CNI International News

တီအန်ကျင်း၊ စက်တင်ဘာ ၂

ကမ္ဘာ့တောင်ခြမ်းဒေသတွင် အိန္ဒိယနှင့်တရုတ် ပါဝင်နေခြင်းကြောင့် အိမ်နီးချင်းကောင်း မိတ်ဆွေအနေဖြင့် နဂါးနှင့်ဆင် ပူပေါင်းဆောင်ရွက်ရန် တရုတ်သမ္မတ ရှီကျင့်ဖျင်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

တရုတ်နှင့် အိန္ဒိယတို့သည် ခင်မင်ရင်းနှီးသည့် အိမ်နီးချင်းများဖြစ်ရန် အရေးကြီးကြောင်း တရုတ်သမ္မတ ရှီကျင့်ဖျင် (Xi Jingping) က ပြောကြားခဲ့သည်။

ထို့ပြင် နယ်စပ်ပြဿနာသည် တရုတ်-အိန္ဒိယ ဆက်ဆံရေးများကို အဓိပ္ပာယ်ဖွင့်ဆိုသည့် အရေးကိစ္စ မဖြစ်သင့် ကြောင်းလည်း ရှီက ဩဂုတ် ၃၁ ရက်တွင် တရုတ်နိုင်ငံသို့ ရောက်ရှိလာသော အိန္ဒိယဝန်ကြီးချုပ် မိုဒီ (Narendra Modi) ကို ပြောကြားခဲ့သည်။

တီယန်ကျင်း (Tianjin) မြို့တွင် ပြုလုပ်သည့် ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အစည်းအဝေးတွင် ရှီက မိုဒီနှင့် သီးသန့်တွေ့ဆုံချိန်တွင် နှစ်နိုင်ငံကြား ကောင်းမွန်သည့် အိမ်နီးချင်းများ ဖြစ်နိုင်ကြောင်း၊ ကမ္ဘာ့ တောင်ခြမ်းတွင် အဓိကအခန်းကဏ္ဍမှ ပါဝင်ဆောင်ရွက်နိုင်ကြောင်း ပြောကြားခဲ့သည်ဟု တရုတ်နိုင်ငံပိုင် ဆင်ဟွာ သတင်းအေဂျင်စီက ဖော်ပြခဲ့သည်။

“တရုတ်နဲ့ အိန္ဒိယက ကမ္ဘာပေါ်က ယဉ်ကျေးမှု အမြင့်မားဆုံး နိုင်ငံတွေ ဖြစ်ပါတယ်။ ကျနော်တို့ဟာ ကမ္ဘာပေါ်မှာ လူဦးရေ အများဆုံးနိုင်ငံတွေဖြစ်ပြီး ကမ္ဘာ့တောင်ခြမ်းဒေသမှာ ပါဝင်နေပါတယ်။ မိတ်ဆွေတွေဖြစ်ဖို့၊ အိမ်နီးချင်း ကောင်းတွေဖြစ်ဖို့၊ နဂါး (တရုတ်) နဲ့ ဆင် (အိန္ဒိယ) တို့ အတူပူးပေါင်းဆောင်ရွက်ဖို့ဟာ အရမ်းအရေးကြီးပါတယ်” ဟု ရှီက အဖွင့်မိန့်ခွန်းတွင် ပြောကြားခဲ့သည်။

အိန္ဒိယဝန်ကြီးချုပ် မိုဒီနဲ့ တရုတ်သမ္မတ ရှီကျင့်ဖျင်တို့ တွေ့ဆုံ ဆွေးနွေးနေစဉ်

၇ နှစ်အတွင်း တရုတ်သို့ ပထမဆုံး ခရီးစဉ်အဖြစ် ရောက်ရှိလာသည့် မိုဒီကလည်း ပြီးခဲ့သည့် နှစ်ကတည်းက နှစ်နိုင်ငံသည် အပြုသဘောဆောင်သော ဦးတည်ချက်ကို ရွေ့လျားခဲ့ကြောင်း ပြောကြားခဲ့သည်။

“ကျနော်တို့ရဲ့ ဆက်ဆံရေးကို အပြန်အလှန် ယုံကြည်မှု၊ လေးစားမှုနဲ့ သိမ်မွေ့နက်နဲမှုအပေါ် အခြေခံပြီး ရှေ့ကို ဆက်သွားဖို့ သန္နိဋ္ဌာန် ချထားပါတယ်။ နယ်စပ်မှာ စစ်ရေးထိတွေ့မှုတွေကို ရှောင်ကြဉ်ခဲ့ပြီးတဲ့နောက် နိုင်ငံရေးနဲ့ တည်ငြိမ်မှုရှိတဲ့ အခြေအနေ တစ်ရပ်ကို ဖန်တီးနိုင်ခဲ့ပါတယ်” ဟု မိုဒီက ပြောကြားခဲ့သည်။

ဩဂုတ် ၃၁ ရက် မွန်းလွဲပိုင်းက ရှီနှင့်မိုဒီတို့၏ သီးသန့်တွေ့ဆုံမှုသည် ၁ နာရီနီးပါး ကြာမြင့်ခဲ့သည်။

၂၀၂၀ ပြည့်နှစ်က တရုတ်နှင့်အိန္ဒိယ စစ်သားများသည် နယ်စပ်တွင် ပြင်းထန်စွာ ခိုက်ရန် ဖြစ်ပွားခဲ့ပြီးနောက် နှစ်နိုင်ငံတင်းမာမှုများ မြင့်တက်ခဲ့သော်လည်း ပြီးခဲ့သည့်နှစ်မှာတော့ တင်းမာမှုများကို လျှော့ချရန် ကြိုးပမ်းခဲ့ သည်။

အထူးသဖြင့် အမေရိကန်၏ ကုန်သွယ်ခွန် တိုးမြှင့်ကောက်ခံမှုများကို ရင်ဆိုင်လာရချိန်တွင် တရုတ်နှင့် အိန္ဒိယ တို့၏ ထိတွေ့ဆက်ဆံမှုများ ပိုမိုမြင့်တက်ခဲ့သည်။

