CNI International News

ကာရာကက်စ်၊ ဖေဖော်ဝါရီ ၂၃

အမေရိကန်အစိုးရ၏ ဖိအားပေးမှုများကြောင့် ဗင်နီဇွဲလားတွင် ရှိနေသည့် ကျူးဘားလုံခြုံရေး အကြံပေးတပ်ဖွဲ့ ဝင်များနှင့် ဆရာဝန်များသည် ဗင်နီဇွဲလားနိုင်ငံမှ စတင်ထွက်ခွာနေပြီဖြစ်ကြောင်း ထိုအကြောင်းအရာနှင့် နီးစပ် သည့် သတင်းရင်းမြစ် ၁၁ ခုက ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ကျူးဘားနှင့် ဗင်နီဇွဲလားကြား လက်ဝဲယိမ်း မဟာ မိတ် ဆက်ဆံရေးကို အဆုံးသတ်ရန် ဗင်နီဇွဲလားယာယီသမ္မတ ဒယ်လ်စီ ရိုဒရီဂွက်ဇ် (Delcy Rodriguez) ၏ အစိုးရအဖွဲ့ကို ဖိအားများ ပေးနေသည်။

ထို့နောက် ဗင်နီဇွဲလားရှိ ကျူးဘားလုံခြုံရေးတပ်ဖွဲ့ဝင်များ ပြန်လည်ထွက်ခွာ နေကြခြင်းဖြစ်သည်။
ရိုဒရီဂွက်ဇ်သည် ၎င်း၏ လုံခြုံရေးအတွက် ဗင်နီဇွဲလား သက်တော်စောင့်များကိုသာ ယုံကြည် ခန့်အပ်ထားကြောင်း သတင်းရင်းမြစ် ၄ ခုက ပြောကြားခဲ့သည်။

ယခင် ဗင်နီဇွဲလားသမ္မတ နီကိုလပ်စ် မာဒူရို ( Nicolas Maduro) နှင့် ကွယ်လွန်သွားပြီဖြစ်သည့် သမ္မတဟောင်း ဟူဂိုချာဗက်ဇ် (Hugo Chavez) တို့ကမူ ၎င်းတို့၏ လုံခြုံရေးအတွက် ကျူးဘား လက်ရွေးစင် တပ်ဖွဲ့များကိုသာ သက်တော်စောင့်များအဖြစ် ခန့်အပ်ခဲ့သည်။

ဗင်နီဇွဲလားလုံခြုံရေးတပ်ဖွဲ့ကို တွေ့ရစဉ်

အမေရိကန်သည် ဇန်နဝါရီ ၃ ရက်နေ့က ဗင်နီဇွဲလားနိုင်ငံအား တိုက်ခိုက်ခဲ့ပြီး မာဒူရိုကို ဖမ်းဆီးခဲ့သည့် စစ်ဆင် ရေးအတွင်း ကျူးဘားနိုင်ငံသား ၃၂ ဦး သေဆုံးခဲ့ကြောင်း ကျူးဘားအစိုးရက ထုတ်ပြန်ခဲ့သည်။

ထိုကျူးဘား စစ်သားများနှင့် သက်တော်စောင့်များသည် ၂၀၀၀ ပြည့်နှစ်၏ နောက်ပိုင်း နှစ်များကတည်းက ဗင်နီဇွဲလားနှင့် ကျူးဘားကြား ချုပ်ဆိုခဲ့သည့် လုံခြုံရေးဆိုင်ရာ သဘောတူညီချက်အရ ဗင်နီဇွဲလားတွင် ရောက်ရှိ နေခြင်းဖြစ်သည်။

ထိုအချိန်က ကျူးဘား ထောက်လှမ်းရေး အေးဂျင့်များသည် ဗင်နီဇွဲလား စစ်တပ်တွင်သာမက ပြည်တွင်း အတိုက် အခံများကို နှိမ်နင်းရာတွင် အဓိကကျသည့် ဗင်နီဇွဲလား၏ စစ်ဘက်ဆိုင်ရာ တန်ပြန်ထောက်လှမ်းရေးဌာန (DGCIM) အတွင်း အခိုင်အမာ နေရာယူခဲ့ကြသည်။

ယခုအခါ DGCIM ဌာနအတွင်းရှိ ကျူးဘား အကြံပေးအချို့မှာ ဖယ်ရှားခြင်း ခံခဲ့ရကြောင်း ဗင်နီဇွဲလား ထောက်လှမ်းရေး အရာရှိဟောင်းတစ်ဦးက ဆိုသည်။

ဗင်နီဇွဲလားသမ္မတဟောင်း မာဒူရိုကို တွေ့ရစဉ်

ထို့ပြင် ပြီးခဲ့သည့် သီတင်းပတ်များအတွင်း ကျူးဘား ဆေးဘက်ဆိုင်ရာ ဝန်ထမ်းများနှင့် လုံခြုံရေးအကြံပေး အချို့သည် ဗင်နီဇွဲလားမှ ကျူးဘားနိုင်ငံသို့ လေကြောင်း ခရီးစဉ်များဖြင့် ပြန်လည် ထွက်ခွာသွားခဲ့ကြကြောင်း သတင်းရင်းမြစ် ၂ ခုက အတည်ပြုခဲ့သည်။

ဗင်နီဇွဲလား အာဏာရပါတီနှင့် နီးစပ်သည့် နောက်ထပ် သတင်းရင်းမြစ်တစ်ခုကမူ ကျူးဘား နိုင်ငံသားများသည် အမေရိကန်၏ ဖိအားပေးမှုကြောင့် ယာယီသမ္မတ ရိုဒရီဂွက်ဇ်၏ အမိန့်ဖြင့် ထွက်ခွာနေကြခြင်းဖြစ်သည်ဟု ဆိုသည်။

သို့သော် အခြားသတင်းရင်းမြစ်များကမူ ကျူးဘားတပ်ဖွဲ့များသည် ရိုဒရီဂွက်ဇ်၏ နှင်ထုတ်မှုကြောင့် ထွက်ခွာ ရခြင်း သို့မဟုတ် ၎င်းတို့၏ ကိုယ်ပိုင် သဘောဆန္ဒဖြင့် ထွက်ခွာခြင်း သို့မဟုတ် ကျူးဘားအစိုးရက ပြန်လည် ခေါ်ယူသဖြင့် ထွက်ခွာခြင်းဆိုသည့် တိကျသော အကြောင်းအရင်းကို မသိရသေးကြောင်း ပြောကြားခဲ့သည်။

 ကျူးဘားနှင့် ဗင်နီဇွဲလား အစိုးရများက ယခုကိစ္စနှင့် ပတ်သက်ပြီး မှတ်ချက်ပေးရန် တောင်းဆိုမှုများကို ပြန်လည်ဖြေကြားခြင်း မရှိသေးသော်လည်း နှစ်နိုင်ငံစလုံးက ၎င်းတို့ကြား ဆက်ဆံရေးမှာ ဆက်လက် တည်ရှိ နေဆဲဖြစ်ကြောင်း လူသိရှင်ကြား အတည်ပြုထားကြသည်။

