CNI International News

ဘန်ကောက်၊ နိုဝင်ဘာ ၁၁

ထိုင်းနှင့် ကမ္ဘောဒီးယားကြား ဇူလိုင် ၂၄ ရက်က ဖြစ်ပွားခဲ့သည့် နယ်စပ် တိုက်ခိုက်မှုများနှင့် ပတ်သက်ပြီး တိုက်ခိုက်မှုများ စတင်ဖြစ်ပွားခဲ့သည့် ပထမရက်မှာပင် အပစ်အခတ်ရပ်စဲရန် အမိန့်ပေးခဲ့ခြင်း မရှိကြောင်း ယာယီဝန်ကြီးချုပ်ဟောင်း ဖွမ်သမ် ဝီချာယာချိုင်း (Phumtham Wechayachai)က ငြင်းဆိုခဲ့သည်ဟု The Nation မှ ဖော်ပြခဲ့သည်။

ထိုအကြောင်းအရာနှင့်ပတ်သက်ပြီး ထိုင်း၏ အမှတ် ၂ စစ်ဒေသ တပ်မှူးဟောင်းဖြစ်သည့် ဒုတိယဗိုလ်ချုပ်ကြီး ဘွန်ဆင် ပက်ကလန် (Boonsin Padklang) က ထုတ်ဖော် ပြောဆိုခဲ့ခြင်း ဖြစ်သည်။

ထိုင်းနှင့် ကမ္ဘောဒီးယားကြား တိုက်ခိုက်မှုများ ဖြစ်ပွားခဲ့ချိန်က ဖွမ်သမ်သည် ဒုဝန်ကြီးချုပ် ရာထူးနှင့် ယာယီ ဝန်ကြီးချုပ် ရာထူးတို့ကို တာဝန်ယူထားချိန်ဖြစ်သည်။

တိုက်ပွဲများ စတင်ဖြစ်ပွားခဲ့ပြီးနောက် ၆ နာရီအကြာတွင် ထိုင်းစစ်သားများကို အပစ်အခတ်ရပ်စဲရန် အထက်မှ အမိန့်ရခဲ့ကြောင်း၊ သို့သော် ထိုအမိန့်ကို လိုက်နာခဲ့ခြင်း မရှိကြောင်း ဘွန်ဆင်က ပြောကြားခဲ့သည်။

ထိုင်းနဲ့ကမ္ဘောဒီးယား အပစ်ရပ်ရေး မလေးရှားမှာ တွေ့ကြစဉ်

ထိုင်းစစ်သားများဘက်မှ အပစ်ရပ် လိုက်မည်ဆိုပါက ထိုင်းဘက်မှ အရေးနိမ့် သွားလိမ့်မည်ဟုလည်း ၎င်းက ဆိုသည်။

ဘွန်ဆန်၏ ပြောကြားချက် ထွက်ပေါ်ခဲ့ပြီးနောက် ထိုင်းစစ်သားများကို  အပစ်ရပ်ရန် အမိန့်ကို မည်သူက ထုတ်ပြန် ခဲ့သနည်းဆိုသည့် မေးခွန်းသည် လူထုကြားတွင် ပျံ့နှံ့လာခဲ့သည်။

အများစုကမူ ထိုအမိန့်ကို ဖွမ်သမ်က ပေးခဲ့ခြင်းဖြစ်နိုင်ကြောင်း ထင်ကြေးပေးနေကြသည်။

ဖွမ်သမ်သည် ဇူလိုင် ၂၈ ရက်က မလေးရှားနိုင်ငံတွင် ကမ္ဘောဒီးယားနှင့် အပစ်အခတ်ရပ်စဲရေး သဘောတူ စာချုပ် ချုပ်ဆိုခဲ့သူလည်း ဖြစ်သည်။

ထိုစွပ်စွဲချက်များနှင့်ပတ်သက်ပြီး သတင်းထောက်များက မေးမြန်းချိန်တွင် ဖွမ်သမ်က ထိုအမိန့်ကို ပေးခဲ့ခြင်းမရှိ ကြောင်း ငြင်းဆိုခဲ့သည်။

“အဲဒီလို အမိန့်မျိုးကို ထုတ်ပြန်တဲ့အချိန်မှာ နိုင်ငံရေး ခေါင်းဆောင်တွေ မပါဝင်ဘူးဆိုတာကို ကျနော် အတည်ပြုပါ တယ်”ဟု ဖွမ်သမ်က သတင်းထောက်များကို ပြောကြားခဲ့သည်။

ဗိုလ်ချုပ်ကြီး နတ္တပွန် နက်ပါနစ်ချ်ကို တွေ့ရစဉ်

ထို့ပြင် ကာကွယ်ရေးဝန်ကြီးဖြစ်သည့် ဗိုလ်ချုပ်ကြီး နတ္တပွန် နက်ပါနစ်ချ် (Nattapon Nakpanich) ကလည်း ကမ္ဘောဒီးယားနှင့် တိုက်ပွဲဖြစ်ပွားသည့် ပထမနေ့တွင် အပစ်ရပ်ရန် အမိန့်ကို ပေးခဲ့ခြင်းမရှိကြောင်း ငြင်းဆိုခဲ့သည်။

“ကျနော် ရှင်းရှင်းပဲ ပြောချင်ပါတယ်။ ကျနော်ဟာ ဇူလိုင် ၂၄ ရက်က အပစ်အခတ်ရပ်စဲဖို့ အမိန့်ကို မပေးခဲ့ပါဘူး။ အခြေအနေကိုပဲ စောင့်ကြည့်ခဲ့တာပါ”ဟု နတ္တပွန်က ပြောကြားခဲ့သည်။

 ထို့ကြောင့် အပစ်အခတ်ရပ်စဲရေး အမိန့်ကို မည်သူက ပေးခဲ့သနည်းဆိုသည့် မေးခွန်းကို သတင်းထောက်များက နတ္တပွန်ကို မေးမြန်းခဲ့ချိန်တွင် “ဒီအကြောင်းကို ပြောခဲ့တဲ့သူကိုပဲ ခင်ဗျားတို့ မေးရပါလိမ့်မယ်။ ဘယ်သူ အမိန့်ပေး ခဲ့ တာလဲဆိုတာကိုတော့ ကျနော် မသိပါဘူး။ ဒုတိယဗိုလ်ချုပ်ကြီး ဘွန်ဆင်ကိုပဲ သွားမေးကြည့်ကြပေါ့” ဟု ဖြေကြားခဲ့သည်။

