CNI International News

မတ်စကတ်၊ ဖေဖော်ဝါရီ ၇

အီရန်နိုင်ငံ၏ နျူကလီးယားစီမံကိန်းနှင့် ပတ်သက်ပြီး အငြင်းပွားမှုများကို အဆုံးသတ်နိုင်ရန် အီရန်နှင့် အမေရိကန်သည် အိုမန်နိုင်ငံတွင် ဆွေးနွေးပွဲများကို ဖေဖော်ဝါရီ ၆ ရက်တွင် စတင် ပြုလုပ်နေကြပြီဖြစ်ကြောင်း ရိုက်တာမှ ဖော်ပြခဲ့သည်။

သို့သော် ဆွေးနွေးမည့် အကြောင်းအရာများကို ချဲ့ထွင်လိုသည့် အငြင်းပွားမှုကြောင့် သံတမန်ရေးရာ ကြိုးပမ်း မှုများ ပျက်ပြားသွားနိုင်ပြီး အရှေ့အလယ်ပိုင်းတွင် နောက်ထပ် ပဋိပက္ခတစ်ခု ဖြစ်ပွားလာမည့် အန္တရာယ်ရှိ နေသည်။

နှစ်ဖက်စလုံးက နျူကလီးယား အငြင်းပွားမှုနှင့် ပတ်သက်၍ သံတမန်ရေးရာ နည်းလမ်းဖြင့် ဖြေရှင်းရန် အရိပ် အယောင် ပြခဲ့ကြသော်လည်း အမေရိကန်က ထိုဆွေးနွေးပွဲများတွင် အီရန်၏ ပဲ့ထိန်းဒုံးကျည်များ၊ ဒေသတွင်းရှိ လက်နက်ကိုင်အဖွဲ့များကို ထောက်ပံ့မှုနှင့် အီရန်ပြည်သူများအပေါ် ဆက်ဆံမှု စသည့် အကြောင်းအရာများကိုပါ ထည့်သွင်း ဆွေးနွေးလိုကြောင်း အမေရိကန်နိုင်ငံခြားရေးဝန်ကြီး မာကို ရူဘီယို (Marco Rubio) က ဖေဖော်ဝါရီ ၄ ရက်တွင် ပြောကြားခဲ့သည်။

အိုမန်နိုင်ငံ မတ်စကတ် (Muscat) မြို့တော်တွင် ပြုလုပ်သည့် ဆွေးနွေးပွဲ၌ အီရန်နိုင်ငံခြားရေးဝန်ကြီး အာဘတ်စ် အာရက်ချီ (Abbas Araqchi) နှင့် အမေရိကန်၏ အရှေ့အလယ်ပိုင်းဆိုင်ရာ အထူးသံတမန် စတိဗ် ဝစ်ကော့ဖ် (Steve Witkoff) တို့သည် နျူကလီးယားကိစ္စ တစ်ခုတည်းကိုသာ ဆွေးနွေးရန် အီရန်ဘက်က အလိုရှိနေသည်။

ဂါဇာ အပစ်အခတ်ရပ်စဲရေး ဆွေးနွေးပွဲများတွင် ကြားဝင်စေ့စပ်ပေးခဲ့သည့် အမေရိကန်သမ္မတ ဒေါ်နယ်ထရမ့် (Donald Trump) ၏ သားမက်ဖြစ်သူ ဂျာရက် ကုရှ်နာ (Jared Kushner) သည်လည်း ဆွေးနွေးပွဲများ၌ ပါဝင် တက်ရောက်မည်ဖြစ်သည်။

အီရန်နိုင်ငံခြားရေးဝန်ကြီးနဲ့ အိုမန်အစိုးရအကြီးအကဲကိုတွေ့ရစဉ်

“အီရန်ဟာ ပြီးခဲ့တဲ့နှစ်အတွင်းက ဖြစ်ရပ်တွေကို သတိတရ ရှိနေပြီး ပွင့်လင်းမြင်သာတဲ့ အမြင်တွေနဲ့ သံတမန် ရေးရာကို စတင်လိုက်ပါတယ်။ ကျနော်တို့ဟာ စိတ်ရင်းမှန်နဲ့ ပါဝင်ဆောင်ရွက်နေသလို ကျနော်တို့ရဲ့ ရပိုင်ခွင့်တွေ အတွက်လည်း ခိုင်ခိုင်မာမာ ရပ်တည်သွားမှာပါ။ ကတိကဝတ် တွေကိုတော့ လေးစားလိုက်နာဖို့ လိုအပ်ပါတယ်” ဟု အာရက်ချီက ဖေဖော်ဝါရီ ၆ ရက်တွင် X လူမှုမီဒီယာ၌ ပြောကြားခဲ့သည်။

အီရန်နိုင်ငံအနီးတွင် အမေရိကန်ရေတပ်က စစ်အင်အား တိုးမြှင့်ထားပြီးနောက် သမ္မတထရမ့် အနေဖြင့် အီရန်ကို တိုက်ခိုက်မည်ဆိုသည့် ၎င်း၏ ခြိမ်းခြောက်မှုများကို အကောင်အထည် ဖော်လာနိုင်ခြေ ရှိသည့်အပေါ် အီရန် ခေါင်းဆောင်များက အလွန် စိုးရိမ်နေကြသည်။

 “ဆွေးနွေးညှိနှိုင်းမှုများ ပြုလုပ်နေချိန် အတွင်းမှာပဲ ကမ္ဘာ့သမိုင်းမှာ အင်အားအကြီးဆုံး စစ်တပ်ရဲ့ စစ်သေနာပတိ ချုပ်ဖြစ်တဲ့ သမ္မတကြီးထရမ့်ရဲ့ လက်ထဲမှာ သံတမန်ရေးရာ နည်းလမ်းအပြင် တခြားရွေးချယ်စရာ နည်းလမ်းများ စွာလည်း ရှိနေသေးတယ်ဆိုတာကို အီရန်အစိုးရကို သတိပေးလိုပါတယ်”ဟု အိမ်ဖြူတော် ပြန်ကြားရေးအရာရှိ ကာရိုလိုင်း လက်ဗစ် (Karoline Leavitt) က ဖေဖော်ဝါရီ ၅ ရက်တွင် သတင်းထောက်များကို ပြောကြားခဲ့သည်။