Source: ရိုက်တာ

CNI International News

နယူးဒေလီ၊ ဖေဖော်ဝါရီ ၂၁

အိန္ဒိယနိုင်ငံ၏ အရှေ့မြောက်ပိုင်းဒေသ ပြည်နယ်များတွင် နေထိုင်သူများကို ခွဲခြားဆက်ဆံခြင်း မပြုသင့်ကြောင်း နာမည်ကြီး ဘောလီးဝုဒ် သရုပ်ဆောင် မင်းသားကြီး အာဘ်ရှေး ကူးမားက (Akshay Kumar) ပြောကြားခဲ့သည်ဟု The Indian Express သတင်းဝက်ဘ်ဆိုက်တွင် ဖော်ပြခဲ့သည်။

အိန္ဒိယ၏ ဖျော်ဖြေရေး ရုပ်သံလိုင်း တစ်ခုဖြစ်သော Sony TV မှ ထုတ်လွှင့်ပြသနေသည့် Wheel of Fortune India အစီအစဉ်တွင် အိန္ဒိယအရှေ့မြောက်ပိုင်းမှ ပြိုင်ပွဲဝင် အမျိုးသမီးတစ်ဦးက သူကြုံတွေ့ခဲ့ရသည့် ခွဲခြားဆက်ဆံခံရ သော အကြောင်းများကို ရင်ဖွင့်ခဲ့ပြီးနောက် ကူးမား၏ ပြောကြားချက် ထွက်ပေါ်လာခြင်းဖြစ်သည်။

ကူးမားသည် Wheel of Fortune India အစီအစဉ်ကို တင်ဆက် ပေးနေသူဖြစ်ပြီး ၎င်း၏ ပြက်လုံးများနှင့် ပျော်ရွှင် စရာ အမူအရာများကြောင့် ထိုအစီအစဉ်ကို လူကြိုက်များသည်။

သို့သော် မကြာသေးမီက ပြိုင်ပွဲဝင် အမျိုးသမီးတစ်ဦးက ၎င်း၏ ခွဲခြားဆက်ဆံခံရသည့် အကြောင်းများကို ရင်ဖွင့် ခဲ့ချိန်တွင် ကူးမားသည် စိတ်ထိခိုက်သွားခဲ့ပြီး အိန္ဒိယအရှေ့မြောက်ဒေသ၌ နေထိုင်သူများ ကြုံတွေ့နေရသော ခါးသီးသည့် အမှန်တရားများအကြောင်းကို ပြန်လည် ပြောပြခဲ့သည်။

အိန္ဒိယအရှေ့မြောက်ပိုင်းဒေသသားတွေကို‌ တွေ့ရစဉ်

ထိုအခြေအနေကို တုန့်ပြန်သည့် အနေဖြင့် ကူးမားသည် မဏိပူရ (Manipur) ပြည်နယ်မှ ၎င်း၏ ကိုယ်ပိုင် မိတ်ကပ်ပညာရှင် ကင်မ် (Kin)ကို စင်ပေါ်သို့ ဖိတ်ခေါ်ခဲ့ပြီး ပရိသတ်များနှင့် မိတ်ဆက်ပေးရာတွင် “ကျနော့်ကို မိတ်ကပ်ပြင်ပေးပြီး ဂရုစိုက်ပေးတဲ့ ကောင်လေးတစ်ယောက် ရှိပါတယ်၊ သူကတော့ ဒီမှာပါ၊ ကင်မ် (Kin) ပါ” ဟု ကူးမားက ပြောကြားခဲ့သည်။

ထို့နောက် ကင်မ်က ၎င်း၏ ပုံစံနှင့် ဖြစ်တည်မှုကြောင့် “တရုတ်”၊ “ချင်ကီ (Chinky)” နှင့် “မိုမို (Momo)” စသည့် စကားလုံးများဖြင့် လှောင်ပြောင်ခံရခြင်း၊ စော်ကားပုတ်ခတ် ခံရခြင်းတို့နှင့် ပတ်သက်သည့် ကိုယ်တွေ့ အတွေ့ အကြုံများကို ပြန်လည်ဝေမျှခဲ့သည်။

Chinky ဆိုသည်မှာ တရုတ်မျက်မှေးဆိုသည့် အဓိပ္ပာယ်မျိုးဖြစ်ပြီး Momo ဆိုသည်မှာ အိန္ဒိယအရှေ့မြောက်ပိုင်း သားများ ရောင်းချသည့် ဖက်ထုပ်ကဲ့သို့ စားစရာများကို အစွဲပြုပြီး နှိမ်ခေါ်သည့် စကားလုံးဖြစ်သည်။

 အာဘ်ရှေးကူးမားကို တွေ့ရစဉ်

“ဒီနေ့ ကင်မ် ပြောတာကို နားထောင်ပြီးတဲ့နောက်မှာ ဒီလို ခွဲခြားဆက်ဆံမှုတွေ တကယ် ရှိနေတယ်ဆိုတာ ကျနော် အခိုင်အမာ ယုံကြည်သွားပါပြီ” ဟု ကူးမားက ပြောကြားခဲ့သည်။

“ကျနော် အိန္ဒိယပြည်သူအားလုံးကို ပြောချင်တာကတော့ အရှေ့မြောက်ပိုင်းက လူတွေအပေါ် ခွဲခြားဆက်ဆံမှုတွေ ရှိနေပါတယ်။ သူတို့အားလုံးဟာ အိန္ဒိယနိုင်ငံသားတွေပါ။ ကျနော်၊ ခင်ဗျားတို့နဲ့ ဒီမှာထိုင်နေတဲ့ လူတွေနည်းတူ သူတို့ဟာလည်း အိန္ဒိယနိုင်ငံသားတွေပဲ ဖြစ်ပါတယ်” ဟု ၎င်းက ထပ်လောင်းပြောဆိုခဲ့သည်။

အရှေ့မြောက်ပိုင်းဒေသမှ နိုင်ငံအတွက် ပေးဆပ်ဆောင်ရွက်မှုများကို အလေးပေး ဖော်ပြသည့် အနေဖြင့် ကူးမား က “ဒီနိုင်ငံအတွက် သူတို့တွေရဲ့ ပေးဆပ်မှုတွေ အများကြီး ရှိပါတယ်။ နာဂတပ်ရင်း (Naga Regiment) ဆိုရင် ကာဂေးလ်စစ်ပွဲ (Kargil war) နဲ့ ဘင်္ဂလားဒေ့ရှ် စစ်ပွဲတွေမှာ ပါဝင်ခဲ့ကြတယ်။ သူတို့ဟာ နိုင်ငံအတွက် သွေးမြေ ကျခဲ့ကြသူတွေပါ။ သူတို့ဟာ အိန္ဒိယနိုင်ငံသားတွေပါ” ဟု ကူးမားက ပြောကြားခဲ့သည်။

Source: The Indian Express

CNI International News

ဝါရှင်တန်၊ ဖေဖော်ဝါရီ ၂၁

အီရန်အနေဖြင့် ၎င်း၏ အငြင်းပွားဖွယ် နျူကလီးယား စီမံကိန်းနှင့်ပတ်သက်ပြီး ၁၀ ရက်မှ ၁၅ ရက်အတွင်း သဘောတူညီမှုရယူရန် သို့မဟုတ်ပါက ဆိုးရွားသည့်အရာများ အမှန်တကယ် ဖြစ်ပွားလာမည်ဖြစ်ကြောင်း အမေရိကန်သမ္မတ ဒေါ်နယ်ထရမ့် (Donald Trump) က အီရန်ကို ဖေဖော်ဝါရီ ၁၉ ရက်တွင် ရာဇသံပေး လိုက်သည်ဟု ရိုက်တာမှ ဖော်ပြခဲ့သည်။

