ပြည်ပ

တောင်ကိုရီးယားသမ္မတ လီဂျေမြောင်ကို တွေ့ရစဉ်

: By CNI; Category: နိုင်ငံရေး; Hits: 287

CNI International News

ဆိုးလ်၊ အောက်တိုဘာ ၃

တောင်ကိုရီးယားသမ္မတ လီဂျေမြောင် (Lee Jae Myung) က တရုတ်ဆန့်ကျင်ရေးနှင့် ပြည်ပဆန့်ကျင်ရေး စုရုံး လှုပ်ရှားမှုများကို ဖြိုခွင်းရန် အောက်တိုဘာ ၂ ရက်က အမိန့်ထုတ်ခဲ့ကြောင်း CNA မှ ဖော်ပြခဲ့သည်။

ထိုကဲ့သို့ လူထုစည်းရုံး လှုပ်ရှားမှုများသည် တောင်ကိုရီးယား၏ ပုံရိပ်နှင့် စီးပွားရေးကို ထိခိုက်စေကြောင်းလည်း လီက ပြောကြားခဲ့သည်။

တောင်ကိုရီးယားအစိုးရသည် ယခုသီတင်းပတ်မှစပြီး တရုတ်နိုင်ငံမှ ခရီးသွားများအား ဗီဇာကင်းလွတ်ခွင့် မပြုမီ ကတည်းက လက်ယာစွန်း အုပ်စုများသည် တရုတ်ကွန်မြူနစ်ပါတီကို အထူးပစ်မှတ်ထားသည့် တရုတ်ဆန့်ကျင် ရေး ချီတက်ပွဲများကို ပြုလုပ်ခဲ့ကြသည်။

တောင်ကိုးရီးယား ကုမ္ပဏီများကမူ အစိုးရ၏ ဗီဇာမူဝါဒသည် ခရီးသွားကဏ္ဍကို မြင့်တက်စေပြီး နိုင်ငံအတွင်းသို့ ရောက်ရှိလာမည့် တရုတ်နိုင်ငံသားများအား ဆွဲဆောင်ရန် စီးပွားရေး အစီအစဉ်များကို ရေးဆွဲခဲ့ကြသည်။

တောင်ကိုရီးယား နိုင်ငံသားတွေကို တွေ့ရစဉ်

“အခုလို ကောင်းမွန်တဲ့ အစီအစဉ်ကို ဘာလို့များ မလိုချင်ရတာလဲ။ တရုတ်ဆန့်ကျင်တဲ့ စုရုံးချီတက်ပွဲတွေဟာ ကျနော်တို့ရဲ့ အမျိုးသားအကျိုးစီးပွားနဲ့ နိုင်ငံ့ပုံရိပ်ကို ထိခိုက်စေပြီး အဆင်အခြင်ကင်းမဲ့တဲ့ လုပ်ရပ်ဖြစ်ပါတယ်” ဟု သမ္မတလီက ပြောသည်။

တရုတ်နိုင်ငံသားများအား ဗီဇာ ကင်းလွတ်ခွင့်ပေးသည့် အစီအစဉ်ကို ၂၀၂၆ ခုနှစ်၊ ဇွန်လအထိ ဆက်လက် ကျင့်သုံးသွားရန် စီစဉ်ထားသည်။

ထို့ပြင် ပြည်ပခရီးသွားများ၏ ဘေးကင်းလုံခြုံရေးကို ခြိမ်းခြောက်သည့် လှုံ့ဆော်လှုပ်ရှားမှုများကို နှိမ်နင်းရန်နှင့် လူမျိုးရေး မုန်းတီးမှုကို ရပ်တန့်ရန် သမ္မတလီက ညွှန်ကြားခဲ့သည်။

လီသည် အောက်တိုဘာ ၃၁ ရက်တွင် စတင်မည့် အာရှ-ပစိဖိတ် စီးပွားရေး ပူးပေါင်းဆောင်ရွက်ရေး ထိပ်သီး အစည်းအဝေး(APEC)အတွက် တရုတ်နိုင်ငံသို့ သွားရောက်မည့် ခရီးစဉ်မတိုင်မီ တောင်ကိုရီးယားနှင့်တရုတ်ကြား ဆက်ဆံရေး တိုးတက်စေရန် ကြိးပမ်းလျက်ရှိသည်။

လီသည် ထိုခရီးစဉ်အတွင်း တရုတ်သမ္မတ ရှီကျင့်ဖျင် (Xi Jinping) နှင့် တွေ့ဆုံသွားမည်ဖြစ်သည်။

