CNI International News

ဘန်ကောက်၊ မေလ ၆

ထိုင်းနိုင်ငံတွင် ဖျက်သိမ်းခံခဲ့ရသည့် Move Forward ပါတီ(MFP)၏ ခေါင်းဆောင်ဟောင်း ပီတာ လင်မ်ဂျာရွန်ရတ် (Pita Limjaroenrat)က လာမည့် ၉ နှစ်အလွန်မှာ ဝန်ကြီးချုပ်ဖြစ်လာရန် ရည်မှန်းထားသည်ဟု ပြောကြားခဲ့ ကြောင်း ဘန်ကောက်ပို့စ်မှ ဖော်ပြခဲ့သည်။

ပီတာသည် နိုင်ငံရေးလုပ်ခွင့် ၁၀ နှစ်ပိတ်ပင် ခံထားရပြီးနောက် လာမည့် ၉ နှစ် ပိတ်ပင်ခံထားရသည့် ကာလအပြီး တွင် နိုင်ငံရေးလောကသို့ ပြန်လည်ဝင်ရောက်၍ ထိုင်းနိုင်ငံ၏ အကောင်းဆုံးဝန်ကြီးချုပ် ဖြစ်လာရန် ရည်မှန်းထား သည်။

“ကျနော်ဟာ ဗဟုသုတတွေ ဆည်းပူးဖို့ နိုင်ငံအနှံ့ကို ခရီးထွက်နေပါတယ်။ နောက် ၉ နှစ်ကြာရင်တော့ ထိုင်းနိုင်ငံ ရဲ့ အကောင်းဆုံး ဝန်ကြီးချုပ်အဖြစ် ကျနော် ပြန်လာခဲ့မှာပါ” ဟု ပီတာက မေလ ၄ ရက်တွင် ၎င်းအား ထောက်ခံ သူများကို ပြောကြားခဲ့သည်။

ပီတာ မဲဆွယ်ပေးနေစဉ်

ပီတာသည် ဖျက်သိမ်းခံခဲ့ရသည့်  ပါတီဝင်များ အသစ်ဖွဲ့စည်းခဲ့သော ပြည်သူ့ပါတီ(PP)၏ ကိုယ်စားလှယ် လောင်းများအတွက် မဲဆွယ်စည်းရုံးမှုများ ပြုလုပ်နေခြင်းဖြစ်သည်။

လက်ရှိတွင် ပြည်သူ့ပါတီ(PP)မှ ကိုယ်စားလှယ်လောင်းများသည် ခွန်ခန် (Khon Kaen) ပြည်နယ်နှင့် အခြား ပြည်နယ်များ၌ မြို့တော်ဝန်နေရာများနှင့် ကောင်စီဝင်နေရာများအတွက် ရွေးကောက်ပွဲ ဝင်ရောက်ယှဉ်ပြိုင်ရန် ပြင်ဆင်နေသည်။

ထိုရွေးကောက်ပွဲကို မေလ ၁၀ ရက်တွင် ပြုလုပ်မည်ဖြစ်သည်။

ပြည်သူ့ပါတီသည် ဖေဖော်ဝါရီလက ပြုလုပ်ခဲ့သည့် ဒေသန္တရ ရွေးကောက်ပွဲများတွင် ပြည်နယ်အချို့၌ ဝင်ရောက် ယှဉ်ပြိုင်ခဲ့သော်လည်း လမ်ဖန် (Lamphun) ပြည်နယ်တစ်ခုတွင်သာ အနိုင်ရခဲ့သည်။

ခွန်ခန်ပြည်နယ်တွင် ပြည်သူ့ပါတီမှ ကိုယ်စားလှယ်လောင်း ဘန်ဂျာမာပွန် သီရိလာဘွန့်  (Benjamaporn Srilaboot)သည် ပြိုင်ဘက် ကိုယ်စားလှယ်လောင်း ၄ ဦးနှင့် ယှဉ်ပြိုင်ရမည်ဖြစ်သည်။

ပီတာနဲ့ လူထုကို တွေ့ရစဉ်

ပီတာကမူ ပြည်သူ့ပါတီကို ထောက်ခံမှု အားကောင်းသည့် မြို့ပြဒေသများ ပါဝင်သည့် ခွန်ခန်ပြည်နယ်တွင် အနိုင်ရရန် မျှော်မှန်းထားသည်။

ပြီးခဲ့သည့်နှစ် သြဂုတ်လက အခြေခံဥပဒေဆိုင်ရာတရားရုံးသည် ပီတာအား အမျိုးသားလုံခြုံရေးနှင့် ဘုရင်စနစ်ကို ရည်ရွယ်ချက်ရှိရှိ ထိခိုက်အောင် လုပ်ဆောင်မှုဖြင့် နိုင်ငံရေးလုပ်ခွင့် ၁၀ နှစ်ပိတ်ပင်ခဲ့ပြီး  MFP ကိုလည်း ဖျက်သိမ်း ရန် အမိန့်ချမှတ်ခဲ့သည်။

ပီတာနှင့်အတူ အခြား MFP အလုပ်အမှုဆောင် ၉ ဦးကိုလည်း နိုင်ငံရေးလောကမှ ၁၀ နှစ်ကြာ ပိတ်ပင်ခဲ့သည်။

၂၀၂၃ ခုနှစ် အထွေထွေရွေးကောက်ပွဲတွင် MFP ပါတီသည် အနိုင်ရခဲ့သော်လည်း ညွန့်ပေါင်းအစိုးရ ဖွဲ့နိုင်ခဲ့ခြင်း မရှိသဖြင့် ဒုတိယမဲအများဆုံး ရရှိခဲ့သည့် ဖြူးထိုင်းပါတီက ညွန့်ပေါင်းအစိုးရဖွဲ့ကာ အာဏာရရှိခဲ့သည်။