Source: The Nation

CNI International News

မက္ကဆီကိုစီးတီး၊ နိုဝင်ဘာ ၁၁

မြို့တော်ဝန် လုပ်ကြံခံရပြီးနောက် မက္ကဆီကိုနိုင်ငံ မီချိုအာကန် (Michoacan) ပြည်နယ်တွင် စစ်တပ်နှင့် လုံခြုံရေး အင်အားကို တိုးမြှင့်သွားမည်ဟု မက္ကဆီကိုသမ္မတ ကလော်ဒီယာ ရှိန်းဘမ်း (Claudia Sheinbaum) က ကြေညာခဲ့ ကြောင်း DW သတင်းဌာနမှ ဖော်ပြခဲ့သည်။

မီချိုအာကန်ပြည်နယ်၊ အူရူအာပန် (Uruapan) မြို့တွင် နိုဝင်ဘာ ၁ ရက်က မြို့တော်ဝင် ကားလို့စ် မန်ဇို (Carlos Manzo) လုပ်ကြံ သတ်ဖြတ်ခံရမှုနှင့်ပတ်သက်ပြီး လူထုကြား ဒေါသများ မြင့်တက်ခဲ့ပြီးနောက် သမ္မတ ရှိန်းဘမ်း၏ ကြေညာချက် ထွက်ပေါ်ခဲ့ခြင်းဖြစ်သည်။

“ပြီးခဲ့တဲ့ ရက်ပိုင်းက အူရူအာပန်မြို့တော်ဝန် လုပ်ကြံ သတ်ဖြတ်ခံရမှုနဲ့ပတ်သက်ပြီး ကျမတို့ နာကျင်ခံစားရသလို ဒေါသလည်း ထွက်ခဲ့ရပါတယ်။ သူ့ကို သတ်သွားတဲ့ သူရဲဘောကြောင်တဲ့ လူသတ်သမားဟာ မီချိုအာကန် ပြည်နယ်နဲ့ တစ်နိုင်ငံလုံးက လူတွေကို နာကျင်ခံစားစေခဲ့ပါတယ်”ဟု ရှိန်းဘမ်းက ပြောကြားခဲ့သည်။

မီချိုအာကန်ပြည်နယ် ငြိမ်းချမ်းရေးနှင့် တရားမျှတရေး အစီအစဉ်၏ အဓိက အချက်တစ်ခုမှာ ထိုပြည်နယ်တွင် စစ်တပ်အင်အားနှင့် အမျိုးသားအစောင့်တပ်အင်အားကို ၁၀,၃၀၀ အထိ တိုးမြှင့်ရန်ဖြစ်သည်။

လုပ်ကြံသတ်ဖြတ်ခံရတဲ့ မြို့တော်ဝင် ကားလို့စ် မန်ဇို အလောင်းကို သယ်ဆောင်နေကြစဉ်

ထိုအစီအစဉ်အရ မီချိုအာကန်ပြည်နယ်သို့ နိုဝင်ဘာ ၁၀ ရက်တွင် နောက်ထပ် လုံခြုံရေးတပ်ဖွဲ့ဝင် ၂၀၀၀ နီးပါး စေလွှတ်သွားမည်ဟု ရှိန်းဘမ်းက ပြောသည်။

ဖက်ဒရယ်တပ်ဖွဲ့များ၏ တာဝန်မှာ ရာဇဝတ် အဖွဲ့အစည်းများကို တိုက်ဖျက်ရေး၊ ခြိမ်းခြောက်မှုများကို နှိမ်နင်းရေး၊ မူးယစ်ဆေးဝါး ဓာတ်ခွဲခန်းများနှင့် လေ့ကျင့်ရေး စခန်းများကို ဖျက်ဆီးရေးတို့ ဖြစ်ကြောင်း မက္ကဆီကို အရာရှိများ က ပြောကြားခဲ့သည်။

ထိုအစီအစဉ်တွင် မီချိုအာကန်ပြည်နယ် အတွင်းရှိ ကျောင်းသားများကို ပညာသင်ဆုများ ချီးမြှင့်ခြင်း၊ လူငယ်များ ကို ရာဇဝတ်ဂိုဏ်းများ၏ စုဆောင်းခြင်း မခံရစေရန်အတွက် အားကစားများတွင် ပါဝင်ရန် စည်းရုံးခြင်းကဲ့သို့ လူမှုရေး အစီအစဉ်များလည်း ပါဝင်သည်။

ထို့ပြင် အစိုးရသည် ထိုပြည်နယ်တွင် စိုက်ပျိုး မွေးမြူရေးနှင့် ခရီးသွားလာရေးကဲ့သို့ ကဏ္ဍများတွင် အရင်းအမြစ် များကို မြှင့်တင်သွားမည်ဖြစ်သည်။

ထိုအစီအစဉ်များအတွက် ဒေါ်လာ ၃ ဒသမ ၁၀ ဘီလျံခန့် ရင်းနှီးမြှုပ်နှံရမည်ဖြစ်ကြောင်း ရှိန်းဘမ်းက ပြောကြားခဲ့ သည်။

Source: DW

CNI International News

အစ္စတန်ဘူလ်၊ နိုဝင်ဘာ ၁၀

ဟစ်ဇ်ဘိုလာအဖွဲ့ကို အီရန်က ထောက်ပံ့ပေးနေမှုအား ဖြတ်တောက်ရန် အချိန်ကျပြီဟု အမေရိကန်အစိုးရအဖွဲ့မှ ပြောကြားခဲ့ကြောင်း ရိုက်တာမှ ဖော်ပြခဲ့သည်။

အမေရိကန်အနေဖြင့် လက်ဘနွန်နိုင်ငံတွင် ဖြစ်ပွားနေသည့် အခြေအနေကို အခွင့်ကောင်းယူပြီး ဟစ်ဇ်ဘိုလာ အဖွဲ့အား ထောက်ပံ့ပေးနေသည့် အီရန်၏ ငွေကြေးထောက်ပံ့မှုကို ဖြတ်တောက်ရန်နှင့် ဟစ်ဇ်ဘိုလာအဖွဲ့ကို လက်နက်ဖြုတ်သိမ်းရန် ကြိုးပမ်းနေကြောင်း အမေရိကန် ဘဏ္ဍာရေးဝန်ကြီးဌာန၏ အကြမ်းဖက်မှုနှင့် ဘဏ္ဍာရေး ထောက်လှမ်းရေးဆိုင်ရာ ဒုဝန်ကြီး ဂျွန်ဟာလေ (John Hurley) က ပြောကြားခဲ့သည်။

