲ့သည့် ဇာလန်းစကီး၏ အစိုးရအဖွဲ့ကို ဝေဖန်ခဲ့သည်။

သမ္မရွေးကောက်ပွဲတွင် အဓိကစိန်ခေါ်သူ တစ်ဦးဖြစ်လာနိုင်သည့် ကိယက်ဗ် (Kyiv) မြို့တော်ဝန် ဗစ်တလီ ကလက်စရှ်ကို (Vitali Klitschko) ကလည်း ဇာလန်းစကီး ခန့်ထားသည့် ကိယက်ဗ်မြို့ စစ်အုပ်ချုပ်ရေးမှူးသည် မိမိတို့ အရပ်ဖက်အုပ်ချုပ်ရေးအဖွဲ့၏ လုပ်ငန်းစဉ်များကို လမ်းလွဲအောင်လုပ်နေကြောင်း စွပ်စွဲခဲ့သည်။

Source: ရိုက်တာ

CNI International News

ဘန်ကောက်၊ ဖေဖော်ဝါရီ ၅

ထိုင်းဝန်ကြီးချုပ် ပေတုန်တန်(Paetongtarn Shinawatra)က မြန်မာ့အရေးကို ဖခင်ဖြစ်သူ သက်ဆင်(Thaksin Shinawatra) နှင့်အတူ အာရုံစိုက် လုပ်ဆောင်နေကြောင်း ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

မလေးရှားနိုင်ငံသည်လည်း မြန်မာ့အရေးကို အရေးကြီးကြောင်း ယူဆထားပြီး အာဆီယံအစည်းအဝေးတိုင်းတွင် မြန်မာနိုင်ငံ တည်ငြိမ်ရေးနှင့် ငြိမ်းချမ်းရေး ရရှိရန်လိုအပ်ကြောင်း တိုက်တွန်းခဲ့ကြသည်ဟု ပေတုန်တန်က ပြောကြားခဲ့သည်။

သက်ဆင်သည် မြန်မာ့အရေး၊ ဒစ်ဂျစ်တယ်ငွေကြေး အခြေအနေတို့နှင့် ပတ်သက်ပြီး မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim)နှင့် ဆွေးနွေးခဲ့ကြောင်း သတင်းထွက်ပေါ်လာခဲ့ပြီးနောက် ပေတုန်တန်၏ မှက်ချက်စကားကို ဘန်ကောက်ပို့စ်က ဖော်ပြခဲ့ခြင်းဖြစ်သည်။

ထိုင်းဝန်ကြီးချုပ်ဟောင်း သက်ဆင်နဲ့ မလေးရှားဝန်ကြီးချုပ် အန်ဝါကို တွေ့ရစဉ်

မစ္စတာအန်ဝါသည် ဖေဖော်ဝါရီ ၂ ရက်က ပြုလုပ်ခဲ့သည့် ဆွေးနွေးမှု အသေးစိတ်ကို ၎င်း၏ Facebook ပို့စ်တွင် အသေးစိတ် ရေးသားဖော်ပြခဲ့ခြင်းမရှိပေ။

သို့သော် မြန်မာ့အရေး၊ ဒစ်ဂျစ်တယ်ငွေကြေး အခြေအနေတို့နှင့်ပတ်သက်ပြီး ဆွေးနွေးခဲ့ကြောင်း၊ ထိုဆွေးနွေးမှု များသည်  အကျိုးရှိကြောင်း ပြောကြားခဲ့သည်။

သက်ဆင်နှင့် အန်ဝါတို့သည် မလေးရှားနိုင်ငံ၊ ကွာလာလမ်ပူမြို့တော်တွင် တွေ့ဆုံခဲ့ခြင်း ဖြစ်သည်ဟု ယူဆရပြီး စင်္ကာပူနိုင်ငံခြားရေးဝန်ကြီးဟောင်း ဂျော့ယို (George Yeo) ကလည်း တက်ရောက်ခဲ့သည်။

“ဆွေးနွေးညှိနှိုင်းမှုတွေက အာဆီယံအတွက် အကျိုးဖြစ်ထွန်းစေပြီး လေထုညစ်ညမ်းမှု ပြဿနာလိုမျိုး အခြားကိစ္စ ရပ်တွေမှာ ပူးပေါင်းဆောင်ရွက်ဖို့ လမ်းဖွင့်ပေးရာ ရောက်ပါတယ်။ ဒါပေမယ့် မြန်မာ့အရေးကိုတော့ အဓိကထား ဆွေးနွေးခဲ့ကြပါတယ်”ဟု ပေတုန်တန်က ပြောကြားခဲ့သည်။

သက်ဆင်သည် ၂၀၂၃ ခုနှစ်၊ ဩဂုတ်လက ထိုင်းနိုင်ငံသို့ ပြန်လည်ရောက်ရှိ လာခဲ့ပြီးနောက် ယခု မလေးရှားခရီးစဉ် သည် ၎င်း၏ ပထမဆုံး ပြည်ပခရီးစဉ်ဖြစ်သည်။

ထိုင်းဝန်ကြီးချုပ် ပေတုန်တန်နဲ့ မြန်မာဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

သက်ဆင်သည် နိုင်ငံအတွင်း ထွက်ခွာခွင့် ယာယီပိတ်ပင် ခံထားရသော်လည်း ထိုင်းတရားရုံးက ဖေဖော်ဝါရီ ၂ ရက် မှ ၃ ရက်အတွင်း သက်ဆင်၏ ခရီးထွက်ခွင့် တောင်းဆိုမှုကို အာမခံ ဘတ် ၅ သန်းဖြင့် ခွင့်ပြုပေးခဲ့သည်။

သက်ဆင်သည် နိုင်ငံအတွင်းမှ ထွက်ခွာခွင့်အတွက် နိုင်ငံခြားရေးဝန်ကြီးဌာနတွင် လိုအပ်သည့် စာရွက်စာတန်း များကို ရယူခဲ့ပြီး နိုင်ငံခြားရေးဝန်ကြီး မာရစ် ဆန်ဂျီယမ်ပွန်ဆာ (Maris Sangiampongsa) က မျက်မြင်သက်သေ အဖြစ် ဆောင်ရွက်ပေးခဲ့သည်။

သက်ဆင်သည် နိုင်ငံအတွင်းသို့ ပြန်လည် ဝင်ရောက်ချိန်တွင်လည်း လူဝင်မှုကြီးကြပ်ရေးဗျူရိုကို အသိပေး အကြောင်းကြားရမည်ဖြစ်သည်။

သက်ဆင်သည် တော်ဝင်မိသားစုအား စော်ကားသည့် စွဲချက်များ၊ ကွန်ပျူတာ ရာဇဝတ်မှုအက်ဥပဒေကို ချိုးဖောက်သည့် စွဲချက်များနှင့် တရားစွဲခံထားရသဖြင့် ပြည်ပသို့ ထွက်ခွာရန်အတွက် တရားရုံး၏ ခွင့်ပြုချက် လိုအပ်ခဲ့ခြင်းဖြစ်သည်။

တရားရုံးက ဇူလိုင်လအတွင်း သက်ဆင်၏ စွဲချက်များနှင့်ပတ်သက်ပြီး ကြားနာစစ်ဆေးမှုများ ပြုလုပ်မည်ဖြစ် သည်။

Source: ဘန်ကောက်ပို့စ်