မိုဒီသည် SCO အစည်းအဝေးကို တက်ရောက်ခဲ့သော်လည်း စက်တင်ဘာ ၃ ရက်တွင် ဘေဂျင်းမြို့တော်၌ ပြုလုပ်မည့် တရုတ်၏ စစ်ရေးပြ အခမ်းအနားအား တက်ရောက်မည် မဟုတ်ကြောင်း သတင်း၌ ဖော်ပြခဲ့သည်။

Source: South China Morning Post

CNI International News

ကဘူးလ်၊ စက်တင်ဘာ ၂

အာဖဂန်နစ္စတန်နိုင်ငံရှိ ဝေးလံခေါင်သီသော တောင်တန်းဒေသတွင် သြဂုတ် ၃၁ ရက် ညသန်းခေါင် မတိုင်မီအချိန် က အင်အားပြင်း ငလျင်တစ်ခုနှင့် နောက်ဆက်တွဲ ငလျင်များ လှုပ်ခတ်မှုကြောင့် နေအိမ်များပြိုကျပြီး လူ ၈၀၀ ကျော် သေဆုံးခဲ့ကြောင်း ရိုက်တာမှ ဖော်ပြခဲ့သည်။

ရစ်ချ်တာစကေး ၆ ပြင်းအားရှိ ထိုငလျင်ကြောင့် ကဘူးလ် (Kabul) မြို့တော်နှင့် အိမ်နီးချင်း ပါကစ္စတန်မြို့တော် အစ္စလာမာဘတ် (Islamabad) ရှိ အဆောက်အအုံများ တုန်လှုပ်သွားခဲ့သည်။

လူ ၁ ဒသမ ၂ သန်းကျော်သည် အင်အားပြင်းထန်သည့် လှုပ်ခတ်မှုကို ကြုံတွေ့ရဖွယ်ရှိသည်ဟု အမေရိကန် ဘူမိဗေဒလေ့လာတိုင်းထွာရေးအေဂျင်စီ (USGS) က ပြောကြားခဲ့သည်။

အာဖဂန်နစ္စတန်နိုင်ငံ အရှေ့ပိုင်းရှိ ငလျင်ဗဟိုချက် အနီးဖြစ်သော ဝေးလံခေါင်သီသည့် ကူနာ(Kunar)ပြည်နယ် တွင် လူ ၈၀၀ ဝန်းကျင် သေဆုံးခဲ့ပြီး ဒဏ်ရာရရှိသူ ၂၅၀၀ ရှိသည်ဟု တာလီဘန် အစိုးရပြောရေးဆိုခွင့်ရှိသူ ဇာဘီဟူလာ မူဂျာဟစ်(Zabihullah Mujahid)က ပြောကြားခဲ့သည်။

လက်ရှိတွင် ကယ်ဆယ်ရေး လုပ်ငန်းများ လုပ်ဆောင်လျက်ရှိသည်ဟု တာလီဘန် အာဏာပိုင်များက ပြောကြား ခဲ့သည်။

အာဖဂနစ္စတန်မှာ လှုပ်ခတ်သွားတဲ့ ငလျင်နေရာကို ပြသထားစဉ်

အိမ်နီးချင်း နန်ဂါဟာပြည်နယ်တွင် ၁၂ ဦး သေဆုံးပြီး ဒဏ်ရာရရှိသူ ၂၅၅ ဦးရှိသည်ဟု ၎င်းက ထပ်မံပြောကြား ခဲ့သည်။

“နေအိမ် အများအပြား ပျက်စီးသွားပါတယ်”ဟု ပြည်ထဲရေးဝန်ကြီးဌာန ပြောရေးဆိုခွင့်ရှိသူ အဘူလ်မာတင် ကာနီက ဆိုသည်။

အာဖဂန်နစ္စတန် ဒေသခံအများစုသည် တန်ဖိုးနည်းပြီး ရွှံ့အုတ်များဖြင့် ဆောက်ထားသော နေအိမ်များတွင် နေထိုင်ကြကာ ထိုနေအိမ်များသည် ငလျင်ဒဏ်ကို ခံနိုင်ရည်မရှိပေ။

လူသူ အရောက်အပေါက် နည်းသည့် ကူနာပြည်နယ်ရှိ ငလျင်ဒဏ်ကို အဆိုးဆုံးခံရသော ကျေးရွာအချို့တွင် အပျက်အစီးများဖြင့် လမ်းများ ပိတ်ဆို့နေသောကြောင့် သွားလာရန် ခက်ခဲနေသည်ဟု ကုလသမဂ္ဂ ရွှေ့ပြောင်း နေထိုင်သူများဆိုင်ရာ အေဂျင်စီက ပြောကြားခဲ့သည်။

တာလီဘန်အာဏာပိုင်များနှင့် ကုလသမဂ္ဂက ငလျင်ဒဏ် အဆိုးဆုံးခံရသော ဒေသများသို့ ကယ်ဆယ်ရေးများ စေလွှတ်ထားသည်ဟု သိရသည်။

Source: ရိုက်တာ

CNI International News

တီယန်ကျင်း ၊ စက်တင်ဘာ ၂

ပူတင်သည် တရုတ်နိုင်ငံ၊ တီယန်ကျင်း (Tianjin) မြို့တွင် ပြုလုပ်သည့် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) အစည်းအဝေးတွင် တရုတ်သမ္မတ ရှီကျင့်ဖျင် ( Xi Jinping ) ၊ အိန္ဒိယဝန်ကြီးချုပ် မိုဒီ(Narendra Modi) တို့နှင့်တွေ့ဆုံပြီး နေတိုး၏ အင်အားချဲ့ထွင်မှုကို ဖြေရှင်းရမည်ဟု ပြောကြားခဲ့ကြောင်း ရိုက်တာမှ ဖော်ပြခဲ့သည်။

ယူကရိန်းတွင် ရေရှည်တည်တံ့သည့် ငြိမ်းချမ်းရေးကို ရရှိရန်အတွက် နေတိုးအဖွဲ့၏ အရှေ့ဘက်သို့ အင်အား ချဲ့ထွင်လာသည့် ပြဿနာကို ဖြေရှင်းရမည်ဟု ရုရှားသမ္မတ ပူတင် (Vladimir Putin) က ပြောသည်။