Source: ဘန်ကောက်ပို့စ်

CNI International News

ပြုံယမ်း၊ မေလ ၅

မြောက်ကိုရီးယားခေါင်းဆောင် ကင်မ်ဂျုံအန်သည် တင့်ကားထုတ်လုပ်သည့် စက်ရုံသို့ သွားရောက်ကြည့်ရှုခဲ့ပြီး ကိုရီးယားပုံစံ တင့်ကားများ၏ နည်းပညာတိုးတက်မှုကို အမွှမ်းတင်ပြောကြားခဲ့ကြောင်း ရိုက်တာမှ ဖော်ပြခဲ့သည်။

စစ်တပ်ကို အဆင့်မြှင့်တင်ရန်နှင့် အာဏာရပါတီ၏ ဒုတိယအကြိမ်မြောက် ကျည်ကာတပ်ဖွဲ့ ပြုပြင်ပြောင်းလဲရေး အစီအစဉ်အား အကောင်အထည်ဖော်ရာတွင် နည်းပညာမြင့် တင့်ကားများနှင့် ကျည်ကာကားများ ထုတ်လုပ်မှု သည် အဓိကကျနေကြောင်း ကင်မ်က ပြောကြားခဲ့သည်။

နျူကလီးယားနှင့် ဒုံးကျည်များ အပါအဝင် မြောက်ကိုရီးယား၏ သမားရိုးကျ လက်နက်ကိုင်တပ်ဖွဲ့များကို အဆင့် မြှင့်တင်မွမ်းမံရန် ကျယ်ကျယ်ပြန့်ပြန့် လုပ်ဆောင်နေချိန်တွင် ကင်မ်၏ တင့်ကားစက်ရုံခရီးစဉ် ပေါ်ပေါက်လာခဲ့ ခြင်းဖြစ်သည်။ 

ကင်မ်ဂျုံအန် တင့်ကားစက်ရုံကို သွားကြည့်စဉ်

မကြာသေးမီက မြောက်ကိုရီးယား ခေါင်းဆောင်သည် ရေတပ်ဖျက်သင်္ဘော အသစ်တစ်စင်း ထုတ်ဖော်ပြသပွဲ၊ ဒရုန်းအသစ်များနှင့် လက်နက်စမ်းသပ်မှုများကို လေ့လာကြည့်ရှုခဲ့သည်။

မြောက်ကိုရီးယားသည် ယူကရိန်းစစ်ပွဲတွင် ရုရှားအား လက်နက်ခဲယမ်းများ၊ ဒုံးကျည်များနှင့် စစ်သားများ စေလွှတ်ပြီး ကူညီခဲ့ကာ အပြန်အလှန်အားဖြင့် ရုရှားထံမှ နည်းပညာနှင့် စစ်ရေးအကူအညီများ လက်ခံရရှိ နေသည်ဟု ယူဆရကြောင်း တောင်ကိုရီးယားနှင့် အမေရိကန်အရာရှိများက ပြောကြားခဲ့သည်။

Source: ရိုက်တာ

CNI International News

ဟောင်ကောင်၊ မေလ ၅

အမေရိကန်နှင့် တရုတ်ကြား ဖြစ်ပွားနေသည့် ကုန်သွယ်ရေးစစ်ပွဲကြောင့် ကမ္ဘာလုံးဆိုင်ရာ ကုန်သွယ်ရေး အခင်းအကျင်း ပြောင်းလဲနေမှုနှင့်အတူ နယ်စပ်ဖြတ်ကျော် လုပ်ကိုင်နေသည့် စီးပွားရေးလုပ်ငန်းများအပေါ် မှီခိုနေရသည့် တရုတ်ပြည်မကြီး၏ ကုမ္ပဏီများတွင် အလုပ်အကိုင်များ ရေရာမှုမရှိသော အခြေအနေသို့ ရောက်ရှိဖွယ်ရှိကြောင်း South China Morning Post မှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် တရုတ်၏ ပို့ကုန်များအပေါ် အခွန် ၁၄၅ ရာခိုင်နှုန်း တိုးမြှင့် ကောက်ခံခဲ့သဖြင့် တရုတ်ကုမ္ပဏီများ၏ စိုးရိမ်မှုများ မြင့်တက်ခဲ့သည်။

ဥပမာအနေဖြင့် အမေရိကန်ဈေးကွက်သို့ ကုန်ကျစရိတ် နည်းပါးစွာဖြင့် ထုတ်ကုန်များကို တင်ပို့နေသည့် တရုတ် ၏  Shein နှင့် Temu ကဲ့သို့ ကုမ္ပဏီများအပေါ် ကုန်သွယ်ခွန်များက ဂယက်ရိုက်ခတ်လာခဲ့သည်။

ထို့ကြောင့် အဆိုပါကုမ္ပဏီများသည် ၎င်းတို့၏ ထုတ်ကုန်များကို ဈေးနှုန်းတိုးမြှင့်ခြင်း၊ ဝယ်လိုအား လျော့ကျမှု ကြောင့် ထုတ်ကုန်အရေအတွက်ကို ကန့်သတ်ခြင်းတို့ ပြုလုပ်လာခဲ့သည်။

တရုတ်နဲ့အမေရိကန် ကုန်သွယ်ရေးကို သရုပ်ဖော်ပြထားစဉ်

ထို့‌နောက် သယ်ယူပို့ဆောင်ရေး၊ ကုန်လှောင်ရုံနှင့် ဖောက်သည်များအား ထောက်ပံ့ပေးသည် ကဏ္ဍများတွင် အလုပ်အကိုင် နေရာများကို လျော့ကျစေနိုင်သည်ဟု ကျွမ်းကျင်သူများက သုံးသပ်ခဲ့သည်။