အမေရိကန်၏ ခြိမ်းခြောက်မှုကို ဖီဆန်ကြောင်း ပြသသည့် အနေဖြင့် အီရန်နိုင်ငံပိုင် ရုပ်သံက ဆွေးနွေးပွဲများ မစတင်မီ နာရီပိုင်းအလိုတွင် အီရန်၏ အဆင့်မြင့်ဆုံး အဝေးပစ် ပဲ့ထိန်းဒုံးကျည်များထဲမှ တစ်ခုဖြစ်သော Khorramshahr-4 ဒုံးကျည်များကို တော်လှန်ရေး အစောင့်တပ်ဖွဲ့၏ မြေအောက် ဒုံးကျည်စခန်းတစ်ခု၌ ဖြန့်ကြက်ချထားကြောင်း ဖော်ပြခဲ့သည်။

Source: ရိုက်တာ

CNI International News

ဝယ်လင်တန်၊ ဖေဖော်ဝါရီ ၇

နယူးဇီလန် ဒုတိယဝန်ကြီးချုပ် ဒေးဗစ် ဆေးမိုး (David Seymour) က ကိုလိုနီပြုခြင်းသည် နိုင်ငံ၏ ဌာနေ တိုင်းရင်းသားများဖြစ်သည့် မော်ရီ (Maori) လူမျိုးများအတွက် ကောင်းကျိုးများရှိခဲ့သည်ဟု ပြောကြားခဲ့သဖြင့် ဝေဖန်ခံနေရကြောင်း အယ်လ်ဂျာဇီးယားမှ ဖော်ပြခဲ့သည်။

သို့သော် ဆေးမိုးကမူ ၎င်း၏ မှတ်ချက်စကားနှင့် ပတ်သက်ပြီး ဝေဖန် ကန့်ကွက်မှုများကို ပယ်ချခဲ့သည်။

၁၈၄၀ ပြည့်နှစ်တွင် ဗြိတိသျှဘုရင်ခံ၏ ကိုယ်စားလှယ်များနှင့် မော်ဝါရီဌာနေ အကြီးအကဲ ၅၀၀ ကျော်တို့က နိုင်ငံကို အုပ်ချုပ်မည့် သတ်မှတ်ချက်များ ထည့်သွင်းချုပ်ဆိုခဲ့သည့် ဝိုင်တန်ဂီစာချုပ် (Waitangi Treaty) ချုပ်ဆိုခဲ့သော နေရာတွင် ဖေဖော်ဝါရီ ၆ ရက် အရုဏ်တက်ချိန်က ဝတ်ပြုဆုတောင်းပွဲ ကျင်းပခဲ့သည်။

ထိုဆုတောင်းပွဲတွင် ဆေးမိုးလ်သည် ဆုတောင်းစကား ပြောကြားရန် ထရပ်လိုက်စဉ်မှာပင် လူပေါင်းများစွာက ၎င်းအား လှောင်ပြောင်အော်ဟစ်ပြီး ပြင်းပြင်းထန်ထန် ကန့်ကွက်ခဲ့ကြသည်။

ဆေးမိုးလ်သည် ဖေဖော်ဝါရီ ၅ ရက်က ကျင်းပသည့် ဝိုင်တန်ဂီနေ့ (Waitangi Day) အထိမ်းအမှတ် မိန့်ခွန်းအတွင်း ကိုလိုနီပြုခြင်းသည် ဌာနေတိုင်းရင်းသားများအတွက် ယေဘုယျအားဖြင့် အပြုသဘောဆောင်သော အတွေ့အကြုံ ဖြစ်ခဲ့သည်ဟု အငြင်းပွားဖွယ် မှတ်ချက်များကို ထည့်သွင်း ပြောကြားခဲ့ခြင်းဖြစ်သည်။

နယူးဇီလန် ဒုတိယဝန်ကြီးချုပ် ဒေးဗစ် ဆေးမိုးကို တွေ့ရစဉ်

ဝိုင်တန်ဂီနေ့သည် ဌာနေမျိုးနွယ်စုများက ၎င်းတို့၏ နစ်နာချက်များကို တင်ပြခွင့်ရသည့် နှစ်စဉ် ကျင်းပလေ့ရှိသော နိုင်ငံရေး လူစုလူဝေးပွဲတစ်ခု ဖြစ်သည်။

လက်ယာယိမ်း ACT ပါတီ၏ ခေါင်းဆောင်ဖြစ်ပြီး မော်ဝါရီ လူမျိုးစုဝင် တစ်ဦးလည်းဖြစ်သူ ဆေးမိုးလ်က “ကိုလိုနီ ပြုတာနဲ့ ကျနော်တို့နိုင်ငံမှာ ဖြစ်ပျက်ခဲ့သမျှ အရာအားလုံးက ဆိုးရွားခဲ့တယ်ဆိုတဲ့ အမြင်ကျဉ်းမြောင်းတဲ့ ပြောဆို သံတွေအပေါ် ကျနော် အမြဲတမ်း အံ့ဩမိပါတယ်။ အမှန်တရားကတော့ အရာရာတိုင်းဟာ အလုံးစုံ ဆိုးရွားနေတာ မျိုးက အလွန်ရှားပါတယ်” ဟု ပြောကြားခဲ့သည်။

ထို့နောက် ဖေဖော်ဝါရီ ၆ ရက် ဆုတောင်းပွဲတွင်  ၎င်းအား အော်ဟစ် ကန့်ကွက်သူများကို အမှောင်ထဲ၌ အော်ဟစ် နေသည့် လူပြိန်းတစ်စုဟု သုံးနှုန်းပြောဆိုခဲ့ပြီး “ဒီနိုင်ငံတစ်ဝန်းမှာရှိတဲ့ တိတ်ဆိတ်စွာ နေထိုင်ကြတဲ့ လူအများစု ဟာ အခုလို ဟန်ဆောင် လုပ်ရပ်မျိုးတွေကို စိတ်ကုန်နေကြပြီ” ဟု ပြောကြားခဲ့သည်။

ဖေဖော်ဝါရီ ၆ ရက်တွင် ဆေးမိုးလ်၏ ဝတ်ပြုဆုတောင်းစကား အပြီး၌ လက်ဝဲယိမ်း လေဘာပါတီခေါင်းဆောင် ခရစ် ဟစ်ကင်စ် (Chris Hipkins) သည်လည်း ဆုတောင်းပွဲ တက်ရောက်လာသူများ၏ လှောင်ပြောင်ခြင်းကို ခံခဲ့ရသည်။