နိုဝင်ဘာ ၇ ရက်က ပြုလုပ်ခဲ့သည့် အင်တာဗျူးတွင် ဟာလေက အီရန်သည် အနောက်နိုင်ငံများ၏ ပိတ်ဆို့မှုများ ချမှတ်ခံထားရသည့်တိုင် ယခုနှစ်အတွင်း ဟစ်ဇ်ဘိုလာအဖွဲ့ကို ဒေါ်လာ ၁ ဘီလျံခန့် ထောက်ပံ့ပေးခဲ့ကြောင်း ပြောကြားခဲ့သည်။

အမေရိကန်သည် အီရန်၏ နျူကလီးယား စီမံကိန်းနှင့် လက်ဘနွန် အပါအဝင် ဒေသတွင်း ဩဇာလွှမ်းမိုးမှုကို ရပ်တန့်ရန် အဆုံးစွန် ဖိအားပေးသည့် အစီအစဉ်ကို လုပ်ဆောင်ခဲ့သည်။

 အမေရိကန် ဘဏ္ဍာရေးဝန်ကြီးဌာန၏ အကြမ်းဖက်မှုနှင့် ဘဏ္ဍာရေး ထောက်လှမ်းရေးဆိုင်ရာ ဒုဝန်ကြီး ဂျွန်ဟာလေကို တွေ့ရစဉ် 

လက်ရှိတွင် လက်ဘနွန်ရှိ ဟစ်ဇ်ဘိုလာအဖွဲ့သည် ၂၀၂၃ ခုနှစ်နှင့် ၂၀၂၄ ခုနှစ်တွင် အစ္စရေးနှင့် စစ်ပွဲဖြစ်ပွားခဲ့သဖြင့် စစ်အင်အား လျော့နည်းလာကြောင်း လေ့လာသူများက ပြောကြားခဲ့သည်။

ပြီးခဲ့သည့် သီတင်းပတ်ကလည်း အမေရိကန်သည် ဟစ်ဇ်ဘိုလာအဖွဲ့ကို ငွေကြေး ထောက်ပံ့ပေးရာတွင် ကူညီပေး ရန်အတွက် ငွေကြေးလဲလှယ်သည့် စင်တာများအား အသုံးပြုခဲ့သည်ဟု သံသယရှိရသူ ၂ ဦးကို ပိတ်ဆို့မှုများ ပြုလုပ်ခဲ့သည်။

“လက်ရှိအချိန် လက်ဘနွန်ရဲ့ အခြေအနေကတော့ အဲဒီလိုပါပဲ။ ကျနော်တို့အနေနဲ့ ဟစ်ဇ်ဘိုလာအဖွဲ့ကို လက်နက် ဖြုတ်သိမ်း နိုင်ခဲ့မယ်ဆိုရင် လက်ဘနွန်ပြည်သူတွေဟာ သူတို့နိုင်ငံကို သူတို့ ပြန်ပြီး ပိုင်ဆိုင်သွားပါလိမ့်မယ်”ဟု ဟာလေက ပြောသည်။

 ဟစ်ဇ်ဘိုလာ ခေါင်းဆောင်တစ်ဦး သတင်းစာရှင်းလင်းပွဲလုပ်နေစဉ်

ဟစ်ဇ်ဘိုလာအဖွဲ့အား လက်နက် ဖြုတ်သိမ်းစေရန် အဓိကကျသည့် အချက်မှာ အီရန်၏ ဩဇာလွှမ်းမိုးမှုကို လျှော့ချရေးနှင့် ဟစ်ဇ်ဘိုလာအဖွဲ့အား ငွေကြေးထောက်ပံ့မှုများကို ရပ်တန့်ရေးဖြစ်ကြောင်း ဟာလေက တူရကီ၊ လက်ဘနွန်၊ ယူအေအီးနှင့် အစ္စရေးနိုင်ငံများသို့ သွားရောက်သည့် ခရီးစဉ်အတွင်း အစ္စတန်ဘူလ် (Istanbul) သို့ ရောက်ရှိချိန်တွင် ပြောကြားခဲ့သည်။

အမေရိကန်နှင့် အနောက်နိုင်ငံများ၏ ပိတ်ဆို့မှုများ ချမှတ်ခံထားရသည့် အီရန်သည် တရုတ်၊ ရုရှားနှင့် ယူအေအီး အပါအဝင် ဒေသတွင်းနိုင်ငံများနှင့် ဆက်ဆံရေးများ ပိုမိုနီးစပ်လာခဲ့သည်။

အမေရိကန်၏ မဟာမိတ်ဖြစ်သည့် အစ္စရေးကမူ ဟစ်ဇ်ဘိုလာအဖွဲ့သည် လွန်ခဲ့သည့်နှစ်က အပစ်အခတ်ရပ်စဲရေး သဘောတူညီမှု ရယူထားသည့်တိုင် လက်ဘနွန်တွင် စစ်အင်အားကို ပြန်လည်ထူထောင်ရန် ကြိုးပမ်းနေကြောင်း ပြောကြားခဲ့သည်။

Source: ရိုက်တာ

CNI International News

အန်ကာရာ၊ နိုဝင်ဘာ ၁၀

ယူကရိန်းကို ရုရှားက ဝင်ရောက် တိုက်ခိုက်ခဲ့သည့် စစ်ပွဲသည် ဂျာမနီ၏ လုံခြုံရေးမူဝါဒကို ပြန်လည်သုံးသပ် စေခဲ့ပြီး တူရကီနှင့် ဂျာမနီတို့ကြား ကာကွယ်ရေးပူးပေါင်းဆောင်ရွက်မှုသည် ပိုမိုနီးစပ်လာကြောင်း DW သတင်း ဝက်ဘ်ဆိုက်တွင် ဖော်ပြခဲ့သည်။

ဂျာမနီသည် ယူကရိန်းကို ထောက်ပံ့ပေးနေချိန်တွင် တစ်ဖက်ကလည်း ၎င်း၏ ကိုယ်ပိုင်ကာကွယ်ရေး စွမ်းဆောင် ရည်များကို တိုးမြှင့်ရန် ကြိုးပမ်းနေသည်။ 