ကုန်သွယ်ရေးစစ်ပွဲကြောင့် ပြည်ပကုမ္ပဏီများသည် ၎င်းတို့၏ ထောက်ပံ့ရေး ကွင်းဆက် လမ်းကြောင်းများကို တရုတ်နှင့် ဝေးသည့် အခြားနိုင်ငံများသို့ ပြောင်းလဲခဲ့သဖြင့် အခြားနိုင်ငံများတွင် ကုန်ထုတ်လုပ်ရေး အလုပ်အကိုင် များ မြင့်တက်လာစေခဲ့သည်။

ထိုအပြောင်းအလဲက အရှေ့တောင်အာရှနိုင်ငံများအတွက် အကျိုးအမြတ်ရစေပြီး တရုတ်ကုမ္ပဏီများအတွက်မူ ကုန်ထုတ်လုပ်မှုအဆင့်ကို ထိန်းသိမ်းရန် စိန်ခေါ်မှုများနှင့် ရင်ဆိုင်ခဲ့ရကာ ကုန်ထုတ်ကဏ္ဍနှင့် အခြားဆက်စပ် သည့် ကဏ္ဍများတွင် အလုပ်အကိုင် တည်ငြိမ်မှုကို သက်ရောက်စေခဲ့သည်။

လေ့လာချက်တစ်ခုအရ ကုန်သွယ်ရေးစစ်ပွဲကြောင့် တရုတ်ကုမ္ပဏီများ၏ ရင်းနှီးမြှုပ်နှံမှုသည် ၂ ရာခိုင်နှုန်း လျော့ကျခဲ့ပြီး နိုင်ငံပိုင် လုပ်ငန်းများသည် ပိုမိုထိခိုက်ခဲ့ကြောင်း ဖော်ပြခဲ့သည်။

ထိုကဲ့သို့ ရင်းနှီးမြှုပ်နှံမှု လျော့ကျမှုသည် ဝန်ထမ်းခေါ်ယူမှုကို လျော့ကျစေပြီး ရှိရင်းစွဲ ဝန်ထမ်းအရေအတွက် ကိုလည်း လျှော့ချနိုင်သည့် အခြေအနေသို့ ရောက်ရှိစေနိုင်ကြောင်း ကျွမ်းကျင်သူများက ပြောကြားခဲ့သည်။

Source: South China Morning Post

CNI International News

အစ္စလာမ်မာဘက်၊ မေလ ၅

ပြီးခဲ့သည့်လက အိန္ဒိယဘက်ခြမ်းရှိ ကက်ရှ်မီးယားဒေသတွင် စစ်သွေးကြွများ၏ တိုက်ခိုက်မှုကြောင့် အိန္ဒိယနှင့် တင်းမာမှု မြင့်တက်နေသည့် ပါကစ္စတန်သည် မေလ ၄ ရက်က ပဲ့ထိန်းဒုံးကျည်တစ်စင်း စမ်းသပ်ပစ်လွှတ်ခဲ့ ကြောင်း အေပီမှ ဖော်ပြခဲ့သည်။

ထိုဒုံးကျည်သည် မြေပြင်မှ မြေပြင်ပစ် ဒုံးကျည် အမျိုးအစားဖြစ်ပြီး ကီလိုမီတာ ၄၅၀ (မိုင် ၂၈၀) အထိ ပစ်ခတ် ရောက်ရှိနိုင်သည်ဟု ပါကစ္စတန်စစ်တပ်က ပြောကြားခဲ့သည်။

ဧပြီ ၂၂ ရက်က ကက်ရှ်မီးယားဒေသ၏ ပါဟယ်ဂန် (Pahalgam) မြို့တွင် စစ်သွေးကြွများ၏ တိုက်ခိုက်မှုနှင့် ပတ်သက်ပြီး ပါကစ္စတန်ကို ဝေဖန်ပြစ်တင်ခဲ့သည့် အိန္ဒိယကမူ ထိုဒုံးကျည် စမ်းသပ်မှုနှင့်ပတ်သက်ပြီး ချက်ချင်း မှတ်ချက်ပေးခဲ့ခြင်းမရှိပေ။

Abdali Weapon System အမည်ရှိ ထိုဒုံးလက်နက် စမ်းသပ်မှုသည် ပါကစ္စတန်စစ်သားများ၏ စစ်ဆင်ရေးဆိုင်ရာ အသင့် အနေအထားရှိမှုနှင့် အဓိကကျသည့် နည်းဗျူဟာမြောက် အခြေအနေကို မြှင့်တင်ရန်ဖြစ်ကြောင်း၊ ထိုဒုံးကျည်တွင် ခေတ်မီ ပဲ့ထိန်းစနစ် ပါဝင်ပြီး အသုံးပြုရ လွယ်ကူးကြောင်း ပါကစ္စတန်စစ်တပ်က ပြောကြားခဲ့ သည်။

အိန္ဒိယနဲ့ပါကစ္စတန်ကို တွေ့ရစဉ်

ပါကစ္စတန်သမ္မတ အဆစ်ဖ် အလီ ဇာဒါရီ (Asif Ali Zardari) နှင့် ဝန်ကြီးချုပ် ရှာဘက် ရှရစ်ဖ် (Shehbaz Sharif) တို့ကလည်း ထိုဒုံးကျည် အောင်မြင်စွာ စမ်းသပ်နိုင်မှုအပေါ် ဂုဏ်ပြုစကားများ ပြောကြားခဲ့သည်။