Source: အယ်ဂျာဇီးယား

CNI International News

ဝါရှင်တန်၊ ဖေဖော်ဝါရီ ၇

အမေရိကန်စစ်တပ်သည် ပစိဖိတ်သမုဒ္ဒရာ အရှေ့ပိုင်းတွင် တရားမဝင် မူးယစ်ဆေးဝါးများ တင်ဆောင်လာသည်ဟု သံသယရှိသော သင်္ဘောတစ်စင်းကို တိုက်ခိုက်ခဲ့သဖြင့် လူနှစ်ဦး သေဆုံးခဲ့ကြောင်း ဖေဖော်ဝါရီ ၅ ရက်၌ DW သတင်းဝက်ဘ်ဆိုက်မှ ဖော်ပြခဲ့သည်။

ထိုသင်္ဘောသည် ပစိဖိတ်သမုဒ္ဒရာ အရှေ့ပိုင်းရှိ လူသိများသော မူးယစ်ဆေးဝါး မှောင်ခို လမ်းကြောင်းများအတိုင်း မောင်းနှင်နေပြီး မူးယစ်ဆေးဝါး မှောင်ခို လုပ်ငန်းများကို လုပ်ဆောင်နေကြောင်း ထောက်လှမ်းရေး သတင်းများ အရ အတည်ပြုနိုင်ခဲ့သည်ဟု အမေရိကန် တောင်ပိုင်းတိုင်းစစ်ဌာနချုပ်က X လူမှုမီဒီယာတွင် ရေးသားခဲ့သည်။

ထိုစစ်ဆင်ရေးအတွင်း အမေရိကန်စစ်တပ်မှ ထိခိုက်ဒဏ်ရာရသူ မရှိခဲ့ကြောင်းလည်း အမေရိကန်တောင်ပိုင်း စစ်ဌာနချုပ် ဖော်ပြထားသည်။

သို့သော် ထိုထုတ်ပြန်ချက်တွင် သံသယဖြစ်ဖွယ် သင်္ဘောသည် တိုက်ခိုက် ဖျက်ဆီးမခံရမီ သင်္ဘောပေါ်၌ မူးယစ် ဆေးဝါးများ အမှန်တကယ် တင်ဆောင်လာခဲ့ခြင်း ရှိ၊ မရှိနှင့် ပတ်သက်၍ မည်သည့် သက်သေ အထောက်အထား ကိုမျှ ဖော်ပြထားခြင်း မရှိပေ။

ယခု တိုက်ခိုက်မှုသည် ဇန်နဝါရီလ ၃ ရက်က အမေရိကန်က ဗင်နီဇွဲလားခေါင်းဆောင် နီကိုလပ်စ် မာဒူရို (Nicolas Maduro) ကို ဖမ်းဆီးခေါ်ဆောင် သွားခဲ့ပြီးနောက်ပိုင်း ဒုတိယအကြိမ်မြောက် တိုက်ခိုက်မှုဖြစ်သည်။

 အမေရိကန်စစ်သင်္ဘောကို တွေ့ရစဉ်

မာဒူရိုကို မူးယစ်ဆေးဝါး အကြမ်းဖက်မှု ပူးပေါင်းကြံစည်မှုနှင့် ကိုကင်းတင်သွင်းရန် ပူးပေါင်းကြံစည်မှု အပါအဝင် စွဲချက်များဖြင့် အမေရိကန်သို့ ခေါ်ဆောင်သွားခဲ့ခြင်း ဖြစ်သည်။

ပြီးခဲ့သည့်နှစ် စက်တင်ဘာလ အစောပိုင်းကတည်းက သမ္မတ ဒေါ်နယ်ထရမ့် (Donald Trump)၏ အစိုးရအဖွဲ့ သည် ကာရေဘီယံပင်လယ်နှင့် ပစိဖိတ်သမုဒ္ဒရာ အရှေ့ပိုင်းတို့ရှိ မှောင်ခို သင်္ဘောများဟု ယူဆရသည့် သင်္ဘော များကို ပစ်မှတ်ထား တိုက်ခိုက်ခဲ့ရှိသည်။

တရားဝင် ကိန်းဂဏန်းများအရ ဖေဖော်ဝါရီ ၅ ရက်က တိုက်ခိုက်မှု အပါအဝင် ထိုစစ်ဆင်ရေးများကြောင့် သေဆုံး သူ အရေအတွက်မှာ ၁၂၈ ဦးအထိ ရှိလာပြီဖြစ်သည်။

အမေရိကန် ကာကွယ်ရေးဝန်ကြီး ပိ ဟက်ဆက် (Pete Hegseth) က Operation Southern Spear ဟု တရားဝင် အမည်ပေးထားသော စစ်ဆင်ရေးသည် အနောက်ကမ္ဘာခြမ်းမှ မူးယစ် အကြမ်းဖက် သမားများကို အမြစ်ပြတ် ချေမှုန်းရန်နှင့် ပြည်သူများကို သေကျေ ပျက်စီးစေနေသည့် မူးယစ်ဆေးဝါးများ၏ ရန်မှ ကာကွယ်ရန် ရည်ရွယ် ခြင်းဖြစ်ကြောင်း ပြောကြားခဲ့သည်။

Source: DW

CNI International News

ဘေဂျင်း၊ ဖေဖော်ဝါရီ ၆

တရုတ်သမ္မတ ရှီကျင့်ဖျင် (Xi Jinping) သည် ရုရှားသမ္မတ ဗလာဒီမာ ပူတင် (Vladimir Putin) နှင့် ဗွီဒီယို ဆက်သွယ်မှုမှတဆင့် ဆွေးနွေးပြီးနောက် နာရီပိုင်းအကြာ ဖေဖော်ဝါရီ ၄ ရက်တွင် အမေရိကန်သမ္မတ ဒေါ်နယ်ထရမ့် (Donald Trump)နှင့် ဖုန်းဖြင့် ဆက်သွယ် စကားပြောခဲ့ကြောင်း South China Morning Post မှ ဖော်ပြခဲ့သည်။

ထိုင်ဝမ်အရေးသည် တရုတ်-အမေရိကန် ဆက်ဆံရေးတွင် အရေးကြီးဆုံး ကိစ္စတစ်ခုဖြစ်ကြောင်း၊ ထိုင်ဝမ်ကျွန်း သည် တရုတ်ပိုင်နက်ဖြစ်ကြောင်းနှင့် ထိုင်ဝမ် ခွဲထွက်ခွင့်ကို မည်သည့်အခါမျှ ခွင့်ပြုမည် မဟုတ်ကြောင်း  ရှီက ထရမ့်ကို ပြောကြားခဲ့သည်။