“ယူကရိန်းစစ်ပွဲက နေတိုးအဖွဲ့ဟာ လက်နက်ထုတ်လုပ်မှု မလုံလောက်ဘူးဆိုတာကို ပြသခဲ့ပါတယ်။ စစ်ပွဲ စတင် ခဲ့ချိန်ကတည်းက ဥရောပနိုင်ငံတွေဟာ သူတို့ရဲ့ ကာကွယ်ရေးပစ္စည်း ထုတ်လုပ်နိုင်စွမ်းကို တိုးမြှင့်ဖို့ ကြိုးပမ်းခဲ့ပါ တယ်”ဟု တူရကီ၏ ကာကွယ်ရေး ကျွမ်းကျင်သူ ကက်ဂလာ ကာ့ခ် (Caglar Kurc) က ပြောကြားခဲ့သည်။

ထို့ကြောင့် ဂျာမနီသည် ကာကွယ်ရေး မိတ်ဖက်သစ်များ ရှာဖွေရာတွင် နေတိုးမဟာမိတ် တူရကီကို သတိထားမိ ခဲ့ပုံပေါ်သည်။

ရုရှားက ယူကရိန်းကို တိုက်ခိုက်လို့ ပျက်စီးနေတဲ့ အဆောက်အဦကို တွေ့ရစဉ်

အောက်တိုဘာလ ကုန်ပိုင်းက ဂျာမနီဝန်ကြီးချုပ် ဖရိုင်းဒရစ်ချ် မာ့ဇ် (Friedrich Merz) နှင့် တူရကီသမ္မတ အာဒိုဂန်(Recep Tayyip Erdogan) တို့၏ တွေ့ဆုံမှုတွင်လည်း ကာကွယ်ရေးကဏ္ဍကို အဓိကထား ဆွေးနွေးခဲ့ ကြသည်။

တူရကီသမ္မတ အာဒိုဂန်ကလည်း တူရကီသည် ဂျာမနီနှင့် ဆက်လက်ပြီး အနီးကပ် ပူးပေါင်းဆောင်ရွက် သွားမည် ဟု ပြောကြားခဲ့သည်။

“နှစ်နိုင်ငံ ကာကွယ်ရေး စက်မှုလုပ်ငန်းတွေ အပြန်အလှန် ပူးပေါင်းဆောင်ရွက် နိုင်မယ်ဆိုရင် ကျနော်တို့ ဝမ်းသာ မိမှာပါ” ဟု ဂျာမနီနိုင်ငံခြားရေးဝန်ကြီး ဂျိုဟန် ဝါဒီဖူလ် (Johann Wadephul) က မကြာသေးမီ သီတင်းပတ်များ အတွင်း အန်ကာရာ (Ankara) သို့ သွားရောက်သည့် ခရီးစဉ်အတွင်း ပြောကြားခဲ့သည်။

ပထဝီနိုင်ငံရေး အခြေအနေများကြောင့် ဂျာမနီ၏ ကွန်ရက်သည် ကျဉ်းမြောင်းလာခဲ့ကြောင်း ဂျာမန်စစ်တပ်၏ လက်နက်များ ဝယ်ယူရေးရုံးမှ အမည်မဖော်လိုသည့် ထိပ်သီးအရာရှိတစ်ဦးက ပြောကြားခဲ့သည်။

တူရကီသမ္မတ အာဒိုဂန်နဲ့ ဂျာမနီဝန်ကြီးချုပ် ဖရိုင်းဒရစ်ချ် မာ့ဇ်ကို တွေ့ရစဉ် 

“နေတိုးအဖွဲ့ဟာ ပထဝီနိုင်ငံရေး နယ်ပယ်မှာ အလုံးစုံ မတူကွဲပြားတဲ့ အခန်းကဏ္ဍကနေ ပါဝင်ရမယ်ဆိုတာ ရှင်းနေပါပြီ။ နေတိုးအဖွဲ့ရဲ့ ဆက်ဆံရေး တိုးတက်ပြောင်းလဲမှု၊ ယူကရိန်းစစ်ပွဲနဲ့ တရုတ်ရဲ့ တိုးတက်ပြောင်းလဲမှု တွေကို ထောက်ရှုပြီး ကမ္ဘာကြီးဟာ ကျဉ်းသထက် ပိုကျဉ်းလာခဲ့တာကိ တွေ့ရမှာဖြစ်ပါတယ်” ဟု ၎င်းက ပြော ကြားခဲ့သည်။

လက်ရှိတွင် တူရကီနိုင်ငံသည် ဂျာမနီအတွက် ခိုင်မာသည့် မိတ်ဖက်နိုင်ငံဖြစ်ပြီး တစ်နိုင်ငံနှင့်တစ်နိုင်ငံ မှီခိုနိုင် ကြောင်း ထိုအမည်မဖော်လိုသော အရာရှိက ပြောကြားခဲ့သည်။

တူရကီသည် နေတိုးအဖွဲ့ထဲတွင် အမေရိကန်ပြီးလျှင် စစ်အင်အားအကြီးဆုံး နိုင်ငံဖြစ်သည်။

Source: DW

CNI International News

ဝါရှင်တန်၊ နိုဝင်ဘာ ၁၀

ဆီးရီးယားယာယီသမ္မတ အာမက် အယ် ရှာရား (Ahmad al-Sharaa) သည် နိုဝင်ဘာ ၈ ရက်က အမေရိကန်သို့ ရောက်ရှိလာခဲ့ပြီး အမေရိကန်သမ္မတ ဒေါ်နယ်ထရမ့် (Donald Trump) နှင့် အစည်းအဝေး ပြုလုပ်ရန် ပြင်ဆင်နေ ကြောင်း DW သတင်းဝက်ဘ်ဆိုက်တွင် ဖော်ပြခဲ့သည်။

ကုလသမဂ္ဂလုံခြုံရေးကောင်စီက ရှာရားနှင့် ဆီးရီးယား အစိုးရအဖွဲ့အပေါ် ချမှတ်ထားသည့် ပိတ်ဆို့မှုများကို ပြန်လည် ရုပ်သိမ်းပေးခဲ့သည်။

ထို့နောက် အမေရိကန်ကလည်း ရှာရားကို အကြမ်းဖက် ပိတ်ဆို့မှုစာရင်းမှ ဖယ်ရှားခဲ့ပြီးနောက် တစ်ရက်အကြာ တွင် ရှာရားသည် ဝါရှင်တန်သို့ ရောက်ရှိလာခဲ့ခြင်း ဖြစ်သည်။