ပါကစ္စတန်သည် ဒုံးကျည်များကို အိန္ဒိယနယ်စပ်သို့ ဦးတည်ပစ်လွှတ်လေ့မရှိဘဲ အာရေဗျပင်လယ် (Arabian Sea) သို့မဟုတ် ဘာလိုချီစတန် (Balochistan) ပြည်နယ် အနောက်တောင်ဘက် သဲကန္တရများထဲသို့သာ စမ်းသပ် ပစ်လွှတ်လေ့ရှိသည်။

မေလ ၃ ရက်က စမ်းသပ်ခဲ့သည့် ဒုံးကျည်၏ အမည်ကို အိန္ဒိယအား အောင်နိုင်ခဲ့သည့် အထင်ကရ မွတ်ဆလင် စစ်ဘုရင် တစ်ဦးဖြစ်သော Abdali ၏ အမည်ကို အစွဲပြုပြီး အမည်ပေးခဲ့ခြင်းဖြစ်ကြောင်း အစ္စလာမ်မာဘက် (Islamabad) မြို့အခြေစိုက် လုံခြုံရေးကျွမ်းကျင်သူ ဆေးယက် မိုဟာမက် အလီ (Syed Muhammad Ali) က ပြောကြားခဲ့သည်။

ယခုကဲ့သို့ ပထဝီနိုင်ငံရေး အခြေအနေ ရှုပ်ထွေးနေချိန်တွင် ဒုံးကျည်စမ်းသပ်မှုသည် အလွန်သိသာထင်ရှားသည့် လုပ်ဆောင်ချက်တစ်ခု ဖြစ်ကြောင်းလည်း အလီက ပြောကြားခဲ့သည်။

ကမ္ဘာတစ်ဝန်းမှ ခေါင်းဆောင်များကမူ အတိတ်ကာလက စစ်ပွဲများ ဖြစ်ပွားခဲ့ဖူးသည့် အိန္ဒိယနှင့် ပါကစ္စတန် နှစ်နိုင်ငံစလုံးကို တင်းမာမှုများ လျှော့ချရန်နှင့် ထိန်းထိန်းသိမ်းသိမ်း လုပ်ဆောင်ကြရန် တိုက်တွန်းထားသည်။

Source: AP

CNI International News

မနီလာ၊ မေလ ၅

ဖိလစ်ပိုင်စစ်တပ်သည် မေလ ၁၂ ရက်တွင် ရွေးကောက်ပွဲ တာဝန်များအတွက် နီဂရို့စ်ကျွန်းဒေသ ( Negros Island Region) ၊ အနောက်ဗီဆာယာနှင့် အလယ်ဗီဆာယာကျွန်းစု (Western Visayas and Central Visayas ) များသို့ စစ်သား ၂၈၂၇ ဦး ဖြန့်ကြက်ချထားမည်ဟု ဖိလစ်ပိုင် ဗီယာဆာ လက်နက်ကိုင်တပ်ဖွဲ့များဌာန (Viscom) က ပြောကြားခဲ့ကြောင်း မနီလာတိုင်းမ်စ် သတင်းဝက်ဘ်ဆိုက်မှ ဖော်ပြခဲ့သည်။

အဆိုပါ စစ်သားများသည် လွတ်လပ်ပြီး စနစ်တကျရှိသည့် တရားမျှတသော ရွေးကောက်ပွဲ လုပ်ငန်းစဉ်အတွက် ဖိလစ်ပိုင်ရဲတပ်ဖွဲ့နှင့် ရွေးကောက်ပွဲကော်မရှင် (Comelec) ကို ကူညီပေးသွားမည်ဖြစ်ကြောင်း Viscom အကြီးအကဲ ဒုတိယဗိုလ်ချုပ်ကြီး ဖာနန်ဒို ရီယက် (Fernando Reyeg) က ပြောကြားခဲ့သည်။

ပြီးခဲ့သည့် သီတင်းပတ်က နီဂရို့စ်နှင့် ပါနေးကျွန်းများသို့ သွားရောက်သည့် ခရီးစဉ်အတွင်း ရီယက်က စစ်သားများ ကို ပရောဖက်ရှင်နယ်ကျကျ တာဝန်ထမ်းဆာင်ရန်နှင့် ရွေးကောက်ပွဲကို စိတ်ချသေချာမှုရှိစေရန် သန္နိဋ္ဌာန်ချထား ဖို့ အားပေးလှုံ့ဆော်ခဲ့သည်။

“ကျ‌နော်တို့ဟာ ပရော်ဖက်ရှင်နယ်ကျကျ၊ သန္နိဋ္ဌာန်ရှိရှိ၊ ပါတီစွဲကင်းကင်းနဲ့ ဖွဲ့စည်းပုံအခြေခံဥပဒေကို သစ္စာစောင့် သိရပါမယ်”ဟု ရီယက်က ပြောကြားခဲ့သည်။

အနောက်ဗီယာဆာနှင့် အလယ်ဗီဆာယာကျွန်းစုကို တွေ့ရစဉ်

ပြည်သူများအတွက် ထိတ်လန့်ကြောက်ရွံ့မှု မရှိစေဘဲ ခြိမ်းခြောက်မှုများ ကင်းရှင်းစွာ မဲပေးပိုင်ခွင့် ရရှိရေးအတွက် မိမိတို့၏ လုံခြုံရေးအခြေအနေကို မြှင့်တင်ရမည်ဖြစ်ကြောင်း ဒီမိုကရေစီလုပ်ငန်းစဉ်းကို ဘေးကင်းလုံခြုံစေရေး သည် ဦးစားပေးကိစ္စဖြစ်ကြောင်း ၎င်းက ဆိုသည်။