Source: CAN

Share

powered by social2s

ဖြုတ်ချခံ သမ္မတဟောင်း အာဆတ်နဲ့ ရွေးကောက်ပွဲ မဲထည့်နေသူကိုတွေ့ရစဉ်

: By CNI; Category: နိုင်ငံရေး; Hits: 345

CNI International News

ဒမတ်စကတ်၊ အောက်တိုဘာ ၃

ဆီးရီးယားနိုင်ငံတွင် ၂၀၂၄ ခုနှစ်၊ ဒီဇင်ဘာလက သူပုန်များ၏ ထိုးစစ်ကြောင့် အာဏာရှင် ဘာရှာ အာဆတ် (Bashar Assad) အစိုးရ ပြုတ်ကျသွားခဲ့ပြီးနောက် ပထမဆုံးအကြိမ်အဖြစ် လွှတ်တော်ရွေးကောက်ပွဲများကို နိုဝင်ဘာ ၅ ရက်တွင် ကျင်းပသွားမည်ဟု အေပီမှ ဖော်ပြခဲ့သည်။

အာဆတ်၏ နှစ်ပေါင်း ၅၀ ကြာ အုပ်ချုပ်မှုအောက်တွင် ဆီးရီးယားပြည်သူ အားလုံးသည် မဲပေးနိုင်ခဲ့ကြသော် လည်း ထိုရွေးကောက်ပွဲများတွင် အာဆတ် ဦးဆောင်သည့် ဘာ့သ်ပါတီ (Baath Party) ကသာ လွှတ်တော်ကို အမြဲတမ်း ထိန်းချုပ်နိုင်ခဲ့သည်။

နိုဝင်ဘာ ၅ ရက်တွင် ကျင်းပမည့် ရွေးကောက်ပွဲသည် ဒီမိုကရေစီ လုပ်ငန်းစဉ်အတိုင်း အပြည့်အဝ ကိုက်ညီ လိမ့်မည် မဟုတ်သော်လည်း မဲဆန္ဒနယ်များ၌ ကိုယ်စားလှယ်မဲများ (electoral college) ဖြင့် ရွေးချယ်သည့် စနစ်ကို ကျင့်သုံးသွားမည်ဖြစ်သည်။

ထို့ပြင် လွှတ်တော်နေရာ ၃ ပုံ ၁ ပုံကို ယာယီသမ္မတ အာမက် အယ်ရှာရား (Ahmad al-Sharaa) က တိုက်ရိုက် ရွေးချယ်သွားမည်ဖြစ်ကြောင်း သိရသည်။

သမ္မတ‌ဟောင်း အာဆတ်ကို ဖြုတ်ချလိုက်တဲ့ လက်ရှိဆီးရီးယားသမ္မတ အယ်ရှာရားကို တွေ့ရစဉ်

ယခုကျင်းပမည့် ရွေးကောက်ပွဲသည် နိုင်ငံတကာ၏ စိတ်ဝင်စားမှုကို အထူးတလည် ရရှိမည် မဟုတ်သည့်တိုင် ဆီးရီးယားပြည်တွင်းတွင် ယာယီအာဏာပိုင်များသည် အမျိုးသမီးများနှင့် လူနည်းစုများ၏ အခွင့်အရေးများ အတွက် မည်မျှအလေးထား ဆောင်ရွက်မည်ဆိုခြင်းကို ပြသမည့် စမ်းသပ်ချက်တစ်ခု ဖြစ်လာနိုင်သည်။

နိုဝင်ဘာ ၅ ရက်တွင် ကျင်းပမည့် လွှတ်တော်ရွေးကောက်ပွဲမှာ ပြည်သူ့လွှတ်တော်၌ နေရာ ၂၁၀ ရှိသည်။

ထိုနေရာများအနက် ၃ ပုံ ၂ ပုံကို ကိုယ်စားလှယ်မဲများဖြင့် ရွေးကောက်မည်ဖြစ်ကာ ကျန် ၁ ပုံကို သမ္မတက တိုက်ရိုက် ခန့်အပ်မည်ဖြစ်သည်။

ထို့ကြောင့် ကိန်းကဏ္ဍန်းအားဖြင့် ခရိုင် ၆၀ ကျော်ရှိ ကိုယ်စားလှယ်မဲ ရွေးချယ်ရေးအဖွဲ့ဝင် ၇၀၀၀ သည် လွှတ်တော်နေရာ စုစုပေါင်း၏ ၃ ပုံ ၂ ပုံဖြစ်သည့် နေရာ ၁၄၀ ကို ရွေးကောက်ရမည်ဖြစ်ပြီး ကျန် ၁ ပုံကို အယ်ရှာရားက တိုက်ရိုက် ခန့်အပ်မည်ဖြစ်သည်။