အီရန်ကမူ အမေရိကန်အနေဖြင့် အီရန်ကို တိုက်ခိုက်မည်ဆိုပါက ဒေသတွင်းရှိ အမေရိကန် အခြေစိုက် စခန်းများ ကို လက်တုန့်ပြန် တိုက်ခိုက်သွားမည်ဟု ပြန်လည်ခြိမ်းခြောက်ခဲ့သည်။

အမေရိကန်သည် အရှေ့အလယ်ပိုင်းဒေသတွင် စစ်အင်အား ကြီးမားစွာ ဖြန့်ကြက်ချထားသဖြင့် ကြီးမားကျယ်ပြန့် သည့် စစ်ပွဲဖြစ်လာနိုင်သော စိုးရိမ်မှုများကို ပေါ်ပေါက်စေခဲ့သည်။

 အီရန် နိုင်ငံအတွင်း တစ်နေရာကို တွေ့ရစဉ်

ထိုအချိန်မျိုးတွင် ထရမ့်က မတိုးသာမဆုတ်သာ အခြေအနေကို အဆုံးသတ်ရန် အီရန်နှင့် ဆွေးနွေးမှုများသည် အဆင်ပြေ ကောင်းမွန်ကြောင်း ပြောကြားခဲ့သော်လည်း အီရန်အနေဖြင့် အဓိပ္ပာယ် ပြည့်ဝသည့် သဘောတူညီ ချက်တစ်ခု ရယူရန်လည်း တောင်းဆိုခဲ့သည်။

“အဲဒီလိုမှ မဟုတ်ဘူးဆိုရင်တော့ ဆိုးရွားတဲ့အရာတွေ ဖြစ်လာပါလိမ့်မယ်” ဟု အီရန်ကို တိုက်ခိုက်မည်ဟု ထပ်တလဲလဲ ခြိမ်းခြောက်ခဲ့သည့် ထရမ့်က ဝါရှင်တန်တွင် ပြုလုပ်ခဲ့သည့် ငြိမ်းချမ်းရေးဘုတ်အဖွဲ့၏ ပထမဆုံး အစည်းအဝေး၌ ပြောကြားခဲ့သည်။

ထရမ့်သည် ပြီးခဲ့သည့်နှစ် ဇွန်လက အီရန်ကို အမေရိကန်က လေကြောင်း တိုက်ခိုက်ခဲ့သည့် ဖြစ်စဉ်နှင့် ပတ်သက် ပြီး ပြောကြားရာတွင် အီရန်၏ နျူကလီးယား အရှိန်အဟုန်သည် အင်အားချိနဲ့သွားခဲ့ကြောင်း၊ မိမိတို့ အနေဖြင့် နောက်ထပ် ခြေလှမ်းတစ်လှမ်း ဆက်လှမ်းရန် လိုအပ်လိမ့်မည်ဖြစ်ကြောင်း၊ သို့သော် လိုအပ်ချင်မှလည်း လိုအပ် မည်ဖြစ်ကြောင်း ပြောကြားခဲ့သည်။

“နောက်ထပ် ၁၀ ရက်လောက်အတွင်းမှာ ခင်ဗျားတို့ သိရမှာပါ။ ဒါက လုံလောက်တဲ့ အချိန်လို့ ထင်ပါတယ်။ ၁၀ ရက်၊ ၁၅ ရက်က အများဆုံးပေးနိုင်တဲ့ အချိန်ပါပဲ”ဟု ထရမ့်က Air Force One လေယာဉ်ပေါ်တွင် သတင်း ထောက်များကို ပြောကြားခဲ့သည်။

အီရန်နိုင်ငံခြားရေးဝန်ကြီးနဲ့ ကိုယ်စားလှယ်အဖွဲ့ကို တွေ့ရစဉ်

သို့သော် ထရမ့်က အသေးစိတ် ပြောကြားခဲ့ခြင်းမရှိဘဲ ဆိုးရွားသည့် အရာများ အမှန်တကယ် ဖြစ်လာလိမ့်မည်ဟု သတိပေးခဲ့သလို အီရန်အနေဖြင့် တစ်နည်းနည်းဖြင့် သဘောတူညီမှု ရယူလိမ့်မည်ဟုလည်း ပြောကြားခဲ့သည်။

အီရန်က ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (Antonio Guterres) ထံ ပေးပို့သည့် စာတစ်စောင်တွင် အီရန်အနေဖြင့် မည်သည့် စစ်ပွဲကိုမှ စတင်မည် မဟုတ်ကြောင်း၊ သို့သော် စစ်ရေးအရ တိုက်ခိုက်ခံရသည့် အချိန်တွင် မိမိကိုယ်ကိုယ် ကာကွယ်ပိုင်ခွင့်ကို ကျင့်သုံးပြီး ပြတ်သားစွာနှင့် သင့်တော်သလို တုန့်ပြန်သွားမည်ဖြစ်ကြောင်း ပြောကြားခဲ့သည်။

“ဒေသတွင်းမှာရှိတဲ့ ရန်လိုတဲ့ အင်အားစုတွေရဲ့ အခြေစိုက်စခန်းတွေ၊ အဆောက်အအုံတွေနဲ့ ပိုင်ဆိုင်မှု အားလုံး ဟာ တရားဝင်မှုရှိတဲ့ ပစ်မှတ်တွေ ဖြစ်လာပါလိမ့်မယ်။ ခန့်မှန်းရခက်ပြီး ထိန်းချုပ်လို့ မရတဲ့ နောက်ဆက်တွဲ အကျိုးဆက်တွေ အားလုံးအတွက်မဆို အမေရိကန်မှာ အပြည့်အဝ တာဝန်ရှိပါတယ်” ဟုလည်း အီရန်က သတိ ပေးခဲ့သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၂၁

အမေရိကန်သမ္မတ ဒေါ်နယ်ထရမ့် (Donald Trump)က ၎င်း၏ ငြိမ်းချမ်းရေးဘုတ်အဖွဲ့ အဖွင့်အစည်းအဝေး အတွင်း ဂါဇာစစ်ပွဲ ပြီးဆုံးပြီဖြစ်ကြောင်း ကြေညာခဲ့သည်ဟု South China Morning Post မှ ဖော်ပြခဲ့သည်။

ဒေသတွင်း လေ့လာစောင့်ကြည့်သူများကမူ အစ္စရေးသည် လာမည့် သီတင်းပတ်များအတွင်း ဂါဇာ၌ စစ်ဆင် ရေးများကို ပြန်လည် စတင်နိုင်ကြောင်း သုံးသပ်နေချိန်တွင် ထရမ့်ကို ထိုကဲ့သို့ ကြေညာခဲ့ခြင်းဖြစ်သည်။

ဖေဖော်ဝါရီ ၁၉ ရက်က ဝါရှင်တန်တွင် ပြုလုပ်ခဲ့သည့် ငြိမ်းချမ်းရေးဘုတ်အဖွဲ့ အစည်းအဝေးကို နိုင်ငံပေါင်း ၂၀ ကျော်မှ ထိပ်တန်းအရာရှိများ တက်ရောက်ခဲ့ပြီး ဂါဇာဒေသ ပြန်လည်ထူထောင်ရေးအတွက် ကတိကဝတ်များကို ပြောကြားခဲ့ကြသော်လည်း တစ်ဖက်တွင်မူ လက်နက်ဖြုတ်သိမ်းခြင်းကို မလုပ်ဆောင်ပါက စစ်ပွဲများ ပြန်လည် ဖြစ်ပွားလိမ့်မည်ဟု အမေရိကန်က သတိပေးခဲ့သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