ရွေးကောက်ပွဲမတိုင်မီ ၃ ရက် ကြိုတင်ပြီး နီဂရို့ အိုရီယန်တယ် (Negros Oriental ) ဒေသတွင် ဘာကိုလော့ မြို့ရဲစခန်း (Bacolod City Police Office)မှ ရဲတပ်ဖွဲ့ဝင် ၃၁၀ ကို ဖြန့်ကြက်ချထားမည်ဖြစ်ကြောင်း တာဝန်ရှိသူ များက ပြောကြားခဲ့သည်။

ရွေးကောက်ပွဲကာလအတွင်း မဲရုံများသို့ လျှပ်စစ်ဓာတ်အား ပေးပို့မှုများ၊ ရွေးကောက်ပွဲနှင့် ဆက်စပ်သည့် အခြား လိုအပ်ချက်များကို ဟာကွက်မရှိစေရန် လုပ်ဆောင်သွားမည်ဟုလည်း ရဲတပ်ဖွဲ့က ပြောကြားခဲ့သည်။

ဖိလစ်ပိုင်စစ်တပ်၏ အမှတ် ၃၀၃ ခြေလျင်တပ်ရင်း၏ တပ်မှူးဖြစ်သည့် ဗိုလ်မှူးချုပ် တက် ဒူမော့စ်မော့ဂ် ( Ted Dumosmog) ကလည်း ၎င်းတို့ တပ်ဖွဲ့ဝင်များသည် ရွေးကောက်ပွဲအတွက် အပြည့်အဝ ပြင်ဆင်ထားခဲ့ပြီးဖြစ် ကြောင်း ပြောကြားခဲ့သည်။

Source: မနီလာ တိုင်းမ်စ်

CNI International News

ဂျေရုဆလင်၊ မေလ ၃

အစ္စရေးလေတပ်က မေလ ၂ ရက် အစောပိုင်းတွင် ဆီးရီးယား၏ သမ္မတနန်းတော်အနီး၌ လေကြောင်းတိုက်ခိုက်မှု လုပ်ဆောင်ခဲ့ကြောင်း အေပီမှ ဖော်ပြခဲ့သည်။

ဆီးရီးယားနိုင်ငံတောင်ပိုင်းရှိ ဒရုဇ်လူနည်းစုများ နေထိုင်သည့် ကျေးရွာများဆီ ချီတက်ခြင်းမပြုရန် ဆီးရီးယား အာဏာပိုင်များကို သတိပေးခဲ့ပြီးနောက် ထိုကဲ့သို့ လေကြောင်းတိုက်ခိုက်မှုများ လုပ်ဆောင်ခဲ့ခြင်းဖြစ်သည်။

ဒမတ်စကတ်မြို့တော် ( Damascus) အနီးတွင် ဆီးရီးယားအစိုးရလိုလားသော သေနတ်သမားများနှင့် ဒရုဇ် လူနည်းစုမှ တိုက်ခိုက်ရေးသမားများအကြား ရက်ပေါင်းများစွာ အဓိကရုဏ်း ဖြစ်ပွားခဲ့ပြီးနောက် ယခုကဲ့သို့ တိုက်ခိုက်ခဲ့ခြင်းဖြစ်သည်။

ဆီးရီးယားအစိုးရ လိုလားသော သေနတ်သမားများနှင့် ဒရုဇ်လူနည်းစုမှ တိုက်ခိုက်ရေး သမားများအကြား ဖြစ်ပွားသည့် တိုက်ခိုက်မှုများအတွင်း လူပေါင်းဒါဇင်ချီသေဆုံး သို့မဟုတ် ထိခိုက်ဒဏ်ရာရရှိခဲ့သည်။

ဆီးရီးယားနိုင်ငံအတွင်းက လက်နက်ကိုင် အင်အားစုများကို တွေ့ရစဉ်

မေလ ၂ ရက်က လေကြောင်းတိုက်ခိုက်မှုသည် ယခုသီတင်းပတ်အတွင်း အစ္စရေး၏ ဆီးရီးယားအပေါ် ဒုတိယမြောက် လေကြောင်း တိုက်ခိုက်မှုဖြစ်သည်။

ထို့ပြင် အစ္စရေးသည် သမ္မတနန်းတော်အနီး ဒေသကို တိုက်ခိုက်မှု ပြုလုပ်ခြင်းသည် ဆီးရီးယား ခေါင်းဆောင်သစ် အပေါ် ပြင်းပြင်းထန်ထန် သတိပေးခြင်းလည်း ဖြစ်သည်။

မေလ ၁ ရက်တွင် ဆီးရီးယား၏ ဒရုဇ်ဘာသာရေး ခေါင်းဆောင် ရှိတ်ဟစ်မက်အယ်ဟီဂျရီ( Sheikh Hikmat Al-Hijri)က ဆီးရီးယားအစိုးရသည် ၎င်း၏ အသိုင်းအဝိုင်းကို မျိုးသုဉ်း သတ်ဖြတ်သည့် စစ်ဆင်ရေး လုပ်ဆောင်နေ ကြောင်း ပြင်းပြင်းထန်ထန် ပြစ်တင်ရှုတ်ချခဲ့သည်။

ထိုရာဇဝတ်မှုများ ဆက်လက် ဖြစ်ပွားနေခြင်းကို ဟန့်တားရန်နှင့် ငြိမ်းချမ်းရေးကို ထိန်းသိမ်းရန် နိုင်ငံတကာ တပ်ဖွဲ့များကို ချက်ချင်း ကြားဝင်ဖြေရှင်းပေးရန်လည်း ၎င်းက တောင်းဆိုခဲ့သည်။ 