မည်သို့ပင်ဆိုစေ လူမျိုးစု ပဋိပက္ခများ ဖြစ်ပွားခဲ့သည့် ဆဝိုက်ဒါ (Sweida) ပြည်နယ်နှင့် ကာ့ဒ်များ ဦးဆောင်သော ဆီးရီးယား ဒီမိုကရက်တစ် တပ်ဖွဲ့များ ထိန်းချုပ်ထားသည့် နိုင်ငံအရှေ့မြောက်ပိုင်း ဒေသများတွင်မူ တင်းမာမှု အခြေအနေများကြောင့် ရွေးကောက်ပွဲများကို ရွှေ့ဆိုင်းထားမည်ဖြစ်သည်။

Source: အေပီ

Share

powered by social2s

: By CNI; Category: နိုင်ငံရေး; Hits: 315

CNI International News

ဝါရှင်တန်၊ အောက်တိုဘာ ၃

အမေရိကန်သမ္မတ ဒေါ်နယ်ထရမ့် (Donald Trump) ၏ အစိုးရအဖွဲ့သည် အောက်တိုဘာ ၁ ရက်က ဒီမိုကရက် များ ဦးဆောင်သည့် ပြည်နယ်များအတွက် ဘတ်ဂျက်ငွေ ၂၆ ဘီလျံကို ဆိုင်းငံခဲ့ကြောင်း ရိုက်တာမှ ဖော်ပြခဲ့သည်။

ဒီမိုကရက်များ၏ ဦးစားပေး အစီအစဉ်များကို ပစ်မှတ်ထားရန် အစိုးရအဖွဲ့ယန္တရား ရပ်ဆိုင်းမှုအား အသုံးချသွား မည်ဟု ခြိမ်းခြောက်ခဲ့ပြီးနောက် ယခုကဲ့သို့ ဆိုင်းငံ့ခဲ့ခြင်းဖြစ်သည်။

ပစ်မှတ်ထားခံခဲ့ရသည် စီမံကိန်းများအတွင်း လွှတ်တော်၏ ထိပ်သီး ဒီမိုကရက်နှစ်ဦး နေထိုင်သည့် နယူးယောက် (New York) ပြည်နယ်ရှိ ဒေါ်လာ ၁၈ ဘီလျံတန်ဖိုးရှိ သယ်ယူပို့ဆောင်ရေး စီမံကိန်းများနှင့် ကယ်လီဖိုးနီးယား (California)ပြည်နယ်နှင့် အီလီနွိုက်စ် (Illinois) ပြည်နယ်တို့ အပါအဝင် ဒီမိုကရက် ၁၆ ဦး အုပ်ချုပ်ထားသည့် အခြားပြည်နယ်များမှ ဒေါ်လာ ၈ ဘီလျံ တန်ကြေးရှိ စွမ်းအင်စီမံကိန်းများ ပါဝင်ခဲ့သည်။

ထိုအချိန် အတောအတွင်း ဒုတိယသမ္မတ ဂျေဒီ ဗန့်စ် (JD Vance) က အစိုးရယန္တရား ရပ်ဆိုင်းမှုသည် ရက် အနည်းငယ် ထပ်မံကြာမြင့်မည်ဆိုပါက အစိုးရသည် ၎င်း၏ ဖက်ဒရယ်ဝန်ထမ်းများအား ရာထူးလျှော့ချမှုများကို ပိုမို ကျယ်ကျယ်ပြန့်ပြန့် ပြုလုပ်နိုင်ကြောင်း သတိပေးခဲ့သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ထိုလုပ်ဆောင်ချက်များအရ ထရမ့်သည် အစိုးရယန္တရား ရပ်ဆိုင်းမှုကို အခွင့်ကောင်းယူပြီး ၎င်း၏ နိုင်ငံရေး ပြိုင်ဘက်များအား ထိုးနှက်ရန်နှင့် ဒေါ်လာ ၇ ထရီလျံ တန်ဖိုးရှိ ဖက်ဒရယ်ဘတ်ဂျက်အပေါ် ၎င်း၏ ထိန်းချုပ်မှုကို ပိုမိုခိုင်မာအောင် လုပ်ဆောင်လိမ့်မည်ဆိုခြင်းမှာ ရှင်းလင်းစွာ မြင်တွေ့ခဲ့ရသည်။

“ဘီလျံနဲ့ချီတဲ့ ဒေါ်လာတွေ အလေအလွှင့် မဖြစ်တော့ပါဘူး”ဟု ထရမ့်က အောက်တိုဘာ ၁ ရက်က Truth Social လူမှုမီဒီယာတွင် ရေးသားခဲ့သည်။