ရှာရားသည် အမေရိကန်က အကြမ်းဖက်အဖွဲ့အဖြစ် သတ်မှတ်ထားသည့် အယ်ကေဒါအဖွဲ့နှင့် အဆက်အသွယ် ရှိခဲ့ဖူးပြီး ပြီးခဲ့သည့်နှစ်က အာဆတ် (Bashar Assad) အစိုးရအဖွဲ့ကို ဖြုတ်ချခဲ့သည့် ဟာရာ တာဟရိ အယ် ရှား (Hayat Tahrir al-Sham-HTS) အဖွဲ့ကို ဦးဆောင်ခဲ့သူ ဖြစ်သည်။

၂၀၂၄ ခုနှစ်၊ ဒီဇင်ဘာလက ရှာရား၏ လက်နက်ကိုင်အဖွဲ့သည် အာဆတ် အစိုးရအဖွဲ့ကို ဖြုတ်ချခဲ့ပြီးနောက် မကြာမီ အချိန်အတွင်းမှာပင် အမေရိကန်က ရှာရားအား ဖမ်းဆီးရန် ဒေါ်လာ ၁၀ သန်း ဆုကြေးထုတ်ထားသည့် ကြေညာချက်ကို ပြန်လည်ရုပ်သိမ်းပေးခဲ့သည်။

ထို့နောက် ယခုနှစ် မေလတွင် ထရမ့်က ဆီးရီးယားအပေါ် ချမှတ်ထားသည့် အမေရိကန်၏ ပိတ်ဆို့မှုများကို အဆုံးသတ်ရန် သမ္မတ အုပ်ချုပ်ရေးအမိန့်ကို လက်မှတ်ရေးထိုးခဲ့ပြီး ဆော်ဒီ၌ ပြုလုပ်သော ဒေသတွင်း အစည်းအဝေး တစ်ခုမှာ ရှာရားနှင့် ပထမဆုံးအကြိမ် သီးသန့်တွေ့ဆုံခဲ့သည်။

ဆော်ဒီမင်းသား၊ သမ္မတ ဒေါ်နယ်ထရမ့်နဲ့ သမ္မတ ရှာရားကို တွေ့ရစဉ် 

ရှာရားသည် စက်တင်ဘာလကလည်း နယူးယောက်သို့ ရောက်ရှိခဲ့ပြီး ဆယ်စုနှစ် များစွာအတွင်း ကုလသမဂ္ဂ အထွေထွေ ညီလာခံတွင် မိန့်ခွန်းပြောခဲ့သည့် ပထမဆုံး ဆီးရီးယားသမ္မတအဖြစ် မှတ်တမ်းဝင်ခဲ့သည်။

ယခုခရီးစဉ်တွင်လည်း ရှာရားသည် ဆီးရီးယားနိုင်ငံ လွတ်လပ်ရေးရသည့် ၁၉၄၆ ခုနှစ်နောက်ပိုင်း အိမ်ဖြူတော်သို့ ရောက်ရှိသည့် ပထမဆုံး ဆီးရီးယားသမ္မတအဖြစ် မှတ်တမ်းဝင်မည်ဖြစ်သည်။

ရှာရားနှင့် ထရမ့်တို့သည် နိုဝင်ဘာ ၁၀ ရက်တွင် အိမ်ဖြူတော်၌ အစည်းအဝေး ပြုလုပ်ရန် စီစဉ်ထားသည်။

ယခုလ အစောပိုင်းက ဆီးရီးယားနိုင်ငံဆိုင်ရာ အမေရိကန်သံတမန် တွမ်ဘာရက် (Tom Barrack) ကမူ ရှာရားနှင့် ထရမ့်တို့သည် အိုင်အက်စ် စစ်သွေးကြွအဖွဲ့ကို တိုက်ခိုက်နေသည့် အမေရိကန်ဦးဆောင်သော မဟာမိတ်အင်အား စုတွင် ပူးပေါင်းရေးအတွက် သဘောတူစာချုပ်တစ်ခု လက်မှတ်ရေးထိုးနိုင်မည်ဟု မျှော်လင့်ကြောင်း ပြောကြားခဲ့ သည်။

အမေရိကန်သည် ဆီးရီးယား၏ ဒမတ်စကတ် (Damascus) အနီးတွင် စစ်စခန်းတစ်ခု ထူထောင်ရန် စီစဉ်နေပြီး ဆိးရီးယားနှင့် အစ္စရေးကြား အခြေအနေကို စောင့်ကြည်ရန်နှင့် လူသားချင်း စာနာထောက်ထားမှုဆိုင်ရာ အကူအညီပေးရန် ရည်ရွယ်ထားကြောင်း အမည်မဖော်လိုသည့် သတင်းရင်းမြစ်တစ်ခုက ပြောကြားခဲ့သည်။

Source: DW

CNI International News

ဘေဂျင်း၊ နိုဝင်ဘာ ၈

တရုတ်နိုင်ငံ၏ တတိယမြောက် လေယာဉ်တင်သင်္ဘောဖြစ်သည့် Fujian အမည်ရှိ သင်္ဘောသည် ပင်လယ်ပြင် တွင် စမ်းသပ်မောင်းနှင်မှုများ ပြုလုပ်ခဲ့ပြီးနောက် တရုတ်ရေတပ်တွင် စတင် တာဝန်ထမ်းဆောင်ပြီဖြစ်ကြောင်း နိုင်ငံပိုင်မီဒီယာက နိုဝင်ဘာ ၇ ရက်၌ ဖော်ပြခဲ့သည်။

ထိုလေယာဉ်တင် သင်္ဘောသည် ကမ္ဘာ့အကြီးဆုံး ရေတပ်ကို ပိုင်ဆိုင်ထားသည့် တရုတ်၏ စွမ်းဆောင်ရည်များအား ပိုမိုချဲ့ထွင်ရာတွင် အထောက်အကူ ဖြစ်စေလိမ့်မည်ဟု ကျွမ်းကျင်သူများက ပြောကြားခဲ့သည်။

Fujian လေယာဉ်တင်သင်္ဘောကို နိုဝင်ဘာ ၅ ရက်က တရုတ်၏ တောင်ပိုင်း ဟိုင်နန် (Hainan) ကျွန်းပေါ်ရှိ ရေတပ်စခန်းတွင် တပ်တော်ဝင် အခမ်းအနား ပြုလုပ်ခဲ့သည်။