ယူကရိန်းနိုင်ငံ အရှေ့ပိုင်းတွင် ရုရှားက ထောက်ပံ့ပေးထားသည့် ခွဲထွက်ဝါဒီများနှင့် ယူကရိန်း စစ်သားများကြား ၈ နှစ်ကြာ တိုက်ပွဲဖြစ်ပွားခဲ့ပြီးနောက် ၂၀၂၂ ခုနှစ်၊ ဖေဖော်ဝါရီ၌ ယူကရိန်းကို ဝင်ရောက် တိုက်ခိုက်ရန် ပူတင်က စစ်တပ်အား အမိန့်ပေးခဲ့သည်။

လက်ရှိတွင် ရုရှားသည် ယူကရိန်း၏ နယ်နိမိတ် စုစုပေါင်း၏ ၅ ပုံ ၁ ပုံကို ထိန်းချုပ်ထားသည်။

ယူကရိန်းနှင့် အနောက်အင်အားကြီး ဥရောပနိုင်ငံများကမူ ထိုကျူးကျော် တိုက်ခိုက်မှုသည် နယ်မြေများကို သိမ်းယူရန် အင်ပါယာချဲ့သည့် ရက်စက်သော ပုံစံတစ်ခု ဖြစ်သည်ဟု ပြောကြားခဲ့သည်။

SCO အစည်းအဝေး ကျင်းပနေစဉ်

ပူတင်ကမူ ၁၉၈၉ ခုနှစ်က ဘာလင်တံတိုင်း ပြိုကျခဲ့ပြီးနောက် နေတိုးအဖွဲ့သည် ကမ္ဘာ့အရှေ့ပိုင်းဒေသတွင် စစ်အင်အားကို ချဲ့ထွင်ခဲ့ခြင်းဖြင့် အနောက်နိုင်ငံများက ရုရှားကို အရှက်ရအောင် လုပ်ဆောင်ခဲ့ခြင်းဖြစ်ကြောင်း ပြောကြားခဲ့သည်။

SCO အစည်းအဝေးတွင် မိုဒီ၊ ပူတင်နှင့် ရှီတို့သည် စကားပြန်များဖြင့် သီးသန့်တွေ့ဆုံခဲ့ချိန်က ပြုံးရွှင်စွာ စကား ပြောနေပုံများကို တရုတ်မီဒီယာများက ထုတ်ပြန်ခဲ့သည်။

ပူတင်သည် SCO အစည်းအဝေးတွင်လည်း ယူကရိန်း စစ်ပွဲနှင့်ပတ်သက်ပြီး အနောက်နိုင်ငံများကို ဝေဖန်ပြစ်တင် ခဲ့သည်။

အနောက်နိုင်ငံများသည် ယူကရိန်းကို ၎င်းတို့ဘက်ပါအောင် စည်းရုံးခဲ့ကြောင်း၊ ထို့နောက် အမေရိကန် ဦးဆောင် သည့် နေတိုးအဖွဲ့ထဲသို့ ယူကရိန်းကို ဆွဲသွင်းရန် ကြိုးပမ်းခဲ့ကြောင်း ပူတင်က ပြောကြားခဲ့သည်။

ထို့ပြင် ဩဂုတ်လက အလက်စကာ (Alaska)မြို့တွင် ပြုလုပ်ခဲ့သည့် အစည်းအဝေးအတွင်း အမေရိကန်သမ္မတ ဒေါ်နယ်ထရမ့် (Donald Trump) နှင့် နားလည်မှုများ ရရှိခဲ့ကြောင်း၊ ထိုနားလည်မှုများကြောင့် ယူကရိန်း ငြိမ်းချမ်းရေးအတွက် လမ်းပွင့်သွားစေခဲ့ကြောင်း ပူတင်က ပြောကြားခဲ့သည်။

Source: ရိုက်တာ

CNI International News

ဗင်းနစ်၊ စက်တင်ဘာ ၁

အီတလီနိုင်ငံတွင် ဗင်းနစ်ရုပ်ရှင်ပွဲတော် ကျင်းပနေသည့် နေရာအနီး၌ ဩဂုတ် ၃၀ ရက်က ထောင်နှင့်ချီသော လူများစုရုံး ရောက်ရှိလာကြပြီး ဂါဇာဒေသအား ပိတ်ဆို့ထားသည့် အစ္စရေးကို ဆန့်ကျင်ဆန္ဒပြခဲ့ကြသည်ဟု South China Morning Post မှ ဖော်ပြခဲ့သည်။

၈၂ ကြိမ်မြောက် ဗင်းနစ် နိုင်ငံတကာ ရုပ်ရှင်ပွဲတော်ကို အီတလီနိုင်ငံ၊ ဗင်းနစ် လီဒီု (Venice Lido) ကျွန်းတွင် ဩဂုတ် ၂၇ ရက်မှ စက်တင်ဘာ ၆ ရက်အထိ ကျင်းပနေခြင်းဖြစ်သည်။

အီတလီနိုင်ငံ အရှေ့မြောက်ပိုင်းရှိ လက်ဝဲယိမ်းနိုင်ငံရေးအဖွဲ့များက ဦးဆောင်သည့် ထိုဆန္ဒပြမှုများသည် ကမ္ဘာကျော် သရုပ်ဆောင်များ ရောက်ရှိနေသည့် ရုပ်ရှင်ပွဲတော် ကျင်းပသည့် ခန်းမနှင့် ကီလိုမီတာ အနည်းငယ် အကွာတွင် ဖြစ်ပွားခဲ့ခြင်းဖြစ်သည်။

ထိုဆန္ဒပြမှုတွင် လူပေါင်း ၃၀၀၀ မှ ၄၀၀၀ ကြား ပါဝင်ခဲ့ပြီး ဆန္ဒပြသူများသည် ပါလက်စတိုင်း အလံများကို ဝှေ့ယမ်းကာ ရုပ်ရှင်ပွဲတော် ဝင်ပေါက်နေရာသို့ ဖြည်းညှင်းစွာ လမ်းလျှောက် ချီတက်ခဲ့ကြသည်။