အစည်းအဝေး ပြင်ပတွင် အစ္စရေး အရာရှိများကလည်း ထိုသတိပေးချက်ကို ထပ်လောင်း အတည်ပြုခဲ့ပြီး ဟားမတ်စ်အဖွဲ့ကို လက်နက်ဖြုတ်သိမ်းရန် ရက်ပေါင်း ၆၀ အချိန်ပေးခဲ့သည်။

ထို့ပြင် လက်နက်ဖြုတ်သိမ်းခြင်း မလုပ်ဆောင်မီ ဂါဇာပြန်လည် တည်ဆောက်ရေး လုပ်ငန်းများကို စတင်မည် မဟုတ်ကြောင်း အစ္စရေးအရာရှိများက ပြောကြားခဲ့သည်။

လေ့လာစောင့်ကြည့်သူများကမူ ထိုကဲ့သို့ တင်းကျပ်သည့် တားမြစ် ကန့်သတ်ချက်များသည် ဂါဇာဒေသကို စစ်ပွဲ လမ်းကြောင်းပေါ်သို့ ပြန်လည် တွန်းပို့နိုင်သည်ဟု သုံးသပ်ခဲ့ကြသည်။

“ဟားမာ့စ်အဖွဲ့ဟာ လက်နက်တွေကို စွန့်လွှတ်လိမ့်မယ် ယုံကြည်ပါတယ်။ တကယ်လို့ သူတို့ လက်နက် မစွန့်ဘူး ဆိုရင်တော့ ပြင်းထန်တဲ့ တုန့်ပြန်မှုတွေနဲ့ ရင်ဆိုင်ရပါလိမ့်မယ်”ဟု ထရမ့်က ငြိမ်းချမ်းရေးဘုတ်အဖွဲ့ကို တက်ရောက်လာသည့် အဖွဲ့ဝင်များအား ပြောကြားခဲ့သည်။

အမေရိကန်သမ္မတ ဒေါ်နယ်ထရမ့် ငြိမ်းချမ်းရေးဘုတ်အဖွဲ့ အစည်းအဝေးကျင်းပနေစဉ် 

မည်သို့ပင်ဆိုစေ ဂါဇာအတွင်းရှိ အစ္စရေးသုံ့ပန်းများ၏ ရုပ်အလောင်း အားလုံးကို ရှာဖွေဖော်ထုတ်ပြီး ပြန်လည် လွှဲပြောင်းပေးခဲ့သည့်အတွက် ဟားမာ့စ်အဖွဲ့၏ လုပ်ဆောင်ချက်ကို အသိအမှတ် ပြုသင့်သည်ဟု ၎င်းက ဆိုသည်။

အမေရိကန်နိုင်ငံခြားရေးဝန်ကြီး မာကို ရူဘီယို (Marco Rubio) ကလည်း ဂါဇာဒေသအတွက် ထရမ့်၏ အစီအစဉ် မှလွဲပြီး အခြားရွေးချယ်စရာ မရှိကြောင်း သတိပေး ပြောကြားခဲ့သည်။

“ဂါဇာအတွက် အရန်အစီအစဉ် (Plan B) ဆိုတာ မရှိပါဘူး။ Plan B ဆိုတာ စစ်ပွဲဆီ ပြန်သွားတာပါ။  ရှေ့ဆက် သွားမယ့် တစ်ခုတည်းသော လမ်းစဉ်ဖြစ်တဲ့ Plan A ကတော့ ပဋိပက္ခတွေ၊ လူသားချင်း စာနာမှုဆိုင်ရာ ဆင်းရဲ ဒုက္ခတွေနဲ့ ပျက်စီးဆုံးရှုံးမှုတွေဆီ ပြန်ရောက်သွားမှာကို ဘယ်သူမှ စိုးရိမ်စရာမလိုဘဲ၊ ခိုင်မြဲပြီး ရေရှည်တည်တံ့တဲ့ ငြိမ်းချမ်းရေး ရရှိအောင် ဂါဇာကို ပြန်လည် တည်ဆောက်သွားမယ့် နည်းလမ်းပဲ ဖြစ်ပါတယ်”ဟု ရူဘီယိုက ငြိမ်းချမ်းရေးဘုတ်အဖွဲ့ (Board of Peace) အစည်းအဝေးတွင် ပြောကြားခဲ့သည်။

Source: South China Morning Post

CNI International News

ကာရာကက်စ်၊ ဖေဖော်ဝါရီ ၂၀

ဗင်နီဇွဲလားယာယီသမ္မတ ဒယ်လ်စီ ရိုဒရီဂွက်ဇ် (Delcy Rodriguez) က ကိုလံဘီယာသမ္မတ ဂူစတာဗို ပက်ထရို (Gustavo Petro) နှင့် လုံခြုံရေးဆိုင်ရာ ကိစ္စရပ်များအပြင် စီးပွားရေးနှင့် စွမ်းအင်ဆိုင်ရာ ကိစ္စရပ်များကို ဆွေးနွေး ရန် မကြာမီတွေ့ဆုံရန် သဘောတူညီခဲ့ကြောင်း ပြောကြားခဲ့သည်ဟု အယ်ဂျာဇီးယားမှ ဖော်ပြခဲ့သည်။

“ကျမတို့ ပြည်သူတွေရဲ့ သာယာဝပြောရေးအတွက် နားလည်မှုရှိတဲ့ ဆက်ဆံရေးနဲ့ အပြန်အလှန် အကျိုးဖြစ်ထွန်း မှုတွေကို ဆက်လက် မြှင့်တင်သွားမှာ ဖြစ်ပါတယ်”ဟု ရိုဒရီဂွက်ဇ်က ဖေဖော်ဝါရီ ၁၈ ရက်တွင် ၎င်း၏ Instagram မှတဆင့် ပြောကြားခဲ့သည်။

ဗင်နီဇွဲလားနှင့် နယ်နိမိတ်ချင်း ထိစပ်နေသည့် ကိုလံဘီယာနိုင်ငံ မြောက်ဘက်စွန်းရှိ လာဂွာဂျီရာ (La Guajira) ဒေသတွင် ပြောကြားသည့် မိန့်ခွန်းအတွင်း ကိုလံဘီယာသမ္မတ ပက်ထရိုက စွမ်းအင်ကဏ္ဍ ပူးပေါင်းဆောင်ရွက် မှုနှင့် အခြေခံ အဆောက်အအုံ စီမံကိန်းများကို ဆွေးနွေးရန် နှစ်နိုင်ငံ နယ်စပ်မြို့ဖြစ်သော ကူကူတာ (Cucuta) ၌ တွေ့ဆုံရန် ရိုဒရီဂွက်ဇ်ကို ဖိတ်ကြားထားသည်ဟု ဆိုသည်။

တွေ့ဆုံမည့် အချိန် အတိအကျနှင့် ပတ်သက်ပြီး ၎င်းက အသေးစိတ် ထုတ်ဖော်ပြောဆိုခြင်း မရှိပေ။