ထိုအခမ်းအနားကို တရုတ်သမ္မတ ရှီကျင့်ဖျင် (Xi Jinping) နှင့် အခြားထိပ်သီး ခေါင်းဆောင်များ တက်ရောက်ခဲ့ သည်ဟု နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့သည်။

တရုတ်၏ ပထမဆုံး လေယာဉ်တင် သင်္ဘောသည် ဆိုဗီယက်လုပ် Liaoning အမည်ရှိ လေယာဉ်တင် သင်္ဘော ဖြစ်ပြီး ဒုတိယလေယာဉ်တင် သင်္ဘောသည် ဆိုဗီယက်ဒီဇိုင်းကို အခြေခံထားပြီး တရုတ်တွင် တည်ဆောက်သည့် Shandong လေယာဉ်တင်သင်္ဘော ဖြစ်သည်။

တရုတ်ရဲ့ လေယာဉ်တင်သင်္ဘောပေါ်မှာ သမ္မတရှီကျင့်ဖျင်ကို တွေ့ရစဉ်

Fujian သည် တရုတ်၏ တတိယမြောက် လေယာဉ်တင် သင်္ဘောဖြစ်ပြီး တရုတ်တွင် ဒီဇိုင်းဆွဲပြီး တည်ဆောက်ခဲ့ သည့် ပထမဆုံး လေယာဉ်တင်သင်္ဘော ဖြစ်သည်။

ထိုလေယာဉ်တင် သင်္ဘောသည် ၂၀၃၅ ခုနှစ် မတိုင်မီ စစ်တပ်ကို အဆင့်မြှင့်တင် မွမ်းမံရန် ရည်ရွယ်ထားသည့် တရုတ်သမ္မတ ရှီ၏ ရည်မှန်းချက် ကြီးမားသော စစ်ရေး ပြုပြင်ပြောင်းလဲမှု၏ ပြယုဂ်တစ်ခုလည်း ဖြစ်သည်။

“လေယာဉ်တင် သင်္ဘောတွေက တရုတ်ကို  တစ်ကမ္ဘာလုံးမှာ စစ်ဆင်ရေး ပြုလုပ်နိုင်တဲ့ ရေတပ်အင်အားကြီး နိုင်ငံ အဖြစ် ရည်မှန်းထားတဲ့ တရုတ်ခေါင်းဆောင်တွေရဲ့ အစီအစဉ်တွေအတွက် အဓိက ကျပါတယ်”ဟု မဟာဗျူဟာ နှင့် နိုင်ငံတကာ လေ့လာရေးစင်တာမှ အာရှပင်လယ်ရေကြောင်းဆိုင်ရာ ပွင့်လင်းမြင်သာမှု အစီအစဉ်၏ ဒါရိုက်တာ ဂရက် ပိုလင်း (Greg Poling) က ပြောကြားခဲ့သည်။

တရုတ်ရေတပ်အတွက် ရည်မှန်းချက် တစ်ခုမှာ တောင်တရုတ်ပင်လယ်၊ အရှေ့တရုတ်ပင်လယ်၊ ပင်လယ်ဝါတို့၏ ရေပြင်များကို ဩဇာလွှမ်းမိုးရန် ဖြစ်သည်ဟုလည်း ၎င်းက ဆိုသည်။

သို့သော် ပစိဖိတ်ဒေသ အတွင်းဘက်ကို နက်ရှိုင်းစွာ ဝင်ရောက်ပြီး အမေရိကန်၏ အဓိက စစ်စခန်းများ တည်ရှိ သည့် ဂူအမ် (Guam) ကျွန်းနှင့် အခြားရေပြင် နယ်နိမိတ်များတွင်လည်း ရေတပ်အင်အား ပြိုင်ဆိုင်မှုကို မြှင့်တင် ရန် ရည်ရွယ်ထားသည်ဟု ပိုလင်းက ပြောကြားခဲ့သည်။ 

Source: အေပီ

CNI International News

ဂျေရုဆလင်၊ နိုဝင်ဘာ ၈

အစ္စရေးစစ်တပ်က လက်ဘနွန်တောင်ပိုင်းတွင် နိုဝင်ဘာ ၆ ရက်က လေကြောင်းတိုက်ခိုက်မှု လုပ်ဆောင်ခဲ့ ကြောင်း ရိုက်တာမှ ဖော်ပြခဲ့သည်။

နေရာ အများအပြားတွင် ဒေသခံများကို ရွှေ့ပြောင်းရန် အမိန့်များ ထုတ်ပြန်ခဲ့ပြီးနောက် လေကြောင်း တိုက်ခိုက် ခဲ့ခြင်းဖြစ်သည်။

လက်ဘနွန် လက်နက်ကိုင်အဖွဲ့ ဟစ်ဇ်ဘိုလာသည် ထိုနေရာတွင် ၎င်း၏ စစ်အင်အားကို ပြန်လည် တည်ဆောက် ရန် ကြိုးပမ်းနေခြင်းကြောင့် လေကြောင်း တိုက်ခိုက်ခဲ့ခြင်းဖြစ်ကြောင်း အစ္စရေးစစ်တပ်က ထုတ်ပြန်ခဲ့သည်။

အီရန်၏ ကျောထောက်နောက်ခံကို ရရှိထားသည့် ဟဇ်ဘိုလာအဖွဲ့နှင့် အစ္စရေးကြား တစ်နှစ်ကျော်ကြာ တိုက်ပွဲ များကို အဆုံးသတ်ရန် ပြီးခဲ့သည့်နှစ်က အပစ်အခတ်ရပ်စဲရေး သဘောတူညီချက် ရရှိခဲ့သည်။

သို့သော် လက်ဘနွန်နိုင်ငံ တောင်ပိုင်းရှိ ဟစ်ဇ်ဘိုလာအဖွဲ့၏ နေရာများကို ရှင်းလင်းရန် လက်ဘနွန်စစ်တပ်က လပေါင်းများစွာ ကြိုးပမ်းမှုများ ပြုလုပ်ပြီးနောက်  တိုက်ခိုက်မှု အသစ်များ ပေါ်ပေါက်လာခြင်း ဖြစ်သည်။