ရုပ်ရှင်လောကသားများ အနေဖြင့် ဂါဇာအရေးကို ကမ္ဘာက ပိုမိုအာရုံစိုက်မိစေရန် ကမ္ဘာ့သက်တမ်း အရင့်ဆုံး ရုပ်ရှင်ပွဲတော်ဖြစ်သည့် ဗင်းနစ်ရုပ်ရှင်ပွဲတော်ကို အသုံးချပြီး ဂါဇာအရေးကို မြှင့်တင်သင့်ကြောင်း ဆန္ဒပြသူများက ပြောကြားခဲ့သည်။

“ဖျော်ဖျေရေး လုပ်ငန်းဟာ ပရိသတ်တွေ အများကြီးရှိတာက အားသာချက် ဖြစ်နေပါတယ်။ အဲဒါကြောင့် သူတို့ အနေနဲ့ ဂါဇာနဲ့ပတ်သက်ပြီး ရပ်တည်ချက်ကို ဖော်ပြသင့်ပါတယ်” ဟု ဗင်းနစ်မြို့မှ အသက် ၃၁ နှစ်အရွယ် ကွန်ပျူတာသိပ္ပံပညာရှင် မာကို စီယိုတာလာ (Marco Ciotola) က ပြောကြားခဲ့သည်။

“ဘာတွေဖြစ်နေလဲဆိုတာ ကျမတို့ အားလုံးသိပြီးပါပြီ။ ဒီပုံစံအတိုင်း ဆက်ဖြစ်နေလို့ မရပါဘူး” ဟု ပါလက်စတိုင်း အလံကို ကိုင်ဆောင်ထားသည့် ကျောင်းဆရာမ တစ်ဦးဖြစ်သော ကလောဒီယာ ပေါ့ဂီ (Claudia Poggi) က ပြော ကြားခဲ့သည်။

ဂါဇာစစ်ပွဲသည် ဗင်းနစ်ရုပ်ရှင်ပွဲတော်တွင် အဓိက အကြောင်းအရာတစ်ခု ဖြစ်လာခဲ့ပြီး အစ္စရေးအစိုးရကို ရှုတ်ချ ထားသလို စစ်ပွဲဆန့်ကျင်ရေးကို လူသိရှင်ကြား ထုတ်ဖော်ပြောဆိုကြရန် ပါလက်စတိုင်းများအား ထောက်ခံသည့် Venice4Palestine အဖွဲ့က ပေးစာတစ်စောင် ထုတ်ပြန်ခဲ့သည်။

ထိုပေးစာတွင် နာမည်ကြီး ရုပ်ရှင်ဒါရိုက်တာများ၊ ရုပ်ရှင်လောကမှ ပရောဖက်ရှင်နယ်များ၏ လက်မှတ်ပေါင်း ၂၀၀၀ ကျော် ရေးထိုးထားကြောင်း ဆန္ဒပြပွဲကို စီစဉ်သူများက ပြောကြားခဲ့သည်။

မေလကလည်း ကိန်းစ် ရုပ်ရှင်ပွဲတော်တွင် အလားတူ ဆန္ဒပြမှုများ ဖြစ်ပွားခဲ့သည်။

Source: South China Morning Post

CNI International News

ဆန်နာ၊ စက်တင်ဘာ ၁

ယီမင်နိုင်ငံ၊ ဆန်နာ (Sanaa) မြို့တော်တွင် ဖြစ်ပွားခဲ့သည့် အစ္စရေး၏ တိုက်ခိုက်မှုကြောင့် ဟူရ်သီအဖွဲ့က ဖွဲ့စည်းထားသော အစိုးရအဖွဲ့၏ ဝန်ကြီးချုပ်နှင့် ဝန်ကြီးအချို့ သေဆုံးခဲ့ကြောင်း ရိုက်တာမှ ဖော်ပြခဲ့သည်။

ထိုတိုက်ခိုက်မှုသည် အစ္စရေးကြောင့် ဟူရ်သီအဖွဲ့၏ ထိပ်သီးအရာရှိများ သေဆုံးသည့် ပထမဆုံး ဖြစ်စဉ် ဖြစ်သည်ဟု ဟူရ်သီအဖွဲ့မှ အမြင့်ဆုံး နိုင်ငံရေးကောင်စီ၏ အကြီးအကဲ မာဒီ အယ် မာရှက် (Mahdi al-Mashat) က ပြောကြားခဲ့သည်။

ဩဂုတ် ၂၈ ရက်က ဖြစ်ပွားခဲ့သည့် အစ္စရေး၏ တိုက်ခိုက်မှုတွင် ဒဏ်ရာ ရရှိသူများလည်း ရှိခဲ့ကြောင်း မာရှက်က ပြောကြားခဲ့သော်လည်း အသေးစိတ် ထုတ်ပြန်ခဲ့ခြင်းမရှိပေ။

အစ္စရေးကမူ ၎င်း၏ လေကြောင်းတိုက်ခိုက်မှုသည် ဟူရ်သီအဖွဲ့၏ စစ်ဦးစီးချုပ်၊ ကာကွယ်ရေးဝန်ကြီးနှင့် အခြား ထိပ်သီးအရာရှိများကို ပစ်မှတ်ထားခဲ့ခြင်းဖြစ်ကြောင်း ပြောကြားခဲ့သည်။

မာရှက်၏ ထုတ်ပြန်ချက်တွင် သေဆုံးသူများ၊ ဒဏ်ရာရသူများထဲတွင် ဟူရ်သီ ကာကွယ်ရေးဝန်ကြီး ပါဝင်ခြင်း ရှိ၊ မရှိ ရှင်းလင်းစွာ ဖော်ပြမထားပေ။

အစ္စရေး၏ တိုက်ခိုက်မှုကြောင့် သေဆုံးခဲ့သည့် ဟူရ်သီအစိုးရ၏ ဝန်ကြီးချုပ် အာမက် ဂါလက်ဘ် အယ် ရာဝီ (Ahmad Ghaleb al-Rahwi)သည် ပြီးခဲ့သည့်နှစ်က ဝန်ကြီးချုပ်အဖြစ် ခန့်အပ်ခြင်း ခံခဲ့ရသူဖြစ်သည်။