တရုတ်နိုင်ငံ အနေဖြင့် အမျိုးသား အချုပ်အခြာအာဏာနှင့် နယ်မြေ တည်တံ့ခိုင်မြဲရေးကို ကာကွယ်စောင့်ရှောက် ရမည်ဖြစ်ကြောင်း ရှီက ပြောကြားခဲ့ပြီး ထိုင်ဝမ်သို့ လက်နက်ရောင်းချမှုများကို အလွန် သတိထား ဆောင်ရွက်ရန် အမေရိကန်ကို တိုက်တွန်းခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ် တစ်ခုအဖြစ် ရှုမြင်ထားပြီး လိုအပ်ပါက အင်အားသုံးပြီး ထိန်းချုပ်သွား မည်ဟု ပြောကြားထားသည်။

အမေရိကန် အပါအဝင် နိုင်ငံအများစုသည် ထိုင်ဝမ်ကို သီးခြားလွတ်လပ်သော နိုင်ငံတစ်ခုအဖြစ် အသိအမှတ် မပြုသော်လည်း အမေရိကန်သည် ထိုင်ဝမ်ကျွန်းကို အင်အားသုံး သိမ်းယူမည့် မည်သည့် ကြိုးပမ်းမှုကိုမဆို ဆန့်ကျင်ကြောင်း ပြောကြားထားပြီး ထိုင်ဝမ်ကို လက်နက်များ ထောက်ပံ့ပေးမည်ဟု ကတိပြုထားသည်။

ထိုင်ဝမ်သမ္မတ လိုင်ချင်တေးကို တွေ့ရစဉ်

အမေရိကန်သမ္မတ ထရမ့်ကမူ ထိုင်ဝမ်အရေးနှင့် ပတ်သက်ပြီး တရုတ်၏ စိုးရိမ်ပူပန်မှုများကို အလေးထား ကြောင်းနှင့် နှစ်နိုင်ငံဆက်ဆံရေး တည်ငြိမ်စေရန်အတွက် တရုတ်အစိုးရနှင့် ဆက်သွယ်ညှိနှိုင်းမှုများ ဆက်လက် လုပ်ဆောင်သွားလိုကြောင်း ပြောကြားခဲ့သည်ဟု တရုတ်အစိုးရက ထုတ်ပြန်ခဲ့သည်။

တရုတ်၏ ထုတ်ပြန်ချက်တွင် ထိုင်ဝမ်အရေးကို အဓိကထား ဖော်ပြခဲ့သော်လည်း ထရမ့်၏ လူမှုမီဒီယာတွင်မူ ၎င်းနှင့် ရှီတို့သည် ကာလကြာရှည် ဖြစ်ပွားနေသည့် ရုရှား-ယူကရိန်း စစ်ပွဲ အကြောင်းကိုလည်း ဆွေးနွေးခဲ့ကြောင်း ရေးသားခဲ့သည်။

ရှီနှင့် ပူတင်တို့၏ ဗွီဒီယို ဆက်သွယ်မှုမှတဆင့် ဆွေးနွေးမှုတွင်မူ ကမ္ဘာ့အခြေအနေ မတည်မငြိမ် ဖြစ်နေချိန်တွင် နှစ်နိုင်ငံ ဆက်ဆံရေး ပိုမိုခိုင်မာလာမှုကို ချီးကျူးခဲ့ကြသည်ဟု ရုရှားနိုင်ငံက ထုတ်ပြန်ခဲ့သည်။

ရှီနှင့် ပူတင်တို့၏ ဆွေးနွေးမှုသည် ရင်းနှီးပွင့်လင်းပြီး ယုံကြည်မှုရှိသော ဆွေးနွေးမှုဖြစ်ကာ ၁ နာရီခွဲနီးပါး ကြာမြင့် ခဲ့ကြောင်း ကရင်မလင်နန်းတော် အရာရှိတစ်ဦးက ပြောကြားခဲ့သည်။

Source: South China Morning Post

CNI International News

ကရာချီ၊ ဖေဖော်ဝါရီ ၆

ပါကစ္စတန်နိုင်ငံ၊ ဘာလူချီစတန် (Balochistan) တွင် သီတင်းတစ်ပတ်ကြာ ပြုလုပ်ခဲ့သည့် စစ်ဆင်ရေးအပြီးမှာ စစ်သွေးကြွ ၂၁၆ ဦးကို ချေမှုန်းနိုင်ခဲ့ကြောင်း ပါကစ္စတန်စစ်တပ်က ဖေဖော်ဝါရီ ၅ ရက်၌ ပြောကြားခဲ့သည်ဟု ရိုက်တာမှ ဖော်ပြခဲ့သည်။

ပါကစ္စတန်၏ အကြီးဆုံးနှင့် အဆင်းရဲဆုံးဖြစ်သည့် ဘာလိုချီစတန်ပြည်နယ်တွင် ဘာလို့ချ် လွတ်မြောက်ရေး တပ်မတော် (BLA) က ဇန်နဝါရီ ၃၁ ရက်မှ စတင်ပြီး စာသင်ကျောင်းများ၊ ဘဏ်များ၊ ဈေးများနှင့် လုံခြုံရေး အဆောက်အအုံများကို တိုက်ခိုက်ခဲ့ပြီးနောက် ပြည်နယ်အတွင်း သယ်ယူပို့ဆောင်ရေးနှင့် စီးပွားရေးများ ရပ်တန့်သွားခဲ့သည်။

ထိုတိုက်ခိုက်မှုများသည် BLA ၏ အကြီးမားဆုံး ထိုးစစ်တစ်ခုဖြစ်ခဲ့ပြီး လုံခြုံရေးတပ်ဖွဲ့ဝင် ၂၂ ဦးနှင့် အရပ်သား ၃၆ ဦး သေဆုံးခဲ့ကြောင်း ပါကစ္စတန်စစ်တပ်က ပြောကြားခဲ့သည်။