အစ္စရေးရဲ့ လေကြောင်း တိုက်ခိုက်မှုကို တွေ့ရစဉ်

နေ့လယ်ခင်း ဗုံးကြဲ တိုက်ခိုက်မှုအတွင်း လူတစ်ဦး ဒဏ်ရာရရှိခဲ့ပြီး အစောပိုင်း လေကြောင်း တိုက်ခိုက်မှုအတွင်း လူတစ်ဦး သေဆုံးခဲ့ကြောင်း အစောပိုင်းရရှိသည့် အချက်အလက်ပေါ် မူတည်ပြီး လက်ဘနွန် ကျန်းမာရေးဝန်ကြီး ဌာနက ထုတ်ပြန်ခဲ့သည်။

အစ္စရေးစစ်တပ် ပြောရေးဆိုခွင့်ရှိသူ အဗီချေးအေဒရာရီ (Avichay Adraee) က နိုဝင်ဘာ ၆ ရက် နေ့လယ် ၃ နာရီ အချိန်တွင် ရွှေ့ပြောင်းမိန့်သုံးခု ဆက်လက် ထုတ်ပြန်ခဲ့ပြီး နောက်ပိုင်းတွင် နောက်ထပ် ရွှေ့ပြောင်းမိန့်နှစ်ခု ဆက်လက် ထုတ်ပြန်ခဲ့သည်။

အစ္စရေးစစ်တပ်က ရွှေ့ပြောင်းမိန့် ထုတ်ပြန်ထားသော နေရာများမှ မီတာ ၅၀၀ အကွာအဝေးတွင် နေထိုင်ကြရန် လည်း ဒေသခံများကို တိုက်တွန်းခဲ့သည်။

လက်ဘနွန် အရပ်ဘက် ကာကွယ်ရေးက အရပ်သားများကို ရွှေ့ပြောင်းမှုတွင် ကူညီပေးခဲ့ကြကြောင်း လက်ဘနွန် မီဒီယာတွင် ဖော်ပြထားသည်။

“ကျနော်တို့ အရမ်းအန္တရာယ်ရှိတဲ့ အခြေအနေထဲ ရောက်နေပါတယ်။ ကိစ္စတွေအားလုံးက ဒီအတိုင်း ဆက်ဖြစ်နေ မယ်ဆိုရင် မျှော်လင့်ချက်တွေ အားလုံး ဆုံးရှုံးကုန်ပါလိမ့်မယ်။ ဒီကိစ္စတွေရဲ့ နောက်ဆက်တွဲက ဘာတွေ ဖြစ်လာ နိုင်မလဲဆိုတာ ဘယ်သူမှ မသိပါဘူး”ဟု တေရာဒက်ဘာ မြို့တော်ဝန် ဖာရစ်နာနွတ်(Farid Nahnouh) က ပြော ကြားခဲ့သည်။

Source: ရိုက်တာ

CNI International News

ဒမတ်စကတ်၊ နိုဝင်ဘာ ၈

ဆီးရီးယားသမ္မတ အာမက် အယ်လ် ရှာရား (Ahmad al-Sharaa) နှင့် ၎င်း၏ အစိုးရအဖွဲ့ဝင်များအပေါ် ချမှတ် ထားသည့် ပိတ်ဆို့မှုများကို ပြန်လည်ရုပ်သိမ်းရန် ကုလသမဂ္ဂလုံခြုံရေးကောင်စီက နိုဝင်ဘာ ၆ ရက်တွင် မဲခွဲ ဆုံးဖြတ်ပြီး အတည်ပြုခဲ့သည်ဟု အေပီမှ ဖော်ပြထားသည်။

အယ်လ်ရှာရားသည်  အိမ်ဖြူတော်သို့ သမိုင်းဝင် ခရီးစဉ်အဖြစ် ရောက်ရှိမလာမီ ရက်ပိုင်းအလိုတွင် ကုလသမဂ္ဂက ပိတ်ဆို့မှုများကို ရုပ်သိမ်းပေးရန် အတည်ပြုခဲ့ခြင်း ဖြစ်သည်။

ကုလသမဂ္ဂ လုံခြုံရေးကောင်စီ၏ အဖွဲ့ဝင် ၁၄ နိုင်ငံသည် အယ်လ်ရှာရားနှင့် ဆီးရီးယား ပြည်ထဲရေးဝန်ကြီး အန်နက်စ် ဟက်ဆန် ခါတက် (Anas Hasan Khattab) တို့အပေါ် ချမှတ်ထားသည့် ပိတ်ဆို့မှုများကို ရုပ်သိမ်းရေး အတွက် ထောက်ခံမဲပေးခဲ့ကြကာ တရုတ်က မဲပေးခဲ့ခြင်းမရှိပေ။

ယခုထောက်ခံမဲများအရ လုံခြုံရေးကောင်စီသည် ဆီးရီးယားတွင် ၂၀၂၄ ခုနှစ်က ဖြုတ်ချခံခဲ့ရသည့် ဘာရှာ အာဆတ် ( Bashar Assad) အစိုးရနောက်ပိုင်း ခေတ်သစ်တစ်ခု ဖွင့်လှစ်နိုင်ခဲ့သည့် အခြေအနေကို အသိအမှတ် ပြုကြောင်း နိုင်ငံရေး လက္ခဏာတစ်ခု ပေးပို့ရာရောက်ကြောင်း ကုလသမဂ္ဂဆိုင်ရာ အမေရိကန်သံအမတ် မိုက်ဝေါ့ဇ် (Mike Waltz) က ပြောကြားခဲ့သည်။

ဆီးရီးယားသမ္မတ အယ်လ်ရှားရာနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ် 

အမေရိကန်အရာရှိများသည် အိမ်ဖြူတော်တွင် အမေရိကန်သမ္မတ ဒေါ်နယ်ထရမ့် (Donald Trump) က ဆီးရီးယားသမ္မတ အယ်လ်ရှာရားကို လက်ခံတွေ့ဆုံမည့် နိုဝင်ဘာ ၁၀ ရက် မတိုင်မီ ဆီးရီးယားအပေါ် ပိတ်ဆို့မှု များ ရုပ်သိမ်းရေးကို အတည်ပြုသည့် ကြေညာချက် ထုတ်ပြန်နိုင်ရန် ကြိုးပမ်းခဲ့ကြခြင်းဖြစ်သည်။

အယ်ရှာရား၏ ခရီးစဉ်သည် ၁၉၄၆ ခုနှစ်တွင် ဆီးရီးယား လွတ်လပ်ရေး ရပြီးနောက် ဝါရှင်တန်သို့ သွားရောက် သည့် ပထမဆုံး ဆီးရီးယားသမ္မတ တစ်ဦး၏ ခရီးစဉ်အဖြစ် မှတ်တမ်းဝင်မည်ဖြစ်သည်။