အမေရိကန်တွင် ယခုတစ်ကြိမ် အစိုးရအဖွဲ့ယန္တရား ရပ်ဆိုင်းမှုသည် ၁၉၈၁ ခုနှစ်နောက်ပိုင်း ၁၅ ကြိမ်မြောက် ဖြစ်ပြီး အစိုးရအဖွဲ့၏ သိပ္ပံနှင့်သုတေသန၊ ဘဏ္ဍာရေးကြီးကြပ်မှု၊ သဘာဝပတ်ဝန်းကျင်အရေးနှင့် အခြားအရေး ကိစ္စများကို ဆိုင်းငံ့သွားစေခဲ့သည်။

ဖက်ဒရယ်ဝန်ထမ်း ၇၅၀,၀၀၀ ခန့်သည် အလုပ်သို့ မလာရန် ညွှန်ကြားခံခဲ့ရပြီး စစ်သားများနှင့် နယ်စပ်ကင်းလှည့် အေးဂျင့်များကဲ့သို့ အချို့ဝန်ထမ်းများသည် လစာမရဘဲ တာဝန်ထမ်းဆောင်နေရသည်။

အမေရိကန်တွင် ယခုအကြိမ်မတိုင်မီ နောက်ဆုံးအကြိမ် အစိုးရအဖွဲ့ယန္တရား ရပ်တန့်မှုသည် ၂၀၁၈ ခုနှစ်၊ ဒီဇင်ဘာလမှ ၂၀၁၉ ခုနှစ်၊ ဇန်နဝါရီလကြား ၃၅ ရက်ကြာမြင့်ခဲ့သည်။

Source: ရိုက်တာ

Share

powered by social2s

အမေရိကန်က ရွှေ့ပြောင်းအခြေချတွေကို နေရပ်ပြန်ပို့နေစဉ်

: By CNI; Category: နိုင်ငံရေး; Hits: 272

CNI International News

တီဟီရန်၊ အောက်တိုဘာ ၂

အမေရိကန်က လာမည့် သီတင်းပတ်များတွင် ရာနှင့်ချီသည့် အီရန် ရွှေ့ပြောင်း နေထိုင်သူများကို နေရပ်သို့ ပြန်ပို့သွားမည်ဟု အေပီမှ ဖော်ပြခဲ့သည်။

လာမည့် ရက်ပိုင်း သို့မဟုတ် လာမည့် နှစ်ရက်အကြာတွင် ပထမဆုံး အနေဖြင့် ရွှေ့ပြောင်း ၁၂၀ ကို နေရပ် ပြန်ပို့ရန်အတွက် လေကြောင်းခရီးစဉ်တစ်ခု ပြင်ဆင်ထားကြောင်း အီရန်က စက်တင်ဘာ ၃၀ ရက်၌ ပြောကြား ခဲ့သည်။

ဇွန်လက အီရန် နျူကလီးယား နေရာများကို အမေရိကန်မှ ဗုံးကြဲခဲ့ပြီးနောက် နှစ်နိုင်ငံကြား တင်းမာမှု မြင့်တက်နေချိန်တွင် အီရန်ရွှေ့ပြောင်းများအား နေရပ်သို့ ပြန်ပို့ရန် စီစဉ်နေခြင်းဖြစ်သည်။

“အမေရိကန် အစိုးရအနေနဲ့ သမ္မတထရမ့်ရဲ့ အမေရိကန်သမိုင်းမှာ တရားမဝင် ရွှေ့ပြောင်းတွေကို အစုလိုက် နေရပ် ပြန်ပို့မယ်ဆိုတဲ့ ကတိကဝတ် ပြည့်မီစေဖို့ တတ်နိုင်သမျှ နည်းလမ်းအားလုံးကို သုံးပြီး လုပ်ဆောင်နေ ပါတယ်”ဟု အိမ်ဖြူတော် ပြောရေးဆိုခွင့်ရှိသူ အဘီဂေးလ်ဂျက်ဆန်(Abigail Jackson)က ပြောကြားခဲ့သည်။

အီရန်နိုင်ငံအခြေပြ မြေပုံကိုတွေ့ရစဉ်

အမေရိကန်သည် အီရန်အား ၎င်း၏ နျူကလီးယား စီမံကိန်းအတွက် လွန်ခဲ့သည့် သီတင်းပတ်က အရေးယူပိတ်ဆို့ မှု ပြန်လည်ချမှတ်ခဲ့သည်။

အီရန်နိုင်ငံပိုင် ရုပ်သံတွင် ဖော်ပြချက်အရ အမေရိကန်နှင့် သဘောတူညီချက် အောက်တွင် အီရန်နိုင်ငံသား ၄၀၀ အထိ နေရပ်ပြန်ပို့သွားမည်ဟု ဆိုသည်။