ပါကစ္စတန်စစ်တပ်သည် ဇန်နဝါရီ ၂၉ ရက်မှစပြီး  Radd Al-Fitna 1 အမည်ရှိ စစ်ဆင်ရေးကို ပြုလုပ်ခဲ့ပြီးနောက် BLA က ပြည်နယ်အတွင်းရှိ နေရာဒေသ အနှံ့အပြားတွင် ညှိနှိုင်းချိတ်ဆက်မှုရှိသည့် တိုက်ခိုက်မှုများ ပြုလုပ်ခဲ့ခြင်း ဖြစ်သည်။

 ပါကစ္စတန်စစ်တပ် စစ်ဆင်ရေးအတွင်း ပျက်စီးမှုကိုတွေ့ရစဉ်

“Operation Radd-ul-Fitna-1 စစ်ဆင်ရေးအောက်မှာ တိကျတဲ့ အစီအစဉ်၊ ခိုင်လုံတဲ့ ထောက်လှမ်းရေးသတင်းနဲ့ ပါကစ္စတန်လုံခြုံရေး တပ်ဖွဲ့ဝင်တွေနဲ့ တရားဥပဒေစိုးမိုးရေး အေဂျင်စီတွေဟာ ထောက်လှမ်းရေး အေဂျင်စီတွေနဲ့ အတူ ပူးတွဲဆောင်ရွက်မှုတွေကတဆင့် တိကျစွာ တုန့်ပြန်ဖြေရှင်းနိုင်ခဲ့ပါတယ်”ဟု ပါကစ္စတန်စစ်တပ်က ထုတ်ပြန်ခဲ့သည်။

ထို့ပြင် ဘာလိုချီစတန်ပြည်နယ်တွင် စစ်တပ်၏ စစ်ဆင်ရေး ကာလအတွင်း စစ်သွေးကြွ ၂၁၆ ဦး သေဆုံးခဲ့သည် ဟုလည်း ထုတ်ပြန်ချက်၌ ဖော်ပြခဲ့သည်။

သောင်းကျန်းသူများသည် နေရာဒေသအနှံ့ရှိ အစိုးရ အဆောက်အအုံများနှင့် ရဲစခန်းများကို သိမ်းပိုက်ခဲ့ကြပြီး သဲကန္တာရမြို့ဖြစ်သော နုရှ်ကီ (Nushki) မြို့ကို သုံးရက်ကြာ ထိန်းချုပ်ထားနိုင်ခဲ့ပြီးမှ ပြန်လည်မောင်းထုတ်ခြင်း ခံခဲ့ရသည်ဟု လုံခြုံရေးအရာရှိများနှင့် မျက်မြင်သက်သေများက ပြောကြားခဲ့သည်။

နုရှ်ကီမြို့ကို သောင်းကျန်းသူများက ဝိုင်းရံပိတ်ဆို့ထားမှုကို အဆုံးသတ်ရန်အတွက် ထိုမြို့သို့ ရဟတ်ယာဉ်များနှင့် ဒရုန်းများ စေလွှတ်ခဲ့ရကြောင်း အာဏာပိုင်များက ပြောကြားခဲ့သည်။

သယံဇာတ ကြွယ်ဝသော ဘာလိုချီစတန် ပြည်နယ်သည် အီရန်နှင့် အာဖဂန်နစ္စတန်နိုင်ငံတို့နှင့် နယ်နိမိတ်ချင်း ထိစပ်နေပြီး တရုတ်အစိုးရ၏ ရင်းနှီးမြှုပ်နှံမှုဖြစ်သော ဂွါဒါ (Gwadar) ရေနက်ဆိပ်ကမ်းနှင့် အခြားစီမံကိန်းများ တည်ရှိရာ ဒေသလည်း ဖြစ်သည်။

Source: ရိုက်တာ

CNI International News

ကာရာကက်စ်၊ ဖေဖော်ဝါရီ ၆

ဗင်နီဇွဲလားသမ္မတဟောင်း မာဒူရို( Nicolas Maduro)၏ လူယုံဖြစ်သည့်  စီးပွားရေးလုပ်ငန်းရှင်ဟောင်း ဗင်နီဇွဲလားအရာရှိ အဲလက်စ်ဆက်ဘ် (Alex Saab) သည် ဖေဖော်ဝါရီ ၄ ရက်တွင် ဗင်နီဇွဲလားနိုင်ငံ၌ ဖမ်းဆီးခံ ခဲ့ရကြောင်း ရိုက်တာမှ ဖော်ပြခဲ့သည်။

အမေရိကန်တွင် တစ်ကြိမ် ဖမ်းဆီးထိန်းသိမ်း ခံခဲ့ရဖူးသည့် ဆက်ဘ်ကို ယခုတစ်ကြိမ် ဖမ်းဆီးမှုသည် အမေရိကန် နှင့် ဗင်နီဇွဲလား အာဏာပိုင်များ၏ ပူးပေါင်းဆောင်ရွက်မှု တစ်စိတ်တစ်ပိုင်းဖြစ်ကြောင်း အမေရိကန် တရားဥပဒေ စိုးမိုးရေး အရာရှိတစ်ဦးက ပြောကြားခဲ့သည်။

ကိုလံဘီယာနိုင်ငံဖွား ဆက်ဘ်သည် ဗင်နီဇွဲလားသမ္မတဟောင်း မာဒူရို၏ အရင်းနှီးဆုံး မဟာမိတ်တစ်ဦးဖြစ်ပြီး ၂၀၂၀ ပြည့်နှစ်က ကိပ်ဗာဒီ (Cape Verde) ကျွန်းစုတွင် ဖမ်းဆီးခံခဲ့ရကာ လာဘ်ပေးလာဘ်ယူမှု စွဲချက်များဖြင့် အမေရိကန်၌ သုံးနှစ်ကျော်ကြာ ထိန်းသိမ်းခံခဲ့ရသူဖြစ်သည်။

ထို့နောက် ဆက်ဘ်ကို ဗင်နီဇွဲလားတွင် ဖမ်းဆီးထားသည့် အမေရိကန်နိုင်ငံသားများနှင့် လဲလှယ်သည့် အနေဖြင့် လွတ်ငြိမ်းချမ်းသာခွင့်ပေးကာ ပြန်လွှတ်ပေးခဲ့ခြင်း ဖြစ်သည်။

ယခုထွက်ပေါ်နေသည့် ဆက်ဘ်အား ဖမ်းဆီးမှု သတင်းသည် သတင်းအမှားသာဖြစ်ကြောင်း ၎င်း၏ရှေ့နေဖြစ်သူ လူဝီဂျီ ဂျူလီယာနို (Luigi Giuliano) ၏ ပြောကြားချက်ကို ကိုးကား၍ ကိုလံဘီယာသတင်းစာ El Espectador က ဖေဖော်ဝါရီ ၄ ရက်နှောင်းပိုင်းတွင် ဖော်ပြခဲ့သည်။