မေလ ၂ ရက်တွင် ဒရုဇ်ဘာသာရေး ခေါင်းဆောင်က ၎င်းတို့ လူမျိုးစု အသိုင်းအဝိုင်းသည် ဆီးရီးယား၏ တစ်စိတ်တစ်ပိုင်းဖြစ်ပြီး နိုင်ငံတွင်းမှ ထွက်သွားမည်မဟုတ်ကြောင်း ငြင်းဆိုခဲ့သည်။

 Source: အေပီ

CNI International News

ဟောင်ကောင်၊ မေလ ၃

ဟောင်ကောင်အမျိုးသားလုံခြုံရေး ရဲတပ်ဖွဲ့သည် ဖမ်းဆီးရန် အလိုရှိသူများစာရင်းတွင် ပါဝင်နေသည့် နိုင်ငံရေး တက်ကြွလှုပ်ရှားသူ အန်နာကွက် (Anna Kwok) ၏ ဖခင်နှင့် အစ်ကိုဖြစ်သူတို့ကို ဖမ်းဆီးခဲ့ကြောင်း ရိုက်တာမှ ဖော်ပြခဲ့သည်။

ဖမ်းဆီးခံရသူနှစ်ဦးသည် အန်နာနှင့် ငွေကြေးပိုင်းဆိုင်ရာ ဆက်ဆံမှုများရှိနေသည်ဟု စွပ်စွဲခံခဲ့ရကြောင်း ဒေသခံမီဒီယာများက မေလ ၂ ရက်တွင် ဖော်ပြခဲ့သည်။

ထိုဖမ်းဆီးမှုသည် ဝရမ်းပြေးတစ်ဦး၏ မိသားစုဝင်များကို ဖမ်းဆီးရာတွင် ဟောင်ကောင်၏ အမျိုးသားလုံခြုံရေး ဥပဒေအား ပထမဆုံးအကြိမ် အသုံးပြုခဲ့ခြင်းဖြစ်သည်။

အန်နာသည် ဝါရှင်တန်အခြေစိုက် ဟောင်ကောင်ဒီမိုကရေစီကောင်စီ၏ အမှုဆောင် ဒါရိုက်တာတစ်ဦးဖြစ်ပြီး ဟောင်ကောင်အမျိုးသားလုံခြုံရေးရဲတပ်ဖွဲ့က ဖမ်းဆီးရန် အလိုရှိနေသည့် ပြည်ပတွင် နေထိုင်သော တက်ကြွ လှုပ်ရှားသူ ၁၉ ဦး၌ တစ်ဦး အပါအဝင်ဖြစ်သည်။

အန်နာသည် ပြည်ပအင်အားစုများနှင့် ပူးပေါင်းကြံစည်မှု စွပ်စွဲခံခဲ့ရပြီး ဟောင်ကောင်ရဲတပ်ဖွဲ့က ကွက်အား ဖမ်းဆီးရမိရန် ကူညီပေးသူကို ဟောင်ကောင်ဒေါ်လာ ၁ သန်း (အမေရိကန်ဒေါ်လာ  ဒေါ်လာ ၁၂၇,၆၅၆) ချီးမြှင့်မည်ဟု ဆုကြေးထုတ်ထားသည်။

ဟောင်ကောင်၏ အမျိုးသားလုံခြုံရေးဥပဒေသည် အစိုးရအတိုက်အခံများကို ဖိနှိပ်ရန်ဖြစ်ပြီး လွတ်လပ်ခွင့်များကို လျော့ပါးစေကြောင်း လူ့အခွင့်အရေးအဖွဲ့များနှင့် ဒီမိုကရေစီနိုင်ငံအချို့က ဝေဖန်ခဲ့ကြသည်။

ဟောင်ကောင်နိုင်ငံရေး တက်ကြွလှုပ်ရှားသူ အန်နာကွက်ကို တွေ့ရစဉ်

အမေရိကန်ကလည်း ပြည်ပနိုင်ငံများတွင် နေထိုင်သည့် ဒီမိုကရေစီလိုလားသည့် ဟောင်ကောင်တက်ကြွလှုပ်ရှား သူများ၏ မိသားစုဝင်များကို နှောင့်ယှက်နေသည့် ဟောင်ကောင်အစိုးရ၏ လုပ်ဆောင်ချက်များကို ပြင်းထန်စွာ ဝေဖန်ရှုံ့ချခဲ့သည်။

ဟောင်ကောင်ရဲတပ်ဖွဲ့ကမူ ၎င်းတို့သည် ဧပြီ ၃၀ ရက်က အသက် ၃၅ နှစ်အရွယ် အမျိုးသားတစ်ဦးနှင့် အသက် ၆၈ နှစ်အရွယ် အမျိုးသားတစ်ဥိးတို့ကို အန်နာ ပိုင်ဆိုင်သည့် ငွေကြေးများအား စီမံထိန်းသိမ်းပေးမှုသံသယဖြင့် ဖမ်းဆီးခဲ့ကြောင်း မေလ ၂ ရက်က ထုတ်ပြန်ခဲ့သည်။

ဒေသခံမီဒီယာများကမူ ထိုအမျိုးသားနှစ်ဦးသည် အန်နာ၏ ဖခင်နှင့် အစ်ကိုဖြစ်ကြောင်း အမည်မဖော်လိုသည့် သတင်းရင်းမြစ်များကို ကိုးကားပြီး ဖော်ပြခဲ့သည်။

ဝရမ်းပြေးတစ်ဦး၏ ငွေကြေးများကို စီမံခန့်ခွဲမှုသည် ကြီးလေးသည့် ပြစ်မှုဖြစ်ပြီး အမြင့်ဆုံး ပြစ်ဒဏ်အဖြစ် ထောင်ဒဏ် ၇ နှစ်အထိ ချမှတ်ခံရနိုင်ကြောင်း ရဲတပ်ဖွဲ့က သတိပေးခဲ့သည်။