ကိုလံဘီယာနှင့် ဗင်နီဇွဲလားနိုင်ငံတို့သည် ကီလိုမီတာ ၂၂၀၀ (မိုင် ၁၃၇၀) ကျော် ရှည်လျားသည့် နယ်နိမိတ်ချင်း ထိစပ်နေပြီး ထိုနယ်စပ်သည် နှစ်နိုင်ငံကြား မကြာခဏ ဆိုသကဲ့သို့ ထိလွယ်ရှလွယ်ရှိသည့် ဆက်ဆံရေးတွင် အဓိကအခန်းကဏ္ဍမှ ပါဝင်နေသည်။

မကြာသေးမီ နှစ်များအတွင်း ကိုလံဘီယာနိုင်ငံအတွင်းသို့ ဗင်နီဇွဲလား ရွှေ့ပြောင်း နေထိုင်သူများနှင့် ဒုက္ခသည် ၃ သန်းနီးပါး ရောက်ရှိလာမှုနှင့်အတူ နှစ်နိုင်ငံ ဆက်ဆံရေးမှာ ပိုမိုရှုပ်ထွေးလာခဲ့သည်။

ဗင်နီဇွဲလားယာယီသမ္မတ ဒယ်လ်စီ ရိုဒရီဂွက်ဇ်နဲ့ ကိုလံဘီယာသမ္မတ ဂူစတာဗို ပက်ထရိုကို တွေ့ရစဉ်

ယခုကြေညာချက်သည် ဗင်နီဇွဲလား ခေါင်းဆောင်ဟောင်း နီကိုလပ်စ် မာဒူရို (Nicolas Maduro)ရာထူးမှ ဖယ်ရှား ခံရပြီးနောက် ဗင်နီဇွဲလား အစိုးရသစ်အတွက် အိမ်နီးချင်း နိုင်ငံများနှင့် ဆက်ဆံရေးများကို ထိန်းညှိဆောင်ရွက် နေချိန်တွင် ထွက်ပေါ်လာခြင်းဖြစ်သည်။

ဇန်နဝါရီ ၃ ရက်က အမေရိကန်သည် ဗင်နီဇွဲလားကို ဝင်ရောက် တိုက်ခိုက်ခဲ့ပြီး မာဒူရိုနှင့် ၎င်း၏ဇနီး စီလီယာ ဖလောရက်စ် ( Cilia Flores )တို့ကို ဖမ်းဆီးခေါ်ဆောင်သွားခဲ့သည်။

ထို့နောက် ရက်အနည်းငယ်အကြာတွင် ဗင်နီဇွဲလား တရားရုံးချုပ်က ရိုဒရီဂွက်ဇ်ကို ယာယီသမ္မတအဖြစ် ခန့်အပ်ခဲ့ သည်။

ရိုဒရီဂွက်ဇ်သည် ဗင်နီဇွဲလားစစ်တပ်၊ အာဏာရပါတီနှင့် အမေရိကန်အစိုးရတို့၏ ထောက်ခံမှုဖြင့် ဇန်နဝါရီ ၅ ရက် နေ့တွင် ယာယီသမ္မတအဖြစ် ကျမ်းသစ္စာဆိုခဲ့သည်။

သို့သော် နိုင်ငံတကာ အဖွဲ့အစည်းများနှင့် ဗင်နီဇွဲလား အတိုက်အခံများကမူ ရွေးကောက်ပွဲဖြင့် ရရှိထားသည့် အာဏာ မဟုတ်ခြင်းကြောင့် ရိုဒရီဂွက်ဇ်၏ တရားဝင်မှုကို မေးခွန်းထုတ်နေကြသည်။

Source: အယ်ဂျာဇီးယား

CNI International News

ပြုံယမ်း၊ ဖေဖော်ဝါရီ ၂၀

မြောက်ကိုရီးယားခေါင်းဆောင် ကင်မ်ဂျုံအန် ( Kim Jong Un) သည် နျူကလီးယားထိပ်ဖူးများ တပ်ဆင် ပစ်ခတ် နိုင်သည့် အလွန်ကြီးမားသော ဒုံးပစ်လောင်ချာများ ထုတ်ဖော်ပြသသည့် အခမ်းအနားကို တက်ရောက်ခဲ့ကြောင်း DW သတင်းတွင် ဖော်ပြခဲ့သည်။

ထိုအခမ်းအနားတွင် ပြသခဲ့သည့် ၆၀၀ မမ ဒုံးပစ်လောင်ချာစနစ်သည် ထူးခြားဆန်းသစ်ပြီး အထူးတိုက်ခိုက်မှုများ သို့မဟုတ် မဟာဗျူဟာမြောက် တာဝန်များကို ထမ်းဆောင်ရန်အတွက် သင့်လျော်သည်ဟု ကင်မ်က ပြောကြား ခဲ့ကြောင်း KCNA က ဖေဖော်ဝါရီ ၁၉ ရက်တွင် ဖော်ပြခဲ့သည်။

မဟာဗျူဟာမြောက် တာဝန်ဆိုသည့် အသုံးအနှုန်းမှာ မြောက်ကိုရီးယားက နျူကလီးယား လက်နက်များကို ရည်ညွှန်းရာတွင် အသုံးပြုလေ့ရှိသည့် စကားလုံးဖြစ်သည်။

ထိုလောင်ချာများသည် ရန်သူများအတွက် အဟန့်အတား တစ်ခုဖြစ်စေရန် ရည်ရွယ်သည်ဟု ပြောကြားခဲ့သော် လည်း ၎င်း၏ အဓိက ပြိုင်ဘက်များဖြစ်သော တောင်ကိုရီးယားနှင့် အမေရိကန်တို့ကို အမည်တပ်ပြီး ထည့်သွင်း ပြောကြားခြင်း မရှိပေ။

တောင်နှင့်မြောက် ကိုရီးယားနှစ်နိုင်ငံသည် ၁၉၅၀ ပြည့်နှစ်မှ ၁၉၅၃ ခုနှစ်အထိ စစ်ပွဲဖြစ်ပွားခဲ့ကာ စစ်ရပ်ဆိုင်းရေး စာချုပ် ချုပ်ဆိုထားသော်လည်း ငြိမ်းချမ်းရေးစာချုပ် မဟုတ်သဖြင့် လက်ရှိတွင် သဘောတရားအရ စစ်ပွဲဖြစ်ပွား နေဆဲ အခြေအနေတွင် ရှိနေသည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

တောင်ကိုရီးယားနိုင်ငံ၏ ဆိုးလ်မြို့တော်သည် မြောက်ကိုရီးယားနယ်စပ်မှ ကီလိုမီတာ ၅၀ (မိုင် ၃၀) အကွာအဝေး အတွင်းတွင် တည်ရှိသည်။

“ဒီလက်နက်ကို အမှန်တကယ် အသုံးပြုတဲ့အခါ ဘယ်အင်အားစုကမှ ဘုရားသခင်ရဲ့ ကာကွယ်မှုကိုမှ မျှော်လင့်နိုင် တော့မှာ မဟုတ်ဘူး။ ဒါဟာ တကယ်ကို အံ့ဩစရာကောင်းပြီး ဆွဲဆောင်မှုရှိတဲ့ လက်နက်တစ်ခုပါပဲ”ဟု ကင်မ်က ပြောကြားခဲ့ကြောင်း KCNA က ဖော်ပြခဲ့သည်။