ဟူရ်သီအဖွဲ့မှ အမြင့်ဆုံး နိုင်ငံရေးကောင်စီ၏ အကြီးအကဲ မာဒီ အယ် မာရှက်ကို တွေ့ရစဉ်

ယခုတွင် ၎င်း၏ နေရာကို ဒုတိယဝန်ကြီးချုပ် မိုဟာမက် မစ်ဖ်တာ (Mohammed Miftah) က အစားထိုး တာဝန်ထမ်းဆောင်မည်ဖြစ်သည်။

ရာဝီသည် ၂၀၁၄ ခုနှစ်က ဆန်နာမြို့တော်တွင် ဟူရ်သီအဖွဲ့၏ ဖြုတ်ချခြင်းကို ခံခဲ့ရသည့်  ယခင် ယီမင်သမ္မတ ဟောင်း အလီ အဗ္ဗဒူလာ ဆာလာ (Ali Abdullah Saleh) ၏ မဟာမိတ်တစ်ဦးဖြစ်သည်။

သို့သော် နောက်ပိုင်းတွင် ရာဝီသည် ဟူရ်သီအဖွဲ့က ထူထောင်ခဲ့သည့် အစိုးရအဖွဲ့ထဲတွင် ပူးပေါင်းပါဝင်ခဲ့သည်။

လက်ရှိတွင် ယီမင်၌ အစိုးရ ၂ ဖွဲ့ကွဲနေပြီး ဆန်နာမြို့တော်တွင် ဟူရ်သီအဖွဲ့က ထူထောင်ထားသည့် အစိုးရအဖွဲ့နှင့် အေဒင် (Aden) မြို့တွင် ဆော်ဒီက ထောက်ခံထားသော အစိုးရအဖွဲ့ဟူ၍ အစိုးရ ၂ ဖွဲ့ရှိနေသည်။

Source: ရိုက်တာ

CNI International News

ဂျာကာတာ၊ စက်တင်ဘာ ၁

အင်ဒိုနီးရှားနိုင်ငံတွင် ဆန္ဒပြမှုများ ကျယ်ပြန့်လာခြင်းကြောင့် သမ္မတ ဘရာဘိုဝိုသည် တရုတ်ခရီးစဉ်ကို ဖျက်သိမ်း လိုက်ပြီးနောက် တရုတ်သံရုံးကလည်း အင်ဒိုနီးရှားနိုင်ငံရှိ တရုတ်နိုင်ငံသားများ လုံခြုံရေးသတိထားရန် ထုတ်ပြန်ခဲ့ သည်ဟု South China Morning Post မှ ဖော်ပြခဲ့သည်။

အင်ဒိုနီးရှားတွင် နေထိုင်သည့် တရုတ်နိုင်ငံသားများ အနေဖြင့် လူစုလူဝေးများထဲ၌ ပါဝင်ခြင်းမပြုရန် ဂျာကာတာ (Jakarta) မြို့တော်ရှိ တရုတ်သံရုံးက သတိပးချက် ထုတ်ပြန်ထားသည်။ 

အင်ဒိုနီးရှားတွင် ဆန္ဒပြသူများနှင့် ရဲတပ်ဖွဲ့ကြား အဓိကရုဏ်းများ ဆက်လက် ဖြစ်ပွားနေသဖြင့် အင်ဒိုနီးရှား သမ္မတ ပရာဘိုဝို (Prabowo Subianto) သည် တရုတ်သို့ သွားရောက်မည့် ခရီးစဉ်ကို ဖျက်သိမ်းခဲ့သည်။

“နိုင်ငံသားတွေနဲ့ အဖွဲ့အစည်းတွေ အနေနဲ့ လုံခြုံရေး သတိဝိရိယကို မြှင့်တင်ဖို့၊ ပတ်ဝန်းကျင်က အခြေအနေ တွေကို မျက်ခြေမပြတ် စောင့်ကြည့်ဖို့ ၊ မလိုအပ်ဘဲ အပြင်မထွက်ဖို့ ၊ ဆန္ဒပြသူတွေ၊ ဆန္ဒပြတဲ့ နေရာတွေနဲ့ ဝေးဝေးမှာနေဖို့နဲ့ လူစုလူဝေးတွေရှိတဲ့ နေရာတွေကို မသွားသင့်ပါဘူး” ဟု တရုတ်သံရုံးက ဩဂုတ် ၃၀ ရက်တွင် လူမှုမီဒီယာ၌ သတိပေးချက် ထုတ်ပြန်ခဲ့သည်။

အင်ဒိုနီးရှားနိုင်ငံခြားရေးဝန်ကြီး ပရာဆက်ယို ဟာဒီ (Prasetyo Hadi) ကလည်း သမ္မတပရာဘိုဝိုသည် ပြည်တွင်း အခြေအနေများကြောင့် တရုတ်ခရီးစဉ်ကို ဖျက်သိမ်းခဲ့ကြောင်း ပြောကြားခဲ့သည်။

ပရာဘိုဝိုသည် အခြေအနေကို အနီးကပ်စောင့်ကြည့်နေပြီး အကောင်းဆုံး ဖြေရှင်းနည်းအား ဦးဆောင်ပြီး ရှာဖွေ နေကြောင်း ပရာဆက်ယိုက ပြောကြားခဲ့သည်။

အင်ဒိုနီးရှားသမ္မတ ဘရာဘိုဝိုကို တွေ့ရစဉ် 

“အဲဒါကြောင့် သမ္မတက သူ အစည်းအဝေး မတက်နိုင်တော့တဲ့ အကြောင်းကို တရုတ်အစိုးရဆီ တောင်းပန်ခဲ့ပါ တယ်”ဟု ပရာဆက်ယိုက ပြောသည်။

ပရာဘိုဝိုသည် ယခင်က ဩဂုတ် ၃၁ ရက်မှ စက်တင်ဘာ ၁ ရက်အထိ တရုတ်နိုင်ငံ ထျန်းကျင်း (Tianjin) မြို့တွင် ပြုလုပ်မည့် ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) ထိပ်သီးအစည်းအဝေးကို တက်ရောက်ရန်နှင့် စက်တင် ဘာ ၃ ရက်တွင် ဘေဂျင်းမြို့တော်၌ ပြုလုပ်မည့် ဖက်ဆစ်တော်လှန်ရေး အောင်ပွဲနေ့ စစ်ရေးပြ အခမ်းအနားကို တက်ရောက်ရန် စီစဉ်ထားခြင်း ဖြစ်သည်။