Source: ရိုက်တာ

CNI International News

ဝါရှင်တန်၊ မေလ ၃

အမေရိကန်သမ္မတ ဒေါ်နယ်ထရမ့် (Donald Trump) သည် ၎င်း၏ အမျိုးသားလုံခြုံရေးအကြံပေးပုဂ္ဂိုလ် မိုက်ဝေါ့ဇ် (Mike Waltz) ကို ရာထူးမှဖယ်ရှားခဲ့ပြီး ၎င်းအား ကုလသမဂ္ဂဆိုင်ရာ အမေရိကန်သံအမတ်အဖြစ် အမည်စာရင်း တင်သွင်းခဲ့သည်ဟု တိုင်းမ်မဂ္ဂဇင်းမှ ဖော်ပြခဲ့သည်။

ယခုလုပ်ဆောင်ချက်သည် ထရမ့်၏ ဒုတိယသက်တမ်းအတွင်း ပထမဆုံးအကြိမ် အထင်ကရ ရာထူးနေရာ အပြောင်းအလဲ ပြုလုပ်မှုဖြစ်သည်။

ဝေါ့ဇ်သည် ယီမင်နိုင်ငံရှိ ဟူရ်သီစစ်သွေးကြွများကို တိုက်ခိုက်မည့် လျှို့ဝှက်ချက်များကို Signal လူမှုမီဒီယာတွင်  ပြောကြားခဲ့သည့် Group Chat တစ်ခုပေါက်ကြားခဲ့ပြီးနောက် သီတင်းပတ် အနည်းငယ်အကြာ၌ ၎င်း၏ လက်ထောက်အရာရှိ အဲလက်စ်ဝေါင် (Alex Wong) နှင့်အတူ မေလ ၁ ရက်မှာ ရာထူးမှ ထွက်ခွာသွားခဲ့သည်။

အမေရိကန်အထူးတပ်ဖွဲ့ဝင် စစ်သားဟောင်းတစ်ဦးဖြစ်ပြီး ဖလော်ရီဒါ လွှတ်တော်အမတ်ဟောင်းဖြစ်သည့် ဝေါ့ဇ် သည် The Atlantic မဂ္ဂဇင်း၏ အယ်ဒီတာချုပ်ဖြစ်သူ ဂျက်ဖရေး ဂိုးလ်ဘတ်ချ် (Jeffrey Goldberg) ကို အစိုးရ ထိပ်သီးအရာရှိများသာ ပါဝင်သည့် Group Chat ထဲတွင် မှားယွင်းစွာ ထည့်သွင်းခဲ့သဖြင့် ယီမင်ရှိ ဟူရ်သီ သူပုန်များအား တိုက်ခိုက်သည့် အသေးစိတ် အချက်အလက်များ ပေါက်ကြားခဲ့ခြင်းဖြစ်သည်။

ထိုဖြစ်စဉ်ကြောင့် ထရမ့်အစိုးရအဖွဲ့သည် လုံခြုံရေးကျိုးပေါက်မှုဖြင့် ဝေဖန်ရှုတ်ချခံခဲ့ရသည်။

ရာထူးမှဖယ်ရှားခံလိုက်ရတဲ့ အမျိုးသားလုံခြုံရေးအကြံပေးပုဂ္ဂိုလ် မိုက်ဝေါ့ဇ်ကို တွေ့ရစဉ်

“ကျ‌နော်ဟာ သမ္မတထရမ့်နဲ့ ကျနော်တို့ရဲ့ ကြီးကျယ်တဲ့နိုင်ငံအတွက် အလွန်ဂုဏ်ယူစွာ ဆက်လက် ထမ်းဆောင် သွားမှာ ဖြစ်ပါတယ်”ဟု ဝေါ့ဇ်က X လူမှုမီဒီယာတွင် ရေးသားခဲ့သည်။

သမ္မတထရမ့်ကလည်း ဝေ့ါဇ်သည် စစ်မြေပြင်တွင်  စစ်သားတစ်ဦးအဖြစ် တာဝန်ထမ်းဆောင်ခဲ့ချိန်မှစပြီး လွှတ်တော်အမတ်အဖြစ် တာဝန်ထမ်းဆောင်ခဲ့ချိန်အထိ   နိုင်ငံ၏ အမျိုးသားအကျိုးစီးပွားများကို ရှေ့တန်းတင်ပြီး အားကြိုးမာန်တက် လုပ်ဆောင်ခဲ့သူဖြစ်ကြောင်း Truth Social လူမှုမီဒီယာ၌ ရေးသားခဲ့သည်။

ထရမ့်က ဝေါ့ဇ်ကို ထောက်ခံကြောင်း အများပြည်သူရှေ့တွင် ထပ်တလဲလဲ ပြောကြားခဲ့သည် ဆိုသော်လည်း နောက်ကွယ်၌ ဝေါ့ဇ်သည် Signal မက်ဆေ့ချ် အရှုပ်တော်ပုံ ပေါ်ပေါက်ခဲ့မှုကြောင့် သမ္မတ၏ယုံကြည်မှုကို ဆုံးရှုံးခဲ့သည်။

ဝေါ့ဇ်ကို အမျိုးသားလုံခြုံရေးရာထူးမှ ဖယ်ရှားပြီး ကုလသမဂ္ဂဆိုင်ရာ အမေရိကန်သံအမတ်အဖြစ် ပြောင်းလဲ တာဝန်ထမ်းဆောင်စေခြင်းကို ရာထူးတိုးပေးမှုအဖြစ် ရှုမြင်နိုင်သည်ဟု အမေရိကန် ဒုတိယသမ္မတ ဂျေဒီဗန့်က (JD Vance) သတင်းဌာနသို့ ပြောကြားခဲ့သည်။