ဗင်နီဇွဲလားသမ္မတဟောင်း မာဒူရိုနဲ့ ဆက်ဘ်ကို တွေ့ရစဉ်

ဗင်နီဇွဲလားအစိုးရ လိုလားသည့် သတင်းထောက်များကလည်း ဆက်ဘ် ဖမ်းဆီးခံရသည် ဆိုခြင်းမှာ မဟုတ်မှန် ကြောင်း လူမှုမီဒီယာများတွင် တုန့်ပြန်ခဲ့ကြသည်။

ဆက်ဘ် အနေဖြင့် ထိုသတင်းမှာ မဟုတ်မမှန်ကြောင်း ကိုယ်တိုင် အတည်ပြုရန်အတွက် လူမြင်ကွင်းတွင် ထွက်ပြ နိုင်သော်လည်း လက်ရှိ ဖြစ်ပေါ်နေသည့် အခြေအနေများနှင့်ပတ်သက်၍ အစိုးရနှင့် တိုင်ပင် ဆွေးနွေးနေကြောင်း ဂျူလီယာနိုက ပြောကြားခဲ့သည်။

ဗင်နီဇွဲလား၏ ထိပ်သီးဥပဒေပြုအမတ် ဂျော့ချ် ရိုဒရီဂွက်ဇ် (Jorge Rodriguez) ကမူ ဖေဖော်ဝါရီ ၄ ရက် ညနေ ပိုင်း သတင်းစာ ရှင်းလင်းပွဲတွင် ထိုသတင်းကို ငြင်းဆိုခြင်း သို့မဟုတ် အတည်ပြုခြင်းမျိုး မပြုလုပ်ခဲ့ပေ။

ဗင်နီဇွဲလား ယာယီသမ္မတ ဒယ်လ်စီ ရိုဒရီဂွက်ဇ် (Delcy Rodríguez) ကမူ ထိုဖြစ်စဉ်သည် ၎င်း၏ တာဝန်နှင့် မသက်ဆိုင်ကြောင်း၊ ဖမ်းဆီးမှု ဖြစ်နိုင်ခြေနှင့် ပတ်သက်ပြီး မည်သည့် သတင်းအချက်အလက်မျှ မရှိကြောင်း ပြောကြားခဲ့သည်။

အသက် ၅၄ နှစ် အရွယ်ရှိ ဆက်ဘ်အား လာမည့် ရက်ပိုင်းအတွင်း အမေရိကန်နိုင်ငံသို့ လွှဲပြောင်းပေးအပ်သွား မည်ဟု မျှော်လင့်ရကြောင်း အမေရိကန်အရာရှိက ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၅

ဖေဖော်ဝါရီ ၃ ရက်က အာရေဗျ ပင်လယ်အတွင်းရှိ အမေရိကန်၏ USS Abraham Lincoln လေယာဉ်တင် သင်္ဘောအနီးသို့ ရန်လိုသည့် ပုံစံမျိုးဖြင့် ချဉ်းကပ် ပျံသန်းလာသော အီရန်ဒရုန်းတစ်စင်းကို အမေရိကန်စစ်တပ်က ပစ်ချလိုက်ကြောင်း ရိုက်တာမှ ဖော်ပြခဲ့သည်။

ထိုဖြစ်စဉ်သည် အီရန်နှင့် အမေရိကန်ကြား နျူကလီးယား ဆွေးနွေးပွဲများ ပြုလုပ်ရန် သံတမန်ရေးအရ ကြိုးပမ်း နေချိန်တွင် ဖြစ်ပွားခဲ့ခြင်းဖြစ်သည်။

အမေရိကန်စစ်သင်္ဘောများ အီရန်နိုင်ငံဘက်သို့ ဦးတည် မောင်းနှင်နေချိန်တွင် အီရန်အနေဖြင့် သဘောတူညီမှု မယူပါက ဆိုးရွားသည့် အရာများ ဖြစ်လာနိုင်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က သတိပေးထားသည်။

အီရန်၏ ဒရုန်း ပစ်ချခံရသည့် သတင်းကြောင့် ရေနံစိမ်း ကြိုတင်ရောင်းဝယ်မှု ဈေးနှုန်းများသည် တစ်စည်လျှင် ၁ ဒေါ်လာကျော် မြင့်တက်သွားခဲ့သည်။

အမေရိကန်စစ်တပ်၏ ထုတ်ပြန်ချက်တွင် အီရန်လုပ် Shahed-139 အမျိုးအစား ဒရုန်းသည် လေယာဉ်တင် သင်္ဘောထံ ရှင်းလင်းစွာ မသိရသည့် ရည်ရွယ်ချက်ဖြင့် ပျံသန်းလာခဲ့ခြင်းဖြစ်ပြီး အမေရိကန်၏ F-35 တိုက်လေ ယာဉ် တစ်စင်းက ပစ်ချခဲ့ခြင်းဖြစ်ကြောင်း ဖော်ပြထားသည်။

စစ်သင်္ဘောတစ်စင်းကို တွေ့ရစဉ်

“မိမိကိုယ်ကိုယ် ကာကွယ်ဖို့နဲ့ လေယာဉ်တင်သင်္ဘောနဲ့ သင်္ဘောသားတွေကို အကာအကွယ် ပေးဖို့အတွက် Abraham Lincoln သင်္ဘောပေါ်က F-35C တိုက်လေယာဉ် တစ်စင်းဟာ အီရန်ဒရုန်းကို ပစ်ချခဲ့တာဖြစ်ပါတယ်” ဟု အမေရိကန် ဗဟိုစစ်ဌာနချုပ် (CENTCOM) ၏ ပြောရေးဆိုခွင့်ရှိသူ ရေတပ်ဗိုလ်မှူးကြီး တင်မ် ဟော့ကင်းစ် (Tim Hawkins) က ပြောကြားခဲ့သည်။

ထိုအကြောင်းအရာနှင့် ပတ်သက်ပြီး ကုလသမဂ္ဂဆိုင်ရာ အီရန်သံတမန်အဖွဲ့က မှတ်ချက်ပေးရန် ငြင်းဆိုခဲ့သည်။