သို့သော် အစိုးရ၏ အဂတိလိုက်စားမှု၊ လွှတ်တော်အမတ်များ၏ အကျိုးခံစားခွင့်များ မြင့်မားနေမှုတို့ကြောင့် ပြည်သူများကြား ဒေါသထွက်နေကြပြီး အင်ဒိုနီးရှားနိုင်ငံ၏ မြို့များတွင် ဆန္ဒပြမှုများ ဖြစ်ပွားခဲ့သည်။

ပရာဘိုဝိုကမူ အစိုးရအဖွဲ့ကို ယုံကြည်ရန်၊ စိတ်အေးအေးထားကြရန် တိုက်တွန်းခဲ့ပြီး ဆန္ဒပြမှုများတွင် သေဆုံးမှု များနှင့်ပတ်သက်ပြီး ပွင့်လင်းမြင်သာသည့် စုံစမ်းစစ်ဆေးမှု ပြုလုပ်မည်ဖြစ်ကြောင်း ကတိပြုခဲ့သည်။

Source: South China Morning Post

CNI International News

ခတ္တမန္ဒူ၊ ဩဂုတ် ၃၀

အိန္ဒိယနှင့် တရုတ်တို့သည် နီပေါနိုင်ငံက ပိုင်ဆိုင်ကြောင်း ကြေညာထားသည့် တောင်ကြားလမ်းကို ပြန်ဖွင့်ကာ နယ်စပ်ကုန်သွယ်မှုများ ပြုလုပ်ရန် သဘောတူခဲ့သဖြင့် နီပေါသည် နယ်စပ်ဒေသ ပိုင်ဆိုင်မှုနှင့်ပတ်သက်ပြီး အိန္ဒိယ၊ တရုတ်နိုင်ငံတို့နှင့် နောက်တစ်ကြိမ် အငြင်းပွားလာခဲ့ကြောင်း Nikkei Asia မှ ဖော်ပြခဲ့သည်။

မကြာသေးမီက အိန္ဒိယနှင့် တရုတ်ကြား သံတမန်ဆက်ဆံရေးများ အဆင်ပြေလာခဲ့ပြီး လာမည့်လ အစောပိုင်းတွင် အိန္ဒိယဝန်ကြီးချုပ် မိုဒီ (Narendra Modi) နှင့် တရုတ်သမ္မတ ရှီကျင့်ဖျင် (Xi Jinping) တို့၏ အစည်းအဝေး အပါအဝင် နှစ်နိုင်ငံကြား ထိပ်သီးအဆင့် အစည်းအဝေးများ ပြုလုပ်ရန် စီစဉ်ထားကြသည်။

၂၀၂၀ ပြည့်နှစ်က ဂေါဝန် တောင်ကြား (Galwan Valley) တွင် အိန္ဒိယနှင့် တရုတ် စစ်သားများကြား ခိုက်ရန် ဖြစ်ပွားခဲ့ပြီးနောက် နှစ်အနည်းငယ်ကြာ တင်းမာခဲ့သည့် ဆက်ဆံရေးများ ပြန်လည်ပျော့ပျောင်း လာခဲ့ခြင်း ဖြစ်သည်။

အိန္ဒိယ၊ တရုတ်၊ နီပေါ နယ်နိမိတ်ကို တွေ့ရစဉ်

မကြာသေးမီက တရုတ်နိုင်ငံခြားရေးဝန်ကြီး ဝမ်ယိ (Wang Yi) ၏ အိန္ဒိယခရီးစဉ်အတွင်း နှစ်နိုင်ငံကြား တိုက်ရိုက် လေကြောင်းလိုင်းများ ပြန်လည်ပြေးဆွဲရေး၊ ကုန်သွယ်ရေး တားမြစ်ကန့်သတ်မှုများ ဖြေလျှော့ရေး၊ ယဉ်ကျေးမှု ဖလှယ်မှုများ ပြန်လည် စတင်ရေးတို့အတွက် သဘောတူညီမှု ရရှိခဲ့သည်။

ထို့ပြင် အိန္ဒိယနှင့်တရုတ်သည် Lipulekh Pass ၊ Shipki La Pass နှင့် Nathu La Pass အမည်ရှိ နယ်စပ်ကုန်သွယ် ရေး လမ်းကြောင်းများကို ပြန်လည်ဖွင့်လှစ်ရန် သဘောတူခဲ့သည်။

ထိုသဘောတူညီချက်ကို နီပေါအစိုးရက ပြင်းထန်စွာ ကန့်ကွက်ခဲ့ပြီး ထိုနယ်စပ်ကုန်သွယ်ရေး လမ်းကြောင်းများ တည်ရှိသည့် Limpiyadhura ၊ Lipulekh နှင့် Kalapani ဒေသတို့သည် နီပေါနိုင်ငံ၏ အချုပ်အခြာအာဏာပိုင် ဒေသများဖြစ်ကာ အခြေခံဥပဒေနှင့် တရားဝင် မြေပုံများထဲတွင်လည်း ထည့်သွင်းရေး ဆွဲထားကြောင်း ပြောကြား ခဲ့သည်။

အိန္ဒိယ၊ တရုတ်၊ နီပေါ အလံကိုတွေ့ရစဉ်

နီပေါအောက်လွှတ်တော် ကိုယ်စားလှယ်များဖြစ်သည့် ဂါဂန် ကူမာ သာပ (Gagan Kumar Thapa) ၊ မာဟက်ရှ် ကူမာ ဘာတူလာ (Mahesh Kumar Bartaula) တို့ကဲ့သို့ နီပေါနိုင်ငံရေး ခေါင်းဆောင်များကလည်း တရုတ်နှင့် အိန္ဒိယ၏ သဘောတူညီချက်ကို ရှုတ်ချခဲ့ပြီး ထိုသဘောတူညီချက်သည့် နီပေါ၏ အချုပ်အခြာအာဏာအား ထိခိုက် စေကြောင်း ပြောကြားခဲ့သည်။