၎င်းတို့ထဲမှ အများစုသည် မက္ကဆီကိုကို ဖြတ်ပြီး အမေရိကန်သို့ တရားမဝင် ဝင်ရောက်လာကြသူများဖြစ်ကာ အချို့မှာမူ ကွဲပြားခြားနားသော လူဝင်မှုကြီးကြပ်ရေး ပြဿနာများရှိကြောင်း အီရန်နိုင်ငံခြားရေးဝန်ကြီးဌာနမှ တာဝန်ရှိသူ ဟော့စိန်နော်ရှာဘာဒီ(Hossein Noushabadi)က ပြောကြားခဲ့သည်။

ပထမဆုံး အသုတ်သည် လာမည့်တစ်ရက် သို့မဟုတ် နှစ်ရက်အကြာတွင် ထွက်ခွာမည်ဖြစ်ပြီး ကာတာ၌ ခရီး တစ်ထောက်နားမည်ဟု နော်ရှာဘာဒီက ပြောကြားခဲ့သော်လည်း ကာတာကမူ ထိုသတင်းကို အတည်ပြုထား ခြင်းမရှိပေ။

၁၉၇၉ ခုနှစ် အစ္စလာမ်မစ် တော်လှန်ရေးပြီးနောက် အီရန်နိုင်ငံသား အများအပြား အမေရိကန်သို့ ထွက်ပြေးခဲ့ ကြသည်။

Source: အေပီ

Share

powered by social2s

အမေရိကန်နဲ့တောင်ကိုရီးယား စစ်ရေးလေ့ကျင့်နေစဉ်

: By CNI; Category: နိုင်ငံရေး; Hits: 366

CNI International News

ဘေကျင်း၊ အောက်တိုဘာ ၂

ဂျပန်၊ တောင်ကိုရီးယားတို့ဖြင့် ဆိုက်ဘာနှင့် AI နည်းပညာ ပါဝင်သည့် စစ်ရေးလေ့ကျင့်မှုများ ချဲ့ထွင်နေသော အမေရိကန်စစ်တပ်၏ လုပ်ဆောင်ချက်များသည် ဒေသတွင်း လုံခြုံရေးအတွက် အန္တရာယ်တစ်ခု ဖြစ်သည်ဟု တရုတ်စစ်တပ်က သတိပေး ပြောကြားခဲ့ကြောင်း South China Morning Post မှ ဖော်ပြခဲ့သည်။

တရုတ်ပြည်သူ့တပ်မတော်၏ နေ့စဉ်ထုတ် သတင်းစာ တစ်စောင်ဖြစ်သည့် PLA Daily သတင်းစာတွင် PLA ၏ စစ်သိပ္ပံအကယ်ဒမီမှ ကျွမ်းကျင်သူ ကျီချန်း(Ji Cheng)က မကြာသေးမီ သီတင်းပတ်များအတွင်း တစ်ဖက်သတ် စစ်ရေးလေ့ကျင့်မှုများ၏ ရှုပ်ထွေးပွေလီမှုအကြောင်းကို ရည်ညွှန်းပြောဆိုခဲ့သည်။

“အဲဒီစစ်ရေးလေ့ကျင့်မှုတွေက သမားရိုးကျ စစ်ရေး ပူးပေါင်းဆောင်ရွက်မှုထက် ကျော်လွန်ပြီး ဒေသတွင်း လုံခြုံရေး အရှိန်အဟုန်ကို ထိခိုက်စေမယ့် ပြည်ပအင်အားစုအတွက် မဟာဗျူဟာမြောက် အခြေအနေတွေကို ဖြစ်ပေါ်စေပါတယ်” ဟု ကျီက ပြောကြားခဲ့သည်။

တိုက်လေယာဉ်အုပ်စုကိုတွေ့ရစဉ်

ထိုကဲ့သို့ မြင့်တက်လာသည့် ဒေသတွင်း ခြိမ်းခြောက်မှုများကြောင့် တရုတ်နှင့် မြောက်ကိုရီးယား၏ စစ်ရေး လေ့ကျင့်မှုများသည် ကာကွယ်ရေးအတွက် တရားဝင်မှုရှိကြောင်း ၎င်းက ပြောသည်။

လွန်ခဲ့သည့် ၂ လခန့်က အမေရိကန်စစ်တပ်သည် တောင်ကိုရီးယားနှင့် Ulchi Freedom Shield စစ်ရေး လေ့ကျင့်မှု၊ ဂျပန်နှင့် Resolute Dragon 2025 စစ်ရေးလေ့ကျင့်မှု၊ အမေရိကန်၊ တောင်ကိုရီးယားနှင့် ဂျပန်တို့ ပါဝင်သည့် Freedom Edge အမည်ရှိ သုံးပွင့်ဆိုင် စစ်ရေးလေ့ကျင့်မှုတို့ ပြုလုပ်ခဲ့သည်။