အီရန်နိုင်ငံ၏ Tasnim သတင်းဌာနကမူ နိုင်ငံတကာ ရေပြင်များအတွင်း ဒရုန်းတစ်စင်းနှင့် အဆက်အသွယ် ပြတ်တောက် သွားခဲ့သော်လည်း အကြောင်းရင်းကို မသိရသေးကြောင်း ဖော်ပြခဲ့သည်။

ထိုဖြစ်စဉ်အတွင်း အမေရိကန်စစ်သားများ ထိခိုက်ဒဏ်ရာ မရခဲ့ဘဲ စစ်ဘက်ဆိုင်ရာ အသုံးအဆောင် ပစ္စည်းများ လည်း ထိခိုက်ပျက်စီးမှု မရှိခဲ့ကြောင်း ဟော့ကင်းစ်က ပြောကြားခဲ့သည်။

Source: ရိုက်တာ

CNI International News

နယူးဒေလီ၊ ဖေဖော်ဝါရီ ၅

အိန္ဒိယသည် လျှော့စျေးဖြင့် ရရှိနေသည့် ရုရှားရေနံများနှင့် ပိတ်ဆို့ခံထားရသည့် အီရန်ရေနံများကို ဝယ်ယူနေခြင်း ကို ရပ်တန့်ရန် အမေရိကန်၏ ဖိအားပေးမှုအား အချိန်ကြာမြင့်စွာ ရင်ဆိုင်ခဲ့ရပြီးနောက် အိန္ဒိယအစိုးရသည် အမေရိကန်သမ္မတ ဒေါ်နယ်ထရမ့် (Donald Trump) ၏ တောင်းဆိုချက်ကို လိုက်လျောရန် ဆုံးဖြတ်ခဲ့ဖွယ်ရှိ ကြောင်း DW သတင်းဝက်ဘ်ဆိုက်မှ ဖော်ပြခဲ့သည်။

ထို့နောက် အိန္ဒိယသည် ရုရှားထံမှ ရေနံတင်သွင်းမှုကို တဖြည်းဖြည်း ရပ်နားသွားရန်နှင့် အမေရိကန်ထံမှ ရေနံများ ကို ပိုမိုဝယ်ယူရန် သဘောတူညီခဲ့ပြီး ဗင်နီဇွဲလား ရေနံများကိုလည်း ဝယ်ယူရန် အလားအလာ ရှိနေသည်။

အိန္ဒိယဝန်ကြီးချုပ် မိုဒီ (Narendra Modi) သည် ရုရှားထံမှ ရေနံများ ဝယ်ယူမှုကို ရပ်တန့်ရန် စီစဉ်နေကြောင်း ထရမ့်က ၎င်း၏ Truth Social လူမှုမီဒီယာတွင် ဖေဖော်ဝါရီ ၂ ရက်က ရေးသားခဲ့သည်။

ထိုသို့ လုပ်ဆောင်ခြင်းသည် ယူကရိန်းစစ်ပွဲကို အဆုံးသတ်ရန် အထောက်အကူ ဖြစ်စေလိမ့်မည်ဟု ထရမ့်က ပြောကြားခဲ့သည်။

အိန္ဒိယဝန်ကြီးချုပ် မိုဒီနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ယူကရိန်းနှင့် တိုက်ခိုက်နေသည့် စစ်ပွဲအတွက် အဓိက ငွေကြေး အရင်းအမြစ်ဖြစ်သည့် ရုရှား၏ စွမ်းအင်ကဏ္ဍမှ ဝင်ငွေသည် ပြီးခဲ့သည့် နှစ်တွင် ၅ ပုံ ၁ ပုံခန့် ကျဆင်းသွားခဲ့ကြောင်း ဗြိတိန်အခြေစိုက် Financial Times သတင်း စာက ပြီးခဲ့သည့် သီတင်းပတ်တွင် ဖော်ပြခဲ့သည်။

ထိုကဲ့သို့ စစ်ပွဲအတွက် အဓိက ငွေကြေး အရင်းအမြစ် ကျဆင်းသွားခဲ့ခြင်းသည် ရုရှားသမ္မတ ပူတင် (Vladimir Putin) ကို ငြိမ်းချမ်းရေး သဘောတူညီချက် ရယူစေရန် ဖိအားပေးသကဲ့သို့ ဖြစ်ခဲ့သည်။

အိန္ဒိယအနေဖြင့် ကျောက်မီးသွေး အပါအဝင် အမေရိကန်၏ စွမ်းအင်၊ နည်းပညာ၊ စိုက်ပျိုးရေးနှင့် အခြား ထုတ်ကုန်များကို ဒေါ်လာ ၅၀၀ ဘီလျံဖိုးအထိ ဝယ်ယူလိမ့်မည်ဟု ထရမ့်က ပြောကြားခဲ့သည်။

အိန္ဒိယသည် တစ်နေ့လျှင် ရေနံစိမ်း စည်ပေါင်း ၅ သန်းခန့် တင်သွင်းနေပြီး ထိုရေနံစိမ်း စည်များ၏ ၄ ပုံ ၁ ပုံမှာ ရုရှားထံမှ ဖြစ်သဖြင့် ရုရှားရေနံအစား အမေရိကန်ရေနံနှင့် အပြည့်အဝ အစားထိုးရန်မှာ လပေါင်းများစွာ သို့မဟုတ် နှစ်နှင့်ချီ ကြာမြင့်နိုင်သည်။

ရေနံကုမ္ပဏီတစ်ခုကို တွေ့ရစဉ်

အိန္ဒိယသည် ရုရှားရေနံကို လျှော့စျေးဖြင့် ဝယ်ယူနိုင်ခဲ့သော်လည်း အမေရိကန်ရေနံသည် ဈေးပိုကြီးသဖြင့် ရုရှား ရေနံအစား အမေရိကန်ရေနံ အစားထိုးမည့် အစီအစဉ်သည် အိန္ဒိယ၏ တစ်နှစ်တာ ရေနံတင်သွင်းမှု ကုန်ကျ စရိတ်ကို ဒေါ်လာ ၉ ဘီလျံမှ ၁၁ ဘီလျံအထိ ပိုမိုမြင့်တက်စေလိမ့်မည်ဟု စွမ်းအင်စောင့်ကြည့်ရေးအဖွဲ့ဖြစ်သော Kpler က ခန့်မှန်းထုတ်ပြန်ခဲ့သည်။