ဆီးရီးယားနိုင်ငံခြားရေးဝန်ကြီးဌာနကလည်း ပိတ်ဆို့မှုများကို ရုပ်သိမ်းသည့် ကုလသမဂ္ဂ၏ မဲခွဲဆုံးဖြတ်မှုကို ကြိုဆိုကြောင်းနှင့် ထိုမဲခွဲဆုံးဖြတ်မှုသည် သမ္မတ အယ်ရှာရား၏ ခေါင်းဆောင်မှုအပေါ် ယုံကြည်မှု မြင့်တက်လာ သည့် အခြေအနေကို ထင်ဟပ်စေခဲ့ကြောင်း ထုတ်ပြန်ခဲ့သည်။

ထို့ပြင် ထိုမဲခွဲဆုံးဖြတ်မှုသည် ဆီးရီးယားသံတမန်ရေး အားထုတ်ကြိုးပမ်းမှု၏ အောင်ပွဲတစ်ခုဖြစ်ပြီး ဒေသတွင်း ဆီးရီးယား၏ အဓိကကျသည့် အခန်းကဏ္ဍကို နိုင်ငံတကာ၏ အသိအမှတ်ပြုမှုကို ပြန်လည်ရရှိအောင် ကြိုးပမ်း ရာတွင် အောင်မြင်ခဲ့ခြင်းလည်း ဖြစ်ကြောင်း ထုတ်ပြန်ချက်တွင် ဖော်ပြခဲ့သည်။

Source: အေပီ

CNI International News

ဘန်ကောက်၊ နိုဝင်ဘာ ၇

ထိုင်းတော်ဝင်ကြည်းတပ် (RTA) သည် ထိုင်း-ကမ္ဘောဒီးယား နယ်စပ်တစ်လျှောက် လက်နက်ကြီးများ ရုပ်သိမ်း နေသည့် ရက်များအတွင်း မြေမြှုပ်မိုင်း ၂ လုံးကို ရှာဖွေတွေ့ရှိခဲ့ပြီး ကမ္ဘောဒီးယား စစ်သားများနှင့် ယာယီရင်ဆိုင် တွေ့မှုဖြစ်ပွားခဲ့ကြောင်း The Nation မှ ဖော်ပြခဲ့သည်။

နိုဝင်ဘာ ၂ ရက်နှင့် ၃ ရက်တွင် ကင်းလှည့်မှုများ ပြုလုပ်နေချိန်အတွင်း ထိုဖြစ်စဉ်များ ဖြစ်ပွားခဲ့ခြင်းဖြစ်ကြောင်း RTA က ထုတ်ပြန်ခဲ့သည်။

ထိုင်း၏ နယ်စပ်ဒေသ တစ်လျှောက်တွင် အမှတ် ၁ နှင့် အမှတ် ၂ စစ်ဒေသမှ တပ်ဖွဲ့ဝင်များသည် တည်မြဲနေရာ များ၌ ဆက်လက် တပ်စွဲထားကြောင်း RTA ပြောရေးဆိုခွင့်ရှိသူ ဗိုလ်ချုပ် ဝင်ထိုင်း ဆူဗာရီ (Winthai Suvaree) က ပြောကြားခဲ့သည်။

ထိုင်း-ကမ္ဘောဒီးယားနယ်စပ်ကို တွေ့ရစဉ်

ထိုင်းနှင့်ကမ္ဘောဒီးယားကြား ပူးတွဲဆောင်ရွက်ရေး အစီအစဉ်နှင့်အညီ လွန်ခဲ့သည့် ၅ ရက်အတွင်း နယ်စပ်ဒေသရှိ လက်နက်ကြီးများကို ပြန်လည်ရုပ်သိမ်းပြီးစီးခဲ့သည့်တိုင်  စစ်သားများကို ထပ်မံတပ်စွဲထားခြင်း ဖြစ်သည်။

ထိုစစ်သားများသည် နှစ်နိုင်ငံကြား အလွှာစုံ အစည်းအဝေးများ ပြုလုပ်ခဲ့ချိန်အတွင်း ရရှိခဲ့သည့် သဘောတူညီချက် နှင့်အညီ ငြိမ်းချမ်းရေးကို ထိန်းသိမ်းရန်အတွက် ကင်းလှည့်မှုများ ဆက်လက် ပြုလုပ်မည်ဟု ဝင်ထိုင်းက ပြော သည်။

လက်နက်ကြီးများ ပြန်လည်ရုပ်သိမ်းသည့် ပထမအဆင့်ကို အာဆီယံ၏ လေ့လာစောင့်ကြည့်ရေးအဖွဲ့၏ သဘော တူညီချက်နှင့် အတည်ပြုချက်အရ ပြုလုပ်ခဲ့ခြင်း ဖြစ်သည်ဟုလည်း ၎င်းက ဆိုသည်။

နိုဝင်ဘာ ၂ ရက်နှင့် ၃ ရက်က ထိုင်းစစ်သားများသည် အူဘွန် ရတ်ချာသာနီ (Ubon Ratchathani) ပြည်နယ် Nam Yuen ခရိုင်၏ နယ်စပ်ဒေသတွင် ကင်းလှည့်နေချိန်အတွင်း PMN-2 မြေမြှုပ်မိုင်း ၂ လုံးကို တွေ့ရှိခဲ့ခြင်းဖြစ်သည်။

ဒုတိယဖြစ်စဉ်မှာ နိုဝင်ဘာ ၃ ရက်က ထိုင်းစစ်သားများသည် Chong Bok Pass နယ်စပ် လမ်းကြောင်းတွင် ကင်းလှည့်သည့် လမ်းကြောင်းကို ဝါးများဖြင့် ပိတ်ဆို့နေသော ကမ္ဘောဒီးယား စစ်သားများနှင့် ယာယီစကားများ ခဲ့ကြောင်း ထိုင်းက ပြောကြားခဲ့သည်။

နှစ်နိုင်ငံစစ်သားများကြား အချေအတင် ပြောဆိုခဲ့ပြီးနောက် ကမ္ဘောဒီးယား စစ်သားများက ၎င်းတို့ ပိတ်ဆို့ ထားသည့် အကာအရံများကို ပြန်လည် ဖယ်ရှားပေးရန် သဘောတူခဲ့သည်ဟု RTA က ထုတ်ပြန်ခဲ့သည်။

Source: The Nation