Source: South China Morning Post

Share

powered by social2s

ကူမင်တန် (KMT)ပါတီ၏ လွှတ်တော်ကိုယ်စားလှယ် ချန်းလီဝမ်ကို တွေ့ရစဉ်

: By CNI; Category: နိုင်ငံရေး; Hits: 243

CNI International News

တိုင်ပေ၊ အောက်တိုဘာ ၂

ထိုင်ဝမ်တွင် အတိုက်အခံပါတီဖြစ်သည့် ကူမင်တန်ပါတီ(KMT)၌ ခေါင်းဆောင်မှု အပြိုင်အဆိုင်မှာ လွှတ်တော် ကိုယ်စားလှယ် ချန်းလီဝမ်(Cheng Li-wun)က ဦးဆောင်နေသည်ဟု Nikkei Asia မှ ဖော်ပြခဲ့သည်။

ကူမင်တန် (KMT) ပါတီ၏ လွှတ်တော်ကိုယ်စားလှယ် ချန်းလီဝမ် (Cheng Li-wun) က တရုတ်ပြည်မကြီးနှင့် ပြန်လည်ပေါင်းစည်းရေးကို လုပ်ဆောင်သွားမည်ဟု အောက်တိုဘာ ၁၈ ရက်တွင် ပြုလုပ်မည့် ပါတီဥက္ကဋ္ဌ ရွေးကောက်ပွဲမတိုင်မီ ပြောကြားခဲ့သည်။

တစ်ချိန်က ကူမင်တန်ပါတီ၏ ပြိုင်ဘက်ပါတီဖြစ်သည့် DPP ပါတီ အဖွဲ့ဝင်ဟောင်းဖြစ်သော ချန်း (အသက် ၅၅ နှစ်) သည် ပါတီတွင်း ခေါင်းဆောင်ရာထူး နေရာအတွက် ဩဇာအာဏာကို ထူထောင်နိုင်ခဲ့သည်။

ချန်းသည် လက်ရှိ DPP ပါတီ ခေါင်းဆောင်ဖြစ်သည့် ထိုင်ဝမ်သမ္မတ လိုင်ချင်တေး (Lai Ching-te) ကို ဝေဖန်လေ့ ရှိပြီး ပြည်မကြီးနှင့် ရေလက်ကြားဖြတ်ကျော် ပြန်လည်ပေါင်းစည်းရေး လုပ်ဆောင်ရန် တိုက်တွန်းခဲ့သည်။

ထိုင်ဝမ်သမ္မတ လိုင်ချင်တေးကို တွေ့ရစဉ်

“ဆုံးရှုံးနစ်နာမှုတွေကို ရှောင်လွှဲဖို့အတွက် အကောင်းမြင်စိတ်နဲ့ မျှော်လင့်နေလို့ မရပါဘူး။ ငြိမ်းချမ်းရေး ဖော်ဆောင်သူတွေ ဖြစ်လာအောင်နဲ့ အဓိကကျတဲ့ အခန်းကဏ္ဍကနေ ပါဝင်ဆောင်ရွက်ရပါလိမ့်မယ်” ဟု ချန်းက ထိုင်ဝမ် နိုင်ငံခြားသတင်းထောက်များကလပ်တွင် ပြောကြားခဲ့သည်။

ထို့ပြင် လိုင်သည် တရုတ်ကို တန်ပြန်ရာတွင် အမေရိကန်အပေါ် အလွန်အကျူး မှီခိုနေကြောင်းလည်း ချန်းက စွပ်စွဲခဲ့သည်။

“ကျနော်တို့က စတေးခံရသူတွေ မဖြစ်ရပါဘူး။ ဒေါ်နယ်ထရမ့် (Donald Trump) ရဲ့ ဝှက်ဖဲတစ်ချပ် မဖြစ်ရပါဘူး” ဟု ချန်းက ပြောကြားခဲ့သည်။

ချန်းသည် 1992 Consensus ဟုခေါ်သည့် ကူမင်တန်(KMT)ပါတီ၏ မူဝါဒကို အခြေခံပြီး ပြောကြားခဲ့ခြင်း ဖြစ်သည်။

1992 Consensus အမည်ရှိ နားလည်မှုသည် ၁၉၉၂ ခုနှစ်က ကူမင်တန်ဦးဆောင်သည့် ထိုင်ဝမ်အစိုးရနှင့် တရုတ် အစိုးရကြား တရုတ်တစ်နိုင်ငံတည်း မူဝါဒအောက်တွင် ရရှိခဲ့သည့် နားလည်မှုတစ်ခု ဖြစ်သည်။