လက်ရှိတွင် အမေရိကန်နိုင်ငံခြားရေးဝန်ကြီး မာကို ရူဘီယို (Marco Rubio) က အမျိုးသားလုံခြုံရေးအကြံပေး ပုဂ္ဂိုလ်အဖြစ် ယာယီ တာဝန်ယူသွားမည်ဖြစ်ကြောင်း ထရမ့်က ပြောကြားခဲ့သည်။

Source: တိုင်းမ်

CNI International News

ဂျာကာတာ၊ မေလ ၃

အင်ဒိုနီးရှားနိုင်ငံ၊ ဂျာကာတာမြို့ရှိ အာဆီယံနှင့် အရှေ့အာရှအတွက် စီးပွားရေး သုတေသန အင်စတီကျု (ERIA) ၏ ရုံးခန်းတွင် “ကမ္ဘောဒီးယား ငြိမ်းချမ်းရေး လုပ်ငန်းစဉ်တွင် အင်ဒိုနီးရှား၏ အခန်းကဏ္ဍ” အမည်ရှိ ခေါင်းစဉ်ဖြင့် ဆွေးနွေးပွဲတစ်ခုကို  ERIA School of Government (SOG) သင်တန်းကျောင်းတွင် ပြုလုပ်ခဲ့သည်ဟု ANTARA  သတင်းဝက်ဘ်ဆိုက်၌ ဖော်ပြခဲ့သည်။

ထိုဆွေးနွေးပွဲတွင် အကြောင်းအရာ အများအပြားကို ဆွေးနွေးမည်ဖြစ်ပြီး မေလ ၆ ရက်တွင်မူ ကမ္ဘောဒီးယား အထက်လွှတ်တော်ဥက္ကဋ္ဌ ဟွန်ဆန် (Samdech Akka Moha Sena Padei Techo Hun Sen) က ERIA ခေါင်းဆောင်မှုအခန်းကဏ္ဍကို ဟောပြောပို့ချမည်ဖြစ်သည်။

ထိုဆွေးနွေးပွဲသည် ၁၉၈၀ ပြည့်နှစ်ကုန်ပိုင်းနှင့် ၁၉၉၀ ပြည့်နှစ် အစောပိုင်း ကာလများအတွင်း  ကမ္ဘောဒီးယား နိုင်ငံ၏ ငြိမ်းချမ်းရေးနှင့် တည်ငြိမ်ရေးကို လုပ်ဆောင်ရာတွင် အင်ဒိုနီးရှား၏ အရေးကြီးသည့် အခန်းကဏ္ဍအား မီးမောင်းထိုး ဖော်ပြခဲ့သည်။

အင်ဒိုနီးရှား၏ အစီအစဉ်များသည် ကမ္ဘောဒီးယား၏ ပြန်လည်ရင်ကြားစေ့ရေး လမ်းကြောင်းကို အဆင်ပြေ ချောမွေ့စေရုံသာမက အာဆီယံအား ဒေသတွင်း လုံခြုံမှုရှိစေသည့် မောင်းနှင်အား တစ်ခုအဖြစ် ခိုင်မာစွာ ရပ်တည်နိုင်စေခဲ့သည်ဟု ဆိုသည်။

ဆွေးနွေးရေး ကိုယ်စားလှယ်များကိုတွေ့ရစဉ်

ERIA သင်တန်းကျောင်း၏ ကျောင်းအုပ်ကြီးဖြစ်သည့် ပါမောက္ခ နိုဘူဟီရို အီဇာဝါ (Nobuhiro Aizawa) ၏ ဖွင့်ပွဲ မိန့်ခွန်းတွင်လည်း အင်ဒိုနီးရှားနိုင်ငံခြားရေးဝန်ကြီးဌာနနှင့် အမျိုးသားလက်နက်ကိုင် တပ်ဖွဲ့တို့မှတဆင့် အင်ဒိုနီးရှားနိုင်ငံ၏ ကြီးမားသည့် စွမ်းဆောင်မှုများကို အလေးထား ပြောဆိုခဲ့သည်။

“သံတမန်ရေးရာနဲ့ အမြော်အမြင်ရှိတဲ့ ခေါင်းဆောင်မှုကဏ္ဍဟာ ပဋိပက္ခတွေ ဖြစ်ပွားနေတဲ့ အချိန်မှာတောင် ဒေသတွင်း တည်ငြိမ်ရေးနဲ့ ငြိမ်းချမ်းရေးကို ဆောင်ကြဉ်းပေးနိုင်တယ်ဆိုတာကို ကမ္ဘောဒီးယား ငြိမ်းချမ်းရေး လုပ်ငန်းစဉ်အတွင်း အင်ဒိုနီးရှားရဲ့ လှုပ်ရှားဆောင်ရွက်မှုက ကြီးမားတဲ့ ဥပမာတစ်ခုလို ဖြစ်နေပါတယ်” ဟု အီဇာဝါက ပြောကြားခဲ့သည်။

ERIA ခေါင်းဆောင်မှု ဟောပြောပို့ချချက် အစီအစဉ်ကို ၂၀၂၄ ခုနှစ်၊ စက်တင်ဘာ ၁၈ ရက်က စတင် အကောင်အထည် ဖော်ခဲ့ခြင်းဖြစ်ပြီး အင်ဒိုနီးရှား၏ ဆဋ္ဌမမြောက် သမ္မတဖြစ်သည့် ဆူစီလို ဘမ်းဘန်း ယူဒိုယိုနို (Susilo Bambang Yudhoyono) က သဘာပတိအဖြစ် ဖွင့်လှစ်ခဲ့ခြင်းဖြစ်သည်။

Source: ANTARA