အိန္ဒိယအာဏာပိုင်များကမူ နီပေါနိုင်ငံ၏ ကန့်ကွက်မှုများသည် တရားမျှတမှုမရှိဘဲ သမိုင်းအချက်အလက်များ အပေါ် အခြေခံထားခြင်း မဟုတ်ကြောင်း တုံ့ပြန်ခဲ့သည်။

ထို့ပြင် နီပေါအစိုးရ အနေဖြင့် တစ်ဖက်သတ် ပြောဆိုမှုများထက် သံတမန်နည်းအရ အဖြေရှာရန်လည်း အိန္ဒိယက တိုက်တွန်းခဲ့သည်။

Source: Nikkei Asia

CNI International News

ဂျာကာတာ၊ သြဂုတ် ၃၀

အင်ဒိုနီးရှားနိုင်ငံတွင် လွှတ်တော်အမတ်များက လုပ်ခလစာ အများအပြားယူနေမှုများကြောင့် ကျောင်းသားများ ဦးဆောင်၍ ကန့်ကွက်ဆန္ဒပြပွဲများ ပေါ်ပေါက်နေသည်။ 

အင်ဒိုနီးရှားနိုင်ငံတွင် သြဂုတ် ၂၈ ရက် ညပိုင်းက ဆန္ဒပြမှုများ ဖြစ်ပွားချိန်အတွင်း ရဲတပ်ဖွဲ့၏ မော်တော်ယာဉ် တစ်စင်းက မော်တော်ဆိုင်ကယ် အငှားမောင်းနှင်သူ တစ်ဦးကို ဝင်တိုက်ခဲ့သဖြင့် ထိုဆိုင်ကယ်သမား သေဆုံး သွားခဲ့ပြီနောက် ဩဂုတ် ၂၉ ရက်တွင် ဆန္ဒပြမှုများ ဆက်လက် ဖြစ်ပွားခဲ့ကြောင်း ရိုက်တာမှ ဖော်ပြခဲ့သည်။

အင်ဒိုနီးရှား ကျောင်းသားသမဂ္ဂက ဦးဆောင်သည့် ဆန္ဒပြသူများသည် သြဂုတ် ၂၉ ရက်က ဂျာကာတာ (Jakarta) မြို့တော်၏ ရဲတပ်ဖွဲ့ဌာနချုပ်တွင် စုရုံးဆန္ဒပြခဲ့ကြသည်။

အင်ဒိုနီးရှားတွင် အစိုးရ၏ စီးပွားရေး ကိုင်တွယ် လုပ်ဆောင်ပုံနှင့်ပတ်သက်၍ မကျေနပ်မှုများ မြင့်တက်လာချိန် တွင် ဆန္ဒပြသူများနှင့် ရဲတပ်ဖွဲ့ကြား အဓိကရုဏ်းများ ဖြစ်ပွားလာခဲ့ခြင်းဖြစ်သည်။

သြဂုတ် ၂၈ ရက်က ရာနှင့်ချီသည့် ဆန္ဒပြသူများသည် အင်ဒိုနီးရှား လွှတ်တော်အနီးတွင် စုဝေးခဲ့ကြသည်။ 

လွှတ်တော်အမတ်များ လုပ်ခလစာ မြင့်မားစွာ ရရှိမှုနှင့် ပတ်သက်ပြီး ဆန္ဒပြသူများက စိတ်တိုဒေါသဖြစ်နေ ကြသည်။

အင်ဒိုနီးရှားမှာ ဆန္ဒပြနေကြစဉ်

လွှတ်တော်အမတ်များသည် လစဉ် အိမ်ရာထောက်ပံ့ကြေး ရူပီးသန်း ၅၀ (ဒေါ်လာ ၃၀၃၄ ခန့်) ရရှိနေပြီး ထိုပမာဏသည် ဂျာကာတာတွင် အနိမ့်ဆုံး လုပ်ခလစာထက်၁၀ ဆနီးပါး ပိုမိုများပြားနေသည်။

အလုပ်သမားအဖွဲ့များက လုပ်ခလစာ ပိုမိုရရှိရေးနှင့် လတ်တလော ကာလတိုအတွင်း အလုပ်သမားများ အလုပ်အကိုင် ဆုံးရှုံးနေမှုများအတွက် အရေးတယူ လုပ်ဆောင်ပေးရန် အစိုးရကို တောင်းဆိုခဲ့ပြီးနောက် ယခုဆန္ဒပြမှုများ ဖြစ်ပေါ်လာခြင်း ဖြစ်သည်။

သြဂုတ် ၂၉ ရက်က ဖြစ်ပွားခဲ့သည့် ဆန္ဒပြမှုများအတွင်း ရဲတပ်ဖွဲ့က မျက်ရည်ယို ဓာတ်ငွေ့များ အသုံးပြုပြီး လူစုခွဲခဲ့သည်။

အင်ဒိုနီးရှားသမ္မတ ပရာဘိုဝို ဆူဘီယန်တို (Prabowo Subianto) ကမူ သြဂုတ် ၂၈ ရက်က ရဲကားဖြင့် တိုက်မိပြီး ဆိုင်ကယ်သမားတစ်ဦး သေဆုံးသွားခဲ့သည့် ဖြစ်စဉ်ကို စုံစမ်းစစ်ဆေးရန် ညွှန်ကြားခဲ့သည်။

တာဝန်ရှိသူများအနေဖြင့် စည်းမျဉ်းများ ချိုးဖောက်ခြင်း သို့မဟုတ် စည်းမျဉ်းနှင့်အညီ ဆောင်ရွက်မှု မရှိခြင်းတို့ကို တွေ့ရှိခဲ့လျှင် ပြင်းပြင်းထန်ထန် အရေးယူသွားမည်ဟုလည်း ပရာဘိုဝိုက ပြောကြားခဲ့သည်။     