မြောက်ကိုရီးယားသည် ၎င်း၏ နျူကလီးယား လက်နက်အင်အားကို မြှင့်တင်ခြင်း၊ ဒုံးကျည်နည်းပညာများကို စမ်းသပ်ခြင်းတို့ကို နှစ်ပေါင်းများစွာကြာ လုပ်ဆောင်လာခဲ့သည်။

ယခုကဲ့သို့ လက်နက်စနစ်များကို အာဏာရ အလုပ်သမားပါတီ၏ ၉ ကြိမ်မြောက် ညီလာခံ မတိုင်မီ ထုတ်ဖော်ပြသ ခြင်းဖြစ်ပြီး ထိုလက်နက်များသည် ညီလာခံကို လက်ဆောင်အဖြစ် ပေးအပ်ခြင်းဖြစ်ကြောင်း ကင်မ်က ပြောကြား ခဲ့သည်။

မြောက်ကိုရီးယား၏ အလုပ်သမားပါတီ အစည်းအဝေးတွင် လာမည့် ၅ နှစ်အတွင်း အကောင်အထည်ဖော်မည့် ကင်မ်၏ စီးပွားရေးနှင့် စစ်ရေးဆိုင်ရာ ရည်မှန်းချက်များကို အဓိကထား ဆွေးနွေးမည်ဖြစ်ပြီး ထိုညီလာခံကို ယခုလကုန်ပိုင်း၌ ကျင်းပဖွယ်ရှိသည်။

Source: DW

CNI International News

ဘန်ကောက်၊ ဖေဖော်ဝါရီ ၂၀

မြန်မာနိုင်ငံတွင် ငြိမ်းချမ်းရေးရရှိစေရန် နယ်စပ်ဒေသတစ်လျှောက်ရှိ မြန်မာတိုင်းရင်းသား လက်နက်ကိုင် အဖွဲ့အစည်းများနှင့် ဒေသန္တရအဆင့် ထိတွေ့ဆက်ဆံမှုများကို ကူညီဆောင်ရွက်ပေးရန် တောင်းဆိုလာမည် ဆိုပါက ထိုင်းနိုင်ငံက ကူညီပေးရန် အသင့်ရှိနေကြောင်း ထိုင်းနိုင်ငံခြားရေးဝန်ကြီး သီဟဆက် ဖူအန်ကက်ကော (Sihasak Phuangketkaew) က ဖေဖော်ဝါရီ ၁၈ ရက်တွင် ပြောကြားခဲ့သည်ဟု Thai PBS World မှ ဖော်ပြခဲ့ သည်။

မြန်မာနိုင်ငံတွင် ပြည်တွင်းရေး သင့်မြတ်မှု ရရှိမှသာ ငြိမ်းချမ်းရေး ရရှိမည်ဖြစ်သဖြင့် နှစ်ဖက် အဖွဲ့အစည်းများကို ဆွေးနွေးမှုများ ပြုလုပ်ရန် မိမိတို့အနေဖြင့် တိုက်တွန်းမည် မဟုတ်ဘဲ ပြည်တွင်းရေး ဆွေးနွေးညှိနှိုင်းမှုများကို စတင်ရန်မှာ မြန်မာနိုင်ငံအပေါ်တွင်သာ မူတည်ကြောင်း သီဟဆက်က ပြောသည်။

“ကျနော်တို့ တတ်နိုင်တဲ့ နည်းလမ်းတွေနဲ့ ကူညီပေးဖို့ ဆန္ဒရှိပါတယ်။ အထူးသဖြင့် ဆွေးနွေးမှုတွေ ဖြစ်လာအောင် ပံ့ပိုးပေးဖို့ပါ။ ဒါပေမဲ့ ဘာတွေ ဆွေးနွေးရမယ်ဆိုတာကိုတော့ ကျနော်တို့က ဝင်ရောက်စွက်ဖက်မှာ မဟုတ်ပါဘူး။ နောက်ဆုံးမှာတော့ ငြိမ်းချမ်းရေးဆွေးနွေးပွဲတွေဟာ မြန်မာနိုင်ငံအတွင်းကပဲ ထွက်ပေါ်လာရမှာ ဖြစ်ပါတယ်" ဟု သီဟဆက်က ပြောကြားခဲ့သည်။

မြန်မာနိုင်ငံခြားရေးဝန်ကြီး ဦးသန်းဆွေနဲ့ ထိုင်းနိုင်ငံခြားရေးဝန်ကြီး သီဟဆက် ဖူအန်ကက်ကောကို တွေ့ရစဉ်

သီဟဆက်သည် ဖူးခက် (Phuket) မြို့၌ မြန်မာနိုင်ငံခြားရေးဝန်ကြီး ဦးသန်းဆွေနှင့် အလွတ်သဘော ဆွေးနွေးပွဲ ပြုလုပ်ခဲ့ပြီးနောက် ယခုကဲ့သို့ ပြောကြားခဲ့ခြင်း ဖြစ်သည်။

မြန်မာနိုင်ငံတွင် မကြာသေးမီက ကျင်းပခဲ့သော ရွေးကောက်ပွဲများသည် အဆင်ပြေ ချောမွေ့စွာ ပြီးမြောက်ခဲ့ပြီး သင်္ကြန်ကာလမတိုင်မီ အစိုးရသစ်တစ်ရပ် ဖွဲ့စည်းနိုင်မည်ဟု မျှော်လင့်ရကြောင်း ဦးသန်းဆွေက ပြောကြားခဲ့ သည်ဟု သီဟဆက်က ဆိုသည်။

မြန်မာနိုင်ငံသည် လက်ရှိတွင် အစိုးရသစ် ဖွဲ့စည်းရန် လုပ်ဆောင်နေပြီး အစိုးရဖွဲ့ပြီးနောက် လွှတ်တော် ခေါ်ယူ ခြင်းနှင့် နိုင်ငံတော်သမ္မတ၊ ဝန်ကြီးချုပ်၊ တပ်မတော်ကာကွယ်ရေးဦးစီးချုပ်တို့ကဲ့သို့ အဓိက ရာထူးနေရာများကို ခန့်အပ်ခြင်းများ ဆက်လက် လုပ်ဆောင်သွားမည်ဖြစ်ကြောင်း၊ ထို့ပြင် လုပ်ပိုင်ခွင့် အာဏာများကို ပိုမိုခွဲဝေ အပ် နှင်းသွားမည်ဖြစ်ကြောင်း သီဟဆက်က ပြောကြားခဲ့သည်။

နောက်တက်လာမည့် မြန်မာအစိုးရသစ် အနေဖြင့် တည်ငြိမ်မှုကို ပြန်လည် ဖော်ဆောင်ရန်နှင့် အမျိုးသား ပြန်လည်သင့်မြတ်ရေးကို လုပ်ဆောင်ရန် ရည်မှန်းထားပြီး တိုင်းရင်းသား လက်နက်ကိုင် အဖွဲ့အစည်းများနှင့် ဒီမိုကရေစီလိုလားသော အင်အားစုများ အပါအဝင် အတိုက်အခံ အဖွဲ့အစည်းများနှင့် ဆွေးနွေးရန် လမ်းဖွင့်ထား ကြောင်း ၎င်းက ဆိုသည်။