Source: Nikkei Asia

Share

powered by social2s

ဒေါ်နယ်ထရမ့်နဲ့ ရေငုပ်သင်္ဘောကို တွေ့ရစဉ်

: By CNI; Category: နိုင်ငံရေး; Hits: 274

CNI International News

မော်စကို၊ အောက်တိုဘာ ၂

အမေရိကန်သမ္မတ ဒေါ်နယ်ထရမ့် (Donald Trump)သည် ရုရှား၏ ကမ်းခြေဒေသများသို့ နျူကလီးယား ရေငုပ်သင်္ဘောများ စေလွှတ်မည်ဟု ကတိပြုခဲ့သော်လည်း ထိုသင်္ဘောများကို စေလွှတ်ခြင်း မရှိခဲ့၍ ရုရှားသမ္မတ ဟောင်း ဗလာဒီမာ မက်ဗီဒက်ဗ် (Dmitry Medvedev)က လှောင်ပြောင်ခဲ့သည်ဟု ရိုက်တာမှ ဖော်ပြခဲ့သည်။

ထရမ့်သည် စက်တင်ဘာ ၃၀ ရက်က မက်ဗီဒက်ဗ်ကို ရူးမိုက်သည့် ပုဂ္ဂိုလ်ဟု ပြောကြားခဲ့ပြီး ရုရှား၏ ကမ်းရိုးတန်းဒေသသို့ ရေငုပ်သင်္ဘော ၁ စင်း သို့မဟုတ် ၂ စင်း စေလွှတ်သွားမည်ဟု ပြောကြားခဲ့သည်။

ပြီးခဲ့သည့်နှစ် ဩဂုတ်လ အတွင်းကလည်း ထရမ့်က သူသည် မက်ဗီဒက်ဗ်၏ ခြိမ်းခြောက်မှုများကို တုံ့ပြန်သည့် အနေဖြင့် သင့်တော်သော ဒေသများသို့ ရေငုပ်သင်္ဘော ၂ စင်းစေလွှတ်ရန် အမိန့်ပေးခဲ့ကြောင်း ပြောကြားခဲ့ဖူး သည်။

ရုရှားသမ္မတ ဟောင်း ဗလာဒီမာ မက်ဗီဒက်ဗ်ကို တွေ့ရစဉ်

“သည်းထိပ်ရင်ဖို ရုပ်ရှင် ဇာတ်လမ်းတွဲတွေရဲ့ အပိုင်းသစ် တစ်ခုလိုပေါ့။ ထရမ့်က ရုရှား ကမ်းရိုးတန်းတွေဆီကို ရေငုပ်သင်္ဘောတွေ စေလွှတ်ပြီး လျှို့ဝှက်စွာ ဖြန့်ကြက်ချထားတယ်လို့ ပြောပါတယ်။ အမှောင်ခန်းထဲက ကြောင်နက်တစ်ကောင်ကို ရှာဖို့ ခက်ခဲလိမ့်မယ်ဆိုတဲ့ စကားပုံလိုမျိုးပေါ့။ တကယ်က အဲဒီကြောင်နက်က အခန်း ထဲမှာ ရှိမနေတာမျိုးလည်း ဖြစ်ပါလိမ့်မယ်”ဟု မက်ဗီဒက်ဗ်က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်သည် ရုရှားနှင့်ယူကရိန်းကြား စစ်ပွဲ အဆုံးသတ်နိုင်ရေးအတွက် ကြိုးပမ်းနေ သော်လည်း လက်တွေ့မှာ အခက်အခဲများဖြင့် ရင်ဆိုင်နေရပြီး နှစ်နိုင်ငံစလုံးကို ပိတ်ဆို့အရေးယူမှုများ ပြုလုပ်မည် ဟုလည်း ခြိမ်းခြောက်လျက်ရှိသည်။

Source: ရိုက်တာ

Share

powered by social2s

တိုနီဘလဲ၊ ဒေါ်နယ်ထရမ့်နဲ့ နေတန်ယာဟုကိုတွေ့ရစဉ်

: By CNI; Category: နိုင်ငံရေး; Hits: 302

CNI International News

ဂါဇာစီးတီး၊ အောက်တိုဘာ ၁

အမေရိကန်၏ ဂါဇာဒေသ ယာယီအုပ်ချုပ်ရေး အစီအစဉ်တွင် ဗြိတိန်ဝန်ကြီးချုပ်ဟောင်း တိုနီဘလဲ(Tony Blair) နှင့် အမေရိကန်သမ္မတ ဒေါ်နယ်ထရမ့် (Donald Trump)တို့ အဓိကပါဝင်နေကြောင်း ရိုက်တာမှ ဖော်ပြခဲ့သည်။

ဂါဇာကမ်းမြောင်ဒေသတွင် ဖြစ်ပွားနေသည့် အစ္စရေး၏ စစ်ပွဲကို အဆုံးသတ်ရန်အတွက် စက်တင်ဘာ ၂၉ ရက်၌ အိမ်ဖြူတော်က ယာယီအုပ်ချုပ်ရေး အစီအစဉ်အား ထုတ်ပြန်ခဲ့သည်။