Source: ရိုက်တာ

CNI International News

ဝါရှင်တန်၊ ဩဂုတ် ၃၀

အမေရိကန်သည် လက်တင်အမေရိက၏ မူးယစ်ဆေးဝါးဂိုဏ်းများကို တိုက်ဖျက်ရန်အတွက် ဗင်နီဇွဲလား၏ ကမ်းလွန်ရေပြင်သို့ စစ်သင်္ဘောများနှင့် ပင်လယ်ရေကြောင်း တပ်ဖွဲ့များ စေလွှတ်ခဲ့ကြောင်း ကြေညာခဲ့သဖြင့် ဗင်နီဇွဲလားအစိုးရနှင့် အတိုက်အခံ နိုင်ငံရေးအင်အားစုကြားတွင် မတူကွဲပြားသည့် ထင်မြင်ယူဆချက်များ ထွက်ပေါ်ခဲ့သည်ဟု အေပီမှ ဖော်ပြခဲ့သည်။

အမေရိကန်အစိုးရက ထိုရေပြင်များတွင်  ဖြန့်ကြက်ချထားသည့် စစ်မှုထမ်း ၄၀၀၀ ကျော်ကို အသုံးပြုပြီး ကျူးကျော်မှုများ ပြုလုပ်မည့် အစီအစဉ်အား အရိပ်လက္ခဏာများ ပြသခဲ့ခြင်းမရှိခဲ့ဘဲ ဗင်နီဇွဲလား လေ့လာသူများ၊ အစိုးရအရာရှိဟောင်းများနှင့် တာဝန်ထမ်းဆောင် နေသူများကလည်း ကျူးကျော်မည့် အလားအလာ မဖြစ်နိုင် ကြောင်း သုံးသပ်ထားကြသည်။

လက်ရှိ အချိန်အထိ အမေရိကန် စစ်သင်္ဘောများ ချဉ်းကပ်လာမှုကို ဗင်နီဇွဲလားနိုင်ငံ၏ ပြည်သူများကြားတွင် ထင်ကြေး အမျိုးမျိုးပေးနေကြပြီး လူမှုမီဒီယာများ ပေါ်တွင်လည်း ထိုအကြောင်းအရာများက ပြည့်နှက်နေသည်။

ဗင်နီဇွဲလားအစိုးရကမူ အမေရိကန်၏ လုပ်ဆောင်ချက်ကို ဆန့်ကျင်ကန့်ကွက်ခဲ့သော်လည်း အတိုက်အခံ အင်အား စုများကမူ အမေရိကန်၏ လုပ်ဆောင်ချက်များသည် ဗင်နီဇွဲလားသမ္မတ နီကိုလက်စ် မာဒူရို (Nicolás Maduro) ၏ သက်တမ်း အဆုံးသတ်တော့မည့် လက္ခဏာဖြစ်နိုင်ကြောင်း ရှုမြင်ထားကြသည်။

အမေရိကန်၏ Aegis အမျိုးအစား ပဲ့ထိန်းဒုံးကျည်တပ် ဖျက်သင်္ဘော သုံးစင်းကို စေလွှတ်ထားကြောင်း ပြီးခဲ့သည့် သီတင်းပတ်က အတည်ပြုခဲ့ပြီးနောက် ကုန်း၊ရေ နှစ်သွယ်စစ်ဆင်ရေး ပြုလုပ်နိုင်သော သင်္ဘောသုံးစင်းလည်း ရေတပ် သင်္ဘောသားများ၊ မရိန်းတပ်သား ၄၀၀၀ ကျော်နှင့်အတူ လက်တင်အမေရိက ရေပြင်များသို့ လာမည့် သီတင်းပတ်တွင် ရောက်ရှိလာမည်ဖြစ်သည်။

တင့်ကား တင်လာတဲ့ ကားကို တွေ့ရစဉ်

အမေရိကန်ရေတပ် ဗိုလ်ချုပ်ကြီး ဒါရယ် ကာဒယ်လ် (Daryl Caudle) ကမူ တောင်အမေရိကန် ကမ်းလွန်ရေပြင် များသို့  ဦးတည်သွားရောက်နေသည့် အမေရိကန် စစ်သင်္ဘောများသည် မူးယစ်ဆေးဝါး ဂိုဏ်းများကို တိုက်ဖျက် နေသော ဗင်နီဇွဲလား၏ စစ်ဆင်ရေးများနှင့် မစ်ရှင်များကို ကူညီထောက်ပံ့ပေးရန်ဖြစ်ကြောင်း ပြောကြားခဲ့သော် လည်း မည်သည့် ရေပြင်များသို့ သွားရောက်မည်ဆိုခြင်းကိုမူ အသေးစိတ် ပြောကြားခဲ့ခြင်း မရှိပေ။

ထိုအကြောင်းအရာနှင့်ပတ်သက်ပြီး နိုင်ငံပိုင်ရုပ်သံ အစီအစဉ်တစ်ဦး၏ မေးမြန်းခြင်းကို ခံရချိန်တွင် ဗင်နီဇွဲလား သမ္မတ မာဒူရိုက ဗင်နီဇွဲလားနိုင်ငံသား ၉၀ ကျော်သည် အမေရိကန်၏ ကြေညာချက်များနှင့် ခြိမ်းခြောက်မှုများကို ငြင်းပယ်ကြောင်း ဖြေကြားခဲ့သည်။

ဗင်နီဇွဲလားနိုင်ငံသားများအနေဖြင့် တိုက်ခိုက်မှုများ ဖြစ်လာခဲ့ပါက စစ်တပ်ကို ကူညီပေးရန် ပြည်သူ့စစ်သို့ ပါဝင် ကြရန် မာဒူရိုက တိုက်တွန်းခဲ့သည်။

အတိုက်အခံ ခေါင်းဆောင်ဖြစ်သည့် မာရီယာ ကော်ရီနာ မာချာဒို (Maria Corina Machado) ကမူ ဗင်နီဇွဲလား နိုင်ငံကို သိမ်းပိုက်ထားသော ပြစ်မှုဆိုင်ရာ အဖွဲ့အစည်းကို ရည်ရွယ်သည့် မှန်ကန်သောချဉ်းကပ်မှု၊ ရဲဝံ့မှုတို့ဖြင့် လုပ်ဆောင်နေသည့် ထရမ့်အစိုးရအဖွဲ့ကို ကျေးဇူးတင်ကြောင်း Fox News ရုပ်သံလိုင်းတွင် ပြောကြားခဲ့သည်။

Source: အေပီ