မြန်မာနိုင်ငံခြားရေးဝန်ကြီး ဦးသန်းဆွေနဲ့ ထိုင်းနိုင်ငံခြားရေးဝန်ကြီး သီဟဆက် ဖူအန်ကက်ကောကို တွေ့ရစဉ်

မြန်မာနိုင်ငံတွင် ရေရှည်တည်တံ့သော ငြိမ်းချမ်းရေးနှင့် တည်ငြိမ်မှု ရှိလာသည်ကို ထိုင်းနိုင်ငံအနေဖြင့် မြင်တွေ့ လိုကြောင်း၊ ထိုအခြေအနေသည် ထိုင်းနိုင်ငံ၏ အမျိုးသားလုံခြုံရေးသာမက နှစ်နိုင်ငံ စီးပွားရေး ပူးပေါင်း ဆောင် ရွက်မှုများအတွက်ပါ အကျိုးရှိစေမည် ဖြစ်ကြောင်း ၎င်းက ဆိုသည်။

ထို့ပြင် မြန်မာနိုင်ငံကို အာဆီယံနှင့် ပြန်လည်ထိတွေ့ ဆက်ဆံနိုင်ရန်အတွက် ထိုင်းနိုင်ငံက ပေါင်းကူးတံတား အဖြစ် ဆောင်ရွက်ပေးရန် အသင့်ရှိကြောင်း၊ သို့သော် မြန်မာနိုင်ငံ အနေဖြင့် ၎င်း၏ တုန့်ပြန်ဆောင်ရွက်မှုများကို အာဆီယံနှင့် နိုင်ငံတကာ အသိုင်းအဝိုင်းကို ချပြရန်လိုအပ်ကြောင်း သီဟဆက်က ပြောကြားခဲ့သည်။

ထိုင်းနိုင်ငံ၏ မူဝါဒသည် အာဆီယံ၏ မြန်မာ့အရေး ဘုံသဘောတူညီချက် ၅ ရပ်နှင့်အညီ အာဆီယံနှင့် မြန်မာနိုင်ငံ အကြား တိုက်ရိုက် ထိတွေ့ဆက်ဆံမှုများကို ပြန်လည် အသက်သွင်းရန် ဖြစ်ကြောင်းလည်း ၎င်းက ထပ်လောင်း ပြောကြားခဲ့သည်။

Source: Thai PBS World

CNI International News

ဝါရှင်တန်၊ ဖေဖော်ဝါရီ ၂၀

နိုက်ဂျီးရီးယားတွင် ခရစ်ယာန်ဘာသာဝင်များ အသတ်ခံနေရသဖြင့် စစ်ရေးအရ ဝင်ရောက်မည်ဟု အမေရိကန် သမ္မတ ဒေါ်နယ်ထရမ့် (Donald Trump)က ပြီးခဲ့သည့်နှစ် နိုဝင်ဘာလတွင် ခြိမ်းခြောက်ခဲ့သော်လည်း လက်ရှိတွင် အမေရိကန်နှင့် နိုက်ဂျီးရီးယားကြား စစ်ရေးအရ ပူးပေါင်းဆောင်ရွက်မှုများ ပိုမိုခိုင်မာလာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

နိုက်ဂျီးရီးယားတွင် ခရစ်ယာန်ဘာသာဝင်များ သတ်ဖြတ်ခံနေရသဖြင့် အမေရိကန် ကာကွယ်ရေးဝန်ကြီးဌာနက လက်နက်အင်အား အပြည့်အစုံဖြင့် ဝင်ရောက်ရန် ပြင်ဆင်နေသည်ဆိုသည့် ထရမ့်၏ လူမှုမီဒီယာ၌ တင်ခဲ့သည့် ပို့စ်ကြောင့် နိုက်ဂျီးရီးယားမှာ စိုးရိမ်မှုများ မြင့်တက်ခဲ့သည်။

နိုက်ဂျီးရီးယားသမ္မတ ဘိုလာ အာမက် တင်နူဘူ (Bola Ahmed Tinubu) ဦးဆောင်သော နိုင်ဂျီးရီးယားအစိုးရကမူ ထရမ့်၏ စွပ်စွဲချက်များကို ချက်ချင်းငြင်းဆိုခဲ့ပြီး မိမိတို့နိုင်ငံသည် လက်နက်ကိုင်အဖွဲ့များနှင့် ဓားပြအုပ်စုများ ကြောင့် လုံခြုံရေးဆိုင်ရာ စိန်ခေါ်မှုများနှင့် ရင်ဆိုင်နေရသော်လည်း ခရစ်ယာန်များကို သီးသန့် ပစ်မှတ်ထားနေ သည် ဆိုခြင်းမှာ မမှန်ကန်ကြောင်း၊ ခရစ်ယာန်များသာမက မွတ်ဆလင် လူ့အဖွဲ့အစည်းများနှင့် ရိုးရာယုံကြည် ကိုးကွယ်သူများမှာလည်း တိုက်ခိုက်ခံနေရကြောင်း ပြောကြားခဲ့သည်။

 အမေရိကန်နဲ့ နိုက်ဂျီးရီးယား ကိုယ်စားလှယ်ကို တွေ့ရစဉ်

သို့သော် ထရမ့် အစိုးရကမူ ကျေနပ်ခြင်းမရှိခဲ့ဘဲ နိုက်ဂျီးရီးယားနိုင်ငံကို ဘာသာရေး လွတ်လပ်ခွင့်နှင့် ပတ်သက် သည့် အထူးစိုးရိမ်ရသည့် နိုင်ငံများ (CPC) စာရင်းထဲသို့ ထည့်သွင်းခဲ့သည်။

ထို့ပြင် ခရစ်ယာန်များကို အကာအကွယ်ပေးရန် ပျက်ကွက်မှုအတွက် နိုက်ဂျီးရီးယား အစိုးရအပေါ် စီးပွားရေး ပိတ်ဆို့မှုများ၊ ဘဏ္ဍာရေး အကူအညီ ဖြတ်တောက်မှုများနှင့် အရေးယူမှုများ ပြုလုပ်မည်ဟု ထရမ့်က ဆက်လက် ခြိမ်းခြောက်ခဲ့သည်။

ထို့နောက် တင်နူဘူ အစိုးရသည် ထရမ့်ကို ရန်လိုသော စကားလုံးများဖြင့် ပြန်လည် တုံ့ပြန်ခဲ့ခြင်းမရှိဘဲ နိုက်ဂျီးရီးယားအစိုးရ အဆက်ဆက်အတွက် ဆူးညှောင့်ခလုပ်သဖွယ် ဖြစ်နေသည့် လုံခြုံရေးဆိုင်ရာ စိန်ခေါ်မှုများ ကို ဖြေရှင်းရာတွင် အမေရိကန်၏ အကူအညီအား ကြိုဆိုမည်ဟု ပြောကြားကာ လေသံကို ပြောင်းလဲခဲ့သည်။

နိုက်ဂျီးရီးယား အစိုးရဘက်က လေသံကို လျှော့ခဲ့ပြီးနောက် ဒီဇင်ဘာလ ၂၅ ရက် ညအချိန်တွင် အမေရိကန်သည် နိုက်ဂျီးရီးယား အနောက်မြောက်ပိုင်းအား ပြင်းထန်စွာ တိုက်ခိုက်ခဲ့ကြောင်း ထရမ့်က ပြောကြားခဲ့သည်။