ထိုအဆိုပြုချက်တွင် ဂါဇာကမ်းမြောင်ဒေသကို နိုင်ငံရေး ကင်းရှင်းသည့် ပါလက်စတိုင်း ကော်မတီဖြစ်သော ယာယီအသွင်ကူးပြောင်းရေး တက်ကနိုကရက်များက အုပ်ချုပ်သွားမည်ဖြစ်ကြောင်း ဖော်ပြထားသည်။

ထိုအသွင်ကူးပြောင်းရေး လုပ်ငန်းစဉ်တွင် ပါဝင်မည့် မည်သည့် အဖွဲ့အစည်း သို့မဟုတ် မည်သည့် ပါလက်စတိုင်း ခေါင်းဆောင်တစ်ဦး၏ အမည်ကိုမှ ထုတ်ဖော်မည် မဟုတ်ကြောင်းလည်း ထုတ်ပြန်ချက်၌ ဖော်ပြခဲ့သည်။

တိုနီဘလဲ၊ ဒေါ်နယ်ထရမ့်နဲ့ နေတန်ယာဟုကိုတွေ့ရစဉ်

ဤကော်မတီသည် ငြိမ်းချမ်းရေးဘုတ်အဖွဲ့ (Board of Peace) အမည်ရှိ နိုင်ငံတကာ အသွင်ကူးပြောင်းရေးအဖွဲ့ သစ်ကို ကြီးကြပ်သွားမည်ဖြစ်ပြီး ထိုနိုင်ငံတကာ အသွင်ကူးပြောင်းရေးအဖွဲ့ကို ထရမ့်၊ တိုနီဘလဲနှင့် အခြား နိုင်ငံ ခေါင်းဆောင်များနှင့် အဖွဲ့ဝင်များ ပါဝင်လိမ့်မည်ဟု ဆိုသည်။

အဆိုပါ ကော်မတီသည် ဂါဇာတွင် ပြည်သူ့ဝန်ဆောင်မှုများနှင့် စည်ပင်သာယာရေး လုပ်ငန်းများကို နေ့စဉ် တာဝန် ယူရမည်ဖြစ်ပြီး ထိုကော်မတီအတွင်း အရည်အချင်း ပြည့်မီသည့် ပါလက်စတိုင်းများနှင့် နိုင်ငံတကာ ကျွမ်းကျင် သူများ ပါဝင်မည်ဖြစ်သော်လည်း ၎င်းတို့၏ အမည်များကို ထုတ်ဖော်ကြေညာမည် မဟုတ်ကြောင်း သိရသည်။

သို့သော် ဂါဇာအား ယာယီအုပ်ချုပ်ရေး ကဏ္ဍတွင် ဟားမာ့စ်အဖွဲ့ ပါဝင်လိမ့်မည် မဟုတ်ကြောင်း သတင်းရင်းမြစ် များက ပြောကြားခဲ့သည်။

မကြာသေးမီ သီတင်းပတ်များအတွင်း ဂါဇာငြိမ်းချမ်းရေး အစီအစဉ်၌ တိုနီဘလဲ ပါဝင်မည်ဆိုသည့် သတင်းများ အပေါ် မေးခွန်းများ ထွက်ပေါ်ခဲ့သည်။

အဘယ်ကြောင့်ဆိုသော် တိုနီဘလဲသည် အရှေ့အလယ်ပိုင်းဒေသကို ဗြိတိန်၏ နယ်ချဲ့ဝါဒ သမိုင်းကြောင်းအား ထပ်တလဲလဲ ပြောကြားခဲ့ပြီး အီရတ်အား ကျူးကျော်သည့် အမေရိကန် ဦးဆောင်သည့် နိုင်ငံတကာ ပူးပေါင်း
တပ်ဖွဲ့များတွင် ပါဝင်ခဲ့ခြင်းကြောင့် ဖြစ်သည်။

အမေရိကန် ဦးဆောင်သည့် နိုင်ငံတကာတပ်ဖွဲ့များသည် ၂၀၀၃ ခုနှစ်က အီရတ်ကို ဝင်ရောက် ကျူးကျော်ခဲ့ပြီး ၂၀၁၁ ခုနှစ်တွင် တပ်များပြန်လည် ရုပ်သိမ်းသွားခဲ့သည်။

ထိုကျူးကျော်မှုသည် ဒေသတွင်း သေဆုံးသူ များပြားခဲ့သည့် ကျူးကျော်စစ်အဖြစ် ဝေဖန်ခံခဲ့ရသည်။

Source: ရိုက်တာ

ဂါဇာယာယီအုပ်ချုပ်ရေး အစီအစဉ်တွင် ထရမ့်နှင့်တိုနီဘလဲ ပါနေ