အမေရိကန် ရေနံဆိုသည်မှာ ဗင်နီဇွဲလားဆီကနေ ဝယ်ယူလာပြီး တခြားနိုင်ငံကို အမေရိကန်က ပြန်လည် ရောင်း ချနေသော ရေနံများကို ဆိုလိုခြင်းဖြစ်သည်။

သို့သော် အမေရိကန်၏ ကုန်သွယ်ခွန် တိုးမြှင့်မည့် ခြိမ်းခြောက်မှုနှင့် ပိတ်ဆို့ အရေးယူမှုများကြောင့် အိန္ဒိယသည် အမေရိကန်ရေနံ ဝယ်ယူမှုကို စတင်တိုးမြှင့်နေပြီဖြစ်သည်။

ပြီးခဲ့သည့်နှစ် ဧပြီလမှ နိုဝင်ဘာလအတွင်း အိန္ဒိယသည် အမေရိကန်ထံမှ ရေနံ ဝယ်ယူတင်သွင်းမှု ၉၂ ရာခိုင်နှုန်း အထိ မြင့်တက်ခဲ့ကြောင်း The Times of India သတင်းစာက ဖော်ပြခဲ့သည်။

၂၀၂၅ ခုနှစ်အတွင်း အိန္ဒိယက တင်သွင်းခဲ့သည့် စုစုပေါင်း ရေနံတန်ချိန် ၁၇၈ ဒသမ ၁ သန်းအနက် ၁၃ သန်းမှာ အမေရိကန်ထံမှ ဖြစ်ပြီး ၂၀၂၄ ခုနှစ်က ၇ ဒသမ ၁ သန်းသာ ရှိခဲ့သဖြင့် သိသိသာသာ တိုးတက်လာခြင်း ဖြစ်သည်။

Source: DW

CNI International News

ထရီပိုလီ၊ ဖေဖော်ဝါရီ ၅

လစ်ဗျားနိုင်ငံ၏ ကွယ်လွန်သွားပြီဖြစ်သည့် အာဏာရှင်ဟောင်း မိုအာမာ ကဒါဖီ (Moammar Gadhafi) ၏ သားဖြစ်သူ ဆိဖ် အယ်လ်အစ္စလမ် ကဒါဖီ (Seif al-Islam Gadhafi) သည် အသ-တ်ခံ လိုက်ရကြောင်း လစ်ဗျား အစိုးရ တာဝန်ရှိသူများက ဖေဖော်ဝါရီ ၃ ရက်တွင် ပြောကြားခဲ့သည်။

အသက် ၅၃ နှစ်အရွယ်ရှိ ဆိဖ် အယ်လ်အစ္စလမ်သည် ထရီပိုလီ (Tripoli) မြို့တော်၏ အနောက်တောင်ဘက် ၁၃၆ ကီလိုမီတာ (၈၅ မိုင်) အကွာရှိ ဇင်တန် (Zintan) မြို့တွင် အသ-တ်ခံခဲ့ရခြင်းဖြစ်ကြောင်း လစ်ဗျားရှေ့နေချုပ်ရုံး က ထုတ်ပြန်ခဲ့သည်။

ကနဦး စုံစမ်းစစ်ဆေးမှုများအရ ဆိဖ် အယ်လ်အစ္စလမ်သည် သေနတ်ဖြင့် ပ-စ်သ-တ် ခံခဲ့ရခြင်းဖြစ်ကြောင်း ဖော်ပြထားသော်လည်း အသေးစိတ် အချက်အလက်များကို ထုတ်ပြန်ခဲ့ခြင်းမရှိပေ။

ဆိဖ် အယ်လ်အစ္စလမ်၏ ရှေ့နေဖြစ်သူ ခါလက် အယ်လ်ဇိုင်ဒီ (Khaled al-Zaidi) ကလည်း ထိုသေဆုံးမှုကို အတည်ပြုခဲ့သော်လည်း အသေးစိတ်ကိုမူ ပြောကြားခဲ့ခြင်းမရှိပေ။

မျက်နှာဖုံးစွပ်ထားသည့် အမျိုးသား ၄ ဦးသည် ဆိဖ် အယ်လ်အစ္စလမ်၏ နေအိမ်အတွင်းသို့ အတင်းအဓမ္မ ဝင်ရောက်လာပြီး သူရဲဘောကြောင်စွာ လုပ်ကြံ သ-တ် ဖြတ် ခဲ့ခြင်းဖြစ်သည်ဟု ဆိဖ် အယ်လ်အစ္စလမ်၏ နိုင်ငံရေးအဖွဲ့မှ ထုတ်ပြန်ခဲ့သည်။

 ကဒါဖီရဲ့ သားကို တွေ့ရစဉ်

၁၉၇၂ ခုနှစ်၊ ဇွန်လတွင် ထရီပိုလီမြို့၌ မွေးဖွားခဲ့သော ဆိဖ် အယ်လ်အစ္စလမ်သည် ကဒါဖီ၏ ဒုတိယမြောက်သား ဖြစ်သည်။

သူသည် လန်ဒန်စီးပွားရေးတက္ကသိုလ် (LSE) တွင် ဒေါက်တာဘွဲ့ (Ph.D.) အတွက် ပညာသင်ကြားခဲ့ပြီး ကဒါဖီ အစိုးရအတွင်း ပြုပြင်ပြောင်းလဲရေးကို လိုလားသော ခေါင်းဆောင်သစ်အဖြစ် ရှုမြင်ခံခဲ့ရသူဖြစ်သည်။

ကဒါဖီသည် လစ်ဗျားတွင် နှစ်ပေါင်း ၄၀ ကျော် အာဏာစွဲကိုင် ထားခဲ့ပြီးနောက် ၂၀၁၁ ခုနှစ်၌ နေတိုး၏ ကျောထောက် နောက်ခံပြုထားသည့် လူထုအုံကြွမှုနှင့်အတူ ဖြစ်ပွားခဲ့သော ပြည်တွင်းစစ်အတွင်း အသ-တ် ခံခဲ့ရသည်။

ထိုအချိန်မှစပြီး လစ်ဗျားနိုင်ငံသည် ဖရိုဖရဲ အခြေအနေသို့ ရောက်ရှိခဲ့ပြီး ပြိုင်ဘက် လက်နက်ကိုင်အဖွဲ့များနှင့် ပြည်သူ့စစ်များအကြား သဘောထား ကွဲလွဲမှုများ ဖြစ်ပွားခဲ့သည်။

Source: အေပီ