သို့သော် အမေရိကန်၏ အာဖရိကစစ်ဌာနချုပ် (AFRICOM) ကမူ ထိုတိုက်ခိုက်မှုများသည် နိုက်ဂျီးရီးယား အာဏာ ပိုင်များ၏ မေတ္တာရပ်ခံချက်အရ ဆောင်ရွက်ခဲ့ခြင်းဖြစ်ကြောင်း ရှင်းလင်းပြောကြားခဲ့သည်။

နိုက်ဂျီးရီးယားသမ္မတကို သတင်းစာမှာ တွေ့ရစဉ်

အမေရိကန်နှင့် နိုက်ဂျီးရီးယားတို့အကြား ထိုကဲ့သို့ စစ်ရေးအရ ပူးပေါင်းဆောင်ရွက်မှုသည် ပိုမိုခိုင်မာ လာဖွယ်ရှိပြီး ယခု သီတင်းပတ်တွင် လက်နက်ကိုင်အဖွဲ့များကို တိုက်ခိုက်ရာတွင် နိုင်ဂျီးရီးယားစစ်သားများကို စစ်ပညာများ လေ့ကျင့် သင်တန်းပေးရန် အမေရိကန် စစ်ဘက်ဆိုင်ရာဝန်ထမ်း ၁၀၀ ခန့်သည် နိုင်ဂျီးရီးယားနိုင်ငံသို့ ရောက်ရှိ လာခဲ့သည်။

အမေရိကန် တပ်ဖွဲ့ဝင်များသည် နည်းပညာပိုင်းဆိုင်ရာ ပံ့ပိုးမှုနှင့် ထောက်လှမ်းရေးသတင်း အချက်အလက်များ မျှဝေမှုတို့တွင် ကူညီပေးမည်ဖြစ်ကြောင်း နိုက်ဂျီးရီးယား ကာကွယ်ရေးဝန်ကြီးဌာနက ထုတ်ပြန်ခဲ့သည်။

အမေရိကန်စစ်သားများသည် တိုက်ရိုက် တိုက်ခိုက်ရေး မစ်ရှင်များတွင် ပါဝင်မည် မဟုတ်သော်လည်း အကြမ်း ဖက်အဖွဲ့များကို ပစ်မှတ်ထား ချေမှုန်းရာတွင် ကူညီပေးသွားမည်ဖြစ်ကြောင်း ထုတ်ပြန်ချက်တွင် ဖော်ပြခဲ့သည်။

Source: အယ်လ်ဂျာဇီးယား

CNI International News

တီဟီရန်၊ ဖေဖော်ဝါရီ ၁၉

ပါရှန်းပင်လယ်ကွေ့၏ ကျဉ်းမြောင်းသည့် ဝင်ပေါက်နေရာ တစ်ခုဖြစ်သည့် ဟော်မုဇ်ရေလက်ကြား (Strait of Hormuz) ၏ အချို့နေရာများကို ယာယီပိတ်ထားကြောင်း အီရန်က ပြောကြားခဲ့သည်ဟု အေပီမှ ဖော်ပြခဲ့သည်။

ကမ္ဘာပေါ်တွင် ရေနံတင်သင်္ဘောများ ဖြတ်သန်းမှု စုစုပေါင်း၏ ၂၀ ရာခိုင်နှုန်းရှိသည့် ထိုရေလက်ကြားတွင် အီရန် က ကျည်အစစ်များ အသုံးပြုပြီး စစ်ရေးလေ့ကျင့်မှုများ ပြုလုပ်နေကြောင်း အီရန်သတင်းအေဂျင်စီများမှ ဖော်ပြခဲ့ ပြီးနောက် အီရန်က ဟော်မုဇ်ရေလက်ကြား၏ အချို့နေရာများကို ပိတ်ခဲ့ခြင်းဖြစ်သည်။

ထိုကဲ့သို့ ဟော်မုဇ်ရေလက်ကြားကို ပိတ်ထားမှုသည် ရှားပါးဖြစ်စဉ် တစ်ခုဖြစ်ပြီး အမေရိကန်က အီရန်အား တိုက်ခိုက်ခဲ့မည်ဆိုပါက အီရန်သည် ဟော်မုဇ်ရေလက်ကြားကိုပိတ်ကာ ကမ္ဘာ့စီးပွားရေးကို ထိခိုက်အောင် လုပ်နိုင်ခြေရှိသည့် သတိပေးချက်တစ်ခုဖြစ်သည်။

အတိတ်ကာလများက တင်းမာမှုများနှင့် ပဋိပက္ခများတွင် အီရန်သည် ဟော်မုဇ်ရေလက်ကြားကို ဖြတ်သန်းသည့် သင်္ဘောများကို နှောင့်ယှက်သည့် ဖြစ်စဉ်များ ရှိခဲ့သည်။

၁၉၈၀ ပြည့်နှစ်ကျော် ကာလများက အီရန်-အီရတ် စစ်ပွဲအတွင်း နှစ်နိုင်ငံစလုံးသည် ဟော်မုဇ်ရေလက်ကြားရှိ ရေနံတင် သင်္ဘောများနှင့် အခြားသင်္ဘောများကို ရေမြှုပ်မိုင်းများ အသုံးပြုပြီး တိုက်ခိုက်ခဲ့ကာ ကုန်သွယ်ရေး လမ်းကြောင်များကို အလုံးစုံရပ်တန့်စေရန် လုပ်ဆောင်ခဲ့သည်။

အီရန်လုံခြုံရေးတပ်ဖွဲ့ကို တွေ့ရစဉ်

သို့သော် ၁၉၈၀ ပြည့်နှစ်ကျော် ကာလများ နောက်ပိုင်းတွင် အီရန်သည် ဟော်မုဇ်ရေလက်ကြားကို ပိတ်ပစ်မည်ဟု ခြိမ်းခြောက်မှုများ ပြုလုပ်ခဲ့သည့်တိုင် လက်တွေ့တွင်မူ ပိတ်ခဲ့ခြင်းမရှိပေ။

ပြီးခဲ့သည့်နှစ်က အစ္စရေးနှင့်ဖြစ်ပွားခဲ့သည့် ၁၂ ရက်ကြာ စစ်ပွဲအတွင်း အမေရိကန်က အီရန်၏ နျူကလီးယား စက်ရုံများကို ဗုံးကြဲ တိုက်ခိုက်ခဲ့သည့်တိုင် အီရန်သည် ဟော်မုဇ်ရေလက်ကြားကို ပိတ်ခဲ့ခြင်းမရှိပေ။

အီရန်အနေဖြင့် ယခုအကြိမ်တွင် ဟော်မုဇ်ရေလက်ကြားကို မည်မျှကြာ ပိတ်ထားမည် ဆိုခြင်းနှင့် ထိုကဲ့သို့ ပိတ်ထားမှုကြောင့် ဖြစ်ပေါ်လာနိုင်သည့် နောက်ဆက်တွဲ ရလဒ်များအား ရှင်းလင်းစွာ မသိရသေးပေ။

အမေရိကန် ဗဟိုစစ်ဌာနချုပ်ကလည်း အီရန်၏ စစ်ရေးလေ့ကျင့်မှုနှင့် ဟော်မုဇ်ရေလက်ကြားကို ပိတ်ထားမှု တို့နှင့်ပတ်သက်ပြီး ချက်ချင်း မှတ်ချက်ပေးခဲ့ခြင်းမရှိပေ။

Source: အေပီ